14 – Okusazaamu olubuto

Bwʼatyo Katonda nʼatonda omuntu mu kifaananyi kye, mu kifaananyi kya Katonda mwe yamutondera; nʼabatonda omusajja nʼomukazi.

Buli anaayiwanga omusaayi gwʼomuntu, nʼogugwe gunaayiibwanga, kubanga mu kifaananyi kya Katonda, Katonda mwe yakolera omuntu.

“Ebibereberye byonna binjawulireko. Abaana abaggulanda mu Isirayiri yonna banaabanga bange; nʼebisolo ebiggulanda nabyo binaabanga byange.”

“Tottanga.”

“Anaakubanga omuntu nʼamutta, naye ateekwa buteekwa okuttibwa.

“Singa abantu babadde balwana, ne bakubiramu omukazi ali olubuto, olubuto ne luvaamu, kyokka nʼatabaako mutawaana mulala gwonna, oyo amukubye anaatanzibwanga omutango bba wʼomukazi gwʼanaasalanga, era nga nʼabalamuzi bagukkirizza. Naye singa omukazi oyo abaako omutawaana ogwʼamaanyi, ekibonerezo kineenkanaakananga nʼekyo kyʼamukoze. Bwʼanattanga anattibwanga,

“Tolemanga kusalirawo muntu nsonga ze mu bwenkanya, olwokubanga mwavu. Teweeyingizanga mu nsonga za bulimba, era tottanga muntu atalina kibi oba atazzizza musango, kubanga aliko omusango sigenda kumwejjeereza.

Kubanga obulamu bwʼekitonde buli mu musaayi, ate nkibawadde okubatangiririra ku kyoto; omusaayi gwe gutangiririra obulamu bwʼomuntu.

“ ‘Mu baana bo towangayo nʼomu ngʼekiweebwayo ekyokeddwa mu muliro eri Moleki, kubanga erinnya lya Katonda wo tosaanira kuliweebuulanga. Nze Mukama.

Awo Mukama nʼagamba Musa nti, “Tegeeza abaana ba Isirayiri bwʼoti nti, Omuyisirayiri yenna, oba omunnaggwanga atuula mu Isirayiri, bwʼanaawangayo omwana we ngʼekiweebwayo eri Moleki, kitaawe wʼomwana oyo ajjanga kuttibwa. Abantu abʼomu kitundu ekyo mwʼabeera banaamukubanga amayinja. Nange kennyini, omuntu oyo nnaamunyiigiranga, era nnaamugobanga ne mmugaana okukolagananga ne banne, kubanga awaddeyo omu ku baana be ngʼekiweebwayo eri Moleki, nʼayonoona Awatukuvu wange era nʼavumisa erinnya lyange ettukuvu. Era abantu abʼomu kitundu ekyo mwʼabeera, bwe banaamuzibiranga ku liiso, omuntu oyo awaddeyo omwana we eri Moleki, ne batamutta, omuntu oyo nnaamunyiigiranga, ne ku bʼomu nnyumba ye, ne mbagoba ne mbagaana okukolagananga ne bannaabwe, ye ne banne abakolaganye naye mu kukuba obwamalaaya ne Moleki.

“Anattanga omuntu naye anattibwanga.

Omuntu bwʼanattanga munne, ne wabaawo obujulizi, omutemu oyo naye anaafanga. Naye tewaabengawo attibwa ku bujulizi obwʼomuntu omu yekka.’ ” “ ‘Temukkirizanga mutango olwʼokununula omussi asingiddwa omusango ogwʼobutemu nʼasalirwa okuttibwa; anaateekwanga okuttibwa.’ ”

“ ‘Temwonoonanga nsi gye mubeeramu. Okuyiwa omusaayi kyonoona ensi; okutangiririra ensi omuyiise omusaayi si kyangu, okuggyako ngʼetangiririrwa nʼomusaayi gwʼoyo eyayiwa omusaayi mu nsi omwo.

