05 – Ipharadesi

Ekuqaleni uNkulunkulu wadala amazulu lomhlaba.

Njalo uJehova uNkulunkulu wenza yonke imihlobo yezihlahla ukuthi zikhule emhlabathini  —  izihlahla ezazibukeka emehlweni njalo zinhle ekudleni. Phakathi laphakathi kwesivande kwakulesihlahla sokuphila lesihlahla sokwazi okuhle lokubi.

Wehlelwa liphupho wabona ilele ligxile phansi emhlabeni, isiqongo salo sifinyelela ezulwini, kwathi izingilosi zikaNkulunkulu zabe ziqansa zisehla kulo.

Wesaba wathi, “Yeka ukwesabeka kwale indawo ehloniphekayo! Ngempela iyindlu kaNkulunkulu; leli lisango lasezulwini.”

Izulu ngelikaJehova wenu, izulu elingaphezu kwamazulu, umhlaba kanye lakho konke okukiwo.

Khangela phansi usezulwini, indawo yakho yokuhlala engcwele, ubusise abantu bakho abako-Israyeli kanye lelizwe osinike lona njengesithembiso owasenza ngesifungo kubokhokho bethu, ilizwe eligeleza uchago kanye loluju.”

“Kodwa uNkulunkulu uzahlala emhlabeni na? Amazulu, loba izulu eliphakemeyo, akungeke kukuvalele wena. Pho ithempeli leli engilakhileyo lingayini kuwe na!

Zwana isikhalazo senceku yakho lesabantu bakho bako-Israyeli nxa bethandaza bekhangele kule indawo. Zwana usezulwini okulikhaya lakho, njalo nxa usizwa, uthethelele.

Bungobakho, O Jehova, ubukhulu lamandla lodumo lobukhosi; ngoba konke okusezulwini lokusemhlabeni kungokwakho. Bungobakho, O Jehova, ubukhosi; uphakeme wena phezu konke.

Wena wedwa unguJehova. Wenza amazulu, kanye lamazulu aphezukonke, lazo zonke izinkanyezi zawo, umhlaba lakho konke okukuwo, izilwandle lakho konke okukuzo. Uyapha ukuphila kukho konke, lamabandla wonke asezulwini ayakukhonza.

UJehova usethempelini lakhe elingcwele; uJehova usesihlalweni sakhe sobukhosi basezulwini. Uyawakhangela amadodana abantu; amehlo akhe ayabahlola.

Usungazisile indlela yempilo; uzangigcwalisa ngokuthaba phambi kwakho, ngenjabulo engapheliyo kwesokunene sakho.

Manje sengisazi ukuthi uJehova uyamhlenga ogcotshiweyo wakhe; uyamphendula esezulwini lakhe elingcwele ngamandla akhe asindisayo awesandla sakhe sokunene.

Wacela kuwe ukusila, wamupha ubude bezinsuku kuze kube nini lanini.

ukuthi aphile okungapheliyo angaboni ukubola.

Izinqola zikaNkulunkulu zingamatshumi ezinkulungwane; lezinkulungwane zezinkulungwane; uJehova usefikile evela eSinayi wangena endlini yakhe engcwele.

Inzalo yakhe ngizayimisa nini lanini, lesihlalo sakhe sobukhosi kasiyikufa saphela.

Ngokuba njengokuphakama komkhathi ngaphezu komhlaba, lukhulu kangako uthando lwakhe kulabo abamesabayo;

UJehova usemisile isihlalo sakhe sobukhosi ezulwini, njalo ubukhosi bakhe buphezu kwakho konke.

Kufana lokuthi amazolo aseHemoni akhithikela eNtabeni iZiyoni. Ngoba lapho uJehova wehlisela isibusiso sakhe, esiyikuphila okwaphakade.

Endleleni yokulunga kulokuphila, kuleyondlela kulokuphila okungapheliyo.

Yonke into uyenze yabanhle ngesikhathi sayo. Wamupha umuntu iphakade enhliziyweni yakhe; kodwa abantu bangeke bafinyelele kulokho uNkulunkululu asakwenzayo kwasekuqaleni kusiya ekupheleni.

Ngomnyaka inkosi u-Uziya eyafa ngawo, ngabona uJehova ehlezi esihlalweni sobukhosi esiphezulu esiphakemeyo, injobo yesambatho sakhe igcwele ithempeli. Ngaphezu kwakhe kwakulamaserafi, elinye lelinye lilezimpiko eziyisithupha. Ayegubuzele ubuso bawo ngezimpiko ezimbili, egubuzele izinyawo zawo ngezimbili, ephapha ngezimbili. Elinye lamemezela kwelinye lisithi: “Ungcwele, ungcwele, ungcwele uJehova uSomandla, Umhlaba wonke ugcwele inkazimulo yakhe.”

Ukwanda kombuso wakhe lokuthula akuyikuba lomkhawulo. Uzabusa esihlalweni sobukhosi sikaDavida laphezu kombuso wakhe, ewumisa njalo ewuqinisa ngokufaneleyo langokulunga, kusukela ngalesisikhathi kusiya phambili, kuze kube nininini. Ukutshisekela kukaJehova uSomandla kuzakufeza lokhu.

Impisi izahlala lezinyane lemvu, ingwe izalala phansi lembuzi, ithole kanye lesilwane kanye lenkonyane elilomnyaka owodwa kudle ndawonye, umntwana omncane akukhokhele.

uzakuginya kokuphela ukufa. UJehova Wobukhosi uzakwesula izinyembezi ebusweni babantu bonke; uzasusa ihlazo labantu bakhe emhlabeni wonke. UJehova usekhulumile.

Ngoba ophakemeyo ongaPhezulu  —  yena ophila kokuphela, obizo lakhe lingcwele uthi: “Ngihlala endaweni ephakemeyo lengcwele, kodwa laye ozisolayo lothobekileyo emoyeni, ukuba kuvuselelwe umoya wabathobekileyo, kuvuselelwe lezinhliziyo zabazisolayo.

Ilanga kalisayikuba yikukhanya kwakho emini loba ukukhanya kwenyanga kukukhanyise, ngoba uJehova uzakuba yikukhanya kwakho okungapheliyo, loNkulunkulu wakho abe yinkazimulo yakho. Ilanga lakho kaliyikutshona futhi, lenyanga yakho ayisayikufiphala njalo. UJehova uzakuba yikukhanya kwakho okungapheliyo, lezinsuku zakho zezinsizi zizaphela. Lapho-ke bonke abantu bakho bazakuba ngabalungileyo, lelizwe lizakuba ngelabo kokuphela. Bangamahlumela engawahlanyelayo, umsebenzi wezandla zami, ukuba ngibonakalise inkazimulo yami.

“Khangelani, ngizadala izulu elitsha lomhlaba omutsha. Izinto zakuqala aziyikukhunjulwa, kumbe zifike engqondweni.

Nanku okutshiwo nguJehova: “Izulu liyisihlalo sami sobukhosi, lomhlaba uyisenabelo sezinyawo zami. Ingaphi indlu elizangakhela yona na? Indawo yami yokuphumula izakuba ngaphi na?

“Njengamazulu amatsha lomhlaba omutsha engikwenzayo kuzakuma kokuphela phambi kwami,” kutsho uJehova, “ngokunjalo ibizo lakho lenzalo yakho izakuma kokuphela.

UJehova uthi: “Uma amazulu phezulu engalinganiswa lezisekelo zomhlaba ngaphansi zihlolwe, kulapho engingayilahla khona yonke inzalo ka-Israyeli ngenxa yakho konke abakwenzileyo,” kutsho uJehova.

