09 – Ukuphenduka

Njalo uJehova uNkulunkulu wamlaya umuntu wathi, “Ukhululekile ukudla loba yisiphi isihlahla esivandeni; kodwa ungadli isihlahla sokwazi okuhle lokubi, ngoba ungaze usidle uzakufa ngempela.”

U-Abhrama eseleminyaka engamatshumi aficamunye laficamunye yobudala, uJehova wabonakala kuye wathi, “NginguNkulunkulu uSomandla; hlala usemehlweni ami, ungasoleki.

UMosi wathi, “Lingesabi, uNkulunkulu uzelilinga ukuze limesabe lokuze lingoni.”

Ngakho wema esangweni lezihonqo wathi, “Loba ngubani ongokaJehova keze kimi.” Wonke amadodana kaLevi ayabuthana kuye.

Kuzamele abeke isandla sakhe enhlokweni yomnikelo wokutshiswa, ngalokho uzakwamukelwa esikhundleni sakhe, uphendle indlela yokubuyisana.

“ ‘Loba aluba ngubani olecala ngenxa yalezindlela, kumele aveze ukuthi wone ngandlela bani

Ngalokho umphristi uzamenzela indlela yokubuyisana phambi kuka Jehova, njalo uzathethelelwa ngalezi izinto azenzileyo ezimenze waba lecala.

Ngalokho uzakwenza indlela yokubuyisana yendawo eNgcwele Ngcwele ngenxa yokungcola lokuhlamuka kwabako-Israyeli, kungakhathalekile ukuthi benze sono bani. Uzakwenza njalo into efananayo eThenteni lokuHlanganela eliphakathi kwabo ngokungcola okuphakathi kwabo.

ngenxa yokuthi ngalolusuku lizakwenzelwa ukubuyisana, ukulihlanza. Ngakho, phambi kukaJehova, lizabe selihlanzekile ezonweni zenu zonke.

“Ngoba impilo yesidalwa isegazini, njalo ngiliphile ukuthi lenze ukubuyisana kwenu ealithareni; kuligazi elenze ukubuyisana empilweni yomuntu.

“ ‘Zingcweliseni libe ngcwele ngokuba mina nginguJehova, uNkulunkulu wenu.

Lingasebenzi ngalelolanga, ngokuba lilanga lokuBuyisana, lapho lihlawulelwa kuJehova uNkulunkulu wenu. Lowo ongaziliyo ngalelolanga makasuswe ebantwini bakibo.

“ ‘Kodwa bangavuma izono zabo lezono zaboyise  —  inkohliso abayenza kimi, lokumelana kwabo lami,

“Tshono kwabako-Israyeli uthi: ‘Nxa indoda loba umfazi onele omunye loba ngayiphi indlela etshengisele ukungathembeki kuJehova, lowomuntu ulomlandu

Abantu baya kuMosi bathi, “Sonile ngokukhuluma kwethu kubi ngoJehova langokukhuluma kwethu ngawe. Akukhuleke ukuthi uJehova asuse izinyoka lezi phakathi kwethu.” Ngakho wabakhulekela abantu.

Kodwa nxa likhonale lingadinga uJehova wenu, lizamfumana nxa limdinga ngezinhliziyo zenu ezipheleleleyo langomphefumulo wenu wonke. Nxa selisesizini zonke lezizinto sezilehlela, lapho-ke ngezinsuku ezizayo lizabuyela kuJehova wenu limlalele. Phela uJehova uNkulunkulu wenu unguJehova olomusa; kayikulidela loba alibhubhise loba alibale isivumelwano sakhe asenza labokhokho benu, leso asiqinisa kubo ngesifungo.

Ngakho nanzelelani lenze lokho uJehova uNkulunkulu wenu alilaya ngakho; lingaphambukeli yiloba kwesokudla loba kwesenxele.

Thanda uJehova uNkulunkulu wakho ngenhliziyo yakho yonke langomoya wakho wonke kanye langamandla akho wonke. Imilayo le engikupha yona lamuhla kumele ibe sezinhliziyweni zenu. Igcizeleleni kubantwabenu. Khulumani ngayo nxa lihlezi emakhaya enu lanxa lihamba ezindleleni, nxa lilele phansi loba nxa livuka. Ibopheleni ezandleni zenu ibe luphawu, liyibophele lasemabunzini enu. Ibhaleni emigubazini yezindlu zenu kanye lasemasangweni enu.

Mesabeni uJehova uNkulunkulu wenu, mkhonzeni yena yedwa lifunge ngebizo lakhe.

ngoba azaphambula amadodana enu ekungikhonzeni abesekhonza abanye onkulunkulu, kuthi ulaka lukaJehova luvuthe lulitshise litshabalale. Nanku okumele likwenze kulezi zizwe: Dilizani ama-alithare azo, libhidlize amatshe eziwakhonzayo, ligamule izigodo zophawu luka-Ashera njalo litshise izithombe zazo ngomlilo. Phela lina lingabantu abangcwele kuJehova uNkulunkulu wenu. UJehova uNkulunkulu wenu ulikhethile phakathi kwabantu bonke emhlabeni ukuthi libe ngabantu bakhe, isipho sakhe esiligugu.

Kumele libemsulwa phambi kukaJehova uNkulunkulu wenu.

UJehova uNkulunkulu wenu uzasoka izinhliziyo zenu kanye lezinhliziyo zezizukulwana zenu, ukuze limthande ngezinhliziyo zenu zonke langomoya wenu wonke, liphile.

Kodwa abako-Israyeli bathi kuJehova, “Senze isono. Yenza kithi lokho okubona kulungile kuwe, kodwa ake usihlenge khathesi nje.”

Angibanga lesici phambi kwakhe njalo ngisixwayile isono.

Emva kokubala abantu bokulwa uDavida wakhathazeka enhliziyweni yakhe, wasesithi kuJehova, “Ngenze isono esikhulu ngalokhu engikwenzileyo. Khathesi-ke, awu Jehova, ngiyacela, susa icala lenceku yakho. Ngenze into yobuthutha.”

wasesithi: “O Jehova, Nkulunkulu ka-Israyeli, kakho uNkulunkulu onjengawe ezulwini phezulu loba emhlabeni ngaphansi  —  wena ogcina isithembiso sakho sothando lezinceku zakho, wena oqhubeka ngenhliziyo yonke endleleni yakho.

kuthi-ke nxa loba ngubani wabo abako-Israyeli ekhuleka loba ekuncenga  —  bona ngamunye bevele bezazela izinhlupheko ezinhliziyweni zabo, kodwa bephakamisele izandla zabo kulelithempeli  — lapho-ke zwana usezulwini okulikhaya lakho. Thethelela njalo wenze, ngamunye yenza kuye okufanele kwenziwe, njengoba usazi inhliziyo yakhe (njengoba nguwe wedwa emhlabeni wonke owaziyo),

Hlabelani kuJehova lina, mhlaba wonke, limemezele insindiso yakhe izinsuku ngezinsuku.

“Njalo wena ndodana yami, Solomoni, mamukele uNkulunkulu kayihlo, umkhonze ngokuzinikela ngenhliziyo yakho yonke langengqondo yokuvuma, ngoba uJehova uyihlola yonke inhliziyo kanti uyayazi iminakano lezenzo zonke. Nxa umfuna uJehova, uzamfumana wena, kodwa nxa umfulathela, uzakufulathela yena kuze kube nininini.

“Kuze kuthi nxa bonile kuwe  —  ngoba kakho ongenzi sono  —  njalo uze ubathukuthelele ubanikele ezitheni zabo, ezizabathumba zibase elizweni elikhatshana loba eliseduzane, njalo kuthi nxa kulokuguquka kwezinhliziyo zabo elizweni lokuthunjwa kwabo, loba bephenduka loba bekuncenga elizweni lokuthunjwa kwabo sebesithi, ‘Sonile, senza okubi, saganga,’ loba nxa bephendukela kuwe ngezinhliziyo zabo zonke langemiphefumulo yabo elizweni njalo bekhuleka bekhangele elizweni owalinika oyise, edolobheni owalikhethayo lasethempelini engilakhele iBizo lakho; ngakho wena osezulwini, endaweni yakho yokuhlala, akuzwe imikhuleko yabo lokuncenga kwabo, ubamele. Njalo ubathethelele abantu bakho, bona abakoneleyo.

uJehova wabonakala kuye ebusuku wathi: “Ngiwuzwile umkhuleko wakho njalo sengizikhethele indawo le ukuba ibe lithempeli lemihlatshelo. Nxa ngivala iphezulu ukuze kungabi lezulu, loba ngithumela isifo phakathi kwabantu bami, nxa abantu bami, ababizwa ngebizo lami, bezazithoba bakhuleke badinge ubuso bami njalo batshiye izindlela zabo ezimbi, kulapho ngizakuzwa khona ngisezulwini ngithethelele izono zabo njalo ngiphephise ilizwe labo. Ngalokho amehlo ami azavuleka, lezindlebe zami zizalalela imikhuleko eyenziwa kulindawo.

Benza isivumelwano sokuba bamdinge uJehova uNkulunkulu waboyise, ngezinhliziyo zabo ezipheleleyo langomoya.

Ngathi ngikuzwa lokho ngadabula isigqoko sami lejazi lami, ngadonsa izinwele ekhanda lami lezindevu zami ngahlala phansi ngididekile. Kwasekusithi wonke lowo owethuswa ngamazwi kaNkulunkulu ka-Israyeli waziqoqa phansi kwami ngenxa yalokhu ukona kwezithunjwa. Ngahlala khonapho ngididekile kwaze kwaba ngumhlatshelo wakusihlwa. Kwathi-ke ngomhlatshelo wa-kusihlwa, ngaphakama ekuzehliseni kwami, isigqoko sami lejazi lami kudabukile, ngaguqa, izandla zami zivuliwe kuJehova uNkulunkulu wami

Lapho u-Ezra wayekhuleka njalo efakaza izono, ekhala ezilahla phansi phambi kwendlu kaNkulunkulu, ixuku elikhulu laba-Israyeli  —  amadoda labafazi labantwana  —  babuthana kuye. Labo bakhala kabuhlungu.

Ngathi sengizwile lezizinto ngahlala phansi ngakhala. Okwezinsuku ezithile ngalila, ngazila ukudla njalo ngikhuleka phambi kukaJehova wasezulwini. Ngasengisithi: “O Jehova, Nkulunkulu wasezulwini, uNkulunkulu omkhulu owesabekayo, ogcina isivumelwano sakhe sothando lalabo abamthandayo, abalalela imilayo yakhe, ake kuthi indlebe yakho ilalele lamehlo akho avuleke ukuze uzwe umkhuleko okhulekwa yinceku yakho kuwe imini lobusuku, ikhulekela izinceku zakho, abantu bako-Israyeli. Ngiyazivuma izono ezenziwe kuwe yithi aba-Israyeli, kugoqela mina lendlu kababa. Senzile ububi kuwe. Kasilalelanga imilayo yakho, izimemezelo lemithetho owayinika inceku yakho uMosi.

Inengi labantu  —  abaphristi, abaLevi, abalindimasango, abahlabeleli, lezinceku zethempeli labo bonke abazehlukanisayo ebantwini bezizwe ngenxa yoMthetho kaNkulunkulu, kanye lamakhosikazi abo lamadodana lamadodakazi abo abasebezwisisa  — bonke laba bahlanganyela labafowabo izikhulu, ukuzibopha ngesiqalekiso langesifungo ukuwulandela uMthetho kaNkulunkulu owanikwa ngoMosi inceku kaNkulunkulu lokulalela kuhle yonke imilayo, leziqondiso lezimemezelo zikaJehova iNkosi yethu.

Sengenze iziphambeko lezono ezinganani na? Ngitshengisa isiphambeko sami lesono sami. Kungani ufihla ubuso bakho ungithathe njengesitha sakho?

Kuzakuthi nxa isikhumba sami sesibhujisiwe, kodwa ngikuyo inyama yami ngizambona uNkulunkulu;

akuthi uNkulunkulu angilinganise esikalini sakhe esiqotho ukuze abone ukuthi angilasici  —

Kuthi-ke abesebuya ebantwini athi, ‘Ngenza isono, ngahlanekela okulungileyo, kodwa kangisazuzanga obekungifanele. Wawuhlenga umphefumulo wami ukuze ungayi egodini, ngakho ngizaphila ukuze ngikholise ukukhanya.

Izindlebe zami zasezizwile ngawe kodwa manje amehlo ami asekubonile. Ngakho sengizeyisa, sengiphenduka ngizilahla othulini lasemlotheni.”

Yazini ukuthi uJehova usezehlukanisele labo abamkholwayo. UJehova uzakuzwa nxa ngikhala kuye.

UJehova uyabusa kuze kube nininini; usesimisile isihlalo sakhe sobukhosi ukuze ahlulele. Uzakwahlulela umhlaba ngokulunga; uzababusa abantu ngokulunga.

Labo abalaziyo ibizo lakho bazathemba kuwe, ngoba wena, Jehova, kawubafulatheli abakudingayo.

Kodwa ngiyalwethemba uthando lwakho olungapheliyo; inhliziyo yami iyathokoza ngensindiso yakho.

Ngibe ngilokhu ngimsulwa phambi kwakhe njalo ngisixwayile isono.

ngikhokhela eqinisweni lakho ungifundise ngokuba unguNkulunkulu uMsindisi wami, lethemba lami likuwe izinsuku zonke.

Ungakhumbuli izono zami zobutsha lezindlela zokuhlamuka kwami; ngikhumbula ngokufanele uthando lwakho, ngokuba ulungile, O Jehova.

Khangela ukukhathazeka kwami lokuhawula kwami, ususe zonke izono zami.

Mupheni uJehova ubukhosi obufanele ibizo lakhe; mkhonzeni uJehova ekukhazimuleni kobungcwele bakhe.

Ezandleni zakho nginikela umphefumulo wami; ngihlenga, O Jehova, Nkulunkulu weqiniso.

ElikaDavida. Ubusisiwe lowo oziphambeko zakhe zithethelelwe, ozono zakhe zisibekelwe.

Lapho-ke ngasengisivuma isono sami kuwe angabe ngisasibekela ububi bami. Ngathi, “Ngizazivuma iziphambeko zami kuJehova”  —  walithethelela icala lesono sami.

Umhlaba wonke kawesabe uJehova; akuthi bonke abantu bomhlaba bazithobe phambi kwakhe.

Amehlo kaJehova akhangele abalungileyo lezindlebe zakhe ziyezwa ukukhala kwabo; ubuso bukaJehova bumelana labenza okubi, ukuba acitshe ukukhunjulwa kwabo emhlabeni. Abalungileyo bayakhala kuJehova abezwe; uyabakhulula kuzo zonke izinhlupheko zabo. UJehova useduze labo abalezinhliziyo ezephukileyo asindise labo abadabukileyo emoyeni.

UJehova uyazihlenga izinceku zakhe; kakho ozalahlwa ophephela kuye.

Ngiyabuvuma ububi bami; ngiyakhathazeka ngesono sami.

Ngathi, “O Jehova ake ungihawukele; ngisilisa, ngoba ngonile kuwe.”

Kumqondisi wokuhlabela. Ihubo likaDavida. Kwakufike umphrofethi uNathani kuye uDavida owayefebile loBhathisheba. Ake ungihawukele, hawu Nkulunkulu, ngenxa yothando lwakho olungaphuthiyo; ngenxa yesihawu sakho esikhulu yesula iziphambeko zami. Hlanza wonke amanyala ami ungihlambulule esonweni sami. Phela ngiyazazi iziphambeko zami, isono sami sihlezi siphambi kwami. Ngenzile isono kuwe, wena wedwa, ngenza okubi phambi kwakho, ukuze kukhanye ukuthi wena uqondile nxa ukhuluma njalo kube kufanele nxa usahlulela.

Ngihlanza ngehisophi ngihlambuluke; Ngigezisa ngibemhlophe kuleliqhwa.

Fihla ubuso bakho esonweni sami ucitshe nya wonke amanyala ami. Dala phakathi kwami inhliziyo ehlanzekileyo, uvuselele ngaphakathi kwami umoya othembekileyo. Ungangilahli ebusweni bakho kumbe ususe kimi uMoya oNgcwele.

Uyabazi ubuthutha bami, wena Nkulunkulu; isono sami kasifihlakalanga kuwe.

Kodwa wena Nkulunkulu unguJehova wami kwasekadeni; uletha insindiso emhlabeni.

kabasigcinanga isivumelwano sikaNkulunkulu, bala ukuphila ngomthetho wakhe.

Ungawethesi thina umlandu wabokhokho; sengathi isihawu sakho singeza masinyane ukuzasivikela, ngokuba sesisebunzimeni obubi. Sisize, hawu Nkulunkulu Msindisi wethu, ngenxa yobukhosi bebizo lakho; sikhulule uthethelele izono zethu, ngenxa yebizo lakho.

Uyathethelela njalo ulungile, O Jehova, ugcwele uthando kulabo abakhuleka kuwe.

UJehova ulesihawu njalo ulomusa, uyaphuza ukuthukuthela, kodwa uyanda ngothando.

kasiphathi ngokufanele izono zethu kumbe asijezise ngokulingene iziphambeko zethu. Ngokuba njengokuphakama komkhathi ngaphezu komhlaba, lukhulu kangako uthando lwakhe kulabo abamesabayo; njengobukhatshana bempumalanga kuyo intshonalanga kanjalo ususile iziphambeko zethu kithi.

Kodwa kusukela phakade kusiya phakade uthando lukaJehova lukulabo abamesabayo, lokulunga kwakhe ebantwaneni babantwana kulabo abagcina isivumelwano sakhe njalo bakhumbule ukulalela izimiso zakhe. UJehova usemisile isihlalo sakhe sobukhosi ezulwini, njalo ubukhosi bakhe buphezu kwakho konke.

Sonile, njengalokho abakwenzayo okhokho bethu; senzile okubi senza izinto ezimbi.

Ukumesaba uJehova kuyikuqala kokuhlakanipha; bonke abalandela iziqondiso zakhe balokuzwisisa okuhle. Kungokwakhe ukudunyiswa kwaphakade.

Kakungabi kithi, O Jehova, hatshi kithi kodwa kwelakho ibizo kakube lenkazimulo, ngenxa yothando lokuthembeka kwakho.

Babusisiwe labo abandlela zabo zingelansolo, abahamba ngomthetho kaJehova. Babusisiwe labo abagcina imilayo yakhe, abayidinga ngenhliziyo yabo yonke. Kaboni lutho; bahamba ezindleleni zakhe.

Ilizwi lakho ngilifihlile enhliziyweni yami ukuze ngingenzi isono kuwe.

Imifula yezinyembezi iyajuluka emehlweni ami, ngokuba umthetho wakho kawulalelwa.

We Israyeli, beka ithemba lakho kuJehova, ngoba kuye uJehova kulothando olungaphuthiyo njalo kuye kulensindiso epheleleyo.

UJehova uthokoza ngalabo abamesabayo, ababeka ithemba labo ethandweni lwakhe olungaphuthiyo.

Ukwesaba uJehova kuyikuqala kolwazi, kodwa iziwula ziyakweyisa ukuhlakanipha lokuzithiba.

Themba kuJehova ngenhliziyo yakho yonke, ungathembi okwakho ukuzwisisa; mvume kuzo zonke izindlela zakho, yena uzaqondisa zonke izindlela zakho. Ungazenzi ohlakaniphileyo ngokubona kwakho; yesaba uJehova uxwaye okubi.

Ungayingeni indlela yababi njalo ungahambi endleleni yezigangi. Ixwaye, ungahambi ngayo; itshiye uqhubeke ngeyakho indlela.

Ukwesaba uJehova yikuzonda ububi; ngiyakuzonda ukuzazisa lobuqholo, ukuziphatha kubi lenkulumo ebolileyo.

Loba ngubani ongawulaleliyo umthetho, lemikhuleko yakhe izakuba yisinengiso.

Lowo ofihla iziphambeko zakhe kayikuphumelela, kodwa lowo ozivumayo azitshiye ufumana umusa. Ubusisiwe umuntu ohlala emesaba uJehova, kodwa lowo oyenza lukhuni inhliziyo yakhe uwela enkathazweni.

Akulamuntu loyedwa olungileyo emhlabeni owenza okulungileyo ongazake enze isono.

Manje-ke konke sekuzwakele; Nansi isiphetho sendaba; Mesabe uNkulunkulu ugcine imiyalo yakhe, ngoba lo yiwo wonke umlandu womuntu. Ngoba uNkulunkulu uzazahlulela zonke izenzo, lalokho okufihliweyo loba kuhle loba kubi.

gezani libe ngabahlambulukileyo. susani izenzo zenu ezimbi phambi kobuso bami. Yekelani ukwenza okubi,

“Wozani khathesi nje, sibonisane sikanye,” kutsho uJehova. “Lanxa izono zenu zibomvu gebhu, zizakuba mhlophe nke njengongqoqwane.

