29 – Temoni

Ua sili le atamai o le gata i manu uma o le vao na faia e Ieova le Atua. Ua fai mai o ia i le fafine, E moni ea, na fetalai mai le Atua, lua te le aai i laau uma o le faatoaga? Ona tali atu ai lea o le fafine i le gata, O fua o laau o le faatoaga ma te aai ai lava; a o le fua o le laau o i totonu o le faatoaga na fetalai mai ai le Atua, Aua ma te aai ai, aua foi ma te papai atu i ai, ne‘i ma oti. Ona fai mai lea o le gata i le fafine, Lua te le oti lava; auā ua silafia e le Atua, o le aso lua te aai ai, e pupula ai o oulua mata; ona avea ai lea o oulua e pei ni atua o loo iloa le lelei ma le leaga. Ona vaai atu lea o le fafine i le laau e lelei lava pe a ‘ai, ma ua matagofie mai, o le laau foi e aoga e maua ai le poto, ona tago ai lea o ia i lona fua, ma ‘ai ai; na ia avatu foi i lana tane faatasi ma ia, na ‘ai ai foi o ia.

Ona fetalai atu lea o Ieova le Atua i le fafine, Se a lena mea ua e faia? Ona tali mai lea o le fafine, Na faasese mai le gata ia te au, ona ou ‘ai ai lea. Ona fetalai atu lea o Ieova le Atua i le gata, E sili lou malaia i manu vaefa fanua uma, ma manu vaefa uma lava o le vao, ina ua e faia lena mea; e te sosolo i lou manava, o le efuefu e te ‘ai ai i aso uma o lou ola; ou te faatupuina le feitagai ia te oulua ma le fafine, o lau fanau foi ma lana fanau; na te tu‘imomomoina lou ulu, a o oe e te tu‘imomomoina lona mulivae.

Ua oo ina amata ona faatoateleina o tagata i le fogāeleele, ma ua fanauina e i latou o afafine, ona vaavaai lea o atalii o le Atua i afafine o tagata, ua lalelei lava i latou; ona fai avā ai lea o i latou i fafine uma ua latou loto i ai. Ona fetalai ane lea o Ieova, E le faavavau ona finau o lo‘u Agaga ma tagata, auā ua na o tagata i latou; a o latou aso e selau ma le luafulu o tausaga ia. Sa i le lalolagi i ia ona aso o tagata maualuluga; e faapea foi i ona tua mai, ina ua o ane o atalii o le Atua i afafine o tagata, ma ua fananau ai ia te i latou, o tagata malolosi ia ma le ta‘ua anamua.

Latou te le toe faia foi a latou taulaga i aitu, sa latou mulimuli atu ai e mulilulua ai; o le tulafono lena e faavavau ia i latou i o latou tupulaga amuli.

Aua tou te faasaga atu ia i latou o i ai aitu vavalo, aua foi e te saili i taulāitu e leaga ai outou; o a‘u o Ieova lo outou Atua.

O le tagata foi e liliu ane i e o i ai aitu vavalo, ma e taulāitu, e mulimuli atu i ai e mulilulua ai, ou te faia mo‘u fili lea tagata, ou te vavaeeseina foi o ia i lona nuu.

O se tane foi po o se fafine o i ai se aitu vavalo, po o ua fai ma taulāitu, ia fasiotia lava ia; latou te fetogi ia i latou i maa; e ia te i latou o latou toto.

Ua latou aami foi i le nuu i taulaga i o latou atua; ona aai ai lea o le nuu, ma ifo atu i o latou atua. Ua faatasia foi Isaraelu ma Paalapeoro; ona tupu ai lea o le toasa o Ieova ia Isaraelu.

Aua ne‘i iloa ia te oe se tasi na te faaui ane lona atalii po o lona afafine i le afi, o se fai togafiti faataulāitu, o se iite i ao o le lagi, po o se saili faailoga, po o se taulāitu, po o se ‘apele, po o se fesili atu i aitu, po o se ua i ai le aitu vavalo, po o se saili atu i e ua oti.

Na latou fai taulaga i temoni, e le o le Atua; o atua na le iloa e i latou; o atua fou, na se‘i tutupu, na le matatau i ai o outou tamā.

Ona amio leaga lea o le fanauga a Isaraelu i luma o Ieova, ua latou auauna foi ia Paala.

Ua fetagofi Filisitia i le atolaau a le Atua, ma latou ave nai Epenesa i Asetota. Ua fetagofi Filisitia i le atolaau a le Atua, ma avatu ai i le fale o Takono, ua tuu i tafatafa o Takono. Ua alu usu atu i le taeao tagata o Asetota, faauta ia Takono, ua paū fao i le eleele i luma o le atolaau a Ieova; ona latou fetagofi ai lea ia Takono, ma faatu ia te ia i le mea e tu ai. Ua latou ala usu atu foi i le tasi taeao, faauta foi ia Takono, ua paū fao ia i le eleele i luma o le atolaau a Ieova; ua motu ese foi le ulu o Takono ma ona tapulima e lua i le faitotoa, ua na o le ogātino o Takono ua toe ia te ia; o le mea lea solia ai le faitotoa o Takono i Asetota e faitaulaga a Takono atoa ma e ulu atu i le fale o Takono, ua oo mai i nei ona po. Sa mamafa le aao o Ieova i tagata o Asetota, ua ia faatafunaina i latou, ma fasi ia te i latou i silailalo, o Asetota ma ona itu. Ua iloa e tagata o Asetota, ua faapea ona fai, ona latou fai ane ai lea, E le tuupeaina le atolaau a le Atua o Isaraelu ia te i tatou; auā ua mamafa lona aao ia te i tatou atoa ma Takono lo tatou atua.

Ua te‘a le Agaga o Ieova ia Saulo, ona osofia lea o ia e le agaga leaga mai ia Ieova. Ua fai atu auauna a Saulo ia te ia, Faauta mai, ua osofia oe e le agaga leaga mai le Atua; ia fetalai mai nei lo matou alii i au auauna i ou luma, matou te sailia se tagata ua poto e ta i le kitara; i le a oo mai le agaga leaga mai le Atua ia te oe, ona ta ai lea e ia i lona lima, e te lelei ai.

A oo mai le agaga mai le Atua ia Saulo, ona tago ai lea o Tavita i le kitara, ua ta i lona lima; ona mapu ai lea o Saulo, ua lelei ai o ia, ua alu ese ai le agaga leaga ia te ia.

Ua oo i le taeao, ona osofia ai lea o Saulo e le agaga leaga mai le Atua, ua perofeta ane ai o ia i lona fale; a o Tavita, na ta e ia i le kitara i lona lima, pei ona fai i lea aso ma lea aso; sa i ai le tao i le lima o Saulo.

Sa ia Saulo le agaga leaga mai ia Ieova; o loo nofo o ia i lona fale ma lona tao i lona lima, o loo ta foi e Tavita le kitara i lona lima.

Auā na mulimuli atu Solomona ia Asaira le atua fafine o sa Saitonū, ua mulimuli foi ia Melekoma le mea leaga a sa Amoni. Ua amio leaga Solomona i luma o Ieova, ua le matuā mulimuli atu o ia ia Ieova, e pei o lona tamā o Tavita. Ona fai ai lea e Solomona o le mea maualuga o Kimosa le mea leaga a Moapi, i le mauga o loo i luma o Ierusalema; mo Moloka foi, o le mea leaga a le fanauga a Amoni.

Ona fai mai ai lea o Mekaio, O lenei, ia e faafogafoga mai i le afioga a Ieova. Na ou iloa atu ia Ieova o loo tietie i lona nofoālii; sa tutū foi ‘au uma a le lagi e latalata ia te ia, i lona itu taumatau ma lona itu tauagavale. Na fetalai atu foi Ieova, Po o ai ea na te faaoleole ia Aapo, ina ia alu ae o ia, ma oti i Ramota-Kiliata? Ona fai mai lea o le tasi e faapea, a e fai mai le isi e faapea. Ona alu ane lea o le tasi agaga, ma tu mai i luma o Ieova, ua fai mai, Ou te faaoleole ia te ia. Na fetalai atu foi Ieova ia te ia, I ni a ea? Ona fai mai lea o ia, Ou te alu, ma ou fai ma agaga pepelo i gutu o ana perofeta uma. Ona fetalai atu lea o Ieova, E te faaoleole ia te ia, e te malo foi; ina alu ia, ina e faia ia o lea. O lenei, faauta, na tuuina e Ieova le agaga pepelo i gutu o au perofeta nei uma; auā ua fetalai e Ieova ia oo le leaga ia te oe.

Ua latou tuua foi poloaiga uma a Ieova lo latou Atua, ua latou faia foi mo i latou tupua uamea, o tamai povi e lua; ua latou fai foi le tupua o Asaira, ua latou ifo foi i ‘au uma o le lagi, ma latou auauna ia Paala. Ua latou faaui ane o latou atalii ma o latou afafine i le afi, ua latou fai togafiti faataulāitu foi, ma saili faailoga; ua matuā tuuina atu foi i latou e i latou ia fai amio leaga i luma o Ieova e faaonoono atu ai ia te ia.

Ua aveeseina foi e Iosia e sa i ai aitu vavalo, ma taulāitu, ma faatagata, ma tupua, atoa ma mea inosia uma na iloa i le nuu o Iuta ma Ierusalema, ina ia faataunuuina e ia o upu o le tulafono na tusia i le tusi na maua e le ositaulaga o Hilikia i le fale o Ieova.

O lea na oti ai Saulo ona o lana agasala na na agasala atu ai ia Ieova, o le afioga lava a Ieova na ia le usiusitai i ai, ua saili foi i le aitu vavalo e fesili i ai.

Ua tulai mai Satani ia Isaraelu, ua ia faaoso ia Tavita ia faitauina Isaraelu.

A ua ia tofia mo ia o faitaulaga o mea maualuluga, ma aitu, ma tamai povi na ia faia.

Ua ia faaui ane ana fanau i le afi i le vanu o le atalii o Hinoma; ua iite foi i ao o le lagi, ma fai togafiti faataulāitu, ma tautala faataulāitu, ma saili i aitu vavalo, ma taulāitu; ua faia mea leaga e tele i luma o Ieova e faaonoono ia te ia.

Ua oo i le tasi aso, ona o mai ai lea o atalii o le Atua e tutū mai i luma o Ieova; na sau foi Satani faatasi ma i latou. Ua fetalai atu Ieova ia Satani, Ua e sau ea mai fea? Ona tali mai ai lea o Satani ia Ieova, ua faapea, Ua ou sau na a‘u fealuai i le lalolagi, ma fesavaliai ai. Ua fetalai atu Ieova ia Satani, Ua e mafaufau ea i la‘u auauna o Iopu, auā ua leai se tasi e tusa ma ia i le lalolagi, o le tagata ua sao lana amio ma le amiotonu, o le ua mata‘u i le Atua, ma ‘alo‘alo ese i mea leaga? Ona tali mai ai lea o Satani ia Ieova, ua faapea mai, Ua mata‘u fua ea Iopu i le Atua? Ua e le siosiomia ea i le aupa o ia, ma lona fale, atoa ma ana mea uma i itu uma? ua e faamanuia le galuega a ona lima, ua e faateleina foi ana manu i le fanua. A e peitai ia e aapa atu lou aao, ma e tago atu i ana mea uma, pe na te le faifai ai ea ia te oe i ou lava luma? Ona fetalai atu lea o Ieova ia Satani, Faauta, ua i lou lima ana mea uma, tau o ia lava aua e te faaoo i ai lou lima. Ona alu ese ai lea o Satani i luma o Ieova.

