17 – Lotu Sesē

Ua sili le atamai o le gata i manu uma o le vao na faia e Ieova le Atua. Ua fai mai o ia i le fafine, E moni ea, na fetalai mai le Atua, lua te le aai i laau uma o le faatoaga?

Ona latou fai aue lea, O mai ia, ina tatou fai ia o se aai, ma se ‘olo, ia oo lona tumutumu i le lagi, ia tatou faia foi se mea e ta‘ua ai i tatou, ne‘i faataapeapeina, i tatou i le fogāeleele uma. Ona afio ifo lea o Ieova e silasila i le aai ma le ‘olo ua faia e tagata. Ona fetalai ane lea o Ieova, Faauta, ua tasi le nuu, e tasi foi le gagana ia te i latou uma; ua amata foi i latou ona fai o lenei mea; o lenei foi, e le toe taofia i latou i se mea e tasi ua latou manatu i ai e fai. O mai ia, ina tatou o ifo ia, ma ia tatou faaeseeseina i lea mea a latou gagana, ina ia le lagona e le tasi i le gagana a le tasi. Ona faataapeape lea e Ieova ia te i latou ai lea mea i le lalolagi uma; ona tuua lea e i latou ona faia o le aai. O le mea lea ua igoa ai ia o Papelu; auā na faaeseeseina i lea mea e Ieova o le gagana a le lalolagi uma; na faataapeape foi e Ieova ia te i latou ai lea mea i le lalolagi uma.

Ua fetalai atu foi le agelu a Ieova ia te ia, Faauta, ua e to, o le a e fanau mai se tama tane, e te faaigoa foi ia te ia o Isamaeli; auā ua faafofogaina e Ieova lou tiga. E fai o ia ma tagata e tusa ma le asini o le vao; e fai tagata uma mona fili, e fai foi o ia ma fili o tagata uma; e mau foi o ia i luma o ona uso uma.

Ua faapea atu foi Aperaamo i le Atua, E, ou te manao ia ola Isamaeli i ou luma! Ua fetalai mai le Atua, E moni lava, e fanau mai sou atalii ia Sara lau avā, e te faaigoa foi ia te ia o Isaako; ou te faatumauina foi la ma feagaiga ma ia, atoa ma ana fanau, pe a mavae atu o ia, o le feagaiga e faavavau. I le ma Isamaeli foi, ua ou faalogo ai ia te oe; faauta, ua ou faamanuia ia te ia, ou te faauluola ia te ia, ou te matuā faatoateleina lava; e fanaua foi e ia o alii e toasefulu ma le toalua; ou te fai foi o ia ma tupuga o le nuu tele. A e peitai o la‘u feagaiga ou te faatumauina lea ia Isaako, o le a fanau mai e Sara ia te oe i le faapenei lava i le tausaga atali.

Ona tago lea e Aperaamo i lona atalii o Isamaeli, ma i latou uma na fananau i lona aiga, atoa ma i latou uma na faatauina i ana tupe, o tane uma lava i le aiga o Aperaamo, ma ua peritomeina e ia o pa‘u o latou tino i lea lava aso, e pei ona fetalai mai ai le Atua ia te ia.

Ona o atu lea o Mose ma Arona ia Farao, ua la faia faapei ona fetalai mai ai o Ieova; ua lafo e Arona lona tootoo i luma o Farao ma ana auauna, ona liu gata ai lea. Ona valaau atu lea e Farao i le au popoto ma taulāitu; ua faapea foi ona fai e taulāitu a Aikupito i a latou togafiti faataulāitu. Auā ua latou taitasi ma lafo lona tootoo, ona liu gata ai lea; a ua folo o latou tootoo e le tootoo o Arona. A ua faamaaaina le loto o Farao, e lei faalogo foi o ia ia i laua, faapei ona fetalai mai ai o Ieova.

Ona faapea lea ona fai e taulāitu o Aikupito i a latou togafiti faataulāitu; ona faamaaaina ai lea o le loto o Farao, ua le faalogo foi ia te i laua, faapei ona fetalai mai ai o Ieova.

Ona faaloaloa lea e Arona o lona lima i vai o Aikupito, ona ae mai ai lea o rane, ua lilo ai lava le nuu o Aikupito. Ua faapea ona fai foi e taulāitu i a latou togafiti faataulāitu; ua faaae foi e i latou o rane i le nuu o Aikupito.

Na la faia foi faapea, na faaloaloa e Arona lona lima sa i ai lona tootoo, na ia ta i le efuefu o le fanua, i le, ua fai ma ‘utu i tagata atoa ma manu; ua liu ‘utu o le efuefu uma lava i le fanua i le nuu uma lava o Aikupito. Ua faapea ona fai foi e taulāitu i a latou togafiti faataulāitu, ina ia tutupu ae o ‘utu, a e le mafaia; sa i ai foi o ‘utu i tagata atoa ma manu. Ona fai atu lea o taulāitu ia Farao, O le aao lenei o le Atua; a ua maaa pea le loto o Farao, e lei faalogo o ia ia te i laua, faapei ona fetalai mai ai o Ieova.

Ua le lavā taulāitu ona tutū i luma o Mose, ona o le ma‘i fulafula; auā sa i ai le ma‘i fulafula i taulāitu atoa ma Aikupito uma lava.

Aua ne‘i e fai mo oe ni atua ese i o‘u luma. Aua e te fai mo oe se tupua ua ta, po o se faatusa lava o se mea o i le lagi i luga, po o i le fanua i lalo, po o i le sami o i lalo o le fanau; aua e te ifo i ai, aua foi e te auauna i ai; auā o a‘u o Ieova lou Atua, o le Atua fuā, o le taui atu i fanau o le amioletonu a o latou mātua, e oo i le tupulaga e tolu ma le fa o e ‘ino‘ino mai ia te au;

aua tou te faia atua ario e faaopoopo mai ia te au, aua foi ne‘i faia atua auro mo outou.

Aua lava ne‘i ola se taulāitu fafine.

O se fai taulaga i se isi atua, ia fano lava ia; ua na o Ieova lava e fai taulaga i ai.

O nei mea uma foi ua ou fai atu ai ia te outou, ia outou tausi i ai; aua foi ne‘i tou ta‘uta‘u le igoa o atua ese, aua lava ne‘i faalogo i ai i lou gutu.

Ua iloa e le nuu ua faatuatuai ona alu ifo o Mose nai le mauga, ona faapotopoto mai lea o le nuu ia Arona, ma latou fai atu ia te ia, Tu ia oe i luga, ia e faia se atua mo i tatou, na te muamua atu ia i tatou; auā o le na Mose, o le tagata na aveina ae i tatou nai le nuu o Aikupito, tatou te lei iloa pe se a se mea ua oo ia te ia. Ona fai mai lea o Arona ia i latou, Ia outou motusi ese o mama auro o i taliga o a outou avā, ma o outou atalii, ma o outou afafine, ma aumaia ia te au. Ona motusi ese lea e le nuu uma o mama auro sa i o latou taliga ma avatu ia Arona. Ua talia e ia nai ia te i latou, ua na gaosi ai i le tofi, ua fai ai le tamai povi auro, ona ia fai atu lea ia i latou, Isaraelu e, o lou atua lenei, o le na aveina ae oe nai le nuu o Aikupito.

ua vave ona latou o ese i le ala na ou poloai atu ai ia te i latou, ua latou faia le tamai povi auro mo i latou, ua latou ifo i ai, ma fai taulaga i ai; o loo faapea ane foi i latou, Isaraelu, o lou atua lenei, o le na aveina ae oe nai le nuu o Aikupito. Ua fetalai mai foi Ieova ia Mose, Ua ou vaai atu i lenei nuu, faauta foi, o le nuu ua maaa lava le ua; o lenei, tuu mai ia o a‘u, ina ia tupu tele lo‘u ita ia te i latou, ina ia ou faaumatia i latou; a ou te faia oe ma nuu tele.

Ona foi atu lea o Mose ia Ieova, ma na fai atu ai, Aue! ua agasala le nuu nei i le agasala tele, na fai mo i latou le atua auro.

a ia outou sofaia o latou fata faitaulaga, ia nutipala i o latou tupua, ma vavae i lalo o latou tupua o Asaira. Auā e te le ifo i se tasi atua; auā o Ieova, o le Fuā, o lona lea suafa, o le Atua fuā lava o ia. Ne‘i e osi le feagaiga ma e o nonofo i le nuu, e mulilulua ai foi i latou i o latou atua, ma fai taulaga i o latou atua; e valaau foi i latou ia te oe, ona e ‘ai lea i a latou taulaga. Ne‘i e au mai foi o latou afafine ma avā a ou atalii, e mulilulua foi o latou afafine i o latou atua, e mulilulua ai foi ou atalii i o latou atua. Aua ne‘i e fai mo oe ni atua uamea.

Latou te le toe faia foi a latou taulaga i aitu, sa latou mulimuli atu ai e mulilulua ai; o le tulafono lena e faavavau ia i latou i o latou tupulaga amuli.

Aua tou te liliu atu i tupua, aua foi ne‘i faia atua uamea mo outou; o a‘u o Ieova lo outou Atua.

Aua tou te aai ma le toto; aua foi le fai togafiti faataulāitu, aua foi tou te iite i ao o le lagi.

Aua tou te saei o outou tino ona o le ua oti, aua foi ne‘i ta tatau ia te outou; o a‘u o Ieova.

Aua tou te faasaga atu ia i latou o i ai aitu vavalo, aua foi e te saili i taulāitu e leaga ai outou; o a‘u o Ieova lo outou Atua.

