14 – Faapau pepe

Ona faia lea e le Atua o le tagata i lona faatusa, o le faatusa o le Atua na ia faia ai o ia; na faia e ia o i laua o le tane ma le fafine.

O se na te faamaligiina le toto o le tagata, e faamaligiina lona lava toto e le tagata; auā o le faatusa o le Atua na fai ai e ia le tagata.

Ia faasaina mo a‘u o ulumatua uma lava, e taitasi uma lava e muai fanau mai i le fanauga a Isaraelu, o tagata atoa ma manu, e fai lava ia mo a‘u.

Aua e te fasioti tagata.

O le na te fasi se tagata e oti ai o ia, ia fasiotia lava o ia.

Pe afai e femisai tagata, ona lavea ai lea o se fafine ua to, ona le au ai lea o lana tama, a e lei afaina ai o ia, ia matuā au mai lana sala, e faitalia le tane a le fafine ona faatatau atu i ai; e avane lava e ia le totogi, e faitalia faamasino. A e afai e tigaina ai le fafine, ia e sui atu le oti i le oti;

Aua e te faapiopioina le faamasinoga o le tagata mativa lua te fetalai i lana finauga. Ia e taumamao ma le upu pepelo, aua foi le fasioti le tagata e le sala ma le ua amiotonu; auā ou te le ta‘uamiotonuina le tagata amio leaga.

Auā o i le toto le ola o le tino; ua ou tuuina atu ai foi ia te outou e fai a‘i le togiola mo outou i luga o le fata faitaulaga; auā o le toto o le mea lava lea e fai a‘i le togiola mo le tagata.

Aua foi e te tuuina atu o so lau fanau e ui ane i le afi ia Moloka. Aua foi e te faaleagaina le igoa o lou Atua; o a‘u o Ieova.

Ua fetalai mai foi Ieova ia Mose, ua faapea mai, Ia e fai atu i le fanauga a Isaraelu, Ai se tagata o le fanauga a Isaraelu, po o se tagata ese e āumau ia Isaraelu, na te avatua so ana fanau ia Moloka; e fasiotia lava o ia; e fetogi lava e tagata o le nuu ia te ia i maa. Ou te faia foi lea tagata mo‘u fili, ma ou vavaeeseina o ia i lona nuu; auā ua ia avatu lana fanau ia Moloka, e faaleaga ai lo‘u malumalu, ma faaleaga ai lo‘u igoa paia. Afai foi e ufiufi lava e tagata o le nuu o latou mata i lea tagata i lona avatu o lana fanau ia Moloka, ma latou le fasioti ia te ia; ona ou faia lea mo‘u fili o lea tagata atoa ma lona aiga, ou te vavaeeseina i lo latou nuu o ia, atoa ma i latou uma o e mulimuli atu ia te ia e mulilulua ai ma Moloka.

Ai sē fasioti foi i le tasi tagata e fasiotia lava o ia.

Ai se fasiotia se tasi, e oti lava le fasioti tagata i le mau a e molimau; a e le oti se tagata i le mau a le molimau e toatasi. Tou te le talia lava se togiola e ola ai le fasioti tagata, o le ua faasalaina ia oti; a e fasiotia lava o ia.

Aua ne‘i leaga ia te outou le laueleele tou te i ai; auā o le toto o le mea lava lea e leaga ai le laueleele; e le mafai foi ona togiolaina le laueleele ai le toto na faamaligiina i ai, na o le toto lava o le na na faamaligiina.

Aua e te fasioti tagata.

Aua lava ne‘i e faia faapea ia Ieova lou Atua; auā o mea uma e inosia e Ieova, o loo inosia lava e ia, ua latou faia i o latou atua; auā ua latou susunu i le afi o latou atalii ma o latou afafine e fai ma taulaga i o latou atua.

Aua ne‘i iloa ia te oe se tasi na te faaui ane lona atalii po o lona afafine i le afi, o se fai togafiti faataulāitu, o se iite i ao o le lagi, po o se saili faailoga, po o se taulāitu,

Ia malaia le na te talia se taui e fasioti ai se tagata ua le sala. Ona tali mai ai lea o le nuu uma, Amene. Ia malaia le na te le faamauina upu o lenei tulafono e faia. Ona tali mai ai lea o le nuu uma, Amene.

