08 – Iesu

ou te faatupuina le feitagai ia te oulua ma le fafine, o lau fanau foi ma lana fanau; na te tu‘imomomoina lou ulu, a o oe e te tu‘imomomoina lona mulivae.

Ona fai atu lea o Isaako i lona tamā o Aperaamo, ua faapea atu, Lo‘u tamā e; ona tali mai lea o ia, Lo‘u atalii e, o a‘u lenei. Ona fai atu lea o ia, Faauta, o le afi ma le fafie; a o ifea se tamai mamoe e fai a‘i le taulaga mu? Ona tali mai lea o Aperaamo, Lo‘u atalii e, e au mai e le Atua se tamai mamoe māna e fai a‘i le taulaga mu; ona o faatasi ai lea o i laua.

Ona fetalai mai lea o le Atua ia Mose, O A‘U O LĒ OLA, O LOO OLA LAVA; ua ia fetalai mai foi, E te fai atu i le fanauga a Isaraelu, ia faapea O A‘U O LĒ OLA, O ia na auina mai a‘u ia te outou.

Afai foi e agasala se tasi, ua faia foi se mea e le tusa ma poloaiga a Ieova i mea uma e le tusa ona fai; e ui lava ina le iloa, e nofo sala lava ia, e ia te ia foi lana agasala. Na te au mai foi i le faitaulaga se mamoe poa e sao ona lelei mai le lafu mamoe, e tusa ma lou lava faatatau, e fai ma taulaga mo le sese; ona fai ai lea e le faitaulaga se togiola mo ia ona o le mea ua ia sese ai, ma na le iloa, ona faamagaloina ai lea o ia.

Auā ua ou iloa, o loo soifua le na te togiolaina a‘u; o aso amuli foi e tulai mai ai o ia i luga o le eleele.

Lo‘u Atua e, lo‘u Atua e, se a ea le mea ua e tuulafoai mai ai ia te ‘au, e taumamao ma lo‘u faaolataga, o upu foi o lo‘u faataio?

Ua sasaaina a‘u e pei o le suāvai, ua see o‘u ivi uma; o lo‘u loto ua pei o le pulu, ua liu suāvai i totonu o lo‘u manava. Ua mago lo‘u malosi, e pei o le ta‘egāipu, ma ua pipii lo‘u laulaufaiva i lo‘u gutu; ua e tuuina a‘u i le eleele o le oti. Auā ua siosiomia a‘u e ulī; ua punitia a‘u e le vao tagata amio leaga; ua tu‘ia e i latou o‘u lima ma o‘u vae. Ou te mafaia ona faitau o‘u ivi uma; o i latou, ua latou vaavaai mai, ua matamata mai ia te au. Ua latou tufatufa o‘u ofu mo i latou, ma latou fai le vili i lo‘u ofu tino.

Ou te tuuina atu lo‘u agaga i lou aao; Ieova e, le Atua faamaoni, ua e togiolaina a‘u.

E leoleoina e ia o ona ivi uma; e le gau lava se tasi.

O le tagata foi o la‘u uo, o le na ou faatuatua i ai, na ‘ai la‘u areto, ua aa mai o ia ia te au i lona mulivae.

E faavavau lava lona suafa; e tumau pea lona suafa a o i ai le la; latou te faaamuia i latou ona o ia; e faaamuia o ia e nuu uma lava.

O a‘u foi, ou te faia o ia ma ulumatua, e silisili o ia i tupu o le lalolagi.

O le maa na lafoaiina e tufuga fai fale, ua fai lea ma maa tulimanu aupitoaluga.

O ai ea ua alu ae i le lagi, ma toe ifoifo? O ai ea ua faapotopotoina le matagi i ona lima? O ai ea ua fusifusi vai i le ofu? O ai ea na faatuina tuluiga uma o le lalolagi? O ai ea lona igoa? o ai foi le igoa o lona atalii, pe afai ua e iloa?

O le tausaga na oti ai le tupu o Usia, na a‘u iloa ai le Alii o afio i le nofoālii silisili ma le maualuga, o ona pito ofu foi na tumu ai le malumalu. Sa tutū serafi e latalata ane, sa tofu i latou ma apaau e ono, o apaau e lua na ia ufitia ai ona mata, o le lua na ia ufitia ai ona vae, o le lua foi na ia lele a‘i. Sa valaau foi le tasi i le tasi, ua faapea ane, E paia, e paia, e paia Ieova o ‘au; ua tumu le lalolagi uma i lona mamalu.

O le mea lea e tuuina mai ai e le Alii lava le faailoga ia te outou; faauta, e to le taupou, ma fanau mai se tama tane; na te faaigoa foi ia te ia o Emanuelu. E ‘ai e ia le suāsusu to‘a ma le meli, seia iloa e ia ona tetee atu i le leaga, a e filifili i le lelei. Auā a o lei iloa e le tama ona tetee atu i le leaga mona filifili i le lelei, e tuua e ona tupu e lua o le nuu ua leaga ia te oe.

O le nuu sa savavali i le pouliuli, ua latou iloa le malamalama tele; o e sa nonofo i le nuu o le ata o le oti, ua pupula mai ia te i latou le malamalama.

Auā ua fanau mai mo i tatou le tama, ua foaiina mai mo i tatou le atalii, e i lona ua le malo, e igoa foi o ia, o le Silisili ese, o le Faipule, o le Atua malosi, o le Tamā o le faavavau, o le Alii o le filemu. E leai se mea e gata mai ai ona tele o lona malo ma le filemu o lona malo i le nofoālii o Tavita ma lona malo, e faatumauina, ma faamausali i le faamasinoga ma le amiotonu, e afua mai i ia ona po e oo i le faavavau; e faia lea mea i le maelega o Ieova o ‘au.

A e tupu mai le la laau i le pogai o Iese, e tupu ae foi le tatupu i ona aa. E afio mau ia te ia le Agaga o Ieova; o le Agaga o le poto ma le mafaufau; o le agaga o le faatonuga ma le malosi; o le Agaga o le malamalama ma le mata‘u ia Ieova.

Latou te le faia se mea leaga, latou te le faaumatia foi se mea i lo‘u mauga paia uma; auā e tumu le lalolagi i le malamalama o Ieova, e pei ona ufitia o le iliti tai i le suāsami. O lea aso foi e tu mai ai le Pogai o Iese, e fai ma tagavai o le nuu, e saili ia te ia o nuu ese; e matagofie foi lona malologa.

Ona faapupulaina ai lea mata o e tauaso, e faalogoa foi taliga o e tutuli; ona osooso ai lea o le pipili e pei o le aila, e pese foi le laulaufaiva o le gūgū; auā e oso mai le vai i le vao lafulafua, ma vaitafe i le toafa;

Faauta i la‘u auauna, ou te taofia o ia i luga; o le na a‘u filifilia ua fiafia i ai lo‘u loto; ua ou tuuina atu lo‘u Agaga i ona luga; na te avatua le faamasinoga mo nuu ese.

O loo faapea ona fetalai mai o Ieova, o le Tupu o Isaraelu, o le na faatauina foi o ia, o Ieova o ‘au; o a‘u lē muamua, o a‘u foi lē mulimuli; a e leai se atua, ua na o a‘u lava.

Na a‘u tuuina atu lo‘u tua i e sasa mai, ma o‘u alafau i e futi le ‘ava; ou te lei ufiufi foi o‘u mata i le mā ma le feanu.

Faauta, e manuia la‘u Auauna, e faasilisiliina o ia, ma viia, ma matuā faaneeneeina. E pei ona ofo o tagata e toatele ia te oe, ua faaleaga faapea ona fofoga e sili i mata o tagata, ma lona tino e sili i tino o tagata; e faapea ona sausauina e ia o nuu e tele; ona o ia e punitia ai e tupu o latou lava fofoga; auā latou te vaaia le mea na le talatalaina ia i latou, latou te iloa foi le mea na latou le faalogo i ai.

O ai ea ua talitonu i la matou upu e taulogologo atu; ua faaalia ia te ai le aao o Ieova? Na tupu ae o ia e pei o se tātupu i ona luma, e pei o le pogai i le nuu naumati; e le aulelei pe lalelei o ia; a tatou vaavaai ia te ia e leai sona matagofie, ina ia tatou mananao ai ia te ia. Ua inosia ma tuulafoaiina o ia e tagata; o le tagata faanoanoa, ua masani foi ma le tiga; e peiseai ua ‘alo ese mata ia te ia; ua inosia o ia, ma ua tatou le manatua lava o ia. E moni, ua na tauave o tatou tiga, ma na tauave o tatou faanoanoa; a ua tatou manatu o ia ua taia, ua fasia e le Atua, ma ua faatigaina. A ua manua o ia ona o a tatou solitulafono, ua momomo o ia ona o a tatou amio leaga; o le aoaiga e filemu ai tatou sa i ona luga lea, o ona faalavalava foi ua malolo ai tatou. O i tatou uma ua sē i tatou e pei o mamoe, ua taitasi ma faasaga i lona lava ala; a ua faaoo ia te ia e Ieova le amio leaga o i tatou uma. Na faasauaina o ia, sa tigaina foi o ia, a e le tautala mai o ia; e pei o le tamai mamoe ua ta‘ita‘iina ia fasia, e pei o le mamoe foi i luma o e sele lona fulufulu, ua faalologo ia, o ia foi ua le tautala mai. O le faasaua ma le faamasinoga na aveeseina ai o ia; o ai foi na te talatalaina lana tupulaga? auā ua vavaeeseina o ia i le nuu o tagata ola; na taia o ia ona o le solitulafono a lo‘u nuu. Na tofia o ia ia fai lona tuugamau faatasi ma ē pagotata, a e peitai sa i le mauoa ina ua maliu; auā na le faia e ia se faasauaga, ua leai foi se pepelo i lona fofoga. A ua finagalo Ieova e tu‘imomomo ia te ia, ua ia faatigaina o ia; pe afai na te faia se taulaga mo agasala, ona iloa lea e ia o lana fanau, e faalevalevaina ona aso, o le finagalo foi o Ieova e manuia lea ia te ia. Ona o le tiga o lona agaga na te iloa ai lana fanau, e malie ai o ia; o le malamalama mai ia te ia e ta‘uamiotonuina ai tagata e toatele e la‘u auauna ua amiotonu; auā e tauave e ia a latou amio leaga. O le mea lea ou te vaevaea ai se vaega mo ia faatasi ma e ua sili, e vaea foi le vete faatasi ma e fitafita, ona ua ia sasaa atu o lona ola ia oti; na faitauina foi o ia faatasi ma e pagotata; na ia aveina foi le agasala a tagata e toatele, ua fautua foi o ia mo e solitulafono.

Ua i o‘u luga le Agaga o le Alii o Ieova; auā ua faauuina a‘u e Ieova e tala‘i le tala lelei i e ua tigaina, ua ia auina mai a‘u e fufusi i e loto momomo, e tala‘i le saolotoga i le tafeaga, ma le matuā tatalaina o e ua fusifusia. E tala‘i le tausaga e talileleia mai ai e Ieova, ma le aso e taui ai ma sui e lo tatou Atua; e faamatalaloto i e faanoanoa uma lava; e avatu le fiafia i e faanoanoa i Siona, e foaiina atu ia i latou le matagofie e sui a‘i le lefulefu, o le uu o le olioli e sui a‘i le faanoanoa, o le ofu e fai a‘i viiga e sui a‘i le loto faavaivai; e igoa i latou, O laau o le amiotonu, o le faatoaga a Ieova, e fai mona viiga.

Faauta, e oo mai ona aso, o loo fetalai mai ai Ieova, ou te faatupuina ai mo Tavita le La laau amiotonu, e pule foi le Tupu, e manuia o ia, e faia foi e ia le faamasinoga ma le amiotonu i le lalolagi.

O loo fetalai mai Ieova, Faauta, e oo i ona aso ou te osia ai le feagaiga fou ma le aiga o Isaraelu, ma le aiga o Iuta. E le pei o le feagaiga na ou osia ma o latou tamā i le aso na ou tago ai i o latou lima e aumaia ai i latou mai le nuu o Aikupito; o la‘u feagaiga lea na latou solia, o a‘u foi na ou ‘ino‘ino ai ia te i latou, ua fetalai mai ai Ieova; a o lenei le feagaiga ou te osia ma le aiga o Isaraelu, pe a mavae ia aso, o loo fetalai mai ai Ieova, ou te tuuina la‘u tulafono i totonu ia te i latou, ma ou tusi ai i o latou loto; e fai foi a‘u mo latou Atua, o i latou foi e fai mo‘u nuu. E le toe a‘oa‘o atu foi le tagata i lē la te tuaoi, ma le tagata i lona uso, e faapea atu, Ia outou iloa Ieova; auā e iloa a‘u e i latou uma lava, o tagata nuu atoa ma alii, o loo fetalai mai ai Ieova; auā ou te faamagalo i a latou amio leaga, ma ou le toe manatua a latou agasala.

O ona po o ia tupu e faatuina ai e le Atua o le lagi o le malo e le faaumatia e faavavau; o lea malo foi, e le tuuina atu ia i se tasi nuu, na te tu‘imomomoina ma faaumatia ia malo uma lava, a o ia e tumau lava e faavavau;

Ona matuā ofo ai lea o Nepukanesa le tupu, ua vave ona tulai, ua fai atu, ua faapea atu i ana tulafane, Pe na tatou le lafoina ea tagata e toatolu o fusifusia i totonu o le afi? Ua tali mai i latou, ua faapea mai i le tupu, Le tupu e, sa faapea lava. Ua tali atu o ia, ua faapea atu, Faauta, ua ou iloa tagata e toafa, ua tatalaina, ua feoai i totonu o le afi, ua le afaina lava i latou; ua tino mai lona toafa ua pei o se alo o le Atua.

Na ou vaavaai ina seia tuu mai o nofoālii, ua tietie mai foi Lē ua mai anamuā ona aso, ua sinasina lona ofu e pei o le kiona, ma ona lauao e pei o le fulufulu mamoe e lelei; o lona nofoālii o le afi mumū ia, ua se afi ua mu ana mea e taavalevale a‘i. Ua tafe mai le afi ua alu atu nai ona luma, ua afe ni afe o e auauna ia te ia, e mano ni mano o e laulaututū i ona luma; ua nofoia le faamasinoga, ma ua fofola tusi.

Na ou iloa i faaaliga i le po, faauta foi, ua afio mai i ao o le lagi Lē e pei o le Atalii o le tagata, ua oo foi ia i Lē ua mai anamua ona aso, ua latou momoli ia te ia i ona luma. Ua foaiina atu ia te ia le pule, ma le viiga, ma le malo, ina ia auauna ia te ia o nuu uma, ma atu nuu, ma gagana eseese; o lana pule o le pule e faavavau lea, e le mavae atu ia, o lona malo foi e le faaumatia.

Ia e iloa foi ma manatunatu, e afua mai i le oo atu o le poloaiga ia toe faia ma ia atiina ae Ierusalema, e oo atu i le Mesia le Alii, e fitu vaiasosa ma vaiasosa e onogafulu ma le lua, e toe faia le ala tele ma le pa i ona po lava o le puapuaga. A mavae vaiasosa e onogafulu ma le lua, ona fasiotia ai lea o le Mesia, a e leai se mea ia te ia; o le nuu o le alii o le a maliu mai, latou te faaumatia le aai ma le malumalu, o lona iuga foi ua se tafega lea; ua tuu le pule ia faatafunaina e oo i le iuga o le taua.

A o oe, Peteleema-Efarata, e itiiti oe i afe o Iuta, a e tupu mai ia te oe mo a‘u o le na te fai ma faipule ia Isaraelu, o lona tupu mai talu mai anamuā lea, talu mai ona po o le vavau lava.

E tu foi o ia ma leoleo ia te i latou i le mana o Ieova, ma le mamalu o le suafa o Ieova lona Atua, ona latou nofo mau ai lea; auā o ona po ia e mamalu ai o ia e oo i tuluiga o le lalolagi.

E sili le mamalu o lenei fale ua mulimuli i le na muamua, ua fetalai mai ai Ieova o ‘au; ou te avatu foi le manuia i le mea nei, ua fetalai mai ai Ieova o ‘au.

Ia e matuā fiafia o oe le tama fafine a Siona; ia alaga fiafia o oe le tama fafine a Ierusalema; faauta, o le a alu atu lou Tupu ia te oe; o ia o le amiotonu ma le faaola; e agamalu o ia, o loo tietie i le asini, o le tamai asini foi.

Ona fetalai mai lea o Ieova ia te au, Ina lafo atu ia i lē fai ipu omea; se tau e lelei naua, ua faatusaina ai a‘u e i latou! Ona ou tago ai lea i tupe e fuatolu, ma ou lafoia atu i le fale o Ieova i lē fai ipu omea.

Ou te liligi ifo i luga o le aiga o Tavita, ma luga o e nonofo i Ierusalema le agaga o le alofa tunoa ma talosaga, latou te vaavaai mai ia te au na latou tu‘ia; latou te tagitu‘i foi ia te ia, e pei ona tagitu‘i i le atalii e toatasi, ma latou faanoanoa ia te ia, e pei ona faanoanoa i le ulumatua.

Ona fai mai lea o se tasi ia te ia, O a ea ia manua i ou lima? Ona fai atu lea o ia, O mea ia na manua ai a‘u i le fale o a‘u uo. Ala mai ia, le pelu e, i lo‘u leoleo mamoe, ma le tagata ma te faatasi ma a‘u, ua fetalai mai ai Ieova o ‘au; ina ta ia o le leoleo mamoe, ona faataapeapeina ai lea o le au mamoe; ona faafoi atu lea o lo‘u lima i e iti.

O le tusi i le gafa o Iesu Keriso, o le atalii o Tavita, o le atalii ia o Aperaamo.

na fanaua e Iakopo o Iosefa le tane a Maria, na fanaua ai IESU, o le ua igoa ia Keriso.

O lenei, o tupulaga uma e afua mai ia Aperaamo e oo ia Tavita, e sefulu ma le fa ia tupulaga; e afua foi ia Tavita e oo i le tafeaga i Papelonia, e sefulu ma le fa ia tupulaga; e afua foi i le tafeaga i Papelonia e oo i le Keriso, e sefulu ma le fa ia tupulaga.

