05 – Lagi

Na faia e le Atua le lagi ma le lalolagi i le amataga.

Ua faatutupuina foi e Ieova le Atua i le fanua o laau uma e matagofie i le vaai, e lelei foi pe a ‘aina; ma le laau o le ola i totonu o le faatoaga, ma le laau e iloa ai le lelei ma le leaga.

Ua fai lana miti; faauta foi, o le apefai ua faatuina i le eleele, ua oo lona iu i le lagi; faauta foi, o agelu a le Atua ua a‘ea‘e ma ifoifo ai.

Ua fefe ai o ia, ua faapea, O le mea matautia lava lenei, e le se mea ese lenei, na o le fale lava o le Atua, o le faitotoa lava lenei o le lagi.

Faauta, o ia Ieova lou Atua le lagi ma le lagi o lagi, o le lalolagi foi, ma mea uma lava o i ai.

Ia e silasila mai mai lou afioaga paia, mai le lagi, ma e faamanuia mai i lou nuu o Isaraelu, ma le laueleele ua e foaiina mai ia te i matou, e faapei ona e tauto ai i o matou tamā, o le nuu o tafe ai le suāsusu ma le meli.

Pe moni ea, e afio le Atua i le lalolagi? Faauta, o le lagi ma le lagi o lagi, e le ofi ai oe, e le atili ai ea ona ē le ofi i lenei fale ua ou faia?

Ia e faafofoga mai foi i le aioi a lau auauna, ma lou nuu o Isaraelu, pe a latou tatalo atu i lenei mea; ia e faafofoga mai foi mai le lagi, o le mea o loo e afio ai; ia e faafofoga mai, ma ia e faamagalo mai.

Ieova e, e ou le silisili ese, ma le malosi, ma le matagofie, ma le mamalu, ma le malualii; auā o ia te oe mea uma o i le lagi ma le lalolagi; Ieova e, e ou le malo, o faasilisili oe e silisili i mea uma lava.

O oe, na o oe lava o Ieova; na e faia le lagi o le lagi o lagi, ma ‘au uma o i ai, o le lalolagi ma mea uma o i ai, o le sami ma mea uma o i ai, ua e faaola foi ia te i latou uma; ua ifo foi ia te oe ‘au a le lagi.

O Ieova o i lona malumalu paia o ia; o Ieova o loo i le lagi lona nofoālii; e silasila mai ona fofoga, e tofotofo le fanau a tagata e ona laufofoga.

E te faailoa mai ia te au le ala o le ola; o i ou luma le fiafia e mālie ai; o i lou itu taumatau le olioli e faavavau.

O lenei, ua ou iloa e faaolaina e Ieova o le na ia faauuina; e tali mai o ia ia te ia ai lona lagi paia i le malosi o lona aao taumatau e ola ai.

Na ia faatogaina atu ia te oe ina ia ola, ona e foaiina mai ai lea ia te ia o le ola tulu‘i faavavau faavavau lava.

ina ia ola pea ia e faavavau; ia le iloa e ia le tuugamau.

O kariota o le Atua e lua sefulu o afe, e manomano lava; o loo ia te i latou le Alii, e pei ona i ai Sinai i le mea paia.

Ou te tofia lana fanau ia faavavau, o lona nofoālii foi e pei o aso o le lagi.

Auā e pei ona maualuga o le lagi i le lalolagi, e faapea ona tele o lona alofa i e matatau ia te ia.

Ua faatumauina e Ieova o lona nofoālii i le lagi; ua pule aoao foi lona malo.

E tusa ma le sau i Heremoni, ua totō ifo i luga o mauga o Siona; auā na poloai Ieova ia oo i ai lana faamanuia, o le ola lava lea e faavavau.

O le ala o le amiotonu, o i ai le ola; e leai foi se oti i ona magāala.

Ua faia e ia mea uma lava e matagofie i o latou lava tausaga; ua tuuina foi e ia le manatu i le lalolagi i o latou loto; a e le mailoa e le tagata le galuega ua faia e le Atua mai le amataga e oo i le gataaga.

O le tausaga na oti ai le tupu o Usia, na a‘u iloa ai le Alii o afio i le nofoālii silisili ma le maualuga, o ona pito ofu foi na tumu ai le malumalu. Sa tutū serafi e latalata ane, sa tofu i latou ma apaau e ono, o apaau e lua na ia ufitia ai ona mata, o le lua na ia ufitia ai ona vae, o le lua foi na ia lele a‘i. Sa valaau foi le tasi i le tasi, ua faapea ane, E paia, e paia, e paia Ieova o ‘au; ua tumu le lalolagi uma i lona mamalu.

E leai se mea e gata mai ai ona tele o lona malo ma le filemu o lona malo i le nofoālii o Tavita ma lona malo, e faatumauina, ma faamausali i le faamasinoga ma le amiotonu, e afua mai i ia ona po e oo i le faavavau; e faia lea mea i le maelega o Ieova o ‘au.

E nofo faatasi le luko ma le tamai mamoe, e taoto foi le nameri faatasi ma le tamai ‘oti; e faatasi foi le tamai povi ma le leona taanoa atoa ma le manu peti, e ta‘ita‘iina foi i latou e le tama itiiti.

E faaumatia e ia le oti e faavavau; e soloiesea foi e le Alii o Ieova o loimata i mata uma lava; e faateaeseina foi e ia le gao o lona nuu i le lalolagi uma lava; auā ua fetalai mai ai Ieova.

Auā o loo faapea ona fetalai mai o le ua Maualuga ma ua Silisili, o lē afio e faavavau, e paia lona suafa, Ou te nofo i le mea maualuga ma le paia, ma te nonofo foi ma le ua momomo ma ua maulalo lona loto, e faamafanafana i e ua loto maulalo, ma faamafanafanaina loto o e ua loto momomo.

E le toe faia le la mou malamalama i le ao; e le faamalamalama foi ia te oe le masina i lona susulu mai; a e faia Ieova mou malamalama e faavavau, e fai foi lou Atua mou matagofie. E le toe goto lou la, e le toe mavae atu foi lou masina; auā e faia Ieova mou malamalama e faavavau; e uma foi aso o lou faanoanoa. O lou nuu foi e amiotonu i latou uma lava; e fai mo latou le nuu e faavavau; o le tātupu o la‘u faatoaga, o le galuega a o‘u lima, e fai mo‘u viiga.

Auā faauta mai, ou te faia le lagi fou ma le lalolagi fou; e le toe manatua mea na muamua, e le alu ae foi i le loto.

O loo faapea ona fetalai mai o Ieova, O le lagi o lo‘u nofoa lea, o le lalolagi o le mea e tu ai ou vae lea; o ifea le fale tou te faia mo a‘u? o ifea foi le mea ou te malolo ai?

Auā e pei ona tumau i o‘u luma o le lagi fou ma le lalolagi fou ou te faia, ua fetalai mai ai Ieova, e faapea ona tumau o a outou fanau ma lo outou igoa.

O loo faapea ona fetalai mai o Ieova, Afai e mafai ona fuatia le lagi i lugā, afai foi e mafai ona suesueina o faavae o le lalolagi i lalō, ona ou lafoaiina lea o le fanau uma a Isaraelu ona o mea uma ua latou faia, ua fetalai mai ai Ieova.