Ou te valaau i le lagi ma le lalolagi i le aso nei e fai ma molimau ia te outou, ua ou tuuina atu i ou luma o le ola ma le oti, o le manuia ma le malaia; o lenei, ia e filifili i le ola, ina ia ola ai oe atoa ma lau fanau;

A ua na savali i le ala o tupu o Isaraelu, ma na faaui ane lava lona atalii i le afi, faapei o tu leaga a nuu ese e na tulia e Ieova i luma o le fanauga a Isaraelu.

Ua latou faaui ane o latou atalii ma o latou afafine i le afi, ua latou fai togafiti faataulāitu foi, ma saili faailoga; ua matuā tuuina atu foi i latou e i latou ia fai amio leaga i luma o Ieova e faaonoono atu ai ia te ia.

na faia e tagata Ava o Niveasa ma Tareaka, o tagata o Sefavaima foi na latou susunu i a latou fanau i le afi mo Atameleko ma Anameleko, o atua ia o Sefavaima.

Ua ia faaui ane foi lona atalii i le afi, ua iite foi i ao o le lagi, ma fai togafiti faataulāitu, ua saili foi i aitu vavalo, ma taulāitu; e tele lava le amio leaga na ia faia i luma o Ieova e faaonoono ai.

Ua ia faamu foi mea manogi i le vanu o le atalii o Hinoma, ma susunu ana fanau i le afi, e tusa ma tu leaga a nuu ese na tulia e Ieova i luma o le fanauga a Isaraelu.

Ua ia faaui ane ana fanau i le afi i le vanu o le atalii o Hinoma; ua iite foi i ao o le lagi, ma fai togafiti faataulāitu, ma tautala faataulāitu, ma saili i aitu vavalo, ma taulāitu; ua faia mea leaga e tele i luma o Ieova e faaonoono ia te ia.

Na saunia ma faia a‘u atoa uma e ou aao; a ua e fasioti ia te au. Se‘i e manatu, na e faia a‘u e pei o le omea; e te toe faafoisia ea a‘u i le efuefu? Na e le sasaaina ea a‘u e pei o le suāsusu, ma faato‘aina a‘u e pei o le suāsusu to‘a? Na e faaofuina a‘u i le pa‘u ma le aano, na e faamalosia foi a‘u i ivi ma ua.

Auā na ou laveaiina le ua puapuagaina, ina ua valaau mai o ia, ma le ua aumatuā, atoa ma le ua leai sona fesoasoani.

O lē na faia a‘u i le manava, e le o ia foi lea na faia o ia? E le o le toatasi ea foi na ia faia i maua i le manava?

Ieova e, ua e faafofogaina le manao o e ua puapuagatia; e faamauina e oe o latou loto, ua liliu mai i ai ou fofoga; ina ia faamasino i le ua mātuaoti ma le ua faasauaina; ina ia le toe faamatau mai le tagata ua tupu mai le eleele.

A o oe, na e aumaia a‘u mai le manava; o oe na saogalemu ai a‘u ina ou susu i lo‘u tinā. Na tuuina atu a‘u ia te oe talu lo‘u fanau mai; o oe lava lo‘u Atua talu ina ou i le manava o lo‘u tinā.

Ia e laveai mai ia te au i e ua fai amio leaga; ia e faaola mai ia te au i tagata ua totolima. Auā faauta mai, ua latou lamalama e fasioti ia te au; ua faapotopoto ē malolosi ia agaleaga mai ia te au; Ieova e, e le ona o lo‘u solitulafono, po o sa‘u agasala. Ua leai sa‘u pagota, a ua latou taufetuli mai, ma latou sauniuni. Ia e tulai mai e faafetaiai mai ia te au, ma e silasila mai.

O le Tamā ia o e ua mātuaoti, le na te faamasinoina mo fafine ua oti a latou tane, o le Atua lea o loo i lona afioaga paia.

O oe ua lagolago mai ia te a‘u talu ina fanaua o a‘u; na e aumaia a‘u mai le manava o lo‘u tinā; e le aunoa ona ou vivii atu ia te oe.

Ia outou faamasinoina e ua vaivai ma ē mātuaoti; ia outou ta‘uamiotonuina e ua puapuaga ma ē matitiva. Ia outou faaola i e vaivai ma ē matitiva; ia outou laveaiina i latou ai le lima o e amio leaga. Latou te le iloa, e le mafaufau foi i latou; e savavali pea i latou i le pouliuli; e faagaeetia faavae uma o le lalolagi.