Ngaphezu komkhathi phezu kwamakhanda azo kwakulokwakungani yisihlalo sobukhosi esenziwe ngesafire, njalo ngaphezulu esihlalweni sobukhosi kwakulolutho olwalufana lomuntu. Lokho ngakubona kokwakungathi lukhalo lwakhe kusiya phezulu ekhanya angathi yinsimbi evuthayo, kungathi kugcwele umlilo, njalo kusukela lapho kusiya phansi wayengathi ngumlilo, njalo ehonqolozelwe yikukhanya okucazimulayo. Ukukhanya okucazimulayo okwakumzungezile kwakunjengomchilo wamakhosikazi emayezini ngosuku lokuna kwezulu. Lokhu kwakuyisimo sesifanekiso senkazimulo kaJehova. Ngathi ngikubona ngawela phansi ngobuso, ngasengisizwa ilizwi lalowo owayekhuluma.

Izinhlobo zonke zezihlahla zezithelo zizakhula emakhunjini womabili omfula. Amahlamvu azo kawayikubuna, lezithelo zazo kazisoze ziphuthe. Zizathela nyanga zonke ngoba amanzi avela endlini engcwele agelezela kuzo. Izithelo zazo zizakuba yikudla kuthi amahlamvu azo abe ngawokwelapha.”

“Ngalesosikhathi samakhosi lawo uNkulunkulu wasezulwini uzabeka umbuso ongasoze wabhidlizwa lanini njalo ongasoze utshiyelwe abanye abantu. Uzayibhidliza yonke leyomibuso iphele, kodwa wona uzakuma laphakade.

“Embonweni wami ebusuku ngakhangela kwabonakala khonapho phambi kwami lowo owayefana lendodana yomuntu esiza ngamayezi ezulu. Yasondela kuSimakade yesiwa phambi kwakhe. Yaphiwa amandla lobukhosi lamandla okubusa; bonke abantu, lezizwe zonke labantu bendimi zonke bamkhonza. Ubukhosi bakhe yibukhosi obungapheliyo obungayikwedlula, lombuso wakhe kawusoze uchithwe.

Kodwa abangcwele bakhe oPhezukonke bazawemukela umbuso ube ngowabo lanininini  —  yebo, okwanini lanini.’

Lapho-ke ubukhosi, lamandla lobukhulu bemibuso leyo ngaphansi kwezulu lonke kuzaphiwa abangcwele, abantu bakhe oPhezukonke. Umbuso wakhe uzakuba ngumbuso ongapheliyo, njalo bonke ababusi bazamkhonza bamlalele.

Izixuku lezixuku zabaleleyo othulini lomhlaba bazavuka; abanye baye ekuphileni okungapheliyo, abanye baye ehlazweni lokunengeka okungapheliyo. Labo abahlakaniphileyo bazakhazimula njengokubenyezela kwamazulu, lalabo abaholela abanengi ekulungeni, bazakhazimula njengezinkanyezi okwanini lanini.

esithi, “Phendukani ngokuba umbuso wezulu useduze.”

Isitsha sakhe sokwela sisesandleni sakhe, njalo uzathanyela isiza sakhe, abuthele wonke amabele esiphaleni, kuthi amakhoba awatshise ngomlilo ongacimiyo.”

Kusukela kulesosikhathi uJesu waqalisa ukutshumayela esithi, “Phendukani ngokuba umbuso wezulu ususondele.”

“Babusisiwe abampofu emoyeni ngoba umbuso wezulu ngowabo.

Babusisiwe abahlukunyezwayo ngenxa yokulunga, ngoba umbuso wezulu ungowabo. “Libusisiwe lina nxa abantu belithuka, belihlukumeza njalo beligcona ngobubi bonke ngenxa yami. Thokozani lijabule ngokuba mkhulu umvuzo wenu ezulwini, ngoba bahlukunyezwa ngaleyondlela abaphrofethi ababephambi kwenu.

Loba ngubani owephula owodwa nje wale imilayo emincinyane, afundise abanye ukwenza njalo uzathiwa mncinyane okudlulayo embusweni wezulu, kodwa loba ngubani olandela njalo afundise imilayo le uzathiwa mkhulu embusweni wezulu. Yikho ngiyalitshela ukuthi ngaphandle kokuthi ukulunga kwenu kudlule okwabaFarisi labafundisi bomthetho, ngempela kalizukuwungena umbuso wezulu.

“Kumele lithandaze kanje: ‘Baba wethu osezulwini, malihlonitshwe ibizo lakho, umbuso wakho kawuze, intando yakho yenziwe emhlabeni njengalokhu isenziwa ezulwini.

Ungasikhokheleli ekulingweni, kodwa usisindise koMubi.’

“Lingazibutheli inotho emhlabeni lapho okubhubhisa khona inondo lokuthomba, njalo lapho okugqekeza khona amasela ebe. Kodwa zibutheleni inotho ezulwini lapho kungabhujiswa khona yinondo lokuthomba, njalo lapho kungagqekezi khona amasela ebe. Ngoba lapho inotho yakho ikhona, kulapho inhliziyo yakho izakuba khona.

“Ngenani ngesango elincinyane ngokuba likhulu isango lendlela ibanzi eya ekubhujisweni, njalo banengi abangena ngalo. Kodwa lincinyane isango lendlela ilukhonjwana eya ekuphileni, njalo balutshwana abayifumanayo.

“Kakusibo bonke abathi kimi, ‘Nkosi, Nkosi’ abazangena embusweni wezulu, kodwa ngulowo kuphela owenza intando kaBaba osezulwini.

Ekuhambeni kwenu tshumayelani leli ilizwi: ‘Umbuso wezulu ususondele.’

Ngiqinisile ngithi: Phakathi kwabo bonke abazelwe ngabesifazana akukaveli loyedwa omkhulu kuloJohane uMbhaphathizi; ikanti lowo ongomncinyane kakhulu embusweni wezulu mkhulu kulaye.

Abafundi beza kuye bambuza bathi, “Kungani ukhuluma ebantwini ngemizekeliso na?” Waphendula wathi, “Ulwazi lwemfihlakalo yombuso wezulu luphiwe lina, kodwa hatshi bona.

Wabatshela omunye umzekeliso wathi: “Umbuso wezulu ufana lenhlamvuyemastadi eyathathwa ngenye indoda yayihlanyela ensimini yayo. Lokuba incinyane kulazo zonke izinhlamvu elilazo, kodwa ithi ingakhula iba yisihlahla esikhulu kulazo zonke zesivande, zize izinyoni zezulu zikhusele ezingatsheni zaso.”

Lapho-ke abalungileyo bazakhazimula njengelanga embusweni kaYise wabo. Lowo olezindlebe, kezwe.

“Umbuso wezulu unjengegugu elifihliweyo esivandeni. Kwathi indoda isilitholile yalifihla njalo, kwathi ngoba iphakathi kokuthokoza yahamba yayathengisa konke eyayilakho yayathenga lesosivande.

“Njalo, umbuso wezulu ufana lomthengi edinga amaphareli amahle. Kwathi esefumene elinye elalilentengo ephezulu wahamba wayathengisa konke ayelakho walithenga.

“Futhi, umbuso wezulu ufana lombule owehliselwa phansi echibini wahuquluza zonke izinhlobo zezinhlanzi. Wathi usugcwele, abagoli bezinhlanzi bawudonsela okhunjini. Basebehlala phansi baqoqela ezitsheni zonke izinhlanzi ezilungileyo kodwa ezimbi bazilahla. Lokhu yikho okuzakwenzakala ekupheleni komhlaba. Izingilosi zizakuza zehlukanise ababi kwabalungileyo

Wathi kubo, “Ngakho wonke umfundisi womthetho osethwasisiwe ngombuso wezulu unjengomnini wendlu okhupha esiphaleni sakhe amagugu amatsha lamadala.”

bamncenga ukuthi avumele labo abagulayo ukuthi bathinte nje umphetho wesigqoko sakhe, kwathi bonke labo abamthintayo basiliswa.

