02 – O le Atua

Na faia e le Atua le lagi ma le lalolagi i le amataga.

O le iva sefulu ma le iva o tausaga o Aperamo, na faaali mai ai Ieova ia Aperamo, ua faapea mai foi ia te ia, O a‘u o le Atua e o‘u le malosi uma lava; ia e savali i o‘u luma, ma ia sao lau amio.

Ua fai atu Mose i le Atua, Faauta, pe a a‘u alu i le fanauga a Isaraelu, ma a‘u fai atu ia i latou, Ua auina mai a‘u ia te outou e le Atua o outou tamā; ona latou fai mai lea ia te au, O ai ea lona suafa? Se a ea sa‘u e fai atu ai ia te i latou? Ona fetalai mai lea o le Atua ia Mose, O A‘U O LĒ OLA, O LOO OLA LAVA; ua ia fetalai mai foi, E te fai atu i le fanauga a Isaraelu, ia faapea O A‘U O LĒ OLA, O ia na auina mai a‘u ia te outou. Ua toe fetalai mai foi le Atua ia Mose, Ia faapea ona e fai atu i le fanauga a Isaraelu, Ua auina mai a‘u ia te outou e Ieova, le Atua o outou tamā, o le Atua o Aperaamo, o le Atua o Isaako, o le Atua foi o Iakopo, o lo‘u igoa lena e faavavau, o la‘u faamanatuga lena i lea tupulaga ma lea tupulaga.

O Ioa, o lo‘u malosi ia, ma la‘u pese, ua fai foi o ia mo‘u olataga; o lo‘u Atua lenei, ou te faaneenee i ai; o le Atua o lo‘u tamā, ou te vivii lava ia te ia. O Ieova, o le toa lava ia, o Ieova o lona suafa lea.

Ieova e, ua mamalu lou aao taumatau i le malosi; Ieova e, o lou aao taumatau ua nutipalaina ai le ua ita mai.

Ua afio ane foi Ieova i ona luma, ma na‘ta‘u mai, O Ieova, o Ieova, o le Atua alofa mutimutivale ma le alofa fua, e telegese lona toasa, a e tele le alofa ma le faamaoni; o lō tausi le alofa e oo atu i afe o tupulaga; o lē faamagalo foi i le amioletonu ma le solitulafono ma le agasala, a e le faasaoina lava e ia o e agasala; a e taui atu e ia le agasala a mātua i a latou fanau ma le fanau a latou fanau, e oo i le tolu ma le fa o tupulaga.

Auā e te le ifo i se tasi atua; auā o Ieova, o le Fuā, o lona lea suafa, o le Atua fuā lava o ia.

a e peitai, o loo ola a‘u, e faatumuina lava le lalolagi uma lava i le mamalu o Ieova;

E le se tagata le Atua e talapepelo ai o ia, po o se atalii o se tagata e salamo ai o ia; ua fetalai mai o ia, na te le faia ea? Ua fetalai mai foi o ia, na te le faataunuuina ea?

Auā o Ieova lou Atua o le afi maamaai ia, o le Atua fuā ia.

Ua faailoaina atu ia te oe ina ia e iloa, o Ieova o ia lava le Atua, e leai se tasi na o ia lava. Ua na tŭlei mai lona siufofoga mai le lagi ia lagona e oe, ina ia a‘oa‘o mai o ia ia te oe; na ia faailoa mai foi ia te oe lana afi tele i le lalolagi, na e faalogologo foi i ana afioga ai totonu o le afi.

Isaraelu e, faalogologo mai ia, o Ieova lo tatou Atua, o Ieova e toatasi lava ia.

Ia e iloa foi o Ieova lou Atua o le Atua lava ia, o le Atua faamaoni, o le na te tausi i le feagaiga atoa ma le alofa i e alolofa atu ia te ia ma tausiusi i ana poloaiga, e oo lava i le afe o tupulaga; a e tauia e ia o e ‘ino‘ino ia te ia i o latou lava luma, ia faaumatia i latou; e le faatuai o ia i lē ‘ino‘ino ia te ia, a e taui atu ia te ia i ona lava luma.

Auā o Ieova lo outou Atua o le Atua o atua ia, o le Alii o alii, o le Atua silisili, e mamana o ia ma le matautia, o le na te le faailogaina tagata,

O le Papa, e sao lava lana galuega; auā e tonu ona ala uma lava; o le Atua faamaoni, e le o ia te ia se amioletonu, o le amiotonu ma le amio sa‘o lava ia.

O le mea e te nofo ai o le Atua o le faavavau lea; o i ou lalo foi aao o le faavavau; e tulia foi e ia i ou luma le ua ita mai; na te fetalai mai foi, Ia e faaumatia i latou.

E leai sē paia e tusa ma Ieova; auā ua leai se tasi ua na o oe; e leai foi se papa e tusa ma lo tatou Atua.

Pe moni ea, e afio le Atua i le lalolagi? Faauta, o le lagi ma le lagi o lagi, e le ofi ai oe, e le atili ai ea ona ē le ofi i lenei fale ua ou faia?

A ua alofa Ieova ia te i latou, ua alofa mutimuti vale mai foi ia te i latou, ua na silasila mai foi ia te i latou ona o lana feagaiga ma Aperaamo, ma Isaako, ma Iakopo; e lei finagalo foi e faauma ia te i latou, e lei lafoai foi ia te i latou ai ona luma i ia ona po.

Vivii atu outou ia Ieova; auā e lelei lava o ia; auā e faavavau lava lona alofa.

O oe foi Solomona e, lo‘u atalii, ia iloa e oe le Atua o lou tamā, ma auauna ia te ia ma le loto atoa, ma le loto fiafia; auā e suesue e Ieova o loto uma, ma ua silafia o mafaufau uma o manatu; afai e te saili atu ia te ia, ona e maua ai lea o ia; a e afai e te tuua o ia, ona tuulafoaiina lea o oe e ia e faavavau.

