15 – Okutamiira

Nuuwa nʼatandika okulima nʼasimba emizabbibu; nʼanywa omwenge nʼatamiira, ne yeebaka mu weema ngʼali bwereere. Kaamu kitaawe wa Kanani nʼalaba obwereere bwa kitaawe, nʼabuulirako baganda be ababiri abaali ebweru.

“Ggwe ne batabani bo bwe muyingiranga mu Weema ya Mukama eyʼOkukuŋŋaanirangamu temunywanga wayini oba ekyokunywa ekirala kyonna ekitamiiza; bwe mulikikola temulirema kufa. Eryo linaabanga tteeka eryʼenkalakkalira ne mu mirembe gyonna egigenda okujja. Mwawulengamu ebitukuvu nʼebyabulijjo, ebirongoofu nʼebitali birongoofu;

anaateekwanga obutanywa wayini nʼekyokunywa ekirala kyonna ekitamiiza, era taanywenga wayini mukaatuufu wadde ekitamiiza ekirala kyonna ekikaatuuse. Era taalyenga ku bibala bya mizabbibu wadde ensigo zaabyo.

Banaategeezanga abakulu abakulembeze bʼomu kibuga kye waabwe nti, “Mutabani waffe ono mukakanyavu era mujeemu. Tatuwulira. Wa mulugube nnyo era mutamiivu.”

Wayini waabwe ava mu terekero lya wayini wa Sodomu, nʼennimiro zʼemizabbibu za Ggomola; ezzabbibu zaabwe zabbibu za butwa, ebirimba byazo bikaawa; wayini waazo bwe butwa bwʼemisota obusagwa obukambwe obwʼamasalambwa.

Laba nga tonywa wayini, newaakubadde ekitamiiza kyonna, wadde okulya ekintu kyonna ekitali kirongoofu.

Obadde mukambwe nnyo eri abantu bo; tuli nga bʼowadde omwenge omungi ne gututagaza.

Mukama akutte mu mukono gwe ekikompe ekyʼobusungu bwe ekijjudde omwenge ogutabuddwamu ebirungo era kijjudde ejjovu; akifuka, aboonoonyi bonna ku nsi ne bakinywa ne bakimaliramu ddala.

Okukola ebibi yʼemmere yaabwe, nʼokukozesa eryanyi kye kyokunywa kyabwe.

Omwenge mukudaazi, ekitamiiza muleekaanyi, era buli alaga mu kkubo ekyamu olwʼebyo talina magezi.

Aganza ebyʼamasanyu anaabanga mwavu, nʼoyo ayagala omwenge nʼamafuta taligaggawala.

Teweegattanga ku abo abeekamirira omwenge, nʼabalulunkanira ennyama: Kubanga omutamiivu nʼomuluvu baavuwala, nʼokubongoota olutata kubambaza enziina.

Ani alina obuyinike? Ani alina ennaku? Ani alina ennyombo? Ani alina okwemulugunya? Ani alina ebiwundu ebyʼobwereere? Ani amyuse amaaso? Abo abatava ku mwenge, nga bagenda baloza ku mwenge omutabule. Totunuulira wayini ngʼamyuse, bwʼatemaganira mu ggiraasi ngʼakka empolampola; ku nkomerero aluma ngʼomusota, wa busagwa ngʼessalambwa. Amaaso go galiraba ebyewuunyo, nʼomutwe gwo ne gulowooza ebitategeerekeka. Oliba ngʼomuntu eyeebase wakati mu nnyanja, obanga oyo alengejjera waggulu ku mulongooti. Olyogera nti, “Bankubye, naye sirumiddwa. Bankubye naye sirina kye mpuliddemu. Nnaazuukuka ddi, neeyongere okunywa?”

Ggwe Lemweri, si kya bakabaka, si kya bakabaka okunywanga omwenge, so si kya balangira okwegombanga omwenge, si kulwa nga bagunywa ne beerabira amateeka, ne batalamula mu bwenkanya abantu baabwe abatulugunyizibwa. Ekitamiiza mukiwenga oyo ayagala okufa, nʼomwenge oyo alina emmeeme eriko obuyinike. Mumuleke anywenga yeerabire obwavu bwe, alemenga kujjukira nate buyinike bwe.