“Tottanga.”

Mukama Katonda wo tomusinzanga mu ngeri efaanana ngʼeya bali, kubanga mu kusinza bakatonda baabwe bakoleramu ebikolobero bingi Mukama byʼatayagala, byʼakyawa. Bayokya ne batabani baabwe ne bawala baabwe mu muliro nga ssaddaaka eri bakatonda baabwe.

Tewabeerangawo omuntu nʼomu alirabika ngʼayisa mutabani we, oba muwala we mu muliro, ngʼekiweebwayo, oba ngʼakola ngʼomulaguzi, oba omulogo, oba omusawo wʼekinnansi, oba avvuunula ebyʼomu biseera ebijja,

“Akolimirwe omuntu yenna akkiriza okugulirirwa atte munne ataliiko musango.” Abantu bonna ne baddamu nti, “Amiina.” “Akolimirwe omuntu yenna atagondera bigambo ebiri mu mateeka gano.” Abantu bonna ne baddamu nti, “Amiina.”

Ku lunaku lwa leero nkoowoola eggulu nʼensi nga be bajulirwa bange, ku mmwe, abategedde nga ntadde mu maaso gammwe, obulamu nʼokufa; nʼemikisa nʼebikolimo. Kale nno londawo obulamu, olyoke obeerenga mulamu, ggwe nʼezzadde lyo:

Nʼatambulira mu ngeri za bassekabaka ba Isirayiri, era nʼokuwaayo nʼawaayo mutabani we ngʼekiweebwayo, ngʼagoberera ebyʼemizizo ebyʼamawanga Mukama ge yali agobye mu maaso gʼAbayisirayiri.

Ne bawaayo abaana baabwe aboobulenzi nʼaboobuwala ngʼebiweebwayo mu muliro, ne bakola ebyʼobufumu nʼebyʼobulogo, ne beetunda okukola ebibi mu maaso ga Mukama, okumusunguwaza.

Abavi ne bakola Nibukazi ne Talutaki, Abasefavayimu ne bookera abaana baabwe mu muliro, nga babawaayo ngʼebiweebwayo eri Adulammereki ne Anammereki, bakatonda ba Sefavayimu.

Nʼawaayo mutabani we okuba ekyokebwa, ngʼakola ebyʼobufumu nʼebyʼobulogo, ate ngʼalagulwa nʼabaliko emizimu, nʼabalogo. Nʼakola ebibi bingi mu maaso ga Mukama, era nʼamusunguwaza.

Nʼayoterezanga obubaane mu kiwonvu kya mutabani wa Kinomu, nʼawaayo batabani be okuba ebiweebwayo ebyokebwa, ngʼagoberera emizizo gyʼabannaggwanga, Mukama be yagoba mu maaso gʼAbayisirayiri.

Nʼawaayo abaana be ngʼekiweebwayo, nʼabookera mu kiwonvu ekya mutabani wa Kinomu, nʼakola ebyʼobufumu, nʼalagulira mu bire, nʼakola ebyʼobulogo, nʼagendanga nʼeri abaliko emizimu ne ddayimooni. Nʼakola ebitaali bya butuukirivu bingi mu maaso ga Mukama, nʼasunguwaza nnyo Mukama.

“Emikono gyo gye gyammumba, gye gyankola. Ate kaakano onookyuka okunsanyaawo? Jjukira nti wammumba ngʼebbumba, ate kaakano onoonfuula ngʼenfuufu? Tewanzitulula ngʼamata nʼonkwasa ngʼomuzigo?” Tewannyambaza omubiri nʼolususu, nʼoluka amagumba nʼebinywa nʼongatta?

kubanga nawonyanga abaavu abaakaabiranga obuyambi, nʼabatalina bakitaabwe abatalina abayamba.

Eyantonda mu lubuto nabo si ye yabatonda? Ffenna si ye yatukola mu mbuto za bannyaffe?