Ngizakupha amakhiye ombuso wasezulwini; loba kuyini okubophayo emhlabeni kuzabotshwa ezulwini, njalo loba kuyini okuthukululayo emhlabeni kuzathukululwa ezulwini.”

Wasesithi, “Ngiqinisile ngithi kini, ngaphandle kokuba liguquke libe njengabantwana abancinyane, kalisoze lafa langena embusweni wezulu.

“Nanzelelani ukuthi lingeyisi lamunye walaba abancinyane. Phela ngilitshela ukuthi izingilosi zabo ezulwini zihlezi zibubona ubuso bukaBaba ezulwini. (

“Ngilitshela iqiniso ukuthi, ingqe yikuphi elikubophayo emhlabeni kuzabotshwa ezulwini, njalo lokho elikuthukululayo emhlabeni kuzathukululwa ezulwini.

UJesu wathi, “Yekelani abantwana beze kimi, lingabavimbeli, ngokuba umbuso wezulu ungowabanjengalaba.”

Kweza enye indoda kuJesu yabuza yathi, “Mfundisi, ngenzeni okulungileyo ukuze ngizuze ukuphila okungapheliyo na?” UJesu waphendula wathi, “Ungibuzelani ngokulungileyo na? Munye kuphela olungileyo. Uma ufuna ukungena ekuphileni, landela imilayo.” Indoda yabuza yathi, “Yiphi na?” UJesu waphendula wathi, “ ‘Ungabulali, ungaphingi, ungebi, ungafakazeli amanga, hlonipha uyihlo lonyoko,’ njalo ‘thanda umakhelwana njengoba uzithanda wena.” Ijaha lathi, “Yonke le ngiyigcinile. Pho ngisaswelani na?” UJesu waphendula wathi, “Aluba ufuna ukuthi uphelele, thengisa yonke inotho yakho uphe abayanga, lapho-ke uzakuba lenotho ezulwini. Usungeza ungilandele.” Kwathi ukuba ijaha lelo likuzwe lokho, lasuka lidanile ngokuba lalilenotho enengi kakhulu.

UJesu wasesithi kubafundi bakhe, “Ngilitshela iqiniso ukuthi kunzima emuntwini onothileyo ukuthi angene embusweni wezulu. Njalo ngiyalitshela ukuthi kungaba lula ukuthi ikamela lingene embotsheni yenalithi kulokuthi umuntu onothileyo angene embusweni kaNkulunkulu.”

UJesu wathi kubo, “Ngilitshela iqiniso ukuthi ngesikhathi sokwenziwa kabutsha izinto zonke, lapho iNdodana yoMuntu isihlezi esihlalweni sobukhosi, lina elingilandelayo lani lizahlala ezihlalweni zobukhosi ezilitshumi lambili, lahlulele izizwana ezilitshumi lambili zako-Israyeli. Njalo bonke labo abatshiye izindlu zabo, loba abafowabo, loba odadewabo kumbe uyise loba unina kumbe abantwana loba amasimu ngenxa yami bazakwamukeliswa okwandiswe ngekhulu njalo bazakudla ilifa lokuphila kwaphakade.

“Umbuso wezulu unjengenkosi eyalungisela indodana yayo idili lomthimba. Yathuma izisebenzi zayo kulabo ababemenyiwe edilini ukuba beze kodwa bala ukuza.

Ekuvukeni kwabafileyo abantu kabayikuthatha loba bendiswe; bazakuba njengezingilosi ezulwini. Kodwa mayelana lokuvuka kwabafileyo  —  kalifundanga yini lokho uNkulunkulu akutsho kini ukuthi, ‘NginguNkulunkulu ka-Abhrahama, uNkulunkulu ka-Isaka loNkulunkulu kaJakhobe? Kasuye uNkulunkulu wabafileyo kodwa ngowabaphilayo.”

“Kulesosikhathi isiboniso seNdodana yoMuntu sizavela emkhathini, kuthi zonke izizwe zomhlaba zilile. Zizabona iNdodana yoMuntu isiza ngamayezi esibhakabhakeni, ilamandla lobukhosi obukhulu.

Izulu lomhlaba kuzadlula, kodwa amazwi ami kasoze edlule lanini.

“Kulesosikhathi umbuso wezulu uzakuba njengezintombi ezilitshumi ezathatha izibane zazo zaphuma ukuyahlangabeza umyeni. Ezinhlanu zazo zaziyiziwula, ezinhlanu zihlakaniphile. Eziyiziwula zathatha izibane zazo kodwa kazithathanga amafutha. Kodwa ezihlakaniphileyo zathwala amafutha emagabheni kanye lezibane zazo.

“Umnini wayo waphendula wathi, ‘Wenze kuhle, nceku elungileyo lethembekileyo! Uthembekile ezintweni ezilutshwana; ngizakuphathisa izinto ezinengi. Woza uzojabula kanye lenkosi yakho!’

Lapho-ke iNkosi izakuthi kulabo abangasekunene kwayo, ‘Wozani, lina elibusisiweyo nguBaba; thathani ilifa lenu, umbuso owalungiselwa lina kulokhu kwadalwa umhlaba.

“Bazasuka baye ekujezisweni kwaphakade, kodwa abalungileyo baye ekuphileni okungapheliyo.”

UJesu weza kubo wathi, “Wonke amandla ezulwini lasemhlabeni aphiwe mina.

UJesu wathi ekubona lokho wacaphuka. Wathi kubo, “Yekelani abantwana abancane beze kimi, lingabavaleli, ngokuba umbuso kaNkulunkulu ungowabanjengalaba. Ngilitshela iqiniso ukuthi loba ngubani ongayikwemukela umbuso kaNkulunkulu njengomntwana omncane kayikungena kuwo.”

UJesu wathi esesuka ehamba, indoda yagijimela kuye yafika yazilahla ngamadolo phambi kwakhe. Yabuza yathi, “Mfundisi olungileyo, ngingenzani ukuze ngizuze ilifa lokuphila kwaphakade na?” UJesu waphendula wathi, “Ungibizelani ngokuthi ngilungile na? Kakho olungileyo ngaphandle kukaNkulunkulu yedwa. Uyayazi imilayo: ‘Ungabulali, ungafebi, ungebi, ungafungeli ubufakazi bamanga, ungadlelezeli, hlonipha uyihlo lonyoko.” Wachaza wathi, “Mfundisi zonke lezi izinto ngiyazigcina kusukela ngisesengumfana.” UJesu wamkhangela wamthanda. Wathi, “Uswele into eyodwa. Hamba uyethengisa konke olakho uphe abampofu, lapho-ke uzakuba lenotho ezulwini. Ubususiza ungilandele.” Isizwa lokhu indoda yathelwa ngamanzi. Yasukuma yahamba isidanile ngokuba yayinothile kakhulu.

Nxa abafileyo sebevuka kabayikuthatha loba bathathwe; bazakuba njengezingilosi ezulwini. Mayelana lokuvuka kwabafileyo  —  kalibalanga yini encwadini kaMosi, emlandweni wesihlahla, ukuthi uNkulunkulu wathi kuye, ‘NginguNkulunkulu ka-Abhrahama, uNkulunkulu ka-Isaka loNkulunkulu kaJakhobe.