Maye kulabo abathi okubi kuhle bathi okuhle kubi, ababeka umnyama esikhundleni sokukhanya; ukukhanya esikhundleni somnyama; ababeka okubabayo esikhundleni sokumnandi, okumnandi esikhundleni sokubabayo. Maye kulabo abahlakaniphileyo emehlweni abo njalo besile ekuboneni kwabo.

Lathinta umlomo wami ngalo lathi, “Khangela, lokhu sekuthinte izindebe zakho; icala lakho selisusiwe, njalo lesono sakho sesihlawulelwe.”

“Mina, uJehova ngikubizile ngokulunga; ngizabamba isandla sakho. Ngizakulondoloza ngikwenze ube yisivumelwano sabantu lokukhanya kwabezizwe;

“Mina, mina uqobo, nginguye owesula iziphambeko zakho ngenxa yami, ngingabe ngisazikhumbula futhi izono zakho. Ngikhangelela isikhathi esedlulayo, kasiphikisane ngaleyondaba.

Ngesule iziphambeko zakho njengeyezi, ngesula izono zakho njengenkungu yekuseni. Buyela kimi, ngoba ngikuhlengile.” Hlabelelani ngentokozo, lina mazulu, ngoba uJehova usekwenzile lokhu; Hlaba umkhosi, wena mhlaba ngaphansi. Tshayani ingoma lina zintaba, lina mahlathi lazo zonke izihlahla zenu, ngoba uJehova usemhlengile uJakhobe, ubonakalisa udumo lwakhe ko-Israyeli.

Memezelani okufanele kube yikho, likubike  —  kabemukele izeluleko ndawonye. Ngubani owabika lokhu endulo, ngubani owamemezela ngakho kudala le? Kwakungayisimi mina uJehova na? Njalo kakho uNkulunkulu ngaphandle kwami, uNkulunkulu olungileyo onguMsindisi; kakho omunye, yimi kuphela. “Phendukelani kimi lisindiswe, lonke lina mikhawulo yomhlaba; Ngoba mina nginguNkulunkulu, njalo kakho omunye.

Abahlengiweyo bakaJehova bazabuya. Bazangena eZiyoni behlabela; ukuthokoza okungapheliyo kuzakuba ngumqhele emakhanda abo. Ukuthaba lokujabula kuzabehlela; usizi lokububula kuzaphela.

Kodwa wagwazwa ngenxa yeziphambeko zethu, wachobozwa ngenxa yokona kwethu, ukuhlutshwa kwakhe kwasilethela ukuthula, njalo sasiliswa ngamanxeba akhe. Thina sonke njengezimvu, silahlekile, lowo lalowo wethu uphambukele endleleni yakhe; njalo uJehova ubeke phezu kwakhe ukona kwethu sonke.

Mdingeni uJehova esatholakala, mbizeni eseseduzane. Omubi kayekele indlela yakhe loxhwalileyo alahle imicabango yakhe. Kaphendukele kuJehova, uzakuba lesihawu kuye, lakuNkulunkulu wethu ngoba uzamthethelela ngesihle. “Ngoba imicabango yami kayisiyo eyenu, lezindlela zenu kayisizo ezami,” kutsho uJehova. Njengomkhathi uphakeme kulomhlaba, ngokunjalo izindlela zami ziphakeme kulezindlela zenu, lemicabango yami iphakeme kulemicabango yenu.

Ngoba ophakemeyo ongaPhezulu  —  yena ophila kokuphela, obizo lakhe lingcwele uthi: “Ngihlala endaweni ephakemeyo lengcwele, kodwa laye ozisolayo lothobekileyo emoyeni, ukuba kuvuselelwe umoya wabathobekileyo, kuvuselelwe lezinhliziyo zabazisolayo.

Umoya kaJehova Wobukhosi uphezu kwami, ngoba uJehova ungigcobile ukuba ngitshumayele izindaba ezinhle kubayanga. Ungithumile ukuba ngibophe izinhliziyo ezidabukileyo, ngimemezele ukukhululwa kwabathunjiweyo, lokukhululwa kwezibotshwa emnyameni, ukumemezela umnyaka womusa kaJehova, losuku lokuphindisela kukaNkulunkulu wethu; ukududuza abalilayo, lokunakekela labo abadabukileyo eZiyoni  —  ukubapha umqhele wobuhle esikhundleni somlotha, amafutha okujabula esikhundleni sokulila, lengubo yokudumisa esikhundleni somoya wokulahla ithemba. Bazabizwa ngokuthi ngama-okhi okulunga, ahlanyelwe nguJehova ukuba abonakalise inkazimulo yakhe.

Sonke sesaba njengomuntu ongcolileyo, lemisebenzi yethu yokulunga yonke injengezidwedwe ezingcolileyo, sonke siyabuna njengehlamvu, lanjengomoya izono zethu zisiphephulela khatshana.

Isandla sami kasizenzanga lezizinto ukuze zibe khona na?” kutsho uJehova. “Engimbukayo ngulo: lowo othobekileyo ozisolayo emoyeni, olesabayo ilizwi lami.

Vuma icala lakho nje kuphela  —  wahlamukela uJehova uNkulunkulu wakho, uhlakazelele umusa wakho kubonkulunkulu bezizweni ngaphansi kwezihlahla zonke eziluhlaza, njalo kawaze wangilalela,’ ” kutsho uJehova.

Kasilaleni phansi silenhloni, siphathwe lihlazo lethu. Ngoba sonile kuJehova uNkulunkulu wethu, thina sonke kanye labokhokho bethu; kusukela ebutsheni bethu kuze kube lamhla, kasimlalelanga uJehova uNkulunkulu wethu.”

We Jerusalema, geza ububi obusenhliziyweni yakho usile. Koze kube nini ugcine imicabango emibi na?

Zwana, wena mhlaba: ngiletha umonakalo phezu kwabantu laba, izithelo zamaqhinga abo, ngoba kabawalalelanga amazwi ami njalo bawalile lomthetho wami.

Ngilalele ngesineke, kodwa kabatsho okulungileyo. Kakho ophenduka ebubini bakhe, esithi, “Kuyini engikwenzileyo na?” Yilowo lalowo ulandela indlela yakhe njengebhiza lizithela empini.

UJehova wathi, “Kungenxa yokuthi sebelahle umthetho wami engababekela wona; kabangilalelanga lomthetho wami kabawulandelanga. Esikhundleni salokho, bona balandele ubulukhuni bezinhliziyo zabo; balandele oBhali, njengokufundiswa kwabo ngoyise.”

Lanxa izono zethu zifakaza kubi ngathi, O Jehova, ake wenze okunye ngenxa yebizo lakho. Ngoba ukuhlehlela kwethu emuva kunengi; sonile kuwe.

Awu Jehova, siyakuvuma ukona kwethu kanye lokona kwabokhokho bethu; impela sonile kuwe.

Ngisilisa, Jehova, njalo ngizasiliswa; ungikhulule, ngizakhululeka, ngoba nguwe engimdumisayo.

Ngizabapha inhliziyo yokungazi, ukuthi mina nginguJehova. Bazakuba ngabantu bami, mina ngibe nguNkulunkulu wabo, ngoba bazabuyela kimi ngenhliziyo yabo yonke.

Ngenxa yothando olukhulu lukaJehova kasibhujiswanga, ngoba isihawu sakhe asipheli. Sitsha ukusa kwamalanga; kukhulu ukuthembeka kwakho.

Akusekho ukuthokoza ezinhliziyweni zethu; ukugida kwethu sekuphenduke ukukhala. Umqhele usuwile ekhanda lethu. Maye thina, ngoba sonile! Ngenxa yalokhu izinhliziyo zethu zibuthakathaka; ngenxa yalezizinto amehlo ethu ayafiphala

Ngoba yonke imiphefumulo ephilayo ngeyami, uyise kanye lendodana  —  bobabili ngokufanayo ngabami. Umphefumulo owonayo yiwo ozakufa.

Umphefumulo owonayo yiwo ozakufa. Indodana kayiyikuba lecala likayise, loba uyise abe lecala lendodana. Ukulunga komuntu olungileyo kuzabalelwa kuye, lobubi bomubi buzamelana laye.

“Kodwa uma umuntu omubi ephenduka kuzo zonke izono azenzayo njalo agcine izimiso zami zonke enze okufaneleyo lokuqondileyo, uzaphila impela, akayikufa. Akukho kona kwakhe okuzakhunjulwa. Ngenxa yezinto ezilungileyo azenzileyo uzaphila. Ngiyathokoza na ngokufa komuntu omubi? kutsho uJehova Wobukhosi. Esikhundleni salokho, kangithabi na nxa bephenduka ezindleleni zabo njalo baphile?

“Kodwa uma umuntu olungileyo eguquka ekulungeni kwakhe enze izono njalo enze zona kanye izinto ezinengayo ezenziwa ngumuntu omubi, kambe uzaphila na? Akukho okwezinto ezilungileyo azenzayo okuzakhunjulwa. Ngenxa yecala lokungathembeki langenxa yezono azenzayo, uzakufa.

“Kodwa lina lithi, ‘Indlela kaJehova kayilunganga.’ Zwana, wena ndlu ka-Israyeli: Indlela yami kayifanelanga na?

Uma umuntu olungileyo eguquka ekulungeni kwakhe enze izono, uzakufela lokho; ngenxa yezono azenzileyo uzakufa.

Kodwa uma umuntu omubi ephenduka ebubini abenzileyo enze okufaneleyo lokuqondileyo, uzasilisa ukuphila kwakhe. Ngokuba ucabanga konke okubi akwenzayo aphenduke kukho, uzaphila impela; akayikufa.

Ikanti indlu ka-Israyeli ithi, ‘Indlela kaJehova kayilunganga.’ Izindlela zami kazilunganga na, wena ndlu ka-Israyeli?

“Ngakho-ke wena ndlu ka-Israyeli, lowo lalowo ngizamahlulela ngokumayelana lezindlela zakhe, kutsho uJehova Wobukhosi. Phendukani! Tshiyani ububi benu bonke; ngalokho isono kasiyikuba yikufa kwenu. Zikhululeni kukho konke okubi elikwenzileyo, lizuze inhliziyo entsha lomoya omutsha. Kungani na uzakufa, wena ndlu ka-Israyeli? Ngoba angithokozi ngokufa loba ngokukabani, kutsho uJehova Wobukhosi. Phendukani liphile!

Khonapho-ke lizakhumbula ukuziphatha kwenu lazo zonke izenzo elizingcolise ngazo, njalo lizazenyanya ngenxa yobubi bonke elibenzileyo.

Uma umuntu olungileyo eguquka ekulungeni kwakhe enze okubi, uzakufela lokho. Njalo uma umuntu omubi ephenduka ebubini bakhe enze okufaneleyo lokulungileyo, uzaphila ngenxa yokwenzanjalo.

Ngizakuchela ngamanzi ahlanzekileyo, uzahlambuluka; ngizakuhlambulula kukho konke ukungcola kwakho kanye lakuzo zonke izithombe zakho. Ngizakunika inhliziyo entsha ngifake lomoya omutsha phakathi kwakho; ngizasusa kuwe inhliziyo yakho yelitshe ngikunike inhliziyo yenyama.

Yikho ngaphendukela kuJehova uNkulunkulu ngamncenga ngomthandazo langokulabhela, langokuzila, ngigqoke amasaka ngazininda ngomlotha. Ngakhuleka kuJehova uNkulunkulu wami ngafakaza ngathi: “O Jehova, Nkulunkulu omkhulu, owesabekayo, ogcina isivumelwano sakhe sothando lalabo bonke abamthandayo, abagcina imilayo yakhe, senzile isono njalo senza okubi. Sisuke saxhwala, sahlamuka; siyifulathele imilayo yakho kanye lemithetho yakho. Kasizilalelanga izinceku zakho abaphrofethi abakhuluma ngebizo lakho emakhosini ethu, lamakhosana ethu lakubobaba lakubo bonke abantu belizwe.

O Jehova, thina lamakhosi ethu, lamakhosana ethu kanye labobaba sembeswe ngehlazo ngokuba senzile isono kuwe.

UJehova uNkulunkulu wethu ulesihawu, uyathethelela loba thina simhlamukele; kasimlalelanga uJehova uNkulunkulu wethu, njalo kasiyigcinanga imithetho asipha yona ngezinceku zakhe abaphrofethi.

Ngathi ngikhuluma njalo ngikhuleka, ngivuma isono sami, lesono sabantu bakithi abako-Israyeli, ngiletha isikhalo sami kuJehova uNkulunkulu wami ngentaba yakhe engcwele  —

Izixuku lezixuku zabaleleyo othulini lomhlaba bazavuka; abanye baye ekuphileni okungapheliyo, abanye baye ehlazweni lokunengeka okungapheliyo.

Buyela, we Israyeli, kuJehova uNkulunkulu wakho. Izono zakho yizo ezikuwisileyo!

“Lakhathesi,” kutsho uJehova, “phendukelani kimi ngezinhliziyo zenu zonke, ngokuzila langokukhala lokulila.” Dabulani izinhliziyo zenu hatshi izigqoko zenu. Buyelani kuJehova uNkulunkulu wenu, ngoba ulomusa lesihawu, uyaphuza ukuthukuthela njalo ulothando olukhulu, njalo uyaxola ukuthumela umonakalo.

Amaxuku, amaxuku esigodini sesinqumo! Ngoba usuku lukaJehova luseduze esigodini sezinqumo.

Abantu beNineve babekholwa kuNkulunkulu. Bamemezela ukuthi kuzilwe ukudla, njalo bonke kusukela komkhulu kusiya komncinyane bavunula amasaka. Ilizwi selifikile enkosini yaseNineve, yasukuma esihlalweni sayo sobukhosi, yakhumula izingubo zayo zobukhosi, yazembathisa isaka yahlala phansi ebhuqwini. Yase ikhupha isimemezelo eNineve esithi: “Ngomthetho wenkosi lezikhulu zayo: Akungavunyelwa muntu kumbe inyamazana, imihlambi yezinkomo loba eyezimvu ukuthi ithinte ulutho oludliwayo; makungavunyelwa kudle kumbe kunathe. Kodwa akuthi umuntu loba yinyamazana kwembathe amasaka. Wonke umuntu kamemeze ngokukhawuleza kuNkulunkulu. Kabadele izindlela zabo zobubi lobudlwangudlwangu babo. Ngubani okwaziyo na? Mhlawumbe uNkulunkulu angadeda kuthi ngesihawu sakhe aphenduke elakeni lwakhe olwesabekayo ukuze singabhubhi.” Kwathi uNkulunkulu esebonile abakwenzayo ukuthi baguquka ezindleleni zabo zobubi, wabazwela isihawu kazabe esabehlisela incithakalo ayesonge ngayo.

Ngenxa yokuba ngonile kuye, ngizalumela ulaka lukaJehova, aze angincengele endabeni yami, aveze ukungabi lacala kwami. Uzangikhuphela phandle ekukhanyeni; ngizabona ukulunga kwakhe.

Ngubani onguNkulunkulu njengawe, oxolela izono athethelele iziphambeko zensalela zelifa lakhe na? Kawuthukutheli kokuphela kodwa uthokoza ngokutshengisa isihawu. Uzakuba lesihawu kithi futhi; uzanyathela izono zethu ngezinyawo uphosele bonke ububi bethu ezinzikini zolwandle.

Uzabeletha indodana ozayetha ibizo uthi nguJesu, ngokuba uzasindisa abantu bakhe ezonweni zabo.”

esithi, “Phendukani ngokuba umbuso wezulu useduze.”

Abantu baqubuka baya kuye bevela eJerusalema lakulo lonke eleJudiya lommango wonke waseJodani. Wababhaphathiza eMfuleni iJodani, bevuma izono zabo.

Kodwa wathi ebona abaFarisi labaSadusi abanengi besiza lapho ayebhaphathizela khona, wathi kubo, “Lina nzalo yezinyoka! Ngubani olixwayisileyo ukuthi libalekele ulaka oluzayo na? Vezani izithelo ezifanele ukuphenduka.

Khathesi nje ihloka livele seleyanyisiwe ezimpandeni zezihlahla, ukuthi zonke lezozihlahla ezingatheli izithelo ezinhle zizaganyulelwa phansi ziphoselwe emlilweni. “Mina ngilibhaphathiza ngamanzi, kubonisa ukuphenduka. Kodwa ngemva kwami kuzakuza olamandla kulami, njalo kakungilingananga ukuthwala amanyathelo akhe. Uzalibhaphathiza ngoMoya oNgcwele langomlilo. Isitsha sakhe sokwela sisesandleni sakhe, njalo uzathanyela isiza sakhe, abuthele wonke amabele esiphaleni, kuthi amakhoba awatshise ngomlilo ongacimiyo.”

Kwafika uJesu evela eGalile weza eJodani ukuba abhaphathizwe nguJohane. Kodwa uJohane wazama ukumvala ngokuthi, “Yimi engiswela ukubhaphathizwa nguwe, kanti pho ungeza njani kimi?” UJesu waphendula wathi, “Yekela kube njalo okwalesi isikhathi; kufanele ukuba sikwenze lokhu ukuze sanelise konke ukulunga.” Ngakho uJohane wasevuma.

abantu ababehlezi emnyameni sebebone ukukhanya okukhulu; kulabo abahlezi elizweni lethunzi lokufa ukukhanya sekufikile.” Kusukela kulesosikhathi uJesu waqalisa ukutshumayela esithi, “Phendukani ngokuba umbuso wezulu ususondele.”

“Babusisiwe abampofu emoyeni ngoba umbuso wezulu ngowabo. Babusisiwe labo abakhalayo ngoba bazaduduzwa. Babusisiwe abathobekileyo, ngoba bazazuza ilifa lomhlaba. Babusisiwe labo abalambela bomele ukulunga, ngoba bazasuthiswa. Babusisiwe abalesihawu, ngoba bazakwenzelwa isihawu. Babusisiwe abahlanzekileyo enhliziyweni ngoba bazabona uNkulunkulu. Babusisiwe abalamulayo, ngoba bazathiwa ngamadodana kaNkulunkulu. Babusisiwe abahlukunyezwayo ngenxa yokulunga, ngoba umbuso wezulu ungowabo.

Ngilitshela iqiniso ukuthi kuze kunyamalale izulu lomhlaba kakuyikususwa lutho eMthethweni, loba libadlana kumbe lichatshana elilotshiweyo, kuze kupheleliswe konke. Loba ngubani owephula owodwa nje wale imilayo emincinyane, afundise abanye ukwenza njalo uzathiwa mncinyane okudlulayo embusweni wezulu, kodwa loba ngubani olandela njalo afundise imilayo le uzathiwa mkhulu embusweni wezulu. Yikho ngiyalitshela ukuthi ngaphandle kokuthi ukulunga kwenu kudlule okwabaFarisi labafundisi bomthetho, ngempela kalizukuwungena umbuso wezulu.

Nxa ilihlo lakho lokunene likwenzisa isono likhuphuluze ulikhuphe ulilahlele khatshana. Kungcono kuwe ukuthi ulahlekelwe ngesisodwa isitho somzimba wakho kulokuthi umzimba wakho wonke uphoselwe esihogweni somlilo. Njalo nxa isandla sakho sokunene sikwenzisa isono, siqume usiphosele kude. Kungcono kuwe ukuthi ulahlekelwe ngesisodwa isitho somzimba wakho kulokuthi umzimba wakho wonke uye esihogweni somlilo.

Ngakho wobani ngabapheleleyo njengalokhu uYihlo wenu wasezulwini ephelele.

“Kumele lithandaze kanje: ‘Baba wethu osezulwini, malihlonitshwe ibizo lakho, umbuso wakho kawuze, intando yakho yenziwe emhlabeni njengalokhu isenziwa ezulwini. Siphe lamuhla ukudla kwethu kwensuku zonke. Sixolele imilandu yethu, njengoba lathi sesibaxolele abalemilandu kithi. Ungasikhokheleli ekulingweni, kodwa usisindise koMubi.’

Phela uma libaxolela abantu nxa belonile uYihlo osezulwini laye uzalixolela. Kodwa uma lingabaxoleli abantu izono zabo uYihlo kayikulixolela izono zenu.

“Ilihlo liyisibane somzimba. Nxa amehlo akho elungile umzimba wakho wonke uzagcwala ukukhanya. Kodwa nxa amehlo akho emabi umzimba wakho wonke uzagcwala ubumnyama. Pho uma ukukhanya okungaphakathi kwakho kungumnyama, mkhulu kanganani kambe lowomnyama!

