03 – Tagata

Ona fetalai ane lea o le Atua, Ina tatou faia ia o le tagata i lo tatou faatusa, ia foliga ia i tatou; ia pule foi i latou i i‘a i le sami, ma manu felelei, ma manu vaefa, ma le laueleele uma, atoa ma mea fetolofi uma e fetolofi i le eleele. Ona faia lea e le Atua o le tagata i lona faatusa, o le faatusa o le Atua na ia faia ai o ia; na faia e ia o i laua o le tane ma le fafine. Ua faamanuia foi e le Atua ia te i laua, ma ua fetalai atu le Atua ia te i laua, Ia fanafanau ia, ma ia uluola, ma ia tumu ai le lalolagi, ia faatoilalo i ai, ma ia pule i i‘a i le sami, ma manu felelei, atoa ma mea ola uma e fetolofi i le eleele. Ua fetalai atu foi le Atua, Faauta, ua ou foai atu ia te oulua o laau afu uma e tutupu ma o latou fua o i le fogāeleele uma lava, atoa ma laau uma ua iai le fua o le laau e tupu ma ona fatu; e ia te oulua ia e fai ma mea e ‘ai. O manu vaefa uma foi o le vao, ma manu felelei uma, atoa ma mea fetolofi uma i le eleele, o iai le ola, ua ou foai atu i ai o laau afu uma lauolaola e fai ma mea e ‘ai; i le ua faapea lava.

Ona faia lea e Ieova le Atua o le tagata i le efuefu o le eleele, ma ua mānava i ona pogaiisu o le mānava ola, ona avea ai lea o le tagata ma tagata ola.

Ua fetalai mai foi Ieova le Atua, E le lelei ina toatasi o le tagata; ou te faia sona fesoasoani e tatau ma ia.

Ona faapea ai lea o Atamu, O le ivi lava lenei o o‘u ivi, ma le aano o o‘u aano; e ta‘ua o ia o le fafine, auā na toina atu o ia ai le tane. O le mea lea e tuua ai e le tane lona tamā ma lona tinā, a e faatasi ma lana avā; ona avea ai lea o i laua ma tino e tasi. Sa le lavalavā i laua o Atamu ma lana avā, a ua le mamā lava.

e te ‘ai foi au mea e ‘ai ma le afu o ou mata, seia e toe foi atu i le eleele; auā na faiina a‘i lava oe; auā o le efuefu oe, e te toe foi atu lava i le efuefu.

O le tusi lenei i le gafa o Atamu. O le aso na faia ai e le Atua le tagata na ia faia o ia ua faatusa i le Atua. Na ia faia i laua, o le tane ma le fafine, na ia faamanuia foi ia te i laua, ma na faaigoaina ai o la igoa o Atamu, i le aso na faia ai i laua.

Ona fetalai ane lea o Ieova, E le faavavau ona finau o lo‘u Agaga ma tagata, auā ua na o tagata i latou; a o latou aso e selau ma le luafulu o tausaga ia.

Ua silafia e Ieova ua leaga tele lava tagata i le lalolagi, o manatu uma ua mafaufau ifo ai i o latou loto ua na ona leaga ia i aso uma lava. Ua salamo foi Ieova ina ua faia e ia tagata i le lalolagi, ma ua tiga ai lona finagalo.

Ua leaga lava le lalolagi i luma o le Atua, ma ua tumu le lalolagi i le saua. Ua silasila mai le Atua i le lalolagi, faauta foi, ua leaga lava; auā o tagata uma ua leaga ia i latou a latou amio i le lalolagi.

Ua lagona foi e Ieova le manogi lelei, ona faapea ifo lea o Ieova i lona finagalo, E ui lava ina leaga o manatu o loto o tagata e afua mai ina o tama iti, ou te le toe faaoo le malaia i le laueleele ona o tagata; ou te le toe taia mea ola uma e pei ona ou faia.

Auā o i le toto le ola o le tino; ua ou tuuina atu ai foi ia te outou e fai a‘i le togiola mo outou i luga o le fata faitaulaga; auā o le toto o le mea lava lea e fai a‘i le togiola mo le tagata.

O Ieova na te fasioti, ma faaola; na te faaoo ifo i le tuugamau, ma faafoi ae.

A ua fetalai mai Ieova ia Samuelu, Aua e te vaai i lona tino, po o le maualuga o lona tino, auā ua ou tetee ia te ia; auā e le vaai Ieova pei o le vaai o tagata, auā e vaai tagata i le tino, a e vaai Ieova i le loto.

Ua fai atu foi o ia, Na ou sau lē lavalavā mai le manava o lo‘u tinā, o le a ou foi atu i ai ua le lavalavā; na foaiina mai e Ieova, ua aveeseina foi e Ieova; ia faamanuina le suafa o Ieova.

Faauta, ua le faalagolago o ia i ana auauna; ua ia ta‘uvaleleaina ana agelu. E atili ai ona faapea i e o nonofo i fale omea, o iai lo latou faavae i le eleele, ua tu‘imomomoina i latou e pei o le pepe.

Auā o i tatou o tagata ananafi, ua tatou le iloa; auā o tatou aso i le lalolagi o le ata ia.

