11 – Agasala

Ua fetalai atu foi Ieova le Atua i le tagata, o loo faapea atu, O laau uma o i le faatoaga e te ‘ai ai. A o le laau e iloa ai le lelei ma le leaga, aua e te ‘ai ai; auā o le aso e te ‘ai ai e te oti ai lava.

Ona vaai atu lea o le fafine i le laau e lelei lava pe a ‘ai, ma ua matagofie mai, o le laau foi e aoga e maua ai le poto, ona tago ai lea o ia i lona fua, ma ‘ai ai; na ia avatu foi i lana tane faatasi ma ia, na ‘ai ai foi o ia.

Ona pupula ai lea o laua mata, ua la iloa ua le lavalavā i laua; ona la fatu ai lea o lau o le mati ua fai mo laua titi. Ua faalogo i laua i le siufofoga o Ieova le Atua o loo savali i le faatoaga i le itu aso e agi malie mai ai le matagi; ona lalafi ai lea o Atamu ma lana avā ai luma o Ieova le Atua i laau o le faatoaga. Ona valaau atu lea o Ieova le Atua ia Atamu, ua faapea atu ia te ia, O fea o iai oe? Ona tali mai lea o ia, Na ou faalogo atu i lou siufofoga i le faatoaga, ona ou fefe ai lea, auā ua ou le lavalavā; ona ou lafi lea. Ua fetalai atu o ia, O ai ea ua na ta‘u atu ia te oe ua e le lavalavā? Ua e ‘ai ea i le laau na ou fai atu ai ia te oe, e aua e te ‘ai ai?

Ona faapea mai lea o Atamu, O le fafine na e aumai ia te au, ua na aumai ia te au le fua o le laau, ona ou ‘ai ai lea. Ona fetalai atu lea o Ieova le Atua i le fafine, Se a lena mea ua e faia? Ona tali mai lea o le fafine, Na faasese mai le gata ia te au, ona ou ‘ai ai lea. Ona fetalai atu lea o Ieova le Atua i le gata,

Ua fetalai ane foi Ieova le Atua, Faauta, ua avea le tagata e pei o so tatou, ua iloa ai le lelei ma le leaga; o lenei, ne‘i aapa atu lona lima, ma tago atu foi i le laau o le ola, e ‘ai ai, ma ola e faavavau; ona tulia ai lea o ia e Ieova le Atua ai le faatoaga o Etena, ia galue i le eleele na faia mai ai o ia. Ua ia tuli atu lava ia Atamu; ua ia tofia foi kerupi e nonofo i le itu i sasae o le faatoaga o Etena, ma le pelu afi mumū, o loo feliuliuai e leoleo ai le ala i le laau o le ola.

a e peitai o Kaino ma lana taulaga, ua ia le silasila i ai. Ona ita tele ai lea o Kaino, ua faaūū lava ona mata. Ona fetalai atu lea o Ieova ia Kaino, Se a le mea ua e ita ai? Se a foi ua faaūū ai ou mata? Pe afai e te amio lelei e te le maua ea le fiafia? A e afai e te le amio lelei o loo taoto i le faitotoa le agasala. E uai atu lona manao ia te oe, e te pule foi oe ia te ia. Ua fai mai foi Kaino ia Apelu lona uso, ua iai foi i laua i le fanua, ona tulai atu lea o Kaino ia Apelu lona uso, ma fasioti ia te ia.

Ua silafia e Ieova ua leaga tele lava tagata i le lalolagi, o manatu uma ua mafaufau ifo ai i o latou loto ua na ona leaga ia i aso uma lava.

Ona faapea lea a Ieova, O le alaga mai Sotoma ma Komoro ua tele, ma ua matuā tele lava a latou agasala;

Aua ne‘i e fai mo oe ni atua ese i o‘u luma. Aua e te fai mo oe se tupua ua ta, po o se faatusa lava o se mea o i le lagi i luga, po o i le fanua i lalo, po o i le sami o i lalo o le fanau; aua e te ifo i ai, aua foi e te auauna i ai; auā o a‘u o Ieova lou Atua, o le Atua fuā, o le taui atu i fanau o le amioletonu a o latou mātua, e oo i le tupulaga e tolu ma le fa o e ‘ino‘ino mai ia te au; a ou te alofa i afe o tupulaga o e alofa mai ia te au, ma tausi mai i a‘u poloaiga.

Aua e te ta‘u fua le suafa o Ieova lou Atua; auā e le faasaoina e Ieova o lē ta‘u fua i lona suafa.

Aua e te fasioti tagata. Aua e te mulilua. Aua e te gaoi. Aua e te molimau pepelo i lē lua te tuaoi. Aua e te manao i le fale o lē lua te tuaoi, aua e te manao i le avā a lē lua te tuaoi, po o lana auauna tane, po o lana auauna fafine, po o lana povi, po o lana asini, po o se tasi mea a lē lua te tuaoi.

Ua tali atu Mose i le nuu, Aua tou te fefefe; auā ua afio mai le Atua ina ia tofotofo ia te outou, ina ia matautia foi o ia e outou, ina ne‘i outou agasala.

O se fasi i lona tamā, po o lona tinā, ia fasiotia lava o ia. O se gaoi foi i se tagata, ma faatauina o ia, po ua iloa o ia o loo ia te ia, ia fasiotia lava o ia. O se fetuu foi i lona tamā, po o lona tinā, ia fasiotia lava o ia.

Ai se tasi la te momoe ma se manu, ia fasiotia lava ia.

Aua e te sii le tala fatu fua; aua foi le ‘au faatasi ma le tagata amio leaga, ne‘i fai oe ma molimau faasaua.

A oo ina nofo sala o ia i se mea o ia mea, ia faaali mai e ia ua agasala o ia i lea mea;

Aua foi ne‘i momoe oulua ma le avā a le tasi, e leaga ai oe ia te ia.

Aua foi e te tuuina atu o so lau fanau e ui ane i le afi ia Moloka. Aua foi e te faaleagaina le igoa o lou Atua; o a‘u o Ieova.

Aua lua te momoe ma se tane, e pei ona momoe ma se fafine; o le mea e inosia lava lea.

Aua foi lua te momoe ma se manu, e leaga ai oe ia te ia; aua ne‘i tu atu foi se fafine i luma o se manu la te momoe ma ia; o le mea matuā leaga lava lea.

Auā ai se na te faia se mea e tasi o ia mea e inosia, o tagata lava o e faia e vavaeeseina i latou i lo latou nuu.

Aua tou te gaoi, aua foi tou te faa‘ole‘ole, aua foi tou te pelopelo le tasi i le tasi.

Aua e te taui ma sui, aua foi le faamoemoe lou ita i tagata o lou nuu, a e te alofa atu i lē lua te tuaoi ia pei o oe lava ia te oe; o a‘u o Ieova.

Aua tou te faia se mea le tonu i le faamasinoga, i le fua faaloloa, po o le fua faatautau, po o le fua faaofuofu. Ia ia te outou le fua faatautau ua tatau, o maa e tatau, o le efa e tatau, ma le sinu e tatau; o a‘u o Ieova lo outou Atua, na ou au mai ia te outou nai le nuu o Aikupito.

O lea ia faapaiaina ai outou e outou, ma ia paia lava outou; auā o a‘u o Ieova lo outou Atua.

Ia e fai atu foi i le fanauga a Isaraelu, ia faapea atu, Ai sē upu leaga i lona Atua e nofo sala lava o ia. O le na te faifaia le suafa o Ieova, e fasiotia lava o ia, e fetogi lava ia te ia i maa e le faapotopotoga uma; o le tagata ese atoa ma le tama a le eleele pe a faifai o ia i le suafa o Ieova, e fasiotia lava o ia.

Afai foi e faia e se tasi se mea e leaga ai le tino o le tasi; e faapei ona ia faia, e faapea lava ona faia ia te ia; e suia le manua i le manua, e suia le mata i le mata, e suia le nifo i le nifo; e pei o le leaga ua faia e ia i le tasi tagata, e faapea lava ona faia ia te ia.

Afai latou te faaali ai i a latou amio leaga, ma amio leaga a o latou tamā atoa ma lo latou solitulafono ua latou soli ai la‘u tulafono, ma latou tetee mai ia te au;

Ia e fai atu i le fanauga a Isaraelu, Pe a faia e se tane po o se fafine se agasala o agasala uma a tagata e soli ai tulafono a Ieova, ma nofo sala ai lea tagata;

Ona o mai ai lea o le nuu ia Mose, ua latou faapea mai, Ua matou agasala, auā ua matou fai upu ia Ieova atoa foi ma oe; ia e tatalo atu ia Ieova ia ave ese e ia ia gata ia te i matou. Ona tatalo ai lea o Mose mo le nuu.

A e afai tou te le faapea ona fai, faauta, e agasala ai outou ia Ieova; ia outou iloa foi e maua lava outou e a outou agasala.

Aua ne‘i e fai mo oe ni atua ese i o‘u luma. Aua e te fai mo oe se tupua ua ta, o se faatusa lava o se mea o i le lagi i luga, po o i le fanua i lalo, po o i le sami o i lalo o le fanua; aua e te ifo i ai, aua foi e te auauna i ai; auā o a‘u o Ieova lou Atua, o le Atua fuā, o lē taui atu i fanau o le amioletonu a o latou mātua, e oo i le tupulaga e tolu ma le fa o e ‘ino‘ino mai ia te au; a ou te alofa i afe o tupulaga o e alofa mai ia te au, ma tausi mai i a‘u poloaiga.

Aua e te ta‘u fua le suafa o Ieova lou Atua; auā e le faasaoina e Ieova o le ta‘u fua i lona suafa.

Aua e te fasioti tagata. Aua foi e te mulilua. Aua foi e te gaoi. Aua foi e te mōlimau pepelo i se tasi. Aua foi e te manao i le avā a le lua te tuaoi, aua foi e te manao i le fale o le lua te tuaoi, o lona fanua, po o lana auauna tane, po o lana auauna fafine, o lana povi, po o lana asini, po o se tasi mea a le lua te tuaoi.

Lenei la, ia outou anaana ia faia, faapei ona poloai mai ai o Ieova lo outou Atua ia te outou, aua tou te afe i le itu taumatau, po o le itu tauagavale.

O tupua ua ta o latou atua ia e susunu i le afi; aua e te manao i le ario ma le auro o i ai, aua foi e te ave mā oe, ne‘i maileia ai oe; auā o le mea e inosia lea e Ieova lou Atua. Aua e te avatu i lou fale se mea e inosia, ne‘i fetuuina oe pei o lea mea; ia e matuā ‘ino‘ino i ai, ma ia matuā inosia e oe, auā o le mea fetuuina lava lea.

Aua ne‘i ia te oe i lau taga o maa eseese e fua ai, o le latele ma lē laitiiti. Aua ne‘i ia te oe i lou fale o efa eseese, o lē latele ma lē laitiiti. A ia ia te oe le maa fua atoatoa ma le tonu, ia ia te oe foi o le efa atoatoa ma le tonu; ina ia faafualoa ai ou aso i le laueleele ua foaiina mai e Ieova lou Atua ia te oe. Auā e inosia e Ieova lou Atua o i latou uma o e faia ia mea, e taitasi uma o e faia le amioletonu.

Ia malaia lava le tagata na te faia se tupua ua ta, po o se tupua uamea, o le mea e inosia e Ieova, ua faia i lima o le tufuga, ma tuu ai i se mea lilo. Ona tali mai ai lea o le nuu uma lava, e faapea mai, Amene.

Ia malaia le na te faapiopioina le faamasinoga i le tagata ese, ma le ua āumatuā, ma le fafine ua oti lana tane. Ona tali mai ai lea o le nuu uma, Amene.

Ia malaia le na te fasi faaliolilo lē la te tuaoi. Ona tali mai ai lea o le nuu uma, Amene.

Ia malaia le na te talia se taui e fasioti ai se tagata ua le sala. Ona tali mai ai lea o le nuu uma, Amene.

Ia malaia le na te le faamauina upu o lenei tulafono e faia. Ona tali mai ai lea o le nuu uma, Amene.

A e afai e te le faalogo i le siufofoga o Ieova lou Atua, e anaana e foi ana poloaiga uma ma ana tulafono ou te fai atu ai ia te oe i le aso nei; ona maua mai ai lea o oe i nei malaia uma, e oo lava ia ia te oe.

Na latou faatupuina lona fuā ona o atua ese; na latou faaonoono ia te ia i mea inosia. Na latou fai taulaga i temoni, e le o le Atua; o atua na le iloa e i latou; o atua fou, na se‘i tutupu, na le matatau i ai o outou tamā.

Ona fai atu lea o le fanauga a Isaraelu ia Ieova, Ua matou agasala, ia e faia ia te i matou mea uma ua e finagalo i ai; tau lava ina e laveai mai ia te i matou i lenei aso.

O ona po ia sa leai se tupu ia Isaraelu, sa taitasi ma fai le mea ua tonu i lona lava manatu.

O lea sa matuā tele ai le agasala a nei taulelea i luma o Ieova, auā na ‘ino‘ino ai tagata i taulaga ia Ieova.

Auā o le fouvale, e tusa ia ma le agasala o le faataulāitu; o le finau vale, e tusa ia ma le leaga o le tapuai i tupua. Ua e lafoai le afioga a Ieova, o lea ua lafoai ai o ia ia te oe ia le fai ma tupu.