Ia e fai atu i le fanauga a Isaraelu, Ai se tagata o le fanauga a Isaraelu, po o se tagata ese e āumau ia Isaraelu, na te avatua so ana fanau ia Moloka; e fasiotia lava o ia; e fetogi lava e tagata o le nuu ia te ia i maa. Ou te faia foi lea tagata mo‘u fili, ma ou vavaeeseina o ia i lona nuu; auā ua ia avatu lana fanau ia Moloka, e faaleaga ai lo‘u malumalu, ma faaleaga ai lo‘u igoa paia.

O le tagata foi e liliu ane i e o i ai aitu vavalo, ma e taulāitu, e mulimuli atu i ai e mulilulua ai, ou te faia mo‘u fili lea tagata, ou te vavaeeseina foi o ia i lona nuu.

O se tane foi po o se fafine o i ai se aitu vavalo, po o ua fai ma taulāitu, ia fasiotia lava ia; latou te fetogi ia i latou i maa; e ia te i latou o latou toto.

Aua tou te faia ni tupua mo outou, aua foi tou te faatuina se tupua ua ta, po o se tupua maa, aua foi tou te tuu se faatagata maa i lo outou nuu, e ifo atu i ai; auā o a‘u o Ieova lo outou Atua.

Ou te faaumatia a outou mea maualuluga, ma vavae i lalo a outou tupua o le la, ma au lafo o outou tino ua oti i luga o tino o a outou tupua, e inosia foi outou e a‘u.

ona outou tulia ai lea o e o nonofo i le nuu uma lava ai o outou luma, ia outou faaumatia a latou faatagata uma lava, ia faaumatia foi e outou a latou tupua uamea lava; o a latou mea maualuluga uma lava tou te matuā faaumatia.

O lenei, ia matuā faaeteete outou ia te outou, auā na outou le iloa lava se mea na tino a‘i mai i le aso na fetalai mai ai Ieova ia te outou i Horepa ai totonu o le afi. Ne‘i leaga outou ia te outou, ma outou faia mo outou se tupua ua ta, o le faatusa o se tupua e tasi, o le faatusa o se tane, po o se fafine; o se faatusa o se tasi manu e tataa, o se faatusa o se manu lele e lele i lugā, o se faatusa o se tasi mea e totolo i le eleele, po o se faatusa o se tasi i‘a o i le sami i lalo o le laueleele; ne‘i tepa ae foi ou mata i le lagi, ma e iloa le la, ma le masina, ma fetu, o ‘au uma o le lagi, ne‘i tosina ai oe e ifo i ai, ma auauna i ai, o mea ia na tofia mai e Ieova lou Atua i nuu uma o le lalolagi.

Auā o Ieova lou Atua o le afi maamaai ia, o le Atua fuā ia.

Aua ne‘i e fai mo oe ni atua ese i o‘u luma. Aua e te fai mo oe se tupua ua ta, o se faatusa lava o se mea o i le lagi i luga, po o i le fanua i lalo, po o i le sami o i lalo o le fanua; aua e te ifo i ai, aua foi e te auauna i ai; auā o a‘u o Ieova lou Atua, o le Atua fuā, o lē taui atu i fanau o le amioletonu a o latou mātua, e oo i le tupulaga e tolu ma le fa o e ‘ino‘ino mai ia te au;

Aua tou te mulimuli atu i atua ese, o atua o nuu e vagavagaia outou, (auā o Ieova lou Atua o ia te oe, o le Atua fuā ia,) ne‘i tupu le toasa o Ieova lou Atua ia te oe, ona faaumatia ai lea o oe ai le fogāeleele.

Aua le fetaiai gafa ma i latou, aua le avatu lou afafine mā lona atalii, aua foi ne‘i e au mai lona afafine mā lou atalii; auā e faaliliueseina e ia lou atalii, ia le mulimuli mai ia te au, a e auauna i atua ese; ona tupu ai lea o le toasa o Ieova ia te outou, ma vave faaumatia ai oe. A ia faapea ona fai e outou ia te i latou, ia outou sofaia o latou fata faitaulaga, ia outou tu‘ipalaina o latou tupua, ma vavae i lalo o latou tupua o Asaira, o latou tupua foi ua ta ia outou susunu i le afi;

Ia outou matuā faaumatia mea uma lava na auauna a‘i i o latou atua o nuu o le a fai mo outou, i luga i mauga maualuluga ma mauga iti, o i lalo ifo foi o laau lauolaola uma. Ia outou sofaia o latou fata faitaulaga, ia outou nutipalaina foi o latou tupua, ma susunu i le afi o latou tupua o Asaira; ia outou vavae i lalo foi o tupua ua ta o latou atua, ia outou tineia foi o latou igoa ai lea lava mea. Aua lava tou te faapea ona fai ia Ieova lo outou Atua.

ia oe, ne‘i maileia oe i lou mulimuli atu ia te i latou, pe a faaumatia i latou i ou luma; aua foi ne‘i e saili atu i o latou atua, o loo faapea ane, Pe faapefea ona auauna nuu nei i o latou atua? ou te faia faapea lava e a‘u. Aua lava ne‘i e faia faapea ia Ieova lou Atua; auā o mea uma e inosia e Ieova, o loo inosia lava e ia, ua latou faia i o latou atua; auā ua latou susunu i le afi o latou atalii ma o latou afafine e fai ma taulaga i o latou atua.

Afai e tu mai ia te oe se perofeta, po o se faimiti, na te tuu atu foi ia te oe se faailoga po o se vavega, a taunuu foi lea faailoga po o lea vavega, na ia fai atu ai ia te oe, o loo faapea, Ina tatou mulimuli atu ia i atua ese, o e na outou le iloa, ma ia tatou auauna i ai; aua ne‘i e faalogo i upu a lea perofeta, po o lena faimiti; auā e tofotofoina ai outou e Ieova lo outou Atua, ina ia silafia pe tou te alofa atu ia Ieova lo outou Atua ma o outou loto atoa ma o outou agaga atoa.

Afai e faoso lemu ia te oe lou uso, le tama a lou tinā, po o lou atalii, po o lou afafine, po o lau avā pele, po o lau uo e pele ia te oe, o loo faapea mai, Ina tatou o ia, ma auauna i atua ese, na e le iloa, o oe, ma ou tamā; o atua o nuu e vagavagai ai outou, po o e felatai ma oe, po o e vava mamao ma oe, e gata mai i le tasi itu lalolagi e oo atu i le tasi itu lalolagi; aua e te gauai ia te ia, aua foi e te faalogo ia te ia; aua ne‘i e alofa ia te ia, aua ne‘i e faasao ia te ia, aua foi ne‘i e ufiufi ia te ia;

po ua alu o ia ma auauna i atua ese, ma ifo i ai, o le la, po o le masina, po o se tasi i ‘au o le lagi, ua ou le poloai atu ai; ona ta‘u mai ai lea ia te oe, ma e faalogo ai, ma e matuā sue atu ai; faauta foi, ua moni ua mautinoa le mea, ua faia lava lena mea inosia i Isaraelu; ona e aveina atu lea i ou faitotoa o lea tane po o lea fafine ua na faia lena mea leaga, ma ia e fetogi i maa o lea tane po o lea fafine, ia oti.

Aua ne‘i iloa ia te oe se tasi na te faaui ane lona atalii po o lona afafine i le afi, o se fai togafiti faataulāitu, o se iite i ao o le lagi, po o se saili faailoga, po o se taulāitu, po o se ‘apele, po o se fesili atu i aitu, po o se ua i ai le aitu vavalo, po o se saili atu i e ua oti. Auā e inosia e Ieova o i latou uma o e faia na mea; e tulia foi i latou e Ieova lou Atua ai ou luma ona o na mea e inosia.

A o le perofeta e faamaualuga ma tautala i se upu i lo‘u igoa, ou te lei fai ane ia te ia e tautala atu ai, pe tautala ia i igoa o atua ese, e oti lea lava perofeta.

Ia malaia lava le tagata na te faia se tupua ua ta, po o se tupua uamea, o le mea e inosia e Ieova, ua faia i lima o le tufuga, ma tuu ai i se mea lilo. Ona tali mai ai lea o le nuu uma lava, e faapea mai, Amene.

Na latou faatupuina lona fuā ona o atua ese; na latou faaonoono ia te ia i mea inosia. Na latou fai taulaga i temoni, e le o le Atua; o atua na le iloa e i latou; o atua fou, na se‘i tutupu, na le matatau i ai o outou tamā.

Ua faatupuina e i latou lo‘u fuā i le mea ua le se atua; ua faaonoono i latou ia te au i a latou mea faatauvaa; o au foi, ou te faatupuina lo latou fuā ia te i latou e le se nuu; ou te faaonoono ia te i latou i le nuu valea.

A e lei faalogo i latou i o latou faamasino, a ua mulimuli atu i atua ese e mulilulua ai, ua latou ifo foi i ai; ua vave ona latou o ese i le ala na savavali ai o latou tamā, ē sa anaana i poloaiga a Ieova; ua le faapea ona latou faia.

A ua oo ina oti o le faamasino, ona latou liliu ai lea, ua sili foi lo latou leaga i o latou tamā, ina ua latou mulimuli atu i atua ese e auauna i ai, ma ifo i ai. Ua latou le tuua a latou amio ma lo latou faalogogatā.

