03 – Abantu

UNkulunkulu wasesithi, “Asenze umuntu ngesimo sethu, ngomfuziselo wethu, njalo kabuse phezu kwezinhlanzi zolwandle lezinyoni zemoyeni, phezu kwezifuyo, phezu kwawo wonke umhlaba laphezu kwazo zonke izinanakazana ezihuquzela emhlabathini.” Ngakho uNkulunkulu wamdala umuntu ngesimo sakhe, wamdala ngesimo sikaNkulunkulu; wadala owesilisa lowesifazana. UNkulunkulu wababusisa wathi kubo, “Zalani lande ngobunengi; wugcwaliseni umhlaba, liwubuse. Busani phezu kwezinhlanzi zolwandle lezinyoni zemoyeni laphezu kwezidalwa zonke ezihambayo emhlabathini.” UNkulunkulu wasesithi, “Ngilinika zonke izihlahla ezizala intanga eziphezu kwawo wonke umhlaba lazo zonke izihlahla ezilezithelo ezilentanga phakathi. Zingezenu ukuthi lizidle. Njalo nginika zonke izihlahla eziluhlaza kuzo zonke izinyamazana zomhlaba lakuzo zonke izinyoni zemoyeni lakuzo zonke izidalwa ezihambayo emhlabathini  —  yonke into ephefumula impilo phakathi kwayo  —  ukuba zibe yikudla kwazo.” Kwaba njalo.

uJehova uNkulunkulu wambumba umuntu ngothuli lomhlabathi waphefumulela emakhaleni akhe umphefumulo wokuphila, yikho umuntu wasesiba yinto ephilayo.

UJehova uNkulunkulu wathi, “Kakukuhle ukuba indoda ibe yodwa. Ngizamenzela umsizi omfaneleyo.”

Indoda yathi, “Lo manje uselithambo lamathambo ami lenyama yenyama yami; usezabizwa ngokuthi ‘mfazi,’ ngokuba wathathwa endodeni.” Ngalesisizatho indoda izadela uyise lonina imanyane lomkayo, bona babe nyamanye. Indoda lomkayo babehambaze, bengelazo inhloni.

Ngezithukuthuku zebunzi lakho uzakudla ukudla kwakho uze ubuyele emhlabathini, njengoba wathathwa kuwo; ngokuba uluthuli njalo uzabuyela othulini.”

Lo ngumlando olotshiweyo ngosendo luka-Adamu. Kwathi uNkulunkulu edala umuntu wamenza ngomfuziselo kaNkulunkulu. Wabadala baba ngowesilisa lowesifazana wababusisa. Kwathi sebedaliwe wababiza ngokuthi “abantu.”

Kwathi uJehova wasesithi, “UMoya wami kawuyikuphikisana lomuntu ngokungapheliyo, ngoba yena ngowenyama nje; izinsuku zakhe zizakuba likhulu elilamatshumi amabili kuphela.”

UNkulunkulu wabona ukuthi ukuxhwala kwabantu kwasekukukhulu kanganani emhlabeni, njalo lokuthi zonke izinkanuko zeminakano yezinhliziyo zabo zaziyibubi kuphela sonke isikhathi. UJehova wadabuka ngokuthi wayemenzile umuntu emhlabeni, ngakho inhliziyo yakhe yagcwala ubuhlungu.

Umhlaba wawuxhwalile phambi kukaNkulunkulu njalo ugcwele ubudlwangudlwangu. UNkulunkulu wabona ukuthi umhlaba wawusuxhwale njani, ngoba bonke abantu emhlabeni basebelezindlela zabo ezixhwalileyo.

UJehova wahotsha uqhatshi olumnandi wathi enhliziyweni yakhe: “Kangisayi kuphinda ngiwuthuke njalo umhlabathi ngenxa yomuntu, lokuba izinkanuko zenhliziyo yakhe zimbi kusukela ebuntwaneni bakhe. Njalo kangisoze lanini ngiphinde ngibhubhise zonke izidalwa eziphilayo, njengalokhu engikwenzileyo.

“Ngoba impilo yesidalwa isegazini, njalo ngiliphile ukuthi lenze ukubuyisana kwenu ealithareni; kuligazi elenze ukubuyisana empilweni yomuntu.

“UJehova uletha ukufa njalo enze ukuphila, wehlisela phansi engcwabeni njalo avuse.

Kodwa uJehova wathi kuSamuyeli, “Ungakhangeli isimo sakhe loba ubude bakhe, ngoba ngimalile. UJehova kakhangeli izinto ezikhangelwa ngabantu. Abantu bakhangela isimo somuntu, kodwa uJehova ukhangela inhliziyo.”

wathi: “Ngaphuma ngize esiswini sikamama, njalo ngizasuka ngize. UJehova wapha njalo uJehova usethathile; kalidunyiswe ibizo likaJehova.”

Nxa uNkulunkulu engazithembi izinceku zakhe, nxa ebeka izingilosi zakhe umlandu ngokona, pho-ke kuzakuba njani kulabo abahlala ezindlini zodaka, ozisekelo zazo zisothulini, abahlifizeka lula njengenondo!

ngokuba thina sizelwe izolo nje, kasazi lutho, lezinsuku zethu emhlabeni zilithunzi kuphela.