Sa faapea ona fanau mai o Iesu Keriso. Sa fāufautane lona tinā o Maria ia Iosefa, ua iloa ua to o ia i le Agaga Paia, a o lei faatasi i laua.

E fanau mai e ia le tama tane, e te faaigoa foi ia te ia o Iesu; auā e faaola e ia lona nuu ai a latou agasala. Ua oo nei mea uma ina ia taunuu ai le afioga a le Alii i le perofeta, ua faapea mai, Faauta, e to le taupou, ma fanau mai le tama tane, latou te faaigoa foi ia te ia o Emanuelu; o lona uiga pe a faamatalaina, Ua ia te i tatou le Atua.

A e la te lei feiloai ua oo ina fanau mai e ia o lana tama tane ulumatua; ua ia faaigoa foi ia te ia o IESU.

Ua fanau Iesu i Peteleema i Iutaia i ona po o Herota le tupu, faauta, ua oo mai ai makoi mai sasae i Ierusalema, ua faapea mai, Po o fea o i ai le ua fanau mai o le tupu o tagata Iutaia? Auā ua matou vaaia lona fetu i sasae, ua matou o mai ai e ifo atu ia te ia. Ua faalogo i ai Herota le tupu, ona atuatuvale ai lea o ia atoa foi ma Ierusalema uma. Ona ia faapotopotoina ai lea o le au faitaulaga sili uma ma le au tusiupu o le nuu, ua fesili atu ia te i latou, po o fea e fanau ai le Keriso. Ona latou fai mai ai lea ia te ia, O Peteleema i Iutaia; auā ua faapea ona tusia e le perofeta, O oe foi Peteleema i le nuu o Iuta, e te le topito ona faatauvaa i alii o Iuta; auā e tupu mai ia te oe le faipule, o le na te pule i lo‘u nuu o Isaraelu.

Ua latou ulufale atu i le fale, ua latou iloa ai le tama itiiti ma Maria lona tinā, ona latou faapauu ai lea, ma ifo atu ia te ia; ua talai foi o latou oloa, ona latou avatu ai lea ia te ia o mea alofa, o le auro, ma le pulu lipano, ma le pulu muro.

O a‘u nei, ou te papatiso atu ia te outou i le vai ina ia salamo; a e peitai o lē mulimuli mai e silisili o ia ia te au, e le aoga a‘u ona tauave i ona see vae; o ia lea na te papatisoina atu ia te outou i le Agaga Paia ma le afi. O i lona aao lana asu, na te faamamāina ai lana faaputugāsaito; na te faapotopotoina foi ana saito i le fale saito, a e susunuina le otaota o saito i le afi e le matineia.

Ona maliu atu ai lea o Iesu mai Kalilaia i Ioritana ia Ioane, ia papatisoina ai e ia. A ua vavao e Ioane ia te ia, ua faapea mai, E ao ona e papatisoina mai o a‘u, a ē maliu mai ea oe ia te au? A ua tali atu Iesu, ua faapea atu ia te ia, Tuu mai nei pea ia; auā e faapea ona tatau ia te i tatou ona faataunuuina o mea tonu uma. Ona tuu mai lea ia te ia. Ua papatisoina Iesu, ona maliu ae loa lea o ia nai le vai, faauta foi, ua faaavanoaina le lagi ia te ia, ua ia iloa atu foi le Agaga o le Atua ua afio ifo e peiseai se lupe, ua oo i ona luga. Faauta foi, o le siufofoga mai le lagi, ua faapea mai, O lo‘u atalii pele lenā, ua ou fiafia lava ia te ia.

Ona aveina ae lea o Iesu i le vao e le Agaga, ina ia faaosoosoina e le tiapolo. Ua faalaina ia i po e fagafulu ma ao e fagafulu, mulimuli ane ona fia taumafa ai lea o ia.

Talu mai ai na afua ona tala‘i atu e Iesu, ua faapea atu, Ina salamo ia outou; auā ua latalata mai le malo o le lagi.

Ua faataamilo Iesu i Kalilaia uma, ua ia a‘oa‘o i o latou sunako, ua ia tala‘i atu foi le tala lelei o le malo, ma faamalolo e ia o ma‘i uma ma ma‘i tiga uma o le nuu. Ua oo atu ai lona logo i Suria uma, ona latou au mai ai lea ia te ia o e ua mamai atoa uma, o e ua i ai ma‘i eseese, ma e ua puapuagatia, ma e ua uluitinoina e temoni, ma e ua ma‘i māliu, atoa ma e ua mamai i le supa; ona faamaloloina lea o i latou e ia. Ona mulimuli atu lea ia te ia o le motu o tagata e toatele mai Kalilaia, ma Tekapoli, ma Ierusalema, ma Iutaia, ma ona tala atu o Ioritana.

Aua ne‘i outou manatu ua ou sau e tatalaina le tulafono po o le au perofeta; ou te lei sau e tatalaina, a ia faataunuuina.

O le mea lea ou te fai atu ai ia te outou, aua ne‘i outou popole i o outou ola, i mea tou te aai ai, ma mea tou te inu ai, po o outou tino, i mea tou te oofu ai. E le sili ea le ola i le mea e ‘ai, ma le tino i le ofu?

E le sao atu i le malo o le lagi i latou uma o e fai mai ia te au, Le Alii e, le Alii e; na o le na te faia le finagalo o lo‘u Tamā o i le lagi.

Ona fetalai atu ai lea o Iesu ia te ia, E fai lua o alope, e fai foi mea e momoe ai manu felelei; a o le Atalii o le tagata, e leai se mea e moe ai o ia.

Ona taufaiofo ai lea o tagata, ua faapea ane, Ua silisili lava lenei Alii! auā ua usiusitai ia te ia le matagi ma le vai.

Ua silafia e Iesu o latou manatunatu, ona faapea atu lea o ia, Se a le mea ua manatunatu leaga ai o outou loto?

A e peitai ina ia iloa e outou o i ai i le Atalii o le tagata i le lalolagi le pule e faamagalo ai agasala, (ona fetalai atu ai lea o ia i le supa,) Ina tulai ia, ina ave lou moega, ma alu i lou fale.

Ua faataamilo Iesu i aai uma ma faoa aai, ua a‘oa‘o i o latou sunako, ma tala‘i i le tala lelei o le malo, ua ia faamalolo foi i ma‘i uma, ma ma‘i tiga uma o le nuu.

Ua valaau atu e ia ona soo e toasefulu ma le toalua, ona tuu atu lea e ia ia te i latou le pule i agaga leaga, ina ia tutuli ia te i latou, ma faamalolo i ma‘i uma ma ma‘i tiga uma.

E inosia foi outou e tagata uma ona o lo‘u igoa; a o lē tumau seia oo atu i le gataaga, e faaolaina o ia.

O lenei, ai se na te ta‘uta‘u a‘u i luma o tagata, o a‘u foi ou te ta‘uta‘uina o ia i luma o lo‘u Tamā o i le lagi. Ai se faafiti foi ia te au i luma o tagata, ou te faafitia foi o ia i luma o lo‘u Tamā o i le lagi.

Aua tou te manatunatu ua ou sau e avatu le filemu i le lalolagi; ou te lei sau e avatu le filemu, a o le pelu. Auā ua ou sau e faamasesei le tagata ma lona tamā, o le tama teine foi e faamasesei ma lona tinā, o le avā foi e faamasesei ma le tinā o lana tane.

O le ua tele lona alofa i lona tamā po o lona tinā, a e itiiti ia te au, e le aoga lea ia te au; o le ua tele foi lona alofa i lona atalii po o lona afafine, a e itiiti ia te au, e le aoga foi lea ia te au. O se le ave lona satauro, ma le lē mulimuli mai ia te au, e le aoga foi lea ia te au.

Ua sau foi le Atalii o le tagata, ua ‘ai o ia ma inu; ona latou fai ane ai lea, Faauta, o le tagata ‘ai tele ma le inu uaina, o le uo a telona ma ē agasala. A e ta‘uamiotonuina le poto e ana tama.

Ua tuuina mai mea uma ia te au e lo‘u Tamā; e leai foi se tasi ua iloa le Atalii, ua na o le Tamā; e leai foi se tasi ua iloa le Tamā, ua na o le Atalii, ma se ua loto le Atalii e faaali atu i ai.

Ia outou o mai ia te au, o outou uma o e tigaina ma mafatia i avega, o a‘u foi e malolo ai outou. Ia outou amoina la‘u amo, ma ia outou faaa‘oa‘o ia te au, auā o a‘u lē agamalu ma le loto maulalo; ona maua lea e outou o le malologa mo outou agaga. Auā e avegofie la‘u amo, o la‘u avega foi e māmā ia.

Auā o le Atalii o le tagata, o le Alii lava ia o le sapati.

O lona igoa foi e faamoemoe i ai nuu ese.

Ona aumaia lea ia te ia o le tagata ua uluitinoina e le temoni, o le tauaso foi o ia ma gūgū; ona faamaloloina ai lea e ia o ia, ona tautala ai lea ma vaai lē sa tauaso ma gūgū. Ona taufaiofo ai lea o le motu o tagata uma, ua faapea ane, E le o le atalii ea lenei o Tavita?

A ua silafia e Iesu o latou manatunatu, ona fetalai atu ai lea o ia ia te i latou, O malo uma ua fevaevaeai e faaumatia ia; o aai uma foi po o aiga e fevaevaeai e lē tumau ia.

A e afai o le Agaga o le Atua ou te tulia ai e a‘u o temoni, ua oo mai lava ia te outou le malo o le Atua.

Auā e pei o Iona sa i le manava o le i‘a tele i ao e tolu ma po e tolu, e faapea foi ona i ai o le Atalii o le tagata i lalo i le eleele i ao e tolu ma po e tolu.

Auā o lē faia le finagalo o lo‘u Tamā o i le lagi, o lo‘u uso lea, ma lo‘u tuafafine, ma lo‘u tinā.

E aauina atu e le Atalii o le tagata ana agelu, latou te faapotopotoina nai lona malo mea uma e tausuai ai ma ē amio leaga.

Ona fetalai atu ai lea o ia i le motu o tagata ia latou taooto i le mutia. Ona tago lea o ia i areto e limagafua ma i‘a e lua lau, ua tepa ae i le lagi, ua faafetai; ua ia tofitofi foi i areto, ma avatu i le au soo, ona avatu ai lea e le au soo i le motu o tagata. Ona aai ai lea o i latou uma lava, ua maoona; ua latou fu‘e foi toe ‘aiga, ua tutumu ai ato e sefulu ma le lua. O i latou foi na aai pe limagaafe o tane, a e lei faitaulia fafine ma tama iti.

Ua maliu atu Iesu ia te i latou i le leoleoga e fa o le po, ua savali i luga o le vai. Ua iloa mai e le au soo o ia ua savali i luga o le vai, ona latou atuatuvale ai lea, ua faapea ane, O le aitu; ona latou uio ai lea i le matatau.

Ona o mai ai lea o e na i le vaa, ua ifo mai ia te ia, ua faapea mai, E moni, o oe lava o le Alo o le Atua.

Ua iloa mai o ia e tagata o lea nuu, ona latou feau atu ai lea i lea itu uma lava, ua latou au mai ai ia te ia o e mamai uma lava; ma ua latou aioi mai ia te ia, tau lava ina latou papai i le tuupao o lona ofu; ua faamaloloina foi o i latou uma e na papai mai i ai.

Ona o mai ai lea ia te ia o le motu o tagata e toatele, ua ia te i latou o e pipili, o e tauaso, o e gūgū, o e mumutu, atoa ma nisi e toatele, ua latou tuu atu ia i latou i vae o Iesu; ona faamalolo ai lea e ia o i latou.

ona tago ai lea o ia i areto e fitu ma i‘a, ua faafetai, ma tofitofi, ona avatu ai lea e ia i ona soo, ona avatu ai lea e le au soo i le motu o tagata. Ona aai ai lea o i latou uma lava, ua maoona; ua latou fu‘e foi i toe ‘aiga, ua tutumu ai ete e fitu. O i latou foi na aai e toafagaafe o tane, a e lei faitaulia fafine ma tama iti.

Ona tali mai ai lea o Simona Peteru, ua faapea mai, O oe o le Keriso, o le Alo o le Atua soifua.

Ona vavao atu ai lea e ia i ona soo, aua ne‘i latou ta‘uta‘u atu i se tasi, o ia o Iesu le Keriso.

O ona po ia na amata ai e Iesu ona faailoa atu i ona soo, e tatau ona alu o ia i Ierusalema, e faatigaina foi i mea e tele e toeaina ma le au faitaulaga sili, ma le au tusiupu, e fasiotia foi o ia, e faatuina foi o ia i le aso tolu.

Auā e sau le Atalii o le tagata faatasi ma ana agelu i le mamalu o lona Tamā; ona tauia lea e ia e taitasi e tusa ma lana galuega.

Ona liua ai lea o ia i o latou luma, ua pupula mai ona fofoga e pei o le la, ua sisina mai foi ona ofu e pei o le malamalama.

Faauta, o le ao pupula ua ufitia ai i latou a o tautala ia; faauta foi, o le siufofoga mai le ao ua faapea mai, O lo‘u Atalii pele lena, ou te fiafia ia te ia; ia outou faalogo ia te ia.

Ua latou ui ane i Kalilaia, ona fetalai atu lea o Iesu ia te i latou, O le a tuuina atu le Atalii o le tagata i lima o tagata; latou te fasioti foi ia te ia, a e toe faatuina o ia i le aso tolu. Ona matuā tiga ai lea o i latou.

Ia outou, ne‘i tou faaleaogaina se tasi o i latou nei e faatauvaa; auā ou te fai atu ia te outou, o a latou agelu i le lagi e le aunoa ona latou vaavaai i fofoga o lo‘u Tamā o i le lagi. Auā ua sau le Atalii o le tagata e faaola i le na le iloa.

Auā o le mea ua faapotopoto ai se toalua, po o se toatolu i lo‘u igoa, ou te i ai faatasi ma i latou.

Ua tali atu Iesu ia te ia, Afai e te manao ina ia atoatoa ona lelei o lau amio ia e alu ma e faatau atu au mea, i le e avatu ai i e matitiva; ona ia te oe lea o le faulaigāoloa i le lagi, i le e sau ma mulimuli mai ia te au.

Faauta, o le a tatou o ae i Ierusalema, e tuuina atu ai le Atalii o le tagata i le au faitaulaga sili, ma le au tusiupu, latou te faasala ia te ia ia oti; latou te tuuina atu foi ia te ia i nuu ese, ina ia latou faatauemu, ma sasa, ma faasatauro ia te ia; a e toe faatuina o ia i le aso tolu.

E pei o le Atalii o le tagata e lei sau ia ina ia auauna mai tagata ia te ia, a ia auauna atu ia, ma foaiina atu lona ola e fai ma togiola e sui a‘i tagata e toatele.

O le toatele o le motu o tagata ua fofola o latou ofu i le ala; o isi foi ua latou sala i lālā o laau ma folasia ai le ala. O le motu o tagata ua muamua, ma e ua mulimuli, ua alalaga i latou, ua faapea mai, Osana i le alo o Tavita; ia manuia lē afio mai i le suafa o le Alii. Osana i mea e aupito i luga.

Ua ulufale atu Iesu i le malumalu o le Atua, ona ia tulia uma lea i fafo o e na fefaatauai i le malumalu, ma na fuli i lalo laulau a e na faatau tupe, ma nofoa o e na faatau lupe. Ua faapea atu o ia ia te i latou, Ua tusia, E ta‘ua lo‘u fale, o le fale tatalo; a ua faia e outou ma ana o e fao mea. Ona o mai ai lea ia te ia i le malumalu o e tauaso ma e pipili, ua na faamalolo ia te i latou. Ua iloa atu e le au faitaulaga sili ma le au tusiupu o vavega ua faia e ia, o tama foi ua alalaga i le malumalu, ua faapea ane, Osana i le alo o Tavita; ona matuā tiga ai lea o i latou,

Ua fetalai atu Iesu ia te i latou, Tou te lei faitaulia lava ea i Tusi, O le maa na lafoaiina e tufuga fai fale, ua fai lea ma tulimanu aupitoaluga; o le mea lea na faia e le Alii, tatou te ofo ai pe a vaavaai atu i ai? O le mea lea ou te fai atu ai ia te outou, E aveesea le malo o le Atua ia te outou, a e tuuina atu i se nuu e au mai ai ona fua. O sē paū foi i luga o lea maa, e gāugau ai o ia; a o se tasi e paū ifo i ai le maa, e nutipalaina ai o ia.

Ua faapotopoto le au faresaio, ona fesili atu ai lea o Iesu ia te i latou, ua faapea atu, Se a la outou taofi i le Keriso? se atalii ea ia o ai? Ona latou fai mai ai lea ia te ia, O le alo o Tavita. Ona fetalai atu ai lea o ia ia te i latou, O lenei, pe faapefea ona ta‘ua e Tavita e le Agaga, o ia o lona Alii, ua faapea mai, Ua fetalai ane le Alii i lo‘u Alii, Ia e nofo i lo‘u itu taumatau, seia ou faia e ua fai oe mo latou fili ma mea e tu ai ou vae. O lenei, afai ua ta‘ua o ia e Tavita, o le Alii, pe faapefea ona fai o ia mona atalii? A e leai se tasi ua na mafaia ona tali mai se upu ia te ia; talu lea aso e le toe faamalosi ona fesili mai se tasi ia te ia i se mea.

Aua foi ne‘i ta‘ua outou o a‘oa‘o; auā e toatasi la outou a‘oa‘o, o le Keriso lea.

Ona latou tuuina atu ai lea o outou i le puapuaga, ma latou fasiotia outou, e inosia foi outou e nuu uma ona o lo‘u igoa.

Auā e pei ona emo mai o le uila i sasae, ma malamalama atu i sisifo; e faapea foi ona sau o le Atalii o le tagata.

Ona iloa ai lea i le lagi o le faailoga o le Atalii o le tagata; ona taufaitagitu‘i ai lea o itu aiga uma o le lalolagi; latou te iloa atu foi le Atalii o le tagata ua sau i ao o le lagi ma le mana ma le mamalu tele.

E mavae atu le lagi ma le lalolagi, a o a‘u upu e le mavae atu lava ia.

