06 – Isihogo

UJehova wamphendula uMosi wathi, “Lowo owenze isono kimi ngizamesula ogwalweni lwami. Khathesi hamba, ukhokhelele abantu endaweni engakhuluma ngayo kuwe. Ingilosi yami izahamba phambi kwakho. Kodwa-ke nxa isikhathi sami sokujezisa sesifikile, ngizabajezisa ngenxa yesono sabo.”

UJehova kazimiselanga ukumthethelela; ulaka lwakhe kanye lokutshiseka kwakhe kuzavutha phezu kwalowomuntu. Zonke iziqalekiso ezilotshwe kule incwadi zizakwehlela phezu kwakhe, njalo uJehova uzacitsha ibizo lakhe ngaphansi kwezulu.

Ngoba umlilo usulunyathiswe yikuthukuthela kwami, wona otshisa ujule uze uyethinta ukufa ngaphansi. Uzahangula udle umhlaba kanye lesivuno sawo uthungele lezinsika zezintaba.

Njengeyezi elinyamalalayo liphele, kanjalo lowo ongena engcwabeni kaphenduki.

ukuthi umuntu omubi uyaphepha ngosuku lokubhujiswa na, ukuthi uyakhululwa ngosuku lwesiphithiphithi?

Ababi babuyela engcwabeni, zonke izizwe ezikhohlwa uNkulunkulu.

ngokuba kawuzukungidela ngize ngiye engcwabeni, njalo kawuyikuyekela Ongcwele wakho abone ukubola.

Izibopho zengcwaba zangithandela; imijibila yokufa yaqondana lami.

Isandla sakho sizazibamba zonke izitha zakho; isandla sakho sokunene sizabaxhakalaza abakuzondayo. Kuzakuthi lapho uqhamuka wena uzabenza babe njengomlilo wemvutho enkulu. Ngenxa yentukuthelo yakhe uJehova uzabaginya, umlilo wakhe uzabaqothula.

Yekela ukufa kuzijume izitha zami; yekela bagqitshelwe bephila engcwabeni, ngokuba ububi buhlezi khoxo phakathi kwabo.

Sengathi bangesulwa encwadini yokuphila bangaze babalwa kanye labalungileyo.

Labo abamzondayo uJehova bangatshotshobala phambi kwakhe, kuthi isijeziso sabo sibe ngesaphakade.

Ngokuba lukhulu uthando lwakho kimi; ungenyule ekujuleni kwengcwaba.

Umuntu ongelangqondo akazi, iziwula kazizwisisi, ukuthi loba ababi bemila njengotshani lezigangi zonke ziphumelela, zizabhujiswa nini lanini.

Abanye bahlala emnyameni lasethunzini elinzima beyizibotshwa ezihluphekayo zibotshwe ngamaketane ensimbi, ngoba babewahlamukele amazwi kaNkulunkulu beyisa iseluleko soPhezukonke.

UJehova uyabalinda bonke abamthandayo, kodwa bonke ababi uzababhubhisa.

Kodwa kabazi ukuthi kuyafiwa, kuleyondawo, ukuthi izethekeli zalowomfazi sezaphelela ekujuleni kwengcwaba.

UKufa lokuBhujiswa kusobala phambi kukaJehova  —  pho-ke kangakanani izinhliziyo zabantu!

Indlela yempilo iyimpumelelo kohlakaniphileyo ukuze angalengeli engcwabeni.

Ungayekeli ukumlaya umntwana; ukumtshaya ngoswazi akuyikumbulala. Mjezise ngoswazi ukuze uphephise umphefumulo wakhe ekufeni.

UKufa leNcithakalo kakusuthisi, anjalo lamehlo omuntu.

Manje-ke konke sekuzwakele; Nansi isiphetho sendaba; Mesabe uNkulunkulu ugcine imiyalo yakhe, ngoba lo yiwo wonke umlandu womuntu. Ngoba uNkulunkulu uzazahlulela zonke izenzo, lalokho okufihliweyo loba kuhle loba kubi.

Ukukhanya kuka-Israyeli kuzakuba ngumlilo, oNgcwele wabo abe lilangabi, ngosuku olulodwa lizatshisa liqede ameva akhe lokhula lwakhe. Ubuhle bamahlathi akhe lamasimu akhe avundileyo, uzakuqeda ngokupheleleyo njengalapho umuntu ogulayo ecikizeka.

njalo uzathokoziswa yikwesaba uJehova. Kayikwahlulela ngalokho akubona ngamehlo akhe, loba aqume ngalokho akuzwa ngendlebe zakhe; kodwa abaswelayo uzabehlulela ngokulunga aqumele abayanga basemhlabeni ngokulunga. Uzatshaya umhlaba ngentonga yomlomo wakhe; ngomoya wendebe zakhe uzabulala ababi.

Lilani ngoba usuku lwenkosi seluseduze. Luzafika njengokuchithakala okuvela kuSomandla. Ngenxa yalokhu izandla zonke zizakuba buthakathaka, izinhliziyo zabantu bonke zizaphela amandla. Bazakuba lokwesaba okukhulu, baphathwe yibuhlungu losizi; bazabhinqika njengowesifazana ehelelwa. Bazakhangelana bemangele, ubuso babo bungamalangabi. Khangelani usuku lukaJehova luyeza  —  usuku lwesihluku, ulaka lokuthukuthela okukhulu  —  ukwenza ilizwe lichitheke, kubhujiswe izoni eziphakathi kwalo. Izinkanyezi zezulu lemithala yazo akuyikukhanyisa. Ilanga eliphumayo lizafiphazwa lenyanga ayiyikukhanyisa. Umhlaba ngizawujezisa ngenxa yobubi bawo, lababi ngenxa yezono zabo. Ngizaqeda ukukloloda kwabazikhukhumezayo ngehlise ukuzigqaja kwabalesihluku.

