20 – Tatalo

Ona tali atu lea o Aperaamo, ua faapea atu, Faauta mai, o a‘u nei o le efuefu ma le lefulefu, ua ou faamalosi e tautala atu i le Alii;

Ona faapea atu lea o ia, Ieova e, le Atua o lo‘u matai o Aperaamo, ia e faamanuia lava ia te au i le asō, ma e alofa mai foi i lo‘u matai o Aperaamo. Faauta, o a‘u nei, ou te tu i luga o le vaipuna; o le a o mai foi afafine o tagata o le aai e utu vai; ia faapea ona fai, o le teine ou te faapea atu i ai, Se‘i e tuutuu ifo lau kate so‘u inu ae; ona faapea mai lea o ia, Ina inu ia, ou te faainua foi au kamela; o le teine lea ua o tofia mā lau auauna o Isaako; ou te iloa foi i lea mea ua e alofa mai i lo‘u matai. Faauta foi, e lei uma atu lana upu, a ua sau Repeka, o le afafine o Petueli, le tama tane lea a Meleka, le avā a Nakori, o le uso o Aperaamo, sa i lona ua lana kate.

Ua faatoga atu Isaako ia Ieova mo lana avā, auā ua pa o ia; ua faafofoga foi Ieova ia te ia, ona to ai lea o lana avā o Repeka.

Ua tuua foi Iakopo e toatasi; ua la fagatua foi ma le tasi tagata ua oo ina aoina. Ua iloa foi e ia ua le malo ia ia te ia, ona pa‘i atu lea o ia i le fa‘iga o lona suilapalapa, ona see lea o le fa‘iga o le suilapalapa o Iakopo ina o la fagatua ma ia. Ua faapea mai foi o ia, Tuu mai ia o a‘u a ou alu, auā ua ao. A ua tali atu ia, Ou te le tuuina atu lava oe seia e faamanuia mai ia te au. Ona faapea mai lea o ia ia te ia, O ai ea lou igoa? Ona tali atu ai lea o ia O a‘u o Iakopo. Ona faapea mai lea o ia, E le toe ta‘ua lou igoa o Iakopo, a o Isaraelu, auā e pei o se alii ua e finau i le Atua atoa ma tagata, ma ua e manumalo. Ua fesili atu foi Iakopo, ua faapea atu, Ina ta‘u mai ia o lou igoa. Ona tali mai lea o ia, Se a le mea ua e fesili mai ai i lo‘u igoa? Ona faamanuia lea o ia ia te ia i lea mea. Ona faaigoa atu lea e Iakopo lea mea o Penieli; auā ua faapea a ia, Na ou iloa ai le Atua ua ma fesagai lava, a ua laveaiina a‘u.

Sa i lea mea foi i laua ma Ieova e fagafulu ona ao, e fagafulu foi ona po; e lei ‘ai ai o ia, e lei inu ai foi; na tusi foi e ia i luga o papa maa o upu o le feagaiga, e sefulu upu.

Ona faapauufao ai lea o i laua, ua faapea atu, Le Atua e, o le Atua o agaga o tagata uma, a agasala le tagata e toatasi, e te toasa mai ai ea i le faapotopotoga uma lava?

A e afai tou te toe saili ia Ieova lou Atua i lea mea, ona e maua lea o ia, pe afai e te saili ia te ia ma lou loto atoa ma lou agaga atoa. A oo ia te oe le puapuaga, a maua foi oe e ia mea uma lava i aso amuli, afai e te toe foi atu ia Ieova lou Atua, ma e faalogo i lona siufofoga, (auā o Ieova lou Atua, o le Atua alofa ia,) na te le tuuna oe, na te le faaumatia oe, e le galo foi ia te ia le feagaiga ma ou tamā, na ia tauto ai ia te i latou.

Na ou alu ae i le mauga e talia papamaa, o papa o i ai le feagaiga na osia e Ieova ma outou; ona ou nofo lea i le mauga e fagafulu o ao ma le fagafulu o po, ou te lei ‘ai ai sina mea e ‘ai, ou te lei inu foi sina vai.

Ona ou faapaū lea i luma o Ieova, faapei ona muai faia, e fagafulu o ao ma le fagafulu o po, ou te lei ‘ai ai sina mea e ‘ai, ou te lei inu foi sina vai, ona o a outou agasala uma lava na outou agasala ai, ina ua faia mea leaga i luma o Ieova e faaonoono ia te ia.

Na ou faapaū i luma o Ieova i ao e fagafulu ma le fagafulu o po faapei ona ou muai faapaū ai; auā na fetalai mai Ieova o le a na faaumatia outou.

Na ou i ai pea i le mauga i ao e fagafulu ma po e fagafulu, pei o ona aso muamua; na faafofoga mai Ieova ia te au i ona po ia foi, i le ua le finagalo Ieova e faauma ia te oe.

Ona saei lea e Iosua ona ofu, ma faapaūfao i le eleele i luma o le atolaau a Ieova, ua oo i le afiafi, o ia, ma toeaina o Isaraelu; ua latou asu ae le efuefu i o latou ulu.

Ona o ae lea o le fanauga uma a Isaraelu ma le nuu uma, ua latou oo atu i Peteli, ma latou fetagisi, ma nonofo ai i luma o Ieova, ma latou anapopogi i lea aso e oo i le afiafi; ua latou faia foi o taulaga mu atoa ma taulaga faafetai i luma o Ieova.

Ua afio mai Ieova, ona tu lea ma valaau, pei ona luai fai, Samuelu e, Samuelu e! Ona tali atu lea o Samuelu, Fetalai mai ia, auā o loo faalogologo atu lau auauna.

O a‘u foi, ia mamao ia te au ona ou agasala ia Ieova i lo‘u tuua o le fautua mo outou; ou te faasino foi ia te outou le ala lelei ma le tonu.

Ona tulai atu lea o Solomona i luma o le fata faitaulaga o Ieova, i luma o le faapotopotoga uma o Isaraelu, ua na faaloaloa ae foi ona lima i le lagi; ua faapea atu foi o ia, Ieova e, le Atua o Isaraelu, e leai se atua e tusa ma oe i le lagi i luga, po o le lalolagi i lalo nei, o loo e tausia le feagaiga ma le alofa i au auauna o e savavali i ou luma ma o latou loto atoa;

Ua faaumaina e Solomona ona tatalo ia Ieova i lenei tatalo ma lenei aioi uma, ona tulai lea o ia mai luma o le fata faitaulaga o Ieova, sa tootuli ai ona tulivae, ma faaloaloa ae ona lima i le lagi.

Ua oo i le itu la e fai ai le taulaga afiafi, ona faalatalata atu ai lea o Elia le perofeta, ua faapea atu, Ieova e, le Atua o Aperaamo, ma Isaako, ma Isaraelu, ia faailoa i lenei aso, o oe o le Atua i Isaraelu, o a‘u foi o lau auauna, ma ua ou faia o nei mea uma e tusa ma lau afioga. Ia e faafofoga mai ia te au, Ieova e, ia e faafofoga mai ia te au, ina ia iloa e le nuu nei o oe o Ieova o le Atua, ma ua e faaliliuina mai o latou loto. Ona paū ifo lea o le afi a Ieova, ma faaumatia ai le taulaga mu, ma fafie, ma maa, ma le eleele ua mitiia ai foi le vai sa i le utu. Ua iloa e le nuu uma, ona faapauufao ai lea o i latou, ua faapea, O Ieova, o le Atua ia; o Ieova o le Atua ia!

Ieova e, ia e liliu mai ou fofoga, ma ia faafofoga mai; Ieova e, ia silasila mai ou fofoga, ma ia e silafia, ma ia faafofoga, mai i upu a Sanerivi, o le ua auina mai le tasi e faifai i le Atua soifua.

O lenei, Ieova e lo matou Atua, ou te aioi atu, ia e faaola mai ia te i matou ai lona lima, ina ia iloa ai e malo uma o le lalolagi, o oe lava o Ieova o le Atua oe, na o oe lava.

Ona liliu atu ai lea ona fofoga i le pa o le fale, ua tatalo atu ia Ieova, ua faapea atu, Ieova e, ou te aioi atu, ia e manatu mai i lo‘u savali i ou luma ma le faamaoni, ma le loto atoa, ua ou faia foi mea ua e finagalo i ai. Ona tagi lotulotu lea o Esekia.

Ua valaau atu Iapesa i le Atua o Isaraelu, ua faapea atu, E, fia manuia a‘u ia te oe ma faalauteleina lo‘u laueleele, ia ia te au foi lou aao, ma ia e leoleo mai ia te au ai le leaga, ina ne‘i tigaina a‘u. Na avatu e le Atua ia te ia le mea na ia faatoga atu ai.

Vivii atu ia outou ia Ieova, valaau atu ia i lona suafa; ia outou faailo atu i nuu o ana mea na fai.

Saili ia outou ia Ieova ma lona malosi; sa iliili ia te ia, aua le aunoa.

Vivii atu outou ia Ieova; auā e lelei lava o ia; auā e faavavau lava lona alofa.

e tutu foi i taeao uma e faafetai ma vivii atu ia Ieova, e faapea foi i afiafi;

Ua tu o ia i luma o le fata faitaulaga o Ieova i luma o le faapotopotoga uma o Isaraelu, ma na faaloaloa ona lima; auā na faia e Solomona le tulaga ‘apa memea e lima kupita lona umi, ma le lima o kupita lona lautele, ma le tolu o kupita lona maualuga, ma ua tuu ai i totonu o le lotoā; ua tu foi o ia i ona luga, ma ua tootuli i ona tulivae i luma o le faapotopotoga uma o Isaraelu, ma ua faaloaloa ae ona lima i le lagi, Ua faapea atu foi o ia, o Ieova e, le Atua o Isaraelu, e leai se Atua e tusa ma oe i le lagi, po o le lalolagi; o loo tausia le feagaiga ma le alofa i au auauna, o ē savavali i ou luma ma o latou loto atoa;

A ia e liuliualo mai i le tatalo a lau auauna, ma lana aioi, Ieova e, lo‘u Atua, ina ia faafofoga mai i le valaau ma le tatalo, o loo tatalo atu ai lau auauna i ou luma; ina ia silasila mai ou fofoga i lenei fale i le ao atoa ma le po, o le mea na e fetalaia mai, e te tuu i ai lou suafa; ina ia e faafogafoga mai i le tatalo e tatalo atu ai lau auauna i lenei mea. Ia e faafofoga mai i le aioi atu a lau auauna, ma lou nuu o Isaraelu, pe a latou tatalo atu i lenei mea; ia e faafofoga mai foi mai le lagi, o le mea o loo e afio ai; ia e faafofoga mai, ma ia e faamagalo mai.

o talosaga uma ma aioi uma e fai e se tasi tagata, po o lou nuu o Isaraelu uma, o e ua iloa taitoatasi o lona ma‘i, ma lona tiga, ma faaloaloa ona lima i lenei fale; ia e faafofoga mai mai le lagi, o le mea o loo e afio ai, ma e faamagalo mai, ma e taui atu i tagata taitoatasi e tusa ma ana amio uma, ua e silafia lona loto; auā na o oe lava e silafia loto o tagata; ina ia latou matatau ia te oe, ma savavali i ou ala, i aso uma latou te ola ai i le laueleele na e foaiina mai i o matou tamā.

O lenei, lo‘u Atua e, ou te aioi atu, ia silasila mai ou fofoga, ma ia e liliu mai ou fofoga i le tatalo e faia i lenei mea.

afai e faamaulalo lo‘u nuu ē ua ta‘ua i lo‘u igoa, ma latou tatalo, ma sailiili ia te au, ma liliu ese i o latou ala leaga, ona ou faalogo ai lea mai le lagi, ma faamagalo i a latou agasala, ma faaolaina lo latou nuu. O lenei, e vaavaai o‘u mata, ma liliu o‘u taliga i le tatalo e faia i lenei mea.

Na amio leaga o ia ina ua le manatu i lona loto e saili ia Ieova.

Ona valaau atu lea o Asa ia Ieova lona Atua, ua faapea atu, Ieova e, e le se mea faigata ia te oe ona fesoasoani i e toatele, po o i latou ua leai se malosi. Ieova e, lo matou Atua, ia e fesoasoani mai ia te i matou; auā matou te faalagolago ia te oe, ua matou o atu i lou suafa lava e tau ma lena toatele. Ieova e, o oe lava lo matou Atua; aua ne‘i manumalo mai tagata ia te oe.

Ua latou faia foi le feagaiga ia saili ia Ieova le Atua o latou tamā ma le loto atoa ma le agaga atoa;

Ona tutū ai lea o le au faitaulaga, o sa Levī, ma latou faamanuia atu i le nuu; sa faafofogaina foi e Ieova o latou leo, ma ua oo atu a latou tatalo i lona afioaga paia, o le lagi lava.