“Kakho ongakhonza amakhosi amabili. Mhlawumbe uzathanda enye azonde enye, loba uzabambelela kwenye azonde enye. Lingazake likhonze uNkulunkulu njalo leMali.

Kodwa funani kuqala umbuso wakhe lokulunga kwakhe, kuzakuthi-ke zonke lezizinto liziphiwe lazo.

“Ngenani ngesango elincinyane ngokuba likhulu isango lendlela ibanzi eya ekubhujisweni, njalo banengi abangena ngalo. Kodwa lincinyane isango lendlela ilukhonjwana eya ekuphileni, njalo balutshwana abayifumanayo.

Kanjalo sonke isihlahla esihle sithela izithelo ezinhle, kodwa isihlahla esibi sithela ezimbi. Isihlahla esihle ngeke sithele izithelo ezimbi njalo lesihlahla esibi kasitheli izithelo ezinhle. Zonke izihlahla ezingatheli izithelo ezinhle ziyaganyulwa ziphoselwe emlilweni. Ngakho-ke lizabazi ngezithelo zabo.

“Kakusibo bonke abathi kimi, ‘Nkosi, Nkosi’ abazangena embusweni wezulu, kodwa ngulowo kuphela owenza intando kaBaba osezulwini. Abanengi bazakuthi kimi ngalolosuku, ‘Nkosi, Nkosi, kasiphrofethanga ngegama lakho na, njalo ngegama lakho sakhupha amadimoni senza lezimangaliso?’ Lapho-ke ngizabatshela kakuhle ngithi, ‘Ngivele kangilazi. Xekani kimi, lina benzi bobubi!’

Bonke abantu bazalizonda ngenxa yami, kodwa lowo omayo aqine kuze kube sekupheleni uzasindiswa.

Lingabesabi labo ababulala umzimba kodwa bengeke babulale umphefumulo. Kodwa yesabani lowo ongabhubhisa kokubili umphefumulo lomzimba esihogweni.

“Loba ngubani ongivuma phambi kwabantu lami ngizamvuma phambi kukaBaba ezulwini. Kodwa lowo ongiphikayo phambi kwabantu lami ngizamphika phambi kukaBaba ezulwini.

“Lowo othanda uyise loba unina kulami kangifanelanga; lowo othanda indodana yakhe loba indodakazi yakhe kulami kangifanelanga; njalo lowo ongathathi isiphambano sakhe angilandele kangifanelanga. Loba ngubani ozuza impilo yakhe izamlahlekela, njalo lalowo olahlekelwa yimpilo yakhe ngenxa yami uzayizuza.

UJesu waseqalisa ukuwasola amadolobho lawo lapho imimangaliso yakhe eminengi yayenziwe khona ngokuba kabazange baphenduke:

Ngokuba enhliziyweni kuphuma imicabango emibi, ukubulala, ukufeba, ukuphinga, ubusela, ukufakaza amanga lokunyeya.

Kuzamsiza ngani umuntu uma ezuza wonke umhlaba, kodwa alahlekelwe ngumphefumulo wakhe na?

Wasesithi, “Ngiqinisile ngithi kini, ngaphandle kokuba liguquke libe njengabantwana abancinyane, kalisoze lafa langena embusweni wezulu.

Kodwa loba ngubani owenza omunye walaba abancinyane abakholwa kimi ukuthi enze isono, kungaba ngcono kuye ukuthi kulengiswe entanyeni yakhe ilitshekazi lokuchola agaluliswe enzikini yolwandle.

Aluba isandla sakho loba unyawo lwakho lukwenzisa isono kuqume ukulahle. Kungcono kuwe ukuba ungene ekuphileni uyingini kumbe ugogekile kulokuba lezandla ezimbili kumbe izinyawo ezimbili ujinge uphoselwe emlilweni waphakade. Aluba ilihlo lakho likwenzisa isono, likopole ulilahle. Kungcono kuwe ukungena ekuphileni ulelihlo elilodwa kulokuba lamehlo amabili kodwa uphoselwe emlilweni wesihogo.

UPhethro weza kuJesu wabuza wathi, “Nkosi, umfowethu ngizamthethelela kangaki nxa elokhu engona na? Kuze kube kakhombisa na?” UJesu waphendula wathi, “Ngithi, hatshi kakhombisa, kodwa okwezikhathi ezingamatshumi ayisikhombisa lesikhombisa.

“Yiyo le indlela uBaba osezulwini azaphatha ngayo lowo lalowo wenu uma lingathetheleli umfowenu kuphuma enhliziyweni.”

Njalo bonke labo abatshiye izindlu zabo, loba abafowabo, loba odadewabo kumbe uyise loba unina kumbe abantwana loba amasimu ngenxa yami bazakwamukeliswa okwandiswe ngekhulu njalo bazakudla ilifa lokuphila kwaphakade.

njengeNdodana yoMuntu engezelanga ukuzakhonzwa, kodwa ukukhonza, lokunikela ukuphila kwayo kube lihlawulo labanengi.”

Ngoba uJohane weza kini ukuzalitshengisa indlela yokulunga, kodwa kalimkholwanga, ikanti abathelisi lezifebe bamkholwa. Kwathi lokuba selikubonile konke lokhu kalimkholwanga.

“Kodwa kwathi inkosi ingena ukuzabona izethekeli yananzelela khonapho indoda eyeyingavunulanga izigqoko zomtshado. Yabuza yathi, “Mfowethu, ungene njani lapha ungelazigqoko zomthimba?’ Indoda yatsha amathe. “Inkosi yase itshela izithunywa zayo yathi, ‘Mbopheni izandla lezinyawo limphosele ngaphandle ebumnyameni, lapho okuzakuba khona ukukhala lokugedla amazinyo.’ “Ngokuba banengi ababiziweyo kodwa balutshwana abakhethiweyo.”

UJesu waphendula wathi, “ ‘Thanda iNkosi uNkulunkulu wakho ngenhliziyo yakho yonke langomphefumulo wakho wonke langengqondo yakho yonke.’ Yiwo oyingqala njalo odlula yonke imilayo. Owesibili unjengawo: ‘Thanda umakhelwana wakho njengalokhu uzithanda wena.’ Wonke uMthetho labaPhrofethi kweyeme kuyonale imilayo emibili.”

kodwa lowo oma aqine kuze kube sekupheleni uzasindiswa.

“Kulesosikhathi umbuso wezulu uzakuba njengezintombi ezilitshumi ezathatha izibane zazo zaphuma ukuyahlangabeza umyeni. Ezinhlanu zazo zaziyiziwula, ezinhlanu zihlakaniphile. Eziyiziwula zathatha izibane zazo kodwa kazithathanga amafutha. Kodwa ezihlakaniphileyo zathwala amafutha emagabheni kanye lezibane zazo. Umyeni waphuza ukufika zonke zaze zawozela zathathwa yibuthongo. “Phakathi kobusuku kwamenyezelwa kwathiwa, ‘Nangu umyeni! Phumani limhlangabeze!’ “Zasezivuka zonke izintombi zalumathisa izibane zazo. Lezo ezaziyiziwula zathi kwezihlakaniphileyo, ‘Ake lisiphe lathi amanye amafutha enu; izibane zethu ziyacima.’ “Zaphendula ezihlakaniphileyo zathi, ‘Hatshi, kakulamafutha angasanela thina lani. Hambani liye kulabo abathengisa amafutha liyozithengela awenu.’ “Kodwa kwathi besayathenga amafutha umyeni wafika. Izintombi ezazizilungiselele zangena laye edilini lomthimba. Umnyango wase uvalwa. “Ngemuva kwesikhathi ezinye lazo zatsho sezifikile. Zathi, ‘Mnumzana! Mnumzana! Ake usivulele umnyango!’ “Kodwa waphendula wathi, ‘Ngiqinisile, kangilazi.’

“Nxa iNdodana yoMuntu isisiza ngenkazimulo yayo, ikanye lezingilosi zonke, izahlala esihlalweni sayo sobukhosi ilenkazimulo yasezulwini. Zonke izizwe zizabuthaniswa phambi kwayo, ibe isisahlukanisa abantu omunye komunye njengomalusi esahlukanisa izimvu ezimbuzini. Izabeka izimvu ngasekunene kwayo lezimbuzi ngasekhohlo. Lapho-ke iNkosi izakuthi kulabo abangasekunene kwayo, ‘Wozani, lina elibusisiweyo nguBaba; thathani ilifa lenu, umbuso owalungiselwa lina kulokhu kwadalwa umhlaba. Ngokuba ngangilambile, langinika ulutho oludliwayo, ngangomile langipha okunathwayo, ngangiyisihambi langingenisa, ngangiswela izambatho langigqokisa, ngangigula langonga, ngangisentolongweni lazongibona.’ “Abalungileyo bazamphendula bathi, ‘Nkosi, sakubona nini ulambile sakupha ukudla na, kumbe womile sakunathisa? Sakubona nini uyisihambi sakungenisa na, kumbe uswela izambatho sakugqokisa? Sakubona nini ugula kumbe usentolongweni seza sazakubona na?’ “INkosi izaphendula ithi, ‘Ngilitshela iqiniso ukuthi loba yini elayenzela loba ngomncinyane kanganani walaba abazalwane bami, lakwenzela mina.’ “INkosi izakuthi kulabo abasekhohlo kwayo, ‘Xekani kimi lina elithukiweyo liye emlilweni wanininini owalungiselwa uSathane lezingilosi zakhe. Ngokuba ngangilambile, kalingiphanga lutho lokudla, ngangomile kalingiphanga lutho lokunatha, ngangiyisihambi kalingingenisanga, ngangiswela izambatho kalingigqokisanga, ngangigula njalo ngisentolongweni kalizange lingidinge.’ “Labo bazaphendula bathi, ‘Nkosi, sakubona nini ulambile kumbe womile kumbe uyisihambi kumbe ungelazigqoko kumbe ugula noma usentolongweni asaze sakunceda na?’ “Izaphendula ithi, ‘Ngiqinisile ngithi, loba kuyini elingakwenzelanga oyedwa nje omncinyane kulabo bonke walaba, kalikwenzelanga mina.’ “Bazasuka baye ekujezisweni kwaphakade, kodwa abalungileyo baye ekuphileni okungapheliyo.”

Leli ligazi lami lesivumelwano elichithelwe abanengi ukuthethelelwa kwezono.

Lindani likhuleke ukuze lingaweli ekulingweni. Umoya uyathanda kodwa umzimba ubuthakathaka.”

UJesu esephindile ukumemeza ngelizwi elikhulu, umoya wakhe waphuma. Kusonaleso isikhathi ikhetheni lethempeli laqhekezeka kabili kusukela phezulu kusiya phansi. Umhlaba wazamazama lamatshe aqhekezeka.

Ngakho hambani lenze abafundi ezizweni zonke, libabhaphathize ebizweni likaBaba, leleNdodana lelikaMoya oNgcwele,

Kwasekufika uJohane ebhaphathiza emmangweni wasenkangala etshumayela ukubhaphathiza kokuphenduka ukuze kuthethelelwe izono. Ummango wonke waseJudiya kanye labantu bonke baseJerusalema baphuma beza kuye. Bavuma izono zabo, wababhaphathiza eMfuleni uJodani.

Wathi, “Isikhathi sesifikile. Umbuso kaNkulunkulu ususeduze. Phendukani likholwe izindaba ezinhle!”

Nxa indawo ethile ingalamukeli ngesihle loba nxa ingalilaleli kalibothintitha uthuli ezinyaweni zenu nxa selisuka kuyo, kube yibufakazi lokubalahla.” Basuka bahamba betshumayela ukuthi abantu kabaphenduke.

Waqhubeka wathi: “Okuphuma phakathi komuntu yikho okumenza ‘ongahlanzekanga’. Ngokuba okusuka ngaphakathi, okusuka enhliziyweni, kuphuma imicabango emibi, ukufeba, ukweba, ukubulala, ukuphinga, ubuhwaba, umona, ubuqili, ukuxhwala, umhawu, ukugcona, ubuqholo lobuthutha. Zonke lezi izono ziphuma ngaphakathi zenze umuntu abe ‘ngongahlanzekanga.’ ”

Wasebiza ixuku labantu kanye labafundi bakhe wathi, “Aluba umuntu efuna ukungilandela, kumele azidele athathe isiphambano sakhe angilandele. Ngoba yilowo ofuna ukulondoloza impilo yakhe izamlahlekela, kodwa olahlekelwa yimpilo yakhe ngenxa yami kanye levangeli uzayilondoloza. Kumsizani umuntu ukuzuza wonke umhlaba kodwa alahlekelwe ngumphefumulo wakhe? Loba, kuyini umuntu angakunika kube yinhlawulo yomphefumulo wakhe na?

Aluba umuntu elamahloni ngami kanye lamazwi ami kulesi isizukulwane esifebayo lesonayo, iNdodana yoMuntu izakuba lamahloni ngaye nxa isifika enkazimulweni kaYise lezingilosi ezingcwele.”

Aluba isandla sakho sikwenzisa ukona, siqume. Kungcono kuwe ukuthi ungene ekuphileni ungungini kulokuya esihogweni ulezandla ezimbili, lapho umlilo wakhona ongacimiyo, ( lapho impethu yakhona engafiyo lomlilo kawucimi).

Njalo uma unyawo lwakho lukwenzisa isono, luqume. Kungcono kuwe ukuthi ungene ekuphileni uyisilima kulokuthi ulezinyawo ezimbili uphoselwe esihogweni ( lapho impethu yakhona engafiyo lomlilo wakhona kawucimi.)

Njalo uma ilihlo lakho likonisa, likhuphuluze liphume. Kungcono kuwe ukungena umbuso kaNkulunkulu ulelihlo elilodwa kulokuba lamehlo amabili kodwa uphoselwe esihogweni, lapho “ ‘impethu yakhona kayifi, lomlilo kawucimi.’

Ngilitshela iqiniso ukuthi loba ngubani ongayikwemukela umbuso kaNkulunkulu njengomntwana omncane kayikungena kuwo.”

Ngoba leNdodana yoMuntu kayizelanga ukuzakhonzwa, kodwa ukuzakhonza, njalo ukunikela impilo yayo ibe yinhlawulo yabanengi.”

Njalo uma lisima likhuleka, nxa lilesikhwili komunye, mthetheleleni, ukuze uYihlo ezulwini alithethelele izono zenu.

Kodwa nxa lingathetheleli, loYihlo osezulwini kazukulithethelela izono zenu.”

Bonke abantu bazalizonda ngenxa yami, kodwa lowo omayo aqine kuze kube sekupheleni uzasindiswa.

Wathi kubo, “Leli ligazi lami lesithembiso elichithelwa abanengi.

Wathi, “Abha, Baba, konke kungenzakala kuwe. Ake ususe inkezo le kimi. Kodwa kakungabi yintando yami, kodwa kube yintando yakho.”

Lindani likhuleke ukuze lingaweli ekulingweni. Umoya uyathanda, kodwa umzimba ubuthakathaka.”

Loba ngubani okholwayo abhaphathizwe uzasindiswa, kodwa lowo ongakholwayo uzalahlwa.

Isihawu sakhe sifinyelela kulabo abamesabayo, kulandela isizukulwane ngesizukulwane.

ngobungcwele langokulunga phambi kwayo ngazo zonke izinsuku zethu.

ukunika abantu bayo ukwazi insindiso ngokuthethelelwa kwezono zabo,

Wawuhamba wonke ummango waseJodani, etshumayela ubhaphathizo lokuphenduka ukuze izono zithethelelwe.

UJohane wathi emaxukwini abantu abezayo ukuthi azobabhaphathiza, “Lina nzalo yezinyoka! Lilimukiswe ngubani ukuthi libalekele ulaka oluzayo na? Thelani izithelo ezihambelana lokuphenduka. Futhi lingaziyengi ngokuthi, ‘Thina silo-Abhrahama ongubaba wethu.’ Ngoba ngilitshela ukuthi ngawonala amatshe uNkulunkulu angamenzela abantwana u-Abhrahama. Ihloka selibekiwe ezimpandeni zezihlahla, kuthi-ke lesosihlahla esingatheliyo izithelo ezilungileyo sizaqunywa siphoselwe emlilweni.”

Labathelisi labo beza ukuzabhaphathizwa. Babuza bathi, “Mfundisi, kumele senzeni na?”

Kwathi bonke abantu bebhaphathizwa, loJesu laye wabhaphathizwa. Wathi ekhuleka izulu lavuleka

“UMoya weNkosi uphezu kwami, ngokuba ingigcobile ukutshumayela izindaba ezinhle kubayanga. Ingithumile ukumemezela ukukhululwa kwezibotshwa lokusiliswa kweziphofu zibone, ukukhululwa kwabacindezelweyo,

Kwathi uSimoni Phethro ekubona lokhu wazilahla phansi phambi kukaJesu wathi, “Suka kimi, Nkosi; ngingumuntu oyisoni!”

Wobani lesihawu njengoYihlo olesihawu. “Lingehluleli, yikho lani kaliyikwehlulelwa. Lingamlahli omunye, yikhona lani lingayikulahlwa. Thethelelani, lani lizathethelelwa.

Kodwa abaFarisi lezazi zomthetho bayala injongo kaNkulunkulu ngabo, ngokuba babengabhaphathizwanga nguJohane.)

Kawuthelanga amafutha ekhanda lami, kodwa yena uthele amakha ezinyaweni zami. Yikho-ke ngiyakutshela ukuthi izono zakhe ezinengi sezithethelelwe  —  ngokuba utshengise uthando olukhulu. Kodwa lowo othethelelwe okuncinyane uthanda kancinyane.” UJesu wasesithi kowesifazana, “Izono zakho sezithethelelwe.”

Wasesithi kubo bonke: “Nxa ekhona ofisa ukungilandela kufanele azidele athwale isiphambano sakhe izinsuku zonke angilandele. Ngoba lowo ofisa ukuphephisa impilo yakhe izamlahlekela, kodwa lowo olahlekelwa yimpilo yakhe ngenxa yami uzayiphephisa. Kumsizani umuntu ukuzuza wonke umhlaba kodwa alahlekelwe loba ancitshwe ubunguye bakhe na?

Nxa umuntu eyangeka ngami langamazwi ami, iNdodana yoMuntu izayangeka ngaye nxa isifikile ngenkazimulo yayo langenkazimulo kaYise lezingilosi ezingcwele.

UJesu waphendula wathi, “Kakho othi angabamba ikhuba elima athalaze emuva owufaneleyo umsebenzi oqondane lombuso kaNkulunkulu.”

Wathi kubo, “Nxa likhuleka, alibokuthi: “ ‘Baba, kalidunyiswe ibizo lakho, umbuso wakho kawuze, Siphe usuku ngosuku isinkwa sethu sansuku zonke. Sithethelele izono zethu, ngokuba lathi siyabathethelela bonke abasonayo thina. Njalo ungasiholeli ekulingweni.’ ”

“Ngiyalitshela, lowo ongivumayo phambi kwabantu iNdodana yoMuntu layo izamvuma phambi kwezingilosi zikaNkulunkulu. Kodwa lowo ongiphikayo phambi kwabantu uzaphikwa phambi kwezingilosi zikaNkulunkulu.

UJesu waphendula wathi, “Kambe likhumbula ukuthi amaGalile lawo ayeyizoni okudlula amanye amaGalile ngoba bahlupheka kanjalo na? Ngithi, hatshi! Kodwa, ngaphandle kokuba liphenduke lani lonke lizabhubha. Kumbe labo abalitshumi lesificamibili abafayo baze bawelwe ngumphotshongo waseSilowani  —  licabanga ukuthi babonile okudlula bonke ababehlala eJerusalema na? Ngithi, hatshi! Kodwa, ngaphandle kokuba liphenduke lani lonke lizabhubha.”

Ngilitshela ukuthi ngaleyondlela kuzakuba lokuthokoza ezulwini ngokuphenduka kwesoni esisodwa okudlula labobantu abalungileyo abangamatshumi aficamunye lesificamunye abangasweli ukuphenduka.

Ngiyalitshela ukuthi ngaleyondlela kulokuthokoza phambi kwezingilosi zikaNkulunkulu ngesoni esisodwa nxa siphenduka.”