Pe a sau le Atalii o le tagata i lona mamalu, ma le au agelu paia uma faatasi ma ia, ona tietie ai lea o ia i lona nofoālii mamalu; e faapotopotoina foi i ona luma o nuu uma lava; ona tuueseeseina lea o i latou e ia, e pei o le leoleo mamoe ona tuueseeseina o mamoe ma ‘oti; ona tuu ai lea e ia o mamoe i lona itu taumatau, a o ‘oti i lona itu tauagavale. Ona fai atu ai lea o le Tupu i e o i lona itu taumatau, O mai ia, o outou ua faamanuiaina e lo‘u Tamā, ia fai mo outou tofi le malo ua saunia mo outou a o lei faavaeina le lalolagi;

O loo latou aai, a e tago Iesu i le areto, ua faafetai, ona tofitofi ai lea, ma avatu i le au soo, ua faapea atu, Ina tago ia, ina aai; o lo‘u tino lenei. Ua tago foi o ia i le ipu, ua faafetai, ona avatu ai lea e ia ia te i latou, ua faapea atu, Ina inu ia outou uma i ai; auā o lo‘u toto lenei, o le toto o le feagaiga fou, ua faamaligiina mo tagata e toatele e faamagalo a‘i agasala. Ou te fai atu foi ia te outou, ou te le toe inu lava i lenei fua o le vine, seia oo i lea aso ou te inu ai le uaina fou faatasi ma outou i le malo o lo‘u Tamā.

Ona fetalai atu ai lea o ia ia te i latou, Ua matuā tiga lo‘u loto e oo i le oti; ia outou nonofo pea iinei, ma ia tatou mataala faatasi ma a‘u.

Fa te oe ea ou te le mafaia ona aioi atu nei i lo‘u Tamā, ona aauina mai ai lea e ia ia te au o agelu e sili ona toatele i lekeona e sefulu ma le lua? Ona faapefea lea ona taunuu o Tusi, e tatau ona oo ia mea?

A ua le fetalai Iesu. Ona fai mai ai lea o le faitaulaga sili, ua faapea mai ia te ia, Ou te fai atu ia te oe ia te tauto mai ia te i matou i le suafa o le Atua soifua, po o oe le Keriso, o le Alo o le Atua. Ona fetalai atu ai lea o Iesu ia te ia, O lea lava; ou te fai atu foi ia te outou, E mulimuli ane tou te iloa ai le Atalii o le tagata e nofo i le itu taumatau o le e ona le mana, e sau foi o ia i ao o le lagi.

Ona latou taufaifeanu ai lea i ona fofoga, ua taufaitu‘i foi ia te ia; ua taufaipo atu foi isi, ua faapea mai, Keriso e, ina iite mai ia te i matou, po o ai na na fasia oe?

Ua tu Iesu i luma o le alii; ona fesili mai ai lea o le alii ia te ia, ua faapea mai, O oe ea o le tupu o tagata Iutaia? Ona fetalai atu ai lea o Iesu ia te ia, O lea lava.

O lea na fai atu ai Pilato ia te i latou, ina ua potopoto i latou, Po o ai tou te loto i ai ou te tatalaina atu ia te outou? o Parapa ea? po o Iesu le ua igoa ia Keriso?

Ona fai atu ai lea o Pilato ia te i latou, Se a foi le mea ou te faia ia Iesu o le ua igoa ia Keriso? Ona fai mai ai lea o i latou uma ia te ia, Ia faasatauroina ia.

Ua latou toeseina ona ofu, ona latou faaofuina ai lea o ia i le ofu mūmū. Ua latou taataai foi laau tuitui ua fai a‘i le pale, ona latou faaee ai lea i lona ao, ua tuu foi le u i lona aao taumatau; ona latou tootuli ai lea i ona luma, ua faatauemu mai ia te ia, ua faapea mai, Talofa, le tupu o tagata Iutaia! Ua feanu i latou ia te ia, ona latou tago ai lea i le u, ma ta i lona ao. Ua uma ona latou faatauemu mai ia te ia, ona latou tatala ese lea o le ofu, ma faaofu ia te ia i ona lava ofu; ona latou ta‘ita‘i atu ai lea ia te ia ia faasatauroina.

Ua latou tuu foi i luga ae o lona ao le tusi i le mea na molia ai o ia, O IESU LENEI, O LE TUPU O TAGATA IUTAIA.

Ua faapea foi ona faatauemu o le au faitaulaga sili, ma le au tusiupu, ma toeaina, ua faapea ane, Na ia faaolaina isi tagata, e le mafaia e ia ona faaola ia te ia. Afai o le Tupu o Isaraelu o ia, ina alu ifo nei lava o ia i le satauro, ona tatou talitonu ai lea ia te ia. Na faatuatua ia i le Atua, ina laveai mai nei o ia ia te ia, afai e finagalo o ia ia te ia; auā na ia fai mai, O a‘u o le Atalii o le Atua.

Ua lata i le itu aso e iva, ona alaga ai lea o Iesu ma le leo tele, ua faapea atu, Eli, Eli, lama sapatani? o lona uiga lenei, Lo‘u Atua e, lo‘u Atua e, se a le mea ua e tuulafoai mai ai a‘u?

Ua toe alaga Iesu ma le leo tele, ona tuuina atu ai lea e ia o lona agaga. Faauta foi, ua saeluaina le ie puipui o le malumalu, ua amata ifo i luga, ua oo i lalo; ua luluina foi le eleele, ua mavaevae foi papa; ua avanoa foi tuugamau, ua toe tutū mai foi tino o tagata paia e toatele na momoe, na mavae foi lona toe tu mai, ona latou o mai ai lea nai tuugamau, ma latou o atu i le aai paia, ua iloa i latou e tagata e toatele. O le ta‘ita‘i foi o le toaselau, ma e na leoleo ia Iesu faatasi ma ia, na latou iloa le mafuie ma mea na faia, ona latou matuā matatau ai lea, ua faapea ane, E moni, o le Alo lava lenei o le Atua.

Faauta foi, ua to le mafuie tele; auā na alu ifo le agelu a le Alii mai le lagi, ua alu atu, ma fuli ese le maa i le gutu o le tuugamau, ma tietie i ona luga. E pei o le uila lona tino mai, ma ona ofu ua sinasina pei o le kiona; ua tetemu foi i le matatau ia te ia o e na leoleo, ua liua i latou e pei o tagata oti. Ona fai atu ai lea o le agelu i fafine, ua faapea atu, Aua lua te matatau oulua; auā ua ou iloa ua oulua sailia mai Iesu na faasatauroina. E le o iinei o ia; auā ua toe tu mai o ia, pei ona fetalai atu ai o ia. O mai, ina matamata i le mea na tuu ai le Alii. Ina o atu ia ia vave, lua te ta‘u atu i ona soo, ua toe tu mai o ia nai e ua oti; faauta foi, e muamua atu ia ia te outou i Kalilaia; tou te iloa ai o ia i lea mea; faauta, ua ou fai atu ia te oulua.

Ua la o e ta‘u atu ai i ona soo, faauta foi, ua fetaiai Iesu ma i laua, ua faapea atu, Si o‘u alofa. Ona la o mai ai lea ua fetagofi i ona vae, ma ifo mai ia te ia. Ona fetalai atu ai lea o Iesu ia te i laua, Aua lua te matatau; ina o atu ia, lua te ta‘u atu i o‘u uso, ina ia latou o atu i Kalilaia, latou te iloa mai ai a‘u.

Ona maliu ane ai lea o Iesu, ua fetalai atu ia te i latou, ua faapea atu, Ua tuuina mai ia te au le pule uma lava i le lagi ma le lalolagi. O lenei, ia outou o atu e fai nuu uma lava ma soo, ma papatiso atu ia te i latou i le suafa o le Tamā, ma le Atalii, ma le Agaga Paia; ia outou a‘oa‘o atu ia te i latou ia tausi i mea uma ua ou fai atu ai ia te outou; faauta foi, ou te ia te outou i aso uma lava, e oo lava i le gataaga o le lalolagi. Amene.

O le amataga o le tala lelei ia Iesu Keriso o le Alo o le Atua.

O a‘u nei, ou te papatiso atu ia te outou i le vai; a o ia, na te papatisoina outou i le Agaga Paia.

O ona po ia ua maliu atu ai Iesu mai Nasareta o i Kalilaia, ua papatisoina foi o ia e Ioane i Ioritana. Ua maliu ae o ia nai le vai, ona iloa loa lea e ia o le lagi ua masae, ma le Agaga ua afio ifo i ona luga, e peiseai se lupe. Ua oo mai foi le siufofoga mai le lagi, ua faapea mai, O lo‘u Atalii pele oe, ou te fiafia ia te oe. Ona avea loa ai lea o ia e le Agaga i le vao. Sa i ai foi o ia i le vao i po e fagafulu, ua faaosoosoina e Satani; sa i ai ma manu feai, sa auauna foi agelu ia te ia.

Ua o foi i latou i Kapanaumi; ona maliu atu loa lea o ia i le sunako i le sapati, ua a‘oa‘o ai. Ua matuā ofo foi i latou i lana mataupu; auā ua ia a‘oa‘o ia te i latou e faapei o se ua i ai le pule, a e le pei o le au tusiupu. Sa i ai foi i lo latou sunako le tagata ua i ai le agaga leaga; ua alaga foi o ia, ua faapea mai, Aue, Iesu e le Nasareta! se a lau na ia i te i matou? ua e maliu mai ea ia fanoia i matou? ua ou iloa oe, o le Paia oe o le Atua. Ona vavao atu lea o Iesu ia te ia, ua faapea atu, Ina faalologo ia, ma e alu i fafo nai ia te ia. Ona faataafiti lea o le agaga leaga ia te ia, ua alaga foi ma le leo tele, ona alu lea o ia i fafo nai ia te ia. Ona taufaiofo ai lea o i latou uma, ua latou fesili ai le tasi i le tasi, ua faapea, Pe se a lenei? se a foi lenei mataupu fou? auā ua pule ia i agaga leaga, ma fetalai atu i ai, ona latou faalogo lava lea ia te ia. Ona logo atu loa lea o le tala ia te ia i le nuu uma o Kalilaia.

Ona ia faamaloloina lea o tagata e toatele na mamai i ma‘i eseese, ua ia tulia foi temoni e toatele, ua ia le tuu atu foi i temoni e tautala, auā ua latou iloa o ia.

A ua alu atu ia, ona matuā tala‘i atu lea ma faasalalau le tala, o lea e lei toe mafai ai o ia ona maliu faaali i le aai; a ua nofonofo i mea tuufua, ua latou o ane foi ia te ia mai itu uma.

O mea uma foi ua ia maliu atu i ai, po o faoa aai, po o aai tetele, po o aai, ua latou tuu ai e mamai i malae, ma aioi mai ia te ia, ina ia latou papai atu tau lava o le tuupao o lona ofu, o e na papai ia te ia, na malolo ai i latou uma.

Ona fetalai atu lea o ia ia te i latou, A o outou na, se a la outou upu ia te au nei, po o ai? Ona tali mai lea o Peteru, ua faapea mai ia te ia, O oe o le Keriso.

Ona amata ai lea e ia ona a‘oa‘o atu ia te i latou, e tatau ona tiga le Atalii o le tagata i mea e tele; e lafoaiina foi o ia e toeaina, ma le au faitaulaga sili, ma le au tusiupu, e fasiotia foi o ia; a mavae aso e tolu, i le toe tu mai.

Auā ua ia a‘oa‘o atu i ona soo, ma fetalai atu ia te i latou, Ua tuuina atu le Atalii o le tagata i lima o tagata, latou te fasioti foi ia te ia; a uma foi ona fasia o ia, e toe tu mai o ia i le aso tolu.

Sa i le ala i latou, ua o ae o Ierusalema, o muamua foi Iesu ia te i latou; ua ofo i latou, ua latou mulimuli atu foi ma le mata‘u. Ona toe ave lea e ia le toasefulu ma le toalua, ua ta‘u atu ia te i latou mea a oo ia te ia, ua faapea atu, Faauta, a tatou o ae nei i Ierusalema, e tuuina ai le Atalii o le tagata i le au faitaulaga sili, ma le au tusiupu; latou te faasala ia te ia, ia oti, latou te tuuina atu foi o ia i nuu ese, e faatauemu i latou ia te ia, e sasa foi ia te ia, e feanu foi ia te ia, ma fasioti ia te ia; a e toe tu mai o ia i le aso tolu.

Auā foi o le Atalii o le tagata na le sau o ia ina ia auauna tagata ia te ia, a e peitai ia auauna o ia, ma foaiina atu lona ola o le togiola e sui a‘i tagata e toatele.

Ua latou oo i Ierusalema; ua ulufale Iesu i le malumalu, ona tulia lea e ia i fafo o e na fefaatauai i le malumalu, ma fuli i lalo laulau o e na faatau tupe, ma nofoa o e na faatau lupe. Ua ia le mafai foi ina ia ui ane se tasi i le malumalu ma se avega. Ua a‘oa‘o atu foi o ia ia te i latou, ua faapea atu, E le ua tusia ea, E ta‘ua lo‘u fale o le fale tatalo mo nuu uma? a ua faia e outou ma ana o e fao mea. Ua faalogo ai le au tusiupu ma le au faitaulaga sili, ona latou saili ai lea, pe faapefea ona latou fasioti ia te ia; auā ua latou matatau ia te ia, ina ua ofo le motu o tagata uma i lana mataupu.

Ua a‘oa‘o Iesu i le malumalu, ona fetalai atu lea o ia, ua faapea atu, Pe faapefea ona fai mai o le au tusiupu, o le Keriso o le atalii ia o Tavita?

E inosia foi outou e tagata uma ona o lo‘u igoa; a o lē tumau seia oo i le iuga, e faaolaina lea.

Ona iloa atu lea e i latou o le Atalii o le tagata ua sau i ao ma le mana tele ma le mamalu.

E mavae atu le lagi ma le lalolagi; a e peitai a‘u upu, e le mavae lava ia.

O loo aai i latou, a e tago Iesu i le areto, ua faafetai, ona tofitofi lea, ma avatu ai ia te i latou, ua faapea atu, Ina tago ia, ina aai, o lo‘u tino lenei. Ua tago foi o ia i le ipu, ua faafetai, ma avatu ai ia te i latou, ua latou inu uma i ai. Ua fetalai atu foi o ia ia te i latou, O lo‘u toto lenei, o le toto o le feagaiga fou, ua faamaligiina mo tagata e toetele.

A ua le fetalai o ia, ua leai foi sana tali. Ona toe fesili mai lea o le ositaulaga sili ia te ia, ua faapea mai ia te ia, O oe ea o le Keriso, o le Alo o Lē viia? Ona fetalai atu lea o Iesu, O a‘u lava lea; tou te iloa foi le Atalii o le tagata e nofo i le itu taumatau o Le e ona le mana, e sau foi o ia i ao o le lagi.

Ona fesili mai lea o Pilato ia te ia, O oe ea e le tupu o tagata Iutaia? Ona tali atu lea o ia ia te ia, ua faapea atu, O lea lava.

Ona latou faaofu lea ia te ia i le ofu pāuli, ma latou taataai laau tuitui ua fai a‘i le pale, ua faapaleina ai o ia. Ona latou alolofa mai lea ia te ia, ua faapea mai, Talofa le tupu o tagata Iutaia. Ua latou ta foi i lona ao i le u, ma feanu ia te ia, ma tootuli ma ifo ia te ia. Ua uma ona latou faatauemu ia te ia, ona latou toeseina lea o le ofu pāuli ia te ia, ma faaofu ia te ia i ona lava ofu; ona latou ta‘ita‘i atu lea ia te ia ia faasatauroina o ia.

Ua tusia foi le tusi i le mea na molia ai o ia, O LE TUPU O TAGATA IUTAIA, Ua latou faasatauro foi faatasi ma ia tagata fao mea e toalua; o le tasi i lona itu taumatau, ma le tasi i lona itu tauagavale. Na taunuu ai le Tusi, ua faapea, Na faitauina o ia faatasi ma pagotata.

Ina alu ifo nei lava le Keriso, le tupu o Isaraelu, i le satauro, tatou te iloa ai, ma tatou talitonu ai. O e na faasatauroina foi faatasi ma ia, ua la upu leaga ia te ia.

O le itu aso e iva foi ua alaga ai Iesu, ua leo tele, ua faapea atu, Eloi, Eloi, lama sapatani? o lona uiga pe a faamatalaina, Lo‘u Atua e, lo‘u Atua e, se a le mea ua e tuulafoai mai ai a‘u?

Ua alaga Iesu ua leo tele, ona to ai lea o lana mānava. Ona saeluaina lea o le ie puipui o le malumalu, ua amata ifo i luga, ua oo lava i lalo. O le ta‘ita‘i o le toaselau, o le na tu atu i ona luma, ua iloa e ia ua faapea ona alaga o ia, ona to lea o lana mānava ona faapea atu ai lea o ia, E moni, o le Alo o le Atua lenei tagata.

Ua ulu atu i latou i le tuugamau, ona latou iloa lea o le taulealea o nofo i le itu taumatau, ua ofu o ia i le ofu pa‘epa‘e tatapuvae; ona latou matatau ai lea. A ua fai atu ia ia te i latou, Aua tou te matatau; o loo outou saili ia Iesu le Nasareta o le na faasatauroina; ua tu o ia; e le o iinei; ina matamata ia i le mea na latou tuuina ai o ia. A ia outou o atu, ina ta‘u atu i ona soo atoa ma Peteru, e muamua atu o ia ia te i outou i Kalilaia; tou te iloa ai o ia i lea mea, faapei ona fetalai atu ai o ia ia te outou. Ona latou vave o atu ai lea i fafo, ma sosola ese i le tuugamau; ua maua foi i latou i le gatete, ma le ofo tele lava; ua latou le fai atu foi se upu i se tasi, auā ua matatau.

Ua mavae foi ona fetalai atu o le Alii ia te i latou, ona aveina ae lea o ia i le lagi, ona nofo ai lea o ia i le itu taumatau o le Atua. Ona latou o atu lea, ma tala‘i atu i mea uma; ua galue faatasi le Alii ma i latou, ma ua faamaonia le upu i faailoga ua mulimuli ane ai. Amene.