Ona tatalo atu ai lea o Esekia le tupu, ma Isaia le perofeta le atalii o Amota, ma la alalaga atu i le lagi ona o lenei mea.

Ona ou tala‘iina lea o le anapogi i lea mea i le vaitafe o Aava, ia faatigaina i matou e i matou i luma o lo matou Atua, e saili mai ia te ia se ala tonu mo matou, ma o matou tama iti, ma a matou mea uma. Auā na ou mā i faatoga i le tupu i se ‘au ma ni e tietie i solofanua e fesoasoani ia i matou i e saua mai i le ala; auā na matou fai atu i le tupu, ua faapea, O le aao o lo matou Atua ua i luga ia te i latou uma o e sailiili atu ia te ia e lelei ai i latou; a o lona mamana ma lona toasa ua i luga ia te i latou uma o e tuua o ia. Ua matou anapopogi foi ma sailiili i lo matou Atua ona o lea mea, ma ua faafofoga mai ai o ia ia te i matou.

Ua oo i le taulaga o le afiafi, ona ou tulai lea ai lo‘u tiga, ua saeia lo‘u ofu, ma lo‘u ofu talaloa, ma ua ou tootuli i o‘u tulivae, ma faaloaloa atu o‘u lima ia Ieova lo‘u Atua, ma ou faapea atu, Lo‘u Atua e, ua ou mā, ma ou masiasi i tepa ae o‘u mata ia te oe, lo‘u Atua e; auā ua tele lo matou leaga ua oo i luga o matou ulu, ma ua tupu tele la matou agasala ua oo lava i le lagi.

Ona tulai lea o Esera ai luma o le fale o le Atua, ma ua alu atu i le potu o Ioanana le atalii o Eliasipa, ua oo foi o ia i ai, ua ia le ‘ai se areto, ua le inu foi se vai, auā sa faanoanoa ona o le agasala a le tafeaga.

Ua ou faalogo i ia upu, ona ou nofo ai lea i lalo, ma ou tagi, ma faanoanoa i nisi aso, ma anapogi, ma tatalo i luma o le Atua o le lagi, ma ou faapea atu, Ieova e, le Atua o le lagi, ou te aioi atu ia te oe, o le Atua silisili ma le matautia, o le tausia le feagaiga ma le alofa ia te i latou o e alofa atu ia te ia, ma tausi i ana poloaiga; ia e faafofoga mai, ma ia silasila mai ou fofoga, ina ia e faafofoga i le tatalo a lau auauna, ou te tatalo atu ai nei i ou luma i le ao ma le po mo le fanauga a Isaraelu o au auauna, ma ta‘u atu i agasala a le fanauga a Isaraelu, ua matou agasala ai ia te oe; ua agasala foi a‘u atoa ma le aiga o lo‘u tamā.

Ona faafetai atu lea o Esera ia Ieova le Atua silisili; ona tali mai lea o le nuu uma, Amene, Amene, ua sisii i luga o latou lima; ma ua latou punonou ma ifo toele ia Ieova.

O le aso foi e luafulu ma le fa o lea masina sa faapotopotoina ai le fanauga a Isaraelu, ua anapopogi, ma lavalava ie talatala, ma le eleele i luga ia te i latou. Ona vavaeeseina lea o le fanau a Isaraelu i tagata ese uma, ma ua latou tutū ma ta‘u atu a latou agasala, ma amio leaga a o latou tamā.

O lea itu malo foi ma lea itu malo uma na oo i ai le upu a le tupu ma lana tulafono, ua faanoanoa tele ai sa Iutā, ma ua anapogi, ma fetagisi, ma tagitu‘i; ua fofola foi e le toatele o latou moega i ie talatala ma le lefulefu.

Alu ia oe, ia e faapotopoto i sa Iutā uma e o i ai i Susana, ma ia anapopogi outou ona o a‘u, aua foi ne‘i outou aai, aua foi le inu i aso e tolu i le po ma le ao; o a‘u foi, ma lo‘u galu teine matou te anapopogi faapenā; e faapena foi ona ou alu atu ai i le tupu o le mea e le tusa ma le tulafono; afai ou te oti ai, oti ai pea ia.

Ona tulai ai lea o Iopu, ma saei lona ofu, ma tafi lona ulu, ua faapaū foi o ia i le eleele ma ifo.

Ae peitai a‘u, ou te saili atu i le Atua, ou te tuuina atu la‘u mea i le Atua; o le ua faia mea tetele e le masuesueina, o vavega e le mafaitaulia.

Afai e te matuā saili atu i le Atua, ma aioi atu i Le e ona le malosi uma lava;

Afai e te saunia lou loto, ma faaloaloa atu ou lima ia te ia;

I le ia e valaau mai, ona ou tali atu ai lea; po ou te tauala atu, ona e tali mai ai lea ia te au.

E te talotalo ia te ia, na te faafofoga mai foi ia te oe; e te faataunuuina foi mea na e tauto ai.

Ua latou alalaga ai, a e le tali atu o ia, ona o le faamaualuga o e amio leaga. E le faafofogaina lava e le Atua le tatalo faatauvaa; e le silasila foi i ai Le e ona le malosi uma lava.

Ua uma ona tatalo Iopu mo ana uo, ona faaae ai lea e Ieova o lana tafeaga. Ua toe au mai foi e Ieova o mea ia Iopu ua faateleina, ua lua mea i mea uma na muai ia te ia.

Na ou valaau ia Ieova i lo‘u leo; ua faafofoga mai foi o ia ia te au mai lona mauga paia. Selā.

Le Atua e, lē ou te amiotonu ai, ia e tali mai i la‘u valaau atu; ua e laveaiina a‘u nai le puapuaga; ia e alofa mai ia te au, ma faafofoga mai i la‘u tatalo.

Ieova e, ia e faafofoga mai i a‘u upu, ia e silafia mai le oi o lo‘u loto. Lo‘u Tupu e, ma lo‘u Atua, ia e faafofoga mai i le leo o la‘u alaga, auā ou te talotalo atu ia te oe. Ieova e, e faafofogaina e oe lo‘u leo i le taeao; o le taeao ou te sauni atu ai la‘u tatalo ia te oe, ma ou vaavaai.

E faatuatua ia te oe o e ua iloa lou suafa; auā, Ieova e, e te le tuuna i latou o e saili ia te oe.

O le faasiasia o mata o le ua amio leaga e le saili ai o ia; o ona mafaufau uma, E leai se Atua.

Ieova e, ia e faafofoga mai i le amiotonu, ia e liliu mai i la‘u alaga; ia e faafofoga mai i la‘u tatalo e le faia i laugutu ‘ole‘ole.

Le Atua e, ou te valaau atu ia te oe; auā e te faafofoga mai ia te au; ia e liliu mai ou fofoga ia te au, ia e faafofoga mai i a‘u upu.

Ona ou valaau atu ai lea ia Ieova i lo‘u puapuaga, ma ou alaga atu i lo‘u Atua; na faafofoga mai o ia i lona malumalu i lo‘u leo, na oo atu ia te ia la‘u alaga i ona lava fofoga.

Ia e ta‘ita‘i mai ia te au i le mea moni mai ia te oe, ma a‘oa‘o mai ia te au, auā o oe o le Atua o lo‘u olataga; ou te faatalitali ia te oe i le aso atoa.

E tasi le mea ua ou ole atu ai ia Ieova, o le mea lava lea ou te saili atu ai; ia ou nofo i le fale o Ieova i aso uma o lo‘u ola, ina ia ou iloa atu ai le matagofie o Ieova, ma ou saili i lona malumalu.

Ieova e, ia e faafofoga mai i lo‘u leo, ou te valaau; ia e alofa mai, ma ia e tali mai ia te au. Na fai atu lo‘u loto ia te oe i lau na e fetalai mai, Ia outou sailiili mai ia te au; Ieova e, ou te sailiili atu i lau afio.

Ina faatalitali atu ia ia Ieova, ina loto tele ia, e faamalosia foi e ia lou loto; ina faatalitali lava ia ia Ieova.

Ieova e, lo‘u papa, ou te valaau atu ia te oe; aua ne‘i ē le tali mai ia te au; ina ne‘i ē le tali mai ia te au, ona tusa lea o a‘u ma e a o ifo i le lua. Ia e faafofoga mai i le leo o la‘u aioi atu, pe a ou alaga atu ia te oe, pe a ou sisii atu o‘u lima i le mea paia e fetalai mai ai.

Ieova e, ou te faatuatua lava ia te oe; aua ne‘i faamaina a‘u e oo i le faavavau; ia e laveai mai ia te au i lau amiotonu. Ia e liliu mai ou fofoga ia te au; ia e vave laveai ia te au; ia fai oe mo‘u papa malosi, o le ‘olo mauga ou te ola ai.

Na ou saili atu ia Ieova, ona tali mai ai lea o ia ia te au, ma na laveaiina a‘u ai mea uma na ou fefe ai. Na latou vaavaai atu ia te ia, ona faaolioliina lea o i latou; e le mā foi o latou mata. Na valaau atu lenei tagata ua tigaina, ona faafofoga mai ai lea o Ieova, ma na faaola ia te ia i ona puapuaga uma lava. E to lauapi le agelu a Ieova e siosiomia ai e o matatau ia te ia, e laveai foi o ia ia te i latou. Ina tofotofo ia outou, ma ia outou iloa e lelei Ieova; amuia lava le tagata o lē faatuatua ia te ia.

O fofoga o Ieova o loo faasaga i e amiotonu, e liliu mai foi ona taliga i a latou alaga. A o fofoga o Ieova, o loo faasaga i e fai amio leaga, ina ia tineia le faamanatuina o i latou ai le lalolagi. Ua alalaga e ua amiotonu, ona faafofoga mai ai lea o Ieova; ua ia laveai mai foi ia te i latou ai o latou puapuaga uma. Ua latalata mai Ieova i e ua loto momomo; ua ia faaola foi i e ua loto nutimomoia.

Ou te vivii atu ia te oe i le faapotopotoga tele, ma pese atu ia te oe i luma o le nuu e toatele.

Ia e faalologo i luma o Ieova, ma faamoemoe ia te ia; aua e te faameo ona o le ua manuia lona ala, o le tagata ua faia togafiti leaga.

Ieova e, ia e faafofoga mai i la‘u tatalo, ma liliu mai ou fofoga i la‘u alaga; aua ne‘i e le tali mai i la‘u tagi; auā ou te se tagata ese a‘u i ou luma ma le āumau, e pei o o‘u tamā uma lava.

Na ou matuā faatalitali lava ia Ieova; ona faasaga mai ai lea o ia ia te au, ua faafofoga mai foi o ia i la‘u alaga.

Ieova e, lo‘u Atua, e tele lava mea ua e faia, o ou vavega ma ou manatu ia te i matou, e le mafai ona laulauina atu ai ia te oe; ou te fia faailoa ma tautala i ai, a e le mafaitaulia lava.

Ia olioli ma fiafia ia te oe o i latou uma o e sailiili ia te oe; ia fai ane pea i latou o e fiafia i lau faaolataga, Ia viia Ieova. A o a‘u nei, ua ou puapuagatia ma ou mativa; e manatua mai a‘u e le Alii; o oe lava lo‘u fesoasoani ma lo‘u faaola; lo‘u Atua e, aua lava e te tuai mai.

E pule mai Ieova lona alofa ia te au i le ao, e ia te au foi le pese ia te ia i le po, o le tatalo i le Atua o lo‘u ola.

Ina soia, ma ia outou iloa o a‘u lava o le Atua; e viia a‘u i nuu ese, e viia a‘u i le lalolagi. Ua ia te i tatou Ieova o ‘au, o le Atua o Iakopo, o lo tatou ‘olo maualuga ia. Selā.

O le viiga, ia e faia lea ma taulaga i le Atua; ia e avatu foi i lē Silisili ese mea na e tauto ai. Ia e valaau foi ia te au i le aso e i ai le puapuaga; ou te laveaiina ai oe, ona e vivii mai ai lea ia te au.

Faauta, ua e finagalo i le faamaoni o le loto; ma e faailoa mai ia te au le poto i le mea lilo.

Le Atua e, ia e faafofoga mai i la‘u tatalo, aua foi e te liliu ese i la‘u aioi atu.

O a‘u nei, ou te valaau atu i le Atua; o Ieova lava na te faaolaina mai a‘u. O le afiafi, ma le taeao, ma le tutonu o le la, ou te tagi ai, ma ou uio; ona faafofoga mai ai lea o ia i lo‘u leo.