“Izandla zakho zangibumba zangenza. Pho usuzaphenduka ungibhidlize na? Khumbula ukuthi wangibumba njengomdaka. Pho usuzabuye ungiphendule uthuli na? Kawungithululanga yini njengochago njalo wangijiyisa njengolaza, wangigqokisa ngesikhumba lenyama, wangithungela ndawonye ngamathambo lemisipha? Wangipha ukuphila wangitshengisa umusa, ukunanza kwakho kwawelusa umoya wami.

Esandleni sakhe kulempilo yazo zonke izidalwa lokuphefumula kwabantu bonke.

“Umuntu ozelwe ngumfazi ulezinsuku ezilutshwana njalo ezigcwele uhlupho. Uyaqhakaza njengeluba aphinde abune; njengesithunzi esithi tshazi, akemi.

“Izinsuku zomuntu zimisiwe; uzibekile izinyanga zokuphila kwakhe wabeka imikhawulo angeke ayeqe.

pho umuntu-ke ongcolileyo, oxhwalileyo, onatha ububi njengamanzi!

“Kusasele iminyakana engemingaki anduba ngiye lapho kungabuywa khona.

pho umuntu-ke usilela kanganani, oyimpethu nje indodana yomuntu, eyinhlava nje kuphela!”

nxa ngilokhu ngiselempilo ngaphakathi kwami, umphefumulo kaNkulunkulu usemakhaleni ami, izindebe zami kazisoze zikhulume ububi, lolimi lwami kaluyikukhuluma inkohliso.

UMoya kaNkulunkulu wangenza; umphefumulo kaSomandla ungipha impilo.

uyini umuntu osungaze uzihluphe ngaye na, indodana yomuntu ukuthi uyinanze?

Wamenza wasilela kancane kulezidalwa zasezulwini, wamethesa umqhele wenkazimulo. Wamenza umbusi phezu kwemisebenzi yezandla zakho; wabeka zonke izinto ngaphansi kwezinyawo zakhe: yonke imihlambi yezimvu leyezinkomo lezinyamazana zeganga, izinyoni zasemkhathini lezinhlanzi zolwandle, konke okuntsheza emigudwini yolwandle.

Kumqondisi wokuhlabela. ElikaDavida Isiwula sithi enhliziyweni yaso, “AkulaNkulunkulu.” Baxhwalile, izenzo zabo zingamanyala; kakho owenza okuhle. UJehova ukhangela phansi esezulwini abone amadodana abantu ingabe bakhona yini abezwayo, abamdingayo uNkulunkulu. Bonke baphambukile, bonke ndawonye sebexhwalile; kakho loyedwa owenza okuhle, kakho lamunye.

Ihubo likaDavida Umhlaba ungokaJehova, lakho konke okukuwo, ilizwe labo bonke abahlala kulo; ngokuba wenza isisekelo sawo phezu kwezilwandle wawumisa phezu kwamanzi.

UJehova ukhangele phansi esezulwini ababone bonke abantu; esemzini wakhe uyababona bonke abahlala emhlabeni  — yena owenza izinhliziyo zabo bonke, enanzelela konke abakwenzayo.

“Ngitshengisa, Jehova, isiphetho sempilo yami lobunengi bezinsuku zami; ngazisa ukuthi impilo yami igijima kanganani. Usuwenze izinsuku zami zaba lobubanzi besandla; ububanzi beminyaka yami kabusilutho kuwe. Impilo yalowo lalowo umuntu ingumoya kuphela.

Abantu uyabakhuza ubajezisele isono sabo; ucikiza inotho yabo njengenondo  —  umuntu ngamunye ungumoya nje.

Ngeqiniso ngavele ngazalwa ngilesono, ngaba yisoni ngiqalisa esiswini sikamama.

Imihlatshelo kaNkulunkulu iyinhliziyo edabukileyo; inhliziyo edabukileyo, ezisolayo, hawu Nkulunkulu, kawuyikuyilahla.

Kumqondisi wokuhlabela. Ngendlela yemahalathi. Imasikili kaDavida. Isiwula sithi enhliziyweni yaso, “AkulaNkulunkulu.” Bangcolile, lezindlela zabo zibolile; kakho loyedwa owenza okulungileyo. UNkulunkulu uyakhangela esezulwini abone amadodana abantu ingabe bakhona yini abalengqondo, abangabe bayamdinga uNkulunkulu. Bonke baphambukile, bonke bangcolile; kakho owenza okulungileyo, kakho lamunye.

Wakhumbula ukuthi babeyinyama nje intshongolo eyedlulayo nje ingabe isabuya.

Khumbula ukwedlula masinyane kwempilo yami. Ngoba wabadalela ize nje abantu! Ngumuntu bani ongaphila angaze abona ukufa, loba azisindise emandleni eliba na?

Ubude bezinsuku zethu buyiminyaka engamatshumi ayisikhombisa  —  loba amatshumi aficamibili, nxa silamandla; kanti lelobanga layo liluhlupho losizi, ngokuba iphanga yedlule, lathi siphaphe nje sedlule.

Sifundise ukubala kuhle izinsuku zethu, ukuze sizuze inhliziyo yenhlakanipho.