UJesu waqhubeka wathi: “Kwakukhona indoda eyayilamadodana amabili. Encinyane yathi kuyise, ‘Baba, ngipha esami isabelo selifa.’ Ngakho uyise wasebehlukanisela impahla yakhe bobabili. “Ngemuva kwesikhatshana indodana encane yabutha konke okungokwayo, yasuka yaya elizweni elikude yafika khonale yayichitha inotho yayo ngempilo yokuxhwala. Isitshaye yachitha konke, kwaba khona indlala enkulu kulolonke ilizwe lelo, yasiswela kakhulu. Yasisiyadinga umsebenzi komunye umuntu wakulelo lizwe owayisa esiqintini sakhe ukuyagcina izingulube. Yabona kungcono kuyo ukuthi ixotshe iphango ngalawo makhafutha ayedliwa yizingulube, kodwa kayizange iphiwe lutho langubani. “Kwathi lapho ingqondo yayo isibuyile yathi, ‘Kambe zingaki izisebenzi zikababa ezidla zize zitshiye, kodwa nanku mina ngisifa yindlala! Ngizasuka ngibuyele kubaba ngifike ngithi kuye: Baba, ngenzile isono phambi kwezulu lakuwe. Kangisafanelanga ukuthiwa ngiyindodana yakho; ngenza ngibe njengomunye wezisebenzi zakho.’ Ngakho yaphakama yaya kuyise. “Kodwa kwathi ilokhu isebucwala uyise wayibona wayizwela isihawu; wagijimela kuyo indodana yakhe, wayigona, wayanga. “Indodana yathi kuye, ‘Baba, ngenzile isono phambi kwezulu lakuwe. Kangisafanelanga ukuthiwa ngiyindodana yakho.’ “Kodwa uyise wathi ezincekwini zakhe, ‘Phangisani! Lethani isigqoko esihle okudlula ezinye limgqokise. Lifake indandatho emunweni wakhe, limgqokise lamanyathela ezinyaweni zakhe. Beseliletha ithole elinonisiweyo lilihlabe. Kasenzeni idili sithokoze. Ngokuba indodana yami le yayisifile kodwa isiphila njalo; yayilahlekile manje isifunyenwe.’ Waqalisa manje umkhosi wokujabula. “Sonke lesi isikhathi indodana endala yayisensimini. Yathi isisondele yezwa kuhlatshelelwa njalo kugidwa. Yasibiza omunye wezisebenzi yambuza ukuthi kwakusenzakalani. Waphendula wathi, ‘Umnawakho usebuyile, ngakho uyihlo usemhlabele ithole elinonisiweyo ngokuba ubuyile ephilile, ephelele.’ “Umnewabo wazonda wafa, wala ukungena ngekhaya. Uyise wasephuma esiya kuye ukuyamncenga. Kodwa waphendula uyise wathi, ‘Khangela! Iminyaka yonke le bengikusebenzela ngikuginqela, njalo kangizange ngeqe imilayo yakho. Kodwa kawukaze ungiphe lokulizinyane kodwa ukuthi lami kengithokoze labangane bami. Kodwa kuthi nxa indodana yakho le esitshaye yathintitha inotho yakho lezifebe, isibuyile ekhaya uyihlabele ithole elinonisiweyo!’ “Uyise wathi, ‘Ndodana yami, uhlezi ulami sonke isikhathi, njalo konke engilakho kungokwakho. Kodwa bekufanele sithokoze sijabule, ngokuba umfowenu lo wayesefile, manje esephila njalo; ubelahlekile, usefunyenwe,’ ”

“Sathi, ‘Hatshi, baba Abhrahama, kodwa aluba kusuka umuntu kwabafileyo aye kubo bazaphenduka.’ “Wathi kuso, ‘Nxa bengalaleli uMosi labaPhrofethi, kabasoze bavume loba omunye angaze avuke kwabafileyo.’ ”

Ngakho lina ziqapheleni. “Aluba umfowenu esenza isono, mkhuze, kuthi nxa ezisola, mthethelele. Aluba esona kuwe kakhombisa ngosuku lulunye, eze kuwe kakhombisa esithi, ‘Ngiyaxolisa,’ mthethelele.”

“Kodwa umthelisi wema laphayana kude laye. Wesaba kanye lokukhangela ezulwini, kodwa wazidutshuza esifubeni wathi, ‘Nkulunkulu, woba lesihawu kimi engiyisoni.’

Ngokuba iNdodana yoMuntu yalanda ukudinga lokusindisa lokho okwakulahlekile.”

Wasethatha isinkwa, wabonga wasesihlephula wabapha, wathi, “Lo ngumzimba wami ophiwe lina; kwenzeni lokhu kube yisikhumbuzo sami.” Ngaleyondlela, ngemva kokudla kwakusihlwa wathatha inkomitshi, wathi, “Inkomitshi le iyisivumelwano esitsha egazini lami elichithelwa lina.

Esefikile kuleyondawo, wathi kubo, “Khulekani ukuze lingaweli ekulingweni.”

“Baba, uma uthanda susa inkomitshi le kimi; kodwa akungabi ngeyami intando, kodwa kwenziwe eyakho.”

Omunye wezigebengu owayelenga khonapho wamthuka wathi, “Kanti kawusuwe uKhristu? Zisindise wena kanye lathi!” Kodwa esinye isigebengu samkhuza sathi, “Kawumesabi na uNkulunkulu, njengoba ulesigwebo sinye laye. Thina sijeziswa ngokusifaneleyo, ngoba sizuza lokho okufanele izenzo zethu. Kodwa umuntu lo kenzanga lutho olungalunganga.” Wasesithi, “Jesu, ungikhumbule nxa ungafika embusweni wakho.” UJesu wamphendula wathi, “Ngiyakutshela iqiniso ngithi, lamuhla uzakuba lami epharadisi.”

Wabatshela wathi, “Nanku okulotshiweyo: UKhristu uzahlupheka aphinde avuke kwabafileyo ngosuku lobuthathu, njalo ukuphenduka lokuthethelelwa kwezono kuzatshunyayelwa ebizweni lakhe ezizweni zonke, kuqaliswa eJerusalema.

Ikanti kulabo bonke abamemukelayo, kulabo abakholwayo ebizweni lakhe, wabapha ilungelo lokuba ngabantwana bakaNkulunkulu  — abantwana abangazalwanga ngendlela yemvelo, kumbe ngokuzikhethela komuntu, loba ngokuthanda kwendoda, kodwa abazelwe ngokukaNkulunkulu.

Ngelanga elilandelayo uJohane wabona uJesu esiza kuye wathi, “Khangelani, nansi iMvana kaNkulunkulu esusa isono somhlaba!

Esephendula uJesu wathi, “Ngiyaqinisa ngithi ngaphandle kokuba umuntu azalwe futhi, angeke awubone umbuso kaNkulunkulu.”

UJesu waphendula wathi, “Ngiyaqinisa ngithi, ngaphandle kokuthi umuntu azalwe ngamanzi langoMoya, angeke awungene umbuso kaNkulunkulu. Inyama izala inyama, kodwa uMoya uzala umoya. Ungamangaliswa yikuthi kwami, ‘Limele lizalwe njalo.’

NjengoMosi waphakamisa inyoka enkangala, ngokunjalo iNdodana yoMuntu imele iphakanyiswe, ukuze kuthi lowo lalowo okholwayo kuyo abelokuphila okungapheliyo. “UNkulunkulu walithanda ilizwe waze wanikela iNdodana yakhe iyiyo yodwa ukuze kuthi loba ngubani okholwa kuyo angabhubhi kodwa abe lokuphila okungapheliyo. Ngokuba uNkulunkulu kathumanga iNdodana yakhe emhlabeni ukuba iwulahle umhlaba, kodwa ukuba umhlaba usindiswe ngayo. Loba ngubani okholwa kuyo kalahlwa, kodwa ongakholwayo uvele uselahliwe ngokuba kakholwanga ebizweni leNdodana eyiyo yodwa kaNkulunkulu. Nanku ukuqunywa kwecala: Ukukhanya sekufikile emhlabeni, kodwa abantu bathanda ubumnyama kulokukhanya ngokuba imisebenzi yabo yayimibi. Wonke umuntu owenza ububi uyakuzonda ukukhanya, njalo kezi ekukhanyeni ngoba esesaba ukuthi izenzo zakhe zizadalulwa. Kodwa loba ngubani ophila ngeqiniso uyeza ekukhanyeni ukuze kubonakale kamhlophe ukuthi lokho akwenzileyo ukwenze ngoNkulunkulu.”

Ngemuva kwalokhu uJesu labafundi bakhe basuka baya emaphandleni aseJudiya lapho ahlala labo okwesikhathi esithile, ebhaphathiza.

Loba ngubani obeke ithemba lakhe eNdodaneni ulokuphila okungapheliyo, kodwa loba ngubani oyilahlayo iNdodana kazukuyibona leyompilo ngokuba ulaka lukaNkulunkulu seluphezu kwakhe.”

UNkulunkulu ungumoya, labo abamkhonzayo bamele bamkhonze ngomoya langeqiniso.”

Muva kwalokho uJesu wayifumana ethempelini indoda leyo wathi kuyo, “Khangela-ke usuphila njalo. Khawula ukwenza isono funa okubi okudlulayo kungakwehlela.”

“Ngiqinisile ngithi lowo owezwayo amazwi ami amkholwe lowo ongithumileyo ulokuphila okungapheliyo njalo kazukulahlwa; usechaphile wasuka ekufeni waya ekuphileni.

“Kakungalimangalisi lokhu ngokuba siyeza isikhathi lapho kuzakuthi bonke abasemathuneni abo bezalizwa ilizwi layo baphume  —  labo abenze okuhle bazavuka baphile, lalabo abenze ububi bazavuka balahlwe.

Konke lokho uBaba anginika khona kuzakuza kimi, njalo lowo ozayo kimi kangisoze ngimlahle.

Ngokuba intando kaBaba iyikuthi bonke abakhangela eNdodaneni bakholwe kuyo bazakuba lokuphila okungapheliyo, njalo ngizabavusa ngosuku lokucina.”

Kakho ongeza kimi ngaphandle kokuthi uBaba ongithumileyo amsondeze, mina-ke ngizamvusa ngosuku lokucina. Kulotshiwe kubaPhrofethi ukuthi: ‘Bonke bazafundiswa nguNkulunkulu.’ Wonke lowo olalela uBaba afunde kuye uyeza kimi.

Ngiqinisile ukuthi lowo okholwayo ulokuphila okungapheliyo.

Ngiyisinkwa esiphilayo esehlela phansi sivela ezulwini. Nxa umuntu angasidla lesisinkwa, uzaphila laphakade. Lesosinkwa siyinyama yami engizayinikela ukuphila komhlaba.”

UJesu wathi kubo, “Ngiqinisile ngithi, ngaphandle kokuba lidle inyama yeNdodana yoMuntu, linathe igazi layo, kalilakuphila phakathi kwenu. Lowo odla inyama yami njalo anathe igazi lami ulokuphila okungapheliyo, njalo ngizamvusa ngosuku lokucina. Ngokuba inyama iyikhona kudla okuqotho legazi lami liyikunatha okuqotho. Lowo odla inyama yami njalo anathe igazi lami uhlala kimi, lami kuye. Njengoba uBaba ophilayo wangithuma njalo ngiphila ngenxa kaBaba, kanjalo lowo odla mina uzaphila ngenxa yami. Lesi yiso isinkwa esehlayo sivela ezulwini. Okhokho benu badla imana kodwa bafa, kodwa odla lesisinkwa uzaphila lanininini.”

Kwathi uJesu esekhuluma ebantwini njalo wathi, “Ngiyikukhanya komhlaba. Loba ngubani ongilandelayo kasoze ahambe ebumnyameni lanini, kodwa uzakuba lokukhanya kokuphila.”

Ngilitshelile ukuthi lizafela ezonweni zenu; uma lingakholwa ukuthi nginguye engithi nginguye, ngempela lizafela ezonweni zenu.”

UJesu wathi kubaJuda abamkholwayo, “Uma libambelela emfundisweni yami lingabafundi bami ngempela. Ngakho lizalazi iqiniso, njalo iqiniso lizalikhulula.”

Siyakwazi ukuthi uNkulunkulu kazilaleli izoni. Ulalela umuntu olobunkulunkulu owenza intando yakhe.

Ngilazo ezinye izimvu ezingasizo zalo umhlambi. Lazo ngimele ngizilethe. Lazo futhi zizalilalela ilizwi lami, ukuze kube lomhlambi owodwa lomalusi oyedwa.

kodwa kalikholwa ngokuba kalisibo abomhlambi wami. Ezami izimvu ziyalilalela ilizwi lami; ngiyazazi lazo ziyangilandela. Ngizipha ukuphila okungapheliyo, kazisoze zabhubha; kakho ongazihlwitha esandleni sikaBaba.

UJesu wathi kuye, “Mina ngiyikuvuka kwabafileyo lokuphila. Lowo okholwa kimi uzaphila, loba ezakufa; njalo lowo ophilayo njalo ekholwa kimi kasoze afa lanini. Uyakukholwa lokhu na?” Waphendula wathi, “Yebo, Nkosi, ngiyakholwa ukuthi unguye uKhristu, iNdodana kaNkulunkulu, obezakuza emhlabeni.”

Umuntu othanda impilo yakhe izamlahlekela, ikanti umuntu ozonda impilo yakhe kulo umhlaba uzayilondolozela ingunaphakade.

Kodwa loba kunjalo abanengi labaphakathi kwabakhokheli bakholwa kuye. Kodwa ngenxa yabaFarisi kabalufakazanga ukholo lwabo besesaba ukuthi bazaxotshwa esinagogeni; ngokuba babethanda ukubukwa ngabantu okwedlula ukubukwa okuvela kuNkulunkulu.

Ngizile emhlabeni ngiyikukhanya, ukuze kuthi angabikhona okholwa kimi ozahlala emnyameni.

Ukhona umahluleli walowo ongalayo, ongawemukeliyo amazwi ami; lona lelolizwi uqobo engalikhulumayo lizamlahla ngosuku lokucina.

UJesu waphendula wathi, “Mina ngiyiyo indlela  —  njalo ngiliqiniso lokuphila. Kakho ozayo kuBaba ngaphandle kwami.

Uma lingithanda lizakwenza lokho engiliyala khona.

Umlayo wami yilo: Thandanani njengoba ngilithandile lina. Kakho olothando olukhulu kulaye onikela ukuphila kwakhe kubangane bakhe.

Uzakuthi angafika uzatshengisa umhlaba ukuthi ulahlekile ngesono langokulunga langokwahlulelwa: ngokwesono, ngokuba abantu kabakholwa kimi; ngokulunga, ngokuba ngiya kuBaba, lapho elingasayi ukungibona khona njalo; njalo ngokwehlulelwa, ngokuba umbusi walo umhlaba usemiselwe ukulahlwa.

Bangcwelise ngalo iqiniso; ilizwi lakho liliqiniso.

UJesu wasemtshela wathi, “Usukholiwe ngokuba usungibonile; babusisiwe labo abathi bengabonanga kodwa sebekholiwe.” UJesu wenza eminye imimangaliso eminengi abafundi bakhe bekhangele, kodwa engabhalwanga kule incwadi. Kodwa le ibhaliwe ukuze likholwe ukuthi uJesu unguKhristu, iNdodana kaNkulunkulu, njalo ukuze kuthi ngokukholwa libe lokuphila ngebizo lakhe.

Kuzakuthi wonke obiza ibizo leNkosi asindiswe.’

UPhethro waphendula wathi, “Phendukani libhaphathizwe lonke, ebizweni likaJesu Khristu ukuze lithethelelwe izono zenu. Lani lizakwamukela isipho soMoya oNgcwele.

Labo abalemukelayo ilizwi lakhe babhaphathizwa, kwengezwa enanini labo mhlalokho abangaba yizinkulungwane ezintathu. Bayikhuthalela imfundiso yabaphostoli kanye lobudlelwano, lokuhlephula isinkwa lokukhuleka.

Yikho, phendukani, libuyele kuNkulunkulu, ukuze izono zenu zesulwe, ukuze kufike izikhathi zokuhlambulula okuvela eNkosini,

Kakho omunye okulensindiso kuye; phela kalikho elinye ibizo ngaphansi kwezulu elaphiwa abantu ukuthi sisindiswe ngalo.”

UNkulunkulu wamphakamisela kwesokunene sakhe waba yiNkosana loMsindisi ukuze anike ukuphenduka lokuthethelelwa kwezono ku-Israyeli.

Kodwa kwathi sebekholwe uFiliphu etshumayela izindaba ezinhle ezombuso kaNkulunkulu kanye lebizo likaJesu Khristu, babhaphathizwa, abesilisa labesifazana. USimoni laye ngokwakhe wakholwa wabhaphathizwa. Walandela uFiliphu ngaphi langaphi, wamangaliswa yiziboniso lemimangaliso ayibonayo.

Phenduka kulobububi uthandaze eNkosini. Mhlawumbe izakuthethelela ngokuthi ulomcabango onje enhliziyweni yakho.

Bathi belokhu behamba ngomgwaqo bafika lapho okwakulamanzi khona, indoda engumthenwa yathi, “Khangela, nanka amanzi. Kulani ukuthi ngihle ngibhaphathizwe na?” (UFiliphu wathi, “Uma ukholwa ngenhliziyo yakho yonke ungabhaphathizwa.” Isikhulu saphendula sathi, “Ngiyakholwa ukuthi uJesu Khristu uyiNdodana kaNkulunkulu.”)

Masinyane, kwakhithika emehlweni kaSawuli okwakungathi zinkwethu, wasebona njalo. Wasukuma wabhaphathizwa,

UPhethro waseqalisa ukukhuluma wathi: “Sengibona khathesi ukuthi uNkulunkulu kathandi abanye kulabanye abantu kodwa wamukela abantu benhlanga zonke abamesabayo, abenza okulungileyo.

Wasilaya ukuba sitshumayele ebantwini bonke njalo sifakaze ukuthi unguye uNkulunkulu ambekayo ukuba ngumahluleli wabaphilayo labafileyo. Bonke abaphrofethi bafakaza ngaye ukuthi bonke abakholwa kuye baphiwa ukuthethelelwa kwezono ngebizo lakhe.”

Wasesithi kababhaphathizwe ebizweni likaJesu Khristu. Yikho base becela uPhethro ukuthi ahlale labo okwezinsukwana ezithile.

Bathi sebekuzwile lokhu, kababe besaba lansolo, badumisa uNkulunkulu, besithi, “Yebo kambe, uNkulunkulu usebanikile labo abeZizwe ukuphendukela ekuphileni.”

Esizukulwaneni sale indoda uNkulunkulu uselethe ko-Israyeli uMsindisi uJesu njengokuthembisa kwakhe. Mandulo kokufika kukaJesu, uJohane watshumayela ukuphenduka lokubhaphathizwa kubo bonke abantu bako-Israyeli.

“Ngakho-ke, bazalwane bami, ngithanda ukuba lazi ukuthi ngoJesu ukuthethelelwa kwezono kuyatshunyayelwa kini. Ngaye bonke abakholwayo sebehlanjululwe kukho konke abebe ngeke bahlanjululwe kukho ngomthetho kaMosi.

beqinisa abafundi njalo bebakhuthaza ukuthi babambelele ekukholweni. Bathi, “Kufanele sedlule ezinhlungwini ezinengi ukuze singene embusweni kaNkulunkulu.”

Wasebakhuphela phandle wababuza wathi, “Madoda, ngenzeni ukuze ngisindiswe na?” Baphendula bathi, “Kholwa eNkosini uJesu, uzasindiswa  —  wena kanye lendlu yakho.” Base bemtshumayeza ilizwi leNkosi kanye labanye abendlu yakhe. Ngalelohora lebusuku umlindijele wabathatha wabagezisa imvimvinya zabo; kwasekusithi khonokho nje yena labendlu yakhe bahle babhaphathizwa.

Ekadeni uNkulunkulu kakunakanga lokhu ukungazi, kodwa khathesi uselaya bonke abantu ezindaweni zonke ukuba baphenduke. Ngoba uselumisile usuku lapho azakwehlulela khona umhlaba ngokulunga ngomuntu ammisileyo. Usevezile ubufakazi balokhu kubo bonke abantu ngokumvusa kwabafileyo.”

UKhrispu, umphathi wesinagogi, kanye lendlu yakhe yonke bakholwa eNkosini; kwathi labanengi bamaKhorinte abamuzwayo bakholwa babhaphathizwa.

UPhawuli wathi, “Ubhaphathizo lukaJohane lwalulubhaphathizo lokuphenduka. Watshela abantu ukuthi bakholwe kulowo owayezakuza ngemva kwakhe, esitsho ukuthi kuJesu.” Sebekuzwile lokhu babhaphathizelwa ebizweni leNkosi uJesu.

Abanengi balabo abasebekholwa beza baphumela egcekeni bevuma iziphambeko zabo.

Ngimemezele kumaJuda lamaGiriki ukuthi bamele baphendukele kuNkulunkulu ngokuphenduka, ba-kholwe eNkosini yethu uJesu.

Zilindeni lina kanye lawo wonke umhlambi uMoya oNgcwele olenze laba ngabaqapheli bakhe. Wobani ngabelusi bebandla likaNkulunkulu, alithenga ngegazi lakhe.