Mukama awulira okwetaaga kwʼababonyaabonyezebwa, ogumye emitima gyabwe; otege okutu kwo obaanukule. Olwanirira abataliiko bakitaabwe nʼabajoogebwa; omuntu obuntu owʼoku nsi nʼataddayo kubatiisa.

Naye ggwe wanziggya mu lubuto lwa mmange, era wampa okukwesiga ne mu buto bwange bwonna nga nkyayonka. Olwazaalibwa ne nteekebwa mu mikono gyo; olwava mu lubuto lwa mmange nʼobeera Katonda wange.

Omponye abakola ebitali bya butuukirivu, era ondokole mu batemu. Laba banneekwekeredde nga banteega okunzita. Abasajja abʼamaanyi abakambwe banneekobera, Ayi Mukama, so nga soonoonye wadde okubaako ne kye nsobezza. Sirina kye nsobezza, naye bateekateeka okunnumba. Tunuulira obuzibu bwange, osituke, onnyambe.

Ye Kitaawe wʼabataliiko bakitaabwe, ye mukuumi wa bannamwandu; ye Katonda abeera mu kifo kye ekitukuvu.

Neesiga ggwe kasookedde nzalibwa; ggwe wanziggya mu lubuto lwa mmange. Nnaakutenderezanga ennaku zonna.

Abanafu nʼabatalina bakitaabwe mubalamulenga mu bwenkanya; abaavu nʼabanyigirizibwa mubayambenga mu bwenkanya. Mulwanirire abatalina maanyi nʼabali mu kwetaaga, mubawonye; mubanunule nga mubaggya mu mikono gyʼababi. Tebalina kye bamanyi, era tebategeera. Batambulira mu kizikiza; emisingi gyʼensi gyonna ginyeenyezebwa.

Batta nnamwandu nʼomutambuze; ne batemula ataliiko kitaawe. Ne boogera nti, “Katonda talaba; Katonda wa Yakobo tafaayo.” Mwerinde mmwe abantu abatategeera. Mmwe abasirusiru muligeziwala ddi?

Oyinza okukolagana nʼobufuzi obukyamu, obukaabya abantu nʼamateeka gaabwe? Abakola ebibi beegatta ne balumbagana abatuukirivu; atasobezza ne bamusalira ogwʼokufa. Naye Mukama afuuse ekiddukiro kyange ekyʼamaanyi; ye Katonda wange, era Olwazi lwange mwe neekweka. Mukama alibabonereza olwʼebibi byabwe, nʼabazikiriza olwʼebyonoono byabwe; Mukama Katonda waffe alibamalirawo ddala.

Baawaayo batabani baabwe ne bawala baabwe eri bakatonda abo. Ne bayiwa omusaayi gwa batabani baabwe ne bawala baabwe abataliiko musango, be baawangayo eri ebifaananyi ebikole nʼemikono Abakanani bye baakola, ensi nʼeyonoonebwa nʼomusaayi gwabwe. Beeyonoona olwʼebyo bye baakola, ebikolwa byabwe ne bibafuula abataliimu nsa nga bavudde ku Katonda waabwe. Mukama kyeyava asunguwalira abantu be, nʼakyawa ezzadde lye.

Emikono gyo gye gyankola ne gimmumba, mpa okutegeera ndyoke njige amateeka go. Abo abakutya banandabanga ne basanyuka, kubanga essuubi lyange liri mu kigambo kyo.

Abaana aboobulenzi kya bugagga okuva eri Mukama; era abaana mpeera gyʼagaba okuva gyʼali.