Ngakho-ke ngizakwenza amazulu anyikinyeke lomhlaba uzamazame endaweni yawo ngokuthukuthela kukaJehova uSomandla, ngosuku lolaka lwakhe oluvuthayo.

Ithuna ngaphansi liyanyakaza ukuba likuhlangabeze ekufikeni kwakho. Livusa imimoya yabafayo ukuba ikubingelele  —  bonke labo ababengababusi emhlabeni; libenza basukume ezihlalweni zabo zobukhosi  —  bonke labo ababengamakhosi ezizwe. Bazaphendula bonke, bazakuthi kuwe, “Lawe usubuthakathaka njengathi, usube njengathi.” Bonke ubukhosi bakho sebehliselwe phansi ethuneni, kanye lomsindo wamachacho akho. Impethu zendlaliwe ngaphansi kwakho, inhlavane zikwembesile.

Yeka ukuwa kwakho uvela ezulwini wena nkanyezi yekuseni, ndodana yokusa! Uphoselwe phansi emhlabeni, wena owake wehlisela izizwe phansi! Wathi enhliziyweni yakho, “Ngizakwenyukela ezulwini, ngizaphakamisela isihlalo sami sobukhosi ngaphezu kwezinkanyezi zikaNkulunkulu. Ngizahlala ebukhosini phezu kwentaba yombuthano ezingqongweni zentaba engcwele. Ngizakwenyukela ngaphezu kwezingqongo zamayezi; ngizazenza njengoPhezukonke.” Kodwa ulethwe phansi ethuneni, ekuzikeni kwegodi.

Khathesi asafa, kawasaphili; imimoya leyana eyahambayo kayivuki. Wawajezisa, wawatshabalalisa; wesula konke ukukhunjulwa kwawo.

Khangelani, uJehova uyaphuma lapho ahlala khona ukuba ajezise abantu basemhlabeni ngenxa yezono zabo. Umhlaba uzaveza igazi elachithwa kuwo; kawusayikubafihla ababulawayo bawo.

Aliyikucitshwa ebusuku lemini; intuthu yalo izathunqa kokuphela. Lizakuba ngelichithiweyo kusukela kusizukulwane kusiya kusizukulwane; kakho ozadabula phakathi kwalo futhi.

Ngoba ingcwaba alingeke likubonge lokufa akungeke kukudumise; labo abangena emgodini abangeke bathemba ubuqotho bakho.

Khangelani, uJehova uza ngomlilo, izinqola zakhe zempi zinjengesivunguzane; ulaka lwakhe uzalwehlisela phansi ngokufuthelana, lokukhuza kwakhe kwehle ngamalangabi omlilo. Ngoba ngomlilo langenkemba yakhe uJehova uzakwahlulela abantu bonke, njalo abanengi bazakuba yilabo ababulewe nguJehova.

“Bazaphuma babone izidumbu zabantu abangihlamukelayo; impethu yazo kayiyikufa, lomlilo wazo kawuyikucitshwa, njalo zizakwenyanyeka ebantwini bonke.”

Ngoba yonke imiphefumulo ephilayo ngeyami, uyise kanye lendodana  —  bobabili ngokufanayo ngabami. Umphefumulo owonayo yiwo ozakufa.

“Ngasengiqhubeka ngilokhu ngibukele ngenxa yamazwi okuzikhukhumeza ayekhulunywa luphondo. Ngala ngilokhu ngikhangele isilo saze sabulawa, isidumbu saso saphoselwa emlilweni ovuthayo.

Izakhuluma okubi ngoPhezukonke icindezele abangcwele bakhe izame ukuguqula izikhathi ezimisiweyo kanye lemithetho. Abangcwele bazanikelwa kuyo okwesikhathi esithile, izikhathi ezilengxenye yesikhathi. “Kodwa umthethwandaba uzahlala phansi, amandla ayo asuswe abhidlizwe okwanini lanini.

Izixuku lezixuku zabaleleyo othulini lomhlaba bazavuka; abanye baye ekuphileni okungapheliyo, abanye baye ehlazweni lokunengeka okungapheliyo.

“Ngeqiniso luyeza usuku; luzavutha njengesithando somlilo. Zonke iziqholo njalo zonke izixhwali zizakuba ngamabibi, njalo lolosuku oluzayo luzabathungela ngomlilo,” kutsho uJehova uSomandla. “Kakuyikusala mpande loba gatsha kubo.

Kodwa wathi ebona abaFarisi labaSadusi abanengi besiza lapho ayebhaphathizela khona, wathi kubo, “Lina nzalo yezinyoka! Ngubani olixwayisileyo ukuthi libalekele ulaka oluzayo na?

Khathesi nje ihloka livele seleyanyisiwe ezimpandeni zezihlahla, ukuthi zonke lezozihlahla ezingatheli izithelo ezinhle zizaganyulelwa phansi ziphoselwe emlilweni.

Isitsha sakhe sokwela sisesandleni sakhe, njalo uzathanyela isiza sakhe, abuthele wonke amabele esiphaleni, kuthi amakhoba awatshise ngomlilo ongacimiyo.”

“Selezwa ukuthi kwathiwa kwabasendulo, ‘Ungabulali; lowo obulalayo uzagwetshwa.’ Kodwa ngilitshela ngithi loba ngubani ozondela umfowabo uzakwahlulelwa emthethwandaba. Njalo lowo othi kumfowabo, ‘Silima ndini,’ uzathonisiswa eMphakathini. Kodwa lowo othi, ‘Wena siwula!’ uzakuba sengozini yomlilo wesihogo.