Pe afai latou te agasala atu ia te oe, (auā e leai se tagata e le agasala,) ma e toasa mai ia te i latou, ma e tuuina i latou i e ita mai ia te i latou, ma latou ave ia te i latou faatagataotaua i le nuu o e ita mai, pe mamao pe latalata mai;

Ua latou faaui ane o latou atalii ma o latou afafine i le afi, ua latou fai togafiti faataulāitu foi, ma saili faailoga; ua matuā tuuina atu foi i latou e i latou ia fai amio leaga i luma o Ieova e faaonoono atu ai ia te ia. O le mea lea na matuā toasa mai ai Ieova ia Isaraelu, ua ia ave ese ai ia te i latou i ona luma; e leai se na toe, na o le itu aiga lava o Iuta.

ia e faafofoga mai, mai le lagi, o le mea o loo e afio ai i a latou tatalo, ma a latou aioi atu, ma ia e fai le faamasinoga mo i latou, ma e faamagalo mai i lou nuu o e ua agasala atu ia te oe.

Ua ia faaui ane ana fanau i le afi i le vanu o le atalii o Hinoma; ua iite foi i ao o le lagi, ma fai togafiti faataulāitu, ma tautala faataulāitu, ma saili i aitu vavalo, ma taulāitu; ua faia mea leaga e tele i luma o Ieova e faaonoono ia te ia.

E faapea lava ala o i latou uma o e faagalogalo i le Atua; e faaumatia foi le faamoemoe o le tagata faalemata‘u.

Afai ou te agasala, ua e silasila mai ai pea ia te au, e te le faamagalo mai foi ia te au i la‘u amio leaga.

Auā ua outou fatu fua lava tala pepelo, o fomai le aoga lava outou uma.

E fia ea a‘u amio leaga ma a‘u agasala? Ina faailoa mai ia ia te au lo‘u solitulafono ma la‘u agasala.

Se a ea le tagata, ia mamā ai o ia, ma ia amiotonu lē ua fanau mai le fafine?

E faasagasaga o ia i tagata, ma fai atu, Ua ou agasala, ua ou faia le amio faapiopio, a ua le tauia mai ia te au. Na te laveaiina o ia, ina ia le oo i le lua; e iloa foi e ia le malamalama.

Amuia le tagata e le savali i le filifiliga a e amio leaga, e le tu foi o ia i le ala o e agasala, e le nofo foi i le nofoa o e tauemu;

E le faapea o e amio leaga; a e pei o aputi o saito i latou ua lelea i le matagi. O le mea lea e le tutū ai o e amio leaga i le faamasinoga, e le tutū foi tagata agasala i le faapotopotoga o e amiotonu. Auā ua silafia e Ieova le ala o e amiotonu; a e fano lava le ala o e amio leaga.

O outou le fanau a tagata, tou te faia ma luma lo‘u mamalu seia afea? Tou te loto ea i le mea faatauvaa? Tou te saili ea i le pepelo? Selā.

E le tutū i ou luma o e faamaualuluga; ua e ‘ino‘ino ia i latou uma o e fai amio leaga. E fano ia te oe o e tala pepelo; e matuā inosia e Ieova le tagata ua totolima ma le tau‘ole‘ole.

O le faamaualuga o le tagata amio leaga ua ia matuā faasaua ai i e ua puapuagatia; ua maua i latou i ia lava togafiti na latou manatua. Auā ua mitamita lē amio leaga i tu‘inanau o lona loto; o le ua matapeapea foi, ua faaamuia o ia e ia, ua ‘ino‘ino ia Ieova. O le faasiasia o mata o le ua amio leaga e le saili ai o ia; o ona mafaufau uma, E leai se Atua.

Ua tumu lona gutu i le fetuu, ma le tau‘ole‘ole, ma le saua; o loo i lalo o lona laulaufaiva le faatiga ma le amio leaga.

Ua fai ifo le tagata valea i lona loto, E leai se Atua. Ua leaga lava i latou; ua inosia a latou amioga; e leai se tasi ua amio lelei.

Ia e silasila mai i lo‘u puapuaga ma lo‘u tiga; ma ia e faamagaloina a‘u agasala uma lava.

Amuia le tagata ua faamagaloina lona solitulafono, ma ua ufitia lana agasala.

Ona ou faailoa atu ai lea ia te oe o la‘u agasala, na ou le ufitia foi la‘u amioletonu; sa ou faapea, Ou te faaali atu ia Ieova o‘u solitulafono; ona e aveesea ai lea o le leaga o la‘u agasala. Selā.

O ana upu o le agasala ia ma le faa‘ole‘ole; ua tuua e ia le faautauta ma le amio lelei.

Ina soia e te ita, ma ia tuu lou tiga; aua e te faameo, ne‘i e faia se mea leaga.

Auā ou te ta‘uta‘uina atu la‘u amio leaga; ou te atuatuvale ona o la‘u agasala.

Na ou fai atu, Ieova e, ia e alofa mai ia te au; ia e faamalolo i lo‘u agaga; auā ua ou agasala atu ia te oe.

Le Atua e, ia e alofa mai ia te au, e tusa ma lou lava alofa; e tusa ma le tele o lou alofa mutimutivale, ia e sōloiesea o‘u solitulafono. Ia e matuā fufulu mai ia te au i la‘u amio leaga, ma ia e faamamā mai ia te au i la‘u agasala. Auā ua ou iloa e ‘au lo‘u solitulafono; e le aunoa foi ona i ai i o‘u luma o la‘u agasala. Ua ou agasala atu ia te oe, na o oe lava; ua ou faia foi lenei mea leaga i ou luma; e tonu ai oe i lau fetalaiga, e sao foi oe pe a e faamasino.

Faauta, na fanaua a‘u ma le amio leaga; na ou i ai foi i le manava o lo‘u tinā ma le agasala.

Ia ‘alo ou fofoga i a‘u agasala, ma ia e sōloi ese a‘u amio leaga uma. Le Atua e, ia e faia se loto mamā mo a‘u; ma ia e faafouina se loto mau i totonu ia te au. Aua e te lafoaiina a‘u i ou luma; aua foi e te aveeseina lou Agaga Paia ia te au.

Ua mafaufau lou laulaufaiva i mea leaga; e fai le pepelo e pei o se tafi maai.

Ua fai ifo le tagata valea i lona loto, E leai se Atua. Ua leaga lava i latou, ua inosia a latou amioga; e leai lava se tasi ua amio lelei. Na silasila mai le Atua mai le lagi i le fanau a tagata, ina ia silafia pe ai se tasi ua poto, o se na te sailia le Atua. Ua latou taitasi ma foi i tua, ua leaga faatasi lava i latou; e leai se tasi ua amio lelei, e leai lava se tasi.

O le agasala a o latou gutu, o le upu lea ai o latou laugutu, ia maileia lava i latou i lo latou lava faamaualuga; ona o a latou fetuu foi ma a latou tala pepelo ua latou tautala ai.

Le Atua e, o oe lava ua e silafia mai lo‘u valea; e le lilo foi a‘u agasala ia te oe.

Na latou le tausia le feagaiga a le Atua, na le mafafai foi ona latou savavali i lana tulafono;

A ua faaopoopo ona toe agasala atu i latou ia te ia, i lo latou faaonoono i lē Silisili ese i le nuu naumati.

Aua e te manatua a matou agasala anamua; ia vave ona tomua mai o lou alofa mutimuti vale ia te i matou; auā ua matuā vaivai i matou. Le Atua o lo matou faaolataga e, ia e fesoasoani mai ia te i matou ona o lou suafa mamalu; ia e laveai mai foi ia te i matou, ma ia e faamagaloina a matou agasala ona o lou suafa.

Ua e tuuina a matou amio leaga i ou luma, ua tuuina foi a matou agasala lilo i le malamalama o ou fofoga.

Outou e ua alolofa atu ia Ieova, ia outou ‘ino‘ino i mea leaga; o loo tausi e ia i agaga o ona tagata amio Atua; na te laveaiina i latou ai lima o e amio leaga.

E le nofo i lo‘u fale o se fai mea faa‘ole‘ole; o lē tala pepelo foi e le tumau ia i o‘u luma.

E lei faia e ia ia i tatou e tusa ma a tatou agasala; e lei taui mai foi o ia ia i tatou e tusa ma a tatou amio leaga. Auā e pei ona maualuga o le lagi i le lalolagi, e faapea ona tele o lona alofa i e matatau ia te ia. E pei ona vava mamao o sasae ma sisifo, e faapea lava ona faamamao e ia ia i tatou o a tatou solitulafono.

Ua matou agasala atoa ma o matou tamā, ua amio faapiopio i matou, ua matou amio leaga lava.

A ua latou nofo fefiloi ma nuu ese, ona a‘oa‘oina ai lea o i latou i a latou amioga. Ua latou auauna foi i o latou tupua; ua fai foi ia mea ma mailei ia i latou. Ua latou fai foi o latou atalii ma o latou afafine ma taulaga i temoni; ma latou sasaa le toto o e le sala, o toto o latou atalii ma o latou afafine, e na latou fai ma taulaga i tupua o Kanana; ona leaga ai lea o le laueleele i le toto. Ona leaga ai lea o i latou i a latou lava amio, ua latou faitaaga foi i a latou mea na fai.

Amuia e ua sao l o latou ala, o e savavali i le tulafono a Ieova.

Ua ou teu i lo‘u loto lau afioga, ina ne‘i ou agasala ia te oe.

Ua e faaleaogaina i latou uma o e sese i au tulafono; auā o le pepelo lo latou faa‘ole‘ole.

O loo tafe ifo o vaitafe i o‘u mata, auā e le tausi e i latou lau tulafono.

Le Atua e, ia e suesue mai ia te au, ma ia e silafia lo‘u loto; tofotofo mai ia ia te au, ma ia e silafia o‘u manatunatu; ma ia e silafia po o ia te au se ala e tiga ai; ma e ta‘ita‘iina mai a‘u i le ala o le faavavau.

Lo‘u atalii e, afai e faaoleole ia te oe tagata agasala, aua ne‘i e usiusitai i ai;

O le tagata ulavale, o le tagata agasala, o loo savali ia ma le gutu faapiopio; e genogeno ona mata; e tautalatala ona vae; e faasino i ona tamatamai lima. Ua i lona loto le faapiopio; na te fai togafiti leaga i aso uma; na te faatupuina maseiga;

O mea nei e ono ua inosia e Ieova; o lona fitu foi ua matuā inosia lava e ia; o mata faasiasia, o le laulaufaiva pepelo, ma lima e sasaa le toto o le ua le sala, o le loto e manatunatu i togafiti leaga, o vae e tele vavave ona taufetuli i le leaga, o le molimau pepelo, na te tautala i mea pepelo; ma le na te faatupu maseiga i uso.

O le mata‘u ia Ieova, o le ‘ino‘ino lea i le leaga; o le faamaualuga, ma le loto fefete, ma le amio leaga, ma le gutu faapiopio, ou te ‘ino‘ino i ai.

Ua inosia e Ieova e ua faapiopio o latou loto; a o e ua sao a latou amio, e fiafia i ai o ia. E tago lea lima i lea lima, a e le faasaoina le ua amio leaga; a o le fanau a e amiotonu, e sao i latou.

O i ai le ala ua tonu i le manatu o le tagata; a o lona taunuuga, o ala ia e oti ai.

E inosia e Ieova mafaufauga o le ua leaga; a e sao ona lelei o upu matagofie. O le ua matapeapea i le oloa, e faatigaina e ia lona lava aiga; a o lē ‘ino‘ino i mea alofa, e ola o ia.

E inosia e Ieova atoa uma e ua loto faamaualuga; e tago lea lima i lea lima, a e le faasaoina i latou.

O le tagata faapiopio, e faatupuina e ia le misa; ma lē faatuaupua, na te faateaeseina uo.

O le na te taui atu le lelei le leaga, e le te‘a le leaga i lona aiga.

O le na te ta‘uamiotonu atu i le ua amio leaga, ma le ua faasala i le ua amiotonu, e faatau inosia i laua e Ieova.

E le faasaoina le molimau pepelo; ma le ua tala pepelo, e le sao lava ia.

O le manatu o le vale o le agasala lea; e inosia foi e tagata le ua faatauemu.

O le laulaufaiva pepelo, ua ‘ino‘ino ia i e ua momomo ai; ma le gutu molemole e tupu ai le malaia.

O le ua liliu ese ona taliga a e le faalogologo i le tulafono, e inosia lana lava tatalo.

O le ua ufiufi lona solitulafono, e le manuia o ia; a o le ua faaali ma lafoaiina, e alofagia o ia. Amuia le tagata ua le aunoa ona mata‘u o ia; a o le ua faamaaa lona loto, e paū o ia i le leaga.

O le faipule e uai atu ona taliga i upu pepelo, e amio leaga ana auauna uma lava.

O i ai le tupulaga, fa te i latou ua latou mamā; a e lei fufuluesea o latou eleele.

Aua le faataalise ona ita o lou loto; auā e tumau le ita i loto o e valelea.

E leai lava se tagata amiotonu i le lalolagi, o le na te faia amio lelei, ma le le agasala.

Se‘i tatou faalogo ia i le iuga o ia mea uma, Ia e mata‘u i le Atua, ma e anaana i ana poloaiga; auā o mea ia e tatau i tagata uma. Auā e faamasinoina e le Atua galuega uma, atoa ma mea lilo uma lava, o mea lelei atoa ma mea leaga.

Ina fafano ia outou, ina faamamā ia outou; faate‘a ese ia a outou galuega leaga i o‘u luma, soia tou te fai mea leaga.

O loo o faapea mai Ieova, O mai ia, ina tatou filifili ia, e ui lava ina pei o ofu mūmū a outou agasala, e sisina ia e pei o le kiona; e ui lava ina mūmū ia e pei o le ie ulaula, e avea e pei o fulufulu mamoe.

A e oo faatasi le malaia o e solitulafono atoa ma e agasala; o e lafoai foi Ieova e faaumatia lava i latou.

Ua iloa i latou i le amio a o latou mata, ua latou faaali mai a latou agasala pei o Sotoma, ua latou le natia lava. Oi talofa ia te i latou! auā o i latou lava ua oo ai le leaga ia te i latou.