Ona toe amio leaga lea o le fanauga a Isaraelu i luma o Ieova, ua latou auauna ia Paala, ma Asaira, ma atua o Suria, ma atua o Saitonu, ma atua o Moapi, ma atua o le fanauga a Amoni, ma atua o Filisitia; a ua latou tuulafoai ia Ieova, ua latou le auauna ia te ia. Ona toasa tele ai lea o Ieova ia Isaraelu, ua na tuuina atu ai i latou i lima o Filisitia, ma lima o le fanauga a Amoni,

Ona alalaga lea o le fanauga a Isaraelu ia Ieova, o loo faapea, Ua matou agasala atu ia te oe, ina ua matou tuulafoai i lo matou Atua, a ua matou auauna ia Paala.

A o outou, ua outou tuulafoaiina a‘u, ma ua outou auauna i atu ese; o le mea lea ou te le toe faaola ai ia te outou. O ia, ina valaau i atua ua outou loto i ai, se‘i latou faaola ia te outou i ona po o lo outou puapuaga. Ona fai atu lea o le fanauga a Isaraelu ia Ieova, Ua matou agasala, ia e faia ia te i matou mea uma ua e finagalo i ai; tau lava ina e laveai mai ia te i matou i lenei aso. Ona latou tuu ese lea o atua ese sa ia te i latou, ma latou auauna ia Ieova; na tigaina lona finagalo ona o le puapuaga o Isaraelu.

Ua fetagofi Filisitia i le atolaau a le Atua, ma avatu ai i le fale o Takono, ua tuu i tafatafa o Takono. Ua alu usu atu i le taeao tagata o Asetota, faauta ia Takono, ua paū fao i le eleele i luma o le atolaau a Ieova; ona latou fetagofi ai lea ia Takono, ma faatu ia te ia i le mea e tu ai. Ua latou ala usu atu foi i le tasi taeao, faauta foi ia Takono, ua paū fao ia i le eleele i luma o le atolaau a Ieova; ua motu ese foi le ulu o Takono ma ona tapulima e lua i le faitotoa, ua na o le ogātino o Takono ua toe ia te ia; o le mea lea solia ai le faitotoa o Takono i Asetota e faitaulaga a Takono atoa ma e ulu atu i le fale o Takono, ua oo mai i nei ona po. Sa mamafa le aao o Ieova i tagata o Asetota, ua ia faatafunaina i latou, ma fasi ia te i latou i silailalo, o Asetota ma ona itu. Ua iloa e tagata o Asetota, ua faapea ona fai, ona latou fai ane ai lea, E le tuupeaina le atolaau a le Atua o Isaraelu ia te i tatou; auā ua mamafa lona aao ia te i tatou atoa ma Takono lo tatou atua.

Auā o le fouvale, e tusa ia ma le agasala o le faataulāitu; o le finau vale, e tusa ia ma le leaga o le tapuai i tupua. Ua e lafoai le afioga a Ieova, o lea ua lafoai ai o ia ia te oe ia le fai ma tupu.

(Ua oti Samuelu, sa taufaitagitu‘i Isaraelu uma ona o ia, ma latou tanu ia te ia i Rama lona nuu; ua faapea foi e Saulo taulāitu fafine, ma e ua i ai aitu vavalo nai le nuu.)

Ona fai mai lea o Saulo i ana auauna, Ina saili ia se fafine ua i ai se aitu vavalo, ou te alu atu ia te ia, ma ou fesili atu ia te ia. Ua fai atu ana auauna ia te ia, Faauta, o le fafine ua i ai le aitu vavalo o loo i Enetoro. Ona faatagā tagata ese lea o Saulo, ua ofu o ia i ofu ese, ua alu atu o ia ma tagata e toalua ma ia; ua oo po atu i le fafine, ua fai atu ai, O lou aitu vavalo e te faaali mai ai ia te au, ma faatulai mai ai ia te au lē ou te fai atu ai ia te oe. Ona tali mai lea o le fafine ia te ia, Faauta, ua e iloa le mea ua faia e Saulo, ua ia fasia taulāitu fafine, ma e ua i ai aitu vavalo i le nuu; o le a le mea ua e faamailei mai ai ia te au, ou te oti ai?

Auā ua toeaina Solomona ona faaliliueseina lea o lona loto e ana avā e mulimuli i atua ese; na le sao lona loto ia Ieova lona Atua, e faapei o le loto o lona tamā o Tavita. Auā na mulimuli atu Solomona ia Asaira le atua fafine o sa Saitonū, ua mulimuli foi ia Melekoma le mea leaga a sa Amoni. Ua amio leaga Solomona i luma o Ieova, ua le matuā mulimuli atu o ia ia Ieova, e pei o lona tamā o Tavita. Ona fai ai lea e Solomona o le mea maualuga o Kimosa le mea leaga a Moapi, i le mauga o loo i luma o Ierusalema; mo Moloka foi, o le mea leaga a le fanauga a Amoni. Ua faapea foi ona fai e ia mo ana avā uma o nuu ese, o e na faamuina mea manogi, ma fai taulaga i o latou atua.

Auā ua latou lafoai ia te au, ma ua latou ifo ia Asaira le atua fafine o sa Saitonū, ma Kimosa le atua o Moapi, ma Melekoma le atua o le fanauga a Amoni; e lei savavali foi i latou i o‘u ala e fai ai mea tonu i o‘u luma, ma anaana i a‘u tulafono ma a‘u faamasinoga, e pei o lona tamā o Tavita.

Ona filifili lea o le tupu, ma ia faia tamai povi auro e lua, ua fai atu foi o ia ia te i latou, E faigata ia te outou ona o ae i Ierusalema; Isaraelu e faauta mai ia i o outou atua o e na aveina ae outou mai le nuu o Aikupito.

Auā na latou faia mo i latou o mea maualuluga, ma tupua, ma tupua o Asaira, i luga o mauga maualuluga uma, ma lalo o laau tauluuluola uma. Sa i ai foi i le nuu o tagata faasotoma; ua latou faia e tusa ma mea e inosia uma a nuu ese na tulia e Ieova i luma o le fanauga a Isaraelu.

Ona faalatalata atu lea o Elia i le nuu uma, ua faapea atu, Pe tou te faaletonu i manatu e lua seia afea? Afai o Ieova o le Atua ia, ia outou mulimuli atu ia te ia; a e afai o Paala, ia outou mulimuli atu ia te ia. A e le tali mai le nuu ia te ia i se upu. Ona fai atu lea o Elia i le nuu, Ua na o a‘u ua toe i perofeta a Ieova; a o perofeta a Paala, e fa selau ma le toalimagafulu i latou. Ia latou au mai ia te i matou o povi e lua; ona filifilia lea e i latou se tasi povi mo i latou, ma latou pena, ma faaee ai i luga o fafie, a e aua le avane ai le afi; ou te saunia foi le tasi povi, ma faaee ai i luga o fafie, a ou te le avane ai le afi. Ona valaau atu lea outou i le igoa o outou atua; ou te valaau atu foi i le suafa o Ieova. O le Atua na te tali mai i le afi, o le Atua lea. Ona tali mai lea o le nuu uma, ua faapea mai, Ua lelei lau upu.

Ona fai atu lea o Elia i perofeta a Paala, Ina filifili ia se povi mo outou, ma ia muamua ona sauni ai e outou, auā e toatele outou; ia outou valaau atu foi i le igoa o outou atua, a e aua le avane ai le afi. Ona latou avea lea o le povi na tuuina atu ia te i latou, ua latou saunia foi, ma latou valaau atu i le igoa o Paala, na amata i le taeao ua oo i le tutonu o le la, ua faapea atu, Paala e, ia e faafogafoga mai ia te i matou. A ua leai se leo; e leai se na tali mai. Ona latou feosofi lea i le fata faitaulaga na latou faia. Ua oo i le tutonu o le la, ona tauemu atu lea o Elia ia te i latou, ua ia faapea atu, Ina valaau atu ia, ia leo tele; auā o le atua ia; po ua tautala ia, po ua alu ese, po ua alu i se malaga; ai lava ua moe ia, e tatau ona fagufagu atu ia te ia. Ona latou valaau atu lea ua leo tele, ma latou selei ia te i latou i polo ma tui, e tusa ma la latou tu, ua oo ina faamaligiina ifo le toto ia te i latou. Ua mavae le tutonu o le la, ona latou perofeta ane lea ua oo i le itu la e fai ai le taulaga afiafi, a ua leai se leo, e leai se na tali mai, pe faalogo mai.

Ona fai atu lea o Elia i le nuu uma, Ina faalatalata mai ia ia te au. Ona faalatalata atu lea o le nuu uma ia te ia, ona toe teu lea e ia o le fata faitaulaga o Ieova sa sŏloia i lalo. Ona ave lea e Elia o maa e sefulu ma le lua, e tusa ma le faitauina o itu aiga o atalii o Iakopo, o le na oo i ai e afioga a Ieova, na faapea, E igoa oe ia Isaraelu. Ona faia lea e ia i ia maa o le fata faitaulaga i le suafa o Ieova; ua faia foi e ia le utu ua soo ai le fata faitaulaga; o lona tele ua tusa ma sea e lua o fua. Ona faaafu lea e ia o fafie, ma pena le povi, ma faaee ai i luga o fafie; ona fai atu lea o ia, Ina faatumu mai ia o kate e fa i le vai, ma sasaa ai i luga o le taulaga mu, ma luga o fafie. Ua ia fai atu foi, Ina foi faalua mai ia. Ona latou foi faalua mai ai lea. Ua ia fai atu foi, Ina foi faatolu mai ia. Ona latou foi faatolu mai ai lea. Ua tafe le vai ua soo ai le fata faitaulaga; ua tumu foi le utu i le vai.

