07 – Aso o le Faamasinoga

O le iva sefulu ma le iva o tausaga o Aperamo, na faaali mai ai Ieova ia Aperamo, ua faapea mai foi ia te ia, O a‘u o le Atua e o‘u le malosi uma lava; ia e savali i o‘u luma, ma ia sao lau amio.

Ia mamao lava ia te oe ona e faia faapea e fasioti i e amiotonu faatasi ma e amio leaga; ma ona faagatusa e amiotonu ma e amio leaga, ia mamao lava lea ia te oe. O le na te faamasinoina le lalolagi uma, e le faia ea e ia le faamasinoga tonu?

Ia sao lau amio i luma o Ieova lou Atua.

Na ou amiotonu i ona luma, na ou taofia a‘u i la‘u agasala.

Ona alalaga fiafia ai lea o laau o i le vao matua i luma o Ieova, auā o loo afio mai e faamasino le lalolagi.

O oe foi Solomona e, lo‘u atalii, ia iloa e oe le Atua o lou tamā, ma auauna ia te ia ma le loto atoa, ma le loto fiafia; auā e suesue e Ieova o loto uma, ma ua silafia o mafaufau uma o manatu; afai e te saili atu ia te ia, ona e maua ai lea o ia; a e afai e te tuua o ia, ona tuulafoaiina lea o oe e ia e faavavau.

Auā ua ou iloa, o loo soifua le na te togiolaina a‘u; o aso amuli foi e tulai mai ai o ia i luga o le eleele. E ui lava foi ina faaumatia lenei tino pe a mavae atu lo‘u pa‘u, a e ou te iloa atu le Atua i lo‘u tino; ou te iloa atu ia te ia mo a‘u lava, e vaai atu foi o‘u mata ia te ia, a e le o se tasi; pe a le toe ai o‘u manao i totonu ia te au. Auā ua tatau pe ana outou fai mai, Se a le mea ua tatou tuliloa atu ai ia te ia? Ina ua iloa mai ia te au le aa o le upu. Ia outou fefefe i le pelu; auā o le ita, o le agasala lea e oo mai ai le pelu; ina ia iloa e outou e fai le faamasinoga.

Ua tuu le tagata amio leaga mo le aso o le malaia; e ta‘ita‘iina atu i latou i le aso o le toasa tele.

ia fuatia a‘u e ia i le fua faatautau tusa, ia silafia ai e le Atua ua sao la‘u amio.

E le faapea o e amio leaga; a e pei o aputi o saito i latou ua lelea i le matagi. O le mea lea e le tutū ai o e amio leaga i le faamasinoga, e le tutū foi tagata agasala i le faapotopotoga o e amiotonu. Auā ua silafia e Ieova le ala o e amiotonu; a e fano lava le ala o e amio leaga.

A o Ieova, e tietie lava ia e faavavau; ua saunia e ia lona nofoālii e faamasino ai. O ia lava na te faamasinoina le atulaulau ma le tonu; na te faatonuina ma le sa‘o finauga a nuu.

E tulia i seoli o e fai amio leaga, o nuu uma lava o e faagalogalo i le Atua.

Na ou amiotonu i ona luma, na ou taofia a‘u ina ne‘i o‘u agasala.

Ua manatunatu le tagata amio leaga i se mea e leaga ai le tagata amiotonu; ua lilivau foi ona nifo ia te ia. E soisoi le Alii ia te ia; auā ua na silafia o le a sau lona aso.

A e peitai e faaola e le Atua lo‘u agaga ai le pule a le tuugamau; auā na te talia mai a‘u. Selā.

Latou te sao ea ona o le amio leaga? Le Atua e, ia e lafoina i lalo le nuu i lou toasa. Ua e faitauina lava lo‘u fesolasolatai; ia e utu o‘u loimata i lau fagu; e le o i ai ea i lau tusi?

Ia sōloia i latou ai le tusi o le ola; aua foi ne‘i tusia i latou faatasi ma e ua amiotonu.

Na ona vaai i ai ou mata, e te iloa atu foi le taui o e amio leaga.

auā o loo afio mai, auā o loo afio mai e faamasino le lalolagi; na te faamasinoina le atu laulau i le amiotonu, atoa ma nuu i lona faamaoni.

auā o loo afio mai o ia e faamasino le lalolagi; na te faamasino le atu laulau ma le amiotonu, atoa ma nuu i le tonu.

Na silasila mai ou fofoga i o‘u tino uma ina o afuafua; ua tusia foi uma lava i lau tusi, o ona aso foi na faia ai, a o leai ni o‘u tino.

E tausi Ieova i e alolofa atu ia te ia uma lava; a e fano ia te ia o e amio leaga atoa uma.

E le aoga le oloa i le aso o le toasa; a o le amiotonu, e laveai lea nai le oti.

Ona ou faapea ifo lea i lo‘u loto, E faamasinoina e le Atua le ua amiotonu atoa ma le ua amio leaga; auā e taitasi ma ona lava po i mea uma ma galuega uma i lea mea.

E sili ona lelei o le ta‘uleleia i le suāuu lelei; ma le aso e oti ai e sili i le aso e fanau mai ai.

Se‘i tatou faalogo ia i le iuga o ia mea uma, Ia e mata‘u i le Atua, ma e anaana i ana poloaiga; auā o mea ia e tatau i tagata uma. Auā e faamasinoina e le Atua galuega uma, atoa ma mea lilo uma lava, o mea lelei atoa ma mea leaga.

e vāai i latou i le laueleele, faauta foi, o le puapuaga ma le pouliuli, o le pouliuli e atuatuvale ai; e tulia foi i latou i le pogisa.

Ou te faasalaina le lalolagi ona o a latou amio leaga, o tagata ulavavale foi ona o a latou agasala; ou te faaumatia foi le faasausili o e faamaualuluga, ou te lafotuina i lalo le faasiasia o e faasaua.

E faaumatia e ia le oti e faavavau; e soloiesea foi e le Alii o Ieova o loimata i mata uma lava; e faateaeseina foi e ia le gao o lona nuu i le lalolagi uma lava; auā ua fetalai mai ai Ieova.

E toe ola mai ou tagata oti, o latou tino oti e toe tutū mai. Ina ala mai ia, ma alalaga fiafia outou e o nonofo i le efuefu; auā o lou sau e pei o le sau o le vao iti ia; e lafo atu foi e le eleele e ua oti.

E faaalia lou tino, e vaaia foi lou mā; ou te taui ma sui, ou te le mafai ona ia tu mai se tagata. O le na faatauina i tatou, o Ieova o ‘au lona suafa, o le Paia o Isaraelu.

E tala‘i le tausaga e talileleia mai ai e Ieova, ma le aso e taui ai ma sui e lo tatou Atua; e faamatalaloto i e faanoanoa uma lava;

Auā faauta mai, ou te faia le lagi fou ma le lalolagi fou; e le toe manatua mea na muamua, e le alu ae foi i le loto.

Auā e pei ona tumau i o‘u luma o le lagi fou ma le lalolagi fou ou te faia, ua fetalai mai ai Ieova, e faapea ona tumau o a outou fanau ma lo outou igoa. O lea masina faatoa vaaia, ma lea masina faatoa vaaia, o lea sapati ma lea sapati e o mai ai tagata uma lava e ifo mai i o‘u luma, ua fetalai mai ai Ieova. Latou te o atu foi, ma latou matamata i tino o tagata oti ē sa fouvale ia te au; auā e le mamate o latou ilo, e le tineia foi lo latou afi; e inosia foi i latou e tagata uma lava.

Faauta, o agaga uma, o o‘u lava i latou; e pei o le agaga o le tamā ona fai mo‘u, e faapea foi le agaga o le atalii; o le tagata e agasala e oti ia.

Na ou vaavaai ina seia tuu mai o nofoālii, ua tietie mai foi Lē ua mai anamuā ona aso, ua sinasina lona ofu e pei o le kiona, ma ona lauao e pei o le fulufulu mamoe e lelei; o lona nofoālii o le afi mumū ia, ua se afi ua mu ana mea e taavalevale a‘i. Ua tafe mai le afi ua alu atu nai ona luma, ua afe ni afe o e auauna ia te ia, e mano ni mano o e laulaututū i ona luma; ua nofoia le faamasinoga, ma ua fofola tusi.

A e maua le malo e le au paia a lē Silisili ese, e fai foi mo i latou le malo e faavavau, e faavavau lava.

Na ou iloa atu ua fai taua foi lena nifo i le au paia, ma ua manumalo ia te i latou; ina seia afio mai Lē ua mai anamuā ona aso, ma ua tuuina atu le faamasinoga i le au paia a lē Silisili ese; ua oo mai foi ona po ua maua mai ai le malo e le au paia.