O le fafine ua oti lana tane atoa ma le tagata ese, ua latou fasiotia, ua latou fasiotia foi ma ē mātuaoti; ma ua faapea a latou, E le silasila mai e Ioa, e le manatua foi e le Atua o Iakopo. Ia outou iloa, outou e valelea i le nuu; o outou vale foi, tou te popoto afea?

E faatasi ea ma oe le nofoālii o i ai amio leaga, o le ua fai ma tulafono le faatiga? Ua latou feosofi mai i le agaga o lē amiotonu; ua latou faasalaina le tagata e leai sana agasala. A e faia Ieova mo‘u ‘olo maualuga; o lo‘u Atua foi o le papa lea ou te malu ai. E taui atu foi e ia ia te i latou a latou agasala, na te faaumatia foi i latou i a latou amio leaga; o Ieova lo matou Atua na te faaumatia i latou.

Ua latou fai foi o latou atalii ma o latou afafine ma taulaga i temoni; ma latou sasaa le toto o e le sala, o toto o latou atalii ma o latou afafine, e na latou fai ma taulaga i tupua o Kanana; ona leaga ai lea o le laueleele i le toto. Ona leaga ai lea o i latou i a latou lava amio, ua latou faitaaga foi i a latou mea na fai. Ona mumū ai lea o le toasa o Ieova i lona nuu, ua ia ‘ino‘ino foi i lona tofi.

Na faia a‘u e ou aao, ua saunia ai foi a‘u; ia e faalotomatala mai ia te au, ina ia a‘oa‘oina lava a‘u i au poloaiga. O e matatau ia te oe latou te iloa mai a‘u, ona fiafia lea o i latou; auā ua ou faamoemoe i lau afioga.

Faauta, o le fanau, o le tofi lea mai ia Ieova; o e ua fanau mai, o le taui lea mai ia te ia.

Auā sa ia te oe o‘u manatunatu; na e ufiufi ia te au i le manava o lo‘u tinā. Ou te vivii atu ia te oe, auā na faia a‘u e ala ai ona matautia ma ofo tele ai; o mea na e faia, o mea mamana ia; ua ou matuā iloa e a‘u nei mea. E lei lilo lo‘u tino ia te oe, ina ua faia a‘u i le mea lilo, ina ua saunia a‘u i mea loloto i le lalolagi. Na silasila mai ou fofoga i o‘u tino uma ina o afuafua; ua tusia foi uma lava i lau tusi, o ona aso foi na faia ai, a o leai ni o‘u tino.

auā o loo faamalosia e ia o faamau faalava o ou puipui; o loo faamanuia e ia lau fanau i totonu ia te oe.

afai latou te fai mai, Tatou o; tatou te lamalama i le toto, ia tatou talialaina le ua fai fua lana amio lelei; tatou te foloolaina i latou, e pei o le tuugamau; ia atoatoa lava e pei o e o ifo i le lua.

o le mea lea e faafuasei ai ona oo mai o lona malaia; e faafuasei ona nutimomoia o ia, a e leai se fofo. O mea nei e ono ua inosia e Ieova; o lona fitu foi ua matuā inosia lava e ia; o mata faasiasia, o le laulaufaiva pepelo, ma lima e sasaa le toto o le ua le sala,

Ia e laveai i e ua puea ia oti, ma ē a oo ina fasia. Afai e te faapea, Faauta, matou te lei iloa lenei tagata; o le ua fuatia loto, na te le lagona ea? o le ua tausia lou agaga, na te le silafia ea? na te le taui atu ea i le tagata e tusa ma lana galuega?

O le tagata ua faasaua ua fasioti ai le tasi, e sola atu lava ia, e oo i le lua; aua le taofia o ia.

E pei ona le iloa e oe le ala o le matagi, ma ona tutupu o ivi i le manava o le ua to, e faapea foi ona le iloa e oe le galuega a le Atua, o le na te faia mea uma lava.