Ia e tuuina atu ia Ieova o mea e te popole vale ai; o ia lava na te tausia oe; na te le tuuna e faavavau le amiotonu ia faagaeetia.

Ou te naunau atu lava ia te oe ona o lona malosi; auā o le Atua o lo‘u ‘olo maualuga ia. O loo ou lumanai lo‘u Atua alofa; e faaali mai ia te au e le Atua le taui o e ita mai ia te au.

Le Atua e, ia e faafofoga mai i la‘u alaga; ia e liliu mai i la‘u tatalo. Ou te valaau atu ia te oe ai le gataaga o le nuu, pe a faavaivai lo‘u loto; ia e ta‘ita‘iina a‘u i le papa e sili ona maualuga ia te au.

E moni lava, e faalologo lo‘u agaga i luma o le Atua; mai ia te ia lo‘u faaolataga. E moni lava, o ia lo‘u papa, ma lo‘u faaolataga, o lo‘u ‘olo maualuga; e le faagaeeteleina a‘u.

E moni lo‘u agaga e, e te faalologo lava i luma o le Atua; auā mai ia te ia lava lo‘u faamoemoe. E moni lava, o ia lo‘u papa, ma lo‘u faaolataga, o lo‘u ‘olo maualuga; e le faagaeeina a‘u. O loo i le Atua lo‘u olataga ma lo‘u mamalu; o lo‘u papa malosi ma lo‘u malu o loo i le Atua ia. Le nuu e, ia outou faatuatua ia te ia i aso uma; ia outou momoli atu o outou loto i ona luma; o lo tatou malu o le Atua lea. Selā.

Le Atua e, o lo‘u Atua lava oe; ou te ala saili ia te oe; ua fia inu lo‘u agaga ia te oe, ua ou matuā naunau atu ia te oe i le nuu naumati, e lailoa ai, e leai ni vai;

Na ou alaga atu ia te ia i lo‘u gutu, ua viia foi o ia e lo‘u laulaufaiva. Ana ou manatu i se amio leaga i lo‘u loto, po ua le faafofoga mai le Alii ia te au; a e peitai ua faafofogaina mai a‘u e le Atua; ua ia liliu mai i le leo o la‘u tatalo. Ia faafetaia le Atua, ua na le liliueseina la‘u tatalo, po o lona alofa ia te au.

Ua lailoa lava a‘u i lo‘u valaau; ua fa lo‘u leo; ua mole lava o‘u mata, a o faatalitali atu a‘u i lo‘u Atua.

E iloa e ua tigaina, ona latou olioli ai lea; ona fiafia ai lea o outou loto, o outou ua saili i le Atua.

Le Atua e, matou te vivii ia te oe; matou te vivii lava; auā ua latalata mai lou suafa; ua ta‘uatua ou vavega.

Na ou alaga atu i le Atua i lo‘u leo, na ou alaga atu i le Atua; ona faafofoga mai lea o ia ia te au. O le aso na puapuagatia ai a‘u na ou saili atu ai i le Alii; na ou faaloaloa lo‘u lima i le po, e lei gase lava; na le mafaia lo‘u loto ona faamafanafanaina.

Ou te faalogologo atu i mea e fetalaia mai e Ieova le Atua; auā na te fetalai mai ia manuia lona nuu atoa ma ona tagata amio Atua; a e aua ne‘i latou toe liliu atu i le valea.

Ieova e, ia e faafofoga mai i la‘u tatalo; ma e liliu mai i le leo o la‘u aioi. O le aso e puapuagaina ai a‘u, ou te valaau atu ai ia te oe; auā e te tali mai ia te au.

Ieova e, le Atua o lo‘u olataga, ua ou alaga atu i ou luma i le ao ma le po; ia oo atu i ou luma la‘u tatalo; ia liliu mai ou fofoga i la‘u valaau;

A o a‘u, Ieova e, na ou alaga atu ia te oe; e tomua foi la‘u tatalo ia te oe i le taeao.

Ia faapea ona e a‘oa‘o mai ia i matou e faitauina o matou aso, ina ia maua ai le poto i o matou loto.

O le nofo i le mea lilo o i ai lē Silisili ese, e mau o ia i le paolo o Le e ona le malosi uma lava.

E valaau mai o ia ia te au, ona ou tali atu ai lea ia te ia; o a‘u, ou te ia te ia i le puapuaga; ou te laveaiina o ia, ma ou faatupuina lona mamalu.

E lelei ona vivii atu ia Ieova, ma ia fai pesega i lou suafa lē Silisili ese e; ia ta‘u atu i le taeao lou alofa ia ta‘u atu foi i le po lou faamaoni,

O mai ia, ia tatou ifo, ma ia tatou punonou; ia tatou tootuli i luma o Ieova o le na faia i tatou. Auā o lo tatou Atua lava ia; o i tatou foi o le nuu ua fagaina e ia, ma le lafu mamoe o i lona aao. O le aso nei afai tou te faalogo ai i lona siufofoga, aua ne‘i faamaaa o outou loto e pei ona faia i Meripa, e pei ona faia i le aso na i Mase i le vao;

Ieova e, faafofoga mai ia i la‘u tatalo, ma ia oo atu la‘u alaga ia te oe. Aua le ‘alo ou fofoga ia te au i le aso e puapuagatia ai a‘u; ia liliu mai ou fofoga ia te au; ia taalise ona e tali mai ia te au i le aso ou te valaau atu ai ia te oe.

E liuliualo mai o ia i le tatalo a le ua mativa, e le ‘ino‘ino foi o ia i la latou tatalo.

Ia outou mitamita i lona suafa paia; ia olioli loto o e sailiili ia Ieova. Sailiili ia outou ia Ieova ma lona malosi; sailiili i ona fofoga, aua le aunoa.

Ua vaivai o‘u tulivae i le anapogi, ma ua tinovale lava a‘u.

Ou te alofa, auā ua faafofoga mai Ieova i lo‘u leo ma a‘u aioi. Auā na liliu mai ona fofoga ia te au, o lea ou te valaau ai ia te ia i lo‘u olaga. Na siomia a‘u i mailei e oti ai; na maua a‘u e puapuaga o le tuugamau; na maua a‘u e le puapuaga ma le faanoanoa. Ona ou valaau atu lea i le suafa o Ieova, Ieova e, ou te aioi atu ia e laveai mai ia te au.

Ua e tatala mai i o‘u noanoaga. Ou te fai le taulaga o le viiga ia te oe, ou te valaau atu foi i le suafa o Ieova.

Na ou valaau atu ia Ioa i lo‘u puapuaga; na tali mai Ioa ia te au, ma na aumaia a‘u i le mea lautele.

Ou te vivii atu ia te oe; auā na e tali mai ia te au, ua avea foi oe mo‘u faaolataga.

Amuia i latou o e tausi i ana tulafono, o e sailiili ia te ia ma le loto atoa;

Ua ou saili ia te oe ma lo‘u loto atoa; aua ne‘i ou sese i au poloaiga.

Ua ou valaau ia te oe ma le loto atoa; Ieova e, ia e tali mai ia te au; ou te anaana lava i au tulafono. Ua ou valaau ia te oe; ia e faaola mai ia te au, ona ou tausi lea i au tulafono. Ua muamua i le tafa o ata ona ou alaga atu; ua ou faamoemoe i lau afioga. Ua muamua ona pupula o‘u mata i leoleoga i itupo, ina ia ou mafaufau i lau afioga. Ia e faafofoga mai i lo‘u leo e tusa ma lou alofa; Ieova e, ia e faaolaola mai ia te au e tusa ma lau faamasinoga.

Ieova e, ua ou valaau atu ia te oe ai mea loloto. Le Alii e, ia e faafofoga mai i lo‘u leo; ia liliu mai ou fofoga i le leo o la‘u aioi atu.

Ou te faatali atu ia Ieova, o loo faatali atu lava lo‘u agaga; ou te faamoemoe foi i lana afioga. O loo faatalitali atu lo‘u agaga i le Alii e sili i e o leoleo ona faatalitali i le taeao; e sili lava i e o leoleo ona faatalitali i le taeao.

Ia outou vivii atu ia Ieova, auā e lelei o ia; auā e faavavau lava lona alofa.

Vivii atu outou i le Atua o atua; auā e faavavau lava lona alofa.

Vivii atu outou i le Alii o alii; auā e faavavau lava lona alofa.

Ieova e, ua ou valaau atu ia te oe, ia vave ona e afio mai ia te au; faafofoga mai i lo‘u leo pe a ou valaau atu ia te oe. Ia saunia la‘u tatalo e faapei o le mea manogi e mu i ou luma; o le sii i luga o o‘u lima ia pei o le taulaga e fai i le afiafi.

Na ou alaga ia Ieova i lo‘u leo; na ou aioi atu ia Ieova i lo‘u leo. Na ou faapaūina atu la‘u tagi i ona luma; na ou faaali atu lo‘u puapuaga i ona luma;

Ieova e, ia e faafofoga mai i la‘u tatalo; ia liliu mai ou fofoga i la‘u aioi atu; ia e tali mai ia te au i lou faamaoni ma lau amiotonu.

E faasaga atu ia te oe mata o mea uma lava; e te avatua foi a latou mea e ‘ai i ona aso e tatau ai. O loo e faamafola lou aao, ma faamaoona le manao o meaola uma lava. E amiotonu Ieova i ona ala uma; o loo alofa ia i ana mea uma lava na faia. E latalata mai Ieova ia i latou uma o e valaau ia te ia, o i latou uma o e valaau ia te ia ma le faamaoni. E faia e ia le mea e manao i ai o e matatau ia te ia; e faafofoga foi o ia i la latou alaga atu, ma faaolaina i latou.

Ona latou valaau mai ai lea ia te au, a o a‘u, ou te le tali atu ai; latou te sailiili mai ia te au, a e latou te le maua a‘u. Na latou ‘ino‘ino i le poto; ua latou le manao foi i le mata‘u ia Ieova; na latou le mafafai i la‘u pule; ua latou ‘ino‘ino i la‘u aoaiga uma lava;

Ou te alofa atu ia i latou o e alofa mai ia te au; o e sailiili mai foi ia te au, latou te maua a‘u.

O le ua liliu ese ona taliga a e le faalogologo i le tulafono, e inosia lana lava tatalo.

Aua le faavave lou gutu, aua foi le faataalise lou loto e fai atu se upu i luma o le Atua; auā o i le lagi le Atua, a ua e i le lalolagi; o le mea lea ia itiiti ai au upu.

O outou masina faatoa vaaia ma outou faapotopotoga, e ‘ino‘ino ai lo‘u loto; ua fai lava ma mea mamafa ia te au, a a‘u lailoa i tauave. A outou faaloaloa mai o outou lima, e ‘alo ese o‘u mata ia te outou; e ui lava ina outou faateleina tatalo, ou te le faalogo ai lava; ua tutumu o outou lima i le toto. Ina fafano ia outou, ina faamamā ia outou; faate‘a ese ia a outou galuega leaga i o‘u luma, soia tou te fai mea leaga.

Ou te faatalitali ia Ieova, o le ua ‘alo ona fofoga i le aiga o Iakopo, ou te faamoemoe foi ia te ia.

Ua manao lo‘u loto ia te oe i le po; e moni, e ala saili ia te oe lo‘u agaga i totonu ia te au; auā e a‘oa‘oina e o nonofo i le atu laulau, pe a faia au faamasinoga i le lalolagi.

Auā e nonofo le nuu i Siona i Ierusalema; e te le toe tagi lava; e matuā alofa o ia ia te oe pe a e alaga atu; a faafofoga o ia, ona tali atu ai lea o ia ia te oe.

a o e faatalitali ia Ieova, e toe faafouina lo latou malosi; latou te sii ae apaau e pei o aeto; latou te femoei, a e le vaivai; latou te savavali, a e le tigaina.

Ia outou saili ia Ieova manū o mafai ona maua o ia; ia outou valaau ia te ia manū o latalata mai o ia;

ou te aumaia i latou lava i lo‘u mauga paia, ma a‘u faafiafia ia te i latou i lo‘u fale tatalo; o a latou taulaga mu ma a latou taulaga e talia ia i lo‘u fata faitaulaga; auā e ta‘ua lo‘u fale o le fale tatalo mo nuu uma.

E faapena ea le anapogi ou te loto i ai; o le aso e faatiga ai le tagata ia te ia lava? e punou ai ea lona ulu e pei o le fiso? e fola lona moega i le ie talatala ma le lefulefu? E te faaigoa ea lena mea o le anapogi ma le aso e fiafia i ai Ieova? E le o lenei ea le anapogi ou te loto i ai? ma ia tatalaina fusi na faia i le amio leaga, e tatala fusi o le amo, e tuuina atu ia sa‘oloto e ua faasauaina, ma ia outou gausia amo uma lava.

