15 – Onā

Ona amata lea e Noa ona galue i le eleele, ua ia fai foi le tovine. Ua inu foi o ia le uaina, ma ua onā ai; ua le lavalavā foi o ia i lona fale ie. Ona ilo atu lea e Hamo le tamā o Kanana le le lavalavā o lona tamā, i le ua ta‘uina atu e ia i ona uso e toalua i fafo.

Aua e te inu le uaina po o le ‘ava, o oe lava, po o ou atalii, pe a outou o i totonu o le fale fetafai o le faapotopotoga, ne‘i oti ai outou; o le tulafono lea e faavavau i o outou tupulaga amuli; ina ia outou faailogaina mea paia ma mea e le paia, o mea leaga foi ma mea mamā;

ia sa lava ia te ia le uaina ma le ‘ava, aua ne‘i inu le vineta e faia i le uaina po o le vineta e faia i le ‘ava, aua ne‘i inu foi le sua o le fua o le vine, aua ne‘i ‘ai foi o ia le fua o le vine pe mata pe mago.

ona fai atu lea o i laua i toeaina o lana aai, O la ma tama nei ua vaogata ma le finauvale ia, e lei faalogo lava i a ma upu; o le ‘ai tele foi ia, ma le inu ia onā.

Auā o lo latou vine mai le vine o Sotoma lea, mai fanua o Komoro foi; o latou fua o vine o vine oona ia, e oona foi o latou fuifuivine; o le mea ‘ona o gata o latou uaina, ma le mea matuā ‘ona o asipi.

O lenei, ia e faaeteete, ne‘i e inu uaina po o se ‘ava, aua foi e te ‘ai se mea leaga; auā faauta, o le a to oe,

Na e faailoa mai mea faigata i lou nuu; na e faainumia i matou i le uaina e tautevateva a‘i.

Auā o loo i le aao o Ieova le ipu, ua mūmū foi le auina; ua tumu i le uaina filogia; e liligiina atu foi e ia ai lenei lava ipu; a o ona ‘alu, e tāulia a faainu a‘i o e amio leaga uma i le lalolagi.

Auā ua latou aai le areto a le agasala; ua latou inu foi le uaina a le sauaga.

O le uaina, o le faatauemu lea; o le ‘ava, o le faapisapisao lea; o i latou uma o e faaseseina ai, e le popoto i latou.

O le tagata mativa ua manao i mea faafiafia, o le ua manao i le uaina, ma le suāuu, e le mauoa ia.

Aua ne‘i fai oe ma so latou o e inu tele i uaina; ma e ua aai tetele i manu; auā o lē inu tele ma ‘ai tele e faamativaina o ia; ma lē fia moe pea e ofu o ia i ofu masaesae.

E ia te ai ea le aue? e ia te ai ea mala? e ia te ai misa? e ia te ai le atuatuvale? e o ai ea manunua fua? e ia te ai ea mata mūmū? O e ua faatuai i le uaina; o e o atu e saili i le uaina filogia. Aua e te vaai i le uaina pe a mūmū mai; pe a pupula mai i le ipu, e alualu sa‘o ifo ia. E mulimuli ane e feū ia, pei se gata; e pei o le gata uogo lona tui; e vaai ou mata i fafine ese; e tautala foi lou loto i mea faapiopio. E tusa lava oe ma le ua taoto i totonu o le sami; e tusa foi ma le ua taoto i le tumutumu o le fanā. E te faapea, Na latou fasia a‘u, a ou te lei tiga ai; na latou tu‘ia a‘u, a ou te lei lagona; pe a a‘u ala, ona ou toe sailia lea.

Lemueli e, e le ono i tupu, e le ono lava i tupu le inu uaina, po o alii e manao i le ‘ava; ina ne‘i inu o ia, ona galo ai lea o tulafono, ma faasese le finauga o se tasi tagata ua tigaina. Avatu le ‘ava i lē a mole; ma le uaina i le ua tiga le loto; ia inu ai o ia, ma faagalogalo i lona mativa; ma ia le toe manatu i lona puapuaga.

