21 – Tapua'iga

Na la feooai foi o Enoka ma le Atua; ua le iloa foi e ia, auā na avea o ia e le Atua.

A o Mekisateko le tupu o Salema ua avane e ia areto ma uaina; o le faitaulaga foi o ia a le Atua silisili ese. Ua ia faamanuia foi ia te ia, ua faapea atu, Ia manuia Aperamo i le Atua silisili ese, e ona le lagi ma le lalologi; ia faafetaia foi le Atua silisili ese, o le na tuuina mai ou fili i ou lima. Ua foai atu foi e Aperamo ia te ia o mea e sefulu a‘i o mea uma.

A ua tali atu Aperamo i le tupu o Sotoma, Ua sii lo‘u lima ia Ieova, le Atua silisili ese, e ona le lagi ma le lalolagi,

Ona faapaū fao lea o Aperamo; ona fetalai mai lea o le Atua ia te ia, ua faapea mai,

Ona punou lea o le tagata, ma ifo atu ia Ieova.

Ona ou punou lea, ma ifo atu ia Ieova, ma faafetai atu ia Ieova le Atua o lo‘u matai o Aperaamo o le na ta‘ita‘i ia te au i le ala tonu, e au mai le afafine o le uso o lo‘u matai e fai ma avā a lona atalii.

Ua faalogo atu le auauna a Aperaamo i a la upu, ona ifo toele lea e ia ia Ieova.

Ua faaali mai ai ia te ia le agelu a Ieova i le afi mumū i totonu o le laau talatala; ona vaai atu lea o ia, faauta, o loo mu lava le laau talatala i le afi, a e lei faaumatia le laau talatala.

Ona fetalai mai lea, Aua e te faalatalata mai iinei; ina to ese ia ou seevae i ou vae, auā ua sa lava le eleele o loo e tu ai nei.

Ona fetalai mai lea o le Atua ia Mose, O A‘U O LĒ OLA, O LOO OLA LAVA; ua ia fetalai mai foi, E te fai atu i le fanauga a Isaraelu, ia faapea O A‘U O LĒ OLA, O ia na auina mai a‘u ia te outou.

E moni lava, o le mea lava lea ua ou faatuina ai oe, ina ia ou faaali ai lo‘u mana ia te oe, ma ia ta‘ua lo‘u igoa i le lalolagi uma lava.

Ua afio Ieova i o latou luma i le ao faaniutu i le ao, e ta‘ita‘iina ai i latou i le ala, a o le afi faaniutu i le po e faamalamalama a‘i i latou, ina ia savavali i le ao atoa ma le po. E lei aveesea e ia le ao faaniutu i le ao, ma le afi faaniutu i le po i luma o le nuu.

Ona alu ane lea o le agelu a le Atua, o le na muamua atu i ‘au a Isaraelu, ua alu ane, ua mulimuli atu ia te i latou; o le ao faaniutu foi ua alu ane nai o latou luma, ua tu i o latou tua.

Ona pepese ai lea o Mose ma le fanauga a Isaraelu i lenei pese ia Ieova, ua latou fai ane, o loo faapea, Ou te pese ia Ieova, auā ua matuā manumalo o ia; o le solofanua atoa ma le na tietie ai, ua ia lafoina i le sami. O Ioa, o lo‘u malosi ia, ma la‘u pese, ua fai foi o ia mo‘u olataga; o lo‘u Atua lenei, ou te faaneenee i ai; o le Atua o lo‘u tamā, ou te vivii lava ia te ia.

Ieova e, ua mamalu lou aao taumatau i le malosi; Ieova e, o lou aao taumatau ua nutipalaina ai le ua ita mai. O le tele o lou malosi ua e lepetia ai e na tulai mai ia te oe; ua e tuuina atu loa toasa, ua ‘aina ai i latou pei o le tagutugutu o saito.

Ieova e, o ai ea se ua tusa ma oe i le vao o atua? O ai se ua tusa ma oe, o lē silisili ona paia, o lē matautia i viiga, o lē fai vavega?

E fai Ieova ma tupu e faavavau faavavau lava.

Ua oo foi ina o tautala atu Arona i le faapotopotoga atoa uma o le fanauga a Isaraelu, ua latou vaai atu i le vao, faauta, o le pupula o Ieova ua faaali mai i le ao.

Ona fetalai mai lea o Ieova ia Mose, Faauta, o le a a‘u alu atu ia te oe i le ao uliuli, ina ia lagona mai e le nuu pe a ou tautala atu ia te oe, ma ia latou talitonu pea lava ia te oe. Ua ta‘u atu foi e Mose o upu a le nuu ia Ieova.

Ona oo lea i le aso tolu i le taeao, ua i luga o le mauga o faititili, ma uila, ma le ao uliuli, o le leo foi o le pu ua matuā tele; ona gatete ai lea o le nuu uma lava sa i le togālauapi. Ona au mai lea e Mose o le nuu nai le togalauapi, latou te fetaiai ma le Atua; ona latou laulaututū ai lea i lalo o le mauga. O le mauga o Sinai foi ua pusa atoa uma; auā na afio ifo ai Ieova i le afi, ua alu ae foi ona asu pei o le asu o se umu; ua luluteleina lava le mauga atoa uma.

Ona alu ae lea o Mose i le mauga, ona ufitia lea o le mauga i le ao; ua tumau foi le pupula o Ieova i luga o le mauga o Sinai, e ono foi aso na ufitia ai i le ao; o le aso fitu foi na ia valaau mai ai ia Mose ai totonu o le ao. O le tino mai foi o le pupula o Ieova, sa pei o le afi maamaai i le tumutumu o le mauga i luma o le fanauga a Isaraelu. Ua alu foi Mose i totonu lava o le ao, ua alu ae foi i le mauga; sa i ai Mose i le mauga i ao e fagafulu ma po e fagafulu.

Ta te fetaiai ma a‘u i lea mea, ma ou tautala atu ia te oe ai luga o le nofoa o le alofa, ai le va o kerupi e lua i luga o le atolaau o le tulafono, i mea uma lava ou te fai atu ai ia te oe, e te fai atu i le fanauga a Isaraelu.

Ua ulu atu Mose i le fale ie, ona ifoifo ai lea o le ao faaniutu, ua tu foi i le faitotoa o le fale ie; ona fetalai mai lea o Ieova ia Mose. Ua iloa e le nuu atoa uma o le ao faaniutu, o loo tu i le faitotoa o le fale ie, ona tulai lea o le nuu uma, ma ifo atu ai, e taitoatasi i le faitotoa o lona fale ie. Ua fetalai mai foi Ieova ia Mose, o loo fesagai lava, faapei o le tagata ona tautalatala ma lana uo; ua foi atu Mose i le togālauapi, a o lana auauna o Iosua, o le atalii o Nuno, o le taulealea, e lei alu ese lava o ia i le fale ie.

Ona fetalai mai lea o Ieova, Ta te o atu lava ma a‘u; ou te avatua foi le mapusaga mo oe.

Ona fai atu lea o Mose, Ia e faaali mai ia te au lou mamalu. Ona fetalai mai lea o ia, Ou te faaui atu lo‘u lelei uma i ou luma; ou te ta‘u atu foi le igoa o Ieova i ou luma; ou te alofa atu foi i e ou te fia alofa atu i ai, ma ou alofa mutimutivale i e ou te fia alofa mutimutivale i ai. Ua ia fetalai mai foi, E te le mafaia ona vaai mai i o‘u mata; auā e le mafai ona vaai mai lava se tagata ia te au, ma ola pea ia. Ua fetalai mai Ieova, Faauta i le mea e latalata ane ia te au, e te tu ai i luga o le papa; a ui ane ai lo‘u mamalu, ou te tuuina oe i le māvaevae o le papa, ou te ufitia oe i lo‘u lima seia mavae ane a‘u; a a‘u ave ese lo‘u lima, ona e iloa mai lea o lo‘u tua; a o o‘u mata e le vaaia lava ia.

Ona afio ifo lea o Ieova i le ao, ua la tutū foi ma ia i lea mea, ua ia ta‘u mai foi le suafa o Ieova. Ua afio ane foi Ieova i ona luma, ma na‘ta‘u mai, O Ieova, o Ieova, o le Atua alofa mutimutivale ma le alofa fua, e telegese lona toasa, a e tele le alofa ma le faamaoni; o lō tausi le alofa e oo atu i afe o tupulaga; o lē faamagalo foi i le amioletonu ma le solitulafono ma le agasala, a e le faasaoina lava e ia o e agasala; a e taui atu e ia le agasala a mātua i a latou fanau ma le fanau a latou fanau, e oo i le tolu ma le fa o tupulaga. Ona faataalise lea o Mose, ua punou i le eleele, ma ifo.

Auā e te le ifo i se tasi atua; auā o Ieova, o le Fuā, o lona lea suafa, o le Atua fuā lava o ia.

Ona ufitia lea o le fale fetafai o le faapotopotoga i le ao, ua tumu foi le malumalu i le pupula o Ieova; ua le mafaia foi e Mose ona ulufale atu i le fale fetafai o le faapotopotoga, auā ua nofo le ao i ona luga; o le pupula foi o Ieova ua tumu ai le malumalu.

Auā o le ao o Ieova sa i luga lava o le malumalu i le ao; sa i ona luga foi le afi i le po, i luma o le aiga uma o Isaraelu, i la latou malaga uma.

Ua ulufale atu Mose ma Arona i le fale fetafai o le faapotopotoga, ona ulufafo ai lea, ma faamanuia atu i le nuu; ona faaali mai ai lea o le pupula o Ieova i le nuu uma. Ona alu ane ai lea o le afi mai luma o Ieova, ma susunu ai le taulaga mu i luga o le fata faitaulaga, atoa ma ga‘o; ua iloa e le nuu uma, ona latou alalaga ai lea, ma faapauufao.

Ua fetalai mai Ieova ia Mose, Ina fai ane ia ia Arona lou uso, aua ne‘i ulufale o ia i aso faisoo i le mea paia i tala atu o le ie puipui, i luma o le nofoa o le alofa ua i luga o le atolaau; ina ne‘i oti ai o ia, auā e faaali a‘u i le ao i luga ae o le nofoa o le alofa.

O le aso na faatuina ai le malumalu na ufitia le malumalu e le ao, o le fale fetafai lea ua i ai le tulafono; o le afiafi foi sa i luga o le malumalu o le mea ua tino mai peiseai o le afi, ua oo i le taeao. Sa faapea lava pea; o le ao na ufitia ai ina o ao, ma le mea ua tino mai peiseai o le afi ina o po.

a e peitai, o loo ola a‘u, e faatumuina lava le lalolagi uma lava i le mamalu o Ieova;

Ona faapotopotoina ai lea e Koru o le faapotopotoga uma lava i le faitotoa o le fale fetafai o le faapotopotoga e tetee ia te i laua; ona faaali mai ai lea o le pupula o Ieova i le faapotopotoga uma lava.

Ua aofia mai le faapotopotoga e tetee ia Mose ma Arona, ona latou vaavaai atu ai lea i le fale fetafai o le faapotopotoga, faauta, ua ufitia i le ao, ua faaali mai ai foi le pupula o Ieova.

Ona o ai lea o Mose ma Arona nai luma o le faapotopotoga i le faitotoa o le fale fetafai o le faapotopotoga; ona la faapauu faō ai lea; ona faaali mai ai lea o le pupula o Ieova ia te i laua.

Ona faapupulaina lea e Ieova o mata o Palaamo, ona iloa ai lea e ia o le agelu a Ieova o loo tu i le ala, ua i lona lima lana pelu ua se‘i; ona ifo ai lea o ia ua faapaūfao.

ua fai atu le ua faalogo i afioga a le Atua, ma iloa le poto o le Silisili ese; ua na iloa foi le faaaliga mai Le e ona le malosi uma lava, ua paū, a ua pupula pea ona mata.

Ua faailoaina atu ia te oe ina ia e iloa, o Ieova o ia lava le Atua, e leai se tasi na o ia lava. Ua na tŭlei mai lona siufofoga mai le lagi ia lagona e oe, ina ia a‘oa‘o mai o ia ia te oe; na ia faailoa mai foi ia te oe lana afi tele i le lalolagi, na e faalogologo foi i ana afioga ai totonu o le afi.

Ia e iloa foi i le aso nei, ma ia mafaufau ai lou loto, o Ieova o ia lava le Atua i le lagi i luga, atoa ma le lalolagi nei, e leai lava se tasi.

ua outou faapea mai, Faauta, ua faaalia mai ia te i matou e Ieova lo tatou Atua o lona pupula ma lona silisili ese, o lona siufofoga foi ua matou faalogologo i ai ai totonu o le afi; o le aso nei ua matou iloa ai ua fetalai mai le Atua i tagata, a e ola pea i latou.

Isaraelu e, faalogologo mai ia, o Ieova lo tatou Atua, o Ieova e toatasi lava ia. Ia e alofa atu ia Ieova lou Atua ma lou loto atoa, ma lou agaga atoa, ma lou malosi atoa.

Auā o Ieova lo outou Atua o le Atua o atua ia, o le Alii o alii, o le Atua silisili, e mamana o ia ma le matautia, o le na te le faailogaina tagata,

Ia e mata‘u ia Ieova lou Atua, ia e auauna ia te ia, ia e pipii foi ia te ia, ma ia e tauto i lona suafa. O ia lava lē e te viia, o ia foi o lou Atua, o le na faia mo oe nā mea tetele ma le matautia na vaai i ai ou mata.

Pe afai e te le anaana e fai i upu uma lava o lenei tulafono ua tusia i lenei tusi, ina ia e mata‘u i lenei suafa mamalu ma le matautia, O IEOVA LOU ATUA;

auā ou te valaau atu i le suafa o Ieova; ia outou vivii atu i le silisili ese o lo tatou Atua. O le Papa, e sao lava lana galuega; auā e tonu ona ala uma lava; o le Atua faamaoni, e le o ia te ia se amioletonu, o le amiotonu ma le amio sa‘o lava ia.

O lenei, ia outou iloa o a‘u, o a‘u lava o ia, e leai foi se atua e toalua ma a‘u; ou te fasiotia, ma ou faaolaina; ou te taia, ma ou faamaloloina; e leai foi se na te laveai mai ai lo‘u lima.

E leai lava se la te tutusa ma le Atua o Iesuruna, o loo tietie i le lagi e fai ma ou fesoasoani, e tietie foi i ao o le lagi i lona mamalu. O le mea e te nofo ai o le Atua o le faavavau lea; o i ou lalo foi aao o le faavavau; e tulia foi e ia i ou luma le ua ita mai; na te fetalai mai foi, Ia e faaumatia i latou.

Ona tali mai ai lea o ia, E leai, a o a‘u, o le ave ‘au a Ieova na ou sau ai nei. Ona faapaūfao ai lea o Iosua i le eleele, ma ifo atu, ua faapea atu ia te ia, Le Alii e, se a se mea e te fetalaia mai i lau auauna? Ona fetalai mai ai lea o le ave ‘au a Ieova ia Iosua, Ia e to ese lou seevae i lou vae; auā ua sa lava le mea e te tu ai na. Ona faapea lea e Iosua ona fai.

E ave e faitaulaga e toafitu o pu e fitu o le iupeli i luma o le atolaau; o le aso fitu tou te faataamilo faafitu ai i le aai; e ilia foi pu e le au faitaulaga. A faalevaleva ona ili o le pu o le iupeli, pe a outou faalogo i le leo o le pu, ona alalaga lea o le nuu uma ma le leo tele; ona solo ai lea i lalo o le pa o le aai; ona o ae ai lea o le nuu uma taitasi i o latou luma.

Ua ili pu e faitaulaga, ona alalaga ai lea o le nuu; ua faalogo le nuu i le leo o le pu, ona alalaga lea o le nuu i le leo tele, ona solo ai lea i lalo o le pa, ona o ae ai lea o le nuu i le aai taitasi i o latou luma, ua latou aea foi le aai.

Ona saei lea e Iosua ona ofu, ma faapaūfao i le eleele i luma o le atolaau a Ieova, ua oo i le afiafi, o ia, ma toeaina o Isaraelu; ua latou asu ae le efuefu i o latou ulu.

Ina faafofoga mai ia outou tupu; alii e, ina liliu mai ia o outou fofoga; o a‘u, ou te pese lava a‘u ia Ieova, ou te fai pesega ia Ieova le Atua o Isaraelu.

Ona fai mai lea o le agelu a Ieova ia te ia, O le a le mea e te fesili mai ai i lo‘u igoa, auā e silisili ese ia. Ona ave lea e Manoa o le tamai ‘oti atoa ma le taulaga i mea e ‘ai, ua ia faitaulaga ai i luga o le papa ia Ieova, ona fai lea e le agelu o le vavega, a o matamata ai Manoa ma lana avā; ua alu ae i le lagi le mumū o le afi ai luga o le fata faitaulaga, ona alu ae lea o le agelu a Ieova i le mumū o le afi o le fata faitaulaga, a o matamata ai Manoa ma lana ava; ona faapauu fao ai lea o i laua i le eleele.

E leai sē paia e tusa ma Ieova; auā ua leai se tasi ua na o oe; e leai foi se papa e tusa ma lo tatou Atua.

A o Tavita ma le aiga uma o Isaraelu na latou sisiva i luma o Ieova, ma latou ta laaupese uma e fai i le perosi, ma kitara, ma napeli, ma topa, ma lulutagitagi, ma sumepalo.

Ona siva lea o Tavita, ua faamalosi ai lava i luma o Ieova; sa ofu Tavita i le efota ia vavae. O Tavita ma le aiga uma o Isaraelu ua latou avae le atolaau a Ieova ma le alalaga ma le ili o le pu. Ua au mai le atolaau a Ieova i le aai a Tavita, ona vaai mai lea o Mekala le afafine o Saulo i le faamalama, ua na iloa Tavita le tupu, o loo osooso ma sivasiva i luma o Ieova, ona ‘ino‘ino lea o ia ia te ia i lona loto.

Ou te valaau ia Ieova, e tusa ona viia o ia; o lea a faaolaina ai a‘u ai e ita mai ia te au;

Na faititili e Ioeva mai le lagi; na tŭlei ifo e le Silisili ese o lona siufofoga.

O le mea lava lea, Ieova e, ou te vivii atu ai ia te oe i luma o nuu ese; ou te pese atu foi i lou suafa.

Ua ulufafo le au faitaulaga ai le mea paia, ona tumu lea o le fale o Ieova i le ao. Ua le mafai le au faitaulaga ona tutū e auauna ona o le ao; auā ua tumu le fale o Ieova i le pupula o Ieova.

Ona tulai atu lea o Solomona i luma o le fata faitaulaga o Ieova, i luma o le faapotopotoga uma o Isaraelu, ua na faaloaloa ae foi ona lima i le lagi; ua faapea atu foi o ia, Ieova e, le Atua o Isaraelu, e leai se atua e tusa ma oe i le lagi i luga, po o le lalolagi i lalo nei, o loo e tausia le feagaiga ma le alofa i au auauna o e savavali i ou luma ma o latou loto atoa;

Pe moni ea, e afio le Atua i le lalolagi? Faauta, o le lagi ma le lagi o lagi, e le ofi ai oe, e le atili ai ea ona ē le ofi i lenei fale ua ou faia?

Ua iloa e le nuu uma, ona faapauufao ai lea o i latou, ua faapea, O Ieova, o le Atua ia; o Ieova o le Atua ia!

Ona fai mai ai lea o Mekaio, O lenei, ia e faafogafoga mai i le afioga a Ieova. Na ou iloa atu ia Ieova o loo tietie i lona nofoālii; sa tutū foi ‘au uma a le lagi e latalata ia te ia, i lona itu taumatau ma lona itu tauagavale.

Ona tatalo atu ai lea o Esekia i luma o Ieova, ua faapea atu, Ieova e, le Atua o Isaraelu, o lē afio i le va o kerupi, o oe lava, na o oe, o le Atua o malo uma o le lalolagi, na e faia le lagi ma le lalolagi.

Ua sasaa Tavita ma Isaraelu uma i luma o le Atua ma lo latou malosi atoa, ma latou fai pesega, ua ta kitara, ma napeli, ma topa, ma sumepalo, ma ili pu.