A e peitai o a outou amio leaga ua fai ia ma pupuni i le va o outou ma lo outou Atua, o a outou agasala foi ua ‘alo ai ona fofoga ia te outou ua ia le faafofoga mai ai.

U a ou faalogo atu i e na le fesili mai; ua maua a‘u e i latou na le saili mai ia te au; na ou fai atu i le nuu na le igoa i latou i lo‘u igoa, Faauta, o a‘u lenei!

A o lei valaau lava i latou, ou te tali atu; a o tautala mai i latou, ou te faalogo atu lava.

O le mea lea, o loo faapea ona fetalai mai ai o Ieova, Faauta, ou te faaoo le malaia ia te i latou, latou te le mafaia ona sao ai; e ui lava ina latou alalaga mai ia te au, ou te le faalogo lava ia te i latou. Ona o ai lea o aai o Iuta ma e o nonofo i Ierusalema, ma latou alalaga i atua na latou faamu i ai mea manogi; a e latou te le faaola lava ia te i latou i ona po o lo latou malaia.

Auā o a‘u nei, ua ou iloa manatu ua ou manatu ai ia te outou, o manatu i le manuia, a e le o le malaia, o loo fetalai mai ai Ieova, e foaiina atu ia te outou le iuga e i ai le faamoemoe. Ona outou valaau ai lea ia te au, e ō foi outou ma tatalo ia te au, ou te faalogo foi ia te outou. E saili mai outou ia te au, tou te maua foi, pe a outou saili mai ia te au ma outou loto atoa. E maua lava a‘u e outou, o loo fetalai mai ai Ieova; ou te faafoisia la outou tafeaga, ma ou faapotopotoina outou ai nuu uma, ma mea uma na ou tulia ai outou, o loo fetalai mai ai Ieova; ou te faafoisia foi outou i le mea ua ou faatāfea ai outou.

ia e valaau mai ia te au, ona ou tali atu ai lea ia te oe, ma ou faaali atu ia te oe o mea tetele ma le faigata, o mea ua e le iloa.

a ia e alu, ma faitau i le tusi taai, ua e tusia mai lo‘u gutu, o afioga a Ieova i luma o le nuu i le fale o Ieova i le aso e anapopogi ai; e te faitauina foi i luma o Iuta uma o e o mai mai o latou aai. Atonu latou te faapauu ma tatalo i luma o Ieova, ma latou toe foi mai, taitasi le tagata ai lona ala leaga; auā ua tele le tiga ma le toasa ua fetalai mai ai Ieova i lenei nuu.

O na ona po, ma lena tausaga, ua fetalai mai Ieova, e o mai ai le fanauga a Isaraelu, o i latou ma le fanauga a Iuta faatasi, latou te fetagisi fano mai; latou te o ane, ma saili ia Ieova lo latou Atua. Latou te fesili i le ala i Siona, o faasaga mai iinei o latou mata, ua faapea, Ina o mai ia, se‘i faatasi atu i tatou ia Ieova i le feagaiga e faavavau, e le galo lava.

O loo agalelei Ieova i e faatalitali ia te ia, o le tagata e saili ia te ia. E lelei ona faamoemoe ma le faalologo i le olataga mai ia Ieova.

Se‘i tatou sii atu o tatou loto faatasi ma o tatou lima i le Atua o i le lagi.

Ona ia fetalai mai lea ia te au, Le atalii e o le tagata, ua e iloa ea lena? ia e toe liliu ane, e te iloa ai mea e inosia e sili i na mea. Ona ia avea lea o a‘u i le lotoā tuloto i le fale o Ieova, faauta i le faitotoa o le malumalu o Ieova, i le va o le faapaologa ma le fata faitaulaga, o tagata pe toaluafulu ma le toalima, ua u atu o latou tua i le malumalu o Ieova, a ua uai o latou mata i sasae, o latou ifo atu i le la i sasae. Ona fetalai mai lea o ia ia te au, Le atalii e o le tagata, ua e iloa ea lena? se mea māmā ea i le aiga o Iuta ina ua faia o mea e inosia o loo latou o faia iina? auā ua latou faatumuina le nuu i le saua, ua latou toe liliu foi e faaonoono mai ia te au; faauta foi, ua latou avae le la laau i o latou isu. O le mea lea ou te taui atu ai ma le ita tele; ou te le faasaoina, ou te le faapelepeleina; e ui ina latou valaau mai ia te au ma le leo tele, ou te le faalogo atu lava ia te i latou.

O ia foi na te liua tausaga ma tau; e aveeseina e ia o tupu, e tofia foi e ia o tupu; e foaiina mai e ia le poto i e o popoto, ma le malamalama i e o iloa mafaufau. O ia na te faaalia mai mea loloto ma mea ua lilo; ua na silafia le mea o loo o i le pouliuli, o le malamalama foi la te mau faatasi ma ia. Ou te faamanū ma vivii atu ia te oe, le Atua o o‘u tamā, o le ua foaiina mai ia te au le poto ma le malosi; ua e faailoaina mai nei foi ia te au le mea sa matou aioi atu ai ia te oe; auā ua e faailoa mai ia te i matou le mea a le tupu.

ua uma ona filifili o alii silisili uma o le malo, o faipule, ma alii sili uma, o tulafale, atoa ma e pule i nuu, ia faatuina se tulafono a le tupu, ma ia faamauina se vavao, ai se tasi na te faatoga atu se mea mai se tasi atua, po o se tagata, a e tau lava o oe e faatoga i ai, le tupu e, i po e tolugafulu, ia lafoina o ia i le lua o leona. O lenei, le tupu e, ia e faamauina le vavao, ma tusi le tusi, ina ia le tālaina, faapei o tulafono a Metai ma Peresia ua le tālaina. O le mea lea na tusi ai e le tupu o Tariu le tusi ma le vavao.

Ua iloa e Tanielu ua tusia le tusi, ona alu atu ai lea o ia i lona fale, ua avanoa faamalama o lona potu e faasaga i Ierusalema, ua ta‘i foi faatolu i aso ona tootuli o ia i ona tulivae, ma tatalo, ma faafetai i luma o lona Atua, faapei ona masani ai o ia. Ona lolofi ane ai lea o ia tagata, ua maua Tanielu o loo o tatalo ma faatoga atu i luma o lona Atua. Ona latou o atu ai lea, ua faapea atu i le tupu i a le vavao a le tupu, E lei tusia ea o oe le vavao, ai se tasi tagata e faatoga atu i se tasi atua, po o se tasi tagata, a e tau lava o oe e faatoga i ai, le tupu e, i po e tolugafulu, e lafoina o ia i le lua o leona? Ua tali mai le tupu, ua faapea mai, E moni lava lea mea, faapei o tulafono a Metai ma Peresia e le tālaina. Ona latou tali atu lea, ua faapea atu i le tupu, O lena Tanielu, o le tagata o le tafeaga o Iuta, e le ava o ia ia te oe, le tupu e, ma le vavao na e tusia, a ua tatalo o ia ta‘i foi faatolu i aso.

Ona ou faasaga lea i le Alii le Atua e saili i le tatalo, ma le faatoga, ma le anapogi, ma le ie talatala, ma le lefulefu. Na a‘u tatalo ia Ieova lo‘u Atua, ma ou faaali atu, ua ou faapea atu, Le Alii e, o le Atua e sili ma le matautia, o lē tausi i le feagaiga, ma le alofa i e alofa atu ia te ia, atoa ma e o tausiusi i ana poloaiga. Ua matou agasala, ma ua fai mea leaga, ma ua matou agaleaga, ua fouvale foi ina ua te‘a ese ma au poloaiga ma au faamasinoga.

O lenei, lo matou Atua e, ia e faafofoga mai i le tatalo a lau auauna, atoa ma ana faatoga, ma ia malamalama atu ou fofoga i lou malumalu ua faatafunaina, ona o le Alii. Lo‘u Atua e, ia e liliu mai ou fofoga, ma faafofoga mai; ia sisila mai ou fofoga, ma e silasila mai i lo matou faatafunaina, atoa ma le aai ua faaigoa i lou suafa; auā matou te le avatu lo matou aioi i ou luma ona o a matou amiotonu, a o lou alofa tele. Le Alii e, ia e faafofoga mai. Le Alii e, ia faamagalo mai. Le Alii e, ia e faasagasaga mai, ma e faia lava; aua le faatuatuai, ona o lau afio lava, lo‘u Atua e, auā ua igoa i lou suafa lau aai ma lou nuu.

O loo ou tautala atu ma tatalo, ma ta‘uta‘u atu a‘u agasala, ma le agasala a lo‘u nuu o Isaraelu, o loo fai foi lo‘u aioi i luma o Ieova lo‘u Atua mo le mauga paia o lo‘u Atua; o loo ou tautala lava i le tatalo, ua pai mai ia te au le tagata o Kaperielu, o le na a‘u luai iloa i le faaaliga, o loo lele faataalise mai i le itu la o le taulaga afiafi. Na ia a‘oa‘o mai, ma ua tautala mai ia te au, ua faapea mai, Tanielu e, ua a‘u sau nei e a‘oa‘o ia te oe e poto ai. Na amataina au faatoga ona oo mai ai lea o le poloaiga; i le ua ou sau ai e faailoa atu ia te oe, auā ua alofateleina oe; o lenei, ia e iloa le upu, ma mafaufau i le faaaliga.

O ona po ia, o a‘u o Tanielu sa ou faanoanoa ai i vaiasosa atoatoa e tolu; e leai se mea lelei na a‘u ‘ai ai, e leai foi se aano o manu, po o se uaina na oo i lo‘u gutu, na ou le uu ai lava, ua oo ina mavae atu vaiasosa e tolu.

Faauta foi, ua pai mai ia te au le lima, ma faatootuli ia te au i o‘u tulivae ma o‘u alofilima. Ona ia faapea mai lea ia te au, Tanielu e, o le tagata ua alofateleina, ia e mafaufau i upu ou te fai atu ai ia te oe, ma ia e tu i luga; auā ua auina mai nei a‘u ia te oe. Ua uma ona fetalaia mai ia te au o nei upu, ona ou tu ai lea, ua ou gatete. Ona faapea mai ai lea o ia ia te au, Tanielu e, aua le fefe; auā talu le luai aso na e sauni ai lou loto e mafaufau ma faatigaina oe e oe i luma o lou Atua, sa faafofogaina au upu, ua a‘u sau foi ona o au upu. A o le alii o le malo o Peresia na ia tetee ia te au i po e luafulu ma le tasi; faauta foi, o Mekaeli o so le au alii sili ia, na ia maliu mai e fesoasoani mai ia te au; na tuua foi a‘u i lea mea faatasi ma tupu o Peresia. O lenei, ua a‘u sau e faailoa atu ia te oe mea e tutupu i lou nuu i ona po amuli; auā e tuai ona po o le faaaliga. Ua ia fetalai mai na upu ia te au, ona ou faasaga lea o‘u mata i le eleele, ua ou le magagana.

Ou te alu, ou te toe foi lava i le mea ou te nofo ai, seia faasalaina lava i latou, ma latou saili ia te au; latou te vave saili ia te au pe a puapuagatia i latou.

Ia outou atofaina ni aso e anapogi ai; ia outou tala‘iina se faapotopotoga, ia outou faapotopotoina le au toeaina, atoa ma i latou uma e o nonofo i le nuu, i le fale o Ieova lo outou Atua; ma ia outou alalaga ia Ieova.

O lenei, ua faapea mai Ieova, Ia outou toe foi mai ia te au ma o outou loto atoa, ma le anapogi, ma le fetagisi, ma le tagiaue; ia outou saeia o outou loto, a e le o outou ofu, ma toe foi ia Ieova lo outou Atua; auā e alofa fua, ma alofa mutimutivale o ia, e tele gese lona toasa, ua tele foi lona alofa, e salamo ia ona o le leaga.

Na tatalo foi Iona ia Ieova lona Atua i le manava o le i‘a, ua faapea atu, Na a‘u valaau atu ia Ieova ona o lo‘u puapuaga, ua na faafofoga mai foi ia te au; na ou alaga atu nai le mea maulalo i tuugamau, ua e faafofoga i lo‘u leo.

Na ou manatua Ieova ina o vaivai o lo‘u loto i totonu ia te au; na oo atu foi la‘u tatalo ia te oe i lou malumalu paia.