Na saunia ma faia a‘u atoa uma e ou aao; a ua e fasioti ia te au. Se‘i e manatu, na e faia a‘u e pei o le omea; e te toe faafoisia ea a‘u i le efuefu? Na e le sasaaina ea a‘u e pei o le suāsusu, ma faato‘aina a‘u e pei o le suāsusu to‘a? Na e faaofuina a‘u i le pa‘u ma le aano, na e faamalosia foi a‘u i ivi ma ua. Na e foaiina mai ia te au le ola ma le alofa, o lou leoleo mai foi na tausia ai lo‘u agaga.

Ua iai i lona aao o le ola o meaola uma, ma le mānava a tagata ola uma lava.

O le tagata ua fanau mai i le fafine, ua saasaa ona aso, mona ua tumu i le atuatuvale. E tupu ae o ia e pei o le fuga, a e salaeseina; e mavae atu foi o ia e pei o le ata, ma ua le tumau.

Faauta, ua tuupoina ona aso; o loo ia te oe le faitau o ona masina; ua e tuuina lona tuaoi e le sopoia e ia.

E matuā sili ai ona inosia ma leaga le tagata, o lē inu i le amio leaga e pei o le vai.

Auā e mavae mai nai tausaga ua faitaulia, ona ou alu atu ai lea i le ala ou te le toe foi mai ai.

E atili ai ona faapea le tagata ua se tuga ia, ma le fanauga a tagata ua se ilo ia.

O aso uma ua i ai ia te au lo‘u ola, ua i ai foi i o‘u pogaiisu le mānava mai le Atua, e le tautala ai lava o‘u laugutu i se mea le tonu, e le tautala foi lo‘u laulaufaiva i se mea pepelo.

Na faia a‘u e le Agaga o le Atua; o le mānava foi a Le e ona le malosi uma lava ua ola ai a‘u.

se a ea le tagata e te manatu mai ai ia te ia; ma le atalii o le tagata e te asiasi mai ai ia te ia?

Auā ua e faamaulalo ane teisi o ia i agelu; ua e faapaleina foi o ia i le mamalu ma le matagofie. Ua e foaiina ia te ia le pule i galuega a ou aao; ua e tuuina mea uma i lalo o ona vae; o lafu mamoe ma povi uma lava, atoa ma manu vaefa o le vao; o manu felelei, ma i‘a o le sami, ua tataa i ala o le sami.

Ua fai ifo le tagata valea i lona loto, E leai se Atua. Ua leaga lava i latou; ua inosia a latou amioga; e leai se tasi ua amio lelei. O loo silasila mai Ieova mai le lagi i le fanau a tagata, ina ia silafia pe i ai se tasi ua poto, se ua saili i le Atua. Ua latou ‘alo‘alo ese uma lava, ua leaga faatasi i latou; e leai se tasi ua amio lelei, e leai lava se tasi.

O le lalolagi ma mea ua tumu ai o a Ieova ia; o le atu laulau ma e o nonofo ai. Auā o ia lava na faavaeina ai i luga o le sami, ma faamau ai i luga o vaitafe.

O loo silasila mai Ieova mai le lagi; e silafia e ia le fanau uma a tagata. O loo matuā silasila mai o ia mai le mea o loo afio ai o ia ia i latou uma o e nonofo i le lalolagi. E faia lava e ia o latou loto uma lava; o loo matuā silafia e ia a latou galuega uma.

Ieova e, ia e faailoa mai ia te au lo‘u iuga, pe se a foi le fua o o‘u aso; ina ia ou iloa pe fia ni aso ua toe ia te au. Faauta, ua e faia o‘u aso e pei o le lautele o le alofilima; o lo‘u olaga foi, ua peiseai ua leai i ou luma; e moni, o tagata uma a o malolosi e matuā faatauvaa lava i latou, Selā.

A e sasa i le tagata i aoaiga ona o le agasala, ona e faaumatia ai lea o lona lelei, e pei o le mogamoga ona atia o le ofu; e moni, o tagata uma e faatauvaa lava i latou. Selā.

Faauta, na fanaua a‘u ma le amio leaga; na ou i ai foi i le manava o lo‘u tinā ma le agasala.

O taulaga i le Atua, o le loto momomo lea; le Atua e, e te le inosia le loto momomo ma le nutimomoia.

Ua fai ifo le tagata valea i lona loto, E leai se Atua. Ua leaga lava i latou, ua inosia a latou amioga; e leai lava se tasi ua amio lelei. Na silasila mai le Atua mai le lagi i le fanau a tagata, ina ia silafia pe ai se tasi ua poto, o se na te sailia le Atua. Ua latou taitasi ma foi i tua, ua leaga faatasi lava i latou; e leai se tasi ua amio lelei, e leai lava se tasi.

auā na ia manatua, ua na o tagata lava i latou; o le matagi o loo mavae atu, e le toe foi mai lava.

Ia e manatua le puupuu o lo‘u olaga; se a le mea ua e faia ai fua le fanau uma a tagata. O ai se tagata ola na te le iloa le oti? Na te laveaiina ea lona agaga ai le pule a le tuugamau? Selā.

O tausaga o matou olaga e fitugafulu ia tausaga; a e afai e valugafulu tausaga ona o le malosi, a o lo latou malosi o i ai le tiga ma le puapuaga; auā e vave ona mavae atu ia, ma matou lele ese.