Ua oo i le itu la e fai ai le taulaga afiafi, ona faalatalata atu ai lea o Elia le perofeta, ua faapea atu, Ieova e, le Atua o Aperaamo, ma Isaako, ma Isaraelu, ia faailoa i lenei aso, o oe o le Atua i Isaraelu, o a‘u foi o lau auauna, ma ua ou faia o nei mea uma e tusa ma lau afioga. Ia e faafofoga mai ia te au, Ieova e, ia e faafofoga mai ia te au, ina ia iloa e le nuu nei o oe o Ieova o le Atua, ma ua e faaliliuina mai o latou loto. Ona paū ifo lea o le afi a Ieova, ma faaumatia ai le taulaga mu, ma fafie, ma maa, ma le eleele ua mitiia ai foi le vai sa i le utu. Ua iloa e le nuu uma, ona faapauufao ai lea o i latou, ua faapea, O Ieova, o le Atua ia; o Ieova o le Atua ia! Ona fai atu lea o Elia ia te i latou, Ia outou pupue i perofeta a Paala; aua ne‘i sao atu so latou. Ona latou pupue lea ia te i latou; ua ave ifo foi e Elia ia te i latou i le alia o Kisona, ma na fasioti ia te i latou i lea mea.

Na matuā fai mea leaga ina ua mulimuli i tupua, e tusa ma mea uma na faia e sa Amorī, o e na tulia e Ieova i luma o le fanauga a Isaraelu.

Ua iloa Ieu e Ioramo, ona fai atu ai lea o ia, Ieu e, e filemu ea? Ona fai mai ai lea o ia, Se a se filemu, ona le ua tele ea o faitaaga a lou tinā o Iesepela, ma ana togafiti faataulāitu?

Ona latou au mai ai lea i fafo o tupua ai le fale o Paala, ma latou susunu ai. Ua latou lepeti i le tupua o Paala, ua latou lepeti foi i le fale o Paala, ua fai ai ma māliuga, ua oo lava i le aso nei.

Ua latou faamu ai mea manogi i mea maualuluga uma, faapei o nuu ese e ua faatāfea e Ieova i o latou luma, ua latou faia foi mea leaga e faaonoono atu ai ia Ieova; auā ua latou auauna i tupua, o le mea na fetalai mai ai Ieova ia te i latou, Aua tou te faia lea mea.

A ua latou le faalogo lava, a e peitai ua latou faamaaa i o latou ua, faapei o ua o latou tamā, o e na le talitonu ia Ieova lo latou Atua. Ua latou tiai foi ana sauniga ma lana feagaiga na osi ma o latou tamā, atoa foi ma ana tulafono na ia fetalai mai ai ia te i latou; ua latou mulimuli atu foi i le mea faatauvaa, ona amio faatauvaa ai lea o i latou; ua faaa‘oa‘o foi i nuu ese na vagavagaia i latou, na poloai mai ai Ieova ia te i latou, Aua ne‘i faia faapei o i latou. Ua latou tuua foi poloaiga uma a Ieova lo latou Atua, ua latou faia foi mo i latou tupua uamea, o tamai povi e lua; ua latou fai foi le tupua o Asaira, ua latou ifo foi i ‘au uma o le lagi, ma latou auauna ia Paala. Ua latou faaui ane o latou atalii ma o latou afafine i le afi, ua latou fai togafiti faataulāitu foi, ma saili faailoga; ua matuā tuuina atu foi i latou e i latou ia fai amio leaga i luma o Ieova e faaonoono atu ai ia te ia. O le mea lea na matuā toasa mai ai Ieova ia Isaraelu, ua ia ave ese ai ia te i latou i ona luma; e leai se na toe, na o le itu aiga lava o Iuta.

A ua taitasi le nuu ma fai o latou lava atua, ma tuu ai i fale o i mea maualuluga sa faia e tagata Samaria, taitasi le nuu ma fai ai i a latou aai na latou nonofo ai.

Na latou matatau ia Ieova, a e auauna foi i o latou lava atua, faapei o tu a nuu e na faatāfeaina i latou nai lea mea. Ua oo lava i le aso nei o latou o fai faapei o tu tuai. Latou te le matatau ia Ieova; latou te le fai foi faapei o a latou tu, ma a latou sauniga, ma le tulafono, ma le poloaiga na poloai mai ai Ieova i le fanauga a Iakopo, na ia faaigoaina o Isaraelu. Na osi foi e Ieova le feagaiga ma i latou, ma na poloai mai ai ia te i latou, ua faapea mai, Aua tou te matatau i atua ese, aua tou te ifo ia te i latou, aua tou te auauna i ai, aua foi tou te ositaulaga ia te i latou.

Ua ia aveeseina mea maualuluga, ua ia tu‘ipalaina foi tupua, ua na vavae i lalo foi tupua o Asaira, ua na tu‘ininiia foi le gata ‘apa memea na faia e Mose; auā e oo lava i ona po ia na faamu i ai mea manogi e le fanauga a Isaraelu, na na ta‘ua ai foi, o le fasi ‘apa memea.

Ieova e, e moni ua faatafunaina e tupu o Asuria o nuu atoa ma o latou laueleele. Ua latou lafoina atu foi o latou atua i le afi, auā e le ni atua i latou, a o mea na faia e lima o tagata, o laau ma maa; o le mea lea ua latou faaumatia ai i latou.

Ua ia faaui ane foi lona atalii i le afi, ua iite foi i ao o le lagi, ma fai togafiti faataulāitu, ua saili foi i aitu vavalo, ma taulāitu; e tele lava le amio leaga na ia faia i luma o Ieova e faaonoono ai.

Ona ua faia e Manase le tupu o luta, ia mea leaga, e sili ona leaga i mea uma na faia e sa Amorī na muamua ia te ia, ua ia faatupu foi le agasala a Iuta i ana tupua; o le mea lea o loo faapea ona fetalai mai ai o Ieova le Atua o Isaraelu, Faauta, o loo au mai e a‘u le malaia i Ierusalema ma Iuta, e taitasi uma o e faalogologo i ai ma taalili ai ona taliga e lua.

Ua savali foi o ia i le ala uma sa savali ai lona tamā, ua na auauna i tupua sa auauna i ai lona tamā, ma ifo foi i ai.

Ua ia aveeseina foi le au faitaulaga e na faatuina e tupu o Iuta e faamu mea manogi i mea maualuluga i aai o Iuta, atoa ma mea e vagavagai i Ierusalema; o i latou foi e na faamu mea manogi ia Paala, ma le la, ma le masina, ma faailoga o le lagi, atoa ma ‘au uma a le lagi. Ua ia au mai foi le tupua o Asaira nai le fale o Ieova, ua ave i tua o Ierusalema i le alia o Ketarono, ua susunu ai i le alia o Ketarono, ma na tu‘ililiia pei o le efuefu, ona lafo ai lea o lona efuefu i luga o tuugamau o tagata o le nuu. Ua ia lepeti foi i fale o e faasotoma sa i tafatafa o le fale o Ieova, na lalaga ai e fafine o fale mo Asaira i lea mea. Ua ia au mai foi ositaulaga uma na i aai o Iuta, ma na faaleaga i mea maualuluga na faamu ai mea manogi e le au ositaulaga, pau mai i Kipea pau mai i Peresepa, ma na lepeti foi i mea maualuluga o faitotoa sa i le mea e ui atu ai i le faitotoa o Iosua le alii e pule i le aai, sa i ai i le itu tauagavale o le tagata i le faitotoa o le aai.

Ua aveeseina foi e Iosia e sa i ai aitu vavalo, ma taulāitu, ma faatagata, ma tupua, atoa ma mea inosia uma na iloa i le nuu o Iuta ma Ierusalema, ina ia faataunuuina e ia o upu o le tulafono na tusia i le tusi na maua e le ositaulaga o Hilikia i le fale o Ieova.

O lea na oti ai Saulo ona o lana agasala na na agasala atu ai ia Ieova, o le afioga lava a Ieova na ia le usiusitai i ai, ua saili foi i le aitu vavalo e fesili i ai.

Auā o atua uma o nuu o tupua lava ia; a o Ieova na ia faia le lagi.

A ua ia tofia mo ia o faitaulaga o mea maualuluga, ma aitu, ma tamai povi na ia faia.

Ua aveeseina e ia o fata faitaulaga i atua ese, ma mea maualuluga, ua ia nutininiia foi tupua, ma ua vavae i lalo o tupua o Asaira.

Ua tuua e i latou le fale o Ieova le Atua o latou tamā, ma latou auauna i tupua o Asaira, ma isi tupua. Ona oo mai ai lea o le toasa ia Iuta ma Ierusalema, ona o la latou agasala lea.

Ua ia fai taulaga foi i atua o Tamaseko o e na fasi ia te ia; ua ia faapea atu, Auā o atua o tupu o Suria o loo fesoasoani ia te i latou, ou te fai taulaga ia te i latou ina ia latou fesoasoani mai ia te au. A ua avea i latou ma mea e malaia ai o ia, atoa ma Isaraelu uma. Ua faapotopoto foi e Aasa o ipu uma o le fale o le Atua, ma ua tipitipi i ipu o le fale o le Atua, ma ua tapuni i faitotoa o le fale o Ieova, ua ia faia foi mo ia o fata faitaulaga i pito aai uma o Ierusalema. Ua faia foi e ia i aai taitasi uma o Iuta o mea maualuluga e faamu ai mea manogi i atua ese, ma na faaonoono ai ia Ieova le Atua o ona tamā.

na ia faia le amio leaga i luma o Ieova, e pei o mea leaga a nuu na tulia e Ieova i luma o le fanauga a Isaraelu. Ua ia toe faia foi o mea maualuluga na lepetia e Esekia lona tamā, ma ua faatu e ia o fata faitaulaga mo Paala, ma ua faia tupua o Asaria, ma ua ifo i ‘au uma a le lagi, ma auauna i ai.