Ggwe watonda byonna ebiri munda mu nze; ggwe wammumbira mu lubuto lwa mmange. Nkutendereza, kubanga wankola mu ngeri eyʼentiisa era eyʼekitalo; emirimu gyo gya kyewuunyo; era ekyo nkimanyidde ddala bulungi. Wammanya nga ntondebwa, bwe nakolerwa mu kyama; bwe natondebwa mu buziba bwʼensi nʼamagezi go amangi. Wandaba nga si natondebwa. Ennaku zange zonna ze wanteekerateekera zawandiikibwa mu kitabo kyo.

kubanga ebisiba enzigi zo, ye abinyweza, nʼabantu bo abasulamu nʼabawa omukisa.

Bwe bakugambanga nti, “Tugende ffenna twesanyuse, tunyage, tubbe nʼokutta; tokkirizanga; ngʼentaana bwʼemira abantu, naffe tubamire tutyo nga bakyali balamu, era nga balamba, ngʼabagenda mu bunnya obuwanvu;

Noolwekyo okuzikirira kulimujjira mbagirawo, mu kaseera buseera alibetentebwa awatali kuwona. Waliwo ebintu mukaaga Mukama byʼakyawa, weewaawo musanvu ebyʼomuzizo gyʼali. Amaaso agʼamalala, emimwa egirimba, okuttira abantu obwereere;

Odduukiriranga nʼowonya abo abatwalibwa okuttibwa, nʼabo abali ku njegoyego zʼokuttibwa, obawonye okuttirwa obwemage. Bwʼogambanga nti, “Laba kino twali tetukimanyi,” oyo akebera emitima aba talaba? Oyo akuuma obulamu bwo takimanyi? Talisasula buli muntu ngʼomulimu gwe bwe guli?

Omuntu alumirizibwa olwʼokutta munne, alibeera mu kutegana okutuusa okufa, tewabanga nʼomu amuyamba.

Nga bwʼotosobola kutegeera kkubo mpewo, oba omubiri nga bwe guzimbibwa ku mwana ali mu lubuto; bwʼotyo bwʼotosobola kutegeera Katonda Omutonzi wa byonna byʼakola.

Bwe munaayimusanga emikono gyammwe musabe nnaabakwekanga amaaso gange, era ne bwe munaasabanga ennyo siiwulirenga kubanga emikono gyammwe gisaabaanye omusaayi. Munaabe, mwetukuze muggirewo ddala ebikolwa byammwe ebibi gye ndi, mulekeraawo okukola ebibi. Muyige okukola obulungi, musalenga emisango nʼamazima, mudduukirirenga abajoogebwa, musalenga omusango gwʼatalina kitaawe, muwolerezenga bannamwandu.” “Mujje nno tukubaganye ebirowoozo,” bwʼayogera Mukama; “ebibi byammwe ne bwe biba ngʼolugoye olumyufu binaafuuka byeru ngʼomuzira, ne bwe binaaba bitwakaavu nga langi emyufu enkwafu, binaatukula ngʼebyoya byʼendiga.

Zibasanze abo abayita ekibi ekirungi nʼekirungi ekibi, abafuula ekizikiza okuba ekitangaala, nʼekitangaala okuba ekizikiza, abafuula ekikaawa okuba ekiwoomerera nʼekiwoomerera okuba ekikaawa.

Weewaawo laba Mukama Katonda ava mu kifo kye gyʼabeera okubonereza abantu bʼensi olwʼebibi byabwe. Ensi erikwekula omusaayi ogwagiyiikako, era teriddayo nate kukweka abattibwa.

Bwʼati bwʼayogera Mukama oyo, eyakutonda era eyakubumba mu lubuto, ajja kukuyamba. “Totya ggwe Yakobo, omuweereza wange, ggwe Yesuruni gwe nalonda.

Bwʼati bwʼayogera Mukama Omulokozi wo, eyakutondera mu lubuto. “Nze Mukama, eyatonda ebintu byonna, eyabamba eggulu nzekka, eyayanjuluza ensi obwomu,

“Mumpulire mmwe, ennyumba ya Yakobo nʼabantu bonna abasigaddewo mu nnyumba ya Isirayiri. Mmwe be nnalera okuva lwe mwava mu lubuto, be nasitula okuva lwe mwazaalibwa.