Izinsuku zami zifana lesithunzi sakusihlwa; ngiyabuna njengotshani. Kodwa wena, O Jehova, uhlezi ebukhosini lanininini; udumo lwakho lumi ezizukulwaneni zonke.

ngokuba uyakwazi ukuthi sibunjwa njani, uyakhumbula ukuthi siluthuli. Umuntu yena izinsuku zakhe zinjengotshani, ukhula amemetheke njengembali yeganga; umoya uyayiphephetha ihle inyamalale, indawo yakhe ingabe isayikhumbula lanini.

Uthi ungafihla ubuso bakho zitshaywe luvalo; uthi ungathatha umphefumulo wazo, zife zibuyele othulini.

NgakaJehova amazulu angaphezu kwakho konke, kodwa umhlaba wawunika umuntu. Kakusibo abafileyo abadumisa uJehova, labo abangena phansi ekuthuleni;

Kumqondisi wokuhlabela. ElikaDavida. Ihubo. O Jehova, usungihlolile usungazi. Uyakwazi lapho ngihlala lalapho ngiphakama; uyayibona imicabango yami lanxa ukhatshana. Uyananzelela ukuphuma kwami lokulala phansi kwami; uzazi kuhle zonke izindlela zami. Ilizwi lingakabi khona olimini lwami usulazi lonke, wena Jehova.

Ngokuba wadala ingaphakathi yobuyimi; wangiphetha kuhle ndawonye esiswini sikamama. Ngiyakudumisa ngokuthi ngabunjwa ngesimanga esesabekayo; iyamangalisa imisebenzi yakho, lokho ngikwazi kamhlophe. Isimo samathambo ami sasingafihlekanga kuwe lapho ngangisenziwa endaweni esithekileyo. Lapho ngangiselukelwa ndawonye ezinzikini zomhlaba, amehlo akho awubona umzimba wami ungakabi lesimo. Zonke izinsuku ezamiselwa mina zabhalwa encwadini yakho lalunye lwazo lungakabi khona. Iligugu elinganani kimi imicabango yakho, O Nkulunkulu! Bukhulu kanganani ubunengi bayo! Aluba ngingayibala ingedlula ubunengi bezinhlamvu zetshebetshebe. Ngithi nxa ngivuka ngibe ngilokhu ngilawe.

Umuntu unjengomphefumulo; izinsuku zakhe zinjengesithunzi esidlulayo masinyane.

Lingabeki ithemba lenu emakhosini, ebantwini benyama, abangeke basindise. Kuthi umoya wabo ungaphuma, babuyele emhlabathini; mhlalokho nje amacebo ahle abhidlike.

UJehova uyabazonda abantu abelenhliziyo embi, kodwa uyathokoza ngalabo abandlela zabo zilungile.

Inhliziyo yenkosi isezandleni zikaJehova, uyiholela lapho athanda khona njengomsele wamanzi. Umuntu ubona kungathi zonke izindlela zakhe zilungile, kodwa uJehova uhlola inhliziyo.

Abanothileyo labayanga bayafanana ngalokhu: uJehova unguMenzi wabo bonke.

Umuntu uphuma eze esiswini sikanina, njengokufika kwakhe ubuyela enjalo. Kazuzi lutho olusuka emsebenzini wakhe angaluphatha ezandleni zakhe.

Ibizo elihle lingcono kulamakha amnandi, lelanga lokufa lingcono kulelanga lokuzalwa.

Akulamuntu loyedwa olungileyo emhlabeni owenza okulungileyo ongazake enze isono.

Akulamuntu olamandla phezu kosuku lwakhe lokufa. Njengoba ibutho lingakhululwa ngesikhathi sempi, kunjalo ukuxhwala akuyikubakhulula labo abaphila ngakho.

Lobu yibo ububi obuvelela zonke izinto ngaphansi kwelanga: Konke kulesiphetho sinye. Njalo izinhliziyo zabantu zigcwele izibozi futhi kulokubheda phakathi kwazo nxa besaphila, ikanti emva kwakho konke baya kwabafileyo.

Njengoba ungayazi indlela yomoya, loba ukubunjwa komzimba esiswini sikanina, yikho ungeke uzwisise umsebenzi kaNkulunkulu, uMenzi wezinto zonke.

Ilizwi lithi, “Memeza!” Mina ngathi, “Ngimemeze ngisithini na?” “Abantu bonke banjengotshani, bonke ubukhosi babo bunjengamaluba eganga. Utshani buyabuna amaluba ayakhithika, ngoba umoya kaJehova uyakuphephetha. Ngempela abantu babutshani.

Lokhu yikho okutshiwo nguJehova yena owadala amazulu wawelula, yena owendlala umhlaba lakho konke okuphuma kuwo, yena onika abantu abakuwo ukuphefumula, kuthi abahamba kuwo abanike ukuphila:

“Nanku akutshoyo uJehova  —  uMhlengi wakho, owakubumbayo esiswini: Mina nginguJehova, owenza izinto zonke, owenza amazulu eyedwa, owendlala umhlaba eyedwa,

“Mina, mina uqobo, nginguye oliduduzayo. Ungubani wena ukuba wesabe abantu abafayo, amadodana abantu, abutshani nje,

Thina sonke njengezimvu, silahlekile, lowo lalowo wethu uphambukele endleleni yakhe; njalo uJehova ubeke phezu kwakhe ukona kwethu sonke.