Ieova e, e ou le silisili ese, ma le malosi, ma le matagofie, ma le mamalu, ma le malualii; auā o ia te oe mea uma o i le lagi ma le lalolagi; Ieova e, e ou le malo, o faasilisili oe e silisili i mea uma lava. Mai ia te oe le oloa ma le mamalu, o oe e te pule i mea uma lava; o i ai foi i lou aao le mamana ma le malosi, o ia te oe foi e faateleina ma faamalosia tagata uma lava.

le Atua o matou tamā, e le o le Atua ea oe i le lagi? E te le pule ea oe i malo uma o nuu ese? E le o i lou aao ea le mana ma le malosi, e le mafaia e se tasi ona tetee atu ia te oe?

Ieova e, le Atua o Isaraelu, o oe o le amiotonu; auā ua faatotoeina i matou, ua faasaoina, e pei ona fai i le aso nei; faauta, o i ou luma i matou ma a matou agasala; auā e le mafai ona tutu i matou i ou luma ona o lenei mea.

O oe, na o oe lava o Ieova; na e faia le lagi o le lagi o lagi, ma ‘au uma o i ai, o le lalolagi ma mea uma o i ai, o le sami ma mea uma o i ai, ua e faaola foi ia te i latou uma; ua ifo foi ia te oe ‘au a le lagi.

O le suesue e te maua ai ea le Atua? E te maua atoatoa ai ea Le e ona le malosi uma lava?

Ua ou iloa e te mafaia mea uma, e le mafai foi ona vaoia se mea e te finagalo i ai.

E soisoi le o afio i le lagi; e tauemu le Alii ia te i latou.

O le Atua, o le faamasino amiotonu o ia; ua toasa foi le Atua i aso uma lava i le ua amio leaga.

Ua fai ifo le tagata valea i lona loto, E leai se Atua. Ua leaga lava i latou; ua inosia a latou amioga; e leai se tasi ua amio lelei. O loo silasila mai Ieova mai le lagi i le fanau a tagata, ina ia silafia pe i ai se tasi ua poto, se ua saili i le Atua. Ua latou ‘alo‘alo ese uma lava, ua leaga faatasi i latou; e leai se tasi ua amio lelei, e leai lava se tasi.

Ia iloga mai lou alofa, o oe le faaola o e faatuatua ia te oe i e tautetee i lou aao taumatau.

Ua tala mai e le lagi le mamalu o le Atua; ua faaalia foi e le va nimonimo le galuega a ona aao.

O Ieova, o lo‘u leoleo mamoe o ia; e leai se mea ou te mativa ai.

E malosi le siufofoga o Ieova; e mamalu le siufofoga o Ieova.

O loo silasila mai Ieova mai le lagi; e silafia e ia le fanau uma a tagata. O loo matuā silasila mai o ia mai le mea o loo afio ai o ia ia i latou uma o e nonofo i le lalolagi.

Ua manatunatu le tagata amio leaga i se mea e leaga ai le tagata amiotonu; ua lilivau foi ona nifo ia te ia. E soisoi le Alii ia te ia; auā ua na silafia o le a sau lona aso.

Auā o le Atua, o le Tupu ia o le lalolagi atoa; ina pepese atu ia ma le atamai. Ua fai ma tupu le Atua i nuu ese; o loo tietie le Atua i lona nofoālii paia.

Aua e te lafoaiina a‘u i ou luma; aua foi e te aveeseina lou Agaga Paia ia te au.

Ieova e, ia e tali mai ia te au, auā e lelei lou alofa mai; ia e liuliu alo mai ia te au, e pei ona tele o lou alofa mutimuti vale.

Ia viia lava lona suafa mamalu e faavavau lava; ia tumu foi le lalolagi uma i lona mamalu; Amene ma Amene.

Auā le Alii e, o oe e lelei, ma ua e faamagalo sala; e tele foi lou alofa ia te i latou uma o e valaau atu ia te oe.

Le Alii e, e leai lava so le vao atua e tusa ma oe; e leai foi se galuega e tusa ma au galuega. O nuu uma na e faia latou te o mai, ma latou ifo atu i ou luma, le Alii e; ma latou faaneenee atu i lou suafa. Auā e sili oe, o loo e fai foi vavega; o le Atua oe, na o oe lava.

A o oe le Alii e, o le Atua oe lē alofa mutimuti vale ma lē alofa fua, o lē telegese lona toasa, a e tele le alofa ma le faamaoni.

O le amiotonu ma le faamasinoga o loo tumau ai lou nofoālii; o le alofa ma le faamaoni la te muamua atu i ou luma.

A o lei fanaua mai mauga, e lei faia foi e oe le lalolagi ma le atu laulau, o le Atua oe mai le vavau e oo i le faavavau.

Auā o oe Ieova e, e sili lava oe i le lalolagi uma; e matuā silisili ese lava oe i atua uma lava.

Ua fai Ieova ma tupu, ia gatete nuu; o loo tietie o ia i le va o kerupi, ia faagaeetia le lalolagi.

Ia outou faaneenee atu ia Ieova lo tatou Atua, ia outou ifo atu foi i lona mauga paia; auā e paia lava Ieova lo tatou Atua.

Auā e lelei Ieova; e faavavau lava lona alofa; e oo atu lava lona faamaoni i lea tupulaga ma lea tupulaga.

O anamua na e faavaeina ai le lalolagi; o le lagi foi o le galuega lea a ou aao. E faaumatia ia mea, a o oe, e te tumau pea; e pala ia mea uma e pei o le ofu tele, e te liua ia e pei o le ofu, ona liua lava lea; a o oe, e faapea lava pea oe; e le iu lava ou tausaga.