Le nuu e, amuia oe pe a fai mou tupu le alo o se alii, e aai foi ou alii i le itu aso e tatau ai, ia malolosi ai, a e le ina ia onā ai.

Oi talofa ia te i latou o e ala usu e matuā saili ‘ava, ma ua nonofo pea ua oo i le po, seia faavalemalolosi ai i latou i le uaina. O loo i ai i a latou faigaai o le kitara, ma le napeli, ma le topa, o le fagufagu foi, atoa ma le uaina; a ua latou le mafaufau i le galuega a Ieova, ua latou le vāai foi i mea ua faia e ona aao.

Oi talofa i e malolosi e inu uaina, o e fai ma tagata totoa foi e palu ai le ‘ava.

Ua liligi atu e Ieova i totonu ia te ia, le agaga e faapiopio ai, o lea ua latou faaseseina ai Aikupito i ana mea uma e fai, e faapei ona tautevateva o le tagata onā i lona puaiga.

Ua latou le toe inu uaina ma pepese; e oona le ‘ava ia te i latou o e feinu ai. Ua lepetia le aai gaogao; ua punitia fale uma, e le uia. O i ala le alaga i le uaina; ua mavae atu le olioli uma; ua alu ese le fiafia o le nuu. Ua toe i le aai na o le faatafunaina, ua tu‘ipalaina le puipui.

Ua tautevateva le nuu e pei o le tagata onā, ua feluea‘iina e pei o le moega tautau; ua mamafa lona fouvale i luga ia te ia; e paū ai o ia, e le toe tu lava.

Oi talofa i le palealii e faamaualuga, o e onā o Efaraima, atoa ma le fuga ua mamae o lo latou matagofie e faamananaia a‘i i latou, o le ua i le ulu o le vanu lafulemu, o i latou o e ua faiaina i le uaina.

E solia i vae le palealii e faamaualuga o e onā o Efaraima;

A e peitai o i latou, ua sese i latou i le uaina; ua feseseai i le ‘ava; ua sese le faitaulaga ma le perofeta i le ‘ava; ua faiaina i latou i le uaina, ua feseseai i latou i le ‘ava; ua sese lo latou vaai, ua latou tautevateva i le faamasinoga. Auā ua tutumu laoai uma i puaiga ma otaota, e leai lava se mea ua sao.

Ia outou faatuatuai, ma ia outou ofo; ia outou olioli, a e tauaso outou; ua latou onā, a e le o le uaina; ua latou tautevateva, a e le o le ‘ava.

O mai ia, ou te aumaia le uaina, tatou te inu ia onā i le ‘ava; e pei o le aso nei foi a taeao; e silisili ese ona lelei.

O le upu foi lenei e te fai atu ai ia te i latou, O loo faapea ona fetalai mai o Ieova le Atua o Isaraelu, E faatutumuina fagu uma i le uaina; latou te fai mai foi ia te oe, E le ua matou matuā iloa ea e faatutumuina fagu uma i le uaina? Ona e fai atu lea ia te i latou, o loo faapea ona fetalai mai o Ieova, Faauta, ou te faatutumuina i le onaga o i latou uma o e nonofo i lenei nuu, o tupu o e nonofo i le nofoālii o Tavita, atoa ma faitaulaga, ma perofeta, ma i latou uma o e nonofo i Ierusalema. Ou te faafeto‘ai i latou, o le tasi i le tasi, o tamā foi atoa ma fanau, o loo fetalai mai ai Ieova; ou te le faapelepele ia te i latou, pe faasaoina, pe alofa atu, a e faaumatia i latou.

Ua momomo lo‘u loto i totonu ia te au ona o perofeta; ua gatete o‘u ivi uma; ua avea a‘u e pei o le tagata onā, e pei o le tagata ua faiaina i le uaina, ona o Ieova ma ana afioga paia.

Auā ua faapea ona fetalai mai o Ieova le Atua o Isaraelu ia te au, Ia e ave le ipu uaina o lo‘u nei ita ai lo‘u lima, ma faainu a‘i atu nuu uma ou te auina atu ai oe ia te i latou. Latou te feinu, ma tautevateva, ma faavālea, ona o le pelu ou te auina atu ai ia te i latou.