Ona talitonu ai lea o tagata o Nineva i le Atua, ua tala‘i atu foi e i latou la latou anapogi, ua latou oofu foi i le ie talatala, o alii atoa ma tagatānuu. Auā ua oo le tala i le tupu o Nineva, ona tulai ai lea o ia i lona nofoālii, ma tuu ese ia te ia lona ofu tele, ona ufutia lea o ia e ia i le ie talatala, ma nofo i le lefulefu. Ua ia tala‘i atu, ma faailo atu i Nineva i le pule a le tupu ma alii sa ia te ia, ua faapea atu, Aua ne‘i ‘ai sina mea e tagata, po o manu, po o lafu povi, po o lafu mamoe; aua lava ne‘i latou aai, aua foi latou te inu vai; a ia ufitia lava tagata ma manu i ie talatala, ma ia latou matuā alalaga atu i le Atua; ia latou taitasi foi ma liliu mai i lana amioga leaga, ma le faasaua ua i o latou lima. O ai se na te iloa, atonu e liliu mai le Atua, ma salamo, ma liliu ese i lona toasa mamafa, ina ia le fano ai i tatou. Ua silafia e le Atua a latou galuega, ina ua liliu ese i latou i lo latou ala leaga; ona salamo ai lea o le Atua i le malaia na ia fetalaia mai na te faia ia te i latou; e lei faia.

Ona latou alalaga atu ai lea ia Ieova, a e le faafofoga mai ai o ia ia te i latou; a e ‘alo ese ona fofoga ia te i latou i ia lava ona po, auā ua leaga lava a latou mea e fai.

A o a‘u, ou te faatalitali ia Ieova, ou te faamoemoe i le Atua o lo‘u olataga; e faafofoga mai lo‘u Atua ia te au.

Ia outou saili ia Ieova, outou uma ua agamalu i le nuu, o e ua faia lana faamasinoga; ia outou saili le amiotonu, ia outou saili le agamalu, atonu e lilo ai outou i le aso o le toasa o Ieova.

Fai atu i tagata uma o le nuu, atoa ma faitaulaga, ia faapea atu, Na outou anapogi ma fetagisi i le lima ma le fitu o masina i ia tausaga e fitugafulu, na outou anapogi ai ea ia te au?

e o atu tagata o le tasi aai i le tasi aai, o loo faapea, O mai ia, ina tatou o e faalaulelei i le finagalo o Ieova, ma saili ia Ieova o ‘au; ou te alu foi a‘u. E o mai foi nuu e tele, ma nuu malolosi e saili ia Ieova o ‘au i Ierusalema, e faalaulelei foi i le finagalo o Ieova.

Ou te avane lona tolu o vaega i le afi; ou te faate‘aese ai le eleele ia te i latou, e pei ona faate‘aeseina ai le eleele o le ario; ou te totofofoina i latou, e pei ona tofotofoina o le auro; e valaau i latou i lo‘u igoa; o a‘u foi, ou te tali atu ai ia te i latou; ou te fai ane, O lo‘u nuu lava i latou; a e fai mai i latou, O Ieova o lo‘u Atua lava o ia.

Ua faalaina ia i po e fagafulu ma ao e fagafulu, mulimuli ane ona fia taumafa ai lea o ia.

A ou te fai atu a‘u ia te outou, ia outou alolofa atu i e ua ita mai ia te outou, ia outou faamanuia atu i e ua fetuu mai ia te outou, ia outou agalelei atu i e ua ‘ino‘ino mai ia te outou, ia outou tatalo foi mo e ua tuua‘i fua mai ma faasaua mai ia te outou;

Pe a e tatalo, aua ne‘i e pei o tagata pepelo, auā ua latou fia tutū ma tatalo i sunako ma fetaulaigāala, ina ia iloa i latou e tagata. E moni, ou te fai atu ia te outou, ua maua e i latou lo latou taui. A o oe, pe a e tatalo, ina ulu atu ia i lou afeafe, ma pupuni lona puipui, i le e tatalo ai i lou Tamā o i le mea lilo; o lou Tamā foi o lē silasila i le mea lilo, na te avatu faaaliali se taui ia te oe. A outou tatalo, aua ne‘i tāutu i a outou upu, e pei o nuu ese; auā fa tei latou, o le tele o a latou upu e talia ai i latou. O lenei, aua ne‘i outou faapei o i latou; auā ua silafia e lo outou Tamā mea ua outou matitiva ai, a o lei ole atu outou ia te ia.

O lenei, ia faapea outou ona tatalo, Lo matou Tamā e, o i le lagi, ia paia lou suafa. Ia oo mai lou malo. Ia faia lou finagalo i le lalolagi, e pei ona faia i le lagi. Ia e foai mai ia te i matou i le aso nei a matou mea e ‘ai e tatau ma le aso. Ia e faamagalo ia te i matou i a matou agasala, e pei o i matou foi ona matou faamagaloina atu i e ua agaleaga mai ia te i matou. Aua foi e te ta‘ita‘iina i matou i le tofotofoga; a ia e laveai ia i matou ai le leaga. Auā e ou le malo, ma le mana, atoa ma le viiga, e faavavau lava, Amene.

Pe a outou anapopogi, aua ne‘i outou mata faanoanoa pei o tagata pepelo; auā ua latou faalaleaga o latou mata, ina ia iloa e tagata ua latou anapopogi. E moni, ou te fai atu ia te outou, ua maua e i latou lo latou taui. A o oe, pe a e anapogi, ia uu lou ulu, ma mulumulu ou mata; ina ia le iloa e tagata ua e anapogi, na o lou Tamā o i le mea lilo; o lou Tamā foi o loo silasila i le mea lilo, na te avatu faaaliali se taui ia te oe.

O lenei, aua ne‘i outou popole, ma faapea ane. Ni a mea tatou te aai ai, ni a foi mea tatou te inu ai, ni a foi mea tatou te oofu ai? auā o mea uma ia ua sailia e nuu ese. Auā ua silafia e lo outou Tamā o i le lagi e aoga ia mea uma ia te outou. A ia outou muai saili le malo o le Atua ma lana amiotonu; ona faaopoopoina atu lea o ia mea uma ia te outou.

Ia outou ole atu, ona foaiina mai ai lea ia te outou; ia outou saili, ona outou maua ai lea; ia outou tu‘itu‘i atu, ona toina ai lea ia te outou. Auā ai se ole atu, e maua e ia; o lē saili foi, e iloa e ia; e toina foi i lē tu‘itu‘i atu. O ai foi se tagata o outou pe a ole mai lona atalii se areto, na te avane ea ia te ia se maa? a ole mai foi se i‘a, na te avane ea ia te ia se gata? O lenei, o outou e leaga, afai ua iloa e outou ona avatu o mea lelei mā a outou fanau, e le sili ea ona foaiina mai e lo outou Tamā o i le lagi o mea lelei i e ole atu ai ia te ia?

Ona o mai ai lea o soo o Ioane ia te ia, ua faapea mai, Se a le mea ua anapopogi soo ai i matou ma le au faresaio, a o ou soo, e le anapopogi i latou? Ona fetalai atu ai lea o Iesu ia te i latou, E mafai ea ona faanoanoa o aumea a le faatoafaiavā i ona aso o ia te i latou o le faatoafaiavā? A e oo mai ona aso e aveeseina ai ia te i latou o le faatoafaiavā, ona latou anapopogi ai lea.

O lea lava itu aso ua fetalai atu ai Iesu, ua faapea atu, Ou te faafetai ia te oe, lo‘u Tamā e, le Alii o le lagi ma le lalolagi, ina ua e nanā ia mea i e popoto ma e atamamai, a ua faaalia atu ia mea i tama valevale.

Ua tuuina atu e ia le motu o tagata ia ō, ona maliu ae lea ua na o ia i le mauga e tatalo. Ua oo i le afiafi, ua na o ia sa i ai.

Ou te fai atu foi ia te outou, Afai e loto gatasi se toalua o outou o i le lalolagi i se mea la te ole atu ai, e faia lea mo i laua e lo‘u Tamā o i le lagi. Auā o le mea ua faapotopoto ai se toalua, po o se toatolu i lo‘u igoa, ou te i ai faatasi ma i latou.

A ua tali atu Iesu, ua faapea atu ia te i latou, E moni, ou te fai atu ia te outou, Afai ua ia te outou le faatuatua, ma outou le masalosalo, ona faia lea e outou e le na o le mea ua faia i le mati, a e afai tou te fai atu i lenei mauga, Ia siitia oe, ma lafoina i le sami, ona faia lava lea. O mea uma foi tou te ole mai ai i le tatalo ua i ai le faatuatua, e maua lava e outou.

Ua tago foi o ia i le ipu, ua faafetai, ona avatu ai lea e ia ia te i latou, ua faapea atu, Ina inu ia outou uma i ai;

Ona oo ai lea o Iesu faatasi ma i latou i le fanua ua igoa ia Ketesemane; ua faapea atu foi o ia i le au soo, Ia outou nonofo iinei, seia ou alu atu iilā ou te tatalo. Ua o ane o ia ma Peteru ma atalii o Sepetaio e toalua, ona tiga lea o ia ma atuatuvale. Ona fetalai atu ai lea o ia ia te i latou, Ua matuā tiga lo‘u loto e oo i le oti; ia outou nonofo pea iinei, ma ia tatou mataala faatasi ma a‘u. Ua maliu faaitiiti atu i luma, ona faapaū fao ai lea o ia ma tatalo, ua faapea atu, Lo‘u Tamā e, afai e mafai, ia ave ese lenei ipu ia te au; a e aua le faia lo‘u loto, a o lou finagalo. Ona maliu ane lea o ia i ona soo, ua maua i latou o momoe, ona fetalai atu ai lea o ia ia Peteru, Pe faapena ea ona outou le lavā ona tatou mataala faatasi ma a‘u i le itu po e tasi? Ia outou mataala ma tatalo, ina ne‘i oo mai le faaosoosoga ia te outou; ua manao i ai le loto, a o le tino ua vaivai. Ua toe maliu ane ia o le atu lua lea, ua tatalo, ua faapea atu, Lo‘u Tamā e, a le mafai ona ave ese o lenei ipu ia te au seia ou inu ai, ia faia lou finagalo.

Faauta foi, ua saeluaina le ie puipui o le malumalu, ua amata ifo i luga, ua oo i lalo; ua luluina foi le eleele, ua mavaevae foi papa;

O le taeao ua ala po ai o ia, ona ulufafo lea o ia ma maliu atu i le mea tuufua, ma talotalo ai.

Sa anapopogi le au soo o Ioane, ma soo o le au faresaio; o le mea lea ua latou o mai ai, ma fai mai ia te ia, Se a le mea e anapopogi ai le au soo o Ioane ma soo o le au faresaio, a o ou soo e le anapopogi i latou? Ona fetalai atu lea o Iesu ia te i latou, Pe mafai ea aumea a le faatoafaiavā ona anapopogi ina o ia te i latou le faatoafaiavā? Latou te le mafai ona anapopogi i ona aso o ia te i latou le faatoafaiavā. A e oo i ona po e aveeseina ai le faatoafaiavā ia te i latou, ona latou anapopogi ai lea i na ona aso.

Ua faamāvae o ia ia te i latou, ona maliu atu lea o ia i le mauga e tatalo.

Ona fetalai atu lea o Iesu ia te ia, Afai ua e mafaia ona faatuatua, e mafaia mea uma lava i lē faatuatua. Ona alaga loa lea o le tamā o le tama, ua fai mai ma le tagi, Le Alii e, ua ou faatuatua; ia e fesoasoani i lo‘u le faatuatua.

Ona fetalai atu lea o ia ia te i latou, Ua na o le tatalo ma le anapogi e mafai ai ona ō ese o mea faapena.

auā e moni, ou te fai atu ia te outou, ai sē fai atu i lenei mauga, Ia siitia oe, ma ia lafoina i le sami, ma le le masalosalo lona loto, a e peitai e faatuatua ia e taunuu lava mea na ia fai atu ai, ona faia lea mo ia o le mea na te fai atu ai. O le mea lea ou te fai atu ai ia te outou, o mea uma lava tou te ole mai ai i a outou tatalo, ina faatuatua ia o le a maua e outou, ona faia lava lea mo outou.

A outou tutū ma tatalo, ai se mea tou te tiga ai i se tasi, ia outou faamagaloina; ina ia faamagaloina foi e lo outou Tamā o i le lagi a outou agasala. Afai foi tou te le faamagaloina, e le faamagaloina e lo outou Tamā o i le lagi a outou agasala.