Ia faapea ona e a‘oa‘o mai ia i matou e faitauina o matou aso, ina ia maua ai le poto i o matou loto.

O o‘u aso ua pei o le ata ua lafoia; o a‘u nei foi ua pei o le vao iti ona magumagu. A o oe, Ieova e, e afio oe e faavavau lava, ma le faamanatuga ia te oe, e āu tupulaga lava lea.

Auā ua silafia lava e ia le mea na fai a‘i i tatou; ua manatu ia o le efuefu lava i tatou. O le tagata, e pei o le mutia ona aso; e pei o le fuga o le vao, e faapea ona fuga mai o ia; auā a agi mai i ai le matagi, ona leai lea o ia; ua le toe iloa foi o ia i le mea sa i ai.

Ua ‘alo ou fofoga, ona atuatuvale ai lea o i latou; ua e aveeseina a latou mānava, ona mamate ai lea, ua toe liu efuefu.

O le lagi, o le lagi lava, e ia Ieova lea; a ua tuuina mai e ia le lalolagi mo le fanau a tagata. E le vivii atu ia Ioa e ua oti, ma i latou uma o e ō ifo i le mea taaligoligoa.

Ieova e, ua e suesue mai ia te au, ua e silafia lava a‘u. O oe lava ua e silafia lo‘u nofo i lalo ma lo‘u tulai i luga; ua e silafia mamao mai o‘u manatunatu. Ua e suesue i lo‘u savali ma lo‘u taoto, ua e masani lava ma o‘u ala uma. A o leai lava se upu i lo‘u gutu, faauta, Ieova e, ua e silafia uma lava.

Auā sa ia te oe o‘u manatunatu; na e ufiufi ia te au i le manava o lo‘u tinā. Ou te vivii atu ia te oe, auā na faia a‘u e ala ai ona matautia ma ofo tele ai; o mea na e faia, o mea mamana ia; ua ou matuā iloa e a‘u nei mea. E lei lilo lo‘u tino ia te oe, ina ua faia a‘u i le mea lilo, ina ua saunia a‘u i mea loloto i le lalolagi. Na silasila mai ou fofoga i o‘u tino uma ina o afuafua; ua tusia foi uma lava i lau tusi, o ona aso foi na faia ai, a o leai ni o‘u tino. Le Atua e, ua matuā sili ou manatunatu ona aoga ia te au, ua sili lava ona tele o lo latou faitau aofai. Afai ou te faitaulia, ua sili ia ona tele i le oneone; a a‘u ala, tā te i ai pea ma a‘u.

O le tagata o loo tusa ia ma le mea le aoga; o ona aso e pei o le ata a mavae atu.

Aua tou te faatuatua i alii, po o le fanau a tagata, e le o i ai se olataga. E alu ese lona agaga, e foi atu i le eleele na i ai o ia; e faaumatia i lea lava aso ona manatunatu.

Ua inosia e Ieova e ua faapiopio o latou loto; a o e ua sao a latou amio, e fiafia i ai o ia.

O le finagalo o le tupu, o vaita‘i ia i le aao o Ieova; na te liliuina i mea uma ua ia finagalo i ai. O ala uma o le tagata e tonu ia i lona lava manatu; a o Ieova, na te fuatia loto.

O le mauoa ma le mativa la te fetaiai; na faia i laua uma e Ieova.

E pei ona sau o ia o le lavalavā mai le manava o lona tinā; e toe foi atu lava o ia e faapei ona ia sau; e le ave foi e ia se mea ai lana galuega e alu ma ia.

E sili ona lelei o le ta‘uleleia i le suāuu lelei; ma le aso e oti ai e sili i le aso e fanau mai ai.

E leai lava se tagata amiotonu i le lalolagi, o le na te faia amio lelei, ma le le agasala.

E leai se tagata ua i ai le pule i le agaga e taofi ai le agaga; e leai foi se pule ia te ia i le aso e oti ai; e leai lava se aueseina atu i lea taua; o le amio leaga foi e le laveaiina ai o e ua faia.

Ua i ai lenei mea leaga i mea uma ua faia i lalo o le la, e oo le mea e tasi i tagata uma; ua tumu foi loto o tagata i le leaga, ua i ai foi le valea i o latou loto i o latou olaga nei, mulimuli ane ua latou o atu i e ua oti.

E pei ona le iloa e oe le ala o le matagi, ma ona tutupu o ivi i le manava o le ua to, e faapea foi ona le iloa e oe le galuega a le Atua, o le na te faia mea uma lava.

Ua fai mai le leo, Ina alaga ia. Ona fai atu lea o ia, Se a ea se upu ou te alagaina? O tagata uma o le mutia i latou, ma lo latou lelei uma, e tusa lea ma le fuga o le vao; e magumagu le mutia, e toulu le fuga; auā o le mānava o Ieova ua agi mai i ai; e moni, o le mutia lava le nuu.

O loo faapea ona fetalai mai o le Atua o Ieova, o le na faia le lagi, ma na faamafolafolaina ai; o le na fofola le lalolagi ma mea e tutupu mai ai; o le ua foai le mānava i nuu o i ai, ma le agaga i e o savavali i ai.