“Ngoba imicabango yami kayisiyo eyenu, lezindlela zenu kayisizo ezami,” kutsho uJehova. Njengomkhathi uphakeme kulomhlaba, ngokunjalo izindlela zami ziphakeme kulezindlela zenu, lemicabango yami iphakeme kulemicabango yenu.

Sonke sesaba njengomuntu ongcolileyo, lemisebenzi yethu yokulunga yonke injengezidwedwe ezingcolileyo, sonke siyabuna njengehlamvu, lanjengomoya izono zethu zisiphephulela khatshana. Kakho okhuleka ebizweni lakho lozamayo ukubambelela kuwe, ngoba ubuso bakho ubufihlile kithi wasenza sacikizeka ngenxa yezono zethu. Ikanti, O Jehova, wena unguBaba wethu. Thina silibumba, wena ungumbumbi; Sonke singumsebenzi wezandla zakho.

“Ngingakakubumbi esiswini ngakwazi, ungakazalwa ngakukhetha ngakubeka ukuba ngumphrofethi ezizweni.”

Kodwa lina selenze okubi kakhulu kulabokhokho benu. Khangelani ukuthi lowo lalowo wenu uyilandela njani inkani yenhliziyo yakhe embi esikhundleni sokuthi angilalele.

UJehova uthi: “Uqalekisiwe lowo othemba umuntu, othembe ukuthi amandla akhe asenyameni, onhliziyo yakhe ihlamukela uJehova.

Inhliziyo iyakhohlisa okudlula izinto zonke njalo imbi kakhulu. Ngubani ongayizwisisa na? “Mina Jehova ngiyayihlola inhliziyo ngihlole lengqondo, ukuba umuntu ngimnike okufanele ukwenza kwakhe mayelana lalokho okufanele izenzo zakhe.”

Ngoba yonke imiphefumulo ephilayo ngeyami, uyise kanye lendodana  —  bobabili ngokufanayo ngabami. Umphefumulo owonayo yiwo ozakufa.

Ngizakunika inhliziyo entsha ngifake lomoya omutsha phakathi kwakho; ngizasusa kuwe inhliziyo yakho yelitshe ngikunike inhliziyo yenyama.

Nanku okutshiwo nguJehova Wobukhosi kula amathambo: Ngizakwenza umoya ungene phakathi kwenu, njalo lizakuba lokuphila. Ngizaxhuma imisipha kini ngenze inyama ihlume phezu kwenu njalo ngibeke ijwabu phezu kwenu; ngizafaka umoya phakathi kwenu, njalo lizakuba lokuphila. Lapho-ke lizakwazi ukuthi mina nginguJehova.’ ”

Wathi ebona izixuku zabantu wabazwela usizi ngokuba babehlukuluzekile bephelelwe, benjengezimvu ezingelamelusi.

Kwala zona izinwele zamakhanda enu zibaliwe. Ngakho lingesabi; liligugu elidlula izintaka ezinengi.

Umuntu olungileyo uletha izinto ezinhle ziphuma ebuhleni abulombe ngaphakathi kwakhe, njalo lomuntu omubi ukhihliza izinto ezimbi azigcine ngaphakathi kwakhe.

Kodwa lezozinto eziphuma emlonyeni zivela enhliziyweni, yizo ezenza umuntu ‘angcole.’ Ngokuba enhliziyweni kuphuma imicabango emibi, ukubulala, ukufeba, ukuphinga, ubusela, ukufakaza amanga lokunyeya.

UJesu wathi, “Yekelani abantwana beze kimi, lingabavimbeli, ngokuba umbuso wezulu ungowabanjengalaba.”

Lindani likhuleke ukuze lingaweli ekulingweni. Umoya uyathanda kodwa umzimba ubuthakathaka.”

Ngokuba okusuka ngaphakathi, okusuka enhliziyweni, kuphuma imicabango emibi, ukufeba, ukweba, ukubulala, ukuphinga, ubuhwaba, umona, ubuqili, ukuxhwala, umhawu, ukugcona, ubuqholo lobuthutha. Zonke lezi izono ziphuma ngaphakathi zenze umuntu abe ‘ngongahlanzekanga.’ ”

Kodwa ekuqaleni kwendalo uNkulunkulu ‘wabenza indoda lomfazi.’ Ngalesisizatho indoda izatshiya uyise lonina imanyane lomfazi wayo, kuthi labo bobabili babe nyamanye. Yikho kabasebabili, sebemunye. Ngakho, lokho uNkulunkulu asekuhlanganisile akungehlukaniswa muntu.”

UJesu waphendula wathi, “Ungibizelani ngokuthi ngilungile na? Kakho olungileyo ngaphandle kukaNkulunkulu yedwa.

Umuntu olungileyo uletha izinto ezinhle eziphuma kokuhle okulonjwe enhliziyweni yakhe, njalo lomuntu omubi uphihliza ububi obuphethuka enhliziyweni yakhe. Ngoba umlomo ukhuluma lokho okuphuphuma enhliziyweni.