Olina omukisa gwʼensi kabaka wo bwʼaba nga wa lulyo lulangira, ate nga nʼabalangira bo bamanyi ekiseera ekyʼokuliiramu, olwʼokufuna amaanyi so si lwa kutamiira.

Zibasanze abo abakeera enkya ku makya banoonye ekitamiiza, abalwawo nga banywa omwenge ettumbi lyʼobudde, okutuusa omwenge lwe gubalalusa! Ababeera nʼennanga nʼentongooli, ebitaasa nʼendere, nʼomwenge ku mbaga zaabwe; naye ne batalowooza ku mulimu gwa Mukama Katonda, wadde okussa ekitiibwa mu ebyo bye yatonda.

Zibasanze abo abazira mu kunywa omwenge era mu kutabula ekitamiiza,

Mukama abataddemu omwoyo omubambaavu era baleetedde Misiri okutabukatabuka mu byonna byʼekola, ngʼomutamiivu atagalira mu bisesemye bye.

Tebakyanywa wayini nga bwe bayimba, nʼomwenge gukaayira abagunywa. Ekibuga ekyazikirizibwa kisigadde nga matongo, na buli mulyango oguyingira mu nnyumba guzibiddwa. Bakaabira wayini mu nguudo, nʼessanyu lyonna liweddewo, nʼokujaguza kwonna tekukyaliwo mu nsi. Ekibuga kizikiridde wankaaki waakyo amenyeddwamenyeddwa.

Ensi etagala ngʼomutamiivu, eyuugayuuga ngʼakasiisira bwe kayuugayuuga mu kibuyaga, omusango gwe gumulumiriza nnyo olwʼobujeemu bwe, era ensi egwa nʼetaddamu kuyimuka.

Zikusanze engule eyʼamalala gʼabatamiivu aba Efulayimu, zikusanze ekimuli ekiwotoka ekyʼobulungi bwʼekitiibwa kye, ekiri ku mutwe gwʼekiwonvu ekigimu, Zikusanze ekibuga kyʼabo abatamiivu.

Engule eyʼamalala eyʼabatamiivu ba Efulayimu aligibetenta nʼebigere bye.

Ne bano nabo batagala olwʼomwenge, era bawabye olwʼekitamiiza; Bakabona ne bannabbi batagala olwʼekitamiiza, era bawabye olwʼomwenge; bawabye olwʼekitamiiza, batagala ne bava mu kwolesebwa, era tebasalawo nsonga. Weewaawo emmeeza zonna ziriko ebisesemye, tewakyali kifo kiyonjo.

Muwuniikirire era mwewuunye Muzibirire era muzibe amaaso; Batamiire, naye si na wayini, batagala, naye si lwa mwenge.

Bagambagana nti, “Mujje, leka tukime omwenge tunywe tutamiire. Nʼolwʼenkya lunaku ngʼolwa leero, oba nʼokusingawo.”

“Bagambe bwʼoti nti, ‘Bwʼati bwʼayogera Mukama Katonda wa Isirayiri, buli kita kiba kya kujjuza wayini.’ Nabo balikuddamu nti, ‘Tetumanyi nga buli kita kiba kya kujjuza wayini?’ Olwo olyoke obagambe nti, ‘Bwʼati bwʼayogera Mukama nti, Laba nditamiiza abantu bonna abatuula mu nsi eno, ne bakabaka abatuula ku ntebe ya Dawudi eyʼobwakabaka, ne bakabona, ne bannabbi nʼabantu bonna abʼomu Yerusaalemi. Era buli omu alikoonagana ne munne, abalenzi ne bakitaabwe, bwʼayogera Mukama. Siribalumirwa, wadde okubaleka oba okubakwatirwa ekisa, ndibazikiriza.’”

Ebikwata ku bannabbi: omutima gwange gwennyise mu nda yange amagumba gange gonna gakankana, nninga omusajja omutamiivu, ngʼomusajja afugiddwa omwenge, ku lwa Mukama nʼebigambo bye ebitukuvu.

Bwʼati Mukama, Katonda wa Isirayiri bwe yaŋŋamba nti, “Twala ekikopo kino, okuva mu mukono gwange, ekijjudde wayini owʼobusungu bwange, okinywese amawanga gonna gye nnaakutuma okukibanywesa. Bwe banaakinywa, bajja kugwa eddalu batagale olwʼekitala kye nnaabasindikamu.”