O loo faapea ona fetalai mai o Ieova le na faatau ia te oe, o le na faatupuina foi oe i le manava; o a‘u o Ieova le na faia mea uma; o lē faamafolafola le lagi na o a‘u lava; o a‘u lava o lē fofolaina le lalolagi;

O a‘u, o a‘u lava lē faamafanafana ia te outou; o ai ea oe e te fefe i le tagata e oti, ma le atalii o le tagata e avea o ia e pei o le mutia.

O i tatou uma ua sē i tatou e pei o mamoe, ua taitasi ma faasaga i lona lava ala; a ua faaoo ia te ia e Ieova le amio leaga o i tatou uma.

Auā o o‘u manatu e le o outou manatu, o o‘u ala e le o outou ala, ua fetalai mai ai Ieova. Auā e pei ona sili ona maualuga o le lagi i le lalolagi, ua faapea ona sili ona maualuga o o‘u ala i o outou ala, ma o‘u manatu e sili i o outou manatu.

O i matou nei e tusa ma le mea leaga i matou uma; o a matou amiotonu uma e tusa ia ma le ie o le ma‘i; ua mamae i matou uma e pei o le lau laau, o a matou amioletonu e pei se matagi ua lelea ai i matou. Ua leai foi sē valaau i lou suafa, ua leai sē ala mai e taofi atu ia te oe; auā ua ‘alo ou fofoga ia te i matou, ua e liua faasuavai i matou ona o a matou amio leaga. A o lenei, Ieova e, o oe lava lo matou Tamā; o i matou nei o le omea, a o oe le Tufuga; o le galuega a ou aao i matou uma.

Na a‘u iloa oe a o lei faia oe e a‘u i le manava; na a‘u faapaiaina oe a o lei fanau mai oe, na a‘u tofia oe e fai ma perofeta i nuu.

A o outou, ua faia e outou amio leaga e sili i o outou tamā; faauta foi, ua taitasi le tagata ma savali i le finau vale o lona loto leaga, ua le faalogo mai ia te au.

O loo faapea ona fetalai mai o Ieova, Ia malaia le tagata e faatuatua i tagata, ma ua fai tagata mona lima a ua liliu ese lona loto ia Ieova.

E sili le faa‘ole‘ole o le loto i mea uma, ma ua matuā leaga lava; po o ai na te mafaia ona iloa? O a‘u o Ieova o lē suesue i le loto, o lē tofotofo i manatu, ina ia tuuina atu i tagata taitasi e tusa ma ona ala, e tusa foi ma le fua o ana amioga.

Faauta, o agaga uma, o o‘u lava i latou; e pei o le agaga o le tamā ona fai mo‘u, e faapea foi le agaga o le atalii; o le tagata e agasala e oti ia.

Ou te avatu foi ia te outou le loto fou, ma ou tuu i totonu ia te outou le agaga fou; ou te aveesea le loto maaa ai o outou tino, ma ou avatu ia te outou le loto aano.

Ua faapea ona fetalai mai o le Alii o Ieova i na ivi; Faauta, ou te faaulu ane le mānava i totonu ia te outou, ona outou ola ai lea; ou te avane foi ua ia te outou, ma ou faatupuina ae aano ia te outou, ma ufiufi ia te outou i pa‘u, ou te tuuina atu foi le mānava i totonu ia te outou, e ola foi outou; ona outou iloa ai lea o a‘u lava o Ieova.

Ua silafia e ia le motu o tagata, ona mutimuti vale ai lea o lona alofa ia te i latou, ona ua lailoa i latou ma tuulafoaiina, e pei o mamoe e leai so latou leoleo.

A o outou lauulu lava ua faitaulia uma ia. O lea aua tou te matatau ai; e sili outou i manu iti e tele.

Ua au mai mea lelei e le tagata amio lelei i mea lelei ua teu i lona loto; o le tagata amio leaga foi, ua au mai mea leaga i mea leaga ua teu i lona loto.

A o mea e sau mai le gutu, ua alu ae ia mai le loto, o mea ia e leaga ai le tagata. Auā e alu ae mai le loto o le manatu leaga, o le fasioti tagata, ole mulilua, o le faitaaga, o le gaoi, o le molimau pepelo, ma le upu leaga.

A ua fetalai atu Iesu, Ina tuu mai ia o tama iti e o mai ia te au, aua le vaoia i latou; auā e faapei o i latou nei o e o i le malo o le lagi.

Ia outou mataala ma tatalo, ina ne‘i oo mai le faaosoosoga ia te outou; ua manao i ai le loto, a o le tino ua vaivai.

Auā e alu ae mai le loto o le tagata o le manatu leaga, o le mulilua, o le faitaaga, o le fasioti tagata, o le gaoi, o le manumanu, o le amio leaga, o le pepelo, o le matāitu, o le mataua, o upu leaga, o le faamaualuga, o le le mafaufau. O ia mea leaga uma e sau mai totonu, ma leaga ai le tagata.

a e peitai talu le amataga o mea na faia, na faia i laua e le Atua o le tane ma le fafine. O le mea lea e tuua ai e le tane lona tamā ma lona tinā, a e faatasi ma lana avā, ona avea lea o i laua ma tino e tasi; o lea e le toe toalua ai i laua, a e peitai ua tino e tasi; o lenei, o e ua faatasia e le Atua, aua le faate‘aeseeseina e se tagata.

