07 – Usuku lokwahlulela

U-Abhrama eseleminyaka engamatshumi aficamunye laficamunye yobudala, uJehova wabonakala kuye wathi, “NginguNkulunkulu uSomandla; hlala usemehlweni ami, ungasoleki.

Akube khatshana lawe ukwenza into enjalo  —  ukubulala abalungileyo lababi. Kakube khatshana lawe lokho! Kambe uMahluleli womhlaba wonke kayikwenza okufaneleyo na?”

Kumele libemsulwa phambi kukaJehova uNkulunkulu wenu.

Angibanga lesici phambi kwakhe njalo ngisixwayile isono.

Ngakho izihlahla zasendle zizahlabela ngentokozo phambi kukaJehova, ngoba uyeza ukwehlulela umhlaba.

“Njalo wena ndodana yami, Solomoni, mamukele uNkulunkulu kayihlo, umkhonze ngokuzinikela ngenhliziyo yakho yonke langengqondo yokuvuma, ngoba uJehova uyihlola yonke inhliziyo kanti uyayazi iminakano lezenzo zonke. Nxa umfuna uJehova, uzamfumana wena, kodwa nxa umfulathela, uzakufulathela yena kuze kube nininini.

Ngiyazi ukuthi uMhlengi wami uyaphila, lokuthi ekupheleni uzakuma emhlabeni. Kuzakuthi nxa isikhumba sami sesibhujisiwe, kodwa ngikuyo inyama yami ngizambona uNkulunkulu; mina ngokwami ngizambona ngawami amehlo  —  mina, hatshi omunye. Inhliziyo yami iyagubhazela ngokulangatha! “Lingaze lithi, ‘Sizamzingela qho ngoba nguye ozilethele ukuhlupheka;’ yini okumele liyesabe inkemba; ngokuba intukuthelo izaletha isijeziso ngenkemba, ngakho-ke lizakwazi ukuthi kulokwahlulela.”

ukuthi umuntu omubi uyaphepha ngosuku lokubhujiswa na, ukuthi uyakhululwa ngosuku lwesiphithiphithi?

akuthi uNkulunkulu angilinganise esikalini sakhe esiqotho ukuze abone ukuthi angilasici  —

Ababi kabanjalo! Banjengamakhoba aphetshulwa ngumoya. Ngakho ababi kabayikuma ekwahlulelweni, noma izoni enkundleni yabalungileyo. Ngokuba uJehova uyayilinda indlela yabalungileyo, kodwa indlela yababi izabhubha.

UJehova uyabusa kuze kube nininini; usesimisile isihlalo sakhe sobukhosi ukuze ahlulele. Uzakwahlulela umhlaba ngokulunga; uzababusa abantu ngokulunga.

Ababi babuyela engcwabeni, zonke izizwe ezikhohlwa uNkulunkulu.

Ngibe ngilokhu ngimsulwa phambi kwakhe njalo ngisixwayile isono.

Ababi baceba ukulimaza abalungileyo babagedlele amazinyo; kodwa uJehova uyabahleka ababi, ngokuba uyazi ukuthi usuku lwabo luyeza.

Kodwa uNkulunkulu uzayihlenga eyami impilo engcwabeni; ngempela uzangithatha angise kuye.

Loba sekutheni ungabayekeli baphunyuke; ngokuthukuthela kwakho, Nkulunkulu, zidilize izizwe. Bhala phansi isililo sami; bhala ithonsi ngalinye lezinyembezi zami emqulwini wakho  —  kazikho yini emibhalweni yakho?

Sengathi bangesulwa encwadini yokuphila bangaze babalwa kanye labalungileyo.

Uzaphosa nje amehlo akho ubukele ubone ukujeziswa kwababi.

zizahlabela phambi kukaJehova, ngokuba uyeza, uyeza ukuzakwahlulela umhlaba. Uzakwahlulela umhlaba ngokulunga, ahlulele abantu ngeqiniso.

kazihlabele phambi kukaJehova, ngoba uyeza ukuzakwahlulela umhlaba. Uzakwahlulela umhlaba ngokulunga labantu bonke ngokufaneleyo.

amehlo akho awubona umzimba wami ungakabi lesimo. Zonke izinsuku ezamiselwa mina zabhalwa encwadini yakho lalunye lwazo lungakabi khona.

UJehova uyabalinda bonke abamthandayo, kodwa bonke ababi uzababhubhisa.

Inotho kayisizi lutho ngosuku lweziphithiphithi kodwa ukulunga kuyaphephisa ekufeni.

Ngacabanga ngenhliziyo yami, “UNkulunkulu uzabehlulela bonke abalungileyo lababi, ngoba sizaba khona isikhathi sezenzakalo zonke, isikhathi sawo wonke umsebenzi.”

Ibizo elihle lingcono kulamakha amnandi, lelanga lokufa lingcono kulelanga lokuzalwa.

Manje-ke konke sekuzwakele; Nansi isiphetho sendaba; Mesabe uNkulunkulu ugcine imiyalo yakhe, ngoba lo yiwo wonke umlandu womuntu. Ngoba uNkulunkulu uzazahlulela zonke izenzo, lalokho okufihliweyo loba kuhle loba kubi.

Emva kwalokho bazakhangela emhlabeni babone usizi kuphela, lomnyama owesabekayo, njalo bazaphoselwa emnyameni opheleleyo.

Umhlaba ngizawujezisa ngenxa yobubi bawo, lababi ngenxa yezono zabo. Ngizaqeda ukukloloda kwabazikhukhumezayo ngehlise ukuzigqaja kwabalesihluku.

uzakuginya kokuphela ukufa. UJehova Wobukhosi uzakwesula izinyembezi ebusweni babantu bonke; uzasusa ihlazo labantu bakhe emhlabeni wonke. UJehova usekhulumile.

Kodwa abafileyo bakho bazaphila, imizimba yabo izavuka. Lina elihlala othulini, vukani lihlabelele ngentokozo. Amazolo enu afana lamazolo ekuseni; umhlaba uzabaveza abafileyo bawo.

Ubunqunu bakho buzavezwa, ihlazo lakho lambuleke. Ngizaphindisela, kakho engizamyekela.” Umhlengi wethu uJehova uSomandla libizo lakhe ungoNgcwele ka-Israyeli.

ukumemezela umnyaka womusa kaJehova, losuku lokuphindisela kukaNkulunkulu wethu; ukududuza abalilayo,

“Khangelani, ngizadala izulu elitsha lomhlaba omutsha. Izinto zakuqala aziyikukhunjulwa, kumbe zifike engqondweni.

“Njengamazulu amatsha lomhlaba omutsha engikwenzayo kuzakuma kokuphela phambi kwami,” kutsho uJehova, “ngokunjalo ibizo lakho lenzalo yakho izakuma kokuphela. Kusukela ekuthwaseni kwenye inyanga kusiya ekuthwaseni kwenye, njalo kusukela kwelinye iSabatha kusiya kwelinye abantu bonke bazakuza bakhothame phambi kwami,” kutsho uJehova. “Bazaphuma babone izidumbu zabantu abangihlamukelayo; impethu yazo kayiyikufa, lomlilo wazo kawuyikucitshwa, njalo zizakwenyanyeka ebantwini bonke.”

Ngoba yonke imiphefumulo ephilayo ngeyami, uyise kanye lendodana  —  bobabili ngokufanayo ngabami. Umphefumulo owonayo yiwo ozakufa.

“Ngisakhangele, “kwabekwa izihlalo zobukhosi, uSimakade wahlala kwesakhe. Izigqoko zakhe zazimhlophe njengeqhwa; izinwele zekhanda lakhe zimhlophe njengoboya bezimvu. Isihlalo sakhe sasilavuka umlilo, lamavili aso wonke evutha umlilo. Kwakugeleza umfula womlilo, uphethuka ngaphambi kwakhe. Izinkulungwane lezinkulungwane zazimkhonza; izinkulungwane ezilitshumi ziphindwe ngezinkulungwane ezilitshumi zema phambi kwakhe. Inkundla yokwahlulela yahlala phansi, kwasekuvulwa izincwadi.

Kodwa abangcwele bakhe oPhezukonke bazawemukela umbuso ube ngowabo lanininini  —  yebo, okwanini lanini.’

Ngilokhu ngibukele, uphondo lolu lwalusilwa luhlasela abangcwele lubehlula, kwaze kwafika uSimakade wabalamulela abangcwele bakhe oPhezukonke, kwafika isikhathi bawuthatha umbuso.

Izakhuluma okubi ngoPhezukonke icindezele abangcwele bakhe izame ukuguqula izikhathi ezimisiweyo kanye lemithetho. Abangcwele bazanikelwa kuyo okwesikhathi esithile, izikhathi ezilengxenye yesikhathi. “Kodwa umthethwandaba uzahlala phansi, amandla ayo asuswe abhidlizwe okwanini lanini. Lapho-ke ubukhosi, lamandla lobukhulu bemibuso leyo ngaphansi kwezulu lonke kuzaphiwa abangcwele, abantu bakhe oPhezukonke. Umbuso wakhe uzakuba ngumbuso ongapheliyo, njalo bonke ababusi bazamkhonza bamlalele.