Pho usalindeleni? Sukuma, ubhaphathizwe, ugeze kusuke izono zakho, ubiza ibizo lakhe.’

ukuthi uvule amehlo abo, ubaphendule basuke ebumnyameni baye ekukhanyeni, njalo basuke emandleni kaSathane baye kuNkulunkulu ukuze bemukele ukuthethelelwa kwezono lendawo phakathi kwalabo abangcwelisiweyo ngokukholwa kimi.’

“Ngakho ngithanda ukuthi lazi ukuba insindiso kaNkulunkulu isithunyelwe kwabeZizwe, njalo bona bazalalela!”

Kangilanhloni ngevangeli, ngoba lingamandla kaNkulunkulu okusindiswa kwabo bonke abakholwayo: kuqala amaJuda, kulandele abezizwe.

Phezu kwalokho, njengoba bengazange bacabange ukuthi kufanele bagcine ukumazi uNkulunkulu, wabanikela engqondweni yokuxhwala, ukuba benze okungamelanga kwenziwe. Sebegcwele ngokonakala konke, ububi, lobuhaga kanye lokuxhwala. Bagcwale umhawu, lokubulala, lengxabano, lenkohliso kanye lolunya. Bangabanyeyi, labahlebi, labazonda uNkulunkulu, leziqholo, labazigqajayo kanye labazikhukhumezayo; baphemba izindlela zokwenza okubi; badelela abazali babo; kabalangqondo, kabalakholo, kabalazwelo balesihluku. Lanxa besazi isimiso esilungileyo sikaNkulunkulu sokuthi labo abenza izinto ezinje bafanele ukufa, kabaqhubeki nje kuphela besenza zona kanye lezizinto kodwa bayavumelana njalo lalabo abazenzayo.

Siyakwazi ukuthi ukubahlulela kwakhe uNkulunkulu labo abenza izinto ezinje kweyame eqinisweni. Ngakho lapho wena, umuntu nje, ubahlulela kodwa usenza izinto ezifanayo, ucabanga ukuthi uzakubalekela ukwahlulela kukaNkulunkulu na? Kumbe njalo weyisa ubukhulu bomusa wakhe, ukubekezela kanye lesineke, ungananzeleli ukuthi umusa kaNkulunkulu ukusa ekuphendukeni na? Kodwa ngenxa yobuqholo bakho lenhliziyo yakho engaphendukiyo, uyaziqoqela ulaka oluzakuhlupha ngosuku lolaka lukaNkulunkulu, lapho okuzabonakaliswa khona ukwahlulela kwakhe okulungileyo. UNkulunkulu “uzanika umuntu wonke ngokumayelana lalokho akwenzileyo.” Kulabo abadinga inkazimulo, lodumo kanye lokungabhubhi, ngokuphikelela ekwenzeni okuhle, uzabanika ukuphila okulaphakade. Kodwa labo abazinqinekelayo abala iqiniso balandele ububi, kuzakuba lolaka lokuthukuthela. Kuzakuba lokuhlupheka losizi emuntwini wonke owenza okubi: kuqala kumJuda kulandele kowezizweni, kodwa inkazimulo, lodumo kanye lokuthula kuye wonke owenza okulungileyo: kuqala kumJuda kulandele kowezizweni. Ngoba uNkulunkulu kalabandlululo.

Lokhu kuzakwenzakala ngosuku uNkulunkulu azakwahlulela izimfihlo zabantu ngoJesu Khristu, njengokutsho kwevangeli lami.

Njengoba kulotshiwe ukuthi: “Kakho olungileyo, kakho loyedwa; Kakho ozwisisayo, kakho odinga uNkulunkulu.

“Ukumesaba uNkulunkulu akukho emehlweni abo.” Siyakwazi ukuthi loba kuyini okutshiwo ngumthetho, ukutsho kulabo abangaphansi komthetho, ukuze imilomo yonke ithuliswe lomhlaba wonke ube lomlandu kuNkulunkulu.

Ngakho-ke kakho okuzathiwa ulungile emehlweni akhe ngokugcina umthetho; kodwa ngomthetho siba lakho ukwazi isono.

ngoba bonke bonile njalo bayasilela enkazimulweni kaNkulunkulu, njalo benziwa babe ngabalungileyo ngesihle ngomusa wakhe ngensindiso eyeza ngoKhristu uJesu. UNkulunkulu wambeka njengomhlatshelo wenhlawulo, ngokukholwa egazini lakhe. Wenza lokhu ukuze abonakalise ukulunga kwakhe, ngoba ngokubekezela kwakhe wayekela izono ezenziwe ngaphambili kungekho kujeziswa  —

Ngoba siyaqinisa ukuthi umuntu ulungiswa yikukholwa langaphandle kokugcina umthetho.

“Babusisiwe labo abaziphambeko zabo zithethelelwe, abazono zabo zembesiwe.

Wanikelwa ekufeni ngenxa yezono zethu njalo wavuselwa ekuphileni ukuze silungiswe.

Ngakho-ke, njengoba silungisiwe ngokukholwa, silokuthula kuNkulunkulu ngeNkosi yethu uJesu Khristu, esithole ngaye ukufinyelela ngokukholwa kulo umusa esimi kuwo khathesi. Njalo siyathokoza ngethemba elenkazimulo kaNkulunkulu. Akunjalo kuphela, kodwa siyathokoza njalo ezinhluphekweni zethu, ngoba siyakwazi ukuthi ukuhlupheka kudala ukuqinisela; ukuqinisela, ubuntu; lobuntu, ithemba. Njalo ithemba kalisidanisi, ngoba uNkulunkulu usethululele uthando lwakhe ezinhliziyweni zethu ngoMoya oNgcwele, asinike yena.

Kodwa uNkulunkulu ubonakalisa uthando lwakhe kithi ngalokhu: Siseseyizoni, uKhristu wasifela. Njengoba khathesi sesilungiswe ligazi lakhe, pho sizasindiswa kakhulu kangakanani elakeni lukaNkulunkulu ngaye! Ngoba uma lapho sasiyizitha zikaNkulunkulu sabuyiselwa kuye ngokufa kweNdodana yakhe, kuzakuba kukhulu kangakanani, sesibuyiselwe, ukuhlengwa kwethu ngokuphila kwakhe! Lokhu akunjalo nje kuphela, kodwa siyathokoza njalo kuNkulunkulu ngeNkosi yethu uJesu Khristu, khathesi esesithole ngaye ukubuyisana.

Umthetho wabekwa ukuze isiphambeko sande. Kodwa lapho okwanda khona isono, umusa wanda kakhulukazi, ukuze kuthi njengoba isono sabusa ekufeni, kuthi ngokunjalo umusa lawo ubuse ngokulunga ukuba ulethe ukuphila okungapheliyo ngoJesu Khristu iNkosi yethu.

Ngakho, sizakuthini na? Sizaqhubeka sisenza isono ukuze umusa wande na? Akunjalo! Safa ngenxa yesono; pho singaphila kanjani kuso futhi na? Kumbe njalo kalazi yini ukuthi sonke thina esabhaphathizelwa kuKhristu uJesu sabhaphathizelwa ekufeni kwakhe na?

Ngakho sangcwatshwa laye ngokubhaphathizelwa ekufeni, ukuze kuthi njengoba uKhristu wavuswa kwabafileyo ngobukhosi bukaYise, lathi singaphila ukuphila okutsha. Uma sihlanganiswe laye kanje ekufeni kwakhe, ngempela sizahlanganiswa laye futhi ekuvukeni kwakhe. Ngoba siyakwazi ukuthi ubuntu bethu obudala babethelwa laye ukuze umzimba wesono ulahlwe, ukuze singabi yizigqili zesono futhi  — ngoba lowo osefile usekhululwe esonweni.

ngoba lowo osefile usekhululwe esonweni. Uma safa loKhristu, siyakholwa ukuthi sizaphila laye. Ngoba siyazi ukuthi njengoba uKhristu wavuswa kwabafileyo, angeke afe futhi; ukufa akuselawo amandla phezu kwakhe. Ukufa akufayo wakufela bonke kanye ngenxa yesono; kodwa ukuphila akuphilayo, ukuphilela uNkulunkulu. Ngokufanayo, zibaleni lingabafileyo esonweni kodwa abaphilayo kuNkulunkulu ngoKhristu uJesu.

Ngokufanayo, zibaleni lingabafileyo esonweni kodwa abaphilayo kuNkulunkulu ngoKhristu uJesu. Ngakho lingavumeli isono ukuba sibuse imizimba yenu efayo ukuba livumele izinkanuko zaso ezimbi. Linganikeli izitho zemizimba yenu esonweni, njengezikhali zobubi, kodwa zinikeleni kuNkulunkulu, njengabavuswe kwabafileyo balethwa ekuphileni; linikele izitho zemizimba yenu kuye njengezikhali zokulunga. Ngoba isono kasiyikuba ngumbusi wenu, ngoba lina kalikho ngaphansi komthetho, kodwa ngaphansi komusa.

Kodwa-ke kabongwe uNkulunkulu ngokuthi lanxa laliyizigqili zesono, layilalela ngezinhliziyo ezipheleleyo indlela yemfundiso elabekwa kuyo. Lakhululwa esonweni laselisiba yizigqili zokulunga. Lokhu ngikubeka ngamazwi abantu ngoba libuthakathaka ngokwemvelo yobuntu benu. Njengoba lalinikela izitho zemizimba yenu ngobugqili emanyaleni lekuxhwaleni okwandayo, ngakho khathesi zinikeleni ngobugqili ekulungeni okuholela ebungcweleni.

Kodwa njengoba khathesi selikhululwe esonweni laba yizigqili kuNkulunkulu, umvuzo eliwutholayo uholela ebungcweleni, lesiphetho yikuphila okungapheliyo. Ngoba umvuzo wesono yikufa, kodwa isipho sikaNkulunkulu siyikuphila okungapheliyo kuKhristu uJesu iNkosi yethu.

Ngoba sisabuswa yimvelo elesono izinkanuko zesono ezavuswa ngumthetho zazisebenza emizimbeni yethu, okwenza sathelela ukufa izithelo. Kodwa khathesi, ngokufela kulokho okwake kwasibopha, sesikhululiwe emthethweni ukuze sikhonze ngendlela entsha yoMoya hatshi ngendlela endala yezimiso ezilotshiweyo.

Kodwa isono, sithatha ithuba elilethwa ngumlayo, saveza kimi izinhlobo zonke zenkanuko yokuhawukela. Ngoba ngaphandle komthetho, isono sifile.

Siyakwazi ukuthi umthetho ungokomoya; kodwa mina kangisuwomoya, ngathengiswa esonweni njengesigqili. Engikwenzayo angikuzwisisi. Ngoba lokho engifuna ukukwenza angikwenzi, kodwa lokho engikuzondayo ngiyakwenza. Ngakho uma ngisenza lokho engingakufuniyo ukukwenza, ngiyavuma ukuthi umthetho ulungile. Njengoba kunje, akuseyimi uqobo okwenzayo, kodwa isono esihlala kimi. Ngiyakwazi ukuthi akulalutho oluhle oluhlala kimi, okutsho imvelo yami elesono. Ngoba ngilesifiso sokwenza okuhle, kodwa angingeke ngikufeze. Ngoba engikwenzayo akusikho okuhle engifuna ukukwenza; hatshi, okubi engingafuniyo ukukwenza  —  lokhu ngiqhubeka ngikwenza. Uma ngisenza engingafuniyo ukukwenza, akuseyimi okwenzayo, kodwa yisono esihlala kimi esikwenzayo.

Ngakho ngithola umthetho lo usebenza ukuthi: Lapho ngifuna ukwenza okuhle, okubi kulami khonapho. Ngoba ebuntwini bami bangaphakathi ngiyathokoza ngomthetho kaNkulunkulu; kodwa ngibona omunye umthetho usebenza ezithweni zami, usilwa lomthetho wengqondo yami ungenza ngibe yisibotshwa somthetho wesono osebenzayo ezithweni zami. Yeka isinothongwana esengiyiso sona. Ngubani ozangihlenga kulo umzimba wokufa? Kabongwe uNkulunkulu  —  ngoJesu Khristu iNkosi yethu! Ngakho-ke mina, engqondweni yami ngiyisigqili somthetho kaNkulunkulu, kodwa ngemvelo elesono ngiyisigqili somthetho wesono.

Ngakho, khathesi akusekho ukulahlwa kulabo abakuKhristu uJesu, ngoba ngoKhristu uJesu umthetho woMoya wokuphila wangikhulula emthethweni wesono lokufa. Ngoba lokho umthetho owawungelamandla okukwenza ngokuba waxegiswa yimvelo elesono, uNkulunkulu wakwenza ngokuthuma iNdodana yakhe ngesimo somuntu olesono ukuba ibe ngumnikelo wesono. Ngakho isono yasilahla emuntwini olesono, ukuze izimiso ezilungileyo zomthetho zipheleliswe kithi, thina esingaphili ngokwemvelo yesono kodwa ngokoMoya. Labo abaphila ngokwemvelo yesono izingqondo zabo zigxile kulokho okufiswa yileyomvelo, kodwa labo abaphila ngokumayelana loMoya izingqondo zabo zigxile kulokho okufiswa nguMoya. Ingqondo yomuntu olesono yikufa, kodwa ingqondo ebuswa nguMoya yikuphila lokuthula; ingqondo yesono iyamzonda uNkulunkulu. Kayiwuvumi umthetho kaNkulunkulu, njalo ayingeke yenze njalo. Labo ababuswa yimvelo yesono abangeke bamthokozise uNkulunkulu.

Kodwa lina kalibuswa yimvelo yesono kodwa nguMoya, uma uMoya kaNkulunkulu ehlala kini. Njalo uma umuntu engelaye uMoya kaKhristu, kasuye kaKhristu. Kodwa uma uKhristu ekini, umzimba wenu ufile ngenxa yesono, kodwa umoya wenu uyaphila ngenxa yokulunga. Njalo uma uMoya walowo owavusa uKhristu kwabafileyo ehlala kini, yena owavusa uKhristu kwabafileyo, imizimba yenu efayo uzayinika ukuphila ngoMoya wakhe ohlala kini.

Ngakho-ke, bazalwane, silomlandu  —  kodwa kawungabi yimvelo yesono, ukuba siphile ngokwawo. Ngoba uma liphila ngokwemvelo yesono, lizakufa; kodwa uma kunguMoya libulala izenzo ezimbi zomzimba, lizaphila, ngoba labo abakhokhelwa nguMoya kaNkulunkulu bangamadodana kaNkulunkulu. Ngoba kalamukelanga umoya olenza libe yizigqili futhi zokwesaba, kodwa lamukela uMoya wobudodana. Njalo siyamemeza ngawo sithi, “Abha, Baba.” UMoya uqobo uyafakaza lomoya wethu ukuthi thina singabantwana bakaNkulunkulu. Ngakho, uma singabantwana, siyizindlalifa  —  izindlalifa zikaNkulunkulu lezindlalifa kanye loKhristu, uma sihlanganyela laye impela ezinhluphekweni zakhe ukuze sihlanganyele laye njalo enkazimulweni yakhe.

Ngikholwa ukuthi izinhlupheko zethu zakhathesi kazifanelanga ukulinganiswa lenkazimulo ezabonakaliswa kithi. Indalo ilindile ngokuthakazelela okukhulu ukuba amadodana kaNkulunkulu abonakaliswe.

Yena ongayigodlanga iNdodana yakhe, kodwa wayinikelela thina sonke  —  angayekela kanjani ukusipha ngesihle izinto zonke kanye layo na? Ngubani ozababeka icala labo abakhethwe nguNkulunkulu na? NguNkulunkulu olungisayo. Ungubani lowo olahlayo? UKhristu Jesu owafayo  —  okudlula lokho, owavuswayo waphila  —  usesandleni sokunene sikaNkulunkulu njalo laye uyasincengela. Ngubani ozasehlukanisa lothando lukaKhristu na? Yikuhlupheka kumbe ukudubeka loba ukuhlukuluzwa kumbe indlala loba ukuhamba ze loba ingozi kumbe inkemba na? Njengoba kulotshiwe ukuthi: “Ngenxa yakho sikhangelane lokufa ilanga lonke; sibalwa njengezimvu ezizahlatshwa.” Hatshi, kuzo zonke lezizinto singaphezu kokuba ngabanqobi ngaye owasithandayo.

Ngoba uthi kuMosi, “Ngizakuba lesihawu kulowo engilesihawu kuye, njalo ngizakuba lozwelo kulowo engilozwelo kuye,” Ngakho-ke, akuyi ngesifiso somuntu loba umzamo wakhe, kodwa ngesihawu sikaNkulunkulu.

Njengoba ukulunga okuvela kuNkulunkulu bengakwazanga bafuna ukumisa okwabo, kabavumanga ukuzibeka ngaphansi kokulunga kukaNkulunkulu. UKhristu ungumkhawulo womthetho ukuze kube lokulunga kubo bonke abakholwayo.

ukuthi uma uvuma ngomlomo wakho usithi, “UJesu uyiNkosi,” njalo ukholwa enhliziyweni yakho ukuthi uNkulunkulu wamvusa kwabafileyo, uzasindiswa. Ngoba ukholwa ngenhliziyo yakho njalo ulungiswa ngayo, njalo kungomlomo wakho ovuma ngawo usindiswe. Njengoba uMbhalo usithi, “Loba ngubani okholwa kuye akayikuyangiswa.” Ngoba kawukho umahluko phakathi komJuda lowezizwe  —  iNkosi yinye iyiNkosi yabo bonke njalo iyababusisa kakhulu bonke abakhuleka kuyo, ngoba, “Bonke abakhuleka ebizweni leNkosi bazasindiswa.”

Ngakho-ke, ukukholwa kuvela ekuzweni ilizwi, lelizwi lizwakala ngelizwi likaKhristu.

Impendulo kaNkulunkulu kuye yathini na? Yathi, “Ngizigodlele mina ngokwami abayizinkulungwane eziyisikhombisa abangamguqelanga ngamadolo uBhali.” Ngakho futhi, ngalesisikhathi kulensalela ezakhethwa ngomusa.

Ngoba uma uNkulunkulu engaziyekelanga izingatsha zemvelo, lani kasoze aliyekele. Ngakho cabangani ngesisa njalo lobulukhuni bukaNkulunkulu: ubulukhuni kulabo abawayo, kodwa isisa kini, uma liqhubeka esiseni sakhe. Kungenjalo, lani lizaqunywa.

Lesi yisivumelwano sami labo lapho ngizisusa izono zabo.”

Ngakho-ke, ngiyalincenga bazalwane, ngenxa yomusa kaNkulunkulu, ukuba linikele imizimba yenu njengemihlatshelo ephilayo, engcwele lemthokozisayo uNkulunkulu  —  okuyikukhonza kwenu ngomoya. Lingavumi futhi ukulingisa umhlaba lo, kodwa liguqulwe ngokwenziwa kwengqondo yenu isibantsha. Lapho-ke lizakwenelisa ukuhlola lokwamukela lokho okuyintando kaNkulunkulu  —  intando yakhe elungileyo, ethokozisayo lepheleleyo.

Linganqotshwa ngokubi, kodwa nqobani ububi ngobuhle.

Njalo yenzani lokhu liqedisisa isikhathi sakhathesi. Isikhathi sesifikile ukuba livuke ebuthongweni benu, ngoba ukusindiswa kwethu khathesi sekuseduze kakhulu kulekuqaliseni kwethu ukukholwa.

Kodwa zigqokiseni iNkosi uJesu Khristu, njalo lingacabangi ngokuthokozisa inkanuko yemvelo yenu yokona.

Pho wena, kungani usahlulela umzalwane wakho na? Loba kungani useyisa umzalwane wakho na? Ngoba sonke sizakuma phambi kwesihlalo sikaNkulunkulu sokwahlulela. Kulotshiwe ukuthi: “ ‘Ngeqiniso elinjengoba ngikhona,’ kutsho uJehova, ‘amadolo wonke azaguqa phambi kwami; izindimi zonke zizavuma kuNkulunkulu.’ ” Ngakho-ke omunye lomunye wethu uzabika akwenzayo kuNkulunkulu.

Sengathi uNkulunkulu wethemba angaligcwalisa ngentokozo enkulu langokuthula ekumethembeni kwenu, ukuze libe lethemba elikhaphakayo ngamandla kaMoya oNgcwele.

Izaligcina liqinile kuze kube sekupheleni, ukuze lingabi lacala ngosuku lweNkosi yethu uJesu Khristu.

Ngoba ilizwi lesiphambano liyibuthutha kulabo ababhubhayo, kodwa kithi abasindisiweyo lingamandla kaNkulunkulu.

ukuze kungabi lamuntu ozazincoma phambi kwakhe. Ngenxa yakhe lina likuKhristu uJesu, yena osebe yikuhlakanipha okuvela kuNkulunkulu esenzela thina  —  okuyikuthi ukulunga kwethu, ubungcwele lokusindiswa.