“Era onoobagamba nti, ‘Bwʼatyo bwʼayogera Mukama owʼEggye, Katonda wa Isirayiri nti, Munywe mutamiire, museseme, mugwe muleme kuddayo kusituka olwʼekitala ekyo kye ŋŋenda okusindika mu mmwe.’

Ne nteeka ebibya ebijjudde wayini nʼebikopo ebimu mu maaso gʼabasajja abʼennyumba yʼAbalekabu ne mbagamba nti, “Munywe ku wayini.” Naye ne baddamu nti, “Tetujja kunywa wayini kubanga jjajjaffe Yonadabu mutabani wa Lekabu yatulagira nti, ‘Tewabanga nʼomu ku mmwe wadde abaana bammwe anywanga wayini.

Anzijuzza ebikaawa era ampadde ekikompe ekyʼobubalagaze nkinywe.

Kubanga wagoberera ekkubo lya muganda wo, kyendiva nkuwa ekikompe kye mu mukono gwo.” “Bwʼati bwʼayogera Mukama Katonda nti, ‘Olinywa ekikompe kya muganda wo, ekikompe ekigazi era ekinene; kirikuleetera okusekererwa nʼokuduulirwa kubanga kirimu ebintu bingi. Olijjuzibwa okutamiira nʼennaku, ekikompe ekyʼobuyinike era ekyʼokunakuwala, ekyo kye kikompe kya muganda wo Samaliya. Olikinywa nʼokikaliza; olikyasaayasa, ne weeyuzaayuza amabeere.’ Nze Mukama Katonda, nkyogedde.” “Mukama Katonda kyava ayogera nti, Kubanga mwanneerabira ne munkuba amabega, kyemuliva mubonaabona olwʼokwegomba kwammwe.”

Tewabanga kabona nʼomu anywa wayini ngʼayingidde mu luggya olwʼomunda.

Naye Danyeri nʼamalirira mu mutima gwe obuteeyonoonyesa na mmere na wayini ebyavanga ku mmeeza ya kabaka, nʼasaba Asupenaazi amukkirize aleme kweyonoonyesa.

Awo omusigire nʼalekayo okubawa emmere yaabwe eyʼenjawulo ne wayini gwe baali bateekwa okunywa, nʼabawa enva endiirwa.

Weegulumizizza eri Mukama wʼeggulu; ebikompe ebyaggyibwa mu yeekaalu ye, obitumizzaayo; era ggwe, nʼabakungu bo, nʼabakyala bo, nʼabazaana bo mubinywereddemu omwenge, nʼoluvannyuma ne mutandika okutendereza bakatonda aba ffeeza, nʼaba zaabu, nʼabʼebikomo, nʼabʼebyuma, nʼabʼemiti, nʼabamayinja abatayinza kulaba newaakubadde okuwulira newaakubadde okutegeera. Naye Katonda oyo alina omukka gwo mu ngalo ze, era amanyi engeri zo zonna, tomugulumizizza.

eri obwenzi, wayini omukadde nʼomusu, ne bibamalamu okutegeera.

Ku lunaku kabaka lwʼagabula embaga, abakungu ettamiiro lya wayini ne libalwaza, kabaka ne yeegatta nʼabanyoomi.

Muzuukuke, mmwe abatamiivu, mwekaabire amaziga; mukube ebiwoobe mmwe mwenna abanywi bʼomwenge, mukube ebiwoobe kubanga akamwa kammwe katuuse okwerabira omwenge omusu.

Bagalamira okumpi ne buli kyoto ku ngoye ezaweebwayo ngʼobweyamo. Mu nnyumba ya bakatonda baabwe mwe banywera omwenge oguleetebwa abatanziddwa.”

“Naye mmwe ne mudda mu kuwa Abawonge ba Mukama omwenge okunywa, ne muwa bannabbi amateeka nga mubagamba nti Temuwa byabunnabbi.

Mwekatankira wayini, ne mwesiiga nʼebizigo ebirungi, naye temukaabira kubonaabona kwa Yusufu.

Omuntu bwʼajja nʼomwoyo ogwʼobulimba, nʼagamba nti, “Ka mbabuulire ku ssanyu lyʼomwenge gwe baagala era gwe banoonya,” oyo yʼaba nnabbi wʼabantu abo.

Kubanga baliba ngʼamaggwa agakwataganye, era nga batamidde, balyoke bookebwe omuliro ngʼekisambu ekikalu.