Oi talofa ia te i latou o e fai mai, ua lelei le mea leaga, a e leaga le mea lelei; o e fai ma malamalama le pouliuli, a e fai foi ma pouliuli le malamalama; o e fai ma mea suamalie le mea oona, a e fai ma mea oona le mea suamalie. Oi talofa i e ua popoto i o latou lava manatu, ma e ua fai ma tagata mafaufau i o latou lava taofi.

O lenei, faapei ona ‘aina o tagutugutu saito i le mumū o le afi, e pei ona pauu foi le mutia magumagu ua mu, e faapea foi ona pala o latou aa, e pusa ae foi lo latou fuga e pei o le efuefu; auā ua latou lafoai le tulafono a Ieova o ‘au, ua latou ‘ino‘ino foi i le afioga a le Paia o Isaraelu.

Ou te faasalaina le lalolagi ona o a latou amio leaga, o tagata ulavavale foi ona o a latou agasala; ou te faaumatia foi le faasausili o e faamaualuluga, ou te lafotuina i lalo le faasiasia o e faasaua.

auā o le nuu fouvale lenei, o le fanau pepelo, o le fanau e le mafafai ona faalogo i le tulafono a Ieova;

Auā e tautala le agaleaga i mea leaga, e sauni le agasala i lona loto, e fai amio faalematau, e tautala foi i mea sese ia Ieova, ina ia faamatelaina le tagata ua fia ‘ai, ua aveesea foi le mea e inu i le ua fia inu. O togafiti a le mataoge e leaga ia; ua taupulepule ia i togafiti e faaumatia ai i upu pepelo e ua tigaina; e faaumatia foi e ua matitiva a o tautala i latou i upu tonu.

O a‘u, o a‘u lava lē sōloiesea au solitulafoni, ona o a‘u lava; o au agasala foi ou te le manatua ia. Ia faamanatu mai ia te au, ia ta fefaamasinoai; ta‘u mai ia oe, ina ia ta‘uamiotonuina ai oe.

A ua manua o ia ona o a tatou solitulafono, ua momomo o ia ona o a tatou amio leaga; o le aoaiga e filemu ai tatou sa i ona luga lea, o ona faalavalava foi ua malolo ai tatou. O i tatou uma ua sē i tatou e pei o mamoe, ua taitasi ma faasaga i lona lava ala; a ua faaoo ia te ia e Ieova le amio leaga o i tatou uma.

O ulī ‘ai tetele i latou, latou te le iloa se ma‘ona; o i latou foi o leoleo mamoe, latou te le iloa faautauta, ua faasaga i latou uma i o latou lava ala, ua taitasi ma faasaga i lana lava oloa, e le faapito lava.

Tou te faatauemu ea ia te ai? E faamaga o outou gutu ia te ai? tou te faaeto mai o outou laulaufaiva ia te ai? E le o le fanau fouvale ea outou? o le fanau e pepelo?

A e peitai o a outou amio leaga ua fai ia ma pupuni i le va o outou ma lo outou Atua, o a outou agasala foi ua ‘alo ai ona fofoga ia te outou ua ia le faafofoga mai ai. Auā ua leaga o outou lima i le toto, ma outou tamatamai lima ua leaga ia i le amio leaga; ua tala pepelo o outou laugutu, ua tautala o outou laulaufaiva i le mea faapiopio. Ua leai se valaau i le amiotonu, ua leai se finau ma le faamaoni; ua latou faatuatua i le mea faatauvaa; ua tala pepelo, ua to i latou i le agasala, ma ua fanau mai le amio leaga.

O i matou nei e tusa ma le mea leaga i matou uma; o a matou amiotonu uma e tusa ia ma le ie o le ma‘i; ua mamae i matou uma e pei o le lau laau, o a matou amioletonu e pei se matagi ua lelea ai i matou.

Auā e ui lava ina e fufulu ia te oe i le neteri, ma e avane ai le moli e tele, ua tusia lau agasala i o‘u luma, ua fetalai mai ai le Alii o Ieova.

Tau ina e iloa lau agasala ua e fouvale ai ia Ieova lou Atua, ua e fealuai i tane ese i lalo o laau lauolaola uma; ua e le faalogo mai foi i lo‘u leo, o loo fetalai mai ai Ieova.

Ua matou taooto ma lo matou masiasi, ua ufitia lava i matou i lo matou mā; auā ua matou agasala ia Ieova lo matou Atua, o i matou atoa ma o matou tamā, talu ina o matou o taulelea ua oo lava i nei ona po, e lei faalogo foi i matou i le siufofoga o Ieova lo matou Atua.

Ierusalema e, ina fufulu ia lou loto ai le leaga, ina ia faaolaina oe; pe tumau seia afea ou mafaufauga leaga i totonu ia te oe?

Ua latou mamā ea ona o le mea inosia ua latou faia? ua matuā le mamā lava i latou, ua latou le iloa lava le masiasi; o le mea lea e pauu ai i latou faatasi ma e ua pauu; o ona po ou te asiasi ai ia te i latou, latou te tausuai ai, o loo fetalai mai ai Ieova.

Le lalolagi e, ina faalogologo mai ia, faauta, o a‘u nei ou te faaooina atu le malaia i lenei nuu, o le fua o latou lava mafaufauga, auā ua latou le faalogo i a‘u upu; o la‘u tulafono foi ua latou lafoaiina lea.

Faauta, ua outou faatuatua i upu pepelo, e le aoga. Tou te gaoi ea, ma fasioti tagata, ma mulilua, ma tauto pepelo, ma faamu mea manogi ia Paala, ma mulimuli atu i atua ese ua outou le iloa; ma outou o mai, ma tutū i o‘u luma i lenei fale, o loo ta‘ua ai lo‘u igoa, ma outou fai mai, Ua laveaiina i matou, ina ia faia nei mea inosia uma?

Se a ea le mea ua liliu ese ai lenei nuu o Ierusalema ma le liliu ese e le aunoa? Ua latou taofi mau i mea pepelo, ma latou le mafafai ona toe liliu mai.

Ua liliu atu o‘u taliga, ma ou faalogologo atu; ua latou le tautala faamaoni; e leai se tagata ua salamo i lana amio leaga, ua faapea mai, Se a le mea ua ou faia? Ua latou taitasi ma liliu atu i o latou taufetuliga, e pei ona oso atu o le solofanua i le taua.

Ua latou lolo‘u o latou laulaufaiva e pei o latou aufana, e tala pepelo ai; latou te le totoa i fai mea faamaoni i le nuu; auā ua alualu la latou amio leaga, ma latou le iloa a‘u, ua fetalai mai ai Ieova. Ia outou taitasi ma faaeteete o ia ia te ia i lana uo, aua foi ne‘i faatuatua i se uso e tasi; auā o uso uma e taitoatasi ma matuā sisio i lona uso, ma uo uma e taitasi ma fealualuai ma feaveaveai. E taitoatasi i latou ma pepelo i lana uo, e le tautala foi i latou ma le faamaoni; ua latou faamasani o latou laulaufaiva i tautala pepelo, ua tautiga i latou i fai mea faapiopio.

O latou laulaufaiva o u fanafana ia e oti ai; e tautalatala faa‘ole‘ole; e taitasi ma tautala ma le filemu i lana uo i lona gutu, a o lona loto ua lamalama ia te ia.

Ua fetalai mai foi Ieova, Ua latou lafoaiina la‘u tulafono na ou tuuina atu i o latou uma, ma latou le faalogo i lo‘u leo, ma latou le savavali i ai; a ua latou mulimuli atu i o latou loto finau vale, atoa ma Paala, na a‘oa‘oina ai i latou e o latou tamā;

Ieova e, e ui lava ina ua molimau a matou agasala ia te i matou, ia e faia lava ona o lou suafa; auā ua tele lo matou liliu ese; ua matou agasala ia te oe.

Ieova e, ua matou iloa la matou amio leaga, ma le amioletonu a o matou tamā; auā ua matou agasala ia te oe.

E sili le faa‘ole‘ole o le loto i mea uma, ma ua matuā leaga lava; po o ai na te mafaia ona iloa?

Ua ou iloa foi le mea e inosia i perofeta o Ierusalema; ua latou mulilulua, ma savavali ma le pepelo; ua faamalolosia foi e i latou lima o e amio leaga, ina ia le toe foi mai se tasi ai lana amio leaga; ua avea i latou uma ia te au e pei o Sotoma, ma e o nonofo ai e pei o Komoro.

Na a‘u aauina atu foi ia te outou a‘u auauna uma o perofeta, na ou ala aauina atu i latou, ua faapea atu, Aua lava ne‘i outou faia lena mea inosia, o le mea lava ou te ‘ino‘ino i ai.

Na le toe lavā onosai Ieova, ona o le leaga o a outou amioga, ona o mea inosia na outou faia; o le mea lea ua fai ai lo outou nuu ma mea gaogao, ma mea e ofo ai, ma faafanoga, e leai sē nofo ai, e pei ona fai i le aso nei.

A o le aiga o Isaraelu, e le mafafai i latou ona faalogo ia te oe, auā latou te le mafafai ona faalogo mai ia te au; auā ua muaulu malō, ma loto maaa le aiga uma o Isaraelu.

O loo faapea ona fetalai mai o le Alii o Ieova; ua e sasaa atu au tupe, ma ua faaalia lou tino i lou talitane ua fai ma ē ua e manao i ai, atoa ma au tupua uma e inosia, ma le toto o au fanau, na e avatu ia te i latou;

Faauta, o le agasala nei a lou uso o Sotoma, na ia te ia ma ana tama, o le faamaualuga, o le tele o mea e ‘ai, ma le matuā nofonofo faatalanoa, na ia le fesoasoani foi i lē puapuaga, ma lē mativa.

Faauta, o agaga uma, o o‘u lava i latou; e pei o le agaga o le tamā ona fai mo‘u, e faapea foi le agaga o le atalii; o le tagata e agasala e oti ia.

O le tagata e agasala e oti lava ia; e le tauia le agasala a le tamā i le atalii, e le tauia foi le agasala a le atalii i le tamā; o le amiotonu a le ua amiotonu e i ona luga lava lea, o le amio leaga foi a le ua amio leaga e i ona luga lava lea.

A e afai e liliu ese le ua amio leaga ai ana agasala uma ua na faia, ma tausi i a‘u tulafono uma, ma faia e ia le amio tatau ma le amiotonu, e ola lava ia, e le oti. O ana solitulafono uma na ia faia e le ta‘uta‘ua ia te ia; o lana amiotonu ua ia faia, e ola ai o ia. O loo fetalai mai le Alii o Ieova, Ou te fiafia ea i le oti o le ua amio leaga? ou te le fiafia ea pe a liliu ese i lona ala ia ola ai o ia?

A e afai e liliu ese le ua amiotonu i lana amiotonu, ma ua fai amio leaga, ma ua fai e tusa ma mea uma e inosia e faia e le ua amio leaga, e ola ea ia? O lana amiotonu uma na ia faia, e le manatua; o lana agasala ua ia agasala ai, ma ona sese ua ia sese ai, ona o ia mea e oti ai o ia.

A liliu ese le ua amiotonu i lana amio, ma ua fai amio leaga, ma oti ai; o lana lava amio leaga ua ia fai e oti ai o ia.

A liliu ese foi le ua amio leaga i lana amio leaga na ia faia, ma ua fai le amio tatau ma le amiotonu, e faaolaina e ia lona agaga. Auā ua ia mafaufau, ma liliu ese i lona solitulafono uma na ia faia, e ola lava ia, e le oti.

O le mea lea ou te faamasino ai ia te outou, le aiga o Isaraelu, taitoatasi e tusa ma ona ala, o loo fetalai mai ai le Alii o Ieova. Liliu mai ia, ina liliu ese i o outou solitulafono uma; ona le faia lea o le agasala ma mea e tausuai ai outou. Ina lafoai ia o outou solitulafono uma ua outou solitulafono ai, ma ia fai mo outou se loto fou, ma se agaga fou; auā pe se a ea le mea tou te fia oti ai, le aiga o Isaraelu e? Auā ou te le fiafia lava i le oti o lē oti, o loo fetalai mai ai le Alii o Ieova; o lenei, liliu mai ia outou tou te ola ai.

Tou te manatunatu ai i a outou amio uma, ma a outou mea uma na fai, sa leaga ai outou; ona ‘ino‘ino ai lea o outou ia te outou ona o a outou mea leaga uma ua outou faia.

A liliu ese le ua amiotonu i lana amiotonu, ma ua faia e ia le amio leaga, ona oti ai lava lea o ia. A e afai e liliu ese le ua amio leaga ai lana amio leaga, ma ua faia e ia le amio tatau ma le amiotonu, ona ola ai lava lea o ia.

Ua outou tutū ma a outou pelu, ua outou fai mea e inosia, ua outou taitasi ma faaleagaina le avā a le tasi tagata; a e fai ea mo outou le nuu?

O loo o tauto, ma tala pepelo, ma fasioti tagata, ma gaoi, ma mulilua, ua latou faasaua lava, ua fepaia‘i toto.

O loo faapea mai Ieova, E tolu agasala a Iuta, e fa foi, ou te le liliu ese ai lana sala; auā na latou lafoai le tulafono a Ieova, e lei tausi foi e i latou ana poloaiga; ua faaseseina i latou i a latou mea pepelo, sa naunau atu i ai o latou tamā.

Ou te amio sao ea a o loo i ai fua faatautau faaletatau, ma le taga o loo i ai maa faaaimago? Ua tutumu ona tagata mauoa i le faasaua, ua tala pepelo foi i latou o e mau ai, o latou laulaufaiva foi i o latou gutu ua faa‘ole‘ole ia.