Na te faia upu i lē Silisili ese, ma faaumatia le au paia a lē Silisili ese, e manatu o ia e faaliliu i tausaga ma tulafono; e tuuina atu foi i latou i lana pule seia mavae le tausaga, ma tausaga, ma le vaeluagalemu o le tausaga. A e nofoia le faamasinoga, ona aveeseina ai lea e i latou o lana pule, ia faaiuina ma faaumatia ia oo i le iuga. O le malo, ma le pule, atoa ma le mamalu o le malo i lalo ifo o le lagi uma, e tuuina atu ia i le nuu o le au paia a lē Silisili ese, o lona malo, o le malo e faavavau lea, e auauna ma usiusitai ia te ia o pule uma lava.

O ona po foi ia e tulai ai Mekaeli, o le alii sili, o le na te tulai ona o tagata o lou nuu; e oo mai foi aso vale, e leai sona tusa talu ona faatoa tupu o nuu, ua oo i ia lava aso; o ona po foi ia e laveaiina ai ou tagata, o i latou uma o e ua tusia i le tusi. E toatele foi o e momoe i le efuefu o le eleele latou te ala mai, o isi i le ola e faavavau, a o isi i le faalumaina ma le inosia e faavavau. O e popoto foi, e fepulafi i latou faapei o le pupula o le lagi; o i latou foi ua faaliliu ai tagata e toatele ia amiotonu, e pei o fetu i latou e faavavau faavavau lava. A o oe Tanielu e, ia e pupuni o ia upu, ma faamaufaailogaina le tusi, seia oo i ona po o le iuga; e fetaufetuliai tagata e toatele, e tupu tele foi le malamalama.

A o oe ia e alu atu seia oo i le iuga; auā e te malolo, e te tu mai foi i lou tofi pe a oo i le iuga o aso.

Auā e latalata le aso o Ieova i nuu uma; e faia ia te oe e pei ona e faia; e toe iu atu ia te oe mea na e faia.

Ua na iloa atu le au faresaio ma le au satukaio e toatele ua o mai i lana papatisoga, ona ia faapea atu ai lea ia te i latou, Fanau a gata feai e, o ai ea ua na faaali atu ia te outou ia sosola ese i le toasa atali?

O loo tuu nei foi le mătau i tafu‘e o laau; o laau uma foi e le fua mai i fua lelei, e taia ma lafoina i le afi.

O i lona aao lana asu, na te faamamāina ai lana faaputugāsaito; na te faapotopotoina foi ana saito i le fale saito, a e susunuina le otaota o saito i le afi e le matineia.

Afai foi e te tausuai i lou mata taumatau, ina sali ese ia, ma e lafoai; auā e lelei ina fano se tasi ou fāsi tino, a e leaga pe a lafoina lou tino uma i Kēna. Afai foi e te tausuai i lou lima taumatau, ina tutū ese ia, ma e lafoai; auā e lelei ina fano se tasi ou fāsi tino, a e leaga pe a lafoina lou tino uma i Kēna.

Auā o le faamasinoga tou te faamasinoina atu ai, e faamasinoina ai outou; o le fua foi tou te fuaina atu ai, e toe fuaina mai ai ia te outou.

Ia outou ulu atu i le faitotoa va apiapi; auā e va tele le faitotoa, e lautele foi le ala e tau atu i le malaia, e toatele foi i latou o e ui atu ai. Auā e va apiapi le faitotoa, e lauitiiti foi le ala e tau atu i le ola, e toaitiiti foi i latou o e maua.

Tou te iloa i latou i o latou fua. Pe tau mai ea tagata se fuifui vine mai le laau tuitui, po o mati mai le laau talatala? E faapea foi laau lelei taitasi ma fua mai i fua lelei; a o le laau leaga e fua mai i fua leaga. E le mafai i le laau lelei ona fua mai i fua leaga, e le mafai foi i le laau leaga ona fua mai i fua lelei. O laau uma e le fua mai i fua lelei, e taia ia ma lafoina i le afi. O lea foi tou te iloa ai i latou i o latou fua.

E le sao atu i le malo o le lagi i latou uma o e fai mai ia te au, Le Alii e, le Alii e; na o le na te faia le finagalo o lo‘u Tamā o i le lagi. E toatele latou te fai mai ia te au i lea aso, Le Alii e, le Alii e, matou te lei perofeta ane ea i lou igoa, o lou igoa foi na matou tulia ai temoni, o lou igoa foi na matou fai ai vavega e tele? Ona ou ta‘utino atu ai lea ia te i latou, Ou te lei iloa lava outou; ina o ese ia outou ia te au, o outou o e fai amio leaga.

Ai se le talia outou, pe le faalogo i a outou upu, a outou o atu nai lea fale po o lea aai, ia outou tūtū atu le eleele nai o outou vae. E moni, ou te fai atu ia te outou, O le aso faamasino e feoloolo ai Sotoma ma Komoro i lea lava aai.

Aua foi tou te matatau i e fasioti le tino, a e latou te le mafaia ona fasioti le agaga; a e lelei ona outou matatau i le ua mafai ona fano ia te ia le agaga atoa ma le tino i Kēna.

O lea ou te fai atu ai ia te outou, E feoloolo Turo ma Saitonu i le aso faamasino ia te outou. O oe foi Kapanaumi, ua faaeaina e oo i le lagi, e lafotuina oe i lalo lava i seoli; auā ana faia i Sotoma o vavega na faia ia te oe, po ua tumau ia ua oo i nei ona po. O lea foi ou te fai atu ai ia te outou, E feoloolo le nuu o Sotoma i le aso faamasino ia te oe.

A ou te fai atu ia te outou, o upu faatauvaa uma e faia e tagata, latou te talatala atu ai le tala i le aso faamasino. Auā o au upu e ta‘uamiotonuina ai oe, o au upu foi e faasalaina ai oe.

a o le fanua, o le lalolagi lea; o le saito lelei, o tagata ia o le malo; o le titania, o le fanau ia a le ua leaga; o le ua ita mai na na luluina ia mea, o le tiapolo lea; o le seleselega, o le gataaga lea o le lalolagi; o e selesele, o agelu ia. O lea e pei ona faaputuina ai o le titania, ma susunuina i le afi, e faapea foi ona faia i le gataaga o lenei lalolagi. E aauina atu e le Atalii o le tagata ana agelu, latou te faapotopotoina nai lona malo mea uma e tausuai ai ma ē amio leaga. E lafoina i latou i totonu o le ogāumu aasa; e i ai le tagiaue ma le lilivau o nifo. Ona pupula ai lea o e amiotonu e pei o le la i le malo o lo latou Tamā. O le ua i ai taliga e faalogo ai, ina faalogo mai ia o ia.

E tusa foi le malo o le lagi ma le upega ua lafo i le vai, ua maua ai i‘a eseese uma. Ua tumu, ona latou toso ae ai lea i le matafaga, ua nonofo ma fafao i‘a lelei i ola, a o i‘a leaga ua lafoai. E faapea foi i le gataaga o le lalolagi; e o atu le au agelu e vavae ese i e amio leaga ma e amiotonu, ona latou lafoina lea ia te i latou i le ogāumu aasa; e i ai le tagiaue ma le lilivau o nifo.

Auā e alu ae mai le loto o le manatu leaga, o le fasioti tagata, ole mulilua, o le faitaaga, o le gaoi, o le molimau pepelo, ma le upu leaga.

Auā se a le aoga i le tagata pe afai na te maua le lalolagi uma, a e māumau lona ola? se a foi se mea e avatu e le tagata e togiola a‘i lona ola? Auā e sau le Atalii o le tagata faatasi ma ana agelu i le mamalu o lona Tamā; ona tauia lea e ia e taitasi e tusa ma lana galuega.

ua faapea atu, E moni, ou te fai atu ia te outou, a le liua outou, ma avea ia pei o tama iti, tou te le sao lava i le malo o le lagi.

E tusa le malo o le lagi ma le tasi tupu ua na faia le tausamaaga o lona atalii; ua aauina atu e ia ana auauna e fai atu i e na tala‘iina ia o mai i le tausamaaga; a ua latou le mafafai ina o mai.

Ona ulufale atu ai lea o le tupu e vaavaai atu i e na taooto e aai ua iloa atu ai e ia o le tasi tagata ua le ofu i le ofu o le tausamaaga. Ona fai atu ai lea o ia ia te ia, Sole, pe faapefea ona e ulufale mai iinei ua le ia te oe le ofu o le tausamaaga? Ona le gagana ai lea o ia. Ona fai atu ai lea o le tupu i auauna, Ia outou fusifusia ona vae ma ona lima, ma ave o ia, ma lafo i le pouliuli i fafo, e i ai le taufaitagiane ma le lilivau o nifo.

O outou gata, o fanau a gata feai, pe faapefea ona outou sosola i le faasala i Kēna?