“Ngalesosikhathi uMikhayeli, umbusi omkhulu olinda abantu bakini, uzavela. Kuzakuba khona isikhathi sokuhlukumezeka okungazange kube khona kulokhu kwadabuka izizwe kuze kube yiso. Kodwa kulesosikhathi abantu bakini  —  bonke labo abalamabizo azafunyanwa elotshiwe encwadini  —  bazahlengwa. Izixuku lezixuku zabaleleyo othulini lomhlaba bazavuka; abanye baye ekuphileni okungapheliyo, abanye baye ehlazweni lokunengeka okungapheliyo. Labo abahlakaniphileyo bazakhazimula njengokubenyezela kwamazulu, lalabo abaholela abanengi ekulungeni, bazakhazimula njengezinkanyezi okwanini lanini. Kodwa wena Danyeli, vala unameke amazwi omgoqwancwadi kuze kube yisikhathi sokucina. Abanengi bazakuya lapha lale ukwandisa ulwazi.”

“Kodwa wena, zihambele nje kuze kube sekucineni. Uzaphumula, bese kusithi ekucineni kwezinsuku uzavuka ukuba wamukele elakho ilifa olabelweyo.”

“Usuku lukaJehova selusondele ezizweni zonke. Njengalokho okwenzileyo, yikho okuzakwenziwa kuwe; izenzo zakho zizaphendukela phezu kwekhanda lakho.

Kodwa wathi ebona abaFarisi labaSadusi abanengi besiza lapho ayebhaphathizela khona, wathi kubo, “Lina nzalo yezinyoka! Ngubani olixwayisileyo ukuthi libalekele ulaka oluzayo na?

Khathesi nje ihloka livele seleyanyisiwe ezimpandeni zezihlahla, ukuthi zonke lezozihlahla ezingatheli izithelo ezinhle zizaganyulelwa phansi ziphoselwe emlilweni.

Isitsha sakhe sokwela sisesandleni sakhe, njalo uzathanyela isiza sakhe, abuthele wonke amabele esiphaleni, kuthi amakhoba awatshise ngomlilo ongacimiyo.”

Nxa ilihlo lakho lokunene likwenzisa isono likhuphuluze ulikhuphe ulilahlele khatshana. Kungcono kuwe ukuthi ulahlekelwe ngesisodwa isitho somzimba wakho kulokuthi umzimba wakho wonke uphoselwe esihogweni somlilo. Njalo nxa isandla sakho sokunene sikwenzisa isono, siqume usiphosele kude. Kungcono kuwe ukuthi ulahlekelwe ngesisodwa isitho somzimba wakho kulokuthi umzimba wakho wonke uye esihogweni somlilo.

Ngoba ngaleyondlela elahlulela ngayo abanye lani lizakwehlulelwa ngayo, langalesosilinganiso elisisebenzisayo lani lizalinganiselwa ngaso.

“Ngenani ngesango elincinyane ngokuba likhulu isango lendlela ibanzi eya ekubhujisweni, njalo banengi abangena ngalo. Kodwa lincinyane isango lendlela ilukhonjwana eya ekuphileni, njalo balutshwana abayifumanayo.

Lizabazi ngezithelo zabo. Abantu bayawakha na amavini esihlahleni sameva, kumbe amakhiwane edolofiyeni na? Kanjalo sonke isihlahla esihle sithela izithelo ezinhle, kodwa isihlahla esibi sithela ezimbi. Isihlahla esihle ngeke sithele izithelo ezimbi njalo lesihlahla esibi kasitheli izithelo ezinhle. Zonke izihlahla ezingatheli izithelo ezinhle ziyaganyulwa ziphoselwe emlilweni. Ngakho-ke lizabazi ngezithelo zabo.

“Kakusibo bonke abathi kimi, ‘Nkosi, Nkosi’ abazangena embusweni wezulu, kodwa ngulowo kuphela owenza intando kaBaba osezulwini. Abanengi bazakuthi kimi ngalolosuku, ‘Nkosi, Nkosi, kasiphrofethanga ngegama lakho na, njalo ngegama lakho sakhupha amadimoni senza lezimangaliso?’ Lapho-ke ngizabatshela kakuhle ngithi, ‘Ngivele kangilazi. Xekani kimi, lina benzi bobubi!’

Nxa engekho olamukelayo kumbe olalela amazwi enu thintithani uthuli ezinyaweni zenu nxa selisuka kulowomuzi loba lelodolobho. Ngiqinisile ngithi kini kuzakuba ngcono eSodoma leGomora ngelanga lokwahlulelwa kulokuzakwehlela lelodolobho.

Lingabesabi labo ababulala umzimba kodwa bengeke babulale umphefumulo. Kodwa yesabani lowo ongabhubhisa kokubili umphefumulo lomzimba esihogweni.

Kodwa ngiyalitshela, kuzakuba ngcono eThire leSidoni ngosuku lokwahlulelwa kulalokho okuzalehlela lina. Lawe Khaphenawume, kambe uzaphakanyiselwa emkhathini na? Hatshi, uzatshona phansi ekujuleni. Aluba imimangaliso eyenziwa kuwe yayenziwe eSodoma, ngabe ikhona lalamhla nje. Kodwa ngiyalitshela ukuthi kuzakuba ngcono eSodoma ngelanga lokwahlulela kulakuwe.”

Kodwa ngiyalitshela ukuthi abantu bazamele baziphendulele ngosuku lokwahlulelwa ngawo wonke amazwi obutshapha abawakhulumayo. Ngokuba lizakhululwa mayelana lamazwi enu njalo lizalahlwa ngokumayelana lamazwi enu.”

Insimu yilizwe, njalo inhlanyelo enhle imele amadodana ombuso. Ukhula lungamadodana omubi, njalo isitha esiluhlanyelayo nguSathane. Isivuno siyikuphela komhlaba, njalo abavuni yizingilosi. “Njengalokhu ukhula lusitshunwa lutshiswe emlilweni, kuzakuba njalo ekupheleni komhlaba. Indodana yoMuntu izathuma izingilosi zayo zicente konke okubanga isono embusweni wayo labo bonke abenza ububi. Zizabaphosela esihogweni somlilo ongungumayo okuzakuba khona ukukhala lokugedla amazinyo. Lapho-ke abalungileyo bazakhazimula njengelanga embusweni kaYise wabo. Lowo olezindlebe, kezwe.

“Futhi, umbuso wezulu ufana lombule owehliselwa phansi echibini wahuquluza zonke izinhlobo zezinhlanzi. Wathi usugcwele, abagoli bezinhlanzi bawudonsela okhunjini. Basebehlala phansi baqoqela ezitsheni zonke izinhlanzi ezilungileyo kodwa ezimbi bazilahla. Lokhu yikho okuzakwenzakala ekupheleni komhlaba. Izingilosi zizakuza zehlukanise ababi kwabalungileyo zibaphosele esihogweni somlilo ongungumayo, lapho okuzaba lokukhala lokugedla amazinyo.

Ngokuba enhliziyweni kuphuma imicabango emibi, ukubulala, ukufeba, ukuphinga, ubusela, ukufakaza amanga lokunyeya.

Kuzamsiza ngani umuntu uma ezuza wonke umhlaba, kodwa alahlekelwe ngumphefumulo wakhe na? Phela iNdodana yoMuntu izakuza ngobukhosi bukaYise kanye lezingilosi zakhe, ibisivuza umuntu ngamunye mayelana lalokho akwenzileyo.

Wasesithi, “Ngiqinisile ngithi kini, ngaphandle kokuba liguquke libe njengabantwana abancinyane, kalisoze lafa langena embusweni wezulu.

“Umbuso wezulu unjengenkosi eyalungisela indodana yayo idili lomthimba. Yathuma izisebenzi zayo kulabo ababemenyiwe edilini ukuba beze kodwa bala ukuza.

“Kodwa kwathi inkosi ingena ukuzabona izethekeli yananzelela khonapho indoda eyeyingavunulanga izigqoko zomtshado. Yabuza yathi, “Mfowethu, ungene njani lapha ungelazigqoko zomthimba?’ Indoda yatsha amathe. “Inkosi yase itshela izithunywa zayo yathi, ‘Mbopheni izandla lezinyawo limphosele ngaphandle ebumnyameni, lapho okuzakuba khona ukukhala lokugedla amazinyo.’

“Lina zinyoka! Lina nkunkuma yezinhlangwana! Lizaphepha kanjani ukuba lilahlelwe esihogweni na?

kodwa lowo oma aqine kuze kube sekupheleni uzasindiswa.