Faauta foi, o le a to oe, ma e fanauina se tama tane, e te faaigoa ia te ia o Iesu. E sili o ia, e ta‘ua foi o le Alo o le Silisili ese; e foai atu e le Alii o le Atua ia te ia le nofoaiga a Tavita lona tamā; e fai o ia ma tupu i le aiga o Iakopo e faavavau; o lona malo foi e leai sona gataaga.

Ona fai atu lea o Maria i le agelu, A faapefea le mea nei; auā ou te lei iloa se tane? Ua tali mai le agelu, ua faapea mai ia te ia, E afio ifo le Agaga Paia i luga ia te oe, e faamalumalu ifo foi ia te oe le mana o le Silisili ese; o le mea lea e ta‘ua ai le tama paia, o le Alo o le Atua.

Ua fanau e ia lana tama ulumatua, ua ia aui ia te ia i le ie, ma faataoto ia te ia i le fale povi, auā latou te le ofi i le fale e tali ai malo.

auā o le aso nei ua fanau ai i le aai a Tavita, lo outou Faaola, o le Alii ia o Keriso. O le faailoga lenei ia te outou, e iloa e outou le tama meamea ua aui i le ie, o loo taoto i le fale povi. Ona faafuasei lea ona faatasi mai ma le agelu o ‘au mai le lagi e toatele, ua vivii i le Atua, ua faapea ane, O le viiga i le Atua i mea aupitoaluga; ma le manuia i le lalolagi; o le finagalo alofa i tagata.

Ua faamanuia atu Simeona ia te i laua, ua fai atu foi ia Maria lona tinā, Faauta, ua tuu le tama nei e pauu ai ma toe tutū ai tagata e toatele o i Isaraelu; e fai foi ma faailoga e faaleagaina; (e tū‘ia foi lou lava loto ia ati i le pelu), ina ia faaalia mai ai manatu o loto i tagata e toatele.

Ua papatisoina le nuu uma, ona papatisoina ai lea o Iesu, ua tatalo ia, ona faaavanoaina ai lea o le lagi, ona afio ifo lea o le Agaga Paia i ona luga, ua tino mai e peiseai se lupe, ua oo mai foi le siufofoga mai le lagi, ua faapea mai, O lo‘u Atalii pele oe, ua ou fiafia lava ia te oe.

Ona foi atu lea o Iesu i le mana o le Agaga i Kalilaia; ua logo atu foi le tala ia te ia ua soo ai lava le itu uma. Ua a‘oa‘o ia i o latou sunako, ua viia ai o ia e tagata uma.

Ua tuuina mai ia te ia le Tusi a le perofeta o Isaia. Ona fofola lea e ia le Tusi, ona maua ai lea o le mea ua tusia ai lenei upu. Ua i o‘u luga le Agaga o le Alii, auā ua na faauu mai ia te au e folafola le tala lelei i e matitiva; ua auina mai a‘u e ia e faamalolo i e loto momomo, e tala‘i le saolotoga i le tafeaga, ma ia pupula mata o e tauaso, e tuu saoloto i e ua faasauaina, e tala‘i le tausaga e finagalo malie mai ai le Alii. Ua taai e ia le Tusi, ona tuu atu ai lea i le auauna, ua nofo i lalo; ona pulatoa mai lea ia te ia o mata o tagata uma i le sunako. Ona amata lea ona fetalai atu o ia ia te i latou, O le aso nei ua taunuu ai lenei Tusi, o outou o faalogologo ai.

Ua matuā ofo i latou i lana mataupu; auā o lana fetalaiga ua i ai le pule. Sa i le sunako o le tagata ua i ai le agaga o le temoni leaga; ua alaga mai foi o ia, ua leo tele, ua faapea mai, Aue! Iesu e, le Nasareta, se a ea lau na ia te i matou? Ua e maliu mai ea ia fanoia i matou? Ua ou iloa oe, o le Paia oe o le Atua. Ona vavao lea o Iesu ia te ia, ua faapea atu, Ina faalologo ia, ma ē alu i fafo nai ia te ia. Ona lafo i lalo lea o le temoni ia te ia i o latou uma; ona alu lea i fafo ia te ia, ua le afaina lava ia. Ona ofo lea o i latou uma, ua fetautalatala‘i foi, ua faapea ane, O le a lenei mataupu? auā o le pule ma le mana ua fetalai atu ai o ia i agaga leaga, ona latou o ese lea i fafo.

Ua o atu foi temoni i fafo i e toatele, o alalaga, ua faapea mai, O oe lava le Keriso, le Alo o le Atua. Ona vavao lea o ia ia te i latou, ua ia le mafai ona latou tautala; auā ua latou iloa o ia o le Keriso.

Ua uma lana lauga, ona fetalai atu lea o ia ia Simona, Ina tuutuu atu ia i le loloto, ma tuu ifo ai o outou upega e maua ai ni i‘a. Ua tali mai Simona, ua faapea mai ia te ia, Le Alii e, ua atoa le po ua tigaina ai i matou, e leai ni mea ua maua; a ona o lau fetalaiga ou te tuu ifo ai le upega. Ua uma ona latou faia o lea mea, ona latou siomia lea o le au i‘a tele lava, ua masae ai lo latou upega. Ua latou genogeno atu i o latou o i le tasi vaa, e o mai e fesoasoani ia te i latou; ona latou o mai lea, ua faatumu e i latou vaa uma e lua, ua tāli gogoto ai. Ua iloa e Simona Peteru, ona faapaū lea o ia i tulivae o Iesu, ua faapea mai, Le Alii e, ina maliu ese atu ia oe ia te au, auā o a‘u le tagata agasala.

Ua silafia e Iesu o latou manatunatu, ona tali atu ai lea o ia, ua faapea atu ia te i latou, Se a le mea tou te manatunatu ai i o outou loto?

Amuia outou pe a itagia outou e tagata, pe a faateaeseina foi outou, ma faaleagaina e i latou, ma lafoaiina lo outou igoa, pei o se mea leaga, ona o le Atalii o le tagata.

Ua fetalai atu ia ia te i latou, A o outou na, se a la outou upu ia te au nei po o ai? Ona tali mai lea o Peteru, ua faapea mai, O oe o le Keriso o le Atua. Ona vavao atu lea o ia ia te i latou, ua fetalai atu, ne‘i ta‘uta‘ua lea mea i se tasi; ua faapea atu, E tatau ona tiga le Atalii o le tagata i mea e tele, ma ia lafoaiina e toeaina, ma faitaulaga sili, ma le au tusiupu, ia fasiotia foi; e faatuina foi o ia i le aso tolu.

Ua tuuina mai mea uma ia te au e lo‘u Tamā; e leai se tasi ua iloa le Atalii, ua na o le Tamā; e leai foi se tasi ua iloa le Tamā, ua na o le Atalii, ma se ua loto le Atalii e faaali atu i ai.

Ou te fai atu foi ia te outou, O sē ta‘ua a‘u i luma o tagata, e ta‘ua foi o ia e le Atalii o le tagata i luma o agelu a le Atua. A o lē faafiti mai ia te au i luma o tagata, e faafitia o ia i luma o agelu a le Atua.

Ua ave e ia le toasefulu ma le toalua, ua fetalai ia te i latou, Faauta, o le a o ae i tatou i Ierusalema, e taunuu ai o mea uma ua tusia e le au perofeta i le Atalii o le tagata. Auā e tuuina atu ia i nuu ese, e faatauemuina, e faaleagaina, e feanu foi i latou ia te ia, latou te sasa foi ma fasioti ia te ia; a o le aso tolu e toe tu mai ai o ia.

Auā ua sau le Atalii o le tagata e saili ma faaola i le na le iloa.

Ua ulu atu ia i le malumalu, ona tulia lea i fafo e ia o e na fefaataua‘i; ua faapea atu ia te i latou. Ua tusia, O lo‘u fale o le fale tatalo lea; a ua outou faia ma ana o e fao mea. Ua a‘oa‘o ia i aso fai soo i le malumalu. A o le au faitaulaga sili ma le au tusiupu, atoa ma alii o le nuu, ua latou fia fasioti ia te ia; a e lei maua e i latou se mea e fai ai; auā ua naunau le nuu uma i le fia faalogo atu ia te ia.

Ona silasila lea o ia ia te i latou, ua faapea atu, Se a foi lenei upu ua tusia. O le maa na lafoaiina e tufuga fai fale, ua avea lea ma maa tulimanu aupitoaluga? O sē paū i luga o lea maa, e gaugau ai o ia; a o se tasi e paū ifo i ai le maa, e nutipalaina ai o ia.

E inosia foi outou e tagata uma ona o lo‘u igoa.

Ona iloa atu ai lea e i latou o le Atalii o le tagata e sau i le ao, ma le mana ma le mamalu tele.

E mavae atu lava le lagi atoa ma le lalolagi; peitai o a‘u upu, e le mavae atu lava ia.

Ona tago ai lea o ia i le areto, ua faafetai, ua tofitofi, ma avatu ia te i latou, ua faapea atu, O lo‘u tino lenei, ua foaiina atu mo outou; tou te faia le mea nei e fai ma faamanatuga ia te au. Sa faapea foi ona tago i le ipu, ina ua uma ona tālisua, ua faapea atu, O lenei ipu o le feagaiga fou lea i lo‘u toto, ua faamaligiina mo outou.

O outou foi, ua outou tumau ia te au i o‘u tofotofoga. E faapei ona tofia mai e lo‘u Tamā o le malo ia te au, e faapea foi ona ou tofia outou, ina ia outou aai ma inu i la‘u laoai i lo‘u malo, ma ia nonofo i nofoālii, ma faamasino atu i itu aiga o Isaraelu e sefulu ma le lua.

Ua puapuaga o ia, ua atili ai lana tatalo; o lona afu foi ua pei o ‘alu‘alu toto ua paū ifo i le eleele.

E amata i nei ona po ona nofo o le Atalii o le tagata i le itu taumatau o le Atua mamana. Ona fai mai lea o i latou uma, O oe foi ea le Alo o le Atua? Ua fetalai atu ia ia te i latou, O a‘u lea ua outou fai mai ai na.

Ona fesili mai lea o Pilato ia te ia, ua faapea mai, O oe ea o le tupu o tagata Iutaia? Ua tali atu ia ia te ia, ua faapea atu, O lea lava.

Ua latou oo atu i le mea e ta‘ua o le mea o i ai le ulupoo, ua latou faasatauro ia te ia i lea mea, ma e pagotata, o le tasi i le itu taumatau, ma le tasi i le itu tauagavale. Ona fetalai atu lea o Iesu, Lo‘u Tamā e, ia e faamagaloina atu ia te i latou; auā ua latou le iloa le mea ua latou faia. Ua tufatufa e i latou ona ofu, ona fai ai lea o le vili.

Na tusia foi le tusi i ona luga, i le upu a Eleni, ma Roma, ma Eperu, O LE TUPU LENEI O TAGATA IUTAIA.

Ona fai mai lea o ia ia Iesu, Le Alii e, ia e manatua mai a‘u, pe a e afio mai i lou malo. Ona fetalai atu ai lea o Iesu ia te ia, E moni, ou te fai atu ia te oe, o le asō ta te faatasi ai ma oe i parataiso.

Ua oo i le itu aso po ua ono, ona pogisa uma ai lea o le nuu, ua oo lava i le itu aso e iva. Ua faapouliuliina foi le la; o le ie puipui foi o le malumalu ua saeluagalemuina. Ona valaau ai lea o Iesu, ua leo tele, ua faapea atu, Lo‘u Tamā e, ou te tuuina atu lo‘u nei agaga i ou aao; ua na fetalai ia upu, ona to ai lea o lana mānava.

Ua fememeai i latou i lenei mea, faauta foi, ua tutū mai ia te i latou tagata e toalua ua oofu i ofu pupula. Ua matatau i latou, ua punou foi o latou mata i le eleele, ona la fai mai lea ia te i latou, Se a le mea tou te saili ai le ua soifua i e ua oti? E le o iinei o ia, a ua tu; ia outou manatu i lona fetalai atu ia te outou, ina o i Kalilaia o ia,

Ona faamatala ai lea e ia ia te i laua o mea ua tusia ia te ia i Tusi uma, ua amata mai ia Mose atoa ma le au perofeta uma.

Ua fetalai atu ia ia te i latou, O upu ia na ou fai atu ai ia te outou, ina o ou ia te outou; e tatau ona taunuu o mea uma ua tusia ia te au i le tulafono a Mose, ma le au perofeta, ma salāmo. Ona tatalaina lea o ia o latou loto, ina ia latou lagona ai Tusi. Ua fetalai atu foi o ia ia te i latou, Ua faapea ona tusia, e faapea foi ona tatau ina tiga o le Keriso, ma toe tu nai e ua oti i le aso tolu; ina ia tala‘iina foi le salamo ma le faamagaloina o agasala i nuu uma i lona igoa, e amata mai i Ierusalema.

Ua oo ina o faamanuia e ia ia te i latou, ona te‘a ese lea o ia ia te i latou, ua siitia i le lagi. Ua latou ifo ia te ia, ona toe foi mai lea i Ierusalema ma le olioli tele;

Sa i le amataga, le Lokou, sa i le Atua le Lokou, o le Atua foi le Lokou. O ia lava sa i le Atua i le amataga. Na ia faia mea uma lava; e leai foi se mea e tasi na faia e lei faia e ia.

Sa i le lalolagi o ia, na ia faia foi le lalolagi; a e lei iloa lava ia e le lalolagi. Ua maliu mai o ia i lona lava nuu, a e lei talia o ia e ona lava tagata. A o i latou uma e na talia o ia, ma faatuatua i lona suafa, na ia avatu i ai o lea manuia, ia avea i latou ma fanau a le Atua. O i latou, e le o le toto na fanau ai, e le o le manao foi o le tino e le o le loto foi o le tagata, a o le Atua lava. Ua liu tino tagata le Lokou, sa mau foi o ia ma i tatou, (na matou matamata i lona mamalu; o le mamalu lava lea o le Alo e toatasi o le Tamā,) ua tumu o ia i le alofa tunoa ma le faamaoni.

Auā na tuuina mai e Mose le tulafono, a o le alofa tunoa ma le mea moni, mai ia Iesu Keriso ia.

O le taeao ua vaai atu ai Ioane ia Iesu o maliu mai ia te ia ona fai ane lea, Faauta i le Tamai mamoe a le Atua, na te aveesea le agasala a le lalolagi.

ua ia vaai foi ia Iesu o savali ane, ona faapea atu lea o ia, Faauta i le Tamai mamoe a le Atua.

Ua ia uluai maua lona lava uso o Simona, ona fai atu lea ia te ia, Ua ma maua le Mesia, (o lona uiga o le Keriso.)

Ona tali mai lea o Natanielu, ua faapea mai ia te ia, Rapi e, o oe lava o le Alo o le Atua, o oe lava le Tupu o Isaraelu.

Sa i ai vai maa tetele e ono, e tailua pe taitolu paita i vai, pei o le tu o le faamamāina o Iutaia. Ua fetalai atu Iesu ia te i latou, Ina faatutumu ia o vai i suāvai. Ona latou faatutumuina lea, ua oo lava i lau. Ua fetalai atu ia ia te i latou, Ina asu ane ia, ina ave i lē pule i le tausamaaga. Ona latou avatua lea. Ua tofo foi lē pule i le tausamaaga i le vai ua liu uaina, (a ua na le iloa le mea na maua ai, a o auauna na asu le vai ua latou iloa,) ona valaau atu lea o lē pule i le tausamaaga i le faatoafaiavā, ua fai atu ia te ia, E muamua ona au mai e tagata uma o le uaina lelei; pe a tele foi le inu i ai o tagata, ona au mai ai lea o le uaina leaga; a ua tuu e oe le uaina lelei, ua oo mai i lenei itu aso.

Ua ia faia le sasa i maea tua iti, ona tutuli atu ai lea ia te i latou uma lava i fafo o le malumalu, o mamoe atoa ma povi; ua sasaa ifo foi tupe a tagata faatau tupe, ma fuli atu laulau. Ua faapea atu foi o ia i e faatau lupe, Ave ese ia nei mea; aua le fai le fale o lo‘u Tamā ma fale faatau oa. Ona manatu ai lea o ona soo i le upu ua tusia, Ua ‘aina lava a‘u i le manao tele i lou fale. Ona fai mai ai lea o tagata Iutaia, ua faapea mai ia te ia, Se a se faailoga e te faaali mai ia te i matou, ina ua e faia nei mea? Ua tali atu Iesu, ua faapea atu ia te i latou, Ina lepeti ia o lenei malumalu, ona ou toe faia lea i aso e tolu.

Afai ua ou fai atu ia te outou i mea o i le lalolagi, a e le talitonu mai outou, pe faapefea ona outou talitonu pe a a‘u fai atu ia te outou i mea o i le lagi? E leai foi se tasi na alu ae i le lagi, na o ia na alu ifo mai le lagi, o le Atalii lea o le tagata o loo i le lagi. E pei ona siitia i luga e Mose o le gata i le vao, e ao ina faapea ona siitia i luga o le Atalii o le tagata; ina ia le fano le tasi e faatuatua ia te ia, a ia maua le ola e faavavau. Auā ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau. Auā e lei auina mai e le Atua lona Atalii i le lalolagi ina ia faasala i le lalolagi, a ia faaolaina le lalolagi ia te ia. O lē faatuatua ia te ia, e le faasalalaina o ia; a o le lē faatuatua, ua nofosala nei lava o ia, auā e lei faatuatua lava ia i le igoa o le Atalii e toatasi o le Atua.

O lē maliu mai mai lugā, e sili o ia i mea uma. O lē mai le lalolagi, o lo le lalolagi lava ia, e tautala foi o ia i la le lalolagi; a o lē maliu mai mai le lagi, e sili o ia i mea uma lava.

E alofa le Tamā ile Alo, ua tuu mai foi mea uma i lona aao. O lē faatuatua i le Alo, ua ia te ia le ola e faavavau; a o le le faatuatua i le Alo e le iloa e ia le ola, a o le toasa o le Atua o loo tumau lava i ona luga.