Ngempela, izinwele zekhanda lakho zibaliwe. Lingesabi; lina liligugu okudlula izintaka ezinengi.

Ikanti kulabo bonke abamemukelayo, kulabo abakholwayo ebizweni lakhe, wabapha ilungelo lokuba ngabantwana bakaNkulunkulu  — abantwana abangazalwanga ngendlela yemvelo, kumbe ngokuzikhethela komuntu, loba ngokuthanda kwendoda, kodwa abazelwe ngokukaNkulunkulu.

Kodwa uJesu kazange aziyekelele kubo, ngokuba wayebazi bonke abantu. Wayengabudingi ubufakazi bomuntu, ngokuba wayekwazi okuphakathi komuntu.

Esephendula uJesu wathi, “Ngiyaqinisa ngithi ngaphandle kokuba umuntu azalwe futhi, angeke awubone umbuso kaNkulunkulu.” UNikhodemu wathi, “Kanti umuntu angazalwa kanjani yena esemdala na? Ngeqiniso, angazake angene ngokwesibili esiswini sikanina ukuze azalwe!” UJesu waphendula wathi, “Ngiyaqinisa ngithi, ngaphandle kokuthi umuntu azalwe ngamanzi langoMoya, angeke awungene umbuso kaNkulunkulu. Inyama izala inyama, kodwa uMoya uzala umoya. Ungamangaliswa yikuthi kwami, ‘Limele lizalwe njalo.’

“UNkulunkulu walithanda ilizwe waze wanikela iNdodana yakhe iyiyo yodwa ukuze kuthi loba ngubani okholwa kuyo angabhubhi kodwa abe lokuphila okungapheliyo.

Nanku ukuqunywa kwecala: Ukukhanya sekufikile emhlabeni, kodwa abantu bathanda ubumnyama kulokukhanya ngokuba imisebenzi yabo yayimibi.

Kodwa waqhubeka wathi, “Lina lingabalapha phansi; mina ngivela ngaphezulu. Lingabomhlaba; kangisuye owalo umhlaba. Ngilitshelile ukuthi lizafela ezonweni zenu; uma lingakholwa ukuthi nginguye engithi nginguye, ngempela lizafela ezonweni zenu.”

Njalo kancediswa yizandla zabantu, ingathi kukhona akuswelayo, ngokuba yena ngokwakhe upha bonke abantu impilo lomphefumulo lokunye konke. Ngomuntu oyedwa wenza zonke izizwe zabantu, ukuthi zakhe emhlabeni wonke; njalo wamisa izikhathi abazilungiselweyo lazo kanye izindawo abamele bahlale kuzo. UNkulunkulu wakwenza lokhu ukuze abantu bamdinge lokuthi mhlawumbe bamfinyelele bamfumane, loba nje uvele engakhatshana komunye lomunye wethu. ‘Ngokuba siphila kuye, sihambe silalame.’ Njengokutsho kwezinye izimbongi zakini ukuthi, ‘Singabantwabakhe.’

Ulaka lukaNkulunkulu luyabonakaliswa luvela ezulwini kukho konke ukungakhonzwa kukaNkulunkulu kanye lobubi babantu abacindezela iqiniso ngobubi babo,

Lanxa bazenza abahlakaniphileyo baba yizithutha benana inkazimulo kaNkulunkulu ongafiyo ngezifanekiso ezenziwa zafana labantu abalakho ukufa lezinyoni lezinyamazana kanye lezinanakazana ezihuquzelayo. Ngakho uNkulunkulu wabanikela esonweni sezinkanuko zezinhliziyo zabo zokungesabi ukujeziselwa ubufebe bokuhlazisana imizimba yabo omunye lomunye.

Akunjalo. UNkulunkulu kabe qotho, umuntu wonke abe ngumqambi wamanga. Njengoba kulotshiwe ukuthi: “Ukuze ubonakaliswe ukuthi uqondile lapho ukhuluma njalo unqobe lapho usahlulela.”

Njengoba kulotshiwe ukuthi: “Kakho olungileyo, kakho loyedwa; Kakho ozwisisayo, kakho odinga uNkulunkulu. Bonke baphambukile, bonke kabasasizi ngalutho; kakho owenza okuhle, kakho loyedwa.”

ngoba bonke bonile njalo bayasilela enkazimulweni kaNkulunkulu,

Ngakho-ke njengalokhu isono sangena emhlabeni ngomuntu oyedwa, lokufa ngesono, njalo ngale indlela ukufa kwafika ebantwini bonke, ngoba bonke benze isono  —