Wakhangela abafundi bakhe wathi: “Libusisiwe lina elimpofu, ngoba okwenu ngumbuso kaNkulunkulu. Libusisiwe lina elilambileyo manje, ngoba lizasuthiswa. Libusisiwe lina elililayo manje, ngoba lizahleka. Libusisiwe lina nxa abantu belizonda, nxa belibandlulula njalo belichothoza bephika ibizo lenu besithi lingcolile, ngenxa yeNdodana yoMuntu. “Thokozani ngalolosuku liqolotshe ngokuthokoza ngokuba mkhulu umvuzo wenu ezulwini. Ngokuba yiyo indlela oyise abaphatha ngayo abaphrofethi.

Wathi, “Ulwazi lwemfihlo yombuso kaNkulunkulu seliluphiwe lina, kodwa kwabanye ngikhuluma ngemizekeliso, ukuze kuthi “ ‘loba bebona, bangaboni; loba besizwa, bangaqedisisi.’

Kodwa lingathatshiswa yikuthi imimoya iyazithoba kini, kodwa thokoziswani yikuthi amabizo enu alotshiwe ezulwini.”

Ngesinye isikhathi isazi somthetho saphakama samlinga uJesu. Sabuza sathi, “Mfundisi, ngingenzani ukuze ngizuze ilifa lempilo engapheliyo na?” “Kubhalweni emthethweni?” kuphendula uJesu. “Kuyini okufunda khona?” Waphendula wathi, “Thanda iNkosi uNkulunkulu wakho ngenhliziyo yakho yonke, langomphefumulo wakho wonke, langamandla akho wonke, njalo langengqondo yakho yonke;’ njalo, ‘Thanda umakhelwana wakho njengoba uzithanda wena.’ ” UJesu waphendula wathi, “Uphendule kuhle. Kwenze lokhu, uzaphila.”

Kodwa funani umbuso wakhe, izinto zonke lezi lazo lizaziphiwa. “Lingesabi, mhlambi omncane, ngoba uYihlo uthandile ukulipha umbuso. Thengisani izimpahla zenu liphe abampofu. Zidingeleni izikhwama ezingagugiyo, inotho ezulwini engayikuphela, lapho okungasondeli khona isela lalapho impehlane ingabhubhisi khona. Ngoba lapho okulenotho yakho khona, inhliziyo yakho ilapho layo.

Ngilitshela ukuthi ngaleyondlela kuzakuba lokuthokoza ezulwini ngokuphenduka kwesoni esisodwa okudlula labobantu abalungileyo abangamatshumi aficamunye lesificamunye abangasweli ukuphenduka.

“Kodwa u-Abhrahama waphendula wathi, ‘Ndodana, khumbula ukuthi ngesikhathi usaphila wazuza izinto zakho ezinhle, kodwa uLazaro wemukela izinto ezimbi, kodwa manje useduduzwa lapha, ikanti wena usebuhlungwini. Njalo ngaphandle kwakho konke lokhu, phakathi kwethu lawe kulodonga olukhulu, ukwenzela ukuthi labo abafisa ukuza ngapho besuka lapha bangeke, futhi kakho ongapho ongachaphela ngakithi.’

Kodwa uJesu wabizela kuye abantwana wathi, “Yekelani abantwana beze kimi, lingabaleli, ngokuba umbuso kaNkulunkulu ungowabanjengalaba. Ngilitshela iqiniso, lowo ongawemukeliyo umbuso kaNkulunkulu njengomntwana omncane kasoze afa awungena.”

Umbusi othile wambuza wathi, “Mfundisi olungileyo, ngenzeni ukuze ngizuze impilo engapheliyo na?” UJesu waphendula wathi, “Ungibizelani ngokuthi ngilungile na? Kakho olungileyo  —  ngaphandle kukaNkulunkulu kuphela. Uyayazi imilayo; ‘Ungafebi, ungabulali muntu, ungebi, ungaphi ubufakazi bamanga, hlonipha uyihlo lonyoko.’ ” Wathi umbusi, “Yonke le ngiyigcinile kwasebufaneni bami.” UJesu esekuzwile lokho wathi kuye, “Usasilele into eyodwa. Thengisa konke olakho uphe abampofu, uzakuba lenotho ezulwini. Usungeza-ke, ungilandele.” Wathi esezwe lokhu wadana kakhulu ngokuba wayeyindoda eyayinothe kakhulu. UJesu wamkhangela wathi, “Kulukhuni kabi ukuthi abanothileyo bawungene umbuso kaNkulunkulu! Ngempela kulula ukuthi ikamela lingene embotsheni yenalithi kulokuthi umuntu onothileyo awungene umbuso kaNkulunkulu.” Labo abakuzwayo lokho babuza bathi, “Ngubani pho ongasindiswa na?” UJesu waphendula wathi, “Lokho okungenzekiyo emandleni abantu kuyenzakala kwakaNkulunkulu.”

UJesu wathi kubo, “Ngilitshela iqiniso ukuthi kakho osetshiye ikhaya loba umfazi kumbe abafowabo loba abazali kumbe abantwana ngenxa yombuso kaNkulunkulu ozakwehluleka ukuzuza ngokuphindwe kanengi esikhathini samanje lesikhathini esizayo, ukuphila okungapheliyo.”

Wasesithi, “Jesu, ungikhumbule nxa ungafika embusweni wakho.” UJesu wamphendula wathi, “Ngiyakutshela iqiniso ngithi, lamuhla uzakuba lami epharadisi.”

Waphinda wengeza wathi, “Ngikutshela iqiniso, uzabona izulu livuleka, lezingilosi zikaNkulunkulu zikhwela zisehlela eNdodaneni yoMuntu.”

Esephendula uJesu wathi, “Ngiyaqinisa ngithi ngaphandle kokuba umuntu azalwe futhi, angeke awubone umbuso kaNkulunkulu.” UNikhodemu wathi, “Kanti umuntu angazalwa kanjani yena esemdala na? Ngeqiniso, angazake angene ngokwesibili esiswini sikanina ukuze azalwe!” UJesu waphendula wathi, “Ngiyaqinisa ngithi, ngaphandle kokuthi umuntu azalwe ngamanzi langoMoya, angeke awungene umbuso kaNkulunkulu. Inyama izala inyama, kodwa uMoya uzala umoya.

Ngikhulume kini ngezinto zalapha emhlabeni kodwa kalikholwa; pho lizakholwa kanjani nxa ngingakhuluma ngokwasezulwini? Ka-kho osewake waya ezulwini ngaphandle kwalowo owavela ezulwini  —  iNdodana yoMuntu NjengoMosi waphakamisa inyoka enkangala, ngokunjalo iNdodana yoMuntu imele iphakanyiswe, ukuze kuthi lowo lalowo okholwayo kuyo abelokuphila okungapheliyo. “UNkulunkulu walithanda ilizwe waze wanikela iNdodana yakhe iyiyo yodwa ukuze kuthi loba ngubani okholwa kuyo angabhubhi kodwa abe lokuphila okungapheliyo.

Loba ngubani obeke ithemba lakhe eNdodaneni ulokuphila okungapheliyo, kodwa loba ngubani oyilahlayo iNdodana kazukuyibona leyompilo ngokuba ulaka lukaNkulunkulu seluphezu kwakhe.”

kodwa lowo onatha amanzi engiwaphayo kasoze abuye ome lanini. Ngempela amanzi engimnika wona azakuba yintombo yamanzi egelezela ekuphileni okungapheliyo.”

“Ngiqinisile ngithi lowo owezwayo amazwi ami amkholwe lowo ongithumileyo ulokuphila okungapheliyo njalo kazukulahlwa; usechaphile wasuka ekufeni waya ekuphileni.

“Kakungalimangalisi lokhu ngokuba siyeza isikhathi lapho kuzakuthi bonke abasemathuneni abo bezalizwa ilizwi layo baphume  —  labo abenze okuhle bazavuka baphile, lalabo abenze ububi bazavuka balahlwe.