A o lē tumau seia oo i le gataaga, e faaolaina lea.

O ia ona po e tusa ai le malo o le lagi ma taupou e toasefulu, o e na ave a latou lamepa, ma latou o atu e faafetaiai i le faatoafaiavā. Ua popoto le toalima o i latou, a e vālea le toalima. O e vālea ua ave a latou lamepa, a e lei avea ma ni suāuu. A o e popoto ua ave ni suāuu i a latou fagu faatasi ma a latou lamepa. Ua tuai mai le faatoafaiavā, ona taufaitulemomoe ai lea o i latou uma, ua momoe lava. A ua oo i le tulua o po, ona sau ai lea o lē alaga, Faauta, ua sau le faatoafaiavā; ina o ia outou e faafetaiai ia te ia. Ona tutū ai lea o ia taupou uma lava, ma teuteu a latou lamepa. Ona fai atu ai lea o e vālea i e popoto, Au mai ni a outou suāuu mā matou; auā o le a mamate a matou lamepa. A ua tali mai o e popoto, ua faapea mai, Ne‘i le lava ia i matou ma outou; a e lelei ona outou o i e faatau ma faatau mai ai ni a outou. Ua latou o e faatau, ona sau ai lea o le faatoafaiavā; o e ua saunia foi ua latou ulufale atu faatasi ma ia i le tausamaaga, ona pupuni ai lea o le faitotoa. E mulimuli ane, ona o mai ai lea o isi taupou, ua faapea mai, Le Alii e, le alii e, ia e tatala atu le puipui mo i matou. A ua tali atu o ia, ua faapea atu, E moni, ou te fai atu ia te outou, ou te le iloa outou.

Ona fai atu ai lea o lona alii ia te ia, Ua lelei ia, le auauna lelei e, ma le faamaoni, ua e faamaoni i nai mea itiiti, ou te tofia oe e pule i mea e tele; ina ulufale mai ia i le fiafia o lou alii.

Pe a sau le Atalii o le tagata i lona mamalu, ma le au agelu paia uma faatasi ma ia, ona tietie ai lea o ia i lona nofoālii mamalu; e faapotopotoina foi i ona luma o nuu uma lava; ona tuueseeseina lea o i latou e ia, e pei o le leoleo mamoe ona tuueseeseina o mamoe ma ‘oti; ona tuu ai lea e ia o mamoe i lona itu taumatau, a o ‘oti i lona itu tauagavale. Ona fai atu ai lea o le Tupu i e o i lona itu taumatau, O mai ia, o outou ua faamanuiaina e lo‘u Tamā, ia fai mo outou tofi le malo ua saunia mo outou a o lei faavaeina le lalolagi; auā na ou fia ‘ai, ona outou avane ai lea ni mea ou te ‘ai ai; na ou fia inu, ona outou avane ai lea ni vai ou te inu ai; sa fai a‘u ma tagata ese, ona outou talia lea o a‘u; na ou le lavalavā, ona outou faaofuina lea o a‘u; na ou ma‘i, ona outou asiasia mai lea o a‘u; na ou i le fale puipui, ona outou o ane ai lea ia te au. Ona tali mai ai lea ia te ia o e amiotonu, e faapea mai, Le Alii e, o anafea na matou iloa ai oe ua fia ‘ai, ma matou fagaina oe? po o fia inu, ma matou avane e te inu ai? O anafea foi na matou iloa ai oe o le tagata ese, ma matou talia oe? po o le le lavalavā, ma matou faaofuina oe? O anafea foi na matou iloa ai oe ua ma‘i, po o i le fale puipui, ma matou o atu ai ia te oe? Ona tali atu ai lea o le Tupu, e faapea atu ia te i latou, E moni, ou te fai atu ia te outou, auā na faia e outou i le tasi o e aupito itiiti o o‘u uso nei, o a‘u lea na outou faia i ai. Ona fai atu foi lea o ia i e o i lona itu tauagavale, O outou ua faafanoina, o ese atu ia ia te au i le afi e faavavau, ua saunia mo le tiapolo ma ana agelu. Auā na ou fia ‘ai, a e tou te lei avane ni mea ou te ‘ai ai; na ou fia inu, a e tou te lei avane ni vai ou te inu ai; sa fai a‘u ma tagata ese, a e lei talia a‘u e outou; na ou le lavalavā, a e tou te lei faaofuina a‘u; na ou ma‘i, na a‘u i le fale puipui foi, a e tou te lei asiasia a‘u. Ona tali mai ai lea o i latou foi ia te ia, e faapea mai, Le Alii e, o anafea na matou iloa ai oe ua fia ‘ai, pe fia inu, po o se tagata ese, pe le lavalavā, po o ma‘i, po o i le fale puipui, ma matou lei auauna atu ia te oe? Ona tali atu ai lea o ia ia te i latou, e faapea atu, E moni, ou te fai atu ia te outou, auā na outou le faia i le tasi o e aupito itiiti o i latou nei, o a‘u lea ua outou le faia i ai. Ona o atu ai lea o i latou nā i le sala e faavavau; a o e amiotonu e o atu i le ola e faavavau.

a o lē upu leaga i le Agaga Paia, e le faamagaloina o ia, a le tu a le tu lava; a e peitai e tatau ia te ia le sala e faavavau.

Ai se le talia outou, pe le faalogo ia te outou, a outou o ese i lea mea, i le tou tūtū atu ai le eleele nai o outou vae, e fai ma molimau ia te i latou; e moni, ou te fai atu ia te outou, e feoloolo Sotoma ma Komoro i le aso faamasino, i lea lava aai.

Auā e alu ae mai le loto o le tagata o le manatu leaga, o le mulilua, o le faitaaga, o le fasioti tagata, o le gaoi, o le manumanu, o le amio leaga, o le pepelo, o le matāitu, o le mataua, o upu leaga, o le faamaualuga, o le le mafaufau.

Ai se na te faatausuaiina se tasi o i latou nei i faatauvaa o e faatuatua mai ia te au, e lelei ia te ia pe ana noatia se maaolo i lona ua, ma lafoina o ia i le moana. A faatausuaiina foi oe e lou lima, ina tutū ese ia; e lelei ona e sao i le ola a ua e lima mutu, a e leaga ona lima lua, a e alu i Kēna, i le afi e le mafai ona tineia; o i ai e le mamate o latou ilo, e le tineia foi le afi. A faatausuaiina foi oe e lau vae, ina tutū ese ia; e lelei ina e sao i le ola ua pipili, a e leaga ona lua ni vae, a e lafoina oe i Kēna, i le afi e le mafai ona tineia; o i ai e le mamate o latou ilo, e le tineia foi le afi. A faatausuaiina foi oe e lou mata, ina sali ese ia; e lelei ina e sao i le malo o le Atua ma le mata e tasi, a e leaga ona lafoina oe ma ou mata e lua i le afi o Kēna; o i ai e le mamate o latou ilo, e le tineia foi le afi.

O lē faatuatua ma papatisoina, e faaolaina ia; a o le lē faatuatua, e faasalaina ia.

O i lona aao lana asu, e faamamā ai e ia lana faaputugāsaito; e faapotopoto foi e ia le saito i lona fale saito, a e susunuina le otaota o saito i le afi e le matineia.

Auā e leai se mea o loo ufiufitia, e le faaalia; e leai foi se mea lilo e le faailoina. O lea foi, o mea uma ua outou fai atu ai i le pouliuli, e logoina lea i le malamalama; o le mea foi ua outou tala lemu atu i afeafe, e tala‘iina lea i luga o fale. A ou te fai atu ia te outou na a‘u uo, aua tou te matatau ia te i latou o e fasioti le tino; a mavae lea, ua leai se toe mea latou te mafaia. A e ou te faasino atu ia te outou i lē tou te matatau i ai; ia outou matatau ia te ia, a mavae ona fasioti e ia, e ana le pule e lafo atu i Kēna; e moni, ou te fai atu ia te outou, ia outou matatau ia te ia.

Ou te fai atu ia te outou, e leai; a e afai tou te le salamo, e faapena lava ona fano outou uma.

Ua fai mai le tasi ia te ia, Le Alii e, e toaitiiti ea e faaolaina? Ona fetalai atu lea o ia ia te i latou, Ia outou finafinau ina ia ulu atu i le faitotoa va apiapi; auā ou te fai atu ia te outou, e toatele latou te saili ina ia ulu atu, a e le mafai lava. A uma ona tulai o le matai o le fale, ma pupuni le faitotoa, ona outou tutū lea i fafo, ma tu‘itu‘i i le faitotoa, e faapea mai, Le Alii e, le Alii e, ia e to mai ia te i matou; a e tali atu ia, e faapea atu ia te outou, Ou te lei iloa outou pe maifea. Ona fai mai ai lea outou, Na matou aai ma inu i ou luma; na e a‘oa‘o foi i o matou ala. Ona faapea atu lea o ia, Ou te fai atu ia te outou, ou te lei iloa outou pe maifea; ina o ese ia outou ia te au, o outou uma o e fai amio leaga. E i ai le taufaitagiaue ma le lilivau o nifo, pe a iloa e outou o Aperaamo, ma Isaako, ma Iakopo, ma le au perofeta uma i le malo o le Atua, a o outou ua tulia i fafo.

