02 – UNkulunkulu

Ekuqaleni uNkulunkulu wadala amazulu lomhlaba.

U-Abhrama eseleminyaka engamatshumi aficamunye laficamunye yobudala, uJehova wabonakala kuye wathi, “NginguNkulunkulu uSomandla; hlala usemehlweni ami, ungasoleki.

UMosi wathi kuNkulunkulu, “Aluba ngifika kwabako-Israyeli ngithi kubo, ‘UNkulunkulu waboyihlo ungithumile kini,’ babe sebengibuza besithi, ‘Ungubani ibizo lakhe?’ ngizakuthini kubo?” UNkulunkulu wathi kuMosi, “NGINGUYE ENGINGUYE. Lokhu yikho ozakutsho kwabako-Israyeli ukuthi, ‘UNGINGUYE ungithumile kini.’ ” UNkulunkulu wabuye wathi kuMosi, “Tshono kwabako-Israyeli uthi, ‘UJehova, uNkulunkulu waboyihlo  —  uNkulunkulu ka-Abhrahama, uNkulunkulu ka-Isaka, loNkulunkulu kaJakhobe  —  ungithumile kini.’ Leli libizo lami laphakade, ibizo engizakhunjulwa ngalo kusukela kusizukulwana kusiya kwesinye isizukulwana.

UJehova ungamandla ami lehubo lami; Useyikusindiswa kwami, UnguNkulunkulu wami, ngizamdumisa; UNkulunkulu kababa ngizamphakamisa. UJehova ulibutho; nguJehova igama lakhe.

“Isandla sakho sokunene, O Jehova, saba lamandla obukhosi. Isandla sakho sokunene, O Jehova, sasihlikiza isitha.

Wadlula phambi kukaMosi ememezela esithi, “UJehova, UJehova; uNkulunkulu olesihawu lomusa, ophuzayo ukuthukuthela, ogcwele uthando lobuqotho, olothando olungapheliyo kuzinkulungwane ethethelela ububi, iziphosiso lezono. Ikanti abalamacala kabayekeli bengajeziswanga; wehlisela ububi baboyise phezu kwabantwana, laphezu kwabantwana babantwana kusiya kusizukulwane sesithathu lesesine.”

Lingakhonzi omunye unkulunkulu, ngoba uJehova, obizo lakhe linguBukhwele, nguNkulunkulu olobukhwele.

Impela njengoba ngiphila, lanjengoba inkazimulo kaJehova igcwalise umhlaba wonke,

UNkulunkulu kasumuntu, ukuthi angaqamba amanga, loba indodana yomuntu, yona eguquka ingqondo yayo. Kambe ukhuluma angenzi na? Uyathembisa angagcwalisi isithembiso na?

Ngoba uJehova uNkulunkulu wenu ungumlilo ohangulayo, uNkulunkulu olobukhwele.

Lakutshengiswa konke lokhu ukuze lazi ukuthi uJehova unguNkulunkulu; ngaphandle kwakhe kakho omunye futhi. Esemazulwini wakwenza ukuthi lilizwe ilizwi lakhe ukuze libe lobuntu. Emhlabeni walitshengisa amalangabi omlilo akhe omkhulu, njalo lawezwa amazwi akhe ephuma emlilweni.

Zwana, we-Israyeli: UJehova uNkulunkulu wethu nguJehova munye.

Yazini-ke ukuthi uJehova wenu unguNkulunkulu; unguNkulunkulu othembekileyo, ogcina isivumelwano sothando kuze kufike esizukulwaneni senkulungwane salabo abamthandayo njalo begcina imilayo yakhe. Kodwa labo abamzondayo uzaphindisela kubo ngokubabhubhisa; kayikuphuza ukuphindisela kulabo abamzondayo.

Ngoba uJehova uNkulunkulu wenu unguJehova wabonkulunkulu njalo unguJehova wamakhosi, uJehova ophakemeyo, olamandla njalo owesabekayo, ongelabandlululo futhi ongemukeli isivalamlomo.

UliDwala, imisebenzi yakhe iphelele, njalo zonke izindlela zakhe zilungile. UNkulunkulu othembekileyo ongenzi okubi, uqotho njalo ulungile yena.

UNkulunkulu oyisimakade uyisiphephelo sakho, njalo ngaphansi kuzingalo ezingelakuphela. Uzazixotsha izitha phambi kwakho esithi, ‘Mbulale!’

“Kakho ongcwele njengoJehova; kakho omunye ngaphandle kwakho; akulaDwala elinjengoNkulunkulu wethu.

“Kodwa uNkulunkulu uzahlala emhlabeni na? Amazulu, loba izulu eliphakemeyo, akungeke kukuvalele wena. Pho ithempeli leli engilakhileyo lingayini kuwe na!

Kodwa uJehova waba lomusa kubo waba lozwelo watshengisela ukubakhathalela ngenxa yesivumelwano sakhe lo-Abhrahama, u-Isaka loJakhobe. Kuze kube lamuhla kathandi ukubabhubhisa loba ukubalahla basuke phambi kwakhe.

Bongani uJehova ngoba ulungile. Uthando lwakhe olungapheliyo lumi kokuphela.

“Njalo wena ndodana yami, Solomoni, mamukele uNkulunkulu kayihlo, umkhonze ngokuzinikela ngenhliziyo yakho yonke langengqondo yokuvuma, ngoba uJehova uyihlola yonke inhliziyo kanti uyayazi iminakano lezenzo zonke. Nxa umfuna uJehova, uzamfumana wena, kodwa nxa umfulathela, uzakufulathela yena kuze kube nininini.