A outou faaloaloa mai o outou lima, e ‘alo ese o‘u mata ia te outou; e ui lava ina outou faateleina tatalo, ou te le faalogo ai lava; ua tutumu o outou lima i le toto. Ina fafano ia outou, ina faamamā ia outou; faate‘a ese ia a outou galuega leaga i o‘u luma, soia tou te fai mea leaga. Ia outou faamasani i le amio lelei, sailiili ia i le faamasinoga; ia outou faasaoina le ua sauaina, ia outou faamasino i le ua matuaoti, ia outou finau mo le fafine ua oti lana tane. O loo o faapea mai Ieova, O mai ia, ina tatou filifili ia, e ui lava ina pei o ofu mūmū a outou agasala, e sisina ia e pei o le kiona; e ui lava ina mūmū ia e pei o le ie ulaula, e avea e pei o fulufulu mamoe.

Oi talofa ia te i latou o e fai mai, ua lelei le mea leaga, a e leaga le mea lelei; o e fai ma malamalama le pouliuli, a e fai foi ma pouliuli le malamalama; o e fai ma mea suamalie le mea oona, a e fai ma mea oona le mea suamalie.

Auā faauta, o loo afio mai Ieova ai le mea o afio ai o ia, ina ia faasalaina e o nonofo i le lalolagi ona o a latou amio leaga; e faaalia foi e le eleele lana toto, na te le toe ufitia foi lana fasi.

O loo faapea ona fetalai mai o Ieova, o le na faia oe, ma na faatupuina oe i le manava; o lē fesoasoani ia te oe; Aua e te fefe la‘u auauna Iakopo e, o Iesuruna foi na ou filifilia.

O loo faapea ona fetalai mai o Ieova le na faatau ia te oe, o le na faatupuina foi oe i le manava; o a‘u o Ieova le na faia mea uma; o lē faamafolafola le lagi na o a‘u lava; o a‘u lava o lē fofolaina le lalolagi;

Faalogo mai ia ia te au, outou le aiga o Iakopo, ma outou uma o e ua totoe o le aiga o Isaraelu, o e ua tauave e a‘u talu ina fanau mai i le manava; ua siitia e a‘u talu ina fanau mai.

Faalogo mai ia ia te au, outou nuu tu matafaga e; uai mai ia o outou taliga outou nuu mamao e; ua valaauina a‘u e Ieova talu mai le manava; ua na ta‘ua lo‘u igoa talu mai le manava o lo‘u tinā.

A o lenei, o loo fetalai mai Ieova, o le na faia a‘u talu mai le manava e fai ma auauna ia te ia, e toe faafoisia Iakopo ia te ia; e ui lava ina le faapotopotoina o Isaraelu, a e viia a‘u i luma o Ieova; e fai foi lo‘u Atua mo‘u malosi.

E galo ea i le fafine lana tama ua susu, na te le alofa i le tama a lona lava manava? ai lava e galo ia te i latou, a e le galo lava oe ia te au. Faauta, ua ou taia lou faatusa i o‘u alofilima; e tumau ou pa i o‘u luma.

Ou te faafaatiga, a ou te le faafanau ea? ua fetalai mai ai Ieova; ou te faafanau, ma a‘u punitia? ua fetalai mai ai lou Atua.

Na oo mai ia te au le afioga a Ieova, ua faapea mai, Na a‘u iloa oe a o lei faia oe e a‘u i le manava; na a‘u faapaiaina oe a o lei fanau mai oe, na a‘u tofia oe e fai ma perofeta i nuu.

Ua iloa i ou lava pito ofu le toto o le ola o e matitiva e le sala; e le o le matuā saili na ou iloa ai, a ua i ai i ia mea uma. A ua e fai mai, E moni, e liliueseina lona toasa ia te au, auā ou te lei agasala. Faauta, ou te faamasino ia te oe, ina ua e faapea, Ou te lei sala.

Ua faia foi e i latou mea maualuluga i Tofeta, ua i le vanu o le atalii o Hinoma, e susunu ai o latou atalii ma o latou afafine i le afi; o le mea ou te lei poloai atu ai, ou te lei manatu foi i ai.