O i luga foi o le va i lagi i luga o latou ulu, ua i ai le faatusa o le nofoālii, ua tino mai e pei o le maa safaira; o i luga foi o le faatusa o le nofoālii le faatusa ua tino mai e pei e le tagata i ona lava luga. Na ou iloa foi pei o le tino o le ‘apa pupula, ua tino mai e pei o le afi ua faataaliolio i totonu, ua tino mai i lona sulugatiti e oo ae i luga; ua tino mai foi i lona sulugatiti e oo ifo i lalo, na ou iloa ua tino mai e pei o le afi, na i ai foi le pupula ua faataaliolioina ai. Pei o le tino mai o le nuanua e i le ao i le aso ua, e faapea ona tino mai o lona pupula o faataaliolioina ai. O lona tino mai lea o le faatusa o le pupula o Ieova. Na ou iloa ai, ona ou faapaū fao ai lea, ona ou lagona lea le siufofoga o le tasi ua fetalai mai.

O le auvai o le vaitafe i lea itu ma lea itu, e tutupu ai laau uma e ‘aina, e le mamae o latou lau, e le uma lava o latou fua; taitasi le masina ma lona fuata, auā e tafe atu o latou vai ai le malumalu; e fai foi o latou fua ma mea e ‘ai, ma o latou lau e fai ma vailaau.

O ona po o ia tupu e faatuina ai e le Atua o le lagi o le malo e le faaumatia e faavavau; o lea malo foi, e le tuuina atu ia i se tasi nuu, na te tu‘imomomoina ma faaumatia ia malo uma lava, a o ia e tumau lava e faavavau;

Na ou iloa i faaaliga i le po, faauta foi, ua afio mai i ao o le lagi Lē e pei o le Atalii o le tagata, ua oo foi ia i Lē ua mai anamua ona aso, ua latou momoli ia te ia i ona luma. Ua foaiina atu ia te ia le pule, ma le viiga, ma le malo, ina ia auauna ia te ia o nuu uma, ma atu nuu, ma gagana eseese; o lana pule o le pule e faavavau lea, e le mavae atu ia, o lona malo foi e le faaumatia.

A e maua le malo e le au paia a lē Silisili ese, e fai foi mo i latou le malo e faavavau, e faavavau lava.

O le malo, ma le pule, atoa ma le mamalu o le malo i lalo ifo o le lagi uma, e tuuina atu ia i le nuu o le au paia a lē Silisili ese, o lona malo, o le malo e faavavau lea, e auauna ma usiusitai ia te ia o pule uma lava.

E toatele foi o e momoe i le efuefu o le eleele latou te ala mai, o isi i le ola e faavavau, a o isi i le faalumaina ma le inosia e faavavau. O e popoto foi, e fepulafi i latou faapei o le pupula o le lagi; o i latou foi ua faaliliu ai tagata e toatele ia amiotonu, e pei o fetu i latou e faavavau faavavau lava.

Ina salamo ia outou; auā ua latalata mai le malo o le lagi.

O i lona aao lana asu, na te faamamāina ai lana faaputugāsaito; na te faapotopotoina foi ana saito i le fale saito, a e susunuina le otaota o saito i le afi e le matineia.

Talu mai ai na afua ona tala‘i atu e Iesu, ua faapea atu, Ina salamo ia outou; auā ua latalata mai le malo o le lagi.

Amuia ē loto maulalo; auā e o latou le malo o le lagi.

Amuia ē sauaina ona o le amiotonu; auā e o latou le malo o le lagi. Amuia outou pe a latou upu leaga, ma faasaua ia te outou, ma latou tuuaiina pepelo outou i mea leaga uma ona o a‘u. Ia outou olioli ma fiafia lava; auā o i le lagi lo outou taui e tele; auā na faapea ona latou faasaua i perofeta e na muamua ia te outou.

O lenei, o se na te tatalaina se poloaiga e tasi e aupito itiiti o nei poloaiga, ma faapea ona a‘oa‘o i tagata, e ta‘ua ia e aupito itiiti i le malo o le lagi; a o se anaana ma a‘oa‘o ai, e ta‘ua ia e sili i le malo o le lagi. Auā ou te fai atu ia te outou, a le sili la outou amiotonu i la le au tusiupu ma le au faresaio, e le sao atu lava outou i le malo o le lagi.

O lenei, ia faapea outou ona tatalo, Lo matou Tamā e, o i le lagi, ia paia lou suafa. Ia oo mai lou malo. Ia faia lou finagalo i le lalolagi, e pei ona faia i le lagi.

Aua foi e te ta‘ita‘iina i matou i le tofotofoga; a ia e laveai ia i matou ai le leaga. Auā e ou le malo, ma le mana, atoa ma le viiga, e faavavau lava, Amene.

Aua tou te tolo‘a‘i oa mo outou i le lalolagi, o i ai le mogamoga ma le ele e faaumatia ai; o i ai foi tagata gaoi e eli atu, ma gaoi ai. A ia outou tolo‘a‘i oa mo outou i le lagi, e le o i ai se mogamoga, po o se ele e faaumatia ai; e le o i ai foi tagata gaoi e eli atu, ma gaoi ai. Auā o le mea ua i ai lo outou oa, e i ai atoa foi ma o outou loto.

Ia outou ulu atu i le faitotoa va apiapi; auā e va tele le faitotoa, e lautele foi le ala e tau atu i le malaia, e toatele foi i latou o e ui atu ai. Auā e va apiapi le faitotoa, e lauitiiti foi le ala e tau atu i le ola, e toaitiiti foi i latou o e maua.

E le sao atu i le malo o le lagi i latou uma o e fai mai ia te au, Le Alii e, le Alii e; na o le na te faia le finagalo o lo‘u Tamā o i le lagi.

A outou o, ia outou tala‘i atu, ia faapea atu, Ua latalata mai le malo o le lagi.

E moni, ou te fai atu ia te outou, e lei tu mai i e na fananau i fafine sē sili ia Ioane le papatiso; a o lē aupito itiiti i le malo o le lagi, e sili lea ia te ia.

Ona o mai ai lea o ona soo, ua faapea mai ia te ia, Se a le mea ua e fetalai atu ai ia te i latou i faataoto? Ona tali atu ai lea o ia, ua faapea atu ia te i latou, Ua foaiina atu ia te outou ia outou iloa mea lilo a le malo o le lagi, a ua le foaiina atu ia te i latou.

Ua sauni atu e ia le tasi faataoto ia te i latou, ua faapea atu, E tusa le malo o le lagi ma le fua o le sinapi, na ave e le tasi tagata, ma totō i lona fanua; e itiiti lava ia i fua o laau uma; pe a uma ona tupu, e sili ia i laau afu, e iu ina fai ma laau tele, e o mai ai manu felelei, ma latou momoe i ona la.

Ona pupula ai lea o e amiotonu e pei o le la i le malo o lo latou Tamā. O le ua i ai taliga e faalogo ai, ina faalogo mai ia o ia.

E tusa foi le malo o le lagi i le oa ua natia i le fanua; ua iloa e le tasi, ona nanā ai lea e ia; ua alu foi ma le fiafia, ma faatau atu ana mea uma, i le faatau a‘i mai lea fanua.

E tusa foi le malo o le lagi ma le tagata faatauoa, ua sailiili penina lelei; ua iloa e ia le tasi penina tau tele, ona alu ai lea o ia, ua faatau atu ana mea uma, i le faatau a‘i mai.

E tusa foi le malo o le lagi ma le upega ua lafo i le vai, ua maua ai i‘a eseese uma. Ua tumu, ona latou toso ae ai lea i le matafaga, ua nonofo ma fafao i‘a lelei i ola, a o i‘a leaga ua lafoai. E faapea foi i le gataaga o le lalolagi; e o atu le au agelu e vavae ese i e amio leaga ma e amiotonu,

Ona fetalai atu lea o ia ia te i latou, O lenei, o tusiupu uma o e ua a‘oa‘oina i le malo o le lagi, e tusa i latou ma le matai o le aiga, ua au mai mea fou ma mea tuai mai lona fale oloa.

ma ua latou aioi mai ia te ia, tau lava ina latou papai i le tuupao o lona ofu; ua faamaloloina foi o i latou uma e na papai mai i ai.