E te fai atu foi ia te i latou, Ua faapea ona fetalai mai o Ieova o ‘au, le Atua o Isaraelu, Ia feinu outou, ma ia onā, ma ia puai, ma ia pauū, aua foi le toe tutū, ona o le pelu ou te auina atu ai ia te outou.

ona ou tuuina atu lea i luma o le fanauga a le aiga o sa Rakapā o ipu faaofuofu ua tutumu i uaina, ma ipu e inu ai; ma a‘u fai atu ia te i latou, Ia outou feinu i le uaina. A ua latou fai mai, Matou te le inu uaina; auā na poloai mai ia te i matou o Ionatapa le atalii o Rakapa, o lo matou tamā, ua faapea mai, Aua tou te inu uaina, o outou, ma o outou fanau, e oo i le faavavau;

Ua ia fagaina a‘u ia ma‘ona i mea oona, ua ia faainu ia te au ia onā i le laena.

Ua e savali i le ala o lou uso; o le mea lea ou te tuuina atu ai lana ipu i lou lima. Ua faapea ona fetalai mai o le Alii o Ieova, E te inu i le ipu a lou uso, e loloto ma le tele, e fai oe ma mea e featani ai ma tauemuina ai; e tele lava mea o i ai. E faatumuina oe i le onaga ma le faanoanoa, o le ipu o le fememeai ma le faatafunuaga, o le ipu a lou uso o Samaria. E te inu ai ma mitia lava, e te taei foi i ona taega ipu, ma e saeia ou lava susu; auā o a‘u ua ou fai atu ai, o loo faapea mai ai le Alii o Ieova. O le mea lea o loo faapea ona fetalai mai ai o le Alii o Ieova, Ua e faagalogalo mai ia te au, ma ua e lafoaiina a‘u i ou tua, o le mea lea ia taui ai ia te oe o lou ulavale, ma au faitaaga.

E le inu uaina foi se tasi ositaulaga lava pe a latou ulufale mai i le lotoā tuloto.

A ua manatu Tanielu, o le a le leaga o ia i mea taumafa a le tupu, po o le uaina e inu ai o ia; ona aioi atu ai lea o ia i le alii e pule i eunuka ina ia le leaga ai o ia.

Ona aveeseina ai lea e Melesara a latou mea taumafa mai le tupu, atoa ma le uaina na fai a inu ai i latou, ua avatu fua o laau mā latou.

a ua e faamaualuga oe i le Alii o le lagi; ua aumaia foi i ou luma o ipu o lona malumalu, ua inu ai uaina e oe, ma alii ua ia te oe, o ou faletua, ma au palake; ua e vivii atu foi atua ario, ma auro, ma ‘apa memea, ma uamea, ma laau, ma maa, e le vaai i latou, e le lagona, e le iloa ni mea; a o le Atua ua i lona aao lou mānava, ua ia te ia foi ou ala uma, e te lei vivii atu i ai.

O le faitaaga, ma le uaina, ma le uaina fou e aveeseina ai le loto.

O le aso o lo tatou tupu na mama‘i ai alii i le oona o uaina; na ia faaloaloa atu lona lima faatasi ma ē tauemu.

Ala mai ia outou ua onā, ma fetagisi; ia uio foi outou uma o e inu uaina, auā tou te le toe feinu lava i le suāvine.

Ua latou taooto foi i ofu ua tuu faafaatau i tafatafa o fata faitaulaga uma; ma ua latou inu uaina a e ua faasalaina i le fale o latou atua.

A ua outou avatua uaina i le au naseri e inu ai, ma vavao atu i le au perofeta, o loo faapea atu, Aua le vavalo mai.

o e inu uaina i ipu tetele, ma uu ia te i latou i uu e sili ona lelei; a ua le tiga i latou ona o le malaia o Iosefa.

Ai se tagata e savali e tusa ma lona loto ma le faa‘ole‘ole e pepelo mai, e faapea mai, Ou te vavalo ia te oe i le uaina ma le ‘ava; e avea lava ia ma perofeta i lenei nuu.

E ui lava ina filia i latou e pei o laau talatala, ma latou matuā onā i le inugāuaina, a e faaumatia i latou pei o tagutugutu o saito e matuā magumagu lava.