Ua ia faaui ane ana fanau i le afi i le vanu o le atalii o Hinoma; ua iite foi i ao o le lagi, ma fai togafiti faataulāitu, ma tautala faataulāitu, ma saili i aitu vavalo, ma taulāitu; ua faia mea leaga e tele i luma o Ieova e faaonoono ia te ia. O le tupua ua ta foi na ia faia, ua ia faatuina ai i le fale o le Atua, i le mea na fetalaia mai ai le Atua ia Tavita ma Solomona lona atalii, o le fale nei ma Ierusalema, ua ou filifilia i itu aiga uma o Isaraelu, ou te tuu ai lo‘u igoa e faavavau;

E faateleina o latou tiga o e vave o atu i se tasi; o a latou taulaga i mea e inu ua faia i le toto ou te le sasaaina, ma o latou igoa ou te le ta‘ua i o‘u laugutu.

Na latou faalili foi ia te ia i a latou mea maualuluga; na latou faatupuina foi lona fuā i a latou tupua ua ta. Ua faafofoga le Atua, ona toasa tele ai lea o ia, ona matuā ‘ino‘ino ai lea o ia ia Isaraelu;

Auā o atua uma o nuu o tupua lava ia; ao Ieova, na ia faia le lagi.

Ia mamā i latou uma o e auauna i tupua ua ta, o e ua mitamita i tupua; outou atua uma e, ia outou ifo atu ia te ia.

Ua latou auauna foi i o latou tupua; ua fai foi ia mea ma mailei ia i latou. Ua latou fai foi o latou atalii ma o latou afafine ma taulaga i temoni; ma latou sasaa le toto o e le sala, o toto o latou atalii ma o latou afafine, e na latou fai ma taulaga i tupua o Kanana; ona leaga ai lea o le laueleele i le toto.

O latou tupua, o ario ma auro ia, o le galuega a lima o tagata. E fai o latou gutu, a e le feganavai i latou; e fai o latou mata, a e le vaai i latou; e fai o latou taliga, a e le faalogo i latou; e fai o latou isu, a e le sogisogi i latou; e fai o latou lima, a e le fetagofi i latou; e fai o latou vae, a e le savavali i latou; e leai se leo i o latou faaī. O e faia ia mea ua tutusa lava ma i latou; o i latou uma o e faatuatua i ai.

O tupua o nuu ese, o ario ma auro ia, o galuega a lima o tagata. E fai o latou gutu, a e le feganavai; e fai o latou mata, a e le vaai; e fai o latou taliga, a e le faalogo; e leai foi se mānava i o latou gutu. O e faia ia mea ua tutusa lava ma i latou, o i latou uma o e faatuatua i ai.

Ua e lafoaiina lava lou nuu le aiga o Iakopo, auā ua tumu i latou i mea mai sasae, ma latou itea ao o le lagi faapei o Filisitia, ua latou osi feagaiga foi ma le fanau a tagata ese.

Ua tumu foi lo latou nuu i tupua; ua latou ifo i galuega a o latou lima, o mea lava na faia i o latou tamatamai lima.

O lea aso e lafoai atu ai e tagata a latou tupua ario ma a latou tupua auro, na latou faia mo i latou e ifo i ai, e lafoaiina lava i afora ma pe‘a.

A latou fai atu foi ia te outou, Saili atu ia i aitu vavalo, ma taulāitu o e leo iī, ma e ua memu, ia outou tali atu, A le saili atu ea le nuu i lo latou Atua? Ina saili ia i le tulafono ma le mau; afai latou te le tautala e tusa ma ia upu, ua leai lava se malamalama ia te i latou.

Oi! ua faapea ona paū mai le lagi o oe le ua pupula, le atalii o le taeao; ua taia oe i lalo i le eleele, o oe sa faatoilaloina nuu ese. O oe foi sa e faapea ifo i lou loto, Ou te alu ae i le lagi, ou te siitia i luga lo‘u nofoālii ia sili i fetu a le Atua, ou te nofo foi i le mauga o le faapotopotoga i le itu i matu; ou te alu ae i luga o mea maualuluga i luga ae o ao; ma te tutusa ma lē Silisili ese. A ua aveina ifo oe i seoli i itu o le lua.

E mavae atu foi le atamai o Aikupito nai totonu ia te i latou, ou te faaumatia foi lana pule; ona latou saili ai lea i tupua, ma e ua leo oolo, ma aitu vavalo, ma e ua memu.

Tou te faaleaga foi le ufiufi ario o outou tupua ua ta, ma le ufiufi auro o outou tupua uamea, e te lafoaiina lava, e pei o le ie o le ma‘i; e te fai atu foi i ai, Alu ia.

Auā o le aso lava lea e taitasi i latou ma tiai ai ana tupua ario ma ana tupua auro, na faia mo outou e o outou lima e agasala ai.

O a‘u o Ieova, o lo‘u igoa lea; o lo‘u mamalu foi ou te le avatua lea i se tasi, ma lo‘u viiga ou te le avatua i tupua ua ta.

Ua liutuaina i latou, ua matuā mamā e ua faatuatua i tupua ua ta, o e ua fai ane i tupua uamea, O matou atua lava outou.

Ua fetalai mai Ieova, O outou o a‘u molimau, ma la‘u auauna o le na a‘u filifilia; ina ia outou iloa, ma ia outou faatuatua mai ia te au, ma ia outou lagona, o a‘u lava o ia; e leai se atua na gaosia e muamua ia te au; e leai foi se tasi e mulimuli ia te au.

O loo faapea ona fetalai mai o Ieova, o le Tupu o Isaraelu, o le na faatauina foi o ia, o Ieova o ‘au; o a‘u lē muamua, o a‘u foi lē mulimuli; a e leai se atua, ua na o a‘u lava.

O e fai tupua ua ta, e faatauvaa i latou uma, ma a latou mea faafiafia, ua le aoga lava ia; o i latou lava e molimau ia i latou; latou te le vaai, latou te le iloa foi, ina ia latou mamā. O ai ea ua na faia se atua, ma na gaosia se tupua uamea, e leai lava sona aoga? Faauta e mamā i latou uma o e faatasi ma ia; o tufuga foi, o tagata lava i latou; ia faapotopoto i latou uma; ia latou tutū i luga; e matatau i latou, e mamā faatasi. O le tufuga fai mea uamea na te faia se to‘i; na te gaosia i le malala; na te faia i samala; na te galue i ai i lona lima malosi; ua fia ‘ai foi o ia, ona leai lea o sona malosi, ua le inu ia i se vai, ona vaivai ai lea o ia. O le tufuga na te faataotoina le fua, na te tusia i le peni, na te faia i tofi, na te tusia i le fua faataaliolio, na te faia e pei o le tino o le tagata, e tusa ma le matagofie o le tagata, ina ia nofo i le fale. Ua ia tuu i lalo arasi mo ia, ua au mai e ia o le tiresa ma le aluna, na te faamalosia foi mo ia i laau o le vao; ua ia totōina le orene, ona tupu tele ai lea i le uaga; ona faia lea e le tagata ma fafie, ua ia ave foi nisi mea e mumulu a‘i o ia; na te faamuina lava ma tao a‘i areto; na te faia lava se atua, ma ifo atu i ai; na te fai a‘i se tupua ua ta, ma ifo faō i ai.

O le mea foi ua totoe na te fai a‘i se atua, o lana tupua ua ta; ua ia ifo faō i ai, ma tapuai atu i ai; ua ia tatalo foi i ai, o loo faapea atu, Ia e laveai mai ia te au, auā o lo‘u atua lava oe. Ua latou le iloa, ua latou le lagona; auā ua ufitia o latou mata ia le vaai, ma o latou loto ina ia le mafaufau.

O a‘u o Ieova, a e leai lava se tasi; e leai se Atua, na o a‘u lava; ua ou fusia oe, a o e lei iloa a‘u;

Ia faapotopotoina, ma ia o mai outou, ia faalatalata faatasi mai lava, o outou e ua sao mai nuu ese; latou te le iloa o e tauave le laau o lo latou tupua ua ta, ma latou tatalo i le atua na te le mafaia ona faaola.

Ua latou soona sasaa mai le auro mai le taga, ua latou fuatia le ario i le fua faatautau; ua latou avatu le oloa i lē fai mea uamea, na te faia se atua, latou te ifo faō i ai, latou te tapuai lava i ai. Latou te siitia o ia i o latou tau‘au, ua latou amo ia te ia, ua latou tuuina o ia i lana mea e tuu ai, ona tu ai lea o ia, e le alu ese o ia ai lona tulaga; e alaga lava se tasi ia te ia, a e le tali mai o ia; na te le faaolaina o ia i lona puapuaga.

Ia e finau i au ‘apere ma le tele o au togafiti faataulāitu, ua e lailoa ai talu ina e itiiti; ai lava ua aoga ia te oe, ai lava e te faamatau mai ai. Ua tigaina oe i le tele o au filifiliga; se‘i tutū mai o e vaevaea le lagi, o e vaavaai i fetu, o e iite i ona po o le masina faatoa vaaia, ma latou faaolaina oe i mea o le a oo ia te oe. Faauta, e avea i latou e pei o tagutugutu o saito; e susunuina i latou i le afi; e le laveaiina i latou e i latou ai le malosi o le mumū o le afi; e leai se malala ola e mumulu ai, po o se afi e nofo atu ai i ona luma. E faapea lava ia te oe o i latou ua e lailoa ai; o e ua faatau ma oe talu ina e teine itiiti; e taitasi ma alu i lona lava ala; e leai se na te faaola ia te oe.