Peitai o oe, pe a e sauni le faigaai, ina tala‘i ia i e matitiva, i e mumutu, i e pipili, ma e tauaso; e manuia ai oe; auā latou te le mafaia ona taui mai ia te oe; a e tauia oe i le toe tutū mai o e amiotonu.

O le tasi foi o e na pagotata ua faatautauina ua upu leaga o ia ia te ia, ua faapea mai, Afai o oe o le Keriso, ina faaola ia oe ia te oe atoa ma i maua nei. A ua tali atu le tasi, ua vavao ia te ia, ua faapea atu, E te le mata‘u ea i le Atua, ina ua tatou sala faatasi? Ua tonu lava la ta sala; auā ua tauia mai i taua e tusa ma mea na ta faia; a o ia nei, e leai se mea e le tusa na faia e ia. Ona fai mai lea o ia ia Iesu, Le Alii e, ia e manatua mai a‘u, pe a e afio mai i lou malo. Ona fetalai atu ai lea o Iesu ia te ia, E moni, ou te fai atu ia te oe, o le asō ta te faatasi ai ma oe i parataiso.

Ua tali atu Iesu, E moni, e moni, ou te fai atu ia te oe, afai e le fanau se tasi i le vai ma le Agaga, e le mafai ona sao o ia i le malo o le Atua.

Auā ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau. Auā e lei auina mai e le Atua lona Atalii i le lalolagi ina ia faasala i le lalolagi, a ia faaolaina le lalolagi ia te ia. O lē faatuatua ia te ia, e le faasalalaina o ia; a o le lē faatuatua, ua nofosala nei lava o ia, auā e lei faatuatua lava ia i le igoa o le Atalii e toatasi o le Atua. O le faasala foi lenei, ina ua oo mai le malamalama i le lalolagi, a o tagata, e sili lo latou manao i le pouliuli i lo latou manao i le malamalama; auā e leaga a latou amio. Auā o i latou uma o e fai mea leaga e ‘ino‘ino i latou i le malamalama, e le o mai foi i le malamalama, ne‘i faailoa a latou amio. A o lē ua faamaoni ana mea e fai, e sau lava o ia i le malamalama, ia faaalia ana amio ina ua tatau i le Atua.

O lē faatuatua i le Alo, ua ia te ia le ola e faavavau; a o le le faatuatua i le Alo e le iloa e ia le ola, a o le toasa o le Atua o loo tumau lava i ona luga.

E moni, e moni, ou te fai atu ia te outou, o lē faalogo mai i la‘u upu, ma talitonu ia te ia na na auina mai a‘u, ua ia te ia le ola e faavavau: e le oo foi ina faasalaina o ia, a ua oo atu ia i le ola, sa i le oti, E moni, e moni, ou te fai atu ia te outou, e oo i le aso, ua oo nei foi i ai, e faalogo mai ai e ua oti i le leo o le Atalii o le Atua; o e faalogo ai foi, e ola ai i latou. Aua faapei o le Tamā e i totonu ia te ia lava le ola: e faapea foi ona foai mai e ia i le Atalii, ia i totonu ia te ia lava le ola. Ua foai mai foi ia te ia le pule, ina ia fai e ia le faamasinoga, auā o ia o le Atalii o le tagata. Aua tou te ofo i lenei mea, auā e oo mai le aso e faalogo ai i lona leo o i latou uma ua i tuugamau, ma latou o mai ai; o e na amio lelei, e toe tutū i le ola; a o e na amio leaga, e toe tutū i le faasala.

O lenei foi le finagalo o le ua auina mai a‘u, ia maua le ola e faavavau e i latou uma o e vaai i le Atalii, ma faatuatua ia te ia, ou te toe faatuina foi i latou i le aso gataaga.

E le mafai se tasi ona sau ia te au, pe a le tosina mai e le Tamā ua auina mai a‘u; ou te toe faatuina foi o ia i le aso gataaga.

E moni, e moni, ou te fai atu ia te outou, o lē faatuatua mai ia te au, ua ia te ia le ola e faavavau.

O lē ‘ai i lo‘u tino ma inu i lo‘u toto, ua ia te ia le ola e faavavau; ou te toe faatuina foi o ia i le aso gataaga;

Ona toe fetalai atu lea o Iesu ia te i latou, Ou te alu ese, ona outou saili lea ia te au, a e oti outou i a outou agasala; e le mafai e outou ona ō i le mea ou te alu i ai.

Ua fai mai Mareta ia te ia, Ua ou iloa e toe tu mai lava ia i le toe tu i le aso gataaga. Ua fetalai atu Iesu ia te ia, O a‘u nei o le toe tu ma le ola; o lē faatuatua mai ia te au, e ui lava ina oti, a e ola lava ia.

O loo faasalaina nei lenei lalolagi; e tulia nei le alii o lenei lalolagi.

O lē faaleaoga ia te au, ma ua le talia a‘u upu, o ia te ia le tasi na te faasalaina ia; o le upu ua ou tautala atu ai, e faasala lea ia te ia i le aso gataaga.

Afai e le tumau se tasi ia te au, ona lafoaiina lea o ia i tua pei o le la laau, ma faapopoina, ona faapotopotoina ai lea e tagata, ma lafo i le afi, ua susunu ai.

Ua na poloai mai foi ia te i matou e tala‘i atu i le nuu, ma molitino atu, o ia lava le ua tofia e le Atua e fai ma faamasino i e o ola ma e ua oti.

Na faapalepale le Atua i ona po o le vālea; a o loo fetalai mai nei i tagata uma i nuu uma lava ia salamo; auā ua faatuina e ia le aso e faamasinoina ai le lalolagi ma le tonu, e le tagata ua tofia e ia; o loo faamaoni mai ai e ia i tagata uma lava i lona toe faatu mai ia te ia i e ua oti. Ua faalogo e i latou i le toe tu mai o e ua oti, ona tauemu mai ai lea o isi, a ua fai mai isi, Matou te toe faalogo atu ia te oe i lena upu.

o loo ia te au le faamoemoe i le Atua, ua taofia foi e i latou nei, o le a toe tutū mai e ua oti, o e ua amiotonu atoa ma e ua amioletonu. O le mea lea ou te taumafai ai a‘u, ina ia maua e a‘u le loto fuatia ifo e lelei i le Atua atoa ma tagata, e le aunoa.

Ua latou le loto foi e taofi i le mataupu i le Atua, o lea ua tuuina atu ai i latou e le Atua i le loto leaga, latou te fai ai mea e le tusa; o loo tutumu i latou i amio leaga uma lava, o le faitaaga, o le amio ulavale, o le manumanu, o le loto leaga; o loo tumu saisai i le mataua, o le fasioti tagata, o le misa, o le ‘ole‘olega, ma le faatāutala; o tuaupua i latou, o e fai tala leaga, o e ‘ino‘ino i le Atua, o e faasiasia, o e faasaua, o e faafiasilisili, o e fia fai togafiti i mea leaga, o e le anaana i mātua, o e valelea, o e tuumavaega, o e le lotoaiga, o e le faamolemoleina, ma ē faalealolofa; o i latou ia ua iloa le tonu mai le Atua, e tatau ai ona oti o e fai mea faapena, e le gata ona latou faia o ia mea, a e fiafia lava i latou i e ua faia.