A ua fetalai atu Iesu ia te ia, Se a le mea e te ta‘ua mai ai a‘u ua lelei? e leai se tasi e lelei, na o le toatasi lava, o le Atua lea.

Ua au mai mea lelei e le tagata amio lelei i mea lelei ua teu i lona loto; o le tagata amio leaga foi ua au mai e ia mea leaga i mea leaga ua teu i lona loto; auā o le tele o mea i le loto e tautala mai ai lona gutu.

A o outou lauulu lava ua faitaulia uma ia. O lena, aua tou te matatau ai; ua sili outou i manu iti e tele.

A o i latou uma e na talia o ia, ma faatuatua i lona suafa, na ia avatu i ai o lea manuia, ia avea i latou ma fanau a le Atua. O i latou, e le o le toto na fanau ai, e le o le manao foi o le tino e le o le loto foi o le tagata, a o le Atua lava.

A o Iesu, e lei faalagolago o ia ia te i latou, auā ua na silafia tagata uma lava. E le aoga foi ia te ia ina ia molimau o se tasi ia te ia i amio a tagata; auā foi ua na silafia mea o i loto o tagata.

Ua tali atu Iesu, ua faapea atu ia te ia, E moni, e moni, ou te fai atu ia te oe, a le toe fanau le tagata, e le mafai ona iloa e ia o le malo o le Atua. Ua fai mai Nikotemo ia te ia, E mafai ea faapefea ona fanau o le tagata ua toeaina? E mafai ea ona toe ofi i le manava o lona tinā, e fanau mai ai? Ua tali atu Iesu, E moni, e moni, ou te fai atu ia te oe, afai e le fanau se tasi i le vai ma le Agaga, e le mafai ona sao o ia i le malo o le Atua. O le ua fanau mai i la le tino, o le tino lea; o le ua fanau mai foi i la le Agaga, o le agaga lea. Aua e te ofo auā na ou fai atu ia te oe, E ao ina toe fanau mai outou.

Auā ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau.

O le faasala foi lenei, ina ua oo mai le malamalama i le lalolagi, a o tagata, e sili lo latou manao i le pouliuli i lo latou manao i le malamalama; auā e leaga a latou amio.

Ua fetalai atu foi o ia ia te i latou. O outou o lalo nei, o a‘u mai lugā; o outou e ō le lalolagi nei, e le so le lalolagi a‘u. O lea ua ou fai atu ai ia te outou. E oti outou i a outou agasala; auā a outou le talitonu, o a‘u lenei o ia, ona oti lea o outou i a outou agasala.

e le o lima o tagata e auauna ai ia te ia, peiseai ua mativa o ia i se mea e tasi; o loo foai mai e ia le ola, ma le mānava, ma mea uma lava i le vao mea atoa; ua faia foi e ia nuu uma o tagata i le toto e tasi, ia nonofo i le fogaeleele uma lava, ua na tuu foi tausaga na tofia anamua, ma tuaoi o mea latou te nonofo ai; ina ia latou saili i le Alii, pe mafai ona latou tautāgotago ma latou iloa o ia; a e peitai e le mamao o ia ma i tatou taitoatasi. Auā o ia o loo ola ai i tatou, ma gaoioi ai, o loo i ai foi i tatou talu o ia; pei ona fai mai foi e isi o outou fatu pese, Auā o lana fanau i tatou.

Ua faaalia mai foi le toasa o le Atua mai le lagi i le amio faalematau ma le amio leaga uma lava a tagata, o e taofi i le upu moni ma le amioletonu.

ua vālea i latou, a o faafiapopoto i latou, ua latou fesuiai foi le mamalu o le Atua soifua pea lava ma le faatagata o le tino o le tagata iu vale, ma manu felelei, ma manu vaefa, ma mea fetolofi. O lea foi na tuuina atu ai i latou e le Atua i le amio leaga, i le tu‘inanau o latou loto, latou te fefaaleagaina ai o latou lava tino;

Aua ne‘i faapea; ia tuu le faamaoni i le Atua, a o le pepelo i tagata uma lava; pei ona tusia, Ina ia ta‘uamiotonuina oe i au afioga, ma ia e malo pe a faamasinoina oe.

faapei ona tusia, E leai sē amiotonu, e leai lava se tasi, e leai se na te lagona, e leai sē saili i le Atua. Ua latou o ese uma lava, ua leaga faatasi i latou, e leai se ua amio lelei, ua leai lava se tasi.

Auā ua agasala tagata uma lava, ma ua le oo i le viiga mai le Atua;

O lenei faapei ona oo mai o le agasala i le lalolagi i le tagata e toatasi, o le oti foi ona o le agasala, ona oo mai ai lea o le oti i tagata uma lava, auā ua agasala uma lava;

