10 – Papatisoga

Sa soona nunumi le lalolagi ma ua gaogao, sa ufitia foi le moana i le pouliuli; na fegaoioiai foi le Agaga o le Atua i le fogātai.

O lenei, ia outou peritomeina le pa‘u o outou loto, aua ne‘i toe maaa o outou ua.

Ia e matuā fufulu mai ia te au i la‘u amio leaga, ma ia e faamamā mai ia te au i la‘u agasala.

Ia e faamamā ia te au i le isopo, ona mamā ai lea o a‘u; ia e fufulu mai ia te au, ona sinasina ai lea o a‘u e sili i lo le kiona.

Ina fafano ia outou, ina faamamā ia outou; faate‘a ese ia a outou galuega leaga i o‘u luma, soia tou te fai mea leaga.

Ierusalema e, ina fufulu ia lou loto ai le leaga, ina ia faaolaina oe; pe tumau seia afea ou mafaufauga leaga i totonu ia te oe?

Ona ou sausauina lea o outou i le vai manino, ona mamā ai lea o outou; ou te faamamāina foi outou i lo outou leaga uma, ma a outou tupua uma. Ou te avatu foi ia te outou le loto fou, ma ou tuu i totonu ia te outou le agaga fou; ou te aveesea le loto maaa ai o outou tino, ma ou avatu ia te outou le loto aano. Ou te tuuina atu lo‘u Agaga i totonu ia te outou, tou te savavali ai i a‘u tulafono, tou te anaana foi i a‘u faamasinoga, ma outou faia.

Ona o atu ai lea ia te ia o Ierusalema, ma Iutaia uma, atoa ma le itu uma o Ioritana; ua papatisoina foi i latou i Ioritana e ia, ua faaali atu e i latou a latou agasala. Ua na iloa atu le au faresaio ma le au satukaio e toatele ua o mai i lana papatisoga, ona ia faapea atu ai lea ia te i latou, Fanau a gata feai e, o ai ea ua na faaali atu ia te outou ia sosola ese i le toasa atali? Ia outou fua mai ni fua e tatau ma le salamo;

O loo tuu nei foi le mătau i tafu‘e o laau; o laau uma foi e le fua mai i fua lelei, e taia ma lafoina i le afi. O a‘u nei, ou te papatiso atu ia te outou i le vai ina ia salamo; a e peitai o lē mulimuli mai e silisili o ia ia te au, e le aoga a‘u ona tauave i ona see vae; o ia lea na te papatisoina atu ia te outou i le Agaga Paia ma le afi. O i lona aao lana asu, na te faamamāina ai lana faaputugāsaito; na te faapotopotoina foi ana saito i le fale saito, a e susunuina le otaota o saito i le afi e le matineia.

Ona maliu atu ai lea o Iesu mai Kalilaia i Ioritana ia Ioane, ia papatisoina ai e ia. A ua vavao e Ioane ia te ia, ua faapea mai, E ao ona e papatisoina mai o a‘u, a ē maliu mai ea oe ia te au? A ua tali atu Iesu, ua faapea atu ia te ia, Tuu mai nei pea ia; auā e faapea ona tatau ia te i tatou ona faataunuuina o mea tonu uma. Ona tuu mai lea ia te ia. Ua papatisoina Iesu, ona maliu ae loa lea o ia nai le vai, faauta foi, ua faaavanoaina le lagi ia te ia, ua ia iloa atu foi le Agaga o le Atua ua afio ifo e peiseai se lupe, ua oo i ona luga. Faauta foi, o le siufofoga mai le lagi, ua faapea mai, O lo‘u atalii pele lenā, ua ou fiafia lava ia te ia.

Ona tali atu lea o Iesu, ua faapea atu ia te i latou, Ou te fesili atu foi a‘u ia te outou se upu e tasi; afai tou te ta‘u mai lea ia te au, ona ou ta‘uina atu lea le pule ou te fai ai nei mea. Se papatisoga ea a Ioane maifea? mai le lagi ea, pe mai tagata? Ona latou felafolafoai ai lea, ua faapea ane, Afai tatou te fai atu, Mai le lagi; ona fai mai ai lea o ia ia te i tatou, Se a foi le mea tou te lei talitonu ai ia te ia? Afai foi tatou te fai atu, Mai tagata; ua tatou fefefe i le motu o tagata; auā o la latou lea taofi uma ia Ioane, o le perofeta ia. Ona latou tali mai ai lea ia Iesu, ua faapea mai, Matou te le iloa. Ona fetalai atu ai lea o ia ia te i latou, Ou te le ta‘u atu foi ia te outou le pule ou te fai ai nei mea.