Nxa ilihlo lakho lokunene likwenzisa isono likhuphuluze ulikhuphe ulilahlele khatshana. Kungcono kuwe ukuthi ulahlekelwe ngesisodwa isitho somzimba wakho kulokuthi umzimba wakho wonke uphoselwe esihogweni somlilo. Njalo nxa isandla sakho sokunene sikwenzisa isono, siqume usiphosele kude. Kungcono kuwe ukuthi ulahlekelwe ngesisodwa isitho somzimba wakho kulokuthi umzimba wakho wonke uye esihogweni somlilo.

“Ngenani ngesango elincinyane ngokuba likhulu isango lendlela ibanzi eya ekubhujisweni, njalo banengi abangena ngalo. Kodwa lincinyane isango lendlela ilukhonjwana eya ekuphileni, njalo balutshwana abayifumanayo.

Zonke izihlahla ezingatheli izithelo ezinhle ziyaganyulwa ziphoselwe emlilweni. Ngakho-ke lizabazi ngezithelo zabo.

“Kakusibo bonke abathi kimi, ‘Nkosi, Nkosi’ abazangena embusweni wezulu, kodwa ngulowo kuphela owenza intando kaBaba osezulwini. Abanengi bazakuthi kimi ngalolosuku, ‘Nkosi, Nkosi, kasiphrofethanga ngegama lakho na, njalo ngegama lakho sakhupha amadimoni senza lezimangaliso?’ Lapho-ke ngizabatshela kakuhle ngithi, ‘Ngivele kangilazi. Xekani kimi, lina benzi bobubi!’

Kodwa abanini bombuso bazaxotshelwa phandle emnyameni lapho okuzakuba khona ukukhala lokugedla amazinyo.”

Lingabesabi labo ababulala umzimba kodwa bengeke babulale umphefumulo. Kodwa yesabani lowo ongabhubhisa kokubili umphefumulo lomzimba esihogweni.

Umuntu olungileyo uletha izinto ezinhle ziphuma ebuhleni abulombe ngaphakathi kwakhe, njalo lomuntu omubi ukhihliza izinto ezimbi azigcine ngaphakathi kwakhe. Kodwa ngiyalitshela ukuthi abantu bazamele baziphendulele ngosuku lokwahlulelwa ngawo wonke amazwi obutshapha abawakhulumayo. Ngokuba lizakhululwa mayelana lamazwi enu njalo lizalahlwa ngokumayelana lamazwi enu.”

Insimu yilizwe, njalo inhlanyelo enhle imele amadodana ombuso. Ukhula lungamadodana omubi, njalo isitha esiluhlanyelayo nguSathane. Isivuno siyikuphela komhlaba, njalo abavuni yizingilosi. “Njengalokhu ukhula lusitshunwa lutshiswe emlilweni, kuzakuba njalo ekupheleni komhlaba. Indodana yoMuntu izathuma izingilosi zayo zicente konke okubanga isono embusweni wayo labo bonke abenza ububi. Zizabaphosela esihogweni somlilo ongungumayo okuzakuba khona ukukhala lokugedla amazinyo.

Lokhu yikho okuzakwenzakala ekupheleni komhlaba. Izingilosi zizakuza zehlukanise ababi kwabalungileyo zibaphosele esihogweni somlilo ongungumayo, lapho okuzaba lokukhala lokugedla amazinyo.

Yikho ngiyakutshela ukuthi unguPhethro, njalo phezu kwalelidwala ngizakwakha ibandla lami, futhi amasango aseHadesi akayikulahlula.

Kuzamsiza ngani umuntu uma ezuza wonke umhlaba, kodwa alahlekelwe ngumphefumulo wakhe na? Phela iNdodana yoMuntu izakuza ngobukhosi bukaYise kanye lezingilosi zakhe, ibisivuza umuntu ngamunye mayelana lalokho akwenzileyo.

Wasesithi, “Ngiqinisile ngithi kini, ngaphandle kokuba liguquke libe njengabantwana abancinyane, kalisoze lafa langena embusweni wezulu.

Kodwa loba ngubani owenza omunye walaba abancinyane abakholwa kimi ukuthi enze isono, kungaba ngcono kuye ukuthi kulengiswe entanyeni yakhe ilitshekazi lokuchola agaluliswe enzikini yolwandle.

Aluba isandla sakho loba unyawo lwakho lukwenzisa isono kuqume ukulahle. Kungcono kuwe ukuba ungene ekuphileni uyingini kumbe ugogekile kulokuba lezandla ezimbili kumbe izinyawo ezimbili ujinge uphoselwe emlilweni waphakade. Aluba ilihlo lakho likwenzisa isono, likopole ulilahle. Kungcono kuwe ukungena ekuphileni ulelihlo elilodwa kulokuba lamehlo amabili kodwa uphoselwe emlilweni wesihogo.

“Kodwa kwathi inkosi ingena ukuzabona izethekeli yananzelela khonapho indoda eyeyingavunulanga izigqoko zomtshado. Yabuza yathi, “Mfowethu, ungene njani lapha ungelazigqoko zomthimba?’ Indoda yatsha amathe. “Inkosi yase itshela izithunywa zayo yathi, ‘Mbopheni izandla lezinyawo limphosele ngaphandle ebumnyameni, lapho okuzakuba khona ukukhala lokugedla amazinyo.’

“Lina zinyoka! Lina nkunkuma yezinhlangwana! Lizaphepha kanjani ukuba lilahlelwe esihogweni na?