Ou te faalatalata foi ia te outou i le faamasinoga; e vave foi ona fai o a‘u ma molimau i e fai togafiti faataulāitu, ma ē mulilulua, ma ē tauto pepelo, ma ē faasaua i le taui o le auauna tauia, o le fafine ua oti lana tane, ma le ua mātuaoti, atoa ma ē faapioina le faamasinoga o le tagata ese; ua latou le matatau foi ia te au, ua fetalai mai ai Ieova o ‘au.

E fanau mai e ia le tama tane, e te faaigoa foi ia te ia o Iesu; auā e faaola e ia lona nuu ai a latou agasala.

Ona o atu ai lea ia te ia o Ierusalema, ma Iutaia uma, atoa ma le itu uma o Ioritana; ua papatisoina foi i latou i Ioritana e ia, ua faaali atu e i latou a latou agasala.

Ua outou faalogo, na fai mai i e anamua, Aua e te fasioti tagata; ai se fasioti tagata, e nofo sala o ia i le faamasinoga. A o a‘u, ou te fai atu ia te outou, ai se ita fua i lona uso, e nofo sala o ia i le faamasinoga; ai se fai atu foi i lona uso, Raka, e nofo sala o ia i le fono; ai se fai atu foi, Le vale e, e nofo sala o ia i le afi o Kēna.

Ua outou faalogo, na fai mai i e anamua, Aua e te mulilua. A ou te fai atu a‘u ia te outou, ai se vaai atu i le fafine ina ia manao i ai, ua uma ona mulilua ma ia i lona loto. Afai foi e te tausuai i lou mata taumatau, ina sali ese ia, ma e lafoai; auā e lelei ina fano se tasi ou fāsi tino, a e leaga pe a lafoina lou tino uma i Kēna. Afai foi e te tausuai i lou lima taumatau, ina tutū ese ia, ma e lafoai; auā e lelei ina fano se tasi ou fāsi tino, a e leaga pe a lafoina lou tino uma i Kēna.

Sa fai mai foi, Ai se faatea i lana avā, ia avatu ia te ia le tusi alei. A ou te fai atu a‘u ia te outou, ai se faatea lana avā, a e lei mulilua ia, ua ia faamulilua ia te ia; ai se fai mana avā le ua faateaina, ua mulilua foi o ia.

O lenei, ia atoatoa ona lelei o la outou amio, e pei o lo outou Tamā o i le lagi e atoatoa ona lelei o ia.

Aua foi e te ta‘ita‘iina i matou i le tofotofoga; a ia e laveai ia i matou ai le leaga. Auā e ou le malo, ma le mana, atoa ma le viiga, e faavavau lava, Amene.

Auā afai tou te faamagaloina atu tagata i a latou agasala, e faamagaloina foi outou e lo outou Tamā o i le lagi. A e afai tou te le faamagaloina atu tagata i a latou agasala, e le faamagaloina foi e lo outou Tamā a outou agasala.

E faapea foi laau lelei taitasi ma fua mai i fua lelei; a o le laau leaga e fua mai i fua leaga. E le mafai i le laau lelei ona fua mai i fua leaga, e le mafai foi i le laau leaga ona fua mai i fua lelei. O laau uma e le fua mai i fua lelei, e taia ia ma lafoina i le afi. O lea foi tou te iloa ai i latou i o latou fua.

E le sao atu i le malo o le lagi i latou uma o e fai mai ia te au, Le Alii e, le Alii e; na o le na te faia le finagalo o lo‘u Tamā o i le lagi. E toatele latou te fai mai ia te au i lea aso, Le Alii e, le Alii e, matou te lei perofeta ane ea i lou igoa, o lou igoa foi na matou tulia ai temoni, o lou igoa foi na matou fai ai vavega e tele? Ona ou ta‘utino atu ai lea ia te i latou, Ou te lei iloa lava outou; ina o ese ia outou ia te au, o outou o e fai amio leaga.

O le mea lea ou te fai atu ai ia te outou, O agasala uma ma upu leaga e faamagaloina ia i tagata; a o le upu leaga i le Agaga, e le faamagaloina lea i tagata. Ai sē fai upu i le Atalii o le tagata, e faamagaloina lea; a o lē fai upu i le Agaga Paia, e le faamagaloina lea i le olaga nei po o lē atali.

A ou te fai atu ia te outou, o upu faatauvaa uma e faia e tagata, latou te talatala atu ai le tala i le aso faamasino. Auā o au upu e ta‘uamiotonuina ai oe, o au upu foi e faasalaina ai oe.

Auā e alu ae mai le loto o le manatu leaga, o le fasioti tagata, ole mulilua, o le faitaaga, o le gaoi, o le molimau pepelo, ma le upu leaga.

Auā se a le aoga i le tagata pe afai na te maua le lalolagi uma, a e māumau lona ola? se a foi se mea e avatu e le tagata e togiola a‘i lona ola?

ai se na te faatausuai se tasi o i latou nei e faatauvaa o e faatuatua ia te au, e lelei i lea tagata pe ana nonoa se maaolo tele i lona ua, ma faagotoina o ia i le moana loloto.

Afai foi e te tausuai i lou lima po o lou vae, ina tutū ese ia, ma e lafoai; e lelei ona e sao i le ola a ua lima mutu, pe pipili, a e leaga pe a lafoina oe i le afi e faavavau ma ou lima e lua ma ou vae e lua. Afai foi e te tausuai i lou mata, ina sali ese ia, ma e lafoai; e lelei ona e sao i le ola ma le mata e tasi, a e leaga pe a lafoina oe ma ou mata e lua i le afi o Kēna.

Afai e agaleaga mai lou uso ia te oe, ia e alu, ma aoai ia te ia tau lava o oulua ma ia. Afai e faalogo mai o ia ia te oe, ua e maua lou uso. A e afai e le faalogo mai o ia, lua te o ma se tasi, po o se toalua, ina ia faamaoni ai upu uma i le mau a le toalua, po o le toatolu. A le faalogo lava o ia ia te i laua, ia e ta‘u atu i le ekalesia; pe afai e le faalogo lava o ia i le ekalesia, ia avea o ia ia te oe, ia pei o le faapaupau, po o le telona.

Ona alu ane ai lea o Peteru ia te ia, ua faapea ane, Le Alii e, e agaleaga mai faafia ea lo‘u uso ia te au, ma ou faamagalo ia te ia? seia atu fitu ea? Ua fetalai atu Iesu ia te ia, Ou te le fai atu ia te oe, seia atu fitu, a ia fitugafulu ni fitu.

E faapea foi ona faia ia te outou e lo‘u Tamā o i le lagi, pe afai tou te le taitasi ma faamagalo ma o outou loto atoa i o outou uso pe a latou agaleaga mai.

Ou te fai atu foi ia te outou, Ai se faatea i lana avā, a o lei mulilua ia, ma fai avā i se tasi, ua mulilua ia; o se fai avā i le na faate‘aina, ua mulilua foi lea.

Faauta foi, ua sau le tasi tagata, ua faapea mai ia te ia, Le a‘oa‘o lelei e, se a se mea lelei ou te faia ou te maua ai le ola faavavau? Ona fetalai atu ai lea o ia ia te ia, Se a le mea e te ta‘ulelei mai ai a‘u? e leai se tasi e lelei, ua na o le toatasi, o le Atua lea. Afai e te fia oo i le ola, ia e tausi i poloaiga. Ua fai mai o ia ia te ia, Po o le fea? Ona faapea atu ai lea o Iesu, Aua e te fasioti tagata; aua e te mulilua; aua e te gaoi; aua e te molimau pepelo; ia e ava i lou tamā ma lou tinā; ma ia e alofa atu i lē lua te tuaoi, ia pei o oe lava ia te oe.

Oi talofa ia te outou tusiupu ma faresaio, tagata pepelo! ua outou faamamā i le tua o le ipu ma le tanoa, a o totonu ua tutumu i mea ua faoa ma le amio leaga.

E maalili foi loto o tagata e toatele, ona ua tupu tele o le amio leaga.

auā o lo‘u toto lenei, o le toto o le feagaiga fou, ua faamaligiina mo tagata e toatele e faamagalo a‘i agasala.

Ia outou mataala ma tatalo, ina ne‘i oo mai le faaosoosoga ia te outou; ua manao i ai le loto, a o le tino ua vaivai.

Sa faia e Ioane lana papatisoga i le vao, ma tala‘i atu ai le papatisoga o le salamo ina ia faamagaloina agasala. Ua o atu foi le nuu uma o Iutaia ia te ia, atoa ma tagata o Ierusalema, ma ua papatisoina i latou uma e ia i le vaitafe o Ioritana, ua faaali atu a latou agasala.

Ua oo mai ona po, ua latalata mai le malo o le Atua; ina salamo ia, ma talitonu i le tala lelei.

Ua fetalai atu foi o ia, O le mea e sau ai totonu o le tagata, o le mea lea e leaga ai le tagata; Auā e alu ae mai le loto o le tagata o le manatu leaga, o le mulilua, o le faitaaga, o le fasioti tagata, o le gaoi, o le manumanu, o le amio leaga, o le pepelo, o le matāitu, o le mataua, o upu leaga, o le faamaualuga, o le le mafaufau. O ia mea leaga uma e sau mai totonu, ma leaga ai le tagata.

A faatausuaiina foi oe e lou lima, ina tutū ese ia; e lelei ona e sao i le ola a ua e lima mutu, a e leaga ona lima lua, a e alu i Kēna, i le afi e le mafai ona tineia; o i ai e le mamate o latou ilo, e le tineia foi le afi.

A faatausuaiina foi oe e lau vae, ina tutū ese ia; e lelei ina e sao i le ola ua pipili, a e leaga ona lua ni vae, a e lafoina oe i Kēna, i le afi e le mafai ona tineia; o i ai e le mamate o latou ilo, e le tineia foi le afi.

A faatausuaiina foi oe e lou mata, ina sali ese ia; e lelei ina e sao i le malo o le Atua ma le mata e tasi, a e leaga ona lafoina oe ma ou mata e lua i le afi o Kēna; o i ai e le mamate o latou ilo, e le tineia foi le afi.

Ua maliu ane ia i le ala, ona momo‘e mai ai lea o le tasi, ua tootuli ia te ia, ma fesili mai ia te ia, Le a‘oa‘o lelei e, se a se mea ou te faia ina ia ou maua ai le ola e faavavau? A ua fetalai atu Iesu ia te ia, Se a le mea e te ta‘ua mai ai a‘u ua lelei? e leai se tasi e lelei, na o le toatasi lava, o le Atua lea. Ua e iloa tulafono, Aua e te mulilua; aua e te fasioti tagata; aua e te gaoi; aua e te molimau pepelo; aua e te agaleaga; ia e ava i lou tamā ma lou tinā.

A outou tutū ma tatalo, ai se mea tou te tiga ai i se tasi, ia outou faamagaloina; ina ia faamagaloina foi e lo outou Tamā o i le lagi a outou agasala.

Afai foi tou te le faamagaloina, e le faamagaloina e lo outou Tamā o i le lagi a outou agasala.

Ina mataala ia, ma tatalo, ne‘i oo mai le faaosoosoga ia te outou; ua manao i ai le loto, a o le tino ua vaivai.

e faailoa atu le olataga i lona nuu i le faamagaloina o a latou agasala,

Ona alu atu ai lea o ia i le itu uma o Ioritana, ua tala‘i atu le papatisoga o le salamo ina ia faamagaloina agasala.

Ua tali atu Iesu, ua faapea atu ia te i latou, O e malolo e le aoga i ai le fomai, na o e mamai. Ou te lei sau e valaau i e ua amiotonu, a o e ua agasala, ina ia latou salamo.

O lea foi ou te fai atu ai ia te oe, Ua faamagaloina ana agasala e tele, auā ua alofa tele mai o ia; a o le ua faamagaloina i ai se mea itiiti, ua itiiti foi lona alofa. Ua fetalai atu ia i le fafine, Ua faamagaloina au agasala. O e na taooto e aai ua latou faapea ifo i o latou loto, O ai foi lenei o lē faamagaloina agasala?

O e i le mea papa, o i latou ia, pe a faalogo i le upu, ua talia ma le fiafia; a e leai ni o latou aa, ua faaletumau lo latou faatuatua, ua oo atu i aso e faaosoosoina ai, ona o ese ai lea.

Ia e faamagalo ia te i matou i a matou agasala; auā foi matou te faamagaloina atu ia i latou uma o e agaleaga mai ia te i matou. Aua foi e te taitaiina i matou i le tofotofoga; a ia e laveai mai ia i matou ai le leaga.

Ou te fai atu ia te outou, e faapea foi ona tele o le olioli i le lagi i le tagata agasala e toatasi e salamo, a e itiiti i e amiotonu e toaivagafulu ma le toaiva e le tusa i ai le salamo.

Ou te fai atu ia te outou, ua faapea le olioli i luma o agelu a le Atua, ona o le tagata agasala e toatasi ua salamo.

A ua faapea atu ia, Lo‘u tamā e, Aperaamo, aua; a e afai e alu atu se tasi ia te i latou nai e ua oti, e salamo ai i latou. Ua fai ane o ia ia te ia, Pe afai latou te le faalogo ia Mose ma le au perofeta, e ui lava ina tu mai se tasi nai e ua oti, latou te le mafafai lava.

Ia outou ia te outou. Pe afai a e agaleaga mai lou uso ia te oe, ia e aoai atu ia te ia; pe afai e salamo ia, ia e faamagalo atu ia te ia. Pe afai e foi faafitu i le aso ona agaleaga mai o ia ia te oe, ma foi faafitu i le aso ona liliu mai ia te oe, ua faapea mai, Ua ou salamo; ia e faamagalo atu ia te ia.