Ua oo i le tasi aso, ona o mai ai lea o atalii o le Atua e tutū mai i luma o Ieova, na sau foi Satani faatasi ma i latou e tu mai i luma o Ieova. Ua fetalai atu foi Ieova ia Satani, Ua e sau ea mai fea? Ona tali mai ai lea o Satani ia Ieova, ua faapea mai, ua ou sau na a‘u fealuai i le lalolagi, ma fesavaliai ai. Ua fetalai atu Ieova ia Satani, Ua e mafaufau ea i la‘u auauna o Iopu, auā e leai se tasi e tusa ma ia i le lalolagi, o le tagata ua sao lana amio ma le amiotonu, o le ua mata‘u i le Atua, ma ‘alo‘alo ese i mea leaga? Ua taofi mau pea foi e ia lana amiotonu, sa e faaosoina a‘u ia te ia, ia ou faaoo fua le malaia ia te ia. Ona tali mai ai lea o Satani ia Ieova, ua faapea mai, O le pa‘u e sui a‘i le pa‘u; o mea uma foi ua i ai i le tagata, e avatua e ia e sui a‘i lona ola. A e peitai ia e aapa atu lou aao, ma e tago atu i ona ivi ma ona aano, pe na te le faifai ai ea ia te oe i ou lava luma? Ona fetalai atu lea o Ieova ia Satani, Faauta, o ia o i lou lima, tau o lona ola e te faasaoina. Ona alu ese ai lea o Satani i luma o Ieova, ma na faaoo ia Iopu le ma‘i papala leaga, e gata ae i ona alofivae, e gata ifo i lona tumuai.

Ua latou fai foi o latou atalii ma o latou afafine ma taulaga i temoni; ma latou sasaa le toto o e le sala, o toto o latou atalii ma o latou afafine, e na latou fai ma taulaga i tupua o Kanana; ona leaga ai lea o le laueleele i le toto.

O seoli i lalō ua faagaeetia ona o oe, e faafetaiai ia te oe i lou alu atu; ua lagaina ona o oe agaga o e ua oti, o alii sili uma o le lalolagi; e faatulaiina tupu uma o nuu ese i o latou nofoālii. O i latou uma latou te tautala atu, ma faapea atu ia te oe, O oe foi ua e vaivai ea e pei o i matou? ua avea ea oe e tutusa ma i matou? Ua faaoo ifo i seoli lou faalialia ma le leo o au napeli; ua folasia ilo i lalo ia te oe, ua fai foi anufe mou ie afu.

Oi! ua faapea ona paū mai le lagi o oe le ua pupula, le atalii o le taeao; ua taia oe i lalo i le eleele, o oe sa faatoilaloina nuu ese. O oe foi sa e faapea ifo i lou loto, Ou te alu ae i le lagi, ou te siitia i luga lo‘u nofoālii ia sili i fetu a le Atua, ou te nofo foi i le mauga o le faapotopotoga i le itu i matu; ou te alu ae i luga o mea maualuluga i luga ae o ao; ma te tutusa ma lē Silisili ese. A ua aveina ifo oe i seoli i itu o le lua.

O i latou o e vāai ia te oe latou te pulatoa ia te oe, latou te mafaufau ia te oe, ma faapea ane, O le tagata ea lenei sa faagateteina le lalolagi, sa na luluina malo? o le na faia ma vao le atu laulau, ma na faatafunaina aai sa i ai; sa na le tuuina atu ona tagata o taua e ō i o latou aiga?

Filisitia atoa e, aua e te olioli oe ina ua gauia le tootoo sa taia a‘i oe; auā o le tino o le gata e tupu mai ai le gata uogo, o lana tama foi, o le gata lele lea.

O lea aso e faasalaina ai e Ieova o leviatana, o le gata tele vave, o leviatana lava, o le gata taataai, e faasalaina lava i lana pelu maaa, ma le tele ma le malosi; e fasimatea lava e ia le tanimo o loo i le vai.

O le avega a manu i le itu i toga; o loo o atu i le nuu e i ai puapuaga, ma le atuatuvale, e tutupu mai ai le leona fafine ma le leona, o le gata ma le gata lele, latou te ave a latou oloa i tua o asini, ma a latou oa i pona o kamela i le nuu e le aoga ia te i latou.

Ina ta‘u atu ia outou i atu nuu, ma faailoa atu ai; sii i luga foi le tagavai; ina faailoa atu ia, aua le natia; ia outou faapea atu, Ua aea Papelonia, ua faamaina Pele, ua matautuia Merota; ua faamaina ona tupua, ua matautuia ana tupua.

Le atalii e o le tagata, ia e sauni atu se pese e aualofa a‘i i le tupu o Turo, ma fai atu ia te ia, O loo faapea ona fetalai mai o le Alii o Ieova, O oe na, ua e faamau faailogaina le atoatoa; ua tumu oe i le poto, ua atoatoa foi lou matagofie. Sa i Etena oe i le faatoaga a le Atua, na liloia oe i maa tāua uma, o le salikea, ma le topasi, ma le ialoma, ma le tasesa, ma le soama, ma le iasepi, ma le safaira, ma le nofeka, ma le pereketa, atoa ma auro; na fai au topa ma au fagufagu; na saunia ia i le aso na faia ai oe. O oe o le kerupi ua faauuina, o lē faamalumalu; na ou tuuina oe, sa e i luga o le mauga paia o le Atua; sa e fealualuai i le va o maa o le afi. Na atoatoa ona lelei o au sauniga talu le aso na faia oe, ua oo i le aso na iloa ai lau amio leaga.

O lou faatauina o oa ina tele ua faatumuina ai oe i le saua, ma ua e agasala; o le mea lea ou te faaleagaina ai oe, ia te‘a ese i le mauga o le Atua; ou te faaumatia oe le kerupi faamalumalu nai le va o maa o le afi. Na faamaualugaina lou loto i lou matagofie; ua e faamaumau lou poto ma lou matagofie; ou te lafoina oe i lalo i le eleele; ou te tuuina atu oe i luma o tupu ina ia latou vaavaai ia te oe. O au amio leaga ina tele, ma le pepelo i lou faatauina o mea, ua e faaleagaina au mea paia, o le mea lea ou te faatupuina ai se afi ai totonu ia te oe, e faaumatia ai oe, ou te avea oe ma lefulefu i le fogāeleele i luma o i latou atoa o e vaavaai ia te oe. O nuu uma e iloa oe e fememeai i latou uma ona o oe; e avea foi oe ma mea e ala ai le mata‘u e le toe ai lava oe e faavavau.

Ona faapea mai ai lea o ia ia te au, Tanielu e, aua le fefe; auā talu le luai aso na e sauni ai lou loto e mafaufau ma faatigaina oe e oe i luma o lou Atua, sa faafofogaina au upu, ua a‘u sau foi ona o au upu. A o le alii o le malo o Peresia na ia tetee ia te au i po e luafulu ma le tasi; faauta foi, o Mekaeli o so le au alii sili ia, na ia maliu mai e fesoasoani mai ia te au; na tuua foi a‘u i lea mea faatasi ma tupu o Peresia.

Ona faapea mai ai lea o ia, Ua e iloa ea le mea ua a‘u sau ai ia te oe? o lenei, o le a a‘u toe foi e tau ma le alii o Peresia; faauta foi, a a‘u alu atu, ona sau ai lea o le alii o Iavana. A e peitai ou te faaali atu ia te oe le mea ua tusia i le Tusi e faamaoni; ua leai foi se tasi e fesoasoani mai ia te au i na mea, ua na o Mekaeli lo outou alii.

Ua ia faaali mai foi ia te au o Iosua le faitaulaga sili, o loo tu i luma o le agelu a Ieova; o Satani foi, o loo tu o ia i lona itu taumatau e tetee atu ia te ia. Ona fetalai atu lea o Ieova ia Satani, Ia aoai atu Ieova ia te oe Satani, ia aoai atu ia te oe Ieova, o le ua filifili i Ierusalema; e le o le motumotu ea lenei na seia mai le afi?

Ua fetalai mai Ieova o ‘au, O lea aso ou te tineia ai igoa o tupua i le lalolagi, e le toe manatua i latou; atoa foi ma perofeta ma le agaga leaga, ou te faate‘aeseina ia i le lalolagi.

Ona aveina ae lea o Iesu i le vao e le Agaga, ina ia faaosoosoina e le tiapolo. Ua faalaina ia i po e fagafulu ma ao e fagafulu, mulimuli ane ona fia taumafa ai lea o ia. Ona alu ane lea ia te ia o lē faaosooso, ua faapea mai, Afai o oe le Alo o le Atua, ina fetalai atu ia ia liu areto nei maa. Ona tali atu ai lea o ia, ua faapea atu, Ua tusia, E le na o mea e ‘ai e ola ai le tagata, a o afioga uma e tūlei mai i le fofoga o le Atua. Ona ave ai lea o ia e le tiapolo i le aai paia, ua ia faatuina foi ia te ia i le tumutumu o le malumalu, ona fai mai lea o ia ia te ia, Afai o oe le Alo o le Atua, oso ia oe i lalō; auā ua tusia, E poloai o ia i ana agelu ia te oe, latou te ave ia te oe i o latou lima, ne‘i tū‘ia lou vae i se maa. Ua fetalai atu Iesu ia te ia, Ua tusia foi, Aua e te tofotofo i le Alii lou Atua. Ona toe ave lea o ia e le tiapolo i le mauga matuā maualuga, ua ia faaali foi ia te ia malo uma o le lalolagi ma o latou matagofie; ona fai mai lea o ia ia te ia, Ou te avatua nei mea uma ia te oe, pe afai e te faapaū ma ifo mai ia te au. Ona fetalai atu lea o Iesu ia te ia, Ina alu ese ia oe Satani; auā ua tusia, E te ifo atu i le Alii lou Atua, ua na o ia lava e te auauna i ai. Ona tuua ai lea o ia e le tiapolo, faauta foi, ua o mai agelu ma auauna mai ia te ia.

Ua oo atu ai lona logo i Suria uma, ona latou au mai ai lea ia te ia o e ua mamai atoa uma, o e ua i ai ma‘i eseese, ma e ua puapuagatia, ma e ua uluitinoina e temoni, ma e ua ma‘i māliu, atoa ma e ua mamai i le supa; ona faamaloloina lea o i latou e ia.

E le sao atu i le malo o le lagi i latou uma o e fai mai ia te au, Le Alii e, le Alii e; na o le na te faia le finagalo o lo‘u Tamā o i le lagi. E toatele latou te fai mai ia te au i lea aso, Le Alii e, le Alii e, matou te lei perofeta ane ea i lou igoa, o lou igoa foi na matou tulia ai temoni, o lou igoa foi na matou fai ai vavega e tele? Ona ou ta‘utino atu ai lea ia te i latou, Ou te lei iloa lava outou; ina o ese ia outou ia te au, o outou o e fai amio leaga.

Ua oo i le afiafi, ona latou au mai ai lea ia te ia o tagata e toatele ua uluitinoina e temoni; ona ia tulia ai lea o agaga i le upu lava, ua faamaloloina foi e ia o i latou uma na mamai.