Izayiquma iziqayiqa, iyabele indawo kanye labazenzisi, lapho okuzakuba khona ukukhala lokugedla amazinyo.

“Kodwa kwathi besayathenga amafutha umyeni wafika. Izintombi ezazizilungiselele zangena laye edilini lomthimba. Umnyango wase uvalwa. “Ngemuva kwesikhathi ezinye lazo zatsho sezifikile. Zathi, ‘Mnumzana! Mnumzana! Ake usivulele umnyango!’ “Kodwa waphendula wathi, ‘Ngiqinisile, kangilazi.’

Manje-ke iphoseni ngaphandle inceku engelamsebenzi, ebumnyameni lapho okuzakuba khona ukukhala lokugedla amazinyo.’

“Nxa iNdodana yoMuntu isisiza ngenkazimulo yayo, ikanye lezingilosi zonke, izahlala esihlalweni sayo sobukhosi ilenkazimulo yasezulwini. Zonke izizwe zizabuthaniswa phambi kwayo, ibe isisahlukanisa abantu omunye komunye njengomalusi esahlukanisa izimvu ezimbuzini. Izabeka izimvu ngasekunene kwayo lezimbuzi ngasekhohlo.

“INkosi izakuthi kulabo abasekhohlo kwayo, ‘Xekani kimi lina elithukiweyo liye emlilweni wanininini owalungiselwa uSathane lezingilosi zakhe. Ngokuba ngangilambile, kalingiphanga lutho lokudla, ngangomile kalingiphanga lutho lokunatha, ngangiyisihambi kalingingenisanga, ngangiswela izambatho kalingigqokisanga, ngangigula njalo ngisentolongweni kalizange lingidinge.’ “Labo bazaphendula bathi, ‘Nkosi, sakubona nini ulambile kumbe womile kumbe uyisihambi kumbe ungelazigqoko kumbe ugula noma usentolongweni asaze sakunceda na?’ “Izaphendula ithi, ‘Ngiqinisile ngithi, loba kuyini elingakwenzelanga oyedwa nje omncinyane kulabo bonke walaba, kalikwenzelanga mina.’ “Bazasuka baye ekujezisweni kwaphakade, kodwa abalungileyo baye ekuphileni okungapheliyo.”

Kodwa loba ngubani ohlambaza uMoya oNgcwele akayikufa wathethelelwa; ulecala lesono saphakade.”

Kumsizani umuntu ukuzuza wonke umhlaba kodwa alahlekelwe ngumphefumulo wakhe? Loba, kuyini umuntu angakunika kube yinhlawulo yomphefumulo wakhe na?

“Aluba umuntu ekhubekisa oyedwa walaba abancinyane abakholwa kimi ukuba enze isono, bekungaba ngcono kuye ukuthi aphoselwe olwandle ebotshelwe ilitshe elikhulu entanyeni yakhe. Aluba isandla sakho sikwenzisa ukona, siqume. Kungcono kuwe ukuthi ungene ekuphileni ungungini kulokuya esihogweni ulezandla ezimbili, lapho umlilo wakhona ongacimiyo, ( lapho impethu yakhona engafiyo lomlilo kawucimi). Njalo uma unyawo lwakho lukwenzisa isono, luqume. Kungcono kuwe ukuthi ungene ekuphileni uyisilima kulokuthi ulezinyawo ezimbili uphoselwe esihogweni ( lapho impethu yakhona engafiyo lomlilo wakhona kawucimi.) Njalo uma ilihlo lakho likonisa, likhuphuluze liphume. Kungcono kuwe ukungena umbuso kaNkulunkulu ulelihlo elilodwa kulokuba lamehlo amabili kodwa uphoselwe esihogweni, lapho “ ‘impethu yakhona kayifi, lomlilo kawucimi.’

Loba ngubani okholwayo abhaphathizwe uzasindiswa, kodwa lowo ongakholwayo uzalahlwa.

Ukhunimbaxa lwakhe lokwela useluphethe ezandleni ukuba ele asuse esizeni abuthele amabele akhe esiphaleni, kodwa uzatshisa amakhoba ngomlilo ongacimiyo.”

UJesu wambuza wathi, “Ungubani ibizo lakho?” “NginguLigiyoni,” waphendula, ngoba amadimoni amanengi ayengene kuye. Amncenga futhi futhi ukuthi angawalayi ukuthi ayewolokothela eMgodini oNgelamkhawulo.

Kumsizani umuntu ukuzuza wonke umhlaba kodwa alahlekelwe loba ancitshwe ubunguye bakhe na?

Lawe, Khaphenawume, uzaphakanyiselwa phezulu emkhathini na? Hatshi, uzakwehla uyephansi ekujuleni. “Lowo olalela lina ulalela mina; lowo olahla lina ulahla mina; kodwa lowo ongalayo wala yena owangithumayo.”

Kodwa ngizalitshengisa lowo okumele limesabe: Mesabeni lowo, othi esebulele umzimba, abe lamandla okuphosela esihogweni. Yebo, ngiyalitshela, mesabeni.

Ngithi, hatshi! Kodwa, ngaphandle kokuba liphenduke lani lonke lizabhubha.

