09 – Salamo

Ua fetalai atu foi Ieova le Atua i le tagata, o loo faapea atu, O laau uma o i le faatoaga e te ‘ai ai. A o le laau e iloa ai le lelei ma le leaga, aua e te ‘ai ai; auā o le aso e te ‘ai ai e te oti ai lava.

O le iva sefulu ma le iva o tausaga o Aperamo, na faaali mai ai Ieova ia Aperamo, ua faapea mai foi ia te ia, O a‘u o le Atua e o‘u le malosi uma lava; ia e savali i o‘u luma, ma ia sao lau amio.

Ua tali atu Mose i le nuu, Aua tou te fefefe; auā ua afio mai le Atua ina ia tofotofo ia te outou, ina ia matautia foi o ia e outou, ina ne‘i outou agasala.

ona tulai lea o Mose i le faitotoa o le togalauapi, ma faapea atu, O ai se ‘au ma Ieova? Ina sau ia ia te au. Ona faapotopoto mai lea ia te ia o le fanauga a Levi uma lava.

Na te faaee lona lima i le ulu o le taulaga mu, ona talia lea mo ia, e fai ma togiola mona.

A oo ina nofo sala o ia i se mea o ia mea, ia faaali mai e ia ua agasala o ia i lea mea;

E faia foi e le faitaulaga se togiola mo ia i luma o Ieova, ona faamagaloina ai lea o ia i se mea o ia mea uma ua ia faia, sa nofo sala ai o ia.

Na te faia foi se togiola mo le mea paia, ona o le leaga o le fanauga a Isaraelu, ona o latou solitulafono foi i a latou agasala uma; e faapea foi ona faia e ia mo le fale fetafai o le faapotopotoga, o loo tumau ia te i latou i o latou leaga.

auā o le aso lea e fai ai le togiola mo outou e faamamāina ai outou, ina ia mamā outou, i luma o Ieova i a outou agasala uma.

Auā o i le toto le ola o le tino; ua ou tuuina atu ai foi ia te outou e fai a‘i le togiola mo outou i luga o le fata faitaulaga; auā o le toto o le mea lava lea e fai a‘i le togiola mo le tagata.

O lea ia faapaiaina ai outou e outou, ma ia paia lava outou; auā o a‘u o Ieova lo outou Atua.

Aua tou te faia se galuega e tasi i lea lava aso; auā o le aso lea o le togiola, e fai ai se togiola mo outou i luma o Ieova lo outou Atua. Ai se tagata e le puapuagatia o ia e ia i lea lava aso, e vavaeeseina o ia i lona nuu.

Afai latou te faaali ai i a latou amio leaga, ma amio leaga a o latou tamā atoa ma lo latou solitulafono ua latou soli ai la‘u tulafono, ma latou tetee mai ia te au;

Ia e fai atu i le fanauga a Isaraelu, Pe a faia e se tane po o se fafine se agasala o agasala uma a tagata e soli ai tulafono a Ieova, ma nofo sala ai lea tagata;

Ona o mai ai lea o le nuu ia Mose, ua latou faapea mai, Ua matou agasala, auā ua matou fai upu ia Ieova atoa foi ma oe; ia e tatalo atu ia Ieova ia ave ese e ia ia gata ia te i matou. Ona tatalo ai lea o Mose mo le nuu.

A e afai tou te toe saili ia Ieova lou Atua i lea mea, ona e maua lea o ia, pe afai e te saili ia te ia ma lou loto atoa ma lou agaga atoa. A oo ia te oe le puapuaga, a maua foi oe e ia mea uma lava i aso amuli, afai e te toe foi atu ia Ieova lou Atua, ma e faalogo i lona siufofoga, (auā o Ieova lou Atua, o le Atua alofa ia,) na te le tuuna oe, na te le faaumatia oe, e le galo foi ia te ia le feagaiga ma ou tamā, na ia tauto ai ia te i latou.

Lenei la, ia outou anaana ia faia, faapei ona poloai mai ai o Ieova lo outou Atua ia te outou, aua tou te afe i le itu taumatau, po o le itu tauagavale.

Ia e alofa atu ia Ieova lou Atua ma lou loto atoa, ma lou agaga atoa, ma lou malosi atoa. Ia i ai foi i lou loto o upu nei ou te fai atu ai ia te oe i le aso nei. Ia e matuā a‘oa‘o soo ai i lau fanau, ma ia e tautalatala a‘i, pe a ē nofo i lou fale, pe a ē savali foi i le ala, pe a ē taoto, pe a ē tulai foi. Ia e fusi ai e fai ma faailoga i lou lima, e avea foi ma pale i le va o ou mata. Ia e tusi ai foi i pou o lou fale, atoa ma ou puipui.

Ia e mata‘u ia Ieova lou Atua, ma ia e auauna ia te ia; o lona suafa foi e te tauto i ai.

auā e faaliliueseina e ia lou atalii, ia le mulimuli mai ia te au, a e auauna i atua ese; ona tupu ai lea o le toasa o Ieova ia te outou, ma vave faaumatia ai oe. A ia faapea ona fai e outou ia te i latou, ia outou sofaia o latou fata faitaulaga, ia outou tu‘ipalaina o latou tupua, ma vavae i lalo o latou tupua o Asaira, o latou tupua foi ua ta ia outou susunu i le afi; auā o oe o lo nuu paia mo Ieova lou Atua, na filifilia oe e Ieova lou Atua ina ia avea ma nuu mona, o le oloa tāua e sili i nuu uma lava o i le fogāeleele.

Ia sao lau amio i luma o Ieova lou Atua.

E faaperitomeina foi e Ieova lou Atua o lou loto, ma loto o lau fanau, ina ia e alofa atu ia Ieova lou Atua ma lou loto atoa, ma lou agaga atoa, ina ia e ola ai.

Ona fai atu lea o le fanauga a Isaraelu ia Ieova, Ua matou agasala, ia e faia ia te i matou mea uma ua e finagalo i ai; tau lava ina e laveai mai ia te i matou i lenei aso.

Na ou amiotonu i ona luma, na ou taofia a‘u i la‘u agasala.

Ona tuia lea o le loto o Tavita ina ua uma ona faitauina o le nuu; ua fai ane Tavita ia Ieova, Ua ou matuā agasala lava i le mea ua ou faia; o lenei, Ieova e, ia e faamagaloina lau auauna ai la‘u amioletonu, auā ua ou matuā faavalea.

ua faapea atu foi o ia, Ieova e, le Atua o Isaraelu, e leai se atua e tusa ma oe i le lagi i luga, po o le lalolagi i lalo nei, o loo e tausia le feagaiga ma le alofa i au auauna o e savavali i ou luma ma o latou loto atoa;

o talosaga uma ma aioi uma e faia e se tagata, po o lou nuu o Isaraelu uma; e taitasi uma o e iloa le tiga o latou loto, ma faaloaloa o latou lima i lenei fale; ia e faafofoga mai mai le lagi, o le mea o loo e afio ai, ma e faamagalo mai, ma e faia, ma foai mai i tagata taitoatasi e tusa ma ana amio uma, ua e silafia lona loto; auā na o oe lava ua e silafia loto o tagata uma lava;

Ia outou pepese atu ia Ieova le lalolagi uma; ia outou tala‘i atu lana faaolataga i lea aso ma lea aso.

O oe foi Solomona e, lo‘u atalii, ia iloa e oe le Atua o lou tamā, ma auauna ia te ia ma le loto atoa, ma le loto fiafia; auā e suesue e Ieova o loto uma, ma ua silafia o mafaufau uma o manatu; afai e te saili atu ia te ia, ona e maua ai lea o ia; a e afai e te tuua o ia, ona tuulafoaiina lea o oe e ia e faavavau.

Afai latou te agasala atu ia te oe, (auā e leai se tagata ua le agasala,) ma e toasa mai ia te i latou, ma e tuuina atu i latou i e ita mai ia te i latou, ma latou ave ia te i latou faatagataotaua i se nuu mamao, pe latalata mai; a e afai e toe manatunatu ifo i latou i le nuu e avea i ai i latou faatagataotaua, ma latou liliu mai, ma aioi mai ia te oe i le nuu o latou o tāfea i ai, ma latou faapea atu, Ua agasala i matou, ma faapiopio i matou, ma amio leaga; afai latou te liliu mai ia te oe ma o latou loto atoa, ma o latou agaga atoa, i le nuu o latou o tāfea i ai, e ave i latou i ai faatagataotaua, ma latou tatalo e faasaga mai i lo latou nuu na e foaiina mai i o latou tamā, ma le aai na e filifilia, ma le fale ua ou faia mo lou suafa; ia e faafofoga mai, mai le lagi, o le mea o loo e afio ai i a latou tatalo, ma a latou aioi atu, ma ia e fai le faamasinoga mo i latou, ma e faamagalo mai i lou nuu o e ua agasala atu ia te oe.

Ona faaali mai lea o Ieova ia Solomona i le po, ua faapea mai ia te ia, Ua ou faalogo i lau tatalo, ma ua ou filifilia lenei mea mo a‘u e fai ma fale e fai ai taulaga. Afai ou te pupuni le lagi ma ua le ua ai, afai foi ou te fai atu i sē ‘akava e faaumatia le fanua, afai foi ou te tuuina atu le faamai i lo‘u nuu; afai e faamaulalo lo‘u nuu ē ua ta‘ua i lo‘u igoa, ma latou tatalo, ma sailiili ia te au, ma liliu ese i o latou ala leaga, ona ou faalogo ai lea mai le lagi, ma faamagalo i a latou agasala, ma faaolaina lo latou nuu. O lenei, e vaavaai o‘u mata, ma liliu o‘u taliga i le tatalo e faia i lenei mea.

Ua latou faia foi le feagaiga ia saili ia Ieova le Atua o latou tamā ma le loto atoa ma le agaga atoa;

Ua ou faalogo i lenei mea, ona ou saeia lea o lo‘u ofu ma lo‘u ofu talaloa, ma ou futi o‘u lauulu, ma la‘u ‘ava, ma ou nofo i lalo ua segia lo‘u mauli. Ona potopoto mai ai lea ia te au o i latou uma na matatau i afioga a le Atua o Isaraelu, ona o le agasala a le tafeaga; ua ou nofo foi ua segia lo‘u mauli, ua oo i le taulaga o le afiafi. Ua oo i le taulaga o le afiafi, ona ou tulai lea ai lo‘u tiga, ua saeia lo‘u ofu, ma lo‘u ofu talaloa, ma ua ou tootuli i o‘u tulivae, ma faaloaloa atu o‘u lima ia Ieova lo‘u Atua,

A o talotalo Esera, ma ta‘uta‘u atu a latou agasala, o loo tagi, ma faapaū i luma o le fale o le Atua, ua faapotopoto mai ia te ia mai ia Isaraelu o le faapotopotoga tele lava, o tane ma fafine ma tama iti; auā sa fetagisi le nuu i le tagi tele.

Ua ou faalogo i ia upu, ona ou nofo ai lea i lalo, ma ou tagi, ma faanoanoa i nisi aso, ma anapogi, ma tatalo i luma o le Atua o le lagi, ma ou faapea atu, Ieova e, le Atua o le lagi, ou te aioi atu ia te oe, o le Atua silisili ma le matautia, o le tausia le feagaiga ma le alofa ia te i latou o e alofa atu ia te ia, ma tausi i ana poloaiga; ia e faafofoga mai, ma ia silasila mai ou fofoga, ina ia e faafofoga i le tatalo a lau auauna, ou te tatalo atu ai nei i ou luma i le ao ma le po mo le fanauga a Isaraelu o au auauna, ma ta‘u atu i agasala a le fanauga a Isaraelu, ua matou agasala ai ia te oe; ua agasala foi a‘u atoa ma le aiga o lo‘u tamā. Ua matou agaleaga lava ia te oe, ma ua matou le tausi poloaiga, ma tulafono, ma faamasinoga, na e poloai mai ai ia Mose lau auauna.

O i latou foi ua totoe o le nuu, o faitaulaga, o sa Levī, o leoleo faitotoa, o e pepese, o netini, ma i latou uma na vavaeeseina i tagata o nuu ese i le tulafono a le Atua, o a latou avā, o latou atalii, ma o latou afafine, o i latou uma ua iloa, ma ua lagona; ua latou pipii atu i o latou uso, o latou alii, ma ua latou augani, ma tauto, latou te savavali i le tulafono a le Atua, na tuuina mai e Mose le auauna a le Atua, e tausi foi ma fai i poloaiga uma a Ieova lo tatou Alii, ma ana faamasinoga, ma ana sauniga;

E fia ea a‘u amio leaga ma a‘u agasala? Ina faailoa mai ia ia te au lo‘u solitulafono ma la‘u agasala. Se a ea le mea ua ‘alo ai ou fofoga ma e faia a‘u mou fili?

E ui lava foi ina faaumatia lenei tino pe a mavae atu lo‘u pa‘u, a e ou te iloa atu le Atua i lo‘u tino;

ia fuatia a‘u e ia i le fua faatautau tusa, ia silafia ai e le Atua ua sao la‘u amio.

E faasagasaga o ia i tagata, ma fai atu, Ua ou agasala, ua ou faia le amio faapiopio, a ua le tauia mai ia te au. Na te laveaiina o ia, ina ia le oo i le lua; e iloa foi e ia le malamalama.

Sa ou faalogo ia te oe i le faalogo o o‘u taliga; a o lenei, ua vaai atu o‘u mata ia te oe; o le mea lea ua ou ‘ino‘ino ai ia te au, ua ou salamo foi i le efuefu ma le lefulefu.

Ia outou iloa ua faailogaina e Ieova le tagata amio Atua mo ia; e faafofoga mai Ieova i la‘u valaau atu ia te ia.

A o Ieova, e tietie lava ia e faavavau; ua saunia e ia lona nofoālii e faamasino ai. O ia lava na te faamasinoina le atulaulau ma le tonu; na te faatonuina ma le sa‘o finauga a nuu.

E faatuatua ia te oe o e ua iloa lou suafa; auā, Ieova e, e te le tuuna i latou o e saili ia te oe.

A o a‘u ne‘i, ou te faatuatua i lou alofa, e fiafia lo‘u loto i lau faaolataga.

Na ou amiotonu i ona luma, na ou taofia a‘u ina ne‘i o‘u agasala.

Ia e ta‘ita‘i mai ia te au i le mea moni mai ia te oe, ma a‘oa‘o mai ia te au, auā o oe o le Atua o lo‘u olataga; ou te faatalitali ia te oe i le aso atoa.

Aua e te manatua a‘u agasala ina o ou taulealea, ma o‘u solitulafono; a e tusa ma lou alofa ia e manatua mai a‘u, Ieova e, ona o lou agalelei.

Ia e silasila mai i lo‘u puapuaga ma lo‘u tiga; ma ia e faamagaloina a‘u agasala uma lava.

Tuuina atu ia ia Ieova le viiga o lona suafa; ina ifo ia ia Ieova i le mea paia e matagofie.

Ou te tuuina atu lo‘u agaga i lou aao; Ieova e, le Atua faamaoni, ua e togiolaina a‘u.

Amuia le tagata ua faamagaloina lona solitulafono, ma ua ufitia lana agasala.

Ona ou faailoa atu ai lea ia te oe o la‘u agasala, na ou le ufitia foi la‘u amioletonu; sa ou faapea, Ou te faaali atu ia Ieova o‘u solitulafono; ona e aveesea ai lea o le leaga o la‘u agasala. Selā.

Ia matatau ia Ieova atoa uma le lalolagi; ia fefefe lava ia te ia o outou uma o e nonofo i le atu laulau.

O fofoga o Ieova o loo faasaga i e amiotonu, e liliu mai foi ona taliga i a latou alaga. A o fofoga o Ieova, o loo faasaga i e fai amio leaga, ina ia tineia le faamanatuina o i latou ai le lalolagi. Ua alalaga e ua amiotonu, ona faafofoga mai ai lea o Ieova; ua ia laveai mai foi ia te i latou ai o latou puapuaga uma. Ua latalata mai Ieova i e ua loto momomo; ua ia faaola foi i e ua loto nutimomoia.

E laveaiina e Ieova o agaga o ana auauna; e le faasalaina foi so latou o e faatuatua ia te ia.

Auā ou te ta‘uta‘uina atu la‘u amio leaga; ou te atuatuvale ona o la‘u agasala.

Na ou fai atu, Ieova e, ia e alofa mai ia te au; ia e faamalolo i lo‘u agaga; auā ua ou agasala atu ia te oe.

Le Atua e, ia e alofa mai ia te au, e tusa ma lou lava alofa; e tusa ma le tele o lou alofa mutimutivale, ia e sōloiesea o‘u solitulafono. Ia e matuā fufulu mai ia te au i la‘u amio leaga, ma ia e faamamā mai ia te au i la‘u agasala. Auā ua ou iloa e ‘au lo‘u solitulafono; e le aunoa foi ona i ai i o‘u luma o la‘u agasala. Ua ou agasala atu ia te oe, na o oe lava; ua ou faia foi lenei mea leaga i ou luma; e tonu ai oe i lau fetalaiga, e sao foi oe pe a e faamasino.

Ia e faamamā ia te au i le isopo, ona mamā ai lea o a‘u; ia e fufulu mai ia te au, ona sinasina ai lea o a‘u e sili i lo le kiona.

Ia ‘alo ou fofoga i a‘u agasala, ma ia e sōloi ese a‘u amio leaga uma. Le Atua e, ia e faia se loto mamā mo a‘u; ma ia e faafouina se loto mau i totonu ia te au. Aua e te lafoaiina a‘u i ou luma; aua foi e te aveeseina lou Agaga Paia ia te au.

Le Atua e, o oe lava ua e silafia mai lo‘u valea; e le lilo foi a‘u agasala ia te oe.

A o le Atua, o lo‘u lea Tupu talu anamua; o loo galue e faaola ai i luma o le lalolagi.

Na latou le tausia le feagaiga a le Atua, na le mafafai foi ona latou savavali i lana tulafono;

Aua e te manatua a matou agasala anamua; ia vave ona tomua mai o lou alofa mutimuti vale ia te i matou; auā ua matuā vaivai i matou. Le Atua o lo matou faaolataga e, ia e fesoasoani mai ia te i matou ona o lou suafa mamalu; ia e laveai mai foi ia te i matou, ma ia e faamagaloina a matou agasala ona o lou suafa.

Auā le Alii e, o oe e lelei, ma ua e faamagalo sala; e tele foi lou alofa ia te i latou uma o e valaau atu ia te oe.

E alofa mutimuti vale ma alofa fua mai Ieova; e tele gese lona toasa, a e tele lona alofa.

E lei faia e ia ia i tatou e tusa ma a tatou agasala; e lei taui mai foi o ia ia i tatou e tusa ma a tatou amio leaga. Auā e pei ona maualuga o le lagi i le lalolagi, e faapea ona tele o lona alofa i e matatau ia te ia. E pei ona vava mamao o sasae ma sisifo, e faapea lava ona faamamao e ia ia i tatou o a tatou solitulafono.

A o le alofa o Ieova, mai le vavau lava lea, e oo i le faavavau i e matatau ia te ia; o lana amiotonu foi e oo i le fanau a latou fanau, i e tausi i lana feagaiga, o e manatua foi ana poloaiga e fai ai. Ua faatumauina e Ieova o lona nofoālii i le lagi; ua pule aoao foi lona malo.

Ua matou agasala atoa ma o matou tamā, ua amio faapiopio i matou, ua matou amio leaga lava.

O le mata‘u ia Ieova, o le amataga lea o le poto; ua i ai le mafaufau lelei ia te i latou uma o e fai ia mea; e tumau lona viiga e faavavau lava.

Aua ne‘i ia te i matou, Ieova e, aua ne‘i ia te i matou, a ia tuuina atu le viiga i lou suafa, ona o lou alofa ma lou faamaoni.

Amuia e ua sao l o latou ala, o e savavali i le tulafono a Ieova. Amuia i latou o e tausi i ana tulafono, o e sailiili ia te ia ma le loto atoa; e le faia foi e i latou se mea leaga; e savavali i latou i ona ala.

Ua ou teu i lo‘u loto lau afioga, ina ne‘i ou agasala ia te oe.

O loo tafe ifo o vaitafe i o‘u mata, auā e le tausi e i latou lau tulafono.

Ia faamoemoe Isaraelu ia Ieova; auā o ia Ieova le alofa, o ia te ia foi le faaolataga tele.

O loo finagalo Ieova i e matatau ia te ia, o e faamoemoe i lona alofa.

O le mata‘u ia Ieova, o le amataga lea o le poto; a e ‘ino‘ino tagata valelea i le poto ma le a‘oa‘oina.

Ia e faatuatua ia Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala. Aua e te faafiapoto; ia e mata‘u ia Ieova, ia ‘alo ese i le leaga;

Aua e te alu i le ala o e agasala; aua foi e te ui i le ala o e fai amio leaga. Ia e faamamao i ai, aua ne‘i ui atu i ai, ia e ‘alo ai, ma alu ese.

O le mata‘u ia Ieova, o le ‘ino‘ino lea i le leaga; o le faamaualuga, ma le loto fefete, ma le amio leaga, ma le gutu faapiopio, ou te ‘ino‘ino i ai.

O le ua liliu ese ona taliga a e le faalogologo i le tulafono, e inosia lana lava tatalo.

O le ua ufiufi lona solitulafono, e le manuia o ia; a o le ua faaali ma lafoaiina, e alofagia o ia. Amuia le tagata ua le aunoa ona mata‘u o ia; a o le ua faamaaa lona loto, e paū o ia i le leaga.