O le telona foi, ua tu mamao atu, e le mafaia ona tepa ae ona mata i le lagi, a ua pōpō lona fatafata, ua faapea atu, Le Atua e, ia e alofa mai ia te au le tagata agasala.

Ua fesili mai foi ia te ia le tasi alii, ua faapea mai, Le a‘oa‘o lelei e, se a le mea ou te faia, ou te maua ai le ola e faavavau? A ua fetalai atu Iesu ia te ia, Se a le mea e te ta‘ulelei mai ai a‘u? e leai sē lelei, na o le toatasi, o le Atua lea. Ua e iloa poloaiga, Aua e te mulilua; aua e te fasioti; aua e te gaoi; aua e te molimau pepelo; ia e ava i lou tamā ma lou tinā.

ina ia tala‘iina foi le salamo ma le faamagaloina o agasala i nuu uma i lona igoa, e amata mai i Ierusalema.

O le taeao ua vaai atu ai Ioane ia Iesu o maliu mai ia te ia ona fai ane lea, Faauta i le Tamai mamoe a le Atua, na te aveesea le agasala a le lalolagi.

E pei ona siitia i luga e Mose o le gata i le vao, e ao ina faapea ona siitia i luga o le Atalii o le tagata; ina ia le fano le tasi e faatuatua ia te ia, a ia maua le ola e faavavau. Auā ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau. Auā e lei auina mai e le Atua lona Atalii i le lalolagi ina ia faasala i le lalolagi, a ia faaolaina le lalolagi ia te ia. O lē faatuatua ia te ia, e le faasalalaina o ia; a o le lē faatuatua, ua nofosala nei lava o ia, auā e lei faatuatua lava ia i le igoa o le Atalii e toatasi o le Atua. O le faasala foi lenei, ina ua oo mai le malamalama i le lalolagi, a o tagata, e sili lo latou manao i le pouliuli i lo latou manao i le malamalama; auā e leaga a latou amio. Auā o i latou uma o e fai mea leaga e ‘ino‘ino i latou i le malamalama, e le o mai foi i le malamalama, ne‘i faailoa a latou amio. A o lē ua faamaoni ana mea e fai, e sau lava o ia i le malamalama, ia faaalia ana amio ina ua tatau i le Atua.

Ua mavae ia mea, ua silafia o ia e Iesu i le malumalu, ona fetalai atu lea o ia ia te ia. Faauta, ua e malolo oe; aua e te toe agasala, ne‘i oo atu ia te oe se leaga e sili i lena.

ua faapea mai i latou ia te ia, Le a‘oa‘o e, na maua lenei fafine ina o mulilua ua mautinoa lava. Ua poloai Mose ia te i tatou i le tulafono ia fetogi i maa o e faapea; a o oe, pe se a se mea e te fetalai mai i ai? Ua latou faapea mai e tofotofo ia te ia, ina ia maua e i latou se mea e molia ai o ia; a ua punou Iesu, ma tusi i lona tamatamai lima i le eleele. A ua latou fesili atu pea lava ia te ia; ona toe nofo lea o ia i luga, ma faapea atu ia te i latou, O so outou e leai sana agasala, ia lua‘i togi se maa ia te ia. Ona toe punou lea o ia, ma tusi i le eleele. Ua latou faalogo i ai, ua iloa a latou agasala i o latou loto fuatia ifo; ona taitoatasi lea o i latou ma alu i fafo, e afua mai i toeaina, ua oo atu i e aupito iti. Ua tuua na o Iesu lava, ma le fafine o loo tu i totonu. Ua toe nofo i luga Iesu, ua silafia ua leai se tagata, ua na o le fafine lava, ona fetalai atu lea o ia ia te ia, Funa e, o ifea ea i latou e na molia oe? ua le faasala mai ea se tasi ia te oe? Ua fai mai o ia, Le Alii e, e leai lava se tasi. Ona fetalai atu lea o Iesu ia te ia, Ou te le faasala foi ia te oe; alu ia oe, aua e te toe agasala.

O lea ua ou fai atu ai ia te outou. E oti outou i a outou agasala; auā a outou le talitonu, o a‘u lenei o ia, ona oti lea o outou i a outou agasala.

Ua tali atu Iesu ia te i latou. E moni, e moni, oa te fai atu ia te outou, o sē faia le agasala, o le pologa lea o le agasala.

Ua tatou iloa e le faafofoga le Atua i e agasala; a e peitai a mata‘u se tasi i le Atua, ma fai lona finagalo, ona faafofoga mai lea o ia ia te ia.

O lē faaleaoga ia te au, ma ua le talia a‘u upu, o ia te ia le tasi na te faasalaina ia; o le upu ua ou tautala atu ai, e faasala lea ia te ia i le aso gataaga.

Afai tou te alofa mai ia te au, ia outou tausi mai i a‘u poloaiga.

A maliu mai foi o ia, na te faailoa atu i le lalolagi le agasala, ma le amiotonu, ma le faamasinoga. O le agasala, auā ua le faatuatua ia te au; o le amiotonu, auā ou te alu atu i lo‘u Tamā, tou te le toe vaai mai foi ia te au; o le faamasinoga, auā ua faamasinoina le alii o le lalolagi nei.

Ona fai atu lea o Peteru ia te i latou, Ina salamo ia, ma ia taitasi ma papatisoina outou uma i le suafa o Iesu Keriso, mo le faamagaloina o agasala; ona maua lea e outou o le mea foai fua mai, o le Agaga Paia lea.

O lenei, ina salamo ia outou ma outou liliu, ina ia sōloiesea a outou agasala, ina ia oo mai ai o tausaga e filemu ai mai luma o le Alii;

O outou, e ua maaa ua, ma ua le peritomeina o loto ma taliga, ua outou tetee atu pea lava i le Agaga Paia; pei o outou tamā ua faapea foi outou.

O lenei, ia e salamo i lou nei leaga, ma e faatoga atu i le Atua, pe mafaia ona faamagaloina le manatu o lou loto.

O lenei foi, se a le mea e te faatuai ai? Tulai ia, ma ia papatisoina oe, ma ia fufulueseina au agasala i lou valaau i le suafa o le Ali.

Ua faaalia mai foi le toasa o le Atua mai le lagi i le amio faalematau ma le amio leaga uma lava a tagata, o e taofi i le upu moni ma le amioletonu.

O lea foi na tuuina atu ai i latou e le Atua i le amio leaga, i le tu‘inanau o latou loto, latou te fefaaleagaina ai o latou lava tino; o i latou ia o e ua fesuiai le upu moni i le Atua ma le upu pepelo; ua latou matatau foi ma auauna i mea na faia, a ua tuua o ia na na faia, o ia o lē viia e faavavau. Amene. O le mea lea na tuuina atu ai i latou e le Atua i manao e masiasi ai; auā o latou fafine foi, ua latou fesuiai le tu tatau ma le tu e le tatau; e faapea foi tane, ua tuua e i latou le tu e tatau i le fafine, ina ua mu i lo latou femanaoai; o tane ua fefaiai i latou i mea e masiasi ai; ua tauia foi i latou i o latou lava tino e tusa ma lo latou sese.

Ua latou le loto foi e taofi i le mataupu i le Atua, o lea ua tuuina atu ai i latou e le Atua i le loto leaga, latou te fai ai mea e le tusa; o loo tutumu i latou i amio leaga uma lava, o le faitaaga, o le amio ulavale, o le manumanu, o le loto leaga; o loo tumu saisai i le mataua, o le fasioti tagata, o le misa, o le ‘ole‘olega, ma le faatāutala; o tuaupua i latou, o e fai tala leaga, o e ‘ino‘ino i le Atua, o e faasiasia, o e faasaua, o e faafiasilisili, o e fia fai togafiti i mea leaga, o e le anaana i mātua, o e valelea, o e tuumavaega, o e le lotoaiga, o e le faamolemoleina, ma ē faalealolofa; o i latou ia ua iloa le tonu mai le Atua, e tatau ai ona oti o e fai mea faapena, e le gata ona latou faia o ia mea, a e fiafia lava i latou i e ua faia.

O le mea lea ua e le mautali ai oe le tagata o lē faasalaina atu, auā o lou faasalaina atu i se tasi, ua e faasalaina ai oe e oe; auā o oe lē faasalaina atu, ua e faia ia lava mea.

a o le toatamai ma le toasa i e finau vale, ma e le gauai i le upu moni, a e gauai i le amio leaga; o le puapuaga ma le atuatuvale i tagata uma lava o e fai amio leaga, e muamua le Iutaia, atoa ma le Eleni;

a e faasalaina i latou i le aso e faamasinoina ai e le Atua e Iesu Keriso mea lilo a tagata, e tusa ma la‘u tala lelei.

O lenei, pe faapefea? ua matou silisili ea? E leai lava; auā ua uma ona molia e i tatou o Iutaia atoa ma Eleni, o loo nofo sala i latou uma lava; faapei ona tusia, E leai sē amiotonu, e leai lava se tasi, e leai se na te lagona, e leai sē saili i le Atua. Ua latou o ese uma lava, ua leaga faatasi i latou, e leai se ua amio lelei, ua leai lava se tasi.

E leai lava so latou mata‘u i le Atua. O lenei, ua tatou iloa, o mea uma ua fai mai e le tulafono, ua fai mai lava i e ua i ai le tulafono, ina ia punitia ai gutu uma lava, ma ia nofo sala le lalolagi uma i luma o le Atua.

Auā e le ta‘uamiotonuina se tagata e toatasi i ona luma i galuega o le tulafono; auā o le tulafono e iloa lelei ai le agasala.

Auā ua agasala tagata uma lava, ma ua le oo i le viiga mai le Atua; ua ta‘uamiotonuina fua i lona alofa tunoa i le togiola e a Keriso Iesu, o le ua tuuina mai i luma e le Atua, o le e finagalo mălie ai i le faatuatua i lona toto; ina ia faaalitinoina mai lana amiotonu i le le tauia o agasala ua mavae, i le faapalepale o le Atua;

Amuia e ua faamagaloina o latou solitulafono, ma ua ufitia a latou agasala.

a ua faaalitinoina mai e le Atua lona lava alofa ia te i tatou, ina ua maliu Keriso ma sui o i tatou, a o tatou agasala pea. O lenei, ua ta‘uamiotonuina nei i tatou i lona toto, e le faaolaina ea i tatou e ia ai le toasa i se a?

O lenei faapei ona oo mai o le agasala i le lalolagi i le tagata e toatasi, o le oti foi ona o le agasala, ona oo mai ai lea o le oti i tagata uma lava, auā ua agasala uma lava; (auā sa i le lalolagi le agasala ua oo i ona po o le tulafono; a e le ta‘usalaina pe a leai se tulafono;

Na faaopoopoina foi le tulafono ina ia faatele ai le agasala; peitai ua silisili lava le alofa tunoa, ina o faateleina le agasala. O lenei, e pei ona malo o le agasala e oo i le oti, faapea foi ona malo o le alofa tunoa e le amiotonu e oo i le ola e faavavau, i lo tatou Alii o Iesu Keriso.

O lenei, se a ea sa tatou upu? Tatou te nonofo pea ea i le agasala, ina ia faatele ai le alofa tunoa? Aua ne‘i faapea. O i tatou ua oti i la le agasala, pe faapefea ona tatou ola pea i ai? Tou te lei iloa ea, o i tatou nei uma na papatisoina ia Keriso Iesu, na papatisoina i tatou i lona maliu?

O lenei, ua tatanu faatasi i tatou ma ia i le papatisoga i lona maliu; ina ia tatou savavali i le ola toefuataiina, pei ona toe faatuina mai o Keriso nai e ua oti, i le mana o le Tamā. Auā afai ua faatasia i tatou i le faatusa i lona maliu, e faapea foi i tatou i lona toe tu mai. Ua tatou iloa lenei mea, na faasatauroina faatasi ma ia lo tatou tagata tuai, ina ia faaumatia ai le tino o le agasala, ina ia le toe faapologaina i tatou i le agasala. Auā o le ua oti ua tuusaunoa ia nai le agasala.

Auā o le ua oti ua tuusaunoa ia nai le agasala. Afai foi ua oti faatasi i tatou ma Keriso, ua tatou taofi, tatou te ola foi faatasi ma ia. Ua tatou iloa ua toe tu mai Keriso nai e ua oti, e le toe maliu lava o ia, e le toe pule le oti ia te ia. Auā o lona maliu, ua tasi lona maliu i la le agasala; a o lona soifua, e soifua lava ia i la le Atua. Ia faapea foi la outou taofi, ua outou oti i la le agasala, a ua outou ola lava i la le Atua i lo tatou Alii o Keriso Iesu.

O lenei, aua ne‘i malo le agasala i o outou tino auga vale, i lo outou gauai i ai i ona tu‘inanau; aua foi ne‘i tuuina atu o outou tino i le agasala e fai ma auupega a le amio leaga; a ia outou tuuina atu outou i le Atua, e pei o e ua ola nai e ua oti, ma ia tuuina atu outou tino i le Atua e fai ma auupega a le amiotonu. Auā e le pule le agasala ia te outou; auā ua outou le nonofo i le tulafono, a o le alofa tunoa.

O lenei, pe faapefea? tatou te agasala ea, ina ua tatou le nonofo i le tulafono, ao le alofa tunoa? Aua ne‘i faapea. Tou te lei iloa ea, o lē tou te tuuina atu i ai outou e fai ma auauna e anaana i ai, o ana auauna outou tou te anaana i ai, po o le agasala e oo ai le oti, po o le anaana e oo ai le amiotonu?