Ou te avatu foi ia te oe ki o le malo o le lagi; o se mea foi e te fusifusia i le lalolagi, e fusifusia foi lea i le lagi; o se mea foi e te tālā i le lalolagi, e tatalaina foi lea i le lagi.

ua faapea atu, E moni, ou te fai atu ia te outou, a le liua outou, ma avea ia pei o tama iti, tou te le sao lava i le malo o le lagi.

Ia outou, ne‘i tou faaleaogaina se tasi o i latou nei e faatauvaa; auā ou te fai atu ia te outou, o a latou agelu i le lagi e le aunoa ona latou vaavaai i fofoga o lo‘u Tamā o i le lagi.

E moni, ou te fai atu ia te outou, O mea uma tou te fusifusia i le lalolagi, e fusifusia ia i le lagi; o mea uma foi tou te tālā i le lalolagi, e tatalaina ia i le lagi.

A ua fetalai atu Iesu, Ina tuu mai ia o tama iti e o mai ia te au, aua le vaoia i latou; auā e faapei o i latou nei o e o i le malo o le lagi.

Faauta foi, ua sau le tasi tagata, ua faapea mai ia te ia, Le a‘oa‘o lelei e, se a se mea lelei ou te faia ou te maua ai le ola faavavau? Ona fetalai atu ai lea o ia ia te ia, Se a le mea e te ta‘ulelei mai ai a‘u? e leai se tasi e lelei, ua na o le toatasi, o le Atua lea. Afai e te fia oo i le ola, ia e tausi i poloaiga. Ua fai mai o ia ia te ia, Po o le fea? Ona faapea atu ai lea o Iesu, Aua e te fasioti tagata; aua e te mulilua; aua e te gaoi; aua e te molimau pepelo; ia e ava i lou tamā ma lou tinā; ma ia e alofa atu i lē lua te tuaoi, ia pei o oe lava ia te oe. Ona fai mai ai lea o le taulealea ia te ia, Ua ou tausia na mea uma talu ina ou itiiti, se a se mea o toe ou te lei faia? Ua tali atu Iesu ia te ia, Afai e te manao ina ia atoatoa ona lelei o lau amio ia e alu ma e faatau atu au mea, i le e avatu ai i e matitiva; ona ia te oe lea o le faulaigāoloa i le lagi, i le e sau ma mulimuli mai ia te au. Ua faalogo le taulealea i lea upu, ona alu ese ai lea o ia ma le tiga, auā e tele lava ana mea.

Ona fetalai atu ai lea o Iesu i ona soo, E moni, ou te fai atu ia te outou, e faigata ona sao atu o le mauoa i le malo o le lagi. Ou te fai atu foi ia te outou, e faigofie ona ui atu o se kamela i le pu o le au, a e faigata ona sao o le mauoa i le malo o le Atua.

Ona fetalai atu ai lea o Iesu ia te i latou, E moni, ou te fai atu ia te outou, o outou ua mulimuli mai ia te au, pe a tietie le Atalii o le tagata i lona nofoālii mamalu i le toefuataiga, tou te tietie ai foi i nofoālii e sefulu ma le lua, e faamasino ai i itu aiga o Isaraelu e sefulu ma le lua. Ai se tasi ua ia tuua o fale, po o uso, po o tuafāfine, po o le tamā, po o le tinā, po o le avā, po o le fanau, p o fanua ona o lo‘u igoa, e maua e ia e taisautuaselau, e fai foi mona tofi le ola faavavau.

E tusa le malo o le lagi ma le tasi tupu ua na faia le tausamaaga o lona atalii; ua aauina atu e ia ana auauna e fai atu i e na tala‘iina ia o mai i le tausamaaga; a ua latou le mafafai ina o mai.

Auā a oo i le toe tu latou te le fai avā, pe nofo tane, a e latou te pei o agelu a le Atua o i le lagi. A o le toe tutū mai o e ua oti, tou te lei faitau ai ea le afioga a le Atua ia te outou, ua faapea mai, O a‘u nei o le Atua o Aperaamo, o le Atua foi o Isaako, o le Atua foi o Iakopo? o le Atua e le se Atua ia o e ua oti, a o e ola.

Ona iloa ai lea i le lagi o le faailoga o le Atalii o le tagata; ona taufaitagitu‘i ai lea o itu aiga uma o le lalolagi; latou te iloa atu foi le Atalii o le tagata ua sau i ao o le lagi ma le mana ma le mamalu tele.

E mavae atu le lagi ma le lalolagi, a o a‘u upu e le mavae atu lava ia.

O ia ona po e tusa ai le malo o le lagi ma taupou e toasefulu, o e na ave a latou lamepa, ma latou o atu e faafetaiai i le faatoafaiavā. Ua popoto le toalima o i latou, a e vālea le toalima. O e vālea ua ave a latou lamepa, a e lei avea ma ni suāuu. A o e popoto ua ave ni suāuu i a latou fagu faatasi ma a latou lamepa.

Ona fai atu ai lea o lona alii ia te ia, Ua lelei ia, le auauna lelei e, ma le faamaoni, ua e faamaoni i nai mea itiiti, ou te tofia oe e pule i mea e tele; ina ulufale mai ia i le fiafia o lou alii.

Ona fai atu ai lea o le Tupu i e o i lona itu taumatau, O mai ia, o outou ua faamanuiaina e lo‘u Tamā, ia fai mo outou tofi le malo ua saunia mo outou a o lei faavaeina le lalolagi;

Ona o atu ai lea o i latou nā i le sala e faavavau; a o e amiotonu e o atu i le ola e faavavau.

Ona maliu ane ai lea o Iesu, ua fetalai atu ia te i latou, ua faapea atu, Ua tuuina mai ia te au le pule uma lava i le lagi ma le lalolagi.

A ua silafia e Iesu, ona tiga ai lea o lona finagalo, ua na fetalai atu foi ia te i latou, Ina tuu mai ia o tama iti o e mai ia te au; aua le vavao ia te i latou; auā e faapei o i latou nei o e o i le malo o le Atua. E moni, ou te fai atu ia te outou, Ai se le talia le malo o le Atua faapei o se tama itiiti, e le sao lava ia i ai.

Ua maliu ane ia i le ala, ona momo‘e mai ai lea o le tasi, ua tootuli ia te ia, ma fesili mai ia te ia, Le a‘oa‘o lelei e, se a se mea ou te faia ina ia ou maua ai le ola e faavavau? A ua fetalai atu Iesu ia te ia, Se a le mea e te ta‘ua mai ai a‘u ua lelei? e leai se tasi e lelei, na o le toatasi lava, o le Atua lea. Ua e iloa tulafono, Aua e te mulilua; aua e te fasioti tagata; aua e te gaoi; aua e te molimau pepelo; aua e te agaleaga; ia e ava i lou tamā ma lou tinā. Ona tali mai lea o ia, ua faapea mai ia te ia, Le a‘oa‘o e, ua ou tausia na mea uma, talu ina ou itiiti. Ua silasila atu Iesu ia te ia, ua alofa atu ia te ia, ua fetalai atu foi ia te ia, E tasi le mea e le o ia te oe. Ina alu ia, faatau atu au mea uma, ma avatu i e ua matitiva, ona e maua lea o le oa i le lagi; i le ē sau ai, ma ave le satauro, a e mulimuli mai ia te au. Ona faanoanoa lea o ia ona o lea upu, ua alu ese foi ma le tiga, auā ua tele ana oloa.

auā pe a latou toe tutū mai i e ua oti, latou te le fai avā pe nofo tane; a e peitai latou te faapei o agelu o i le lagi. A o e ua oti, ma lo latou toe tu, ua outou le faitau ai ea i le tusi a Mose, i le laau talatala, na fetalai mai le Atua ia te ia, ua faapea, O a‘u o le Atua o Aperaamo, o le Atua foi o Isaako, o le Atua foi o Iakopo?