Mumpulirize mmwe ebizinga, mmwe muwulire kino amawanga agali ewala. Nnali sinazaalibwa Mukama nʼampita. Bwe nnali nkyali mu lubuto lwa mmange nʼayatula erinnya lyange.

Era kaakano Mukama ayogera, oyo eyammumba mu lubuto okubeera omuweereza we, okukomyawo Yakobo gyʼali era nʼokukuŋŋaanya Isirayiri gyʼali. Kubanga ndi wa kitiibwa mu maaso ga Mukama era Katonda wange afuuse amaanyi gange.

“Nnyina wʼomwana ayinza okwerabira omwana we gwʼayonsa, nʼatasaasira mwana eyava mu lubuto lwe? Weewaawo, wadde ngʼayinza okumwerabira naye nze sirikwerabira. Laba, nkuwandiise mu bibatu byʼengalo zange; ebisenge byo binaabeeranga mu maaso gange.

Nnyinza okutuusa abantu bange ku kuzaalibwa ne batazaalibwa?” bwʼayogera Mukama Katonda. “Ate olubuto ndusiba ntya nga ndutuusizza ku kuzaala?” bwʼayogera Mukama Katonda wo.

Ekigambo kya Mukama Katonda ne kinzijira, ngʼagamba nti, “Nakumanya bwe nnali sinnakubumba mu lubuto lwa maama wo; nga tonnava mu lubuto nʼakutukuza. Nakulonda okubeera nnabbi eri amawanga.”

Engoye zo zijjudde omusaayi gwʼabaavu nʼabatalina musango, awatali kugamba nti bakwatibwa nga babba. Ate nga wadde byonna biri bwe bityo ogamba nti, “Sirina musango, ddala takyanninako busungu!” Laba, ŋŋenda kukusalira omusango olwʼokugamba nti, “Sirina kibi kye nkoze.”

Bazimbye ebifo ebigulumivu ebya Tofesi mu kiwonvu kya mutabani wa Kinomu ne bassaddaakiramu batabani baabwe be bazaala nʼabawala, kye saalowoozaako wadde okukibalagira.

Kubanga banvuddeko ekifo kino ne bakifuula ekya bakatonda abalala. Bookerezaamu ebiweebwayo eri bakatonda, bakitaabwe wadde bakabaka ba Yuda be batamanyangako, nga bajjuzza ekifo kino omusaayi gwʼabataliiko musango. Bazimbye ebifo ebigulumivu ebya Baali, bookereyo batabani baabwe mu muliro ngʼekiweebwayo eri Baali, ekintu kye siragiranga, era kye soogerangako, wadde okukirowoozaako. Noolwekyo bwʼati bwʼayogera Mukama nti, Mwegendereze, ennaku zijja, ngʼekifo kino abantu tebakyakiyita Tofesi newaakubadde Kiwonvu kya mutabani wa Kinomu, wabula nga bakiyita ekiwonvu ekyʼettambiro. “ ‘Mu kifo kino ndizikiriza entegeka za Yuda ne Yerusaalemi. Ne mbawaayo mu mikono gyʼabalabe baabwe battibwe nʼekitala, era ndiwaayo emirambo gyabwe okuba emmere yʼebinyonyi ebyʼomu bbanga nʼebisolo ebyʼomu nsiko.

Yandinzitidde mu lubuto lwa mmange. Mmange yandibadde entaana yange, olubuto lwe ne luba lunene emirembe gyonna.

“Naye amaaso gammwe nʼemitima gyammwe biri ku magoba agʼobukuusa, ne ku kuyiwa omusaayi ogutaliiko musango ne ku kunyigiriza ne ku kunyaga.”

Bwʼati bwʼayogera Mukama nti, “Eddoboozi liwulirwa mu Laama, nga likungubaga nʼokukaaba okungi. Laakeeri akaabira abaana be era agaanye okusirisibwa, kubanga abaana be baweddewo.”