Bungobakho, O Jehova, ubukhulu lamandla lodumo lobukhosi; ngoba konke okusezulwini lokusemhlabeni kungokwakho. Bungobakho, O Jehova, ubukhosi; uphakeme wena phezu konke. Inotho lodumo kuvela kuwe; ungumbusi wazo zonke izinto. Esandleni sakho kukhona ukuqina lamandla. Kukuwe ukuphakamisa lokupha amandla kubo bonke.

wathi, “O Jehova, Nkulunkulu wabokhokho, kakusuwe yini uNkulunkulu osezulwini? Ubusa phezu kwemibuso yezizwe zonke. Amandla asesandleni sakho, njalo kakho ongamelana lawe.

O Jehova, Nkulunkulu ka-Israyeli, ulungile! Namhlanje sisele njengensalela. Nanku silapha phambi kwakho ngecala lethu, lokuba engekho ongema ebukhoneni bakho ngenxa yalo icala lethu.”

Wena wedwa unguJehova. Wenza amazulu, kanye lamazulu aphezukonke, lazo zonke izinkanyezi zawo, umhlaba lakho konke okukuwo, izilwandle lakho konke okukuzo. Uyapha ukuphila kukho konke, lamabandla wonke asezulwini ayakukhonza.

“Kambe ungayifinyelela yini imfihlakalo kaNkulunkulu? Ungaziphenya iziphetho zikaSomandla na?

“Ngiyazi ukuthi ungazenza zonke izinto; kalikho icebo lakho elingavinjelwa.

Yena osesihlalweni ezulwini uyahleka; uJehova ubahleka ulunya.

UNkulunkulu ngumahluleli olungileyo, uNkulunkulu obonisa ulaka lwakhe izinsuku zonke.

Kumqondisi wokuhlabela. ElikaDavida Isiwula sithi enhliziyweni yaso, “AkulaNkulunkulu.” Baxhwalile, izenzo zabo zingamanyala; kakho owenza okuhle. UJehova ukhangela phansi esezulwini abone amadodana abantu ingabe bakhona yini abezwayo, abamdingayo uNkulunkulu. Bonke baphambukile, bonke ndawonye sebexhwalile; kakho loyedwa owenza okuhle, kakho lamunye.

Tshengisa ukumangalisa kothando lwakho olukhulu, wena osindisa ngesandla sakho sokunene labo ababalekela kuwe ezitheni zabo.

Kumqondisi wokuhlabela. Ihubo likaDavida. Amazulu afakaza inkazimulo kaNkulunkulu; lomkhathi utshumayela umsebenzi wezandla zakhe.

Ihubo likaDavida UJehova ungumalusi wami, angiyikuswela.

Ilizwi likaJehova lilamandla; ilizwi likaJehova lilobukhosi.

UJehova ukhangele phansi esezulwini ababone bonke abantu; esemzini wakhe uyababona bonke abahlala emhlabeni  —

Ababi baceba ukulimaza abalungileyo babagedlele amazinyo; kodwa uJehova uyabahleka ababi, ngokuba uyazi ukuthi usuku lwabo luyeza.

Ngokuba uNkulunkulu unguJehova womhlaba wonke; hlabelelani kuye ihubo lokudumisa. UNkulunkulu uyazibusa izizwe; UNkulunkulu uhlezi esihlalweni sakhe sobukhosi esingcwele.

Ungangilahli ebusweni bakho kumbe ususe kimi uMoya oNgcwele.

Ngiphendula, O Jehova, ngenxa yokulunga kothando lwakho; emuseni wakho omkhulu phendukela kimi.

Udumo kalube sebizweni lakhe elingcwele laphakade; sengathi umhlaba wonke ungagcwala inkazimulo yakhe. Ameni, njalo Ameni.

Uyathethelela njalo ulungile, O Jehova, ugcwele uthando kulabo abakhuleka kuwe.

Phakathi kwabonkulunkulu kakho onjengawe, O Jehova; kakulazenzo ezingalinganiswa lezakho. Zonke izizwe owazenzayo zizakuza zikhonze kuwe, O Jehova; zizaletha udumo ebizweni lakho. Ngokuba umkhulu njalo wenza imisebenzi emangalisayo; wena wedwa unguNkulunkulu.

Kodwa wena, O Jehova, unguNkulunkulu olozwelo, olobubelo, ophuza ukuzonda, owandayo ngothando lokuthembeka.

Ukulunga lokwahlulela kuhle yikho okuyinsika yesihlalo sakho sobukhosi; uthando lokuthembeka kuhamba phambili kwakho.

Izintaba zingakabikhona lalapho ungakawuvezi umhlaba kanye lelizwe, kusukela phakade kuze kube phakade unguNkulunkulu.

Ngokuba wena, O Jehova ungoPhezukonke kuwo wonke umhlaba; uphakeme ngaphezulu kakhulu kwabonkulunkulu bonke.

UJehova uyabusa, izizwe kazithuthumele; uhlezi esihlalweni sobukhosi phakathi kwamakherubi, umhlaba kawuzamazame.

Phakamisani uJehova uNkulunkulu wethu, limkhonze entabeni yakhe engcwele, ngokuba uJehova uNkulunkulu wethu ungcwele.

Ngokuba uJehova ulungile lothando lwakhe lumi kuze kube phakade; ukuthembeka kwakhe kumi kuzo zonke izizukulwane.