“Kulesosikhathi umbuso wezulu uzakuba njengezintombi ezilitshumi ezathatha izibane zazo zaphuma ukuyahlangabeza umyeni. Ezinhlanu zazo zaziyiziwula, ezinhlanu zihlakaniphile. Eziyiziwula zathatha izibane zazo kodwa kazithathanga amafutha. Kodwa ezihlakaniphileyo zathwala amafutha emagabheni kanye lezibane zazo. Umyeni waphuza ukufika zonke zaze zawozela zathathwa yibuthongo. “Phakathi kobusuku kwamenyezelwa kwathiwa, ‘Nangu umyeni! Phumani limhlangabeze!’ “Zasezivuka zonke izintombi zalumathisa izibane zazo. Lezo ezaziyiziwula zathi kwezihlakaniphileyo, ‘Ake lisiphe lathi amanye amafutha enu; izibane zethu ziyacima.’ “Zaphendula ezihlakaniphileyo zathi, ‘Hatshi, kakulamafutha angasanela thina lani. Hambani liye kulabo abathengisa amafutha liyozithengela awenu.’ “Kodwa kwathi besayathenga amafutha umyeni wafika. Izintombi ezazizilungiselele zangena laye edilini lomthimba. Umnyango wase uvalwa. “Ngemuva kwesikhathi ezinye lazo zatsho sezifikile. Zathi, ‘Mnumzana! Mnumzana! Ake usivulele umnyango!’ “Kodwa waphendula wathi, ‘Ngiqinisile, kangilazi.’

“Umnini wayo waphendula wathi, ‘Wenze kuhle, nceku elungileyo lethembekileyo! Uthembekile ezintweni ezilutshwana; ngizakuphathisa izinto ezinengi. Woza uzojabula kanye lenkosi yakho!’

“Nxa iNdodana yoMuntu isisiza ngenkazimulo yayo, ikanye lezingilosi zonke, izahlala esihlalweni sayo sobukhosi ilenkazimulo yasezulwini. Zonke izizwe zizabuthaniswa phambi kwayo, ibe isisahlukanisa abantu omunye komunye njengomalusi esahlukanisa izimvu ezimbuzini. Izabeka izimvu ngasekunene kwayo lezimbuzi ngasekhohlo. Lapho-ke iNkosi izakuthi kulabo abangasekunene kwayo, ‘Wozani, lina elibusisiweyo nguBaba; thathani ilifa lenu, umbuso owalungiselwa lina kulokhu kwadalwa umhlaba. Ngokuba ngangilambile, langinika ulutho oludliwayo, ngangomile langipha okunathwayo, ngangiyisihambi langingenisa, ngangiswela izambatho langigqokisa, ngangigula langonga, ngangisentolongweni lazongibona.’ “Abalungileyo bazamphendula bathi, ‘Nkosi, sakubona nini ulambile sakupha ukudla na, kumbe womile sakunathisa? Sakubona nini uyisihambi sakungenisa na, kumbe uswela izambatho sakugqokisa? Sakubona nini ugula kumbe usentolongweni seza sazakubona na?’ “INkosi izaphendula ithi, ‘Ngilitshela iqiniso ukuthi loba yini elayenzela loba ngomncinyane kanganani walaba abazalwane bami, lakwenzela mina.’ “INkosi izakuthi kulabo abasekhohlo kwayo, ‘Xekani kimi lina elithukiweyo liye emlilweni wanininini owalungiselwa uSathane lezingilosi zakhe. Ngokuba ngangilambile, kalingiphanga lutho lokudla, ngangomile kalingiphanga lutho lokunatha, ngangiyisihambi kalingingenisanga, ngangiswela izambatho kalingigqokisanga, ngangigula njalo ngisentolongweni kalizange lingidinge.’ “Labo bazaphendula bathi, ‘Nkosi, sakubona nini ulambile kumbe womile kumbe uyisihambi kumbe ungelazigqoko kumbe ugula noma usentolongweni asaze sakunceda na?’ “Izaphendula ithi, ‘Ngiqinisile ngithi, loba kuyini elingakwenzelanga oyedwa nje omncinyane kulabo bonke walaba, kalikwenzelanga mina.’ “Bazasuka baye ekujezisweni kwaphakade, kodwa abalungileyo baye ekuphileni okungapheliyo.”

Kodwa loba ngubani ohlambaza uMoya oNgcwele akayikufa wathethelelwa; ulecala lesono saphakade.”

Nxa indawo ethile ingalamukeli ngesihle loba nxa ingalilaleli kalibothintitha uthuli ezinyaweni zenu nxa selisuka kuyo, kube yibufakazi lokubalahla.”

Ngokuba okusuka ngaphakathi, okusuka enhliziyweni, kuphuma imicabango emibi, ukufeba, ukweba, ukubulala, ukuphinga, ubuhwaba, umona, ubuqili, ukuxhwala, umhawu, ukugcona, ubuqholo lobuthutha.

“Aluba umuntu ekhubekisa oyedwa walaba abancinyane abakholwa kimi ukuba enze isono, bekungaba ngcono kuye ukuthi aphoselwe olwandle ebotshelwe ilitshe elikhulu entanyeni yakhe. Aluba isandla sakho sikwenzisa ukona, siqume. Kungcono kuwe ukuthi ungene ekuphileni ungungini kulokuya esihogweni ulezandla ezimbili, lapho umlilo wakhona ongacimiyo, ( lapho impethu yakhona engafiyo lomlilo kawucimi). Njalo uma unyawo lwakho lukwenzisa isono, luqume. Kungcono kuwe ukuthi ungene ekuphileni uyisilima kulokuthi ulezinyawo ezimbili uphoselwe esihogweni ( lapho impethu yakhona engafiyo lomlilo wakhona kawucimi.) Njalo uma ilihlo lakho likonisa, likhuphuluze liphume. Kungcono kuwe ukungena umbuso kaNkulunkulu ulelihlo elilodwa kulokuba lamehlo amabili kodwa uphoselwe esihogweni, lapho “ ‘impethu yakhona kayifi, lomlilo kawucimi.’

Loba ngubani okholwayo abhaphathizwe uzasindiswa, kodwa lowo ongakholwayo uzalahlwa.

Ukhunimbaxa lwakhe lokwela useluphethe ezandleni ukuba ele asuse esizeni abuthele amabele akhe esiphaleni, kodwa uzatshisa amakhoba ngomlilo ongacimiyo.”

Kakukho okufihliweyo okungakubekwa obala, lokuthukuziweyo okungayikudalulwa. Lokho okukhulume emnyameni kuzazwiwa emini lithe bha, lalokho obukunyenyezela endlebeni ezindlini zangaphakathi kuzamenyezelwa phezulu kophahla lwezindlu. “Ngiyalitshela, bazalwane, lingabesabi labo ababulala umzimba kungabikhona okunye abangakwenza ngemuva kwalokho. Kodwa ngizalitshengisa lowo okumele limesabe: Mesabeni lowo, othi esebulele umzimba, abe lamandla okuphosela esihogweni. Yebo, ngiyalitshela, mesabeni.

Ngithi, hatshi! Kodwa, ngaphandle kokuba liphenduke lani lonke lizabhubha.

Omunye wambuza wathi, “Nkosi, ngabalutshwana kuphela yini abazasindiswa na?” Wathi kubo, “Zamani ngamandla ukuthi lingene ngomnyango omncinyane, ngokuba ngiyalitshela ukuthi abanengi bazazama ukungena kodwa bazakwehluleka. Angavele aphakame umninindlu avale umnyango lizakuma phandle liqoqode lincenga lisithi, ‘Mnumzana, sivulele umnyango.’ “Kodwa uzaphendula athi, ‘Kangilazi, kangazi njalo ukuthi livela ngaphi.’ “Lapho lizakuthi, ‘Sadla lawe, sanatha sonke, njalo wafundisa emigwaqweni yakithi.’ “Kodwa uzaphendula athi, ‘Kangilazi, njalo kangikwazi ukuthi livela ngaphi. Sukani kimi, lonke lina benzi bobubi!’ “Kuzakuba khona ukukhala lapho lokugedla amazinyo, nxa selibona u-Abhrahama, lo-Isaka loJakhobe labo bonke abaphrofethi embusweni kaNkulunkulu, kodwa lina ngokwenu lilahlelwe ngaphandle.

Kodwa nxa usenza idili, nxusa abayanga, izilima, izigoga, iziphofu, lapho uzabusiswa. Loba bengasoze bakwenanise lawe, uzakwenaniswa ekuvukeni kwabalungileyo.”