Zimusanze oyo awa baliraanwa be ekitamiiza nʼakibafukira okuva mu kita nʼabawa banywe okutuusa lwe batamiira asobole okutunuulira ensonyi zaabwe! Olijjuzibwa ensonyi mu kifo kyʼekitiibwa. Naawe olinywa nʼoswala. Ekikompe ekyʼomu mukono gwa Mukama ogwa ddyo kirikyusibwa kidde gyʼoli, nʼensonyi ezʼobuwemu zisaanikire ekitiibwa kyo.

Kubanga Yokaana eyali talya wadde okunywa yajja ne mugamba nti, ‘Aliko dayimooni.’ Omwana wʼOmuntu, bwe yajja ngʼalya era ngʼanywa, ne boogera nti, ‘Wa mululu, muntu munywi, era mukwano gwʼabasolooza bʼomusolo nʼaboonoonyi. Bʼabeeramu!’ So nga amagezi geeragira mu bikolwa.”

Naye obanga omuddu omubi bwʼagamba mu mutima gwe nti, ‘Mukama wange tajja kudda mangu,’ nʼadda ku baddu banne nʼabakuba, nʼalya, nʼanywa nʼabatamiivu, okutuusa lwʼalidda. Mukama wʼomuddu oyo nʼakomawo ku lunaku lwʼatamusuubidde ne mu kiseera kyʼatamanyi, alimutemamu ebitundu bibiri, ebitundu bye nʼabiteeka awamu nʼabannanfuusi, eriba okukaaba nʼokuluma obujiji.”

Kubanga aliba mukulu mu maaso ga Katonda. Talinywa mwenge wadde ekitamiiza kyonna. Era alijjuzibwa Mwoyo Mutukuvu ngʼakyali mu lubuto lwa nnyina.

Kubanga Yokaana Omubatiza bwe yajja teyalyanga mmere wadde okunywa omwenge, ne mugamba nti, ‘Aliko dayimooni!’ Omwana wʼOmuntu azze ngʼalya emmere era ngʼanywa ne mugamba nti, ‘Laba wa mululu era mutamiivu, mukwano gwʼabasolooza ba musolo nʼabalina ebibi!’

Naye singa omuddu oyo alowooza mu mutima gwe nti, ‘Mukama wange ajja kulwawo okudda,’ nʼadda ku baweereza banne, abasajja nʼabakuba, nʼebiseera bye nʼabimala mu kulya ne mu kunywa ne mu kutamiira, mukama we agenda kudda mu kiseera wʼatamusuubirira, amutemeeteme, era amusuule eyo abatakkiriza gye bali.

“Mwekuume muleme okwemalira mu binyumu nʼokutamiira, nʼokweraliikirira ebyʼobulamu, okujja kwange okwʼamangu kuleme kubakwasa nga temugenderedde ngʼabagudde mu mutego.

Omukulu wʼabagabuzi bwe yalega ku mazzi agafuuse wayini, nga tamanyi gyʼavudde, so nga bo abaweereza baali bamanyi, nʼayita omugole omusajja nʼamugamba nti, “Bulijjo omuntu asooka kugabula wayini omuka, nʼoluvannyuma ngʼabagenyi be banywedde nnyo, tebakyafaayo olwo nʼalyoka agabula ogutali muka nnyo. Naye ggwe wayini omuka gwʼosembezzaayo!”

Naye abalala ne baseka busesi nga bagamba nti, “Banywedde mwenge musu!” Awo Peetero nʼasituka nʼabatume ekkumi nʼomu, nʼasitula ku ddoboozi nʼayogera eri ekibiina, nʼabagamba nti, “Abasajja Abayudaaya, nammwe mwenna ababeera mu Yerusaalemi, mutegeere bino era mumpulirize. Abantu bano tebatamidde nga bwe mulowooza, kubanga essaawa ziri ssatu ezʼenkya! Naye kino kye kyayogerwako nnabbi Yoweeri nti,

Tutambulenga ngʼabʼomu musana, so si mu binyumu ne mu kutamiira, ne mu bwenzi nʼobukaba, ne mu kuyombagana nʼobuggya, naye twambale Mukama waffe Yesu Kristo so tetuwanga mubiri bbanga kukola ngʼokwegomba kwagwo bwe kuli.