Aua ua latou tuua a‘u, ua latou liua foi lenei mea, ma ua latou faamu ai mea manogi i atua ese na latou le iloa, o i latou, po o latou tamā, po o tupu o Iuta; ma ua latou faatumuina lenei mea i le toto o e le sala. Ua faia e i latou o mea maualuluga a Paala e susunu ai a latou fanau i le afi e fai ma taulaga mu ia Paala; o le mea na ou le poloai atu ai, pe fai atu ai, ou te lei manatu foi i ai. O le mea lea faauta, o le a oo mai ai ona po, o loo fetalai mai ai Ieova, e le toe igoa ai lea mea o Tofeta, po o le vanu o le atalii o Hinoma, a o le vanu o le fasi. Ou te faaleaogaina le pule a Iuta ma Ierusalema i lenei mea; ou te tuuina foi i latou ia fāsia i le pelu i luma o e ita ia i latou, ma lima o e sailiili ia i latou ia oti; ou te tuuina atu foi o latou tino ua oti e fai ma mea e ‘ai a manu felelei ma manu e tataa.

auā na le fasiotia a‘u ina o i le manava; po ua avea lo‘u tinā ma tuugamau ia te au, ma lona manava e to pea e faavavau.

A ua na ona faasaga o ou mata ma lou loto i lau oloa, ma le faamaligiina o le toto o le ua le sala, ma le faasaua, ma le faatigaina, ia faia.

O loo faapea ona fetalai mai o Ieova, Ua lagona le leo i Rama, o le auega, o le tagi lotulotu lava; ua tagi Rasela ona o lana fanau, e le mafai foi ona faanaina o ia ona o lana fanau, auā ua leai i latou.

Ua faia foi e i latou mea maualuluga ia Paala, ua i le vanu o le atalii o Hinoma, ina ia latou faaui ane o latou atalii ma o latou afafine i le afi ia Moloka; o le mea lava ou te lei poloai ai ia te i latou, ou te lei manatu foi i ai; ua faia e i latou lenei mea e inosia e faatupuina ai le agasala ia Iuta.

Ua e avea foi au tama tane, ma au tama teine na e fanau mai ia te au, ma ua e fai i latou ma taulaga ia te i latou ina ia faaumatia ai. O le mea māmā ea lea i lou talitane, ina ua e fasioti i la‘u fanau; ma ua e tuuina atu i latou ia faaui ane i latou i le afi mo i latou? O au mea e inosia uma ma lou talitane uma, na e le manatua ona aso a o te teine itiiti, ina ua le ufitia ai oe, ma ua le lavalavā, ma ua taatia i lou toto. Ua uma foi ona e fai o au amio leaga uma, (Oi talofa, oi talofa ia te oe! o loo fetalai mai ai le Alii o Ieova;)

O loo faapea ona fetalai mai o le Alii o Ieova; ua e sasaa atu au tupe, ma ua faaalia lou tino i lou talitane ua fai ma ē ua e manao i ai, atoa ma au tupua uma e inosia, ma le toto o au fanau, na e avatu ia te i latou; faauta, o le mea lea ou te faapotopotoina ai i latou uma ua e manao i ai, o i latou ua e fiafia i ai, ma i latou uma ua e naunau i ai, atoa ma i latou uma ua e ‘ino‘ino i ai; ou te faapotopotoina lava i latou ia te oe mai itu uma ia leaga ai oe, ma ou faaalia ia te i latou lou tino, ina ia latou iloa lou tino uma. Ou te faasala foi ia te oe, e pei ona faasalaina o fafine mulilulua, ma e ua faamaligi toto, ma ou avatu ia te oe le toto i le ita tele ma le fuā.

Faauta, o agaga uma, o o‘u lava i latou; e pei o le agaga o le tamā ona fai mo‘u, e faapea foi le agaga o le atalii; o le tagata e agasala e oti ia.

Auā o lo outou avatua o a outou taulaga, ma lo outou faaui ane o a outou fanau i le afi ua outou faaleagaina ai outou i a outou tupua uma, ua oo mai i lenei aso; tou te fesili mai ea ia te au nei, le aiga o Isaraelu e? O loo fetalai mai ai le Alii o Ieova, O loo ola a‘u, ou te le mafai lava ona outou fesili mai ia te au.

Auā ua la mulilulua, ua i ai foi le toto i o laua lima; ua la mulilulua i a la tupua; o a laua fanau foi na la fanau mai ai ia te au, ua la faaui ane i le afi, ia faaumatia ai mo i latou. Ua la faia foi lenei mea ia te au; ua la faaleagaina lo‘u malumalu i lea lava aso, ma o‘u sapati ua la solia; ua la fasia a laua fanau mo tupua, ona o mai ai lea o i laua i lo‘u malumalu i lea lava aso e soli ai; faauta foi, na faapea ona la faia i totonu o lo‘u fale.