Ua fai atu Tavita i alii sili o sa Levī, ia latou tofi ni o latou uso e usua pese i laaupese, o napeli, ma kitara, ma sumepalo, e pepese ai ma le leo tele e fiafia ai.

Ua ofu Tavita i le ofu ie vavae, o sa Levī uma foi o e na ave le atolaau, ma ē pepese, ma Kinania o le usu pese sili i ē pepese. Sa ofu Tavita i le efota ie vavae. Ua avae e Isaraelu uma le atolaau o le feagaiga a Ieova ma le alalaga, ma le leo o le foafoa, ma pu, ma sumepalo, ua ta foi napeli, ma kitara. Ua oo le atolaau o le feagaiga a Ieova i le aai a Tavita, ona vaai ifo lea o Mekala le afafine o Saulo i le faamalama, ua iloa atu le tupu o Tavita o saa ma siva, ona ‘ino‘ino lea o ia ia te ia i lona loto.

Vivii atu ia outou ia Ieova, valaau atu ia i lona suafa; ia outou faailo atu i nuu o ana mea na fai. Ia pepese outou ia te ia, ia outou fai pesega ia te ia; talatala atu ia outou i ona vavega uma lava. Ia outou mitamita i lona suafa paia; ia olioli loto o e sailiili ia Ieova. Saili ia outou ia Ieova ma lona malosi; sa iliili ia te ia, aua le aunoa.

Ia outou pepese atu ia Ieova le lalolagi uma; ia outou tala‘i atu lana faaolataga i lea aso ma lea aso. Ia outou ta‘uta‘u atu lona mamalu i nuu ese, ma ona vavega i nuu uma lava. Auā e silisili Ieova, e tusa ona matuā viia o ia; e sili foi ona matautia o ia i atua uma. Auā o atua uma o nuu o tupua lava ia; a o Ieova na ia faia le lagi. O loo i ona luma le viiga ma le matagofie; o loo i lona afioaga le malosi ma le fiafia. Outou o itu aiga o le nuu, ia outou avatua ia Ieova, ia avatua ia Ieova le viiga ma le malosi. Ia outou avatua ia Ieova le viiga o lona suafa; ia outou avatu taulaga, ma outou o atu i ona luma, ia outou ifo atu ia Ieova i le malumalu e matagofie. Ia outou gatete i ona luma le lalolagi uma; e faatumauina lava le lalolagi, ne‘i faagaeetia. Ia fiafia le lagi, ia olioli foi le lalolagi, ia outou fai atu i nuu ese, O Ieova o le tupu lava ia. Ia taalili mai le sami, ma mea ua tumu ai; ia fiafia le laueleele, ma mea uma o i ai. Ona alalaga fiafia ai lea o laau o i le vao matua i luma o Ieova, auā o loo afio mai e faamasino le lalolagi. Vivii atu outou ia Ieova; auā e lelei lava o ia; auā e faavavau lava lona alofa. Ia outou faapea atu, Le Atua o lo matou faaolataga e, ia e faaola mai, ma faapotopotoina i matou, ma laveai ia i matou ai nuu ese, ina ia matou vivii i lou suafa paia, ia mitamita foi i matou i viiga ia te oe. Ia faamanu ia Ieova o le Atua o Isaraelu mai le vavau e oo i le faavavau. Ia faapea atu foi le nuu uma, Amene, ma ia vivii atu ia Ieova.

e tutu foi i taeao uma e faafetai ma vivii atu ia Ieova, e faapea foi i afiafi;

Ona faamanu atu ai lea o Tavita ia Ieova i luma o le faapotopotoga uma, ma ua faapea atu Tavita, Ia faamanuina oe, Ieova e, le Atua o Isaraelu, lo matou tamā, mai le vavau e oo i le faavavau. Ieova e, e ou le silisili ese, ma le malosi, ma le matagofie, ma le mamalu, ma le malualii; auā o ia te oe mea uma o i le lagi ma le lalolagi; Ieova e, e ou le malo, o faasilisili oe e silisili i mea uma lava. Mai ia te oe le oloa ma le mamalu, o oe e te pule i mea uma lava; o i ai foi i lou aao le mamana ma le malosi, o ia te oe foi e faateleina ma faamalosia tagata uma lava. O lenei, lo matou Atua e, ua matou faafetai atu ia te oe, ma vivii atu i lou suafa mamalu.

Ua ulufafo mai le au faitaulaga nai le mea paia, auā sa faapaiaina le au faitaulaga uma ua i ai, ua latou le tausi i vasega. O sa Levī foi o e pepese, o i latou uma o sa Asafō, ma sa Hemanā, ma sa Iutanā, ma o latou atalii, ma o latou uso, ua oofu i ie vavae, ua i ai sumepalo, ma napeli, ma kitara, ua tutū i le itu i sasae o le fata faitaulaga, ua faatasi ma i latou le au faitaulaga e toaselau ma le toaluafulu i latou o ili pu. O e ili pu ma e o pepese ua peiseai o se toatasi, ua tasi le leo i le viiga ma le faamanu ia Ieova; ua latou pepese faatasi ma pu, ma sumepalo, ma laaupese, e vivii atu ai ia Ieova, o loo faapea atu, Auā e lelei o ia, auā e faavavau lava lona alofa, Ona tumu ai lea o le fale i le ao, o le fale lava o Ieova. Ua le mafai ai le au faitaulaga ona tutū e auauna ona o le ao; auā na tumu le fale o le Atua i le pupula o Ieova.

Ua tu o ia i luma o le fata faitaulaga o Ieova i luma o le faapotopotoga uma o Isaraelu, ma na faaloaloa ona lima; auā na faia e Solomona le tulaga ‘apa memea e lima kupita lona umi, ma le lima o kupita lona lautele, ma le tolu o kupita lona maualuga, ma ua tuu ai i totonu o le lotoā; ua tu foi o ia i ona luga, ma ua tootuli i ona tulivae i luma o le faapotopotoga uma o Isaraelu, ma ua faaloaloa ae ona lima i le lagi, Ua faapea atu foi o ia, o Ieova e, le Atua o Isaraelu, e leai se Atua e tusa ma oe i le lagi, po o le lalolagi; o loo tausia le feagaiga ma le alofa i au auauna, o ē savavali i ou luma ma o latou loto atoa;

Pe moni ea e afio le Atua ma tagata i le lalolagi? Faauta, o le lagi ma le lagi o lagi e le ofi ai oe; e le atili ai ea ona ē le ofi i lenei fale ua ou faia?

Ua faaiu e Solomona lana tatalo, ona paū ifo ai lea o le afi mai le lagi, ua faaumatia ai le taulaga mu ma taulaga; ua tumu foi le fale i le pupula o Ieova. Ua le mafaia foi e le au faitaulaga ona ulufale i le fale o Ieova, auā ua tumu le fale o Ieova i le pupula o Ieova. Ua iloa e le fanauga a Isaraelu uma o le afi ua paū ifo, ma le pupula o Ieova i luga o le fale, ona latou faapauu fao ai lea i le paepae, ma latou ifo, ma vivii atu ia Ieova, ua faapea atu, Auā e lelei o ia; auā e faavavau lona alofa.

Ua tutū atu le au faitaulaga i o latou tofi; o sa Levī foi ua i ai laaupese a Ieova, na faia e Tavita le tupu e vivii atu ai ia Ieova, auā e faavavau lona alofa; o ia mea na vivii atu ai e Tavita; ua ili pu le au faitaulaga i o latou luma, ua tutū mai foi o Isaraelu uma.

Ua toe fai mai Mekaio, O lenei, ina faafogafoga mai ia i le afioga a Ieova. Na ou iloa atu ia Ioeva o loo tietie i lona nofoālii, sa tutū foi ‘au uma a le lagi i lona itu taumatau ma lona itu tauagavale.

Ua ia filifili ma le nuu, ona tofia lea e ia o e pepese ia Ieova, ma ē vivii atu ua ia i latou teuga paia, i lo latou o atu i luma o ‘au, ma latou fai atu, Ia faamanū atu ia Ieova, auā e faavavau lona alofa.

Ua fai atu foi Esekia le tupu ma alii i sa Levī ia vivii ia Ieova i upu a Tavita, ma Asafo le tagata vaai. Ua latou vivii atu ma le fiafia, ma ua latou punonou ma ifo.

O le fanauga a Isaraelu na i ai i Ierusalema na faia e i latou le tausamiga o areto e lei faafefeteina ma le fiafia tele lava i aso e fitu; na vivii atu foi sa Levī ma le au faitaulaga ia Ieova i lea aso ma lea aso i laaupese e vivii atu a‘i ia Ieova.

Ua faavaeina e tufuga ati fale le malumalu o Ieova, ona latou tofia lea o le au faitaulaga ua oofu i latou, ua i ai foi pu, ma sa Levi o le fanauga a Asafo ua i ai sumepalo, e vivii atu ia Ieova e tusa ma le pule a Tavita le tupu o Isaraelu. Sa latou pepese i viiga ma faafetai ia Ieova, aua e lelei o ia, aua e faavavau lona alofa ia Isaraelu. Ona alaga lea o le nuu uma i le alaga tele i viiga ia Ieova, ona ua faavaeina o le fale o Ieova.

Ua oo i le taulaga o le afiafi, ona ou tulai lea ai lo‘u tiga, ua saeia lo‘u ofu, ma lo‘u ofu talaloa, ma ua ou tootuli i o‘u tulivae, ma faaloaloa atu o‘u lima ia Ieova lo‘u Atua,

Ona faafetai atu lea o Esera ia Ieova le Atua silisili; ona tali mai lea o le nuu uma, Amene, Amene, ua sisii i luga o latou lima; ma ua latou punonou ma ifo toele ia Ieova.

Ona tutū lea i luga i le tulaga o sa Levī, o Iosua, ma Pani, o Katameeli, o Sepania, o Puni, o Serepeia, o Pani, ma Kanani, ua latou alalaga ma le leo tele ia Ieova lo latou Atua. Ona faapea atu lea o sa Levī, o Iosua, ma Katameeli, o Pani, o Hasepenia, o Serepeia, o Hotia, o Sepania, ma Petakia, Ina tutū ia outou i luga, ina faamanu atu ia Ieova lo outou Atua mai le vavau e oo i le faavavau; ia faamanuina lava lou suafa mamalu ua silisili i faamanu ma viiga uma. O oe, na o oe lava o Ieova; na e faia le lagi o le lagi o lagi, ma ‘au uma o i ai, o le lalolagi ma mea uma o i ai, o le sami ma mea uma o i ai, ua e faaola foi ia te i latou uma; ua ifo foi ia te oe ‘au a le lagi.

a o oe, o lou alofa mutimuti vale e tele, na e le tuua ai i latou i le vao; ua le te‘a ma i latou le ao faaniutu i le ao, e ta‘ita‘iina i latou i le ala; ma le afi faaniutu i le po, e faamalamalama a‘i i latou i le ala latou te o atu ai.

O le faasaina foi o le pa o Ierusalema ua latou sailia sa Levī i o latou aai uma, e au mai ia te i latou i Ierusalema, e fai le faasaina o le pa ma le fiafia, ma faafetai, ma pese, ma sumepalo, ma napeli, ma kitara.

Auā talu anamua i ona po o Tavita ma Asafo sa i ai matai o e pepese pese, ma pese e vivii ai ma faafetai i le Atua.

Ona tulai ai lea o Iopu, ma saei lona ofu, ma tafi lona ulu, ua faapaū foi o ia i le eleele ma ifo. Ua fai atu foi o ia, Na ou sau lē lavalavā mai le manava o lo‘u tinā, o le a ou foi atu i ai ua le lavalavā; na foaiina mai e Ieova, ua aveeseina foi e Ieova; ia faamanuina le suafa o Ieova.

Ae peitai a‘u, ou te saili atu i le Atua, ou te tuuina atu la‘u mea i le Atua; o le ua faia mea tetele e le masuesueina, o vavega e le mafaitaulia.

O le suesue e te maua ai ea le Atua? E te maua atoatoa ai ea Le e ona le malosi uma lava?

Afai e te saunia lou loto, ma faaloaloa atu ou lima ia te ia;

Auā ua ou iloa, o loo soifua le na te togiolaina a‘u; o aso amuli foi e tulai mai ai o ia i luga o le eleele. E ui lava foi ina faaumatia lenei tino pe a mavae atu lo‘u pa‘u, a e ou te iloa atu le Atua i lo‘u tino; ou te iloa atu ia te ia mo a‘u lava, e vaai atu foi o‘u mata ia te ia, a e le o se tasi; pe a le toe ai o‘u manao i totonu ia te au.

E avea foi Le e ona le malosi uma lava ma au auro, ma faulaigāario ma oe. Ona e fiafia ai lea i Le e ona le malosi uma lava, ma faasaga ae ou mata i le Atua.

Faauta, ua silisili ese le Atua i lona malosi; o ai na te a‘oa‘o e faapei o ia? Po o ai ua togia ia te ia lona ala? O ai foi na te fai atu, Ua e faia amioletonu? Ia e manatua ona vivii i ana galuega o loo vaai i ai tagata;

O le mea foi lenei ua gatete ai lo‘u loto, ua sapotuvale ai foi i le mea o i ai. Ina matuā faalogologo atu ia i le taalili o lona siufofoga, ma le gogolo ua oo atu nai lona fofoga. Ua ia ta‘ita‘iina ai i lalo o le lagi atoa uma, ma lona uila foi e oo i tuluiga o le lalolagi. E mulimuli ane ai, ona taalili mai ai lea o le leo; ua ia faapā mai le faititili i lona siufofoga silisili; ua ia le taofi foi i ai pe a lagona lona siufofoga. Ua faapā mai e le Atua le faititili silisili ese i lona siufofoga; e faia e ia mea tetele e le mailoa e i tatou.

Ua e iloa ea le fuatia o le mamafa o ao uliuli, o vavega o Le e ona le poto atoatoa?

E sau le pupula faaauro mai le itu i matu; o loo i le Atua le mamalu matautia. A o Le e ona le malosi uma lava, tatou te le mafai ona iloa o ia; e silisili ese lona malosi ma lona faamasinoga, e sili foi lana amiotonu, na te le agaleaga.

E soisoi le o afio i le lagi; e tauemu le Alii ia te i latou.

A o a‘u, ua ou faauuina la‘u Tupu i luga o Siona lo‘u mauga paia.

Ou te vivii atu ia Ieova ona o lana amiotonu; ou te pese atu foi i le suafa o Ieova lē Silisili ese.

Ieova e, lo matou Alii, e silisili lava lou suafa i le lalolagi uma lava; o oe lava ua e faasilisili lou viiga i le lagi.

Ieova e, lo matou Alii, e silisili lava lou suafa i le lalolagi uma lava.

Ou te vivii atu ia te oe Ieova ma lo‘u loto atoa; ou te ta‘uta‘u atu foi ou vavega uma. Ou te fiafia ma ou olioli ia te oe; ou te pese lava i lou suafa, lē Silisili ese.

Ina pepese atu ia outou ia Ieova, o loo afio i Siona; ina faaali atu ia i nuu ana mea na fai.

ina ia ou ta‘uta‘u atu ou viiga uma i faitotoa o le tama fafine a Siona; ou te fiafia i lau faaolataga.

O Ieova o le Tupu ia e faavavau faavavau lava; ua fano nuu ese nai lona laueleele.

O Ieova o i lona malumalu paia o ia; o Ieova o loo i le lagi lona nofoālii; e silasila mai ona fofoga, e tofotofo le fanau a tagata e ona laufofoga.

Ou te pese atu ia Ieova, auā ua agalelei mai o ia ia te au.

Ia e leoleo mai ia te au e pei o le tamatamai mata; ia e natia a‘u i le paolo o ou apaau,

Ieova e, lo‘u malosi, ou te alofa lava ia te oe. O Ieova o lo‘u papa ia, ma lo‘u ‘olo, ma lo‘u faaola; o lo‘u Atua, o lo‘u papa, ou te faatuatua ia te ia; o lo‘u talita, ma le nifo o lo‘u olataga, o lo‘u ‘olo maualuga. Ou te valaau ia Ieova, e tatau ona viia o ia; o lea e faaolaina ai a‘u i e ua ita mai ia te au.

Na faititili foi Ieova mai le lagi, na tŭlei ifo e le Silisili ese o lona siufofoga; o uato‘a ma malala ola o le afi.

O le Atua, e sao lava lona ala; ua se ario ua te‘a ma le otaota afioga a Ieova; o ia lava o le talta o i latou uma o e faatuatua ia te ia. Auā o ai ea le Atua, ua na o Ieova? O ai ea le papa, ua na o lo tatou Atua?

O loo soifua Ieova, ia faafetaia foi lo‘u papa; ma ia viia le Atua o lo‘u faaolataga.

Ua tala mai e le lagi le mamalu o le Atua; ua faaalia foi e le va nimonimo le galuega a ona aao.

Ieova e, ia faasilisiliina oe i lou malosi; matou te pepese ma fai pesega i lou mana.

A o oe, e paia oe; o loo e tietie i viiga a Isaraelu.

Ou te ta‘u atu lou suafa i o‘u uso; ou te vivii atu ia te oe i totonu o le faapotopotoga. O outou o e matatau ia Ieova, ina vivii atu ia ia te ia; o outou o le fanauga uma a Iakopo, ina vivii atu ia ia te ia; o outou o le fanauga uma a Isaraelu, ia outou fefefe ia te ia. Auā e le ta‘ufaatauvaa o ia, e le ‘ino‘ino foi o ia i le puapuaga o le ua puapuagaina; e le liliu ese foi e ia ona fofoga ia te ia; na tagi atu o ia ia te ia, ona faafofoga mai ai lea o ia. Ou te vivii lava ia te oe i totonu o le faapotopotoga tele; ou te avatua foi ia te ia i luma o e matatau ia te ia o mea na ou tauto ai. E aai o e matitiva, ma latou maoona ai; e vivii atu ia Ieova e ua sailiili ia te ia; e faalototeleina outou e faavavau. E manatunatu ifo ma liliu mai ia Ieova o tulu‘iga uma lava o le lalolagi; e ifo atu foi i ou luma aiga uma o nuu ese. Auā o loo ia Ieova le malo; o loo pule o ia i nuu ese. E aai ma ifo ia te ia atoa uma o e puputa i le lalolagi; e punonou i ona luma atoa uma o e ō ifo i le eleele, atoa ma le ua le faaola o ia ia te ia.

Ina faaea ia i luga o outou ulu, outou faitotoa e; ia faaeaina i luga o outou puipui o le faavavau e, se‘i ulu atu ai le Tupu mamalu. O ai ea lenei Tupu mamalu? O Ieova, le malosi ma le fitafita, o Ieova le fitafita i le taua. Ina faaea ia i luga o outou ulu, outou, faitotoa e; ia faaeaina i luga o outou puipui o le faavavau e, se‘i ulu atu ai le Tupu mamalu. O ai ea lenei Tupu mamalu? O Ieova o ‘au, o ia lava le tupu mamalu. Selā.

E tasi le mea ua ou ole atu ai ia Ieova, o le mea lava lea ou te saili atu ai; ia ou nofo i le fale o Ieova i aso uma o lo‘u ola, ina ia ou iloa atu ai le matagofie o Ieova, ma ou saili i lona malumalu.

O lenei, e faaeaina lo‘u ulu i luga o e ua ita mai ia te au, o e siosio ia te au; ou te osia ai taulaga i lona fale fetafai ma le alaga fiafia; ou te pese ma ou fai pesega ia Ieova. Ieova e, ia e faafofoga mai i lo‘u leo, ou te valaau; ia e alofa mai, ma ia e tali mai ia te au. Na fai atu lo‘u loto ia te oe i lau na e fetalai mai, Ia outou sailiili mai ia te au; Ieova e, ou te sailiili atu i lau afio.

O Ieova, o lo‘u malosi ma lo‘u talita o ia; na faatuatua lo‘u loto ia te ia, ona ou maua ai lea o le fesoasoani; o lea e fiafia ai lo‘u loto, ma ou vivii atu ia te ia i la‘u pese.