Ua silasila atu ia i ona soo, ma fetalai atu, Amuia outou e matitiva; auā e o outou le malo o le Atua. Amuia outou e fia aai nei; auā e maoona outou. Amuia outou e tagi nei; aua e featani outou. Amuia outou pe a itagia outou e tagata, pe a faateaeseina foi outou, ma faaleagaina e i latou, ma lafoaiina lo outou igoa, pei o se mea leaga, ona o le Atalii o le tagata. Ia outou olioli i lea aso, ma ia outou osooso ma le fiafia; auā faauta, o i le lagi lo outou taui ua tele; auā sa faapea ona fai e o latou tamā i perofeta.

Ona fetalai atu lea o ia, Ua foaiina atu ia te outou ina ia outou iloa mea lilo a le malo o le Atua; a ua fai atu i nisi i faataoto; ina ia latou le vaai i lo latou vaai, ina ia le lagona foi i lo latou faalogo.

A e peitai aua tou te olioli i lenei mea, ina ua usiusitai agaga ia te outou; na o lenei tou te olioli ai, ina ua tusia o outou igoa i le lagi.

Faauta foi, ua tulai le tasi a‘oa‘o tulafono, ma tofotofo ia te ia, ua faapea mai, Le a‘oa‘o e, se a se mea ou te faia ina ia ou maua ai le ola e faavavau? Ua fetalai atu ia ia te ia, O le a ea ua tusia i le tulafono? O le a lau faitau? Ua tali mai o ia, ua faapea mai, E te alofa atu i le Alii lou Atua ma lou loto atoa, ma lou agaga atoa, ma lou malosi atoa, ma lou manatu atoa; e te alofa atu foi i lē lua te tuaoi, ia pei o oe lava ia te oe. Ona faapea atu lea o ia ia te ia, Ua tonu lau tali; ia e faapea ona fai, e te ola ai.

A ia outou saili le malo o le Atua; ona faaopoopoina ai lea o ia mea uma ia te outou. Aua e te fefe oe le lafu mamoe itiiti e; auā ua finagalo lo outou Tamā e foai mai le malo ia te outou. Ia outou faatau atu i a outou mea, tou te avatu ai e fai ma mea alofa; ia fai outou ni a outou taga e anagata, o le oa i le lagi e le uma lava, e le tāitāi ane i ai se gaoi, e le atia foi e se mogamoga. Auā o le mea o i ai lo outou oa, e i ai atoa foi ma o outou loto.

Ou te fai atu ia te outou, e faapea foi ona tele o le olioli i le lagi i le tagata agasala e toatasi e salamo, a e itiiti i e amiotonu e toaivagafulu ma le toaiva e le tusa i ai le salamo.

Ona fai ane lea o Aperaamo, Lo‘u atalii e, ia e manatu, na e maua au mea lelei i lou olaga, na maua foi e Lasalo o mea leaga; a o lenei, ua faaolioliina ia; a ua puapuagaina oe. E le gata i nei mea uma, a ua tumau le vanu tele i lo tatou va; o le mea lea e le masao ai o e ua iinei ua fia o atu ia te outou; e le masao mai foi o e ua iina ia te i matou nei.

A o Iesu, ua valaau atu o ia ia te i latou, ua faapea atu, Ina tuu mai ia o tama iti e o mai ia te au, a e aua tou te vavao ia te i latou; auā e faapei o i latou nei o e o i le malo o le Atua. E moni, ou te fai atu ia te outou, Ai se le tali i le malo o le Atua e pei o se tama itiiti, e le sao lava ia i ai.

Ua fesili mai foi ia te ia le tasi alii, ua faapea mai, Le a‘oa‘o lelei e, se a le mea ou te faia, ou te maua ai le ola e faavavau? A ua fetalai atu Iesu ia te ia, Se a le mea e te ta‘ulelei mai ai a‘u? e leai sē lelei, na o le toatasi, o le Atua lea. Ua e iloa poloaiga, Aua e te mulilua; aua e te fasioti; aua e te gaoi; aua e te molimau pepelo; ia e ava i lou tamā ma lou tinā. Ona fai mai lea o ia, Ua ou tausia ia mea uma talu lava ina ou itiiti. Ua faafofoga Iesu i ia upu, ona fetalai atu lea ia te ia, Ua toe o le mea e tasi e te lei maua; ia e faatau atu i au mea uma, ma ia e tufatufaina i e matitiva, ona ia te oe lea o le faulaigāoloa i le lagi; i le e sau, ma mulimuli mai ia te au. Ua faalogo o ia i na upu, ona tiga tele ai lea o ia; auā o le mauoa tele lava ia. Ua silafia e Iesu o ia ua tiga tele ona fetalai atu lea o ia, O le mea faigata nauā ona sao atu o e mauoa i le malo o le Atua! E faigofie ona ui atu o le kamela i le pu o le au, a e faigata ona sao atu o le mauoa i le malo o le Atua. O e na faalogo i ai ua fai mai, Afai o lea, o ai se tasi e mafai ona faaolaina? Ua fetalai atu ia, O mea e le mafaia e tagata, e mafaia e le Atua.

Ona fetalai atu lea o ia ia te i latou, E moni, ou te fai atu ia te outou, Ai se tagata ua tuua e ia le fale, po o mātua, po o uso, po o le avā, po o le fanau, ona o le malo o le Atua, e maua e ia o mea sautualasi i nei ona po, o le ola foi e faavavau i le olaga atali.

Ona fai mai lea o ia ia Iesu, Le Alii e, ia e manatua mai a‘u, pe a e afio mai i lou malo. Ona fetalai atu ai lea o Iesu ia te ia, E moni, ou te fai atu ia te oe, o le asō ta te faatasi ai ma oe i parataiso.

Ua fetalai atu foi o ia ia te ia, E moni, e moni, ou te fai atu ia te outou, e mulimuli ane e vaaia e outou le lagi ua avanoa; o agelu foi a le Atua e o ae ma ifoifo i luga o le Atalii o le tagata.

Ua tali atu Iesu, ua faapea atu ia te ia, E moni, e moni, ou te fai atu ia te oe, a le toe fanau le tagata, e le mafai ona iloa e ia o le malo o le Atua. Ua fai mai Nikotemo ia te ia, E mafai ea faapefea ona fanau o le tagata ua toeaina? E mafai ea ona toe ofi i le manava o lona tinā, e fanau mai ai? Ua tali atu Iesu, E moni, e moni, ou te fai atu ia te oe, afai e le fanau se tasi i le vai ma le Agaga, e le mafai ona sao o ia i le malo o le Atua. O le ua fanau mai i la le tino, o le tino lea; o le ua fanau mai foi i la le Agaga, o le agaga lea.

Afai ua ou fai atu ia te outou i mea o i le lalolagi, a e le talitonu mai outou, pe faapefea ona outou talitonu pe a a‘u fai atu ia te outou i mea o i le lagi? E leai foi se tasi na alu ae i le lagi, na o ia na alu ifo mai le lagi, o le Atalii lea o le tagata o loo i le lagi. E pei ona siitia i luga e Mose o le gata i le vao, e ao ina faapea ona siitia i luga o le Atalii o le tagata; ina ia le fano le tasi e faatuatua ia te ia, a ia maua le ola e faavavau. Auā ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau.