Ekuqaleni wabeka izisekelo zomhlaba, lamazulu angumsebenzi wezandla zakho. Konke kuzabhubha, kodwa wena uzasala; konke kuzaguga njengesigqoko. Njengesivunulo uzakuguqula kucine sekulahlwa. Kodwa wena uhlala unjalo, njalo iminyaka yakho kayisoze iphele lanini.

UJehova ulesihawu njalo ulomusa, uyaphuza ukuthukuthela, kodwa uyanda ngothando.

Ngokuba njengokuphakama komkhathi ngaphezu komhlaba, lukhulu kangako uthando lwakhe kulabo abamesabayo; njengobukhatshana bempumalanga kuyo intshonalanga kanjalo ususile iziphambeko zethu kithi.

Kodwa kusukela phakade kusiya phakade uthando lukaJehova lukulabo abamesabayo, lokulunga kwakhe ebantwaneni babantwana kulabo abagcina isivumelwano sakhe njalo bakhumbule ukulalela izimiso zakhe. UJehova usemisile isihlalo sakhe sobukhosi ezulwini, njalo ubukhosi bakhe buphezu kwakho konke.

Dumisa uJehova, O mphefumulo wami. O Jehova Nkulunkulu wami, umkhulu kakhulu; ugqoke inkazimulo lobukhosi. Uyazigoqela ngokukhanya kungathi kungesivunulo; amazulu uyawelula njengethente

Mbongeni uJehova ngokuba ulungile; uthando lwakhe lumi laphakade.

UJehova uphakeme ngaphezu kwezizwe zonke, inkazimulo yakhe ngaphezulu kwamazulu.

UNkulunkulu wethu usezulwini; wenza loba yini ayithandayo.

UJehova wenza loba yini ayifunayo, emazulwini lasemhlabeni, ezilwandle lasezinzikini zazo.

Bongani uJehova, ngokuba ulungile. Uthando lwakhe lumi laphakade.

Bongani uJehova wamakhosi: Uthando lwakhe lumi laphakade.

owathi ngokuzwisisa kwakhe wenza amazulu, Uthando lwakhe lumi laphakade.

Bongani uNkulunkulu wasezulwini. Uthando lwakhe lumi laphakade.

Ngingaya ngaphi ngisuke eMoyeni wakho na? Ngingabalekela ngaphi ngisuke kuwe na? Ngingakhuphukela emazulwini, ukhona lapho; uma ngilala ezinzikini, ukhona lapho.

Umkhulu uJehova njalo ufanele kakhulu ukudunyiswa; ubukhulu bakhe kakho ongabulinganisa.

Sizakhuluma ngenkazimulo yakho ebenyezelayo ubukhosi bakho, lami ngizazidla ingqondo ngemisebenzi yakho emangalisayo.

UJehova ulobubele lesihawu, uphuza ukuthukuthela ande ngothando.

UJehova ulungile kuzo zonke izindlela zakhe njalo ulothando kukho konke akwenzayo. UJehova useduze kulabo abacela kuye, kubo bonke abacela kuye ngeqiniso.

uMenzi wezulu lomhlaba, ulwandle lakho konke okulapho  —  uJehova owala elokhu ethembekile laphakade. Uyabalwela abacindezelwayo anike abalambileyo ukudla. UJehova ukhulula izibotshwa,

Umisile ubunengi bezinkanyezi aziqambe leyo laleyo ngamabizo. Mkhulu uJehova wethu, njalo makhulu amandla akhe; ukuzwisisa kwakhe kakulamkhawulo.

Ngiyabathanda labo abangithandayo, labo abangidingayo bayangifumana.

Amehlo kaJehova asezindaweni zonke, alinde ababi labalungileyo.

Ngubani oseke waya ezulwini waphinda wehla na? Ngubani oseke wafumbatha umoya ngesandla sakhe na? Ngubani oseke wagoqela amanzi ngesigqoko sakhe na? Ngubani omise yonke imikhawulo yomhlaba na? Lingubani ibizo lakhe, lebizo lendodana yakhe na? Ngitshela uma usazi!

Ngenani ezimbalwini zamatshe lasemhlabathini, licatshele ukwesabeka kukaJehova lenkazimulo yobukhosi bakhe!

Elinye lamemezela kwelinye lisithi: “Ungcwele, ungcwele, ungcwele uJehova uSomandla, Umhlaba wonke ugcwele inkazimulo yakhe.”

UJehova uSomandla nguye okumele limazi engongcwele, nguye okumele limesabe, nguye okumele limqhuqhe.

Ngoba sizalelwe umntwana, siphiwe indodana, umbuso uzakuba phezu kwamahlombe akhe. Uzabizwa ngokuthi uMeluleki Omangalisayo, uNkulunkulu uSomandla, uBaba Waphakade, iNkosana yokuThula.

UMoya kaJehova uzakuba phezu kwakhe  —  uMoya wokuhlakanipha lowokuqedisisa, uMoya wokweluleka lowamandla, uMoya wokwazi lowokwesaba uJehova  —

Kodwa uJehova ulangatha ukuba lomusa kini; uyavuka ukuba alitshengise isihawu. Ngoba uJehova unguNkulunkulu wokulunga. Babusisiwe bonke abamlindeleyo!

Ngoba uJehova ungumahluleli wethu, uJehova usinika imithetho, uJehova unguJehova wethu; nguye ozasikhulula.

Phambi kwakhe zonke izizwe zinjengeze; yena uzikhangela njengezingasilutho njalo zingaphansi kweze. Pho ngubani elingamfanisa loNkulunkulu na? Yisifanekiso bani elingasilinganisa laye na?

UJehova uhlezi ebukhosini ngaphezu kwendingilizi yomhlaba, njalo abantu bakhe banjengezintethe. Welula amazulu njengekhetheni, awendlale njengethente lokuhlala kulo.