Ua tali atu Iesu, ua faapea atu ia te ia, O lē inu i lenei vai e toe fia inu ia. A o sē inu i le vai ou te avatu ia te ia, e le toe fia inu ia e faavavau; a o le vai ou te avatu ia te ia, e avea i totonu ia te ia o le vaipuna, e puna i luga i le ola e faavavau.

Ua fai mai le fafine ia te ia, Ua ou iloa o le a maliu mai le Mesia, (o lē ua igoa ia Keriso,) pe a maliu mai o ia, e faailoa mai mea uma ia te i matou. Ona fetalai atu lea o Iesu ia te ia, O a‘u lava lenei, o lē tautala atu ia te oe.

O le mea lea ua atili ai ona saili o Iutaia e fasioti ia te ia, auā e le gata ina soli e ia le sapati, a ua fetalai mai o ia, o le Atua lona lava Tamā; ua ia faatusa o ia ma le Atua. Ona fetalai atu lea o Iesu ia te i latou, ua faapea atu, E moni, e moni, ou te fai atu ia te outou, e le mafai e le Atalii ona fai o se mea, na o ia lava; a o mea na te vaai atu i le Tamā o faia; o mea foi o faia e ia, o loo faia foi ia lava mea e le Atalii. Auā o loo alofa le Tamā i le Atalii, ua faaali mai foi ia te ia mea uma lava e faia e ia; e faaali mai foi e ia ia te ia galuega silisili i ia galuega, ina ia outou ofo ai. Auā faapei ona toe faatutū ma faaola e le Tamā i e ua oti; e faapea foi ona faaola e le Atalii o i latou ua ia loto i ai. Auā e le faamasino e le Tamā i se tasi, a ua ia tuu mai i le Atalii, le faamasinoga uma lava; ina ia ava tagata uma lava i le Atalii, faapei ona latou ava i le Tamā. O le le ava i le Atalii, e lē ava lea i le Tamā na auina mai o ia. E moni, e moni, ou te fai atu ia te outou, o lē faalogo mai i la‘u upu, ma talitonu ia te ia na na auina mai a‘u, ua ia te ia le ola e faavavau: e le oo foi ina faasalaina o ia, a ua oo atu ia i le ola, sa i le oti,

E moni, e moni, ou te fai atu ia te outou, e oo i le aso, ua oo nei foi i ai, e faalogo mai ai e ua oti i le leo o le Atalii o le Atua; o e faalogo ai foi, e ola ai i latou. Aua faapei o le Tamā e i totonu ia te ia lava le ola: e faapea foi ona foai mai e ia i le Atalii, ia i totonu ia te ia lava le ola. Ua foai mai foi ia te ia le pule, ina ia fai e ia le faamasinoga, auā o ia o le Atalii o le tagata. Aua tou te ofo i lenei mea, auā e oo mai le aso e faalogo ai i lona leo o i latou uma ua i tuugamau, ma latou o mai ai; o e na amio lelei, e toe tutū i le ola; a o e na amio leaga, e toe tutū i le faasala.

Ua fetalai atu Iesu ia te i latou, O a‘u nei le areto o le ola; o lē sau ia te au, e le laina lava ia; o lē faatuatua foi ia te au, e le toe fia inu lava ia.

Auā ou te lei alu ifo mai le lagi e fai lo‘u lava loto, a o le finagalo o le ua auina mai a‘u.

O a‘u le areto ola na alu ifo mai le lagi; pe a ‘ai se tasi i lenei areto ona ola ai lea o ia e faavavau. O le areto foi ou te avatua, o lo‘u tino lea, ou te avatua ma ola o le lalolagi.

Ona fetalai atu lea o Iesu ia te i latou, E moni, e moni, ou te fai atu ia te outou, afai tou te le aai i le tino o le Atalii o le tagata, a le inu foi i lona toto, ua le i totonu ia te outou le ola. O lē ‘ai i lo‘u tino ma inu i lo‘u toto, ua ia te ia le ola e faavavau; ou te toe faatuina foi o ia i le aso gataaga; auā o lo‘u tino o le mea e ‘ai moni lea, o lo‘u toto foi o le mea e inu moni lea. O lē ‘ai i lo‘u tino ma inu i lo‘u toto, e tumau o ia ia te au, o a‘u foi ia te ia.

Ua faalogologo ai isi ona soo e toatele, ona faapea ai lea o i latou, O le upu faigata lena; o ai ea se na te mafaia ona faalogologo i ai? Ua silafia e Iesu i lona lava finagalo, ua muimui ona soo i lena mea, ona fetalai atu ai lea o ia ia te i latou. Tou te tausuai ea i lena mea? Pe faapefea pe a outou vaai atu i le Atalii o le tagata, o alu ae ia i le mea sa i ai anamua? O le agaga lea e tupu ai le ola, e le aoga le tino i se mea; o upu ou te fai atu ia te outou, o le agaga ia, o le ola foi ia.

Ua ia fetalai atu foi, O le mea lea na ou fai atu ai ia te outou, e le mafai e se tasi ona sau ia te au, pe a le foaiina atu ai ia te ia, e lo‘u Tamā.

Talu ai ua o ese isi o ona soo e toatele i tua, a e lei toe feoai i latou ma ia. Ona faapea atu lea o Iesu i le toasefulu ma le toalua, Pe tou te fia o ese foi? Ona tali mai lea o Simona Peteru ia te ia, Le Alii e, a matou o ea ia te ia? o ia te oe upu o le ola e faavavau.

Ua fetalai atu Iesu ia te i latou, ua faapea atu, O la‘u mataupu, e le o sa‘u lava, a o lana na auina mai a‘u. Ai se tasi e fia fai lona finagalo, e iloa ai e ia le mataupu, pe mai le Atua, pe ou te tautala fua lava a‘u. O lē tautala fua ia te ia, ua saili e ia lona lava viiga; a o lē saili ia viia le na auina o ia, e faamaoni lea, e leai foi sana amioletonu.

Ona toe fetalai atu lea o Iesu ia te i latou, ua faapea atu, O a‘u nei o le malamalama o le lalolagi; o lē mulimuli mai ia te au, e le savali o ia i le pouliuli, a e ia te ia le malamalama o le ola.

A e afai ou te faamasino e moni la‘u faamasinoga; auā ou te le toatasi lava a‘u, peitai o i maua ma le Tamā ua auina mai a‘u.

O a‘u nei lē molimau ia te au, o loo molimau foi ia te au le Tamā ua auina mai a‘u.

Ua fetalai atu foi o ia ia te i latou. O outou o lalo nei, o a‘u mai lugā; o outou e ō le lalolagi nei, e le so le lalolagi a‘u. O lea ua ou fai atu ai ia te outou. E oti outou i a outou agasala; auā a outou le talitonu, o a‘u lenei o ia, ona oti lea o outou i a outou agasala.

Ona fetalai atu lea o Iesu ia te i latou. Pe a siitia i luga e outou le Atalii o le tagata, ona iloa lea e outou o a‘u lenei o ia: ou te le fai fua foi se mea, a e peitai, faapei ona a‘oa‘o mai e lo‘u Tamā ia te au, o mea ia ou te tautala atu ai. O ia foi ua auina mai a‘u o loo ia te au ia; e le tuua a‘u e toatasi e le Tamā, aua ou te faia pea lava o mea e lelei ia te ia.

Ua faapea mai Iesu ia te i latou, E moni, e moni, ou te fai atu ia te outou, sa a‘u i ai, a o lei leai se Aperaamo.

Ua faafofoga Iesu ua latou tulia o ia i tua; ua ia silafia o ia, ona faapea atu lea ia te ia. Po ua e talitonu i le Atalii o le Atua? Ua tali mai o ia, ua faapea mai, Le Alii e, o ai ea o ia, ina ia ou talitonu ia te ia? Ua fetalai atu Iesu ia te ia. Ua e vaai ia te ia, o ia foi lenei ua tautala ma oe. Ona faapea mai lea o ia. Le Alii e, ua ou talitonu lava; ona ifo lea o ia ia te ia.

Ona toe fetalai atu lea o Iesu ia te i latou, E moni, e moni, ou te fai atu ia te outou, o a‘u ne‘i o le faitotoa o mamoe.

O a‘u le leoleo mamoe lelei; e tuu atu e le leoleo mamoe lelei o lona ola e sui a‘i mamoe.

O a‘u nei o le leoleo mamoe lelei; ua ou iloa a‘u mamoe, ua iloa foi a‘u e a‘u mamoe; pei ona silafia a‘u e le Tamā ma ou iloa le Tamā. Ou te tuuina atu foi lo‘u ola e sui a‘i mamoe. Ua ia te au foi isi mamoe e le o i lenei lotoā; e tatau ona ou ta‘ita‘iina mai o i latou foi, e faalogo foi i latou i lo‘u leo; ona tasi ai lea o le lafu mamoe, ma le leoleo mamoe e toatasi. O le mea lea e alofa mai ai le Tamā ia te au, auā ou te tuuina atu lo‘u ola, ina ia ou toe au mai ai. E leai se tasi na te aveeseina ia te au, a e peitai a‘u, ou te tuuina atu e a‘u lava. O ia te au le pule e tuuina atu, o ia te au foi le pule e toe au mai ai; ua ou maua lena poloaiga mai lo‘u Tamā.

Ua tali atu Iesu ia te i latou, Ua uma ona ou ta‘u atu ia te outou, a ua outou le talitonu mai lava. O galuega ou te faia i le suafa o lo‘u Tamā, e molimau mai ia ia te au. A ua outou le talitonu mai lava outou; auā e le ni a‘u mamoe outou, pei ona a‘u fai atu ia te outou. O a‘u mamoe e faalogo mai i latou i lo‘u leo, ua ou iloa foi i latou, ua latou mulimuli mai foi ia te au; ou te avatu foi le ola e faavavau ia te i latou; latou te le fano lava e oo i le faavavau, e le mafai lava e se tasi ona fao ia te i latou ai lo‘u lima. O lo‘u Tamā o le na foaiina mai i latou ia te au, e sili o ia i nisi uma lava; e le mafai e se tasi ona faoa i latou i le lima o lo‘u Tamā. O a‘u nei ma le Tamā, e tasi lava i maua.

O a‘u nei ma le Tamā, e tasi lava i maua. Ona toe fetagofi lea o Iutaia i maa, e fetogi ia te ia. Ona faapea atu lea o Iesu ia te i latou, E tele galuega lelei ua ou faaalia ia te outou mai lo‘u Tamā; o se fea ea o ia galuega tou te fetogi mai ai ia te au. Ua tali mai Iutaia ia te ia, ua faapea mai, E le se galuega lelei matou te fetogi ai oe, a o le upu leaga; auā o oe o le tagata, a ua e fai oe ma Atua.

A e afai ou te faia, e ui lava ina outou le talitonu mai ia te au, ia outou talitonu i galuega; ina ia iloa e outou, ma ia talitonu, o i totonu ia te au le Tamā, o a‘u foi o i totonu ia te ia.

Ua fetalai atu Iesu ia te ia, O a‘u nei o le toe tu ma le ola; o lē faatuatua mai ia te au, e ui lava ina oti, a e ola lava ia. O tagata ola uma o e faatuatua mai ia te au, e le oti lava e oo i le faavavau; po ua e talitonu mai ea i lena mea? Ona faapea mai lea o ia ia te ia, Ioe, le Alii e, ua ou talitonu lava, o oe le Keriso le Alo o le Atua, o lē maliu mai i le lalolagi.

Ua tagi Iesu.

Ua ia fetalai atu ia upu, ona alaga lea o ia ua leo tele, Lasalo e, ina sau ia i fafo. Ona alu ai lea i fafo o le na oti, ua fusifusia ona vae ma ona lima i ie na tanuma‘i, ua fusi foi ona mata i le solosolo. Ona fetalai atu lea o Iesu ia te i latou, Tatala ia ia te ia, ina tuu atu ia e alu.

O le taeao ua faalogo ai e le motu o tagata ua o mai i le tausamiga, ua maliu mai Iesu i Ierusalema, ona ave lea e i latou o lau o pama, ma o mai e faafetaiai ia te ia; ona latou alalaga lea, Osana! Ia manuia lē afio mai i le suafa o le Alii, o le Tupu o Isaraelu.

Ua tali atu Iesu ia te i laua, ua faapea atu, Ua oo mai ona po e oo ai le Atalii o le tagata i lona mamalu.

Lo‘u Tamā e, ia e tuuina atu le mamalu i lou suafa. Ona oo mai ai lea o le siufofoga mai le lagi, Ua ou tuuina atu le mamalu, ou te toe tuuina atu foi i ai le mamalu.

O a‘u foi, afai e siitia au ai le eleele, ou te tosina uma mai tagata ia te au. Ua fetalai ane ia lea upu e faailoa ai le uiga o lona maliu o le a maliu ai o ia.

Na fai mai ia upu e Isaia ina ua vaai atu o ia i lona mamalu, ma tautala mai ia te ia.

O lē faaleaoga ia te au, ma ua le talia a‘u upu, o ia te ia le tasi na te faasalaina ia; o le upu ua ou tautala atu ai, e faasala lea ia te ia i le aso gataaga. Auā ou te le tautala fua na o a‘u; a o le Tamā ua auina mai a‘u, na ia tuu mai le poloaiga ia te au i mea ou te fai atu ai, ma mea ou te tautala atu ai.

A o lei oo i le tausamiga o le paseka, ua silafia e Iesu ua oo mai ona po e tuua ai e ia lenei lalolagi, a e maliu atu i le Tamā; ua na alofa i ona tagata o i le lalolagi, ua ia alofa ia i latou ua oo i le gataaga.

Ua alu ia i fafo, ona faapea atu lea o Iesu, Ua viia nei le Atalii o le tagata, ua viia foi le Atua ia te ia. Afai e viia le Atua ia te ia, e viia foi o ia e le Atua ia te ia lava, e vave foi ona vivii o ia ia te ia.

Ua fetalai atu Iesu ia te ia. O a‘u nei le ala, ma le upu moni, ma le ola; e le alu atu lava se tasi i le Tamā, pe a le ui mai ia te au. Ana iloa e outou o a‘u, po ua iloa foi e outou lo‘u Tamā; e amata nei foi ona iloa o ia e outou; tou te vaai foi ia te ia.

E te le talitonu ea, o a‘u o i totonu o le Tamā, o le Tamā foi o i totonu ia te au? O upu ou te tautala atu ai ia te outou, ou te le tautala fua na o a‘u; a o le Tamā o loo nofo i totonu ia te au, o ia lava na te faia ia galuega. Ia outou talitonu mai ia te au, o a‘u o i totonu o le Tamā, o le Tamā foi o i totonu ia te au; a le o lea ia outou talitonu mai ia te au ona o ia galuega.

E moni, e moni, ou te fai atu ia te outou, o lē talitonu mai ia te au, e faia lava e ia o galuega ou te faia; e fai foi e ia mea e sili i ia mea, auā ou te alu i lo‘u Tamā. O mea uma foi tou te ole atu ai i lo‘u igoa, ou te faia lava; ina ia viia le Tamā ona o le Atalii. Afai tou te ole atu i se mea i lo‘u igoa, ou te faia lava. Afai tou te alofa mai ia te au, ia outou tausi mai i a‘u poloaiga.

O lea aso e iloa ai e outou, ou te i totonu o lo‘u Tamā; o outou foi o i totonu ia te au, o a‘u foi o i totonu ia te outou.

O le le alofa ia te au, e le tausia e ia a‘u upu; o le upu foi tou te faalogologo i ai, e le sa‘u lea, a o le upu a le Tamā ua auina mai a‘u.

Ua outou faalogo mai, ua ou fai atu ia te outou, Ou te alu, ma ou toe sau ia te outou. Ana outou alofa mai ia te au, po ua outou olioli i lo‘u fai atu, Ou te alu atu i le Tamā; auā e sili lo‘u Tamā ia te au.

O a‘u nei o le vine moni, a o lo‘u Tamā o lē galue vine ia.

O a‘u nei o le vine, o la outou. O lē tumau ia te au, ma a‘u ia te ia, o ia lava e fua tele mai; auā e le mafaia e outou ona fai o se mea e tasi pe a a‘u le i ai. Afai e le tumau se tasi ia te au, ona lafoaiina lea o ia i tua pei o le la laau, ma faapopoina, ona faapotopotoina ai lea e tagata, ma lafo i le afi, ua susunu ai. Afai tou te tumau ia te au, a tumau foi a‘u upu ia te outou, o mea uma lava tou mananao i ai, tou te ole atu ai, ona faia lea mo outou.

Faapei ona alofa mai o le Tamā ia te au, e faapea lava ona ou alofa atu ia te outou; ia tumau pea outou i lo‘u alofa. Afai tou te tausia a‘u poloaiga, ona tumau lea o outou i lo‘u alofa; pei ona ou tausia poloaiga a lo‘u Tamā, ma ou tumau i lona alofa. Ua ou fai atu nei mea ia te outou, ina ia tumau ai lo‘u olioli ia te outou, ia atoatoa foi lo outou olioli.

O la‘u poloaiga lenei, ia outou fealofani, pei ona ou alofa atu ia te outou. E le sili lava le alofa o se tasi i lenei alofa, ia tuuina atu e se tasi lona ola e sui a‘i ana uo.

Afai e ‘ino‘ino mai le lalolagi ia te outou, ua outou iloa ua muamua ona ‘ino‘ino mai ia te au, i lona ‘ino‘ino ia te outou.

O lē ‘ino‘ino mai ia te au, ua ‘ino‘ino foi o ia i lo‘u Tamā.

O ia lava e vivii mai ia te au, auā e maua e ia mai ia te au, ma faailoa atu ai ia te outou. O mea uma lava o i le Tamā, o ia te au foi ia; o le mea lea na ou fai atu ai, e maua e ia mai ia te au, ma faailoa atu ai ia te outou.

O lenei, ua matou iloa ua e silafia mea uma lava, e le aoga foi ia te oe ina fesili atu se tasi ia te oe; o le mea lea ua matou talitonu ai, na e maliu mai mai le Atua.

Faauta, e oo i le aso, ua oo nei foi i ai, e taapeape ai outou, e taitasi ma alu i lona aiga, a e tuua a‘u e toatasi; a ou te le toatasi lava, auā ua ia te au le Tamā. Ua ou fai atu nei mea ia te outou, ina ia outou maua le manuia ia te au; e maua foi outou e le puapuaga i le lalolagi, a ia outou loto tetele, ua ou manumalo i le lalolagi.