Kanti kalazi yini ukuthi lina ngokwenu lilithempeli likaNkulunkulu kanye lokuthi uMoya kaNkulunkulu uhlala phakathi kwenu? Uma umuntu echitha ithempeli likaNkulunkulu, uNkulunkulu uzamchitha; ngoba ithempeli likaNkulunkulu lingcwele, njalo lina liyilelothempeli.

Kodwa khathesi ngililobela ukuba lingahlanganyeli lomuntu ozibiza ngokuthi ngumzalwane kodwa exhwalile eyisifebe loba isihwaba, umkhonzi wezithombe loba umnyeyi, isidakwa loba iqili. Umuntu onjalo lingadli laye. Kungumlandu wami na ukuba ngahlulele abangaphandle kwebandla? Akumelanga lahlulele labo abaphakathi na? UNkulunkulu uzakwahlulela labo abangaphandle. “Mxotsheni umuntu omubi phakathi kwenu.”

Kalazi yini ukuthi abaxhwalileyo kabayikudla ilifa lombuso kaNkulunkulu? Lingakhohliswa. Akulazifebe ezixhwalileyo loba abakhonza izithombe loba iziphingi loba amawule esilisa loba abesilisa abaphinganayo loba amasela loba izihwaba loba izidakwa loba abanyeyayo loba amaqili azakudla ilifa lombuso kaNkulunkulu. Njalo lokho yikho abanye benu ababe yikho. Kodwa selageziswa, selangcweliswa, selalungiswa ngebizo leNkosi uJesu Khristu langoMoya kaNkulunkulu wethu.

Balekelani ukuxhwala kobufebe. Zonke ezinye izono umuntu azenzayo zingaphandle komzimba wakhe, kodwa lowo owenza isono sobufebe wenza isono emzimbeni wakhe. Kalazi yini ukuthi umzimba wenu ulithempeli likaMoya oNgcwele, ophakathi kwenu, elamamukela kuNkulunkulu na? Kalisibo benu, lathengwa ngentengo. Ngakho-ke dumisani uNkulunkulu ngemizimba yenu.

Ukusoka kuyize njalo lokungasoki kuyize. Ukugcina imilayo kaNkulunkulu yikho okuqakathekileyo.

Lathengwa ngentengo; kalingabi yizigqili zabantu.

Akumelanga senze ukuxhwala kobufebe njengokwenziwa ngabanye babo  —  njalo ngosuku olulodwa kwafa ababo abayizinkulungwane ezingamatshumi amabili lantathu. Akumelanga silinge iNkosi njengokwenziwa ngabanye babo  —  babulawa zinyoka. Lingakhononi, njengokwenziwa ngabanye babo  —  babulawa yingilosi ebhubhisayo. Izinto lezi zenzakala kubo njengezibonelo njalo zalotshwa njengezixwayiso kithi, osekufike kubo ukugcwaliseka kwezikhathi. Ngakho uma licabanga ukuthi limi liqinile, qaphelani ukuba lingawi.

Akulazilingo ezilehleleyo ngaphandle kokwejwayelekileyo ebantwini. Njalo uNkulunkulu uthembekile; akayikuvumela ukuba lilingwe ngokwedlula lokho elingakumela. Kodwa lapho lilingwa, uzalinika indlela yokuphunyuka ukuze limelane lakho.

Ngoba sonke sabhaphathizwa ngoMoya munye kulowomzimba munye  —  loba singamaJuda kumbe amaGiriki, izigqili loba abakhululekileyo  —  sonke saphiwa uMoya munye ukuba siwunathe.

Ngoba engakwamukelayo lami ngakudlulisela kini njengokuqakatheke kakhulu: ukuthi uKhristu wafela izono zethu mayelana lemibhalo, lokuthi wangcwatshwa, lokuthi wavuswa ngosuku lwesithathu mayelana lemibhalo,

Lingedukiswa: “Abangane ababi bayasona isimilo esihle.” Khumbulani ngezingqondo zenu njengokumele likwenze, licine ukwenza izono; ngoba kulabanye abangamaziyo uNkulunkulu  —  ngitsho lokhu ukuba liyangeke.

Udonsi lokufa yisono, lamandla esono ngumthetho.

Lanxa ivangeli lethu limboziwe, limbozwe kulabo ababhubhayo. Unkulunkulu walesisikhathi usenqunde izingqondo zabangakholwayo, ukuze bangakuboni ukukhanya kwevangeli lenkazimulo kaKhristu, ongumfanekiso kaNkulunkulu.

Sikuthwele njalo nje emizimbeni yethu ukufa kukaJesu, ukuze ukuphila kukaJesu lakho kwambulwe emizimbeni yethu. Ngoba thina abaphilayo sihlezi sinikelwa ekufeni ngenxa kaJesu, ukuze ukuphila kwakhe kwambulwe emizimbeni yethu efayo.

Ngoba ukukhanya kwethu lezinhlupheko zethu ezincane ezesikhatshana zisizuzela inkazimulo elaphakade enkulu kulazo zonke. Ngakho amehlo ethu kasiwakhangelisanga kokubonakalayo, kodwa kokungabonakaliyo. Ngoba okubonakalayo kuyedlula, kodwa okungabonakaliyo kakuyikuphela.

Ngoba sonke kumele sime phambi kwesihlalo sokwahlulela sikaKhristu, ukuze lowo lalowo amukele okumfaneleyo okwezinto azenzayo esemzimbeni, langabe ngezinhle loba ezimbi.

Wafela abantu bonke ukuze abaphilayo bangaziphileli bona ngokwabo, kodwa lowo owabafelayo wavuswa njalo.

Ngakho uma umuntu ekuKhristu, uyisidalwa esitsha; okudala akusekho, sekufike okutsha.

Ngakho-ke singabameli bakaKhristu, ngokungathi uNkulunkulu wenza isikhalazo sakhe ngathi. Siyalincenga simele uKhristu sithi: Buyisanani loNkulunkulu. UNkulunkulu wamenza waba yisono owayengelasono ngenxa yethu, ukuze kuthi kuye sibe yikulunga kukaNkulunkulu.

Ngoba uthi: “Ngesikhathi somusa wami ngalizwa, langosuku lwensindiso yami ngalisiza.” Zwanini, khathesi sekuyisikhathi somusa kaNkulunkulu, khathesi lusuku lwensindiso.

Lingazibopheli ndawonye labangakholwayo. Ngoba ukulunga lobubi kulokuhambelana bani na? Loba yibudlelwano bani obungaba khona phakathi kokukhanya lobumnyama na?

“Ngakho phumani kubo lehlukane labo, kutsho iNkosi. Lingathinti lutho olungcolileyo, mina ngizalemukela.” “Mina ngizakuba nguYihlo, lina lizakuba ngamadodana lamadodakazi ami, kutsho iNkosi uSomandla.”

Njengoba silezithembiso lezi, bazalwane abathandekayo, kasizihlambululeni ezintweni zonke ezingcolisa umzimba lomoya, siphelelise ubungcwele ngokwesaba uNkulunkulu.

ikanti khathesi ngiyathokoza, hatshi ngokuba ladaniswa, kodwa ngoba usizi lwenu lwalenza laphenduka. Ngoba laba lusizi njengokujonga kukaNkulunkulu ngalokho thina kasaze salilimaza langayiphi indlela. Usizi lokwesaba uNkulunkulu luletha ukuphenduka okuholela ekusindisweni kungatshiyi nsolo, kodwa usizi lwasemhlabeni luletha ukufa. Khangelani ukuba usizi lokwesaba uNkulunkulu lolu selufezeni kini: ukutshisekela okungaka, lokufisa okungaka ukuba lizigeze, lentukuthelo engaka, lokwethuka okungaka ekuboneni ukulunga kusenziwa. Kukho konke libonakalise ukuthi lina limsulwa kule indaba.

Ngenxa yomsebenzi eselizibonakalise ngawo, abantu bazamdumisa uNkulunkulu ngenxa yokulalela okukanye lokuvuma kwenu ivangeli likaKhristu, kanye lomusa wenu ekwabelaneni labo kanye labanye futhi.

Ngoba ngiyesaba ukuthi ekufikeni kwami angiyikulifica liyilokho engifuna libe yikho, mhlawumbe lani lingangifumani ngiyilokho elifuna ngibe yikho. Ngiyesaba ukuthi kungaba khona ukuxabana, lomona, lokuthukuthela, lemibango, lesinyeyo, lokuhleba, lokuzikhukhumeza, kanye lokuphithizela. Ngiyesaba ukuthi ekufikeni kwami futhi uNkulunkulu wami uzangidumaza phambi kwenu, njalo ngizakuba lusizi ngabanengi abenze izono ngaphambili njalo bengaphendukanga kulokhokungcola, isono sokufeba kanye lamanyala abangena kuwo.

Zihloleni ukuba libone langabe lisekukholweni; zihloleni. Kaliboni yini ukuthi uKhristu uJesu uphakathi kwenu  —  ngaphandle nje kokuba lehluleke ekuhlolweni?

siyakwazi ukuthi umuntu kalungisiswa yikugcina umthetho, kodwa yikukholwa kuJesu Khristu. Ngakho-ke, lathi futhi, sibeke ukukholwa kwethu kuKhristu uJesu ukuba silungiswe yikukholwa kuKhristu hatshi ngokugcina umthetho, ngoba kakho ozalungisiswa ngokugcina umthetho.

Sengibethelwe kanye loKhristu, akuseyimi engiphilayo, kodwa uKhristu uphila phakathi kwami. Ukuphila engikuphila emzimbeni, ngiphila ngokukholwa eNdodaneni kaNkulunkulu, eyangithandayo njalo yazinikela ngenxa yami.

UKhristu wasihlenga esiqalekisweni somthetho ngokuba yisiqalekiso ngenxa yethu, ngoba kulotshiwe ukuthi: “Uqalekisiwe umuntu wonke olengiswa esihlahleni.”

Ngakho umthetho waphiwa amandla okusiholela kuKhristu ukuba silungisiswe ngokukholwa.

ngoba lonke lina elabhaphathizelwa kuKhristu selizembathise ngoKhristu.

Kodwa kwathi lapho isikhathi sesifike ngokupheleleyo, uNkulunkulu wathuma iNdodana yakhe, yazalwa ngowesifazana, izalwa ngaphansi komthetho, ukuba ihlenge abangaphansi komthetho, ukuze sithole amalungelo apheleleyo amadodana.

Ngakho ngithi, philani ngoMoya, kaliyikuthokozisa izinkanuko zenu zemvelo elesono. Ngoba imvelo yesono ikhanuka okuphambene loMoya, loMoya okuphambene lemvelo yesono. Kuyaphikisana, ukuze lingenzi elikuthandayo. Kodwa uma likhokhelwa nguMoya, kalikho ngaphansi komthetho.

Izenzo zemvelo yesono zisobala: ubufebe, lokungesabi ukujeziswa, lokuxhwala; ukukhonza izithombe lobuthakathi; inzondo, lokuxabana, lomona, lentukuthelo, lobuhwaba, lokungezwani, lokungavumelani kanye lomhawu; ukudakwa, lokuzitika ngamanyala kanye lokunye okunjalo. Ngiyalixwayisa, njengoba ngenza ngaphambili, ukuthi abaphila kanje kabayikulidla ilifa lombuso kaNkulunkulu.

Kodwa izithelo zikaMoya luthando, lokuthokoza, lokuthula, lokubekezela, lomusa, lokulunga, lokuthembeka, lobumnene kanye lokuzithiba. Ezintweni ezinje akulamthetho.

Labo abangabakaKhristu sebayibethela esiphambanweni imvelo yabo yesono lokufutheka kwayo kanye lezinkanuko. Njengoba siphila ngoMoya, kasenzeni okuhambelana loMoya.

Lingakhohliswa: UNkulunkulu angeke ahlekwa. Umuntu uvuna lokho akuhlanyelayo. Lowo ohlanyela ukuthokozisa imvelo yakhe yesono, kuleyomvelo uzavuna ukuchitheka; lowo ohlanyela ukuthokozisa uMoya, kuMoya uzavuna ukuphila okulaphakade.

Ukusoka loba ukungasoki akutsho lutho; okuqakathekileyo yikudalwa kutsha.

Udumo kalube kuNkulunkulu uYise weNkosi yethu uJesu Khristu, osibusise ebukhosini basezulwini ngezibusiso zonke zomoya kuKhristu. Ngoba wasikhetha kuye umhlaba ungakadalwa ukuba sibe ngcwele singelasici ebusweni bakhe. Ngothando wasimisela ukuba senziwe amadodana akhe ngoJesu Khristu, ngokumayelana lentokozo yakhe kanye lentando yakhe  — ukuze kudunyiswe umusa wakhe omangalisayo, asiphe wona ngesihle kuLowo amthandayo. Kuye silokuhlengwa ngegazi lakhe, lokuthethelelwa kwezono, ngokumayelana lengcebo yomusa kaNkulunkulu awuthululele phezu kwethu ngenhlakanipho yonke langokuqedisisa.

Sakhethwa kuye, simiselwe lokho mayelana lecebo lakhe yena osebenza izinto zonke ngokuvumelana lenjongo yentando yakhe, ukuze kuthi thina, esaba ngabokuqala ukuthemba kuKhristu, sibe ngabokubonga udumo lwakhe. Lani labalwa kanye loKhristu, lapho selizwe ilizwi leqiniso. Selikholwe kuye, labekwa uphawu, uMoya oNgcwele owathenjiswayo, oyisibambiso esiqinisela ilifa lethu kuze kube lokuhlengwa kwalabo abangabakaNkulunkulu  —  ukuba kubongwe udumo lwakhe.

Lina lalifile kuziphambeko zenu lasezonweni, elaliphila kuzo lapho lalilandela izindlela zalo umhlaba lezombusi wombuso wasemoyeni, umoya osebenzayo lakhathesi kulabo abangalaleliyo. Lathi sonke sake saphila phakathi kwabo ngesinye isikhathi, sithokozisa izinkanuko zemvelo yethu yesono silandela lezifiso zayo kanye lemicabango. Njengabanye, ngemvelo sasiyizinto zolaka. Kodwa ngenxa yothando lwakhe olukhulu kithi, uNkulunkulu olesihawu esikhulu, wasenza saba ngabaphilayo loKhristu lanxa sasifile eziphambekweni  —  lina selisindisiwe ngomusa. UNkulunkulu wasivusa kanye loKhristu wasihlalisa laye ebukhosini basezulwini kuKhristu uJesu, ukuze kuthi ezikhathini ezizayo atshengise inotho yomusa wakhe engeke ilinganiswe, ebalulwe yibubele bakhe kithi kuKhristu uJesu. Ngoba lisindisiwe ngomusa, ngokukholwa  —  njalo lokhu akuveli kini, kuyisipho sikaNkulunkulu  — hatshi ngemisebenzi, ukuze kungabi lozazincoma. Ngoba siyibuciko bukaNkulunkulu, sidalelwe kuKhristu uJesu ukuba senze imisebenzi emihle, uNkulunkulu ayilungisa ngaphambili ukuba siyenze.

Mayelana lendlela yenu yakuqala yokuphila, lafundiswa ukuba lilahle uqobo lwenu oludala, olonakaliswa yizinkanuko zalo zenkohliso; lenziwe libe batsha esimeni sezingqondo zenu; lifake ubumina obutsha, obadalelwa ukuba njengoNkulunkulu ekulungeni okuqotho lobungcwele.

Njalo lingamdabukisi uMoya oNgcwele kaNkulunkulu, elabekwa ngaye uphawu lwelanga lokuhlengwa.

Wobani lomusa lozwelo omunye komunye, lithethelelane njengalokhu uNkulunkulu walithethelela ngoKhristu.

Kodwa phakathi kwenu akungabi khona lokuncane ukuxhwala kobufebe, loba yikuphi ukungcola, loba okobuhwaba, ngoba lezizinto kazifanelanga ebantwini abangcwele bakaNkulunkulu. Njalo akumelanga kube lenhlamba, lenkulumo zobuthutha loba ubuphoxo, okuyizinto ezingafanelanga, kodwa kakube lokubonga. Ngoba kuliqiniso ukuthi: Akulamuntu oyisixhwali, longcolileyo loba oyisihwaba  —  umuntu onjalo ukhonza izithombe  —  olelifa embusweni kaKhristu lokaNkulunkulu. Lingavumi ukukhohliswa ngumuntu ngamazwi ayize, ngoba ngenxa yezinto ezinje ulaka luka-Nkulunkulu lwehlela phezu kwalabo abangalaleliyo.

ukuba alenze libe ngcwele, elihlambulula ngokuligezisa ngamanzi ngokusebenzisa ilizwi, kanye lokulethula kuye njengebandla elilenkazimulo, elingelachatha loba umxhele loba esinye nje isici, kodwa lingcwele njalo lingelacala.

ngilethemba lalokhu ukuthi lowo owaqalisa umsebenzi omuhle kini uzawuqhubekisela ekupheleni kuze kube lusuku lukaKhristu uJesu.

Ngokutshiseka ngilindele njalo ngithemba ukuba angiyikuyangeka langayiphi indlela, kodwa ngizakuba lesibindi esaneleyo ukuze kuthi khathesi njengenjwayelo uKhristu uzaphakanyiswa kimi, loba ngokuphila kumbe ngokufa. Ngoba kimi, ukuphila kunguKhristu lokufa kuyinzuzo.

Ngoba kunikelwe kini ngenxa kaKhristu kungasikukholwa kuye kuphela, kodwa lokumhluphekela,

Ngakho-ke, bangane bami abathandekayo, njengoba lihlezi lilalela  —  kungayisikho nxa ngikhona kuphela, kodwa khathesi ikakhulu nxa ngingekho  —  qhubekani lisebenzela ukusindiswa kwenu ngokwesaba langokuthuthumela

Ngoba thina yithi abokusokwa, thina esikhonza ngoMoya kaNkulunkulu, esiziqhenya ngoKhristu uJesu, njalo esingabeki ithemba okwenyama  —

Ngoba, njengoba ngangihlala ngilitshela kuqala lakhathesi ngiyatsho futhi langezinyembezi, ukuthi abanengi baphila njengezitha zesiphambano sikaKhristu. Isiphetho sabo yikubhubha, unkulunkulu wabo yisisu sabo, lodumo lwabo lusehlazweni labo. Ingqondo yabo isezintweni zasemhlabeni. Kodwa elethu ikithi lisezulwini. Njalo simlindele ngokutshiseka uMsindisi evela khonale, iNkosi uJesu Khristu, yena okuzakuthi ngamandla amenza abeke izinto zonke ngaphansi kwakhe, uzaguqula imizimba yethu elesimo esiphansi ibe njengomzimba wakhe olenkazimulo.

Ngingazenza zonke izinto ngaye onginika amandla.

Ngoba wasihlenga embusweni wobumnyama wasiletha embusweni weNdodana yakhe ayithandayo, okukuyo ukuhlengwa kwethu, ukuthethelelwa kwezono.

Lina lake laba ngabehlukane loNkulunkulu liyizitha ezingqondweni zenu ngenxa yokuziphatha kwenu okubi. Kodwa khathesi uselibuyisile ngomzimba kaKhristu uqobo lwawo ngokufa ukuze alimise lingcwele ebusweni bakhe, lingelasici njalo limsulwa  —

Lasokelwa kuye, ngokususwa kwemvelo yenu yesono, kungayisikho ngokusoka okwenziwa ngezandla zabantu kodwa ngokusoka okwenziwa nguKhristu, selimbelwe laye ngobhaphathizo lavuswa kanye laye ngokukholwa kwenu emandleni kaNkulunkulu, owamvusayo kwabafileyo. Lapho lalifile ezonweni zenu lasekungasokanga kwemvelo yenu yesono, uNkulunkulu walenza laba ngabaphilayo kanye loKhristu. Wasithethelela zonke izono zethu,

Bekani izingqondo zenu ezintweni eziphezulu, hatshi ezintweni zasemhlabeni. Ngoba lafa, ukuphila kwenu khathesi kufihlwe loKhristu kuNkulunkulu. Lapho uKhristu, oyikuphila kwenu, ebonakala, lani futhi lizabonakala laye enkazimulweni.