O lenei, ia outou o atu e fai nuu uma lava ma soo, ma papatiso atu ia te i latou i le suafa o le Tamā, ma le Atalii, ma le Agaga Paia; ia outou a‘oa‘o atu ia te i latou ia tausi i mea uma ua ou fai atu ai ia te outou; faauta foi, ou te ia te outou i aso uma lava, e oo lava i le gataaga o le lalolagi. Amene.

Sa faia e Ioane lana papatisoga i le vao, ma tala‘i atu ai le papatisoga o le salamo ina ia faamagaloina agasala. Ua o atu foi le nuu uma o Iutaia ia te ia, atoa ma tagata o Ierusalema, ma ua papatisoina i latou uma e ia i le vaitafe o Ioritana, ua faaali atu a latou agasala. Ua ofu Ioane i le fulufulu kamela, ma le fusi pa‘u i lona sulugātiti; a o ana mea e ‘ai o sē akerise ma le meli vao ia. Ua tala‘i atu ia, ua faapea atu, O loo mulimuli mai le tasi, e silisili o ia ia te au, ou te le aoga a‘u e punou ifo ma tatala le nonoa o ona see vae. O a‘u nei, ou te papatiso atu ia te outou i le vai; a o ia, na te papatisoina outou i le Agaga Paia.

O ona po ia ua maliu atu ai Iesu mai Nasareta o i Kalilaia, ua papatisoina foi o ia e Ioane i Ioritana. Ua maliu ae o ia nai le vai, ona iloa loa lea e ia o le lagi ua masae, ma le Agaga ua afio ifo i ona luga, e peiseai se lupe. Ua oo mai foi le siufofoga mai le lagi, ua faapea mai, O lo‘u Atalii pele oe, ou te fiafia ia te oe.

Ona tali atu lea o Iesu ia te i latou, ua faapea atu, Ou te fesili atu foi se upu e tasi ia te outou, ia outou tali mai ai ia te au; ona ou ta‘u atu ai lea ia te outou le pule ou te fai ai nei mea. O le papatisoga a Ioane, pe mai le lagi ea? pe mai tagata? ina tali mai ia ia te au. Ona latou felafolafoai lea, ua faapea ane, Afai tatou te fai atu, Mai le lagi; ona fai mai lea o ia, Se a foi le mea na outou le talitonu ai ia te ia? A e peitai a tatou fai atu, Mai tagata; ua latou matatau i le nuu; auā ua taofi uma i latou ia Ioane, o le perofeta aiai ia. Ona latou tali mai lea ia Iesu, ua faapea mai, Matou te le iloa. Ona tali atu lea o Iesu ia te i latou, ua faapea atu, Ou te le ta‘u atu foi ia te outou le pule ou te fai ai nei mea.

Ua fetalai atu foi o ia ia te i latou, O atu ia outou i le lalolagi uma, ina tala‘i atu ai le tala lenei i tagata uma lava. O lē faatuatua ma papatisoina, e faaolaina ia; a o le lē faatuatua, e faasalaina ia. E mulimuli atu foi nei faailoga i e faatuatua; e tutuli e i latou temoni i lo‘u igoa; e tautalatala i latou i gagana fou;

Ona alu atu ai lea o ia i le itu uma o Ioritana, ua tala‘i atu le papatisoga o le salamo ina ia faamagaloina agasala.

Ua fai atu ia i le motu o tagata e na o mai e papatisoina e ia, Fanau a gata feai e, o ai ea na na faaali atu ia te outou e sosola ese i le toasa atali? Ia outou fua mai ni fua e tatau ma le salamo, a e aua tou te faapea ifo i o outou loto, O Aperaamo, o ia o lo matou tamā; auā ou te fai atu ia te outou, e mafaia lava e le Atua ona faatupuina mai i nei maa ni fanau mā Aperaamo. O loo tuu nei foi le mătau i tafu‘e o laau; o laau uma foi e le fua mai i fua lelei, e taia ma lafoina i le afi.