A ia faafetai i le Atua, e ui lava ina fai outou ma auauna a le agasala, a ua outou gauai nei ma le loto i le faaa‘oa‘o o le mataupu na tuuina atu ia te outou. Ua tuusaunoa foi outou nai le agasala, a ua fai ma auauna a le amiotonu. O upu a tagata ou te fai atu ai nei, ona o le vaivai o outou tino; auā faapei ona outou tuuina atu o outou tino e fai ma auauna a le amio leaga ma le ulavale, e ulavale ai; ia faapea foi ona tuuina atu nei o outou tino e fai ma auauna a le amiotonu, e iu i le faapaiaina.

Auā sa aunoa outou ma le amiotonu, ina o auauna outou i le agasala. Ni a foi ni fua na ia te outou anamua i na mea ua outou mamā ai i nei ona po? Auā o le iuga o ia mea o le oti lea.

A o lenei, ua tuusaunoa outou nai le agasala, ma ua fai ma auauna a le Atua, ua ia te outou ni a outou fua e oo ai i le faapaiaina o lona uiga foi o le ola e faavavau. Auā o le oti, o le totogi lea o le agasala; a o le ola e faavavau, o le mea foaifuaina mai lea e le Atua, i lo tatou Alii o Keriso Iesu.

Auā ua galulue manao leaga talu le tulafono, i o tatou tino, ina o i la le tino i tatou, e fua mai ai ni fua e oti ai; a o lenei, tatalaina i tatou nai le tulafono sa taofia ai i tatou, ina ua tatou oti, o lea ua tatou auauna ai i la le agaga fou, a e le i la le tusi tuai.

O lenei, se a ea sa tatou upu? O le agasala ea le tulafono? Aua ne‘i faapea. E moni lava, ana le se anoa le tulafono, po ua ou le iloa le agasala; auā ana le fai mai le tulafono, Aua e te tu‘inanau, po ua ou le iloa le tu‘inanau. A ua maua e le agasala se togafiti i le poloaiga, ona faatupu ai lea i totonu ia te au o tu‘inanau uma lava. Auā ua oti le agasala, a o leai se tulafono. Sa ou ola foi anamua, ina ua le oo mai le tulafono; a ua oo mai le poloaiga, ona toe ola mai ai lea o le agasala, ona ou oti lea. Ua iloa foi e a‘u o le poloaiga na saunia e ola ai, o lea ua oo mai ai le oti; auā na maua e le agasala le togafiti, ona faasese mai ai lea o ia ia te au e le poloaiga, o lea foi na fasioti ai o ia ia te au.

A ua maua e le agasala se togafiti i le poloaiga, ona faatupu ai lea i totonu ia te au o tu‘inanau uma lava. Auā ua oti le agasala, a o leai se tulafono.

Ia, ua avea ea le mea lelei ma mea e oti ai a‘u? Aua ne‘i faapea; a o le agasala, ina ia iloa mai o le agasala lea, o le na te faatupuina le oti ia te au i le mea lelei, ina ia iloa i le poloaiga, o le agasala, e matuā agasala lava.

Auā ua tatou iloa o loo i la le Agaga le tulafono, a o a‘u ou te i la le tino, ua faatauina atu a‘u e fai ma tagata o le agasala. Auā ou te le iloa mea ou te faia; auā o le mea ou te faia ou te le loto i ai, a o le mea ou te ‘ino‘ino i ai o lea ou te faia. Afai foi ou te faia le mea ou te loto i ai, ma te ‘au upu faatasi ma le tulafono, e lelei ia. O lenei, e le o a‘u e toe faia lea mea, a o le agasala o loo nofo i totonu ia te au. Auā ua ou iloa e leai se mea lelei ua nofo i totonu ia te au, o lo‘u tino lea; auā ua ia te au le loto atu, a ou te lei iloa ona fai o le mea lelei; auā ou te le faia o le mea lelei ou te loto i ai, a o le mea leaga ou te le loto i ai, o le mea lea ou te faia. Afai foi ou te faia le mea ou te le loto i ai, ua le o a‘u e toe faia, a o le agasala o loo nofo i totonu ia te au.

O lenei, ua ou iloa peisai se tulafono ua ia te au; pe a ou loto atu i le lelei e fai, ua ia te au le leaga. Auā ou te fiafia i le tulafono a le Atua i le tagata i totonu. A ua ou iloa le tulafono ese i o‘u tino, o loo tau le taua i le tulafono a lo‘u mafaufau, ua fai foi a‘u ma tagata o taua i le tulafono a le agasala o loo i o‘u tino. Aue o a‘u le tagata malaia! o ai sē laveai ia te au ai le tino o lenei oti? Ou te faafetai lava i le Atua, auā o Iesu Keriso lo tatou Alii. O lenei foi, o a‘u nei lava ou te auauna i le tulafono a le Atua i lo‘u mafaufau, a o le tulafono a le agasala i lo‘u tino.

O lenei, ua leai se faasala i e o ia Keriso Iesu, o e le savavali i la le tino, a e i la le Agaga; auā o le tulafono a le Agaga o le ola ua ia Keriso Iesu ua tuusaunoa mai lea ia te au nai le tulafono a le agasala ma le oti. Auā o le mea na le mafaia i le tulafono, ina ua vaivai ia ona o le tino, ua faia lea e le Atua i lona auina mai o lona lava Alo, ua tino tagata agasala, o le taulaga foi mo agasala, na ia faasalaina ai le agasala i le tino; ina ia atoatoa ai le amiotonu i la le tulafono ia i tatou, o e le savavali i la le tino, a e i la le Agaga. Auā o e i la le tino e loto atu i latou i mea a le tino; a o e i la le Agaga e loto atu i mea a le Agaga. Auā o le loto i la le tino o le oti lea; a o le loto i la le Agaga o le ola lea ma le manuia; auā o le loto i la le tino o le ita lea i le Atua; auā e le usiusi tai i le tulafono a le Atua, e le mafai foi i ai. O i latou foi o i la le tino, e le mafai ona fiafia i ai le Atua.

O lenei, le au uso e, ua ia te i tatou e taui atu, a e le o le tino, tatou te amio ai i la le tino; auā afai tou te amio i la le tino, e oti ai outou; a e afai e fasiotia e outou amioga a le tino e le Agaga, tou te ola ai.

o la‘u foi lenei feagaiga ma i latou, pe a aveeseina e a‘u a latou agasala.

Aua ne‘i faatagā alofa; ia ‘ino‘ino i le leaga, ia pipii i le lelei.

Auā o upu ia, Aua le mulilua, Aua le fasioti tagata, Aua le gaoi, aua le molimau pepelo, Aua le tu‘inanau; afai foi ua toe se isi poloaiga, o loo ua aofia lava i lenei upu, Ia e alofa atu i lē lua te tuaoi, ia pei o oe lava ia te oe.

Ia tatou savavali ma le matagofie e tusa i le ao; aua le poula ma le onā, aua le faitaaga ma le matāitu, aua le femisai ma le mataua. A ia outou oofu i le Alii o Iesu Keriso; aua foi le sauniuni mo le tino, e oo ai ona tu‘inanau.

O oe na, se a le mea e te faasala ai i lou uso? o oe na foi, pe se a le mea e te ta‘ufaatauvaaina ai lou uso? auā tatou te laulaututū uma lava i luma o le nofoa faamasino o Keriso.

A o lē masalosalo, ua faasalaina ia pe afai e ‘ai, auā e le o lana taofi lea; o mea uma lava e le ala mai i le taofi, o le agasala lea.

Ou te aioi atu foi ia te outou, le au uso e, ia outou vaavaai i e faatupu fevaevaeaiga, ma mea e tausuai ai; o mea ia e le tusa ma le mataupu ua a‘oa‘oina ai outou; ia outou liliu ese foi ia te i latou. Auā o e faapea, e le auauna i latou i lo tatou Alii o Iesu Keriso, a o latou lava manava; ma latou faasese i loto o tagata ua le manatu leaga, i lo latou faaneenee ma alofa faavivii.

Tou te le o iloa ea o le malumalu outou o le Atua, o loo nofo foi le Agaga o le Atua i totonu ia te outou? Afai e faaleaga e se tasi le malumalu o le Atua, e faaleagaina lena tagata e le Atua; auā e paia le malumalu o le Atua, o outou lava ia.

Ua ou tusi atu ia te outou i la‘u tusi, aua tou te feoai ma e faitaaga. A e le matuā faapea foi i e faitaaga i lenei lalolagi, atoa ma e matapeapea, ma e fao mea, ma e ifo i tupua; ana faapea, e ao ina outou o ese atu i le lalolagi. A o lenei, ua ou tusi atu ia te outou, ai se tasi ua ta‘uusoina a e faitaaga, pe matapeapea, pe ifo i tupua, pe agatele, pe onā, pe fao mea; aua lava ne‘i tou feoai, aua foi tou te aai faatasi ma le o faapea. Auā o ia te au ea ona faamasino i e ua i tua? Tou te le faamasino ea i e ua i loto pa? A o e i tua, e faamasinoina i latou e le Atua. O lenei, ia faateaeseina e outou lena tagata amio leaga ia te outou.

Tou te le iloa ea, o e amio leaga e le fai mo latou tofi le malo o le Atua? Aua ne‘i faaseseina outou; o e faitaaga, ma e ifo i tupua, ma e mulilulua, ma e tauātane, ma e faasotoma, ma e gaoi, ma e matapeapea, ma e onā, ma e agatele, ma e fao mea, e le fai mo latou tofi le malo o le Atua. Sa faapea foi nisi o outou; a ua taeele outou, a ua faapaiaina outou, a ua ta‘uamiotonuina outou i le suafa o le Alii o Iesu, i le Agaga foi o lo tatou Atua.

Ina sosola ese ia outou i le faitaaga. Ua auliuligia le tino i agasala uma e faia e tagata; a o lē faitaaga, e agasala ia i lona lava tino. Tou te le iloa ea, o lo outou tino o le malumalu lea o le Agaga Paia ua i totonu ia te outou, o loo ua ia te outou mai le Atua, e le aiā foi outou ia te outou? Auā ua faatauina outou i le tau; o lenei, ia outou vivii atu i le Atua i o outou tino ma ou outou agaga, o mea a le Atua ia.

Aua foi tatou te faitaaga, pei ona faitaaga o isi o i latou, ma fano ai i le aso e tasi e lua sefulu o afe ma afe e tolu. Aua foi tatou te faaonoono ia Keriso, pei ona faaonoono o isi o i latou, ma fano ai i gata. Aua foi tou te muimui, pei ona muimui o isi o i latou, ma fano ai i le na te olopalaina. Na oo na mea uma ia te i latou e fai ma faailoga; ua tusia foi e fai ma apoapoaiga mo i tatou o e ua aulia mai ai tausaga e gata ai. O lenei, o lē manatu o loo o tu ia, ina faaeteete ia ne‘i paū.

Ua le maua outou e se tofotofoga e ese i lo tagata; a ua faamaoni le Atua, o le na te le tuuina atu outou i le tofotofoga e sili i se mea ua outou lavatia, a e sauni foi faatasi ma le tofotofoga se mea e sao ai, ina ia outou lavā oono.

Auā na ou tuuina atu ia te outou mea muamua o mea foi ia na ou maua foi e a‘u; na maliu Keriso ma sui o a tatou agasala, pei ona tusia; na tanu foi o ia, ma toe tu mai i le aso tolu, pei o upu ua i Tusi.

Aua ne‘i faaseseina outou, O le feoai ma e amio leaga e leaga ai amio lelei. Ina ala mai ia i le amiotonu, a e aua ne‘i agasala; auā ua pouliuli nisi i la le Atua; ou te faapea atu ia te outou e faamā ia te outou.

O le tui o le oti, o le agasala lea, o le malosi foi o le agasala o le tulafono lea;

Auā tatou te tutū atu uma lava i luma o le nofoa faamasino o Keriso e tatau ai; ina ia taitasi ma talitali i mea na faia i le tino, e pei o mea na faia, pe lelei pe leaga.

Auā o ia na le iloa le agasala, na faia lea e ia ma agasala, o le sui o i tatou; ina ia avea i tatou ma amiotonu a le Atua ia te ia.

O lenei, le au pele e, ona ua ia te i tatou o ia upu ua folafolaina mai, ia tatou faamamā ia te i tatou i mea uma e leaga ai le tino atoa ma le agaga, ia faaatoatoina lo outou faapaiaina i le mata‘u i le Atua.

Auā ou te fefe ne‘i iloa outou e a‘u, e le faapei ona ou loto i ai, pe a ou alu atu, ne‘i iloa foi a‘u e outou, e le pei ona outou loto i ai; ne‘i ia te outou o misa, o faamatataua, o faalotoa, o finau vale, o upuesega, o tuaupua, o loto faafefeteina, o faaletaupulea; ina ne‘i faamaualaloina a‘u e lo‘u Atua ona o outou, i lo‘u toe alu atu ia te outou; ona ou faanoanoa lea i nisi e toatele o e na agasala anamua, ma ua le salamo i le amio leaga, ma le faitaaga, ma le matāitu na latou faia.

A e peitai ua punitia e le Tusi tagata uma lava i le agasala, ina ia foaiina mai i e faatuatua le mea na folafolaina e maua i le faatuatua ia Iesu Keriso.

Ou te fai atu, ia outou savavali i la le Agaga, ona le faia lea e outou o le tu‘inanau o le tino. Auā o le tino ua tu‘inanau lea e tetee atu i le Agaga, ua tu‘inanau foi le Agaga e tetee atu i le tino; ua feteenai foi ia mea, o le mea lea tou te le fai ai mea tou te loto i ai. A e afai e ta‘ita‘iina outou e le Agaga, ua le nonofo outou i le tulafono.