Ua oo atu ia i le tasi itu i le nuu o Kerekese, ona fetaiai ai lea ma ia o tagata e toalua ua uluitinoina e temoni, ua o mai mai tuugamau, ua matuā faavalemalosi i laua, e le mafai ai se tasi ona ui ane i lea ala. Faauta foi, ua alalaga i laua, ua faapea mai, Se a lau na ia te i matou nei, Iesu e, le Alo o le Atua? Ua e maliu mai ea iinei, e te faatiga ia te i matou a o lei oo i ona po? Ua mamao ane foi ma i latou le lafu puaa e tele o tataa. Ua aioi mai temoni ia te ia, ua faapea mai, Afai a ē tulia i matou i fafo, tuu mai ia ia te i matou e o atu i le lafu puaa. Ona fetalai atu ai lea o ia ia te i latou, Ina o ia. Ona latou o i fafo ai lea, ua o atu i le lafu puaa; faauta foi, ua feosofi ifo le lafu puaa uma i le tofē i le vai, ua mamate ai i le vai. Ona sosola ai lea o e sa fagaina, ua oo i le aai, ma tala atu ai mea uma, atoa ma mea ua oo i e sa i ai temoni.

Ua la o, faauta, ua latou au mai ia te ia le tagata gūgū, ua uluitinoina e le temoni. Ua tulia le temoni, ona tautala mai ai lea o le gūgū. Ona taufaiofo ai lea o le motu o tagata, ua faapea ane, E lei iloa mai anamua se mea faapena i Isaraelu. A ua fai ane le au faresaio, O le temoni sili ua tulia ai e ia e temoni.

Ua valaau atu e ia ona soo e toasefulu ma le toalua, ona tuu atu lea e ia ia te i latou le pule i agaga leaga, ina ia tutuli ia te i latou, ma faamalolo i ma‘i uma ma ma‘i tiga uma.

Ia outou faamalolo i e mamai, faamamā lepela, faatutū i e ua oti, tutuli i temoni. Ua maua fua e outou, ia outou foaifuaina atu.

Ona aumaia lea ia te ia o le tagata ua uluitinoina e le temoni, o le tauaso foi o ia ma gūgū; ona faamaloloina ai lea e ia o ia, ona tautala ai lea ma vaai lē sa tauaso ma gūgū. Ona taufaiofo ai lea o le motu o tagata uma, ua faapea ane, E le o le atalii ea lenei o Tavita?

A ua lagona e le au faresaio, ona latou fai ane ai lea, Aua le se anoa Pelesepulo le alii o temoni, e le tulia e lena tagata o Temoni. A ua silafia e Iesu o latou manatunatu, ona fetalai atu ai lea o ia ia te i latou, O malo uma ua fevaevaeai e faaumatia ia; o aai uma foi po o aiga e fevaevaeai e lē tumau ia. Afai foi e tulia e Satani ia Satani, ona fevaevaeai lea o ia ia te ia; pe faapefea foi ona tumau o lona malo? Afai foi o Pelesepulo ou te tulia ai e a‘u temoni, po o ai ua tulia ai temoni e a outou fanau? O le mea lea e fai ai i latou ma faamasino ia te outou. A e afai o le Agaga o le Atua ou te tulia ai e a‘u o temoni, ua oo mai lava ia te outou le malo o le Atua. E mafai faapefea se tasi ona ulu atu i le fale o le tagata malosi, ma vete ana mea? seia muai fusifusia le tagata malosi, i le vete ai lona fale. O se le ‘au ia te au, e ‘au ese lea ia te au; o se le faaputu faatasi ma a‘u, e faataapeape lea. O le mea lea ou te fai atu ai ia te outou, O agasala uma ma upu leaga e faamagaloina ia i tagata; a o le upu leaga i le Agaga, e le faamagaloina lea i tagata. Ai sē fai upu i le Atalii o le tagata, e faamagaloina lea; a o lē fai upu i le Agaga Paia, e le faamagaloina lea i le olaga nei po o lē atali.

Pe a alu i fafo i le tagata le agaga leaga, ona fealuai ai lea o ia i nuu naumati, ua saili se malologa, a e le maua. Ona faapea ane ai lea o ia, Ou te foi atu i lo‘u fale na ou sau ai; ua alu i ai, ona iloa ai lea ua tuufua, ua uma foi ona tafitafi ma teuteu. Ona alu ai lea o ia, ua na aumaia isi agaga e toafitu e sili lo latou leaga i lona, ona latou ulufale atu ai lea, ua nonofo ai; ona sili ai lea o le leaga o le iuga o lea tagata i lona amataga. E faapea foi ona fai i lenei tupulaga leaga.

A faalogo se tasi i le upu o le malo, a e le lagona, ona alu ane ai lea o le ua leaga, ua fao le mea sa luluina i lona loto; o le mea lea sa luluina i le auala.

Ua sauni atu e ia le tasi faataoto ia te i latou, ua faapea atu, Ua faatusaina le malo o le lagi i le tagata ua luluina le saito lelei i lona fanua; ua momoe tagata, ona alu ane ai lea o le ua ita mai ia te ia, ua na luluina le titania i totonu o le saito, ona alu ese ai lea o ia. Ua totogo ae le saito, ma fua mai, ona iloa ai lea o le titania. Ona o mai ai lea o auauna a le matai o le aiga, ua faapea mai ia te ia, Le alii e, e le o le saito lelei ea na e luluina i lou fanua? O lenei, pe naifea nei titania? Ona fai atu ai lea o ia ia te i latou, Ua fai lenei mea e se tagata ua ita mai. Ona fai mai ai lea o auauna ia te ia, E te finagalo ea matou te o atu e veleeseina ia mea?

a o le fanua, o le lalolagi lea; o le saito lelei, o tagata ia o le malo; o le titania, o le fanau ia a le ua leaga; o le ua ita mai na na luluina ia mea, o le tiapolo lea; o le seleselega, o le gataaga lea o le lalolagi; o e selesele, o agelu ia. O lea e pei ona faaputuina ai o le titania, ma susunuina i le afi, e faapea foi ona faia i le gataaga o lenei lalolagi.

Ou te avatu foi ia te oe ki o le malo o le lagi; o se mea foi e te fusifusia i le lalolagi, e fusifusia foi lea i le lagi; o se mea foi e te tālā i le lalolagi, e tatalaina foi lea i le lagi.

O ona po ia na amata ai e Iesu ona faailoa atu i ona soo, e tatau ona alu o ia i Ierusalema, e faatigaina foi i mea e tele e toeaina ma le au faitaulaga sili, ma le au tusiupu, e fasiotia foi o ia, e faatuina foi o ia i le aso tolu. Ona ta‘ita‘i ane ai lea e Peteru, ia te ia, ua vavao ia te ia, ua faapea mai, Le Alii e, ia mamao ia te oe lea mea; e le oo lena mea ia te oe. Ona fāliu atu ai lea o ia, ua faapea atu ia Peteru, Satani e, ina alu ia oe i o‘u tua, ua fai oe ma mea ou te tausuai ai; auā e le o mea a le Atua ua e loto i ai, a o mea a tagata.

Le Alii e, ia e alofa mai i lo‘u atalii, ua ma‘i māliu, ua tiga lava; auā ua paū soo ia i le afi, ua faapea soo foi i le vai. Na ou au mai ia te ia i ou soo, a ua latou le mafaia ona faamalolo ia te ia. Ona tali atu ai lea o Iesu, ua faapea atu, Le tupulaga le faatuatua ma le faapiopio, ou te i ai ia te outou seia afea? ou te faapalepale ia te outou seia afea? au mai ia o ia iinei ia te au. Ua vavao atu Iesu ia te ia, ona alu ai lea i fafo o le temoni sa ia te ia; ona malolo ai lea o le tama talu i lea lava itu aso.

E moni, ou te fai atu ia te outou, O mea uma tou te fusifusia i le lalolagi, e fusifusia ia i le lagi; o mea uma foi tou te tālā i le lalolagi, e tatalaina ia i le lagi.

O outou gata, o fanau a gata feai, pe faapefea ona outou sosola i le faasala i Kēna?

Ona fai atu foi lea o ia i e o i lona itu tauagavale, O outou ua faafanoina, o ese atu ia ia te au i le afi e faavavau, ua saunia mo le tiapolo ma ana agelu.

Sa i ai foi o ia i le vao i po e fagafulu, ua faaosoosoina e Satani; sa i ai ma manu feai, sa auauna foi agelu ia te ia.

Ua o foi i latou i Kapanaumi; ona maliu atu loa lea o ia i le sunako i le sapati, ua a‘oa‘o ai. Ua matuā ofo foi i latou i lana mataupu; auā ua ia a‘oa‘o ia te i latou e faapei o se ua i ai le pule, a e le pei o le au tusiupu. Sa i ai foi i lo latou sunako le tagata ua i ai le agaga leaga; ua alaga foi o ia, ua faapea mai, Aue, Iesu e le Nasareta! se a lau na ia i te i matou? ua e maliu mai ea ia fanoia i matou? ua ou iloa oe, o le Paia oe o le Atua. Ona vavao atu lea o Iesu ia te ia, ua faapea atu, Ina faalologo ia, ma e alu i fafo nai ia te ia. Ona faataafiti lea o le agaga leaga ia te ia, ua alaga foi ma le leo tele, ona alu lea o ia i fafo nai ia te ia. Ona taufaiofo ai lea o i latou uma, ua latou fesili ai le tasi i le tasi, ua faapea, Pe se a lenei? se a foi lenei mataupu fou? auā ua pule ia i agaga leaga, ma fetalai atu i ai, ona latou faalogo lava lea ia te ia.

Ua oo i le afiafi i le goto o le la, ona latou au mai lea ia te ia o e mamai uma, atoa ma e ua uluitinoina e temoni. Ua potopoto uma ane foi le aai i le faitotoa. Ona ia faamaloloina lea o tagata e toatele na mamai i ma‘i eseese, ua ia tulia foi temoni e toatele, ua ia le tuu atu foi i temoni e tautala, auā ua latou iloa o ia.

Ua ia tala‘i foi i o latou sunako i Kalilaia uma, ma tutuli temoni.

O agaga leaga foi, ua latou iloa mai o ia, ona faapauu lea o latou i ona luma, ma latou alalaga, ua faapea mai, O oe lava o le Alo o le Atua. A ua matuā vavao atu o ia ia te i latou, aua ne‘i latou faaalia o ia.

Ona tofia lea e ia le toatinoagafulu ma le toalua, ina ia latou faatasi ma ia, ia na aauina atu foi i latou e tala‘i i le tala lelei; ina ia tuuina atu foi le pule ia te i latou, latou te faamalolo ai ma‘i, ma tutuli ai temoni.

A o le au tusiupu e na o ifo mai Ierusalema, ua faapea ane i latou, O ia te ia Pelesepulo, o le alii foi o temoni, e tuli ai e ia o temoni. Ua valaau atu ia ia te i latou, ona fetalai atu lea ia te i latou i faataoto, E mafai faapefea e Satani ona tulia o Satani? Afai foi e fevaevaeai se malo, e le mafai ona tumau o lena malo. Afai foi e fevaevaeai se aiga, e le mafai ona tumau o lena aiga. Afai foi e tetee atu Satani ia te ia lava, ma fevaevaeai o ia, ona le mafai ai lea ona tumau o ia, a e oo i lona iuga. E leai se na te mafaia ona ulu atu i le fale o le tagata malosi, ma vete ana mea, seai lua‘i noanoatia le tagata malosi, i le vete ai lona fale. E moni, ou te fai atu ia te outou, E faamagaloina agasala uma a tagata, atoa ma upu leaga uma latou te upu leaga ai; a o lē upu leaga i le Agaga Paia, e le faamagaloina o ia, a le tu a le tu lava; a e peitai e tatau ia te ia le sala e faavavau. Na ia faapea atu, auā na latou fai mai, O ia te ia le agaga leaga.