Ua o mai foi telona ia papatisoina, ua faapea mai ia te ia, Le a‘oa‘o e, se a se mea matou te faia?

ua tali atu Ioane ia te i latou uma, ua faapea atu, O a‘u nei lē papatiso atu ia te outou i le vai, a o lē maliu mai, e silisili o ia ia te au, e le aoga a‘u ona tatala le nonoa o ona seevae; o ia lava na te papatiso ia te outou i le Agaga Paia ma le afi. O i lona aao lana asu, e faamamā ai e ia lana faaputugāsaito; e faapotopoto foi e ia le saito i lona fale saito, a e susunuina le otaota o saito i le afi e le matineia.

Ua papatisoina le nuu uma, ona papatisoina ai lea o Iesu, ua tatalo ia, ona faaavanoaina ai lea o le lagi, ona afio ifo lea o le Agaga Paia i ona luga, ua tino mai e peiseai se lupe, ua oo mai foi le siufofoga mai le lagi, ua faapea mai, O lo‘u Atalii pele oe, ua ou fiafia lava ia te oe.

Ona ta‘uamiotonuina ai lea o le Atua e le nuu uma lava e na faalogo ai, atoa ma le au telona, ina ua papatisoina i latou i le papatisoga a Ioane. A o le au faresaio ma le au a‘oa‘a tulafono, ua latou faaleaoga ia te i latou le pule a le Atua, ina ua le papatisoina i latou e ia.

Ua molimau foi Ioane, ua faapea, Na ou iloa le Agaga ua afio ifo mai le lagi, peiseai se lupe, ua nofo i ona luga. Ou te lei iloa o ia, peitai o ia na auina mai a‘u e papatiso i le vai, na fetalai mai o ia ia te au, O le e te iloa le Agaga ua afio ifo i ai, ma nofo i luga ia te ia, o ia lava lea na te papatiso i le Agaga Paia. Ua ou vaaia foi ma ou molimau o ia lava le Alo o le Atua.

Ua tali atu Iesu, ua faapea atu ia te ia, E moni, e moni, ou te fai atu ia te oe, a le toe fanau le tagata, e le mafai ona iloa e ia o le malo o le Atua. Ua fai mai Nikotemo ia te ia, E mafai ea faapefea ona fanau o le tagata ua toeaina? E mafai ea ona toe ofi i le manava o lona tinā, e fanau mai ai? Ua tali atu Iesu, E moni, e moni, ou te fai atu ia te oe, afai e le fanau se tasi i le vai ma le Agaga, e le mafai ona sao o ia i le malo o le Atua. O le ua fanau mai i la le tino, o le tino lea; o le ua fanau mai foi i la le Agaga, o le agaga lea. Aua e te ofo auā na ou fai atu ia te oe, E ao ina toe fanau mai outou.

Mulimuli ane, ua maliu atu Iesu ma ona soo i le nuu o Iutaia; ua nofo ai ma i latou, ma papatiso ai. Sa papatiso foi Ioane i Ainona, e lata ane i Salima, aua e tele ai vai: na o mai foi tagata, ua papatisoina ai.

Ona fefinauai lea o isi soo o Ioane ma Iutaia i le faamamāina. Ua latou o mai ia Ioane, ma fai mai ia te ia, Rapi e, o lē sa oulua i ai ma ia i tala atu o Ioritana, na e molimau i ai, faauta, o loo papatiso ia, ua o atu foi ia te ia tagata uma lava. Ona tali atu lea o Ioane, ua faapea atu, E le mafai e le tagata ona ave se mea māna pe a le foaiina mai ia te ia mai le lagi.

Ua silafia e le Alii ua faalogo e le au faresaio, e toatele soo ua faia e Iesu ma papatisoina, a e toaitiiti a Ioane; (peitai o Iesu, e lei papatiso e ia, na o ona soo,) ona tuua lea e ia o Iutaia, a ua toe maliu atu i Kalilaia.