O le mea lea ua e le mautali ai oe le tagata o lē faasalaina atu, auā o lou faasalaina atu i se tasi, ua e faasalaina ai oe e oe; auā o oe lē faasalaina atu, ua e faia ia lava mea. Ua tatou iloa foi, e tatau lava ma le upu moni le faasala a le Atua i e fai mea faapena. Le tagata e, o lē faasalaina atu i e fai mea faapena, a ua e faia ia lava mea, o lou lea manatu ea e te sao lava oe i le faasala a le Atua? po ua faatauvaa ea ia te oe le faulai o lona agamalu, ma lona faapalepale, ma lona onosai, o loo e le iloa e ta‘ita‘iina oe e le agamalu o le Atua i le salamo? a e peitai o lou loto maaa ma le le salamo, e te faaputu ai ea mo oe le toasa i le aso o le toasa ma le faaaliga o le faasala tonu a le Atua, o le na te tuuina atu le taui taitasi i tagata e tusa ma a latou galuega? E tuuina atu foi le ola e faavavau i e tumau pea i galuega lelei, ua latou saili ai le viiga, ma le mamalu, ma le le iu vale; a o le toatamai ma le toasa i e finau vale, ma e le gauai i le upu moni, a e gauai i le amio leaga; o le puapuaga ma le atuatuvale i tagata uma lava o e fai amio leaga, e muamua le Iutaia, atoa ma le Eleni; a o le viiga, ma le mamalu, a le manuia ia te i latou uma o e fai amio lelei; e muamua le Iutaia, atoa ma le Eleni. Auā e le faailogaina e le Atua ni tagata;

auā atoa uma e ua agasala e le o i ai le tulafono, e fano i latou ua le o i ai le tulafono; atoa uma foi e ua agasala ua i ai le tulafono, e faasalaina i latou i le tulafono; (auā e le ta‘uamiotonuina i luma o le Atua e ua faalogologo atu i le tulafono, a e peitai o e anaana i le tulafono, e ta‘uamiotonuina i latou. Auā pe a fai fua e nuu ese e le o i ai le tulafono o mea e tusa ma le tulafono, e ui ina le o i ai le tulafono, ua avea i latou ma tulafono ia te i latou; o i latou ia ua iloa mai ai le galuega o le tulafono ua tusia i o latou loto, e ō faatasi ai foi o latou loto fuatia ifo, o loo fefaaleagai foi, pe fefaatonuai o latou manatu;) a e faasalaina i latou i le aso e faamasinoina ai e le Atua e Iesu Keriso mea lilo a tagata, e tusa ma la‘u tala lelei.

O lenei, ua tatou iloa, o mea uma ua fai mai e le tulafono, ua fai mai lava i e ua i ai le tulafono, ina ia punitia ai gutu uma lava, ma ia nofo sala le lalolagi uma i luma o le Atua.

peitai ona o i tatou foi, o le a ta‘ua i ai, o i tatou o e faatuatua i le na faatu mai i lo tatou Alii o Iesu nai e ua oti; na tuuina mai o ia ona o a tatou agasala, ma toe faatuina mai ina ia ta‘uamiotonuina ai i tatou.

O lenei, ua tatanu faatasi i tatou ma ia i le papatisoga i lona maliu; ina ia tatou savavali i le ola toefuataiina, pei ona toe faatuina mai o Keriso nai e ua oti, i le mana o le Tamā. Auā afai ua faatasia i tatou i le faatusa i lona maliu, e faapea foi i tatou i lona toe tu mai.

A o lenei, ua tuusaunoa outou nai le agasala, ma ua fai ma auauna a le Atua, ua ia te outou ni a outou fua e oo ai i le faapaiaina o lona uiga foi o le ola e faavavau. Auā o le oti, o le totogi lea o le agasala; a o le ola e faavavau, o le mea foaifuaina mai lea e le Atua, i lo tatou Alii o Keriso Iesu.

O lenei, ua leai se faasala i e o ia Keriso Iesu, o e le savavali i la le tino, a e i la le Agaga; auā o le tulafono a le Agaga o le ola ua ia Keriso Iesu ua tuusaunoa mai lea ia te au nai le tulafono a le agasala ma le oti.

Le au pele e, aua le taui atu ma sui, a ia outou tuu atu i le toasa; auā ua tusia, Ua faapea mai le Alii, O ia te au le taui ma sui, ou te taui atu.

O oe na, se a le mea e te faasala ai i lou uso? o oe na foi, pe se a le mea e te ta‘ufaatauvaaina ai lou uso? auā tatou te laulaututū uma lava i luma o le nofoa faamasino o Keriso. Auā ua tusia, Ua fetalai mai le Alii, Ou te ola a‘u, e tootuli mai ia te au o tulivae uma lava, e ta‘uta‘u mai foi o laulaufaiva uma lava i le Atua. O lenei, e taitasi i tatou ma tala i lana amio i le Atua.

o ia foi na te faatumauina outou seia oo atu i le iuga, ina ia leai se mea e faasalaina ai outou i le aso o lo tatou Alii o Iesu Keriso.

Auā e le mafaia e se tasi ona tuu se isi faavae i le ua uma ona tuuina, o Iesu le Keriso lea. A e afai e ati ae e se tasi i lenei faavae o auro, o ario, o maa tāua; o laau, o vaofalī, po o tagutugutu o saito; e faaalia galuega a tagata taitoatasi; e faailoa foi e le aso, auā e faaalia i le afi; e tofotofoina foi galuega a tagata taitoatasi i le afi po ua faapefea. Afai e tumau le galuega a se tasi na ia ati ae, e maua e ia le taui. Afai e faamuina le galuega a se tasi, e māumau ana mea; peitai ane e sao o ia, a e pei o se na ui mai i le afi.

O lenei, aua tou te faamasino i se tasi mea a o le oo mai ona po, seia afio mai le Alii, o le na te faamalamalamaina mea lilo io i le pouliuli, ma faaalia filifiliga o loto; e i ai ona taitasi ma ta‘uleleia e le Atua.

Tou te le iloa ea, o e amio leaga e le fai mo latou tofi le malo o le Atua? Aua ne‘i faaseseina outou; o e faitaaga, ma e ifo i tupua, ma e mulilulua, ma e tauātane, ma e faasotoma, ma e gaoi, ma e matapeapea, ma e onā, ma e agatele, ma e fao mea, e le fai mo latou tofi le malo o le Atua. Sa faapea foi nisi o outou; a ua taeele outou, a ua faapaiaina outou, a ua ta‘uamiotonuina outou i le suafa o le Alii o Iesu, i le Agaga foi o lo tatou Atua.

Auā afai ana tatou faamasino ia te i tatou, po ua le faasalaina i tatou.

A o lenei, ua toe faatuina mai Keriso i e ua oti, ua avea ma faapolopolo o e ua momoe. Auā ua oo mai le oti talu le tagata, ua oo mai foi le toe tutū o e ua oti talu le tagata. Auā faapei ona oti uma ia Atamu, e faapea foi ona faaolaina uma ia Keriso. A e peitai e taitoatasi ma lona lava tofi; o le faapolopolo o Keriso lea, mulimuli ane o e o ia Keriso e toe tutū i lona afio mai. Ona oo ai lea i le gataaga, e tuuina atu ai e ia le malo i le Atua, o le Tamā lea, pe a uma ona faaumatia e ia o alii sili uma, ma faipule uma, ma e malolosi. Auā e tatau ona pule o ia, seia tuuina e ia ona fili uma lava i lalo o ona vae. O le toe fili e faaumatia, o le oti lea; auā, Ua tuuina e ia o mea uma i lalo o ona vae; a e peitai ina ua fai mai, Ua tuuina i lalo mea uma ia te ia, ua iloa tino ai, ua vavae atu le na ia tuuina i lalo o mea uma ia te ia. Pe a uma foi ona tuuina i lalo ia te ia o mea uma, ona tuuina i lalo foi lea o le Alo lava i le na tuuina i lalo ia te ia o mea uma, ina ia pule aoao le Atua i le aoao o mea.

E faapea foi le toe tutū mai o e ua oti; eluluina ma le pala, e toe faatuina mai ma le le pala; e luluina ma le matagā, e toe faatuina mai ma le matagofie; e luluina ma le vaivai, e toe faatuina mai ma le malosi; e luluina le tino faaletino, e toe faatuina mai o le tino faaleagaga; e i ai le tino faaletino, e i ai foi le tino faaleagaga. E faapea foi ona tusia, Na faia Atamu le uluai tagata ma tagata ola; a o le Atamu mulimuli, o le Agaga faaola o ia. A e peitai e le muamua le faaleagaga, a o le faaletino; ona mulimuli ai lea o le faaleagaga. E faaleeleele le uluai tagata, na fua mai i le eleele; a o le tagata mulimuli, o le Alii lea mai le lagi. Pei o lē faaleeleele, e faapea lava o e faaleeleele; pei o lē faalelagi, e faapea lava o e faalelagi. Faapei ona foliga o i tatou i lē faaleeleele, e faapea lava ona foliga o i tatou i lē faalelagi.

Le au uso e, o la‘u upu lenei, e le mafaia ona avea o le malo o le Atua ma tofi o i latou ua i ai tino aano ma toto; e le fai foi le ola pea ma tofi o le iu vale. Faauta mai, ou te ta‘u atu ia te outou le mea lilo; e le momoe i tatou uma, a e liua i tatou uma, e faafuasei lava, o le emo o le mata, pe a ilia le pu faauma; auā e ilia lava, e toe tutū mai ai e ua oti ma le ola pea, e liua foi i tatou. Auā e tatau ona ofu o lenei tino iu vale i le tino ola pea, ia ofu foi lenei tino oti i le tino le oti lava. Pe a ofu foi lenei tino iu vale i le tino ola pea, a ofu foi lenei tino oti i le tino le oti lava, ona taunuu ai lea o le upu ua tusia. Ua faaumatia le oti i le manumalo.