Ua fetalai atu ia mea e Iesu, ona tepa ae le o ona fofoga i le lagi, ua faapea atu, Lo‘u Tamā e, ua oo mai le aso. Tuu mai ia le viiga i lou Atalii, ina ia tuu atu foi e lou Atalii le viiga ia te oe. Auā ua e foai mai ia te ia le pule i tagata uma lava, ina ia avatu e ia le ola e faavavau ia te i latou uma lava na e foaiina mai ia te ia. O le ola e faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lea. Ua ou tuu atu le viiga ia e oe i le lalolagi; ua ou faaumaina le galuega na e tuuina mai ia te au, ou te faia. O lenei foi, lo‘u Tamā e, ia e tuu mai ia te au le manuia faatasi ma oe, o le manuia lava sa ia te i taua ma oe, a o lei faia le lalolagi.

Ou te tatalo mo i latou; ou te le tatalo mo le lalolagi, a o i latou na e foaiina mai ia te au, auā o ou tagata lava i latou. O a‘u mea uma, o au lava ia; o au mea, o a‘u lava ia; ua viia foi a‘u ia te i latou.

O lenei, ou te alu atu ia te oe, ou te fai atu foi nei mea a o ou i le lalolagi, ina ia maua e i latou lo‘u olioli ia atoatoa ai i totonu ia te i latou. Ua ou tuu atu lau afioga ia te i latou; ua ‘ino‘ino foi le lalolagi ia te i latou, auā e le ni o le lalolagi i latou, faapei o a‘u, ou te le so le lalolagi a‘u.

ina ia tasi i latou uma, faapei o oe le Tamā o i totonu ia te au, o a‘u foi o i totonu ia te oe, ina ia tasi i latou i totonu ia te i taua; ina ia talitonu le lalolagi ua e auina mai a‘u. O le manuia foi ua e foai mai ia te au, ua ou foai atu ia te i latou, ina ia tasi o i latou, faapei o i taua ua tasi; o a‘u o i totonu ia te i latou, o oe foi o i totonu ia te au, ina ia faaatoatoaina i latou ia tasi; ina ia iloa ai foi e le lalolagi, na e auina mai a‘u, ma e alofa mai ia te i latou, faapei ona e alofa mai ia te au. Lo‘u Tamā e, o lo‘u loto lenei ia te i latou ua e foaiina mai ia te au, ina ia latou faatasi ma a‘u i le mea ou te i ai, ina ia latou vaaia lo‘u manuia na e foaia mai ia te au; auā ua e alofa mai ia te au ao lei faavaeina le lalolagi.

Ua latou tali mai ia te ia, O Iesu le Nasareta. Ona fetalai atu lea o Iesu ia te i latou, O a‘u lenei. Ua tutū faatasi foi ma i latou o Iuta le na faalataina ia. Ua faapea atu Iesu ia te i latou, O a‘u lenei; ona tuumuli ai lea o i latou, ua pauu foi i le eleele.

Ua tali atu Iesu, E le mai le lalolagi nei lo‘u malo; afai ana mai le lalolagi nei lo‘u malo, po ua tau a‘u auauna, ina ne‘i tuuina atu a‘u ia Iutaia; a o lenei, e le mai iinei lo‘u malo. Ona fai mai lea o Pilato ia te ia, O lena foi, e te se tupu ea oe? Ua tali atu Iesu, O lea lava, o a‘u o le Tupu. O le mea lenei na fanau mai ai a‘u, o le mea foi lenei na ou sau ai i le lalolagi, ina ia ou molimau i le upu moni. O i latou uma lava o i le upu moni, e faalogo mai i latou i lo‘u leo.

Ua taataai foi e le ‘au o laau tuitui, ua fai a‘i le pale, ua faaee i lona ao, ua faaofu foi ia te ia i le ofu pāuli. Ona latou fai atu lea, Talofa! le tupu o tagata Iutaia. Ua latou po atu foi ia te ia.

Ua tali mai Iutaia ia te ia, O ia te i matou le tulafono, e tusa foi i la matou tulafono ona ia oti o ia, auā ua fai o ia e ia ma Alo o le Atua.

O le aso o le sauniga o le paseka lea aso, o lona itu aso foi pe ono; ua fai mai o ia ia Iutaia, Faauta i lo outou tupu. A ua alalaga i latou, Ave ese ia, ave ese ia; ina faasatauro ia te ia. Ua faapea mai Pilato ia te i latou. Ou te faasatauro ea i lo outou tupu? Ua tali atu lea au ositaulaga ia te ia. E leai so matou tupu, na o Kaisara.

Ua tusia foi e Pilato o le tusi faailoga, ma tuu i luga i le satauro; o le upu lenei ua tusia. O IESU LE NASARETA. O LE TUPU O TAGATA IUTAIA. Ona faitaulia lea o lea faailoga e Iutaia e toatele, auā o le mea na faasatauroina ai Iesu, e lata ane lea i le aai; ua tusia foi i le upu a Eperu, ma Eleni, ma roma. Ona faapea atu lea o le au ositaulaga o Iutaia ia Pilato. Aua e te tusi, O le tupu o tagata Iutaia; a ia faapea, Ua fai mai o ia. O a‘u o le tupu o tagata Iutaia. Ua tali atu Pilato. O le mea ua ou tusia, ua ou tusia lava.

Mulimuli ane ua silafia e Iesu ua uma ona taunuu o mea uma, ua ia fetalai ane. Ou te fia inu; ina ia taunuu ai le Tusi.

Ua talia le vineta e Iesu, ona fetalai ane lea o ia. Ua taunuu; ua faagaugau lona ao, ona tuuina atu lea o lona agaga.

ona iloa atu lea e ia o agelu e toalua ua oofu i ofu sisina, ua nonofo i le mea na tuu ai le tino o Iesu; o le tasi e i ulu, o le tasi e i vae. Ua la fai mai ia te ia, Funa e, se a le mea e te tagi ai? Ua faapea atu ia ia te i laua, Auā ua latou ave ese lo‘u Alii, ou te lei iloa foi le mea ua latou tuuina ai o ia. Ua ia fai atu na upu, ona fāliu lea i tua; ona iloa atu lea e ia o Iesu ua tu mai; a e lei iloa e ia o Iesu lava lea. Ua fetalai atu Iesu iia te ia, Funa e, se a le mea e te tagi ai? O ai ea e te sailia? A o le fafine, fa te ia o le leoleo ia o le fanua, ua fai mai ia te ia, Le Alii e, afai ua e ave ese ia te ia, ta‘u mai ia ia te au po o fea le mea ua e tuuina ai o ia; ona ou aveeseina lea o ia. Ua fetalai atu Iesu ia te ia, Maria e. Ona fāliu lea o ia, ua fai mai ia te ia, Raponi e, (o lona uiga, Le a‘oa‘o e).

Ua oo i le afiafi, o le uluai aso lea o le vaisapati, ua punitia faitotoa o le mea na potopoto ai le au soo, ona o le fefe ia Iutaia; ua maliu atu Iesu, ua tu i totonu; ona fetalai atu lea o ia ia te i latou, Ia outou manuia.

Ua mavae aso e valu, ua toe faatasi ona soo i le fale, ua faatasi ai foi i latou ma Toma; ua maliu atu Iesu, a o pupuni faitotoa, ua tu foi o ia i totonu, ma fetalai atu, Ia outou manuia. Ona fetalai atu lea o ia ia Toma, Au mai ia lou tamatamai lima iinei, vaai mai foi i o‘u lima; au mai ia foi lou lima, ma tuu mai i lo‘u itu; aua foi e te masalo vale, a ia e talitonu. Ona tali mai lea o Toma, ua faapea mai ia te ia, Lo‘u Alii e, ma lo‘u Atua e.

O isi foi faailoga e tele na faia e Iesu i luma o ona soo, e lei tusia i lenei tusi. A ua tusia ia mea, ina ia talitonu ai outou, o Iesu o le Keriso lava ia, o le Alo o le Atua; ina ia maua ai foi le ola i lona suafa e outou o e talitonu.

Ua fetalai atu o ia ia te i latou. Ina lafo ia le upega i le itu i matau o le vaa, ona outou maua ai lea. Ona latou lafo lea; a ua le toe mafai e i latou ona toso ae, ona o taumafa o i‘a. Ona fai atu lea o lena soo ua alofaina e Iesu ia Peteru, O le Alii lea. Ua faalogo Simona Peteru, o le Alii ia, ona ofu lea o ia i lona ofu, auā na faasau o ia; i le ua oso i le vai.

O isi mea foi e tele na faia e Iesu, afai e tusia uma lava, o la‘u taofi e le mafai ona ofi i le lalolagi ia tusi pe a tusia. Amene.

Na faailoa atu foi o ia e ia ia te i latou ua soifua ia, ina ua mavae o lona tiga, ua faamaonia i faailoga faamaoni e tele; e fagafulu po ua iloa ai o ia e i latou, ma na fetalai atu i mea a le malo o le Atua.

Ua fetalai atu ia i ia mea, ona siitia lea o ia, o latou o vaavaai atu; ua avea foi o ia i le ao nai o latou luma. Ua latou tulimatai ae i le lagi, a o afio ae o ia, faauta foi, o tagata e toalua ua tutū mai ia te i latou ma ofu sisina. Ua la fai mai, O outou tagata Kalilaia e, se a le mea tou te tutū ai, ma vaavaai i le lagi? O Iesu lena, ua aveina ae nai ia te outou i le lagi, e faapea ona toe afio mai o ia, pei o lona afio atu i le lagi na outou vaavaai i ai.

Sema e, o outou Isaraelu e, faalogo mai ia i nei upu; o Iesu o le Nasareta, o le tagata ua faasinoina e le Atua ia te outou i mea mamana, ma vavega, ma faailoga ua faia e le Atua i o outou luma e ia, pei ona outou iloa foi; o ia ua tuuina mai e le pule tonu ma le silafaga a le Atua anamua, na maua o ia e outou, ma outou faamau i le laau ma fasioti i lima o tagata faaletaupulea;

ua muai iloa e ia, o lea ua na fai mai ai i le toe tu mai o le Keriso, ua le tuua o ia i le tuugamau, ua le oo foi le pala i lona tino.

O lenei foi, ona ua siitia o ia i luga e le aao taumatau o le Atua, ma ua maua e ia mai le Tamā o le Agaga Paia na folafolaina, ua liligi ifo ai e ia lenei mea ua outou iloa ma faalogo ai nei.

O lenei foi, ia matuā iloa e le aiga uma o Isaraelu, o Iesu lava lena na faasatauroina e outou, ua faia lea e le Atua ma Alii ma Keriso.

ua fasioti foi e outou le Alii o le ola, o ia ua toe faatuina e le Atua nai e ua oti; o molimau i matou nei i lena mea.

ia iloa e outou uma, atoa ma le nuu uma o Isaraelu, o le suafa o Iesu Keriso o le Nasareta, o le na faasatauroina e outou, o le ua toe faatuina e le Atua nai e ua oti, o ia lava ua tu mai ai lenei tagata ua malolo i o outou luma. O le maa lenei na faaleaogaina e outou tufuga fai fale, ua avea ia ma tulimanu aupitoaluga. E leai foi se tasi ua i ai le ola; e leai lava se isi igoa i lalo o le lagi ua foaiina mai i tagata e mafaia ona faaolaina ai o i tatou.

O le Atua o tatou tamā ua na toe faatu mai ia Iesu, le na fasiotia e outou i lo outou faatautau i le laau. O ia ua aveina ae e le Atua i lona aao taumatau o le Alii i le ma le Faaola, na te avatua ia Isaraelu le salamo ma le faamagaloina o agasala.

A ua tumu o ia i le Agaga Paia, ua pulatoa i le lagi, ua iloa atu le pupula o le Atua, ma Iesu o loo tu i le itu taumatau o le Atua, ona fai atu lea, Faauta, ua ou iloa le lagi ua avanoa, ma le Atalii o le tagata o loo tu i le itu taumatau o le Atua.

O le fuaiupu foi o le tusi ua na faitau ai, o lenei, Pei o le mamoe ua ta‘ita‘iina ia fasia; pei o le tamai mamoe foi i luma o lē sele fulufulu e le tagi, e faapea foi o ia ua le tautala mai.

Ua outou iloa le upu na molia e ia i le fanauga a Isaraelu, ua folafola ai le tala lelei o le manuia ia Iesu Keriso, o le Alii ia o tagata uma lava;

o Iesu o le Nasareta, o le na faauuina e le Atua i le Agaga Paia ma le mana, o ia sa femaliuai ma agalelei ma faamalolo atu i e na faatoilaloina uma lava e le tiapolo; auā sa ia te ia le Atua.

O ia na toe faatuina e le Atu i le aso tolu, ma na faaalitinoina o ia, e le o le nuu, uma lava, a o molimau na uluai filifilia e le Atua, o i matou nei lava sa matou aai ma feinu ma ia, ina ua toe tu mai o ia i e ua oti. Ua na poloai mai foi ia te i matou e tala‘i atu i le nuu, ma molitino atu, o ia lava le ua tofia e le Atua e fai ma faamasino i e o ola ma e ua oti. Ua molitinoina mai o ia e le au perofeta uma, ona o lona suafa e maua ai le faamagalo o agasala a ē faatuatua ia te ia uma lava.

ua faamatala ma faasino atu, na tatau ona tiga o le Keriso, ma toe tu mai i e ua oti; ma ua faapea atu, O Iesu lenei ou te folafola atu ai ia te outou, o le Keriso ia.

e tiga le Keriso, e muai toe tu mai foi o ia i e ua oti, ma folafola e ia le malamalama i le nuu nei atoa ma nuu ese.

i lona Alo o Iesu Keriso lo tatou Alii, o le na fanau mai i le aiga o Tavita i la le tino, o le faasinotonuina mai o le Alo o le Atua o ia ma le mana, i la le agaga e paia lea, i le toe tu mai nai e ua oti;

O lenei, ua ta‘uamiotonuina i tatou i le faatuatua, o lea ua tatou lelei ai ma le Atua, ona o lo tatou Alii o Iesu Keriso;

a ua faaalitinoina mai e le Atua lona lava alofa ia te i tatou, ina ua maliu Keriso ma sui o i tatou, a o tatou agasala pea. O lenei, ua ta‘uamiotonuina nei i tatou i lona toto, e le faaolaina ea i tatou e ia ai le toasa i se a? Auā afai ua lelei i tatou ma le Atua i le maliu o lona Alo, ina o fai i tatou mona fili, e matuā faaolaina lava i tatou i lona soifua, o i tatou ua lelei ma ia. A e le gata i lea, a ua tatou mitamita foi i le Atua, ona o lo tatou Alii o Iesu Keriso, o ia ua tatou maua mai ai nei le leleiga.

Afai foi ua oti faatasi i tatou ma Keriso, ua tatou taofi, tatou te ola foi faatasi ma ia. Ua tatou iloa ua toe tu mai Keriso nai e ua oti, e le toe maliu lava o ia, e le toe pule le oti ia te ia. Auā o lona maliu, ua tasi lona maliu i la le agasala; a o lona soifua, e soifua lava ia i la le Atua. Ia faapea foi la outou taofi, ua outou oti i la le agasala, a ua outou ola lava i la le Atua i lo tatou Alii o Keriso Iesu.

Auā o le oti, o le totogi lea o le agasala; a o le ola e faavavau, o le mea foaifuaina mai lea e le Atua, i lo tatou Alii o Keriso Iesu.

O lenei, ua leai se faasala i e o ia Keriso Iesu, o e le savavali i la le tino, a e i la le Agaga; auā o le tulafono a le Agaga o le ola ua ia Keriso Iesu ua tuusaunoa mai lea ia te au nai le tulafono a le agasala ma le oti. Auā o le mea na le mafaia i le tulafono, ina ua vaivai ia ona o le tino, ua faia lea e le Atua i lona auina mai o lona lava Alo, ua tino tagata agasala, o le taulaga foi mo agasala, na ia faasalaina ai le agasala i le tino;

O ai se na te faateaeseina mai i tatou i le alofa o Keriso? o le puapuaga ea, po o le atuatuvale, po o le saua, po o le oge, po o le lavalavā, po o le pagatia, po o le pelu?

Auā ua ou mautinoa, e le mafaia e le oti, po o le ola, po o agelu, po o alii, po o e malolosi, po o mea i nei ona po, po o mea atali, po o le maualuga, po o le loloto, po o se tasi mea na faia, e le mafaia e ia mea ona faateaeseina mai i tatou i le alofa o le Atua, o loo ia Keriso Iesu lo tatou Alii.

o ia te i latou tupuga, mai ia te i latou foi le Keriso i la le tino, o lē pule aoao ia, o le Atua e viia e faavavau. Amene.

afai e te ta‘utino i lou gutu i le Alii o Iesu, ma talitonu i lou loto ua toe faatuina mai o ia e le Atua nai e ua oti, e faaolaina ai oe;

Auā o le mea lava lea na maliu ai Keriso, ma ua toe tu mai ai, ma ua soifua ai, ina ia faia o ia ma Alii i e ua oti atoa ma e o ola.

Auā e lei auina mai a‘u e Keriso e papatiso, a ia folafola atu le tala lelei, e le o le poto i upu, ina ne‘i faaleaogaina le satauro o Keriso. Auā o le mataupu i le satauro, o le valea lea i e o malaia; a o le mana o le Atua ia te i tatou ua faaolaina.

a o i matou, ua matou tala‘i atu ia Keriso na faasatauroina, o le mea e tausuai ai Iutaia, ma le valea ia Eleni; a e peitai o e ua valaauina, o Iutaia atoa ma Eleni, ua fai Keriso ma mana o le Atua, ma poto o le Atua ia te i latou.