Tou te gaoi ea, ma fasioti tagata, ma mulilua, ma tauto pepelo, ma faamu mea manogi ia Paala, ma mulimuli atu i atua ese ua outou le iloa; ma outou o mai, ma tutū i o‘u luma i lenei fale, o loo ta‘ua ai lo‘u igoa, ma outou fai mai, Ua laveaiina i matou, ina ia faia nei mea inosia uma? O lenei fale foi ua ta‘ua ai lo‘u igoa ua avea ea lea ma ana o tagata faasaua i o outou manatu? Faauta mai, o a‘u nei lava ua ou vaai atu i ai, o loo fetalai mai ai Ieova.

Ua fai fafie e le fanau, ua tafu le afi e o latou tamā, ua lomi le paluga falaoa e fafine e fai a‘i faapapā areto mā le tupu fafine o le lagi, ua liligi foi taulaga i mea e inu i atua ese, ina ia latou faaonoono mai ai ia te au.

latou te folasia ai foi i le la, ma le masina, ma ‘au uma a le lagi, o mea na latou loto i ai, ma latou auauna i ai, ma latou mulimuli atu i ai, ma latou sailiili i ai, ma latou ifo i ai; e le aofia ia ivi, e le tanumia foi, a e fai ma otaota i luga o le laueleele.

Auā ua faatauvaa lava tu a nuu ese; auā ua ta e se tasi le laau i le vao, o le galuega a lima o le tufuga e fai i le mătau. Ua latou faamatagofieina i ario ma auro, ma latou faamauina ai i fao ma samala, ina ia le gaoioi. E pei o le pama ua togitogi faamamanuina ia mea; latou te le tautala foi; e tauave i latou, auā latou te le mafai ona savavali. Aua tou te fefefe ia te i latou; auā latou te le mafai ona agaleaga mai, e le mafai foi ona agalelei mai.

Ia faapea ona outou fai atu ia te i latou, O atua na le faia le lagi ma le lalolagi, e fano i latou i le lalolagi ma lalo foi o lena lagi.

Ua taitasi ma valea tagata uma e leai so latou poto; ua taitasi ma faamaina foi tufuga fai mea uamea ona o le tupua ua ta; auā o le mea pepelo lana tupua uamea, e leai foi se mānava ia te i latou. E faatauvaa ia mea, o le galuega e tauemua; e fano lava i latou i ona po e tauia ai i latou.

O lenei nuu amio leaga, ua le mafafai i latou ona faalogo mai i a‘u upu, ua savavali ma le loto finau vale, ma mulimuli atu i atua ese, e auauna ma ifo ia te i latou, e avea lava i latou e pei o lenei fusi, e le aoga i se mea e tasi.

E faia ea e le tagata o atua mo ia, a e le ni atua i latou?

Aua ua latou tuua a‘u, ua latou liua foi lenei mea, ma ua latou faamu ai mea manogi i atua ese na latou le iloa, o i latou, po o latou tamā, po o tupu o Iuta; ma ua latou faatumuina lenei mea i le toto o e le sala. Ua faia e i latou o mea maualuluga a Paala e susunu ai a latou fanau i le afi e fai ma taulaga mu ia Paala; o le mea na ou le poloai atu ai, pe fai atu ai, ou te lei manatu foi i ai. O le mea lea faauta, o le a oo mai ai ona po, o loo fetalai mai ai Ieova, e le toe igoa ai lea mea o Tofeta, po o le vanu o le atalii o Hinoma, a o le vanu o le fasi.

e avea foi fale o Ierusalema, ma maota o tupu o Iuta, e pei o le mea e ta‘ua o Tofeta, ua leaga ia auā ua latou faamu mea manogi i luga o latou fale uma i ‘au uma o le lagi, ma ua latou liligi atu taulaga i mea e inu i atua ese.

Aua le mulimuli atu i atua ese e auauna i ai, ma ifo i ai; aua ne‘i faaonoono foi ia te au i mea e faia e o outou lima, ona ou le faatigaina lea o outou;

O lenei, aua ne‘i outou faalogo i o outou perofeta, ma o outou taulāitu, ma o outou fai miti, ma o outou tagata e iite i ao o le lagi, ma e fai togafiti faataulāitu ia te outou, o i latou o e fai atu ia te outou, ua faapea atu, E le fai ma auauna outou i le tupu o Papelonia. Auā o mea pepelo ua latou vavalo ai ia te outou, ina ia avemamaoina outou i lo outou laueleele; ia ou tulia foi outou, ma ia faaumatia outou.

a ua latou tuuina a latou mea e inosia i le fale ua ta‘ua ai lo‘u igoa, ina ia latou faaleagaina ai. Ua faia foi e i latou mea maualuluga ia Paala, ua i le vanu o le atalii o Hinoma, ina ia latou faaui ane o latou atalii ma o latou afafine i le afi ia Moloka; o le mea lava ou te lei poloai ai ia te i latou, ou te lei manatu foi i ai; ua faia e i latou lenei mea e inosia e faatupuina ai le agasala ia Iuta.

Ua taitasi ma valea tagata uma e leai so latou poto; ua taitasi ma faamaina foi tufuga fai mea uamea, ona o le tupua ua ta; auā o le mea pepelo lana tupua uamea, e leai foi se mānava ia te i latou. E faatauvaa ia mea, o le galuega e tauemua; e fano lava i latou i ona po e tauia ai i latou.

ma e fai atu, O loo faapea ona fetalai mai o le Alii o Ieova, Oi talofa i fafine o e su‘i aluga mo tulilima uma, ma fai pulou mo ulu o tupulaga uma e mailei a‘i tagata. Tou te taumailei ea i tagata o lo‘u nuu, tou te faaolaina ea foi o i latou o e o ane ia te outou?

O le mea lea, ua faapea ona fetalai mai ai o le Alii o Ieova, Faauta, ou te fai mo‘u fili o outou aluga tou te mailei a‘i agaga ina ia felelei ai i latou, ou te saeia lava ai o outou lima, ma tuuina atu i latou e ō, o agaga ia tou te taumailei ai ina ia felelei.

Le atalii e o le tagata, ua faatuina e ia tagata o a latou tupua i o latou loto, ma ua tuuina i o latou luma la latou agasala e tausuai ai; latou te fesili mai ea ia te au? O le mea lea ia e tautala atu ai ia te i latou, ma fai atu ia te i latou, O loo faapea ona fetalai mai o le Alii o Ieova, Ai se tagata o le aiga o Isaraelu na te faatuina ana tupua i lona loto, ma tuuina i ona luma lana agasala e tausuai ai, ma alu ane i le perofeta; o a‘u o Ieova, ou te tali atu i lē alu ane, e tusa ma le tele o ana tupua; ina ia maua le aiga o Isaraelu i o latou lava loto, auā ua o ese i latou uma ia te au ona o a latou tupua.

O le mea lea ia e fai atu ai i le aiga o Isaraelu, O loo faapea ona fetalai mai o le Alii o Ieova, Liliu mai ia, ina liliu ese i a outou tupua, ia liliu ese o outou mata i a outou mea inosia uma. Auā ai se tagata o le aiga o Isaraelu, po o se tagata ese o āumau i Isaraelu, na te alu ese ia te au, ma faatuina ana tupua i lona loto, ma tuuina i ona luma lana agasala e tausuai ai, ma alu ane i le perofeta e fesili atu ai ia te au, o a‘u o Ieova, o a‘u lava, ou te tali atu ia te ia.

Auā na tu le tupu o Papelonia i fetaulaigāala i le mea e vala lua ai le ala, e fai togafiti faataulāitu, na ia luluina ana u fanafana, na ia fesili atu i tupua, na ia iloilo i le ate.

Ua tali atu Tanielu i luma o le tupu, ua faapea atu, E le mafai i e popoto, ma vaafaatau, ma taulāitu, ma e o popoto i fetu, ona faaali atu i le tupu o le mea a le tupu ua lilo na ia fetalai atu ai. A o i ai le Atua i le lagi, o le na te faaalia mea ua lilo, ma faailoa mai ia Nepukanesa le tupu o mea e oo mai i aso amuli. Sa faapea lau faalepo ma le mea na e silafia i lou tofaga.

Ona o mai ai lea o taulāitu, ma vaafaatau, ma le au Kaletaia, atoa ma e o popoto i fetu, ona a‘u ta‘uina atu lea o le miti ia te i latou, a ua latou le faailoa mai ia te au lona uiga.

A o le alii o le malo o Peresia na ia tetee ia te au i po e luafulu ma le tasi; faauta foi, o Mekaeli o so le au alii sili ia, na ia maliu mai e fesoasoani mai ia te au; na tuua foi a‘u i lea mea faatasi ma tupu o Peresia.

O e ua anaana i mea faatauvaa ma le pepelo ua lafoaiina e i latou o mea e manuia ai i latou.

Ou te faaumatia togafiti faataulāitu ai lou lima, e le i ai foi ia te oe ni e iite i ao o le lagi. Ou te faaumatia foi au tupua ua ta, atoa ma au tupua maa; ona e le toe ifo ai lea i galuega a ou lima. Ou te lepeti foi i au tupua o Asaira i totonu ia te oe, ma ou faatafunaina ou aai.

Se a ea le aoga o le tupua ua ta ina ua taia e le na na faia; o le tupua uamea, ma le a‘oa‘o i le pepelo, ina ua faatuatua le na faia i lana mea na fai, ia fai ai e ia tupua e le magagana? Oi talofa i le na te fai atu i le laau, Ala mai ia; ma le maa e le magagana, Tulai mai ia! E a‘oa‘o mai ea lena mea? Faauta ia te ia, ua ufitia i le auro ma le ario, ae leai lava se mānava i totonu ia te ia.