Ua latou oo atu i le fanua, o Ketesemane lona igoa; ona fetalai atu lea o ia i ona soo, Ina nonofo ia outou iinei, se‘i ou tatalo. Ua ō ane foi o ia ma Peteru, ma Iakopo, ma Ioane, ona matautuia lea o ia, ma atuatuvale. Ona fetalai atu lea o ia ia te i latou, O loo matuā tiga lava lo‘u loto e oo i le oti; ina nonofo ia outou iinei, ma mataala. Ua faaitiiti atu ia i luma, ona faapaū lea o ia i le eleele, ma tatalo ina ia mavae atu lea itu aso ia te ia, pe afai e mafaia. Ua faapea atu, Ava, lo‘u Tamā e, e te mafaia e oe mea uma lava; ia e aveeseina lenei ipu ia te au; a e aua le faia lo‘u loto, a o lou finagalo. Ona maliu ane lea o ia, ua maua i latou o momoe; ona fetalai atu lea o ia ia Peteru, Simona e, ua e moe ea? e te le lavā ea ona mataala i le itu po e tasi? Ina mataala ia, ma tatalo, ne‘i oo mai le faaosoosoga ia te outou; ua manao i ai le loto, a o le tino ua vaivai.

Ona saeluaina lea o le ie puipui o le malumalu, ua amata ifo i luga, ua oo lava i lalo.

auā e leai lava se mea e tasi e le mafaia e le Atua.

O ia foi le fafine nofo fua, pe atoa ona tausaga e valugafulu ma le fa, e lei alu ese ia i le malumalu, a ua auauna o ia i le Atua i anapogi ma talosaga i le ao ma le po. O lea lava itu aso, ua sau ai o ia, ua faafetai atu i le Alii, ma tautala ia te ia i tagata uma lava e na faatali atu i le togiola i Ierusalema.

Ua papatisoina le nuu uma, ona papatisoina ai lea o Iesu, ua tatalo ia, ona faaavanoaina ai lea o le lagi,

ua faaosoosoina e le tiapolo i aso e fagafulu. O aso lava ia e lei taumafa ai e ia sina mea e tasi; ua mavae ia aso, mulimuli ane ona fia taumafa ai lea o ia.

A ua maliu ia i le mea tuufua ua tatalo ai.

Ua latou fai mai ia te ia, Se a le mea e anapopogi soo ai, ma tatalo ai le au soo o Ioane, ua faapea foi ma soo o le au faresaio, peitai ou soo, ua latou aai ma inu? Ona fetalai atu lea o ia ia te i latou, E mafai ea ona anapopogi o aumea a le faatoafaiavā, ina o ia te i latou le faatoafaiavā? A e oo mai ona po e aveeseina ai ia te i latou le faatoafaiavā, o ona po ia latou te anapopogi ai.

O aso lava ia ua maliu ae ai o ia i le mauga e tatalo; ua aoina lana tatalo i le Atua.

A ou te fai atu ia te outou o e faalogo mai. Ia alofa atu i e o fai outou mo latou fili: ia agalelei atu i e ita mai ia te outou, ia outou faamanuia atu i e fetuu mai ia te outou, ia outou tatalo foi mo e tuua‘i fua mai ia te outou;

Ua mavae nei upu, po ua po valu, ona ave lea e ia o Peteru, ma Ioane, ma Iakopo, ua maliu ae i le mauga e tatalo. O loo tatalo ia, a ua liua ona fofoga, ua pa‘epa‘e ma pupula tele mai ona ofu.

Sa i le tasi mea o ia, ua tatalo, ua uma, ona fai mai lea ia te ia o le tasi o lona au soo, Le Alii e, ia e a‘oa‘o mai ia te i matou i tatalo; e faapei o Ioane foi ona a‘oa‘o i ona soo. Ua fetalai atu ia ia te i latou, Pe a outou tatalo, ia outou fai atu, Lo matou Tamā e o i le lagi, ia paia lou suafa. Ia oo mai lou malo. Ia faia lou finagalo i le lalolagi, e pei ona faia i le lagi. Ia e foai mai ia te i matou i lea aso ma lea aso a matou mea e ‘ai e tatau ma le aso. Ia e faamagalo ia te i matou i a matou agasala; auā foi matou te faamagaloina atu ia i latou uma o e agaleaga mai ia te i matou. Aua foi e te taitaiina i matou i le tofotofoga; a ia e laveai mai ia i matou ai le leaga.

Ua fetalai atu foi o ia ia te i latou, O ai so outou e ana le uo, e alu atu ia te ia i le tulua o po, ma fai atu ia te ia, Sole, se‘i au mai ni areto e tolu gafua, a e taui atu; auā ua sau la‘u uo ia te au i lana malaga, a e leai ni a‘u mea e laulau atu i ai; e tali mai o ia mai totonu o le fale, ua faapea mai, Aua e te faasoesa mai ia te au; ua uma ona pupuni o le faitotoa, ua matou taooto ma la‘u fanau; ou te le mafai ona tulai e avatu mā oe. Ou te fai atu ia te outou, E ui lava ina le tulai o ia, ma avatu ia te ia, ona o ia o lana uo, a e tulai, ma avatu mea uma e manao ai o ia, ona o lana faatauanau ane.

Ou te fai atu foi a‘u ia te outou, Ia outou ole atu, ona foaiina mai ai lea ia te outou; ia outou saili, ona outou maua ai lea; ia outou tu‘itu‘i atu, ona toina mai ai lea ia te outou. Auā ai se ole atu, e maua e ia; o lē saili, e iloa e ia; o lē tu‘itu‘i, e toina mai ia te ia. O ai se tamā ia te outou e avatu ea e ia i lona atalii se maa, pe a ole mai se areto? pe a ole mai se i‘a, e avatu ea ia te ia se gata a e le o se i‘a? pe a ole mai se fuāmoa, e avatu ea ia te ia se akarava? O lenei, o outou e leaga, afai ua iloa e outou ona avatu o mea lelei mā a outou fanau; e le sili ea ona foaiina mai e lo outou Tamā o i le lagi le Agaga Paia i e ole atu ai ia te ia?

o outou foi, ia outou faapei o tagata e faatali atu i lo latou alii, seia foi mai o ia mai le tausamaaga; ia latou to loa mai le puipui ia te ia pe a sau, ma tu‘itu‘i mai. Amuia ia auauna e maua i latou e lo latou alii, o mataala pe a sau. E moni, ou te fai atu ia te outou, e fusi e ia ona ofu, ma fai atu ia te i latou ia taooto e aai, ma alu ane lava, ma auauna ia te i latou.

Ua fetalai atu foi o ia le faataoto ia te i latou, ina ia tatalo soo e tatau ai, a e aua le faavaivai; ua faapea atu, Sa i le tasi aai le faamasino, ua le mata‘u i le Atua, e le ava foi i tagata; sa i lea aai foi le tasi fafine ua oti lana tane, ua alu atu ia te ia, ua faapea atu, Ia e faamasino atu i le ua i ai a‘u mea. O nai aso e lei mafai ai o ia; a e mulimuli ane ua faapea ifo o ia i lona loto, E ui lava ina ou le mata‘u i le Atua, ma a‘u le ava i tagata, a e peitai ona o le faasoesa mai ia te au o le fafine nei ua oti lana tane, ou te faamasino i ana mea, ina ne‘i faatiga mai ia te au i lona sau soo. Ona fetalai atu ai lea o le Alii, Ia outou faalogo mai i le upu a le faamasino amioletonu. E ui lava ina tuai mai le Atua i e na ia filifilia, o loo alalaga i latou ia te ia i le ao ma le po, pe le faamasino ea o ia i a latou mea? Ou te fai atu ia te outou, e vave ona faamasino e ia o a latou mea. Peitai a sau le Atalii o le tagata, e iloga ea e maua e ia le faatuatua i le lalolagi.

Na o ae i le malumalu tagata e toalua e tatalo, o le faresaio le tasi, a o le telona le tasi. Na tulai le faresaio, ua tatalo lemu atu i nei upu, Le Atua e, ou te faafetai atu ia te oe, ina ua ou le pei o isi tagata, o e fao mea, o e amio leaga, o e mulilulua, e le pei o lela telona foi. E tailua i vaiasosa ona ou anapogi, ou te avatu mea e sefulu a‘i mea uma ou te maua. O le telona foi, ua tu mamao atu, e le mafaia ona tepa ae ona mata i le lagi, a ua pōpō lona fatafata, ua faapea atu, Le Atua e, ia e alofa mai ia te au le tagata agasala. Ou te fai atu ia te outou, na alu ifo lena tagata i lona fale ua ta‘uamiotonuina, a e le faapea le isi; auā o sē faamaualuga ia te ia, e faamaulaloina lea; a o lē faamaulalo ia te ia, e faamaualugaina lea.

O lea ia outou mataala ai ma tatalo e le aunoa, ina ia ta‘uaogaina outou e sao mai ia mea uma ua tāli oo mai, ma ia tutū i luma o le Atalii o le tagata.

a ua ou faatoga mo oe, ina ne‘i mavae lou faatuatua; a o oe foi, pe a liua mai oe, ona e faamalosi ai lea i ou uso.

Ua oo atu ia i lea mea, ona fetalai atu lea o ia ia te i latou, Ia outou tatalo ne‘i oo mai le faaosoosoga ia te outou. Ona maliu ese lea o ia ia te i latou, e pei o le togi o le maa ona mamao, ona tootuli ai lea o ia ua tatalo, ua faapea atu, Lo‘u Tamā e, a e finagalo i ai, ia e ave ese lenei ipu ia te au; a e aua le faia lo‘u loto, a o lou finagalo. Ona faaali mai ai lea ia te ia o le agelu mai le lagi, ua faamalosi ia te ia. Ua puapuaga o ia, ua atili ai lana tatalo; o lona afu foi ua pei o ‘alu‘alu toto ua paū ifo i le eleele. Ua tulai o ia sa tatalo, ona maliu atu lea i ona soo, ua maua i latou ua momoe ina ua tiga i le alofa. Ona fetalai atu lea o ia ia te i latou, Se a le mea tou te momoe ai? ina tulai ia, ina tatalo, ne‘i oo mai le faaosoosoga ia te outou.

Ona fetalai atu lea o Iesu, Lo‘u Tamā e, ia e faamagaloina atu ia te i latou; auā ua latou le iloa le mea ua latou faia. Ua tufatufa e i latou ona ofu, ona fai ai lea o le vili.

Ua faapouliuliina foi le la; o le ie puipui foi o le malumalu ua saeluagalemuina.

Ona tago lea o Iesu i areto, ua faafetai, ona tufatufa lea i ona soo, a e tufatufa e ona soo i e taooto. Ua faapea foi ma i‘a, ua avatu faitalia i latou.

O lē mai le Atua, e faalogo ia i afioga a le Atua; o le mea lea tou te le faalogo ai, auā e le mai le Atua outou.

Ua tatou iloa e le faafofoga le Atua i e agasala; a e peitai a mata‘u se tasi i le Atua, ma fai lona finagalo, ona faafofoga mai lea o ia ia te ia.

E to mai ia te ia le puipui e le leoleo faitotoa: e faalogo foi mamoe i lona leo: e valaau e ia i ana lava mamoe i o latou igoa; na te ta‘ita‘i atu foi ia te i latou. Pe a tuuina atu e ia ana lava mamoe, e muamua atu ia i ai; ona mulimuli atu ai lea o mamoe ia te ia, anā ua latou iloa lona leo.

Ua ia te au foi isi mamoe e le o i lenei lotoā; e tatau ona ou ta‘ita‘iina mai o i latou foi, e faalogo foi i latou i lo‘u leo; ona tasi ai lea o le lafu mamoe, ma le leoleo mamoe e toatasi.

O a‘u mamoe e faalogo mai i latou i lo‘u leo, ua ou iloa foi i latou, ua latou mulimuli mai foi ia te au;

Ona latou ave ese lea o le maa i le mea na tuu ai le ua oti. Ona tepa ae lea o fofoga o Iesu, ua faapea atu, Lo‘u Tamā e, ou te faafetai atu ia te oe, auā ua e faafofoga mai ia te au. Ua ou iloa foi, e te faafofoga mai ia te au e le aunoa; a e peitai ua ou fai atu ai, ona o le motu o tagata o loo vagavagai, ina ia talitonu i latou ua e auina mai a‘u. Ua ia fetalai atu ia upu, ona alaga lea o ia ua leo tele, Lasalo e, ina sau ia i fafo.

O mea uma foi tou te ole atu ai i lo‘u igoa, ou te faia lava; ina ia viia le Tamā ona o le Atalii. Afai tou te ole atu i se mea i lo‘u igoa, ou te faia lava. Afai tou te alofa mai ia te au, ia outou tausi mai i a‘u poloaiga. Ou te fai atu foi i le Tamā, ona foai mai ai lea e ia ia te outou le tasi Fesoasoani, ina ia tumau pea o ia ia te outou e faavavau; o le Agaga lea e tupu mai ai le upu moni, e le mafai e le lalolagi ona talia o ia, auā, ua le vaaia o ia, ua le iloa foi o ia; a o outou, ua outou iloa o ia, auā e tumau pea ia ia te outou, e i ai foi o ia i totonu ia te outou.