O loo faapea mai Ieova, E tolu agasala a le fanauga a Amoni, e fa foi, ou te le liliu ese ai lana sala; auā na latou faatiau i fafine totō i Kiliata, ina ia faateleina e i latou lo latou laueleele.

Ua iloa e Herota ua olegia o ia e makoi, ona tele ai lea o lona ita, ua aauina atu e ia nisi e fasioti i tama tane uma i Peteleema e oo i ona tuaoi uma, e afua i e ua lua o latou tausaga atoa ma e ua pito ane i ai, e faatatau i ona po na na matuā sueina atu ai i makoi.

Ua outou faalogo, na fai mai i e anamua, Aua e te fasioti tagata; ai se fasioti tagata, e nofo sala o ia i le faamasinoga.

Aua foi tou te matatau i e fasioti le tino, a e latou te le mafaia ona fasioti le agaga; a e lelei ona outou matatau i le ua mafai ona fano ia te ia le agaga atoa ma le tino i Kēna.

Ai se talia se tama itiiti faapenei ona o lo‘u igoa, ua ia talia a‘u;

Afai foi e te tausuai i lou lima po o lou vae, ina tutū ese ia, ma e lafoai; e lelei ona e sao i le ola a ua lima mutu, pe pipili, a e leaga pe a lafoina oe i le afi e faavavau ma ou lima e lua ma ou vae e lua. Afai foi e te tausuai i lou mata, ina sali ese ia, ma e lafoai; e lelei ona e sao i le ola ma le mata e tasi, a e leaga pe a lafoina oe ma ou mata e lua i le afi o Kēna. Ia outou, ne‘i tou faaleaogaina se tasi o i latou nei e faatauvaa; auā ou te fai atu ia te outou, o a latou agelu i le lagi e le aunoa ona latou vaavaai i fofoga o lo‘u Tamā o i le lagi. Auā ua sau le Atalii o le tagata e faaola i le na le iloa.

E faapea lo outou Tamā o i le lagi, e le finagalo ia ina ia fano se tasi o i latou nei e faatauvaa.

A ua fetalai atu Iesu, Ina tuu mai ia o tama iti e o mai ia te au, aua le vaoia i latou; auā e faapei o i latou nei o e o i le malo o le lagi.

Auā e alu ae mai le loto o le tagata o le manatu leaga, o le mulilua, o le faitaaga, o le fasioti tagata,

Ua e iloa tulafono, Aua e te mulilua; aua e te fasioti tagata; aua e te gaoi; aua e te molimau pepelo; aua e te agaleaga; ia e ava i lou tamā ma lou tinā.

Auā e sili o ia i luma o le Alii; e le inu o ia i le uaina po o le ‘ava; e faatumuina foi o ia i le Agaga Paia e afua ina fanau mai o ia.

Ua faalogo mai Elisapeta i le alofa o Maria, ona osooso ai lea o le tama i lona manava; ua faatumuina foi Elisapeta i le Agaga Paia; ua alaga ia, ua leo tele, ua faapea mai, Amuia oe i fafine, amuia foi lē a fanau mai ia te oe. Pe faapefea foi lenei mea, ina ua sau le tinā o lo‘u Alii ia te au nei? Faauta foi, ua oo mai le leo o lou alofa i o‘u taliga, ona osooso ai lea o le tama i lo‘u manava ma le olioli.

(pei ona tusia i le tulafono a le Alii, O tama tane ulumatua uma e taua i latou e paia mo le Alii;)

Ua e iloa poloaiga, Aua e te mulilua; aua e te fasioti; aua e te gaoi; aua e te molimau pepelo; ia e ava i lou tamā ma lou tinā.

Se a le mea e le lagona ai e outou la‘u nei upu? auā tou te le mafaia ona faalogo i la‘u mataupu. O outou nai lo outou tamā le tiapolo, tou te fia faia foi mea e tu‘inanau i ai lo outou tamā. O le fasioti tagata ia talu le amataga, e lei tumau lava ia i le upu moni, auā e le o i totonu lava ia te ia le upu moni; a tautala ia i le tala pepelo, o lana lava lea e tautala a‘i, auā o le pepelo ia, ma le tamā o le pepelo. A o a‘u nei, tou te le talitonu mai ia te au, auā ou te fai atu le upu moni.