Kalazi yini? Kalizwanga na? UJehova unguNkulunkulu waphakade, UMdali wemikhawulo yomhlaba. Kayikudinwa kumbe akhathale, ukuqedisisa kwakhe kakho ongakulinganisa.

“Mina nginguJehova, lelo yilo ibizo lami! Ubukhosi bami angiyikubunika omunye loba nginike izithombe udumo lwami.

“Lina lingofakazi bami,” kutsho uJehova, “lenceku yami engiyikhethileyo, ukuze lazi, likholwe kimi, njalo lizwisise ukuthi mina nginguye. Ngaphambi kwami kakho unkulunkulu owake waba khona, njalo kakho ozakuba khona emva kwami. Mina, mina uqobo, nginguJehova, ngaphandle kwami kakho omunye umsindisi.

“Nanku akutshoyo uJehova  —  iNkosi loMhlengi ka-Israyeli, uJehova uSomandla: Mina ngingowokuqala njalo ngingowokucina; ngaphandle kwami kakho uNkulunkulu.

“Nanku akutshoyo uJehova  —  uMhlengi wakho, owakubumbayo esiswini: Mina nginguJehova, owenza izinto zonke, owenza amazulu eyedwa, owendlala umhlaba eyedwa,

ukuze kuthi kusukela empumalanga kusiya entshonalanga, abantu bakwazi ukuthi kakho omunye ngaphandle kwami. Mina nginguJehova, njalo kakho omunye. Ngenza ukukhanya njalo ngidale umnyama, ngiletha ukuphumelela njalo ngidale incithakalo; mina, uJehova ngiyazenza zonke lezizinto.

Ngoba nanku okutshiwo nguJehova yena owadala amazulu, unguNkulunkulu, yena owabumba umhlaba wawenza, wawusekela; kawudalanga ukuba ungabi lalutho, kodwa wawenza ukuba kuhlalwe kuwo, uthi: “Mina nginguJehova, kakho omunye.

Memezelani okufanele kube yikho, likubike  —  kabemukele izeluleko ndawonye. Ngubani owabika lokhu endulo, ngubani owamemezela ngakho kudala le? Kwakungayisimi mina uJehova na? Njalo kakho uNkulunkulu ngaphandle kwami, uNkulunkulu olungileyo onguMsindisi; kakho omunye, yimi kuphela. “Phendukelani kimi lisindiswe, lonke lina mikhawulo yomhlaba; Ngoba mina nginguNkulunkulu, njalo kakho omunye.

Khumbulani izinto zakuqala ezendulo. Mina nginguNkulunkulu, kakho omunye; Mina nginguNkulunkulu, kakho onjengami. Mina ngenza isiphetho sazakale kusukela ekuqaleni; lokuzakwenzakala kusukela ezikhathini zasendulo. Ngithi: Injongo yami izakuma kokuphela, njalo ngizakwenza konke engikufunayo.

Ngoba uMenzi wakho engumyeni wakho  —  uJehova uSomandla libizo lakhe oNgcwele ka-Israyeli unguMhlengi wakho; ubizwa ngokuthi nguNkulunkulu womhlaba wonke.

“Ngoba imicabango yami kayisiyo eyenu, lezindlela zenu kayisizo ezami,” kutsho uJehova. Njengomkhathi uphakeme kulomhlaba, ngokunjalo izindlela zami ziphakeme kulezindlela zenu, lemicabango yami iphakeme kulemicabango yenu.

Ngoba ophakemeyo ongaPhezulu  —  yena ophila kokuphela, obizo lakhe lingcwele uthi: “Ngihlala endaweni ephakemeyo lengcwele, kodwa laye ozisolayo lothobekileyo emoyeni, ukuba kuvuselelwe umoya wabathobekileyo, kuvuselelwe lezinhliziyo zabazisolayo.

Nanku okutshiwo nguJehova: “Izulu liyisihlalo sami sobukhosi, lomhlaba uyisenabelo sezinyawo zami. Ingaphi indlu elizangakhela yona na? Indawo yami yokuphumula izakuba ngaphi na?

Kodwa uJehova unguNkulunkulu oqotho; unguNkulunkulu ophilayo, iNkosi yanininini. Lapho ethukuthele, umhlaba uyagedezela; izizwe azingeke zimelane lolaka lwakhe.

Kodwa uNkulunkulu wenza umhlaba ngamandla akhe; wawumisa umhlaba ngokuhlakanipha kwakhe njalo wanweba amazulu ngokuqedisisa kwakhe.

“Ngakho ngizabafundisa  —  khathesi ngizabafundisa amandla ami lobukhulu bami. Lapho-ke bazakwazi ukuthi ibizo lami nguJehova.

Umuntu angacatsha endaweni efihlakeleyo ukuba ngingamboni na?” kutsho uJehova. “Angithi ngigcwele ezulwini lasemhlabeni na?” kutsho uJehova.

UJehova wabonakala kithi kudala esithi: “Ngikuthandile ngothando olungapheliyo; ngikuhole ngesisa esikhulu.

Umuntu kasayikufundisa umakhelwana wakhe, kumbe umuntu afundise umfowabo esithi, ‘Yazi uJehova,’ ngoba bonke bazangazi, kusukela komncane wabo kusiya komkhulukazi,” kutsho uJehova. Ngoba ngizabathethelela ububi babo, ngingazikhumbuli futhi izono zabo.”