Ou te faaloaloa atu foi lo‘u lima i luga o Iuta, ma luga o i latou uma o e nonofo i Ierusalema, ou te faaumatia foi i lenei mea o toe mea a Paala, o le igoa foi o faitaulaga i tupua faatasi ma ositaulaga; o i latou foi o e ifo i ‘au o le lagi i luga o fale; o i latou foi o e ifo ma tauto ia Ieova, a e tauto foi ia Moloka;

Auā ua tautala tupua i mea le aoga, ma e fai togafiti faataulāitu ua latou vaaia le pepelo, ma latou tala mai miti pepelo, ma latou faamafanafana fua; o le mea lea ua o ese ai i latou pei o mamoe sa tigaina ina ua leai se leoleo.

Ua faa‘ole‘ole Iuta, ua faia foi i Isaraelu ma Ierusalema le mea e inosia; auā ua solia e Iuta le mea ua paia ia Ieova, o le mea ua ia alofaina; ua ia fai avā foi i le afafine o le atua ese. E vavaeeseina e Ieova le tagata ua faia lena mea, o le ua mataala, ma le ua tali atu ai fale ie o Iakopo; atoa ma le ua avatu le taulaga ia Ieova o ‘au.

Aua foi ne‘i tou ta‘ua se tasi i le lalolagi o lo outou tamā; auā e toatasi lo outou Tamā, o i le lagi ia.

Ua tali atu Iesu, ua faapea atu ia te ia, E moni, e moni, ou te fai atu ia te oe, a le toe fanau le tagata, e le mafai ona iloa e ia o le malo o le Atua. Ua fai mai Nikotemo ia te ia, E mafai ea faapefea ona fanau o le tagata ua toeaina? E mafai ea ona toe ofi i le manava o lona tinā, e fanau mai ai? Ua tali atu Iesu, E moni, e moni, ou te fai atu ia te oe, afai e le fanau se tasi i le vai ma le Agaga, e le mafai ona sao o ia i le malo o le Atua. O le ua fanau mai i la le tino, o le tino lea; o le ua fanau mai foi i la le Agaga, o le agaga lea. Aua e te ofo auā na ou fai atu ia te oe, E ao ina toe fanau mai outou. E agi le matagi i le mea e loto i ai o ia, e te faalogo foi i lona agi, a e te le iloa le mea na sau ai, ma le mea e alu atu i ai; e faapea i latou uma o e ua fanau mai e le Agaga.

Auā ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau. Auā e lei auina mai e le Atua lona Atalii i le lalolagi ina ia faasala i le lalolagi, a ia faaolaina le lalolagi ia te ia. O lē faatuatua ia te ia, e le faasalalaina o ia; a o le lē faatuatua, ua nofosala nei lava o ia, auā e lei faatuatua lava ia i le igoa o le Atalii e toatasi o le Atua.

E moni, e moni, ou te fai atu ia te outou, o le le ui atu i le faitotoa i totonu o le lotoā mamoe, a e alu ae i ai i se tasi mea, o le gaoi lea ma le fao mea.

Ua fetalai atu Iesu ia te ia. O a‘u nei le ala, ma le upu moni, ma le ola; e le alu atu lava se tasi i le Tamā, pe a le ui mai ia te au.

A e a maliu mai o ia, o le Agaga lea e tupu mai ai le upu moni, e ta‘ita‘i e ia ia te outou i upu moni uma; auā e le tautala fua ia na o ia, a o mea uma e faalogo i ai o ia, e tautala a‘i lava, ma faailoa mai ia te outou mea e oo mai.

E leai foi se tasi ua i ai le ola; e leai lava se isi igoa i lalo o le lagi ua foaiina mai i tagata e mafaia ona faaolaina ai o i tatou.

A o le tasi tagata, o Simona le igoa, sa muai fai togafiti faataulāitu i lea aai ua faatupu ai le ofo o le nuu o Samaria, ua ia faapea, o ia lava o le silisili; ua naunau atu i latou uma lava ia te ia, o tagatānuu atoa ma alii, ua faapea ane, O le mana tele o le Atua lenei tagata. Ua latou naunau ia te ia, auā ua leva lona faatupuina o le ofo ia te i latou i ana togafiti faataulāitu. Ua talitonu i latou ia Filipo o folafola le tala lelei i mea a le malo o le Atua, ma le suafa o Iesu Keriso, ona papatisoina lea o i latou, o tane atoa ma fafine. O Simona foi, ua talitonu ia; ua papatisoina foi o ia, ona faatasi atu lea o ia ia Filipo, ua matuā ofo, ina o matamata i faailoga ma vavega tele ua faia.

Ua latou sopo itu i le motu, ua oo atu i Pafo, ua iloa ai e i latou le tasi makoi, o le perofeta pepelo, o le Iutaia, o Paiesu lona igoa; sa i ai o ia i le suikonesula, o Sekio Paulo, o le tagata faautauta lea; ua aami lenei tagata ia Panapa ma Saulo, ua manao i le fia faalogo i le afioga a le Atua. A o Elima le makoi, (auā o le uiga lea o lona igoa,) ua tetee mai o ia ia te i laua, ua fia faaliliu ese atu e ia i le suikonesula i le faatuatua. A o Saulo, (o Paulo foi lea,) ua tumu ia i le Agaga Paia, ua pulatoa ia te ia, ona faapea atu lea o ia, O oe na ua tumu i le pepelo uma ma le ulavale uma, o le atalii o le tiapolo, o lē ‘ino‘ino i le amiotonu uma lava; e te le se‘i soia ea lou faapiopio i ala tonu o le Alii? Faauta nei, o le a oo ia te oe le aao o le Alii, e tauaso oe, e te le vaai i le la seia se aso. Ona paū loa lea ia te ia o le popogi ma le pouliuli; ona fealuai lea o ia, ma saili ni tagata e ta‘ita‘i ia te ia. Ua iloa foi e le suikonesula le mea ua faia, ona talitonu lea o ia, ua matuā ofo i le mataupu a le Alii.

Ua faaigoa atu foi e i latou ia Panapa, o Seu; a o Paulo, o Hereme ia, auā o ia o le ‘autu o upu. A o le faitaulaga a Seu, o le na i luma o la latou aai lona malumalu, ua au mai e ia o povi poa ma pale i faitotoa, o le a osi taulaga o ia atoa ma le motu o tagata. Ua faalogo i ai aposetolo, o Panapa ma Paulo, ona la saeia lea o laua ofu, ma feosofi atu i le motu o tagata, o loo alalaga i laua, ua faapea atu, Alii e, se a le mea ua outou fai ai na mea? O tagata lava i maua nei e tutusa ma outou, ua ma folafola atu le tala lelei ia te outou, ia outou lafoai nei mea le aoga, ma liliu mai i le Atua soifua, o le na faia le lagi, ma le lalolagi, ma le sami, ma mea uma lava o i ai;

Ua o atu i matou i le tatalo, ona fetaiai lea ma i matou le tasi auauna teine ua i ai le aitu vavalo, ua na maua oloa e tele ma ona alii i ana valoaga. Ua femulimuliai o ia ia Paulo ma i matou, ma alaga, ua faapea ane, O auauna nei tagata a le Atua silisili ese, latou te tala‘i mai ia te i tatou le ala o le ola. Ua faapea ona fai e ia i aso e tele. A ua tiga Paulo, ua fāliu atu, ma ua fai atu i le aitu, Ou te fai atu ia te oe i le suafa o Iesu Keriso, alu ia i fafo ia te ia. Ona alu ai lea o ia i fafo i lea lava itu aso.

Ona tu atu ai lea o Paulo i Areopako, ua faapea atu o ia, O outou Atenai e, ua ou iloa i mea uma lava ua sili la outou tapuai i atua. Auā na ou ui ane, ma ou matamata i a outou mea paia, ona ou iloa atu lea o le fata ua tusi i ai, MO LE ATUA E LE ILOA. O lenei, o ia ua outou tapuai i ai ma le le iloa, ou te faailoa atu ai ia te outou. O le Atua na faia le lalolagi ma mea uma lava o i ai, ona o le Alii o ia o le lagi ma le lalolagi, e le afio o ia i malumalu e faia e lima; e le o lima o tagata e auauna ai ia te ia, peiseai ua mativa o ia i se mea e tasi; o loo foai mai e ia le ola, ma le mānava, ma mea uma lava i le vao mea atoa; ua faia foi e ia nuu uma o tagata i le toto e tasi, ia nonofo i le fogaeleele uma lava, ua na tuu foi tausaga na tofia anamua, ma tuaoi o mea latou te nonofo ai; ina ia latou saili i le Alii, pe mafai ona latou tautāgotago ma latou iloa o ia; a e peitai e le mamao o ia ma i tatou taitoatasi. Auā o ia o loo ola ai i tatou, ma gaoioi ai, o loo i ai foi i tatou talu o ia; pei ona fai mai foi e isi o outou fatu pese, Auā o lana fanau i tatou. O lenei, ona o le fanau a le Atua i tatou, e le tatau ona tatou manatu ua tusa le Atua i se auro, po o se ario, po o se maa, ua talaiia i le faiva ma le fuafua o le tagata. Na faapalepale le Atua i ona po o le vālea; a o loo fetalai mai nei i tagata uma i nuu uma lava ia salamo;

E toatele foi o e na fai togafiti faataulāitu na faapotopoto e i latou a latou tusi, ma susunu ai i luma o tagata uma; ona latou faitau lea i a latou faatusa, ua iloa ai ua lima sefulu o afe o tupe ario.

ua vālea i latou, a o faafiapopoto i latou, ua latou fesuiai foi le mamalu o le Atua soifua pea lava ma le faatagata o le tino o le tagata iu vale, ma manu felelei, ma manu vaefa, ma mea fetolofi.

o i latou ia o e ua fesuiai le upu moni i le Atua ma le upu pepelo; ua latou matatau foi ma auauna i mea na faia, a ua tuua o ia na na faia, o ia o lē viia e faavavau.