O lē lulu saito, e lulu ia i le upu. O i latou ia i le auala e luluina ai le upu; a latou faalogo ai, ona alu ane loa lea o Satani, ma aveeseina le upu na luluina i o latou loto.

Ua maliu atu ia nai le vaa, ona fetaiai loa lea ma ia o le tagata mai tuugamau, ua ia te ia le agaga leaga, sa mau o ia i tuugamau; e le mafai foi se tasi ona noanoatia o ia i maea uamea lava. Auā ua atu lasi ona noanoatia o ia i mea e faamau a‘i vae, atoa ma maeā uamea; a ua motumotusia e ia o maea uamea, ua tu‘ipalaina foi mea e faamaū a‘i vae; e leai foi se na ia mafaia ona faalata ia te ia. Sa i ai pea lava o ia i tuugamau ma mauga i le po ma le ao; sa alaga, ma selei o ia ia te ia i maa. Ua iloa mamao mai e ia o Iesu, ona momo‘e mai lea, ma ifo ia te ia, ua alaga mai foi o ia ma le leo tele, ua faapea mai, Se a lau na ia te au nei, Iesu e, le Alo o le Atua silisili ese? ou te fai atu ia te oe ia e tauto mai i le suafa o le Atua, e te le faatiga mai ia te au. Auā ua fetalai atu o ia ia te ia, Alu ia i fafo i le tagata, o oe na le agaga leaga. Ua fesili atu foi o ia ia te ia, Po o ai lou igoa? Ona tali mai lea o ia, ua faapea mai, O Lekeono lo‘u igoa; auā e totele i matou. Ua matuā aioi mai foi o ia ia te ia ina ia na le aueseina i latou i lea nuu. Sa i ai foi le lafu puaa e tele, ua tataa e lata ane i mauga. Ua aioi mai foi temoni uma ia te ia, ua faapea mai, Ia e aauina i matou i puaa, matou te uluitino ai. Ona tuu atu loa lea e Iesu ia te i latou. Ua o i fafo agaga leaga, ona latou uluitino lea i puaa; ona feosofi ifo ai lea o le lafu i le tofē i le vai, pe atoa le lua o afe i latou; ona malelemo ai lea i le vai. Ona sosola lea o e sa fagaina puaa, ma tala atu ai i le aai ma ona faoa aai; ona latou o mai lea e matamata i le mea ua faia. Ua latou o mai foi ia Iesu, ma ua iloa o ia sa uluitinoina e temoni, sa i ai le lekeono, ua nofo i lalo o ia, ua ofu foi, ma ua atamai; ona latou matatau ai lea. O e na iloa, ua latou faamatala atu ia te i latou i le uiga o le mea na faia i le na uluitinoina, atoa ma puaa. Ona latou aioi atu lea ia te ia ina ia maliu ese atu ia i lo latou nuu. Ua maliu ae o ia i le vaa, ona aioi mai lea ia te ia o le na uluitinoina ina ia la faatasi ma ia. A o Iesu ua le mafai, a ua fetalai atu ia te ia, Alu atu ia oe i lou fale, i lou aiga, ma ia e ta‘u atu ia te i latou mea tetele ua faia e le Alii ia te oe, ma lona alofa ia te oe.

Ua valaau atu ia i le toatinoagafulu ma le toalua, ona aau atu lea ia te i latou e taitoalua, ua ia tuu atu foi ia te i latou le pule i agaga leaga;

Ona latou o atu ai lea ma tala‘i atu ina ia latou salamo. E toatele foi temoni ua latou tulia, e toatele foi o e na mamai ua latou faauuina i le suāuu, ma faamaloloina.

auā o le fafine ua i lana tama teine le agaga leaga, ua na faalogo i le tala ia te ia, ona sau ai lea o ia ia te ia, ua faapaū mai i ona vae; (o le fafine Eleni ia, na fanau i Suria Foinie,) ua ia faatoga ia te ia, ina ia tulia i fafo le temoni i lana tama. A ua fetalai atu Iesu ia te ia, Seia lua‘i maoona le fanau auā e le tatau ina ave mea e ‘ai a le fanau, ma lafo i ulī. Ona tali mai lea o ia ia te ia, ua faapea mai, Le Alii e, moni a oe; a o ulī i lalo o le laoai e aai i latou i momoi mea a tama. Ona fetalai atu ai lea o ia ia te ia, Ina alu ia ona o lau upu lena; ua te‘a le temoni sa i totonu i lau tama teine. Ona alu atu lea o ia i lona fale, ua maua ai lana tama teine o taoto i luga o le moega, a ua te‘a le temoni.

Ona amata ai lea e ia ona a‘oa‘o atu ia te i latou, e tatau ona tiga le Atalii o le tagata i mea e tele; e lafoaiina foi o ia e toeaina, ma le au faitaulaga sili, ma le au tusiupu, e fasiotia foi o ia; a mavae aso e tolu, i le toe tu mai. Ua ia faaali tino lava lena upu; ona ta‘ita‘i ane lea o Peteru ia te ia, ua vavao ia te ia. A o ia ua fāliu, ma silasila ane i ona soo, ona vavao atu lea o ia ia Peteru, ua faapea atu, Ina alu ia i o‘u tua Satani e; auā e te le loto i mea a le Atua, a o mea a tagata.

Ona tali mai lea o le tasi o le motu o tagata, ua faapea mai, Le a‘oa‘o e, ua ou au mai ia te oe lo‘u atalii ua i ai le agaga gūgū; so se mea e pue ai ia te ia, ona lafotu ai lea ia te ia, ua fāuā le gutu, ua lilivau ona nifo, ua tino vale ai foi o ia; ua uma foi ona ou fai atu i ou soo ina ia latou tulia o ia, a ua le mafaia e i latou. Ona tali atu lea o ia ia te ia, ua faapea atu, Le tupulaga le faatuatua e, tatou te i ai ma outou seia afea? ou te faapalepale ia te outou seia afea? ina au mai ia o ia ia te au. Ona latou aumaia lea o ia ia te ia; ua na iloa o ia, ona faataafiti loa lea ia te ia e le agaga, i le ua paū ia i le eleele, ona taafilifili ai lea o ia, ma fāuā lona gutu. Ona fesili atu lea o ia i lona tamā, Talu mai anafea ona oo o lena mea ia te ia? Ua fai mai o ia, Talu ina o tama itiiti. Ua lafo soo foi o ia ia te ia i le afi, atoa ma le vai, ina ia fano ai o ia; a e peitai ai se mea e te mafaia, ia e alofa mai ia te i matou, ma ia e fesoasoani mai ia te i matou. Ona fetalai atu lea o Iesu ia te ia, Afai ua e mafaia ona faatuatua, e mafaia mea uma lava i lē faatuatua. Ona alaga loa lea o le tamā o le tama, ua fai mai ma le tagi, Le Alii e, ua ou faatuatua; ia e fesoasoani i lo‘u le faatuatua. Ua silafia e Iesu ua taufetuli mai le motu o tagata, ona vavao atu lea o ia i le agaga leaga, ua faapea atu ia te ia. O oe na, le agaga gūgū ma le tutuli, ou te fai atu lava ia te oe, ina e alu i fafo ia te ia, aua foi e te toe alu i totonu ia te ia. Ona alaga lea o le agaga, ma faataafiti tele ia te ia, ona alu lea i fafo; ona liua lea o ia peiseai ua oti; ona fai mai ai lea tagata e toatele, Ua oti lava ia. A o Iesu ua tago ifo ia i lona lima, ma faatu ia te ia, ona tulai lea o ia. Ua maliu ane Iesu i le fale, ona fesili lea o ona soo ia te ia ina ua na o i latou, Se a le mea na matou le mafai ai ona tulia o ia? Ona fetalai atu lea o ia ia te i latou, Ua na o le tatalo ma le anapogi e mafai ai ona ō ese o mea faapena.

Ua tu mai o ia i le taeao lava o le uluai aso o le vaisapati, ona lua‘i faaali lea o ia ia Maria le Makatala, o le na ia tuli ese ia te ia temoni e toafitu.

O lē faatuatua ma papatisoina, e faaolaina ia; a o le lē faatuatua, e faasalaina ia. E mulimuli atu foi nei faailoga i e faatuatua; e tutuli e i latou temoni i lo‘u igoa; e tautalatala i latou i gagana fou;

Ua foi ae Iesu mai Ioritana, ua tumu o ia i le Agaga Paia, ona ave lea o ia e le Agaga i le vao, ua faaosoosoina e le tiapolo i aso e fagafulu. O aso lava ia e lei taumafa ai e ia sina mea e tasi; ua mavae ia aso, mulimuli ane ona fia taumafa ai lea o ia. Ona fai mai lea o le tiapolo ia te ia, Afai o oe le Alo o le Atua, ina fetalai ane ia i lenei maa ia liu areto. Ona tali atu lea o Iesu ia te ia, ua faapea atu, Ua tusia, E le na o mea e ‘ai e ola ai le tagata, a o afioga uma a le Atua. Ona aveina ae lea o ia e le tiapolo i le mauga maualuga, ma faaali ia te ia malo uma o le lalolagi, ua se emo lava. Ona fai mai lea o le tiapolo ia te ia, Ou te avatua ia te oe lenei pule uma, ma lo latou mamalu; auā ua tuuina mai ia te au, ou te avatu ai foi i lē ou te manao i ai; o lenei, afai e te ifo mai ia te au, e fai ma au nei mea uma. Ona tali atu lea o Iesu, ua faapea atu ia te ia, Satani e, ina alu ese ia oe i o‘u tua; auā ua tusia, E te ifo i le Alii lou Atua, ua na o ia lava e te auauna i ai. Ona ave ai lea o ia ia te ia i Ierusalema, ua faatu ia te ia i le tumutumu o le malumalu, ona fai mai lea o ia ia te ia, Afai o oe le Alo o le Atua, ina oso ia oe i lalo i le mea nei; auā ua tusia, E poloai o ia i ana agelu ia te oe, e tausi ia te oe; latou te ave ia te oe i o latou lima, ne‘i tū‘ia lou vae i se maa. Ona tali atu lea o Iesu, ua faapea atu ia te ia, O loo faapea le upu, Aua e te tofotofo i le Alii lou Atua. Ua faauma e le tiapolo le tofotofoga uma, ona alu ese ai lea ia te ia seia i se aso.

Ua matuā ofo i latou i lana mataupu; auā o lana fetalaiga ua i ai le pule. Sa i le sunako o le tagata ua i ai le agaga o le temoni leaga; ua alaga mai foi o ia, ua leo tele, ua faapea mai, Aue! Iesu e, le Nasareta, se a ea lau na ia te i matou? Ua e maliu mai ea ia fanoia i matou? Ua ou iloa oe, o le Paia oe o le Atua. Ona vavao lea o Iesu ia te ia, ua faapea atu, Ina faalologo ia, ma ē alu i fafo nai ia te ia. Ona lafo i lalo lea o le temoni ia te ia i o latou uma; ona alu lea i fafo ia te ia, ua le afaina lava ia. Ona ofo lea o i latou uma, ua fetautalatala‘i foi, ua faapea ane, O le a lenei mataupu? auā o le pule ma le mana ua fetalai atu ai o ia i agaga leaga, ona latou o ese lea i fafo.