Auā tatou te tutū atu uma lava i luma o le nofoa faamasino o Keriso e tatau ai; ina ia taitasi ma talitali i mea na faia i le tino, e pei o mea na faia, pe lelei pe leaga. O lenei, ona ua matou iloa le matautia o le Alii, ua matou pulunaunau atu ai i tagata; ua silafia i matou e le Atua, o la‘u taofi foi ua iloa i matou i o outou loto fuatia ifo.

Auā ou te fefe ne‘i iloa outou e a‘u, e le faapei ona ou loto i ai, pe a ou alu atu, ne‘i iloa foi a‘u e outou, e le pei ona outou loto i ai; ne‘i ia te outou o misa, o faamatataua, o faalotoa, o finau vale, o upuesega, o tuaupua, o loto faafefeteina, o faaletaupulea; ina ne‘i faamaualaloina a‘u e lo‘u Atua ona o outou, i lo‘u toe alu atu ia te outou; ona ou faanoanoa lea i nisi e toatele o e na agasala anamua, ma ua le salamo i le amio leaga, ma le faitaaga, ma le matāitu na latou faia.

Ua iloa tino foi galuega a le tino, o mea faapenei; o le mulilua, o le faitaaga, o le amio leaga, o le matāitu, o le ifo i tupua, o le fai togafiti faataulāitu, o le feitagai, o le femisai, o le losilosi vale, o le lotoa, o le finau vale, o le fevaevaeaiga, o maseiga, o le mataua, o le fasioti tagata, o le onaga, o le poula, ma mea faapena; ou te muai ta‘u atu nei ia te outou, pei ona ou fai atu anamua, o e faia mea faapena, e le fai le malo o le Atua mo latou tofi.

Aua ne‘i faaseseina outou, e le ulagia le Atua auā o le mea e luluina e le tagata, o le mea lava lea e seleseleina mai ai e ia; o sē lulu i la lona tino, e selesele mai ai e ia i la le tino le mea e pala; a o sē lulu i la le Agaga, e selesele mai ai e ia i la le Agaga le ola faavavau.

o ia foi ua tatou maua ai le togiola i lona toto, o le faamagaloina o agasala, e tusa ma le oloa faulai o lona alofa tunoa,

a o le faitaaga, ma mea leaga uma, ma le manumanu, aua ne‘i ta‘ua lava ia te outou, e pei ona tatau i e ua paia. O le anovale foi, ma upu faatauvaa, ma le faaulaula, o mea ia e le tatau; a o le faafetai e lelei lava lea. Auā ua outou iloa lenei mea, ai sē faitaaga, po o sē fai mea leaga, po o sē manumanu, (o le ifo i tupua lava lea,) e le maua e i latou se tofi i le malo o Keriso, o le Atua lea. Aua ne‘i faaseseina outou e se tasi i upu faatauvaa; auā o mea ia e oo mai ai le toasa o le Atua i e faalogogata.

ina ia ou iloa o ia, ma le mana o lona toe tu mai, ma ia faatasi a‘u i ona tiga, ona ua faatusaina a‘u ia te au i lona maliu, pe mafai lava ia te au ona oo atu i le toe tu mai o e ua oti.

Aua o lo tatou nuu moni ua i le lagi lea, o loo faatalitali mai ai i tatou i le Faaola, o le Alii o Iesu Keriso; na te liua o tatou nei tino ua leaga, ina ia faia ia faatatau i lona tino matagofie, e tusa ma le mana na te mafaia ai ona faatoilaloina o mea uma ia te ia lava.

o ia ua na laveai mai ia te i tatou nai le pule a le pouliuli, a ua na aumaia i latou i le malo o lona lava Alo pele; o ia ua tatou maua ai le togiola i lona toto, o le faamagaloina lea o agasala;

i lona tino tagata, ina ua maliu, ina ia tuuina atu outou e ia, o le au paia, o e le mata‘uleagaina, ua leai foi se mea e faasalaina ai i ona lava luma; pe afai lava tou te tutumau i le faatuatua, o faavaeina, ma mausali, ma le le faateaeseina outou i le faamoemoe o i le tala lelei na outou faalogologo i ai, sa tala‘iina atu foi i tagata uma lava i le lalolagi; o a‘u o Paulo ua fai a‘u ma auauna i ai.

O lenei, ia outou fasiotia o outou itu tino o i le lalolagi, o le faitaaga, o le amio leaga, o le faamatāitu, o le tu‘inanau leaga, ma le matapeapea, (o le ifo i tupua lava lea); o mea ia e oo mai ai le toasa o le Atua i e le faalogo; o outou foi na outou savavali ai foi anamua, a o outou nonofo ai; a o ona po nei ia tuu ese ai e outou lava o nei mea uma, o le ita, o le lotoa, o le loto leaga, o le upu leaga, ma le upu matagā ai o outou gutu. Aua le fetaupelopeloai, ina ua toeseina e outou le tagata tuai atoa ma ana amio,

O lē amioletonu e maua e ia le taui o lana amioletonu; e le faailogaina foi se tasi.

ina ia faatumauina o outou loto e le mata‘uleagaina i le amio lelei i luma o le Atua lo latou Tamā, pe a afio mai lo tatou Alii o Iesu Keriso, faatasi ma ona au paia uma.

Ia atoatoa ona faapaiaina o outou e le Atua lava e ona le manuia; ia tausia lava lo outou agaga atoa uma, i le ma le loto, atoa ma le tino, ia le mata‘uleagaina, i le afio mai o lo tatou Alii o Iesu Keriso.

o le faailoga lea o le faamasinoga tonu a le Atua, ina ia ta‘uaogaina outou i le malo o le Atua, o le mea lea e tigaina ai outou. Auā ua tonu i le Atua e taui atu le puapuaga i e ua faapuapuagaina ai outou; e ia te outou foi o e puapuagaina, o le mapusaga faatasi ma i matou, pe a faaalia le Alii o Iesu mai le lagi, faatasi ma agelu o lona malosi, i le afi mumū, na te taui ma sui i e ua le iloa le Atua, ma ua le anaana i le tala lelei a lo tatou Alii o Iesu Keriso; e faasalaina i latou lava i le fanoga e faavavau lava, ia te‘a ma le Alii ma le mamalu o lona malosi; pe a afio mai o ia ina ia viia i ona lava tagata paia, ma ia ofo ia te ia i lena aso ia te i latou uma o e faatuatua, auā na outou talitonu mai lava i la matou mau.

Ua tatou iloa lava o le mea lelei le tulafono, pe afai e faia e se tasi o mea e tatau i ai; o loo iloa lenei mea, ua le faatuina mai le tulafono mo le ua amiotonu, a o e faaletaupulea ma e soli i tulafono, o e faalematau ma e agasala, o e amio leaga ma e ulavavale, o e fasi tamā ma e fasi tinā, o e fasioti tagata, o e faitaaga, o e faasotoma, o e gaoi tagata, o e tala pepelo, o e tauto pepelo; afai foi o i ai se toe mea e faatu‘iese ai i le mataupu e ola ai, e tusa ma le tala lelei silisili a le Atua manuia, ua tuuina mai ia te au.

Ia e matuā fai atu ia mea, ina ia le mata‘uleagaina i latou.

Auā tatou te lei au mai lava se mea e tasi i le lalolagi, ua mautinoa foi tatou te le mafai ona ave ese ai o se mea.

ia e taofi lenei poloaiga ma le le ponā, ma ia le mata‘uleagaina, seia oo atu i le faaali mai o lo tatou Alii o Iesu Keriso.

O le upu moni lenei; auā pe afai tatou te oti faatasi ma ia, tatou te ola faatasi ai foi; pe afai tatou te onosai, e fai foi i tatou ma tupu faatasi ma ia; pe afai tatou te faafiti ia te ia, e faafiti foi o ia ia te i tatou;

O lenei ou te matuā fai atu ia te oe i luma o le Atua ma le Alii o Iesu Keriso, o le na te faamasinoina o e ola atoa ma e ua oti, pe a oo i lona faaali mai ma lona malo;

Auā o a‘u ua faamaligiina nei lo‘u toto, ua lata ona po ou te alu ai. Ua ou tau le taua lelei, ua iu ia te au le tausinioga, ua ou taofi i le upu o le faatuatua. O lenei, ua teuina mo a‘u le pale o le amiotonu, e foaiina mai ia te au i lea lava aso o le Alii le faamasino amiotonu; e le gata foi ia te au, a o i latou uma lava o e fiafia i lona faaali mai.