“Jehova Wobukhosi, wadala amazulu lomhlaba ngamandla akho amakhulu langengalo yakho eyeluliweyo. Akukho lutho olunzima kuwe. Ubonakalisa uthando kuzinkulungwane kodwa ulethe isijeziso sezono zaboyise ebantwaneni babo ngemva kwabo. Wena Nkulunkulu omkhulu olamandla, obizo lakho nguJehova uSomandla,

“Mina nginguJehova, uNkulunkulu woluntu lonke. Kambe kulento engehlulayo na?

wathi: “Kalidunyiswe ibizo likaNkulunkulu nini lanini; inhlakanipho lamandla kungokwakhe. Uyaguqula izikhathi lezibanga; uyawabeka amakhosi aphinde awaqethule. Unika inhlakanipho kwabahlakaniphileyo lolwazi kwabaqedisisayo. Uhlazulula izinto ezizikileyo lezifihlakeleyo; uyakwazi okucatshe emnyameni, lokukhanya kuhlala kuye.

Ngizakwendisela kimi kuze kube nininini; ngizakwendisa ngokulunga langemfanelo, ngothando langesihawu.

uJehova uNkulunkulu uSomandla, uJehova yilo ibizo lakhe lodumo!

Yena obumba izintaba, udala umoya, aveze lemicabango yakhe ebantwini, yena oguqula ukusa kube ngumnyama, anyathele lezindawo eziphakemeyo zomhlaba  —  uJehova uNkulunkulu uSomandla yilo ibizo lakhe.

UJehova uNkulunkulu olobukhwele lophindiselayo; uJehova uyaphindisela njalo ulolaka olukhulu. UJehova uyaphindisela ezitheni zakhe aqinise lolaka lwakhe ezitheni zakhe. UJehova uyaphuza ukuthukuthela njalo ulamandla amakhulu; uJehova kayikumyekela olecala engajeziswanga. Indlela yakhe iphakathi kwesivunguzane lesiphepho, amayezi aluthuli lwezinyawo zakhe.

Ngoba umhlaba uzagcwala ngokwazi udumo lukaJehova, njengamanzi agcwalise ulwandle.

UJehova uNkulunkulu wakho ulawe, ulamandla okusindisa. Uzathokoza kakhulu ngawe, uzakududuza ngothando lwakhe, uzakuthokozela ngokuhlabelela.”

Kodwa mina ngithi, Livele lingafungi: loba ngezulu ngoba liyisihlalo sobukhosi sikaNkulunkulu; kumbe ngomhlaba, ngoba uyisinyathelo sakhe; loba ngeJerusalema ngoba lidolobho leNkosi enkulu.

Ngakho wobani ngabapheleleyo njengalokhu uYihlo wenu wasezulwini ephelele.

“Kumele lithandaze kanje: ‘Baba wethu osezulwini, malihlonitshwe ibizo lakho,

Ungasikhokheleli ekulingweni, kodwa usisindise koMubi.’

Ngalesosikhathi uJesu wathi, “Ngiyakubonga, Baba, Nkosi yezulu lomhlaba, ngokuba uzifihlile lezizinto kwabahlakaniphileyo labafundileyo, wazambulela abantwana abancinyane.

UJesu wabakhangela wathi, “Ngokwabantu, lokhu kakwenzeki, kodwa kuNkulunkulu zonke izinto ziyenzeka.”

‘NginguNkulunkulu ka-Abhrahama, uNkulunkulu ka-Isaka loNkulunkulu kaJakhobe? Kasuye uNkulunkulu wabafileyo kodwa ngowabaphilayo.”

“Nxa iNdodana yoMuntu isisiza ngenkazimulo yayo, ikanye lezingilosi zonke, izahlala esihlalweni sayo sobukhosi ilenkazimulo yasezulwini. Zonke izizwe zizabuthaniswa phambi kwayo, ibe isisahlukanisa abantu omunye komunye njengomalusi esahlukanisa izimvu ezimbuzini.

UJesu weza kubo wathi, “Wonke amandla ezulwini lasemhlabeni aphiwe mina. Ngakho hambani lenze abafundi ezizweni zonke, libabhaphathize ebizweni likaBaba, leleNdodana lelikaMoya oNgcwele,

UJesu wabakhangela wathi, “Ngokwabantu kakwenzeki, kodwa hatshi ngoNkulunkulu; zonke izinto ziyenzakala ngoNkulunkulu.”

UJesu waphendula wathi, “Oqakatheke okudlulayo yilo: ‘Zwana, wena Israyeli, iNkosi uNkulunkulu wethu, iNkosi yinye.

UJesu wathi, “Nginguye. Njalo lizayibona iNdodana yoMuntu ihlezi kwesokunene salowo Olamandla isehla ngamayezi ezulu.”

UJesu, egcwele uMoya oNgcwele, wabuya evela eJodani waqhutshwa nguMoya wamusa enkangala,

Wobani lesihawu njengoYihlo olesihawu.

Ngalesosikhathi uJesu egcwele intokozo ngoMoya oNgcwele wathi, “Ngiyakudumisa, Baba, Nkosi yasezulwini lasemhlabeni, ngokuba uzifihlile lezizinto kwabahlakaniphileyo labafundileyo wazambula ebantwaneni abancinyane. Yebo, Baba, ngoba lokhu kwakuyikuthanda kwakho okuhle.

Wathi kubo, “Nxa likhuleka, alibokuthi: “ ‘Baba, kalidunyiswe ibizo lakho, umbuso wakho kawuze,

Ekuqaleni wayekhona uLizwi, uLizwi waye loNkulunkulu, njalo uLizwi wayenguNkulunkulu. Waye loNkulunkulu kwasekuqaleni. Izinto zonke zenziwa ngaye; ngaphandle kwakhe kakulalutho olukhona olwenziwayo.