O i latou uma sa i ai tagata e mamai i ma‘i eseese, ua latou aumaia i latou ia te ia i le goto o le la; ua pa‘ipa‘i tasi atu ona aao ia te i latou, ma faamalolo ia te i latou. Ua o atu foi temoni i fafo i e toatele, o alalaga, ua faapea mai, O oe lava le Keriso, le Alo o le Atua. Ona vavao lea o ia ia te i latou, ua ia le mafai ona latou tautala; auā ua latou iloa o ia o le Keriso.

o e na tigaina foi i agaga leaga, ua faamaloloina foi i latou.

O lea lava itu aso ua faamalolo ai e ia tagata e toatele sa i ai ma‘i, ma ma‘i tiga, ma agaga leaga; ua foai atu foi ina ia vaai o e tauaso e toatele.

atoa ma nisi fafine sa i ai agaga leaga ma ma‘i, a ua faamaloloina; o Maria ua ta‘ua o le Makatala, na ō i fafo ia te ia temoni e toafitu,

O le faataoto lenei, O le saito, o le afioga lea a le Atua. O e i le auala, o e faalogo ia; ona alu ane ai lea o le tiapolo, ma aveeseina le upu nai o latou loto, ne‘i faatuatua ma faaolaina i latou.

Ua maliu ae ia i uta, ona fetaiai lea ma ia o le tasi tagata mai le aai ua leva ona ia te ia o temoni, ua le ofu o ia, ua le nofo foi i se fale, a o tuugamau. Ua iloa mai e ia o Iesu, ona alaga mai lea o ia, ma faapaū mai i ona luma, ua fai mai ia te ia ma le leo tele, Se a lau na ia te au nei, Iesu e, o oe na le Alo o le Atua silisili ese? ou te aioi atu ia te oe, aua e te faatiga mai ia te au. Auā na fetalai o ia i le agaga leaga e alu i fafo i le tagata. Auā na atu lasi ona pue ia te ia; ua fusifusia o ia i maea uamea, ma mea e faamau a‘i vae ua leoleoina ai o ia, a ua motumotusia maea ia te ia, ona avea ai lea o ia e le temoni i le vao.) Ua fesili atu Iesu ia te ia, ua faapea atu, O ai ea lou igoa? Ua fai mai o ia, O Lekeono; auā ua uluitino ia te ia temoni e toatele. Ua latou aioi mai ia te ia, aua le fetalai o ia ia te i latou e o i le fafā. Sa i ai le lafu puaa e tele, sa tataa i le mauga; ua latou faanoi mai ia te ia ia tuu atu latou te uluitino i ai. Ona tuu atu ai lea ia te i latou. Ona o lea o temoni i fafo nai le tagata, a ua uluitino i puaa; ona feosofi ifo lea o le lafu i le tofē i le vai, ua malelemo ai. Ua iloa ē sa faga puaa i le mea ua faia, ona sosola ai lea, ua o atu ua tala atu i le aai ma ona faoa aai. Ona latou o mai lea e matamata i le mea ua faia; ua o mai ia Iesu, ua latou iloa atu le tagata ua o i fafo ia te ia temoni, o loo nofo o ia i vae o Iesu; ua ofu ia, ma ua atamai; ona latou matatau ai lea. O e na iloa ua latou tala atu ia te i latou le mea na malolo ai le tagata sa uluitinoina. Ona aioi mai lea ia te ia o le nuu uma o Katara, ina ia maliu ese o ia ia te i latou; auā ua oo ia te i latou le mata‘u tele; ona maliu ae lea o ia i le vaa, ua toe foi atu. Ua aioi mai ia te ia le tagata ua o i fafo ia te ia temoni, la te faatasi ma ia; a ua auina atu ia e Iesu, ua faapea atu, Ina foi atu ia oe i lou aiga, ma ia faamatala atu i mea tetele ua faia e le Atua ia te oe. Ona alu ai lea o ia, ua tala‘i i le aai uma i mea tetele na faia e Iesu ia te ia.

Ua faapotopotoina e ia ona soo e toasefulu ma le toalua, ua tuu atu ia te i latou le mana ma le pule i temoni uma, ma ia faamalolo i ma‘i.

Faauta foi, ua alaga mai le tasi mai le motu o tagata, ua faapea mai, Le a‘oa‘o e, ou te aioi atu ia te oe, e te silasila mai i lo‘u atalii; auā o ia lo‘u atalii toatasi. Faauta foi, ua pue ia te ia e le agaga, ona alaga loa lea, ma faataafiti ia te ia, ma ua fāuā lona gutu, ua tu‘i fulifuli ia te ia, toe ina le alu ese ia te ia. Na ou aioi atu foi i ou soo ia latou tuli ia te ia i fafo; a ua le mafai lava ia te i latou. Ua tali atu Iesu, ua faapea atu, Le tupulaga lē faatuatua ma le faapiopio, ou te i ai ia te outou, ma onosai ia te outou seia afea? Ina au mai ia lou atalii iinei. O loo sau ia, a e lafotu ma faataafiti ia te ia e le temoni. Ona vavao lea e Iesu i le agaga leaga, ma ua faamalolo i le tama, ma toe tuu atu ia te ia i lona tamā. Ua latou matuā ofo uma i le vavega o le Atua. O loo ofo i latou uma i mea uma na faia e Iesu, ona fetalai atu lea o ia i ona soo,

Ua toe foi mai le toafitugafulu ma le olioli, ua faapea mai. Le Alii e, ua usiusitai mai temoni ia te i matou, ona o lou suafa. Ua fetalai atu ia ia te i latou, Na ou iloa Satani ua paū mai le lagi pei o le uila. Faauta, ou te foai ia te outou le pule e soli ai gata ma akarava ma le malosi uma o le fili; e leai lava se mea e leaga ai outou. A e peitai aua tou te olioli i lenei mea, ina ua usiusitai agaga ia te outou; na o lenei tou te olioli ai, ina ua tusia o outou igoa i le lagi.

Sa tuli e ia le temoni, ua gūgū foi o ia; ua alu i fafo le temoni, ona gagana ai lea o le gūgū, ua ofo ai lava le motu o tagata. Peitai o isi o i latou ua fai ane, O Pelesepulo le alii o temoni, ua tulia ai e ia o temoni. O isi foi ua faaosooso, ua saili mai ia te ia se faailoga mai le lagi. A ua silafia e ia o latou manatu, ona fetalai atu lea ia te i latou, O malo uma e fevaevaeai, e faaumatia ia; po o se aiga e fevaevaeai, e malaia lea. Afai foi e fevaevaeai Satani, pe faapefea ea ona tumau o lona malo? auā ua outou fai mai, o Pelesepulo e tulia ai e a‘u o temoni. Afai o Pelesepulo e tulia ai e a‘u o temoni, ia, po ai e tulia ai temoni e a outou fanau? o lea, e fai ai i latou ma faamasino ia te outou. A e afai o le aao o le Atua ou te tulia ai temoni, ua oo mai lava ia te outou le malo o le Atua.

A leoleoina e le tagata malosi ma lana auupega lona fale, ona saogalemu ai lea o ana mea. A e afai e oso atu ia te ia le tasi e sili lona malosi ia te ia, ua manumalo i ai, ona fao ai lea o lana auupega uma na ia faatuatua i ai, ma tufatufa i ana mea na fao. O se le ‘au ia te au, e ‘au ese lea ia te au; o se le faaputu faatasi ma a‘u, e faataapeape lea. Pe a alu le agaga leaga i fafo o le tagata, ua fealualuai ia i mea matutu, ua saili se mapusaga, a e le maua; ona fai ane lea, Ou te toe foi i lo‘u fale na ou sau ai. Ua oo i ai, ona iloa ai lea, ua uma ona tafitafi ma teuteu. Ona alu ai lea o ia, ua na aumaia isi agaga e toafitu, e sili lo latou leaga i lona; ona latou ulufale ai lea, ua nonofo ai; ona sili ai lea o le leaga o le iuga o lea tagata i lona amataga.

Faauta foi, sa i ai le fafine ua ia te ia le agaga e vaivai ai i ona tausaga ua sefulu ma le valu, ua faano‘uno‘u lava ia, e le mafai lava ona tu sa‘o i luga.

A o le fafine nei, o le afafine o Aperaamo, ua noanoatia e Satani, faauta ona tausaga ia ua sefulu ma le valu, e le tatau ea ona tatalaina o lenei noanoaga ia te ia i le aso sapati?

Ona uluitino ai lea o Satani ia Iuta e ta‘ua o le Sekara, o le tasi lea o le toasefulu ma le toalua. Ua alu ia, ua tautalatala ma le au faitaulaga sili ma ta‘ita‘i o ‘au i se togafiti na te faalataina ai o ia ia te i latou.

Ua fetalai atu le Alii, Simona e, Simona e, faauta, ua manao tele Satani ia te outou, ia lulu ia te outou pei o le saito; a ua ou faatoga mo oe, ina ne‘i mavae lou faatuatua; a o oe foi, pe a liua mai oe, ona e faamalosi ai lea i ou uso.

O outou nai lo outou tamā le tiapolo, tou te fia faia foi mea e tu‘inanau i ai lo outou tamā. O le fasioti tagata ia talu le amataga, e lei tumau lava ia i le upu moni, auā e le o i totonu lava ia te ia le upu moni; a tautala ia i le tala pepelo, o lana lava lea e tautala a‘i, auā o le pepelo ia, ma le tamā o le pepelo.

Ona toe vaeluaina lea o Iutaia i ia upu. Ua faapea ane nisi o i latou e toatele, Ua ia te ia le temoni, o le vale foi o ia; pe se a le mea tou te faalogologo ai ia te ia? A ua faapea ane nisi, E le ni upu ia a se tagata ua uluitinoina; e mafai ea e se temoni ona ia faapupulaina mata o tauaso?

Ua fai le talisuaga, a ua tuu e le tiapolo i le loto o Iuta le Sekara, le atalii o Simona ia faalata ia te ia;

Ua tali atu Iesu, O le ou te avatu i ai sina mea e ‘ai pe a uma ona ou fuia, o ia lea. Ona fuifui lea e ia o le mea e ‘ai, ma avatu ia Iuta le Sekara, le atalii o Simona. Ua mavae atu le mea e ‘ai, ona uluitinoina lea o lea tagata e Satani, Ona faapea atu lea o Iesu ia te ia, O le mea e te faia, ia vave ia ona fai.

A ua fai atu Peteru, Anania e, se a le mea ua faatumu ai e Satani lou loto e te pepelo ai i le Agaga Paia, ma e tuu ai ma oe nisi mea o le tau o le fanua? A o tumau e lei faatauina, e le o lou lava ea? ua uma foi ona faatauina, e lei i lau pule ea? Se a le mea ua tuu ai lenei mea i lou loto? ua e le pepelo i tagata, a o le Atua.

Ua o mai foi le motu o tagata mai aai ua vagavagai Ierusalema, ua au mai e i latou e ua mamai ma e ua tigaina i agaga leaga; ua faamaloloina i latou uma lava.

Auā ua ō i fafo agaga leaga i tagata e toatele sa i ai, ua alalaga ma le leo tele; ua faamaloloina foi e sa mamai i le supa ma pipili e toatele.

o Iesu o le Nasareta, o le na faauuina e le Atua i le Agaga Paia ma le mana, o ia sa femaliuai ma agalelei ma faamalolo atu i e na faatoilaloina uma lava e le tiapolo; auā sa ia te ia le Atua.