E leai lava se tagata amiotonu i le lalolagi, o le na te faia amio lelei, ma le le agasala.

Se‘i tatou faalogo ia i le iuga o ia mea uma, Ia e mata‘u i le Atua, ma e anaana i ana poloaiga; auā o mea ia e tatau i tagata uma. Auā e faamasinoina e le Atua galuega uma, atoa ma mea lilo uma lava, o mea lelei atoa ma mea leaga.

Ina fafano ia outou, ina faamamā ia outou; faate‘a ese ia a outou galuega leaga i o‘u luma, soia tou te fai mea leaga.

O loo o faapea mai Ieova, O mai ia, ina tatou filifili ia, e ui lava ina pei o ofu mūmū a outou agasala, e sisina ia e pei o le kiona; e ui lava ina mūmū ia e pei o le ie ulaula, e avea e pei o fulufulu mamoe.

Oi talofa ia te i latou o e fai mai, ua lelei le mea leaga, a e leaga le mea lelei; o e fai ma malamalama le pouliuli, a e fai foi ma pouliuli le malamalama; o e fai ma mea suamalie le mea oona, a e fai ma mea oona le mea suamalie. Oi talofa i e ua popoto i o latou lava manatu, ma e ua fai ma tagata mafaufau i o latou lava taofi.

Na ia faapai mai ai i lo‘u gutu, ma faapea mai, Faauta, ua papai atu lenei mea i ou laugutu, ua aveeseina ai lau amio leaga, ua faamagaloina foi lau agasala.

O a‘u o Ieova, na ou valaauina oe i le amiotonu; ou te taofimauina lou lima, ma a‘u leoleo ia te oe, ou te avatua foi oe e fai ma feagaiga a le nuu, o le malamalama o nuu ese;

O a‘u, o a‘u lava lē sōloiesea au solitulafoni, ona o a‘u lava; o au agasala foi ou te le manatua ia. Ia faamanatu mai ia te au, ia ta fefaamasinoai; ta‘u mai ia oe, ina ia ta‘uamiotonuina ai oe.

Ua ou sōloia ou solitulafono e pei o se ao uliuli, ma au agasala e pei o se ao; foi mai ia ia te au, auā ua ou faatauina oe. Ia pese oe le lagi e, auā ua faia lea mea e Ieova; ia alalaga outou o mea maulalalo i le lalolagi; ia leo tetele outou mauga e, ma alalaga fiafia; o oe le vao ma laau uma o i ai; auā ua faatauina Iakopo e Ieova, na te faatupuina foi lona lava viiga ia Isaraelu.

Faaali mai ia, ma ia outou faalatalata mai; ia filifili faatasi foi i latou. O ai ea ua na faailoa mai lenei mea mai anamua, ua faaalia mai talu anamua? E le o a‘u ea o Ieova? e leai se tasi atua, ua na o a‘u lava; o le Atua amiotonu, i le ma le Faaola; e leai se tasi na o a‘u. Liliu mai ia ia te au, tou te ola ai, o outou tuluiga uma o le lalolagi; auā o a‘u o le Atua, a e leai lava se tasi.

E foi mai e ua togiolaina e Ieova, latou te o mai foi i Siona ma le alaga ma le olioli e faavavau i luga i o latou ulu; latou te maua le olioli ma le fiafia; a e sosola ese le faanoanoa ma le mapuitiga.

A ua manua o ia ona o a tatou solitulafono, ua momomo o ia ona o a tatou amio leaga; o le aoaiga e filemu ai tatou sa i ona luga lea, o ona faalavalava foi ua malolo ai tatou. O i tatou uma ua sē i tatou e pei o mamoe, ua taitasi ma faasaga i lona lava ala; a ua faaoo ia te ia e Ieova le amio leaga o i tatou uma.

Ia outou saili ia Ieova manū o mafai ona maua o ia; ia outou valaau ia te ia manū o latalata mai o ia; ia lafoai e le ua amio leaga lona ala, ma le tagata agasala ia lafoai e ia ona manatu; a ia foi mai ia Ieova, ona alofa mai lea o ia ia te ia; ia foi mai i lo tatou Atua, auā na te matuā faamagaloina. Auā o o‘u manatu e le o outou manatu, o o‘u ala e le o outou ala, ua fetalai mai ai Ieova. Auā e pei ona sili ona maualuga o le lagi i le lalolagi, ua faapea ona sili ona maualuga o o‘u ala i o outou ala, ma o‘u manatu e sili i o outou manatu.

Auā o loo faapea ona fetalai mai o le ua Maualuga ma ua Silisili, o lē afio e faavavau, e paia lona suafa, Ou te nofo i le mea maualuga ma le paia, ma te nonofo foi ma le ua momomo ma ua maulalo lona loto, e faamafanafana i e ua loto maulalo, ma faamafanafanaina loto o e ua loto momomo.

Ua i o‘u luga le Agaga o le Alii o Ieova; auā ua faauuina a‘u e Ieova e tala‘i le tala lelei i e ua tigaina, ua ia auina mai a‘u e fufusi i e loto momomo, e tala‘i le saolotoga i le tafeaga, ma le matuā tatalaina o e ua fusifusia. E tala‘i le tausaga e talileleia mai ai e Ieova, ma le aso e taui ai ma sui e lo tatou Atua; e faamatalaloto i e faanoanoa uma lava; e avatu le fiafia i e faanoanoa i Siona, e foaiina atu ia i latou le matagofie e sui a‘i le lefulefu, o le uu o le olioli e sui a‘i le faanoanoa, o le ofu e fai a‘i viiga e sui a‘i le loto faavaivai; e igoa i latou, O laau o le amiotonu, o le faatoaga a Ieova, e fai mona viiga.

O i matou nei e tusa ma le mea leaga i matou uma; o a matou amiotonu uma e tusa ia ma le ie o le ma‘i; ua mamae i matou uma e pei o le lau laau, o a matou amioletonu e pei se matagi ua lelea ai i matou.

Na faia ia mea uma e o‘u lima; sa i ai lava ia mea uma, ua fetalai mai ai Ieova; a o lenei le tagata ou te vaai i ai, o e ua faamaulalo ma le loto tiga, o le ua gatete foi i la‘u upu.

Tau ina e iloa lau agasala ua e fouvale ai ia Ieova lou Atua, ua e fealuai i tane ese i lalo o laau lauolaola uma; ua e le faalogo mai foi i lo‘u leo, o loo fetalai mai ai Ieova.

Ua matou taooto ma lo matou masiasi, ua ufitia lava i matou i lo matou mā; auā ua matou agasala ia Ieova lo matou Atua, o i matou atoa ma o matou tamā, talu ina o matou o taulelea ua oo lava i nei ona po, e lei faalogo foi i matou i le siufofoga o Ieova lo matou Atua.

Ierusalema e, ina fufulu ia lou loto ai le leaga, ina ia faaolaina oe; pe tumau seia afea ou mafaufauga leaga i totonu ia te oe?

Le lalolagi e, ina faalogologo mai ia, faauta, o a‘u nei ou te faaooina atu le malaia i lenei nuu, o le fua o latou lava mafaufauga, auā ua latou le faalogo i a‘u upu; o la‘u tulafono foi ua latou lafoaiina lea.

Ua liliu atu o‘u taliga, ma ou faalogologo atu; ua latou le tautala faamaoni; e leai se tagata ua salamo i lana amio leaga, ua faapea mai, Se a le mea ua ou faia? Ua latou taitasi ma liliu atu i o latou taufetuliga, e pei ona oso atu o le solofanua i le taua.

Ua fetalai mai foi Ieova, Ua latou lafoaiina la‘u tulafono na ou tuuina atu i o latou uma, ma latou le faalogo i lo‘u leo, ma latou le savavali i ai; a ua latou mulimuli atu i o latou loto finau vale, atoa ma Paala, na a‘oa‘oina ai i latou e o latou tamā;

Ieova e, e ui lava ina ua molimau a matou agasala ia te i matou, ia e faia lava ona o lou suafa; auā ua tele lo matou liliu ese; ua matou agasala ia te oe.

Ieova e, ua matou iloa la matou amio leaga, ma le amioletonu a o matou tamā; auā ua matou agasala ia te oe.

Ieova e, ia e faamalolo mai ia te au, ona malolo ai lea o a‘u; ia e faaola mai ia te au, ona faaolaina ai lea o a‘u; auā o oe ou te vivii i ai.

Ou te avatu foi ia te i latou le loto e iloa ai a‘u, o a‘u lava o Ieova; e fai foi i latou mo‘u nuu, e fai foi a‘u mo latou Atua; pe a latou toe foi mai ia te au ma o latou loto atoa.

O le alofa o Ieova ua le faaumatia ai i tatou, ona ua le mavae o lona alofa mutimutivale; e fou mai ia i taeao uma; e tele lou faamaoni.

Ua mavae le fiafia o matou loto; ua liua la matou siva ma faanoanoa. Ua paū le palealii i lo matou ulu; oi talofa ia te i matou nei, auā ua agasala i matou. O le mea lea ua vaivai ai o matou loto; o mea ia ua faapouliuligia ai o matou mata;

Faauta, o agaga uma, o o‘u lava i latou; e pei o le agaga o le tamā ona fai mo‘u, e faapea foi le agaga o le atalii; o le tagata e agasala e oti ia.

O le tagata e agasala e oti lava ia; e le tauia le agasala a le tamā i le atalii, e le tauia foi le agasala a le atalii i le tamā; o le amiotonu a le ua amiotonu e i ona luga lava lea, o le amio leaga foi a le ua amio leaga e i ona luga lava lea.

A e afai e liliu ese le ua amio leaga ai ana agasala uma ua na faia, ma tausi i a‘u tulafono uma, ma faia e ia le amio tatau ma le amiotonu, e ola lava ia, e le oti. O ana solitulafono uma na ia faia e le ta‘uta‘ua ia te ia; o lana amiotonu ua ia faia, e ola ai o ia. O loo fetalai mai le Alii o Ieova, Ou te fiafia ea i le oti o le ua amio leaga? ou te le fiafia ea pe a liliu ese i lona ala ia ola ai o ia?

A e afai e liliu ese le ua amiotonu i lana amiotonu, ma ua fai amio leaga, ma ua fai e tusa ma mea uma e inosia e faia e le ua amio leaga, e ola ea ia? O lana amiotonu uma na ia faia, e le manatua; o lana agasala ua ia agasala ai, ma ona sese ua ia sese ai, ona o ia mea e oti ai o ia.

A ua outou fai mai, E le tusa le ala o le Alii. Ina faalogologo mai ia, le aiga o Isaraelu e, E le tusa ea lo‘u ala? E le ua le tutusa ea o outou ala?

A liliu ese le ua amiotonu i lana amio, ma ua fai amio leaga, ma oti ai; o lana lava amio leaga ua ia fai e oti ai o ia.

A liliu ese foi le ua amio leaga i lana amio leaga na ia faia, ma ua fai le amio tatau ma le amiotonu, e faaolaina e ia lona agaga. Auā ua ia mafaufau, ma liliu ese i lona solitulafono uma na ia faia, e ola lava ia, e le oti.

A ua fai mai le aiga o Isaraelu, E le tusa le ala o le Alii. Le aiga o Isaraelu e, e le tutusa ea o‘u ala? E le ua le tutusa ea o outou ala?

O le mea lea ou te faamasino ai ia te outou, le aiga o Isaraelu, taitoatasi e tusa ma ona ala, o loo fetalai mai ai le Alii o Ieova. Liliu mai ia, ina liliu ese i o outou solitulafono uma; ona le faia lea o le agasala ma mea e tausuai ai outou. Ina lafoai ia o outou solitulafono uma ua outou solitulafono ai, ma ia fai mo outou se loto fou, ma se agaga fou; auā pe se a ea le mea tou te fia oti ai, le aiga o Isaraelu e? Auā ou te le fiafia lava i le oti o lē oti, o loo fetalai mai ai le Alii o Ieova; o lenei, liliu mai ia outou tou te ola ai.

Tou te manatunatu ai i a outou amio uma, ma a outou mea uma na fai, sa leaga ai outou; ona ‘ino‘ino ai lea o outou ia te outou ona o a outou mea leaga uma ua outou faia.

A liliu ese le ua amiotonu i lana amiotonu, ma ua faia e ia le amio leaga, ona oti ai lava lea o ia. A e afai e liliu ese le ua amio leaga ai lana amio leaga, ma ua faia e ia le amio tatau ma le amiotonu, ona ola ai lava lea o ia.

Ona ou sausauina lea o outou i le vai manino, ona mamā ai lea o outou; ou te faamamāina foi outou i lo outou leaga uma, ma a outou tupua uma. Ou te avatu foi ia te outou le loto fou, ma ou tuu i totonu ia te outou le agaga fou; ou te aveesea le loto maaa ai o outou tino, ma ou avatu ia te outou le loto aano.

Ona ou faasaga lea i le Alii le Atua e saili i le tatalo, ma le faatoga, ma le anapogi, ma le ie talatala, ma le lefulefu. Na a‘u tatalo ia Ieova lo‘u Atua, ma ou faaali atu, ua ou faapea atu, Le Alii e, o le Atua e sili ma le matautia, o lē tausi i le feagaiga, ma le alofa i e alofa atu ia te ia, atoa ma e o tausiusi i ana poloaiga. Ua matou agasala, ma ua fai mea leaga, ma ua matou agaleaga, ua fouvale foi ina ua te‘a ese ma au poloaiga ma au faamasinoga. E lei faalogo i matou i au auauna le au perofeta, o e na tautala mai i lou suafa i o matou tupu, ma o matou alii, ma o matou tamā, atoa foi ma tagata uma o le nuu.

Le Alii e, ua ia te i matou le masiasi, o matou tupu, ma o matou alii, atoa ma o matou tamā, auā ua matou agasala ia te oe.

O loo i le Alii, lo matou Atua, le alofa mutimutivale ma le faamagaloina o sala, auā ua matou fouvale ia te ia. E lei faalogo foi i matou i le siufofoga o Ieova lo matou Atua, e savavali i ana tulafono, na ia tuuina mai ia i matou e ana auauna le au perofeta.

O loo ou tautala atu ma tatalo, ma ta‘uta‘u atu a‘u agasala, ma le agasala a lo‘u nuu o Isaraelu, o loo fai foi lo‘u aioi i luma o Ieova lo‘u Atua mo le mauga paia o lo‘u Atua;

E toatele foi o e momoe i le efuefu o le eleele latou te ala mai, o isi i le ola e faavavau, a o isi i le faalumaina ma le inosia e faavavau.

Isaraelu e ina toe foi mai ia ia Ieova lou Atua; auā o lau agasala ua e paū ai.

O lenei, ua faapea mai Ieova, Ia outou toe foi mai ia te au ma o outou loto atoa, ma le anapogi, ma le fetagisi, ma le tagiaue; ia outou saeia o outou loto, a e le o outou ofu, ma toe foi ia Ieova lo outou Atua; auā e alofa fua, ma alofa mutimutivale o ia, e tele gese lona toasa, ua tele foi lona alofa, e salamo ia ona o le leaga.

E toatele lava tagata i le vanu e faasalaina ai, auā ua latalata mai le aso o Ieova i le vanu e faasalaina ai.

Ona talitonu ai lea o tagata o Nineva i le Atua, ua tala‘i atu foi e i latou la latou anapogi, ua latou oofu foi i le ie talatala, o alii atoa ma tagatānuu. Auā ua oo le tala i le tupu o Nineva, ona tulai ai lea o ia i lona nofoālii, ma tuu ese ia te ia lona ofu tele, ona ufutia lea o ia e ia i le ie talatala, ma nofo i le lefulefu. Ua ia tala‘i atu, ma faailo atu i Nineva i le pule a le tupu ma alii sa ia te ia, ua faapea atu, Aua ne‘i ‘ai sina mea e tagata, po o manu, po o lafu povi, po o lafu mamoe; aua lava ne‘i latou aai, aua foi latou te inu vai; a ia ufitia lava tagata ma manu i ie talatala, ma ia latou matuā alalaga atu i le Atua; ia latou taitasi foi ma liliu mai i lana amioga leaga, ma le faasaua ua i o latou lima. O ai se na te iloa, atonu e liliu mai le Atua, ma salamo, ma liliu ese i lona toasa mamafa, ina ia le fano ai i tatou. Ua silafia e le Atua a latou galuega, ina ua liliu ese i latou i lo latou ala leaga; ona salamo ai lea o le Atua i le malaia na ia fetalaia mai na te faia ia te i latou; e lei faia.

Ou te faatoatoa i le toatamai o Ieova, auā ua ou agasala atu ia te ia; seia faia e ia la‘u finauga, ma na faia foi lo‘u faamasinoga; na te faaooina a‘u i le malamalama, ou te iloa lana amiotonu.

O ai ea se Atua e tusa ma oe o le faamagalo agasala, ma ua le manatua solitulafono a e o totoe o lona tofi? Na te le faamoemoe pea i lona toasa, auā e fiafia o ia i le alofa. E toe alofa mai o ia ia te i tatou, e faatoilaloina e ia a tatou amioletonu; e te lafo foi a latou agasala uma i mea loloto o le sami.

E fanau mai e ia le tama tane, e te faaigoa foi ia te ia o Iesu; auā e faaola e ia lona nuu ai a latou agasala.

Ina salamo ia outou; auā ua latalata mai le malo o le lagi.

Ona o atu ai lea ia te ia o Ierusalema, ma Iutaia uma, atoa ma le itu uma o Ioritana; ua papatisoina foi i latou i Ioritana e ia, ua faaali atu e i latou a latou agasala.

Ua na iloa atu le au faresaio ma le au satukaio e toatele ua o mai i lana papatisoga, ona ia faapea atu ai lea ia te i latou, Fanau a gata feai e, o ai ea ua na faaali atu ia te outou ia sosola ese i le toasa atali? Ia outou fua mai ni fua e tatau ma le salamo;

O loo tuu nei foi le mătau i tafu‘e o laau; o laau uma foi e le fua mai i fua lelei, e taia ma lafoina i le afi. O a‘u nei, ou te papatiso atu ia te outou i le vai ina ia salamo; a e peitai o lē mulimuli mai e silisili o ia ia te au, e le aoga a‘u ona tauave i ona see vae; o ia lea na te papatisoina atu ia te outou i le Agaga Paia ma le afi. O i lona aao lana asu, na te faamamāina ai lana faaputugāsaito; na te faapotopotoina foi ana saito i le fale saito, a e susunuina le otaota o saito i le afi e le matineia.

Ona maliu atu ai lea o Iesu mai Kalilaia i Ioritana ia Ioane, ia papatisoina ai e ia. A ua vavao e Ioane ia te ia, ua faapea mai, E ao ona e papatisoina mai o a‘u, a ē maliu mai ea oe ia te au? A ua tali atu Iesu, ua faapea atu ia te ia, Tuu mai nei pea ia; auā e faapea ona tatau ia te i tatou ona faataunuuina o mea tonu uma. Ona tuu mai lea ia te ia.

o le nuu sa nofo i le pouliuli, ua latou iloa le malamalama tele; o i latou foi sa nonofo i le nuu ma le ata o le oti ua alu ae le malamalama ia te i latou. Talu mai ai na afua ona tala‘i atu e Iesu, ua faapea atu, Ina salamo ia outou; auā ua latalata mai le malo o le lagi.

Amuia ē loto maulalo; auā e o latou le malo o le lagi. Amuia ē faanoanoa; auā e faamafanafanaina i latou. Amuia ē agamalu; auā e fai mo latou tofi le nuu. Amuia ē fia aai ma fia inu i le amiotonu; auā e maoona i latou. Amuia ē alolofa atu; auā e alofaina mai i latou. Amuia ē loto mamā; auā latou te iloa atu le Atua. Amuia ē faatupuina le filemu; auā e ta‘ua i latou o atalii o le Atua. Amuia ē sauaina ona o le amiotonu; auā e o latou le malo o le lagi.

Auā e moni, ou te fai atu ia te outou, e mavae atu le lagi ma le lalolagi, a e le mavae atu lava se iota po o sina fāsi mataitusi o le tulafono, seia taunuu mea uma. O lenei, o se na te tatalaina se poloaiga e tasi e aupito itiiti o nei poloaiga, ma faapea ona a‘oa‘o i tagata, e ta‘ua ia e aupito itiiti i le malo o le lagi; a o se anaana ma a‘oa‘o ai, e ta‘ua ia e sili i le malo o le lagi. Auā ou te fai atu ia te outou, a le sili la outou amiotonu i la le au tusiupu ma le au faresaio, e le sao atu lava outou i le malo o le lagi.

Afai foi e te tausuai i lou mata taumatau, ina sali ese ia, ma e lafoai; auā e lelei ina fano se tasi ou fāsi tino, a e leaga pe a lafoina lou tino uma i Kēna. Afai foi e te tausuai i lou lima taumatau, ina tutū ese ia, ma e lafoai; auā e lelei ina fano se tasi ou fāsi tino, a e leaga pe a lafoina lou tino uma i Kēna.

O lenei, ia atoatoa ona lelei o la outou amio, e pei o lo outou Tamā o i le lagi e atoatoa ona lelei o ia.

O lenei, ia faapea outou ona tatalo, Lo matou Tamā e, o i le lagi, ia paia lou suafa. Ia oo mai lou malo. Ia faia lou finagalo i le lalolagi, e pei ona faia i le lagi. Ia e foai mai ia te i matou i le aso nei a matou mea e ‘ai e tatau ma le aso. Ia e faamagalo ia te i matou i a matou agasala, e pei o i matou foi ona matou faamagaloina atu i e ua agaleaga mai ia te i matou. Aua foi e te ta‘ita‘iina i matou i le tofotofoga; a ia e laveai ia i matou ai le leaga. Auā e ou le malo, ma le mana, atoa ma le viiga, e faavavau lava, Amene.