O le mea lea e tatau ona atili ai ona tatou naunau i mea ua tatou faalogologo i ai, ne‘i te‘a ia i tatou. Auā afai na faamauina le upu na molia mai e agelu, taitasi foi soli tulafono ma faalogogata ma oo i ai le taui e tusa ai, pe sao faapefea i tatou pe a faatamala i le olataga e matuā tele? sa muai fetalaia mai e le Alii, ona faamaonia mai lea ia i tatou e i latou sa faalogo ia te ia;

Pei ona tofia foi mo tagata ia tasi lo latou oti, a e mulimuli ane o le faamasinoga;

ona ou fai ane lea, Le Atua e, silasila mai ia, ou te alu atu e faia lou finagalo; (ua tusia a‘u i le Tusi taai.)

ia tatou manatunatu foi le tasi i le tasi, ina ia taufaatupu ai le alofa ma galuega lelei; aua le lafoaiina le faapotopotoina o i tatou, pei o le masani o isi, a ia fefaamafanafanai; ia atili ai foi ona faapea ina ua outou iloa o le aso o loo tāulata mai. Auā afai tatou te agasala ma le loto i ai pe a uma ona talia o le malamalama o le upu moni, ua le toe lava se taulaga mo agasala, na o le faatali ma le mata‘u tele i le faasala, ma le toasa e mumū e susunu ai e o tetee atu.

Auā ua tatou iloa le na fetalaia mai, O loo faapea mai le Alii, O ia te au le taui ma sui, ou te taui atu. I le ma lea, E faamasino e le Alii lona lava nuu. O le mea e mata‘u tele ai ona maua e aao o le Atua soifua.

a ua oo outou i le mauga o Siona, ma le aai o le Atua soifua, o Ierusalema faalelagi, ma agelu e manomanō, o le faapotopotoga atoatoa ma le ekalesia o le au ulumatua e ua tusia i le lagi, ma le Atua o le faamasino aoao, ma agaga o e ua amiotonu ua faaatoatoaina,

Ia lelei le faiavā i tagata uma, o le moega foi ia leai sona leaga; e faasalaina e le Atua o e faitaaga ma e mulilulua.

Auā ia gata ia i aso ua mavae o le olaga nei ona fai ai e i tatou o le manao o e faapaupau, sa savavali i le faamatāitu ma tu‘inanau, ma le inu tele i uaina, ma poula, ma inugāava, ma le ifo i tupua e soli ai tulafono.

latou te tala atu le tala i le ua saunia e faamasino i e ola ma e ua oti. O le mea lea na folafola atu ai le tala lelei i e ua oti, ina ia faasalaina i latou i le tino i la tagata, a e ola ai i le agaga i la le Atua. A ua lata mai le gataaga o mea uma lava; o lena, ia faautauta ai, ma ia mataala outou ma le tatalo.

Auā o ona po nei e amata ai le faamasinoga i le aiga o le Atua; afai foi e muamua ia i tatou, pe se a le gataaga o e faalogogata i le tala lelei a le Atua?

Auā afai na le faasaoina e le Atua le au agelu o e na agasala, a ua na tuuina atu i latou i maea uamea o le pogisa i seoli, ina ia taofia i latou e oo i le faamasinoga;

ua silafia e le Alii se mea e laveai mai ai i e amio Atua ai le faaosoosoga, a e taofi i e amio leaga e oo i le aso faamasino ina ia faasalaina i latou; a e sili lava i latou o e mulimuli atu i la le tino i le tu‘inanau i le fia ulavale, ma latou ta‘ufaatauvaa i alii; ua faamalosi, ua finau vale, ma ua le fefe ona upu leaga i e ua mamalu. A o agelu e sili ona malosi ma le mana, e le molimau lava se upu leaga e faasala ai ia te i latou i luma o le Alii. A o i latou nei, faapei o mea ola e tutupu ma le le o i ai se mafaufau, na faia ina ia puea ma fasimatea, latou te faifai i mea latou te le iloa, e fano lava i latou i lo latou lava leaga; e maua e i latou le taui o le amioletonu; fa te i latou o le mea e fiafia ai le sololelei i le ao, o ila i latou ma mea e pona ai, o loo sololelei lava i o latou lava faasese, ina o fai faigaai i latou faatasi ma outou; ua tutumu o latou mata i le fafine mulilua, e le mafai foi ona mapu i le agasala, latou te maileia tagata ua le faatumauina, o ia te i latou le loto ua masani i le matapeapea, o tagata ua faafanoina; ua tuua e i latou le ala tonu, ua sese i latou, ua mulimuli atu i le ala o Palaamo le atalii o Posoru, o le na manao i le totogi o le amioletonu. A ua aoaiina o ia ona o lona lava solitulafono, ua gagana mai i le leo o le tagata le manu le tautala, ua na vavao atu i le valea o le perofeta. O puna o vai i latou e le o i ai se vai, o ao ua lelea i le afā, ua tuu mo i latou le pogisa o le pouliuli e faavavau.

a o le lagi nei ma le lalolagi ua tuu ona o lea lava afioga, ia taofia mo le afi i le aso e faamasino ai ma fano ai tagata faalematau. A e aua ne‘i lilo ia te outou, le au pele, lenei mea e tasi, e tusa i luma o le Alii le aso e tasi ma tausaga e afe, o le afe foi o tausaga e tusa ma le aso e ta si. E le faatuai mai le Alii i le mea na folafolaina mai, faapei o le manatu a isi tagata i le faatuai; a e peitai ua onosai mai lava o ia ia i tatou, ona ua le finagalo ia fano se tasi, a ia oo uma lava i le salamo.

A e sau le aso o le Alii pei o se gaoi i le po, e mavaeeseina ai le lagi ma le gogolo tele, e te‘a eseese ai foi o mea na fai a‘i ina ua mu; o le lalolagi foi ma galuega o i ai e susunuina lava. O lenei, o le a te‘a eseese nei mea uma, pe faapefea la outou amio e tatau ai i le amio lelei ma le amio Atua; o loo faatalitali ma naunau atu ia aulia mai le aso o le Atua, e te‘a eseese ai le lagi ina ua mu, e liu suāvai foi o mea na fai a‘i ina ua mu? A e faatalitali i tatou i le lagi fou ma le lalolagi fou, pei o lana na folafola mai, e mau ai le amiotonu.

O lenei, le au pele e, ua outou faatalitali i ia mea, o lea ia outou finafinau ai lava ina ia maua outou e ia ma le manuia, ua le ponā, ma le le mata‘uleagaina.

Faauta i le silisili o le alofa ua foaiina ma e le Tamā ia te i tatou, ina ua ta‘ua i tatou o le fanau a le Atua; o le mea lea e le iloa ai i tatou e le lalolagi, auā na le iloa o ia. Le au pele e, o le fanau i tatou a le Atua i nei ona po, a e lei faaalia mai nei le uiga o i tatou a amuli; a ua tatou iloa, pe a faaali mai o ia, ona foliga ai lea o i tatou ia te ia, auā tatou te iloa tino ai lava o ia.

O i tatou, ua tatou iloa ua oo i tatou i le ola sa i le oti, auā o loo alolofa i tatou i le au uso; o se le alofa i le uso, o loo tumau ia i le oti. O i latou uma o e ita i o latou uso, o fasioti tagata i latou; ua outou iloa foi e leai sē fasioti tagata e tumau ia te ia le ola e faavavau.

O le mea lava lenei ua atoatoa ai le alofa ia te i tatou, ina ia tatou maua le faamalosi i le aso o le faamasinoga; auā e pei o ia, e faapea foi i tatou i lenei lalolagi.

O lenei foi le mau, ua foaiina mai e le Atua ia te i tatou le ola e faavavau; o le ola lava lea ua i lona Alo. O le o ia te ia le Alo, o ia te ia le ola; o le e le o ia te ia le Alo o le Atua, e le o ia te ia le ola.

O agelu foi o e na le taofi i lo latou mamalu, a ua tuua e i latou le mea sa latou nofo ai, ua taofia e ia i noanoataga e faavavau i lalo o le pogisa, seia oo i le faamasinoga o le aso tele. E pei o Sotoma ma Komoro, ma aai sa vagavagai ai, ua faitaaga pei o i latou, ma mulimuli atu i nisi tino, o lea ua tuu mai ai i latou e fai ma faailoga, ua faasalaina i latou i le afi e faavavau.

o peau sousou o le sami, ua faapunaia ae mea e masiasi ai i latou; o fetu feoai ua tuu mo i latou le pogisa o le pouliuli e faavavau.

e faamasino ai i tagata uma, ma faasalaina ai e ua amio faalematau uma lava o ia i latou, ona o a latou galuega faalematau uma ua latou faia ma le faalematau, ona o a latou upu faatautala foi na fai ia te ia e tagata agasala ua faalematau.