A o Elima le makoi, (auā o le uiga lea o lona igoa,) ua tetee mai o ia ia te i laua, ua fia faaliliu ese atu e ia i le suikonesula i le faatuatua. A o Saulo, (o Paulo foi lea,) ua tumu ia i le Agaga Paia, ua pulatoa ia te ia, ona faapea atu lea o ia, O oe na ua tumu i le pepelo uma ma le ulavale uma, o le atalii o le tiapolo, o lē ‘ino‘ino i le amiotonu uma lava; e te le se‘i soia ea lou faapiopio i ala tonu o le Alii? Faauta nei, o le a oo ia te oe le aao o le Alii, e tauaso oe, e te le vaai i le la seia se aso. Ona paū loa lea ia te ia o le popogi ma le pouliuli; ona fealuai lea o ia, ma saili ni tagata e ta‘ita‘i ia te ia. Ua iloa foi e le suikonesula le mea ua faia, ona talitonu lea o ia, ua matuā ofo i le mataupu a le Alii.

Ua o atu i matou i le tatalo, ona fetaiai lea ma i matou le tasi auauna teine ua i ai le aitu vavalo, ua na maua oloa e tele ma ona alii i ana valoaga. Ua femulimuliai o ia ia Paulo ma i matou, ma alaga, ua faapea ane, O auauna nei tagata a le Atua silisili ese, latou te tala‘i mai ia te i tatou le ala o le ola. Ua faapea ona fai e ia i aso e tele. A ua tiga Paulo, ua fāliu atu, ma ua fai atu i le aitu, Ou te fai atu ia te oe i le suafa o Iesu Keriso, alu ia i fafo ia te ia. Ona alu ai lea o ia i fafo i lea lava itu aso. Ua iloa foi e ona alii ua alu ese le faatuatuaga e maua ai a latou oloa, ona pupue ai lea e i latou ia Paulo ma Sila, ma fetoso ia te i laua i le malae i luma o alii.

Ua faia foi e le Atua vavega sili i lima o Paulo; o lea ua avea ai solosolo ma ie tali otaota nai lona tino i e mamai, ona mavae ai lea o latou ma‘i, ua ō i fafo foi ia te i latou agaga leaga.

Ona faamalosi lea o isi o le au taulāitu Iutaia, o e na feoai, ua latou ta‘u atu le suafa o le Alii o Iesu i luga i e ua i ai agaga leaga, ua faapea atu, Matou te matuā fai atu ia te outou i le suafa o Iesu, o le ua tala‘iina e Paulo. Ua faia foi lenei mea e nisi tagata o atalii e toafitu o Seva, o le Iutaia, o le faitaulaga sili. A ua tali mai le agaga leaga, ua faapea mai, Ua ou iloa Iesu, ua ou iloa foi Paulo, a o ai ea outou na? Ona oso mai ai lea o le tagata ua i ai le agaga leaga, ua manumalo ia i latou, ua faiaina lava i latou ia te ia; ona sosola ai lea o i latou i fafo o le fale ua le lavalavā ma ua manunua.

E toatele foi o e na fai togafiti faataulāitu na faapotopoto e i latou a latou tusi, ma susunu ai i luma o tagata uma; ona latou faitau lea i a latou faatusa, ua iloa ai ua lima sefulu o afe o tupe ario.

ma ou laveai ia te oe ai le nuu nei, atoa ma nuu ese, ou te auina atu ai nei oe, e faapupula i o latou mata, ia liliu mai mai le pouliuli i le malamalama, mai le pule foi a Satani ia liliu i le Atua; latou te maua ai le faamagaloina o agasala, ma le tofi faatasi ma i latou ua faapaiaina i le faatuatua ia te au.

Auā ua ou mautinoa, e le mafaia e le oti, po o le ola, po o agelu, po o alii, po o e malolosi, po o mea i nei ona po, po o mea atali, po o le maualuga, po o le loloto, po o se tasi mea na faia, e le mafaia e ia mea ona faateaeseina mai i tatou i le alofa o le Atua, o loo ia Keriso Iesu lo tatou Alii.

A ua faapefea ea le tali mai a le Atua ia te ia? Ua ou faatoe mo‘u e toafitugaafe o tagata, o e ua le tootuli lava ia Paala.

E le pine foi ona solia o Satani i lalo o outou vae e le Atua e ona le manuia. Ia ia te outou le alofa tunoa o lo tatou Alii o Iesu Keriso. Amene.

tou te tuuina atu ai le ua faapea ia Satani, e fano ai le tino, ina ia sao le agaga i le aso o le Alii o Iesu.

Aua ne‘i faafiti le tasi i le tasi, seia iloga lava lua te loto gatasi ai i nai aso, ina ia oulua faasaga i le anapogi ma le tatalo; ma ia toe faatasi ane i le mea e tasi, ina ne‘i faaosooso mai Satani ia te oulua, ona o lo oulua le lava onosai.

E leai, a o mea ua fāsia e nuu ese, ua fāsia e i latou mo temoni, a e le o le Atua; ou te le loto foi ina ia outou mafuta faatasi ma temoni. Tou te le mafaia ona inu i le ipu a le Alii atoa ma le ipu a temoni; tou te le mafaia ona faatofutofusia i le laoai a le Alii atoa ma le laoai a temoni. Tatou te faaonoono ea i le Alii? Ua sili ea lo tatou malosi i lona?

ina ne‘i ‘ole‘olegia i tatou e Satani; auā tatou te le vālea i ana togafiti.

Afai foi ua ufitia la matou tala lelei, ua ufitia ia i e ua fano; ua faatauasoina manatu o i latou o e le talitonu e le atua o le lalolagi nei, ina ne‘i pupula atu ia te i latou le malamalama o le tala lelei i le mamalu o Keriso, ua tusa o ia ma le Atua.

Pe faapefea foi ona loto gatasi o Keriso ma Pelialo? Pe faapefea foi ona tofusia faatasi o lē talitonu ma le ua le talitonu?

auā o auupega a lo matou nei taua e le faaletino ia, a e faamalolosia el e Atua e lepetia ai ‘olo; o loo lepeti i lalo masalosaloga, ma mea maualuluga uma ua faasiasia i le mataupu a le Atua, o loo faatoilaloina manatu uma ia anaana ia Keriso;

A e ou te fefe, ina ne‘i pei ona faaseseina o Eva e le gata i lana togafiti, e faapea ona faaleagaina o outou manatu ina ia le tonu ia Keriso.

Auā o i latou, o aposetolo pepelo i latou, o le au faigaluega ‘ole‘ole, ua lina i latou e i latou ma aposetolo a Keriso. E le se mea foi lea e ofo ai, auā o Satani lava, ua liua o ia e ia ma agelu o le malamalama. O lenei, e le se mea tele pe a liua ana auauna peiseai o auauna a le amiotonu i latou; o lo latou iuga e tusa ma a latou galuega.

Ina ne‘i faamaualuga a‘u i le silisili ese o mea na faaalia mai, sa tuuina mai ia te au le mea matuitui i le tino, ole agelu a Satani, e tu‘i mai ia te au, ina ne‘i ou faamaualuga.

e silisili lava i alii sili uma lava, ma faipule, ma e ua malolosi, ma alii, ma igoa uma lava e ta‘ua, e le gata i le olaga nei, a e oo foi i lē atali;

na outou savavali ai anamua, e tusa ma le tu a lenei lalolagi, e tusa ma le ta‘ita‘i o le au faipule i le va nimonimo, o le agaga lea o loo matuā galue nei i e ua faalogogata;

ina ia iloa nei e alii sili ma le au faipule i mea o i le lagi, i le ekalesia, le poto uiga eseese o le Atua,

A outou ita, aua le agasala ai; aua ne‘i goto le la o ita pea outou. Aua foi ne‘i tuuina atu e outou se mea e mautu ai le tiapolo.

Ia oofu outou i ofutau atoatoa mai le Atua, ina ia outou mafaia ona tetee atu i togafiti a le tiapolo. Auā tatou te le tau ma tagata, a o alii sili, ma faipule, ma alii o le pouliuli o lenei lalolagi, atoa ma agaga leaga i mea o i le lagi. O le mea lea ia outou tago ai i ofutau atoatoa mai le Atua, ina ia outou mafaia ona tetee atu pe a oo i le aso vale, pe a uma ona outou faia o mea uma, tou te tutumau ai lava.

ia faaopoopo i na mea uma ona tago atu i le talipupuni o le faatuatua, tou te mafai ai ona tinei o u fanafana mu uma lava a loo leaga;

ua uma ona tuueseina e ia o alii sili ma faipule, ona faaalia mai lea o i latou ia iloa uma, ua manumalo o ia ia te i latou i lea lava mea.

O lea na matou fia o atu ai ia te outou, o a‘u lava o Paulo, ua atu tasi ma atu lua, a ua faalavelave mai Satani ia te i matou.

Aua ne‘i faasese se tasi ia te outou i se togafiti e tasi; auā e le oo mai lena aso, seia muai ona taunuu o le tete‘a ese, ma ia faaalia mai o le tagata o le agasala, o le tagata lea o le malaia, o lē tetee atu, ma faamaualugaina e ia ia te ia e sili i mea uma lava ua ta‘uatuaina, ma mea uma ua ifo i ai tagata, o lea ua tietie ai o ia i le malumalu o le Atua, peiseai o le Atua o ia, o loo faaali mai o ia, o le Atua lava o ia. Tou te le manatu ea, na ou fai atu ia mea ia te outou, a o tatou i ai ma outou? O lenei foi, ua outou iloa le mea o loo faalavelave, ina ia faaalia mai o ia i ona lava aso. Auā o loo galue nei lava le mea lilo a le amio leaga, na ona seia aveeseina le o faalavelave. Ona faaalia mai ai lea o le ua amio leaga, e fano o ia i le Alii, i le mānava mai o lona fofoga, ma faaumatia i le faaali mai o lana afio; o lona sau foi e pei o le galuega a Satani, i le mana uma, ma faailoga, ma vavega pepelo, ma mea faasese uma o le amio leaga i e a fano; auā ua latou le talia le upu moni ma le fiafia i ai, ina ia faaolaina ai i latou.

A o loo faamaoni le Alii, na te faatumauina outou ma leoleoina ina ne‘i leaga.

e i ai Umenaio ma Alesana, o e ua ou tuuina atu ia Satani, ina ia a‘oa‘oina i laua, aua ne‘i upu leaga.

E le se faatoa lotu, ne‘i faafefeteina lona loto, ona paū lea o ia i le faasala a le tiapolo. E tatau ona ia logoleleia o ia e i latou o i tuā, ne‘i upuleagaina o ia ma paū i le mailei a le tiapolo.

A o loo ta‘utino mai e le Agaga, e o ese nisi i le faatuatua i tausaga amuli, latou te faalogo i agaga e faasese ma mataupu a temoni;

Auā ua uma le liliueseina o isi ua mulimuli ia Satani.

Auā ua le foaiina mai e le Atua ia te i tatou le Agaga e mata‘u ai, a o le Agaga e faamalosi ai, ma alofa ai, ma mafaufau tonu ai.

ia latou ala mai foi na moe i le mailei a le tiapolo, o e ua maua e ia, ina ia faia lona lava finagalo.