E alofa mutimuti vale ma alofa fua mai Ieova; e tele gese lona toasa, a e tele lona alofa.

Auā e pei ona maualuga o le lagi i le lalolagi, e faapea ona tele o lona alofa i e matatau ia te ia. E pei ona vava mamao o sasae ma sisifo, e faapea lava ona faamamao e ia ia i tatou o a tatou solitulafono.

A o le alofa o Ieova, mai le vavau lava lea, e oo i le faavavau i e matatau ia te ia; o lana amiotonu foi e oo i le fanau a latou fanau, i e tausi i lana feagaiga, o e manatua foi ana poloaiga e fai ai. Ua faatumauina e Ieova o lona nofoālii i le lagi; ua pule aoao foi lona malo.

Lo‘u agaga e, ia e faamanū atu ia Ieova; Ieova e, lo‘u Atua, e matuā silisili lava oe, e ofu oe i le viiga ma le matagofie. O loo e pulupulu i le malamalama pei o se ie pulupulu; o loo e fofola le lagi faapei o se ie puipui.

Vivii atu ia outou ia Ieova, auā e lelei lava o ia, auā e faavavau lava lona alofa.

Ua sili lava Ieova i luga o nuu ese uma lava, o lona mamalu ua sili i le lagi.

A o lo matou Atua, o i le lagi lava ia; ua faia e ia o mea uma ua ia finagalo i ai.

O mea uma lava e finagalo i ai Ieova, e faia lava e ia i le lagi atoa ma le lalolagi, o le sami ma mea loloto uma lava.

Ia outou vivii atu ia Ieova, auā e lelei o ia; auā e faavavau lava lona alofa.

Vivii atu outou i le Alii o alii; auā e faavavau lava lona alofa.

O le na faia le lagi i le poto; auā e faavavau lava lona alofa.

Ina vivii atu ia outou i le Atua o le lagi; auā e faavavau lava lona alofa.

Ou te alu ea ifea ai lou Agaga? Ou te sola ifea ai ou luma? Afai ou te alu ae i le lagi, o i ai lava oe; afai ou te fofola so‘u moega i seoli, faauta, o i ai lava oe.

E silisili lava Ieova, e tusa ona matuā viia o ia; e le mafai ona suesueina lona silisili ese.

Ou te tautala atu i le matagofie o le viiga o lou mamalu, atoa ma au mea mamana;

E alofa fua mai ma alofa mutimuti vale mai Ieova; e telegese lona toasa, e tele foi lona alofa.

E amiotonu Ieova i ona ala uma; o loo alofa ia i ana mea uma lava na faia. E latalata mai Ieova ia i latou uma o e valaau ia te ia, o i latou uma o e valaau ia te ia ma le faamaoni.

o le na faia le lagi atoa ma le lalolagi, o le sami ma mea uma o i ai; o le na te tausia le faamaoni e faavavau. O le na te faia le faamasinoga mo e o sauaina; na te avatua le mea e ‘ai i e o fia aai; e tatala e Ieova i e ua noanoatia.

O loo faitaulia e ia le aofai e fetu; ua faaigoaina e ia o latou igoa uma lava. E silisili lava lo tatou Alii, e tele lona malosi; e le ma faamatalaina lona poto.

Ou te alofa atu ia i latou o e alofa mai ia te au; o e sailiili mai foi ia te au, latou te maua a‘u.

O loo i mea uma lava fofoga o Ieova; o loo matuā silasila i e amio leaga ma e amio lelei.

O ai ea ua alu ae i le lagi, ma toe ifoifo? O ai ea ua faapotopotoina le matagi i ona lima? O ai ea ua fusifusi vai i le ofu? O ai ea na faatuina tuluiga uma o le lalolagi? O ai ea lona igoa? o ai foi le igoa o lona atalii, pe afai ua e iloa?

Alu ia i totonu o le papa, ina lafi ia i le eleele, ona o le matautia o Ieova, ma lona mamalu silisili.

Sa valaau foi le tasi i le tasi, ua faapea ane, E paia, e paia, e paia Ieova o ‘au; ua tumu le lalolagi uma i lona mamalu.

A o Ieova o ‘au, ia paia o ia ia te outou, o ia lava tou te fefefe ai, o ia foi tou te matatau ai.

Auā ua fanau mai mo i tatou le tama, ua foaiina mai mo i tatou le atalii, e i lona ua le malo, e igoa foi o ia, o le Silisili ese, o le Faipule, o le Atua malosi, o le Tamā o le faavavau, o le Alii o le filemu.

E afio mau ia te ia le Agaga o Ieova; o le Agaga o le poto ma le mafaufau; o le agaga o le faatonuga ma le malosi; o le Agaga o le malamalama ma le mata‘u ia Ieova.

A e ui lava i lea e faatalitali Ieova ina ia alofa fua mai ia te outou; o le mea lea e tulai ai o ia e alofa ia te outou; auā o Ieova, o le Atua e faamasino tonu ia; amuia i latou uma o e faatalitali ia te ia.

Auā o Ieova o lo tatou faamasino ia, o Ieova o lo tatou fai tulafono, o Ieova o lo tatou tupu, o ia lava e faaola ia te i tatou.

O atu nuu uma peiseai ua leai i ona luma; ua matuā leai lava i latou i lona manatu, ma ua matuā faatauvaa lava. O lenei, tou te faatusa le Atua ia te ai? se a foi se faatusa tou te faatusaina ai o ia?

O ia lē tietie i luga o le faataaliolio o le lalolagi, a o e nonofo ai e tutusa i latou ma sē; o ia lē fofola le lagi e pei o se ie manifinifi; na te faamafolafolaina ai foi e pei o se fale ie e nofo ai.