Kumbe njalo kalazi yini ukuthi sonke thina esabhaphathizelwa kuKhristu uJesu sabhaphathizelwa ekufeni kwakhe na? Ngakho sangcwatshwa laye ngokubhaphathizelwa ekufeni, ukuze kuthi njengoba uKhristu wavuswa kwabafileyo ngobukhosi bukaYise, lathi singaphila ukuphila okutsha. Uma sihlanganiswe laye kanje ekufeni kwakhe, ngempela sizahlanganiswa laye futhi ekuvukeni kwakhe. Ngoba siyakwazi ukuthi ubuntu bethu obudala babethelwa laye ukuze umzimba wesono ulahlwe, ukuze singabi yizigqili zesono futhi  — ngoba lowo osefile usekhululwe esonweni. Uma safa loKhristu, siyakholwa ukuthi sizaphila laye. Ngoba siyazi ukuthi njengoba uKhristu wavuswa kwabafileyo, angeke afe futhi; ukufa akuselawo amandla phezu kwakhe. Ukufa akufayo wakufela bonke kanye ngenxa yesono; kodwa ukuphila akuphilayo, ukuphilela uNkulunkulu. Ngokufanayo, zibaleni lingabafileyo esonweni kodwa abaphilayo kuNkulunkulu ngoKhristu uJesu. Ngakho lingavumeli isono ukuba sibuse imizimba yenu efayo ukuba livumele izinkanuko zaso ezimbi. Linganikeli izitho zemizimba yenu esonweni, njengezikhali zobubi, kodwa zinikeleni kuNkulunkulu, njengabavuswe kwabafileyo balethwa ekuphileni; linikele izitho zemizimba yenu kuye njengezikhali zokulunga.

Lokhu ngikubeka ngamazwi abantu ngoba libuthakathaka ngokwemvelo yobuntu benu. Njengoba lalinikela izitho zemizimba yenu ngobugqili emanyaleni lekuxhwaleni okwandayo, ngakho khathesi zinikeleni ngobugqili ekulungeni okuholela ebungcweleni.

Ngoba sisabuswa yimvelo elesono izinkanuko zesono ezavuswa ngumthetho zazisebenza emizimbeni yethu, okwenza sathelela ukufa izithelo.

Ngiyakwazi ukuthi akulalutho oluhle oluhlala kimi, okutsho imvelo yami elesono. Ngoba ngilesifiso sokwenza okuhle, kodwa angingeke ngikufeze.

Yeka isinothongwana esengiyiso sona. Ngubani ozangihlenga kulo umzimba wokufa?

Ngoba lokho umthetho owawungelamandla okukwenza ngokuba waxegiswa yimvelo elesono, uNkulunkulu wakwenza ngokuthuma iNdodana yakhe ngesimo somuntu olesono ukuba ibe ngumnikelo wesono. Ngakho isono yasilahla emuntwini olesono, ukuze izimiso ezilungileyo zomthetho zipheleliswe kithi, thina esingaphili ngokwemvelo yesono kodwa ngokoMoya. Labo abaphila ngokwemvelo yesono izingqondo zabo zigxile kulokho okufiswa yileyomvelo, kodwa labo abaphila ngokumayelana loMoya izingqondo zabo zigxile kulokho okufiswa nguMoya. Ingqondo yomuntu olesono yikufa, kodwa ingqondo ebuswa nguMoya yikuphila lokuthula; ingqondo yesono iyamzonda uNkulunkulu. Kayiwuvumi umthetho kaNkulunkulu, njalo ayingeke yenze njalo. Labo ababuswa yimvelo yesono abangeke bamthokozise uNkulunkulu. Kodwa lina kalibuswa yimvelo yesono kodwa nguMoya, uma uMoya kaNkulunkulu ehlala kini. Njalo uma umuntu engelaye uMoya kaKhristu, kasuye kaKhristu.

Ngoba uma liphila ngokwemvelo yesono, lizakufa; kodwa uma kunguMoya libulala izenzo ezimbi zomzimba, lizaphila,

Ngamanye amazwi, akusibantwana benyama abangabantwana bakaNkulunkulu, kodwa ngabantwana besithembiso ababalwa njengenzalo ka-Abhrahama.

Kodwa zigqokiseni iNkosi uJesu Khristu, njalo lingacabangi ngokuthokozisa inkanuko yemvelo yenu yokona.

Umuntu ongelaMoya kazamukeli izinto ezivela kuMoya kaNkulunkulu, ngoba kuye ziyibuthutha, njalo angeke aziqedisise ngoba zibonakaliswa ngomoya.

Kanti kalazi yini ukuthi lina ngokwenu lilithempeli likaNkulunkulu kanye lokuthi uMoya kaNkulunkulu uhlala phakathi kwenu? Uma umuntu echitha ithempeli likaNkulunkulu, uNkulunkulu uzamchitha; ngoba ithempeli likaNkulunkulu lingcwele, njalo lina liyilelothempeli.

Kalazi yini ukuthi umzimba wenu ulithempeli likaMoya oNgcwele, ophakathi kwenu, elamamukela kuNkulunkulu na? Kalisibo benu, lathengwa ngentengo. Ngakho-ke dumisani uNkulunkulu ngemizimba yenu.

Ngoba njengoba ukufa kweza ngomuntu, ukuvuka kwabafileyo lakho kuza ngomuntu. Ngoba njengoba ku-Adamu bonke besifa, ngokunjalo kuKhristu bonke bazaphiliswa.

Inyama yonke kayifanani: Abantu balohlobo lunye lwenyama, izinyamazana zilolunye, izinyoni olunye lezinhlanzi olunye.