Ia outou alofa atu i nisi ma ia faatatau; a o isi ia outou faaola ia i latou ma le mata‘u, ia se‘i ia te i latou mai le afi, ma ia outou ‘ino‘ino i le ofu ua pisia i le tino. O lenei, ia ia te ia na te mafaia ona leoleo ia te outou ina ne‘i pauu, ma tuuina atu ia te outou ua le ponā i luma o lona lava mamalu ma le fiafia tele,

Ua ou iloa atu ia te ia, ona ou paū ifo lea i ona vae e peiseai ua oti; a ua ia faaee mai lona aao taumatau i luga ia te au, ua faapea mai ia te au, Aua e te fefe; o a‘u le muamua ma le mulimuli; o lē ola nei lava, sa ou oti, faauta foi, ou te ola e faavavau faavavau lava; Amene, o ia te au foi ki o seoli ma le oti.

O le ua i ai taliga, ina faalogo mai ia o ia i le mea ua fetalai mai ai le Agaga i ekalesia, O lē manumalo, ou te avatua ia te ia e ‘ai i le laau o le ola o i totonu o le parataiso o le Atua.

O le ua i ai taliga, ina faalogo mai ia o ia i le mea ua fetalai mai ai le Agaga i ekalesia, O lē manumalo, e le afaina lava o ia i le oti faalua.

O lē manumalo, e faaofuina o ia i ofu sisina; ou te le sōloiesea foi lona igoa i le tusi o le ola, a e ou te ta‘u atu lona igoa i luma o lo‘u Tamā, ma luma o ana agelu.

O lē manumalo ou te avatua i te ia ma te nonofo faatasi ma a‘u i lo‘u nofoālii, e pei o a‘u foi ona ou manumalo, ua ma nonofo foi faatasi ma lo‘u Tamā i lona nofoālii.

ua latou alalaga foi ma le leo tele, ua faapea atu, Le Alii e, le paia ma le faamaoni e te le faamasino ea ma taui i lo matou toto i e nonofo i le lalolagi seia afea?

Ua ili foi e lona toafitu o agelu le pu, ona i ai lea i le lagi o leo tetele, ua faapea mai, O malo o le lalolagi ua avea mo lo tatou Alii ma lona Keriso, e fai foi o ia ma tupu e faavavau faavavau lava.

Ua ita foi nuu, ona oo mai lea o lou toasa, ma ona po e faamasinoina ai e ua oti, ma taui ai i au auauna le au perofeta, ma le au paia, ma e ua matatau i lou suafa, o tagatānuu atoa ma alii, e fano ai foi i latou o e na fano ai le lalolagi. Ua faaavanoaina foi le malumalu o le Atua i le lagi, ona iloa atu ai lea o le atolaau o lana feagaiga i lona malumalu; ona tutupu lea o uila, ma leo, ma faititili, ma le mafuie, ma le uato‘a tetele.

e le iloa foi se pepelo i o latou gutu; auā e le ponā i latou i luma o le nofoālii o le Atua.

ua faapea atu ma le leo tele, Ia outou matatau i le Atua, ma avatu ia te ia le viiga, auā ua oo mai le itu aso o lana faamasinoga; ma ia outou ifo i le na faia le lagi, ma le fanua, ma le sami, atoa ma puna o vai.

e inu lava ia i le uaina o le toasa o le Atua, ua liligiina atu e le suia i le ipu o lona toasa, e puapuagatia foi ai i le afi ma le teio i luma o le au agelu paia ma luma o le Tamai mamoe; o le asu foi o lo latou puapuaga e alu ae e faavavau faavavau lava; latou te le maua foi se filemu i le ao ma le po o e ua ifo i le manu feai ma lona faatagata, ma se na te talia le faailoga o lona igoa.

Na ou lagona foi le agelu e pule i vai ua faapea atu, Le Alii e, o lē amiotonu oe, o lē soifua, o le na soifua, ma loo lelei, auā ua faapea ona e faasalaina. Auā na latou faamaligiina le toto o tagata paia ma perofeta, i le ua e avatu ai ia te i latou le toto e inu ai; auā ua tatau lea mo i latou. Na ou lagona foi i le tasi mai le fata faitaulaga, ua faapea atu, E moni, le Alii e, le Atua e ou le malosi uma lava; e faamaoni ma le tonu au faamasinoga.

Ua mavae nei mea, ona ou faalogo lea e peiseai o le leo tele o le motu o tagata e toatele o i le lagi, ua faapea atu, Aleluia; ua i le Alii lo tatou Atua le olataga, ma le viiga, ma le faaneeneega, ma le mana; auā e faamaoni, e tonu foi ana faamasinoga; auā ua faasalaina e ia le fafine talitane e sili, o le na faaleagaina le lalolagi i lana faitaaga, ua ia taui atu ia te ia lava le toto o ana auauna. Ua latou toe fai atu, Aleluia; ona alu ae ai lea o lona asu e faavavau faavavau lava.

Ua fai mai foi o ia ia te au, Ia e tusi, Amuia e ua tala‘iina i le tausamaaga o le Tamai mamoe. Ua fai mai foi o ia ia te au, O afioga moni ia a le Atua.

Na a‘u iloa atu le lagi ua avanoa, faauta foi, o le solofanua sinasina, o lē tietie ai foi ua igoa ia o le Faamaoni ma le Moni, o le amiotonu foi na te faamasino ai ma tau ai le taua;

Na a‘u iloa foi nofoālii, ma ua latou tietie ai, ua tuuina atu foi le faamasinoga ia te i latou; na a‘u iloa foi agaga o e ua vavaeeseina o latou ulu ona o le mau ia Iesu ma le afioga a le Atua, o e na le ifo i le manu feai po o lona faatagata, na le talia foi le faailoga i o latou muaulu po o latou lima; ua latou ola foi, ma ua fai ma tupu faatasi ma Keriso i tausaga e afe; a o e totoe o e ua oti, e lei toe ola i latou seia atoa ia tausaga e afe. O le uluai toe tu lena.

Na a‘u iloa foi le nofoālii tele e sinasina, ma le o tietie ai, ua sosola ese le lalolagi ma le lagi i ona luma, e le iloa foi se mea e tu ai i laua. Na a‘u iloa foi o e na oti, o tagatānuu atoa ma alii, o tutū i luma o le Atua, ona fofola lea o tusi; ua fofola foi ma le tasi tusi, o le tusi lea o le ola; ona faamasinoina ai lea o e na oti i mea ua tusia i tusi, e tusa ma a latou amio. Ua avae foi e le sami e na oti sa i ai, ua avae foi e le oti ma seoli e na oti sa i ai; e taitasi foi o i latou ma faamasinoina e tusa ma a latou amio. Ua lafoina foi le oti ma seoli i le lepa afi; o le oti faalua lea. Ai se tasi ua iloa ua le tusia i le tusi o le ola, ua lafoina lea i le lepa afi.

Ona a‘u iloa lea o le lagi fou ma le lalolagi fou; auā ua mavae atu le uluai lagi, ma le uluai lalolagi, ua leai foi se toe sami. O a‘u foi o Ioane na ou iloa le aai paia, o Ierusalema fou, ua alu ifo mai le Atua i le lagi, ua saunia pei o se faatoanofotane ua teuteuina mo lana tane. Na ou faalogo foi i le leo tele mai le lagi, ua faapea mai, Faauta, ua faatasi ma tagata le fale fetafai o le Atua, e mau foi o ia ma i latou; e fai foi i latou mona nuu, e ia te i latou le Atua lava, o lo latou Atua ia. E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.

Ua fetalai mai foi lē tietie i le nofoālii, Faauta, ou te faia ia fou mea uma lava. Ua fetalai mai foi o ia ia te au, Ia e tusi; auā o upu nei e moni ma le faamaoni ia. Ua fetalai mai foi o ia ia te au, Ua uma ona fai. O a‘u le Alefa ma le Omeka, o le amataga ma le gataaga. O le ua fia inu ou te foaifuaina atu ia te ia ai le puna o le vai ola. O lē manumalo e maua e ia mea uma, e fai foi a‘u mona Atua, e fai foi o ia mo‘u atalii. A o e loto vaivai, ma e lē faalogo, ma e fai mea e inosia, ma e fasioti tagata, ma e faitaaga, ma e faataulāitu, ma e ifo i tupua, atoa ma e tala pepelo uma, e fai o latou tofi i le lepa e mu i le afi ma le teio, o le oti faalua lea.

E le sao atu lava i ai se mea leaga e tasi, po o se na te faia se mea inosia, po o se pepelo; na o i latou lava e ua tusia i le tusi o le ola a le Tamai mamoe.

O lē amioletonu ia amioletonu pea o ia, o lē eleelea ia eleelea pea o ia, o lē amiotonu ia amiotonu pea o ia, o lē paia ia paia pea o ia. Faauta foi, ou te vave alu atu; ua ia te au foi le taui ou te taui taitasi atu ia tusa ma lana ua fai.