Omunye wambuza wathi, “Nkosi, ngabalutshwana kuphela yini abazasindiswa na?” Wathi kubo, “Zamani ngamandla ukuthi lingene ngomnyango omncinyane, ngokuba ngiyalitshela ukuthi abanengi bazazama ukungena kodwa bazakwehluleka. Angavele aphakame umninindlu avale umnyango lizakuma phandle liqoqode lincenga lisithi, ‘Mnumzana, sivulele umnyango.’ “Kodwa uzaphendula athi, ‘Kangilazi, kangazi njalo ukuthi livela ngaphi.’ “Lapho lizakuthi, ‘Sadla lawe, sanatha sonke, njalo wafundisa emigwaqweni yakithi.’ “Kodwa uzaphendula athi, ‘Kangilazi, njalo kangikwazi ukuthi livela ngaphi. Sukani kimi, lonke lina benzi bobubi!’ “Kuzakuba khona ukukhala lapho lokugedla amazinyo, nxa selibona u-Abhrahama, lo-Isaka loJakhobe labo bonke abaphrofethi embusweni kaNkulunkulu, kodwa lina ngokwenu lilahlelwe ngaphandle.

“Kwakulendoda enothileyo eyayigqoka izigqoko zombala oyibubende lezelembu lelineni iphakathi kobutifitifi izinsuku zonke. Entubeni yomuzi wayo kwakuhlezi isiceli esasithiwa nguLazaro, ethe minci ngezilonda emzimbeni eloyisa ukudla lokho okwakukhithika etafuleni yesicebi, futhi lezinja zazifika zikhothe izilonda zakhe. “Kwafika isikhathi isiceli safa, izingilosi zasithwala zasisa eceleni lika-Abhrahama. Lesicebi laso safa sambelwa. Sasisesihogweni lapho esasitshwatshwama khona; sakhangela ngaphaya sabona u-Abhrahama ekude le, kuloLazaro eceleni kwakhe. Sasesimemeza sathi, ‘Baba Abhrahama, ake ungihawukele uthume uLazaro agxamuze isihloko somunwe wakhe emanzini apholise ulimi lwami, ngokuba ngisebuhlungwini emlilweni lo.’ “Kodwa u-Abhrahama waphendula wathi, ‘Ndodana, khumbula ukuthi ngesikhathi usaphila wazuza izinto zakho ezinhle, kodwa uLazaro wemukela izinto ezimbi, kodwa manje useduduzwa lapha, ikanti wena usebuhlungwini. Njalo ngaphandle kwakho konke lokhu, phakathi kwethu lawe kulodonga olukhulu, ukwenzela ukuthi labo abafisa ukuza ngapho besuka lapha bangeke, futhi kakho ongapho ongachaphela ngakithi.’ “Saphendula sathi, ‘Uma kunjalo-ke, ngiyakuncenga, baba, thuma uLazaro endlini kababa, ngoba ngilabafowethu abahlanu. Kafike abaxwayise, ukuze labo bangezi kule indawo yobuhlungu.’ “U-Abhrahama waphendula wathi, ‘BaloMosi labaPhrofethi; kabalalele bona.’ “Sathi, ‘Hatshi, baba Abhrahama, kodwa aluba kusuka umuntu kwabafileyo aye kubo bazaphenduka.’ “Wathi kuso, ‘Nxa bengalaleli uMosi labaPhrofethi, kabasoze bavume loba omunye angaze avuke kwabafileyo.’ ”

“UNkulunkulu walithanda ilizwe waze wanikela iNdodana yakhe iyiyo yodwa ukuze kuthi loba ngubani okholwa kuyo angabhubhi kodwa abe lokuphila okungapheliyo. Ngokuba uNkulunkulu kathumanga iNdodana yakhe emhlabeni ukuba iwulahle umhlaba, kodwa ukuba umhlaba usindiswe ngayo. Loba ngubani okholwa kuyo kalahlwa, kodwa ongakholwayo uvele uselahliwe ngokuba kakholwanga ebizweni leNdodana eyiyo yodwa kaNkulunkulu. Nanku ukuqunywa kwecala: Ukukhanya sekufikile emhlabeni, kodwa abantu bathanda ubumnyama kulokukhanya ngokuba imisebenzi yabo yayimibi. Wonke umuntu owenza ububi uyakuzonda ukukhanya, njalo kezi ekukhanyeni ngoba esesaba ukuthi izenzo zakhe zizadalulwa.

Loba ngubani obeke ithemba lakhe eNdodaneni ulokuphila okungapheliyo, kodwa loba ngubani oyilahlayo iNdodana kazukuyibona leyompilo ngokuba ulaka lukaNkulunkulu seluphezu kwakhe.”

“Kakungalimangalisi lokhu ngokuba siyeza isikhathi lapho kuzakuthi bonke abasemathuneni abo bezalizwa ilizwi layo baphume  —  labo abenze okuhle bazavuka baphile, lalabo abenze ububi bazavuka balahlwe.

Nxa loba ngubani engahlali kimi, unjengogatsha olulahliweyo lwabuna; amagatsha anjalo ayathezwa abaswe atshe.

Ngokuba kawuzukungiyekela ngiye engcwabeni njalo kawuyikuyekela oNgcwele wakho abone ukubola.

Ngoba ebona okwakungaphambili, wakhuluma ngokuvuka kukaKhristu, ukuthi kazange atshiywe engcwabeni, njalo umzimba wakhe kawukubonanga ukubola.