Omunye wezigebengu owayelenga khonapho wamthuka wathi, “Kanti kawusuwe uKhristu? Zisindise wena kanye lathi!” Kodwa esinye isigebengu samkhuza sathi, “Kawumesabi na uNkulunkulu, njengoba ulesigwebo sinye laye. Thina sijeziswa ngokusifaneleyo, ngoba sizuza lokho okufanele izenzo zethu. Kodwa umuntu lo kenzanga lutho olungalunganga.” Wasesithi, “Jesu, ungikhumbule nxa ungafika embusweni wakho.” UJesu wamphendula wathi, “Ngiyakutshela iqiniso ngithi, lamuhla uzakuba lami epharadisi.”

UJesu waphendula wathi, “Ngiyaqinisa ngithi, ngaphandle kokuthi umuntu azalwe ngamanzi langoMoya, angeke awungene umbuso kaNkulunkulu.

“UNkulunkulu walithanda ilizwe waze wanikela iNdodana yakhe iyiyo yodwa ukuze kuthi loba ngubani okholwa kuyo angabhubhi kodwa abe lokuphila okungapheliyo. Ngokuba uNkulunkulu kathumanga iNdodana yakhe emhlabeni ukuba iwulahle umhlaba, kodwa ukuba umhlaba usindiswe ngayo. Loba ngubani okholwa kuyo kalahlwa, kodwa ongakholwayo uvele uselahliwe ngokuba kakholwanga ebizweni leNdodana eyiyo yodwa kaNkulunkulu. Nanku ukuqunywa kwecala: Ukukhanya sekufikile emhlabeni, kodwa abantu bathanda ubumnyama kulokukhanya ngokuba imisebenzi yabo yayimibi. Wonke umuntu owenza ububi uyakuzonda ukukhanya, njalo kezi ekukhanyeni ngoba esesaba ukuthi izenzo zakhe zizadalulwa. Kodwa loba ngubani ophila ngeqiniso uyeza ekukhanyeni ukuze kubonakale kamhlophe ukuthi lokho akwenzileyo ukwenze ngoNkulunkulu.”

Loba ngubani obeke ithemba lakhe eNdodaneni ulokuphila okungapheliyo, kodwa loba ngubani oyilahlayo iNdodana kazukuyibona leyompilo ngokuba ulaka lukaNkulunkulu seluphezu kwakhe.”

“Ngiqinisile ngithi lowo owezwayo amazwi ami amkholwe lowo ongithumileyo ulokuphila okungapheliyo njalo kazukulahlwa; usechaphile wasuka ekufeni waya ekuphileni. Ngiqinisile ngithi, isikhathi siyeza njalo sivele sesifikile lapho abafileyo bezalizwa ilizwi leNdodana kaNkulunkulu, kuthi bonke abezwayo baphile. Njengoba uYise elokuphila kuye yena ngokwakhe, yikho useyinikile iNdodana ukuba ibe lokuphila kuyo yona ngokwayo. Njalo useyiphile amandla okwahlulela ngokuba iyiNdodana yoMuntu. “Kakungalimangalisi lokhu ngokuba siyeza isikhathi lapho kuzakuthi bonke abasemathuneni abo bezalizwa ilizwi layo baphume  —  labo abenze okuhle bazavuka baphile, lalabo abenze ububi bazavuka balahlwe.

Ngokuba intando kaBaba iyikuthi bonke abakhangela eNdodaneni bakholwe kuyo bazakuba lokuphila okungapheliyo, njalo ngizabavusa ngosuku lokucina.”

Kakho ongeza kimi ngaphandle kokuthi uBaba ongithumileyo amsondeze, mina-ke ngizamvusa ngosuku lokucina.

Ngiqinisile ukuthi lowo okholwayo ulokuphila okungapheliyo.

Lowo odla inyama yami njalo anathe igazi lami ulokuphila okungapheliyo, njalo ngizamvusa ngosuku lokucina.

Waphinda njalo uJesu wathi kubo, “Ngiyasuka lapha, futhi lizangidinga kodwa lizafela esonweni senu. Lapho engiya khona lingeke lize khona.”

UMatha waphendula wathi, “Ngiyazi ukuthi uzavuka futhi ekuvukeni kwabafileyo ngosuku lokucina.” UJesu wathi kuye, “Mina ngiyikuvuka kwabafileyo lokuphila. Lowo okholwa kimi uzaphila, loba ezakufa;

Manje sekuyisikhathi sokwahlulela kulo umhlaba; manje inkosi yalo umhlaba isizaxotshwa.

Ukhona umahluleli walowo ongalayo, ongawemukeliyo amazwi ami; lona lelolizwi uqobo engalikhulumayo lizamlahla ngosuku lokucina.

Nxa loba ngubani engahlali kimi, unjengogatsha olulahliweyo lwabuna; amagatsha anjalo ayathezwa abaswe atshe.

Wasilaya ukuba sitshumayele ebantwini bonke njalo sifakaze ukuthi unguye uNkulunkulu ambekayo ukuba ngumahluleli wabaphilayo labafileyo.

Ekadeni uNkulunkulu kakunakanga lokhu ukungazi, kodwa khathesi uselaya bonke abantu ezindaweni zonke ukuba baphenduke. Ngoba uselumisile usuku lapho azakwehlulela khona umhlaba ngokulunga ngomuntu ammisileyo. Usevezile ubufakazi balokhu kubo bonke abantu ngokumvusa kwabafileyo.” Bathi besizwa ngokuvuka kwabafileyo, abanye babo bamhoza, kodwa abanye bathi, “Sifuna ukuphinda sikuzwe ukhuluma ngale indaba njalo.”

njalo ngilalona lelothemba kuNkulunkulu alalo lamadoda, ukuthi kuzakuba lokuvuka kwabafileyo, abalungileyo lababi. Ngakho ngiyazama kokuphela ukuba isazela sami sihlale sihlanzekile phambi kukaNkulunkulu laphambi kwabantu.

Phezu kwalokho, njengoba bengazange bacabange ukuthi kufanele bagcine ukumazi uNkulunkulu, wabanikela engqondweni yokuxhwala, ukuba benze okungamelanga kwenziwe. Sebegcwele ngokonakala konke, ububi, lobuhaga kanye lokuxhwala. Bagcwale umhawu, lokubulala, lengxabano, lenkohliso kanye lolunya. Bangabanyeyi, labahlebi, labazonda uNkulunkulu, leziqholo, labazigqajayo kanye labazikhukhumezayo; baphemba izindlela zokwenza okubi; badelela abazali babo; kabalangqondo, kabalakholo, kabalazwelo balesihluku. Lanxa besazi isimiso esilungileyo sikaNkulunkulu sokuthi labo abenza izinto ezinje bafanele ukufa, kabaqhubeki nje kuphela besenza zona kanye lezizinto kodwa bayavumelana njalo lalabo abazenzayo.

Ngakho-ke kawulakho ukuxolisa wena owahlulela omunye, ngoba loba kungaphi owahlulela khona omunye, uyazigweba wena ngokwakho, ngoba wena owahlulelayo wenza izinto ezifanayo. Siyakwazi ukuthi ukubahlulela kwakhe uNkulunkulu labo abenza izinto ezinje kweyame eqinisweni. Ngakho lapho wena, umuntu nje, ubahlulela kodwa usenza izinto ezifanayo, ucabanga ukuthi uzakubalekela ukwahlulela kukaNkulunkulu na? Kumbe njalo weyisa ubukhulu bomusa wakhe, ukubekezela kanye lesineke, ungananzeleli ukuthi umusa kaNkulunkulu ukusa ekuphendukeni na? Kodwa ngenxa yobuqholo bakho lenhliziyo yakho engaphendukiyo, uyaziqoqela ulaka oluzakuhlupha ngosuku lolaka lukaNkulunkulu, lapho okuzabonakaliswa khona ukwahlulela kwakhe okulungileyo. UNkulunkulu “uzanika umuntu wonke ngokumayelana lalokho akwenzileyo.” Kulabo abadinga inkazimulo, lodumo kanye lokungabhubhi, ngokuphikelela ekwenzeni okuhle, uzabanika ukuphila okulaphakade. Kodwa labo abazinqinekelayo abala iqiniso balandele ububi, kuzakuba lolaka lokuthukuthela. Kuzakuba lokuhlupheka losizi emuntwini wonke owenza okubi: kuqala kumJuda kulandele kowezizweni, kodwa inkazimulo, lodumo kanye lokuthula kuye wonke owenza okulungileyo: kuqala kumJuda kulandele kowezizweni. Ngoba uNkulunkulu kalabandlululo.

Bonke abenza isono ngaphandle komthetho bazabhubha ngaphandle komthetho, njalo bonke abenza isono ngaphansi komthetho bazakwahlulelwa ngomthetho. Ngoba akusilabo abezwa umthetho abalungileyo emehlweni kaNkulunkulu, kodwa yilabo abalalela umthetho okuzathiwa balungile. (Ngempela, uma abezizwe, abangelawo umthetho, besenza ngokwemvelo izinto ezifunwa ngumthetho, bangumthetho bona ngokwabo, lanxa bengelawo umthetho, njengoba bebonakalisa ukuthi okufunwa ngumthetho kulotshiwe ezinhliziyweni zabo, izazela zabo ziyafakaza, imicabango yabo ibasola iphinde ibavikele.) Lokhu kuzakwenzakala ngosuku uNkulunkulu azakwahlulela izimfihlo zabantu ngoJesu Khristu, njengokutsho kwevangeli lami.