“UNkulunkulu walithanda ilizwe waze wanikela iNdodana yakhe iyiyo yodwa ukuze kuthi loba ngubani okholwa kuyo angabhubhi kodwa abe lokuphila okungapheliyo.

UYise uyayithanda iNdodana njalo useyiphe amandla phezu kwezinto zonke.

UNkulunkulu ungumoya, labo abamkhonzayo bamele bamkhonze ngomoya langeqiniso.”

UJesu wachaza wathi, “Ngiyisinkwa sokuphila. Lowo ozayo kimi kasoze afa alamba, lalowo okholwa kimi kasoze aphinde ome.

Ngiyisinkwa sokuphila.

Ngiyisinkwa esiphilayo esehlela phansi sivela ezulwini. Nxa umuntu angasidla lesisinkwa, uzaphila laphakade. Lesosinkwa siyinyama yami engizayinikela ukuphila komhlaba.”

Kwathi uJesu esekhuluma ebantwini njalo wathi, “Ngiyikukhanya komhlaba. Loba ngubani ongilandelayo kasoze ahambe ebumnyameni lanini, kodwa uzakuba lokukhanya kokuphila.”

Yimi ngokwami engizifakazelayo; omunye ufakazi wami nguye ongithumileyo  —  uBaba.”

Kodwa waqhubeka wathi, “Lina lingabalapha phansi; mina ngivela ngaphezulu. Lingabomhlaba; kangisuye owalo umhlaba.

UJesu waphendula wathi, “Ngilitshela iqiniso ukuthi u-Abhrahama engakabi khona, Mina Ngikhona!”

“Ngingumalusi olungileyo. Umalusi olungileyo unikela ukuphila kwakhe izimvu zakhe.

UJesu wathi kuye, “Mina ngiyikuvuka kwabafileyo lokuphila. Lowo okholwa kimi uzaphila, loba ezakufa;

UJesu waphendula wathi, “Mina ngiyiyo indlela  —  njalo ngiliqiniso lokuphila. Kakho ozayo kuBaba ngaphandle kwami. Aluba belingazi mina ngempela, belizamazi loBaba. Kusukela khathesi, selimazi njalo selimbonile.”

Kodwa uMeluleki, uMoya ONgcwele, uBaba azamthumela ebizweni lami, uzalifundisa zonke izinto njalo uzalikhumbuza konke engikukhulumileyo kini.

Kakho olothando olukhulu kulaye onikela ukuphila kwakhe kubangane bakhe.

UJesu esethe, “Nginguye,” batsheda bawela phansi.

Basebekhuleka bathi, “Nkosi, uyayazi inhliziyo yalowo lalowo. Sitshengise ukuthi nguwuphi walaba ababili omkhethileyo

“Kodwa oPhezukonke kahlali ezindlini ezakhiwe ngabantu. Njengoba esitsho umphrofethi ukuthi: “ ‘Izulu liyisihlalo sami sobukhosi, umhlaba uyisenabelo sami. Lizangakhela ndlu bani? kutsho iNkosi. Kumbe izaba ngaphi indawo yami yokuphumula na?

“UNkulunkulu owenza umhlaba lakho konke okukuwo uyiNkosi yezulu lomhlaba, njalo kahlali emathempelini akhiwe ngezandla.

Ulaka lukaNkulunkulu luyabonakaliswa luvela ezulwini kukho konke ukungakhonzwa kukaNkulunkulu kanye lobubi babantu abacindezela iqiniso ngobubi babo, ngoba okungazakala ngoNkulunkulu kusobala kubo. Ngoba kusukela ekudalweni komhlaba isimo sikaNkulunkulu esingabonakaliyo  —  amandla akhe angapheliyo kanye lobuNkulunkulu bakhe  —  sekubonakele ngokusobala, kuzwisiseka ngokwenziweyo, ukuze abantu bangabi lasizatho sokuzigeza.

Kodwa uNkulunkulu ubonakalisa uthando lwakhe kithi ngalokhu: Siseseyizoni, uKhristu wasifela.

Ngoba ngiyakholwa ukuthi loba yikufa kumbe ukuphila, loba yizingilosi kumbe amadimoni, loba likhathesi kumbe isikhathi esizayo, loba kungamandla bani, loba kuyikuphakama kumbe ukutshona, loba olunye ulutho kukho konke okudaliweyo, akuyikusehlukanisa lothando lukaNkulunkulu olukuKhristu uJesu iNkosi yethu.

Yeka ukuzika kwenotho yenhlakanipho kanye lokwazi kukaNkulunkulu! Yeka ukwahlulela kwakhe okungeke kuhlolwe, kanye lezindlela zakhe ezingeke zilandelwe! “Ngubani owake wayazi ingqondo yeNkosi na? Loba owake waba ngumcebisi wayo na?” “Ngubani owake wanika uNkulunkulu ulutho ukuba uNkulunkulu aluhlawule na?” Ngoba izinto zonke zivela kuye langaye njalo futhi zikuye. Udumo kalube kuye nini lanini! Ameni.

ukuze ukukholwa kwenu kungeyami ekuhlakanipheni kwabantu, kodwa emandleni kaNkulunkulu.