Afai tou te alofa mai ia te au, ia outou tausi mai i a‘u poloaiga.

Sa faapotopoto foi o i latou ma ia, ona fetalai atu lea o ia ia te i latou, ia le tuua Ierusalema, a ia faatali i le mea na folafolaina e le Tamā, ua outou faalogo ai ia te au. Auā na papatiso lava Ioane i le vai; a o outou, e papatisoina outou i le Agaga Paia e le tele ni aso e va a‘i.

Ua oo atu foi i le aso Penetekoso, sa i ai i latou uma lava i le mea e tasi ma le loto gatasi. Ona faafuasei mai lea o le atalii mai le lagi, peiseai o le matagi ua agi tele mai, ua tumu uma ai le fale sa latou nonofo ai. Ua iloa foi e i latou o laulaufaiva peiseai o le afi ua vaevaeina, ua nofo i o latou luga taitoatasi. Ua faatutumuina foi i latou uma i le Agaga Paia, ua afua ai ona tautala i gagana eseese, pei ona foaiina mai e le Agaga o le gagana ia te i latou.

Ona fai atu lea o Peteru ia te i latou, Ina salamo ia, ma ia taitasi ma papatisoina outou uma i le suafa o Iesu Keriso, mo le faamagaloina o agasala; ona maua lea e outou o le mea foai fua mai, o le Agaga Paia lea.

Ona papatisoina lea o e na talia lana upu ma le fiafia; o lea aso foi ua faaopoopoina ai pe tolu afe o tagata. Ua tumau pea i latou i le mataupu a le au aposetolo, ma le mafuta faatasi, ma le tofitofiga o le areto, ma talotaloga. Ua oo foi le fefe i tagata uma; ua faia foi e le au aposetolo vavega ma faailoga e tele.

Ua talitonu i latou ia Filipo o folafola le tala lelei i mea a le malo o le Atua, ma le suafa o Iesu Keriso, ona papatisoina lea o i latou, o tane atoa ma fafine. O Simona foi, ua talitonu ia; ua papatisoina foi o ia, ona faatasi atu lea o ia ia Filipo, ua matuā ofo, ina o matamata i faailoga ma vavega tele ua faia.

Ua faalogo foi le au aposetolo i Ierusalema, ua talia e Samaria le afioga a le Atua, ona latou aauina atu lea o Peteru ma Ioane ia te i latou. Ua o mai foi i laua, ona tatalo lea mo i latou, ina ia maua e i latou le Agaga Paia; auā o ona po ia e lei afio ifo ai o ia i se tasi o i latou; ua na ona papatisoina o i latou i le suafa o le Alii o Iesu. Ona la faaee atu lea o laua lima ia te i latou, ona maua lea e i latou o le Agaga Paia.

Ua o ane foi i laua i le ala, ua oo i le tasi vai; ona fai mai lea o le eunuka, Faauta, o le vai; se a ea se mea e vaoia ai a‘u e aua le papatisoina o a‘u? Ua fai atu e Filipo, Afai ua e talitonu ma le loto atoa, e mafai ai lava. Ua tali mai o ia, ua faapea mai, Ou te talitonu o Iesu Keriso o le Alo o le Atua ia. Ona fai atu lea o ia ia faapau mai le nofoa faataavalevale; ona o ifo lea o i laua uma i le vai, o Filipo ma le eunuka; ua na papatiso foi ia te ia. Ua o ae i laua nai le vai, ona segia lea o Filipo e le Agaga o le Alii; ua le toe iloa ia e le eunuka, ua alu foi ia i lana malaga ma le olioli. A ua iloa Filipo i Asota; ua alu foi o ia, ma folafola solo le tala lelei i aai uma lava, ua oo lava ia i Kaisareia.

Ona pauu loa lea o mea nai ona mata peiseai ni una; ona toe vaai loa lea o ia, ua tu foi i luga, ma ua papatisoina.

E mafai ea e se tasi ona vavao i le vai, ina ia le papatisoina ai i latou nei, o e ua maua le Agaga Paia pei o i tatou nei? Ua fai atu foi o ia ia papatisoina i latou i le suafa o le Alii. Ona aioi lea o i latou ia te ia ia latou nonofo ma ia i nisi aso.