O outou atalii o e malolosi, tuuina atu ia ia Ieova, tuuina atu ia ia Ieova le viiga ma le malosi. Tuuina atu ia ia Ieova le viiga o lona suafa; ina ifo ia ia Ieova i le mea paia e matagofie. O loo i luga o vai le siufofoga o Ieova; o loo faititili mai le Atua mamalu; o Ieova, o loo i luga o vai e tele o ia. E malosi le siufofoga o Ieova; e mamalu le siufofoga o Ieova.

O le siufofoga o Ieova ua faafanau ai aila, ua manunu ai foi le vao matua; o i totonu o lona malumalu foi e taitasi ma tautala i lona mamalu. Na tietie Ieova i luga o le lolo; e tietie lava Ieova o le Tupu e faavavau lava.

O outou na o ona tagata amio Atua, ia outou pepese atu ia Ieova, ma ia outou vivii pe a manatua lona paia.

Ua e liua lo‘u tagitu‘i i le siva; ua e talaeseina lo‘u ie talatala, a e fusia a‘u i le fiafia; ina ia pese atu ia te oe lo‘u mamalu, ma le le mapu; Ieova e lo‘u Atua, ou te vivii atu ia te oe e faavavau lava.

Ina pepese ia ia Ieova o outou o e amiotonu; e ono lava i e ua amio sa‘o ona vivii atu. Ina vivii atu ia ia Ieova i le kitara; ia fai pesega ia te ia i le napeli e sefulu ona manoa. Ina pepese atu ia ia te ia i le pese fou; ia outou ta malie ma le leo fiafia.

Ou te faafetai ia Ieova i aso uma lava; e le aunoa ōna viiga i lo‘u gutu. E mitamita lo‘u agaga ia Ieova; e faalogologo i ai e ua puapuagaina, ona latou fiafia ai lea. Ia outou faaneenee atu ia Ieova faatasi ma a‘u; ma ia tatou vivii faatasi i lona suafa.

Ou te vivii atu ia te oe i le faapotopotoga tele, ma pese atu ia te oe i luma o le nuu e toatele.

Ia pepese ma taufaiolioli o e loto i la‘u amiotonu; ia fai ane pea lava i latou, Ia viia Ieova, o le ua finagalo ia manuia lana auauna. E ta‘uta‘u atu foi lo‘u laulaufaiva i lau amiotonu, ma vivii atu ai ia te oe i le aso atoa.

Ua tuuina mai e ia le pese fou i lo‘u gutu, o le viiga i lo tatou Atua; e iloa ai e le toatele, e matatau foi i latou, ma latou faatuatua ia Ieova.

Ia olioli ma fiafia ia te oe o i latou uma o e sailiili ia te oe; ia fai ane pea i latou o e fiafia i lau faaolataga, Ia viia Ieova.

A o a‘u nei, e te taofia a‘u i luga i la‘u amio sao; e te faatuina foi a‘u i ou luma e faavavau. Ia faafetaia Ieova, le Atua o Isaraelu, mai le vavau e oo lava i le faavavau. Amene ma Amene.

Le Atua e, e faapei ona naunau o le aila i vaitafe, o loo faapea ona naunau o lo‘u agaga ia te oe. Ua fia inu lo‘u agaga i le Atua, o le Atua soifua; o afea ea ou te alu atu ai ia iloa ai a‘u i luma o le Atua?

E pule mai Ieova lona alofa ia te au i le ao, e ia te au foi le pese ia te ia i le po, o le tatalo i le Atua o lo‘u ola.

Ona ou alu atu ai lea i le fata faitaulaga o le Atua, o le Atua ou te matuā fiafia i ai; le Atua e, lo‘u Atua ou te vivii atu ia te oe i le kitara.

Ina fusi ia lau pelu i lou vae, o oe na le toa, o lou viiga ma lou mamalu. O lou mamalu foi ia e tietie ai i le manu ma le manuia, ona o le upu moni, ma le agamalu, ma le amiotonu; ia a‘oa‘oina foi oe e lou aao taumatau i mea e matautia ai.

Le Atua e, o lou nofoālii e faavavau faavavau lava lea; o le tootoo o lou malo, o le tootoo o le amiotonu lea.

Ou te ta‘uta‘u atu lou suafa i augātupulaga uma lava; o le mea lea e vivii atu ai tagata ia te oe e faavavau faavavau lava.

Ina soia, ma ia outou iloa o a‘u lava o le Atua; e viia a‘u i nuu ese, e viia a‘u i le lalolagi.

Ina patipati ia o outou lima, o outou nuu uma lava; ina alalaga atu ia i le Atua ma le leo fiafia. Auā e matautia Ieova lē Silisili ese; o le Tupu silisili ia i le lalolagi atoa.

O loo afio ae le Atua ma le alaga fiafia, o loo afio ae Ieova ma le leo o le pu. Ina pepese atu ia i le Atua, ina pepese ia; ina pepese atu ia i lo tatou Tupu, ina pepese ia. Auā o le Atua, o le Tupu ia o le lalolagi atoa; ina pepese atu ia ma le atamai. Ua fai ma tupu le Atua i nuu ese; o loo tietie le Atua i lona nofoālii paia. Ua faatasia alii o nuu i le nuu o le Atua o Aperaamo; auā e ō le Atua talita o le lalolagi; e matuā silisili ese lava o ia.

E sili lava Ieova, e tatau foi ona matuā viia o ia i le aai a lo tatou Atua, o lona mauga paia.

Auā o lenei Atua, o lo tatou Atua lava ia e faavavau faavavau lava; o ia lava na te ta‘ita‘iina i tatou e oo lava i le oti.

O le viiga, ia e faia lea ma taulaga i le Atua; ia e avatu foi i lē Silisili ese mea na e tauto ai. Ia e valaau foi ia te au i le aso e i ai le puapuaga; ou te laveaiina ai oe, ona e vivii mai ai lea ia te au.

O lē faia le viiga ma taulaga, o lē ava lea ia te au; ma le ua mafaufau i lona ala, ou te faailoa atu ia te ia le faaolataga mai le Atua.

Le Atua e, le Atua o lo‘u olataga, ia e laveai mai ia te au ai le sala o le toto; ona pese fiafia ai lea o lo‘u laulaufaiva i le amiotonu mai ia te oe. Le Alii e, ia e faamatala mai o‘u laugutu; ona ta‘uta‘u atu lea e lo‘u gutu lou viiga.

Le Atua e, ia faasilisiliina oe i le lagi; ia i ai i le lalolagi uma lou mamalu.

Le Atua e, ua mau lo‘u loto, ua mau lava lo‘u loto; ou te pese lava, ma ou fai pesega.

A o a‘u ou te pese atu i lou malosi; ou te alaga fiafia i le taeao i lou alofa mai; auā na fai oe mo‘u ‘olo maualuga, ma o‘u malu i le aso na puapuagaina ai a‘u. Lo‘u malosi e, ou te fai pesega lava ia te oe; auā o le Atua o lo‘u ‘olo maualuga lea, o le Atua ua alofa mai ia te au.

Ona ou fai pesega ai lea i lou suafa e faavavau, ina ia ou avatua i lea aso ma lea aso o mea na ou tauto ai.

Le Atua e, o lo‘u Atua lava oe; ou te ala saili ia te oe; ua fia inu lo‘u agaga ia te oe, ua ou matuā naunau atu ia te oe i le nuu naumati, e lailoa ai, e leai ni vai; ia ou iloa lou malosi ma lou mamalu, e pei ona ou iloa oe i le malumalu. Auā o lou alofa e sili ona lelei lea i le ola; ou te vivii atu lava ia te oe i o‘u laugutu. O lea ou te faamanū atu ai ia te oe a o ou ola; ou te sii o‘u lima i lou suafa. E peiseai o le ga‘o ma le mea lololo, ou te ma‘ona ai lava a‘u; e vivii atu foi ia te oe o lo‘u gutu ma o‘u laugutu e alaga fiafia. A ou manatua oe i lo‘u moega, ou te mafaufau ia te oe i leoleoga i itu po.

A o le tupu, e fiafia lava ia i le Atua; e taitasi ma mitamita o e tauto ia te ia; auā e punitia gutu o e tala pepelo.

Le Atua e, ua ia te oe le viiga e faia ma le faalologo i Siona; e avatua lava ia te oe le mea na tauto ai.

Le lalolagi uma e, ia outou alalaga atu i le Atua. Ia outou pepese atu i lona suafa mamalu; ia mamalu ia te outou lona viiga. Ia outou fai atu i le Atua, E matuā matautia oe i au galuega. O lou malosi tele e faatagā vivii atu ai ia te oe o e ua ita ia te oe. E ifo atu lava ia te oe le lalolagi uma; latou te fai pesega ia te oe, latou te fai pesega i lou suafa. Selā.

E pule ia e faavavau i lona lava malosi; ua matuā silasila atu ona fofoga i nuu ese; o e fouvale, aua ne‘i faamaualuga i latou. Selā. Le nuu e, ia outou faafetai atu i lo tatou Atua; ia lagona mai le leo o lona viiga.

Ia outou pepese atu i le Atua, ia fai pesega i lona suafa; ia outou faalaulelei le ala mo lē tietie ma afio atu i le vao; o Ioa o lona suafa lea, ma ia outou olioli i ona luma.

Ona gatete ai lea o le lalolagi, ole lagi foi na tautulu ifo i luma o le Atua; o Sinai lava na gatete ia i luma o le Atua, o le Atua o Isaraelu.

O outou malo o le lalolagi ina pepese atu ia i le Atua; ia outou fai pesega i le Alii; Selā; o lē tietie atu i lagi o lagi o le vavau; faauta, ua ia tŭlei mai lona siufofoga o le siufofoga malosi. Ia outou tuu atu le malosi i le Atua; o loo i luga o Isaraelu lona silisili ese, o loo i ao foi lona malosi. Le Atua e, ua matautia oe ai ou afioaga paia; o le Atua o Isaraelu, o ia lea na te tuuina atu le malosi ma le fitafita i lona nuu. Ia faafetaia lava le Atua.

Ou te vivii atu i le suafa o le Atua i le pese; ou te faaneenee atu foi ia te ia i le viiga.

Ia vivii atu ia te ia le lagi atoa ma le lalolagi; o le sami atoa ma mea uma e tataa ai.

Ia olioli ma fiafia ia te oe i latou uma o e sailiili ia te oe; ia fai ane pea i latou o e fiafia i lau faaolataga, Ia viia le Atua.

O oe ua lagolago mai ia te a‘u talu ina fanaua o a‘u; na e aumaia a‘u mai le manava o lo‘u tinā; e le aunoa ona ou vivii atu ia te oe. Sa fai a‘u e peiseai se mea e ofo ai le toatele; a o oe o lo‘u malu malosi oe. E tumu lava lo‘u gutu i lou viiga, ma lou faaneeneega i aso uma lava.

A o a‘u, ou te faamoemoe e le aunoa, ma a‘u toe faaopoopoina atu i ou viiga uma lava.

O a‘u foi, ou te vivii atu ia te oe i le napeli, o lou faamaoni lava, lo‘u Atua e; ou te fai pesega ia te oe i le kitara, o oe le Paia o Isaraelu. E alaga fiafia o‘u laugutu pe a a‘u fai pesega ia te oe, atoa foi ma lo‘u agaga ua e faaolaina.

E ifo foi i ona luma o e nonofo i le nuu naumati, e etoeto i le eleele o e ita ia te ia.

E ifo lava ia te ia o tupu uma lava; e auauna ia te ia o nuu uma.

E faavavau lava lona suafa; e tumau pea lona suafa a o i ai le la; latou te faaamuia i latou ona o ia; e faaamuia o ia e nuu uma lava. Ia faafetaia Ieova le Atua, o le Atua o Isaraelu, na o ia lava na te faia vavega. Ia viia lava lona suafa mamalu e faavavau lava; ia tumu foi le lalolagi uma i lona mamalu; Amene ma Amene.

Ou te manatua galuega a Ioa; e moni, ou te matuā manatua ou vavega anamua. Ou te manatunatu foi i au galuega uma, ou te mafaufau i mea na e faia. Le Atua e, e paia lava lou ala; o ai se atua e silisili e tusa ma le Atua? O oe lava le Atua o lē fai vavega; ua faailoa lou malosi i nuu.

Na ia ta‘ita‘i ia te i latou ina o ao i le ao a o le malamalama o le afi na ia ta‘ita‘i ai ia te i latou i le po atoa.

Ona latou manatu ifo ai lea o le Atua o lo latou papa ia; o le Atua silisili o ia na te faaolaina i latou.

Ia outou pepese ma le leo tele i le Atua lo tatou malosi; ia outou alalaga i le Atua o Iakopo. Ina usu ia le pese, au mai ia le topa, o le kitara leo mălie, atoa ma le napeli.

ina ia iloa e i latou, o oe, e ou le suafa o IEOVA, na o oe lava o le Silisili ese i le lalolagi uma.

Ieova o ‘au e, e matuā manaomia ou afioaga. O loo naunau lo‘u agaga, ma ua lailoa i le fia alu atu i lotoā o Ieova; o loo alaga fiafia lo‘u loto ma lo‘u tino i le Atua soifua. E moni, o le manulele ua maua se fale, o le pe‘ape‘a foi ua maua sona ofaga e tuu ai lana toloai, o au lava fata faitaulaga, Ieova o ‘au e, o lo‘u Tupu ma lo‘u Atua. Amuia i latou ua nonofo i lou fale; latou te vivii pea ia te oe. Selā.

O nuu uma na e faia latou te o mai, ma latou ifo atu i ou luma, le Alii e; ma latou faaneenee atu i lou suafa. Auā e sili oe, o loo e fai foi vavega; o le Atua oe, na o oe lava. Ieova e, ia e faasino mai ia te au lou ala, ou te savali i le mea moni mai ia te oe; ia e faia ina ia tasi lo‘u loto e mata‘u i lou suafa. Le Alii e, lo‘u Atua, ou te vivii atu ia te oe i lo‘u loto atoa; ou te faaneenee atu lava i lou suafa e faavavau.

O e pepese atoa ma e sisiva; o ia te oe o‘u punāvai uma.

Ua totō o‘u mata ona o le puapuaga; Ieova e, ua ou valaau atu ia te oe i aso uma, ua ou faaloaloa atu o‘u lima ia te oe.

O le alofa mai o Ieova ou te pese ai lava e faavavau; ou te faailoa atu i lo‘u gutu lou faamaoni i lea tupulaga ma lea tupulaga.

Ieova e, e vivii le lagi i ou vavega; e viia foi lou faamaoni i le faapotopotoga o le au paia. Auā o ai ea i le lagi e faatusaina Ieova? O ai so le fanau a e malolosi e tusa ma Ieova? O le Atua e tatau ona matautia tele i le faapotopotoga o le au paia; e tatau foi ona matautia o ia e i latou uma o e vagavagai ia te ia.

O le amiotonu ma le faamasinoga o loo tumau ai lou nofoālii; o le alofa ma le faamaoni la te muamua atu i ou luma.

Auā o oe lo latou matagofie e i ai le malosi; o lou finagalo alofa foi ua faamaualugaina ai lo matou nifo. Auā o lo matou talita o Ieova lava lea; o le Paia foi o Isaraelu, o lo matou tupu lava ia.

Le Alii e, ua fai oe ma mea matou te nonofo ai i lea tupulaga ma lea tupulaga. A o lei fanaua mai mauga, e lei faia foi e oe le lalolagi ma le atu laulau, o le Atua oe mai le vavau e oo i le faavavau.

O le nofo i le mea lilo o i ai lē Silisili ese, e mau o ia i le paolo o Le e ona le malosi uma lava.

E lelei ona vivii atu ia Ieova, ma ia fai pesega i lou suafa lē Silisili ese e;

O loo fai Ieova ma tupu, e ofu o ia i le mamalu; e ofu Ieova i le malosi, ua fusia ai o ia e ia; e faatumauina foi le lalolagi, e le faagaeetia. O tumau lou nofoālii talu anamuā; talu mai le vavau lava oe. Ieova e, ua taalili mai vaitafe, o vaitafe ua taalili ae o latou leo; o vaitafe ua taalili ae o latou gogolo. O Ieova o i le mea maualuga, e sili ona malosi o ia i le taalili o vai e tele, o peau malolosi o le sami. O āu mau e matuā faamaoni ia; e onomea lava ona paia o lou fale, Ieova e, e faavavau lava.

O mai ia, ia tatou alalaga fiafia ia Ieova; ia tatou alalaga i le papa o lo tatou olataga. Ia tatou o atu i ona luma ma le viiga; ia tatou alalaga ia te ia i pese. Auā o Ieova o le Atua sili lea, o le Tupu tele lava o ia e sili i atua uma lava.

O mai ia, ia tatou ifo, ma ia tatou punonou; ia tatou tootuli i luma o Ieova o le na faia i tatou.

Ia outou pepese atu ia Ieova i le pese fou; le lalolagi uma e, ia outou pepese atu ia Ieova. Ia outou pepese atu ia Ieova, ia outou faafetaia lona suafa; ia outou tala‘i atu lana faaolataga i lea aso ma lea aso. Ia outou ta‘uta‘u atu lona mamalu i nuu ese, ma ona vavega i nuu uma lava. Auā e silisili Ieova, e tusa foi ona matuā viia o ia; e sili ona matautia o ia i atua uma. Auā o atua uma o nuu o tupua lava ia; ao Ieova, na ia faia le lagi. O loo i ona luma le viiga ma le matagofie; o loo i lona malumalu le malosi ma le mamalu. Outou o itu aiga o le nuu, ia outou avatua ia Ieova, ia outou avatua ia Ieova le viiga ma le malosi. Ia outou avatua ia Ieova le viiga o lona suafa; ia outou avatu taulaga, ma outou o atu i ona lotoā. Ia outou ifo atu ia Ieova i le malumalu e matagofie; ia outou gatete i ona luma le lalolagi uma. Ia outou fai atu i nuu ese, Ua fai Ieova ma tupu; e faatumauina ai le lalolagi ne‘i faagaeetia; na te faamasinotonuina le nuu. Ia fiafia le lagi, ia olioli foi le lalolagi; ia taalili mai le sami ma mea ua tumu ai. Ia fiafia lava le laueleele ma mea uma o i ai; ona alalaga fiafia ai lea o laau uma o i le vao matua, i luma o Ieova; auā o loo afio mai, auā o loo afio mai e faamasino le lalolagi; na te faamasinoina le atu laulau i le amiotonu, atoa ma nuu i lona faamaoni.

Ua fai Ieova ma tupu; ina olioli ia le lalolagi; ia fiafia le vao nuu o tu matafaga. Ua siosiomia o ia i ao ma le pogisa; o le amiotonu ma le faamasinoga o loo tumau ai lona nofoālii.

Ua liu suāvai mauga e pei o le pulu, i luma o Ieova, i luma o le Alii o le lalolagi uma. O loo faaali mai e le lagi lana amiotonu, o loo iloa atu foi e nuu uma lona mamalu.

Auā o oe Ieova e, e sili lava oe i le lalolagi uma; e matuā silisili ese lava oe i atua uma lava.

Ia outou pepese atu ia Ieova i le pese fou; auā o vavega na na faia; o lona aao taumatau, o lona lava aao paia, ua ia fai ai le olataga.

Ia alalaga ia Ieova le lalolagi uma; ia leo tele lava, ma ia alalaga fiafia, ma ia fai pesega. Ia outou fai pesega ia Ieova i le kitara; o le kitara ma le leo o le pese. O pu ma le leo o le sofao ia outou alalaga ai i luma o Ieova le Tupu. Ia taalili le sami atoa ma mea ua tumu ai, o le atu laulau atoa ma e o nonofo ai. Ia pāti lima vaitafe, ia alalaga fāatasi ai mauga ma le fiafia, i luma o Ieova;

Ua fai Ieova ma tupu, ia gatete nuu; o loo tietie o ia i le va o kerupi, ia faagaeetia le lalolagi. E silisili Ieova o i Siona; e maualuga foi o ia i luga o nuu uma. Ia latou vivii atu i lou suafa e sili ia ma le matautia; e paia lava ia. O le malosi foi o le tupu o loo fiafia ia i le faamasinoga; o oe ua e faatumauina le amiotonu, o oe foi ua e faia le faamasinoga tonu ia Iakopo. Ia outou faaneenee atu ia Ieova lo tatou Atua, ia outou ifo atu i le mea e tu ai ona aao; e paia lava o ia.