A ua fua mai ia te ia ona i ai outou ia Keriso Iesu, o le ua avea ai mo tatou poto mai le Atua, o le amiotonu foi, ma le paia, ma le faaolataga;

Auā na tonu lo‘u manatu, ou te le iloa se tasi mea ia te outou tau lava o Iesu Keriso, o ia lava na faasatauroina.

o le mea na le iloa e se alii e tasi o lenei lalolagi; auā ana latou iloa, po ua latou le faasatauroina le Alii e ona le manuia.

pe a faapotopotoina outou faatasi ma lo‘u loto, ma le mana o lo tatou Alii o Iesu Keriso, o le suafa o lo tatou Alii o Iesu Keriso,

O le mea lea ia outou faatea ese ai le mea faafefete tuai, ina ia avea outou ma paluga fou, ona ua leai o se mea faafefete ia te outou; auā foi o Keriso la tatou paseka ua fasia mo i tatou.

a e peitai ua ia te i tatou le Atua e toatasi o le Tamā ia, e fua mai ia te ia mea uma, o i tatou foi ua fai mo ia; ma le Alii e toatasi o Iesu Keriso, ua faia e ia mea uma, o i tatou foi ua faia e ia.

O lenei, ou te faailoa atu ia te outou, e leai lava se tagata e tautala i le Agaga o le Atua na te ta‘uanatemaina o Iesu; e leai foi se tasi na te mafaia ona ta‘ua o Iesu o le Alii, a le se anoa le Agaga Paia.

A o outou, o le tino o Keriso outou, ma itu tino taitoatasi. Ua faatuina foi e le Atua i le ekalesia e muamua o aposetolo, o lona lua o perofeta, o lona tolu o a‘oa‘o, pito ane i ai o e fai vavega, i le ma mea alofa e faamalolo a‘i ma‘i, o e fesoasoani, o ta‘ita‘i, o gagana eseese.

Auā na ou tuuina atu ia te outou mea muamua o mea foi ia na ou maua foi e a‘u; na maliu Keriso ma sui o a tatou agasala, pei ona tusia; na tanu foi o ia, ma toe tu mai i le aso tolu, pei o upu ua i Tusi. Na iloa foi o ia e Kefa, ona iloa lea e le toasefulu ma le toalua. Ona toe iloa lea o ia e le au uso e lima selau ma ona tupu ina ua faatasi; o le toatele foi o ia latou o ola mai, ua oo i ona po nei; a o isi ua momoe.

A o lenei, ua toe faatuina mai Keriso i e ua oti, ua avea ma faapolopolo o e ua momoe. Auā ua oo mai le oti talu le tagata, ua oo mai foi le toe tutū o e ua oti talu le tagata. Auā faapei ona oti uma ia Atamu, e faapea foi ona faaolaina uma ia Keriso. A e peitai e taitoatasi ma lona lava tofi; o le faapolopolo o Keriso lea, mulimuli ane o e o ia Keriso e toe tutū i lona afio mai. Ona oo ai lea i le gataaga, e tuuina atu ai e ia le malo i le Atua, o le Tamā lea, pe a uma ona faaumatia e ia o alii sili uma, ma faipule uma, ma e malolosi. Auā e tatau ona pule o ia, seia tuuina e ia ona fili uma lava i lalo o ona vae. O le toe fili e faaumatia, o le oti lea; auā, Ua tuuina e ia o mea uma i lalo o ona vae; a e peitai ina ua fai mai, Ua tuuina i lalo mea uma ia te ia, ua iloa tino ai, ua vavae atu le na ia tuuina i lalo o mea uma ia te ia. Pe a uma foi ona tuuina i lalo ia te ia o mea uma, ona tuuina i lalo foi lea o le Alo lava i le na tuuina i lalo ia te ia o mea uma, ina ia pule aoao le Atua i le aoao o mea.

a e peitai sa faatauasoina o latou manatu; auā ua oo mai i nei ona po o tumau pea lea lava ufiufi pe a faitauina le feagaiga tuai, e lei faailoa ua faaumatia lea talu Keriso.

Afai foi ua ufitia la matou tala lelei, ua ufitia ia i e ua fano; ua faatauasoina manatu o i latou o e le talitonu e le atua o le lalolagi nei, ina ne‘i pupula atu ia te i latou le malamalama o le tala lelei i le mamalu o Keriso, ua tusa o ia ma le Atua. Auā matou te le tala‘iina i matou, a o Keriso Iesu le Alii; o i matou nei foi o a outou auauna ona o Iesu. Auā o le Atua o le na fai atu ia pupula mai le malamalama mai le pouliuli, ua faapupula mai e ia i o matou loto, ina ia malamalama e iloa ai le mamalu o le Atua i fofoga o Iesu Keriso.

Auā tatou te tutū atu uma lava i luma o le nofoa faamasino o Keriso e tatau ai; ina ia taitasi ma talitali i mea na faia i le tino, e pei o mea na faia, pe lelei pe leaga.

O lenei, afai o ia Keriso se tasi, o le tagata fou ia; ua mavae mea tuai, faauta, ua faafouina mea uma.

Auā o ia na le iloa le agasala, na faia lea e ia ma agasala, o le sui o i tatou; ina ia avea i tatou ma amiotonu a le Atua ia te ia.

Auā ua outou iloa le alofa tunoa o lo tatou Alii o Iesu Keriso, sa tamaoaiga ia, a ua faamativaina ona o outou, ina ia faatamaoaigaina outou i lona mativa.

Ua faasatauroina faatasi i maua ma Keriso; a e ou te le toe ola a‘u, a o Keriso o loo ola i totonu ia te au; o le ola foi ou te ola ai nei i le tino, ou te ola ai lava i le faatuatua i le Alo o le Atua, o le na alofa mai ia te au, ma foaiina mai o ia e ia e fai mo‘u sui.

Na faatauina mai i tatou e Keriso ai le faafanoga o le tulafono, ina ua faafanoina o ia mo i tatou; auā ua tusia, E faafanoina i latou uma o e ua faatautauina i le laau;

A ua oo atu i le faaatoaga o tausaga, ona auina mai lea e le Atua o lona Alo, na fanau i le fafine, na fanau ua nofo i le tulafono; ina ia faatau mai e ia i e na nofo i le tulafono, ia avea i tatou ma tamafai.

ina ia foai atu ia te outou e le Atua o lo tatou Alii o Iesu Keriso, o le Tamā e ona le mamalu, le Agaga e ona le poto ma le faaaliga, ina ia outou iloa lelei o ia; ia faapupulaina mata o outou loto, ina ia outou iloa le uiga o le faamoemoe ua i lona valaau mai, ma le uiga o le faulaigamea lelei o i lana tofiga ua silisili mo le au paia; ma le uiga o le silisili ese lava o lona mana ua ia i tatou o e faatuatua, e tusa ma le galuega a lona mana tele lava, na ia matuā galue ai ia Keriso, ina ua toe faatuina mai o ia nai e ua oti, ma faanofo ia te ia i lona itu taumatau i mea o i le lagi, e silisili lava i alii sili uma lava, ma faipule, ma e ua malolosi, ma alii, ma igoa uma lava e ta‘ua, e le gata i le olaga nei, a e oo foi i lē atali; ua ia tuu foi mea uma lava i lalo o ona vae, ma tuuina atu o ia e fai ma ulu o mea uma lava mo le ekalesia, o lona tino lea, o le tumu o le na te faatumuina mea uma lava i mea uma.

o loo ua atiina ae i luga o le faavae o le au aposetolo, atoa ma le au perofeta, o le maa tulimanu o Iesu Keriso lava lea; ua faatatauina ia te ia le fale atoa, o loo alu ae, ina ia fai ma malumalu paia i le Alii; o outou foi ua atiina ae faatasi outou ia te ia e le Agaga, e fai ma afioaga o le Atua.

O le na afio ifo, o ia lava lea na afio ae i luga o lagi uma lava, ina ia faatumuina e ia o mea uma lava.

A ia amio faamaoni i le alofa, ia tutupu i tatou ia te ia i mea uma, o le ulu lava ia, o ia foi o Keriso; e mai ia te ia ona tupu o le tino uma lava, o loo o faatatauina ma faasooina i ua uma lava e fesoasoani i ai, e tusa ma le galuega i le fua o itu tino taitasi, ia iu ina atiina ae le tino e ia ia ia i le alofa.

O lenei, ia faaa‘oa‘o outou i le Atua, faapei o le fanau pele; ma ia savavali i le alofa, faapei o Keriso foi na ia alofa mai ia i tatou, ua na foai mai foi e ia ia te ia e sui a‘i i tatou, o le taulaga ma le togiola i le Atua o le mea manogi lea;

auā o itu lava i tatou o lona tino, ma lona aano, ma ona ivi.

Ia ia te outou foi lea lava manatu sa ia Keriso Iesu, o ia sa uiga faatasi ma le Atua, e lei manatu ia o se mea faoa ina ia tusa lava o ia ma le Atua; a ua faamaulalo e ia ia te ia, ua uiga o ia faatasi ma le pologa, ina ua faia o ia faapei o se tagata; na iloa foi o ia ua tino mai i le tagata, ua faamaulalo e ia ia te ia, ua na anaana ua oo ina maliu, o le maliu lea i le satauro. O le mea lava lea ua matuā faaeaina ai o ia e le Atua, ma foaiina atu ai ia te ia o le suafa e silisili i suafa uma lava; ina ia tootuli o tulivae uma lava i le suafa o Iesu, o e o i le lagi, ma e o i le lalolagi, ma e o i lalo o le lalolagi; ma ia ta‘uta‘u atu e laulaufaiva uma lava o Iesu Keriso o le Alii lava ia, ia iu ina viia ai le Atua le Tamā.

ina ia ou iloa o ia, ma le mana o lona toe tu mai, ma ia faatasi a‘u i ona tiga, ona ua faatusaina a‘u ia te au i lona maliu, pe mafai lava ia te au ona oo atu i le toe tu mai o e ua oti.

o ia ua na laveai mai ia te i tatou nai le pule a le pouliuli, a ua na aumaia i latou i le malo o lona lava Alo pele; o ia ua tatou maua ai le togiola i lona toto, o le faamagaloina lea o agasala; o ia foi ua tusa ma le Atua e le vaaia, o le ulumatua o mea uma lava ua faia; auā na faia e ia o mea uma lava, o mea i le lagi ma mea i le lalolagi, o mea o vaaia ma mea e le o vaaia, o nofoālii, ma alii, ma alii sili, ma faipule; na faia e ia mea uma lava, na faia foi mo ia; o ia foi o le uluai o mea uma lava, o loo faatumauina foi mea uma lava ia te ia; o le ulu foi o ia o le tino, o le ekalesia lea; o le amataga foi o ia, o le ulumatua o e ua oti, ina ia fai o ia ma faasilisili i mea uma lava. Auā ua finagalo le Tamā ia mau i totonu ia te ia le tumu atoatoa; ina ia faaleleia e ia o mea uma lava ma ia, ina ia lelei ia te ia lava i le toto o lona satauro, o mea i le lalolagi atoa ma mea o i le lagi.

ina ia faamafanafanaina o latou loto, o faasooina i le alofa, ina ia maua ai le oloa uma o le mautinoa i le loto matala, ina ia iloa lelei le upu a le Atua sa lilo, o le Tamā lea, atoa ma Keriso; ua ia te ia le oloa uma o le poto atoa ma le malamalama, ua lilo ai.

auā o loo mau i totonu ia te ia le tumu uma lava o le itu Atua ua i lona tino; o loo ua faaatoatoaina foi outou ia te ia; o le ulu ia o alii sili uma lava atoa ma faipule;

ua uma ona tuueseina e ia o alii sili ma faipule, ona faaalia mai lea o i latou ia iloa uma, ua manumalo o ia ia te i latou i lea lava mea.

O lenei, afai ua toe faatuina outou faatasi ma Keriso, ia outou saili i mea o i lugā, o i ai Keriso, o loo tietie i le itu taumatau o le Atua.

Auā e toatasi le Atua, e toatasi foi le puluvaga i le Atua ma tagata, o le tagata o Keriso Iesu lea; o le na foaifuaina e ia ia te ia e fai ma togiola mo tagata uma lava, e fai ma molimau i ona lava po e tatau ai;

Ua leai foi se taofi ese, e sili lava lenei upu lilo i la le amio Atua, Ua faaali mai le Atua i le tino tagata, ua faaalia lana amiotonu e le Agaga, ua vaaia e agelu, ua tala‘iina atu i nuu ese, ua faatuatua i ai o e o i le lalolagi, ua aveina ae i le manuia.

ia e taofi lenei poloaiga ma le le ponā, ma ia le mata‘uleagaina, seia oo atu i le faaali mai o lo tatou Alii o Iesu Keriso. E faailoa mai lea mea e ia i ona lava aso, o ia o le Alii e manuia mona ua toatasi, o le Tupu o tupu, ma le Alii o alii; o loo na o ia o lē soifua pea lava, o lē afio i le malamalama e le masao i ai se tasi; e lei vaaia o ia e se tasi tagata, e le mafai foi ona vaai i ai; ia ia te ia le viiga ma le malosi e faavavau. Amene.

O lenei ou te matuā fai atu ia te oe i luma o le Atua ma le Alii o Iesu Keriso, o le na te faamasinoina o e ola atoa ma e ua oti, pe a oo i lona faaali mai ma lona malo;

o faatalitali atu i le faatuatuaga e manuia ai, o le faaalia lea o le pupula o le Atua silisili, o lo tatou Faaola o Iesu Keriso lea;

O le Atua, o le na fetalai mai anamua i o tatou tamā e le au perofeta, na auaua‘i mai i togafiti eseese, ua fetalai mai o ia ia i tatou i nei ona aso e gata ai e lona Alo, o le ua tofia e ia e fai mea uma lava mona tofi, na ia faia foi e ia mea uma; o ia o le pupula o lona mamalu ma ua matuā tusa lava ma ia, o loo o faatumauina e ia mea uma lava i lana afioga mana, na ia faamamāina e ia lava a tatou agasala, ona nofo ai lea o ia i le itu taumatau o lē Silisili ese o i lugā;

Auā o anafea ea na fetalai atu ai o ia i se tasi o le au agelu, O lo‘u Atalii oe, ua ou fanaua oe i le aso nei; i le ma lea, E fai a‘u mona Tamā, e fai foi o ia mo‘u Atalii? Ua faapea mai foi o ia i lona toe au mai o lana ulumatua i le lalolagi, Ma ia ifo agelu uma lava a le Atua ia te ia.

a ua faapea mai i le Alo, O lou nofoālii, le Atua e, faavavau faavavau lava lea; o le tootoo o lou malo, o le tootoo o le amiotonu lea. Ua e fiafia i le amiotonu, a ua e ‘ino‘ino i le amio leaga; o le mea lea, ua faauuina ai oe e le Atua, o lou lava Atua i le suāuu o le olioli e sili i e tou te faatasi. I le ma lea, Le Alii e, na e faavaeina le lalolagi i le amataga, o lagi foi o galuega ia a ou aao; e faaumatia ia mea, a o oe e te tumau pea; e pala ia mea uma lava pei o se ofu, pei o se ie pulupulu e te taataaia, e liua foi ia; a o oe, e te le liliu lava, e leai foi se iuga i ou tausaga.

Auā na tigaina o ia ina o tofotofoina, o le mea lea ua mafai ai e ia ona fesoasoani i e ua tofotofoina.

O lenei, le au uso paia e, e ua tofutofusia i le valaau mai le lagi, ina mafaufau ia i le aposetolo ma le faitaulaga sili ua ta‘uta‘uina e i tatou, o Keriso Iesu lea;

O lenei, ua ia i tatou le faitaulaga silisili, ua afio atu i le lagi, o Iesu le Alo o le Atua, ia tatou taofi mau ai i la tatou e ta‘utino atu. Auā e le ia te i tatou se faitaulaga sili e le mafaia ona tiga alofa faatasi ma i tatou i o tatou vaivai, a ua faaosoosoina o ia i mea uma pei o i tatou, a ua leai se agasala ia te ia.

O ia lenei sa tatalo atu i ona po na tino tagata mai ai, ma aioi atu ma le tagi tele ma loimata i le na mafaia ona faaola ia te ia nai le oti, na faafofogaina foi o ia i le mea na ia fefe ai. E ui lava o ia o le Alo, a o mea sa tiga ai o ia na a‘oa‘oina ai o ia ia usiusitai, ua faaatoatoaina foi o ia, ona avea ai lea o ia ma tupuga o le ola e faavavau ia i latou uma o e usiusitai ia te ia; ua ta‘ua e le Atua o le faitaulaga sili, e uiga faatasi ma Mekisateko.

peitai o ia ua tumau e faavavau, o le mea lea ua i ai ia te ia le faiva o faitaulaga e tumau pea; o le mea foi lea e mafai ai ia te ia ona faaola pea lava i e faalatalata atu i le Atua ona o ia, auā o loo soifua pea ia e fautua mo i latou. Auā e tatau ona ia ia i tatou o se faitaulaga sili faapena, e paia, e agamalu, e leai sona leaga, e taumamao ma ē agasala, e silisili foi ia i luga o lagi; e le aoga ia te ia i aso fai soo, pei o ia faitaulaga, e muamua ona fai o taulaga mo ana lava agasala, ona fai ai lea mo agasala a le nuu; auā ua atu tasi lava ona faia e ia o lea mea ina ua avatua o ia e ia ma taulaga. Auā o le tulafono e faatuina ai tagata o i ai le vaivai, e fai ma faitaulaga sili; a o le upu o le tauto na mulimuli i le tulafono, ua faatuina ai le Alo ua faaatoatoaina e faavavau.

O le aano lenei o mea o loo tautala ai nei, ua ia i tatou le faitaulaga sili e faapena, o le ua nofo i le itu taumatau o le nofoālii o lē Silisili ese o i le lagi,

Auā ana sao ona lelei o le feagaiga na muamua, po ua le sailia sona lua. Auā ua ta‘ua e ia ua le sao le na muamua, ona fetalai atu lea o ia ia te i latou, O loo fetalai mai le Alii, Faauta mai, e oo mai, ona aso ou te osi ai se feagaiga fou ma le aiga o Isaraelu atoa ma le aiga o Iuta;

O lana fetalaiga lea, O le feagaiga fou, ua ta‘utuai ai e ia o le ua muamua; a o le mea ua ta‘utuai ma ua tauāu ina vaivai, ua latatala lea ina mavae.

A o Keriso ua maliu mai, o le faitaulaga sili i mea lelei atali, ua ui ane i le fale fetafai e sili ona lelei ma ona atoatoa, e le faia e lima, o lona uiga e le faia faalelalolagi nei, ona ulu faatasi lava lea o ia i totonu o le mea paia, e le ma le toto o ‘oti ma tamai povi, a o lona lava toto, ua na maua le togiola e faavavau mo i tatou.