E te le iloa ea? E te lei faalogo ai ea? O le Atua o le vavau, o Ieova o le na faia tuluiga o le lalolagi, e le vaivai o ia, e le tigaina foi, e le masuesueina lona mafaufau.

O a‘u o Ieova, o lo‘u igoa lea; o lo‘u mamalu foi ou te le avatua lea i se tasi, ma lo‘u viiga ou te le avatua i tupua ua ta.

Ua fetalai mai Ieova, O outou o a‘u molimau, ma la‘u auauna o le na a‘u filifilia; ina ia outou iloa, ma ia outou faatuatua mai ia te au, ma ia outou lagona, o a‘u lava o ia; e leai se atua na gaosia e muamua ia te au; e leai foi se tasi e mulimuli ia te au. O a‘u o a‘u lava o Ieova; a e leai se faaola ua na.

O loo faapea ona fetalai mai o Ieova, o le Tupu o Isaraelu, o le na faatauina foi o ia, o Ieova o ‘au; o a‘u lē muamua, o a‘u foi lē mulimuli; a e leai se atua, ua na o a‘u lava.

O loo faapea ona fetalai mai o Ieova le na faatau ia te oe, o le na faatupuina foi oe i le manava; o a‘u o Ieova le na faia mea uma; o lē faamafolafola le lagi na o a‘u lava; o a‘u lava o lē fofolaina le lalolagi;

ina ia latou iloa, e afua mai i le mea e alu ae ai le la, e oo i le mea e alu ifo ai, e leai se tasi na o a‘u; o a‘u o Ieova, a e leai lava se tasi; o a‘u lē faia le malamalama, ma faatupuina le pouliuli; o lē faia le manuia, ma faatupuina le mala; o a‘u o Ieova, o lē faia ia mea uma.

Auā o loo faapea ona fetalai mai o Ieova, o le na faia le lagi; o ia lava o le Atua; o le tufuga o le na faia le lalolagi; o ia na faatumauina; na ia le faia fua, na ia faia ina ia āina, o a‘u o Ieova, a e leai se tasi.

Faaali mai ia, ma ia outou faalatalata mai; ia filifili faatasi foi i latou. O ai ea ua na faailoa mai lenei mea mai anamua, ua faaalia mai talu anamua? E le o a‘u ea o Ieova? e leai se tasi atua, ua na o a‘u lava; o le Atua amiotonu, i le ma le Faaola; e leai se tasi na o a‘u. Liliu mai ia ia te au, tou te ola ai, o outou tuluiga uma o le lalolagi; auā o a‘u o le Atua, a e leai lava se tasi.

Ia outou manatunatu i mea muamua talu mai le vavau; auā o a‘u o le Atua, e leai lava se tasi; o le Atua, e leai se ma te tutusa; o loo faaali talu mai le amataga o mea e mulimuli; mai anamua foi o mea ua le faia; o loo fai ane, E tu la‘u pule, ou te faia foi mea uma ou te loto i ai.

Auā o le na faia oe o lau tane lea, o Ieova o ‘au o lona igoa lea; o le na faatauina oe, o le Paia o Isaraelu lea; e ta‘ua o ia, O le Atua o le lalolagi uma.

Auā o o‘u manatu e le o outou manatu, o o‘u ala e le o outou ala, ua fetalai mai ai Ieova. Auā e pei ona sili ona maualuga o le lagi i le lalolagi, ua faapea ona sili ona maualuga o o‘u ala i o outou ala, ma o‘u manatu e sili i o outou manatu.

Auā o loo faapea ona fetalai mai o le ua Maualuga ma ua Silisili, o lē afio e faavavau, e paia lona suafa, Ou te nofo i le mea maualuga ma le paia, ma te nonofo foi ma le ua momomo ma ua maulalo lona loto, e faamafanafana i e ua loto maulalo, ma faamafanafanaina loto o e ua loto momomo.

O loo faapea ona fetalai mai o Ieova, O le lagi o lo‘u nofoa lea, o le lalolagi o le mea e tu ai ou vae lea; o ifea le fale tou te faia mo a‘u? o ifea foi le mea ou te malolo ai?

A o Ieova o le Atua moni ia, o ia lava le Atua soifua, ma le Tupu e faavavau; o lona toasa e gatete ai le lalolagi, e le lavā foi e nuu ona tali o lona toatamai.

Na faia e ia le lalolagi i lona mana, na faatumauina e ia le atu laulau i lona poto, na fofolaina foi e ia le lagi i lona faautauta.

O le mea lea, faauta, ou te faailoa atu ai ia te i latou, e atu tasi lava, ou te faailoa atu ia te i latou lo‘u lima ma lo‘u malosi; latou te iloa ai o Ieova o lo‘u igoa lea.

Pe mafai ea e se tagata ona lafi i mea lilo, ou te le iloa ai o ia? o loo fetalai mai ai Ieova. E le o tutumu ea le lagi ma le lalolagi ia te au? o loo fetalai mai ai Ieova.

Na faaali mai Ieova ia te au anamua, ua faapea mai, O le alofa e faavavau, ua ou alofa atu ai ia te oe; o le mea lea ua ou faafualoaina ai lo‘u alofa ia te oe.

E le toe a‘oa‘o atu foi le tagata i lē la te tuaoi, ma le tagata i lona uso, e faapea atu, Ia outou iloa Ieova; auā e iloa a‘u e i latou uma lava, o tagata nuu atoa ma alii, o loo fetalai mai ai Ieova; auā ou te faamagalo i a latou amio leaga, ma ou le toe manatua a latou agasala.