Oi talofa i le na te faainu i le tasi tagata, o oe o lē liligi atu lau mea oona ia te ia, ua e faaonā foi ia te ia, ina ia e vaai atu i lo latou le lavalavā. E tumu oe i le mā e le o le mamalu; ia e inu foi oe, ma ia aliali lou le peritomeina; e liliu atu ia te oe le ipu a le aao taumatau o Ieova, e i ai foi le puaiga e faamāina ai i luga o lou mamalu.

Auā na sau Ioane, e lei ‘ai, e lei inu foi ia; ona latou fai ane ai lea, Ua ia te ia le temoni. Ua sau foi le Atalii o le tagata, ua ‘ai o ia ma inu; ona latou fai ane ai lea, Faauta, o le tagata ‘ai tele ma le inu uaina, o le uo a telona ma ē agasala. A e ta‘uamiotonuina le poto e ana tama.

A e afai e fai ifo lea auauna leaga i lona loto, E faatuai mai lo‘u alii; ona fasi ai lea o ia i ona uso a auauna, ua aai foi ma inu faatasi ma e inu ia onā; e sau lava le alii o lea auauna i le aso e le faatalitali atu ai o ia, o le itu aso foi e le iloa ai e ia, ona matuā faasala lea ia te ia, ma avatu ia te ia lona tofi faatasi ma tagata pepelo; e i ai le taufaitagiaue ma le lilivau o nifo.

Auā e sili o ia i luma o le Alii; e le inu o ia i le uaina po o le ‘ava; e faatumuina foi o ia i le Agaga Paia e afua ina fanau mai o ia.

Auā na sau Ioane le papatiso, ua le ‘ai areto, ua le inu foi uaina; ona outou fai ane lea Ua ia te ia le temoni. Ua sau le Atalii o le tagata, ua ‘ai o ia ma inu; ona outou fai ane lea, Faauta, o le tagata ‘ai tele ma le inu uaina, o le uo a telona ma ē agasala.

A e afai e fai ifo lea auauna i lona loto. E faatuai mai lo‘u alii; ona fasi ai lea o ia i auauna tane ma auauna fafine, e ‘ai foi, ma inu, ma onā. E sau lava le alii o lea auauna i le aso e le faatalitali atu ai o ia, o le itu aso foi e le iloa ai e ia; ona matuā faasala lea ia te ia, ma avatu lona tofi faatasi ma e le faalogo.

Ia outou, ne‘i faamamafaina o outou loto, ma le faaniniva, ma le onā, ma le popole i mea a le olaga nei, ne‘i faafuasei mai lea aso ia te outou.

Ua tofo foi lē pule i le tausamaaga i le vai ua liu uaina, (a ua na le iloa le mea na maua ai, a o auauna na asu le vai ua latou iloa,) ona valaau atu lea o lē pule i le tausamaaga i le faatoafaiavā, ua fai atu ia te ia, E muamua ona au mai e tagata uma o le uaina lelei; pe a tele foi le inu i ai o tagata, ona au mai ai lea o le uaina leaga; a ua tuu e oe le uaina lelei, ua oo mai i lenei itu aso.

Peitai o isi, ua tauemu i latou, ua faapea ane, Ua onā nei tagata i le uaina suamalie. Ona tulai lea o Peteru atoa ma le toatinoagafulu ma le toatasi, ua fai atu ma le leo tele, ua faapea atu ia te i latou, Sema e, o outou Iutaia e, atoa foi ma e ua nonofo i Ierusalema uma lava, ia iloa e outou lenei mea, ma ia faafofoga mai i a‘u upu. Auā ua le onā nei tagata, pei ona outou masalosalo i ai; auā o le itu aso e tolu lenei; a o le mea lenei ua fai mai ai e le perofeta o Ioelu,

Ia tatou savavali ma le matagofie e tusa i le ao; aua le poula ma le onā, aua le faitaaga ma le matāitu, aua le femisai ma le mataua. A ia outou oofu i le Alii o Iesu Keriso; aua foi le sauniuni mo le tino, e oo ai ona tu‘inanau.