O lē faatuatua i le Alo, ua ia te ia le ola e faavavau; a o le le faatuatua i le Alo e le iloa e ia le ola, a o le toasa o le Atua o loo tumau lava i ona luga.

A o sē inu i le vai ou te avatu ia te ia, e le toe fia inu ia e faavavau; a o le vai ou te avatu ia te ia, e avea i totonu ia te ia o le vaipuna, e puna i luga i le ola e faavavau.

E moni, e moni, ou te fai atu ia te outou, o lē faalogo mai i la‘u upu, ma talitonu ia te ia na na auina mai a‘u, ua ia te ia le ola e faavavau: e le oo foi ina faasalaina o ia, a ua oo atu ia i le ola, sa i le oti,

Aua tou te ofo i lenei mea, auā e oo mai le aso e faalogo ai i lona leo o i latou uma ua i tuugamau, ma latou o mai ai; o e na amio lelei, e toe tutū i le ola; a o e na amio leaga, e toe tutū i le faasala.

E suesue outou i Tusi, auā ua outou manatu tou te maua ai le ola e faavavau; o Tusi foi ia o loo molimau ia te au;

Aua tou te galulue i mea e ‘ai e pala, a o mea e ‘ai e tumau i le ola e faavavau, e foaiina atu ia te outou e le Atalii o le tagata; auā ua faaalitinoina mai o ia e le Atua le Tamā.

O lenei foi le finagalo o le ua auina mai a‘u, ia maua le ola e faavavau e i latou uma o e vaai i le Atalii, ma faatuatua ia te ia, ou te toe faatuina foi i latou i le aso gataaga.

E moni, e moni, ou te fai atu ia te outou, o lē faatuatua mai ia te au, ua ia te ia le ola e faavavau.

O a‘u le areto ola na alu ifo mai le lagi; pe a ‘ai se tasi i lenei areto ona ola ai lea o ia e faavavau. O le areto foi ou te avatua, o lo‘u tino lea, ou te avatua ma ola o le lalolagi.

O lē ‘ai i lo‘u tino ma inu i lo‘u toto, ua ia te ia le ola e faavavau; ou te toe faatuina foi o ia i le aso gataaga;

Ona tali mai lea o Simona Peteru ia te ia, Le Alii e, a matou o ea ia te ia? o ia te oe upu o le ola e faavavau.

ou te avatu foi le ola e faavavau ia te i latou; latou te le fano lava e oo i le faavavau, e le mafai lava e se tasi ona fao ia te i latou ai lo‘u lima.

Ua fetalai atu Iesu ia te ia, O a‘u nei o le toe tu ma le ola; o lē faatuatua mai ia te au, e ui lava ina oti, a e ola lava ia. O tagata ola uma o e faatuatua mai ia te au, e le oti lava e oo i le faavavau; po ua e talitonu mai ea i lena mea? Ona faapea mai lea o ia ia te ia, Ioe, le Alii e, ua ou talitonu lava, o oe le Keriso le Alo o le Atua, o lē maliu mai i le lalolagi.

O lē faapelepele i lona ola, e faamāumau e ia i ai; a o lē ‘ino‘ino i lona ola i lenei lalolagi, e leoleo ai e ia e oo i le ola faavavau.

E tele mea e nonofo ai i le maota o lo‘u Tamā; ana leai, po ua ou fai atu ia te outou; ou te alu e sauni se mea e nonofo ai outou. Afai foi ou te alu ma sauni se mea e nonofo ai outou, ou te toe sau, ou te talia foi outou ia faatasi ma a‘u; ina ia i ai outou i le mea ou te i ai a‘u.

Ua fetalai atu ia mea e Iesu, ona tepa ae le o ona fofoga i le lagi, ua faapea atu, Lo‘u Tamā e, ua oo mai le aso. Tuu mai ia le viiga i lou Atalii, ina ia tuu atu foi e lou Atalii le viiga ia te oe. Auā ua e foai mai ia te ia le pule i tagata uma lava, ina ia avatu e ia le ola e faavavau ia te i latou uma lava na e foaiina mai ia te ia. O le ola e faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lea.

Ua tali atu Iesu, E le mai le lalolagi nei lo‘u malo; afai ana mai le lalolagi nei lo‘u malo, po ua tau a‘u auauna, ina ne‘i tuuina atu a‘u ia Iutaia; a o lenei, e le mai iinei lo‘u malo.

O le lagi o lo‘u nofoālii lea, o le lalolagi foi o le mea e tu ai o‘u vae lea; o loo faapea mai le Alii, pe faapefea se fale tou te faia mo a‘u? po o ifea se mea ou te nofo ai?

Ua faalogo tagata o nuu ese, ona olioli ai lea, ma vivii atu i le afioga a le Alii; ua faatuatua foi i latou uma lava e ua saunia i le ola e faavavau.

ua faamalosi i loto o le au soo, ma apoapoai atu ia tumau i le faatuatua; ua faapea atu foi, O puapuaga e tele e tatau ona tatou sao atu ai i le malo o le Atua.

ua tala‘i le malo o le Atua, ma a‘oa‘o atu i mea a le Alii o Iesu Keriso ma le faamalosi lava, e lei vaoia.

E tuuina atu foi le ola e faavavau i e tumau pea i galuega lelei, ua latou saili ai le viiga, ma le mamalu, ma le le iu vale;

O lenei, e pei ona malo o le agasala e oo i le oti, faapea foi ona malo o le alofa tunoa e le amiotonu e oo i le ola e faavavau, i lo tatou Alii o Iesu Keriso.

A o lenei, ua tuusaunoa outou nai le agasala, ma ua fai ma auauna a le Atua, ua ia te outou ni a outou fua e oo ai i le faapaiaina o lona uiga foi o le ola e faavavau. Auā o le oti, o le totogi lea o le agasala; a o le ola e faavavau, o le mea foaifuaina mai lea e le Atua, i lo tatou Alii o Keriso Iesu.

auā e faaolaina i latou uma o e valaau i le suafa o le Alii.

A e pei ona tusia, O mea e lei vaaia e mata, e lei lagona foi e taliga, e lei oo foi i le loto o se tagata, o mea ia ua saunia e le Atua mo i latou o e alofa ia te ia.

E faapea foi le toe tutū mai o e ua oti; eluluina ma le pala, e toe faatuina mai ma le le pala; e luluina ma le matagā, e toe faatuina mai ma le matagofie; e luluina ma le vaivai, e toe faatuina mai ma le malosi; e luluina le tino faaletino, e toe faatuina mai o le tino faaleagaga; e i ai le tino faaletino, e i ai foi le tino faaleagaga. E faapea foi ona tusia, Na faia Atamu le uluai tagata ma tagata ola; a o le Atamu mulimuli, o le Agaga faaola o ia. A e peitai e le muamua le faaleagaga, a o le faaletino; ona mulimuli ai lea o le faaleagaga. E faaleeleele le uluai tagata, na fua mai i le eleele; a o le tagata mulimuli, o le Alii lea mai le lagi. Pei o lē faaleeleele, e faapea lava o e faaleeleele; pei o lē faalelagi, e faapea lava o e faalelagi. Faapei ona foliga o i tatou i lē faaleeleele, e faapea lava ona foliga o i tatou i lē faalelagi.