Aue! le Alii e Ieova, faauta, o oe na e faia le lagi ma le lalolagi i lou malosi tele, ma lou aao faaloaloa, e le faigata foi ia te oe se mea e tasi; ua e alofa i afe o tupulaga, ua e taui atu foi le amioletonu a tamā i fatafata o a latou fanau pe a mavae atu i latou; o le Atua sili, ma le malosi, o Ieova o ‘au, o lona suafa lea,

Faauta, o a‘u lava o Ieova, o le Atua o tagata uma; pe faigata ea ia te au se mea e tasi?

Ua fai atu Tanielu, ua faapea atu, Ia viia le suafa o le Atua e faavavau, e faavavau lava; auā e ona le poto ma le mana. O ia foi na te liua tausaga ma tau; e aveeseina e ia o tupu, e tofia foi e ia o tupu; e foaiina mai e ia le poto i e o popoto, ma le malamalama i e o iloa mafaufau. O ia na te faaalia mai mea loloto ma mea ua lilo; ua na silafia le mea o loo o i le pouliuli, o le malamalama foi la te mau faatasi ma ia.

Ta te osi sa ta feagaiga ma a‘u e faavavau; ta te osi sa ta feagaiga ma a‘u i le amiotonu, ma le faamasinoga, ma le agalelei, ma le alofa.

O Ieova lava o le Atua o ‘au; o Ieova o lona suafa lea e manatua ai o ia.

Auā faauta mai, o le na faia mauga, ma na faia le matagi, ma ua faailoaina atu i le tagata lona manatu, o le na te liua le taeao i le pouliuli, o lē savali i luga o mea maualuluga o le lalolagi, o Ieova, o le Atua o ‘au, o lona suafa lea.

O Ieova o le Atua fuā ia, o lē taui ma sui, o Ieova o lē taui ma sui ma lē matuā toasa; e taui ma sui Ieova i e ita ia te ia, o loo faamoemoe foi o ia i e ua fai o ia ma o latou fili. O Ieova e tele gese lona toasa, a e tele lona mana; na te le faasaoina lava e ua agasala; o Ieova o loo i ai lona ala i le asiosio ma le afā, o ao o le efuefu ia o ona aao.

Auā e tumu le lalolagi i le malamalama o le mamalu o Ieova, faapei ona ufitia o le iliti tai i le suāsami.

O Ieova lou Atua i totonu ia te oe o l? malosi ia; na te faaolaina; e olioli o ia ia te oe ma le fiafia; o lona alofa e le fetalai ai o ia; e olioli lava o ia ia te oe ma le ofo fiafia.

A ou te fai atu a‘u ia te outou, aua lava ne‘i tauto; aua le tauto i le lagi, auā o le nofoalii lea o le Atua; po o le lalolagi, auā o le mea e tu ai ona aao lea; po o Ierusalema, auā o le aai lea a le Tupu silisili.

O lenei, ia atoatoa ona lelei o la outou amio, e pei o lo outou Tamā o i le lagi e atoatoa ona lelei o ia.

O lenei, ia faapea outou ona tatalo, Lo matou Tamā e, o i le lagi, ia paia lou suafa.

Aua foi e te ta‘ita‘iina i matou i le tofotofoga; a ia e laveai ia i matou ai le leaga. Auā e ou le malo, ma le mana, atoa ma le viiga, e faavavau lava, Amene.

O lea lava itu aso ua fetalai atu ai Iesu, ua faapea atu, Ou te faafetai ia te oe, lo‘u Tamā e, le Alii o le lagi ma le lalolagi, ina ua e nanā ia mea i e popoto ma e atamamai, a ua faaalia atu ia mea i tama valevale.

Ona silasila atu ai lea o Iesu, ua faapea atu ia te i latou, E le mafaia e tagata lenei mea, a e mafaia mea uma e le Atua.

O a‘u nei o le Atua o Aperaamo, o le Atua foi o Isaako, o le Atua foi o Iakopo? o le Atua e le se Atua ia o e ua oti, a o e ola.

Pe a sau le Atalii o le tagata i lona mamalu, ma le au agelu paia uma faatasi ma ia, ona tietie ai lea o ia i lona nofoālii mamalu; e faapotopotoina foi i ona luma o nuu uma lava; ona tuueseeseina lea o i latou e ia, e pei o le leoleo mamoe ona tuueseeseina o mamoe ma ‘oti;

Ona maliu ane ai lea o Iesu, ua fetalai atu ia te i latou, ua faapea atu, Ua tuuina mai ia te au le pule uma lava i le lagi ma le lalolagi. O lenei, ia outou o atu e fai nuu uma lava ma soo, ma papatiso atu ia te i latou i le suafa o le Tamā, ma le Atalii, ma le Agaga Paia;

A ua silasila atu Iesu ia te i latou, ua faapea atu, E le mafaia e tagata, na o le Atua; auā e mafaia mea uma e le Atua.

Ona tali atu lea o Iesu ia te ia, E sili lenei i poloaiga uma, Faalogo mai ia Isaraelu e; o le Alii lo tatou Atua, o le Alii e toatasi ia.

Ona fetalai atu lea o Iesu, O a‘u lava lea; tou te iloa foi le Atalii o le tagata e nofo i le itu taumatau o Le e ona le mana, e sau foi o ia i ao o le lagi.

Ua foi ae Iesu mai Ioritana, ua tumu o ia i le Agaga Paia, ona ave lea o ia e le Agaga i le vao,

O lenei, ia mutimuti vale lo outou alofa, pei ona alofa mutimuti vale o lo outou Tamā.

O lea lava itu aso ua matuā fiafia ai le finagalo o Iesu, ua faapea atu. Ou te faafetai ia te oe lo‘u Tamā e, o le Alii o le lagi ma le lalolagi, ina ua e nanā ia mea i e popoto ma e atamamai, a ua faaalia atu ia mea i tama valevale; o lea lava lo‘u Tamā, auā o lou finagalo lava lea.