Ia outou faaneenee atu ia Ieova lo tatou Atua, ia outou ifo atu foi i lona mauga paia; auā e paia lava Ieova lo tatou Atua.

Ia alalaga ia Ieova le lalolagi uma. Ia outou auauna atu ia Ieova ma le fiafia; o mai ia outou i ona luma ma le alaga fiafia. Ia outou iloa o Ieova o ia lava le Atua; o ia na faia i tatou, ua fai i tatou mona; o lona nuu i tatou, o le lafu mamoe ua ia fagaina. Ia outou ulu atu i ona faitotoa ma le viiga, ma ona lotoā ma le pese; ia outou vivii atu ia te ia, ia outou faamanu atu i lona suafa. Auā e lelei Ieova; e faavavau lava lona alofa; e oo atu lava lona faamaoni i lea tupulaga ma lea tupulaga.

Ou te pese i le alofa ma le faamasinoga, Ieova e, ou te fai pesega ia te oe.

E matatau foi nuu ese i le suafa o Ieova, ma tupu uma o le lalolagi e matatau i lou mamalu. Auā e atiina ae Siona e Ieova, e iloa mai o ia i lona mamalu.

O anamua na e faavaeina ai le lalolagi; o le lagi foi o le galuega lea a ou aao. E faaumatia ia mea, a o oe, e te tumau pea; e pala ia mea uma e pei o le ofu tele, e te liua ia e pei o le ofu, ona liua lava lea; a o oe, e faapea lava pea oe; e le iu lava ou tausaga.

Lo‘u agaga e, ia e faamanū atu ia Ieova, o mea uma foi o i totonu ia te au ia faamanū i lona suafa paia. Lo‘u agaga e, ia e faamanū atu ia Ieova, aua foi ne‘i galo se mea e tasi o ana meaalofa;

Ua faatumauina e Ieova o lona nofoālii i le lagi; ua pule aoao foi lona malo.

Faamanū atu ia ia Ieova outou ana agelu o e malolosi tele, o e faia lana afioga, o loo faalogo i lona siufofoga. Faamanū atu ia ia Ieova outou ana ‘au uma lava, o outou ana auauna, o e faia lona finagalo. Faamanū atu ia ia Ieova o mea uma na ia faia i mea uma lava ua pule i ai o ia. Lo‘u agaga e, ia e faamanū atu ia Ieova.

Lo‘u agaga e, ia e faamanū atu ia Ieova; Ieova e, lo‘u Atua, e matuā silisili lava oe, e ofu oe i le viiga ma le matagofie. O loo e pulupulu i le malamalama pei o se ie pulupulu; o loo e fofola le lagi faapei o se ie puipui.

Ieova e, ua matuā tele au galuega. Ua e faia ia mea uma i le poto; ua tumu le lalolagi i au oloa. O lenei sami tele ma le lautele, o i ai mea fetolofi e le masino, o meaola iti atoa ma e tetele.

E tumau le mamalu o Ieova e faavavau; e fiafia Ieova i ana mea na fai. E silasila mai o ia i le lalolagi, ona gatete ai lea; e papai atu ia i mauga, ona pupusa ai lea. Ou te pese ia Ieova i lo‘u nei olaga; ou te fai pesega i lo‘u Atua a o au ola. E mălie lo‘u mafaufau ia te ia; ou te fiafia lava a‘u ia Ieova. E faaumatia o e agasala ai le lalolagi, ma e amio leaga e le toe i ai i latou. Lo‘u agaga e, ia e faamanū atu ia Ieova. Ia outou vivii atu ia Ioa.

Vivii atu ia outou ia Ieova; valaau atu ia i lona suafa; ia outou faailo atu i nuu ana mea na fai. Ia pepese outou ia te ia, ia outou fai pesega ia te ia; talatala atu ia outou i ona vavega uma lava. Ia outou mitamita i lona suafa paia; ia olioli loto o e sailiili ia Ieova. Sailiili ia outou ia Ieova ma lona malosi; sailiili i ona fofoga, aua le aunoa. Ia outou manatua ana mea mamana na ia faia, o ona vavega, atoa ma faamasinoga a lona fofoga;

Ia outou vivii atu ia Ioa, Vivii atu outou ia Ieova, auā e lelei lava o ia; auā e faavavau lava lona alofa. O ai se na te mafaia ona ta‘u atu i mea mamana a Ieova? O ai se na te faailoa ona viiga uma lava?

Ieova e, lo matou Atua, ia e faaola mai ia te i matou, ma e faapotopoto ia i matou ai nuu ese, ina ia vivii i lou suafa paia, ia mitamita foi i viiga ia te oe. Ia faafetaia Ieova, o le Atua o Isaraelu mai le vavau ma ia oo i le faavavau; ma ia faapea mai o le nuu uma lava, Amene. Ia outou vivii atu ia Ioa.

Vivii atu ia outou ia Ieova, auā e lelei lava o ia, auā e faavavau lava lona alofa.

Ia latou faaneenee ia te ia i le faapotopotoga o le nuu, ma ia vivii atu ia te ia i le saofaiga a toeaina.

Le Atua e, ua mau lo‘u nei loto, ou te pese lava, e fai pesega lo‘u lava mamalu. Ala mai ia le napeli ma le kitara, ou te ala i le taeao lava. Ieova e, ou te vivii ia te oe i luma o le nuu, ou te fai pesega foi ia te oe i luma o tagata. Auā ua sili lou alofa i le maualuga o le lagi, o lou faamaoni foi ua oo i ao. Le Atua e, ia faasilisiliina oe i le lagi, ia i ai i le lalolagi uma lou mamalu.

Ou te matuā vivii atu ia Ieova i lo‘u gutu, ou te faaneenee atu ia te ia i totonu o le toatele.

Ia outou vivii atu ia Ioa. Ou te vivii atu ia Ieova ma le loto atoa i le saofaiga a e amiotonu, atoa ma le faapotopotoga. O mea ua faia e Ieova, o mea tetele lava ia, o loo sailia e i latou uma lava o e fiafia i ai. O mea e viia ma le matagofie o ana galuega ia, e tumau foi lana amiotonu e faavavau.

Na ia avatu le togiola mo lona nuu; na poloai i lana feagaiga ia faavavau lava; e paia ma le matautia lona suafa. O le mata‘u ia Ieova, o le amataga lea o le poto; ua i ai le mafaufau lelei ia te i latou uma o e fai ia mea; e tumau lona viiga e faavavau lava.

Ia outou vivii atu ia Ioa. Vivii atu ia outou o auauna a Ieova; vivii atu ia i le suafa o Ieova. Ia faafetaia le suafa o Ieova, e amata mai nei lava, a ia oo i le faavavau. Ia viia le suafa o Ieova, e afua mai i le mea e alu ae ai le la, e oo atu i le mea e goto ai.

Ua sili lava Ieova i luga o nuu ese uma lava, o lona mamalu ua sili i le lagi. O ai ea sē tusa ma Ieova lo tatou Atua, o lē faamaualugaina e ia lona afioaga? O lē faamaulaloina e ia ia ia e silasila mai i le lagi atoa ma le lalolagi.

Aua ne‘i ia te i matou, Ieova e, aua ne‘i ia te i matou, a ia tuuina atu le viiga i lou suafa, ona o lou alofa ma lou faamaoni.

A o i tatou nei, tatou te faamanū atu ia Ioa, e afua mai nei lava, a e oo i le faavavau. Ia outou vivii atu ia Ioa.

Ua e tatala mai i o‘u noanoaga. Ou te fai le taulaga o le viiga ia te oe, ou te valaau atu foi i le suafa o Ieova. Ou te avatua ia Ieova i luma o lona nuu uma lava o mea na ou tauto ai, i lotoā o le fale o Ieova, i totonu lava ia te oe, Ierusalema e. Ia outou vivii atu ia Ioa.

Vivii atu ia Ieova outou o nuu ese uma lava; faaneenee atu ia te ia outou tagata uma lava. Auā ua tele lava lona alofa mai ia te i tatou; o le faamaoni foi o Ieova e faavavau lava lea. Ia outou vivii atu ia Ioa.

Ia faapea atu lava i latou o e matatau ia Ieova, e faavavau lava lona alofa.

Ua maualuga le aao taumatau o Ieova; ua se toa le aao taumatau o Ieova.

Ou te vivii atu ia te oe; auā na e tali mai ia te au, ua avea foi oe mo‘u faaolataga. O le maa na lafoaiina e tufuga fai fale, ua fai lea ma maa tulimanu aupitoaluga. O le mea lea ua faia e Ieova; o le mea tatou te ofo ai pe a vaai i ai. O le aso lenei ua faia e Ieova; ia tatou olioli ma fiafia i ai.

O oe lava lo‘u Atua, ou te vivii atu ia te oe; o oe lava lo‘u Atua, ou te faaneenee atu ia te oe. Vivii atu ia outou ia Ieova, auā e lelei o ia; auā e faavavau lava lona alofa.

Ou te vivii atu ia te oe ma le loto faamaoni, pe a a‘a‘oina a‘u i au faamasinoga tonu.

Ou te ala i le tulua o po e vivii atu ai ia te oe, ona o au faamasinoga tonu.

E ta‘i foi faafitu i aso ona ou vivii atu ia te oe, ona o au faamasinoga tonu.

E ta‘u atu le viiga i o‘u laugutu, pe a e a‘oa‘o mai ia te au i au tulafono.

Tatou te o lava i ona afioaga; tatou te ifo atu i luma o le mea e tu ai ona aao.

Ia outou sisii i luga o outou lima i le malumalu, ma ia outou faamanū atu ia Ieova.

Ia outou vivii atu ia Ioa. Vivii atu ia outou i le suafa o Ieova; o outou auauna a Ieova, vivii atu ia outou ia te ia. Outou o e tutū i le fale o Ieova, i lotoā o le fale o lo tatou Atua, ia outou vivii atu ia Ioa; auā e lelei Ieova, ia fai pesega i lona suafa; auā e matagofie lea.

Ia faamanū atu ia Ieova mai Siona, o le o afio i Ierusalema. Ia outou vivii atu ia Ioa.

Vivii atu outou i le Atua o atua; auā e faavavau lava lona alofa. Vivii atu outou i le Alii o alii; auā e faavavau lava lona alofa.

Ina vivii atu ia outou i le Atua o le lagi; auā e faavavau lava lona alofa.

Ou te vivii atu ia te oe ma lo‘u loto atoa; ou te fai pesega ia te oe i luma o atua. Ou te ifo i lou malumalu paia, ou te vivii atu foi i lou suafa ona o lou alofa ma lou faamaoni; auā ua e faasilisili lau afioga i lou suafa uma. O le aso na ou valaau atu ai ia te oe, ua e tali mai ai ia te au; na e faateleina mai le malosi ia te au. Ieova e, e vivii atu ia te oe o tupu uma lava o le lalolagi, pe a latou faalogo i afioga a lou fofoga. E pepese foi i latou i ala o Ieova; auā e tele le mamalu o Ieova.

Ou te vivii atu ia te oe, auā na faia a‘u e ala ai ona matautia ma ofo tele ai; o mea na e faia, o mea mamana ia; ua ou matuā iloa e a‘u nei mea.

Ou te faaloaloa o‘u lima ia te oe, ou te manao lava ia te oe, faapei o se nuu naumati. Selā.

Le Atua e, ou te pese i le pese fou ia te oe; ou te fai pesega ia te oe i le napeli e sefulu ona manoa.

Lo‘u Atua e, le Tupu, ou te faaneenee ia te oe; ou te faamanū atu foi i lou suafa e faavavau faavavau lava. Ou te faamanu atu ia te oe i aso uma lava; ou te vivii atu foi i lou suafa e faavavau faavavau lava. E silisili lava Ieova, e tusa ona matuā viia o ia; e le mafai ona suesueina lona silisili ese. E vivii atu le tasi tupulaga ma le tasi tupulaga i au galuega; latou te faailoa atu au mea mamana. Ou te tautala atu i le matagofie o le viiga o lou mamalu, atoa ma au mea mamana; e tautalatala i latou i le malosi o au mea e matautia ai oe; ou te ta‘uta‘u atu foi i lou silisili ese. Latou te ta‘u atu lava le faamanatuga i lou agalelei tele lava; latou te alalaga fiafia foi i lau amiotonu.

Ieova e, e vivii atu ia te oe mea uma na e faia; e faafetai atu foi ia te oe ou tagata amio Atua. E tautalatala atu i latou i le mamalu o lou malo, ma ta‘uta‘u atu i lou mana; ina ia faailoa atu i le fanau a tagata ana mea mamana, ma le mamalu matagofie o lona malo. O lou malo o le malo lea e faavavau lava; ma lau pule e āu tupulaga lava lea.

O vii o Ieova e ta‘u atu e lo‘u gutu; e faafetaia e tagata uma o lona suafa paia, e faavavau faavavau lava.

Ia outou vivii atu ia Ioa. Lo‘u agaga e, ia e vivii atu ia Ieova. Ou te vivii atu ia Ieova a o ou ola; ou te fai pesega i lo‘u Atua a o ou tumau i le ola nei.

E pule Ieova e faavavau lava; Siona e, e pule lou Atua e āu tupulaga. Ia outou vivii atu ia Ioa.

Ia outou vivii atu ia Ioa, auā e lelei ona fai pesega i lo tatou Atua; auā e matagofie, e ono lava le viiga.

O loo faitaulia e ia le aofai e fetu; ua faaigoaina e ia o latou igoa uma lava. E silisili lava lo tatou Alii, e tele lona malosi; e le ma faamatalaina lona poto. E lagolago Ieova i e ua puapuagatia; a e lafotuina e ia e ua amio leaga ia toele. Ia outou pepese atu ia Ieova i le viiga; ia outou fai pesega i lo tatou Atua i le kitara.

Ia outou vivii atu ia Ioa. Ia outou vivii atu ia Ieova mai le lagi; ia outou vivii atu ia te ia i mea maualuluga. Ia vivii atu ia te ia outou ana agelu uma lava; vivii atu ia te ia outou ana ‘au uma lava. Ia vivii atu ia te ia le la ma le masina; ia vivii atu ia te ia outou fetu uma o loo fepulafi mai. Ia vivii atu ia te ia le lagi o lagi, ma vai o loo i luga o le lagi. Ia latou vivii atu i le suafa o Ieova; auā o ia na fetalai ane, ona faia lava lea. Na ia faatumauina foi i latou e faavavau faavavau lava; na faia e ia le tulafono, e le solia lava.

Ia vivii atu ia Ieova ai le lalolagi o tanimo ma mea loloto uma; o le afi ma le uato‘a, o le kiona ma le ausa; o le matagi e afā ai, o loo faia lana afioga. O mauga tetele, ma mauga iti uma lava; o laau e fua mai, ma arasi uma lava. O manu feai, ma manu vaefa uma; o mea fetolofi, ma manu felelei. O tupu o le lalolagi, ma nuu atoa uma lava; o alii, ma faamasino uma o le lalolagi. O taulelea atoa ma teine, o toeaina atoa ma tama; ia latou vivii atu i le suafa o Ieova; auā ua na o lona suafa e mamalu; o lona viiga ua sili lea i le lalolagi atoa ma le lagi.

Ia outou vivii atu ia Ioa. Ia outou pepese ia Ieova i le pese fou; pepese i lona viiga i le faapotopotoga a ona tagata amio Atua. Ia fiafia Isaraelu i le na faia i latou; ia olioli le fanau a Siona i lo latou Tupu. Ia latou vivii atu i lona suafa ma le siva, ia latou fai pesega ia te ia i le topa ma le kitara. Auā o loo fiafia Ieova i lona nuu; e faamatagofie e ia i le olataga e ua agamalu. Ia olioli i le mamalu e ua amio Atua; ia latou alalaga fiafia i o latou moega; ia i ai i o latou gutu o faaneeneega i le Atua; ia i ai foi i o latou lima le pelu e faatau maai itu;

Ia outou vivii atu ia Ioa. Ia outou vivii atu i le Atua i lona malumalu; ia vivii atu outou ia te ia i le va nimonimo o i ai lona malosi. Ia outou vivii atu ia te ia ona o ana mea mamana; vivii atu ia te ia e tusa ma lona silisili ese. Ia outou vivii atu ia te ia i le leo o le pu; vivii atu ia te ia i le napeli atoa ma le kitara. Ia outou vivii atu ia te ia i le topa ma le siva; vivii atu ia te ia i le menima ma le faaili. Ia outou vivii atu ia te ia i sumepalo taalili; vivii atu ia te ia i sumepalo leo tetele. Ia vivii atu ia Ioa o mea uma lava e mānava. Ia outou vivii atu ia Ioa.

O le mata‘u ia Ieova, o le amataga o le poto lea; ia iloa foi lē Paia, o le atamai lava lea.

O ai ea ua alu ae i le lagi, ma toe ifoifo? O ai ea ua faapotopotoina le matagi i ona lima? O ai ea ua fusifusi vai i le ofu? O ai ea na faatuina tuluiga uma o le lalolagi? O ai ea lona igoa? o ai foi le igoa o lona atalii, pe afai ua e iloa?

Ia sogi mai o ia ia te au i sogi o lona fofoga; auā e sili ona lelei o lou faapelepele mai i le uaina. O le nanamu o ou uu lelei ua avea ai lou suafa e pei o le uu ua liligiina; o le mea lea ua mananao ai taupou ia te oe. Ia e tosina atu o a‘u, matou te taufetuli ma mulimuli atu ia te oe. Ua ta‘ita‘iina o a‘u e le tupu i ona potu; matou te fiafia ma olioli ia te oe, e tele lo matou manatunatu i lou faapelepele mai a e itiiti i le uaina; ua mananao tagata amiotonu ia te oe.

O ai ea lena o loo alu ae nai le vao e faapei o le asu faaniutu, o loo nanamu i le pulu muro, ma le pulu lipano, ma mea manogi uma ua nutililiia a le tagata faatauoa?

Le matu e, ina ala mai ia; le toga e, ina sau ia; agi mai i la‘u faatoaga, ina ia puaiina lona manogi. Ia maliu mai lo‘u manamea i lana faatoaga, ma taumafa i ona fua e sili ona lelei.

Alu ia i totonu o le papa, ina lafi ia i le eleele, ona o le matautia o Ieova, ma lona mamalu silisili.

Latou te ulu atu foi i ana o papa, ma lua o le eleele, ona o le matautia o Ieova ma lona mamalu silisili, pe a tulai o ia e luluina le laueleele.

Ina ia latou o atu i mavaevae o papa, atoa ma va i papa, ona o le matautia o Ieova ma lona mamalu silisili, pe a tulai o ia e luluina le laueleele.

ona faia lea e Ieova i luga o mea uma i le mauga o Siona, o i luga foi o le mea e potopoto ai, o le ao ma le asu i le ao, ma le pupula mai o le afi mumū i le po; auā e i ai le mamalu i luga o le matagofie uma.

A o Ieova o ‘au e viia o ia ona o le faamasinoga, o le Atua paia foi e ta‘upaiaina o ia ona o le amiotonu.

O le tausaga na oti ai le tupu o Usia, na a‘u iloa ai le Alii o afio i le nofoālii silisili ma le maualuga, o ona pito ofu foi na tumu ai le malumalu. Sa tutū serafi e latalata ane, sa tofu i latou ma apaau e ono, o apaau e lua na ia ufitia ai ona mata, o le lua na ia ufitia ai ona vae, o le lua foi na ia lele a‘i. Sa valaau foi le tasi i le tasi, ua faapea ane, E paia, e paia, e paia Ieova o ‘au; ua tumu le lalolagi uma i lona mamalu. Sa luluina foi faavae o faitotoa i le leo o le na valaau, sa tumu foi le fale i le asu. Ona ou faapea atu ai lea, Aue a‘u nei! auā ai a‘u a fano; auā o a‘u o le tagata laugutu leaga, o a‘u foi matou te mau faatasi ma le nuu laugutu leaga; auā lava ua iloa i o‘u mata le Tupu o Ieova o a‘u.