Ulaka lukaNkulunkulu luyabonakaliswa luvela ezulwini kukho konke ukungakhonzwa kukaNkulunkulu kanye lobubi babantu abacindezela iqiniso ngobubi babo, ngoba okungazakala ngoNkulunkulu kusobala kubo. Ngoba kusukela ekudalweni komhlaba isimo sikaNkulunkulu esingabonakaliyo  —  amandla akhe angapheliyo kanye lobuNkulunkulu bakhe  —  sekubonakele ngokusobala, kuzwisiseka ngokwenziweyo, ukuze abantu bangabi lasizatho sokuzigeza. Ngoba lanxa uNkulunkulu babemazi, kabamdumisanga njengoNkulunkulu loba bambonge, kodwa imicabango yabo yaba yize lezinhliziyo zabo eziyiziwula zaba mnyama. Lanxa bazenza abahlakaniphileyo baba yizithutha

Kodwa ngenxa yobuqholo bakho lenhliziyo yakho engaphendukiyo, uyaziqoqela ulaka oluzakuhlupha ngosuku lolaka lukaNkulunkulu, lapho okuzabonakaliswa khona ukwahlulela kwakhe okulungileyo. UNkulunkulu “uzanika umuntu wonke ngokumayelana lalokho akwenzileyo.” Kulabo abadinga inkazimulo, lodumo kanye lokungabhubhi, ngokuphikelela ekwenzeni okuhle, uzabanika ukuphila okulaphakade. Kodwa labo abazinqinekelayo abala iqiniso balandele ububi, kuzakuba lolaka lokuthukuthela.

Ngoba umvuzo wesono yikufa, kodwa isipho sikaNkulunkulu siyikuphila okungapheliyo kuKhristu uJesu iNkosi yethu.

Ngakho, khathesi akusekho ukulahlwa kulabo abakuKhristu uJesu, ngoba ngoKhristu uJesu umthetho woMoya wokuphila wangikhulula emthethweni wesono lokufa.

Lingaphindiseli, bangane bami, kodwa litshiyele ulaka lukaNkulunkulu ithuba, ngoba kulotshiwe ukuthi: “Ukuphindisela ngokwami; ngizaphindisela,” kutsho iNkosi.

Kulotshiwe ukuthi: “ ‘Ngeqiniso elinjengoba ngikhona,’ kutsho uJehova, ‘amadolo wonke azaguqa phambi kwami; izindimi zonke zizavuma kuNkulunkulu.’ ” Ngakho-ke omunye lomunye wethu uzabika akwenzayo kuNkulunkulu.

Ngoba sonke kumele sime phambi kwesihlalo sokwahlulela sikaKhristu, ukuze lowo lalowo amukele okumfaneleyo okwezinto azenzayo esemzimbeni, langabe ngezinhle loba ezimbi. Ngakho njengoba sikwazi ukuthi ukwesaba iNkosi kuyini, siyazama ukubancenga abantu. Lokhu thina esiyikho kusobala kuNkulunkulu, njalo ngithemba kusobala lakuzazela zenu.

Loba ngubani owenza okubi uzaphindiselwa ububi bakhe, njalo akukho bandlululo.

Izabajezisa labo abangamaziyo uNkulunkulu njalo bengalilaleli ivangeli leNkosi yethu uJesu. Bazajeziswa ngokubhujiswa okulaphakade bavalelwe ngaphandle kobukhona beNkosi lasenkazimulweni yamandla ayo

Njengalokhu umuntu wamiselwa ukufa kanye, kuthi emva kwalokho abhekane lokwahlulelwa,

Uma siqhubeka sisenza izono ngabomu emva kokuba iqiniso sesilazi, kawusekho umhlatshelo wezono, kodwa umlindelo kuphela owesabekayo wokwahlulelwa kanye lomlilo ovuthayo ozaqothula izitha zikaNkulunkulu.

Pho licabanga ukuthi ufanele ukujeziswa kakhulu okungakanani umuntu owanyathela iNdodana kaNkulunkulu ngaphansi konyawo, ophathe igazi lesivumelwano elamenza waba ngcwele njengento engangcwele, lohlambaza uMoya womusa na? Ngoba thina siyamazi lowo owathi, “Ukuphindisela ngokwami; ngizabuyisela,” njalo wathi, “INkosi izakwahlulela abantu bayo.” Kuyinto eyesabekayo ukuwela ezandleni zikaNkulunkulu ophilayo.

Ngoba uKhristu wafela izono zenu kwaba kanye, olungileyo efela abangalunganga, ukuze alise kuNkulunkulu. Wabulawa emzimbeni kodwa wavuswa nguMoya, wahamba ngaye wayatshumayela emimoyeni eyayisentolongweni yona

Kodwa phakathi kwabantu kwakulabaphrofethi bamanga futhi, njengoba kuzakuba labafundisi bamanga phakathi kwenu. Ngasese bazangenisa ukholo lwamanga oluchithayo, baze bayiphike leNkosi yobukhosi eyabathengayo  —  bazilethele ukubhujiswa ngokuphangisa. Abanengi bazalandela izindlela zabo ezilihlazo benze lendlela yeqiniso idumazeke. Ngobugovu babo abafundisi laba bazakwenza inzuzo ngani ngezinganekwane zokuzibumbela. Ukulahlwa kwabo kubengamile, lokubhujiswa kwabo akuzange kukhohlakale.

Ngoba uma uNkulunkulu engaziyekelanga izingilosi ekwenzeni kwazo isono, kodwa wazisa egehena, wazifaka emigodini emnyama ukuba zigcinelwe ukwahlulelwa; uma engayekelanga umhlaba wasendulo lapho aletha uzamcolo ebantwini bawo ababengamesabi uNkulunkulu, kodwa wamvikela uNowa, umtshumayeli wokulunga, labanye abayisikhombisa; uma watshabalalisa amadolobho aseSodoma leGomora ngokuwatshisa abe ngumlotha, wawenza aba yisibonelo salokho okuzakwenzakala kwabangamesabiyo uNkulunkulu; njalo uma wahlenga uLothi, umuntu olungileyo, owayekhathazekile ngokuphila okungcolileyo kwabantu ababengelamthetho (ngoba lowomuntu olungileyo, owayehlala phakathi kwabo izinsuku zonke, wayehlutshwa yizenzo zabo ezimbi ayezibona layezizwa)  — uma lokhu kunjalo, uNkulunkulu uyakwazi ukuhlenga abantu abamesabayo ekulingweni kanye lokugcinela abangalunganga usuku lokwahlulela, eqhubeka ngokujeziswa kwabo. Lokhu kuliqiniso ikakhulu kulabo abalandela izinkanuko zokonakala ezemvelo yabo yesono njalo beseyisa umthetho. Ngesibindi lokuzikhukhumeza, abantu laba kabakwesabi ukuhlambaza izidalwa zasezulwini; ikanti lezingilosi, lanxa ziqinile njalo zilamandla amakhulu, kazizethesi macala ngokuhlambaza izidalwa ezinjalo phambi kweNkosi.