Ngakho kubulaleni konke okungokwemvelo yenu yasemhlabeni: ukuxhwala kobufebe, ukungcola, inkanuko, izifiso ezimbi kanye lobuhwaba, okuyikukhonza izithombe. Ngenxa yalezizinto ulaka lukaNkulunkulu luyeza. Lalijwayele ukuhamba kulezizindlela, empilweni elake layiphila. Kodwa khathesi zilahleni zonke izinto ezinjengalezi: ulaka, ukuthukuthela, inzondo, ukunyeya lenkulumo ebolileyo. Lingaqambelani amanga, njengoba selihlubule uqobo lwenu oludala lezenzo zalo

Ngakho, njengabantu bakaNkulunkulu abakhethiweyo, abangcwele labathandwa kakhulu, zembeseni ngesihawu, umusa, ukuzithoba, ubumnene kanye lokubekezela. Bekezelelanani, lithethelelane loba kuyinsolo bani omunye angaba layo ngomunye. Thethelelani njengoba iNkosi yalithethelela. Phezu kwakho konke lokhu ukulunga yembathani uthando, olukubophela ndawonye kube yikumanyana okupheleleyo.

Loba ngubani owenza okubi uzaphindiselwa ububi bakhe, njalo akukho bandlululo.

Kayilinike amandla angaphakathi ukuze lingasoleki njalo libe ngcwele phambi kukaNkulunkulu wethu loBaba ekufikeni kweNkosi yethu uJesu labangcwele bayo bonke.

Kuyintando kaNkulunkulu ukuba libe ngcwele: ukuba lixwaye ukuxhwala kobufebe; ukuba omunye lomunye wenu kumele afunde ukuthiba umzimba wakhe ngendlela engcwele lehloniphekayo,

Ngoba uNkulunkulu kasimiselanga ulaka kodwa ukuba sithole ukusindiswa ngeNkosi yethu uJesu Khristu.

Hlolani izinto zonke. Bambelelani kokulungileyo. Xwayani konke. Sengathi uNkulunkulu uqobo, uNkulunkulu wokuthula, angalingcwelisa ngokupheleleyo. Sengathi umoya wenu wonke, lomphefumulo kanye lomzimba kungalondolozwa kungelasici ekufikeni kweNkosi yethu uJesu Khristu.

Kodwa kufanele sibonge uNkulunkulu kokuphela ngenxa yenu, bazalwane abathandwa yiNkosi, ngoba uNkulunkulu walikhetha kusukela ekuqaleni ukuba lisindiswe ngomsebenzi ongcwelisayo kaMoya langokukholwa eqinisweni.

Siyakwazi lokuthi umthetho kawenzelwanga abantu abalungileyo, kodwa wenzelwa abeqa imithetho labahlamuki, abangamaziyo uNkulunkulu labayizoni, abangengcwele labangakholwayo; wenzelwa ababulala oyise labonina, lababulali, lezifebe, kanye lezixhwali, abathengisa izigqili labaqamba amanga kanye labafungela amanga  —  kanye lokunye okuphambene lemfundiso eqotho

Nansi isitsho esiqotho esifanele ukwamukelwa esithi: UKhristu uJesu weza emhlabeni ukuba asindise izoni  —  mina ngingesibi kakhulu sazo. Kodwa ngenxa yasonalesi isizatho ngenzelwa isihawu, ukuze kuthi ngami, isoni esibi kakhulu, uKhristu abonakalise ukubekezela kwakhe okungelamkhawulo njengesibonelo kulabo abakholwa kuye bamukele lokuphila okungapheliyo.

ofuna ukuba abantu bonke basindiswe njalo balazi iqiniso.

Ngoba uNkulunkulu munye, lommeli munye phakathi kukaNkulunkulu labantu, umuntu uKhristu uJesu, owazinikelayo njengenhlawulo yabantu bonke  —  ubufakazi obanikwa ngesikhathi sabo esifaneleyo.

Umoya utsho ngokucacileyo ukuthi ngezikhathi zokucina abanye bazalahla ukukholwa balandele imimoya ekhohlisayo lezinto ezifundiswa ngamadimoni. Ukufundisa okunjalo kuza labaqambi bamanga abangabazenzisi abalezazela ezatshayo kungathi zahaqazwa ngensimbi etshisayo.

Banike labo abantu izeluleko lezi, ukuze angabi khona ongasoleka.

ukuba ugcine umlayo lo kungekho sici loba ukusoleka kuze kube sekubonakaleni kweNkosi yethu uJesu Khristu,

Ngakho ungabi lenhloni ukufakaza ngeNkosi yethu, loba ube lenhloni ngami isibotshwa sayo. Kodwa hlanganyela lami ekuhluphekeleni ivangeli, ngamandla kaNkulunkulu, owasisindisayo wasibizela ekuphileni okungcwele  —  kungayisikho ngenxa yokuthi kukhona esakwenzayo kodwa ngenxa yenjongo yakhe langomusa wakhe. Umusa lo sawunikwa ngoKhristu uJesu ngaphambi kokuqala kwesikhathi, kodwa khathesi usubonakaliswe ngokubonakala koMsindisi wethu, uKhristu Jesu, osechithe ukufa waletha ekukhanyeni ukuphila lokungafi ngevangeli.

Ngakho ngibekezelela konke ngenxa yabakhethiweyo, ukuze labo bazuze ukusindiswa okukuKhristu uJesu, lenkazimulo engapheliyo. Nansi isitsho esiqotho: Uma safa laye sizaphila laye futhi; uma sibekezela sizabusa laye futhi. Uma simphika, laye futhi uzasiphika;

Noma kunjalo isisekelo sikaNkulunkulu esiqinileyo sigxilile, sibekwe uphawu lombhalo lo othi: “Ujehova uyabazi labo abangabakhe,” lothi, “Bonke abalivumayo ibizo likaJehova kumele badele ububi.”

Inceku yeNkosi kumele ixwaye ingxabano; kodwa kumele ibe lomusa ebantwini bonke, yanelise ukufundisa, ingabi lenzondo. Abaphikisayo kumele ibaluleke kuhle, ngethemba lokuthi uNkulunkulu uzabaguqula izinhliziyo baholelwe ekwazini iqiniso, lokuthi bazaphaphama baphunyuke emjibileni kaSathane, obathumbele ukuba benze intando yakhe.

Abantu bazakuba ngabazithandayo, labathanda imali, labazikhukhumezayo, labazigqajayo, labathukayo, labangalaleli abazali babo, labangabongiyo, labangcolileyo, abangelathando, labangathetheleliyo, labahlebayo, labangazikhuziyo, labalesihluku, labangakuthandiyo okuhle, labalamacebo amabi, labacaphuka ngeze, labaziphakamisayo, labathanda injabulo kulokuthanda uNkulunkulu  — belesimo sokukholwa kuNkulunkulu kodwa belandula amandla akho ukukholwa. Ungahlanganyeli labo.

Impela, umuntu wonke othanda ukuphila impilo yokulalela uNkulunkulu kuKhristu uJesu uzahlukuluzwa,

IMibhalo yonke yaphefumulelwa nguNkulunkulu njalo ilosizo ekufundiseni, lokukhuza, lokuqondisa, lokufundisa ngokulunga, ukuze umuntu kaNkulunkulu ayilungisele ngokupheleleyo yonke imisebenzi emihle.

Khathesi ngigcinelwe umqhele wokulunga, iNkosi, uMahluleli olungileyo, ezanginika wona ngalelolanga  —  njalo kungayisimi kuphela, kodwa bonke futhi abatshisekela ukubonakala kwayo.

INkosi izangihlenga kukho konke ukuhlaselwa okubi, ingilethe kungekho bubi embusweni wayo wasezulwini. Udumo kalube kuyo kuze kube nini lanini. Ameni.

ukukholwa lokwazi okweyame ethembeni lokuphila okulaphakade, okwathenjiswa nguNkulunkulu, ongaqambi manga, isikhathi singakaqalisi,

Ngoba umusa kaNkulunkulu oletha insindiso usubonakele ebantwini bonke. Uyasifundisa ukuthi “Hayi” ekweyiseni uNkulunkulu lasezinkanukweni zasemhlabeni, njalo siphile ngokuzikhuza, ngokuqonda empilweni yokulalela uNkulunkulu ngesikhathi samanje, lapho sisalindele ithemba elibusisiweyo  —  ukubonakala ngenkazimulo kukaNkulunkulu wethu ophakemeyo longuMsindisi, uJesu Khristu owazinikelayo ngenxa yethu ukuba asihlenge ebubini bonke kanye lokuze azihlambululele abantu abangabakhe, abatshisekela ukwenza okuhle.

wasisindisa, hatshi ngenxa yezinto ezilungileyo esasizenzile, kodwa ngenxa yesihawu sakhe. Wasisindisa ngokugeziswa kokuzalwa kutsha kanye lokuvuselelwa nguMoya oNgcwele,

ukuze kuthi sesilungiswe ngumusa wakhe, sibe yindlalifa silethemba lokuphila okulaphakade.

Ngakho kufanele siqaphelisise lokho esikuzwileyo, ukuze singaduki. Ngoba uma ilizwi elakhulunywa yizingilosi liqinisa, njalo konke ukona lokungalaleli kuthole isijeziso sakho esifaneleyo, pho thina sizaphepha njani uma singanaki insindiso enkulu kangaka na? Ukusindiswa lokhu, okwabikwa kuqala yiNkosi, kwafakazwa kithi yilabo abayizwayo.

Njengoba laye wahlupheka lapho elingwa, uyanelisa ukubasiza abalingwayo.

Bonani, bazalwane, ukuthi kakho omunye wenu olenhliziyo yokona lokungakholwa, ephambukayo kuNkulunkulu ophilayo.

Kodwa khuthazanani izinsuku zonke kusabizwa ngokuthi lamhla, ukuze angabikhona owenu oba lukhuni ngenxa yokukhohliswa yisono.

Njengoba kutshiwo: “Lamhla, uma lisizwa ilizwi lakhe, lingazenzi zibe lukhuni izinhliziyo zenu njengelakwenzayo ekuhlamukeni.”

Kukho konke okudaliweyo akulalutho olufihlakeleyo emehlweni kaNkulunkulu. Konke kwambuliwe kwabekwa obala phambi kwamehlo akhe yena okumele sizibike kuye. Ngakho, njengoba silomphristi omkhulu kakhulu osengene emazulwini, uJesu iNdodana kaNkulunkulu, kasibambeleleni kakhulu ekholweni esiluvumayo. Ngoba kasilamphristi omkhulu onganelisiyo ukuzwela ubuthakathaka bethu, kodwa silaye oseke walingwa ngezindlela zonke njengathi kodwa akaze aba lesono. Kasisondeleni esihlalweni sobukhosi somusa ngesibindi, ukuze samukele isihawu njalo sithole umusa wokusisiza ezikhathini zokuswela kwethu.

Akwenzakali kulabo asebake bakhanyiselwa, asebenambithe isipho sasezulwini, asebehlanganyele kuMoya oNgcwele, asebenambithe ubuhle belizwi likaNkulunkulu kanye lamandla esikhathi esizayo, uma behlubuka, ukuba babuyiselwe ekuphendukeni, ngoba ekulahlekelweni kwabo bayayibethela futhi esiphambanweni iNdodana kaNkulunkulu beyethesa ihlazo phambi kwabantu bonke.

Ngakho ulamandla okubasindisa ngokupheleleyo labo abeza kuNkulunkulu ngaye, ngoba uhlezi ephilela ukubancengela.

Nansi isivumelwano engizasenza lendlu ka-Israyeli ngemva kwalesosikhathi, kutsho iNkosi. Ngizabeka imithetho yami ezingqondweni zabo ngiyilobe ezinhliziyweni zabo. Ngizakuba nguNkulunkulu wabo, bona babe ngabantu bami.

Ngoba ngizathethelela okubi kwabo, njalo angiyikukhumbula izono zabo futhi.”

Kangenanga ngokusebenzisa igazi lembuzi loba elamathole; kodwa wangena kanye kuphela eNdaweni eNgcwele kakhulu ngegazi lakhe, esethole ukukhululwa okulaphakade.

Ngenxa yalokhu uKhristu ungummeli wesivumelwano esitsha ukuze kuthi labo ababiziweyo bathole ilifa elingapheliyo elathenjiswayo  —  njengoba sewafa njengenhlawulo ukuba abakhulule ezonweni abazenzayo esivumelwaneni sakuqala.

Ngempela umthetho uphose ufune ukuba izinto zonke zihlanjululwe ngegazi, njalo kungekho kuchithwa kwegazi akukho ukuthethelela.

Njengalokhu umuntu wamiselwa ukufa kanye, kuthi emva kwalokho abhekane lokwahlulelwa, ngokunjalo uKhristu wanikelwa kanye ukuba asuse izono zabantu abanengi; njalo uzabonakala okwesibili, hatshi ukuthwala isono, kodwa ukuletha ukusindiswa kulabo abamlindeleyo.

Njalo ngaleyontando senziwe saba ngcwele ngomhlatshelo womzimba kaJesu Khristu kanye kuphela.

Kodwa kwathi umphristi lo esenikelele izikhathi zonke umhlatshelo owodwa wezono, wahlala phansi esandleni sokunene sikaNkulunkulu.

ngoba ngomhlatshelo owodwa usephelelise nini lanini labo abenziwayo ukuba ngcwele. LoMoya oNgcwele uyafakaza kithi ngalokho. Kuqala uthi: “Lesi yisivumelwano engizasenza labo emva kwalesosikhathi, kutsho iNkosi. Ngizafaka imithetho yami ezinhliziyweni zabo ngiyilobe lasezingqondweni zabo.” Wabuya wengeza wathi: “Izono zabo lezenzo zokungabi lamthetho, angiyikukukhumbula futhi.” Nxa lezi sezithethelelwe, kawusekho umhlatshelo wesono.

Ngakhoke, bazalwane, njengoba silethemba lokungena eNdaweni eNgcwele kaKhulu ngegazi likaJesu, ngendlela entsha ephilayo, esiyivulelwe ekhethenini, okuyikuthi umzimba wakhe, njalo njengoba silomphristi omkhulu ophethe indlu kaNkulunkulu, kasisondeleni phansi kukaNkulunkulu ngezinhliziyo eziqotho ngethemba elipheleleyo lokholo; sibe lezinhliziyo ezicheliweyo ukuba sihlanjululwe isazela secala lemizimba yethu igeziswe ngamanzi ahlanzekileyo.

Uma siqhubeka sisenza izono ngabomu emva kokuba iqiniso sesilazi, kawusekho umhlatshelo wezono, kodwa umlindelo kuphela owesabekayo wokwahlulelwa kanye lomlilo ovuthayo ozaqothula izitha zikaNkulunkulu. Owawalayo umthetho kaMosi wafa kungekho sihawu ngobufakazi babafakazi ababili kumbe abathathu. Pho licabanga ukuthi ufanele ukujeziswa kakhulu okungakanani umuntu owanyathela iNdodana kaNkulunkulu ngaphansi konyawo, ophathe igazi lesivumelwano elamenza waba ngcwele njengento engangcwele, lohlambaza uMoya womusa na? Ngoba thina siyamazi lowo owathi, “Ukuphindisela ngokwami; ngizabuyisela,” njalo wathi, “INkosi izakwahlulela abantu bayo.” Kuyinto eyesabekayo ukuwela ezandleni zikaNkulunkulu ophilayo.

Ukukholwa yikuba leqiniso lalokhu esikulindeleyo njalo kuqinisekile ngalokho esingakuboniyo.

Kungelakukholwa akwenzakali ukuthokozisa uNkulunkulu, ngoba oza kuye kumele akholwe ukuthi ukhona lokuthi uyabanika umvuzo labo abadinga ngobuqotho.

Ngakho-ke, njengoba sihanqwe lixuku elikhulu kangaka labofakazi, kasikulahleni konke okusivimbelayo kanye lesono esihilela lula, njalo kasigijimeni ngokubekezela kulo umjaho ophawulelwe thina.

Ekulweni kwenu lesono, kalimelananga laso okufika ebangeni lokuchitha igazi lenu.

Zamani kakhulu ukuhlalisana ngokuthula labantu bonke lokuba ngcwele; kungekho bungcwele kakho ozayibona iNkosi.

Muva, njengoba lisazi, lapho esefuna ukuzuza isibusiso lesi waliwa. Wayengeke enze kube lokuguquka kwengqondo, lanxa wafuna isibusiso leso ngezinyembezi.

Ukuthathana kumele kuhlonitshwe ngumuntu wonke, kuthi lombheda wokuthathana uhlale ungangcoliswanga, ngoba uNkulunkulu uzakwahlulela isifebe labo bonke abayiziphingi.

Ngakho, ngoJesu, kasinikeleni njalonjalo kuNkulunkulu umhlatshelo wokubonga  —  isithelo sezindebe ezivuma ibizo lakhe.

Sengathi uNkulunkulu wokuthula, owavusa iNkosi yethu uJesu kwabafileyo ngegazi lesivumelwano esingapheliyo, lowoMalusi omkhulu wezimvu,

Uma omunye wenu eswela ukuhlakanipha kumele acele kuNkulunkulu, obanikayo bonke ngokuphana engadinganga sici, uzakuphiwa.

Ubusisiwe umuntu oqiniselayo ekulingweni, ngoba lapho esephumelele ekuhlolweni, uzaphiwa umqhele wokuphila, ukuphila uNkulunkulu akuthembisa labo abamthandayo. Ekulingweni, kakho omele athi, “UNkulunkulu uyangilinga.” Ngoba uNkulunkulu angeke alingwe yibubi, kumbe alinge umuntu;

kodwa lowo lalowo ulingwa yinkanuko yakhe embi, lapho edonselwa kude ehugwa. Ngakho nxa inkanuko isiyemule izala isono; njalo isono lapho sesikhulile okugcweleyo, sizala ukufa.

Ngakho-ke lahlani amanyala wonke lobubi obande kangaka, lilamukele ngokuthobeka ilizwi elahlanyelwa kini, elingalisindisa. Lingalaleli ilizwi nje kuphela, beselizikhohlisa ngalokho. Yenzani lokho elikutshoyo.

Ngoba loba ngubani ogcina umthetho wonke kodwa akhubeke endaweni eyodwa, ulecala lokuwephula wonke.

Kusizani bazalwane bami, uma umuntu esithi ulokholo kodwa engelazenzo? Ukholo olunjalo lungamsindisa na? Kasithi umzalwane loba umzalwanekazi kalazigqoko lokudla kwansuku zonke. Uma omunye wenu esithi kuye, “Hamba, ngikufisela okuhle; hlala ukhudumala njalo usutha,” kodwa angenzi lutho ngaleziziswelo zakhe zomzimba, kusizani na? Ngokunjalo, ukukholwa nje kuphela, uma kungelamisebenzi kufile.

Liyabona ukuthi umuntu ulungiswa yilokho akwenzayo hatshi ngokukholwa kuphela.

Njengoba umzimba ongelamoya ufile, ngokunjalo ukukholwa okungelamisebenzi kufile.

Lina zifebe zabantu, kalikwazi yini ukuthi ubungane lomhlaba kuyikuzonda uNkulunkulu na? Umuntu okhetha ukuba ngumngane womhlaba uba yisitha sikaNkulunkulu. Kumbe licabanga ukuthi umbhalo utsho kungelasizatho ukuthi umoya awenza ukuba uhlale phakathi kwethu ugebela ebukhweleni, kodwa yena usinika umusa owengeziweyo. Yikho nje umbhalo usithi, “UNkulunkulu umelana labazigqajayo kodwa abanike umusa abathobekileyo.” Ngakho-ke zehliseni kuNkulunkulu. Menqabeni uSathane, uzalibalekela. Sondelani phansi kukaNkulunkulu laye uzasondela kini. Gezani izandla zenu lina zoni, lihlambulule lezinhliziyo zenu, lina abangqondombili. Dabukani, lilile, likhale. Guqulani ukuhleka kwenu kube yikukhala, kuthi ukuthokoza kwenu kube yikudana. Zithobeni phambi kweNkosi, izaliphakamisa.

Ngakho loba ngubani okwaziyo okulungileyo okumele akwenze kodwa angakwenzi, wenza izono.

Umkhuleko owenziwe ngokukholwa uzakwenza lowomuntu ogulayo asile; iNkosi izamvusa. Uma enze isono, uzathethelelwa. Ngakho-ke vumani izono zenu omunye komunye njalo likhulekelane ukuze lisiliswe. Umkhuleko womuntu olungileyo ulamandla njalo uyasebenza.

Bazalwane bami, uma omunye wenu ephambuka eqinisweni, omunye ambuyisele, khumbulani lokhu: Lowo onqanda isoni ekoneni kwaso uzasisindisa ekufeni, agubuzele izono ezinengi.

Udumo kalube kuNkulunkulu uYise weNkosi yethu uJesu Khristu! Ngenxa yesihawu sakhe esikhulu usinike ukuzalwa kutsha ethembeni eliphilayo ngokuvuka kwabafileyo kukaJesu Khristu, kanye laselifeni elingeke libole, lonakale loba libune  —  eliligcinelweyo ezulwini. Ngokukholwa livikelwe ngamandla kaNkulunkulu kuze kufike ukusindiswa okulungiselwe ukubonakaliswa ngesikhathi sokucina.