Auā ua fanau mai mo i tatou le tama, ua foaiina mai mo i tatou le atalii, e i lona ua le malo, e igoa foi o ia, o le Silisili ese, o le Faipule, o le Atua malosi, o le Tamā o le faavavau, o le Alii o le filemu. E leai se mea e gata mai ai ona tele o lona malo ma le filemu o lona malo i le nofoālii o Tavita ma lona malo, e faatumauina, ma faamausali i le faamasinoga ma le amiotonu, e afua mai i ia ona po e oo i le faavavau; e faia lea mea i le maelega o Ieova o ‘au.

E afio mau ia te ia le Agaga o Ieova; o le Agaga o le poto ma le mafaufau; o le agaga o le faatonuga ma le malosi; o le Agaga o le malamalama ma le mata‘u ia Ieova.

O lea aso foi tou te faapea atu ai, Ia outou vivii atu ia Ieova, ina valaau atu ia i lona suafa; ia outou faailoa atu i nuu o ana galuega; ia outou ta‘uta‘u atu ua viia lona suafa. Pepese atu ia ia Ieova, auā ua faia e ia mea silisili ese; ina faailoa atu ia o lea mea i le lalolagi uma. Alaga ia, ia leo tele ma le fiafia, o oe o lē nofo i Siona; auā e silisili ese le Paia o Isaraelu o le o afio i totonu ia te oe.

O lea aso e faasaga atu ai le tagata i Le na faia o ia, e vaavaai atu foi ona mata i le Paia o Isaraelu.

Latou te leo tetele, latou te alalaga fiafia, ona o le mamalu o Ieova, latou te alalaga mai le sami. O le mea lea ia outou vivii atu ai ia Ieova i le afi, i nuu tuloto i le sami, o le suafa lava o Ieova o le Atua o Isaraelu.

Ieova e, o lo‘u Atua lava oe; ou te faaneenee ia te oe; ou te vivii atu i lou suafa; auā ua e faia mea e ofo ai; o mea na e pule ai talu anamua e faamaoni ia, e moni lava; auā ua e faia le aai ma faupuega maa; o le aai nofo ‘olo ua e lepetia; ua e faia le maota o tagata ese ia leai se aai; e le toe faia lava e faavavau; o le mea lea e vivii atu ai ia te oe le nuu malosi; e matatau ia te oe le aai o nuu ese e matautia;

Ina faatuatua ia outou ia Ieova e faavavau lava; auā o Ioa Ieova, o le papa e faavavau ia.

O lea aso e avea ai Ieova o ‘au ma palealii e matagofie, ma pale lalelei i e ua totoe o lona nuu;

E ia te outou le pese, e pei ona fai i le po e fai ai le tausamiga paia; e fiafia foi loto e pei o le ua ili fano lana fagufagu e oo atu i le mauga o Ieova, o le Papa o Isaraelu. E faafaalogoina e Ieova lona siufofoga silisili, e faaali foi e ia le faapaū ifo o lona aao, ma le tele o lona toasa, ma le mu o le afi ‘ai tele, o le lolo, ma le afā, ma le uato‘a.

E maimoa ou mata i le tupu i lona matagofie; latou te vaavaai i nuu mamao.

Auā o Ieova o lo tatou faamasino ia, o Ieova o lo tatou fai tulafono, o Ieova o lo tatou tupu, o ia lava e faaola ia te i tatou.

E foi mai e ua togiolaina e Ieova, latou te o mai foi i Siona ma le alaga ma le olioli e faavavau i luga i o latou ulu; latou te maua le olioli ma le fiafia, a e sosola ese le faanoanoa ma le mapuitiga.

Ua faaolaina a‘u e Ieova; matou te taia a‘u nekina i le fale o Ieova i aso uma o lo matou ola.

Ona faaalia mai ai lea o le pupula o Ieova e vāaia lava e tagata uma faatasi; auā ua fetalai mai ai le fofoga o Ieova.

O ai ea ua na fuatia le sami i lona alofilima, ma na fuatia le lagi i le āga, ma na fuatia le eleele o le lalolagi i le fua faaofuofu; ua na fuatia mauga foi i le fua, ma mauga iti i le fua faatautau?

Tou te le iloa ea? Tou te lei faalogo ea? E lei ta‘uina atu ea ia te outou mai le amataga? Tou te lei lagona ea mai le faavaeina o le lalolagi? O ia lē tietie i luga o le faataaliolio o le lalolagi, a o e nonofo ai e tutusa i latou ma sē; o ia lē fofola le lagi e pei o se ie manifinifi; na te faamafolafolaina ai foi e pei o se fale ie e nofo ai. Na te liua alii ia leai; o faamasino o le lalolagi ua faia i latou e ia e tusa ma se mea faatauvaa.

Se‘i tetepa ae i luga, ma outou vaai, po o ai ea ua na faia nei mea? Na te ta‘ita‘iina mai a latou ‘au ua faitauina; na te valaau ia te i latou uma i o latou igoa; ona o le tele o lona malosi ma lona mana tele; e leai so latou e le iloa.

E te le iloa ea? E te lei faalogo ai ea? O le Atua o le vavau, o Ieova o le na faia tuluiga o le lalolagi, e le vaivai o ia, e le tigaina foi, e le masuesueina lona mafaufau.

E te faasavili ia te i latou, e lelea foi i latou i le matagi; e faataapeapeina i latou i le afā; a o oe, e te olioli ia Ieova, e te mitamita foi i le Paia o Isaraelu.

O a‘u o Ieova, o lo‘u igoa lea; o lo‘u mamalu foi ou te le avatua lea i se tasi, ma lo‘u viiga ou te le avatua i tupua ua ta. O mea muamua, faauta, ua oo mai ia; o mea fou foi o loo ou te ta‘uina atu; ua ou faailoa atu ia te outou, a o lei tutupu mai. Pepese ia Ieova i le pese fou, o lona viiga mai le tuluiga o le lalolagi, outou o e ō ifo i le sami, atoa ma e o tumu ai; outou nuu tu matafaga, ma e o nonofo ai. E leo tele mai le vao ma ona aai, o faoa aai e nofo ai Kitara; e alalaga e o nonofo i le papa; latou te faataio mai tumutumu o mauga. Latou te avatu le faaneeneega ia Ieova, ma latou ta‘u atu lona viiga i nuu tu matafaga.

o i latou uma ua igoa i lo‘u igoa, na ou faia ia viia ai a‘u; na a‘u gaosia ma ou faia lava i latou.

Ua fetalai mai Ieova, O outou o a‘u molimau, ma la‘u auauna o le na a‘u filifilia; ina ia outou iloa, ma ia outou faatuatua mai ia te au, ma ia outou lagona, o a‘u lava o ia; e leai se atua na gaosia e muamua ia te au; e leai foi se tasi e mulimuli ia te au. O a‘u o a‘u lava o Ieova; a e leai se faaola ua na.

O a‘u o Ieova, o lo outou Alii Paia; o le na faia Isaraelu, o lo outou Tupu.

O le nuu lenei na a‘u faia mo a‘u; latou te ta‘uatua lo‘u viiga.

O loo faapea ona fetalai mai o Ieova, o le Tupu o Isaraelu, o le na faatauina foi o ia, o Ieova o ‘au; o a‘u lē muamua, o a‘u foi lē mulimuli; a e leai se atua, ua na o a‘u lava.

Ia pese oe le lagi e, auā ua faia lea mea e Ieova; ia alalaga outou o mea maulalalo i le lalolagi; ia leo tetele outou mauga e, ma alalaga fiafia; o oe le vao ma laau uma o i ai; auā ua faatauina Iakopo e Ieova, na te faatupuina foi lona lava viiga ia Isaraelu.

O a‘u o Ieova, a e leai lava se tasi; e leai se Atua, na o a‘u lava; ua ou fusia oe, a o e lei iloa a‘u; ina ia latou iloa, e afua mai i le mea e alu ae ai le la, e oo i le mea e alu ifo ai, e leai se tasi na o a‘u; o a‘u o Ieova, a e leai lava se tasi; o a‘u lē faia le malamalama, ma faatupuina le pouliuli; o lē faia le manuia, ma faatupuina le mala; o a‘u o Ieova, o lē faia ia mea uma.

Auā o loo faapea ona fetalai mai o Ieova, o le na faia le lagi; o ia lava o le Atua; o le tufuga o le na faia le lalolagi; o ia na faatumauina; na ia le faia fua, na ia faia ina ia āina, o a‘u o Ieova, a e leai se tasi.

Liliu mai ia ia te au, tou te ola ai, o outou tuluiga uma o le lalolagi; auā o a‘u o le Atua, a e leai lava se tasi. Ua ou tauto ia te au lava, ua mavae atu le upu i lo‘u gutu e faamaoni, e le toe foi mai lava, E tootuli mai ia te au o tulivae uma lava, e tauto mai laulaufaiva uma lava;

Ia outou manatunatu i mea muamua talu mai le vavau; auā o a‘u o le Atua, e leai lava se tasi; o le Atua, e leai se ma te tutusa; o loo faaali talu mai le amataga o mea e mulimuli; mai anamua foi o mea ua le faia; o loo fai ane, E tu la‘u pule, ou te faia foi mea uma ou te loto i ai.

O le na faatauina i tatou, o Ieova o ‘au lona suafa, o le Paia o Isaraelu.

Faalogo mai ia ia te au, Iakopo e, o oe foi Isaraelu le na ou valaauina; o a‘u lava ia, o a‘u lava lē muamua, o a‘u foi lē mulimuli. O lo‘u lima foi na faavaeina ai le lalolagi, ma lo‘u lima taumatau na folasia ai le lagi; ou te valaau ia te i latou, ona latou tutū faatasi mai lea.

O loo faapea ona fetalai mai o Ieova, o le Faaola o Isaraelu, o lona Alii Paia, i le ua faaleaogaina e tagata, ma inosia e le nuu, o le auauna a ē pule; e iloa mai tupu, ma latou tulai; o alii foi, ma latou ifo; auā o Ieova, o le ua faamaoni, o le Paia o Isaraelu, le ua filifilia oe.

Ia alaga oe le lagi e, ia olioli oe le lalolagi e, ia leo tetele outou mauga, ma ia alalaga fiafia; auā ua faamafanafanaina e Ieova lona nuu, ua ia alofa foi i ona tagata ua tigaina.

O le leo o ou tagata vaai, ua latou leo tetele, ua latou alalaga faatasi; auā latou te iloa e faafesagai lava, pe a faafoisia Siona e Ieova. Ia alalaga fiafia faatasi outou o mea faatafunaina i Ierusalema; auā ua faamafanafanaina lona nuu e Ieova, ua na faatauina Ierusalema.

Auā o le na faia oe o lau tane lea, o Ieova o ‘au o lona igoa lea; o le na faatauina oe, o le Paia o Isaraelu lea; e ta‘ua o ia, O le Atua o le lalolagi uma.

Auā tou te o atu ma le fiafia, e ta‘ita‘iina foi outou ma le manuia; o atu mauga ma mauga e leo tetele ma le alaga fiafia i o outou luma, e pāti lima foi laau uma o le vao.

Auā o loo faapea ona fetalai mai o le ua Maualuga ma ua Silisili, o lē afio e faavavau, e paia lona suafa, Ou te nofo i le mea maualuga ma le paia, ma te nonofo foi ma le ua momomo ma ua maulalo lona loto, e faamafanafana i e ua loto maulalo, ma faamafanafanaina loto o e ua loto momomo.

E le toe faia le la mou malamalama i le ao; e le faamalamalama foi ia te oe le masina i lona susulu mai; a e faia Ieova mou malamalama e faavavau, e fai foi lou Atua mou matagofie. E le toe goto lou la, e le toe mavae atu foi lou masina; auā e faia Ieova mou malamalama e faavavau; e uma foi aso o lou faanoanoa. O lou nuu foi e amiotonu i latou uma lava; e fai mo latou le nuu e faavavau; o le tātupu o la‘u faatoaga, o le galuega a o‘u lima, e fai mo‘u viiga.

e avatu le fiafia i e faanoanoa i Siona, e foaiina atu ia i latou le matagofie e sui a‘i le lefulefu, o le uu o le olioli e sui a‘i le faanoanoa, o le ofu e fai a‘i viiga e sui a‘i le loto faavaivai; e igoa i latou, O laau o le amiotonu, o le faatoaga a Ieova, e fai mona viiga.

o le na ta‘ita‘i ia te i latou i le lima taumatau o Mose, ma lona aao mamalu, na vaea e ia le sami i o latou luma, ina ia faia mo ia le suafa e faavavau?

Auā o oe lava lo matou Tamā; e ui lava ina le iloa o i matou e Aperaamo, ua le vaai mai foi Isaraelu ia te i matou, o oe Ieova o lo matou Tamā oe, o le na faatauina i matou; mai anamuā lava lou suafa.

A o lenei, Ieova e, o oe lava lo matou Tamā; o i matou nei o le omea, a o oe le Tufuga; o le galuega a ou aao i matou uma.

O loo faapea ona fetalai mai o Ieova, O le lagi o lo‘u nofoa lea, o le lalolagi o le mea e tu ai ou vae lea; o ifea le fale tou te faia mo a‘u? o ifea foi le mea ou te malolo ai?

Auā e pei ona tumau i o‘u luma o le lagi fou ma le lalolagi fou ou te faia, ua fetalai mai ai Ieova, e faapea ona tumau o a outou fanau ma lo outou igoa. O lea masina faatoa vaaia, ma lea masina faatoa vaaia, o lea sapati ma lea sapati e o mai ai tagata uma lava e ifo mai i o‘u luma, ua fetalai mai ai Ieova.

Tou te le fefefe ea ia te au? o loo fetalai mai ai Ieova; tou te le gatete ea i o‘u luma? o a‘u na ou tuuina le oneone e fai ma tuaoi o le sami; o le tulafono e faavavau lea, e le masopoia; e ui ina fāti tetele mai ona galu, e le mafaia lava; e ui ina taalili mai, e le masopoia lava.

A o Ieova o le Atua moni ia, o ia lava le Atua soifua, ma le Tupu e faavavau; o lona toasa e gatete ai le lalolagi, e le lavā foi e nuu ona tali o lona toatamai.

Ina pepese ia ia Ioeva, ia outou vivii atu ia Ieova; auā ua laveaiina e ia ia ola le ua mativa ai lima o e amio leaga.

Pe mafai ea e se tagata ona lafi i mea lilo, ou te le iloa ai o ia? o loo fetalai mai ai Ieova. E le o tutumu ea le lagi ma le lalolagi ia te au? o loo fetalai mai ai Ieova.

E le pei o le afi ea la‘u upu? o loo fetalai mai ai Ieova; e le pei o le samala foi e tu‘imomoia ai le papa?

E saili mai outou ia te au, tou te maua foi, pe a outou saili mai ia te au ma outou loto atoa.

Aue! le Alii e Ieova, faauta, o oe na e faia le lagi ma le lalolagi i lou malosi tele, ma lou aao faaloaloa, e le faigata foi ia te oe se mea e tasi; ua e alofa i afe o tupulaga, ua e taui atu foi le amioletonu a tamā i fatafata o a latou fanau pe a mavae atu i latou; o le Atua sili, ma le malosi, o Ieova o ‘au, o lona suafa lea,

Faauta, o a‘u lava o Ieova, o le Atua o tagata uma; pe faigata ea ia te au se mea e tasi?

e lagona ai le leo fiafia ma le leo olioli, o le leo o le faatoafaiavā ma le leo o le faatoanofotane, o le leo o e fai mai, Ia outou vivii atu ia Ieova o ‘au, auā e lelei Ieova, auā e faavavau lava lona alofa; o i latou ia o e avatua le taulaga faaneenee i le fale o Ieova. Auā ou te foafoisia le tafeaga o le nuu, e pei o anamua, ua fetalai mai ai Ieova.

Ina tulai ia, ina valaau atu i le po i le amataga o leoleoga; ia e sasaaina atu lou loto e pei o se vai i luma o le Alii; ina sisii atu ia o ou lima ia te ia ina ia ola au tama iti ua matapogia i le fia ‘ai i tuluiga o ala uma.

Se‘i tatou sii atu o tatou loto faatasi ma o tatou lima i le Atua o i le lagi.

O oe, Ieova e, e tumau oe e faavavau; o lou nofoālii e auga tupulaga lea.

Na ou lagona le taalili o latou apaau ina ua latou o atu, ua pei o le taalili o vai e tele, pei o le siufofoga o Le e ona le malosi uma lava; o le taalili ua pei o le taalili o se itu taua: ua tutū i latou, ona tutuu lea i lalo e i latou o latou apaau. Na i ai foi le taalili mai le va i lagi i luga o latou ulu; a tutū i latou, ona tutuu lea i lalo e i latou o latou apaau. O i luga foi o le va i lagi i luga o latou ulu, ua i ai le faatusa o le nofoālii, ua tino mai e pei o le maa safaira; o i luga foi o le faatusa o le nofoālii le faatusa ua tino mai e pei e le tagata i ona lava luga. Na ou iloa foi pei o le tino o le ‘apa pupula, ua tino mai e pei o le afi ua faataaliolio i totonu, ua tino mai i lona sulugatiti e oo ae i luga; ua tino mai foi i lona sulugatiti e oo ifo i lalo, na ou iloa ua tino mai e pei o le afi, na i ai foi le pupula ua faataaliolioina ai. Pei o le tino mai o le nuanua e i le ao i le aso ua, e faapea ona tino mai o lona pupula o faataaliolioina ai. O lona tino mai lea o le faatusa o le pupula o Ieova. Na ou iloa ai, ona ou faapaū fao ai lea, ona ou lagona lea le siufofoga o le tasi ua fetalai mai.

Ona siitia lea o a‘u i luga e le Agaga, ona ou faalogo atu lea i o‘u tua i le leo o le taalili tele, ua faapea mai, Ia viia le mamalu o Ieova mai lona afioaga.

Ona ou tulai ai lea, ma ou alu atu i le fanua laugatasi; faauta foi, o le pupula o Ieova ua tu mai ai, pei o le pupula na ou iloa e lata ane i le vaitafe o Kepara; ona ou faapaū fao ai lea.

Faauta foi, sa i ai le pupula o le Atua o Isaraelu, ua tino mai ia e pei ona ou iloa i le fanua laugatasi.

Ona alu ae lea o le pupula o Ieova nai luga o le kerupi, ua oo i le faitotoa o le fale; ua faatumuina foi le fale i le ao, ua tumu foi le lotoā i le pupula matagofie o Ieova. Ua logona foi le taalili o apaau o kerupi, ua oo lava i le lotoā aupito i fafo, ua pei o le siufofoga o le Atua e ona le malosi uma lava pe a fetalai mai o ia.

Ona alu atu lea o le pupula o Ieova ai le faitotoa o le fale, ma ua tu i luga ae o kerupi. Ona faloina lea i luga e kerupi o latou apaau, ua o ae mai le lalolagi, o loo ou vaai i ai; ua latou o atu ua faatasi ma i latou mea taavavale, ua latou tutū foi i le puipui o le faitotoa o le fale o Ieova e faasaga i sasae; ua i luga lava ia te i latou le pupula o le Atua o Isaraelu.

Ona siitia lea i luga e kerupi o latou apaau, ma mea taavavale i o latou tafatafa; ua i o latou luga ae le pupula o le Atua o Isaraelu. Ona alu ae lea o le pupula o Ieova nai totonu o le aai, ua tu i luga o le mauga o loo i le itu i sasae o le aai.

Ou te faasilisiliina o a‘u e a‘u, ma ou faapaiaina o a‘u; e iloa foi a‘u i luma o nuu e tele, e iloa ai lava e i latou o a‘u lava o Ieova.

faauta foi, o le pupula o le Atua o Isaraelu ua afio mai mai sasae; o lona siufofoga foi e pei o le taalili o le vai e tele; ua malamalama foi le lalolagi i lona pupula. E pei ona tino mai o le faaaliga na ou iloa, e pei o le faaaliga lava na ou iloa ina ua ou sau e faaumatia le aai; o faaaliga foi e pei o le faaaliga na ou iloa i le vaitafe o Kepara; ona ou faapaūfao ai lea. Ua afio mai foi le pupula o Ieova i le fale na ala mai i le faitotoa e faasaga i sasae. Ona siitia lea o a‘u e le Agaga, ua ia au mai foi ia te au i le lotoā tuloto; faauta foi, ua tumu le fale i le pupula o Ieova. Ona ou faalogo atu lea, ua tŭlei mai lona siufofoga ia te au ai totonu o le fale; ua tu mai foi le tagata i o‘u tafatafa, ua ia faapea mai foi ia te au, Le atalii e o le tagata, o le mea e i ai lo‘u nofoālii, ma le mea e tutū ai o‘u alofivae, ou te nofo ai e faatasi ma le fanauga a Isaraelu e faavavau, e le toe faaleagaina foi lo‘u igoa paia e le aiga o Isaraelu, o i latou ma o latou tupu i a latou faitaaga, e le toe leaga foi i tino oti o latou tupu i a latou mea maualuluga,

Ua ia au mai foi ia te au i le ala o le faitotoa i le itu i matu i lumāfale; ona ou vaai lea, faauta foi, ua tumu le fale o Ieova i le pupula o Ieova, ona ou faapaūfao ai lea.