Ua fetalai atu ia ia te i latou, Pe a outou tatalo, ia outou fai atu, Lo matou Tamā e o i le lagi, ia paia lou suafa. Ia oo mai lou malo. Ia faia lou finagalo i le lalolagi, e pei ona faia i le lagi.

Sa i le amataga, le Lokou, sa i le Atua le Lokou, o le Atua foi le Lokou. O ia lava sa i le Atua i le amataga. Na ia faia mea uma lava; e leai foi se mea e tasi na faia e lei faia e ia.

Auā ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau.

E alofa le Tamā ile Alo, ua tuu mai foi mea uma i lona aao.

O le Atua o le agaga lava ia; o e tapuai ia te ia, e tatau ona tapuai atu ai i le agaga ma le faamaoni.

Ua fetalai atu Iesu ia te i latou, O a‘u nei le areto o le ola; o lē sau ia te au, e le laina lava ia; o lē faatuatua foi ia te au, e le toe fia inu lava ia.

O a‘u o le areto o le ola.

O a‘u le areto ola na alu ifo mai le lagi; pe a ‘ai se tasi i lenei areto ona ola ai lea o ia e faavavau. O le areto foi ou te avatua, o lo‘u tino lea, ou te avatua ma ola o le lalolagi.

Ona toe fetalai atu lea o Iesu ia te i latou, ua faapea atu, O a‘u nei o le malamalama o le lalolagi; o lē mulimuli mai ia te au, e le savali o ia i le pouliuli, a e ia te ia le malamalama o le ola.

O a‘u nei lē molimau ia te au, o loo molimau foi ia te au le Tamā ua auina mai a‘u.

Ua fetalai atu foi o ia ia te i latou. O outou o lalo nei, o a‘u mai lugā; o outou e ō le lalolagi nei, e le so le lalolagi a‘u.

Ua faapea mai Iesu ia te i latou, E moni, e moni, ou te fai atu ia te outou, sa a‘u i ai, a o lei leai se Aperaamo.

O a‘u le leoleo mamoe lelei; e tuu atu e le leoleo mamoe lelei o lona ola e sui a‘i mamoe.

Ua fetalai atu Iesu ia te ia, O a‘u nei o le toe tu ma le ola; o lē faatuatua mai ia te au, e ui lava ina oti, a e ola lava ia.

Ua fetalai atu Iesu ia te ia. O a‘u nei le ala, ma le upu moni, ma le ola; e le alu atu lava se tasi i le Tamā, pe a le ui mai ia te au. Ana iloa e outou o a‘u, po ua iloa foi e outou lo‘u Tamā; e amata nei foi ona iloa o ia e outou; tou te vaai foi ia te ia.

A o le Fesoasoani, o le Agaga Paia lea, e auina mai e le Tamā i lo‘u igoa, o ia lava na te a‘oa‘o ia te outou i mea uma lava; e faamanatu mai foi o ia ia te outou i mea uma ua ou fai atu ai ia te outou.

E le sili lava le alofa o se tasi i lenei alofa, ia tuuina atu e se tasi lona ola e sui a‘i ana uo.

Ua faapea atu Iesu ia te i latou, O a‘u lenei; ona tuumuli ai lea o i latou, ua pauu foi i le eleele.

Ua tatalo foi i latou, ua faapea atu, Le Alii e, o oe o lē silafia loto o tagata uma lava, ia e faailoa mai po o ai so laua nei ua e filifilia,

A e peitai o le Silisili ese, e le afio o ia i malumalu e faia e lima, pei ona fai mai le perofeta, O le lagi o lo‘u nofoālii lea, o le lalolagi foi o le mea e tu ai o‘u vae lea; o loo faapea mai le Alii, pe faapefea se fale tou te faia mo a‘u? po o ifea se mea ou te nofo ai?

O le Atua na faia le lalolagi ma mea uma lava o i ai, ona o le Alii o ia o le lagi ma le lalolagi, e le afio o ia i malumalu e faia e lima;

Ua faaalia mai foi le toasa o le Atua mai le lagi i le amio faalematau ma le amio leaga uma lava a tagata, o e taofi i le upu moni ma le amioletonu. Auā o mea a le Atua e mafai ona iloa ua faaalia mai ia te i latou; auā ua faaalia mai e le Atua ia te i latou; auā o ana mea e le vaaia talu ona faia o le lalolagi, e vaaia lava ia i le mafaufau i mea na faia, o lona mana lava lea e faavavau ma lona Atua; o lea foi ua le mautali ai i latou.

a ua faaalitinoina mai e le Atua lona lava alofa ia te i tatou, ina ua maliu Keriso ma sui o i tatou, a o tatou agasala pea.

Auā ua ou mautinoa, e le mafaia e le oti, po o le ola, po o agelu, po o alii, po o e malolosi, po o mea i nei ona po, po o mea atali, po o le maualuga, po o le loloto, po o se tasi mea na faia, e le mafaia e ia mea ona faateaeseina mai i tatou i le alofa o le Atua, o loo ia Keriso Iesu lo tatou Alii.

Aue! le loloto o le tamaoaiga o le poto atoa ma le silafaga a le Atua. E le masuesueina ana faamasinoga; e le mafai foi ona iloa ona ala. Auā o ai ea se ua iloa le finagalo o le Alii? po o ai foi se ua pulega faatasi ma ia? po o ai se na muai avatua ni mea ia te ia, a e tauia mai ai ia te ia? Auā ua fua mai ia te ia, ma ua faia e ia, e iu atu foi ia te ia mea uma; ia ia te ia le viiga e faavavau lava. Amene.

ina ia le i ai lo outou faatuatua i le poto o tagata, a o le mana o le Atua.