Siyakwazi ukuthi loba kuyini okutshiwo ngumthetho, ukutsho kulabo abangaphansi komthetho, ukuze imilomo yonke ithuliswe lomhlaba wonke ube lomlandu kuNkulunkulu.

kodwa lathi futhi, uNkulunkulu azabalela kubo ukulunga  —  kithi esikholwa kuye yena owavusa uJesu iNkosi yethu kwabafileyo. Wanikelwa ekufeni ngenxa yezono zethu njalo wavuselwa ekuphileni ukuze silungiswe.

Ngakho sangcwatshwa laye ngokubhaphathizelwa ekufeni, ukuze kuthi njengoba uKhristu wavuswa kwabafileyo ngobukhosi bukaYise, lathi singaphila ukuphila okutsha. Uma sihlanganiswe laye kanje ekufeni kwakhe, ngempela sizahlanganiswa laye futhi ekuvukeni kwakhe.

Kodwa njengoba khathesi selikhululwe esonweni laba yizigqili kuNkulunkulu, umvuzo eliwutholayo uholela ebungcweleni, lesiphetho yikuphila okungapheliyo. Ngoba umvuzo wesono yikufa, kodwa isipho sikaNkulunkulu siyikuphila okungapheliyo kuKhristu uJesu iNkosi yethu.

Ngakho, khathesi akusekho ukulahlwa kulabo abakuKhristu uJesu, ngoba ngoKhristu uJesu umthetho woMoya wokuphila wangikhulula emthethweni wesono lokufa.

Lingaphindiseli, bangane bami, kodwa litshiyele ulaka lukaNkulunkulu ithuba, ngoba kulotshiwe ukuthi: “Ukuphindisela ngokwami; ngizaphindisela,” kutsho iNkosi.

Pho wena, kungani usahlulela umzalwane wakho na? Loba kungani useyisa umzalwane wakho na? Ngoba sonke sizakuma phambi kwesihlalo sikaNkulunkulu sokwahlulela. Kulotshiwe ukuthi: “ ‘Ngeqiniso elinjengoba ngikhona,’ kutsho uJehova, ‘amadolo wonke azaguqa phambi kwami; izindimi zonke zizavuma kuNkulunkulu.’ ” Ngakho-ke omunye lomunye wethu uzabika akwenzayo kuNkulunkulu.

Izaligcina liqinile kuze kube sekupheleni, ukuze lingabi lacala ngosuku lweNkosi yethu uJesu Khristu.

Ngoba kakho ongabeka esinye isisekelo ngaphandle kwaleso esivele sesibekiwe, esinguJesu Khristu. Uma umuntu esakhela phezu kwalesisisekelo ngegolide, ngesiliva, ngamatshe adulayo, ngezigodo, ngotshani loba ngamahlanga, umsebenzi wakhe uzabonakaliswa unjalo, ngoba uSuku luzawubeka ekukhanyeni. Uzavezwa obala ngomlilo, njalo umlilo uzahlola umsebenzi womuntu ngamunye ukuthi unjani. Uma lokho okwakhileyo kusala kukhona, uzakwamukela umvuzo wakhe. Kodwa uma kusitsha kuphele du, uzalahlekelwa; yena ngokwakhe uzaphepha, kodwa kube njengomuntu ophunyuka edabula phakathi kwamalangabi.

Ngakho-ke lingahluleli lutho isikhathi esimisiweyo singakafiki; manini iNkosi ize ifike. Yona izakubeka ekukhanyeni okufihlwe emnyameni, njalo izaziveza obala izinjongo zezinhliziyo zabantu. Ngalesosikhathi omunye lomunye uzakwamukela ukubongwa kwakhe kuNkulunkulu.

Kalazi yini ukuthi abaxhwalileyo kabayikudla ilifa lombuso kaNkulunkulu? Lingakhohliswa. Akulazifebe ezixhwalileyo loba abakhonza izithombe loba iziphingi loba amawule esilisa loba abesilisa abaphinganayo loba amasela loba izihwaba loba izidakwa loba abanyeyayo loba amaqili azakudla ilifa lombuso kaNkulunkulu. Njalo lokho yikho abanye benu ababe yikho. Kodwa selageziswa, selangcweliswa, selalungiswa ngebizo leNkosi uJesu Khristu langoMoya kaNkulunkulu wethu.

Kodwa uma sizahlulela kasiyikwahlulelwa.

Kodwa uKhristu wavuswa impela kwabafileyo, izithelo zakuqala zalabo asebelele. Ngoba njengoba ukufa kweza ngomuntu, ukuvuka kwabafileyo lakho kuza ngomuntu. Ngoba njengoba ku-Adamu bonke besifa, ngokunjalo kuKhristu bonke bazaphiliswa. Kodwa yilowo lalowo ngethuba lakhe: UKhristu, oyizithelo zakuqala; muva, ekubuyeni kwakhe, labo abangabakhe. Lapho-ke isiphetho sizafika esenikela umbuso kaNkulunkulu uYise emva kokuba esechithe ukubusa konke, lobukhosi kanye lamandla. Ngoba kumele abuse uNkulunkulu aze azibeke zonke izitha zakhe ngaphansi kwezinyawo zakhe. Isitha sokucina esizachithwa, yikufa. Ngoba uNkulunkulu “usebeke izinto zonke ngaphansi kwezinyawo zakhe,” Nxa esithi “izinto zonke” sezibekwe ngaphansi kwakhe, kusobala ukuthi lokhu akugoqeli uNkulunkulu yena ngokwakhe, owabeka izinto zonke ngaphansi kukaKhristu. Lapho esekwenzile lokhu, iNdodana uqobo izakuba ngaphansi kwakhe yena owabeka izinto zonke ngaphansi kwakhe, ukuze uNkulunkulu abe yikho konke kukho konke.

Kuzakuba njalo-ke ngokuvuka kwabafileyo. Umzimba ohlanyelwayo uyabola, uvuswa ungasaboli; uhlanyelwa useyiswa, uvuswe ngenkazimulo; uhlanyelwa ubuthakathaka, uvuswe usungumzimba womoya. Nxa kulomzimba wemvelo, ukhona njalo lomzimba womoya. Ngakho kulotshiwe ukuthi: “Umuntu wakuqala u-Adamu waba yisidalwa esiphilayo;” kodwa u-Adamu wokucina waba ngumoya ophilisayo. Owomoya kafikanga kuqala, kodwa owemvelo, emva kwalokho kwafika owomoya. Umuntu wakuqala wayenziwe ngothuli lomhlabathi; umuntu wesibili wavela ezulwini. Njengoba wayenjalo umuntu wasemhlabeni, banjalo lalabo abangabomhlaba; njalo njengoba enjalo umuntu ovela ezulwini, banjalo labo abangabasezulwini. Njalo njengoba silesimo somuntu wasemhlabeni, ngokunjalo sizakuba lesimo somuntu ovela ezulwini.

Bazalwane, ngithi kini inyama legazi akungeke kudle ilifa lombuso kaNkulunkulu, lokubolayo akulidli ilifa lokungaboliyo. Lalelani, ngilitshela imfihlakalo: Kasiyikufa sonke, kodwa sonke sizaguqulwa  — ngesikhatshana, ngokucwayiza kwelihlo, ngecilongo lokucina. Ngoba icilongo lizakhala, abafileyo bazavuswa bengabolanga, njalo sizaguqulwa. Ngoba okubolayo kumele kuzigqokise ngokungaboliyo, lokufayo ngokungafiyo. Nxa okubolayo sekugqokiswe okungaboliyo, lokufayo ngokungafiyo, kuzagcwaliseka isitsho esilotshiweyo esithi: “Ukufa kuginyiwe ekunqobeni.”

Ngoba sonke kumele sime phambi kwesihlalo sokwahlulela sikaKhristu, ukuze lowo lalowo amukele okumfaneleyo okwezinto azenzayo esemzimbeni, langabe ngezinhle loba ezimbi. Ngakho njengoba sikwazi ukuthi ukwesaba iNkosi kuyini, siyazama ukubancenga abantu. Lokhu thina esiyikho kusobala kuNkulunkulu, njalo ngithemba kusobala lakuzazela zenu.