Ona faaali mai ai lea i le faaaliga i le po ia Tanielu o le mea sa lilo; ona faamanū ai lea o Tanielu i le Atua o le lagi. Ua fai atu Tanielu, ua faapea atu, Ia viia le suafa o le Atua e faavavau, e faavavau lava; auā e ona le poto ma le mana. O ia foi na te liua tausaga ma tau; e aveeseina e ia o tupu, e tofia foi e ia o tupu; e foaiina mai e ia le poto i e o popoto, ma le malamalama i e o iloa mafaufau. O ia na te faaalia mai mea loloto ma mea ua lilo; ua na silafia le mea o loo o i le pouliuli, o le malamalama foi la te mau faatasi ma ia. Ou te faamanū ma vivii atu ia te oe, le Atua o o‘u tamā, o le ua foaiina mai ia te au le poto ma le malosi; ua e faailoaina mai nei foi ia te au le mea sa matou aioi atu ai ia te oe; auā ua e faailoa mai ia te i matou le mea a le tupu.

O ona po o ia tupu e faatuina ai e le Atua o le lagi o le malo e le faaumatia e faavavau; o lea malo foi, e le tuuina atu ia i se tasi nuu, na te tu‘imomomoina ma faaumatia ia malo uma lava, a o ia e tumau lava e faavavau;

Ua uma ia aso, ona ou faasaga ae ai lea o‘u mata i le lagi, o a‘u o Nepukanesa, ona a‘u toe atamai ai lea; ona ou faafetai ai lea i lē Silisili ese, ua ou faaneenee atu foi ma vivii atu ia te ia o lē soifua e faavavau, o lana pule o le pule e faavavau lea, o lona malo foi e āu tupulaga lava lea.

O lenei, o a‘u o Nepukanesa ou te faamanū atu, ma vivii atu, ma faaneenee atu i le Tupu o le lagi, e faamaoni ana galuega uma, ma ona ala ua tonu; na te mafaia foi ona faamaulaloina e o savavali ma le faamaualuga.

Na ou vaavaai ina seia tuu mai o nofoālii, ua tietie mai foi Lē ua mai anamuā ona aso, ua sinasina lona ofu e pei o le kiona, ma ona lauao e pei o le fulufulu mamoe e lelei; o lona nofoālii o le afi mumū ia, ua se afi ua mu ana mea e taavalevale a‘i. Ua tafe mai le afi ua alu atu nai ona luma, ua afe ni afe o e auauna ia te ia, e mano ni mano o e laulaututū i ona luma; ua nofoia le faamasinoga, ma ua fofola tusi.

Na ou iloa i faaaliga i le po, faauta foi, ua afio mai i ao o le lagi Lē e pei o le Atalii o le tagata, ua oo foi ia i Lē ua mai anamua ona aso, ua latou momoli ia te ia i ona luma. Ua foaiina atu ia te ia le pule, ma le viiga, ma le malo, ina ia auauna ia te ia o nuu uma, ma atu nuu, ma gagana eseese; o lana pule o le pule e faavavau lea, e le mavae atu ia, o lona malo foi e le faaumatia.

A e maua le malo e le au paia a lē Silisili ese, e fai foi mo i latou le malo e faavavau, e faavavau lava.

O le malo, ma le pule, atoa ma le mamalu o le malo i lalo ifo o le lagi uma, e tuuina atu ia i le nuu o le au paia a lē Silisili ese, o lona malo, o le malo e faavavau lea, e auauna ma usiusitai ia te ia o pule uma lava.

E tu foi o ia ma leoleo ia te i latou i le mana o Ieova, ma le mamalu o le suafa o Ieova lona Atua, ona latou nofo mau ai lea; auā o ona po ia e mamalu ai o ia e oo i tuluiga o le lalolagi.

E gatete mauga ia te ia, e liu suāvai mauga iti; e mafuie le eleele i ona luma, o le lalolagi foi atoa ma i latou uma o e nonofo ai.

Auā e tumu le lalolagi i le malamalama o le mamalu o Ieova, faapei ona ufitia o le iliti tai i le suāsami.

Na afio mai le Atua mai Timanu, na afio mai foi le Paia mai le mauga o Parana. Selā. Sa ufitia le lagi i lona pupula, o lona viiga foi sa tumu ai le lalolagi. O le pupula foi sa faapei o le la, sa oo mai ‘ave ai lona aao, sa iai foi le ufiufi o lona mana.

Na iloa oe e mauga, ua latou gatete ai; ua tafe ane le tafega o vai; na gagana mai le moana, ua na sisii i luga ona lima.

Ou te luluina foi nuu uma; ona oo mai ai lea o mea ua manaomia e nuu uma; ou te faatumuina foi lenei fale i le pupula, ua fetalai mai ai Ieova o ‘au.

O a‘u foi, ua fetalai mai Ieova, e fai a‘u ma pa afi e siosio a‘i, e fai foi a‘u ma pupula i totonu ia te ia.

Ua tali mai o ia, ua fai mai ia te au, o loo faapea mai, O le afioga lenei a Ieova ia Serupapelu, o loo faapea mai, E le o le fitafita, e le o le malosi, a o lo‘u Agaga, ua fetalai mai ai Ieova o ‘au.

o ia lava na te faia le malumalu o Ieova; e ia te ia foi le mamalu, e tietie foi o ia ma pule i luga o lona nofoālii; e fai foi o ia ma faitaulaga i luga o lona nofoālii; e i ai foi le pule o le manuia ia te i laua.

Ia e matuā fiafia o oe le tama fafine a Siona; ia alaga fiafia o oe le tama fafine a Ierusalema; faauta, o le a alu atu lou Tupu ia te oe; o ia o le amiotonu ma le faaola; e agamalu o ia, o loo tietie i le asini, o le tamai asini foi.

E tu ona aao i lea aso i luga o le mauga o Olive, o loo feagai ma Ierusalema i gagae; e vaeluaina foi le mauga o Olive i totonu i sasae ma sisifo, o le vanu tele lava; e te‘a atu le tasi itu o le mauga i le itu i matu, ma le tasi ona itu i le itu i toga.

E fai foi Ieova ma Tupu i le lalolagi uma lava; o lea aso ua na o Ieova ai lava, ma lona suafa e āu tasi lea.

Ona fetautalatalai lea e na matatau ia Ieova; ua liliu mai foi e Ieova ona fofoga, ma ua faafofoga mai; ona tusia lea o le tusi e faamanatu i ona luma, mo e matatau ia Ieova, ma mafaufau i lona suafa.

Faauta, e to le taupou, ma fanau mai le tama tane, latou te faaigoa foi ia te ia o Emanuelu; o lona uiga pe a faamatalaina, Ua ia te i tatou le Atua.

Po o fea o i ai le ua fanau mai o le tupu o tagata Iutaia? Auā ua matou vaaia lona fetu i sasae, ua matou o mai ai e ifo atu ia te ia.

Ua latou ulufale atu i le fale, ua latou iloa ai le tama itiiti ma Maria lona tinā, ona latou faapauu ai lea, ma ifo atu ia te ia; ua talai foi o latou oloa, ona latou avatu ai lea ia te ia o mea alofa, o le auro, ma le pulu lipano, ma le pulu muro.

Ua papatisoina Iesu, ona maliu ae loa lea o ia nai le vai, faauta foi, ua faaavanoaina le lagi ia te ia, ua ia iloa atu foi le Agaga o le Atua ua afio ifo e peiseai se lupe, ua oo i ona luga. Faauta foi, o le siufofoga mai le lagi, ua faapea mai, O lo‘u atalii pele lenā, ua ou fiafia lava ia te ia.

Ia faapea ona pupula atu lo outou malamalama i luma o tagata, ina ia latou iloa la outou amio lelei, latou te vivii atu ai i lo outou Tamā o i le lagi.

O lenei, ia faapea outou ona tatalo, Lo matou Tamā e, o i le lagi, ia paia lou suafa. Ia oo mai lou malo. Ia faia lou finagalo i le lalolagi, e pei ona faia i le lagi.

Aua foi e te ta‘ita‘iina i matou i le tofotofoga; a ia e laveai ia i matou ai le leaga. Auā e ou le malo, ma le mana, atoa ma le viiga, e faavavau lava, Amene.

Ona taufaiofo ai lea o tagata, ua faapea ane, Ua silisili lava lenei Alii! auā ua usiusitai ia te ia le matagi ma le vai.

Ou te fai atu foi ia te outou, O iinei le ua sili i le malumalu.

Ona o mai ai lea o e na i le vaa, ua ifo mai ia te ia, ua faapea mai, E moni, o oe lava o le Alo o le Atua.

Ona taufaiofo ai lea o le motu o tagata ina ua latou iloa atu o e sa gūgū ua tautala, o e sa mumutu ua atoatoa, o e sa pipili ua savavali, o e sa tauaso foi ua vaai; ona latou vivii atu ai lea i le Atua o Isaraelu.

Auā e sau le Atalii o le tagata faatasi ma ana agelu i le mamalu o lona Tamā; ona tauia lea e ia e taitasi e tusa ma lana galuega.

Ona liua ai lea o ia i o latou luma, ua pupula mai ona fofoga e pei o le la, ua sisina mai foi ona ofu e pei o le malamalama.

Faauta, o le ao pupula ua ufitia ai i latou a o tautala ia; faauta foi, o le siufofoga mai le ao ua faapea mai, O lo‘u Atalii pele lena, ou te fiafia ia te ia; ia outou faalogo ia te ia. Ua faalogo ai le au soo, ona latou faapauu faō ai lea, ua matuā matatau lava.

Ona silasila atu ai lea o Iesu, ua faapea atu ia te i latou, E le mafaia e tagata lenei mea, a e mafaia mea uma e le Atua.

Ona fetalai atu ai lea o Iesu ia te i latou, E moni, ou te fai atu ia te outou, o outou ua mulimuli mai ia te au, pe a tietie le Atalii o le tagata i lona nofoālii mamalu i le toefuataiga, tou te tietie ai foi i nofoālii e sefulu ma le lua, e faamasino ai i itu aiga o Isaraelu e sefulu ma le lua.

Ia outou fai atu i le tama fafine a Siona, faauta, o loo afio mai ia te oe lou Tupu, ua agamalu o ia, o loo tietie i le asini, o le tamai asini foi.

O le motu o tagata ua muamua, ma e ua mulimuli, ua alalaga i latou, ua faapea mai, Osana i le alo o Tavita; ia manuia lē afio mai i le suafa o le Alii. Osana i mea e aupito i luga.

Ua iloa atu e le au faitaulaga sili ma le au tusiupu o vavega ua faia e ia, o tama foi ua alalaga i le malumalu, ua faapea ane, Osana i le alo o Tavita; ona matuā tiga ai lea o i latou, ona faapea mai ai lea o i latou ia te ia, Ua e lagona ea a latou upu? Ona fetalai atu ai lea o Iesu ia te i latou, Ioe; tou te lei faitaulia lava ea, Ua e saunia le viiga mai gutu o tama meamea ma tama fesusui?

Ona fetalai atu ai lea o Iesu ia te ia, E te alofa atu i le Alii lou Atua ma lou loto atoa, ma lou agaga atoa, ma lou manatu atoa. O le poloaiga muamua lena ma le sili.

Ona iloa ai lea i le lagi o le faailoga o le Atalii o le tagata; ona taufaitagitu‘i ai lea o itu aiga uma o le lalolagi; latou te iloa atu foi le Atalii o le tagata ua sau i ao o le lagi ma le mana ma le mamalu tele. E aauina atu foi e ia o ana agelu ma le leo tele o le pu, latou te faapotopoto foi i e ua filifilia e ia mai matāmatagi e fa, e amata i le tasi tulu‘iga o le lagi, e oo i le tasi tulu‘iga.

Pe a sau le Atalii o le tagata i lona mamalu, ma le au agelu paia uma faatasi ma ia, ona tietie ai lea o ia i lona nofoālii mamalu; e faapotopotoina foi i ona luma o nuu uma lava; ona tuueseeseina lea o i latou e ia, e pei o le leoleo mamoe ona tuueseeseina o mamoe ma ‘oti;

Ua uma ona fai o a latou pese, ona latou o atu ai lea i le mauga o Olive.

Ona fetalai atu ai lea o Iesu ia te ia, O lea lava; ou te fai atu foi ia te outou, E mulimuli ane tou te iloa ai le Atalii o le tagata e nofo i le itu taumatau o le e ona le mana, e sau foi o ia i ao o le lagi.

Ua tu Iesu i luma o le alii; ona fesili mai ai lea o le alii ia te ia, ua faapea mai, O oe ea o le tupu o tagata Iutaia? Ona fetalai atu ai lea o Iesu ia te ia, O lea lava.

Ua latou tuu foi i luga ae o lona ao le tusi i le mea na molia ai o ia, O IESU LENEI, O LE TUPU O TAGATA IUTAIA.

Ua la o e ta‘u atu ai i ona soo, faauta foi, ua fetaiai Iesu ma i laua, ua faapea atu, Si o‘u alofa. Ona la o mai ai lea ua fetagofi i ona vae, ma ifo mai ia te ia.

Ua latou iloa o ia, ona latou ifo mai ai lea ia te ia; a ua masalosalo nisi. Ona maliu ane ai lea o Iesu, ua fetalai atu ia te i latou, ua faapea atu, Ua tuuina mai ia te au le pule uma lava i le lagi ma le lalolagi.

Ona matuā matatau lava lea o i latou, ma fetautalatalai i latou, Po o ai lava lenei, ina ua faalogo lava le matagi ma le vai ia te ia?

Auā ai sē mā ia te au, ma a‘u upu i lenei tupulaga mulilulua ma le agasala, e mā foi le Atalii o le tagata ia te ia, pe a sau o ia faatasi ma ana agelu paia i le mamalu o lona Tamā.

Ua oo mai foi le ao ua ufitia ai i latou; ona tŭlei mai lea o le siufofoga mai le ao, ua faapea mai, O lo‘u Atalii pele lena, ina faalogo ia outou ia te ia.

A ua silasila atu Iesu ia te i latou, ua faapea atu, E le mafaia e tagata, na o le Atua; auā e mafaia mea uma e le Atua.

Ua alalaga foi e na muamua, ma e na mulimuli, ua faapea, Osana! Ia manuia lē afio mai i le suafa o le Alii. Ia manuia le malo o lo tatou tamā o Tavita, e oo mai i le suafa o le Alii; Osana i mea e aupito i luga!

Ona tali atu lea o Iesu ia te ia, E sili lenei i poloaiga uma, Faalogo mai ia Isaraelu e; o le Alii lo tatou Atua, o le Alii e toatasi ia. Ia e alofa foi i le Alii lou Atua ma lou loto atoa, ma lou agaga atoa, ma lou manatu atoa, ma lou malosi atoa. O le poloaiga sili lea.

Ona iloa atu lea e i latou o le Atalii o le tagata ua sau i ao ma le mana tele ma le mamalu.

E mavae atu le lagi ma le lalolagi; a e peitai a‘u upu, e le mavae lava ia.

Ua uma ona faia o a latou pese, ona latou o atu lea i le mauga o Olive.

Ona fetalai atu lea o Iesu, O a‘u lava lea; tou te iloa foi le Atalii o le tagata e nofo i le itu taumatau o Le e ona le mana, e sau foi o ia i ao o le lagi.

Ona fesili mai lea o Pilato ia te ia, O oe ea e le tupu o tagata Iutaia? Ona tali atu lea o ia ia te ia, ua faapea atu, O lea lava.

Ua tusia foi le tusi i le mea na molia ai o ia, O LE TUPU O TAGATA IUTAIA,

Ua mavae foi ona fetalai atu o le Alii ia te i latou, ona aveina ae lea o ia i le lagi, ona nofo ai lea o ia i le itu taumatau o le Atua.

Faauta foi, o le a to oe, ma e fanauina se tama tane, e te faaigoa ia te ia o Iesu. E sili o ia, e ta‘ua foi o le Alo o le Silisili ese; e foai atu e le Alii o le Atua ia te ia le nofoaiga a Tavita lona tamā; e fai o ia ma tupu i le aiga o Iakopo e faavavau; o lona malo foi e leai sona gataaga. Ona fai atu lea o Maria i le agelu, A faapefea le mea nei; auā ou te lei iloa se tane? Ua tali mai le agelu, ua faapea mai ia te ia, E afio ifo le Agaga Paia i luga ia te oe, e faamalumalu ifo foi ia te oe le mana o le Silisili ese; o le mea lea e ta‘ua ai le tama paia, o le Alo o le Atua.

auā e leai lava se mea e tasi e le mafaia e le Atua.

Ona fai ane lea o Maria, Ua vivii atu lo‘u loto i le Alii. Ua fiafia lava lo‘u loto i le Atua lo‘u Faaola;

Auā o Le e ona le mana, ua faia e ia mea silisili mo a‘u; e paia foi lona suafa.

auauna ia te ia ma le paia ma le amiotonu i ona luma i aso uma o lo tatou ola.

Ona faafuasei lea ona faatasi mai ma le agelu o ‘au mai le lagi e toatele, ua vivii i le Atua, ua faapea ane, O le viiga i le Atua i mea aupitoaluga; ma le manuia i le lalolagi; o le finagalo alofa i tagata.

Ona foi mai lea o leoleo mamoe, o vivii ma faafetai i le Atua, ona o mea uma ua latou faalogo ai ma vaai i ai, pei ona ta‘ua mai ia te i latou.

Ona tali atu lea o Iesu, ua faapea atu ia te ia, Satani e, ina alu ese ia oe i o‘u tua; auā ua tusia, E te ifo i le Alii lou Atua, ua na o ia lava e te auauna i ai.

Ua iloa e Simona Peteru, ona faapaū lea o ia i tulivae o Iesu, ua faapea mai, Le Alii e, ina maliu ese atu ia oe ia te au, auā o a‘u le tagata agasala.

Ua fetalai atu ia ia te i latou, O ifea ea lo outou faatuatua? Ua matatau lava i latou ma ofo; ua fetautalatala‘i i latou, O ai ea lenei? auā ua fetalai o ia i le matagi ma le vai, ona usiusitai ai lea ia te ia.

Auā ai se mā ia te au ma a‘u upu, e mā foi ia te ia le Atalii o le tagata, pe a sau o ia i lona mamalu, ma lo le tamā, ma le au agelu paia.

Ua latou matuā ofo uma i le vavega o le Atua. O loo ofo i latou uma i mea uma na faia e Iesu, ona fetalai atu lea o ia i ona soo,

O lea lava itu aso ua matuā fiafia ai le finagalo o Iesu, ua faapea atu. Ou te faafetai ia te oe lo‘u Tamā e, o le Alii o le lagi ma le lalolagi, ina ua e nanā ia mea i e popoto ma e atamamai, a ua faaalia atu ia mea i tama valevale; o lea lava lo‘u Tamā, auā o lou finagalo lava lea.

Ua tali mai o ia, ua faapea mai, E te alofa atu i le Alii lou Atua ma lou loto atoa, ma lou agaga atoa, ma lou malosi atoa, ma lou manatu atoa; e te alofa atu foi i lē lua te tuaoi, ia pei o oe lava ia te oe.

Ua fetalai atu ia ia te i latou, Pe a outou tatalo, ia outou fai atu, Lo matou Tamā e o i le lagi, ia paia lou suafa. Ia oo mai lou malo. Ia faia lou finagalo i le lalolagi, e pei ona faia i le lagi.