Baazimba ebifo ebigulumivu ebya Baali mu kiwonvu kya mutabani wa Kinomu, basaddaake batabani baabwe ne bawala baabwe mu muliro eri Moleki, newaakubadde nga sibalagiranga, wadde okukirowooza mu magezi gange, nti balikola ekintu ekibi ennyo bwe kityo kiviireko Yuda okwonoona.”

“Waddira batabani bo ne bawala bo be wanzaalira, nʼobawaayo ngʼebiweebwayo ebyʼemmere eri bakatonda abalala. Obwenzi bwe wakola bwali tebumala? Watta abaana bange nʼobawaayo ngʼebiweebwayo eri bakatonda abalala. Mu bikolwa byo byonna ebyʼekivve nʼobwenzi bwo, tewajjukira biseera ebyʼobuvubuka bwo, bwe wali obwereere nga toliiko bwʼoli, era ngʼosambagala mu musaayi gwo.” “Zikusanze! Zikusanze, bwʼayogera Mukama Katonda. Mu bikolwa byo ebibi byonna,

Bwʼati bwʼayogera Mukama Katonda nti, Olwʼobugagga bwo bwe walaga, nʼoyanika obwereere bwo wakati mu baganzi bo ngʼokola ebikolwa ebyʼobwenzi, nʼolwa bakatonda bo abalala abʼekivve, nʼokuwaayo omusaayi gwʼabaana bo, kyendiva nkuŋŋaanya baganzi bo bonna, be wasinza, bonna be wayagala ne be wakyawa, gyʼoli ne bakwetooloola, ne nkufungulirira mu maaso gaabwe, balabe obwereere bwo. Ndikusalira omusango ne nkuwa ekibonerezo ngʼekyʼabakazi abenzi nʼabo abayiwa omusaayi, ne nkuleetako omusaayi ogwʼekiruyi nʼobuggya.

Buli kiramu, kyange; obulamu bwʼomuzadde nʼobwʼomwana bwonna nabwo bwange.

Bwe muwaayo ebirabo, ne muwaayo nʼabaana bammwe mu muliro ngʼebiweebwayo, mweyongera okweyonoona ne bakatonda bammwe abalala bonna. Nnyinza okubakkiriza okunneebuuzaako mmwe ennyumba ya Isirayiri? Nga bwe ndi omulamu temujja ku nneebuuzaako, bwʼayogera Mukama Katonda.

kubanga bakoze ebyʼobwenzi, nʼengalo zaabwe zijjudde omusaayi. Benze ne bakatonda baabwe, ne basaddaaka nʼabaana baabwe ngʼemmere yʼabakatonda baabwe, abaana be banzalira. Ne kino bakinkoze. Mu kiseera kyekimu boonoonye ekifo kyange ekitukuvu, era boonoonye ne Ssabbiiti zange. Ku lunaku kwe baassaddaakira abaana baabwe eri bakatonda baabwe, baayingira mu watukuvu ne bayonoonawo. Ebyo bye baakola mu nnyumba yange.”

Bwʼati bwʼayogera Mukama nti, “Olwʼebyonoono bya Amoni ebisatu weewaawo ebina, siriggyawo busungu bwange. Mu ntalo ezʼokugaziya ensi ye, yabaaga abakazi abaali embuto abʼe Giriyaadi.

Kerode bwe yalaba ngʼAbagezigezi banyoomye ekiragiro kye, nʼasunguwala nnyo, nʼatuma abaserikale e Besirekemu ne mu byalo byakyo batte abaana bonna aboobulenzi abʼemyaka ebiri nʼabatannagiweza, ngʼasinziira ku bbanga abagezigezi lye baali bamutegeezeza mwe baalabira emmunyeenye.

“Mwawulira abʼedda bwe baagambibwa nti, ‘Tottanga, na buli anattanga, anaawozesebwa.’