O lenei, ina ua i ai i le fanau le tino tagata ola, na faapea foi ona ua i ai ia te ia, ina ia faaumatia e ia i lona maliu o le ua i ai le malo e oti ai, o le tiapolo lea,

Ua e talitonu e toatasi lava le Atua; ua lelei lava lea; ua talitonu foi temoni ma latou tetemu.

A e afai o ia te outou le finau leaga ma le misa i o outou loto, soia le mitamita, aua foi le pepelo e faaleaga ai le upu moni. E le o le poto lenei ua alu ifo mai lugā; a o la le lalolagi ia, o le mea faaletino, o le faatemoni ia.

O le mea lea ia outou gauai ai i le Atua; ia outou tetee atu i le tiapolo, ona sola ese ai lea o ia ia te outou.

Ia outou faautauta, ia outou mataala, ona o le ua fai outou mona fili, o le tiapolo lea, o loo fealualuai o ia e pei o se leona tagi, ua saili se tasi e ‘aina e ia;

Auā afai na le faasaoina e le Atua le au agelu o e na agasala, a ua na tuuina atu i latou i maea uamea o le pogisa i seoli, ina ia taofia i latou e oo i le faamasinoga;

Tama iti e, o ona aso nei e gata ai, faapei ona outou faalogo ai foi o loo sau le anetikeriso, o loo i ai nei foi anetikeriso e toatele; o le mea lea ua tatou iloa ai o ona aso nei e gata ai. Na latou o ese ia i tatou, a e lei ni o tatou i latou; auā pe afai ni o tatou i latou, po ua latou tumau ma i tatou; a ua o ese i latou ina ia faaalia ai e le ni o tatou i latou uma. A o outou, o ia te outou le faauuina mai le Paia, ua outou iloa ai foi mea uma. Ua ou le tusi atu ia te outou, auā ua outou le iloa le upu moni, a e peitai ina ua outou iloa lava, ua iloa foi e leai se tala pepelo mai le upu moni. O ai ea le tagata pepelo, pe afai e le o le ua faafiti, ua faapea, E le o le Keriso o Iesu? O le anetikeriso lava lea o le ua faafiti i le Tamā atoa ma le Alo.

O lē fai le agasala, mai le tiapolo lava ia; auā ua agasala le tiapolo talu le amataga. O le mea lava lea na faaalia mai ai le Alo o le Atua, ina ia faaumatia e ia galuega a le tiapolo. O i latou uma o e ua fanau mai i le Atua, latou te le faia le agasala; auā o loo tumau i totonu ia te i latou lana fua; e le mafai foi ona agasala, auā ua fanau mai i latou i le Atua. O le mea lea ua iloa ai le fanau a le Atua ma le fanau a le tiapolo. O i latou uma o e le fai le amiotonu, e le mai le Atua i latou, atoa ma ē le alolofa i o latou uso.

Leau pele e, aua tou te faalogo i agaga uma lava, a ia outou tofotofo i agaga pe mai le Atua i latou; auā e toatele perofeta pepelo ua o atu i le lalolagi.

O le mea lenei tou te iloa ai le Agaga o le Atua, O agaga uma o e ta‘utino, ua maliu mai Iesu Keriso i le tino, mai le Atua lava i latou. A o agaga uma o e le ta‘utino, ua maliu mai Iesu Keriso i le tino, e le mai le Atua i latou; o lo le anetikeriso lava lenei ua outou faalogo ai o le a sau, o loo i ai nei i le lalolagi.

Ua tatou iloa e mai le Atua lava i tatou, a o le lalolagi uma o loo nofo toilalo i loo leaga.

Auā e toatele o e faasese ua o atu i le lalolagi, o e le ta‘u tino ua maliu mai Iesu Keriso i le tino; o le faasese lava lea ma le anetikeriso. Ia outou ia te outou, ne‘i maumau a matou galuega na matou faia, a ia maua le taui atoa. O i latou uma lava o e tuumavaega, a e le tumau i le mataupu ia Keriso, e le o ia te i latou le Atua; o lē tumau i le mataupu ia Keriso, e ia te ia lava le Tamā atoa ma le Alo. Pe a alu atu ia te outou se tasi a e le molia lenei lava mataupu, aua tou te talia o ia i o outou fale, aua foi tou te ofo alofa ia te ia; auā o sē ofo alofa atu ia te ia, e faatasi ai o ia ma ana galuega leaga.

O agelu foi o e na le taofi i lo latou mamalu, a ua tuua e i latou le mea sa latou nofo ai, ua taofia e ia i noanoataga e faavavau i lalo o le pogisa, seia oo i le faamasinoga o le aso tele.

A o Mekaeli o le agelu silisili, ina ua la finau ma le tiapolo na ia finau i le tino o Mose, ua na le faamalosi ona lafo atu o se upu leaga e faasala ia te ia, a ua na faapea atu, Ia aoai le Alii ia te oe.

Ua ou iloa au galuega, ma lou puapuaga, ma lou mativa, (a ua e tamaoaiga,) ma le upu faifai a ē ua fai mai o Iutaia i latou, a e leai lava, a o le sunako o Satani i latou. Aua lava e te fefe i mea o le a e tiga ai. Faauta, o le a tuuina atu ni o outou e le tiapolo i le fale puipui, ina ia tofotofoina ai outou; e po agafulu foi e puapuagatia ai outou. Ia e faamaoni seia oo i le oti, ona ou avatu ai lea ia te oe o le pale o le ola.

Ua ou iloa au galuega, ma le mea ua e nofo ai, o i ai le nofoālii o Satani, ua e taofi mau foi i lo‘u igoa, ma ua e le faafitia le faatuatua ia te au i ia ona po lava na i ai Anetipa o la‘u molimau o le na faamaoni, sa fasiotia o ia na ia te outou i le mea o nofo ai Satani.

A ou te fai atu ia te outou, atoa ma nisi o i Tuatira, o e ua le i ai lenei mataupu, ma ua latou le iloa mea loloto a Satani, (pei ona ta‘ua e i latou,) Ou te le tuuina atu se isi avega ia te outou;

Faauta, ou te tuuina atu i latou o i le sunako o Satani, o e o fai mai o Iutaia i latou, a e leai lava, a ua pepelo i latou; faauta, ou te ta‘ita‘i ia te i latou ina ia latou o atu i ou luma, ma ifo atu i ou vae; latou te iloa foi o a‘u ua ou alofa atu ia te oe.

Ua ili foi e lona toalima o agelu le pu, ona ou iloa ai lea o le fetu ua paū nai le lagi i le lalolagi; ua tuuina atu foi ia te ia le ki o le to e le gata. Ua tatala foi e ia le to e le gata; ona alu ae ai lea o le asu ai le to e pei o le asu o se umu tele, ua faapouliuligia ai le la ma le lagi ona o le asu o le to. Ua o atu foi sē akerisi nai le asu i luga o le laueleele; ua tuuina atu ia te i latou le malosi e pei o le malosi o akarava o le vao; ua fai atu foi ia te i latou aua ne‘i latou faaleaga i vao iti o le fanua, po o se mea lauolaola e tasi, po o se laau e tasi; tau lava o tagata ua le i ai i o latou muaulu le faamaufaailoga a le Atua. Ua tuuina atu ia te i latou aua ne‘i fasiotia i latou, tau lava ina faatigaina i masina e lima; o latou tiga foi e pei o le tiga o le tagata pe a tuia e le akarava. O ona po ia e saili ai e tagata le oti, a e latou te le maua; e naunau foi i latou ina ia oti, a e sola ese le oti ia te i latou. O sē akerisi foi ua tino mai e pei o solofanua ua saunia i le taua; o latou ulu foi ua peiseai ua i ai palealii e pei o auro, ma o latou mata e pei o mata o tagata; ua ia te i latou foi lauulu e pei o lauulu o fafine, ma o latou nifo e pei o nifo o leona; ua ia te i latou foi ufifatafata e pei o ufifatafata uamea; ua palalu foi o latou apaau e pei o le taalili o kariota ma solofanua e tele pe a taufetuli e tau. Ua ia te i latou o iu e pei o iu o akarava, ua i ai foi tui i o latou iu; ma ua ia te i latou le malosi e faaleaga ai tagata i masina e lima. Ua ia te i latou foi le tupu, o le agelu lea o le to e le gata; o lona igoa i le upu Eperu o Avatonu, a o lona igoa i le upu Eleni o Apoluonu.

O tagata foi na totoe o e lei fasiotia i nei mala, latou te lei salamo i galuega a o latou lima, o lo latou ifo i temoni, ma tupua auro, ma ario, ma ‘apa memea, ma maa, ma laau, o mea ia e le mafaia ona vaai, pe faalogo, pe savavali;

Pe a uma ona la faaiuina la la mau, ona sii mai lea o le taua ia te i laua e le manu feai le ua alu ae nai le to e le gata, e manumalo foi o ia ia te i laua, ma fasioti ia te i laua.

Ua iloa foi le tasi faailoga i le lagi, faauta foi, o le tarako tele e mūmū, e fitu ona ulu ma ona nifo e sefulu; ua i ona ulu o palealii e fitu. Ua toso e lona iu i lona tolu o vaega o fetu i le lagi, ma lafo ifo ia i latou i le lalolagi. Ua tu foi le tarako i luma o le fafine o le a fanau, ina ia ‘ai e ia o lana tama pe a fanau.

Ua tau foi le taua i le lagi; o Mekaeli ma ana agelu ua latou tau ma le tarako, ua ‘au foi le tarako ma ana agelu e tau ai le taua, a ua latou le manumalo, e le toe maua foi i le lagi se mea latou te nonofo ai. Ua lafo foi le tarako tele, o le gata tuai lea, ua igoa i le tiapolo, i le ma Satani, o lē faasese i le lalolagi uma; ua lafo ifo i le lalolagi, ua lafo foi ana agelu faatasi ma ia. Na ou faalogo foi i le leo tele i le lagi, ua faapea, O ona po nei ua oo mai ai le olataga, ma le mana, ma le malo o lo tatou Atua ma le pule a lona Keriso; auā ua lafo i lalo le na molia o tatou uso, o le na molia i latou i luma o lo tatou Atua i le ao ma le po. A ua latou manumalo ia te ia ona o le toto o le Tamai mamoe, ma le upu a la latou mau, ua latou le faapelepeleina foi lo latou ola ua oo i le oti. O le mea lea ia outou olioli ai, le lagi e atoa ma e ua nonofo ai. O i talofa ia te outou o e nonofo i le fanua ma le sami, auā ua alu ifo ia te outou le tiapolo ua lotoa tele, auā ua na iloa ua saasaa ona po.

Ua iloa e le tarako ua lafo ifo o ia i le lalolagi, ona faasaua lea o ia i le fafine na na fanaua le tama tane. Ona foaiina atu lea i le fafine apaau e lua o le aeto tele, ina ia lele ai o ia ai luma o le gata i le vao i le mea e nofo ai o ia, e fagaina ai o ia i le tausaga, ma tausaga, ma lona vaeluagalemu o le tausaga. Ona luai atu lea e le gata le vai, e pei o se vaitafe nai lona gutu i tua o le fafine, ina ia tafea o ia i le vai. Ona fesoasoani ai lea o le fanua i le fafine, ua faamaga ae foi e le fanua lona gutu, ma ua inu i le vaitafe ua luai atu e le tarako nai lona gutu. Ua ita foi le tarako i le fafine, ona alu atu ai lea o ia e tau le taua ma i latou ua totoe o lana fanau, o e ua tausi i poloaiga a le Atua, ma ua taofi le mau ia Iesu Keriso.