Auā afai tou te faamagaloina atu tagata i a latou agasala, e faamagaloina foi outou e lo outou Tamā o i le lagi. A e afai tou te le faamagaloina atu tagata i a latou agasala, e le faamagaloina foi e lo outou Tamā a outou agasala.

O le lamepa o le tino, o mata ia; pe afai foi e lelei ou mata, e malamalama uma ai lou tino. A e afai e leaga ou mata, e pouliuli uma ai lou tino. O lenei, afai e pouliuli le malamalama ua i totonu ia te oe ona matuā tele ai lea o le pouliuli.

E leai se na te mafaia ona auauna i alii e toalua; auā e ‘ino‘ino o ia i le tasi, a e alofa atu i le tasi; a le o lea, e faapipii atu ia i le tasi, a e faaleaoga i le tasi. Tou te le mafaia ona auauna i le Atua atoa ma mamone.

A ia outou muai saili le malo o le Atua ma lana amiotonu; ona faaopoopoina atu lea o ia mea uma ia te outou.

Ia outou ulu atu i le faitotoa va apiapi; auā e va tele le faitotoa, e lautele foi le ala e tau atu i le malaia, e toatele foi i latou o e ui atu ai. Auā e va apiapi le faitotoa, e lauitiiti foi le ala e tau atu i le ola, e toaitiiti foi i latou o e maua.

E faapea foi laau lelei taitasi ma fua mai i fua lelei; a o le laau leaga e fua mai i fua leaga. E le mafai i le laau lelei ona fua mai i fua leaga, e le mafai foi i le laau leaga ona fua mai i fua lelei. O laau uma e le fua mai i fua lelei, e taia ia ma lafoina i le afi. O lea foi tou te iloa ai i latou i o latou fua.

E le sao atu i le malo o le lagi i latou uma o e fai mai ia te au, Le Alii e, le Alii e; na o le na te faia le finagalo o lo‘u Tamā o i le lagi. E toatele latou te fai mai ia te au i lea aso, Le Alii e, le Alii e, matou te lei perofeta ane ea i lou igoa, o lou igoa foi na matou tulia ai temoni, o lou igoa foi na matou fai ai vavega e tele? Ona ou ta‘utino atu ai lea ia te i latou, Ou te lei iloa lava outou; ina o ese ia outou ia te au, o outou o e fai amio leaga.

E inosia foi outou e tagata uma ona o lo‘u igoa; a o lē tumau seia oo atu i le gataaga, e faaolaina o ia.

Aua foi tou te matatau i e fasioti le tino, a e latou te le mafaia ona fasioti le agaga; a e lelei ona outou matatau i le ua mafai ona fano ia te ia le agaga atoa ma le tino i Kēna.

O lenei, ai se na te ta‘uta‘u a‘u i luma o tagata, o a‘u foi ou te ta‘uta‘uina o ia i luma o lo‘u Tamā o i le lagi. Ai se faafiti foi ia te au i luma o tagata, ou te faafitia foi o ia i luma o lo‘u Tamā o i le lagi.

O le ua tele lona alofa i lona tamā po o lona tinā, a e itiiti ia te au, e le aoga lea ia te au; o le ua tele foi lona alofa i lona atalii po o lona afafine, a e itiiti ia te au, e le aoga foi lea ia te au. O se le ave lona satauro, ma le lē mulimuli mai ia te au, e le aoga foi lea ia te au. O lē maua lona ola, e māumau ai ia te ia; a o le faamāumau i lona ola ona o a‘u, e maua e ia.

Ona faasa‘i atu ai lea o ia i aai na fai ai le tele o ona vavega, auā latou te lei salamo.

Auā e alu ae mai le loto o le manatu leaga, o le fasioti tagata, ole mulilua, o le faitaaga, o le gaoi, o le molimau pepelo, ma le upu leaga.

Auā se a le aoga i le tagata pe afai na te maua le lalolagi uma, a e māumau lona ola? se a foi se mea e avatu e le tagata e togiola a‘i lona ola?

ua faapea atu, E moni, ou te fai atu ia te outou, a le liua outou, ma avea ia pei o tama iti, tou te le sao lava i le malo o le lagi.

ai se na te faatausuai se tasi o i latou nei e faatauvaa o e faatuatua ia te au, e lelei i lea tagata pe ana nonoa se maaolo tele i lona ua, ma faagotoina o ia i le moana loloto.

Afai foi e te tausuai i lou lima po o lou vae, ina tutū ese ia, ma e lafoai; e lelei ona e sao i le ola a ua lima mutu, pe pipili, a e leaga pe a lafoina oe i le afi e faavavau ma ou lima e lua ma ou vae e lua. Afai foi e te tausuai i lou mata, ina sali ese ia, ma e lafoai; e lelei ona e sao i le ola ma le mata e tasi, a e leaga pe a lafoina oe ma ou mata e lua i le afi o Kēna.

Ona alu ane ai lea o Peteru ia te ia, ua faapea ane, Le Alii e, e agaleaga mai faafia ea lo‘u uso ia te au, ma ou faamagalo ia te ia? seia atu fitu ea? Ua fetalai atu Iesu ia te ia, Ou te le fai atu ia te oe, seia atu fitu, a ia fitugafulu ni fitu.

E faapea foi ona faia ia te outou e lo‘u Tamā o i le lagi, pe afai tou te le taitasi ma faamagalo ma o outou loto atoa i o outou uso pe a latou agaleaga mai.

Ai se tasi ua ia tuua o fale, po o uso, po o tuafāfine, po o le tamā, po o le tinā, po o le avā, po o le fanau, p o fanua ona o lo‘u igoa, e maua e ia e taisautuaselau, e fai foi mona tofi le ola faavavau.

E pei o le Atalii o le tagata e lei sau ia ina ia auauna mai tagata ia te ia, a ia auauna atu ia, ma foaiina atu lona ola e fai ma togiola e sui a‘i tagata e toatele.

Auā na sau Ioane ia te outou i le ala o le amiotonu, a e tou te lei talitonu ia te ia; a ua talitonu ia te ia telona ma fafine talitane; ua outou iloa foi, a e lei mulimuli ona salamo outou, ina ia talitonu ai ia te ia.

Ona ulufale atu ai lea o le tupu e vaavaai atu i e na taooto e aai ua iloa atu ai e ia o le tasi tagata ua le ofu i le ofu o le tausamaaga. Ona fai atu ai lea o ia ia te ia, Sole, pe faapefea ona e ulufale mai iinei ua le ia te oe le ofu o le tausamaaga? Ona le gagana ai lea o ia. Ona fai atu ai lea o le tupu i auauna, Ia outou fusifusia ona vae ma ona lima, ma ave o ia, ma lafo i le pouliuli i fafo, e i ai le taufaitagiane ma le lilivau o nifo. Auā e toatele e ua tala‘iina a e toaitiiti e ua filifilia.

Ona fetalai atu ai lea o Iesu ia te ia, E te alofa atu i le Alii lou Atua ma lou loto atoa, ma lou agaga atoa, ma lou manatu atoa. O le poloaiga muamua lena ma le sili. E faapena foi lona lua, E te alofa atu i lē lua te tuaoi, ia pei o oe lava ia te oe. O nā poloaiga e lua ua autu ai le tulafono uma ma le au perofeta.

A o lē tumau seia oo i le gataaga, e faaolaina lea.

O ia ona po e tusa ai le malo o le lagi ma taupou e toasefulu, o e na ave a latou lamepa, ma latou o atu e faafetaiai i le faatoafaiavā. Ua popoto le toalima o i latou, a e vālea le toalima. O e vālea ua ave a latou lamepa, a e lei avea ma ni suāuu. A o e popoto ua ave ni suāuu i a latou fagu faatasi ma a latou lamepa. Ua tuai mai le faatoafaiavā, ona taufaitulemomoe ai lea o i latou uma, ua momoe lava. A ua oo i le tulua o po, ona sau ai lea o lē alaga, Faauta, ua sau le faatoafaiavā; ina o ia outou e faafetaiai ia te ia. Ona tutū ai lea o ia taupou uma lava, ma teuteu a latou lamepa. Ona fai atu ai lea o e vālea i e popoto, Au mai ni a outou suāuu mā matou; auā o le a mamate a matou lamepa. A ua tali mai o e popoto, ua faapea mai, Ne‘i le lava ia i matou ma outou; a e lelei ona outou o i e faatau ma faatau mai ai ni a outou. Ua latou o e faatau, ona sau ai lea o le faatoafaiavā; o e ua saunia foi ua latou ulufale atu faatasi ma ia i le tausamaaga, ona pupuni ai lea o le faitotoa. E mulimuli ane, ona o mai ai lea o isi taupou, ua faapea mai, Le Alii e, le alii e, ia e tatala atu le puipui mo i matou. A ua tali atu o ia, ua faapea atu, E moni, ou te fai atu ia te outou, ou te le iloa outou.

Pe a sau le Atalii o le tagata i lona mamalu, ma le au agelu paia uma faatasi ma ia, ona tietie ai lea o ia i lona nofoālii mamalu; e faapotopotoina foi i ona luma o nuu uma lava; ona tuueseeseina lea o i latou e ia, e pei o le leoleo mamoe ona tuueseeseina o mamoe ma ‘oti; ona tuu ai lea e ia o mamoe i lona itu taumatau, a o ‘oti i lona itu tauagavale. Ona fai atu ai lea o le Tupu i e o i lona itu taumatau, O mai ia, o outou ua faamanuiaina e lo‘u Tamā, ia fai mo outou tofi le malo ua saunia mo outou a o lei faavaeina le lalolagi; auā na ou fia ‘ai, ona outou avane ai lea ni mea ou te ‘ai ai; na ou fia inu, ona outou avane ai lea ni vai ou te inu ai; sa fai a‘u ma tagata ese, ona outou talia lea o a‘u; na ou le lavalavā, ona outou faaofuina lea o a‘u; na ou ma‘i, ona outou asiasia mai lea o a‘u; na ou i le fale puipui, ona outou o ane ai lea ia te au. Ona tali mai ai lea ia te ia o e amiotonu, e faapea mai, Le Alii e, o anafea na matou iloa ai oe ua fia ‘ai, ma matou fagaina oe? po o fia inu, ma matou avane e te inu ai? O anafea foi na matou iloa ai oe o le tagata ese, ma matou talia oe? po o le le lavalavā, ma matou faaofuina oe? O anafea foi na matou iloa ai oe ua ma‘i, po o i le fale puipui, ma matou o atu ai ia te oe? Ona tali atu ai lea o le Tupu, e faapea atu ia te i latou, E moni, ou te fai atu ia te outou, auā na faia e outou i le tasi o e aupito itiiti o o‘u uso nei, o a‘u lea na outou faia i ai. Ona fai atu foi lea o ia i e o i lona itu tauagavale, O outou ua faafanoina, o ese atu ia ia te au i le afi e faavavau, ua saunia mo le tiapolo ma ana agelu. Auā na ou fia ‘ai, a e tou te lei avane ni mea ou te ‘ai ai; na ou fia inu, a e tou te lei avane ni vai ou te inu ai; sa fai a‘u ma tagata ese, a e lei talia a‘u e outou; na ou le lavalavā, a e tou te lei faaofuina a‘u; na ou ma‘i, na a‘u i le fale puipui foi, a e tou te lei asiasia a‘u. Ona tali mai ai lea o i latou foi ia te ia, e faapea mai, Le Alii e, o anafea na matou iloa ai oe ua fia ‘ai, pe fia inu, po o se tagata ese, pe le lavalavā, po o ma‘i, po o i le fale puipui, ma matou lei auauna atu ia te oe? Ona tali atu ai lea o ia ia te i latou, e faapea atu, E moni, ou te fai atu ia te outou, auā na outou le faia i le tasi o e aupito itiiti o i latou nei, o a‘u lea ua outou le faia i ai. Ona o atu ai lea o i latou nā i le sala e faavavau; a o e amiotonu e o atu i le ola e faavavau.

auā o lo‘u toto lenei, o le toto o le feagaiga fou, ua faamaligiina mo tagata e toatele e faamagalo a‘i agasala.

Ia outou mataala ma tatalo, ina ne‘i oo mai le faaosoosoga ia te outou; ua manao i ai le loto, a o le tino ua vaivai.

Ua toe alaga Iesu ma le leo tele, ona tuuina atu ai lea e ia o lona agaga. Faauta foi, ua saeluaina le ie puipui o le malumalu, ua amata ifo i luga, ua oo i lalo; ua luluina foi le eleele, ua mavaevae foi papa;

O lenei, ia outou o atu e fai nuu uma lava ma soo, ma papatiso atu ia te i latou i le suafa o le Tamā, ma le Atalii, ma le Agaga Paia;

Sa faia e Ioane lana papatisoga i le vao, ma tala‘i atu ai le papatisoga o le salamo ina ia faamagaloina agasala. Ua o atu foi le nuu uma o Iutaia ia te ia, atoa ma tagata o Ierusalema, ma ua papatisoina i latou uma e ia i le vaitafe o Ioritana, ua faaali atu a latou agasala.

Ua oo mai ona po, ua latalata mai le malo o le Atua; ina salamo ia, ma talitonu i le tala lelei.

Ai se le talia outou, pe le faalogo ia te outou, a outou o ese i lea mea, i le tou tūtū atu ai le eleele nai o outou vae, e fai ma molimau ia te i latou; e moni, ou te fai atu ia te outou, e feoloolo Sotoma ma Komoro i le aso faamasino, i lea lava aai. Ona latou o atu ai lea ma tala‘i atu ina ia latou salamo.

Ua fetalai atu foi o ia, O le mea e sau ai totonu o le tagata, o le mea lea e leaga ai le tagata; Auā e alu ae mai le loto o le tagata o le manatu leaga, o le mulilua, o le faitaaga, o le fasioti tagata, o le gaoi, o le manumanu, o le amio leaga, o le pepelo, o le matāitu, o le mataua, o upu leaga, o le faamaualuga, o le le mafaufau. O ia mea leaga uma e sau mai totonu, ma leaga ai le tagata.

Ona valaau atu lea o ia i le motu o tagata, atoa ma ona soo, ua fetalai atu ia te i latou, Ai se fia mulimuli mai ia te au, aua ne‘i usiusitai o ia ia te ia, a ia ave e ia lona satauro, i le mulimuli mai ai ia te au. Auā ai se fia faasaogalemuina lona ola, e māumau ai ia te ia; a o lē faamāumau lona ola ona o a‘u ma le tala lelei, e faasaoina e ia. Auā se a le aoga i le tagata, pe afai na te maua le lalolagi uma, a e māumau lona ola? se a foi se mea e avatu e le tagata e togiola a‘i lona ola?

Auā ai sē mā ia te au, ma a‘u upu i lenei tupulaga mulilulua ma le agasala, e mā foi le Atalii o le tagata ia te ia, pe a sau o ia faatasi ma ana agelu paia i le mamalu o lona Tamā.

A faatausuaiina foi oe e lou lima, ina tutū ese ia; e lelei ona e sao i le ola a ua e lima mutu, a e leaga ona lima lua, a e alu i Kēna, i le afi e le mafai ona tineia; o i ai e le mamate o latou ilo, e le tineia foi le afi.

A faatausuaiina foi oe e lau vae, ina tutū ese ia; e lelei ina e sao i le ola ua pipili, a e leaga ona lua ni vae, a e lafoina oe i Kēna, i le afi e le mafai ona tineia; o i ai e le mamate o latou ilo, e le tineia foi le afi.

A faatausuaiina foi oe e lou mata, ina sali ese ia; e lelei ina e sao i le malo o le Atua ma le mata e tasi, a e leaga ona lafoina oe ma ou mata e lua i le afi o Kēna; o i ai e le mamate o latou ilo, e le tineia foi le afi.

E moni, ou te fai atu ia te outou, Ai se le talia le malo o le Atua faapei o se tama itiiti, e le sao lava ia i ai.

Auā foi o le Atalii o le tagata na le sau o ia ina ia auauna tagata ia te ia, a e peitai ia auauna o ia, ma foaiina atu lona ola o le togiola e sui a‘i tagata e toatele.

A outou tutū ma tatalo, ai se mea tou te tiga ai i se tasi, ia outou faamagaloina; ina ia faamagaloina foi e lo outou Tamā o i le lagi a outou agasala.

Afai foi tou te le faamagaloina, e le faamagaloina e lo outou Tamā o i le lagi a outou agasala.

E inosia foi outou e tagata uma ona o lo‘u igoa; a o lē tumau seia oo i le iuga, e faaolaina lea.

Ua fetalai atu foi o ia ia te i latou, O lo‘u toto lenei, o le toto o le feagaiga fou, ua faamaligiina mo tagata e toetele.

Ua faapea atu, Ava, lo‘u Tamā e, e te mafaia e oe mea uma lava; ia e aveeseina lenei ipu ia te au; a e aua le faia lo‘u loto, a o lou finagalo.

Ina mataala ia, ma tatalo, ne‘i oo mai le faaosoosoga ia te outou; ua manao i ai le loto, a o le tino ua vaivai.

O lē faatuatua ma papatisoina, e faaolaina ia; a o le lē faatuatua, e faasalaina ia.

O lona alofa foi i e matatau ia te ia e āu tupulaga lava lea.

auauna ia te ia ma le paia ma le amiotonu i ona luma i aso uma o lo tatou ola.

e faailoa atu le olataga i lona nuu i le faamagaloina o a latou agasala,

Ona alu atu ai lea o ia i le itu uma o Ioritana, ua tala‘i atu le papatisoga o le salamo ina ia faamagaloina agasala.

Ua fai atu ia i le motu o tagata e na o mai e papatisoina e ia, Fanau a gata feai e, o ai ea na na faaali atu ia te outou e sosola ese i le toasa atali? Ia outou fua mai ni fua e tatau ma le salamo, a e aua tou te faapea ifo i o outou loto, O Aperaamo, o ia o lo matou tamā; auā ou te fai atu ia te outou, e mafaia lava e le Atua ona faatupuina mai i nei maa ni fanau mā Aperaamo. O loo tuu nei foi le mătau i tafu‘e o laau; o laau uma foi e le fua mai i fua lelei, e taia ma lafoina i le afi.

Ua o mai foi telona ia papatisoina, ua faapea mai ia te ia, Le a‘oa‘o e, se a se mea matou te faia?

Ua papatisoina le nuu uma, ona papatisoina ai lea o Iesu, ua tatalo ia, ona faaavanoaina ai lea o le lagi,

Ua i o‘u luga le Agaga o le Alii, auā ua na faauu mai ia te au e folafola le tala lelei i e matitiva; ua auina mai a‘u e ia e faamalolo i e loto momomo, e tala‘i le saolotoga i le tafeaga, ma ia pupula mata o e tauaso, e tuu saoloto i e ua faasauaina,

Ua iloa e Simona Peteru, ona faapaū lea o ia i tulivae o Iesu, ua faapea mai, Le Alii e, ina maliu ese atu ia oe ia te au, auā o a‘u le tagata agasala.

O lenei, ia mutimuti vale lo outou alofa, pei ona alofa mutimuti vale o lo outou Tamā. Aua tou te faamasino atu, ona le faamasinoina mai ai lea o outou; aua tou te faasala, ona le faasalaina mai ai lea o outou; ia outou faamagaloina atu, e faamagaloina mai ai outou.

A o le au faresaio ma le au a‘oa‘a tulafono, ua latou faaleaoga ia te i latou le pule a le Atua, ina ua le papatisoina i latou e ia.

E te lei faauu mai i lo‘u ulu i le suāuu fua; peitai o ia, ua faauu e ia i o‘u vae i le suāuu manogi. O lea foi ou te fai atu ai ia te oe, Ua faamagaloina ana agasala e tele, auā ua alofa tele mai o ia; a o le ua faamagaloina i ai se mea itiiti, ua itiiti foi lona alofa. Ua fetalai atu ia i le fafine, Ua faamagaloina au agasala.

Ua fetalai atu ia i tagata uma, A fia mulimuli mai se tasi ia te au, aua le usiusitai o ia ia te ia, a ia ave e ia lona satauro i aso fai soo, i le mulimuli mai ai ia te au. Auā ai sē fia faasaogalemuina lona ola, e māumau ai ia te ia; a o lē faamāumau i lona ola ona o a‘u, e faasaoina e ia. Auā se a le aoga i le tagata pe afai na te maua le lalolagi uma, a e faamāumau e ia ia ia, pe lafoaiina?

Auā ai se mā ia te au ma a‘u upu, e mā foi ia te ia le Atalii o le tagata, pe a sau o ia i lona mamalu, ma lo le tamā, ma le au agelu paia.

Ua fetalai atu Iesu ia te ia, O lē tago lona lima i le suotosina, ma tepa i tua, e le tatau ia i le malo o le Atua.

Ua fetalai atu ia ia te i latou, Pe a outou tatalo, ia outou fai atu, Lo matou Tamā e o i le lagi, ia paia lou suafa. Ia oo mai lou malo. Ia faia lou finagalo i le lalolagi, e pei ona faia i le lagi. Ia e foai mai ia te i matou i lea aso ma lea aso a matou mea e ‘ai e tatau ma le aso. Ia e faamagalo ia te i matou i a matou agasala; auā foi matou te faamagaloina atu ia i latou uma o e agaleaga mai ia te i matou. Aua foi e te taitaiina i matou i le tofotofoga; a ia e laveai mai ia i matou ai le leaga.