Era temubatyanga abo abatta omubiri kubanga tebasobola kutta mwoyo! Naye mutyenga oyo yekka, ayinza okuzikiriza byombi omwoyo nʼomubiri mu ggeyeena.

“Na buli asembeza omwana omuto ngʼono mu linnya lyange ngʼasembeza Nze.

Obanga omukono gwo gukuleetera okwonoona gutemeko ogusuule. Kisinga okuyingira mu bulamu ngʼogongobadde oba ngʼolemadde, okusinga okugenda mu muliro ogutazikira ngʼolina emikono ebiri nʼebigere bibiri. Obanga eriiso lyo nga likuleetera okwonoona, liggyeemu olisuule. Kisinga okuyingira mu ggulu ngʼolina eriiso limu okusinga okugenda mu muliro gwa ggeyeena ngʼolina amaaso go gombi.” “Mwekuume obutanyoomanga nʼomu ku baana bano abato. Kubanga mbagamba nti Bamalayika baabwe ennaku zonna babeera mu maaso ga Kitange ali mu ggulu. Kubanga Omwana wʼOmuntu yajja okulokola ekyabula.

Kale bwe kityo ne Kitammwe ali mu ggulu tasiima kulaba ngʼomu ku bato bano ngʼazikirira.”

Naye Yesu nʼagamba abayigirizwa be nti, “Mukkirize abaana abato bajje gye ndi so temubaziyiza, kubanga abafaanana ngʼabo be bannannyini bwakabaka obwʼomu ggulu.”

Kubanga mu mutima gwʼomuntu mwe muva ebirowoozo ebibi ebyʼobukaba, nʼobubbi, nʼobutemu, nʼobwenzi,

Amateeka gano ogamanyi. ‘Tottanga, toyendanga, tobbanga, towaayirizanga, kitaawo ne nnyoko obassangamu ekitiibwa.’ ”

Kubanga aliba mukulu mu maaso ga Katonda. Talinywa mwenge wadde ekitamiiza kyonna. Era alijjuzibwa Mwoyo Mutukuvu ngʼakyali mu lubuto lwa nnyina.

Naye Maliyamu bwe yalamusa Erisabesi, omwana eyali mu lubuto lwa Erisabesi nʼabuukabuuka era nʼajjuzibwa Mwoyo Mutukuvu. Erisabesi nʼalyoka ayogerera mu ddoboozi eryʼomwanguka nti, “Oweereddwa omukisa, ggwe mu bakazi, era nʼomwana ali mu lubuto lwo aweereddwa omukisa. Nga nfunye ekitiibwa kinene ggwe nnyina wa Mukama wange okujja okunkyalira! Kubanga bwʼoyingidde nʼonnamusa, omwana ali mu lubuto lwange oluwulidde ku ddoboozi lyo ne yeekyusakyusa olwʼessanyu!

Kubanga mu mateeka ago, Katonda yalagira nti, “Omwana omubereberye bwʼanaabanga omulenzi, anaaweebwangayo eri Mukama.”

Amateeka ogamanyi nti, ‘Toyendanga, tottanga, tobbanga, tolimbanga, kitaawo ne nnyoko obassangamu ekitiibwa.’ ”

Lwaki temutegeera bye njogera? Kubanga temwagala kuwulira bigambo byange. Kubanga Setaani ye kitammwe era nammwe mwagala okukola ebyo kitammwe byʼayagala. Okuva ku lubereberye mutemu era tanywerera mu mazima, era mu ye temuli mazima. Bwʼayogera ebyʼobulimba ayogera ebiva mu bibye, kubanga mulimba era kitaawe wʼabalimba. Naye kubanga njogera mazima kyemuva mutanzikiriza.

Omukazi ngʼazaala aba mu bulumi buyitirivu, kubanga ekiseera kye kituuse. Naye omwana bwʼamala okuzaalibwa olwo omukazi aba takyajjukira bulumi buli olwʼessanyu eryʼokuzaala omuntu mu nsi.