Ua iloa tino foi galuega a le tino, o mea faapenei; o le mulilua, o le faitaaga, o le amio leaga, o le matāitu, o le ifo i tupua, o le fai togafiti faataulāitu, o le feitagai, o le femisai, o le losilosi vale, o le lotoa, o le finau vale, o le fevaevaeaiga, o maseiga, o le mataua, o le fasioti tagata, o le onaga, o le poula, ma mea faapena; ou te muai ta‘u atu nei ia te outou, pei ona ou fai atu anamua, o e faia mea faapena, e le fai le malo o le Atua mo latou tofi.

A o e o ia Keriso, ua faasatauroina e i latou le tino, ma ona manao, ma ona tu‘inanau. Afai ua tatou ola i le Agaga, ia tatou savavali foi i le Agaga.

Le au uso e, afai e maua se tagata i se tasi agasala, o outou o i la le Agaga ia outou faafoi mai le ua faapeaina ma le loto o le agamalu, ma ia faaeteete oe ina ne‘i faaosoosoina foi oe.

Aua ne‘i faaseseina outou, e le ulagia le Atua auā o le mea e luluina e le tagata, o le mea lava lea e seleseleina mai ai e ia; o sē lulu i la lona tino, e selesele mai ai e ia i la le tino le mea e pala; a o sē lulu i la le Agaga, e selesele mai ai e ia i la le Agaga le ola faavavau.

o ia foi ua tatou maua ai le togiola i lona toto, o le faamagaloina o agasala, e tusa ma le oloa faulai o lona alofa tunoa,

O outoufoi lava o e na oti i amio leaga ma agasala, na outou savavali ai anamua, e tusa ma le tu a lenei lalolagi, e tusa ma le ta‘ita‘i o le au faipule i le va nimonimo, o le agaga lea o loo matuā galue nei i e ua faalogogata; o i tatou foi, na amio faatasi i tatou uma lava ma i latou anamua, ina ua tatou nonofo i tu‘inanau o tatou tino, na faia foi e i tatou o mea na loto i ai le tino atoa ma le mafaufau, na fanau mai foi i tatou o le fanauga a le toasa, faapei o isi atoa foi.

O lenei, ou te fai atu ia te outou, ma ta‘utino atu lenei mea i luma o le Alii, aua tou te toe savavali faapei o isi nuu faapaupau uma, o e savavali i le valea o latou loto, o loo faapouliuligia o latou mafaufau, o liliueseina i latou i le ola o i le Atua, ona o le valea ua ia i latou, ona o le maaa o latou loto; ua latou le lagona se mea, ua tuuina atu i latou ia i latou i le matāitu e fai mea leaga uma lava ma le tu‘inanau i ai.

ina ia outou to ese le tagata tuai o loo ua leaga, e tusa ma le amioga faaanamua, e tusa ma tu‘inanau e faasese ai; a ia toe fuataiina manao o outou loto, ma ia oofu outou i le tagata fou ua faia e foliga i le Atua, ile amiotonu ma le amio lelei e faamaoni.

Ia te‘a ma outou upu faafiufiu uma lava, ma le lotoa, ma le ita, ma le leo tele, ma le upu leaga, atoa ma le loto leaga uma lava.

a o le faitaaga, ma mea leaga uma, ma le manumanu, aua ne‘i ta‘ua lava ia te outou, e pei ona tatau i e ua paia. O le anovale foi, ma upu faatauvaa, ma le faaulaula, o mea ia e le tatau; a o le faafetai e lelei lava lea. Auā ua outou iloa lenei mea, ai sē faitaaga, po o sē fai mea leaga, po o sē manumanu, (o le ifo i tupua lava lea,) e le maua e i latou se tofi i le malo o Keriso, o le Atua lea. Aua ne‘i faaseseina outou e se tasi i upu faatauvaa; auā o mea ia e oo mai ai le toasa o le Atua i e faalogogata.

Aua foi tou te amio faatasi ma galuega le aoga a le pouliuli, a e lelei ona outou aoai atu. Auā o mea ua faia faalilolilo e i latou, ua matagā lava ona tautalatala i ai.

Aua foi ne‘i onā outou i le uaina, o le mea e ulavale ai; a ia faatumuina outou i le Agaga.

O outou foi sa tagata ese anamua, sa fai o ia mo outou fili i o outou loto i le amio leaga; a o lenei, ua lelei outou ma ia i lona tino tagata, ina ua maliu, ina ia tuuina atu outou e ia, o le au paia, o e le mata‘uleagaina, ua leai foi se mea e faasalaina ai i ona lava luma;

O lenei, ia outou fasiotia o outou itu tino o i le lalolagi, o le faitaaga, o le amio leaga, o le faamatāitu, o le tu‘inanau leaga, ma le matapeapea, (o le ifo i tupua lava lea); o mea ia e oo mai ai le toasa o le Atua i e le faalogo; o outou foi na outou savavali ai foi anamua, a o outou nonofo ai; a o ona po nei ia tuu ese ai e outou lava o nei mea uma, o le ita, o le lotoa, o le loto leaga, o le upu leaga, ma le upu matagā ai o outou gutu. Aua le fetaupelopeloai, ina ua toeseina e outou le tagata tuai atoa ma ana amio,

O lē amioletonu e maua e ia le taui o lana amioletonu; e le faailogaina foi se tasi.

O le finagalo foi lenei o le Atua, ia faapaiaina outou, ina ia faamamao outou ma le faitaaga; ia taitasi outou ma iloa ona fai o lana lava ipu ma le faapaiaina ma le ta‘uleleia,

Auā e lei valaauina i tatou e le Atua ia amio leaga, a ia faapaiaina lava. O lenei, o lē faaleaoga mai, ua ia le faaleaoga i tagata, a o le Atua le ua foai mai lona Agaga Paia ia te i matou.

Ia tofotofo i mea uma lava, ia taofi mau i le mea lelei. Ia mamao outou ma mea leaga eseese uma lava. Ia atoatoa ona faapaiaina o outou e le Atua lava e ona le manuia; ia tausia lava lo outou agaga atoa uma, i le ma le loto, atoa ma le tino, ia le mata‘uleagaina, i le afio mai o lo tatou Alii o Iesu Keriso.

na te taui ma sui i e ua le iloa le Atua, ma ua le anaana i le tala lelei a lo tatou Alii o Iesu Keriso;

o loo iloa lenei mea, ua le faatuina mai le tulafono mo le ua amiotonu, a o e faaletaupulea ma e soli i tulafono, o e faalematau ma e agasala, o e amio leaga ma e ulavavale, o e fasi tamā ma e fasi tinā, o e fasioti tagata, o e faitaaga, o e faasotoma, o e gaoi tagata, o e tala pepelo, o e tauto pepelo; afai foi o i ai se toe mea e faatu‘iese ai i le mataupu e ola ai,

O le upu moni lenei, e tatau lava ona matuā talia, na maliu mai Keriso Iesu i le lalolagi, na te faaolaina o e agasala; ua sili musa a‘u nei ia i latou. A o lenei lava le mea na alofaina ai a‘u, ina ia muamua ona faaalia mai ia te au e Iesu Keriso le onosai tele lava, ia avea a‘u ma faata‘ita‘i o e a faatuauta ia te ia amuli, e maua ai le ola e faavavau.

Ia aoai atu i e agasala i luma o tagata uma, ina ia matatau ai nisi uma lava.

E iloa tino agasala a isi tagata, e muamua atu i le faamasinoga; a o agasala a isi e mulimuli atu.

A o e manao i le fia mauoa, e maua i latou i le faaosoosoga, ma le mailei, ma tu‘inanau e tele e valea ai ma leaga ai, o mea ia e goto ai tagata i le fanoga ma le malaia. Auā o le manao i tupe, o le pogai lea o mea leaga uma lava; ua mananao tele i ai nisi, ona sese ai lava lea o i latou i le upu o le faatuatua, ua tu‘ia ai ua ati i latou e i latou i puapuaga e tele.

auā e avea tagata ma e alolofa i latou ia i latou, o e mananao i tupe, o e loto vii, o e faamaualuga, o e upu leaga, o e le faalogo i mātua, o e le faafetai, o e amio leaga, o e le lotoaiga, o e tuumavaega, o e faatuaupua, o e le taofi manao o le tino, o e faasaua, o e le alolofa i tagata amio lelei, o e faalata, o e soona fai, o e ua faafefeteina, o e ua tele le manao i mea faafiafia a e leai se manao i le Atua; o e ua peiseai ua amio Atua, a o le mana ua i lea mea ua latou teena; ia e ‘alo ese lava i tagata faapena. E i ai foi nisi o e ulu atu i fale, ma ave faatagataotaua fafine valelea, ua mafatia i agasala, o e ua ta‘ita‘ieseina e tu‘inanau eseese, ua a‘oa‘oina e le aunoa, a e le āu mafai ona oo ina iloa lelei o le upu moni.

A o tagata amio leaga ma e taupelopelo, e alualu pea lava lo latou leaga, o loo faasese atu, ua faaseseina foi i latou.

Ua latou ta‘u ane ua latou iloa le Atua, a e faafiti ia te ia i a latou galuega, o inosia i latou ma faalogogata, latou te le faamaoni foi i se galuega lelei e tasi.

Auā o i tatou foi, sa vālea i tatou anamua, ma faalogogata, ma faaseseina, sa auauna i tu‘inanau ma mea eseese e fiafia ai, sa nonofo ma le loto leaga ma le mataua, sa inosia ma feitagai.

Auā na tigaina o ia ina o tofotofoina, o le mea lea ua mafai ai e ia ona fesoasoani i e ua tofotofoina.

a ia outou fefaamafanafanai i lea aso ma lea aso, manū o ta‘ua o le aso nei, ina ne‘i loto fatu so outou i le pepelo o le agasala;

Manū o fai mai, O le aso nei afai tou te faalogo ai i lona siufofoga, aua tou te faamaaa i o outou loto, pei o le faaonoono.

Auā e le ia te i tatou se faitaulaga sili e le mafaia ona tiga alofa faatasi ma i tatou i o tatou vaivai, a ua faaosoosoina o ia i mea uma pei o i tatou, a ua leai se agasala ia te ia.

Auā o le taulaga e tasi ua faaatoatoaina ai e ia e faavavau o e ua faapaiaina. O loo molimau mai ai foi le Agaga Paia ia i tatou; auā ua uma ona muai fetalai mai o ia, O le feagaiga lava lenei ou te faia ma i latou pe a mavae atu ia aso, o loo fetalai mai ai le Alii, ou te tuuina atu a‘u tulafono i o latou loto, ma ou tusi ai i o latou mafaufau; o a latou agasala foi ma o latou solitulafono ou te le toe manatua lava. O lenei, o le mea o i ai le faamagaloina o ia mea, ua leai se toe taulaga mo le agasala.

Auā afai tatou te agasala ma le loto i ai pe a uma ona talia o le malamalama o le upu moni, ua le toe lava se taulaga mo agasala, na o le faatali ma le mata‘u tele i le faasala, ma le toasa e mumū e susunu ai e o tetee atu. O le na faaleaogaina le tulafono a Mose na oti o ia i le mau a le toalua po o le toatolu, ua le alofagia; pe ni a fa outou i le sili o le mamafa o le taui e ta‘utatauina ai le ua soli le Alo o le Atua, ma ua ta‘ulepaiaina e ia le toto o le feagaiga na faapaiaina ai o ia, ma ua upu leaga i le Agaga o le alofa tunoa? Auā ua tatou iloa le na fetalaia mai, O loo faapea mai le Alii, O ia te au le taui ma sui, ou te taui atu. I le ma lea, E faamasino e le Alii lona lava nuu. O le mea e mata‘u tele ai ona maua e aao o le Atua soifua.

O lenei, o i tatou foi, o loo ua vagavagaia e le faapotopotoga o e matamata mai e faapea ona toatele, ina tatou tuu ese ia o mea mamafa uma, atoa ma le agasala e faalavelavegofie ai i tatou, ia tatou taufetuli ma le onosai i le ala tanu o i o tatou luma,

Ua oo i nei ona po ua outou le tetee atu e oo i le faasasaaina o outou toto i lo outou tetee atu i le agasala;

Ia outou tausisi i le filemu ma tagata uma lava, i le ma le amio lelei, a aunoa ma lea, e leai se tasi na te iloa atu le Alii.

Ia lelei le faiavā i tagata uma, o le moega foi ia leai sona leaga; e faasalaina e le Atua o e faitaaga ma e mulilulua.

Amuia le tagata o lē onosai i le faaosoosoga; auā a uma ona tofotofoina e maua e ia le pale o le ola, ua folafolaina mai e le Alii i e alolofa atu ia te ia. A faaosoosoina se tasi, aua le faapea, Ua faaosoosoina a‘u mai le Atua; auā e le mafai ona faaosoosoina o le Atua i mea leaga, e le faaosooso atu foi o ia i se tasi; a ua taitasi ma faaosoosoina, pe a tosina ma maileia i lona lava tu‘inanau; pe a to le tu‘inanau ona fanau mai ai lea o le agasala; a matua le agasala ona fanaua mai ai lea o le oti. O‘u uso pele e, aua ne‘i sese outou;

o lea foi ia lafoai ai mea eleelea uma ma le leaga e silisili, ia talia ma le faamaulalo le upu ua totōina, o lea e mafai ai ona faaolaina o outou agaga. A ia fai outou ma e anaana i le upu, a e aua le na ona faalogologo i ai, o faaseseina ai outou e outou.

auā o sē tausi le tulafono uma, a e agasala i se mea e tasi, ua nofo sala ia i mea uma.