Ou te fai atu foi ia te outou, O sē ta‘ua a‘u i luma o tagata, e ta‘ua foi o ia e le Atalii o le tagata i luma o agelu a le Atua. A o lē faafiti mai ia te au i luma o tagata, e faafitia o ia i luma o agelu a le Atua.

Ona tali atu lea o Iesu, ua faapea atu ia te i latou, Fa te outou ea, ua sili ona agasala ia Kalilaia i tagata Kalilaia uma, ina ua tigaina i latou i mea faapena? Ou te fai atu ia te outou, e leai; a e afai tou te le salamo, e faapena lava ona fano outou uma. I le ma le toasefulu ma le toavalu sa paū i o latou luga le ‘olo i Seloa, ua latou oti ai; fa te outou ea, ua sili a latou agasala i tagata uma e na nonofo i Ierusalema? Ou te fai atu ia te outou, e leai; a e afai tou te le salamo, e faapena lava ona fano outou uma.

Ou te fai atu ia te outou, e faapea foi ona tele o le olioli i le lagi i le tagata agasala e toatasi e salamo, a e itiiti i e amiotonu e toaivagafulu ma le toaiva e le tusa i ai le salamo.

Ou te fai atu ia te outou, ua faapea le olioli i luma o agelu a le Atua, ona o le tagata agasala e toatasi ua salamo.

Ua fetalai atu o ia, O le tasi tagata e toalua ona atalii. Ua fai atu le uii i lona tamā, Sena e, ia e au mai ia te au lo‘u tofi o le oa; ona vaelua lea e ia o ana mea ia te i laua. Ua mavae nai aso, ona faapotopoto ai lea e le uii mea uma, ua alu malaga i le nuu mamao, ua faataapeape ai ana mea i lea nuu, ua soona ulavale. Ua uma atu ana mea, ona oge tele ai lea o lea nuu; ona faatoa mativa ai lea o ia. Ua alu ia ua nofo i le tasi tagata o lea nuu, ua ia auina foi o ia i ona fanua e fafaga ai puaa. Ua tupu lona manao i atigi mea e ‘aina e puaa ia maona ai o ia; e leai lava se tasi ua avane sina mea ia te ia. Ona atamai ai lea o ia, ua faapea ane, E lē toatele ea o auauna a lo‘u tamā ua faulai a latou areto ua totoe; a o au, ou te matelaina. O le a a‘u tulai ma alu i lo‘u tamā, ou te fai atu ia te ia, Lo‘u tamā e, ua ou agasala i Lē o i le lagi, atoa ma ou luma; ua ou le toe aoga ona ta‘ua o lou atalii; ia e avea a‘u ia pei o se tasi o au auauna. Ona tulai lea o ia, ua alu i lona tamā. Ua iloa mamao atu foi o ia e lona tamā, ona mutimuti vale lea o lona alofa, ua momo‘e atu ia, ua fusi ia te ia, ma sogi atu ia te ia. A ua fai mai le atalii ia te ia, Lo‘u tamā e, ua ou agasala i Lē o i le lagi, atoa ma ou luma, ua ou le toe aoga ona ta‘ua o lou atalii. A ua fai atu le tamā i ana auauna, Au mai ia le ofu tatapuvae e aupito lelei, ma faaofu ia te ia; ma ia tuu se mama i lona lima, ma faasee i ona vae; au mai ia foi le tamai povi peti, ma fasi; tatou te aai ma olioli; auā o lo‘u atalii lenei, na oti, ua toe ola mai; na le iloa foi o ia, a ua maua. Ona latou olioli ai lea. Sa i le vao lona atalii ulumatua; ua sau ia, ua latalata mai i le fale, ona faalogo ai lea o ia i laaupese ua ta, ma le siva. Ua valaau atu ia i le tasi auauna, ua fesili atu, po o le a le uiga o nei mea. Ua fai mai o ia ia te ia, Ua sau lou uso; ua fasi ai foi e lou tamā le tamai povi peti, ina ua toe oo mai o ia o ola. Ona ita ai lea o ia, e le mafaia ona ulufale i ai; ona alu atu ai lea o lona tamā i fafo, ua faaoleole ia te ia. Ona tali mai ai lea o ia, ua faapea mai i lona tamā. Faauta, o tausaga ua tele, ua ou auauna ai ia te oe, ua leai lava sau poloaiga ua ou solia; e te lei au mai lava se tamai ‘oti ma a‘u, matou te olioli ai ma a‘u uo. Peitai o lou atalii lena, sa na faaumatia au mea faatasi ma fafine talitane, ua sau o ia, ona e fasi lea le tamai povi peti māna. Ua fai atu ia ia te ia. Tā e, ta te nonofo pea ma oe, o a‘u mea uma foi, o āu ia. Ua tatau foi ona tatou fiafia ma olioli, auā o lou uso lena na oti, a ua toe ola mai; na le iloa foi, a ua maua.

A ua faapea atu ia, Lo‘u tamā e, Aperaamo, aua; a e afai e alu atu se tasi ia te i latou nai e ua oti, e salamo ai i latou. Ua fai ane o ia ia te ia, Pe afai latou te le faalogo ia Mose ma le au perofeta, e ui lava ina tu mai se tasi nai e ua oti, latou te le mafafai lava.

Ia outou ia te outou. Pe afai a e agaleaga mai lou uso ia te oe, ia e aoai atu ia te ia; pe afai e salamo ia, ia e faamagalo atu ia te ia. Pe afai e foi faafitu i le aso ona agaleaga mai o ia ia te oe, ma foi faafitu i le aso ona liliu mai ia te oe, ua faapea mai, Ua ou salamo; ia e faamagalo atu ia te ia.

O le telona foi, ua tu mamao atu, e le mafaia ona tepa ae ona mata i le lagi, a ua pōpō lona fatafata, ua faapea atu, Le Atua e, ia e alofa mai ia te au le tagata agasala.

Auā ua sau le Atalii o le tagata e saili ma faaola i le na le iloa.

Ona tago ai lea o ia i le areto, ua faafetai, ua tofitofi, ma avatu ia te i latou, ua faapea atu, O lo‘u tino lenei, ua foaiina atu mo outou; tou te faia le mea nei e fai ma faamanatuga ia te au. Sa faapea foi ona tago i le ipu, ina ua uma ona tālisua, ua faapea atu, O lenei ipu o le feagaiga fou lea i lo‘u toto, ua faamaligiina mo outou.

Ua oo atu ia i lea mea, ona fetalai atu lea o ia ia te i latou, Ia outou tatalo ne‘i oo mai le faaosoosoga ia te outou.

ua faapea atu, Lo‘u Tamā e, a e finagalo i ai, ia e ave ese lenei ipu ia te au; a e aua le faia lo‘u loto, a o lou finagalo.

O le tasi foi o e na pagotata ua faatautauina ua upu leaga o ia ia te ia, ua faapea mai, Afai o oe o le Keriso, ina faaola ia oe ia te oe atoa ma i maua nei. A ua tali atu le tasi, ua vavao ia te ia, ua faapea atu, E te le mata‘u ea i le Atua, ina ua tatou sala faatasi? Ua tonu lava la ta sala; auā ua tauia mai i taua e tusa ma mea na ta faia; a o ia nei, e leai se mea e le tusa na faia e ia. Ona fai mai lea o ia ia Iesu, Le Alii e, ia e manatua mai a‘u, pe a e afio mai i lou malo. Ona fetalai atu ai lea o Iesu ia te ia, E moni, ou te fai atu ia te oe, o le asō ta te faatasi ai ma oe i parataiso.

Ua fetalai atu foi o ia ia te i latou, Ua faapea ona tusia, e faapea foi ona tatau ina tiga o le Keriso, ma toe tu nai e ua oti i le aso tolu; ina ia tala‘iina foi le salamo ma le faamagaloina o agasala i nuu uma i lona igoa, e amata mai i Ierusalema.

A o i latou uma e na talia o ia, ma faatuatua i lona suafa, na ia avatu i ai o lea manuia, ia avea i latou ma fanau a le Atua. O i latou, e le o le toto na fanau ai, e le o le manao foi o le tino e le o le loto foi o le tagata, a o le Atua lava.

O le taeao ua vaai atu ai Ioane ia Iesu o maliu mai ia te ia ona fai ane lea, Faauta i le Tamai mamoe a le Atua, na te aveesea le agasala a le lalolagi.

Ua tali atu Iesu, ua faapea atu ia te ia, E moni, e moni, ou te fai atu ia te oe, a le toe fanau le tagata, e le mafai ona iloa e ia o le malo o le Atua.

Ua tali atu Iesu, E moni, e moni, ou te fai atu ia te oe, afai e le fanau se tasi i le vai ma le Agaga, e le mafai ona sao o ia i le malo o le Atua. O le ua fanau mai i la le tino, o le tino lea; o le ua fanau mai foi i la le Agaga, o le agaga lea. Aua e te ofo auā na ou fai atu ia te oe, E ao ina toe fanau mai outou.

E pei ona siitia i luga e Mose o le gata i le vao, e ao ina faapea ona siitia i luga o le Atalii o le tagata; ina ia le fano le tasi e faatuatua ia te ia, a ia maua le ola e faavavau. Auā ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau. Auā e lei auina mai e le Atua lona Atalii i le lalolagi ina ia faasala i le lalolagi, a ia faaolaina le lalolagi ia te ia. O lē faatuatua ia te ia, e le faasalalaina o ia; a o le lē faatuatua, ua nofosala nei lava o ia, auā e lei faatuatua lava ia i le igoa o le Atalii e toatasi o le Atua. O le faasala foi lenei, ina ua oo mai le malamalama i le lalolagi, a o tagata, e sili lo latou manao i le pouliuli i lo latou manao i le malamalama; auā e leaga a latou amio. Auā o i latou uma o e fai mea leaga e ‘ino‘ino i latou i le malamalama, e le o mai foi i le malamalama, ne‘i faailoa a latou amio. A o lē ua faamaoni ana mea e fai, e sau lava o ia i le malamalama, ia faaalia ana amio ina ua tatau i le Atua.

Mulimuli ane, ua maliu atu Iesu ma ona soo i le nuu o Iutaia; ua nofo ai ma i latou, ma papatiso ai.

O lē faatuatua i le Alo, ua ia te ia le ola e faavavau; a o le le faatuatua i le Alo e le iloa e ia le ola, a o le toasa o le Atua o loo tumau lava i ona luga.

O le Atua o le agaga lava ia; o e tapuai ia te ia, e tatau ona tapuai atu ai i le agaga ma le faamaoni.

Ua mavae ia mea, ua silafia o ia e Iesu i le malumalu, ona fetalai atu lea o ia ia te ia. Faauta, ua e malolo oe; aua e te toe agasala, ne‘i oo atu ia te oe se leaga e sili i lena.

E moni, e moni, ou te fai atu ia te outou, o lē faalogo mai i la‘u upu, ma talitonu ia te ia na na auina mai a‘u, ua ia te ia le ola e faavavau: e le oo foi ina faasalaina o ia, a ua oo atu ia i le ola, sa i le oti,

Aua tou te ofo i lenei mea, auā e oo mai le aso e faalogo ai i lona leo o i latou uma ua i tuugamau, ma latou o mai ai; o e na amio lelei, e toe tutū i le ola; a o e na amio leaga, e toe tutū i le faasala.

O i latou uma ua foaiina mai ia te au e le Tamā, e o mai i latou ia te au; o ia foi e sau ia te au, ou te le tulia lava i fafo.

O lenei foi le finagalo o le ua auina mai a‘u, ia maua le ola e faavavau e i latou uma o e vaai i le Atalii, ma faatuatua ia te ia, ou te toe faatuina foi i latou i le aso gataaga.

E le mafai se tasi ona sau ia te au, pe a le tosina mai e le Tamā ua auina mai a‘u; ou te toe faatuina foi o ia i le aso gataaga. Ua tusia i le au perofeta, E a‘oa‘oina i latou uma lava e le Atua. O lenei, o i latou uma o e faalogo i le Tamā, o e a‘oa‘oina foi, e o mai i latou ia te au;

E moni, e moni, ou te fai atu ia te outou, o lē faatuatua mai ia te au, ua ia te ia le ola e faavavau.

O a‘u le areto ola na alu ifo mai le lagi; pe a ‘ai se tasi i lenei areto ona ola ai lea o ia e faavavau. O le areto foi ou te avatua, o lo‘u tino lea, ou te avatua ma ola o le lalolagi.

Ona fetalai atu lea o Iesu ia te i latou, E moni, e moni, ou te fai atu ia te outou, afai tou te le aai i le tino o le Atalii o le tagata, a le inu foi i lona toto, ua le i totonu ia te outou le ola. O lē ‘ai i lo‘u tino ma inu i lo‘u toto, ua ia te ia le ola e faavavau; ou te toe faatuina foi o ia i le aso gataaga; auā o lo‘u tino o le mea e ‘ai moni lea, o lo‘u toto foi o le mea e inu moni lea. O lē ‘ai i lo‘u tino ma inu i lo‘u toto, e tumau o ia ia te au, o a‘u foi ia te ia. E faapei ona soifua o le Tamā ua na auina mai a‘u, o loo ola foi a‘u i le Tamā; e faapea foi o lē ‘ai ia te au, e ola lea ia te au. O lenei le areto ua alu ifo mai le lagi, e le pei o outou tamā na aai le manai, a ua oti i latou; o lē ‘ai i lenei areto e ola ia e faavavau lava.

Ona toe fetalai atu lea o Iesu ia te i latou, ua faapea atu, O a‘u nei o le malamalama o le lalolagi; o lē mulimuli mai ia te au, e le savali o ia i le pouliuli, a e ia te ia le malamalama o le ola.

O lea ua ou fai atu ai ia te outou. E oti outou i a outou agasala; auā a outou le talitonu, o a‘u lenei o ia, ona oti lea o outou i a outou agasala.

Ona fetalai atu lea o Iesu ia Iutaia, e ua talitonu ia te ia. Afai tou te tumau pea i la‘u mataupu, o o‘u soo moni outou. E iloa foi e outou le mea moai, e tuu sa‘oloto foi outou e le upu moni.

Ua tatou iloa e le faafofoga le Atua i e agasala; a e peitai a mata‘u se tasi i le Atua, ma fai lona finagalo, ona faafofoga mai lea o ia ia te ia.

Ua ia te au foi isi mamoe e le o i lenei lotoā; e tatau ona ou ta‘ita‘iina mai o i latou foi, e faalogo foi i latou i lo‘u leo; ona tasi ai lea o le lafu mamoe, ma le leoleo mamoe e toatasi.

A ua outou le talitonu mai lava outou; auā e le ni a‘u mamoe outou, pei ona a‘u fai atu ia te outou. O a‘u mamoe e faalogo mai i latou i lo‘u leo, ua ou iloa foi i latou, ua latou mulimuli mai foi ia te au; ou te avatu foi le ola e faavavau ia te i latou; latou te le fano lava e oo i le faavavau, e le mafai lava e se tasi ona fao ia te i latou ai lo‘u lima.

Ua fetalai atu Iesu ia te ia, O a‘u nei o le toe tu ma le ola; o lē faatuatua mai ia te au, e ui lava ina oti, a e ola lava ia. O tagata ola uma o e faatuatua mai ia te au, e le oti lava e oo i le faavavau; po ua e talitonu mai ea i lena mea? Ona faapea mai lea o ia ia te ia, Ioe, le Alii e, ua ou talitonu lava, o oe le Keriso le Alo o le Atua, o lē maliu mai i le lalolagi.

O lē faapelepele i lona ola, e faamāumau e ia i ai; a o lē ‘ino‘ino i lona ola i lenei lalolagi, e leoleo ai e ia e oo i le ola faavavau.

A e peitai e toatele alii ua talitonu ia te ia; a e le‘i ta‘u atu ai, ona o le au faresaio, ne‘i tulia i latou i le sunako. Auā ua sili lo latou manao i le viiga mai tagata, i le viiga mai le Atua.

Ua ou sau o le malamalama i le lalolagi, ina ia le tumau pea i le pouliuli se tasi e faatuatua mai ia te au.

O lē faaleaoga ia te au, ma ua le talia a‘u upu, o ia te ia le tasi na te faasalaina ia; o le upu ua ou tautala atu ai, e faasala lea ia te ia i le aso gataaga.

Ua fetalai atu Iesu ia te ia. O a‘u nei le ala, ma le upu moni, ma le ola; e le alu atu lava se tasi i le Tamā, pe a le ui mai ia te au.

Afai tou te alofa mai ia te au, ia outou tausi mai i a‘u poloaiga.

O la‘u poloaiga lenei, ia outou fealofani, pei ona ou alofa atu ia te outou. E le sili lava le alofa o se tasi i lenei alofa, ia tuuina atu e se tasi lona ola e sui a‘i ana uo.

A maliu mai foi o ia, na te faailoa atu i le lalolagi le agasala, ma le amiotonu, ma le faamasinoga. O le agasala, auā ua le faatuatua ia te au; o le amiotonu, auā ou te alu atu i lo‘u Tamā, tou te le toe vaai mai foi ia te au; o le faamasinoga, auā ua faamasinoina le alii o le lalolagi nei.

Ia e faapaiaina i latou i lau upu moni; o lau afioga o le upu moni lea.

Ua fetalai atu Iesu ia te ia, Toma e, ua e talitonu, auā ua e vaai mai ia te au. Amuia o e le vaai mai, a e talitonu mai pea. O isi foi faailoga e tele na faia e Iesu i luma o ona soo, e lei tusia i lenei tusi. A ua tusia ia mea, ina ia talitonu ai outou, o Iesu o le Keriso lava ia, o le Alo o le Atua; ina ia maua ai foi le ola i lona suafa e outou o e talitonu.

E iu foi ina faaolaina o i latou uma lava o e valaau atu i le suafa o le Alii.

Ona fai atu lea o Peteru ia te i latou, Ina salamo ia, ma ia taitasi ma papatisoina outou uma i le suafa o Iesu Keriso, mo le faamagaloina o agasala; ona maua lea e outou o le mea foai fua mai, o le Agaga Paia lea.

Ona papatisoina lea o e na talia lana upu ma le fiafia; o lea aso foi ua faaopoopoina ai pe tolu afe o tagata. Ua tumau pea i latou i le mataupu a le au aposetolo, ma le mafuta faatasi, ma le tofitofiga o le areto, ma talotaloga.

O lenei, ina salamo ia outou ma outou liliu, ina ia sōloiesea a outou agasala, ina ia oo mai ai o tausaga e filemu ai mai luma o le Alii;

E leai foi se tasi ua i ai le ola; e leai lava se isi igoa i lalo o le lagi ua foaiina mai i tagata e mafaia ona faaolaina ai o i tatou.

O ia ua aveina ae e le Atua i lona aao taumatau o le Alii i le ma le Faaola, na te avatua ia Isaraelu le salamo ma le faamagaloina o agasala.

Ua talitonu i latou ia Filipo o folafola le tala lelei i mea a le malo o le Atua, ma le suafa o Iesu Keriso, ona papatisoina lea o i latou, o tane atoa ma fafine. O Simona foi, ua talitonu ia; ua papatisoina foi o ia, ona faatasi atu lea o ia ia Filipo, ua matuā ofo, ina o matamata i faailoga ma vavega tele ua faia.

O lenei, ia e salamo i lou nei leaga, ma e faatoga atu i le Atua, pe mafaia ona faamagaloina le manatu o lou loto.

Ua o ane foi i laua i le ala, ua oo i le tasi vai; ona fai mai lea o le eunuka, Faauta, o le vai; se a ea se mea e vaoia ai a‘u e aua le papatisoina o a‘u? Ua fai atu e Filipo, Afai ua e talitonu ma le loto atoa, e mafai ai lava. Ua tali mai o ia, ua faapea mai, Ou te talitonu o Iesu Keriso o le Alo o le Atua ia.

Ona pauu loa lea o mea nai ona mata peiseai ni una; ona toe vaai loa lea o ia, ua tu foi i luga, ma ua papatisoina.

Ona oo atu lea o le lauga a Peteru, ua faapea atu, E moni, ua ou iloa e le faailogaina tagata e le Atua; a e peitai o le mata‘u ia te ia i nuu uma lava, ma fai le amiotonu ua talia i latou e ia.

Ua na poloai mai foi ia te i matou e tala‘i atu i le nuu, ma molitino atu, o ia lava le ua tofia e le Atua e fai ma faamasino i e o ola ma e ua oti. Ua molitinoina mai o ia e le au perofeta uma, ona o lona suafa e maua ai le faamagalo o agasala a ē faatuatua ia te ia uma lava.

Ua fai atu foi o ia ia papatisoina i latou i le suafa o le Alii. Ona aioi lea o i latou ia te ia ia latou nonofo ma ia i nisi aso.

Ua latou faalogo mai i ia upu, ona latou faalologo lea, ua vivii atu foi i le Atua, ua faapea ane, E moni, ua foai atu e le Atua i nuu ese le salamo e ola ai.

O le aiga o lenei tagata ua faatuina ai e le Atua ia Isaraelu le Faaola o Iesu, pei ona folafolaina e ia; ina ua muai tala‘i e Ioane, a o lei maliu mai o ia, i le papatisoga o le salamo i le nuu o Isaraelu uma lava.

O lenei, sema e, le au uso e, ia outou iloa ua folafolaina ia te outou le faamagaloina o agasala ona o lenei tagata; o tagata uma foi o e faatuatua e ta‘uamiotonuina i latou ia te ia i mea uma lava na le mafai ona ta‘uamiotonuina ai outou i le tulafono a Mose.

ua faamalosi i loto o le au soo, ma apoapoai atu ia tumau i le faatuatua; ua faapea atu foi, O puapuaga e tele e tatau ona tatou sao atu ai i le malo o le Atua.