Bwe baagaana okumanya Katonda, Katonda kyeyava abaleka ne babeera nʼomutima omwonoonefu ne bakola ebitasaana. Bajjuzibbwa obutali butuukirivu bwonna, nʼebibi, nʼomululu, nʼobukyayi, nʼobuggya, nʼobussi, nʼentalo, nʼobulimba, nʼenkwe, nʼokwogera ebitasaana, nga basala ku bannaabwe ebigambo, era nga bageya, nga bakyawa Katonda, nga bavuma bannaabwe, nga bajjudde amalala nʼokwekulumbaza, nga bagunjawo enkola yʼebikyamu, era nga bajeemera bakadde baabwe. Tebategeera so tebalina kukkiriza, tebalina kwagala, era tebalina mutima gusaasira. Newaakubadde nga bamanyi nga Katonda yagamba nti Abantu abakola ebintu ngʼebyo balizikirizibwa, tebakoma ku kubikola kyokka, naye basiima nʼabo ababikola.

Temubeeranga na bbanja lyonna eri omuntu yenna, wabula okwagalananga; kubanga ayagala muntu munne ngʼatuukiriza amateeka. Kubanga amateeka gano nti, “Toyendanga, tottanga, tobbanga, teweegombanga,” nʼetteeka eddala, ligattiddwa mu kino nti “Yagalanga muliraanwa wo nga bwe weeyagala wekka.” Ayagala muliraanwa we tamukola bubi; noolwekyo okwagala kyekuva kutuukiriza amateeka.

Oba temumanyi ngʼomubiri gwammwe ye Yeekaalu ya Mwoyo Mutukuvu Katonda gwe yabawa, era nʼemibiri gyammwe si gyammwe ku bwammwe?

Naye Katonda bwe yasiima, eyanjawula okuva mu lubuto lwa mmange, nʼampita olwʼekisa kye, nʼambikkulira Omwana we ndyoke ŋŋende eri Abaamawanga mbabuulire Enjiri era sseebuuza ku muntu nʼomu,

tulyoke tulabike ngʼabatume ba Kristo abʼamaanyi. Naye twefuula ngʼabaana abato mu maaso gammwe, nga nnyina wʼabaana bwe yandyagadde abaana be,

balyoke basobole okugunjula abakazi abato okwagalanga babbaabwe awamu nʼabaana baabwe.

Ngʼomubiri bwe guba omufu omwoyo bwe gutagubeeramu, nʼokukkiriza bwe kutyo kuba kufu bwe kuteeyolekera mu bikolwa.

Mulabe okwagala Katonda kwʼatwagala bwe kuli okunene ennyo, nʼatuyita abaana be, era ddala bwe tutyo bwe tuli. Ensi kyeva eremwa okututegeera, kubanga naye yennyini teyamutegeera.

si nga Kayini eyali owa Setaani, nʼatta muganda we. Kale yamuttira ki? Kayini yatta muganda we kubanga Kayini yakola ebibi, so nga ye muganda we yakola ebyʼobutuukirivu.

Buli akyawa muntu munne, oyo aba mussi, era mukimanyi nti tewali mussi alina obulamu obutaggwaawo mu ye.

Ne bakaabirira Mukama nʼeddoboozi eryʼomwanguka nga bagamba nti, “Ayi Mukama, Omutukuvu era owʼamazima, onoosalira ddi abantu bʼensi omusango, nʼowoolera eggwanga olwʼomusaayi gwaffe?”

Naye abo ababi nʼabatakkiriza nʼabagwagwa, nʼabassi, nʼabenzi, nʼabalogo nʼabasinza ebifaananyi, nʼabalimba bonna, omugabo gwabwe kuliba kuzikirizibwa mu nnyanja eyʼomuliro ogwaka ne salufa. Okwo kwe kufa okwokubiri.”