A o le Fesoasoani, o le Agaga Paia lea, e auina mai e le Tamā i lo‘u igoa, o ia lava na te a‘oa‘o ia te outou i mea uma lava; e faamanatu mai foi o ia ia te outou i mea uma ua ou fai atu ai ia te outou.

Afai tou te tumau ia te au, a tumau foi a‘u upu ia te outou, o mea uma lava tou mananao i ai, tou te ole atu ai, ona faia lea mo outou.

Ua le filifilia a‘u e outou, a ua filifilia outou e a‘u; ua ou tuuina atu foi outou, ia outou ō, ma ia outou fua mai ni fua, ma ia tumau o outou fua; ina ia foaiina atu ia te outou e le Tamā mea uma lava tou te ole atu ai ia te ia i lo‘u igoa.

A e a maliu mai o ia, o le Agaga lea e tupu mai ai le upu moni, e ta‘ita‘i e ia ia te outou i upu moni uma; auā e le tautala fua ia na o ia, a o mea uma e faalogo i ai o ia, e tautala a‘i lava, ma faailoa mai ia te outou mea e oo mai.

O lea aso tou te le toe fesili mai ai ia te au i se mea e tasi. E moni, e moni, ou te fai atu ia te outou, o mea uma tou te ole atu ai i le Tamā i lo‘u igoa, e foai mai e ia ia te outou. Ua oo mai nei lava tou te lei ole atu i se mea i lo‘u igoa; ina ole atu ia, ona outou maua ai lea, ina ia atoatoa ai lo outou olioli.

Ua fetalai atu ia mea e Iesu, ona tepa ae le o ona fofoga i le lagi, ua faapea atu, Lo‘u Tamā e, ua oo mai le aso. Tuu mai ia le viiga i lou Atalii, ina ia tuu atu foi e lou Atalii le viiga ia te oe. Auā ua e foai mai ia te ia le pule i tagata uma lava, ina ia avatu e ia le ola e faavavau ia te i latou uma lava na e foaiina mai ia te ia. O le ola e faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lea. Ua ou tuu atu le viiga ia e oe i le lalolagi; ua ou faaumaina le galuega na e tuuina mai ia te au, ou te faia. O lenei foi, lo‘u Tamā e, ia e tuu mai ia te au le manuia faatasi ma oe, o le manuia lava sa ia te i taua ma oe, a o lei faia le lalolagi. Ua ou faaali atu lou suafa i tagata na e foai mai ia te au ai le lalolagi; sa fai i latou mou, ua e foaiina mai foi i latou ia te au, ua latou tausia foi lau afioga. O lenei, ua latou iloa o mea uma na e foaiina mai ia te au, mai ia te oe lava ia; o upu foi na e tuu mai ia te au, ua ou tuuina atu ia te i latou; ua latou talia foi, ma ua latou iloa, e moni ua ou sau mai ia te oe; ua talitonu foi i latou ua e auina mai a‘u. Ou te tatalo mo i latou; ou te le tatalo mo le lalolagi, a o i latou na e foaiina mai ia te au, auā o ou tagata lava i latou. O a‘u mea uma, o au lava ia; o au mea, o a‘u lava ia; ua viia foi a‘u ia te i latou. Ou te le i ai pea i le lalolagi, a o i latou, e i le lalolagi lava i latou; ou te alu atu foi ia te oe. Le Tamā paia e, ia e tausi ia i latou i lou suafa o e na e foai mai ia te au, ina ia tasi o i latou, faapei o i taua. Ua ou tausia i latou i lou suafa, ina ua ou ia te i latou i le lalolagi; ua ou leoleo i e na e foai mai ia te au, e leai foi so latou ua fano, na o le tagata o le malaia, ia taunuu ai le Tusi. O lenei, ou te alu atu ia te oe, ou te fai atu foi nei mea a o ou i le lalolagi, ina ia maua e i latou lo‘u olioli ia atoatoa ai i totonu ia te i latou. Ua ou tuu atu lau afioga ia te i latou; ua ‘ino‘ino foi le lalolagi ia te i latou, auā e le ni o le lalolagi i latou, faapei o a‘u, ou te le so le lalolagi a‘u. Ou te le ole atu ina ia e ave ese ia te i latou i le lalolagi, a ia e tausi ia te i latou ina ne‘i leaga. E le ni o le lalolagi i latou, faapei o a‘u foi, ou te le so le lalolagi a‘u. Ia e faapaiaina i latou i lau upu moni; o lau afioga o le upu moni lea. Faapei ona e auina mai a‘u i le lalolagi, ua faapea foi a‘u ona auina atu o i latou i le lalolagi. Ou te faapaia foi a‘u e sui a‘i i latou, ina ia faapaiaina o i latou i le upu moni. E le faapito la‘u tatalo mo i latou nei, a o i latoi foi e faatuatua ia te au ona o la latou upu; ina ia tasi i latou uma, faapei o oe le Tamā o i totonu ia te au, o a‘u foi o i totonu ia te oe, ina ia tasi i latou i totonu ia te i taua; ina ia talitonu le lalolagi ua e auina mai a‘u. O le manuia foi ua e foai mai ia te au, ua ou foai atu ia te i latou, ina ia tasi o i latou, faapei o i taua ua tasi; o a‘u o i totonu ia te i latou, o oe foi o i totonu ia te au, ina ia faaatoatoaina i latou ia tasi; ina ia iloa ai foi e le lalolagi, na e auina mai a‘u, ma e alofa mai ia te i latou, faapei ona e alofa mai ia te au. Lo‘u Tamā e, o lo‘u loto lenei ia te i latou ua e foaiina mai ia te au, ina ia latou faatasi ma a‘u i le mea ou te i ai, ina ia latou vaaia lo‘u manuia na e foaia mai ia te au; auā ua e alofa mai ia te au ao lei faavaeina le lalolagi. Le Tamā amiotonu e, e lei iloa oe e le lalolagi, a o a‘u, ua ou iloa oe; ua iloa foi e i latou nei, ua e auina mai a‘u. Ua ou faailoa atu foi lou suafa ia te i latou, ou te faailoa atu ai foi; ina ia i totonu ia te i latou le alofa ua e alofa mai ai ia te au, o a‘u foi i totonu ia te i latou.

Ua finafinau pea i latou nei uma lava ma le loto gatasi i le tatalo ma le aioi, atoa ma fafine, ma Maria le tinā o Iesu, atoa foi ma ona uso.

Ua oo atu foi i le aso Penetekoso, sa i ai i latou uma lava i le mea e tasi ma le loto gatasi. Ona faafuasei mai lea o le atalii mai le lagi, peiseai o le matagi ua agi tele mai, ua tumu uma ai le fale sa latou nonofo ai. Ua iloa foi e i latou o laulaufaiva peiseai o le afi ua vaevaeina, ua nofo i o latou luga taitoatasi. Ua faatutumuina foi i latou uma i le Agaga Paia, ua afua ai ona tautala i gagana eseese, pei ona foaiina mai e le Agaga o le gagana ia te i latou.

Ua faalogo i ai i latou, ona latou valaau lea i le Atua ma le loto gatasi, ua faapea atu, Le Alii e, o le Atua oe, o le na faia le lagi, ma le lalolagi, ma le sami, ma mea uma lava o i ai;

Ua mavae atu la latou tatalo, ona luluina lea o le mea ua faapotopoto ai i latou; ua tutumu foi i latou uma i le Agaga Paia, ma ua tautala atu i le afioga a le Atua ma le faamalosi.

Ua o mai foi i laua, ona tatalo lea mo i latou, ina ia maua e i latou le Agaga Paia;

Ona fai mai lea o Konelio, Anā po fa sa ou anapogi ai, na oo i le itu aso faapenei; o le itu aso e iva foi sa ou tatalo ai i lo‘u fale, faauta foi, na tu mai le tagata i o‘u luma ma le ofu pupula, ua na fai mai, Konelio e, ua faafofogaina lau tatalo, ua manatua foi au mea alofa i luma o le Atua.

O lenei, ua leoleoina Peteru i le fale puipui; a ua faia le tatalo faatauanau i le Atua e le ekalesia mo ia. Ua oo ina a ta‘ita‘i e Herota ia te ia i fafo, o lea lava po na moe ai Peteru i le va o tagata tau e toalua, ua noanoatia o ia i maea uamea e lua; o leoleo foi i luma o le faitotoa, ua leoleo i latou i le fale puipui. Faauta foi, o le agelu a le Alii ua tu mai, ua pupula mai foi le malamalama i le fale; ua na ta ia Peteru i lona itu, ma fafagu ia te ia, ua faapea atu, Ina tu ai i luga, ia vave. Ona pauu ifo lea o maoa uamea nai ona lima.

Ona anapopogi lea o i latou ma tatalo, ma faaee o latou lima ia te i laua, ona tuuina atu lea o i laua e ō.

Ua uma ona tofia e i laua o toeaina mo i latou i lea ekalesia ma lea ekalesia, ua tatalo ma anapopogi, ona la tuuina atu lea o i latou i le Alii ua latou faatuatua i ai.

O le tulua o po ma ao ua tatalo ai ma pepese o Paulo ma Sila i le Atua; ua faalogo foi ia te i laua e ua noanoatia. Ona faafuasei mai lea o le mafuie tele, ua luluina ai faavae e le fale puipui; ua toloaina mai ai o puipui uma, ua maunuunu ai foi o latou noanoaga uma lava.

Ua faaee atu foi e Paulo ona lima ia te i latou, ona oo lea o le Agaga Paia ia te i latou; ona tautala lea i gagana eseese, ma perofeta i latou.

Ua mavae atu ia upu, ona tootuli lea o ia, ma tatalo faatasi ma i latou uma.

O lenei foi, se a le mea e te faatuai ai? Tulai ia, ma ia papatisoina oe, ma ia fufulueseina au agasala i lou valaau i le suafa o le Ali.

Ua fai atu ia upu, ona tago lea o ia i le areto, ma faafetai atu i le Atua i luma o i latou uma, ona totofi lea e ia, ma afua ona ‘ai.

E faapea foi le Agaga ona fesoasoani mai i lo tatou vaivai; auā tatou te le iloa mea tatou te ole atu ai ma le tusa, a e peitai o le Agaga, e fautua o ia mo i tatou i le oi e le mafai ona talatalaina. A o lē suesue i loto, ua silafia e ia le finagalo o le Agaga; auā o loo fautua o ia mo le au paia e tusa ma le finagalo o le Atua.

Le au uso e, o le manao lava lenei o lo‘u loto, ma a‘u tatalo i le Atua mo Isaraelu, ia faaolaina i latou.

Ia olioli i le faamoemoe, ia onosai i le puapuaga, ia finafinau i le tatalo.

O lē anaana i le aso, e anaana o ia i ai ona o le Alii; o le le anaana foi i le aso, e le anaana i ai o ia ona o le Alii; o lē ‘ai, e ‘ai o ia ona o le Alii, auā ua faafetai i le Atua; o le lē ‘ai foi, e lē ‘ai o ia ona o le Alii, ua ia faafetai foi i le Atua.

Le au uso e, ou te aioi atu ia te outou, ona o lo tatou Alii o Iesu Keriso, ma le alofa o le Agaga, ia outou matuā finafinau faatasi ma a‘u i talosaga i le Atua mo a‘u;

Auā o lē tautala i le gagana ese, e le tautala ia i tagata, a o le Atua; auā e leai se lagona, a e tautala ia i le Agaga i mea lilo;

O lē tautala i le gagana ese e faamafanafana e ia ia te ia; a o lē perofeta ane, e faamafanafana ia i le ekalesia.

O lenei, o lē tautala i le gagana ese, ina tatalo ia o ia, ina ia mafai ona faamatalaina e ia. Auā afai ou te tatalo i le gagana ese, ua tatalo ai lo‘u agaga, a ua le fua mai ni fua e lo‘u mafaufau. Ia, a faapefea? ou te tatalo i le agaga, ou te tatalo foi i le mafaufau; ou te pese i le agaga, ou te pese foi i le mafaufau. A le faapea, pe a ē faafetai i le agaga, pe faapefea ona amene mai i lau faamanū o lē nofo i le mea e nofo ai le tagata valea, ina ua le lagona e ia lau upu? auā ua mālie lava lau faamanū, a ua le faamafanafanaina le tasi. Ou te faafetai i lo‘u Atua, ina ua tele la‘u tautala i gagana eseese, a e itiiti a outou uma lava; a e peitai ou te loto ina ia ou tautala i le ekalesia i ni upu se lima ma lo‘u mafaufau, ina ia ou a‘oa‘o atu i nisi, a e ou tele loto i ni upu se mano i se gagana ese.