E lelei pe a le ‘ai ni aano o manu, ma ia le inu uaina, po o se tasi mea e tausuai ai lou uso, pe tautevateva ai, pe vaivai ai.

Tou te le o iloa ea o le malumalu outou o le Atua, o loo nofo foi le Agaga o le Atua i totonu ia te outou? Afai e faaleaga e se tasi le malumalu o le Atua, e faaleagaina lena tagata e le Atua; auā e paia le malumalu o le Atua, o outou lava ia.

A o lenei, ua ou tusi atu ia te outou, ai se tasi ua ta‘uusoina a e faitaaga, pe matapeapea, pe ifo i tupua, pe agatele, pe onā, pe fao mea; aua lava ne‘i tou feoai, aua foi tou te aai faatasi ma le o faapea.

Tou te le iloa ea, o e amio leaga e le fai mo latou tofi le malo o le Atua? Aua ne‘i faaseseina outou; o e faitaaga, ma e ifo i tupua, ma e mulilulua, ma e tauātane, ma e faasotoma, ma e gaoi, ma e matapeapea, ma e onā, ma e agatele, ma e fao mea, e le fai mo latou tofi le malo o le Atua. Sa faapea foi nisi o outou; a ua taeele outou, a ua faapaiaina outou, a ua ta‘uamiotonuina outou i le suafa o le Alii o Iesu, i le Agaga foi o lo tatou Atua.

Tou te le iloa ea, o lo outou tino o le malumalu lea o le Agaga Paia ua i totonu ia te outou, o loo ua ia te outou mai le Atua, e le aiā foi outou ia te outou? Auā ua faatauina outou i le tau; o lenei, ia outou vivii atu i le Atua i o outou tino ma ou outou agaga, o mea a le Atua ia.

Ua le maua outou e se tofotofoga e ese i lo tagata; a ua faamaoni le Atua, o le na te le tuuina atu outou i le tofotofoga e sili i se mea ua outou lavatia, a e sauni foi faatasi ma le tofotofoga se mea e sao ai, ina ia outou lavā oono.

Se a ea se aoga ia te au ona ua ou tau ma manu feai i Efeso, pei o le tu a tagata, pe afai e le toe tutū e ua oti? ina tatou aai ma inu, auā o a taeao tatou te oti ai. Aua ne‘i faaseseina outou, O le feoai ma e amio leaga e leaga ai amio lelei. Ina ala mai ia i le amiotonu, a e aua ne‘i agasala; auā ua pouliuli nisi i la le Atua; ou te faapea atu ia te outou e faamā ia te outou.

Ua iloa tino foi galuega a le tino, o mea faapenei; o le mulilua, o le faitaaga, o le amio leaga, o le matāitu, o le ifo i tupua, o le fai togafiti faataulāitu, o le feitagai, o le femisai, o le losilosi vale, o le lotoa, o le finau vale, o le fevaevaeaiga, o maseiga, o le mataua, o le fasioti tagata, o le onaga, o le poula, ma mea faapena; ou te muai ta‘u atu nei ia te outou, pei ona ou fai atu anamua, o e faia mea faapena, e le fai le malo o le Atua mo latou tofi.

Aua foi ne‘i onā outou i le uaina, o le mea e ulavale ai; a ia faatumuina outou i le Agaga. Ia outou fetautalatalai i salāmo, ma pese, ma siva faaleagaga, ia faaneenee atu ma pepese atu i le Alii i o outou loto.

O lea, aua ne‘i tatou momoe ai faapei o isi, a ia tatou mataala, ma ia faautauta. Auā o e momoe, e momoe i latou i le po; o e inu ia onā, e onā i latou i le po; a o i tatou nei o e o le ao, ia faautauta i tatou, ia tatou oofu i le ufifatafata o le faatuatua ma le alofa, ma le puloutau o le faamoemoe i le ola. Auā e lei tofia i tatou e le Atua i le toasa, a ia maua le ola ona o lo tatou Alii o Iesu Keriso,