O le tasi o i latou, ua na iloa ua faamaloloina ia, ona toe foi mai lea o ia, ua vivii atu i le Atua ma le leo tele; ua faapaū fao ia i ona vae, ua faafetai mai ia te ia; o le Samaria foi o ia.

Ua fetalai atu ia, O mea e le mafaia e tagata, e mafaia e le Atua.

Ona vaai loa lea o ona mata, ua mulimuli atu ia te ia, ua vivii atu i le Atua; ua iloa atu ai e le nuu uma, ona latou vivii atu lea i le Atua.

Ua latalata ia ua i le ifoa‘i o le mauga o Olive, ona afua ai lea o le olioli o le au soo uma e toatele, ua latou vivii atu i le Atua ma le leo tele, auā o vavega uma na vaaia e i latou; ua faapea ane, Ia manuia le tupu o loo maliu mai i le suafa o le Alii; o le manuia i le lagi, o le viiga foi i mea aupitoaluga. Ona fai mai lea ia te ia o isi o le au faresaio mai le motu o tagata, Le a‘oa‘o e, ia e aoai atu i ou soo. Ona tali atu lea o ia ia te i latou, ua faapea atu, Ou te fai atu ia te outou, a le feganavai i latou nei, e alalaga mai lava o maa.

Ona iloa atu ai lea e i latou o le Atalii o le tagata e sau i le ao, ma le mana ma le mamalu tele.

E mavae atu lava le lagi atoa ma le lalolagi; peitai o a‘u upu, e le mavae atu lava ia.

E amata i nei ona po ona nofo o le Atalii o le tagata i le itu taumatau o le Atua mamana. Ona fai mai lea o i latou uma, O oe foi ea le Alo o le Atua? Ua fetalai atu ia ia te i latou, O a‘u lea ua outou fai mai ai na.

Ona fesili mai lea o Pilato ia te ia, ua faapea mai, O oe ea o le tupu o tagata Iutaia? Ua tali atu ia ia te ia, ua faapea atu, O lea lava.

Na tusia foi le tusi i ona luga, i le upu a Eleni, ma Roma, ma Eperu, O LE TUPU LENEI O TAGATA IUTAIA.

Ona fai mai lea o ia ia Iesu, Le Alii e, ia e manatua mai a‘u, pe a e afio mai i lou malo.

Ua latou ifo ia te ia, ona toe foi mai lea i Ierusalema ma le olioli tele; sa i le malumalu i latou e le aunoa, o latou o vivii ma faafetai atu i le Atua. Amene.

Na ia faia mea uma lava; e leai foi se mea e tasi na faia e lei faia e ia.

Ua liu tino tagata le Lokou, sa mau foi o ia ma i tatou, (na matou matamata i lona mamalu; o le mamalu lava lea o le Alo e toatasi o le Tamā,) ua tumu o ia i le alofa tunoa ma le faamaoni.

Ona tali mai lea o Natanielu, ua faapea mai ia te ia, Rapi e, o oe lava o le Alo o le Atua, o oe lava le Tupu o Isaraelu.

E ao ina tupu pea o ia: peitai a‘u nei, e tauāu ina itiiti o a‘u. O lē maliu mai mai lugā, e sili o ia i mea uma. O lē mai le lalolagi, o lo le lalolagi lava ia, e tautala foi o ia i la le lalolagi; a o lē maliu mai mai le lagi, e sili o ia i mea uma lava.

Ua fetalai atu Iesu ia te ia, Funa e, talitonu mai ia ia te au, e oo mai ona aso, tou te tapuai i le Tamā e le gata i lenei mauga, po o Ierusalema. Tou te tapuai ma le le iloa; a ua matou tapuai ma le iloa, auā mai ia Iutaia le faaolataga. A e oo mai ona aso, ua oo nei foi i ai, o e tapuai faamaoni latou te tapuai i le Tamā i le agaga ma le faamaoni; auā o loo saili le Tamā e tapuai faapena ia te ia. O le Atua o le agaga lava ia; o e tapuai ia te ia, e tatau ona tapuai atu ai i le agaga ma le faamaoni.

ina ia ava tagata uma lava i le Atalii, faapei ona latou ava i le Tamā. O le le ava i le Atalii, e lē ava lea i le Tamā na auina mai o ia.

Ona toe fetalai atu lea o Iesu ia te i latou, ua faapea atu, O a‘u nei o le malamalama o le lalolagi; o lē mulimuli mai ia te au, e le savali o ia i le pouliuli, a e ia te ia le malamalama o le ola.

Ua faapea mai Iesu ia te i latou, E moni, e moni, ou te fai atu ia te outou, sa a‘u i ai, a o lei leai se Aperaamo.

Ona faapea mai lea o ia. Le Alii e, ua ou talitonu lava; ona ifo lea o ia ia te ia.

O a‘u nei ma le Tamā, e tasi lava i maua.

Ua fetalai atu Iesu ia te ia, Pe na ou le fai atu ea ia te oe, Afai e te talitonu, ona e iloa lea o le mamalu o le Atua?

O le taeao ua faalogo ai e le motu o tagata ua o mai i le tausamiga, ua maliu mai Iesu i Ierusalema, ona ave lea e i latou o lau o pama, ma o mai e faafetaiai ia te ia; ona latou alalaga lea, Osana! Ia manuia lē afio mai i le suafa o le Alii, o le Tupu o Isaraelu. Ua maua e Iesu le tamai asini, ona tietie ai lea, faapei ona tusia, Aua e te fefe, o oe le tama fafine a Siona; faauta, e afio mai lou Tupu, o loo tietie i le tama i asini.

Ua tali atu Iesu ia te i laua, ua faapea atu, Ua oo mai ona po e oo ai le Atalii o le tagata i lona mamalu.

Lo‘u Tamā e, ia e tuuina atu le mamalu i lou suafa. Ona oo mai ai lea o le siufofoga mai le lagi, Ua ou tuuina atu le mamalu, ou te toe tuuina atu foi i ai le mamalu.

Ua alu ia i fafo, ona faapea atu lea o Iesu, Ua viia nei le Atalii o le tagata, ua viia foi le Atua ia te ia. Afai e viia le Atua ia te ia, e viia foi o ia e le Atua ia te ia lava, e vave foi ona vivii o ia ia te ia.

O mea uma foi tou te ole atu ai i lo‘u igoa, ou te faia lava; ina ia viia le Tamā ona o le Atalii.

E viia lo‘u Tamā i lenei mea, pe a outou fua tele mai; ona fai ai lea outou mo‘u soo.

Ua fetalai atu ia mea e Iesu, ona tepa ae le o ona fofoga i le lagi, ua faapea atu, Lo‘u Tamā e, ua oo mai le aso. Tuu mai ia le viiga i lou Atalii, ina ia tuu atu foi e lou Atalii le viiga ia te oe. Auā ua e foai mai ia te ia le pule i tagata uma lava, ina ia avatu e ia le ola e faavavau ia te i latou uma lava na e foaiina mai ia te ia. O le ola e faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lea. Ua ou tuu atu le viiga ia e oe i le lalolagi; ua ou faaumaina le galuega na e tuuina mai ia te au, ou te faia. O lenei foi, lo‘u Tamā e, ia e tuu mai ia te au le manuia faatasi ma oe, o le manuia lava sa ia te i taua ma oe, a o lei faia le lalolagi.

Ua latou tali mai ia te ia, O Iesu le Nasareta. Ona fetalai atu lea o Iesu ia te i latou, O a‘u lenei. Ua tutū faatasi foi ma i latou o Iuta le na faalataina ia. Ua faapea atu Iesu ia te i latou, O a‘u lenei; ona tuumuli ai lea o i latou, ua pauu foi i le eleele.

Ona toe ulufale lea o Pilato i le maota o le alii, ua valaau ia Iesu, ua fai mai ia te ia, O oe ea le tupu o tagata Iutaia?

Ua tali atu Iesu, E le mai le lalolagi nei lo‘u malo; afai ana mai le lalolagi nei lo‘u malo, po ua tau a‘u auauna, ina ne‘i tuuina atu a‘u ia Iutaia; a o lenei, e le mai iinei lo‘u malo. Ona fai mai lea o Pilato ia te ia, O lena foi, e te se tupu ea oe? Ua tali atu Iesu, O lea lava, o a‘u o le Tupu. O le mea lenei na fanau mai ai a‘u, o le mea foi lenei na ou sau ai i le lalolagi, ina ia ou molimau i le upu moni. O i latou uma lava o i le upu moni, e faalogo mai i latou i lo‘u leo.

A o la outou tu lea, ia ou tatalaina atu ia te outou se tasi tagata i le paseka; o lenei, pe tou te mananao ea ina ia ou tatalaina atu ia te outou le tupu o tagata Iutaia?

Ua tusia foi e Pilato o le tusi faailoga, ma tuu i luga i le satauro; o le upu lenei ua tusia. O IESU LE NASARETA. O LE TUPU O TAGATA IUTAIA. Ona faitaulia lea o lea faailoga e Iutaia e toatele, auā o le mea na faasatauroina ai Iesu, e lata ane lea i le aai; ua tusia foi i le upu a Eperu, ma Eleni, ma roma. Ona faapea atu lea o le au ositaulaga o Iutaia ia Pilato. Aua e te tusi, O le tupu o tagata Iutaia; a ia faapea, Ua fai mai o ia. O a‘u o le tupu o tagata Iutaia. Ua tali atu Pilato. O le mea ua ou tusia, ua ou tusia lava.

Ona tali mai lea o Toma, ua faapea mai ia te ia, Lo‘u Alii e, ma lo‘u Atua e.

O lenei foi, ona ua siitia o ia i luga e le aao taumatau o le Atua, ma ua maua e ia mai le Tamā o le Agaga Paia na folafolaina, ua liligi ifo ai e ia lenei mea ua outou iloa ma faalogo ai nei.

O lenei foi, ia matuā iloa e le aiga uma o Isaraelu, o Iesu lava lena na faasatauroina e outou, ua faia lea e le Atua ma Alii ma Keriso.

Ua oso ia i luga ma tu, ua savali foi, na ulu faatasi foi ma i laua i le malumalu, o loo savali ia, ma oso, ma vivii atu i le Atua.

O ia ua aveina ae e le Atua i lona aao taumatau o le Alii i le ma le Faaola, na te avatua ia Isaraelu le salamo ma le faamagaloina o agasala.

Ona fetalai mai lea o le Alii ia te ia, Tatala ia ou seevae; auā o le mea ua e tu ai o le eleele paia lea.

A ua tumu o ia i le Agaga Paia, ua pulatoa i le lagi, ua iloa atu le pupula o le Atua, ma Iesu o loo tu i le itu taumatau o le Atua, ona fai atu lea, Faauta, ua ou iloa le lagi ua avanoa, ma le Atalii o le tagata o loo tu i le itu taumatau o le Atua.

Ua outou iloa le upu na molia e ia i le fanauga a Isaraelu, ua folafola ai le tala lelei o le manuia ia Iesu Keriso, o le Alii ia o tagata uma lava;

O le tulua o po ma ao ua tatalo ai ma pepese o Paulo ma Sila i le Atua; ua faalogo foi ia te i laua e ua noanoatia. Ona faafuasei mai lea o le mafuie tele, ua luluina ai faavae e le fale puipui; ua toloaina mai ai o puipui uma, ua maunuunu ai foi o latou noanoaga uma lava.

O le Atua na faia le lalolagi ma mea uma lava o i ai, ona o le Alii o ia o le lagi ma le lalolagi, e le afio o ia i malumalu e faia e lima;

o le faasinotonuina mai o le Alo o le Atua o ia ma le mana, i la le agaga e paia lea, i le toe tu mai nai e ua oti;

auā o ana mea e le vaaia talu ona faia o le lalolagi, e vaaia lava ia i le mafaufau i mea na faia, o lona mana lava lea e faavavau ma lona Atua; o lea foi ua le mautali ai i latou.

o ia te i latou tupuga, mai ia te i latou foi le Keriso i la le tino, o lē pule aoao ia, o le Atua e viia e faavavau. Amene.

Aue! le loloto o le tamaoaiga o le poto atoa ma le silafaga a le Atua. E le masuesueina ana faamasinoga; e le mafai foi ona iloa ona ala. Auā o ai ea se ua iloa le finagalo o le Alii? po o ai foi se ua pulega faatasi ma ia?

Auā ua fua mai ia te ia, ma ua faia e ia, e iu atu foi ia te ia mea uma; ia ia te ia le viiga e faavavau lava. Amene.

O lenei, le au uso e, ou te aioi atu ia te outou, ona o le alofa mutimuti vale o le Atua, ia outou tuuina atu o outou tino i le Atua, o le taulaga ola, ma le paia, ma le mālie, o le mea lea e tatau ai ona outou faia.

Auā ua tusia, Ua fetalai mai le Alii, Ou te ola a‘u, e tootuli mai ia te au o tulivae uma lava, e ta‘uta‘u mai foi o laulaufaiva uma lava i le Atua.

ina ia vivii outou i le Atua, le Tamā o lo tatou Alii o Iesu Keriso, ma le loto e tasi, ma le upu e tasi. O lea ia outou talia ai le tasi e le tasi, faapei o Keriso foi ona talia o i tatou, e oo ai le viiga i le Atua. Ou te fai atu foi, ua avea Iesu Keriso ma auauna o le peritomega, ona o le faamaoni o le Atua, ina ia faamauina ai mea na folafolaina i tupuga; ina ia vivii foi nuu ese i le Atua ona o le alofa, pei ona tusia, O le mea lea ou te ta‘uta‘ua ai oe i nuu ese, ou te pese atu foi i lou suafa. Ua toe faapea foi, Ia olioli outou nuu ese faatasi ma lona nuu; i le ma lea, Ia vivii atu i le Alii outou nuu uma, ia faaneenee atu ia te ia outou tagata uma lava.

Ia viia le na te mafaia ona faatumau ia te outou, e tusa ma la‘u tala lelei, ma le tala‘iga o le tala ia Iesu Keriso, e tusa ma le faaaliga o le mea lilo sa natia i tausaga o le vavau; a ua faaali mai nei i tusi a perofeta, e tusa ma le poloaiga a le Atua e faavavau, o loo ua faailoa mai i nuu uma, ia iu ina usiusitai i le faatuatua; o le Atua poto ia e toatasi, ia ia te ia le viiga ia Iesu Keriso e faavavau. Amene.

Auā ua faatauina outou i le tau; o lenei, ia outou vivii atu i le Atua i o outou tino ma ou outou agaga, o mea a le Atua ia.

a e peitai ua ia te i tatou le Atua e toatasi o le Tamā ia, e fua mai ia te ia mea uma, o i tatou foi ua fai mo ia; ma le Alii e toatasi o Iesu Keriso, ua faia e ia mea uma, o i tatou foi ua faia e ia.

O lenei, pe tou te aai, pe tou te inu, po o se tasi mea tou te faia, ia outou faia mea uma lava ia viia ai le Atua.

ua aliali mai ai foi mea lilo o i lona loto, ona faapaū fao ai lea o ia, ma ifo atu i le Atua, ma talatala, e moni, o ia te outou le Atua.

Auā o le Atua o le na fai atu ia pupula mai le malamalama mai le pouliuli, ua faapupula mai e ia i o matou loto, ina ia malamalama e iloa ai le mamalu o le Atua i fofoga o Iesu Keriso.

o le na foaiina mai o ia e ia ona o a tatou agasala, ina ia laveai mai o ia ia i tatou ai le olaga leaga ua i ai nei, e tusa ma le finagalo o le Atua, o lo tatou lava Tamā. Ia ia te ia le viiga e faavavau faavavau lava. Amene.

Ia faafetaia le Atua, o le Tamā o lo tatou Alii o Iesu Keriso, o le ua faamanuia mai ia i tatou i mea uma lava e manuia ai i la le Agaga, i mea o i le lagi, ona o Keriso;

ina ia viia ai lona lava alofa tunoa ua silisili, o lea ua agalelei fua mai ai o ia ia te i tatou, ona o le ua alofagia;

ina ia avea i matou ma ala e viia ai lona mamalu, o i matou o e na muai faamoemoe ia Keriso; e i ai foi outou ia te ia, ina ua outou faalogologo i le upu o le mea moni, o le tala lelei lea o lo outou olataga, ua outou faatuatua ia te ia, ona faamaufaailogaina ai lea o outou e le Agaga Paia, o le na folafolaina mai; o le faamaoni o ia o lo tatou tofi, seia iu ina faaolaina e ua faatauina, ina ia viia ai lona mamalu.

ina ia foai atu ia te outou e le Atua o lo tatou Alii o Iesu Keriso, o le Tamā e ona le mamalu, le Agaga e ona le poto ma le faaaliga, ina ia outou iloa lelei o ia; ia faapupulaina mata o outou loto, ina ia outou iloa le uiga o le faamoemoe ua i lona valaau mai, ma le uiga o le faulaigamea lelei o i lana tofiga ua silisili mo le au paia; ma le uiga o le silisili ese lava o lona mana ua ia i tatou o e faatuatua, e tusa ma le galuega a lona mana tele lava, na ia matuā galue ai ia Keriso, ina ua toe faatuina mai o ia nai e ua oti, ma faanofo ia te ia i lona itu taumatau i mea o i le lagi, e silisili lava i alii sili uma lava, ma faipule, ma e ua malolosi, ma alii, ma igoa uma lava e ta‘ua, e le gata i le olaga nei, a e oo foi i lē atali; ua ia tuu foi mea uma lava i lalo o ona vae, ma tuuina atu o ia e fai ma ulu o mea uma lava mo le ekalesia, o lona tino lea, o le tumu o le na te faatumuina mea uma lava i mea uma.

O le mea lea ou te tootuli ai i le Tamā o lo tatou Alii o Iesu Keriso, o ia ua faaigoaina ai le aiga uma o i le lagi atoa ma le lalolagi; ina ia foaiina ia te outou e tusa ma le faulai o lona viiga, ia faamalosia outou i le mana e lona lava Agaga, i le tagata i totonu; ia nofo mau Keriso i o outou loto i le faatuatua, ina ia mauaa outou, ma ia faavaeina i le alofa, tou te mafai ai ona iloa lelei e outou atoa ma le au paia uma, o le uiga o le lautele, ma le umi, ma le loloto, ma le maualuga, ia iloa foi le alofa o Keriso ua silisili ese e le mailea, ia faatutumuina outou i le tumu uma lava o le Atua. Ia ia te ia o le na te mafaia ona faia o mea uma e faasilisili lava i mea tatou te ole atu ai ma mafaufau i ai, e tusa ma le mana o loo matuā galue i totonu ia te i tatou, ia ia te ia le viiga i le ekalesia ona o Keriso Iesu, i augatupulaga uma, e faavavau faavavau lava. Amene.

e tasi le Atua, o le Tamā foi lea o tagata uma lava, o lē pule i mea uma lava, o le ua i ai i mea uma lava, o loo i totonu foi ia te outou uma.

O le na afio ifo, o ia lava lea na afio ae i luga o lagi uma lava, ina ia faatumuina e ia o mea uma lava.

Ia outou fetautalatalai i salāmo, ma pese, ma siva faaleagaga, ia faaneenee atu ma pepese atu i le Alii i o outou loto. Ia faafetai pea lava ona o mea uma i le Atua le Tamā, i le suafa o lo tatou Alii o Iesu Keriso.

ia tutumu outou i fua o le amiotonu mai ia Iesu Keriso, ina ia viia ai ma faaneeneeina ai le Atua.

O le mea lava lea ua matuā faaeaina ai o ia e le Atua, ma foaiina atu ai ia te ia o le suafa e silisili i suafa uma lava; ina ia tootuli o tulivae uma lava i le suafa o Iesu, o e o i le lagi, ma e o i le lalolagi, ma e o i lalo o le lalolagi; ma ia ta‘uta‘u atu e laulaufaiva uma lava o Iesu Keriso o le Alii lava ia, ia iu ina viia ai le Atua le Tamā.

auā o le au peritomeina i tatou, o e auauna i le Atua ma le loto, ma mitamita ia Keriso Iesu, a e le faatuatua i la le tino.