Auā o le malo o le Atua e le o i le upu, a o le malosi.

a e peitai ua ia te i tatou le Atua e toatasi o le Tamā ia, e fua mai ia te ia mea uma, o i tatou foi ua fai mo ia; ma le Alii e toatasi o Iesu Keriso, ua faia e ia mea uma, o i tatou foi ua faia e ia.

na ia matuā galue ai ia Keriso, ina ua toe faatuina mai o ia nai e ua oti, ma faanofo ia te ia i lona itu taumatau i mea o i le lagi, e silisili lava i alii sili uma lava, ma faipule, ma e ua malolosi, ma alii, ma igoa uma lava e ta‘ua, e le gata i le olaga nei, a e oo foi i lē atali; ua ia tuu foi mea uma lava i lalo o ona vae, ma tuuina atu o ia e fai ma ulu o mea uma lava mo le ekalesia, o lona tino lea, o le tumu o le na te faatumuina mea uma lava i mea uma.

A o le Atua, ua i ai le faulai o le alofa, ona o lona lava alofa tele na ia alofa mai ai ia i tatou,

Auā ua faatau maua e i tatou uma ona o ia o le ta‘ita‘iga i le Tamā, e le Agaga e toatasi.

e tasi le Atua, o le Tamā foi lea o tagata uma lava, o lē pule i mea uma lava, o le ua i ai i mea uma lava, o loo i totonu foi ia te outou uma.

Aua foi tou te faatiga i le Agaga Paia o le Atua, ua faamaufaailogaina ai outou ia te ia seia oo i le aso e faaolaina ai.

O le mea lava lea ua matuā faaeaina ai o ia e le Atua, ma foaiina atu ai ia te ia o le suafa e silisili i suafa uma lava; ina ia tootuli o tulivae uma lava i le suafa o Iesu, o e o i le lagi, ma e o i le lalolagi, ma e o i lalo o le lalolagi; ma ia ta‘uta‘u atu e laulaufaiva uma lava o Iesu Keriso o le Alii lava ia, ia iu ina viia ai le Atua le Tamā.

o ia foi ua tusa ma le Atua e le vaaia, o le ulumatua o mea uma lava ua faia; auā na faia e ia o mea uma lava, o mea i le lagi ma mea i le lalolagi, o mea o vaaia ma mea e le o vaaia, o nofoālii, ma alii, ma alii sili, ma faipule; na faia e ia mea uma lava, na faia foi mo ia; o ia foi o le uluai o mea uma lava, o loo faatumauina foi mea uma lava ia te ia; o le ulu foi o ia o le tino, o le ekalesia lea; o le amataga foi o ia, o le ulumatua o e ua oti, ina ia fai o ia ma faasilisili i mea uma lava. Auā ua finagalo le Tamā ia mau i totonu ia te ia le tumu atoatoa;

auā o loo mau i totonu ia te ia le tumu uma lava o le itu Atua ua i lona tino; o loo ua faaatoatoaina foi outou ia te ia; o le ulu ia o alii sili uma lava atoa ma faipule;

O lenei, ia i ai i le Tupu o le vavau, o le o soifua pea lava, o le le o vaaia, o le Atua poto e toatasi, ia ia te ia le mamalu atoa ma le viiga e faavavau faavavau lava. Amene.

o loo na o ia o lē soifua pea lava, o lē afio i le malamalama e le masao i ai se tasi; e lei vaaia o ia e se tasi tagata, e le mafai foi ona vaai i ai; ia ia te ia le viiga ma le malosi e faavavau. Amene.

O le Atua, o le na fetalai mai anamua i o tatou tamā e le au perofeta, na auaua‘i mai i togafiti eseese, ua fetalai mai o ia ia i tatou i nei ona aso e gata ai e lona Alo, o le ua tofia e ia e fai mea uma lava mona tofi, na ia faia foi e ia mea uma; o ia o le pupula o lona mamalu ma ua matuā tusa lava ma ia, o loo o faatumauina e ia mea uma lava i lana afioga mana, na ia faamamāina e ia lava a tatou agasala, ona nofo ai lea o ia i le itu taumatau o lē Silisili ese o i lugā;

a ua faapea mai i le Alo, O lou nofoālii, le Atua e, faavavau faavavau lava lea; o le tootoo o lou malo, o le tootoo o le amiotonu lea.

e le lilo foi se tasi mea na faia i ona luma, a ua taatia fua ma ua aliali mai o mea uma lava i lana silafaga, tatou te ta‘u atu ia te ia a tatou amio.

Auā foi o lo tatou Atua o le afi maamaai ia

O Iesu Keriso e le liu lava ia o ananafi, ma le asō, e oo foi i le faavavau.

o mea lelei uma e foaifuaina mai, atoa ma mea alofa uma e atoatoa ona lelei, mai luga lava ia, e alu ifo mai le Tamā o malamalama, e le o ia te ia se mea faaletumau, po o sina liliu itiiti;

Ua e talitonu e toatasi lava le Atua; ua lelei lava lea; ua talitonu foi temoni ma latou tetemu.

o ia o loo i le itu taumatau o le Atua, ina ua afio ae o ia i le lagi, ua toilalo ia te ia o agelu, ma faipule, atoa ma ē malolosi.

Auā na maua e ia mai le Atua le Tamā o le mamalu ma le viiga, ina ua tŭlei mai ia te ia le siufofoga lava nai le mamalu silisili ese, ua faapea mai, O lo‘u Atalii pele lenei, ou te fiafia lava ia te ia.

O lenei foi le feau na matou faalogologo ai mai ia te ia, ua matou faailoa atu ai foi ia te outou, o le malamalama lava le Atua, a e leai lava se pouliuli o ia te ia.

O se le alofa ua le iloa e ia le Atua; auā o le Atua, o le alofa lava ia.