Kirungi obutalya nnyama newaakubadde okunywa wayini newaakubadde ekintu kyonna ekyesittaza muganda wo.

Temumanyi nti Mmwe muli Yeekaalu ya Katonda era nga Omwoyo wa Katonda abeera mu mmwe? Omuntu yenna azikiriza Yeekaalu ya Katonda, Katonda alizikiriza omuntu oyo; kubanga Yeekaalu ya Katonda ntukuvu, ye mmwe.

Naye kaakano mbawandiikira nga mbategeeza nti Mwewale omuntu yenna ayitibwa owooluganda ngʼate mwenzi, owoomululu, asinza bakatonda abalala, oba omuvumi, oba omutamiivu oba omukumpanya. Abʼengeri eyo nʼokulya temulyanga nabo.

Oba temumanyi ngʼabatali batuukirivu tebaliyingira mu bwakabaka bwa Katonda? Temulimbibwanga. Abakaba, newaakubadde abasinza bakatonda abalala, newaakubadde abenzi, newaakubadde abasajja abeeyisa ngʼabakazi, newaakubadde abalya ebisiyaga, newaakubadde ababbi, newaakubadde aboomululu, newaakubadde abatamiivu, newaakubadde abajerega, newaakubadde abanyazi tebaliyingira mu bwakabaka bwa Katonda. Era abamu ku mmwe mwali nga bo, naye ebibi byammwe byanaazibwa era mwatukuzibwa era mwaweebwa obutuukirivu mu linnya lya Mukama waffe Yesu Kristo nʼOmwoyo wa Katonda waffe.

Oba temumanyi ngʼomubiri gwammwe ye Yeekaalu ya Mwoyo Mutukuvu Katonda gwe yabawa, era nʼemibiri gyammwe si gyammwe ku bwammwe? Kubanga mwagulibwa na muwendo, noolwekyo emibiri gyammwe gigulumizenga Katonda.

Tewali kukemebwa kubatuukako okutali kwa bantu; kyokka Katonda mwesigwa, kubanga taabalekenga kutuukibwako kukemebwa kwe mutayinza kugumira, naye anaabasobozesanga okubigumira, nʼabalaga nʼekkubo eryʼokubiwangula.

Kale obanga nze omuntu obuntu nalwana nʼensolo enkambwe mu Efeso, kingasa ki? Obanga abafu tebazuukizibwa, “Kale tulye tunywe kubanga enkya tuli ba kufa.” Temulimbibwalimbibwanga, kubanga “emikwano emibi gyonoona empisa ennungi.” Mweddemu, mutambulirenga mu butuukirivu mulekeraawo okukola ebibi, kubanga abamu mu mmwe tebamanyi Katonda. Kino nkyogera kubakwasa nsonyi.

Ebikolwa byʼomubiri bya lwatu, bye bino: obwenzi, obukaba, obugwenyufu, Okusinza bakatonda abalala, obufumu, obulabe, okuyomba, obuggya, obusungu, okwekuluntaza, okweyawula, okwesalamu, ettima, obutamiivu, ebinyumu, nʼebirala ebiri ngʼebyo. Ka mbategeeze nate nga bwe nasooka okubabuulira nti Buli akola ebyo talina mugabo mu bwakabaka bwa Katonda.

Ate temutamiiranga, kubanga mujja kweyonoona, wabula Omwoyo ajjulenga mu bulamu bwammwe. Bwe mukuŋŋananga muzimbaganenga mu Zabbuli ne mu nnyimba, ne mu nnyimba ezʼOmwoyo nga muyimbira Mukama era nga mumuyimusiza amaloboozi mu mutima gwammwe.

Noolwekyo tuleme kwebaka ngʼabalala naye tutunulenga okwegomba kuleme okutufuga. Kubanga abeebaka beebaka kiro, nʼabatamiira batamiira kiro. Naye ffe, kubanga tuli ba musana, tulemenga okutamiira. Twambale okukkiriza nʼokwagala ngʼekyomu kifuba, era tube nʼessuubi eryʼobulokozi nga ye nkufiira yaffe. Kubanga ffe Katonda teyatulondera kufukibwako kiruyi kya busungu, wabula okutulokola ngʼayita mu Mukama waffe Yesu Kristo,

Noolwekyo Omulabirizi kimugwanira okuba nga taliiko kya kunenyezebwa, nga musajja wa mukazi omu, nga muntu eyeefuga, nga mwegendereza, nga mukwata mpola, ayaniriza abagenyi, era ngʼamanyi okuyigiriza. Tateekwa kuba mutamiivu, era nga si mukambwe, wabula omuwombeefu, nga si muyombi era nga talulunkanira nsimbi.