Le au uso e, o la‘u upu lenei, e le mafaia ona avea o le malo o le Atua ma tofi o i latou ua i ai tino aano ma toto; e le fai foi le ola pea ma tofi o le iu vale. Faauta mai, ou te ta‘u atu ia te outou le mea lilo; e le momoe i tatou uma, a e liua i tatou uma, e faafuasei lava, o le emo o le mata, pe a ilia le pu faauma; auā e ilia lava, e toe tutū mai ai e ua oti ma le ola pea, e liua foi i tatou. Auā e tatau ona ofu o lenei tino iu vale i le tino ola pea, ia ofu foi lenei tino oti i le tino le oti lava. Pe a ofu foi lenei tino iu vale i le tino ola pea, a ofu foi lenei tino oti i le tino le oti lava, ona taunuu ai lea o le upu ua tusia. Ua faaumatia le oti i le manumalo. Le oti e, o fea o i ai lou tui? Le tuugamau e, o fea o i ai lou mauumalo? O le tui o le oti, o le agasala lea, o le malosi foi o le agasala o le tulafono lea;

Auā o lo matou puapuaga mamasagia ma le vave mavae, e tupu mai ai mo i matou le manuia mamafa e matuā silisili ese lava ma le faavavau; o loo matou le manatunatu i mea ua vaaia, a o mea e le vaaia; auā o mea ua vaaia e gata mai ia, a o mea e le vaaia e faavavau ia.

Auā ua matou iloa afai e lepetia lo matou fale apitaga faalelalolagi, ua ia te i matou le fale mai le Atua, o le fale e lei faia e lima, e faavavau i le lagi. Auā foi ua matou feoi i lenei fale, o loo naunau tele i le fia faaofuina i lo matou fale mai le lagi;

ua matou loto tetele ma ua sili lo matou manao ia o ese i matou i le tino, a ia nonofo i matou ma le Alii.

Ua ou iloa le tasi tagata o Keriso, ua tasi le sefulu ma le fa o tausaga talu ona segia o ia i le lagi tua tolu, (ou te le ilea pe na i le tino, ou te le iloa pe lei i le tino; ua silafia le Atua.) Ua ou iloa foi lena tagata, (ou te le iloa pe na i le tino o ia, pe lei i le tino; ua silafia le Atua.) Na segia o ia i parataiso, ma na faalogo i upu e le mata‘uta‘ua, e le tatau foi i se tagata ona tautala i ai.

Aua ne‘i faaseseina outou, e le ulagia le Atua auā o le mea e luluina e le tagata, o le mea lava lea e seleseleina mai ai e ia; o sē lulu i la lona tino, e selesele mai ai e ia i la le tino le mea e pala; a o sē lulu i la le Agaga, e selesele mai ai e ia i la le Agaga le ola faavavau.

Ia faafetaia le Atua, o le Tamā o lo tatou Alii o Iesu Keriso, o le ua faamanuia mai ia i tatou i mea uma lava e manuia ai i la le Agaga, i mea o i le lagi, ona o Keriso;

O lenei, e le toe tagata ese outou, po o e ua āumau, a ua nuu faatasi ma le au paia, o le aiga foi o le Atua;

Auā o lo‘u ola ua ia Keriso lea; a o lo‘u oti, o lo‘u manuia lea. Afai ou te ola i le tino, o le fua lea o la‘u galuega; a ou te le iloa po o le fea mea ou te filifilia. Auā ua ou faaletonu i manatu e lua; o loo ia te au le naunau ia ou alu, ia faatasia a‘u ma Keriso; o le mea lea e sili ona lelei.

Aua o lo tatou nuu moni ua i le lagi lea, o loo faatalitali mai ai i tatou i le Faaola, o le Alii o Iesu Keriso; na te liua o tatou nei tino ua leaga, ina ia faia ia faatatau i lona tino matagofie, e tusa ma le mana na te mafaia ai ona faatoilaloina o mea uma ia te ia lava.

o ia ua na laveai mai ia te i tatou nai le pule a le pouliuli, a ua na aumaia i latou i le malo o lona lava Alo pele;

Ia outou loto lava i mea i lugā, a e le o mea i le lalolagi;

ina ia outou savavali ia tatau i le Atua, o le na valaauina outou i lona malo ma lona manuia.

e ia te outou foi o e puapuagaina, o le mapusaga faatasi ma i matou, pe a faaalia le Alii o Iesu mai le lagi, faatasi ma agelu o lona malosi, i le afi mumū,

A o lenei lava le mea na alofaina ai a‘u, ina ia muamua ona faaalia mai ia te au e Iesu Keriso le onosai tele lava, ia avea a‘u ma faata‘ita‘i o e a faatuauta ia te ia amuli, e maua ai le ola e faavavau. O lenei, ia i ai i le Tupu o le vavau, o le o soifua pea lava, o le le o vaaia, o le Atua poto e toatasi, ia ia te ia le mamalu atoa ma le viiga e faavavau faavavau lava. Amene.

Auā e itiiti le aoga o le faamasani i la le tino; a o le amio Atua e aoga lea i mea uma lava, o loo i ai le mea ua folafolaina mai i la le olaga nei atoa ma lē atali.

Auā tatou te lei au mai lava se mea e tasi i le lalolagi, ua mautinoa foi tatou te le mafai ona ave ese ai o se mea.

Ia e tau le taua lelei i la le faatuatua, tago atu ia i le ola faavavau, na valaauina ai foi oe, ma ua e ta‘utino atu i le ta‘utinoga lelei i luma o molimau e toatele.

ina ia latou agalelei atu, ia tamaoaiga i galuega lelei, ia mataalofa, ia latou avatu fua a latou mea, ia latou teua oloa mo i latou lava, o le faavae lelei mo aso atali, ina ia latou fetagofi atu i le ola e faavavau.

a ua faailoa mai nei i le faaalia mai o lo tatou Faaola o Iesu Keriso, o le ua faaumatia lava le oti, a o le ola ma le le iu vale ua faamalamalamaina mai lea e ia i le tala lenei,

E laveai mai foi le Alii ia te au ai mea leaga uma, ma faaola mai ia te au ia oo i lona malo i le lagi; ia ia te ia le viiga e faavavau faavavau lava. Amene.

i le faamoemoe i le ola e faavavau, na folafolaina mai talu mai tausaga o le vavau e le Atua e le mafai ona tala pepelo;

ina ia ta‘uamiotonuina i tatou i lona lava alofa tunoa, ia fai i tatou ma suli e tusa ma le faamoemoe i le ola e faavavau.

a ua faapea mai i le Alo, O lou nofoālii, le Atua e, faavavau faavavau lava lea; o le tootoo o lou malo, o le tootoo o le amiotonu lea.

O lenei, ua tuuina mai pea o le malologa faasapati mo tagata o le Atua.

ua faaatoatoaina foi o ia, ona avea ai lea o ia ma tupuga o le ola e faavavau ia i latou uma o e usiusitai ia te ia;

O le mea lea sa tatau ai ona famamāina o faatusa o mea o i le lagi i ia mea; a o mea faalelagi lava e faamamāina i taulaga e sili ona lelei i ia mea. Auā ua le ulu atu Keriso i le mea paia ua faia e lima, o le faatusa lea o le mea moni, a o le lagi lava, ina ia iloa ai nei o ia i luma o le Atua mo i tatou;

a o lenei, ua latou naunau lava i le nuu e sili ona lelei, o le faalelagi lea; o le mea lea e le mā ai le Atua ia te i latou, ina ia ta‘ua o ia o lo latou Atuā auā ua saunia e ia o le aai mo i latou.

a ua oo outou i le mauga o Siona, ma le aai o le Atua soifua, o Ierusalema faalelagi, ma agelu e manomanō, o le faapotopotoga atoatoa ma le ekalesia o le au ulumatua e ua tusia i le lagi, ma le Atua o le faamasino aoao, ma agaga o e ua amiotonu ua faaatoatoaina,

auā ua leai so tatou aai tumau iinei, a ua tatou saili i lē atali.

ia iu i le tofi e le pala, e leai se leaga o i ai, e le mamae lava, o loo teu i le lagi mo i tatou,

o ia o loo i le itu taumatau o le Atua, ina ua afio ae o ia i le lagi, ua toilalo ia te ia o agelu, ma faipule, atoa ma ē malolosi.