Ona ou manatua lea o le afioga a le Alii, ua faapea mai, Na papatiso lava Ioane i le vai, a e papatisoina outou i le Agaga Paia. O lenei, afai e tusa le alofa ua foaiina mai e le Atua ia te i tatou atoa ma i latou, ina ua faatuatua i le Alii o Iesu Keriso, o ai ea a‘u nei ou te mafaia ona vavao atu i le Atua? Ua latou faalogo mai i ia upu, ona latou faalologo lea, ua vivii atu foi i le Atua, ua faapea ane, E moni, ua foai atu e le Atua i nuu ese le salamo e ola ai.

O le aiga o lenei tagata ua faatuina ai e le Atua ia Isaraelu le Faaola o Iesu, pei ona folafolaina e ia; ina ua muai tala‘i e Ioane, a o lei maliu mai o ia, i le papatisoga o le salamo i le nuu o Isaraelu uma lava.

Ua faalogo mai foi ia te i matou le tasi fafine ua mata‘u i le Atua, o Litia le igoa, o le faatau ie pāuli, o Tuatira lona nuu; ua tatalaina e le Alii lona loto ia naunau i upu na tautala a‘i Paulo. Ua papatisoina o ia atoa ma lona aiga, ona aioi mai lea o ia, ua faapea mai, Afai ua outou manatu o a‘u o lē faatuatua i le Alii, o mai ia i lo‘u fale, ma nonofo ai. Ua pulutia foi i matou e ia.

Ua fai atu i laua, Ina faatuatua ia i le Alii o Iesu Keriso, e ola ai oe atoa ma lou aiga. Ona la tautala atu loa i le afioga a le Alii ia te ia, ma i latou uma ua i lona fale. Ua na au mai foi ia te i laua i lea lava itu po, ma mulumulu atu o la ta; ona papatisoina loa lea o ia ma lona aiga uma.

O Kiripo foi le pule i le sunako, ua faatuatua i le Alii o ia ma lona aiga uma; e toatele foi tagata Korinito o e na faalogo ua faatuatua i latou, ma ua papatisoina.

ona fai atu lea o ia ia te i latou, Na maua ea e outou le Agaga Paia ina ua outou faatuatua? Ua fai mai i latou ia te ia, Na matou le lagona lava po ua foaiina le Agaga Paia. Ona fai atu lea o ia ia te i latou, pe na papatisoina outou i le a? Ua fai mai i latou, O le papatisoga a Ioane. Ona fai atu lea o Paulo, Na papatiso lava Ioane i le papatisoga o le salamo, ua fai atu i le nuu, ia faatuatua i latou i lē mulimuli mai, o le Keriso o Iesu lea. Ua faalogo ai i latou, ona papatisoina lea i le suafa o le Alii o Iesu. Ua faaee atu foi e Paulo ona lima ia te i latou, ona oo lea o le Agaga Paia ia te i latou; ona tautala lea i gagana eseese, ma perofeta i latou.

O lenei foi, se a le mea e te faatuai ai? Tulai ia, ma ia papatisoina oe, ma ia fufulueseina au agasala i lou valaau i le suafa o le Ali.

Tou te lei iloa ea, o i tatou nei uma na papatisoina ia Keriso Iesu, na papatisoina i tatou i lona maliu? O lenei, ua tatanu faatasi i tatou ma ia i le papatisoga i lona maliu; ina ia tatou savavali i le ola toefuataiina, pei ona toe faatuina mai o Keriso nai e ua oti, i le mana o le Tamā. Auā afai ua faatasia i tatou i le faatusa i lona maliu, e faapea foi i tatou i lona toe tu mai. Ua tatou iloa lenei mea, na faasatauroina faatasi ma ia lo tatou tagata tuai, ina ia faaumatia ai le tino o le agasala, ina ia le toe faapologaina i tatou i le agasala. Auā o le ua oti ua tuusaunoa ia nai le agasala. Afai foi ua oti faatasi i tatou ma Keriso, ua tatou taofi, tatou te ola foi faatasi ma ia.