O le mea foi lea o loo fai ai o ia ma puluvaga o le feagaiga fou, ona o lona maliu foi e togiola a‘i agasala na faia a o i le muai feagaiga, ia maua ai e i latou ua valaauina o le tofi e faavavau na folafolaina. Auā pe a fai se tofiga, se‘i iloga e oti lē ana le tofiga, ona oo ai lea; auā e faamaonia se tofiga ona o e ua oti, ina ua le aoga a o ola mai lē ana le tofiga. Auā na le faamauina le na muamua a o le o i ai se toto;

Na toe ina uma foi o mea uma ona faamamāina i le toto e tusa ma le tulafono; a le o i ai foi se faamaligiina o le toto, ua leai foi se faamagaloina.

Auā ua le ulu atu Keriso i le mea paia ua faia e lima, o le faatusa lea o le mea moni, a o le lagi lava, ina ia iloa ai nei o ia i luma o le Atua mo i tatou;

na faapea foi Keriso, ua tasi lava ona avatua o ia ma taulaga, ina ia aveina ai agasala a le toatele, e faaali foi o ia ia te i latou o e faatalitali atu ia te ia i lona foi faalua mai, e le ina ia aveina agasala, a ia latou ola ai.

peitai ane o ia, na avatua e ia le taulaga e tasi mo agasala, ona nofo lea o ia i le itu taumatau o le Atua e faavavau,

O lenei, le au uso e, ua tatou sa‘oloto e ulu atu i le mea e sili ona paia ona o le toto o Iesu, i le ala fou e ola ai, ua faapaiaina e ia mo i tatou i le ie puipui, o lona lava tino lea, mona ua ia i tatou le faitaulaga sili e pule i le fale o le Atua,

ma ia vaavaai atu ia Iesu o le na te ta‘ita‘iina ma le na te faaatoatoaina le faatuatua; o le na onosai i le satauro, na faatauvaa ia te ia le mā, ona o le olioli sa tuu i ona luma, ua nofo foi o ia i le itu taumatau o le nofoālii o le Atua. Auā, ia outou mafaufau i le na onosai i le faatu‘i ese faapena ia te ia o e agasala, ne‘i faavaivai o outou loto ma outou le lavatia.

ma Iesu le puluvaga o le feagaiga fou, ma le toto e sausau ai, o loo tala mai i mea e sili ona lelei i lo le toto o Apelu;

O Iesu Keriso e le liu lava ia o ananafi, ma le asō, e oo foi i le faavavau.

A o le Atua e ona le manuia, o le na toe faatuina mai nai e ua oti le Leoleo mamoe sili, o lo tatou Alii o Iesu, ona o le toto o le feagaiga e faavavau, ia faaatoatoaina outou e ia i galuega lelei uma lava, ina ia outou faia lona finagalo, ia galue o ia i totonu ia te outou le mea e mālie i ona luma, ona o Iesu Keriso; ia ia te ia le viiga e faavavau faavavau lava. Amene.

O‘u uso e, aua tou te faailoga tagata i lo outou taofi i le mataupu o le faatuatua i lo tatou Alii mamalu o Iesu Keriso.

Ia faafetaia le Atua, le Tamā o lo tatou Alii o Iesu Keriso, o le na fanaufouina i tatou ona o lona alofa tele, ina ia iu i le faamoemoe ua ola, i le toe tu mai o Iesu Keriso nai e ua oti, ia iu i le tofi e le pala, e leai se leaga o i ai, e le mamae lava, o loo teu i le lagi mo i tatou, o e o leoleoina e le mana o le Atua, i le faatuatua, ia iu i le ola ua saunia, e faaalia mai i ona po e gata ai.

a o le toto tāua o Keriso pei o lo le tamai mamoe e le ponā lava, e leai foi sona leaga; na silafia lava e ia anamua a o lei faavaeina le lalolagi, a ua faaalia mai i ona po nei e gata ai ona o outou o e faatuatua i le Atua talu o ia, na ia toe faatu mai ia te ia nai e ua oti, ma na avatu le mamalu ia te ia, ina ia i ai i le Atua lo outou faatuatua ma lo outou faamoemoe.

Ua outou o mai ia te ia, o le maa ola o ia na lafoaiina e tagata, a ua filifilia e le Atua, ua tāua lava, o outou foi, ua atiina ae outou pei o maa ola, o le fale faaleagaga, o le au ositaulaga paia, e avatu taulaga faaleagaga e mālie i le Atua ona o Iesu Keriso. Auā foi ua i le Tusi, Faauta, ou te tuu i Siona le maa tulimanu ua filifilia, ma le tāua; e le ma foi sē faatuatua ia te ia.

O lenei, ua ia te outou o e faatuatua o lenei mamalu; a o e faalogogata, O le maa na lafoaiina e tufuga fai fale, ua avea lava lea ma tulimanu aupitoaluga, ma maa e tausuai ai, ma papa e tautevateva ai; o e tausuai i latou ua faalogogata i le upu, na tofia foi i latou i lea lava mea.

Auā na valaauina outou ona o lea lava mea; auā na tigaina Keriso lava o le sui o outou, ua tuuina mai ai e ia le faaa‘oa‘o mo outou, ina ia outou mulimuli atu i ona tulagāaao. O le na le agasala lava, na le iloa foi se pepelo i lona fofoga; o le sa agateleina, a e lei toe agatele atu, na faatigaina o ia, a e lei faamatau atu, a ua tuuina atu o ia e ia i le na te faamasino tonu. O le na aveina e ia lava a tatou agasala i lona lava tino i luga i le laau, ina ia tete‘a outou ma agasala, tatou te nofo ai i le amiotonu, O ona faalavalava ua malolo ai i tatou. Auā o outou sa faapei o mamoe na sē, a o lenei ua toe liliu mai outou i Le na te leoleoina ma tausia o outou agaga.

Auā o Keriso foi na tigaina o ia faatasi mo agasala, o le amiotonu o le sui o le amioletonu, ina ia ta‘ita‘iina e ia o i tatou i le Atua; na fasiotia o ia i le tino, a ua faaolaina mai i le Agaga;

O le faatusa foi lea mea o le papatisoga, o loo faaola mai ai nei ia i tatou, (e le o le faateaeseina o le eleele o le tino, a o le tali a le loto fuatia ifo lelei i le Atua,) i le toe tu mai o Iesu Keriso; o ia o loo i le itu taumatau o le Atua, ina ua afio ae o ia i le lagi, ua toilalo ia te ia o agelu, ma faipule, atoa ma ē malolosi.

O a‘u o Simona Peteru, o le auauna ma le aposetolo a Iesu Keriso, o la‘u tusi lenei i e ua maua le faatuatua e tusa lona lelei ma lo matou, i le amiotonu o lo tatou Atua, o lo tatou Faaola lea o Iesu Keriso. Ia faateleina ia te outou le alofa tunoa ma le manuia i lo outou iloa lelei le Atua, atoa ma lo tatou Alii o Iesu.

Auā a faapea, ona matuā faaofia ai lea o outou i le ala o le malo e faavavau o lo tatou Alii o lo tatou Faaola lea o Iesu Keriso.

Auā e lei usiusitai i matou i tala o le vavau ua fatua ma le poto, ina ua matou faailoa atu ia te outou le mana ma le afio mai o lo tatou Alii o Iesu Keriso; peitai na matou vaavaai atu i lona lava mamalu. Auā na maua e ia mai le Atua le Tamā o le mamalu ma le viiga, ina ua tŭlei mai ia te ia le siufofoga lava nai le mamalu silisili ese, ua faapea mai, O lo‘u Atalii pele lenei, ou te fiafia lava ia te ia.

A ia tutupu outou i le alofa tunoa ma le poto i a lo tatou Alii o lo tatou Faaola lea o Iesu Keriso. Ia ia te ia le viiga i ona po nei, ma ia oo i le faavavau lava. Amene.

Si a‘u fanau e, ou te tusi atu nei mea ia te outou, ina ne‘i agasala outou; pe afai foi e agasala se tasi, o ia te i tatou le fautua i luma o le Tamā, o Iesu Keriso lea, o lē amiotonu. O le togiola foi o ia mo a tatou agasala, e le gata foi i a tatou, a e atoa foi ma agasala a le lalolagi uma lava.

Ua outou iloa foi na faaalia o ia ina ia aveeseina e ia a tatou agasala; e le o ia te ia foi se agasala.

Ua tatou iloa foi ua maliu mai le Alo o le Atua, ua ia foaiina mai foi le mafaufau ia te i tatou, ina ia tatou iloa ai loo moni, o i ai foi i tatou i loo moni, o i lona Alo o Iesu Keriso. O lenei lava le Atua moni, ma le soifua e faavavau.

ia i le Atua poto e toatasi o lo tatou Faaola, le viiga ma le mamalu, o le malosi ma le pule, i nei ona po, ma ia oo i le faavavau lava. Amene.

O a‘u o Ioane o la‘u tusi lenei i ekalesia e fitu o i Asia; ia ia te outou le alofa tunoa ma le manuia mai ia te ia o loo soifua, na soifua foi, o le a afio mai; mai Agaga foi e toafitu o i luma o lona nofoālii; mai ia Iesu Keriso foi, o le molimau faamaoni, o le ulumatua o e ua oti, ma le pule i tupu o le lalolagi. O le na alofa mai ia te i tatou, na ia fufulu mai foi ia te i tatou i a tatou agasala i lona lava toto, na ia faia foi i tatou ma tupu ma faitaulaga i le Atua o lona lava Tamā, ia ia te ia le viiga ma le malosi e faavavau faavavau lava. Amene. Faauta, o loo afio mai o ia ma ao, e iloa atu foi o ia e mata o tagata uma, atoa ma e na tu‘ia o ia; e taufaitagitu‘i foi itu aiga uma o le lalolagi ona o ia. E moni, Amene.

O a‘u le Alefa ma le Omeka, o le amataga ma le gataaga, ua fetalai mai ai le Alii, o loo soifua, na soifua foi, o le a afio mai, e ona le malosi uma lava.

O a‘u le Alefa ma le Omeka, o le muamua ma le mulimuli; i le ma lea, O mea e te vaaia ia e tusi i se tusi, ma avatu i ekalesia o i Asia, o Efeso, ma Semurana, ma Perekamo, ma Tuatira, ma Sarataisa, ma Filatelefaia, ma Laotikaia.

Na ou fāliu atu e vaai i le leo na tautala mai ia te au; ua ou fāliu, ona ou iloa atu lea o tuugālamepa auro e fitu. Ua i totonu foi i tuugālamepa e fitu le tasi e pei o le Atalii o le tagata, ua ofu ia i le ofu tatapuvae, ua fusia foi lona fatafata i le fusi auro; ua sinasina foi lona ao ma ona lauao e pei o le fulufulu mamoe ona sinasina, e pei o le kiona lava; o ona fofoga foi e pei o le mumū o le afi; ma ona vae e pei o le ‘apa pupula, e peiseai ua mu i le ogāumu; o lona siufofoga foi e pei o le taalili o vai e tele; ua i lona aao taumatau o fetu e fitu; ua alu atu foi ai lona fofoga o le pelu e faataumaai ona itu e maamaai lava; o ona fofoga foi e pei o le pupula o le la ina o mu toto‘a.

Ua ou iloa atu ia te ia, ona ou paū ifo lea i ona vae e peiseai ua oti; a ua ia faaee mai lona aao taumatau i luga ia te au, ua faapea mai ia te au, Aua e te fefe; o a‘u le muamua ma le mulimuli; o lē ola nei lava, sa ou oti, faauta foi, ou te ola e faavavau faavavau lava; Amene, o ia te au foi ki o seoli ma le oti.

Ona fai mai ai lea ia te au o le tasi o le au toeaina, Aua e te tagi; faauta, ua manumalo le Leona o le itu aiga o Iuta, o le Aa o Tavita, e fofola i le tusi, ma tatala i ona faamaufaailoga e fitu. Na a‘u iloa foi, faauta, ua tu mai i le va o le nofoālii ma mea ola e fa, e i ona tua foi le au toeaina, o le Tamai mamoe e peiseai na fasia, e fitu ona nifo ma ona mata e fitu, o Agaga ia e toafitu o le Atua ua aauina atu i le lalolagi uma.

ua latou pepese foi i le pese fou, ua faapea atu, Ua tatau lava oe ina ia e tago i le tusi, ma tatala i ona faamaufaailoga; auā na fasia oe, ua e faatauina foi i matou i lou lava toto mo le Atua, mai itu aiga uma, ma gagana eseese, ma nuu, atoa ma atu nuu;

Na a‘u iloa atu foi, ma ou faalogo i le leo o agelu e toatele, o e ua faataaliolio i le nofoālii, ma le leo o mea ola e fa atoa ma le au toeaina; o lo latou faitau aofai ua mano ni mano, ma afe ni afe, o loo faapea atu ma le leo tele, Ua tatau lava le Tamai mamoe na fasia ina ia tuuina atu ia te ia le mana, ma le oa, ma le poto, ma le malosi, ma le faaneeneega, ma le viiga, ma le faamanū. Na ou faalogo foi i mea uma na faia o i le lagi, ma le lalolagi, ma lalo ifo o le lalolagi, ma mea foi o i le sami, atoa ma mea uma o i ai i ia mea, o loo faapea atu, Ia ia te ia o lē tietie i le nofoālii atoa ma le Tamai mamoe le faamanū, ma le faaneeneega, ma le viiga, ma le malosi e faavavau faavavau lava. Ona fai atu lea o mea ola e fa, Amene; ona faapaū lea o toeaina e toaluafulu ma le toafa ma ifo atu i lē soifua e faavavau e faavavau lava.

Ua mavae atu ia mea, ona ou iloa lea, faauta foi i le motu o tagata e toatele mai atu nuu uma, ma aiga, ma nuu, ma gagana eseese, e le ma faitaulia e se tasi, o loo tutū i latou i luma o le nofoālii ma luma o le Tamai mamoe, ua oofu i latou i ofu sisina, ua i ai foi lau pama i o latou lima; ua latou alalaga foi ma leo tetele, ua faapea atu, O i ai le faaolataga i lo tatou Atua o lē tietie i le nofoālii, atoa ma le Tamai mamoe. Ua tutū faataaliolio agelu uma i le nofoālii ma le au toeaina ma mea ola e fa, ua latou faapaū fao i luma o le nofoālii, ma ifo atu i le Atua,

auā o le Tamai mamoe o loo i luma o le nofoālii na te fafaga ia i latou, ma ta‘ita‘i ia te i latou i puna o vai ola; e sōloieseina foi e le Atua o loimata uma nai o latou mata.

Ua ili foi e lona toafitu o agelu le pu, ona i ai lea i le lagi o leo tetele, ua faapea mai, O malo o le lalolagi ua avea mo lo tatou Alii ma lona Keriso, e fai foi o ia ma tupu e faavavau faavavau lava.

A ua latou manumalo ia te ia ona o le toto o le Tamai mamoe, ma le upu a la latou mau, ua latou le faapelepeleina foi lo latou ola ua oo i le oti.

Na a‘u iloa, faauta foi, ua tu mai le Tamai mamoe i le mauga o Siona, ua faatasi foi ma ia tagata e selau afe ma afe e fa sefulu ma le fa o afe, ua tusia le suafa o lona Tamā i o latou muaulu.

Na a‘u iloa faauta foi, o le ao sinasina, ua tietie foi i le ao le tasi ua pei o le Atalii o le tagata, ua i lona ao le palealii auro, ua i lona aao foi le selesaito maai.

Latou te tau le taua ma le Tamai mamoe, a e manumalo le Tamai mamoe ia te i latou, auā o le Alii ia o alii ma le Tupu o tupu; o e ua ia te ia foi ua valaauina i latou, ma filifilia, ma faamaoni.

Na a‘u iloa atu le lagi ua avanoa, faauta foi, o le solofanua sinasina, o lē tietie ai foi ua igoa ia o le Faamaoni ma le Moni, o le amiotonu foi na te faamasino ai ma tau ai le taua; ua pei o le mumū o le afi ona fofoga, ua i lona ao foi palealii e tele; ua ia te ia le suafa ua tusia e le iloa e se tasi ua na o ia lava; ua ofu foi o ia i le ofu ua fufui i le toto; ua faasuafaina o ia, O le Lokou o le Atua. O ‘au foi o i le lagi ua mulimuli atu ia te ia i luga o solofanua sisina, ua oofu i latou i le ie vavae sinasina ma le mamā. Ua alu atu foi le pelu maai nai i lona fofoga, ina ia taia a‘i e ia o nuu; e pule foi o ia ia te i latou i le tootoo uamea; e soli foi e ia le soligāvine o le toasa mamafa o le Atua e ona le malosi uma lava. Ua ia te ia foi le suafa ua tusia i lona ofu ma lona vae. O LE TUPU O TUPU, MA LE ALII O ALII.

Ua fetalai mai foi lē tietie i le nofoālii, Faauta, ou te faia ia fou mea uma lava. Ua fetalai mai foi o ia ia te au, Ia e tusi; auā o upu nei e moni ma le faamaoni ia. Ua fetalai mai foi o ia ia te au, Ua uma ona fai. O a‘u le Alefa ma le Omeka, o le amataga ma le gataaga. O le ua fia inu ou te foaifuaina atu ia te ia ai le puna o le vai ola.

E leai foi se toe faafano e tasi; e i ai foi le nofoālii o le Atua ma le Tamai mamoe, o ana auauna foi latou te auauna ia te ia;

Faauta foi, ou te vave alu atu; ua ia te au foi le taui ou te taui taitasi atu ia tusa ma lana ua fai. O a‘u le Alefa ma le Omeka, o le amataga ma le gataaga, o le muamua ma le mulimuli.

O a‘u o Iesu na ou auina atu la‘u agelu e molimau ia te outou i ia mea i ekalesia. O a‘u o le Aa ma le fanau a Tavita, o le fetu ao pupula.

Ua fai mai lē molimau i nei mea, E moni, ou te vave alu atu. Amene. O lea lava, le Alii e Iesu, ia e afio mai. Ia ia te outou uma le alofa tunoa o lo tatou Alii o Iesu Keriso. Amene.