A fanau se fafine ua tiga ai o ia, auā ua oo i lona aso; a uma ona fanau mai o lana tama, ua le toe manatu e ia lona tiga, ona o le olioli, ina ua fanau mai le tagata i le lalolagi.

Ua latou le loto foi e taofi i le mataupu i le Atua, o lea ua tuuina atu ai i latou e le Atua i le loto leaga, latou te fai ai mea e le tusa; o loo tutumu i latou i amio leaga uma lava, o le faitaaga, o le amio ulavale, o le manumanu, o le loto leaga; o loo tumu saisai i le mataua, o le fasioti tagata, o le misa, o le ‘ole‘olega, ma le faatāutala; o tuaupua i latou, o e fai tala leaga, o e ‘ino‘ino i le Atua, o e faasiasia, o e faasaua, o e faafiasilisili, o e fia fai togafiti i mea leaga, o e le anaana i mātua, o e valelea, o e tuumavaega, o e le lotoaiga, o e le faamolemoleina, ma ē faalealolofa; o i latou ia ua iloa le tonu mai le Atua, e tatau ai ona oti o e fai mea faapena, e le gata ona latou faia o ia mea, a e fiafia lava i latou i e ua faia.

Aua ne‘i ia te outou se mea e tasi a se tasi tagata; a e tau lava o le fealofani; auā ai sē alofa atu i se tasi tagata, ua atoatoa ona faia e ia o le tulafono. Auā o upu ia, Aua le mulilua, Aua le fasioti tagata, Aua le gaoi, aua le molimau pepelo, Aua le tu‘inanau; afai foi ua toe se isi poloaiga, o loo ua aofia lava i lenei upu, Ia e alofa atu i lē lua te tuaoi, ia pei o oe lava ia te oe. E le agaleaga atu le alofa i lē la te tuaoi; o lenei, o le alofa o le atoatoa lea o le tulafono.

Tou te le iloa ea, o lo outou tino o le malumalu lea o le Agaga Paia ua i totonu ia te outou, o loo ua ia te outou mai le Atua, e le aiā foi outou ia te outou?

A o le Atua o le na filifilia a‘u talu ina fanau mai o a‘u, ma na valaauina a‘u i lona alofa tunoa, na finagalo o ia, ina ia faaali mai lona Alo i totonu ia te au, ina ia ou folafolaina atu i nuu ese le tala lelei ia te ia, ona ou le filifili lea ma tagata,

A ua matou agamalu ina ua matou i ai ia te outou na, faapei o se failele na te tausi lelei i ana lava tama;

ina ia latou a‘oa‘o atu i fafine muli latou te alofa atu i a latou tane, ia alofa atu i a latou fanau, ia faautauta i latou,

E faapei o le tino ua oti ia pe a te‘a le agaga, e faapea foi le faatuatua ua mate pe a leai ni galuega.

Faauta i le silisili o le alofa ua foaiina ma e le Tamā ia te i tatou, ina ua ta‘ua i tatou o le fanau a le Atua; o le mea lea e le iloa ai i tatou e le lalolagi, auā na le iloa o ia.

E le pei o Kaino na i loo leaga, na fasioti foi i lona lava uso; se a foi le mea na ia fasioti ai ia te ia? Ona o lana amio ina leaga, a o le amio a lona uso ua tonu.

O i latou uma o e ita i o latou uso, o fasioti tagata i latou; ua outou iloa foi e leai sē fasioti tagata e tumau ia te ia le ola e faavavau.

ua latou alalaga foi ma le leo tele, ua faapea atu, Le Alii e, le paia ma le faamaoni e te le faamasino ea ma taui i lo matou toto i e nonofo i le lalolagi seia afea?

A o e loto vaivai, ma e lē faalogo, ma e fai mea e inosia, ma e fasioti tagata, ma e faitaaga, ma e faataulāitu, ma e ifo i tupua, atoa ma e tala pepelo uma, e fai o latou tofi i le lepa e mu i le afi ma le teio, o le oti faalua lea.