Tou te lei iloa ea, o i tatou nei uma na papatisoina ia Keriso Iesu, na papatisoina i tatou i lona maliu? O lenei, ua tatanu faatasi i tatou ma ia i le papatisoga i lona maliu; ina ia tatou savavali i le ola toefuataiina, pei ona toe faatuina mai o Keriso nai e ua oti, i le mana o le Tamā. Auā afai ua faatasia i tatou i le faatusa i lona maliu, e faapea foi i tatou i lona toe tu mai. Ua tatou iloa lenei mea, na faasatauroina faatasi ma ia lo tatou tagata tuai, ina ia faaumatia ai le tino o le agasala, ina ia le toe faapologaina i tatou i le agasala. Auā o le ua oti ua tuusaunoa ia nai le agasala. Afai foi ua oti faatasi i tatou ma Keriso, ua tatou taofi, tatou te ola foi faatasi ma ia. Ua tatou iloa ua toe tu mai Keriso nai e ua oti, e le toe maliu lava o ia, e le toe pule le oti ia te ia. Auā o lona maliu, ua tasi lona maliu i la le agasala; a o lona soifua, e soifua lava ia i la le Atua. Ia faapea foi la outou taofi, ua outou oti i la le agasala, a ua outou ola lava i la le Atua i lo tatou Alii o Keriso Iesu. O lenei, aua ne‘i malo le agasala i o outou tino auga vale, i lo outou gauai i ai i ona tu‘inanau; aua foi ne‘i tuuina atu o outou tino i le agasala e fai ma auupega a le amio leaga; a ia outou tuuina atu outou i le Atua, e pei o e ua ola nai e ua oti, ma ia tuuina atu outou tino i le Atua e fai ma auupega a le amiotonu.

O upu a tagata ou te fai atu ai nei, ona o le vaivai o outou tino; auā faapei ona outou tuuina atu o outou tino e fai ma auauna a le amio leaga ma le ulavale, e ulavale ai; ia faapea foi ona tuuina atu nei o outou tino e fai ma auauna a le amiotonu, e iu i le faapaiaina.

Auā ua galulue manao leaga talu le tulafono, i o tatou tino, ina o i la le tino i tatou, e fua mai ai ni fua e oti ai;

Auā ua ou iloa e leai se mea lelei ua nofo i totonu ia te au, o lo‘u tino lea; auā ua ia te au le loto atu, a ou te lei iloa ona fai o le mea lelei;

Aue o a‘u le tagata malaia! o ai sē laveai ia te au ai le tino o lenei oti?

Auā o le mea na le mafaia i le tulafono, ina ua vaivai ia ona o le tino, ua faia lea e le Atua i lona auina mai o lona lava Alo, ua tino tagata agasala, o le taulaga foi mo agasala, na ia faasalaina ai le agasala i le tino; ina ia atoatoa ai le amiotonu i la le tulafono ia i tatou, o e le savavali i la le tino, a e i la le Agaga. Auā o e i la le tino e loto atu i latou i mea a le tino; a o e i la le Agaga e loto atu i mea a le Agaga. Auā o le loto i la le tino o le oti lea; a o le loto i la le Agaga o le ola lea ma le manuia; auā o le loto i la le tino o le ita lea i le Atua; auā e le usiusi tai i le tulafono a le Atua, e le mafai foi i ai. O i latou foi o i la le tino, e le mafai ona fiafia i ai le Atua. A o outou, tou te le i la le tino, a e i la le Agaga, pe afai e nofo le Agaga o le Atua i totonu ia te outou. Ai se tasi ua le ia te ia le Agaga o Keriso, e le fai lea mona.

auā afai tou te amio i la le tino, e oti ai outou; a e afai e fasiotia e outou amioga a le tino e le Agaga, tou te ola ai.

O lona uiga lenei, o le fanau a le tino, e le o le fanau a le Atua i latou; a e peitai o le fanau o i le upu ua folafolaina, e ta‘ua i latou o le fanau.

A ia outou oofu i le Alii o Iesu Keriso; aua foi le sauniuni mo le tino, e oo ai ona tu‘inanau.

A e le talia e le tagata faaletino o mea a le Agaga o le Atua; auā o mea valea ia ia te ia, na te le mafai foi ona iloa, auā e faamasinoina faaleagaga.

Tou te le o iloa ea o le malumalu outou o le Atua, o loo nofo foi le Agaga o le Atua i totonu ia te outou? Afai e faaleaga e se tasi le malumalu o le Atua, e faaleagaina lena tagata e le Atua; auā e paia le malumalu o le Atua, o outou lava ia.

Tou te le iloa ea, o lo outou tino o le malumalu lea o le Agaga Paia ua i totonu ia te outou, o loo ua ia te outou mai le Atua, e le aiā foi outou ia te outou? Auā ua faatauina outou i le tau; o lenei, ia outou vivii atu i le Atua i o outou tino ma ou outou agaga, o mea a le Atua ia.

Auā ua oo mai le oti talu le tagata, ua oo mai foi le toe tutū o e ua oti talu le tagata. Auā faapei ona oti uma ia Atamu, e faapea foi ona faaolaina uma ia Keriso.

Ua le tino e tasi tino uma lava; a e ese le tino o tagata, ese le tino o manu, ese le tino o i‘a, ese le tino o manu felelei.