Maifea taua ma misa o ia te outou? E le o lenei ea, mai o outou manao leaga o loo tau i o outou tino uma? Ua outou tu‘inanau, a e lei maua; ua outou fasioti ma outou losilosi, a e tou te le mafai ona maua; ua outou femisai ma fai taua, a e lei maua, ina ua outou le ole atu;

O outou tane mulilulua e, ma fafine mulilulua e, tou te le iloa ea o le fefaauoai ma le lalolagi o le ita lea i le Atua? O lenei, o sē fia uo ma le lalolagi, ua avea o ia ma ita i le Atua. Fa te outou ea ua fai mai fua le Tusi. O le loto o loo nofo i totonu ia te outou ua naunau ia i le mataua? A ua foai mai e ia le alofa tunoa e sili; o lea ua faapea mai ai, E tetee atu le Atua i e faamaualuga, a e foai mai le alofa tunoa i e faamaulalo. O le mea lea ia outou gauai ai i le Atua; ia outou tetee atu i le tiapolo, ona sola ese ai lea o ia ia te outou. Ia outou faalatalata atu i le Atua, ona faalatalata mai lea o ia ia te outou. Tagata agasala e, ina fafano ia o outou lima, o outou e faalotolotolua e, ina faamamā ia o outou loto; ia puapuagatia outou, ma ia faavauvau, ma fetagisi; ia liua o outou ‘ata‘ata ma faavauvau, ma lo outou fiafia i le faanoanoa; ina faamaulalo ia i luma o le Alii, ona faamaualugaina lea o outou e ia.

Le au uso e, ana tou te fefaiupuai; o lē fai upu i lona uso, ma faamasino i lona uso, ua fai upu o ia i le tulafono, ma faamasino i le tulafono; afai foi ua e faamasino i le tulafono, e te le se anaana i le tulafono, a o le faamasino i ai. E toatasi lava lē fai tulafono na te mafaia ona faaola ma fasioti; o ai ea oe e te faamasino i se tasi?

O lenei, o le ua iloa e fai le mea lelei, a e le faia, o le agasala lea ia te ia.

ia iloa e ia, o lē faafoi mai le tagata agasala nai lona ala sese, e faaolaina e ia le agaga nai le oti, e ufiufi foi e ia le vao agasala.

Ia pei o fanau gauai, aua ne‘i faatusaina outou e outou i o outou tu‘inanau tuai, a o vālea outou; a e pei ona paia o ia na valaauina outou, ia faapea foi outou ona paia i a outou amio uma; auā ua tusia, Ia paia outou, auā o a‘u nei e paia lava a‘u.

O lenei, ia tuueseina e outou le loto leaga uma lava, ma le faa‘ole‘ole uma, ma le taupelopelo, ma le mataua, ma tautalatalaga leaga uma lava;

Le au pele e, ou te aioi atu ia te outou o tagata ese ma e āumau, ia mamao outou ma tu‘inanau o le tino, o mea ia e tau ma le agaga.

O le na aveina e ia lava a tatou agasala i lona lava tino i luga i le laau, ina ia tete‘a outou ma agasala, tatou te nofo ai i le amiotonu, O ona faalavalava ua malolo ai i tatou. Auā o outou sa faapei o mamoe na sē, a o lenei ua toe liliu mai outou i Le na te leoleoina ma tausia o outou agaga.

Auā o Keriso foi na tigaina o ia faatasi mo agasala, o le amiotonu o le sui o le amioletonu, ina ia ta‘ita‘iina e ia o i tatou i le Atua; na fasiotia o ia i le tino, a ua faaolaina mai i le Agaga;

O lenei, ua tigaina Keriso i le tino o le sui o i tatou, ia fai ai ma auupega ia te outou foi lea lava loto, auā o le ua tiga i le tino, ua tuu e ia le agasala; ina ia le toe usiusitai o ia i tu‘inanau o tagata, i ona tausaga ua totoe i le tino, a ia usiusitai i le finagalo o le Atua. Auā ia gata ia i aso ua mavae o le olaga nei ona fai ai e i tatou o le manao o e faapaupau, sa savavali i le faamatāitu ma tu‘inanau, ma le inu tele i uaina, ma poula, ma inugāava, ma le ifo i tupua e soli ai tulafono.

O le matapeapea foi e fai ai outou e i latou ma mea faatau i a latou upu pepelo; e le tuai mai ia te i latou le sala na fetalaia mai talu anamua, o lo latou malaia foi e le moe lea. Auā afai na le faasaoina e le Atua le au agelu o e na agasala, a ua na tuuina atu i latou i maea uamea o le pogisa i seoli, ina ia taofia i latou e oo i le faamasinoga;

ua silafia e le Alii se mea e laveai mai ai i e amio Atua ai le faaosoosoga, a e taofi i e amio leaga e oo i le aso faamasino ina ia faasalaina i latou; a e sili lava i latou o e mulimuli atu i la le tino i le tu‘inanau i le fia ulavale, ma latou ta‘ufaatauvaa i alii; ua faamalosi, ua finau vale, ma ua le fefe ona upu leaga i e ua mamalu.

ua tutumu o latou mata i le fafine mulilua, e le mafai foi ona mapu i le agasala, latou te maileia tagata ua le faatumauina, o ia te i latou le loto ua masani i le matapeapea, o tagata ua faafanoina;

A ua taunuu ia te i latou le upu faataoto moni, Ua toe foi le ulī i lona lava puaiga; i le ma lea, O le puaa na faataeleina ua toe foi ia e taafili i le palapala.

ua muamua, ona iloa o lenei mea, e o mai i ona aso e gata ai o e tauemu, latou te savavali e tusa ma o latou lava tu‘inanau;

Afa tatou te fai atu, ua tatou mafuta faatasi ma ia, a e savavali i tatou i le pouliuli, ua tatou pepelo ai, ua tatou le faia foi le upu moni. A e afai tatou te savavali i le malamalama, faapei ona i ai o ia i le malamalama, ona tatou mafuta faatasi ai lea o le tasi ma le tasi, o le toto foi o Iesu Keriso lona Alo e faamamāina ai i tatou i agasala uma lava. Afai tatou te faapea, E leai sa tatou agasala, ua sese ai i tatou ia i tatou, e le o i totonu ia te i tatou le upu moni; a e afai tatou te faaali a tatou agasala, e faamaoni o ia, ma le amiotonu e faamagalo ai a tatou agasala, ma faamamā mai ia i tatou i amioletonu uma lava. Pe afai tatou te faapea, Tatou te lei agasala, ua tatou fai ai o ia ma pepelo, e le o i totonu ia te i tatou lana afioga.

Si a‘u fanau e, ou te tusi atu nei mea ia te outou, ina ne‘i agasala outou; pe afai foi e agasala se tasi, o ia te i tatou le fautua i luma o le Tamā, o Iesu Keriso lea, o lē amiotonu. O le togiola foi o ia mo a tatou agasala, e le gata foi i a tatou, a e atoa foi ma agasala a le lalolagi uma lava. O le mea foi lea tatou te iloa ai ua tatou iloa o ia, pe afai tatou te tausi i ana poloaiga. O sē faapea, Ua ou iloa o ia, a e le tausi e ia i ana poloaiga, o le pepelo lava lea, e le o i totonu ia te ia le upu moni. A o lē tausi i lana afioga, e moni, ua atoatoa le alofa i le Atua i totonu ia te ia. O le mea lea ua tatou iloa ai o i totonu ia te ia i tatou. O lē faapea o loo tumau ia i totonu ia te ia, e tatau ona savali o lena tagata faapei ona savali o ia.

A o lē ita i lona uso, o i le pouliuli o ia, o loo savali foi i le pouliuli, e le iloa foi e ia le mea e alu i ai, auā ua faatauasoina ona mata e le pouliuli.

Le fanau e, ou te tusi atu ia te outou, auā ua faamagaloina a outou agasala ona o lona suafa.

Aua tou te mananao i le lalolagi, po o mea o i ai i le lalolagi. Pe afai e manao se tasi i le lalolagi, e le o ia te ia le alofa i le Tamā. Auā o mea uma lava o i le lalolagi, o le tu‘inanau o le tino, ma le tu‘inanau o mata, ma le faalialia o lenei olaga, e le mai le Tamā ia, a e mai le lalolagi. O le a mavae atu foi le lalolagi, atoa ma lona tu‘inanau, a o lē fai le finagalo o le Atua, e tumau lea e faavavau.

O i latou uma lava o e fai le agasala, ua latou soli foi i tulafono; o le agasala o le solitulafono lava lea. Ua outou iloa foi na faaalia o ia ina ia aveeseina e ia a tatou agasala; e le o ia te ia foi se agasala. E le agasala se tasi o e tumau ia te ia; o sē agasala ua le vaai o ia ia te ia, ua le iloa foi o ia e ia. Le fanau e, aua ne‘i faasese se tasi ia te outou; o lē fai le amiotonu, o le amiotonu lea, faapei ona amiotonu o ia. O lē fai le agasala, mai le tiapolo lava ia; auā ua agasala le tiapolo talu le amataga. O le mea lava lea na faaalia mai ai le Alo o le Atua, ina ia faaumatia e ia galuega a le tiapolo. O i latou uma o e ua fanau mai i le Atua, latou te le faia le agasala; auā o loo tumau i totonu ia te i latou lana fua; e le mafai foi ona agasala, auā ua fanau mai i latou i le Atua. O le mea lea ua iloa ai le fanau a le Atua ma le fanau a le tiapolo. O i latou uma o e le fai le amiotonu, e le mai le Atua i latou, atoa ma ē le alolofa i o latou uso.

O i latou uma o e ita i o latou uso, o fasioti tagata i latou; ua outou iloa foi e leai sē fasioti tagata e tumau ia te ia le ola e faavavau.

O sē ua i ai le oa a le lalolagi nei, pe a iloa atu e ia lona uso ua mativa, a e punitia lona loto alofa ia te ia, pe faapefea ona tumau o le alofa i le Atua i lea tagata?

O le alofa lava lenei, e le ona ua tatou alofa i le Atua, a ua alofa mai o ia ia te i tatou, ua na auina mai foi lona Alo o le togiola mo a tatou agasala.

Afai ua iloa e se tasi lona uso ua na fai se agasala e le iu i le oti, ia faatoga o ia mo ia, ona foaiina mai lea o le ola ia te ia mo e agasala e le iu i le oti. O i ai le agasala e iu i le oti; ou te le fai atu ia outou faatoga atu mo lea agasala. O amioletonu uma lava, o agasala ia; o i ai foi le agasala e le iu i le oti. Ua tatou iloa e le agasala se tasi o e ua fanau mai i le Atua; a o le ua fanau mai i le Atua, e tausi o ia e ia, e le tago foi loo leaga ia te ia.

O i latou uma lava o e tuumavaega, a e le tumau i le mataupu ia Keriso, e le o ia te i latou le Atua; o lē tumau i le mataupu ia Keriso, e ia te ia lava le Tamā atoa ma le Alo. Pe a alu atu ia te outou se tasi a e le molia lenei lava mataupu, aua tou te talia o ia i o outou fale, aua foi tou te ofo alofa ia te ia; auā o sē ofo alofa atu ia te ia, e faatasi ai o ia ma ana galuega leaga.

e faamasino ai i tagata uma, ma faasalaina ai e ua amio faalematau uma lava o ia i latou, ona o a latou galuega faalematau uma ua latou faia ma le faalematau, ona o a latou upu faatautala foi na fai ia te ia e tagata agasala ua faalematau.

O e muimui i latou ma faameo, o loo o savavali i latou e tusa ma o latou tu‘inanau, ma ua tautala mai o latou gutu i upu faasausili, o loo faaneenee atu foi i latou i alii e maua ai ni mea.

Ina e salamo ia; afai e leai, ona ou vave alu atu lea ia te oe, ou te tau foi ma i latou i le pelu ai lo‘u gutu.

Ua ou tuu atu foi ni ona aso ia salamo ai i lana faitaaga, a ua le salamo lava o ia.

Ua ou iloa au galuega, e te le maalili, e te le vevela foi; ou te loto ina ia e maalili, pe vevela; o lenei, ua e faaleogalua, e te le maalili, e te le vevela foi, o le mea lea ou te luai atu ai ia te oe i lo‘u gutu

latou te lei salamo foi i o latou fasioti tagata, ma a latou togafiti faataulāitu, ma la latou faitaaga, ma o latou gaoi.

Ua ou faalogo foi i le tasi leo mai le lagi, ua faapea mai, Lo‘u nuu e, ia outou o ese ia te ia, ina ne‘i faatasia outou i ana agasala, ina ne‘i tofusia foi outou i ona mala; auā ua pa‘i atu ana agasala i le lagi, ua manatua foi e le Atua ana amioleaga.

Na a‘u iloa foi le nofoālii tele e sinasina, ma le o tietie ai, ua sosola ese le lalolagi ma le lagi i ona luma, e le iloa foi se mea e tu ai i laua. Na a‘u iloa foi o e na oti, o tagatānuu atoa ma alii, o tutū i luma o le Atua, ona fofola lea o tusi; ua fofola foi ma le tasi tusi, o le tusi lea o le ola; ona faamasinoina ai lea o e na oti i mea ua tusia i tusi, e tusa ma a latou amio.

A o e loto vaivai, ma e lē faalogo, ma e fai mea e inosia, ma e fasioti tagata, ma e faitaaga, ma e faataulāitu, ma e ifo i tupua, atoa ma e tala pepelo uma, e fai o latou tofi i le lepa e mu i le afi ma le teio, o le oti faalua lea.

E le sao atu lava i ai se mea leaga e tasi, po o se na te faia se mea inosia, po o se pepelo; na o i latou lava e ua tusia i le tusi o le ola a le Tamai mamoe.

O lē amioletonu ia amioletonu pea o ia, o lē eleelea ia eleelea pea o ia, o lē amiotonu ia amiotonu pea o ia, o lē paia ia paia pea o ia.

A ua i tuapā o ulī, ma e faataulāitu, ma e faitaaga, ma e fasioti tagata, ma e ifo i tupua, atoa uma lava e ua loto i le tala pepelo ma latou faia.