Ua na aumaia foi i laua i fafo, ua faapea mai, Alii e, se a le mea e tatau ona ou faia ou te ola ai? Ua fai atu i laua, Ina faatuatua ia i le Alii o Iesu Keriso, e ola ai oe atoa ma lou aiga. Ona la tautala atu loa i le afioga a le Alii ia te ia, ma i latou uma ua i lona fale. Ua na au mai foi ia te i laua i lea lava itu po, ma mulumulu atu o la ta; ona papatisoina loa lea o ia ma lona aiga uma.

Na faapalepale le Atua i ona po o le vālea; a o loo fetalai mai nei i tagata uma i nuu uma lava ia salamo; auā ua faatuina e ia le aso e faamasinoina ai le lalolagi ma le tonu, e le tagata ua tofia e ia; o loo faamaoni mai ai e ia i tagata uma lava i lona toe faatu mai ia te ia i e ua oti.

O Kiripo foi le pule i le sunako, ua faatuatua i le Alii o ia ma lona aiga uma; e toatele foi tagata Korinito o e na faalogo ua faatuatua i latou, ma ua papatisoina.

Ona fai atu lea o Paulo, Na papatiso lava Ioane i le papatisoga o le salamo, ua fai atu i le nuu, ia faatuatua i latou i lē mulimuli mai, o le Keriso o Iesu lea. Ua faalogo ai i latou, ona papatisoina lea i le suafa o le Alii o Iesu.

Ua o mai foi i latou e toatele o e ua faatuatua, ma faaali mai ma ta‘u mai a latou amio.

ua ou molitino ia Iutaia atoa ma Eleni le salamo i le Atua, ma le faatuatua i lo tatou Alii o Iesu Keriso.

O lenei, ina tausi ia outou ia te outou, atoa ma le lafu mamoe uma lava ua tofia ai outou e le Agaga Paia e fai ma leoleo, ia leoleo atu i le ekalesia a le Atua, ua faatauina e ia mona i lona lava toto.

O lenei foi, se a le mea e te faatuai ai? Tulai ia, ma ia papatisoina oe, ma ia fufulueseina au agasala i lou valaau i le suafa o le Ali.

e faapupula i o latou mata, ia liliu mai mai le pouliuli i le malamalama, mai le pule foi a Satani ia liliu i le Atua; latou te maua ai le faamagaloina o agasala, ma le tofi faatasi ma i latou ua faapaiaina i le faatuatua ia te au.

O lenei, ia iloa e outou ua molia le olataga mai le Atua i nuu ese, latou te faalogo ai lava.

Auā ou te le mā i le tala lelei ia Keriso; auā o le mana lava lea o le Atua e ola ai i latou uma o e faatuatua, e muamua le Iutaia, atoa ma le Eleni.

Ua latou le loto foi e taofi i le mataupu i le Atua, o lea ua tuuina atu ai i latou e le Atua i le loto leaga, latou te fai ai mea e le tusa; o loo tutumu i latou i amio leaga uma lava, o le faitaaga, o le amio ulavale, o le manumanu, o le loto leaga; o loo tumu saisai i le mataua, o le fasioti tagata, o le misa, o le ‘ole‘olega, ma le faatāutala; o tuaupua i latou, o e fai tala leaga, o e ‘ino‘ino i le Atua, o e faasiasia, o e faasaua, o e faafiasilisili, o e fia fai togafiti i mea leaga, o e le anaana i mātua, o e valelea, o e tuumavaega, o e le lotoaiga, o e le faamolemoleina, ma ē faalealolofa; o i latou ia ua iloa le tonu mai le Atua, e tatau ai ona oti o e fai mea faapena, e le gata ona latou faia o ia mea, a e fiafia lava i latou i e ua faia.

Ua tatou iloa foi, e tatau lava ma le upu moni le faasala a le Atua i e fai mea faapena. Le tagata e, o lē faasalaina atu i e fai mea faapena, a ua e faia ia lava mea, o lou lea manatu ea e te sao lava oe i le faasala a le Atua? po ua faatauvaa ea ia te oe le faulai o lona agamalu, ma lona faapalepale, ma lona onosai, o loo e le iloa e ta‘ita‘iina oe e le agamalu o le Atua i le salamo? a e peitai o lou loto maaa ma le le salamo, e te faaputu ai ea mo oe le toasa i le aso o le toasa ma le faaaliga o le faasala tonu a le Atua, o le na te tuuina atu le taui taitasi i tagata e tusa ma a latou galuega? E tuuina atu foi le ola e faavavau i e tumau pea i galuega lelei, ua latou saili ai le viiga, ma le mamalu, ma le le iu vale; a o le toatamai ma le toasa i e finau vale, ma e le gauai i le upu moni, a e gauai i le amio leaga; o le puapuaga ma le atuatuvale i tagata uma lava o e fai amio leaga, e muamua le Iutaia, atoa ma le Eleni; a o le viiga, ma le mamalu, a le manuia ia te i latou uma o e fai amio lelei; e muamua le Iutaia, atoa ma le Eleni. Auā e le faailogaina e le Atua ni tagata;

a e faasalaina i latou i le aso e faamasinoina ai e le Atua e Iesu Keriso mea lilo a tagata, e tusa ma la‘u tala lelei.

faapei ona tusia, E leai sē amiotonu, e leai lava se tasi, e leai se na te lagona, e leai sē saili i le Atua.

E leai lava so latou mata‘u i le Atua. O lenei, ua tatou iloa, o mea uma ua fai mai e le tulafono, ua fai mai lava i e ua i ai le tulafono, ina ia punitia ai gutu uma lava, ma ia nofo sala le lalolagi uma i luma o le Atua.

Auā e le ta‘uamiotonuina se tagata e toatasi i ona luma i galuega o le tulafono; auā o le tulafono e iloa lelei ai le agasala.

Auā ua agasala tagata uma lava, ma ua le oo i le viiga mai le Atua; ua ta‘uamiotonuina fua i lona alofa tunoa i le togiola e a Keriso Iesu, o le ua tuuina mai i luma e le Atua, o le e finagalo mălie ai i le faatuatua i lona toto; ina ia faaalitinoina mai lana amiotonu i le le tauia o agasala ua mavae, i le faapalepale o le Atua;

O lenei, ua tatou taofi, e ta‘uamiotonuina le tagata i le faatuatua, e le o i ai galuega o le tulafono.

Amuia e ua faamagaloina o latou solitulafono, ma ua ufitia a latou agasala.

na tuuina mai o ia ona o a tatou agasala, ma toe faatuina mai ina ia ta‘uamiotonuina ai i tatou.

O lenei, ua ta‘uamiotonuina i tatou i le faatuatua, o lea ua tatou lelei ai ma le Atua, ona o lo tatou Alii o Iesu Keriso; o ia foi ua tatou maua mai ai le ta‘ita‘iga i lenei alofa tunoa, tatou te i ai i le faatuatua; o loo mitamita foi i tatou ma le faamoemoe i le manuia mai le Atua. E le gata foi i lea, a ua tatou mitamita foi i puapuaga, ina ua tatou iloa o le puapuaga e tupu ai le onosai, o le onosai e tupu ai le mautinoa, o le mautinoa e tupu ai le faamoemoe; o le faamoemoe foi e le mā ai, auā ua faamaligi mai le alofa o le Atua i o tatou loto e le Agaga Paia ua foaiina mai ia te i tatou.

a ua faaalitinoina mai e le Atua lona lava alofa ia te i tatou, ina ua maliu Keriso ma sui o i tatou, a o tatou agasala pea. O lenei, ua ta‘uamiotonuina nei i tatou i lona toto, e le faaolaina ea i tatou e ia ai le toasa i se a? Auā afai ua lelei i tatou ma le Atua i le maliu o lona Alo, ina o fai i tatou mona fili, e matuā faaolaina lava i tatou i lona soifua, o i tatou ua lelei ma ia. A e le gata i lea, a ua tatou mitamita foi i le Atua, ona o lo tatou Alii o Iesu Keriso, o ia ua tatou maua mai ai nei le leleiga.

Na faaopoopoina foi le tulafono ina ia faatele ai le agasala; peitai ua silisili lava le alofa tunoa, ina o faateleina le agasala. O lenei, e pei ona malo o le agasala e oo i le oti, faapea foi ona malo o le alofa tunoa e le amiotonu e oo i le ola e faavavau, i lo tatou Alii o Iesu Keriso.

O lenei, se a ea sa tatou upu? Tatou te nonofo pea ea i le agasala, ina ia faatele ai le alofa tunoa? Aua ne‘i faapea. O i tatou ua oti i la le agasala, pe faapefea ona tatou ola pea i ai? Tou te lei iloa ea, o i tatou nei uma na papatisoina ia Keriso Iesu, na papatisoina i tatou i lona maliu?

O lenei, ua tatanu faatasi i tatou ma ia i le papatisoga i lona maliu; ina ia tatou savavali i le ola toefuataiina, pei ona toe faatuina mai o Keriso nai e ua oti, i le mana o le Tamā. Auā afai ua faatasia i tatou i le faatusa i lona maliu, e faapea foi i tatou i lona toe tu mai. Ua tatou iloa lenei mea, na faasatauroina faatasi ma ia lo tatou tagata tuai, ina ia faaumatia ai le tino o le agasala, ina ia le toe faapologaina i tatou i le agasala. Auā o le ua oti ua tuusaunoa ia nai le agasala.

Auā o le ua oti ua tuusaunoa ia nai le agasala. Afai foi ua oti faatasi i tatou ma Keriso, ua tatou taofi, tatou te ola foi faatasi ma ia. Ua tatou iloa ua toe tu mai Keriso nai e ua oti, e le toe maliu lava o ia, e le toe pule le oti ia te ia. Auā o lona maliu, ua tasi lona maliu i la le agasala; a o lona soifua, e soifua lava ia i la le Atua. Ia faapea foi la outou taofi, ua outou oti i la le agasala, a ua outou ola lava i la le Atua i lo tatou Alii o Keriso Iesu.

Ia faapea foi la outou taofi, ua outou oti i la le agasala, a ua outou ola lava i la le Atua i lo tatou Alii o Keriso Iesu. O lenei, aua ne‘i malo le agasala i o outou tino auga vale, i lo outou gauai i ai i ona tu‘inanau; aua foi ne‘i tuuina atu o outou tino i le agasala e fai ma auupega a le amio leaga; a ia outou tuuina atu outou i le Atua, e pei o e ua ola nai e ua oti, ma ia tuuina atu outou tino i le Atua e fai ma auupega a le amiotonu. Auā e le pule le agasala ia te outou; auā ua outou le nonofo i le tulafono, a o le alofa tunoa.

A ia faafetai i le Atua, e ui lava ina fai outou ma auauna a le agasala, a ua outou gauai nei ma le loto i le faaa‘oa‘o o le mataupu na tuuina atu ia te outou. Ua tuusaunoa foi outou nai le agasala, a ua fai ma auauna a le amiotonu. O upu a tagata ou te fai atu ai nei, ona o le vaivai o outou tino; auā faapei ona outou tuuina atu o outou tino e fai ma auauna a le amio leaga ma le ulavale, e ulavale ai; ia faapea foi ona tuuina atu nei o outou tino e fai ma auauna a le amiotonu, e iu i le faapaiaina.

A o lenei, ua tuusaunoa outou nai le agasala, ma ua fai ma auauna a le Atua, ua ia te outou ni a outou fua e oo ai i le faapaiaina o lona uiga foi o le ola e faavavau. Auā o le oti, o le totogi lea o le agasala; a o le ola e faavavau, o le mea foaifuaina mai lea e le Atua, i lo tatou Alii o Keriso Iesu.

Auā ua galulue manao leaga talu le tulafono, i o tatou tino, ina o i la le tino i tatou, e fua mai ai ni fua e oti ai; a o lenei, tatalaina i tatou nai le tulafono sa taofia ai i tatou, ina ua tatou oti, o lea ua tatou auauna ai i la le agaga fou, a e le i la le tusi tuai.

A ua maua e le agasala se togafiti i le poloaiga, ona faatupu ai lea i totonu ia te au o tu‘inanau uma lava. Auā ua oti le agasala, a o leai se tulafono.

Auā ua tatou iloa o loo i la le Agaga le tulafono, a o a‘u ou te i la le tino, ua faatauina atu a‘u e fai ma tagata o le agasala. Auā ou te le iloa mea ou te faia; auā o le mea ou te faia ou te le loto i ai, a o le mea ou te ‘ino‘ino i ai o lea ou te faia. Afai foi ou te faia le mea ou te loto i ai, ma te ‘au upu faatasi ma le tulafono, e lelei ia. O lenei, e le o a‘u e toe faia lea mea, a o le agasala o loo nofo i totonu ia te au. Auā ua ou iloa e leai se mea lelei ua nofo i totonu ia te au, o lo‘u tino lea; auā ua ia te au le loto atu, a ou te lei iloa ona fai o le mea lelei; auā ou te le faia o le mea lelei ou te loto i ai, a o le mea leaga ou te le loto i ai, o le mea lea ou te faia. Afai foi ou te faia le mea ou te le loto i ai, ua le o a‘u e toe faia, a o le agasala o loo nofo i totonu ia te au.

O lenei, ua ou iloa peisai se tulafono ua ia te au; pe a ou loto atu i le lelei e fai, ua ia te au le leaga. Auā ou te fiafia i le tulafono a le Atua i le tagata i totonu. A ua ou iloa le tulafono ese i o‘u tino, o loo tau le taua i le tulafono a lo‘u mafaufau, ua fai foi a‘u ma tagata o taua i le tulafono a le agasala o loo i o‘u tino. Aue o a‘u le tagata malaia! o ai sē laveai ia te au ai le tino o lenei oti? Ou te faafetai lava i le Atua, auā o Iesu Keriso lo tatou Alii. O lenei foi, o a‘u nei lava ou te auauna i le tulafono a le Atua i lo‘u mafaufau, a o le tulafono a le agasala i lo‘u tino.

O lenei, ua leai se faasala i e o ia Keriso Iesu, o e le savavali i la le tino, a e i la le Agaga; auā o le tulafono a le Agaga o le ola ua ia Keriso Iesu ua tuusaunoa mai lea ia te au nai le tulafono a le agasala ma le oti. Auā o le mea na le mafaia i le tulafono, ina ua vaivai ia ona o le tino, ua faia lea e le Atua i lona auina mai o lona lava Alo, ua tino tagata agasala, o le taulaga foi mo agasala, na ia faasalaina ai le agasala i le tino; ina ia atoatoa ai le amiotonu i la le tulafono ia i tatou, o e le savavali i la le tino, a e i la le Agaga. Auā o e i la le tino e loto atu i latou i mea a le tino; a o e i la le Agaga e loto atu i mea a le Agaga. Auā o le loto i la le tino o le oti lea; a o le loto i la le Agaga o le ola lea ma le manuia; auā o le loto i la le tino o le ita lea i le Atua; auā e le usiusi tai i le tulafono a le Atua, e le mafai foi i ai. O i latou foi o i la le tino, e le mafai ona fiafia i ai le Atua.

A o outou, tou te le i la le tino, a e i la le Agaga, pe afai e nofo le Agaga o le Atua i totonu ia te outou. Ai se tasi ua le ia te ia le Agaga o Keriso, e le fai lea mona. A e afai ua i totonu ia te outou Keriso, ua oti ai le tino ona o le agasala, a ua ola le agaga ona o le amiotonu. A e afai e nofo i totonu ia te outou le Agaga o le na toe faatu mai ia Iesu nai e ua oti, e faaola mai foi o outou tino auga vale e le na toe faatu mai ia Keriso nai e ua oti, e lona Agaga o loo nofo i totonu ia te outou.

O lenei, le au uso e, ua ia te i tatou e taui atu, a e le o le tino, tatou te amio ai i la le tino; auā afai tou te amio i la le tino, e oti ai outou; a e afai e fasiotia e outou amioga a le tino e le Agaga, tou te ola ai. Auā o i latou uma ua ta‘ita‘iina e le Agaga o le Atua, o atalii i latou o le Atua. Auā ua outou le maua le agaga o le pologa, e toe fefefe ai; a ua outou maua le Agaga o tamafai, tou te valaau atu ai, Ava, le Tamā e. O loo molimau mai lea lava Agaga i o tatou agaga, o fanau i tatou a le Atua. Afai foi o fanau i tatou, o suli foi, o suli lava o le Atua, o suli faatasi ma Keriso; pe afai tatou te tiga faatasi ma ia, ina ia faamanuiaina foi i tatou faatasi ma ia.

Auā o lo‘u manatu e le tatau ona faatusaina le tiga i nei ona po ma le manuia atali e faaalia mai ia te i tatou. Auā o loo faatalitali mea uma na faia ma le naunau i le faaalia mai o atalii o le Atua.

O ia lava sa na le faasaoina lona lava Alo, a ua tuuina mai o ia e sui a‘i i tatou uma lava, e le foai fua mai ea e ia ia te i tatou mea uma lava faatasi ma ia i se a? O ai se na te molia le au filifilia a le Atua? O le Atua o lē ta‘uamiotonuina mai, o ai se na te faasalaina mai? O Keriso o ia na maliu, a ua toe tu mai lava o ia; o loo i le itu taumatau foi o le Atua, o loo fautua foi o ia mo i tatou. O ai se na te faateaeseina mai i tatou i le alofa o Keriso? o le puapuaga ea, po o le atuatuvale, po o le saua, po o le oge, po o le lavalavā, po o le pagatia, po o le pelu? Faapei ona tusia, Ona o oe ua fasiotia ai i matou i aso uma, ua faatatauina i matou e pei o mamoe ā fasia. A ua tatou manumalo aiai i nei mea uma lava, ona o ia ua alofa mai ia te i tatou.

Auā na ia fetalai atu ia Mose, Ou te alofa atu i le ou te fia alofa atu i ai, ou te alofa mutimuti vale foi i le ou te fia alofa mutimuti vale i ai. O lenei, e le mai le ua manao, e le mai le ua tausinio, a e mai le Atua o lē alofa mai.

Auā ua le iloa e i latou le amiotonu mai le Atua, ma ua saili e faatu la latou lava amiotonu, ua latou le usiusitai ai i le amiotonu ma le Atua. Auā o le iuga o le tulafono o Keriso lea, e oo mai ai le amiotonu i e faatuatua uma lava.

afai e te ta‘utino i lou gutu i le Alii o Iesu, ma talitonu i lou loto ua toe faatuina mai o ia e le Atua nai e ua oti, e faaolaina ai oe; auā o le loto e talitonu ai, e oo mai ai le amiotonu; a o le gutu e ta‘utino ai, e oo mai ai le ola. Auā ua faapea mai le Tusi, E le mā se tasi e faatuatua ia te ia. Auā e le eseese le Iutaia ma le Eleni; auā o le Alii e toatasi o tagata uma e faulai lona alofa ia te i latou uma lava o e valaau atu ia te ia; auā e faaolaina i latou uma o e valaau i le suafa o le Alii.

O lenei, e tupu le faatuatua i le taulogologo atu, o le taulogologo atu foi o i le afioga a le Atua lea.

A ua faapefea ea le tali mai a le Atua ia te ia? Ua ou faatoe mo‘u e toafitugaafe o tagata, o e ua le tootuli lava ia Paala. O lenei, e faapea foi i nei ona po, ua i ai e ua totoe e tusa ma le filifiliga o le alofa tunoa.

Auā afai ua le faasaoina e le Atua o la na tupu mai ai, ia oe, ne‘i le faasaoina oe. Faauta foi i le agamalu ma le toasa o le Atua; o e na pauu e oo ai le toasa; a e oo ia te oe le agamalu, pe afai e te tumau pea i lona agamalu; a le faapea e gauieseina oe.

o la‘u foi lenei feagaiga ma i latou, pe a aveeseina e a‘u a latou agasala.

O lenei, le au uso e, ou te aioi atu ia te outou, ona o le alofa mutimuti vale o le Atua, ia outou tuuina atu o outou tino i le Atua, o le taulaga ola, ma le paia, ma le mālie, o le mea lea e tatau ai ona outou faia. Aua foi tou te amio faatasi ma lenei lalolagi, a e peitai ia liliuina i le toe fuataiina o outou loto, ina ia outou suesue pe se a le finagalo o le Atua, o mea ua lelei, ma le mālie, ma le atoatoa.

Aua le faatoilaloina oe i le leaga a ia e faatoilaloina le leaga i le lelei.

Ia faapea foi, ina ua tatou iloa ona po, ua oo i le itu po e ala ai e na momoe; auā ua latalata nei ia te i tatou le ola, sa mamao ina o tatou uluai faatuatua.

A ia outou oofu i le Alii o Iesu Keriso; aua foi le sauniuni mo le tino, e oo ai ona tu‘inanau.

O oe na, se a le mea e te faasala ai i lou uso? o oe na foi, pe se a le mea e te ta‘ufaatauvaaina ai lou uso? auā tatou te laulaututū uma lava i luma o le nofoa faamasino o Keriso. Auā ua tusia, Ua fetalai mai le Alii, Ou te ola a‘u, e tootuli mai ia te au o tulivae uma lava, e ta‘uta‘u mai foi o laulaufaiva uma lava i le Atua. O lenei, e taitasi i tatou ma tala i lana amio i le Atua.

O le Atua foi e tupu mai ai le faamoemoe, ia faatutumuina outou e ia i le olioli uma atoa ma le filemu, ina ua faatuatua; ina ia tele lava lo outou faamoemoe ona o le mana o le Agaga Paia.

o ia foi na te faatumauina outou seia oo atu i le iuga, ina ia leai se mea e faasalaina ai outou i le aso o lo tatou Alii o Iesu Keriso.