Ia faapea foi la outou taofi, ua outou oti i la le agasala, a ua outou ola lava i la le Atua i lo tatou Alii o Keriso Iesu.

A e afai ua i totonu ia te outou Keriso, ua oti ai le tino ona o le agasala, a ua ola le agaga ona o le amiotonu.

Sa faapea foi nisi o outou; a ua taeele outou, a ua faapaiaina outou, a ua ta‘uamiotonuina outou i le suafa o le Alii o Iesu, i le Agaga foi o lo tatou Atua.

Auā foi o le Agaga e toatasi na papatisoina ai i tatou uma i le tino e tasi, po o Iutaia, po o Eleni, po o pologa, po o sa‘oloto; ma ua faainumia i tatou uma i le Agaga e toatasi.

O lenei, afai o ia Keriso se tasi, o le tagata fou ia; ua mavae mea tuai, faauta, ua faafouina mea uma.

auā o atalii o le Atua outou uma lava i le faatuatua ia Keriso Iesu. Auā o outou uma lava na papatisoina ia Keriso ua outou oofu ia Keriso;

O outoufoi lava o e na oti i amio leaga ma agasala,

a o oti lava i tatou i amio leaga, ua na faaola mai ia i tatou faatasi ma Keriso; (o le alofa tunoa ua faaolaina ai outou;) ua na toe faatutū faatasi mai foi, ma faanonofo faatasi i tatou ma Keriso Iesu i mea o i le lagi;

E tasi le tino, e tasi foi le Agaga, faapei ona valaauina o outou i le faamoemoe e tasi ua valaauina ai outou; e tasi le Alii, e tasi le faatuatuaga, e tasi le papatisoga;

ina ia faapaiaina ai, ina ua faamamaina i le faataeleina i le vai atoa ma le upu; ina ia na tuuina atu o ia ia te ia, o le ekalesia matagofie lava, e leai sona ila, po o se maanuminumi po o se tasi mea faapena, a ia paia ma ia le ponā.

ua faaperitomeina foi outou ia te ia i le peritomega e lei faia e lima, i le toeseina o le tino o agasala o i le tino i le peritomega mai ia Keriso; na tanumia outou faatasi ma ia i le papatisoga, o lea foi ua outou toe tutū mai ia faatasi ma ia i le faatuatua i le mana o le Atua, o le na faatu mai ia te ia i e ua oti.

O le mea lea ina tatou tuua ai ia o mataupu muamua a Keriso, a ia tatou faaoo atu i le faaatoatoaga; aua le toe tuuina i lalo le faavae o le salamo i galuega e oti ai, ma le faatuatua i le Atua, o le mataupu i papatisoga, ma le faaee atu o lima, ma le toe tutū mai o e ua oti, ma le faamasinoga e faavavau. Tatou te faia foi lena mea, pe a finagalo i ai le Atua.

O lenei, le au uso e, ua tatou sa‘oloto e ulu atu i le mea e sili ona paia ona o le toto o Iesu, i le ala fou e ola ai, ua faapaiaina e ia mo i tatou i le ie puipui, o lona lava tino lea, mona ua ia i tatou le faitaulaga sili e pule i le fale o le Atua, ina tatou faalatalata atu ia ma le loto faamaoni i le faatuatua ua mautinoa lava, o sausauina o tatou loto nai le manatu ifo ua leaga, o taelea foi o tatou tino i le vai manino;

Ua outou faamamā i o outou loto i le gauai i le upu moni e le Agaga, ua iu i le alofa faamaoni i le au uso, o le mea lea ia matuā fealofani ai outou ai le loto naunau; ua fanaufouina outou e le o le fua e pala, a o le fua e le pala lava, o le afioga a le Atua lea ua oia ma ua tumau e oo i le faavavau.

O le faatusa foi lea mea o le papatisoga, o loo faaola mai ai nei ia i tatou, (e le o le faateaeseina o le eleele o le tino, a o le tali a le loto fuatia ifo lelei i le Atua,) i le toe tu mai o Iesu Keriso;

Amuia i latou o e faia ana poloaiga, ina ia taga ia i latou le laau o le ola, ma ia latou ulu atu i le aai i ona faitotoa.