A o le ‘ai i mea e fāsia mo tupua, ua tatou iloa o le mea faatauvaa i le lalolagi le tupua; e leai foi se tasi Atua, ua na o le toatasi lava. Auā e ui lava ina o i ai e ua ta‘ua o atua, o i le lagi ma le lalolagi, (ona ua i ai atua e toatele, ma alii e toatele.)

O le mea lea, au pele e, ia outou sosola ese ai i le ifo i tupua.

Se a foi ou te fai atu ai? O se mea aoga ea le tupua? po o se mea aoga le mea ua fasia mo tupua? E leai, a o mea ua fāsia e nuu ese, ua fāsia e i latou mo temoni, a e le o le Atua; ou te le loto foi ina ia outou mafuta faatasi ma temoni. Tou te le mafaia ona inu i le ipu a le Alii atoa ma le ipu a temoni; tou te le mafaia ona faatofutofusia i le laoai a le Alii atoa ma le laoai a temoni. Tatou te faaonoono ea i le Alii? Ua sili ea lo tatou malosi i lona?

Ua outou iloa sa fai ma nuu ese outou, sa tosina foi i tupua le gagana, pei ona soona tosina o outou. O lenei, ou te faailoa atu ia te outou, e leai lava se tagata e tautala i le Agaga o le Atua na te ta‘uanatemaina o Iesu; e leai foi se tasi na te mafaia ona ta‘ua o Iesu o le Alii, a le se anoa le Agaga Paia.

Pe faapefea foi ona loto gatasi o Keriso ma Pelialo? Pe faapefea foi ona tofusia faatasi o lē talitonu ma le ua le talitonu? Pe faapefea foi ona loto faatasi o le malumalu o le Atua ma tupua? auā o outou le malumalu o le Atua soifua, pei ona fetalai mai o le Atua, Ou te nofo i totonu ia te i latou, ou te savali foi i totonu ia te i latou; e fai a‘u mo latou Atua, e fai foi i latou mo‘u tagata.

Auā o i latou, o aposetolo pepelo i latou, o le au faigaluega ‘ole‘ole, ua lina i latou e i latou ma aposetolo a Keriso. E le se mea foi lea e ofo ai, auā o Satani lava, ua liua o ia e ia ma agelu o le malamalama.

Ua ou ofo ina ua faapea ona vave liliueseina o outou i le na valaauina outou i le alofa tunoa o Keriso a e faasaga i le tala lelei e ese; e le se tasi tala lelei foi lea, a o isi tagata ua faaatuatuvale ia te outou, ma fia faaliliueseina le tala lelei a Keriso. A e peitai e ui lava ina tala‘iina e i matou, po o se agelu mai le lagi, ia te outou se tala lelei e ese i lea na tala‘iina atu ai e i matou ia te outou, ia anatema ia. Pei ona matou muai fai atu, ou te toe fai atu ai nei foi, Afai e tala‘iina atu e se isi ia te outou se tala lelei e ese i lea na outou talia, ia anatema ia.

Auā e toatasi le Atua, e toatasi foi le puluvaga i le Atua ma tagata, o le tagata o Keriso Iesu lea;

A o loo ta‘utino mai e le Agaga, e o ese nisi i le faatuatua i tausaga amuli, latou te faalogo i agaga e faasese ma mataupu a temoni;

Pei ona tofia foi mo tagata ia tasi lo latou oti, a e mulimuli ane o le faamasinoga;

Ua e talitonu e toatasi lava le Atua; ua lelei lava lea; ua talitonu foi temoni ma latou tetemu.

O ai ea le tagata pepelo, pe afai e le o le ua faafiti, ua faapea, E le o le Keriso o Iesu? O le anetikeriso lava lea o le ua faafiti i le Tamā atoa ma le Alo. Ai se faafiti i le Alo, e le o ia te ia le Tamā; (o le ua ta‘uta‘ua le Alo, ua ia te ia foi le Tamā.)

Leau pele e, aua tou te faalogo i agaga uma lava, a ia outou tofotofo i agaga pe mai le Atua i latou; auā e toatele perofeta pepelo ua o atu i le lalolagi. O le mea lenei tou te iloa ai le Agaga o le Atua, O agaga uma o e ta‘utino, ua maliu mai Iesu Keriso i le tino, mai le Atua lava i latou. A o agaga uma o e le ta‘utino, ua maliu mai Iesu Keriso i le tino, e le mai le Atua i latou; o lo le anetikeriso lava lenei ua outou faalogo ai o le a sau, o loo i ai nei i le lalolagi.

O i matou, mai le Atua lava i matou, o le ua iloa le Atua e faalogo mai o ia ia te i matou; o le le mai le Atua e le faalogo mai o ia ia te i matou; o le mea lea ua tatou iloa ai le agaga moni ma le agaga sese.

Le fanau e, ia leoleo outou ia te outou ia taumamao i tupua. Amene.

O i latou uma lava o e tuumavaega, a e le tumau i le mataupu ia Keriso, e le o ia te i latou le Atua; o lē tumau i le mataupu ia Keriso, e ia te ia lava le Tamā atoa ma le Alo. Pe a alu atu ia te outou se tasi a e le molia lenei lava mataupu, aua tou te talia o ia i o outou fale, aua foi tou te ofo alofa ia te ia; auā o sē ofo alofa atu ia te ia, e faatasi ai o ia ma ana galuega leaga.

O tagata foi na totoe o e lei fasiotia i nei mala, latou te lei salamo i galuega a o latou lima, o lo latou ifo i temoni, ma tupua auro, ma ario, ma ‘apa memea, ma maa, ma laau, o mea ia e le mafaia ona vaai, pe faalogo, pe savavali; latou te lei salamo foi i o latou fasioti tagata, ma a latou togafiti faataulāitu, ma la latou faitaaga, ma o latou gaoi.

Ua lafo foi le tarako tele, o le gata tuai lea, ua igoa i le tiapolo, i le ma Satani, o lē faasese i le lalolagi uma; ua lafo ifo i le lalolagi, ua lafo foi ana agelu faatasi ma ia.

Ua latou ifo foi i le tarako o le na tuuina atu le pule i le manu feai, ua latou ifo foi i le manu feai, ua faapea atu. O ai sē tusa ma le manu feai? O ai se na te mafaia ona tau ma ia?

Ua tuuina atu foi ia te ia na te avatua le mānava i le faatagata o le manu feai, ina ia tautala le faatagata o le manu feai, ma ia faia ina ia fasiotia i latou uma o e le ifo atu i le faatagata o le manu feai. Ua faia foi e ia ona ia faailogaina o tagata uma, o tagata nuu atoa ma alii, o e mauoa ma e matitiva, o e sa‘oloto ma e pologa, ia faailogaina i latou i o latou lima taumatau, po o latou muaulu; ina ia le mafaia ona faatau mai pe faatau atu e se tasi, tau lava o e ua i ai le faailoga, po o le igoa o le manu feai, po o le faitau aofai o lona igoa. O le mea lenei ua i ai le poto. O le ua i ai le mafaufau ina faitau ia o ia i le faitau aofai o le manu feai; auā o le faitau aofai lea o le tagata; o lona faitau aofai foi, E ono selau ma le onogafulu ma le ono.

Ona mulimuli atu ai lea ia te i laua o lona toatolu o agelu, ua faapea atu ma le leo tele, Ai se tasi e ifo i le manu feai ma lona faatagata, ma talia le faailoga i lona muaulu po o lona lima, e inu lava ia i le uaina o le toasa o le Atua, ua liligiina atu e le suia i le ipu o lona toasa, e puapuagatia foi ai i le afi ma le teio i luma o le au agelu paia ma luma o le Tamai mamoe; o le asu foi o lo latou puapuaga e alu ae e faavavau faavavau lava; latou te le maua foi se filemu i le ao ma le po o e ua ifo i le manu feai ma lona faatagata, ma se na te talia le faailoga o lona igoa.

Ua ofu le fafine i le ie pāuli ma le mūmū, ua teuteu foi i auro, ma maa tāua, ma penina, ua i lona lima le ipu auro, ua tumu i mea e inosia ma le leaga o lana faitaaga; ua tusia foi i lona muaulu le igoa, O LE MEA LILO, PAPELONIA LE AAI TELE, O LE TINA O FAFINE TALITANE MA MEA E INOSIA I LE LALOLAGI. Na ou iloa foi le fafine ua onā i le toto o le au paia ma le toto o e na molimau ia Iesu; ua ou iloa atu ia te ia, ona ou matuā ofo tele ai lea.

e le toe pupula mai foi ia te oe se malamalama o se lamepa, e le toe lagona foi ia te oe le leo o le faatoafaiavā ma le faatoanofo tane; auā o ou tagata faatauoa o tagata sili ia o i le lalolagi, auā ua faaseseina nuu uma i au togafiti faataulāitu.

A o e loto vaivai, ma e lē faalogo, ma e fai mea e inosia, ma e fasioti tagata, ma e faitaaga, ma e faataulāitu, ma e ifo i tupua, atoa ma e tala pepelo uma, e fai o latou tofi i le lepa e mu i le afi ma le teio, o le oti faalua lea.