Auā o le mataupu i le satauro, o le valea lea i e o malaia; a o le mana o le Atua ia te i tatou ua faaolaina.

ina ne‘i mitamita se tagata e toatasi i ona luma. A ua fua mai ia te ia ona i ai outou ia Keriso Iesu, o le ua avea ai mo tatou poto mai le Atua, o le amiotonu foi, ma le paia, ma le faaolataga;

Tou te le o iloa ea o le malumalu outou o le Atua, o loo nofo foi le Agaga o le Atua i totonu ia te outou? Afai e faaleaga e se tasi le malumalu o le Atua, e faaleagaina lena tagata e le Atua; auā e paia le malumalu o le Atua, o outou lava ia.

A o lenei, ua ou tusi atu ia te outou, ai se tasi ua ta‘uusoina a e faitaaga, pe matapeapea, pe ifo i tupua, pe agatele, pe onā, pe fao mea; aua lava ne‘i tou feoai, aua foi tou te aai faatasi ma le o faapea. Auā o ia te au ea ona faamasino i e ua i tua? Tou te le faamasino ea i e ua i loto pa? A o e i tua, e faamasinoina i latou e le Atua. O lenei, ia faateaeseina e outou lena tagata amio leaga ia te outou.

Tou te le iloa ea, o e amio leaga e le fai mo latou tofi le malo o le Atua? Aua ne‘i faaseseina outou; o e faitaaga, ma e ifo i tupua, ma e mulilulua, ma e tauātane, ma e faasotoma, ma e gaoi, ma e matapeapea, ma e onā, ma e agatele, ma e fao mea, e le fai mo latou tofi le malo o le Atua. Sa faapea foi nisi o outou; a ua taeele outou, a ua faapaiaina outou, a ua ta‘uamiotonuina outou i le suafa o le Alii o Iesu, i le Agaga foi o lo tatou Atua.

Ina sosola ese ia outou i le faitaaga. Ua auliuligia le tino i agasala uma e faia e tagata; a o lē faitaaga, e agasala ia i lona lava tino. Tou te le iloa ea, o lo outou tino o le malumalu lea o le Agaga Paia ua i totonu ia te outou, o loo ua ia te outou mai le Atua, e le aiā foi outou ia te outou? Auā ua faatauina outou i le tau; o lenei, ia outou vivii atu i le Atua i o outou tino ma ou outou agaga, o mea a le Atua ia.

E le aoga lava le peritome, e le aoga foi le le peritome; ua na o le tausi i poloaiga a le Atua.

Ua faatauina outou i le tau, aua ne‘i avea outou ma pologa o tagata.

Aua foi tatou te faitaaga, pei ona faitaaga o isi o i latou, ma fano ai i le aso e tasi e lua sefulu o afe ma afe e tolu. Aua foi tatou te faaonoono ia Keriso, pei ona faaonoono o isi o i latou, ma fano ai i gata. Aua foi tou te muimui, pei ona muimui o isi o i latou, ma fano ai i le na te olopalaina. Na oo na mea uma ia te i latou e fai ma faailoga; ua tusia foi e fai ma apoapoaiga mo i tatou o e ua aulia mai ai tausaga e gata ai. O lenei, o lē manatu o loo o tu ia, ina faaeteete ia ne‘i paū.

Ua le maua outou e se tofotofoga e ese i lo tagata; a ua faamaoni le Atua, o le na te le tuuina atu outou i le tofotofoga e sili i se mea ua outou lavatia, a e sauni foi faatasi ma le tofotofoga se mea e sao ai, ina ia outou lavā oono.

Auā foi o le Agaga e toatasi na papatisoina ai i tatou uma i le tino e tasi, po o Iutaia, po o Eleni, po o pologa, po o sa‘oloto; ma ua faainumia i tatou uma i le Agaga e toatasi.

Auā na ou tuuina atu ia te outou mea muamua o mea foi ia na ou maua foi e a‘u; na maliu Keriso ma sui o a tatou agasala, pei ona tusia; na tanu foi o ia, ma toe tu mai i le aso tolu, pei o upu ua i Tusi.

Aua ne‘i faaseseina outou, O le feoai ma e amio leaga e leaga ai amio lelei. Ina ala mai ia i le amiotonu, a e aua ne‘i agasala; auā ua pouliuli nisi i la le Atua; ou te faapea atu ia te outou e faamā ia te outou.

O le tui o le oti, o le agasala lea, o le malosi foi o le agasala o le tulafono lea;

Afai foi ua ufitia la matou tala lelei, ua ufitia ia i e ua fano; ua faatauasoina manatu o i latou o e le talitonu e le atua o le lalolagi nei, ina ne‘i pupula atu ia te i latou le malamalama o le tala lelei i le mamalu o Keriso, ua tusa o ia ma le Atua.

o loo tauave i le tino e le aunoa le fasiotia o le Alii o Iesu, ina ia faaalia foi le soifua o Iesu i o matou tino. Auā o i matou nei o loo ola ua tuuina atu pea lava i le oti ona o Iesu, ina ia faaalia foi le soifua o Iesu i o matou tino augavale.

Auā o lo matou puapuaga mamasagia ma le vave mavae, e tupu mai ai mo i matou le manuia mamafa e matuā silisili ese lava ma le faavavau; o loo matou le manatunatu i mea ua vaaia, a o mea e le vaaia; auā o mea ua vaaia e gata mai ia, a o mea e le vaaia e faavavau ia.

Auā tatou te tutū atu uma lava i luma o le nofoa faamasino o Keriso e tatau ai; ina ia taitasi ma talitali i mea na faia i le tino, e pei o mea na faia, pe lelei pe leaga.

na maliu foi o ia ona o tagata uma, ina ia le usiusitai pea o e ola ia te i latou, a o ia o le na maliu ma toe tu mai o le sui o i latou.

O lenei, afai o ia Keriso se tasi, o le tagata fou ia; ua mavae mea tuai, faauta, ua faafouina mea uma.

O lenei, o sāvali i matou a Keriso, peiseai ua aioi mai le Atua ia te outou e i matou; matou te ole atu, o sui i matou o Keriso, ia outou lelei ma le Atua. Auā o ia na le iloa le agasala, na faia lea e ia ma agasala, o le sui o i tatou; ina ia avea i tatou ma amiotonu a le Atua ia te ia.

(Auā ua faapea mai o ia, O le tausaga e talia ai na ou faalogo ai ia te oe, o le aso foi e faaolaina ai na ou fesoasoani ai ia te oe. Faauta, o lenei le tausaga e talileleia mai ai; faauta, o lenei le aso e faaolaina ai.)

Aua tou te amo faalegatasi ma e le talitonu; auā pe faapefea ona faatasi o le amiotonu ma le amio leaga? Pe faapefea foi ona mafuta o le malamalama ma le pouliuli?

O lea i o mai ai outou nai totonu ia te i latou, ma ia outou vavae mai, ua fetalai mai ai le Alii, aua foi tou te papai atu i se mea leaga; ona ou talia ai lea o outou, e fai foi a‘u mo outou Tamā, e fai foi outou mo‘u atalii ma o‘u afafine, ua fetalai mai ai le Alii e ona le malosi uma lava.

O lenei, le au pele e, ona ua ia te i tatou o ia upu ua folafolaina mai, ia tatou faamamā ia te i tatou i mea uma e leaga ai le tino atoa ma le agaga, ia faaatoatoina lo outou faapaiaina i le mata‘u i le Atua.

O lenei, ou te olioli, e le ona ua outou tiga, a ona ua iu lo outou tiga i le salamo; auā na faatigaina outou e tusa i le Atua, ina ne‘i leaga outou ia i matou i se mea e tasi. Auā o le tiga e tusa i le Atua e tupu ai le salamo e oo i le ola e le toe salamo ai; a o le tiga faalelalolagi e tupu ai le oti. Faauta foi i lenei lava mea, na tiga outou e tusa i le Atua, ua tele lava le filigā na tupu ai ia te outou, i le ma le faatonu, i le ma le loto tiga, i le ma le mata‘u, i le ma le naunau tele mai, i le ma le maelega, i le ma le taui atu. Ua uma ona faailoa outou e outou ua outou mamā i lena mea.

o loo vivii atu i latou i le Atua, ona o le faailoga i lenei sauniga alofa; auā ua ta‘ua mai ai lo outou gauai i le tala lelei ia Keriso, ma le matamamau o le alofa fai tele ia te i latou atoa ma tagata uma;

Auā ou te fefe ne‘i iloa outou e a‘u, e le faapei ona ou loto i ai, pe a ou alu atu, ne‘i iloa foi a‘u e outou, e le pei ona outou loto i ai; ne‘i ia te outou o misa, o faamatataua, o faalotoa, o finau vale, o upuesega, o tuaupua, o loto faafefeteina, o faaletaupulea; ina ne‘i faamaualaloina a‘u e lo‘u Atua ona o outou, i lo‘u toe alu atu ia te outou; ona ou faanoanoa lea i nisi e toatele o e na agasala anamua, ma ua le salamo i le amio leaga, ma le faitaaga, ma le matāitu na latou faia.

Ina tofotofo ia outou ia te outou, po ua outou i le faatuatua; ina suesue ifo ia ia te outou; pe tou te le iloa ea o outou loto, ua i totonu ia te outou o Iesu Keriso, pe afai ua le pepelo outou?

ua tatou iloa e le ta‘uamiotonuina se tagata i galuega o le tulafono, a o le faatuatua ia Iesu Keriso; o i tatou foi ua tatou faatuatua ia Keriso Iesu, ina ia ta‘uamiotonuina i tatou i le faatuatua ia Keriso, a e le o galuega o le tulafono; auā e le ta‘uamiotonuina se tagata e tasi i galuega o le tulafono.

Ua faasatauroina faatasi i maua ma Keriso; a e ou te le toe ola a‘u, a o Keriso o loo ola i totonu ia te au; o le ola foi ou te ola ai nei i le tino, ou te ola ai lava i le faatuatua i le Alo o le Atua, o le na alofa mai ia te au, ma foaiina mai o ia e ia e fai mo‘u sui.

Na faatauina mai i tatou e Keriso ai le faafanoga o le tulafono, ina ua faafanoina o ia mo i tatou; auā ua tusia, E faafanoina i latou uma o e ua faatautauina i le laau;

O lenei, ua fai mo tatou ta‘ita‘itama le tulafono, na te ta‘ita‘iina i tatou ia Keriso, ina ia ta‘uamiotonuina i tatou i le faatuatua.

Auā o outou uma lava na papatisoina ia Keriso ua outou oofu ia Keriso;

A ua oo atu i le faaatoaga o tausaga, ona auina mai lea e le Atua o lona Alo, na fanau i le fafine, na fanau ua nofo i le tulafono; ina ia faatau mai e ia i e na nofo i le tulafono, ia avea i tatou ma tamafai.

Ou te fai atu, ia outou savavali i la le Agaga, ona le faia lea e outou o le tu‘inanau o le tino. Auā o le tino ua tu‘inanau lea e tetee atu i le Agaga, ua tu‘inanau foi le Agaga e tetee atu i le tino; ua feteenai foi ia mea, o le mea lea tou te le fai ai mea tou te loto i ai. A e afai e ta‘ita‘iina outou e le Agaga, ua le nonofo outou i le tulafono.

Ua iloa tino foi galuega a le tino, o mea faapenei; o le mulilua, o le faitaaga, o le amio leaga, o le matāitu, o le ifo i tupua, o le fai togafiti faataulāitu, o le feitagai, o le femisai, o le losilosi vale, o le lotoa, o le finau vale, o le fevaevaeaiga, o maseiga, o le mataua, o le fasioti tagata, o le onaga, o le poula, ma mea faapena; ou te muai ta‘u atu nei ia te outou, pei ona ou fai atu anamua, o e faia mea faapena, e le fai le malo o le Atua mo latou tofi.

A o le fua o le Agaga o le alofa, o le olioli, o le filemu, o le onosai, o le mataalofa, o le agalelei, o le faamaoni, o le agamalu, ma le le gaoiā; e le faatulafonoina mea faapena.

A o e o ia Keriso, ua faasatauroina e i latou le tino, ma ona manao, ma ona tu‘inanau. Afai ua tatou ola i le Agaga, ia tatou savavali foi i le Agaga.

Aua ne‘i faaseseina outou, e le ulagia le Atua auā o le mea e luluina e le tagata, o le mea lava lea e seleseleina mai ai e ia; o sē lulu i la lona tino, e selesele mai ai e ia i la le tino le mea e pala; a o sē lulu i la le Agaga, e selesele mai ai e ia i la le Agaga le ola faavavau.

Auā e le aoga le peritome, po o le le peritomeina i e ua ia Keriso Iesu, tau lava ina ia faafouina i latou.

Ia faafetaia le Atua, o le Tamā o lo tatou Alii o Iesu Keriso, o le ua faamanuia mai ia i tatou i mea uma lava e manuia ai i la le Agaga, i mea o i le lagi, ona o Keriso; faapei ona ia filifili mai ia i tatou ona o ia, a o lei faavaeina le lalolagi, ina ia paia i tatou ma ia le mata‘uleagaina i ona luma, i le alofa; ua na tofia i tatou anamua, ina ia avea ma tamafai māna, ona o Iesu Keriso, e tusa ma le pule tunoa a lona finagalo; ina ia viia ai lona lava alofa tunoa ua silisili, o lea ua agalelei fua mai ai o ia ia te i tatou, ona o le ua alofagia; o ia foi ua tatou maua ai le togiola i lona toto, o le faamagaloina o agasala, e tusa ma le oloa faulai o lona alofa tunoa, ua ia faafaupue tele mai ai ia i tatou, i le poto uma atoa ma le faautauta;

o ia lava ua matou maua ai le tofi, o i matou na tofia anamua, e tusa ma le finagalo o le ua matuā galue i mea uma lava, e tusa ma le pule a lona finagalo; ina ia avea i matou ma ala e viia ai lona mamalu, o i matou o e na muai faamoemoe ia Keriso; e i ai foi outou ia te ia, ina ua outou faalogologo i le upu o le mea moni, o le tala lelei lea o lo outou olataga, ua outou faatuatua ia te ia, ona faamaufaailogaina ai lea o outou e le Agaga Paia, o le na folafolaina mai; o le faamaoni o ia o lo tatou tofi, seia iu ina faaolaina e ua faatauina, ina ia viia ai lona mamalu.

O outoufoi lava o e na oti i amio leaga ma agasala, na outou savavali ai anamua, e tusa ma le tu a lenei lalolagi, e tusa ma le ta‘ita‘i o le au faipule i le va nimonimo, o le agaga lea o loo matuā galue nei i e ua faalogogata; o i tatou foi, na amio faatasi i tatou uma lava ma i latou anamua, ina ua tatou nonofo i tu‘inanau o tatou tino, na faia foi e i tatou o mea na loto i ai le tino atoa ma le mafaufau, na fanau mai foi i tatou o le fanauga a le toasa, faapei o isi atoa foi. A o le Atua, ua i ai le faulai o le alofa, ona o lona lava alofa tele na ia alofa mai ai ia i tatou, a o oti lava i tatou i amio leaga, ua na faaola mai ia i tatou faatasi ma Keriso; (o le alofa tunoa ua faaolaina ai outou;) ua na toe faatutū faatasi mai foi, ma faanonofo faatasi i tatou ma Keriso Iesu i mea o i le lagi; ina ia faaalia i tupulaga atali le silisili ese o le faulai o lona alofa tunoa, i le agalelei mai ia te i tatou, ia Keriso Iesu. Auā o le alofa tunoa ua faaolaina ai outou i le faatuatua; e le mai ia te outou foi lea, a o le mea ua foaiina mai e le Atua; e le ona o galuega, ina ne‘i mitamita se tasi. Auā o lana lava galuega i tatou, na faia i tatou ia Keriso Iesu, ina ia faia galuega lelei, na saunia anamua e le Atua, ina ia tatou savavali ai.

ina ia outou to ese le tagata tuai o loo ua leaga, e tusa ma le amioga faaanamua, e tusa ma tu‘inanau e faasese ai; a ia toe fuataiina manao o outou loto, ma ia oofu outou i le tagata fou ua faia e foliga i le Atua, ile amiotonu ma le amio lelei e faamaoni.

Aua foi tou te faatiga i le Agaga Paia o le Atua, ua faamaufaailogaina ai outou ia te ia seia oo i le aso e faaolaina ai.

A ia outou feagaleleiai, ia femutimutivaleai lo outou alofa, ia fefaamagaloai outou, faapei ona faamagaloina outou e le Atua ia Keriso.

a o le faitaaga, ma mea leaga uma, ma le manumanu, aua ne‘i ta‘ua lava ia te outou, e pei ona tatau i e ua paia. O le anovale foi, ma upu faatauvaa, ma le faaulaula, o mea ia e le tatau; a o le faafetai e lelei lava lea. Auā ua outou iloa lenei mea, ai sē faitaaga, po o sē fai mea leaga, po o sē manumanu, (o le ifo i tupua lava lea,) e le maua e i latou se tofi i le malo o Keriso, o le Atua lea. Aua ne‘i faaseseina outou e se tasi i upu faatauvaa; auā o mea ia e oo mai ai le toasa o le Atua i e faalogogata.

ina ia faapaiaina ai, ina ua faamamaina i le faataeleina i le vai atoa ma le upu; ina ia na tuuina atu o ia ia te ia, o le ekalesia matagofie lava, e leai sona ila, po o se maanuminumi po o se tasi mea faapena, a ia paia ma ia le ponā.

ua ou mautinoa lenei lava mea, o ia na amataina le galuega lelei i totonu ia te outou, e faaatoatoaina ai lava e ia e oo atu lava i le aso o Iesu Keriso;

e tusa ma lo‘u faanaunau atu, ma lo‘u faamoemoe, ina ia ou le mā i se mea e tasi, a ia ou matuā faamalosi faapei ona ou faia e le aunoa, e faapea foi i nei ona po, ina ia viia ai Keriso i lo‘u tino, i le ola po o le oti. Auā o lo‘u ola ua ia Keriso lea; a o lo‘u oti, o lo‘u manuia lea.

Auā ua foaifuaina ia te outou ona o Keriso, e le na ona ia faatuatua ia te ia, a ia faatigaina foi outou ona o ia;

O lenei, a‘u pele e, faapei ona outou anaana mai e le aunoa, e le gata ina o tatou nonofo ma outou, a o lenei ua atili ai ina ua ou le i ai ia te outou, ia outou galulue aiai ma le mata‘u atoa ma le gatete, ina ia faaolaina outou.

auā o le au peritomeina i tatou, o e auauna i le Atua ma le loto, ma mitamita ia Keriso Iesu, a e le faatuatua i la le tino.

Auā o loo savavali isi e toatele, na ou fai atu soo ai ia te outou, ou te toe fai atu nei foi ma le tagi, ua latou fai mo latou fili le satauro o Keriso; o le malaia, o lo latou iuga lea; o le manava, o lo latou atua lea; o le mea latou te vivii ai, o le mea e masiasi ai lea; e loto i latou i mea a le lalolagi. Aua o lo tatou nuu moni ua i le lagi lea, o loo faatalitali mai ai i tatou i le Faaola, o le Alii o Iesu Keriso; na te liua o tatou nei tino ua leaga, ina ia faia ia faatatau i lona tino matagofie, e tusa ma le mana na te mafaia ai ona faatoilaloina o mea uma ia te ia lava.

Ou te mafaia mea uma lava i le faamalosi mai o Keriso ia te au.

o ia ua na laveai mai ia te i tatou nai le pule a le pouliuli, a ua na aumaia i latou i le malo o lona lava Alo pele; o ia ua tatou maua ai le togiola i lona toto, o le faamagaloina lea o agasala;

O outou foi sa tagata ese anamua, sa fai o ia mo outou fili i o outou loto i le amio leaga; a o lenei, ua lelei outou ma ia i lona tino tagata, ina ua maliu, ina ia tuuina atu outou e ia, o le au paia, o e le mata‘uleagaina, ua leai foi se mea e faasalaina ai i ona lava luma;

ua faaperitomeina foi outou ia te ia i le peritomega e lei faia e lima, i le toeseina o le tino o agasala o i le tino i le peritomega mai ia Keriso; na tanumia outou faatasi ma ia i le papatisoga, o lea foi ua outou toe tutū mai ia faatasi ma ia i le faatuatua i le mana o le Atua, o le na faatu mai ia te ia i e ua oti. O outou foi sa oti i amio leaga ma le le peritomeina o outou tino, na ia faaola mai faatasi ma ia, ina ua faamagaloina mai a outou agasala uma lava;

Ia outou loto lava i mea i lugā, a e le o mea i le lalolagi; auā ua oti outou, ua lilo foi lo outou ola faatasi ma Keriso i le Atua. Pe a faaali mai Keriso lo tatou ola, ona iloa ai lea o outou faatasi ma ia i le manuia.