Liphenyisisa iMibhalo liyihlola ngokuba licabanga ukuthi ngayo lilakho ukuphila okungapheliyo. Yiyo le iMibhalo efakaza ngami,

Lingasebenzeli ukudla khona okubolayo, kodwa sebenzelani ukudla okuhlalayo, okwempilo engapheliyo, elizakuphiwa yiNdodana yoMuntu. UBaba usebeke kuyo uphawu lwakhe lokuyibeka.”

Ngokuba intando kaBaba iyikuthi bonke abakhangela eNdodaneni bakholwe kuyo bazakuba lokuphila okungapheliyo, njalo ngizabavusa ngosuku lokucina.”

Ngiqinisile ukuthi lowo okholwayo ulokuphila okungapheliyo.

Ngiyisinkwa esiphilayo esehlela phansi sivela ezulwini. Nxa umuntu angasidla lesisinkwa, uzaphila laphakade. Lesosinkwa siyinyama yami engizayinikela ukuphila komhlaba.”

Lowo odla inyama yami njalo anathe igazi lami ulokuphila okungapheliyo, njalo ngizamvusa ngosuku lokucina.

USimoni Phethro wamphendula wathi, “Nkosi, sizakuya kubani na? Wena ulamazwi okuphila okungapheliyo.

Ngizipha ukuphila okungapheliyo, kazisoze zabhubha; kakho ongazihlwitha esandleni sikaBaba.

UJesu wathi kuye, “Mina ngiyikuvuka kwabafileyo lokuphila. Lowo okholwa kimi uzaphila, loba ezakufa; njalo lowo ophilayo njalo ekholwa kimi kasoze afa lanini. Uyakukholwa lokhu na?” Waphendula wathi, “Yebo, Nkosi, ngiyakholwa ukuthi unguye uKhristu, iNdodana kaNkulunkulu, obezakuza emhlabeni.”

Umuntu othanda impilo yakhe izamlahlekela, ikanti umuntu ozonda impilo yakhe kulo umhlaba uzayilondolozela ingunaphakade.

Emzini kaBaba kulezindlu ezinengi; aluba kungenjalo ngabe ngalitshela. Ngiya khona ukuyalilungisela indawo. Njalo nxa sengiyile ukulilungisela indawo ngizabuya ngizolithatha ukuthi libe lami, ukuze lani libe khona lapho engikhona.

UJesu esekutshilo lokhu, wakhangela ezulwini wakhuleka wathi: “Baba, isikhathi sesifikile. Khazimulisa iNdodana yakho, ukuze iNdodana yakho ikukhazimulise. Ngokuba wayinika amandla phezu kwabantu bonke ukuthi ibaphe ukuphila okungapheliyo kubo bonke labo obanike yona. Manje-ke yilokhu ukuphila okungapheliyo: ukuthi bakwazi wena, onguwe wedwa uNkulunkulu weqiniso, uJesu Khristu omthumileyo.

UJesu wathi, “Umbuso wami kayisiwo walo umhlaba. Aluba kwakunjalo izinceku zami bezizakulwa ukuvalela ukuthi ngingabotshwa ngabaJuda. Kodwa hatshi, umbuso wami uvela kwenye indawo.”

“ ‘Izulu liyisihlalo sami sobukhosi, umhlaba uyisenabelo sami. Lizangakhela ndlu bani? kutsho iNkosi. Kumbe izaba ngaphi indawo yami yokuphumula na?

Kwathi abeZizwe bekuzwa lokhu bathaba, balidumisa ilizwi leNkosi; kwathi bonke ababemiselwe ukuphila okungapheliyo bakholwa.

beqinisa abafundi njalo bebakhuthaza ukuthi babambelele ekukholweni. Bathi, “Kufanele sedlule ezinhlungwini ezinengi ukuze singene embusweni kaNkulunkulu.”

Watshumayela ngombuso kaNkulunkulu, wafundisa ngeNkosi uJesu Khristu ngesibindi njalo engaphazanyiswa muntu.

Kulabo abadinga inkazimulo, lodumo kanye lokungabhubhi, ngokuphikelela ekwenzeni okuhle, uzabanika ukuphila okulaphakade.

ukuze kuthi njengoba isono sabusa ekufeni, kuthi ngokunjalo umusa lawo ubuse ngokulunga ukuba ulethe ukuphila okungapheliyo ngoJesu Khristu iNkosi yethu.

Kodwa njengoba khathesi selikhululwe esonweni laba yizigqili kuNkulunkulu, umvuzo eliwutholayo uholela ebungcweleni, lesiphetho yikuphila okungapheliyo. Ngoba umvuzo wesono yikufa, kodwa isipho sikaNkulunkulu siyikuphila okungapheliyo kuKhristu uJesu iNkosi yethu.

ngoba, “Bonke abakhuleka ebizweni leNkosi bazasindiswa.”

Kodwa kunjengoba kulotshiwe ukuthi: “Akulalihlo eselibonile, akulandlebe esizwile akulangqondo esicabangile ngalokho uNkulunkulu akulungisele labo abamthandayo,”  —

Kuzakuba njalo-ke ngokuvuka kwabafileyo. Umzimba ohlanyelwayo uyabola, uvuswa ungasaboli; uhlanyelwa useyiswa, uvuswe ngenkazimulo; uhlanyelwa ubuthakathaka, uvuswe usungumzimba womoya. Nxa kulomzimba wemvelo, ukhona njalo lomzimba womoya. Ngakho kulotshiwe ukuthi: “Umuntu wakuqala u-Adamu waba yisidalwa esiphilayo;” kodwa u-Adamu wokucina waba ngumoya ophilisayo. Owomoya kafikanga kuqala, kodwa owemvelo, emva kwalokho kwafika owomoya. Umuntu wakuqala wayenziwe ngothuli lomhlabathi; umuntu wesibili wavela ezulwini. Njengoba wayenjalo umuntu wasemhlabeni, banjalo lalabo abangabomhlaba; njalo njengoba enjalo umuntu ovela ezulwini, banjalo labo abangabasezulwini. Njalo njengoba silesimo somuntu wasemhlabeni, ngokunjalo sizakuba lesimo somuntu ovela ezulwini.

Bazalwane, ngithi kini inyama legazi akungeke kudle ilifa lombuso kaNkulunkulu, lokubolayo akulidli ilifa lokungaboliyo. Lalelani, ngilitshela imfihlakalo: Kasiyikufa sonke, kodwa sonke sizaguqulwa  — ngesikhatshana, ngokucwayiza kwelihlo, ngecilongo lokucina. Ngoba icilongo lizakhala, abafileyo bazavuswa bengabolanga, njalo sizaguqulwa. Ngoba okubolayo kumele kuzigqokise ngokungaboliyo, lokufayo ngokungafiyo. Nxa okubolayo sekugqokiswe okungaboliyo, lokufayo ngokungafiyo, kuzagcwaliseka isitsho esilotshiweyo esithi: “Ukufa kuginyiwe ekunqobeni.” “Kungaphi ukunqoba kwakho, wena kufa? Lungaphi udonsi lwakho, wena kufa?” Udonsi lokufa yisono, lamandla esono ngumthetho.

Ngoba ukukhanya kwethu lezinhlupheko zethu ezincane ezesikhatshana zisizuzela inkazimulo elaphakade enkulu kulazo zonke. Ngakho amehlo ethu kasiwakhangelisanga kokubonakalayo, kodwa kokungabonakaliyo. Ngoba okubonakalayo kuyedlula, kodwa okungabonakaliyo kakuyikuphela.