O lenei, le au uso e, ia atili ai ona faamalolosi outou ia faamauina lo outou valaauina ma lo outou filifilia, auā pe a outou faia ia mea tou te le iu vale lava. Auā a faapea, ona matuā faaofia ai lea o outou i le ala o le malo e faavavau o lo tatou Alii o lo tatou Faaola lea o Iesu Keriso.

A e faatalitali i tatou i le lagi fou ma le lalolagi fou, pei o lana na folafola mai, e mau ai le amiotonu.

O le mea sa i ai talu le amataga, na matou faalogologo i ai, na matou vaavaai atu i ai o matou mata, na matou matamata ai, na tagotago foi o matou lima i a le Lokou o le ola; (na faaalia mai foi le ola, na matou vaai atu, matou te molimau foi i ai, ma ua matou ta‘u atu ia te outou le ola e faavavau, o lena sa i le Tamā, a ua faaalia mai ia te i matou;)

O le a mavae atu foi le lalolagi, atoa ma lona tu‘inanau, a o lē fai le finagalo o le Atua, e tumau lea e faavavau.

O le mea foi lenei na folafola mai e ia ia te i tatou, o le ola e faavavau.

Le au pele e, o le fanau i tatou a le Atua i nei ona po, a e lei faaalia mai nei le uiga o i tatou a amuli; a ua tatou iloa, pe a faaali mai o ia, ona foliga ai lea o i tatou ia te ia, auā tatou te iloa tino ai lava o ia.

O lenei foi le mau, ua foaiina mai e le Atua ia te i tatou le ola e faavavau; o le ola lava lea ua i lona Alo. O le o ia te ia le Alo, o ia te ia le ola; o le e le o ia te ia le Alo o le Atua, e le o ia te ia le ola. Ua ou tusi atu nei mea ia te outou o e faatuatua i le suafa o le Alo o le Atua, ina ia outou iloa ai ua ia te outou le ola e faavavau, ina ia outou faatuatua foi i le suafa o le Alo o le Atua.

Ua tatou iloa foi ua maliu mai le Alo o le Atua, ua ia foaiina mai foi le mafaufau ia te i tatou, ina ia tatou iloa ai loo moni, o i ai foi i tatou i loo moni, o i lona Alo o Iesu Keriso. O lenei lava le Atua moni, ma le soifua e faavavau.

ia outou faatumau ia te outou i le alofa o le Atua, ma faatalitali atu i le alofa o lo tatou Alii o Iesu Keriso, e oo atu i le ola e faavavau.

O le ua i ai taliga, ina faalogo mai ia o ia i le mea ua fetalai mai ai le Agaga i ekalesia, O lē manumalo, ou te avatua ia te ia e ‘ai i le laau o le ola o i totonu o le parataiso o le Atua.

O lē manumalo, e faaofuina o ia i ofu sisina; ou te le sōloiesea foi lona igoa i le tusi o le ola, a e ou te ta‘u atu lona igoa i luma o lo‘u Tamā, ma luma o ana agelu.

O lē manumalo ou te avatua i te ia ma te nonofo faatasi ma a‘u i lo‘u nofoālii, e pei o a‘u foi ona ou manumalo, ua ma nonofo foi faatasi ma lo‘u Tamā i lona nofoālii.

Ua mavae atu ia mea, ona ou iloa atu lea, faauta, o le faitotoa ua avanoa i le lagi, o le uluai leo foi na ou faalogo ai e pei o le pu ona tautala mai ia te au, ua faapea mai, Ina sau ia i luga nei, ou te faaali atu ai ia te oe mea e tusa ona tutupu amuli. Ona a‘u i le Agaga loa lea; faauta foi, ua tu mai le nofoālii i le lagi, ua tietie foi le tasi i le nofoālii; o lē tietie mai foi ua pei o le maa iasepi ma le salikea lona tino mai; ua siosioina foi le nofoālii e le nuanua e pei o le samaraki lona tino mai. Ua siosioina foi le nofoālii e nofoālii e luafulu ma le fa; na ou iloa foi o toeaina e toaluafulu ma le toafa o tietie i ia nofoālii, ua oofu i ofu sisina; ua i o latou ulu foi o pale auro.

Ua oo mai foi uila, ma faititili, ma leo mai le nofoālii; o lamepa foi e fitu o mumū i luma o le nofoālii, o Agaga ia e toafitu o le Atua. Ua i luma foi o le nofoālii le sami tioata, e pei o le maa tioata; ua i totonu o le nofoālii ma ua liolioina le nofoālii e mea ola e fa ua tutumu i mata i luma atoa ma tua. O le mea ola muamua e pei o le leona, o lona lua o mea ola e pei o se povi taanoa, o lona tolu o mea ola e pei o le tagata ona mata, o lona fa foi o mea ola e pei o le aeto ua lele. O mea ola foi e fa e taitasi ma ona apaau e ono, ua faataaliolio ai, ma ua mata atoa i latou i totonu; latou te le mapu lava i le ao ma le po i le fai atu, E paia, e paia, e paia le Alii le Atua e ona le malosi uma lava, o le na soifua, o loo soifua foi, o le a afio mai.

A vivii foi, ma faaneenee, ma faafetai atu mea ola i le o tietie i le nofoālli, o lē soifua e faavavau e faavavau lava, ona faapaū ai lea o toeaina e toaluafulu ma le toafa i luma o lē tietie i le nofoālii, ma ifo atu i lē soifua e faavavau e faavavau lava, ma lafo o latou pale i luma o le nofoālii, o loo faapea atu, Le Alii e, e tatau lava oe ina ia tuu atu ia te oe le viigia, ma le faaneeneega, ma le mana; auā na e faia mea uma lava, ona o lou finagalo foi e i ai i latou ma ua faia.

ua faia foi e oe i matou ma tupu ma faitaulaga i lo matou Atua; e fai foi i matou ma tupu i le lalolagi. Na a‘u iloa atu foi, ma ou faalogo i le leo o agelu e toatele, o e ua faataaliolio i le nofoālii, ma le leo o mea ola e fa atoa ma le au toeaina; o lo latou faitau aofai ua mano ni mano, ma afe ni afe,

Ua mavae atu ia mea, ona ou iloa lea, faauta foi i le motu o tagata e toatele mai atu nuu uma, ma aiga, ma nuu, ma gagana eseese, e le ma faitaulia e se tasi, o loo tutū i latou i luma o le nofoālii ma luma o le Tamai mamoe, ua oofu i latou i ofu sisina, ua i ai foi lau pama i o latou lima; ua latou alalaga foi ma leo tetele, ua faapea atu, O i ai le faaolataga i lo tatou Atua o lē tietie i le nofoālii, atoa ma le Tamai mamoe. Ua tutū faataaliolio agelu uma i le nofoālii ma le au toeaina ma mea ola e fa, ua latou faapaū fao i luma o le nofoālii, ma ifo atu i le Atua, ua faapea atu, Amene; Ia i lo tatou Atua le faamanū, ma le viiga, ma le poto, ma le faafetai, ma le mamalu, ma le mana, ma le malosi e faavavau faavavau lava. Amene.

O le mea lea ua latou i luma ai o le nofoālii o le Atua, ua latou auauna foi ia te ia i lona malumalu i le ao ma le po; o lē tietie foi i le nofoālii e mau ma i latou. Latou te le toe fia aai, e le toe fia inu foi e le ogotia i latou i le la, po o se tasi vevela; auā o le Tamai mamoe o loo i luma o le nofoālii na te fafaga ia i latou, ma ta‘ita‘i ia te i latou i puna o vai ola; e sōloieseina foi e le Atua o loimata uma nai o latou mata.