Kuzakuba njalo-ke ngokuvuka kwabafileyo. Umzimba ohlanyelwayo uyabola, uvuswa ungasaboli; uhlanyelwa useyiswa, uvuswe ngenkazimulo; uhlanyelwa ubuthakathaka, uvuswe usungumzimba womoya. Nxa kulomzimba wemvelo, ukhona njalo lomzimba womoya. Ngakho kulotshiwe ukuthi: “Umuntu wakuqala u-Adamu waba yisidalwa esiphilayo;” kodwa u-Adamu wokucina waba ngumoya ophilisayo. Owomoya kafikanga kuqala, kodwa owemvelo, emva kwalokho kwafika owomoya. Umuntu wakuqala wayenziwe ngothuli lomhlabathi; umuntu wesibili wavela ezulwini. Njengoba wayenjalo umuntu wasemhlabeni, banjalo lalabo abangabomhlaba; njalo njengoba enjalo umuntu ovela ezulwini, banjalo labo abangabasezulwini. Njalo njengoba silesimo somuntu wasemhlabeni, ngokunjalo sizakuba lesimo somuntu ovela ezulwini. Bazalwane, ngithi kini inyama legazi akungeke kudle ilifa lombuso kaNkulunkulu, lokubolayo akulidli ilifa lokungaboliyo.

Ngakho kasilahli themba. Lanxa ngaphandle sicikizeka, kodwa ngaphakathi senziwa sibe batsha izinsuku zonke.

Siyakwazi ukuthi uma ithente lethu lasemhlabeni lidilizwa, silesakhiwo esivela kuNkulunkulu, indlu elaphakade ezulwini, engakhiwanga ngezandla zabantu. Okwakhathesi siyabubula, sifisa ukwembeswa ngekhaya lethu lasezulwini, ngoba uma sesembesiwe kasiyikufunyanwa sinqunu. Ngoba nxa sisesekuleli ithente, siyabubula njalo siyasindwa, ngoba kasifisi ukwembulwa kodwa ukwembeswa ngekhaya lethu lasezulwini, ukuze okufayo kuginywe yikuphila.

Njengoba silezithembiso lezi, bazalwane abathandekayo, kasizihlambululeni ezintweni zonke ezingcolisa umzimba lomoya, siphelelise ubungcwele ngokwesaba uNkulunkulu.

AkulamJuda loba umGiriki, isigqili loba okhululekileyo, owesilisa loba owesifazana, ngoba lonke limunye kuKhristu uJesu.

Ngakho ngithi, philani ngoMoya, kaliyikuthokozisa izinkanuko zenu zemvelo elesono. Ngoba imvelo yesono ikhanuka okuphambene loMoya, loMoya okuphambene lemvelo yesono. Kuyaphikisana, ukuze lingenzi elikuthandayo.

Labo abangabakaKhristu sebayibethela esiphambanweni imvelo yabo yesono lokufutheka kwayo kanye lezinkanuko.

Lowo ohlanyela ukuthokozisa imvelo yakhe yesono, kuleyomvelo uzavuna ukuchitheka; lowo ohlanyela ukuthokozisa uMoya, kuMoya uzavuna ukuphila okulaphakade.

Lathi sonke sake saphila phakathi kwabo ngesinye isikhathi, sithokozisa izinkanuko zemvelo yethu yesono silandela lezifiso zayo kanye lemicabango. Njengabanye, ngemvelo sasiyizinto zolaka.

Kubamnyama ekuqedisiseni kwabo njalo behlukene lokuphila kukaNkulunkulu ngenxa yokungazi kwabo okungenxa yobulukhuni bezinhliziyo zabo.

Ngoba kimi, ukuphila kunguKhristu lokufa kuyinzuzo.

Ngoba thina yithi abokusokwa, thina esikhonza ngoMoya kaNkulunkulu, esiziqhenya ngoKhristu uJesu, njalo esingabeki ithemba okwenyama  —

Ngoba, njengoba ngangihlala ngilitshela kuqala lakhathesi ngiyatsho futhi langezinyembezi, ukuthi abanengi baphila njengezitha zesiphambano sikaKhristu. Isiphetho sabo yikubhubha, unkulunkulu wabo yisisu sabo, lodumo lwabo lusehlazweni labo. Ingqondo yabo isezintweni zasemhlabeni. Kodwa elethu ikithi lisezulwini. Njalo simlindele ngokutshiseka uMsindisi evela khonale, iNkosi uJesu Khristu, yena okuzakuthi ngamandla amenza abeke izinto zonke ngaphansi kwakhe, uzaguqula imizimba yethu elesimo esiphansi ibe njengomzimba wakhe olenkazimulo.

Qaphelani kungabi khona olithumbayo ngenhlakanipho eyize lekhohlisayo, eyeyame emdabukweni wabantu lakuzimiso zemvelo yakulo umhlaba kungesikho kuKhristu.

Lapho akukho mGriki loba umJuda, osokileyo loba ongasokanga, iqaba, umSikhethiya, isigqili loba okhululekileyo, kodwa uKhristu uyikho konke, njalo ukubo bonke.

Sengathi uNkulunkulu uqobo, uNkulunkulu wokuthula, angalingcwelisa ngokupheleleyo. Sengathi umoya wenu wonke, lomphefumulo kanye lomzimba kungalondolozwa kungelasici ekufikeni kweNkosi yethu uJesu Khristu.