O lenei, ia outou fasiotia o outou itu tino o i le lalolagi, o le faitaaga, o le amio leaga, o le faamatāitu, o le tu‘inanau leaga, ma le matapeapea, (o le ifo i tupua lava lea); o mea ia e oo mai ai le toasa o le Atua i e le faalogo; o outou foi na outou savavali ai foi anamua, a o outou nonofo ai; a o ona po nei ia tuu ese ai e outou lava o nei mea uma, o le ita, o le lotoa, o le loto leaga, o le upu leaga, ma le upu matagā ai o outou gutu. Aua le fetaupelopeloai, ina ua toeseina e outou le tagata tuai atoa ma ana amio,

O lenei, ia oofu outou i le alofa mutimuti vale, ma le agalelei, ma le loto maulalo, ma le agamalu, ma le onosai, faapei o e ua filifilia e le Atua, o e ua paia ma ua alofaina; ia fefaapalepaleai, ma ia fefaamagaloai outou, pe afai ua agaleagaina se tasi e se tasi; faapei ona faamagalo mai Keriso ia te outou, ia faapea foi outou. A o le alofa, e lautua lea i nei mea uma, o le fusi lea e atoatoa ona lelei ai.

O lē amioletonu e maua e ia le taui o lana amioletonu; e le faailogaina foi se tasi.

ina ia faatumauina o outou loto e le mata‘uleagaina i le amio lelei i luma o le Atua lo latou Tamā, pe a afio mai lo tatou Alii o Iesu Keriso, faatasi ma ona au paia uma.

O le finagalo foi lenei o le Atua, ia faapaiaina outou, ina ia faamamao outou ma le faitaaga; ia taitasi outou ma iloa ona fai o lana lava ipu ma le faapaiaina ma le ta‘uleleia,

Auā e lei tofia i tatou e le Atua i le toasa, a ia maua le ola ona o lo tatou Alii o Iesu Keriso,

Ia tofotofo i mea uma lava, ia taofi mau i le mea lelei. Ia mamao outou ma mea leaga eseese uma lava. Ia atoatoa ona faapaiaina o outou e le Atua lava e ona le manuia; ia tausia lava lo outou agaga atoa uma, i le ma le loto, atoa ma le tino, ia le mata‘uleagaina, i le afio mai o lo tatou Alii o Iesu Keriso.

A o i matou e tatau ona matou faafetai i le Atua e le aunoa ona o outou, le au uso e, e ua alofagia e le Alii, auā na filifili le Atua ia te outou mai le amataga ia faaolaina i le faapaiaina e le Agaga,

o loo iloa lenei mea, ua le faatuina mai le tulafono mo le ua amiotonu, a o e faaletaupulea ma e soli i tulafono, o e faalematau ma e agasala, o e amio leaga ma e ulavavale, o e fasi tamā ma e fasi tinā, o e fasioti tagata, o e faitaaga, o e faasotoma, o e gaoi tagata, o e tala pepelo, o e tauto pepelo; afai foi o i ai se toe mea e faatu‘iese ai i le mataupu e ola ai,

O le upu moni lenei, e tatau lava ona matuā talia, na maliu mai Keriso Iesu i le lalolagi, na te faaolaina o e agasala; ua sili musa a‘u nei ia i latou. A o lenei lava le mea na alofaina ai a‘u, ina ia muamua ona faaalia mai ia te au e Iesu Keriso le onosai tele lava, ia avea a‘u ma faata‘ita‘i o e a faatuauta ia te ia amuli, e maua ai le ola e faavavau.

o lē finagalo ina ia faaolaina o tagata uma lava, ma ia oo ina iloa lelei le upu moni.

Auā e toatasi le Atua, e toatasi foi le puluvaga i le Atua ma tagata, o le tagata o Keriso Iesu lea; o le na foaifuaina e ia ia te ia e fai ma togiola mo tagata uma lava, e fai ma molimau i ona lava po e tatau ai;

A o loo ta‘utino mai e le Agaga, e o ese nisi i le faatuatua i tausaga amuli, latou te faalogo i agaga e faasese ma mataupu a temoni; ona o le pepelo o tagata tala pepelo, o e ua faamuina o latou lava loto fuatia ifo i le uamea aasa;

Ia e matuā fai atu ia mea, ina ia le mata‘uleagaina i latou.

ia e taofi lenei poloaiga ma le le ponā, ma ia le mata‘uleagaina, seia oo atu i le faaali mai o lo tatou Alii o Iesu Keriso.

O lenei, aua e te mā i le molimau i lo tatou Alii, po o ona o a‘u o loo noanoatia ona o ia; a ia tiga faatasi i tatou ona o le tala lelei, e tusa ma le mana o le Atua, o le na faaola mai ia i tatou, ma valaau mai i le valaau paia, e le tusa ma a tatou galuega, a e tusa ma lona lava finagalo ma lona alofa tunoa na foaiina mai ia i tatou ia Keriso Iesu talu mai le vavau, a ua faailoa mai nei i le faaalia mai o lo tatou Faaola o Iesu Keriso, o le ua faaumatia lava le oti, a o le ola ma le le iu vale ua faamalamalamaina mai lea e ia i le tala lenei,

O le mea lea ou te onosai ai i mea uma ona o le au filifilia, ina ia maua e i latou lava le ola o loo ia Keriso Iesu ma le manuia e faavavau. O le upu moni lenei; auā pe afai tatou te oti faatasi ma ia, tatou te ola faatasi ai foi; pe afai tatou te onosai, e fai foi i tatou ma tupu faatasi ma ia; pe afai tatou te faafiti ia te ia, e faafiti foi o ia ia te i tatou;

A e ui lava i lea o le faavae mau o le Atua e tu lava lea, o loo i ai lenei faailoga, Ua silafia e le Alii ona lava tagata; atoa ma lea, Ia o ese i le amio leaga i latou uma o e ta‘uta‘u le suafa o Keriso.

Auā e le tatau ona finau o le auauna a le Alii, a ia agamalu i tagata uma, ia mafaia ona a‘oa‘o atu, ma ia onosai, ia a‘oa‘o atu ma le agamalu i e o finau mai; pe mafai lava le Atua ona foai atu ia te i latou le salamo, ina ia latou iloa lelei le upu moni; ia latou ala mai foi na moe i le mailei a le tiapolo, o e ua maua e ia, ina ia faia lona lava finagalo.

auā e avea tagata ma e alolofa i latou ia i latou, o e mananao i tupe, o e loto vii, o e faamaualuga, o e upu leaga, o e le faalogo i mātua, o e le faafetai, o e amio leaga, o e le lotoaiga, o e tuumavaega, o e faatuaupua, o e le taofi manao o le tino, o e faasaua, o e le alolofa i tagata amio lelei, o e faalata, o e soona fai, o e ua faafefeteina, o e ua tele le manao i mea faafiafia a e leai se manao i le Atua; o e ua peiseai ua amio Atua, a o le mana ua i lea mea ua latou teena; ia e ‘alo ese lava i tagata faapena.

O i latou uma foi o e loto ina nonofo ma le amio Atua ia Keriso Iesu, e sauaina i latou.

O Tusi Paia uma lava e mai le Agaga o le Atua ia, e aoga foi ia e a‘oa‘o ai, e aoai ai, e faatonu ai, e faapoto ai foi i le amiotonu, ina ia atoatoa ona lelei ai o le tagata o le Atua, ia saunia lava ia i galuega lelei uma lava.

O lenei, ua teuina mo a‘u le pale o le amiotonu, e foaiina mai ia te au i lea lava aso o le Alii le faamasino amiotonu; e le gata foi ia te au, a o i latou uma lava o e fiafia i lona faaali mai.

E laveai mai foi le Alii ia te au ai mea leaga uma, ma faaola mai ia te au ia oo i lona malo i le lagi; ia ia te ia le viiga e faavavau faavavau lava. Amene.

i le faamoemoe i le ola e faavavau, na folafolaina mai talu mai tausaga o le vavau e le Atua e le mafai ona tala pepelo;

Auā o le alofa tunoa o le Atua ua au mai ai le olataga, ua faaalia mai lea i tagata uma lava, o loo a‘oa‘o mai ai ia te i tatou, ia tatou tete‘a ese ma le faalematau atoa ma tu‘inanau faalelalolagi, a ia tatou nonofo ma le faautauta ma le amiotonu atoa ma le amio Atua i lenei olaga; o faatalitali atu i le faatuatuaga e manuia ai, o le faaalia lea o le pupula o le Atua silisili, o lo tatou Faaola o Iesu Keriso lea; o le na foaiina mai o ia e ia mo i tatou, e togiola a‘i i tatou ai le solitulafono uma lava, ma ia faamamāina mai e ia e fai mona, o lona lava nuu, e maelega i galuega lelei.

ona faaola mai ai lea o ia ia i tatou, e le ona o galuega o i le amiotonu sa tatou faia, a e tusa ma lona lava alofa i le faataeleina i le toefuataiina ma le faafouina e le Agaga Paia,

ina ia ta‘uamiotonuina i tatou i lona lava alofa tunoa, ia fai i tatou ma suli e tusa ma le faamoemoe i le ola e faavavau.

O le mea lea e tatau ona atili ai ona tatou naunau i mea ua tatou faalogologo i ai, ne‘i te‘a ia i tatou. Auā afai na faamauina le upu na molia mai e agelu, taitasi foi soli tulafono ma faalogogata ma oo i ai le taui e tusa ai, pe sao faapefea i tatou pe a faatamala i le olataga e matuā tele? sa muai fetalaia mai e le Alii, ona faamaonia mai lea ia i tatou e i latou sa faalogo ia te ia;

Auā na tigaina o ia ina o tofotofoina, o le mea lea ua mafai ai e ia ona fesoasoani i e ua tofotofoina.

Le au uso e, ia outou, ne‘i ai i so outou le loto leaga ma le le talitonu, tou te o ese ai i le Atua soifua;

a ia outou fefaamafanafanai i lea aso ma lea aso, manū o ta‘ua o le aso nei, ina ne‘i loto fatu so outou i le pepelo o le agasala;

Manū o fai mai, O le aso nei afai tou te faalogo ai i lona siufofoga, aua tou te faamaaa i o outou loto, pei o le faaonoono.

e le lilo foi se tasi mea na faia i ona luma, a ua taatia fua ma ua aliali mai o mea uma lava i lana silafaga, tatou te ta‘u atu ia te ia a tatou amio. O lenei, ua ia i tatou le faitaulaga silisili, ua afio atu i le lagi, o Iesu le Alo o le Atua, ia tatou taofi mau ai i la tatou e ta‘utino atu. Auā e le ia te i tatou se faitaulaga sili e le mafaia ona tiga alofa faatasi ma i tatou i o tatou vaivai, a ua faaosoosoina o ia i mea uma pei o i tatou, a ua leai se agasala ia te ia. O le mea lea ia tatou faalatalata atu ai ma le faamalosi i le nofoālii o le alofa tunoa, ina ia alofaina ai o i tatou, ia maua ai foi le alofa tunoa e fesoasoani mai i ona aso e tatau ai.

Auā e le mafaia ia te i latou e na muai faamalamalamaina, na latou tofo foi i le mea foaifuaina mai i le lagi, ma ua faatofutofusia i le Agaga Paia, o e ua tofo foi i le upu lelei a le Atua ma le mana o le ola atali, ma ua pauu i latou, e le mafaia ona toe faafouina o i latou ina ia salamo, ina ua toe faasatauroina e i latou lava le Alo o le Atua, ma faainosia o ia i luma o tagata.

o le mea foi lea e mafai ai ia te ia ona faaola pea lava i e faalatalata atu i le Atua ona o ia, auā o loo soifua pea ia e fautua mo i latou.

a o le feagaiga lenei ou te faia ma le aiga o Isaraelu pe a mavae atu ia aso, o loo fetalai mai ai le Alii, ou te tuuina atu a‘u tulafono i o latou mafaufau, ma ou tusia i o latou loto; e fai foi a‘u mo latou Atua, e fai foi i latou mo‘u nuu.

auā ou te faamagalo i a latou amioleaga, ou te le toe manatua foi a latou agasala ma o latou solitulafono.

ona ulu faatasi lava lea o ia i totonu o le mea paia, e le ma le toto o ‘oti ma tamai povi, a o lona lava toto, ua na maua le togiola e faavavau mo i tatou.

O le mea foi lea o loo fai ai o ia ma puluvaga o le feagaiga fou, ona o lona maliu foi e togiola a‘i agasala na faia a o i le muai feagaiga, ia maua ai e i latou ua valaauina o le tofi e faavavau na folafolaina.

Na toe ina uma foi o mea uma ona faamamāina i le toto e tusa ma le tulafono; a le o i ai foi se faamaligiina o le toto, ua leai foi se faamagaloina.

Pei ona tofia foi mo tagata ia tasi lo latou oti, a e mulimuli ane o le faamasinoga; na faapea foi Keriso, ua tasi lava ona avatua o ia ma taulaga, ina ia aveina ai agasala a le toatele, e faaali foi o ia ia te i latou o e faatalitali atu ia te ia i lona foi faalua mai, e le ina ia aveina agasala, a ia latou ola ai.

O le finagalo lea ua faapaiaina ai i tatou i le taulaga i le tino o Iesu Keriso na fai faatasi.

peitai ane o ia, na avatua e ia le taulaga e tasi mo agasala, ona nofo lea o ia i le itu taumatau o le Atua e faavavau,

Auā o le taulaga e tasi ua faaatoatoaina ai e ia e faavavau o e ua faapaiaina. O loo molimau mai ai foi le Agaga Paia ia i tatou; auā ua uma ona muai fetalai mai o ia, O le feagaiga lava lenei ou te faia ma i latou pe a mavae atu ia aso, o loo fetalai mai ai le Alii, ou te tuuina atu a‘u tulafono i o latou loto, ma ou tusi ai i o latou mafaufau; o a latou agasala foi ma o latou solitulafono ou te le toe manatua lava. O lenei, o le mea o i ai le faamagaloina o ia mea, ua leai se toe taulaga mo le agasala.

O lenei, le au uso e, ua tatou sa‘oloto e ulu atu i le mea e sili ona paia ona o le toto o Iesu, i le ala fou e ola ai, ua faapaiaina e ia mo i tatou i le ie puipui, o lona lava tino lea, mona ua ia i tatou le faitaulaga sili e pule i le fale o le Atua, ina tatou faalatalata atu ia ma le loto faamaoni i le faatuatua ua mautinoa lava, o sausauina o tatou loto nai le manatu ifo ua leaga, o taelea foi o tatou tino i le vai manino;

Auā afai tatou te agasala ma le loto i ai pe a uma ona talia o le malamalama o le upu moni, ua le toe lava se taulaga mo agasala, na o le faatali ma le mata‘u tele i le faasala, ma le toasa e mumū e susunu ai e o tetee atu. O le na faaleaogaina le tulafono a Mose na oti o ia i le mau a le toalua po o le toatolu, ua le alofagia; pe ni a fa outou i le sili o le mamafa o le taui e ta‘utatauina ai le ua soli le Alo o le Atua, ma ua ta‘ulepaiaina e ia le toto o le feagaiga na faapaiaina ai o ia, ma ua upu leaga i le Agaga o le alofa tunoa? Auā ua tatou iloa le na fetalaia mai, O loo faapea mai le Alii, O ia te au le taui ma sui, ou te taui atu. I le ma lea, E faamasino e le Alii lona lava nuu. O le mea e mata‘u tele ai ona maua e aao o le Atua soifua.

A o le faatuatua, o le faalagolago lea i mea ua faamoemoe i ai, o le mautinoa lea o mea e le o vaaia.

A leai foi se faatuatua e le mafai ona fiafia mai o ia; auā e tatau i lē alu atu i le Atua ona talitonu o loo soifua o ia, o ia foi na te tauia mai o e matuā saili ia te ia.

O lenei, o i tatou foi, o loo ua vagavagaia e le faapotopotoga o e matamata mai e faapea ona toatele, ina tatou tuu ese ia o mea mamafa uma, atoa ma le agasala e faalavelavegofie ai i tatou, ia tatou taufetuli ma le onosai i le ala tanu o i o tatou luma,

Ua oo i nei ona po ua outou le tetee atu e oo i le faasasaaina o outou toto i lo outou tetee atu i le agasala;

Ia outou tausisi i le filemu ma tagata uma lava, i le ma le amio lelei, a aunoa ma lea, e leai se tasi na te iloa atu le Alii.

Auā ua outou iloa e mulimuli ane, ina ua manao o ia ia maua le faamanuia, ua teena o ia; auā e ui lava ina ua matuā faatoga ma loimata, a ua le maua e ia se mea e liliu ai le loto o lona tamā.

Ia lelei le faiavā i tagata uma, o le moega foi ia leai sona leaga; e faasalaina e le Atua o e faitaaga ma e mulilulua.

O lenei, o ia tatou te avatu soo ai le taulaga o le viiga i le Atua, o le fua lea o tatou laugutu, o loo faafetai atu i lona suafa.

A o le Atua e ona le manuia, o le na toe faatuina mai nai e ua oti le Leoleo mamoe sili, o lo tatou Alii o Iesu, ona o le toto o le feagaiga e faavavau,

A e afai ua leai se poto i so outou, ina ole atu ia i le Atua, o lē foai tele mai i tagata uma ma le le toe ta‘uta‘ua; ona foaiina mai ai lea ia te ia.

Amuia le tagata o lē onosai i le faaosoosoga; auā a uma ona tofotofoina e maua e ia le pale o le ola, ua folafolaina mai e le Alii i e alolofa atu ia te ia. A faaosoosoina se tasi, aua le faapea, Ua faaosoosoina a‘u mai le Atua; auā e le mafai ona faaosoosoina o le Atua i mea leaga, e le faaosooso atu foi o ia i se tasi;

a ua taitasi ma faaosoosoina, pe a tosina ma maileia i lona lava tu‘inanau; pe a to le tu‘inanau ona fanau mai ai lea o le agasala; a matua le agasala ona fanaua mai ai lea o le oti.

o lea foi ia lafoai ai mea eleelea uma ma le leaga e silisili, ia talia ma le faamaulalo le upu ua totōina, o lea e mafai ai ona faaolaina o outou agaga. A ia fai outou ma e anaana i le upu, a e aua le na ona faalogologo i ai, o faaseseina ai outou e outou.

auā o sē tausi le tulafono uma, a e agasala i se mea e tasi, ua nofo sala ia i mea uma.

O‘u uso e, se a le aoga pe a fai mai se tasi ua ia te ia le faatuatua, a e le ia te ia galuega? e mafai ea le faatuatua ona faaola ia te ia? Afai ua le ofu se uso po o se tuafafine, ua leai foi sana mea e ‘ai i lea aso ma lea aso, a fai atu so outou ia te i latou, Ina o ia outou ma le manuia, ia mafanafana, ma ia maoona, a ua le foai atu ia te i latou ni mea e tatau i le tino, se a lona aoga? E faapea foi le faatuatua, pe afai e le i ai galuega, e mate lava ia ina ua na o ia.

O lenei, ua outou iloa ua ta‘uamiotonuina le tagata i galuega, a e le na o le faatuatua.

E faapei o le tino ua oti ia pe a te‘a le agaga, e faapea foi le faatuatua ua mate pe a leai ni galuega.

O outou tane mulilulua e, ma fafine mulilulua e, tou te le iloa ea o le fefaauoai ma le lalolagi o le ita lea i le Atua? O lenei, o sē fia uo ma le lalolagi, ua avea o ia ma ita i le Atua. Fa te outou ea ua fai mai fua le Tusi. O le loto o loo nofo i totonu ia te outou ua naunau ia i le mataua? A ua foai mai e ia le alofa tunoa e sili; o lea ua faapea mai ai, E tetee atu le Atua i e faamaualuga, a e foai mai le alofa tunoa i e faamaulalo. O le mea lea ia outou gauai ai i le Atua; ia outou tetee atu i le tiapolo, ona sola ese ai lea o ia ia te outou. Ia outou faalatalata atu i le Atua, ona faalatalata mai lea o ia ia te outou. Tagata agasala e, ina fafano ia o outou lima, o outou e faalotolotolua e, ina faamamā ia o outou loto; ia puapuagatia outou, ma ia faavauvau, ma fetagisi; ia liua o outou ‘ata‘ata ma faavauvau, ma lo outou fiafia i le faanoanoa; ina faamaulalo ia i luma o le Alii, ona faamaualugaina lea o outou e ia.

O lenei, o le ua iloa e fai le mea lelei, a e le faia, o le agasala lea ia te ia.

O le tatalo foi e faia i le faatuatua e faaolaina ai le ma‘i, e faatuina foi o ia e le Alii; afai foi ua agasala, e faamagaloina ia. Ia fefaaaliai a outou agasala, ma tatalo le tasi mo le tasi, ina ia faamaloloina outou. Ua aoga tele le tatalo faatauanau a le tagata amiotonu.

Le au uso e, ai se tasi o ia te outou ua sese i le upu moni, a ua faafoi mai se tasi ia te ia, ia iloa e ia, o lē faafoi mai le tagata agasala nai lona ala sese, e faaolaina e ia le agaga nai le oti, e ufiufi foi e ia le vao agasala.

Ia faafetaia le Atua, le Tamā o lo tatou Alii o Iesu Keriso, o le na fanaufouina i tatou ona o lona alofa tele, ina ia iu i le faamoemoe ua ola, i le toe tu mai o Iesu Keriso nai e ua oti, ia iu i le tofi e le pala, e leai se leaga o i ai, e le mamae lava, o loo teu i le lagi mo i tatou, o e o leoleoina e le mana o le Atua, i le faatuatua, ia iu i le ola ua saunia, e faaalia mai i ona po e gata ai.

O lea ua outou olioli ai, e ui lava ona faanoanoa o outou i nai aso nei, (pe afai e tatau ai,) i tofotofoga eseese. O le tofotofo foi o lo outou faatuatua, e silisili ona aoga i le auro e faaumatia, e ui lava ina tofotofoina i le afi, e avea ma mea e iu i le viiga, ma le mamalu, ma le manuia pe a faaalia mai Iesu Keriso; e le o iloa atu outou ia te ia, a ua alolofa ia te ia; e le o vaai atu nei foi ia te ia, a o loo faatuatua ia te ia, tou te olioli ai ma le fiafia e le matalatalaina, e silisili ese lava; e maua foi le iuga o lo outou faatuatua, o le faaolaina lea o outou agaga.