Ua faaavanoaina foi le malumalu o le Atua i le lagi, ona iloa atu ai lea o le atolaau o lana feagaiga i lona malumalu; ona tutupu lea o uila, ma leo, ma faititili, ma le mafuie, ma le uato‘a tetele.

Ua tau foi le taua i le lagi; o Mekaeli ma ana agelu ua latou tau ma le tarako, ua ‘au foi le tarako ma ana agelu e tau ai le taua, a ua latou le manumalo, e le toe maua foi i le lagi se mea latou te nonofo ai.

Ua fai mai foi o ia ia te au, Ia e tusi, Amuia e ua tala‘iina i le tausamaaga o le Tamai mamoe. Ua fai mai foi o ia ia te au, O afioga moni ia a le Atua.

Na a‘u iloa foi le nofoālii tele e sinasina, ma le o tietie ai, ua sosola ese le lalolagi ma le lagi i ona luma, e le iloa foi se mea e tu ai i laua.

Ona a‘u iloa lea o le lagi fou ma le lalolagi fou; auā ua mavae atu le uluai lagi, ma le uluai lalolagi, ua leai foi se toe sami. O a‘u foi o Ioane na ou iloa le aai paia, o Ierusalema fou, ua alu ifo mai le Atua i le lagi, ua saunia pei o se faatoanofotane ua teuteuina mo lana tane. Na ou faalogo foi i le leo tele mai le lagi, ua faapea mai, Faauta, ua faatasi ma tagata le fale fetafai o le Atua, e mau foi o ia ma i latou; e fai foi i latou mona nuu, e ia te i latou le Atua lava, o lo latou Atua ia. E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.

Ua fetalai mai foi lē tietie i le nofoālii, Faauta, ou te faia ia fou mea uma lava. Ua fetalai mai foi o ia ia te au, Ia e tusi; auā o upu nei e moni ma le faamaoni ia. Ua fetalai mai foi o ia ia te au, Ua uma ona fai. O a‘u le Alefa ma le Omeka, o le amataga ma le gataaga. O le ua fia inu ou te foaifuaina atu ia te ia ai le puna o le vai ola. O lē manumalo e maua e ia mea uma, e fai foi a‘u mona Atua, e fai foi o ia mo‘u atalii. A o e loto vaivai, ma e lē faalogo, ma e fai mea e inosia, ma e fasioti tagata, ma e faitaaga, ma e faataulāitu, ma e ifo i tupua, atoa ma e tala pepelo uma, e fai o latou tofi i le lepa e mu i le afi ma le teio, o le oti faalua lea. Ua alu ane foi ia te au le tasi o ia agelu e toafitu o e sa i ai ipu e fitu na tutumu i mala e fitu e gata ai, ua tautala mai foi o ia ia te au, ua faapea mai, Sau ia, ou te faaali atu ia te oe le faatoanofotane, o le faletua lea o le Tamai mamoe.

Ua ia avea foi a‘u i le Agaga i le mauga tele ma le maualuga, ua ia faaali foi ia te au Ierusalema, o le aai tele ma le paia, o loo alu ifo i le lagi mai le Atua, ua i ai le pupula o le Atua; o lona pupula foi e pei o se maa tāua lava, e pei o se maa iasepi i lona faatioata mai; ua i ai foi le pa tele ma le maualuga, ua i ai puipui e sefulu ma le lua, ua i puipui foi agelu e toasefulu ma le toalua, ua tusia ai foi igoa, o igoa ia o itu aiga e sefulu ma le lua o le fanauga a Isaraelu, ua i sasaē o puipui e tolu, ua i le itu i matu o puipui e tolu, ua i le itu i toga o puipui e tolu, ua i sisifo o puipui e tolu. Ua i le pa foi o le aai o faavae e sefulu ma le lua, ua i ai foi igoa o le au aposetolo a le Tamai mamoe e toasefulu ma le toalua.

O le na tautala ma a‘u sa i ai le u auro e fua a‘i e ia le aai, ma ona puipui, atoa ma ona pa. Ua faatu faatāfafa foi le aai, o lona umi ua tusa ma lona lautele; ua fuatia foi e ia o le aai i le u, e sefulu afe ma afe e lua o setatio; o lona umi, ma le lautele, ma le maualuga, ua tutusa lava ia. Ua fuatia foi e ia lona pa, e tasi le selau ma le fagafulu ma le fa o kupita, o le fua a le tagata, o a le agelu lea. Ua ati foi lona pa i maa iasepi; o le aai o le auro lelei lea, ua pei o le tioata manino. Ua teteu foi noopa o le aai i maa tāua uma; o le noopa muamua o le iasepi lea, o lona lua o le safaira lea, o lona tolu o le kakito lea, o lona fa o le samaraki lea; o lona lima o le saritonu lea, o lona ono o le salikea lea, o lona fitu o le tasesa lea, o lona valu o le soama lea, o lona iva o le topasi lea, o lona sefulu o le kuasopera lea, o lona sefulu ma le tasi o le uakini lea, o lona sefulu ma le lua o le aselama lea. O puipui foi e sefulu ma le lua o penina ia e sefulu ma le lua; taitasi le puipui ma le penina e tasi na fai a‘i; o le ala tele foi o le aai o le auro lelei lea, e pei o le tioata manino.

Ou te lei iloa ai foi se malumalu; auā o lona malumalu o le Alii le Atua lea, e ona le malosi uma lava, atoa ma le Tamai mamoe. E le aoga foi i le aai ona pupula i ai o le la, po o le masina; auā o le pupula o le Atua ua faamalamalamaina ai ia, o le Tamai mamoe foi o lona lamepa lea. O nuu foi o e ua faaolaina latou te savavali i lona malamalama; o tupu foi o le lalolagi latou te au mai i ai o latou mamalu ma viiga. O ona puipui foi e le punitia lava i le ao; auā e leai se po i lea mea. Latou te au mai foi i ai le mamalu ma le viiga o nuu. E le sao atu lava i ai se mea leaga e tasi, po o se na te faia se mea inosia, po o se pepelo; na o i latou lava e ua tusia i le tusi o le ola a le Tamai mamoe.

Ona faaali mai lea e ia ia te au le vaitafe manino o le vai o le ola, e manino e pei o le maa tioata, ua tafe ifo mai le nofoālii o le Atua ma le Tamai mamoe. O i le moa o lona ala tele ma itu taitasi o le vaitafe le laau o le ola, o loo fua mai i fuata e sefulu ma le lua, e taitasi le masina ma fua mai ai lona fuata; o lau foi o le laau e faamalolo ai nuu. E leai foi se toe faafano e tasi; e i ai foi le nofoālii o le Atua ma le Tamai mamoe, o ana auauna foi latou te auauna ia te ia; latou te vaavaai atu foi i ona fofoga, e i ai foi i o latou muaulu lona suafa. E leai lava se po i lea mea; e le aoga foi ia te i latou se lamepa, po o le malamalama o le la; auā o le Alii le Atua na te faamalamalamaina i latou; latou te fai ma tupu foi e faavavau faavavau lava.

Amuia i latou o e faia ana poloaiga, ina ia taga ia i latou le laau o le ola, ma ia latou ulu atu i le aai i ona faitotoa.

Ua fetalai mai le Agaga ma le faatoanofotane, Ina sau ia; ina fai atu foi ia o lē faalogo, Ina sau ia; o lē fia inu, ina sau ia, atoa ma lē manao i ai, ina ave fua ia le vai o le ola.