Ngoba ngiyesaba ukuthi ekufikeni kwami angiyikulifica liyilokho engifuna libe yikho, mhlawumbe lani lingangifumani ngiyilokho elifuna ngibe yikho. Ngiyesaba ukuthi kungaba khona ukuxabana, lomona, lokuthukuthela, lemibango, lesinyeyo, lokuhleba, lokuzikhukhumeza, kanye lokuphithizela. Ngiyesaba ukuthi ekufikeni kwami futhi uNkulunkulu wami uzangidumaza phambi kwenu, njalo ngizakuba lusizi ngabanengi abenze izono ngaphambili njalo bengaphendukanga kulokhokungcola, isono sokufeba kanye lamanyala abangena kuwo.

Izenzo zemvelo yesono zisobala: ubufebe, lokungesabi ukujeziswa, lokuxhwala; ukukhonza izithombe lobuthakathi; inzondo, lokuxabana, lomona, lentukuthelo, lobuhwaba, lokungezwani, lokungavumelani kanye lomhawu; ukudakwa, lokuzitika ngamanyala kanye lokunye okunjalo. Ngiyalixwayisa, njengoba ngenza ngaphambili, ukuthi abaphila kanje kabayikulidla ilifa lombuso kaNkulunkulu.

Lingakhohliswa: UNkulunkulu angeke ahlekwa. Umuntu uvuna lokho akuhlanyelayo. Lowo ohlanyela ukuthokozisa imvelo yakhe yesono, kuleyomvelo uzavuna ukuchitheka; lowo ohlanyela ukuthokozisa uMoya, kuMoya uzavuna ukuphila okulaphakade.

Kuye silokuhlengwa ngegazi lakhe, lokuthethelelwa kwezono, ngokumayelana lengcebo yomusa kaNkulunkulu

Kodwa phakathi kwenu akungabi khona lokuncane ukuxhwala kobufebe, loba yikuphi ukungcola, loba okobuhwaba, ngoba lezizinto kazifanelanga ebantwini abangcwele bakaNkulunkulu. Njalo akumelanga kube lenhlamba, lenkulumo zobuthutha loba ubuphoxo, okuyizinto ezingafanelanga, kodwa kakube lokubonga. Ngoba kuliqiniso ukuthi: Akulamuntu oyisixhwali, longcolileyo loba oyisihwaba  —  umuntu onjalo ukhonza izithombe  —  olelifa embusweni kaKhristu lokaNkulunkulu. Lingavumi ukukhohliswa ngumuntu ngamazwi ayize, ngoba ngenxa yezinto ezinje ulaka luka-Nkulunkulu lwehlela phezu kwalabo abangalaleliyo.

Ngifuna ukumazi uKhristu lamandla okuvuka kwakhe ekufeni lobudlelwano bokuhlanganyela ekuhluphekeni kwakhe, ngibe njengaye ekufeni, ukuze, ngenye indlela, ngithole ukuvuka kwabafileyo.

Kodwa elethu ikithi lisezulwini. Njalo simlindele ngokutshiseka uMsindisi evela khonale, iNkosi uJesu Khristu, yena okuzakuthi ngamandla amenza abeke izinto zonke ngaphansi kwakhe, uzaguqula imizimba yethu elesimo esiphansi ibe njengomzimba wakhe olenkazimulo.

Ngoba wasihlenga embusweni wobumnyama wasiletha embusweni weNdodana yakhe ayithandayo, okukuyo ukuhlengwa kwethu, ukuthethelelwa kwezono.

Kodwa khathesi uselibuyisile ngomzimba kaKhristu uqobo lwawo ngokufa ukuze alimise lingcwele ebusweni bakhe, lingelasici njalo limsulwa  — uma liqhubeka ngokukholwa kwenu, ligxile njalo liqinile, lingasuki ethembeni eliliphiwa ngevangeli. Leli yilo ivangeli elalizwayo eselitshunyayelwe kuzo zonke izidalwa ngaphansi kwezulu, mina Phawuli esengibe yinceku yalo.

Ngakho kubulaleni konke okungokwemvelo yenu yasemhlabeni: ukuxhwala kobufebe, ukungcola, inkanuko, izifiso ezimbi kanye lobuhwaba, okuyikukhonza izithombe. Ngenxa yalezizinto ulaka lukaNkulunkulu luyeza. Lalijwayele ukuhamba kulezizindlela, empilweni elake layiphila. Kodwa khathesi zilahleni zonke izinto ezinjengalezi: ulaka, ukuthukuthela, inzondo, ukunyeya lenkulumo ebolileyo. Lingaqambelani amanga, njengoba selihlubule uqobo lwenu oludala lezenzo zalo

Loba ngubani owenza okubi uzaphindiselwa ububi bakhe, njalo akukho bandlululo.

Kayilinike amandla angaphakathi ukuze lingasoleki njalo libe ngcwele phambi kukaNkulunkulu wethu loBaba ekufikeni kweNkosi yethu uJesu labangcwele bayo bonke.

Sengathi uNkulunkulu uqobo, uNkulunkulu wokuthula, angalingcwelisa ngokupheleleyo. Sengathi umoya wenu wonke, lomphefumulo kanye lomzimba kungalondolozwa kungelasici ekufikeni kweNkosi yethu uJesu Khristu.

Konke lokhu kuyibufakazi bokuthi ukwahlulela kukaNkulunkulu kulungile, ngakhoke lizabalwa njengabafanele umbuso kaNkulunkulu, eliwuhluphekelayo. UNkulunkulu ulungile: Uzaphindisela izinhlupho kulabo abalihluphayo alinike, kanye lathi, ukuhlaliseka lina elihlutshwayo. Lokhu kuzakwenzakala lapho iNkosi uJesu isibonakaliswa ezulwini phakathi komlilo ovuthayo ilezingilosi zayo ezilamandla. Izabajezisa labo abangamaziyo uNkulunkulu njalo bengalilaleli ivangeli leNkosi yethu uJesu. Bazajeziswa ngokubhujiswa okulaphakade bavalelwe ngaphandle kobukhona beNkosi lasenkazimulweni yamandla ayo ngosuku ezafika ngalo ukuba idunyiswe ngabantu bayo abangcwele lokuba ibatshazwe phakathi kwabo bonke abakholwayo. Lokhu kugoqela lani, ngoba labukholwa ubufakazi bethu kini.

Siyakwazi ukuthi umthetho ulungile uma umuntu ewusebenzisa kuhle. Siyakwazi lokuthi umthetho kawenzelwanga abantu abalungileyo, kodwa wenzelwa abeqa imithetho labahlamuki, abangamaziyo uNkulunkulu labayizoni, abangengcwele labangakholwayo; wenzelwa ababulala oyise labonina, lababulali, lezifebe, kanye lezixhwali, abathengisa izigqili labaqamba amanga kanye labafungela amanga  —  kanye lokunye okuphambene lemfundiso eqotho evumelana levangeli elilenkazimulo kaNkulunkulu obusisekileyo, angiphathisa lona.

Banike labo abantu izeluleko lezi, ukuze angabi khona ongasoleka.

Ngoba akulalutho esalulethayo emhlabeni, njalo akulalutho esingasuka lalo kuwo.

ukuba ugcine umlayo lo kungekho sici loba ukusoleka kuze kube sekubonakaleni kweNkosi yethu uJesu Khristu,

Nansi isitsho esiqotho: Uma safa laye sizaphila laye futhi; uma sibekezela sizabusa laye futhi. Uma simphika, laye futhi uzasiphika;

Phambi kukaNkulunkulu loKhristu uJesu, ozakwahlulela abaphilayo labafileyo, njalo mayelana lokubonakala kwakhe kanye lombuso wakhe, ngikunika umlayo lo:

Ngoba mina sengilungele ukwenziwa umnikelo, njalo lesikhathi sokusuka kwami sesifikile. Ngilwile ukulwa okuhle, umjaho wami sengiwuqedile, ukukholwa ngikulondolozile. Khathesi ngigcinelwe umqhele wokulunga, iNkosi, uMahluleli olungileyo, ezanginika wona ngalelolanga  —  njalo kungayisimi kuphela, kodwa bonke futhi abatshisekela ukubonakala kwayo.

Ngakho kufanele siqaphelisise lokho esikuzwileyo, ukuze singaduki. Ngoba uma ilizwi elakhulunywa yizingilosi liqinisa, njalo konke ukona lokungalaleli kuthole isijeziso sakho esifaneleyo, pho thina sizaphepha njani uma singanaki insindiso enkulu kangaka na? Ukusindiswa lokhu, okwabikwa kuqala yiNkosi, kwafakazwa kithi yilabo abayizwayo.

Njengalokhu umuntu wamiselwa ukufa kanye, kuthi emva kwalokho abhekane lokwahlulelwa,

Ngasengisithi, ‘Ngilapha  —  kulotshiwe ngami emqulwini  —  ngilande ukuzakwenza intando yakho, O Nkulunkulu.’ ”

Njalo kasicabangeni ukuba singakhuthazana kanjani ethandweni lasezenzweni ezinhle. Kasingakudeli ukuhlangana, njengalokhu abanye abajayele ukukwenza, kodwa kasikhuthazane  —  ikakhulu njengoba libona uSuku lusondela. Uma siqhubeka sisenza izono ngabomu emva kokuba iqiniso sesilazi, kawusekho umhlatshelo wezono, kodwa umlindelo kuphela owesabekayo wokwahlulelwa kanye lomlilo ovuthayo ozaqothula izitha zikaNkulunkulu.