Liyathokoza kakhulu ngalokhu lanxa like lahlupheka okwesikhatshana ngezinsizi zezinhlobo zonke zezilingo. Zifikile ukuze ukukholwa kwenu  —  okuqakatheke kakhulu kulegolide, elonakalayo lanxa licengwe ngomlilo  —  kubonakaliswe kuqotho njalo kulethe ukubonga, lenkazimulo kanye lodumo lapho uJesu Khristu esebonakaliswa. Lanxa lingambonanga, liyamthanda; njalo lanxa lingamboni khathesi, liyakholwa kuye njalo ligcwele intokozo engakhulumekiyo lemangalisayo, ngoba lamukela umvuzo wokukholwa kwenu, ukusindiswa kwemiphefumulo yenu.

Njengabantwana abalalelayo lingavumeli izinkanuko ezimbi elalilazo lingakazi. Kodwa njengoba lowo owalibizayo engcwele, ngakho yibani ngcwele kukho konke elikwenzayo; ngoba kulotshiwe ukuthi: “Yibani ngcwele ngoba mina ngingcwele.”

Njengoba likhuleka kuYihlo owahlulela imisebenzi yomuntu ngamunye kungekho bandlululo, philani impilo yenu lapha njengezihambi ngokwesaba okuhloniphayo. Ngoba liyakwazi ukuthi kalihlengwanga ngezinto ezifayo ezinjengegolide lesiliva endleleni yokuphila eyize elakutshiyelwa ngokhokho benu, kodwa ngegazi eliligugu likaKhristu imvana engelacala loba isici.

Njengoba khathesi selizihlambulule ngokulalela iqiniso ukuze libe lothando oluqotho kubazalwane benu, thandanani kakhulu, kusuka enhliziyweni. Ngoba selizalwe kutsha, kungasikho ngenhlanyelo ebolayo, kodwa ngengaboliyo, ngelizwi eliphilayo eliqinileyo lika-Nkulunkulu. Ngoba, “Abantu bonke banjengotshani, bonke ubukhosi babo bunjengamaluba eganga; utshani buyabuna njalo iluba liyawohloka, kodwa ilizwi leNkosi limi kuze kube nini lanini.” Njalo leli yilo ilizwi elatshunyayelwa kini.

Yena ngokwakhe wathwala izono zethu emzimbeni wakhe esiphambanweni ukuze siphephe ezonweni njalo siphilele ukulunga; lisilisiwe ngamanxeba akhe. Ngoba lina lalinjengezimvu ezilahlekileyo, kodwa khathesi selibuyele kuMalusi loMbonisi wemiphefumulo yenu.

Ngoba uKhristu wafela izono zenu kwaba kanye, olungileyo efela abangalunganga, ukuze alise kuNkulunkulu. Wabulawa emzimbeni kodwa wavuswa nguMoya,

njalo amanzi la afanekisa umbhaphathizo osusilisa lani futhi  —  kungayisikho kususa ingcekeza emzimbeni kodwa kuyisibambiso sesazela esihle kuNkulunkulu. Siyalisilisa ngokuvuka kwabafileyo kukaJesu Khristu, oseye ezulwini njalo usesandleni sokunene sikaNkulunkulu  —  lezingilosi, leziphathamandla kanye lezikhulu ekuzehliseni kuye.

Ngakho, njengoba uKhristu wahlupheka emzimbeni wakhe, lani hlomani ngesimo esifanayo, ngoba lowo owahluphekayo emzimbeni wakhe usehlule isono. Ngakho-ke, ukuphila kwakhe kwasemhlabeni okuseleyo kakuphileli izinkanuko ezimbi zabantu, kodwa intando kaNkulunkulu. Ngoba selichithe isikhathi esaneleyo ngaphambili lisenza lokho abahedeni abakhetha ukukwenza  —  impilo yobudlova, inkanuko, lokudakwa, ukuzitika, ukuzivusa amadlabuzane kanye lezithombe eziyisinengiso.

Ukuphela kwezinto zonke sekusondele. Ngakho kumele liqedisise njalo lizithibe ukuze likhuleke. Phezu kwakho konke, thandanani ngokupheleleyo, ngoba uthando lugqibela izono ezinengi.

Bangane bami abathandekayo, lingamangaliswa yibuhlungu besilingo elibuzwayo, kungathi kwenzakala into engaziwayo kini. Kodwa thokozani ngokuthi liyahlanganyela ekuhluphekeni kukaKhristu, ukuze lithokoze kakhulu lapho inkazimulo yakhe isibonakaliswa.

Ngoba kuyisikhathi sokuthi ukwahlulela kuqalise ngabendlu kaNkulunkulu; njalo uma kuqalisa ngathi, isiphetho sizakuba yini kulabo abangalaleli ivangeli likaNkulunkulu na? Njalo, “Uma kunzima ukuba abalungileyo basindiswe, pho kuyini okuzakwenzakala kwabayizoni kanye labeyisa uNkulunkulu na?”

Ngakho-ke labo abahlupheka ngokwentando kaNkulunulu kumele bazinikele kuMdali wabo othembekileyo njalo baqhubeke besenza okulungileyo.

Menqabeni, liqinile ekukholweni, ngokuba liyakwazi ukuthi abazalwane benu emhlabeni wonke baphakathi kwazona lezo izinhlupheko. Njalo uNkulunkulu womusa wonke, yena owalibizela enkazimulweni yakhe kuKhristu, emva kokuba lihlupheke okwesikhatshana, yena uqobo uzalivuselela alenze libe lamandla, liqine njalo lithembeke.

Ngakho-ke, bazalwane bami, tshisekelani kakhulu ukwenza ukubizwa lokukhethwa kwenu kuqiniseke. Ngoba uma lisenza lezizinto, kalizukuwa, njalo lizakwamukelwa ngokupheleleyo embusweni olaphakade weNkosi loMsindisi wethu uJesu Khristu.

uma lokhu kunjalo, uNkulunkulu uyakwazi ukuhlenga abantu abamesabayo ekulingweni kanye lokugcinela abangalunganga usuku lokwahlulela, eqhubeka ngokujeziswa kwabo.

INkosi kayiphuzi ukugcwalisa isithembiso sayo, njengokuqedisiswa ngabanye ngokuphuza. Iyalibekezelela, ingafuni ukuba lamunye abhubhe, kodwa ukuba umuntu wonke aphenduke.

Ngakho-ke, bangane abathandekayo, njengoba lokhu likulindele, yenzani imizamo yonke ukuba litholakale lingelasici, lingelacala njalo lihlalisane laye ngokuthula.

Uma sisithi silokuhlanganyela laye kodwa sihambe ebumnyameni, siqamba amanga, njalo leqiniso kasilenzi. Kodwa uma sihamba ekukhanyeni, njengoba esekukhanyeni, silokuhlanganyela omunye lomunye, legazi likaJesu, iNdodana yakhe, liyasihlambulula ezonweni zonke. Uma sisithi kasilasono, siyazikhohlisa, njalo kasilaqiniso. Uma sivuma izono zethu, yena uthembekile njalo ulungile, uzasithethelela izono zethu asihlambulule kukho konke ukungalungi kwethu. Uma sisithi akulasono esasenzayo, simenza abe ngumqambi wamanga, njalo ilizwi lakhe kalilandawo kithi.

Bantwabami abathandekayo, ngililobela incwadi le ukuze lingenzi izono. Kodwa uma umuntu enze isono, silaye osikhulumelayo kuBaba esivikela  —  uJesu Khristu oLungileyo. Ungumhlatshelo wenhlawulo yezono zethu, kungasizono zethu kuphela kodwa lezono zomhlaba wonke. Singaba leqiniso ukuthi siyamazi uma silalela imilayo yakhe. Umuntu othi, “Ngiyamazi,” kodwa angagcini imilayo yakhe uqamba amanga, leqiniso kalalo. Kodwa uma umuntu elalela ilizwi lakhe, uthando lukaNkulunkulu luyapheleliswa sibili kuye. Nanku esazi ngakho ukuthi sikuye: Lowo othi uhlala kuye kumele aphile njengokwenziwa nguJesu.

Ngiyalilobela, bantwana abathandekayo, ngoba izono zenu zithethelelwe ngenxa yebizo lakhe.

Lingawuthandi umhlaba loba olunye ulutho olusemhlabeni. Uma umuntu ethanda umhlaba, uthando lukaBaba kalukho kuye. Ngoba izinto zonke ezisemhlabeni  —  izinkanuko zabantu abalezono  —  ukulangazela kwamehlo abo kanye lokuzigqaja ngezimpahla  —  akuveli kuBaba kodwa emhlabeni. Umhlaba lezinkanuko zawo kuyadlula, kodwa umuntu owenza intando kaNkulunkulu uphila kuze kube nininini.

Kangililobeli ngoba iqiniso lingalazi, kodwa ngokuba lilazi langenxa yokuthi akulamanga aphuma eqinisweni. Umqambi wamanga ngubani? Ngumuntu ophikayo ukuthi uJesu unguKhristu. Umuntu onjalo ngumphikuKhristu  —  uphika uYise leNdodana. Kakho ophika iNdodana oloYise; lowo owamukela iNdodana uloYise futhi.

Njalo nanku asithembisa khona  —  ukuphila okulaphakade. Ngililobela ngalezizinto mayelana lalabo abazama ukulidukisa.

Ngakho-ke, bantwana abathandekayo, qhubekani likuye, ukuze kuthi lapho esebonakala sibe lesibindi njalo singabi lenhloni phambi kwakhe ekufikeni kwakhe. Uma likwazi ukuthi ulungile, liyakwazi ukuthi umuntu wonke owenza okulungileyo uzalwa nguye.

Wonke umuntu olethemba leli ngaphakathi kwakhe uyazihlambulula, njengaye ohlambulukileyo.

Umuntu wonke owenza izono wephula umthetho; ngempela, isono yikungabi lomthetho. Kodwa liyakwazi ukuthi wabonakala ukuze asuse izono zethu. Njalo kuye akulasono. Kakho ohlala kuye oqhubeka esenza izono. Kakho oqhubeka esenza izono owambonayo kumbe omaziyo. Bantwana abathandekayo, lingavumeli muntu eledukisa. Lowo owenza okulungileyo ulungile, njengaye olungileyo. Lowo owenza izono ngokaSathane ngoba uSathane wenza izono kusukela ekuqaleni. INdodana kaNkulunkulu yabonakala ukuze ichithe imisebenzi kaSathane. Kakho ozelwe nguNkulunkulu ozaqhubeka esenza izono, ngoba ezelwe nguNkulunkulu. Sibazi kanje ukuthi abantwana bakaNkulunkulu ngobani kanye lokuthi abangabantwana bakaSathane ngobani: Lowo ongenzi okulungileyo kasuye mntakaNkulunkulu; loba lowo ongamthandiyo umfowabo.

njalo samukela kuye konke esikucelayo, ngoba siyayilalela imilayo yakhe senze okumthokozisayo.

Nanku umlayo wakhe: ukukholwa ebizweni leNdodana yakhe, uJesu Khristu, lokuthandana njengokusilaya kwakhe. Labo abalalela imilayo yakhe bahlala kuye, laye kubo. Njalo sikwazi kanje ukuthi uhlala kithi: Sikwazi ngoMoya asinika yena.

Bangane abathandekayo, kasithandaneni, ngoba uthando luvela kuNkulunkulu. Umuntu wonke othandayo uzelwe nguNkulunkulu njalo uyamazi uNkulunkulu. Lowo ongathandiyo kamazi uNkulunkulu, ngoba uNkulunkulu uluthando.

Uma umuntu evuma ukuthi uJesu uyiNdodana kaNkulunkulu, uNkulunkulu uhlala kuye laye kuNkulunkulu.

Uma umuntu esithi, “Mina ngiyamthanda uNkulunkulu,” kodwa ezonda umfowabo, ulamanga. Ngoba umuntu ongamthandiyo umfowabo, ambonayo, angeke amthande uNkulunkulu angakaze ambone. Njalo wasinika umlayo lo: Lowo othanda uNkulunkulu kumele athande lomfowabo.

Umuntu wonke okholwayo ukuthi uJesu nguKhristu uzelwe nguNkulunkulu, njalo umuntu wonke othanda uyise womntwana uyamthanda lomntwana wakhe lowo. Sikwazi kanje ukuthi siyabathanda abantwana bakaNkulunkulu: ngokuthanda uNkulunkulu sigcina imilayo yakhe. Ukuthanda uNkulunkulu yilokhu: ukulalela imilayo yakhe. Njalo imilayo yakhe kayinzima, ngoba umuntu wonke ozelwe nguNkulunkulu uwunqobile umhlaba. Lokhu yikunqoba okwehlule umhlaba, okuyikukholwa kwethu. Ngubani lowo onqoba umhlaba? Ngulowo kuphela okholwayo ukuthi uJesu uyiNdodana kaNkulunkulu.

Lowo okholwayo eNdodaneni kaNkulunkulu ulobufakazi lobu enhliziyweni yakhe. Lowo ongamkholwayo uNkulunkulu umenze waba ngolamanga, ngoba engabukholwanga ubufakazi uNkulunkulu abunike ngeNdodana yakhe. Ubufakazi lobo yilobu: UNkulunkulu usinike ukuphila okulaphakade, njalo lokhu kuphila kuseNdodaneni yakhe. Lowo oleNdodana yakhe ulokuphila; lowo ongelayo iNdodana kaNkulunkulu kalakho ukuphila.

Ngililobela lezizinto lina abakholwayo ebizweni leNdodana kaNkulunkulu ukuze lazi ukuthi lilokuphila okulaphakade.

Silesiqiniselo lesi ekusondeleni kuNkulunkulu: ukuthi uma sicela ulutho ngokwentando yakhe, uyasizwa.

Siyakwazi ukuthi umuntu ozelwe nguNkulunkulu kaqhubeki esenza izono; lowo owazalwa nguNkulunkulu uyamvikela, loSathane kamthinti.

Lowo odlulela phambili angabe esaqhubeka ngemfundiso kaKhristu kalaye uNkulunkulu; lowo oqhubekayo ngemfundiso uloBaba leNdodana. Uma umuntu esiza kini engalethi imfundiso le, lingamngenisi ezindlini zenu njalo lingamamukeli. Lowo omamukelayo uyahlanganyela emisebenzini yakhe emibi.

Zigcineni lisethandweni luka-Nkulunkulu lisalindele isihawu seNkosi yethu uJesu Khristu ukuba ilingenise ekuphileni okulaphakade. Yibani lesihawu kulabo abathandabuzayo; lenyule abanye emlilweni libasilise; kwabanye bonakalisani isihawu, kuhlangene lokwesaba  —  lizonde lezigqoko ezingcoliswe yimizimba exhwalileyo. Kuye olamandla okuligcina ukuba lingawi, lokulibeka phambi kwenkazimulo yobukhona bakhe kungelasici njalo ngentokozo enkulu  —

lokuvela kuJesu Khristu, ongufakazi othembekileyo, izibulo elivela kwabafileyo, lombusi wamakhosi asemhlabeni. Kuye osithandayo lowasikhululayo ezonweni zethu ngegazi lakhe,

Kodwa ngilale insolo ngawe: Usuludelile uthando lwakho lwakuqala. Khumbula isiqongo owe kuso! Phenduka wenze izinto owawuzenza kuqala. Uma ungaphenduki, ngizakuza kuwe, ngisuse uluthi lwakho lwesibane endaweni yalo.

Ngakho-ke phenduka! Hlezi ngize kuwe ngilwe labo ngenkemba yomlomo wami.

Ngimnike isikhathi ukuba aphenduke ekuxhwaleni kwakhe, kodwa kafuni.

Lowo onqobayo uzagqoka okumhlophe njengabo. Ibizo lakhe kangisoze ngilesule encwadini yokuphila, kodwa ibizo lakhe ngizalivuma phambi kukaBaba lezingilosi zakhe.

Ngiyazazi izenzo zakho, ukuthi kawuqandi njalo kawutshisi. Ngifisa ukuthi ngabe uyilokhu loba uyilokhuyana. Ngakho njengoba ubuthukuthuku  —  ungatshisi njalo ungaqandi  —  sekuseduze ukuba ngikukhafule emlonyeni wami.

Wena uthi, ‘Nginothile; sengazuza inotho njalo kangisweli lutho.’ Kodwa kawunanzeleli ukuthi uyahlupheka, ulusizi, ungumyanga, uyisiphofu njalo unqunu. Ngiyakucebisa ukuba uthenge kimi igolide elihlanjululwe emlilweni, ukuze unothe; ugqoke izigqoko ezimhlophe, ukuze uvale ubunqunu bakho obulihlazo, lamafutha okugcoba amehlo akho ukuze ubone. Labo engibathandayo ngiyabakhuza ngibajezise. Ngakhoke woba lokutshiseka, uphenduke.

Mina ngilapha! Ngimi emnyango ngiqoqoda. Uma kukhona ozwa ilizwi lami avule umnyango, ngizangena ngidle laye, laye adle lami.

Lowo onqobayo, ngizamnika ilungelo lokuhlala lami esihlalweni sami sobukhosi, njengoba lami nganqoba ngasengihlala loBaba esihlalweni sakhe sobukhosi.

Ngaphendula ngathi, “Nkosi, uyakwazi.” Wasesithi, “Laba yibo abaphume ekuhluphekeni okukhulu; bagezise izambatho zabo egazini leWundlu bazenza zaba mhlophe.

Bamnqobile ngegazi leWundlu langelizwi lobufakazi babo; kabakuthandanga kakhulu ukuphila kwabo ukuba besabe ukufa.

Akulamanga atholakala emilonyeni yabo; kabalasici.

Lokho kufuna ukuqinisela lokubekezela kwabangcwele abagcina imilayo kaNkulunkulu baqhubeke bethembekile kuJesu.

Ngubani ongayikukwesaba, wena Nkosi, adumise ibizo lakho na? Ngoba nguwe kuphela ongcwele. Zonke izizwe zizakuza zikhonze phambi kwakho, ngoba imisebenzi yakho elungileyo isibonakalisiwe.”

Ngabuya ngabona isihlalo sobukhosi esikhulu kanye lalowo owayehlezi kuso. Umhlaba lomkhathi kwabaleka phambi kwakhe, akwaze kwaba lendawo yakho. Ngasengibona abafileyo, abancane labakhulu, bemi phambi kwesihlalo sobukhosi, kwasekuvulwa izincwadi. Kwavulwa enye incwadi, eyincwadi yokuphila. Abafileyo bahlulelwa mayelana lalokho ababekwenzile okwakulotshwe ezincwadini.

Uzazesula zonke izinyembezi emehlweni abo. Akusayikuba khona futhi ukufa loba ukulila loba ukukhala loba ubuhlungu, ngoba umumo omdala wezinto usudlule.” Lowo owayehlezi esihlalweni sobukhosi wathi, “Ngenza izinto zonke zibe zintsha!” Wabuya wathi, “Kulobe lokhu, ngoba amazwi la aqotho njalo aliqiniso.” Wasesithi kimi, “Sekwenzakele. Mina ngingu-Alfa lo-Omega, ukuQala lokuCina. Lowo owomileyo ngizamnathisa emthonjeni wamanzi okuphila kungekho mbadalo. Lowo onqobayo uzakudla ilifa lakho konke lokhu, njalo ngizakuba nguNkulunkulu wakhe yena abe yindodana yami. Kodwa amagwala, labangakholwayo, labaxhwalileyo, lababulali leziphingi, labathakathi, labakhonza izithombe labo bonke abaqamba amanga  —  indawo yabo izakuba sechibini lomlilo wesolufa ovuthayo. Lokhu yikufa kwesibili.”

Owenza okubi kaqhubeke esenza okubi; oxhwalileyo kaqhubeke ngokuxhwala; olungileyo kaqhubeke esenza okulungileyo; njalo ongcwele kaqhubeke engcwele.”

“Babusisiwe labo abagezisa izambatho zabo, ukuze babe lelungelo esihlahleni sokuphila, njalo bangene ngesango edolobheni.

UMoya lomlobokazi bathi, “Woza!” Ozwayo katsho athi, “Woza!” Loba ngubani owomileyo, keze; njalo loba ngubani ofisayo, kathathe isipho esingabhadalelwayo samanzi okuphila.

Ngiyabaxwayisa bonke abezwa amazwi esiphrofetho sencwadi le: Uma umuntu ezakwengeza olunye ulutho kuwo, uNkulunkulu uzazengeza kuye izifo ezibaliswe kule incwadi. Njalo uma umuntu esusa amazwi kule incwadi yesiphrofetho, uNkulunkulu uzamthathela isabelo sakhe esihlahleni sokuphila lasedolobheni elingcwele, okubaliswe kule incwadi.