Ngoba umbuso kaNkulunkulu kawusindaba yokukhuluma kodwa eyamandla.

kodwa kithi kuloNkulunkulu oyedwa kuphela, uYise, okwavela kuye izinto zonke njalo okunguye esimphilelayo; njalo kuleNkosi eyodwa kuphela, uJesu Khristu, ozinto zonke zeza ngaye njalo esiphila ngaye.

awasebenzisa kuKhristu emvusa kwabafileyo emhlalisa esandleni sakhe sokunene ebukhosini basezulwini, ngaphezu kokubusa konke lobukhosi, lamandla kanye lombuso, lamabizo wonke angatshiwo, kungasikho ngalesisikhathi kuphela kodwa lakuleso esizayo. UNkulunkulu wabeka izinto zonke ngaphansi kwezinyawo zakhe wamkhetha ukuba abe yinhloko yezinto zonke ebandleni, lona elingumzimba wakhe, ukuphelela kwakhe yena ophelelisa izinto zonke ngezindlela zonke.

Kodwa ngenxa yothando lwakhe olukhulu kithi, uNkulunkulu olesihawu esikhulu,

Ngoba ngaye sobabili siyafinyelela kuYise ngoMoya munye.

uNkulunkulu munye uYise wabo bonke, ophezu kwabo bonke, ongabo bonke njalo okubo bonke.

Njalo lingamdabukisi uMoya oNgcwele kaNkulunkulu, elabekwa ngaye uphawu lwelanga lokuhlengwa.

Ngakho-ke uNkulunkulu wamphakamisela endaweni ephezulu kakhulu wamnika ibizo elingaphezu kwamabizo wonke, ukuba amadolo wonke aguqe ebizweni likaJesu, ezulwini lasemhlabeni kanye langaphansi komhlaba, lezindimi zonke zivume ukuthi uJesu Khristu uyiNkosi, kube ludumo lukaNkulunkulu uYise.

Yona iyisifanekiso sikaNkulunkulu ongabonakaliyo, izibulo kukho konke okwadalwayo. Ngoba izinto zonke zadalwa ngayo: izinto ezisezulwini lezisemhlabeni, ezibonakalayo lezingabonakaliyo, loba kuyizihlalo zobukhosi kumbe amandla loba ababusi kumbe abaphathi; izinto zonke zadalwa ngayo zidalelwa yona. Yona iphambi kwezinto zonke, njalo kuyo izinto zonke zibambene. Iyinhloko yomzimba, ibandla; iyikuqala lezibulo elivela kwabafileyo ukuze ibe lobukhosi ezintweni zonke. Ngoba uNkulunkulu wathokoza ukuba ukuphelela kwakhe kube kuyo,

Ngoba konke ukuphelela kobuNkulunkulu kuhlezi kuKhristu ngesimo somzimba, njalo lina lilakho lokhukuphelela kuKhristu oyinhloko yamandla wonke kanye lokubusa konke.

Manje, kuyo iNkosi yaphakade, engafiyo, engabonakaliyo, uNkulunkulu yedwa, akube kuye udumo lenkazimulo kuze kube nini lanini. Ameni.

onguye kuphela ongafiyo lohlala ekukhanyeni okungafinyelelekiyo, okungekho owake wambona loba ongambona. Udumo lamandla akube kuye kuze kube laphakade. Ameni.

Kudala uNkulunkulu wakhuluma kubokhokho ngabaphrofethi ezikhathini ezinengi langezindlela ezehlukeneyo, kodwa ngalezizinsuku zokucina ukhulume kithi ngeNdodana yakhe, ayibeka ukuba yindlalifa yezinto zonke, yona adala ngayo izulu lomhlaba. INdodana iyikubenyezela kwenkazimulo kaNkulunkulu kanye lesifanekiso uqobo sokuba nguye kwakhe, iqinisa izinto zonke ngelizwi layo elilamandla. Emva kokuba isidlinzekele ukuhlanjululwa kwezono, yahlala phansi ngakwesokudla sobuKhosi ezulwini.

Kodwa ngeNdodana uthi, “Isihlalo sakho sobukhosi, O Nkulunkulu, sizakuba khona kuze kube nininini, lokulunga kuzakuba yintonga yombuso wakho.

Kukho konke okudaliweyo akulalutho olufihlakeleyo emehlweni kaNkulunkulu. Konke kwambuliwe kwabekwa obala phambi kwamehlo akhe yena okumele sizibike kuye.

ngoba uNkulunkulu wethu ungumlilo oqothulayo.

UJesu Khristu uyafana izolo lalamhla kanye lanininini.

Zonke izipho ezinhle lezipheleleyo zivela phezulu, zehlele phansi zivela kuYise wezibane zasezulwini, ongaguquki njengemithunzi etshudukayo.

Uyakholwa ukuthi kuloNkulunkulu oyedwa. Kulungile! Lamadimoni ayakukholwa lokhu  —  njalo ayathuthumela.

oseye ezulwini njalo usesandleni sokunene sikaNkulunkulu  —  lezingilosi, leziphathamandla kanye lezikhulu ekuzehliseni kuye.

Ngoba wamukela udumo lenkazimulo kuNkulunkulu uBaba lapho ilizwi lafika kuye livela eNkazimulweni yoBukhosi, lisithi, “Le yiNdodana yami engiyithandayo; ngiyathokoza kakhulu ngayo.”

Leli yilizwi esilizwe kuye esilitshumayela kini elokuthi: UNkulunkulu uyikukhanya; kuye akukho ubumnyama.

Lowo ongathandiyo kamazi uNkulunkulu, ngoba uNkulunkulu uluthando.

Ngakho siyazi njalo sithembe uthando uNkulunkulu alalo kithi. UNkulunkulu uluthando. Ohlala ethandweni, uhlala kuNkulunkulu, loNkulunkulu kuye.