Ngoba thina siyamazi lowo owathi, “Ukuphindisela ngokwami; ngizabuyisela,” njalo wathi, “INkosi izakwahlulela abantu bayo.” Kuyinto eyesabekayo ukuwela ezandleni zikaNkulunkulu ophilayo.

Kodwa lina lize eNtabeni iZiyoni, iJerusalema lasezulwini, umuzi kaNkulunkulu ophilayo. Lize kuzinkulungwane lezinkulungwane zezingilosi ezihlangane ngentokozo, ebandleni lezibulo, ezimabizo azo alotshiwe ezulwini. Lize kuNkulunkulu, umahluleli wabantu bonke, emimoyeni yabantu abalungileyo abaphelelisiweyo,

Ukuthathana kumele kuhlonitshwe ngumuntu wonke, kuthi lombheda wokuthathana uhlale ungangcoliswanga, ngoba uNkulunkulu uzakwahlulela isifebe labo bonke abayiziphingi.

Ngoba selichithe isikhathi esaneleyo ngaphambili lisenza lokho abahedeni abakhetha ukukwenza  —  impilo yobudlova, inkanuko, lokudakwa, ukuzitika, ukuzivusa amadlabuzane kanye lezithombe eziyisinengiso.

Kodwa kuzamela baziphendulele kuye olungele ukwahlulela abaphilayo kanye labafileyo. Ngoba lesi yisona sizatho esenza kwatshunyayelwa ivangeli lakulabo khathesi asebefile, ukuze bahlulelwe ngokwabantu mayelana lomzimba, kodwa baphile ngokukaNkulunkulu mayelana lomoya. Ukuphela kwezinto zonke sekusondele. Ngakho kumele liqedisise njalo lizithibe ukuze likhuleke.

Ngoba kuyisikhathi sokuthi ukwahlulela kuqalise ngabendlu kaNkulunkulu; njalo uma kuqalisa ngathi, isiphetho sizakuba yini kulabo abangalaleli ivangeli likaNkulunkulu na?

Ngoba uma uNkulunkulu engaziyekelanga izingilosi ekwenzeni kwazo isono, kodwa wazisa egehena, wazifaka emigodini emnyama ukuba zigcinelwe ukwahlulelwa;

uma lokhu kunjalo, uNkulunkulu uyakwazi ukuhlenga abantu abamesabayo ekulingweni kanye lokugcinela abangalunganga usuku lokwahlulela, eqhubeka ngokujeziswa kwabo. Lokhu kuliqiniso ikakhulu kulabo abalandela izinkanuko zokonakala ezemvelo yabo yesono njalo beseyisa umthetho. Ngesibindi lokuzikhukhumeza, abantu laba kabakwesabi ukuhlambaza izidalwa zasezulwini; ikanti lezingilosi, lanxa ziqinile njalo zilamandla amakhulu, kazizethesi macala ngokuhlambaza izidalwa ezinjalo phambi kweNkosi. Kodwa abantu laba bahlambaza ngezindaba abangaziqedisisiyo. Banjengezilo ezilolunya, izidalwa ezibuswa yimvelo, ezazalelwa ukubanjwa lokubulawa kuphela, labo njalo njengezilo bazabhubha. Bazaphindiselwa ngokubi ngenxa yokubi abakwenzileyo. Umcabango wabo ngenjabulo yikuminza emini libalele. Bayizixhwali lezoni, bezitika enjabulweni yabo besidla lani edilini. Ngamehlo agcwele ubufebe kabayekeli ukwenza isono; baxhwalisa abangaqinanga; bazingcitshi zobugovu  —  inzalo eqalekisiweyo! Bayitshiyile indlela eqondileyo, baduka belandela indlela kaBhalamu indodana kaBheyori owayethanda inzuzo yobubi. Kodwa wakhuzwa ngezenzo zakhe ezimbi ngubabhemi  —  inyamazana eyisimungulu  —  eyakhuluma ngelizwi lomuntu yanqanda ubuhlanya bomphrofethi. Abantu laba bayimithombo engelamanzi lezinkungu eziqhutshwa yisiphepho. Umnyama omkhulu ugcinelwe bona.

Ngalonalelolizwi amazulu akhathesi kanye lomhlaba kugcinelwe umlilo, kulindele usuku lokwahlulela lokubhujiswa kwabantu abangamesabiyo uNkulunkulu. Kodwa, bangane abathandekayo, lingakhohlwa into le eyodwa ukuthi: ENkosini usuku lunjengeminyaka eyinkulungwane, leminyaka eyinkulungwane injengosuku olulodwa. INkosi kayiphuzi ukugcwalisa isithembiso sayo, njengokuqedisiswa ngabanye ngokuphuza. Iyalibekezelela, ingafuni ukuba lamunye abhubhe, kodwa ukuba umuntu wonke aphenduke.

Kodwa usuku lweNkosi luzafika njengesela. Amazulu azanyamalala ngokuhlokoma; imimoya izaqothulwa ngomlilo, lomhlaba lakho konke okukuwo kuzatshabalaliswa. Njengoba izinto zonke zizachithwa ngale indlela, lina kumele libe ngabantu abanjani na? Kumele liphile impilo engcwele leyokumesaba uNkulunkulu lisalindele usuku lwakhe liphangisise ukufika kwalo. Lolosuku luzaletha ukuchithwa kwamazulu ngomlilo, njalo imimoya izancibilikiswa yikutshisa. Kodwa mayelana lesithembiso sakhe silindele izulu elitsha lomhlaba omutsha, ikhaya lokulunga.

Ngakho-ke, bangane abathandekayo, njengoba lokhu likulindele, yenzani imizamo yonke ukuba litholakale lingelasici, lingelacala njalo lihlalisane laye ngokuthula.

Yeka ubukhulu bothando uBaba asinika lona, ukuba sibizwe ngokuthi singabantwana bakaNkulunkulu! Njalo lokho yikho esiyikho! Okwenza umhlaba thina ungasazi yikuthi laye kawumazanga. Bangane abathandekayo, khathesi singabantwana bakaNkulunkulu, njalo lokho esizakuba yikho akukaziwa. Kodwa siyakwazi ukuthi lapho ebonakala sizakuba njengaye, ngoba sizambona njengoba enjalo.

Siyakwazi ukuthi sesidlulile ekufeni saya ekuphileni, ngoba siyabathanda abazalwane bethu. Lowo ongathandiyo ulokhu esekufeni. Lowo ozonda umzalwane wakhe ungumbulali, njalo liyakwazi ukuthi akulambulali olokuphila okungapheliyo kuye.

Uthando luyapheleliswa kithi ukuze sibe lesibindi ngosuku lokwahlulelwa, ngoba kulo umhlaba lathi sinjengaye.

Ubufakazi lobo yilobu: UNkulunkulu usinike ukuphila okulaphakade, njalo lokhu kuphila kuseNdodaneni yakhe. Lowo oleNdodana yakhe ulokuphila; lowo ongelayo iNdodana kaNkulunkulu kalakho ukuphila.

Lezingilosi ezingagcinanga izikhundla zazo zamandla kodwa zadela ikhaya lazo  —  lezi wazigcina ebumnyameni, zibotshwe ngamaketane angaqamukiyo zilindele ukwahlulelwa ngoSuku olukhulu. Ngokunjalo, iSodoma leGomora lamadolobho aseduzane azinikela ekuxhwaleni kobufebe lokonakala. Ayisibonelo salabo abezwa isijeziso somlilo wanini lanini.

Bangamagagasi olwandle alamandla, bebhubhudla ihlazo labo; izinkanyezi ezintulayo, ezilobumnyama obukhulu obugcinelwe zona kuze kube nininini.

ukwahlulela abantu bonke, lokubalahla ngamacala bonke abangamesabiyo uNkulunkulu ngenxa yezenzo zabo zonke zokweyisa uNkulunkulu abazenzayo ezindleleni zabo zokwedelela uNkulunkulu, langenxa yamazwi wonke alukhuni izoni ezingamesabiyo uNkulunkulu ezawakhuluma kubi ngaye.”