O i tatou foi, ua tatou iloa ma ua faatuatua i le alofa ua i le Atua ia te i tatou. O le Atua, o le alofa lava ia; o lē tumau i le alofa, ua tumau ia i totonu o le Atua, o le Atua foi o i totonu ia te ia.

Auā e toatolu o e molimau i le lagi, o le Tamā, ma le Lokou, atoa ma le Agaga Paia; o i latou nei foi e toatolu e toatasi lava ia. E tolu foi e molimau mai i le lalolagi, o le Agaga, ma le vai, atoa ma le toto; o lea tolu foi e auga atu ia i le mea e tasi.

Ua tatou iloa foi ua maliu mai le Alo o le Atua, ua ia foaiina mai foi le mafaufau ia te i tatou, ina ia tatou iloa ai loo moni, o i ai foi i tatou i loo moni, o i lona Alo o Iesu Keriso. O lenei lava le Atua moni, ma le soifua e faavavau.

ia i le Atua poto e toatasi o lo tatou Faaola, le viiga ma le mamalu, o le malosi ma le pule, i nei ona po, ma ia oo i le faavavau lava. Amene.

O a‘u le Alefa ma le Omeka, o le amataga ma le gataaga, ua fetalai mai ai le Alii, o loo soifua, na soifua foi, o le a afio mai, e ona le malosi uma lava.

Ia e tusi foi i le agelu a le ekalesia, o i Sarataisa, O mea nei ua fai mai ai le ua i ai Agaga e toafitu o le Atua, ma fetu e fitu, Ua ou iloa au galuega, ua ia te oe le igoa ua e ola, a ua e oti.

Ona a‘u i le Agaga loa lea; faauta foi, ua tu mai le nofoālii i le lagi, ua tietie foi le tasi i le nofoālii; o lē tietie mai foi ua pei o le maa iasepi ma le salikea lona tino mai; ua siosioina foi le nofoālii e le nuanua e pei o le samaraki lona tino mai. Ua siosioina foi le nofoālii e nofoālii e luafulu ma le fa; na ou iloa foi o toeaina e toaluafulu ma le toafa o tietie i ia nofoālii, ua oofu i ofu sisina; ua i o latou ulu foi o pale auro. Ua oo mai foi uila, ma faititili, ma leo mai le nofoālii; o lamepa foi e fitu o mumū i luma o le nofoālii, o Agaga ia e toafitu o le Atua. Ua i luma foi o le nofoālii le sami tioata, e pei o le maa tioata; ua i totonu o le nofoālii ma ua liolioina le nofoālii e mea ola e fa ua tutumu i mata i luma atoa ma tua. O le mea ola muamua e pei o le leona, o lona lua o mea ola e pei o se povi taanoa, o lona tolu o mea ola e pei o le tagata ona mata, o lona fa foi o mea ola e pei o le aeto ua lele. O mea ola foi e fa e taitasi ma ona apaau e ono, ua faataaliolio ai, ma ua mata atoa i latou i totonu; latou te le mapu lava i le ao ma le po i le fai atu, E paia, e paia, e paia le Alii le Atua e ona le malosi uma lava, o le na soifua, o loo soifua foi, o le a afio mai. A vivii foi, ma faaneenee, ma faafetai atu mea ola i le o tietie i le nofoālli, o lē soifua e faavavau e faavavau lava, ona faapaū ai lea o toeaina e toaluafulu ma le toafa i luma o lē tietie i le nofoālii, ma ifo atu i lē soifua e faavavau e faavavau lava, ma lafo o latou pale i luma o le nofoālii, o loo faapea atu, Le Alii e, e tatau lava oe ina ia tuu atu ia te oe le viigia, ma le faaneeneega, ma le mana; auā na e faia mea uma lava, ona o lou finagalo foi e i ai i latou ma ua faia.

Na a‘u iloa foi, faauta, ua tu mai i le va o le nofoālii ma mea ola e fa, e i ona tua foi le au toeaina, o le Tamai mamoe e peiseai na fasia, e fitu ona nifo ma ona mata e fitu, o Agaga ia e toafitu o le Atua ua aauina atu i le lalolagi uma.

Na ou faalogo foi i mea uma na faia o i le lagi, ma le lalolagi, ma lalo ifo o le lalolagi, ma mea foi o i le sami, atoa ma mea uma o i ai i ia mea, o loo faapea atu, Ia ia te ia o lē tietie i le nofoālii atoa ma le Tamai mamoe le faamanū, ma le faaneeneega, ma le viiga, ma le malosi e faavavau faavavau lava.

ua faapea atu ma le leo tele, Ia outou matatau i le Atua, ma avatu ia te ia le viiga, auā ua oo mai le itu aso o lana faamasinoga; ma ia outou ifo i le na faia le lagi, ma le fanua, ma le sami, atoa ma puna o vai.

Ua ou faalogo foi e peiseai o le leo o le motu o tagata e toatele, e peiseai o le taalili o vai e tele, e peiseai o le taalili foi o faititili tetele, ua faapea atu, Aleluia; auā ua fai ma tupu le Alii le Atua e ona le malosi uma lava.

Ua ia te ia foi le suafa ua tusia i lona ofu ma lona vae. O LE TUPU O TUPU, MA LE ALII O ALII.

Ou te lei iloa ai foi se malumalu; auā o lona malumalu o le Alii le Atua lea, e ona le malosi uma lava, atoa ma le Tamai mamoe. E le aoga foi i le aai ona pupula i ai o le la, po o le masina; auā o le pupula o le Atua ua faamalamalamaina ai ia, o le Tamai mamoe foi o lona lamepa lea.

O a‘u le Alefa ma le Omeka, o le amataga ma le gataaga, o le muamua ma le mulimuli.