Siyakwazi ukuthi uma ithente lethu lasemhlabeni lidilizwa, silesakhiwo esivela kuNkulunkulu, indlu elaphakade ezulwini, engakhiwanga ngezandla zabantu. Okwakhathesi siyabubula, sifisa ukwembeswa ngekhaya lethu lasezulwini,

Ngithi silethemba, njalo ngingakhetha ukuba khatshana lomzimba ngisekhaya kanye leNkosi.

Mina ngazi umuntu okuKhristu okwathi ngeminyaka elitshumi lane eyedlulayo wathathwa wasiwa ezulwini lesithathu. Langabe kwakuphakathi komzimba loba ngaphandle komzimba kangikwazi  —  kwazi uNkulunkulu. Mina ngazi ukuthi umuntu lo  —  loba phakathi komzimba kumbe ngaphandle komzimba, kangikwazi, kodwa uNkulunkulu uyazi  — wahlwithwa wasiwa ePharadise. Wezwa izinto ezingakhulumekiyo, izinto umuntu angavunyelwa ukuzitsho.

Lingakhohliswa: UNkulunkulu angeke ahlekwa. Umuntu uvuna lokho akuhlanyelayo. Lowo ohlanyela ukuthokozisa imvelo yakhe yesono, kuleyomvelo uzavuna ukuchitheka; lowo ohlanyela ukuthokozisa uMoya, kuMoya uzavuna ukuphila okulaphakade.

Udumo kalube kuNkulunkulu uYise weNkosi yethu uJesu Khristu, osibusise ebukhosini basezulwini ngezibusiso zonke zomoya kuKhristu.

Ngalokho-ke, kaliseyibo bezizweni lezihambi, kodwa seliyinzalo yakithi labantu bakaNkulunkulu, kanye lamalunga abendlu kaNkulunkulu,

Ngoba kimi, ukuphila kunguKhristu lokufa kuyinzuzo. Uma ngingaqhubeka ngiphila emzimbeni, lokhu kuzakutsho umsebenzi olezithelo kimi. Kodwa-ke kuyini engizakukhetha? Angazi! Ngiphakathi kwakho kokubili: Ngifisa ukusuka ngibe loKhristu, okungcono kakhulu;

Kodwa elethu ikithi lisezulwini. Njalo simlindele ngokutshiseka uMsindisi evela khonale, iNkosi uJesu Khristu, yena okuzakuthi ngamandla amenza abeke izinto zonke ngaphansi kwakhe, uzaguqula imizimba yethu elesimo esiphansi ibe njengomzimba wakhe olenkazimulo.

Ngoba wasihlenga embusweni wobumnyama wasiletha embusweni weNdodana yakhe ayithandayo,

Bekani izingqondo zenu ezintweni eziphezulu, hatshi ezintweni zasemhlabeni.

siliqinisa, siliduduza kanye lokulikhuthaza ukuba liphile izimpilo ezifanele uNkulunkulu, olibizela embusweni wakhe lasenkazimulweni.

alinike, kanye lathi, ukuhlaliseka lina elihlutshwayo. Lokhu kuzakwenzakala lapho iNkosi uJesu isibonakaliswa ezulwini phakathi komlilo ovuthayo ilezingilosi zayo ezilamandla.

Kodwa ngenxa yasonalesi isizatho ngenzelwa isihawu, ukuze kuthi ngami, isoni esibi kakhulu, uKhristu abonakalise ukubekezela kwakhe okungelamkhawulo njengesibonelo kulabo abakholwa kuye bamukele lokuphila okungapheliyo. Manje, kuyo iNkosi yaphakade, engafiyo, engabonakaliyo, uNkulunkulu yedwa, akube kuye udumo lenkazimulo kuze kube nini lanini. Ameni.

Ngoba imfundiso yokuqinisa umzimba ilosizo oluthile, kodwa ukwesaba uNkulunkulu kulosizo ezintweni zonke, kulesithembiso ekuphileni kwakhathesi lasekuphileni okuzayo.

Ngoba akulalutho esalulethayo emhlabeni, njalo akulalutho esingasuka lalo kuwo.

Lwana ukulwa okuhle kokukholwa. Bambelela ekuphileni okulaphakade owabizelwa kukho ekuvumeni kwakho okuhle owakwenza kulabofakazi abanengi.

Balaye ukuba benze okuhle, bande ngezenzo ezinhle, baphane njalo bathande ukwaba okungokwabo. Ngalokhu bazazibekela inotho njengesisekelo esiqinileyo sesizukulwana esizayo ukuze babambe ukuphila okuyikuphila okuqotho.

kodwa khathesi usubonakaliswe ngokubonakala koMsindisi wethu, uKhristu Jesu, osechithe ukufa waletha ekukhanyeni ukuphila lokungafi ngevangeli.

INkosi izangihlenga kukho konke ukuhlaselwa okubi, ingilethe kungekho bubi embusweni wayo wasezulwini. Udumo kalube kuyo kuze kube nini lanini. Ameni.

ukukholwa lokwazi okweyame ethembeni lokuphila okulaphakade, okwathenjiswa nguNkulunkulu, ongaqambi manga, isikhathi singakaqalisi,

ukuze kuthi sesilungiswe ngumusa wakhe, sibe yindlalifa silethemba lokuphila okulaphakade.

Kodwa ngeNdodana uthi, “Isihlalo sakho sobukhosi, O Nkulunkulu, sizakuba khona kuze kube nininini, lokulunga kuzakuba yintonga yombuso wakho.

Ngakho kulokhu kukhona ukuphumula kweSabatha kwabantu bakaNkulunkulu;

kwathi lapho esephelelisiwe, waba ngumthombo wokusindiswa okulaphakade wabo bonke abamlalelayo

Ngakho kwakufanele ukuba izifanekiso zezinto zasezulwini zihlanjululwe ngemihlatshelo le, kodwa izinto zasezulwini uqobo kube ngemihlatshelo engcono kulale. Ngoba uKhristu kangenanga endaweni engcwele eyenziwa ngabantu eyayiyisifanekiso nje kuphela saleyo eqotho; yena wangena ezulwini uqobo, ukuba asimele phambi kukaNkulunkulu.

Kodwa-ke bona babefuna ilizwe elingcono  —  elasezulwini. Ngakho uNkulunkulu akumyangisi ukubizwa ngokuthi unguNkulunkulu wabo, ngoba usebalungisele idolobho.

Kodwa lina lize eNtabeni iZiyoni, iJerusalema lasezulwini, umuzi kaNkulunkulu ophilayo. Lize kuzinkulungwane lezinkulungwane zezingilosi ezihlangane ngentokozo, ebandleni lezibulo, ezimabizo azo alotshiwe ezulwini. Lize kuNkulunkulu, umahluleli wabantu bonke, emimoyeni yabantu abalungileyo abaphelelisiweyo,

Ngoba lapha kasiladolobho elimiyo njalo, kodwa sidinga idolobho elizayo.

kanye laselifeni elingeke libole, lonakale loba libune  —  eliligcinelweyo ezulwini.

oseye ezulwini njalo usesandleni sokunene sikaNkulunkulu  —  lezingilosi, leziphathamandla kanye lezikhulu ekuzehliseni kuye.

Ngakho-ke, bazalwane bami, tshisekelani kakhulu ukwenza ukubizwa lokukhethwa kwenu kuqiniseke. Ngoba uma lisenza lezizinto, kalizukuwa, njalo lizakwamukelwa ngokupheleleyo embusweni olaphakade weNkosi loMsindisi wethu uJesu Khristu.

Kodwa mayelana lesithembiso sakhe silindele izulu elitsha lomhlaba omutsha, ikhaya lokulunga.