Ua ou tu i le oneone i le matafaga; ona a‘u iloa ai lea o le manu feai ua alu ae nai le sami, e fitu ona ulu ma ona nifo e sefulu; ua i ona nifo foi o palealii e sefulu, ua i ona ulu foi o le igoa faifai. O le manu feai foi na ou iloa, e pei o le nameri, o ona vae foi e pei o vae o le urosa, ma lona gutu e pei o le gutu o le leona. Ua tuuina atu foi ia te ia e le tarako lona malosi, ma lona nofoālii, ma le pule tele. Na a‘u iloa foi le tasi o ona ulu e peiseai ua foa a mate; a o lona foa na fai a mate ai ua mafu, ona ofo ai lea o le lalolagi uma ma latou mulimuli atu i le manu feai. Ua latou ifo foi i le tarako o le na tuuina atu le pule i le manu feai, ua latou ifo foi i le manu feai, ua faapea atu. O ai sē tusa ma le manu feai? O ai se na te mafaia ona tau ma ia? Ua avatu foi ia te ia le gutu e tautala ai i upu tetele ma upu faifai; ua tuuina atu foi ia te ia le pule e tau ai le taua i masina e fagafulu ma le lua. Ona tautala lea o ia ua upu leaga i le Atua, ua ia upu leaga i lona suafa, ma lona fale fetafai, atoa ma e ua nonofo i le lagi. Ua tuuina atu foi ia te ia ia tau le taua ma le au paia, ma ia manumalo ia te i latou; ua tuuina atu foi ia te ia e pule i itu aiga uma, ma gagana eseese, ma nuu. Ua ifo foi ia te ia o i latou uma o e nonofo i le lalolagi, ē ua le tusia o latou igoa i le tusi o le ola a le Tamai mamoe na fasia talu ona faavaeina o le lalolagi. Ai se tasi ua i ai taliga, ina faalogo mai ia o ia. Ai se na te ta‘ita‘iina nisi faatagataotaua, e alu lava ia faatagataotaua; ai se na te fasiotia i le pelu, e tusa ona fasiotia o ia i le pelu. O le mea lena ua i ai le onosai ma le faatuatua o le au paia.

Na a‘u iloa foi le tasi manu feai ua alu ae nai le fanua, ua i ai foi ona nifo e lua pei o nifo o se tamai mamoe, a ua tautala ia pei o se tarako. Ua fai foi e ia le pule uma a le uluai manu feai i ona luma; ma ua faia e ia ona ia ifo o le lalolagi ma e ua nonofo ai i le uluai manu feai, o le ua mafu lona foa na fai a mate ai; ua faia foi e ia faailoga tetele, o lea ua fai ai e ia ina ia alu ifo le afi mai le lagi i le lalolagi i luma o tagata. Ua ia faasese foi i e ua nonofo i le lalolagi ona o ia faailoga ua tuuina atu ia te ia na te faia i luma o le manu feai, o loo fai atu ia i e ua nonofo i le lalolagi latou te faia se faatagata o le manu feai e ona le manua i le pelu a ua ola. Ua tuuina atu foi ia te ia na te avatua le mānava i le faatagata o le manu feai, ina ia tautala le faatagata o le manu feai, ma ia faia ina ia fasiotia i latou uma o e le ifo atu i le faatagata o le manu feai. Ua faia foi e ia ona ia faailogaina o tagata uma, o tagata nuu atoa ma alii, o e mauoa ma e matitiva, o e sa‘oloto ma e pologa, ia faailogaina i latou i o latou lima taumatau, po o latou muaulu; ina ia le mafaia ona faatau mai pe faatau atu e se tasi, tau lava o e ua i ai le faailoga, po o le igoa o le manu feai, po o le faitau aofai o lona igoa. O le mea lenei ua i ai le poto. O le ua i ai le mafaufau ina faitau ia o ia i le faitau aofai o le manu feai; auā o le faitau aofai lea o le tagata; o lona faitau aofai foi, E ono selau ma le onogafulu ma le ono.

Ona mulimuli atu ai lea ia te i laua o lona toatolu o agelu, ua faapea atu ma le leo tele, Ai se tasi e ifo i le manu feai ma lona faatagata, ma talia le faailoga i lona muaulu po o lona lima, e inu lava ia i le uaina o le toasa o le Atua, ua liligiina atu e le suia i le ipu o lona toasa, e puapuagatia foi ai i le afi ma le teio i luma o le au agelu paia ma luma o le Tamai mamoe; o le asu foi o lo latou puapuaga e alu ae e faavavau faavavau lava; latou te le maua foi se filemu i le ao ma le po o e ua ifo i le manu feai ma lona faatagata, ma se na te talia le faailoga o lona igoa.

Ua liligi foi e lona toalima o agelu lana ipu i le nofoālii o le manu feai; ona faapouliuligia lea o lona malo; ona latou feati ai lea o latou laulaufaiva ona o le puapuaga;

Ona ou iloa ai lea o agaga leaga e toatolu e pei o rane ua o mai mai le gutu o le tarako, ma le gutu o le manu feai, atoa ma le gutu o le perofeta pepelo; auā o agaga ia o temoni e fai faailoga, ua latou o atu i tupu o le lalolagi ma le atu laulau uma, e faapotopoto ia te i latou i le taua i le aso tele o le Atua e ona le malosi uma lava.

Ua sau foi le tasi o ia agelu e toafitu sa i ai ipu e fitu, ua tautala mai ia te au, ua faapea mai ia te au, Sau ia, ou te faailoa ia te oe le faasalaina o le fafine talitane e sili, o lē tietie i vai e tele; ua faitaaga ma ia o tupu o le lalolagi, ua onā foi e o nonofo i le lalolagi i le uaina o lana faitaaga. Ua ia avea foi a‘u i le vao i le Agaga; ona ou iloa lea o le fafine ua tietie i le manu feai mūmū, ua lilo i igoa faifai, e fitu ona ulu ma ona nifo e sefulu. Ua ofu le fafine i le ie pāuli ma le mūmū, ua teuteu foi i auro, ma maa tāua, ma penina, ua i lona lima le ipu auro, ua tumu i mea e inosia ma le leaga o lana faitaaga; ua tusia foi i lona muaulu le igoa, O LE MEA LILO, PAPELONIA LE AAI TELE, O LE TINA O FAFINE TALITANE MA MEA E INOSIA I LE LALOLAGI. Na ou iloa foi le fafine ua onā i le toto o le au paia ma le toto o e na molimau ia Iesu; ua ou iloa atu ia te ia, ona ou matuā ofo tele ai lea. Ona fai mai lea o le agelu ia te au, Se a le mea ua e ofo ai? Ou te ta‘u atu ia te oe le uiga lilo o le fafine, ma le manu feai ua ia tietie ai, e fitu ona ulu ma ona nifo e sefulu.

O le manu feai na e iloa, sa i ai, ua le i ai foi, o le a alu ae foi o ia ai le to e le gata, e alu atu foi o ia i le malaia; o e nonofo i le lalolagi, (e lei tusia o latou igoa i le tusi o le ola talu ona faavaeina o le lalolagi,) latou te taufaiofo, pe a iloa le manu feai sa i ai, ua le i ai foi, a e ui i lea o loo i ai lava. O le mea lenei ua i ai le atamai e ona le poto. O ulu e fitu o mauga ia e fitu, ua nofo ai le fafine; o tupu foi ia e toafitu; e toalima ua pauu, o loo i ai le tasi, e lei oo mai nei foi le tasi; pe a oo mai e tusa ona saasaa ona po e tumau ai. O le manu feai foi sa i ai, ua le i ai foi, o lona toavalu lea, nai le toafitu foi o ia, e alu atu foi o ia i le malaia. O nifo foi e sefulu na e iloa, o tupu ia e toasefulu, ua le oo ina maua o latou malo, a e maua e i latou le pule pei o tupu e tasi le itu aso faatasi ma le manu feai. Ua loto gatasi i latou nei, latou te avatu foi o latou malosi ma a latou pule i le manu feai.

Latou te tau le taua ma le Tamai mamoe, a e manumalo le Tamai mamoe ia te i latou, auā o le Alii ia o alii ma le Tupu o tupu; o e ua ia te ia foi ua valaauina i latou, ma filifilia, ma faamaoni. Ona fai mai lea o ia ia te au, O vai na e iloa, o loo tietie ai le fafine talitane, o nuu ia, ma motu o tagata, ma atu nuu, ma gagana eseese. O nifo foi e sefulu na e iloa i le manu feai, latou te ‘ino‘ino i le fafine talitane, ma faasaunoa ia te ia, ma to ese ona ofu, latou te aai foi i lona tino, ma susunu ia te ia i le afi. Auā ua tuuina atu e le Atua i o latou loto ia faia lona finagalo, latou te loto gatasi foi e avatu lo latou malo mo le manu feai, seia taunuu afioga a le Atua. O le fafine foi na e iloa, o le aai tele lea, e i ai le pule i tupu o le lalolagi.

Ua matuā alaga foi o ia ma le leo tele, ua faapea ane, Ua paū, ua paū Papelonia le aai tele, ua avea foi o ia ma mea e nofo ai temoni, ma mea e puipui ai agaga leaga uma, o le mea foi e puipui ai manu felelei uma e leaga ma le inosia;

Ona ou iloa lea o le manu feai, ma tupu o le lalolagi, ma a latou ‘au, ua faapotopotoina e tau ai le taua ma le ua tietie i le solofanua ma lana itu taua. Ona puea lea o le manu feai atoa ma le perofeta pepelo o le na fai faailoga i ona luma, o mea ia na faaseseina ai e ia o e ua i ai le faailoga o le manu feai, ma e ua ifo i lona faatagata; ua lafoolaina i laua i le lepa afi ua mu i le teio. A o e na totoe, ua fasiotia i latou i le pelu ua alu atu nai le fofoga o le ua tietie i le solofanua; ona maoona ai lea o manu felelei uma i o latou tino.

Na a‘u iloa foi le agelu ua alu ifo i le lagi, ua ia te ia le ki o le to e le gata, ua i lona lima foi le maea uamea tele. Ua pue foi e ia le tareko, o le gata tuai, o le tiapolo lea ma Satani, ua ia fusifusi foi ia te ia i tausaga e afe. Ua ia lafo foi ia te ia i le to e le gata, ua pupuni foi ia te ia, ma tuuina atu le faamaufaailoga i ona luga, ina ia le toe faaseseina e ia o nuu, seia atoa ia tausaga e afe; a mavae foi ia, e tatau ona tatalaina o ia i nai aso.

Pe a atoa foi ia tausaga e afe, ona tatalaina lea o Satani ai le mea na puipuiina ai o ia. E alu atu foi o ia e faasese i nuu o i itu e fa o le lalolagi, o Koku ma Makoku, e faapotopoto ia te i latou i le taua, ua pei o le oneone o le sami i latou ona toatele. Ua o ae foi i latou i le mafolafola o le lalolagi, ua latou siomia foi le toagālauapi a le au paia ma le aai ua faapelepeleina; ona alu ifo lea o le afi mai le Atua i le lagi, ua susunu ai ia te i latou;

o le tiapolo foi o le na faasese ia te i latou, ua lafoina o ia i le lepa afi ma le teio, o i ai le manu feai ma le perofeta pepelo; e puapuagaina ai i latou i le ao ma le po e faavavau faavavau lava.