Abadiikoni nabo kibagwanira okuba abantu abassibwamu ekitiibwa abatataaganaaga mu bigambo byabwe, abatatamiira, era abatalulunkanira bintu,

Kubanga Mwoyo wa Katonda, gwe yatuwa tatufuula bati, wabula atuwa amaanyi, nʼokwagala era nʼokwegendereza.

Naye ggwe weefugenga mu bintu byonna, ogumirenga ebizibu, ngʼokola omulimu ogwʼomubuulizi wʼenjiri, ngʼotuukiririza ddala obuweereza bwo. Nze kaakano mpebwayo, era ekiseera kyange ekyʼokuva ku nsi kituuse.

Omulabirizi kimugwanira okuba nga taliiko kya kunenyezebwa ngʼomuwanika wa Katonda, nga si mukakanyavu, nga si wa busungu, nga si mutamiivu, nga si mukambwe, nga teyeegomba kufuna magoba mu bukuusa naye ayaniriza abagenyi, ayagala okukola obulungi, omutegeevu, nga mwenkanya, nga mutukuvu, era ngʼamanyi okwefuga.

Kubirizanga abasajja abakulu babe bateefu, abassibwamu ekitiibwa, abeegendereza, abajjudde okukkiriza, okwagala nʼokugumiikiriza. Abakazi abakulu nabo bakubirize bwʼotyo babe nʼempisa ezisaanira abantu ba Katonda, nga tebawaayiriza, era nga tebatamiira, wabula nga bayigiriza ebirungi,

Nʼabavubuka bakubirizenga babe beegendereza,

era kituyigiriza tuleke obutatya Katonda, nʼokwegomba kwʼensi, tulyoke tube beegendereza, abatuukirivu abatya Katonda nga tuli mu mulembe gwa kaakano;

Noolwekyo mwetegeke nga muli bateefu, nga mutadde emitima gyammwe ku kisa kya Katonda ekiribaweebwa, Yesu Kristo bwʼalirabika. Mugonderenga Katonda, kubanga muli baana be, muleme kufugibwa okwegomba kwammwe okubi okwʼedda, kwe mwatambulirangamu mu butamanya. Kale, nga Katonda eyabayita bwʼali omutukuvu, nammwe mubeerenga batukuvu mu byonna bye mukola. Nga bwe kyawandiikibwa nti, “Mubenga batukuvu, kubanga nze ndi mutukuvu.”

Mu biseera ebyayita mwemaliranga mu kukola ebyo Abaamawanga bye beegombanga. Mwali mwemalidde mu bwenzi, mu kwegomba okubi, mu butamiivu, mu binyumu, mu bubaga obwʼomwenge, ne mu kusinza bakatonda abalala.

Mutunulenga, mwekuume omulabe wammwe Setaani, atambulatambula ngʼempologoma enjala gyʼeruma egenda ngʼewuluguma ngʼenoonya gwʼeneerya. Mumwaŋŋange ngʼabalumbye, nga mwesiga Mukama, era mujjukire nti Ebibonoobono ebiri ngʼebyo bituuka ne ku bakkiriza abalala mu nsi yonna.

Naye bwe twatula ebibi byaffe, ye mwesigwa era mutuukirivu okutusonyiwa nʼokutunaazaako obutali butuukirivu bwonna.

Ate malayika omulala owookubiri nʼamugoberera ngʼagamba nti, “Babulooni kigudde! Kigudde, ekibuga ekikulu, kubanga kyasendasenda amawanga gonna okunywa ku mwenge gwʼobusungu obwʼobwenzi bwakyo.”

Bakabaka abʼoku nsi bayenda naye nʼabantu abʼoku nsi banywa omwenge ogwʼobwenzi bwe ne batamiira.”

Kubanga amawanga gonna gaanywa ku mwenge gwʼobwenzi bwe. Bakabaka abʼomu nsi bonna baayenda naye. Era abasuubuzi abʼomu nsi yonna bagaggawadde olwʼobulamu bwe obwʼokwejalabya.”