Lokho okwakukhona kusukela ekuqaleni, esesikuzwile, esesikubone ngamehlo ethu, esesikukhangele lezandla zethu zakuthinta  —  lokhu siyakutshumayela mayelana leLizwi lokuphila. Ukuphila kwabonakala; sikubonile njalo siyakufakaza, njalo sitshumayela kini ukuphila okulaphakade okwakukhona kuBaba njalo sekubonakele kithi.

Umhlaba lezinkanuko zawo kuyadlula, kodwa umuntu owenza intando kaNkulunkulu uphila kuze kube nininini.

Njalo nanku asithembisa khona  —  ukuphila okulaphakade.

Bangane abathandekayo, khathesi singabantwana bakaNkulunkulu, njalo lokho esizakuba yikho akukaziwa. Kodwa siyakwazi ukuthi lapho ebonakala sizakuba njengaye, ngoba sizambona njengoba enjalo.

Ubufakazi lobo yilobu: UNkulunkulu usinike ukuphila okulaphakade, njalo lokhu kuphila kuseNdodaneni yakhe. Lowo oleNdodana yakhe ulokuphila; lowo ongelayo iNdodana kaNkulunkulu kalakho ukuphila. Ngililobela lezizinto lina abakholwayo ebizweni leNdodana kaNkulunkulu ukuze lazi ukuthi lilokuphila okulaphakade.

Siyakwazi lokuthi iNdodana kaNkulunkulu yeza yasinika ukuqedisisa, ukuze siyazi yona eqotho. Njalo sikuye yena oqotho  —  kanye laseNdodaneni yakhe uJesu Khristu. Yena unguNkulunkulu oqotho kanye lokuphila okulaphakade.

Zigcineni lisethandweni luka-Nkulunkulu lisalindele isihawu seNkosi yethu uJesu Khristu ukuba ilingenise ekuphileni okulaphakade.

Lowo olendlebe, kezwe okutshiwo nguMoya emabandleni. Lowo onqobayo ngizamnika ilungelo lokudla esihlahleni sokuphila esisepharadisi kaNkulunkulu.

Lowo onqobayo uzagqoka okumhlophe njengabo. Ibizo lakhe kangisoze ngilesule encwadini yokuphila, kodwa ibizo lakhe ngizalivuma phambi kukaBaba lezingilosi zakhe.

Lowo onqobayo, ngizamnika ilungelo lokuhlala lami esihlalweni sami sobukhosi, njengoba lami nganqoba ngasengihlala loBaba esihlalweni sakhe sobukhosi.

Emva kwalokhu ngakhangela, ngabona umnyango phambi kwami uvulekile ezulwini. Ilizwi engangilizwe kuqala lingikhulumisa kungathi licilongo lathi, “Woza lapha ngikutshengise okuzakwenzakala emva kwalokhu.” Khonokho nje ngahle ngehlelwa nguMoya, kwathi phambi kwami ngabona isihlalo sobukhosi ezulwini kulomuntu owayehlezi kuso. Lowo owayehlezi lapho wayefana lejaspa lekhaneliya. Umchilo wamakhosikazi owawufana le-emaralidi wawuzingeleze isihlalo sobukhosi. Kwakulezinye izihlalo zobukhosi ezingamatshumi amabili lane ezazizingeleze isihlalo sobukhosi leso, kuzo kuhlezi abadala abangamatshumi amabili lane. Babegqoke okumhlophe njalo belemiqhele yegolide emakhanda abo.

Esihlalweni sobukhosi kwaba lokuphazima kombane, lokundindizela kanye lokukhwaza kwezulu. Phambi kwesihlalo sobukhosi kwakuvutha izibane eziyisikhombisa. Lezi zazingomoya abayisikhombisa bakaNkulunkulu. Phambi kwesihlalo futhi kwakulokwakungathi lulwandle lwengilazi, kucwebile njengelitshe elikhazimulayo. Phakathi, emaceleni wonke esihlalo sobukhosi, kwakulezidalwa ezine eziphilayo, zigcwele amehlo phambili langemuva. Isidalwa sakuqala esiphilayo sasinjengesilwane, esesibili sinjengenkabi, esesithathu sasilobuso obunjengobomuntu, esesine sasinjengokhozi oluphaphayo. Esinye lesinye salezozidalwa eziphilayo sasilezimpiko eziyisithupha njalo sigcwele amehlo macele wonke, kanye langaphansi kwezimpiko. Emini lebusuku kazizange zithule ukuthi: “Ingcwele, ingcwele, ingcwele iNkosi uNkulunkulu uSomandla, owayekhona, okhona, njalo ozakuza.”

Kuthi lapho izidalwa eziphilayo zimdumisa, zimhlonipha njalo zimbonga lowo ohleziyo esihlalweni sobukhosi njalo ophila kuze kube nininini, abadala abangamatshumi amabili lane bawela phansi phambi kwakhe ohlezi esihlalweni sobukhosi, bamkhonze yena ophila kuze kube nininini. Babeka imiqhele yabo phambi kwesihlalo sobukhosi bathi: “Ufanele, Nkosi yethu loNkulunkulu wethu, ukwamukela udumo lenhlonipho kanye lamandla, ngoba wena wadala izinto zonke, njalo zadalwa ngentando yakho njalo zilabo ubukhona bazo.”

Ubenze baba ngumbuso labaphristi ukuba bakhonze uNkulunkulu wethu, njalo bazabusa emhlabeni.” Ngakhangela ngasengisizwa amazwi ezingilosi ezinengi, ezaziyizinkulungwane lezinkulungwane, lezinkulungwane ezilitshumi ziphindwe okuzinkulungwane ezilitshumi. Zazizingeleze isihlalo sobukhosi lezidalwa eziphilayo kanye labadala.

Emva kwalokhu ngakhangela, khonapho phambi kwami kwakulexuku elikhulukazi okungelamuntu owayengalibala, livela ezizweni zonke, lezizwaneni, lasebantwini kanye lasezindimini zonke, limi phambi kwesihlalo sobukhosi laphambi kweWundlu. Babegqoke izambatho ezimhlophe bephethe izingatsha zelala ngezandla zabo. Bamemeza ngelizwi elikhulu besithi: “Ukusindisa ngokukaNkulunkulu wethu, ohlezi esihlalweni sobukhosi, kanye lokweWundlu.” Izingilosi zonke zazimi zizingeleze isihlalo sobukhosi njalo zizingeleze abadala kanye lezidalwa ezine eziphilayo. Zathi mbo phansi ngobuso bazo phambi kwesihlalo sobukhosi zakhonza uNkulunkulu zisithi: “Ameni! Udumo lobukhosi lokuhlakanipha lokubongwa lokuhlonitshwa lamandla kanye lokuqina kakube kuNkulunkulu wethu nini lanini. Ameni!”

Ngakho-ke, “baphambi kwesihlalo sobukhosi sikaNkulunkulu bemkhonza emini lebusuku ethempelini lakhe; njalo yena ohlezi esihlalweni sobukhosi uzakwendlala ithente lakhe ngaphezu kwabo. Kabasoze balambe futhi; njalo kabasoze bome futhi. Ilanga kalisayikuhlaba phezu kwabo loba ukutshisa okuhangulayo. Ngoba iWundlu elingaphakathi kwesihlalo sobukhosi lizakuba ngumelusi wabo; lizabaholela emithonjeni yamanzi okuphila. UNkulunkulu uzazesula zonke izinyembezi emehlweni abo.”

Emva kwalokho ithempeli likaNkulunkulu lavulwa ezulwini, phakathi kwethempeli lakhe kwabonakala ibhokisi elingcwele lesivumelwano sakhe. Kwasekusiba lokuphazima kwemibane, lokundindizela, lokukhwaza kwezulu, lokuzamazama komhlaba kanye lesiqhotho esikhulu.