E faapea foi le toe tutū mai o e ua oti; eluluina ma le pala, e toe faatuina mai ma le le pala; e luluina ma le matagā, e toe faatuina mai ma le matagofie; e luluina ma le vaivai, e toe faatuina mai ma le malosi; e luluina le tino faaletino, e toe faatuina mai o le tino faaleagaga; e i ai le tino faaletino, e i ai foi le tino faaleagaga. E faapea foi ona tusia, Na faia Atamu le uluai tagata ma tagata ola; a o le Atamu mulimuli, o le Agaga faaola o ia. A e peitai e le muamua le faaleagaga, a o le faaletino; ona mulimuli ai lea o le faaleagaga. E faaleeleele le uluai tagata, na fua mai i le eleele; a o le tagata mulimuli, o le Alii lea mai le lagi. Pei o lē faaleeleele, e faapea lava o e faaleeleele; pei o lē faalelagi, e faapea lava o e faalelagi. Faapei ona foliga o i tatou i lē faaleeleele, e faapea lava ona foliga o i tatou i lē faalelagi. Le au uso e, o la‘u upu lenei, e le mafaia ona avea o le malo o le Atua ma tofi o i latou ua i ai tino aano ma toto; e le fai foi le ola pea ma tofi o le iu vale.

O le mea lea matou te le faavaivai ai; auā e ui lava ina tauāu ina uma lo matou tagata i fafo, ua faafouina lē i totonu i lea aso ma lea aso.

Auā ua matou iloa afai e lepetia lo matou fale apitaga faalelalolagi, ua ia te i matou le fale mai le Atua, o le fale e lei faia e lima, e faavavau i le lagi. Auā foi ua matou feoi i lenei fale, o loo naunau tele i le fia faaofuina i lo matou fale mai le lagi; afai foi o faaofuina i matou, e le maua i matou e le lavalavā. Auā o i matou o i lenei fale apitaga, ua feoi i matou o loo mafatia; e le ona ua matou loto ina ia toeseina ofu, a ia faaofunina, ina ia tofatumoanaina le iu vale i le ola.

O lenei, le au pele e, ona ua ia te i tatou o ia upu ua folafolaina mai, ia tatou faamamā ia te i tatou i mea uma e leaga ai le tino atoa ma le agaga, ia faaatoatoina lo outou faapaiaina i le mata‘u i le Atua.

e le o i ai se Iutaia po o se Eleni, e le o i ai se pologa po o se sa‘oloto, e le o i ai se tane po o se fafine; auā ua tasi lava outou uma ia Keriso Iesu.

Ou te fai atu, ia outou savavali i la le Agaga, ona le faia lea e outou o le tu‘inanau o le tino. Auā o le tino ua tu‘inanau lea e tetee atu i le Agaga, ua tu‘inanau foi le Agaga e tetee atu i le tino; ua feteenai foi ia mea, o le mea lea tou te le fai ai mea tou te loto i ai.

A o e o ia Keriso, ua faasatauroina e i latou le tino, ma ona manao, ma ona tu‘inanau.

o sē lulu i la lona tino, e selesele mai ai e ia i la le tino le mea e pala; a o sē lulu i la le Agaga, e selesele mai ai e ia i la le Agaga le ola faavavau.

o i tatou foi, na amio faatasi i tatou uma lava ma i latou anamua, ina ua tatou nonofo i tu‘inanau o tatou tino, na faia foi e i tatou o mea na loto i ai le tino atoa ma le mafaufau, na fanau mai foi i tatou o le fanauga a le toasa, faapei o isi atoa foi.

o loo faapouliuligia o latou mafaufau, o liliueseina i latou i le ola o i le Atua, ona o le valea ua ia i latou, ona o le maaa o latou loto;

Auā o lo‘u ola ua ia Keriso lea; a o lo‘u oti, o lo‘u manuia lea.

auā o le au peritomeina i tatou, o e auauna i le Atua ma le loto, ma mitamita ia Keriso Iesu, a e le faatuatua i la le tino.

Auā o loo savavali isi e toatele, na ou fai atu soo ai ia te outou, ou te toe fai atu nei foi ma le tagi, ua latou fai mo latou fili le satauro o Keriso; o le malaia, o lo latou iuga lea; o le manava, o lo latou atua lea; o le mea latou te vivii ai, o le mea e masiasi ai lea; e loto i latou i mea a le lalolagi. Aua o lo tatou nuu moni ua i le lagi lea, o loo faatalitali mai ai i tatou i le Faaola, o le Alii o Iesu Keriso; na te liua o tatou nei tino ua leaga, ina ia faia ia faatatau i lona tino matagofie, e tusa ma le mana na te mafaia ai ona faatoilaloina o mea uma ia te ia lava.

Ia outou, ne‘i faatagataotauaina outou e se tasi i le poto le aoga e faasese ai, e tusa ma le uputuu a tagata, e tusa ma mataupu muamua a le lalolagi, a e le tusa ma mataupu a Keriso;

E le o i ai se Eleni po o se Iutaia, o sē peritomeina po o sē le peritomeina, o se tagata o nuu ese po o se Sekutia, o se ploga po o se sa‘oloto; a ua ia Keriso mea uma, o i ai foi o ia i mea uma lava.

Ia atoatoa ona faapaiaina o outou e le Atua lava e ona le manuia; ia tausia lava lo outou agaga atoa uma, i le ma le loto, atoa ma le tino, ia le mata‘uleagaina, i le afio mai o lo tatou Alii o Iesu Keriso.

Auā tatou te lei au mai lava se mea e tasi i le lalolagi, ua mautinoa foi tatou te le mafai ona ave ese ai o se mea.