Abantu laba bayimithombo engelamanzi lezinkungu eziqhutshwa yisiphepho. Umnyama omkhulu ugcinelwe bona.

Ngalonalelolizwi amazulu akhathesi kanye lomhlaba kugcinelwe umlilo, kulindele usuku lokwahlulela lokubhujiswa kwabantu abangamesabiyo uNkulunkulu.

INkosi kayiphuzi ukugcwalisa isithembiso sayo, njengokuqedisiswa ngabanye ngokuphuza. Iyalibekezelela, ingafuni ukuba lamunye abhubhe, kodwa ukuba umuntu wonke aphenduke.

Lowo ozonda umzalwane wakhe ungumbulali, njalo liyakwazi ukuthi akulambulali olokuphila okungapheliyo kuye.

Ubufakazi lobo yilobu: UNkulunkulu usinike ukuphila okulaphakade, njalo lokhu kuphila kuseNdodaneni yakhe. Lowo oleNdodana yakhe ulokuphila; lowo ongelayo iNdodana kaNkulunkulu kalakho ukuphila.

Ngoba abantu abathile abokulahlwa kwabo kwalotshwa endulo sebengene phakathi kwenu ngasese. Bangabantu abangamesabiyo uNkulunkulu abaguqulela umusa kaNkulunkulu ukuthi ubeyimvumo yokuganga bamphike loJesu Khristu onguyena Mbusi leNkosi yethu kuphela.

Lezingilosi ezingagcinanga izikhundla zazo zamandla kodwa zadela ikhaya lazo  —  lezi wazigcina ebumnyameni, zibotshwe ngamaketane angaqamukiyo zilindele ukwahlulelwa ngoSuku olukhulu. Ngokunjalo, iSodoma leGomora lamadolobho aseduzane azinikela ekuxhwaleni kobufebe lokonakala. Ayisibonelo salabo abezwa isijeziso somlilo wanini lanini.

Abantu laba bayizinengiso emadilini enu abantu abathetheneyo, besidla lani bengelanhloni lakancane  —  abelusi abazinika ukudla bona bodwa. Bangamayezi angelazulu, aphetshulwa ngumoya; izihlahla zasekwindla ezingelazithelo ezisitshuliweyo  —  zife kabili. Bangamagagasi olwandle alamandla, bebhubhudla ihlazo labo; izinkanyezi ezintulayo, ezilobumnyama obukhulu obugcinelwe zona kuze kube nininini.

lenyule abanye emlilweni libasilise; kwabanye bonakalisani isihawu, kuhlangene lokwesaba  —  lizonde lezigqoko ezingcoliswe yimizimba exhwalileyo.

NgingoPhilayo; ngangifile, njalo khangela ngiyaphila kuze kube nininini! Njalo ngiphethe izivulo zokufa kanye leNdawo yabafileyo.

Lowo olendlebe, kezwe okutshiwo nguMoya emabandleni. Lowo onqobayo kasoze alinyazwe lakancane yikufa kwesibili.

Ingilosi yesihlanu yakhalisa icilongo layo, ngasengibona inkanyezi eyavela emkhathini iwela emhlabeni. Inkanyezi leyo yayiphiwe ikhiye yoMgodi ongelamkhawulo. Isivule umgodi ongelamkhawulo kwaphuma kuwo inthuthu efana lentuthu ephuma esithandweni somlilo esikhulukazi. Ilanga lomkhathi kwaba mnyama ngentuthu eyaphuma emgodini ongelamkhawulo.

Ingilosi yesithathu yazilandela yathi ngelizwi elikhulu, “Nxa umuntu angakhonza isilo lesifanekiso saso abekwe uphawu lwaso ebunzini loba esandleni, laye uzanatha iwayini lentukuthelo kaNkulunkulu, elithelwe ngamandla agcweleyo enkomitshini yolaka lwakhe. Uzachukuluzwa ngesolufa elitshisayo phambi kwezingilosi ezingcwele laphambi kweWundlu. Intuthu yokuchukuluzwa kwabo ithunqa kuze kube nininini. Akukho suku lokuphumula loba ubusuku kulabo abakhonza inyamazana lesifanekiso sayo, loba lowo obekwa uphawu lwebizo layo.”

Inyamazana eyake yaba khona, njalo khathesi engasekho, yinkosi yesificamibili. Ngenye yalawo ayisikhombisa njalo isisiya ekubhujisweni kwayo.

Yamemeza ngelizwi elikhulu yathi: “Idilikile! Idilikile iBhabhiloni eNkulu! Isibe likhaya lamadimoni Lommango wabomoya ababi, Lommango wezinyoni zonke ezingcolileyo lezenyanyekayo. Ngoba izizwe zonke zinathe iwayini elihlanyisayo lobufebe bayo. Amakhosi omhlaba afeba layo, labathengisi basemhlabeni banothiswa yinotho yayo edlulisileyo.”