O lenei, o gagana eseese, e le fai ma faailoga ia i e faatuatua, a o e le faatuatua; a o le perofeta ane, e le se faailoga lea mo e le faatuatua a o e faatuatua. Afai foi e faapotopoto le ekalesia uma i le mea e tasi, ma latou tautala uma i gagana eseese, a ulufale atu ni e valelea, po o e le faatuatua, e le ta‘uvaleleaina ea outou e i latou? A e afai e perofeta ane uma, a e ulufale atu se tasi, o se le faatuatua, po o se valea, ua aoaiina o ia e i latou uma, ua faamasinoina e i latou uma, ua aliali mai ai foi mea lilo o i lona loto, ona faapaū fao ai lea o ia, ma ifo atu i le Atua, ma talatala, e moni, o ia te outou le Atua.

Afai e tautala se tasi i le gagana ese, ia tautala se toalua, po o se toatolu e gata ai, ma ia feauai; ma ia faamatala e se tasi. A e afai e leai se na te faamatalaina, aua le tautala o ia i le ekalesia; a ia tautala o ia ia te ia ma le Atua.

O lenei, le au uso e, ia outou naunau ina ia perofeta; aua foi ne‘i vavao le tautala i gagana eseese.

o le mea lea ou te le mapu ai i le faafetai ona o outou, o ta‘uta‘ua outou i a‘u tatalo; ina ia foai atu ia te outou e le Atua o lo tatou Alii o Iesu Keriso, o le Tamā e ona le mamalu, le Agaga e ona le poto ma le faaaliga, ina ia outou iloa lelei o ia;

Auā ua faatau maua e i tatou uma ona o ia o le ta‘ita‘iga i le Tamā, e le Agaga e toatasi.

Ia ia te ia o le na te mafaia ona faia o mea uma e faasilisili lava i mea tatou te ole atu ai ma mafaufau i ai, e tusa ma le mana o loo matuā galue i totonu ia te i tatou, ia ia te ia le viiga i le ekalesia ona o Keriso Iesu, i augatupulaga uma, e faavavau faavavau lava. Amene.

Ia outou fetautalatalai i salāmo, ma pese, ma siva faaleagaga, ia faaneenee atu ma pepese atu i le Alii i o outou loto. Ia faafetai pea lava ona o mea uma i le Atua le Tamā, i le suafa o lo tatou Alii o Iesu Keriso.

Ia outou tatalo i le Agaga i aso uma lava i talotaloga ma faatoga uma; ia outou mataala pea i lenei lava mea, ma matuā tausisi i le faatoga mo tagata paia uma lava;

Ou te faafetai atu i lo‘u Atua i o‘u manatu uma ia te outou, e le aunoa la‘u faatoga ma le fiafia, i a‘u tatalo uma mo outou uma lava,

O la‘u tatalo foi lenei, ia faatuputeleina pea lava lo outou alofa, ma le iloa lelei, atoa ma le faautauta uma; ina ia masino ia te outou mea uiga eseese, ina ia avea outou ma ē faamaoni, ma le le ta‘uleagaina pe a oo i le aso o Keriso; ia tutumu outou i fua o le amiotonu mai ia Iesu Keriso, ina ia viia ai ma faaneeneeina ai le Atua.

Aua ne‘i popole outou i se mea e tasi, a ia faailoa atu o outou manao i mea uma lava i le Atua, i le tatalo, ma le faatoga, atoa ma le faafetai. O le manuia foi mai le Atua, o loo silisili lava i mea uma e manatu i ai, e leoleoina ai o outou loto atoa ma o outou mafaufau ia Keriso Iesu.

Ou te mafaia mea uma lava i le faamalosi mai o Keriso ia te au. A e ui lava i lea na outou agalelei, ina ua outou alolofa mai i lo‘u puapuaga.

A o lo‘u Atua e faaatoa e ia ia te outou mea uma e matitiva ai outou, e tusa ma le faulai o lona viiga, ia Keriso Iesu.

Ma te faafetai atu i le Atua, o le Tamā o ia o lo tatou Alii o Iesu Keriso, o loo tatalo atu e le aunoa mo outou,

O le mea lea o i maua foi ma te lei mapu ai lava i le tatalo mo outou, talu le aso na ma faalogologo ai, ma te aioi atu foi ina ia atoatoa ona outou iloa lelei o lona finagalo, i le poto uma atoa ma le mafaufau faaleagaga;

Ia outou finafinau i le tatalo, ia mataala i lea mea ma le faafetai. Ina tatalo ia mo i matou foi, ina ia faaavanoa mai e le Atua se faitotoa o le upu mo i matou, e tautala atu ai i le upu ia Keriso sa lilo, ona o lea foi ua noanoatia ai a‘u,

O loo alofa atu ia te outou o Epafara, o lo outou lava o ia, o le auauna a Keriso, o loo finafinau e le aunoa i tatalo mo outou; ina ia outou tumau ua atoatoa ona lelei, ma ua mautinoa le finagalo uma lava o le Atua.

Matou te faafetai pea lava i le Atua, ona o outou uma lava, o loo ta‘uta‘ua outou i a matou tatalo,

Ia outou saga olioli pea lava. Ia tatalo e le aunoa. Ia outou faafetai i mea uma lava, auā o le finagalo lea o le Atua ia te outou, ia Keriso Iesu.

Le au uso e, ia outou tatalo mo i matou.

O le toe upu lenei, le au uso e, ia outou tatalo mo i matou, ia tele vave ma ia mamalu le afioga a le Alii, e faapei ona fai ia te outou;

O lenei, e muamua i mea uma ou te apoapoai atu ia faia olega, ma tatalo, ma faatoga, ma faafetai mo tagata uma lava; mo tupu ma i latou uma ua i ai le pule, ina ia tatou nonofo ma le le atuatuvale ma le filemu, i le amio Atua uma lava ma le amio matagofie;

O lenei, o lo‘u manao ia tatalo o tane i mea uma lava, o loo sisii i luga o lima le agasala, ma ia le ita, ma ia le masalosalo.

Auā o mea uma ua faia e le Atua, e lelei lava ia, e le lafoaiina foi se tasi mea, a ia talia ma le faafetai; auā ua faapaiaina i le afioga a le Atua ma le tatalo.

A o le ua oti lana tane ua ausage ma ua tuua toatasi, ua faamoemoe ia i le Atua, ma tumau pea i le faatoga ma le tatalo i le po atoa ma le ao.

Ou te faafetai atu i le Atua, o le ou te auauna i ai ma le loto fuatia ifo ua mamā pei ona maua mai o‘u tupuga, ina ua ou manatua oe e le aunoa i a‘u faatoga i le po ma le ao;

Ou te faafetai atu i lo‘u Atua, o loo ou ta‘uta‘ua oe e le aunoa i a‘u tatalo,

O le Atua, o le na fetalai mai anamua i o tatou tamā e le au perofeta, na auaua‘i mai i togafiti eseese, ua fetalai mai o ia ia i tatou i nei ona aso e gata ai e lona Alo, o le ua tofia e ia e fai mea uma lava mona tofi, na ia faia foi e ia mea uma;

Manū o fai mai, O le aso nei afai tou te faalogo ai i lona siufofoga, aua tou te faamaaa i o outou loto, pei o le faaonoono.

ona toe tuupo ai lea o ia i le tasi aso i lana na fetalaia mai e Tavita, O le aso nei, ina ua mavae o ia tausaga e tele, pei ona fetalaia mai, O le aso nei afai tou te faalogo ai i lona siufofoga, aua tou te faamaaa i o outou loto.

O le mea lea ia tatou faalatalata atu ai ma le faamalosi i le nofoālii o le alofa tunoa, ina ia alofaina ai o i tatou, ia maua ai foi le alofa tunoa e fesoasoani mai i ona aso e tatau ai.

O ia lenei sa tatalo atu i ona po na tino tagata mai ai, ma aioi atu ma le tagi tele ma loimata i le na mafaia ona faaola ia te ia nai le oti, na faafofogaina foi o ia i le mea na ia fefe ai. E ui lava o ia o le Alo, a o mea sa tiga ai o ia na a‘oa‘oina ai o ia ia usiusitai,

O lenei, le au uso e, ua tatou sa‘oloto e ulu atu i le mea e sili ona paia ona o le toto o Iesu,

A leai foi se faatuatua e le mafai ona fiafia mai o ia; auā e tatau i lē alu atu i le Atua ona talitonu o loo soifua o ia, o ia foi na te tauia mai o e matuā saili ia te ia.

O lenei, o ia tatou te avatu soo ai le taulaga o le viiga i le Atua, o le fua lea o tatou laugutu, o loo faafetai atu i lona suafa.

A e afai ua leai se poto i so outou, ina ole atu ia i le Atua, o lē foai tele mai i tagata uma ma le le toe ta‘uta‘ua; ona foaiina mai ai lea ia te ia. A ia ole atu ma le faatuatua, aua lava ne‘i masalosalo; auā e lē masalosalo e tusa ia ma le peau o le sami ua sousou i le matagi ma felafolafoaiina.

ua outou ole atu, a e lei maua, auā ua ole atu ma le faaletatau, ina ia faauma ai ia mea i o outou manao leaga.

Ia outou faalatalata atu i le Atua, ona faalatalata mai lea o ia ia te outou. Tagata agasala e, ina fafano ia o outou lima, o outou e faalotolotolua e, ina faamamā ia o outou loto; ia puapuagatia outou, ma ia faavauvau, ma fetagisi; ia liua o outou ‘ata‘ata ma faavauvau, ma lo outou fiafia i le faanoanoa; ina faamaulalo ia i luma o le Alii, ona faamaualugaina lea o outou e ia.

Ua tigaina ea so outou? ina tatalo ia. Ua fiafia ea se tasi? ina pese ia. Ua ma‘i ea so outou? ina aami atu ia i toeaina o le ekalesia, ia latou tatalo mo ia, pe a uma ona faauu ia te ia i le suāuu i le suafa o le Alii. O le tatalo foi e faia i le faatuatua e faaolaina ai le ma‘i, e faatuina foi o ia e le Alii; afai foi ua agasala, e faamagaloina ia. Ia fefaaaliai a outou agasala, ma tatalo le tasi mo le tasi, ina ia faamaloloina outou. Ua aoga tele le tatalo faatauanau a le tagata amiotonu. O Elia o le tagata ia e tusa ma i tatou, ua matuā tatalo o ia ina ia le ua; ona le uaina ai lea o le fanua i tausaga e tolu ma masina e ono. Ua toe tatalo foi, ona to ifo ai lea o le ua mai le lagi, ona fua mai ai lea o le eleele i ona lava fua.

Auā o fofoga o le Alii o loo faasaga i e amiotonu, e liliu mai foi ona taliga i a latou faatoga. A o fofoga o le Alii o loe faasaga ma le toasa i e fai amio leaga.

A ua lata mai le gataaga o mea uma lava; o lena, ia faautauta ai, ma ia mataala outou ma le tatalo.

Ia tuuina atu ia te ia mea uma tou te popole ai, auā o loo manatu mai o ia ia te outou.

a e afai tatou te faaali a tatou agasala, e faamaoni o ia, ma le amiotonu e faamagalo ai a tatou agasala, ma faamamā mai ia i tatou i amioletonu uma lava.

O mea uma foi tatou te ole atu ai, e maua mai ia te ia, auā ua tatou tausi i ana poloaiga, tatou te faia foi mea e lelei i ona luma.

O lenei foi le faamalosi ua tatou maua i ona luma, pe afai tatou te ole atu ai se mea e tusa ma lona finagalo, e faafofoga mai o ia ia te i tatou. Afai foi ua tatou iloa, e faafofoga mai o ia ia te i tatou e se mea tatou te faatoga atu ai, ua tatou iloa e maua e i tatou mea tatou te faatoga atu ai ia te ia.

Le pele e, ia e manuia i mea uma, ma ia e malolo, faapei ona manuia o lou agaga.

O le ua i ai taliga, ina faalogo mai ia o ia i le mea ua fetalai mai ai le Agaga i ekalesia.

O le ua i ai taliga, ina faalogo mai ia o ia i le mea ua fetalai mai ai le Agaga i ekalesia.

O le ua i ai taliga, ina faalogo mai ia o ia i le mea ua fetalai mai ai le Agaga i ekalesia.

O le ua i ai taliga, ina faalogo mai ia o ia i le mea ua fetalai mai ai le Agaga i ekalesia.