O lenei, e tatau i le epikopo ia le mata‘uleagaina, o lē faiavā i le fafine e toatasi, o lē mataala, o lē faautauta, o lē amio lelei, o lē alofa i tagata ese, o le na te mafaia ona a‘oa‘o atu. E le se inu tele i uaina, e le se fasi tagata, e le manumanu i oloa; a e agamalu, e le se fai finauga, e le se matapeapea i tupe;

O tiakono foi, ia faapea ona faatoeaina i latou, e le faagutugutulua, e le fia inu uaina e tele, e le manumanu i oloa;

Auā ua le foaiina mai e le Atua ia te i tatou le Agaga e mata‘u ai, a o le Agaga e faamalosi ai, ma alofa ai, ma mafaufau tonu ai.

A o oe, ia e faautauta i mea uma lava, ia e onosai i mea e tiga ai, ia e fai le galuega a lē folafola le tala lelei, ia e matuā faaiuina lau faiva. Auā o a‘u ua faamaligiina nei lo‘u toto, ua lata ona po ou te alu ai.

Auā e tatau lava i le epikopo ona le mata‘uleagaina o ia, auā o ia le auauna e tausi i mea a le Atua; e le finau vale, e le itagofie, e le inu tele i uaina, e le fasi tagata, e le manumanu i oloa; a o lē alofa i tagata ese, o lē alofa i e amio lelei, o lē faautauta, o lē amiotonu, o lē amio Atua, ma le le gaoiā;

fai atu i toeaina ia mataala i latou, ia faatoeaina, ia faautauta, ia faamaoni i le faatuatua, ma le alfoa, ma le onosai. Ia faapena foi loomatutua, ia amio i latou i le amio Atua, aua ne‘i faatuaupua, aua ne‘i faapologaina i latou i le uaina, a ia fai ma a‘oa‘o i mea lelei,

Ia faapea foi ona e apoapoai atu i taulelea, ia faautauta i latou.

o loo a‘oa‘o mai ai ia te i tatou, ia tatou tete‘a ese ma le faalematau atoa ma tu‘inanau faalelalolagi, a ia tatou nonofo ma le faautauta ma le amiotonu atoa ma le amio Atua i lenei olaga;

O lenei, ia outou fusi ae i sulugatiti o outou mafaufau, ia faautauta, ia atoatoa ona faamoemoe, i le alofa tunoa e molia mai ia te outou pe a faaalia mai Iesu Keriso. Ia pei o fanau gauai, aua ne‘i faatusaina outou e outou i o outou tu‘inanau tuai, a o vālea outou; a e pei ona paia o ia na valaauina outou, ia faapea foi outou ona paia i a outou amio uma; auā ua tusia, Ia paia outou, auā o a‘u nei e paia lava a‘u.

Auā ia gata ia i aso ua mavae o le olaga nei ona fai ai e i tatou o le manao o e faapaupau, sa savavali i le faamatāitu ma tu‘inanau, ma le inu tele i uaina, ma poula, ma inugāava, ma le ifo i tupua e soli ai tulafono.

Ia outou faautauta, ia outou mataala, ona o le ua fai outou mona fili, o le tiapolo lea, o loo fealualuai o ia e pei o se leona tagi, ua saili se tasi e ‘aina e ia; ia outou tetee atu ia te ia, ma ia mausali outou i le faatuatua, ina ua outou iloa o loo taufaaatoaina ia lava mea tiga i lo outou au uso o i le lalolagi.

a e afai tatou te faaali a tatou agasala, e faamaoni o ia, ma le amiotonu e faamagalo ai a tatou agasala, ma faamamā mai ia i tatou i amioletonu uma lava.

Ona mulimuli atu ai lea o le tasi agelu, ua faapea atu, Ua paū, ua paū Papelonia o le aai tele, auā ua ia faainu i nuu uma i le uaina o le toasa i lana faitaaga.

ua faitaaga ma ia o tupu o le lalolagi, ua onā foi e o nonofo i le lalolagi i le uaina o lana faitaaga.

auā ua feinu nuu uma i le uaina o le toasa i lana faitaaga, ua faitaaga foi ma ia tupu o le lalolagi, o le faulaiga o ana mea faafiafia ua tamaoaiga ai e ua faatau oa o i le lalolagi.