Yibani lesihawu kulabo abathandabuzayo; lenyule abanye emlilweni libasilise; kwabanye bonakalisani isihawu, kuhlangene lokwesaba  —  lizonde lezigqoko ezingcoliswe yimizimba exhwalileyo. Kuye olamandla okuligcina ukuba lingawi, lokulibeka phambi kwenkazimulo yobukhona bakhe kungelasici njalo ngentokozo enkulu  —

Kwathi ngimbona, ngawela ezinyaweni zakhe njengofileyo. Wabeka isandla sakhe sokunene phezu kwami, wathi: “Ungesabi. Mina ngingowokuQala lokuCina. NgingoPhilayo; ngangifile, njalo khangela ngiyaphila kuze kube nininini! Njalo ngiphethe izivulo zokufa kanye leNdawo yabafileyo.

Lowo olendlebe, kezwe okutshiwo nguMoya emabandleni. Lowo onqobayo ngizamnika ilungelo lokudla esihlahleni sokuphila esisepharadisi kaNkulunkulu.

Lowo olendlebe, kezwe okutshiwo nguMoya emabandleni. Lowo onqobayo kasoze alinyazwe lakancane yikufa kwesibili.

Lowo onqobayo uzagqoka okumhlophe njengabo. Ibizo lakhe kangisoze ngilesule encwadini yokuphila, kodwa ibizo lakhe ngizalivuma phambi kukaBaba lezingilosi zakhe.

Lowo onqobayo, ngizamnika ilungelo lokuhlala lami esihlalweni sami sobukhosi, njengoba lami nganqoba ngasengihlala loBaba esihlalweni sakhe sobukhosi.

Yamemeza ngelizwi elikhulu yathi, “Koze kube nini, Nkosi Yobukhosi, engcwele leqotho, ukuze wahlulele abasemhlabeni uphindisele igazi lethu na?”

Ingilosi yesikhombisa yakhalisa icilongo layo, kwasekusiba lamazwi amakhulu ezulwini, ayesithi: “Umbuso wasemhlabeni usube ngumbuso weNkosi yethu loKhristu wayo, njalo izabusa kuze kube nininini.”

Izizwe zazithukuthele; lolaka lwakho selufikile. Isikhathi sokwahlulela abafileyo sesifikile, kanye lesokuvuza izinceku zakho abaphrofethi labangcwele bakho kanye lalabo abalihloniphayo ibizo lakho, abancinyane labakhulu  —  kanye lesokuchitha labo abachitha umhlaba.” Emva kwalokho ithempeli likaNkulunkulu lavulwa ezulwini, phakathi kwethempeli lakhe kwabonakala ibhokisi elingcwele lesivumelwano sakhe. Kwasekusiba lokuphazima kwemibane, lokundindizela, lokukhwaza kwezulu, lokuzamazama komhlaba kanye lesiqhotho esikhulu.

Akulamanga atholakala emilonyeni yabo; kabalasici.

Ngelizwi elikhulu yathi, “Mesabeni uNkulunkulu limdumise, ngoba isikhathi sokwahlulela kwakhe sesifikile. Mkhonzeni yena owadala amazulu, lomhlaba, lolwandle kanye lemithombo yamanzi.”

laye uzanatha iwayini lentukuthelo kaNkulunkulu, elithelwe ngamandla agcweleyo enkomitshini yolaka lwakhe. Uzachukuluzwa ngesolufa elitshisayo phambi kwezingilosi ezingcwele laphambi kweWundlu. Intuthu yokuchukuluzwa kwabo ithunqa kuze kube nininini. Akukho suku lokuphumula loba ubusuku kulabo abakhonza inyamazana lesifanekiso sayo, loba lowo obekwa uphawu lwebizo layo.”

Ngasengisizwa ingilosi eyayingumphathi wamanzi isithi: “Ulungile ngalezizahlulelo wena okhona lowayekhona, oNgcwele, ngoba wahlulele kanjalo; ngoba bachitha igazi labangcwele bakho lelabaphrofethi, ngakho ubanike igazi ukuba balinathe njengokubafaneleyo.” Ngezwa i-alithare liphendula lisithi: “Yebo, Nkosi Nkulunkulu Somandla, ziqotho njalo zilungile lezi zahlulelo zakho.”

Emva kwalokhu ngezwa umsindo onjengokuhlokoma kwexuku elikhulu ezulwini limemeza lisithi: “Haleluya! Ukusindisa lodumo lamandla ngokukaNkulunkulu wethu, ngoba ukwahlulela kwakhe kuqotho njalo kulungile. Usilahlile isiphingi esikhulu esixhwalisa umhlaba ngobufebe baso. Uphindisele kuso igazi lezinceku zakhe.” Bamemeza njalo bathi: “Haleluya! Intuthu yokutsha kwaso ithunqa kuze kube nininini.”

Ingilosi yasisithi kimi, “Loba ukuthi: ‘Babusisiwe labo abanxusiweyo edilini lomtshado weWundlu!’ ” Yengeza yathi, “La ngamazwi aqotho kaNkulunkulu.”

Ngabona izulu livulekile njalo khonapho phambi kwami kwakulebhiza elimhlophe, umgadi walo ethiwa nguThembekile loQiniso. Uyahlulela ngokulunga alwe impi.

Ngabona izihlalo zobukhosi okwakuhlezi kuzo labo ababephiwe amandla okwahlulela. Ngabona imiphefumulo yalabo ababequnywe amakhanda ngenxa yokufakazela kwabo uJesu langenxa yelizwi likaNkulunkulu. Babengasikhonzanga isilo loba isifanekiso saso njalo bengabekwanga uphawu lwaso emabunzini abo loba ezandleni zabo. Bavuka, njalo baphila njalo babusa loKhristu iminyaka eyinkulungwane. (Inengi labafileyo kalivukanga kwaze kwaphela iminyaka eyinkulungwane.) Lokhu yikuvuka ekufeni kwakuqala.

Ngabuya ngabona isihlalo sobukhosi esikhulu kanye lalowo owayehlezi kuso. Umhlaba lomkhathi kwabaleka phambi kwakhe, akwaze kwaba lendawo yakho. Ngasengibona abafileyo, abancane labakhulu, bemi phambi kwesihlalo sobukhosi, kwasekuvulwa izincwadi. Kwavulwa enye incwadi, eyincwadi yokuphila. Abafileyo bahlulelwa mayelana lalokho ababekwenzile okwakulotshwe ezincwadini. Ulwandle lwakhupha abafileyo ababekulo, ukufa leHadesi kwakhupha abafileyo ababekukho, umuntu ngamunye wahlulelwa mayelana lalokho akwenzayo. Ukufa leHadesi kwaphoselwa echibini lomlilo. Ichibi lomlilo liyikufa kwesibili. Uma umuntu ibizo lakhe lalitholakala lingalotshwanga encwadini yokuphila, wayephoselwa echibini lomlilo.

Ngabuya ngabona izulu elitsha lomhlaba omutsha, ngoba izulu lakuqala lomhlaba wakuqala kwasekudlule, njalo ulwandle lwalungasekho. Ngabona iDolobho eliNgcwele, iJerusalema elitsha, lisehlela phansi liphuma ezulwini kuNkulunkulu lilungiswe njengomlobokazi ececele umkakhe. Ngezwa ilizwi elikhulu livela esihlalweni sobukhosi lisithi, “Khathesi ikhaya likaNkulunkulu selisebantwini, uzahlala labo. Bazakuba ngabantu bakhe, njalo uNkulunkulu yena uqobo uzakuba labo abe nguNkulunkulu wabo. Uzazesula zonke izinyembezi emehlweni abo. Akusayikuba khona futhi ukufa loba ukulila loba ukukhala loba ubuhlungu, ngoba umumo omdala wezinto usudlule.”

Lowo owayehlezi esihlalweni sobukhosi wathi, “Ngenza izinto zonke zibe zintsha!” Wabuya wathi, “Kulobe lokhu, ngoba amazwi la aqotho njalo aliqiniso.” Wasesithi kimi, “Sekwenzakele. Mina ngingu-Alfa lo-Omega, ukuQala lokuCina. Lowo owomileyo ngizamnathisa emthonjeni wamanzi okuphila kungekho mbadalo. Lowo onqobayo uzakudla ilifa lakho konke lokhu, njalo ngizakuba nguNkulunkulu wakhe yena abe yindodana yami. Kodwa amagwala, labangakholwayo, labaxhwalileyo, lababulali leziphingi, labathakathi, labakhonza izithombe labo bonke abaqamba amanga  —  indawo yabo izakuba sechibini lomlilo wesolufa ovuthayo. Lokhu yikufa kwesibili.”

Akulalutho olungcolileyo oluzake lungene kulo, loba ngubani owenza okulihlazo kumbe inkohliso, kodwa labo kuphela abalamabizo abo alotshwe encwadini yokuphila yeWundlu.

Owenza okubi kaqhubeke esenza okubi; oxhwalileyo kaqhubeke ngokuxhwala; olungileyo kaqhubeke esenza okulungileyo; njalo ongcwele kaqhubeke engcwele.” “Khangelani, ngiyeza masinyane! Umvuzo wami ukimi, njalo umuntu wonke ngizamupha mayelana lalokho akwenzileyo.