Ukukhanya kwesibane akusoze kukhanye kuwe futhi. Ilizwi lomyeni lelomlobokazi kalisoze lizwakale kuwe futhi. Abathengisi bakho babeyizikhulu zomhlaba. Izizwe zonke zadukiswa yibuthakathi bakho. Kuwe kwafunyanwa igazi labaphrofethi lelabangcwele, kanye lelabo bonke ababulawayo emhlabeni.’ ”

ngoba ukwahlulela kwakhe kuqotho njalo kulungile. Usilahlile isiphingi esikhulu esixhwalisa umhlaba ngobufebe baso. Uphindisele kuso igazi lezinceku zakhe.” Bamemeza njalo bathi: “Haleluya! Intuthu yokutsha kwaso ithunqa kuze kube nininini.”

Ugqoke isambatho esigxanyuzwe egazini, njalo ibizo lakhe nguLizwi likaNkulunkulu. Amabutho asezulwini ayemlandela, egade amabhiza amhlophe njalo egqoke ilineni elihle, elimhlophe njalo lihlanzekile. Emlonyeni wakhe kuphuma inkemba ebukhali agalela ngayo izizwe. Uzazibusa ngentonga yensimbi. Unyathela isikhamelo sewayini sentukuthelo yolaka lukaNkulunkulu uSomandla.

Ngasengibona ingilosi imi elangeni, eyamemezela ngelizwi elikhulu ezinyonini zonke ezazindiza emoyeni isithi, “Wozani libuthanele idili elikhulu likaNkulunkulu, ukuze lidle inyama yemizimba yamakhosi, leyezinduna zempi, leyamadoda alamandla, eyamabhiza leyabagadi bawo, kanye leyabantu bonke, abakhululekileyo lezigqili, abancane labakhulu.”

Kodwa isilo sathunjwa, ndawonye lomphrofethi wamanga owayenze izibonakaliso ezimangalisayo emele sona. Ngalezizibonakaliso wabedukisa labo ababebekwe uphawu lwesilo bakhonza isifanekiso sayo. Sona lomphrofethi wamanga baphoselwa bephila echibini lomlilo wesolufa elivuthayo. Abanye babo, babulawa ngenkemba eyaphuma emlonyeni womgadi webhiza, njalo izinyoni zonke zazitika ngenyama yemizimba yabo.

Ngabona ingilosi isehlela phansi isuka ezulwini, ilesihluthulelo soMgodi ongelamkhawulo iphethe ngesandla sayo iketane elikhulu. Yabamba umgobho, inyoka endala leyana, engoMubi loba uSathane, yambopha okweminyaka eyinkulungwane. Yamphosela eMgodini ongelamkhawulo, yakhiya, yawuvala silikici, ukumvimbela ukuba angakhohlisi izizwe futhi kuze kuphele iminyaka eyinkulungwane. Emva kwalokho kumele akhululwe okwesikhatshana.

Iminyaka eyinkulungwane isidlule, uSathane uzakhululwa entolongweni yakhe, aphume ukuyakhohlisa izizwe emagumbini amane omhlaba  —  uGogi loMagogi  —  ukuba abaqoqele impi. Ngobunengi bangangenhlabathi ekhunjini lolwandle. Badabula phakathi komhlaba bahonqolozela izihonqo zabantu bakaNkulunkulu, idolobho alithandayo. Kodwa kwehla umlilo uvela ezulwini wabaqothula. Omubi, owayebakhohlisile, waphoselwa echibini lesolufa elivuthayo, lapho okwakuphoselwe khona inyamazana lomphrofethi wamanga. Bazachukuluzwa emini lebusuku kuze kube nininini.

Ngabuya ngabona isihlalo sobukhosi esikhulu kanye lalowo owayehlezi kuso. Umhlaba lomkhathi kwabaleka phambi kwakhe, akwaze kwaba lendawo yakho. Ngasengibona abafileyo, abancane labakhulu, bemi phambi kwesihlalo sobukhosi, kwasekuvulwa izincwadi. Kwavulwa enye incwadi, eyincwadi yokuphila. Abafileyo bahlulelwa mayelana lalokho ababekwenzile okwakulotshwe ezincwadini. Ulwandle lwakhupha abafileyo ababekulo, ukufa leHadesi kwakhupha abafileyo ababekukho, umuntu ngamunye wahlulelwa mayelana lalokho akwenzayo. Ukufa leHadesi kwaphoselwa echibini lomlilo. Ichibi lomlilo liyikufa kwesibili. Uma umuntu ibizo lakhe lalitholakala lingalotshwanga encwadini yokuphila, wayephoselwa echibini lomlilo.

Kodwa amagwala, labangakholwayo, labaxhwalileyo, lababulali leziphingi, labathakathi, labakhonza izithombe labo bonke abaqamba amanga  —  indawo yabo izakuba sechibini lomlilo wesolufa ovuthayo. Lokhu yikufa kwesibili.”

Owenza okubi kaqhubeke esenza okubi; oxhwalileyo kaqhubeke ngokuxhwala; olungileyo kaqhubeke esenza okulungileyo; njalo ongcwele kaqhubeke engcwele.”

Ngiyabaxwayisa bonke abezwa amazwi esiphrofetho sencwadi le: Uma umuntu ezakwengeza olunye ulutho kuwo, uNkulunkulu uzazengeza kuye izifo ezibaliswe kule incwadi. Njalo uma umuntu esusa amazwi kule incwadi yesiphrofetho, uNkulunkulu uzamthathela isabelo sakhe esihlahleni sokuphila lasedolobheni elingcwele, okubaliswe kule incwadi.