Kwaba lempi ezulwini. UMikhayeli lezingilosi zakhe balwa lomgobho, kwathi umgobho kanye lezingilosi zawo lawo walwa labo. Kodwa wawungelamandla kangako, njalo wona lezingilosi zawo balahlekelwa yindawo yabo ezulwini.

Ingilosi yasisithi kimi, “Loba ukuthi: ‘Babusisiwe labo abanxusiweyo edilini lomtshado weWundlu!’ ” Yengeza yathi, “La ngamazwi aqotho kaNkulunkulu.”

Ngabuya ngabona isihlalo sobukhosi esikhulu kanye lalowo owayehlezi kuso. Umhlaba lomkhathi kwabaleka phambi kwakhe, akwaze kwaba lendawo yakho.

Ngabuya ngabona izulu elitsha lomhlaba omutsha, ngoba izulu lakuqala lomhlaba wakuqala kwasekudlule, njalo ulwandle lwalungasekho. Ngabona iDolobho eliNgcwele, iJerusalema elitsha, lisehlela phansi liphuma ezulwini kuNkulunkulu lilungiswe njengomlobokazi ececele umkakhe. Ngezwa ilizwi elikhulu livela esihlalweni sobukhosi lisithi, “Khathesi ikhaya likaNkulunkulu selisebantwini, uzahlala labo. Bazakuba ngabantu bakhe, njalo uNkulunkulu yena uqobo uzakuba labo abe nguNkulunkulu wabo. Uzazesula zonke izinyembezi emehlweni abo. Akusayikuba khona futhi ukufa loba ukulila loba ukukhala loba ubuhlungu, ngoba umumo omdala wezinto usudlule.”

Lowo owayehlezi esihlalweni sobukhosi wathi, “Ngenza izinto zonke zibe zintsha!” Wabuya wathi, “Kulobe lokhu, ngoba amazwi la aqotho njalo aliqiniso.” Wasesithi kimi, “Sekwenzakele. Mina ngingu-Alfa lo-Omega, ukuQala lokuCina. Lowo owomileyo ngizamnathisa emthonjeni wamanzi okuphila kungekho mbadalo. Lowo onqobayo uzakudla ilifa lakho konke lokhu, njalo ngizakuba nguNkulunkulu wakhe yena abe yindodana yami. Kodwa amagwala, labangakholwayo, labaxhwalileyo, lababulali leziphingi, labathakathi, labakhonza izithombe labo bonke abaqamba amanga  —  indawo yabo izakuba sechibini lomlilo wesolufa ovuthayo. Lokhu yikufa kwesibili.” Enye yezingilosi eziyisikhombisa eyayilemiganu eyisikhombisa eyayigcwele izifo zokucina eziyisikhombisa yeza yathi kimi, “Woza, ngizakutshengisa umlobokazi, umkaWundlu.”

Yangithwala ngiseMoyeni yangisa entabeni enkulu ende, yangitshengisa iDolobho eliNgcwele, iJerusalema, lisehla liphuma ezulwini kuNkulunkulu. Lakhanyisa ngenkazimulo kaNkulunkulu, ukucwebezela kwalo kwakufana lokwelitshe eliligugu, njengejaspha, licwebezela njengelitshe elikhanyisayo. Lalilomduli omkhulu, ophakemeyo lamasango alitshumi lambili kanye lezingilosi ezilitshumi emasangweni. Emasangweni kwakulotshwe amabizo ezizwana ezilitshumi lambili zako-Israyeli. Kwakulamasango amathathu ngasempumalanga, lamathathu ngasenyakatho, lamathathu ngaseningizimu, kanye lamathathu ngasentshonalanga. Umduli wedolobho wawulezisekelo ezilitshumi lambili, njalo phezu kwazo kwakulamabizo abaphostoli beWundlu abalitshumi lambili.

Ingilosi eyakhuluma lami yayilomqwayi wegolide owokulinganisa idolobho, amasango alo lomduli walo. Idolobho lalakhiwe lalingana inxa zonke, lilide okungangobubanzi balo. Yalilinganisa idolobho ngomqwayi yathola lingamakhilomitha azi-2,200 ubude, njalo libanzi liphakeme okulingana lobude balo. Yalinganisa umduli walo, wawuyizingalo ezilikhulu lamatshumi amane lane ubuqatha bawo, ngesilinganiso sabantu esasisetshenziswa yingilosi. Umduli wawenziwe ngejaspha, idolobho lakhiwe ngegolide elicengeke njengengilazi. Izisekelo zemiduli yedolobho zaziceciswe ngezinhlobo zonke zamatshe aligugu. Isisekelo sakuqala sasiyijaspha, esesibili kuyisafire, esesithathu kuyikhalisedoni, esesine kuyiemaralidi, esesihlanu kuyisadonikisi, esesithupha kuyikhaneliyani, esesikhombisa kuyikhrisolithe, eseficamibili kuyibherili, eseficamunye kuyithophazi, esetshumi kuyikhrisophirase, esetshumi lanye kuyijasinti, esetshumi lambili kuyiamethisithi. Amasango alitshumi lambili ayengamatshe obuhlalu alitshumi lambili, isango ngalinye lenziwe ngelitshe elilodwa lobuhlalu. Umgwaqo omkhulu wedolobho wawuligolide elicengekileyo njengengilazi ebonisa okungale kwayo.

Kangibonanga thempeli edolobheni, ngoba iNkosi uNkulunkulu uSomandla leWundlu balithempeli lalo. Idolobho kalisweli langa loba inyanga yokukhanyisa kulo, ngoba inkazimulo kaNkulunkulu ilinika ukukhanya, leWundlu liyisibane salo. Izizwe zizahamba ekukhanyeni kwalo, lamakhosi omhlaba azaletha ubukhazikhazi bawo kulo. Akulasuku lapho amasango alo azake avalwe ngalo, ngoba akuyikuba lobusuku khona. Inkazimulo lodumo lwezizwe kuzalethwa kulo. Akulalutho olungcolileyo oluzake lungene kulo, loba ngubani owenza okulihlazo kumbe inkohliso, kodwa labo kuphela abalamabizo abo alotshwe encwadini yokuphila yeWundlu.

Ingilosi yasingitshengisa umfula wamanzi okuphila, acengekileyo kakhulu, egeleza evela esihlalweni sobukhosi sikaNkulunkulu leseWundlu esehla ephakathi komgwaqo omkhulu wedolobho. Eceleni ngalinye lomfula kwakulesihlahla sokuphila, sithela izithelo ezilitshumi lambili, sithela izithelo zaso nyanga zonke. Amahlamvu esihlahla leso ngawokwelapha izizwe. Akusoze kube lesiqalekiso futhi. Isihlalo sobukhosi sikaNkulunkulu leseWundlu zizakuba sedolobheni, njalo izinceku zakhe zizamkhonza. Zizabubona ubuso bakhe, lebizo lakhe lizakuba semabunzini azo. Akusayikuba lobusuku futhi. Kaziyikukuswela ukukhanya kwesibane loba okwelanga, ngoba iNkosi uNkulunkulu izazikhanyisela. Njalo zizabusa kuze kube nininini.

“Babusisiwe labo abagezisa izambatho zabo, ukuze babe lelungelo esihlahleni sokuphila, njalo bangene ngesango edolobheni.

UMoya lomlobokazi bathi, “Woza!” Ozwayo katsho athi, “Woza!” Loba ngubani owomileyo, keze; njalo loba ngubani ofisayo, kathathe isipho esingabhadalelwayo samanzi okuphila.