Auā ua le foaiina mai e le Atua ia te i tatou le Agaga e mata‘u ai, a o le Agaga e faamalosi ai, ma alofa ai, ma mafaufau tonu ai.

auā e avea tagata ma e alolofa i latou ia i latou, o e mananao i tupe, o e loto vii, o e faamaualuga, o e upu leaga, o e le faalogo i mātua, o e le faafetai, o e amio leaga, o e le lotoaiga, o e tuumavaega, o e faatuaupua, o e le taofi manao o le tino, o e faasaua, o e le alolofa i tagata amio lelei, o e faalata, o e soona fai, o e ua faafefeteina, o e ua tele le manao i mea faafiafia a e leai se manao i le Atua; o e ua peiseai ua amio Atua, a o le mana ua i lea mea ua latou teena; ia e ‘alo ese lava i tagata faapena.

Ua mamā mea uma i e ua loto mamā, a o e loto eleelea ma le le faatuatua, e le mamā ia te i latou se mea e tasi, a ua eleelea o latou mafaufau atoa ma o latou loto fuatia ifo. Ua latou ta‘u ane ua latou iloa le Atua, a e faafiti ia te ia i a latou galuega, o inosia i latou ma faalogogata, latou te le faamaoni foi i se galuega lelei e tasi.

a ua molitino mai e le tasi i le tasi upu, ua faapea mai, Se a ea le tagata ua e manatu mai ai ia te ia; po o le atalii o le tagata ua e asiasi mai ai ia te ia? Ua e faamaulalo ane teisi o ia i agelu; ua e faapale ia te ia i le mamalu ma le viiga, ua e tofia foi o ia e pule i galuega a ou aao; ua e tuuina foi o mea uma lava i lalo o ona vae. O lenei, ina ua tuuina o mea uma i lalo ia te ia, ua le tuua e ia se mea e tasi e lei tuuina i lalo ia te ia; a ua le vaaia nei e i tatou o mea uma lava ona tuuina i lalo ia te ia.

O lenei, ina ua i ai i le fanau le tino tagata ola, na faapea foi ona ua i ai ia te ia, ina ia faaumatia e ia i lona maliu o le ua i ai le malo e oti ai, o le tiapolo lea, ma tuusaunoaina ai i latou uma o e na faapologaina i o latou olaga uma ona o le mata‘u i le oti.

Auā o loo ola le afioga a le Atua, o loo matuā galue foi, o loo sili foi lona maai i pelu uma e faatau maai itu, o loo vaevae foi e oo lava i le vavaeeseina o le loto ma le agaga, o gaugātino foi ma aano o ivi, o loo faamasino foi i manatu ma filifiliga o le loto; e le lilo foi se tasi mea na faia i ona luma, a ua taatia fua ma ua aliali mai o mea uma lava i lana silafaga, tatou te ta‘u atu ia te ia a tatou amio.

Pei ona tofia foi mo tagata ia tasi lo latou oti, a e mulimuli ane o le faamasinoga;

a ua taitasi ma faaosoosoina, pe a tosina ma maileia i lona lava tu‘inanau; pe a to le tu‘inanau ona fanau mai ai lea o le agasala; a matua le agasala ona fanaua mai ai lea o le oti. O‘u uso pele e, aua ne‘i sese outou;

E faapei o le tino ua oti ia pe a te‘a le agaga, e faapea foi le faatuatua ua mate pe a leai ni galuega.

Faauta mai ia, outou o e fai ane, O le asō po o taeao tatou te o atu ai i lea aai, po o le tasi aai, ma nonofo ai i le tausaga e tasi, ma faatau, ma maua ai oloa; a e le iloa e outou se mea e tupu a taeao. Auā pe se a lo outou ola? O le puao lava lea, ua aliali mai se itu aso itiiti, ona mou ai lea.

Auā o tagata uma lava e tusa ia ma le mutia, o le matagofie uma foi o tagata e pei o le fuga o le vao; e magumagu le mutia, e toulu foi ona fuga;

Le au pele e, ou te aioi atu ia te outou o tagata ese ma e āumau, ia mamao outou ma tu‘inanau o le tino, o mea ia e tau ma le agaga.

Aua tou te mananao i le lalolagi, po o mea o i ai i le lalolagi. Pe afai e manao se tasi i le lalolagi, e le o ia te ia le alofa i le Tamā. Auā o mea uma lava o i le lalolagi, o le tu‘inanau o le tino, ma le tu‘inanau o mata, ma le faalialia o lenei olaga, e le mai le Tamā ia, a e mai le lalolagi. O le a mavae atu foi le lalolagi, atoa ma lona tu‘inanau, a o lē fai le finagalo o le Atua, e tumau lea e faavavau.

Faauta i le silisili o le alofa ua foaiina ma e le Tamā ia te i tatou, ina ua ta‘ua i tatou o le fanau a le Atua; o le mea lea e le iloa ai i tatou e le lalolagi, auā na le iloa o ia.

a o isi ia outou faaola ia i latou ma le mata‘u, ia se‘i ia te i latou mai le afi, ma ia outou ‘ino‘ino i le ofu ua pisia i le tino.

Faauta, o loo afio mai o ia ma ao, e iloa atu foi o ia e mata o tagata uma, atoa ma e na tu‘ia o ia; e taufaitagitu‘i foi itu aiga uma o le lalolagi ona o ia. E moni, Amene.