Ngoba bathathu abafakazayo: uMoya, lamanzi kanye legazi; njalo bobathathu laba bayavumelana.

Siyakwazi lokuthi iNdodana kaNkulunkulu yeza yasinika ukuqedisisa, ukuze siyazi yona eqotho. Njalo sikuye yena oqotho  —  kanye laseNdodaneni yakhe uJesu Khristu. Yena unguNkulunkulu oqotho kanye lokuphila okulaphakade.

kuye onguNkulunkulu yedwa, uNkulunkulu uMsindisi wethu, kakube lenkazimulo, lobukhosi, lamandla kanye lobukhulu, ngoJesu Khristu iNkosi yethu, mandulo kwezikhathi zonke, khathesi kanye lanininini! Ameni.

“Mina nginguKuqala loKucina,” kutsho iNkosi uNkulunkulu, “okhona, lowayekhona, lozakuza, uSomandla.”

“Ingilosi yebandla laseSadisi ilobele uthi: La ngamazwi akhe lowo ophethe omoya abayisikhombisa bakaNkulunkulu kanye lezinkanyezi eziyisikhombisa. Ngiyazazi izenzo zakho; ulodumo lokuba ngophilayo, kodwa ufile.

Khonokho nje ngahle ngehlelwa nguMoya, kwathi phambi kwami ngabona isihlalo sobukhosi ezulwini kulomuntu owayehlezi kuso. Lowo owayehlezi lapho wayefana lejaspa lekhaneliya. Umchilo wamakhosikazi owawufana le-emaralidi wawuzingeleze isihlalo sobukhosi. Kwakulezinye izihlalo zobukhosi ezingamatshumi amabili lane ezazizingeleze isihlalo sobukhosi leso, kuzo kuhlezi abadala abangamatshumi amabili lane. Babegqoke okumhlophe njalo belemiqhele yegolide emakhanda abo. Esihlalweni sobukhosi kwaba lokuphazima kombane, lokundindizela kanye lokukhwaza kwezulu. Phambi kwesihlalo sobukhosi kwakuvutha izibane eziyisikhombisa. Lezi zazingomoya abayisikhombisa bakaNkulunkulu. Phambi kwesihlalo futhi kwakulokwakungathi lulwandle lwengilazi, kucwebile njengelitshe elikhazimulayo. Phakathi, emaceleni wonke esihlalo sobukhosi, kwakulezidalwa ezine eziphilayo, zigcwele amehlo phambili langemuva. Isidalwa sakuqala esiphilayo sasinjengesilwane, esesibili sinjengenkabi, esesithathu sasilobuso obunjengobomuntu, esesine sasinjengokhozi oluphaphayo. Esinye lesinye salezozidalwa eziphilayo sasilezimpiko eziyisithupha njalo sigcwele amehlo macele wonke, kanye langaphansi kwezimpiko. Emini lebusuku kazizange zithule ukuthi: “Ingcwele, ingcwele, ingcwele iNkosi uNkulunkulu uSomandla, owayekhona, okhona, njalo ozakuza.” Kuthi lapho izidalwa eziphilayo zimdumisa, zimhlonipha njalo zimbonga lowo ohleziyo esihlalweni sobukhosi njalo ophila kuze kube nininini, abadala abangamatshumi amabili lane bawela phansi phambi kwakhe ohlezi esihlalweni sobukhosi, bamkhonze yena ophila kuze kube nininini. Babeka imiqhele yabo phambi kwesihlalo sobukhosi bathi: “Ufanele, Nkosi yethu loNkulunkulu wethu, ukwamukela udumo lenhlonipho kanye lamandla, ngoba wena wadala izinto zonke, njalo zadalwa ngentando yakho njalo zilabo ubukhona bazo.”

Ngabona iWundlu, kukhanya angathi lalibulewe, limi ngaphakathi kwesihlalo sobukhosi, lizingelezwe yizidalwa eziphilayo ezine labadala. Lalilezimpondo eziyisikhombisa lamehlo ayisikhombisa, okungomoya abayisikhombisa baka-Nkulunkulu abathunywe emhlabeni wonke.

Ngezwa izidalwa zonke ezulwini lasemhlabeni langaphansi komhlaba laselwandle lakho konke okukukho, kuhlabela kusithi: “Kuye ohlezi esihlalweni sobukhosi lakulo iWundlu kakube lenhlonipho lodumo lenkazimulo kanye lamandla kuze kube nininini!”

Ngelizwi elikhulu yathi, “Mesabeni uNkulunkulu limdumise, ngoba isikhathi sokwahlulela kwakhe sesifikile. Mkhonzeni yena owadala amazulu, lomhlaba, lolwandle kanye lemithombo yamanzi.”

Ngabuya ngezwa okwakungathi lixuku elikhulu, kunjengokuhlokoma kwamanzi agelezayo lanjengokukhwaza kwezulu besithi: “Haleluya! Ngoba iNkosi yethu uNkulunkulu uSomandla uyabusa.

Esambathweni sakhe lasemlenzeni wakhe kulotshwe ibizo leli elithi: INKOSI YAMAKHOSI LOMBUSI WABABUSI.

Kangibonanga thempeli edolobheni, ngoba iNkosi uNkulunkulu uSomandla leWundlu balithempeli lalo. Idolobho kalisweli langa loba inyanga yokukhanyisa kulo, ngoba inkazimulo kaNkulunkulu ilinika ukukhanya, leWundlu liyisibane salo.

Ngingu-Alfa lo-Omega, ukuQala lokuCina, iSiqalo leSicino.