Ia pei o fanau gauai, aua ne‘i faatusaina outou e outou i o outou tu‘inanau tuai, a o vālea outou; a e pei ona paia o ia na valaauina outou, ia faapea foi outou ona paia i a outou amio uma; auā ua tusia, Ia paia outou, auā o a‘u nei e paia lava a‘u.

Afai foi tou te valaau atu i le Tamā o le na te le faailogaina tagata, o le na te faamasino e tusa ma le galuega a tagata e taitoatasi, ia outou nonofo ma le mata‘u, a o outou a āumau iinei. Auā ua outou iloa e lei togiolaina outou i mea e pala, o le ario po o le auro, nai la outou amio le aoga na tuuina mai e o outou tamā; a o le toto tāua o Keriso pei o lo le tamai mamoe e le ponā lava, e leai foi sona leaga;

Ua outou faamamā i o outou loto i le gauai i le upu moni e le Agaga, ua iu i le alofa faamaoni i le au uso, o le mea lea ia matuā fealofani ai outou ai le loto naunau; ua fanaufouina outou e le o le fua e pala, a o le fua e le pala lava, o le afioga a le Atua lea ua oia ma ua tumau e oo i le faavavau. Auā o tagata uma lava e tusa ia ma le mutia, o le matagofie uma foi o tagata e pei o le fuga o le vao; e magumagu le mutia, e toulu foi ona fuga; a o le afioga a le Alii e tumau lea e faavavau lava. O le afioga foi lea ua folafolaina atu ia te outou na.

O le na aveina e ia lava a tatou agasala i lona lava tino i luga i le laau, ina ia tete‘a outou ma agasala, tatou te nofo ai i le amiotonu, O ona faalavalava ua malolo ai i tatou. Auā o outou sa faapei o mamoe na sē, a o lenei ua toe liliu mai outou i Le na te leoleoina ma tausia o outou agaga.

Auā o Keriso foi na tigaina o ia faatasi mo agasala, o le amiotonu o le sui o le amioletonu, ina ia ta‘ita‘iina e ia o i tatou i le Atua; na fasiotia o ia i le tino, a ua faaolaina mai i le Agaga;

O le faatusa foi lea mea o le papatisoga, o loo faaola mai ai nei ia i tatou, (e le o le faateaeseina o le eleele o le tino, a o le tali a le loto fuatia ifo lelei i le Atua,) i le toe tu mai o Iesu Keriso; o ia o loo i le itu taumatau o le Atua, ina ua afio ae o ia i le lagi, ua toilalo ia te ia o agelu, ma faipule, atoa ma ē malolosi.

O lenei, ua tigaina Keriso i le tino o le sui o i tatou, ia fai ai ma auupega ia te outou foi lea lava loto, auā o le ua tiga i le tino, ua tuu e ia le agasala; ina ia le toe usiusitai o ia i tu‘inanau o tagata, i ona tausaga ua totoe i le tino, a ia usiusitai i le finagalo o le Atua. Auā ia gata ia i aso ua mavae o le olaga nei ona fai ai e i tatou o le manao o e faapaupau, sa savavali i le faamatāitu ma tu‘inanau, ma le inu tele i uaina, ma poula, ma inugāava, ma le ifo i tupua e soli ai tulafono.

A ua lata mai le gataaga o mea uma lava; o lena, ia faautauta ai, ma ia mataala outou ma le tatalo. Ia muamua i mea uma ona maua e outou o le alofa naunau o le tasi i le tasi, auā o le alofa e ufiufi ai agasala e tele;

Le au pele e, aua tou te ofo i le tofotofoga pei o le afi, ua oo ia te outou e fai ma tofotofoga ia te outou, peiseai o se mea fou ua oo ia te outou; a e faapei ona tofusia o outou faatasi i tiga o Keriso, ia outou olioli ai, ina ia fiafia outou ma le olioli tele pe a faaalia mai lona mamalu.

Auā o ona po nei e amata ai le faamasinoga i le aiga o le Atua; afai foi e muamua ia i tatou, pe se a le gataaga o e faalogogata i le tala lelei a le Atua? Pe afai foi e toe ina le mafai ona faaolaina o lē amiotonu, po o ifea e tu mai ai o le faalematau ma le agasala?

O lenei, o i latou ua tigaina e tusa ma le finagalo o le Atua, ia latou tuuina atu ma le amio lelei o latou lava ola i le na faia mea uma, o ia e faamaoni.

ia outou tetee atu ia te ia, ma ia mausali outou i le faatuatua, ina ua outou iloa o loo taufaaatoaina ia lava mea tiga i lo outou au uso o i le lalolagi. A o le Atua e ona le alofa tunoa uma lava, o le na valaauina i tatou ia iu atu i lona manuia faavavau o ia Keriso Iesu, pe a tigaina outou i nai aso, ia faaatoatoaina outou e ia lava, ia faatumauina ia faamalosia, ma ia faavaeina outou;

O lenei, le au uso e, ia atili ai ona faamalolosi outou ia faamauina lo outou valaauina ma lo outou filifilia, auā pe a outou faia ia mea tou te le iu vale lava. Auā a faapea, ona matuā faaofia ai lea o outou i le ala o le malo e faavavau o lo tatou Alii o lo tatou Faaola lea o Iesu Keriso.

ua silafia e le Alii se mea e laveai mai ai i e amio Atua ai le faaosoosoga, a e taofi i e amio leaga e oo i le aso faamasino ina ia faasalaina i latou;

E le faatuai mai le Alii i le mea na folafolaina mai, faapei o le manatu a isi tagata i le faatuai; a e peitai ua onosai mai lava o ia ia i tatou, ona ua le finagalo ia fano se tasi, a ia oo uma lava i le salamo.

O lenei, le au pele e, ua outou faatalitali i ia mea, o lea ia outou finafinau ai lava ina ia maua outou e ia ma le manuia, ua le ponā, ma le le mata‘uleagaina.

Afa tatou te fai atu, ua tatou mafuta faatasi ma ia, a e savavali i tatou i le pouliuli, ua tatou pepelo ai, ua tatou le faia foi le upu moni. A e afai tatou te savavali i le malamalama, faapei ona i ai o ia i le malamalama, ona tatou mafuta faatasi ai lea o le tasi ma le tasi, o le toto foi o Iesu Keriso lona Alo e faamamāina ai i tatou i agasala uma lava. Afai tatou te faapea, E leai sa tatou agasala, ua sese ai i tatou ia i tatou, e le o i totonu ia te i tatou le upu moni; a e afai tatou te faaali a tatou agasala, e faamaoni o ia, ma le amiotonu e faamagalo ai a tatou agasala, ma faamamā mai ia i tatou i amioletonu uma lava. Pe afai tatou te faapea, Tatou te lei agasala, ua tatou fai ai o ia ma pepelo, e le o i totonu ia te i tatou lana afioga.

Si a‘u fanau e, ou te tusi atu nei mea ia te outou, ina ne‘i agasala outou; pe afai foi e agasala se tasi, o ia te i tatou le fautua i luma o le Tamā, o Iesu Keriso lea, o lē amiotonu. O le togiola foi o ia mo a tatou agasala, e le gata foi i a tatou, a e atoa foi ma agasala a le lalolagi uma lava. O le mea foi lea tatou te iloa ai ua tatou iloa o ia, pe afai tatou te tausi i ana poloaiga. O sē faapea, Ua ou iloa o ia, a e le tausi e ia i ana poloaiga, o le pepelo lava lea, e le o i totonu ia te ia le upu moni. A o lē tausi i lana afioga, e moni, ua atoatoa le alofa i le Atua i totonu ia te ia. O le mea lea ua tatou iloa ai o i totonu ia te ia i tatou. O lē faapea o loo tumau ia i totonu ia te ia, e tatau ona savali o lena tagata faapei ona savali o ia.

Le fanau e, ou te tusi atu ia te outou, auā ua faamagaloina a outou agasala ona o lona suafa.

Aua tou te mananao i le lalolagi, po o mea o i ai i le lalolagi. Pe afai e manao se tasi i le lalolagi, e le o ia te ia le alofa i le Tamā. Auā o mea uma lava o i le lalolagi, o le tu‘inanau o le tino, ma le tu‘inanau o mata, ma le faalialia o lenei olaga, e le mai le Tamā ia, a e mai le lalolagi. O le a mavae atu foi le lalolagi, atoa ma lona tu‘inanau, a o lē fai le finagalo o le Atua, e tumau lea e faavavau.

Ua ou le tusi atu ia te outou, auā ua outou le iloa le upu moni, a e peitai ina ua outou iloa lava, ua iloa foi e leai se tala pepelo mai le upu moni. O ai ea le tagata pepelo, pe afai e le o le ua faafiti, ua faapea, E le o le Keriso o Iesu? O le anetikeriso lava lea o le ua faafiti i le Tamā atoa ma le Alo. Ai se faafiti i le Alo, e le o ia te ia le Tamā; (o le ua ta‘uta‘ua le Alo, ua ia te ia foi le Tamā.)

O le mea foi lenei na folafola mai e ia ia te i tatou, o le ola e faavavau. Ua ou tusi atu ia mea ia te outou i e o faasese atu ia te outou.

O lenei foi, le fanau e, ia outou tumau ia te ia, ina ia maua ai e i tatou le faamalosi pe a faaali mai o ia, ia le faamāina foi i tatou i ona luma i lona afio mai. Afai ua outou iloa o lē amiotonu ia, ua outou iloa ai o i latou uma o e fai le amiotonu ua fanau mai i latou ia te ia.

O i latou uma foi o i ai lenei faamoemoe ia te i latou, ua taitasi ma faamamāina o ia e ia, faapei ona mamā o ia.

O i latou uma lava o e fai le agasala, ua latou soli foi i tulafono; o le agasala o le solitulafono lava lea. Ua outou iloa foi na faaalia o ia ina ia aveeseina e ia a tatou agasala; e le o ia te ia foi se agasala. E le agasala se tasi o e tumau ia te ia; o sē agasala ua le vaai o ia ia te ia, ua le iloa foi o ia e ia. Le fanau e, aua ne‘i faasese se tasi ia te outou; o lē fai le amiotonu, o le amiotonu lea, faapei ona amiotonu o ia. O lē fai le agasala, mai le tiapolo lava ia; auā ua agasala le tiapolo talu le amataga. O le mea lava lea na faaalia mai ai le Alo o le Atua, ina ia faaumatia e ia galuega a le tiapolo. O i latou uma o e ua fanau mai i le Atua, latou te le faia le agasala; auā o loo tumau i totonu ia te i latou lana fua; e le mafai foi ona agasala, auā ua fanau mai i latou i le Atua. O le mea lea ua iloa ai le fanau a le Atua ma le fanau a le tiapolo. O i latou uma o e le fai le amiotonu, e le mai le Atua i latou, atoa ma ē le alolofa i o latou uso.

O mea uma foi tatou te ole atu ai, e maua mai ia te ia, auā ua tatou tausi i ana poloaiga, tatou te faia foi mea e lelei i ona luma.

O lenei foi lana poloaiga, ia tatou faatuatua i le suafa o lona Alo o Iesu Keriso, ma ia tatou fealofani, faapei ona tuuina mai e ia o le poloaiga ia i tatou. O lē tausi foi i ana poloaiga, o loo tumau lea i totonu ia te ia, o ia foi o i totonu ia te ia; o le mea foi lenei ua tatou iloa ai o loo tumau o ia i totonu ia i tatou, auā o le Agaga ua ia foaiina mai ia te i tatou.

Le au pele e, ia tatou fealofani; auā mai le Atua le alofa; o i latou uma foi o e alolofa ua fanau mai i latou mai le Atua, ua iloa foi e i latou le Atua. O se le alofa ua le iloa e ia le Atua; auā o le Atua, o le alofa lava ia.

O sē ta‘utino atu, o Iesu o le Alo o le Atua o ia, o loo tumau le Atua i totonu ia te ia, o ia foi o i totonu o le Atua.

Pe afai e faapea mai se tasi, Ou te alofa i le Atua, a e ita i lona uso, o le pepelo lava ia; auā o le le alofa i lona uso ua ia vaai atu i ai, pe mafai faapefea ona alofa o ia i le Atua ua ia le vaai atu i ai. O lenei foi le poloaiga ua tatou maua mai ia te ia, o lē alofa i le Atua ia alofa foi o ia i lona uso.

O i latou uma o e talitonu, o Iesu o le Keriso lava lea, ua fanau mai i latou mai le Atua; o i latou uma foi o e alolofa i lē ana le fanau, e alolofa foi i latou i lana fanau. O le mea lava lenei ua tatou iloa ai e alolofa i tatou i le fanau a le Atua, pe a tatou alolofa i le Atua, ma tausi i ana poloaiga. Auā o lenei lava le alofa i le Atua, ia tatou tausi i ana poloaiga; e le mamafa foi ana poloaiga. Auā o i latou uma o e fanau mai i le Atua, e manumalo i latou i le lalolagi; o lenei foi le manumalo e manumalo ai i le lalolagi, o lo tatou faatuatua lava. O ai se na te manumalo i le lalolagi, pe afai e le o lē talitonu, o Iesu o le Alo lava ia o le Atua?

O lē faatuatua i le Alo o le Atua ua i totonu ia te ia le molimau; o le le talitonu i le Atua ua ia faia o ia ma pepelo; auā e lei talitonu ia i le mau na molimau mai ai e le Atua i lona lava Alo. O lenei foi le mau, ua foaiina mai e le Atua ia te i tatou le ola e faavavau; o le ola lava lea ua i lona Alo. O le o ia te ia le Alo, o ia te ia le ola; o le e le o ia te ia le Alo o le Atua, e le o ia te ia le ola.

Ua ou tusi atu nei mea ia te outou o e faatuatua i le suafa o le Alo o le Atua, ina ia outou iloa ai ua ia te outou le ola e faavavau, ina ia outou faatuatua foi i le suafa o le Alo o le Atua.

O lenei foi le faamalosi ua tatou maua i ona luma, pe afai tatou te ole atu ai se mea e tusa ma lona finagalo, e faafofoga mai o ia ia te i tatou.

Ua tatou iloa e le agasala se tasi o e ua fanau mai i le Atua; a o le ua fanau mai i le Atua, e tausi o ia e ia, e le tago foi loo leaga ia te ia.

O i latou uma lava o e tuumavaega, a e le tumau i le mataupu ia Keriso, e le o ia te i latou le Atua; o lē tumau i le mataupu ia Keriso, e ia te ia lava le Tamā atoa ma le Alo. Pe a alu atu ia te outou se tasi a e le molia lenei lava mataupu, aua tou te talia o ia i o outou fale, aua foi tou te ofo alofa ia te ia; auā o sē ofo alofa atu ia te ia, e faatasi ai o ia ma ana galuega leaga.

ia outou faatumau ia te outou i le alofa o le Atua, ma faatalitali atu i le alofa o lo tatou Alii o Iesu Keriso, e oo atu i le ola e faavavau. Ia outou alofa atu i nisi ma ia faatatau; a o isi ia outou faaola ia i latou ma le mata‘u, ia se‘i ia te i latou mai le afi, ma ia outou ‘ino‘ino i le ofu ua pisia i le tino. O lenei, ia ia te ia na te mafaia ona leoleo ia te outou ina ne‘i pauu, ma tuuina atu ia te outou ua le ponā i luma o lona lava mamalu ma le fiafia tele,

mai ia Iesu Keriso foi, o le molimau faamaoni, o le ulumatua o e ua oti, ma le pule i tupu o le lalolagi. O le na alofa mai ia te i tatou, na ia fufulu mai foi ia te i tatou i a tatou agasala i lona lava toto,

A ua ou iloa se mea ia te oe, ona ua e tuua o lou uluai alofa. O lenei, ia e manatua le mea na e paū mai ai, ma ia e salamo, ma e faia au uluai galuega; afai e leai, ona ou vave alu atu lea ia te oe, ou te aveesea lau tuugālamepa i le mea e tuu ai pe afai e te le salamo.

Ina e salamo ia; afai e leai, ona ou vave alu atu lea ia te oe, ou te tau foi ma i latou i le pelu ai lo‘u gutu.

Ua ou tuu atu foi ni ona aso ia salamo ai i lana faitaaga, a ua le salamo lava o ia.

O lē manumalo, e faaofuina o ia i ofu sisina; ou te le sōloiesea foi lona igoa i le tusi o le ola, a e ou te ta‘u atu lona igoa i luma o lo‘u Tamā, ma luma o ana agelu.

Ua ou iloa au galuega, e te le maalili, e te le vevela foi; ou te loto ina ia e maalili, pe vevela; o lenei, ua e faaleogalua, e te le maalili, e te le vevela foi, o le mea lea ou te luai atu ai ia te oe i lo‘u gutu

Auā ua e fai mai, Ou te se mauoa, ua faatamaoaigaina a‘u, ou te le mativa foi i se mea e tasi; a ua e le iloa o oe o le malaia, ma le pagatia, ma le mativa, ma le tauaso, ma le le lavalava; ou te fai atu ai ia te oe, ia e faatau atu ia te au le auro ua faamamāina i le afi, ina ia e tamaoaiga ai; ma ofu sisina ina ia e ofu ai, ina ne‘i iloa le mā o lou le lavalavā; ma le vaimata e nini a‘i ou mata, ina ia e pupula ai. Ou te aoai ma sasa ia i latou uma ou te alofa i ai; o lenei, ia e vilivilitai, ma ia e salamo.

Faauta, ou te tu atu i le puipui ma tu‘itu‘i atu; ai se tasi e faalogo mai i lo‘u leo, ma tatala mai le puipui, ou te ulufale atu ia te ia, ma te tali sua foi ma ia, o ia foi ma a‘u.

O lē manumalo ou te avatua i te ia ma te nonofo faatasi ma a‘u i lo‘u nofoālii, e pei o a‘u foi ona ou manumalo, ua ma nonofo foi faatasi ma lo‘u Tamā i lona nofoālii.

Ona ou faapea atu ai lea ia te ia, Le Alii e, ua e silafia. Ona faapea mai ai lea o ia ia te au, O i latou ia o e o mai nai le puapuaga tele, ua ta foi o latou ofu, ma ua faasinasinaina o latou ofu i le toto o le Tamai mamoe.

A ua latou manumalo ia te ia ona o le toto o le Tamai mamoe, ma le upu a la latou mau, ua latou le faapelepeleina foi lo latou ola ua oo i le oti.

e le iloa foi se pepelo i o latou gutu; auā e le ponā i latou i luma o le nofoālii o le Atua.

O le mea lenei ua i ai le onosai o le au paia; o le mea lenei ua i ai e ua tausi i poloaiga a le Atua ma le faatuatua ia Iesu.

Le Alii e, o ai se le mata‘u ia te oe, ma vivii atu i lou suafa? auā ua na o oe e lelei; auā e o mai nuu uma lava, ma latou ifo i ou luma; auā ua faaalia au faamasinoga tonu.

Na a‘u iloa foi le nofoālii tele e sinasina, ma le o tietie ai, ua sosola ese le lalolagi ma le lagi i ona luma, e le iloa foi se mea e tu ai i laua. Na a‘u iloa foi o e na oti, o tagatānuu atoa ma alii, o tutū i luma o le Atua, ona fofola lea o tusi; ua fofola foi ma le tasi tusi, o le tusi lea o le ola; ona faamasinoina ai lea o e na oti i mea ua tusia i tusi, e tusa ma a latou amio.

E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua. Ua fetalai mai foi lē tietie i le nofoālii, Faauta, ou te faia ia fou mea uma lava. Ua fetalai mai foi o ia ia te au, Ia e tusi; auā o upu nei e moni ma le faamaoni ia. Ua fetalai mai foi o ia ia te au, Ua uma ona fai. O a‘u le Alefa ma le Omeka, o le amataga ma le gataaga. O le ua fia inu ou te foaifuaina atu ia te ia ai le puna o le vai ola. O lē manumalo e maua e ia mea uma, e fai foi a‘u mona Atua, e fai foi o ia mo‘u atalii. A o e loto vaivai, ma e lē faalogo, ma e fai mea e inosia, ma e fasioti tagata, ma e faitaaga, ma e faataulāitu, ma e ifo i tupua, atoa ma e tala pepelo uma, e fai o latou tofi i le lepa e mu i le afi ma le teio, o le oti faalua lea.

O lē amioletonu ia amioletonu pea o ia, o lē eleelea ia eleelea pea o ia, o lē amiotonu ia amiotonu pea o ia, o lē paia ia paia pea o ia.

Amuia i latou o e faia ana poloaiga, ina ia taga ia i latou le laau o le ola, ma ia latou ulu atu i le aai i ona faitotoa.

Ua fetalai mai le Agaga ma le faatoanofotane, Ina sau ia; ina fai atu foi ia o lē faalogo, Ina sau ia; o lē fia inu, ina sau ia, atoa ma lē manao i ai, ina ave fua ia le vai o le ola.

Auā ou te ta‘utino atu ia i latou uma o e faalogo i upu o le valoaga o lenei tusi, Ai se tasi e faaopoopo mai se upu i nei upu, e faaopoopoina atu e le Atua ia te ia o mala ua tusia i lenei tusi. Ai se tasi foi e ave ese se upu i upu o le tusi o lenei valoaga, e aveeseina e le Atua lona tofi i le tusi o le ola, ma le aai paia, ma mea ua tusia i lenei tusi.