Ngoba akulalutho esalulethayo emhlabeni, njalo akulalutho esingasuka lalo kuwo.

Ngoba uNkulunkulu kasiphanga umoya wobugwala, kodwa umoya wamandla, lowothando kanye lowokuzithiba.

Abantu bazakuba ngabazithandayo, labathanda imali, labazikhukhumezayo, labazigqajayo, labathukayo, labangalaleli abazali babo, labangabongiyo, labangcolileyo, abangelathando, labangathetheleliyo, labahlebayo, labangazikhuziyo, labalesihluku, labangakuthandiyo okuhle, labalamacebo amabi, labacaphuka ngeze, labaziphakamisayo, labathanda injabulo kulokuthanda uNkulunkulu  — belesimo sokukholwa kuNkulunkulu kodwa belandula amandla akho ukukholwa. Ungahlanganyeli labo.

Kwabahlambulukileyo izinto zonke zihlambulukile, kodwa kulabo abaxhwalileyo njalo bengakholwa, akulalutho oluhlambulukileyo. Impela, kokubili izingqondo zabo lezazela zabo kuxhwalile. Bathi uNkulunkulu bayamazi, kodwa ngezenzo zabo bayamphika. Bayenyanyeka, bayadelela njalo kabafanelanga ukwenza loba kuyini okuhle.

Kodwa ikhona indawo lapho omunye ofakaza khona esithi: “Umuntu uyini ukuba ukhathazeke ngaye, loba indodana yomuntu ukuba uyinanze na? Wamenza waba mncinyazana kulezingilosi; wambeka umqhele wobukhosi lodumo, wabeka lezinto zonke ngaphansi kwezinyawo zakhe.” Ekubekeni izinto zonke ngaphansi kwakhe, uNkulunkulu katshiyanga lutho olungekho ngaphansi kwakhe. Kodwa khathesi kasiboni zinto zonke zingaphansi kwakhe.

Njengoba abantwana belomzimba legazi, laye wahlanganyela ebuntwini babo ukuze kuthi ngokufa kwakhe amchithe lowo ophethe amandla okufa  —  okutsho uSathane  — abakhulule ababebambeke ebugqilini impilo yabo yonke ngenxa yokwesaba kwabo ukufa.

Ilizwi likaNkulunkulu liyaphila njalo liyasebenza. Libukhali kulenkemba esika inxa zombili, ingena ize yehlukanise umphefumulo lomoya, amalunga lomnkantsho; lahlulela imicabango lomumo wenhliziyo. Kukho konke okudaliweyo akulalutho olufihlakeleyo emehlweni kaNkulunkulu. Konke kwambuliwe kwabekwa obala phambi kwamehlo akhe yena okumele sizibike kuye.

Njengalokhu umuntu wamiselwa ukufa kanye, kuthi emva kwalokho abhekane lokwahlulelwa,

kodwa lowo lalowo ulingwa yinkanuko yakhe embi, lapho edonselwa kude ehugwa. Ngakho nxa inkanuko isiyemule izala isono; njalo isono lapho sesikhulile okugcweleyo, sizala ukufa. Lingakhohliswa, bazalwane bami abathandekayo.

Njengoba umzimba ongelamoya ufile, ngokunjalo ukukholwa okungelamisebenzi kufile.

Lalelani lina elithi, “Lamhla loba kusasa sizakuya kuleli loba kuleliyana idolobho, siqede umnyaka khona, senze imisebenzi sizuze imali.” Kungani, kalikwazi lokuzakwenzakala kusasa. Ukuphila kwenu kuyini na? Liyinkungu ebonakala okwesikhatshana ibe isinyamalala.

Ngoba, “Abantu bonke banjengotshani, bonke ubukhosi babo bunjengamaluba eganga; utshani buyabuna njalo iluba liyawohloka,

Bangane abathandekayo, ngiyalincenga, njengabezizweni lezihambi emhlabeni, ukuba lizile izinkanuko zesono ezilwa lemiphefumulo yenu.

Lingawuthandi umhlaba loba olunye ulutho olusemhlabeni. Uma umuntu ethanda umhlaba, uthando lukaBaba kalukho kuye. Ngoba izinto zonke ezisemhlabeni  —  izinkanuko zabantu abalezono  —  ukulangazela kwamehlo abo kanye lokuzigqaja ngezimpahla  —  akuveli kuBaba kodwa emhlabeni. Umhlaba lezinkanuko zawo kuyadlula, kodwa umuntu owenza intando kaNkulunkulu uphila kuze kube nininini.

Yeka ubukhulu bothando uBaba asinika lona, ukuba sibizwe ngokuthi singabantwana bakaNkulunkulu! Njalo lokho yikho esiyikho! Okwenza umhlaba thina ungasazi yikuthi laye kawumazanga.

lenyule abanye emlilweni libasilise; kwabanye bonakalisani isihawu, kuhlangene lokwesaba  —  lizonde lezigqoko ezingcoliswe yimizimba exhwalileyo.

Khangelani uyeza ngamayezi, amehlo wonke azambona, lalabo abamgwazayo; labantu bonke basemhlabeni bazalila ngenxa yakhe. kuzakuba njalo! Ameni.