Ia i le Atua lo tatou lava Tamā le viiga e faavavau faavavau lava. Amene.

o ia foi ua tusa ma le Atua e le vaaia, o le ulumatua o mea uma lava ua faia; auā na faia e ia o mea uma lava, o mea i le lagi ma mea i le lalolagi, o mea o vaaia ma mea e le o vaaia, o nofoālii, ma alii, ma alii sili, ma faipule; na faia e ia mea uma lava, na faia foi mo ia; o ia foi o le uluai o mea uma lava, o loo faatumauina foi mea uma lava ia te ia; o le ulu foi o ia o le tino, o le ekalesia lea; o le amataga foi o ia, o le ulumatua o e ua oti, ina ia fai o ia ma faasilisili i mea uma lava. Auā ua finagalo le Tamā ia mau i totonu ia te ia le tumu atoatoa; ina ia faaleleia e ia o mea uma lava ma ia, ina ia lelei ia te ia lava i le toto o lona satauro, o mea i le lalolagi atoa ma mea o i le lagi.

na finagalo foi le Atua ona faailoa atu i ai le uiga o le silisili o le lelei o lenei upu lilo o i nuu ese, o Keriso lea o loo ia te outou o le faamoemoe i le manuia;

auā o loo mau i totonu ia te ia le tumu uma lava o le itu Atua ua i lona tino; o loo ua faaatoatoaina foi outou ia te ia; o le ulu ia o alii sili uma lava atoa ma faipule;

O lenei, afai ua toe faatuina outou faatasi ma Keriso, ia outou saili i mea o i lugā, o i ai Keriso, o loo tietie i le itu taumatau o le Atua. Ia outou loto lava i mea i lugā, a e le o mea i le lalolagi; auā ua oti outou, ua lilo foi lo outou ola faatasi ma Keriso i le Atua. Pe a faaali mai Keriso lo tatou ola, ona iloa ai lea o outou faatasi ma ia i le manuia.

Ia nofo le afioga a Keriso i totonu ia te outou ia tele lava, i le poto uma lava, ia outou a‘oa‘o ma apoapoai le tasi i le tasi i salāmo, ma pese, ma siva faaleagaga, o loo pepese atu ai ma le faafetai i le Alii i o outou loto. O mea uma foi tou te faia i le tautalatala, po o le amio, ia faia uma lava ia mea i le suafa o le Alii o Iesu, ma le faafetai i le Atua le Tamā ona o ia.

ma le talitonu i le upu moni, na valaauina ai outou e ia i la matou tala lelei, ina ia maua le manuia o lo tatou Alii o Iesu Keriso.

O lenei, ia i ai i le Tupu o le vavau, o le o soifua pea lava, o le le o vaaia, o le Atua poto e toatasi, ia ia te ia le mamalu atoa ma le viiga e faavavau faavavau lava. Amene.

E faailoa mai lea mea e ia i ona lava aso, o ia o le Alii e manuia mona ua toatasi, o le Tupu o tupu, ma le Alii o alii; o loo na o ia o lē soifua pea lava, o lē afio i le malamalama e le masao i ai se tasi; e lei vaaia o ia e se tasi tagata, e le mafai foi ona vaai i ai; ia ia te ia le viiga ma le malosi e faavavau. Amene.

E laveai mai foi le Alii ia te au ai mea leaga uma, ma faaola mai ia te au ia oo i lona malo i le lagi; ia ia te ia le viiga e faavavau faavavau lava. Amene.

o faatalitali atu i le faatuatuaga e manuia ai, o le faaalia lea o le pupula o le Atua silisili, o lo tatou Faaola o Iesu Keriso lea;

ua fetalai mai o ia ia i tatou i nei ona aso e gata ai e lona Alo, o le ua tofia e ia e fai mea uma lava mona tofi, na ia faia foi e ia mea uma; o ia o le pupula o lona mamalu ma ua matuā tusa lava ma ia, o loo o faatumauina e ia mea uma lava i lana afioga mana, na ia faamamāina e ia lava a tatou agasala, ona nofo ai lea o ia i le itu taumatau o lē Silisili ese o i lugā;

Ua faapea mai foi o ia i lona toe au mai o lana ulumatua i le lalolagi, Ma ia ifo agelu uma lava a le Atua ia te ia. O agelu foi ua fetalai mai ai o ia, Ua faia e ia ana agelu o matagi, ma ana auauna o le afi mumū; a ua faapea mai i le Alo, O lou nofoālii, le Atua e, faavavau faavavau lava lea; o le tootoo o lou malo, o le tootoo o le amiotonu lea.

A ua tatou iloa o ia o le na faamaulaloina teisi i agelu, o Iesu lea, ua faapaleina i le mamalu ma le viiga, ona o le tiga o le oti, ina ia oo ia te ia le oti ona o tagata uma i le alofa tunoa o le Atua.

o loo faapea mai, Ou te ta‘u atu lou suafa i o‘u uso; ou te pese atu viiga ia te oe i totonu o le ekalesia.

O lenei, ua ia i tatou le faitaulaga silisili, ua afio atu i le lagi, o Iesu le Alo o le Atua, ia tatou taofi mau ai i la tatou e ta‘utino atu. Auā e le ia te i tatou se faitaulaga sili e le mafaia ona tiga alofa faatasi ma i tatou i o tatou vaivai, a ua faaosoosoina o ia i mea uma pei o i tatou, a ua leai se agasala ia te ia. O le mea lea ia tatou faalatalata atu ai ma le faamalosi i le nofoālii o le alofa tunoa, ina ia alofaina ai o i tatou, ia maua ai foi le alofa tunoa e fesoasoani mai i ona aso e tatau ai.

Auā e tatau ona ia ia i tatou o se faitaulaga sili faapena, e paia, e agamalu, e leai sona leaga, e taumamao ma ē agasala, e silisili foi ia i luga o lagi;

O le aano lenei o mea o loo tautala ai nei, ua ia i tatou le faitaulaga sili e faapena, o le ua nofo i le itu taumatau o le nofoālii o lē Silisili ese o i le lagi,

ona ulu faatasi lava lea o ia i totonu o le mea paia, e le ma le toto o ‘oti ma tamai povi, a o lona lava toto, ua na maua le togiola e faavavau mo i tatou.

peitai ane o ia, na avatua e ia le taulaga e tasi mo agasala, ona nofo lea o ia i le itu taumatau o le Atua e faavavau,

O lenei, le au uso e, ua tatou sa‘oloto e ulu atu i le mea e sili ona paia ona o le toto o Iesu,

ma ia vaavaai atu ia Iesu o le na te ta‘ita‘iina ma le na te faaatoatoaina le faatuatua; o le na onosai i le satauro, na faatauvaa ia te ia le mā, ona o le olioli sa tuu i ona luma, ua nofo foi o ia i le itu taumatau o le nofoālii o le Atua.

O lenei, ua maua e i tatou le malo e le mafai ona luluina, ia tatou faafetai ai, tatou te auauna ai i le Atua ma le migao, ma le mata‘u ia fiafia mai ai o ia. Auā foi o lo tatou Atua o le afi maamaai ia

O Iesu Keriso e le liu lava ia o ananafi, ma le asō, e oo foi i le faavavau.

O lenei, o ia tatou te avatu soo ai le taulaga o le viiga i le Atua, o le fua lea o tatou laugutu, o loo faafetai atu i lona suafa.

A o le Atua e ona le manuia, o le na toe faatuina mai nai e ua oti le Leoleo mamoe sili, o lo tatou Alii o Iesu, ona o le toto o le feagaiga e faavavau, ia faaatoatoaina outou e ia i galuega lelei uma lava, ina ia outou faia lona finagalo, ia galue o ia i totonu ia te outou le mea e mālie i ona luma, ona o Iesu Keriso; ia ia te ia le viiga e faavavau faavavau lava. Amene.

Ua tigaina ea so outou? ina tatalo ia. Ua fiafia ea se tasi? ina pese ia.

o ia o loo i le itu taumatau o le Atua, ina ua afio ae o ia i le lagi, ua toilalo ia te ia o agelu, ma faipule, atoa ma ē malolosi.

Afai e tautala se tasi, ia tusa ma afioga a le Atua; afai e auauna se tasi, ia tusa ma le malosi ua foaiina mai e le Atua, ina ia viia le Atua i mea uma lava, ona o Iesu Keriso; ia ia te ia le viiga ma le malosi e faavavau faavavau lava. Amene.

a e afai e faatigaina se tasi auā o ia o le Kerisiano, aua le masiasi ai o ia, a ia vivii atu i le Atua ona o lea lava mea.

A o le Atua e ona le alofa tunoa uma lava, o le na valaauina i tatou ia iu atu i lona manuia faavavau o ia Keriso Iesu, pe a tigaina outou i nai aso, ia faaatoatoaina outou e ia lava, ia faatumauina ia faamalosia, ma ia faavaeina outou; ia ia te ia le viiga ma le malosi e faavavau faavavau lava. Amene.

Auā e lei usiusitai i matou i tala o le vavau ua fatua ma le poto, ina ua matou faailoa atu ia te outou le mana ma le afio mai o lo tatou Alii o Iesu Keriso; peitai na matou vaavaai atu i lona lava mamalu. Auā na maua e ia mai le Atua le Tamā o le mamalu ma le viiga, ina ua tŭlei mai ia te ia le siufofoga lava nai le mamalu silisili ese, ua faapea mai, O lo‘u Atalii pele lenei, ou te fiafia lava ia te ia.

A ia tutupu outou i le alofa tunoa ma le poto i a lo tatou Alii o lo tatou Faaola lea o Iesu Keriso. Ia ia te ia le viiga i ona po nei, ma ia oo i le faavavau lava. Amene.

ia i le Atua poto e toatasi o lo tatou Faaola, le viiga ma le mamalu, o le malosi ma le pule, i nei ona po, ma ia oo i le faavavau lava. Amene.

mai ia Iesu Keriso foi, o le molimau faamaoni, o le ulumatua o e ua oti, ma le pule i tupu o le lalolagi. O le na alofa mai ia te i tatou, na ia fufulu mai foi ia te i tatou i a tatou agasala i lona lava toto, na ia faia foi i tatou ma tupu ma faitaulaga i le Atua o lona lava Tamā, ia ia te ia le viiga ma le malosi e faavavau faavavau lava. Amene. Faauta, o loo afio mai o ia ma ao, e iloa atu foi o ia e mata o tagata uma, atoa ma e na tu‘ia o ia; e taufaitagitu‘i foi itu aiga uma o le lalolagi ona o ia. E moni, Amene.

O a‘u le Alefa ma le Omeka, o le amataga ma le gataaga, ua fetalai mai ai le Alii, o loo soifua, na soifua foi, o le a afio mai, e ona le malosi uma lava.

Na ou fāliu atu e vaai i le leo na tautala mai ia te au; ua ou fāliu, ona ou iloa atu lea o tuugālamepa auro e fitu. Ua i totonu foi i tuugālamepa e fitu le tasi e pei o le Atalii o le tagata, ua ofu ia i le ofu tatapuvae, ua fusia foi lona fatafata i le fusi auro; ua sinasina foi lona ao ma ona lauao e pei o le fulufulu mamoe ona sinasina, e pei o le kiona lava; o ona fofoga foi e pei o le mumū o le afi; ma ona vae e pei o le ‘apa pupula, e peiseai ua mu i le ogāumu; o lona siufofoga foi e pei o le taalili o vai e tele; ua i lona aao taumatau o fetu e fitu; ua alu atu foi ai lona fofoga o le pelu e faataumaai ona itu e maamaai lava; o ona fofoga foi e pei o le pupula o le la ina o mu toto‘a. Ua ou iloa atu ia te ia, ona ou paū ifo lea i ona vae e peiseai ua oti; a ua ia faaee mai lona aao taumatau i luga ia te au, ua faapea mai ia te au, Aua e te fefe; o a‘u le muamua ma le mulimuli; o lē ola nei lava, sa ou oti, faauta foi, ou te ola e faavavau faavavau lava; Amene, o ia te au foi ki o seoli ma le oti.

Ona a‘u i le Agaga loa lea; faauta foi, ua tu mai le nofoālii i le lagi, ua tietie foi le tasi i le nofoālii; o lē tietie mai foi ua pei o le maa iasepi ma le salikea lona tino mai; ua siosioina foi le nofoālii e le nuanua e pei o le samaraki lona tino mai. Ua siosioina foi le nofoālii e nofoālii e luafulu ma le fa; na ou iloa foi o toeaina e toaluafulu ma le toafa o tietie i ia nofoālii, ua oofu i ofu sisina; ua i o latou ulu foi o pale auro.

Ua oo mai foi uila, ma faititili, ma leo mai le nofoālii; o lamepa foi e fitu o mumū i luma o le nofoālii, o Agaga ia e toafitu o le Atua. Ua i luma foi o le nofoālii le sami tioata, e pei o le maa tioata; ua i totonu o le nofoālii ma ua liolioina le nofoālii e mea ola e fa ua tutumu i mata i luma atoa ma tua.

O mea ola foi e fa e taitasi ma ona apaau e ono, ua faataaliolio ai, ma ua mata atoa i latou i totonu; latou te le mapu lava i le ao ma le po i le fai atu, E paia, e paia, e paia le Alii le Atua e ona le malosi uma lava, o le na soifua, o loo soifua foi, o le a afio mai. A vivii foi, ma faaneenee, ma faafetai atu mea ola i le o tietie i le nofoālli, o lē soifua e faavavau e faavavau lava, ona faapaū ai lea o toeaina e toaluafulu ma le toafa i luma o lē tietie i le nofoālii, ma ifo atu i lē soifua e faavavau e faavavau lava, ma lafo o latou pale i luma o le nofoālii, o loo faapea atu, Le Alii e, e tatau lava oe ina ia tuu atu ia te oe le viigia, ma le faaneeneega, ma le mana; auā na e faia mea uma lava, ona o lou finagalo foi e i ai i latou ma ua faia.

Ona fai mai ai lea ia te au o le tasi o le au toeaina, Aua e te tagi; faauta, ua manumalo le Leona o le itu aiga o Iuta, o le Aa o Tavita, e fofola i le tusi, ma tatala i ona faamaufaailoga e fitu. Na a‘u iloa foi, faauta, ua tu mai i le va o le nofoālii ma mea ola e fa, e i ona tua foi le au toeaina, o le Tamai mamoe e peiseai na fasia, e fitu ona nifo ma ona mata e fitu, o Agaga ia e toafitu o le Atua ua aauina atu i le lalolagi uma. Ua alu atu ia, ma to mai le tusi mai le aao taumatau o lē tietie i le nofoālii. Ua to mai e ia le tusi, ona faapaū ai lea o mea ola e fa ma toeaina e toaluafulu ma le toafa i luma o le Tamai mamoe, ua tofu i latou ma le kitara, ma le ipu auro ua tumu i mea manogi e mu, o talosaga ia a le au paia; ua latou pepese foi i le pese fou, ua faapea atu, Ua tatau lava oe ina ia e tago i le tusi, ma tatala i ona faamaufaailoga; auā na fasia oe, ua e faatauina foi i matou i lou lava toto mo le Atua, mai itu aiga uma, ma gagana eseese, ma nuu, atoa ma atu nuu; ua faia foi e oe i matou ma tupu ma faitaulaga i lo matou Atua; e fai foi i matou ma tupu i le lalolagi.

Na a‘u iloa atu foi, ma ou faalogo i le leo o agelu e toatele, o e ua faataaliolio i le nofoālii, ma le leo o mea ola e fa atoa ma le au toeaina; o lo latou faitau aofai ua mano ni mano, ma afe ni afe, o loo faapea atu ma le leo tele, Ua tatau lava le Tamai mamoe na fasia ina ia tuuina atu ia te ia le mana, ma le oa, ma le poto, ma le malosi, ma le faaneeneega, ma le viiga, ma le faamanū. Na ou faalogo foi i mea uma na faia o i le lagi, ma le lalolagi, ma lalo ifo o le lalolagi, ma mea foi o i le sami, atoa ma mea uma o i ai i ia mea, o loo faapea atu, Ia ia te ia o lē tietie i le nofoālii atoa ma le Tamai mamoe le faamanū, ma le faaneeneega, ma le viiga, ma le malosi e faavavau faavavau lava. Ona fai atu lea o mea ola e fa, Amene; ona faapaū lea o toeaina e toaluafulu ma le toafa ma ifo atu i lē soifua e faavavau e faavavau lava.

Ua mavae atu ia mea, ona ou iloa lea, faauta foi i le motu o tagata e toatele mai atu nuu uma, ma aiga, ma nuu, ma gagana eseese, e le ma faitaulia e se tasi, o loo tutū i latou i luma o le nofoālii ma luma o le Tamai mamoe, ua oofu i latou i ofu sisina, ua i ai foi lau pama i o latou lima; ua latou alalaga foi ma leo tetele, ua faapea atu, O i ai le faaolataga i lo tatou Atua o lē tietie i le nofoālii, atoa ma le Tamai mamoe. Ua tutū faataaliolio agelu uma i le nofoālii ma le au toeaina ma mea ola e fa, ua latou faapaū fao i luma o le nofoālii, ma ifo atu i le Atua, ua faapea atu, Amene; Ia i lo tatou Atua le faamanū, ma le viiga, ma le poto, ma le faafetai, ma le mamalu, ma le mana, ma le malosi e faavavau faavavau lava. Amene.

O le mea lea ua latou i luma ai o le nofoālii o le Atua, ua latou auauna foi ia te ia i lona malumalu i le ao ma le po; o lē tietie foi i le nofoālii e mau ma i latou.

Ua ili foi e lona toafitu o agelu le pu, ona i ai lea i le lagi o leo tetele, ua faapea mai, O malo o le lalolagi ua avea mo lo tatou Alii ma lona Keriso, e fai foi o ia ma tupu e faavavau faavavau lava. O toeaina foi e toaluafulu ma le toafa, o e nonofo i o latou nofoālii i luma o le Atua, ua latou faapaū fao, ma ifo i le Atua, ua faapea atu, Le Alii e, le Atua e ou le malosi uma lava, ua matou faafetai atu ia te oe, o lē soifua, o le na soifua, o le a afio mai, ina ua e tago i lou mana tele ma ua fai oe ma tupu.

Na ou faalogo foi i le leo tele i le lagi, ua faapea, O ona po nei ua oo mai ai le olataga, ma le mana, ma le malo o lo tatou Atua ma le pule a lona Keriso; auā ua lafo i lalo le na molia o tatou uso, o le na molia i latou i luma o lo tatou Atua i le ao ma le po.

Ua ou faalogo foi i le leo mai le lagi e pei o le taalili o vai e tele, e pei o le taalili foi o le faititili tetele; ua ou faalogo foi i le leo o e ta kitara o loo ta i a latou kitara. Ua latou pepese foi e peiseai o se pese fou i luma o le nofoālii, ma luma o mea ola e fa, ma le au toeaina; e le mafaia foi e se tasi ona a‘oa‘o i lea pese, na o le selau afe ma afe e fa sefulu ma le fa o afe o e ua faatauina nai le lalolagi. O tagata ia e lei leaga i fafine; auā o taupou i latou; o i latou ia o e ua mulimuli atu i le Tamai mamoe i mea uma e alu i ai o ia; o i latou ia o e ua faatauina nai tagata, o e ua faapolopoloina mo le Atua ma le Tamai mamoe; e le iloa foi se pepelo i o latou gutu; auā e le ponā i latou i luma o le nofoālii o le Atua.

ua faapea atu ma le leo tele, Ia outou matatau i le Atua, ma avatu ia te ia le viiga, auā ua oo mai le itu aso o lana faamasinoga; ma ia outou ifo i le na faia le lagi, ma le fanua, ma le sami, atoa ma puna o vai.

Na a‘u iloa faauta foi, o le ao sinasina, ua tietie foi i le ao le tasi ua pei o le Atalii o le tagata, ua i lona ao le palealii auro, ua i lona aao foi le selesaito maai.

Ua latou pepese i le pese a Mose le auauna a le Atua, ma le pese a le Tamai mamoe, ua faapea atu, Le Alii e, le Atua e ou le malosi uma lava, ua tetele au galuega e ofo ai; e tonu ma faamaoni ou ala, le Tupu o le au paia e. Le Alii e, o ai se le mata‘u ia te oe, ma vivii atu i lou suafa? auā ua na o oe e lelei; auā e o mai nuu uma lava, ma latou ifo i ou luma; auā ua faaalia au faamasinoga tonu.

Ua tumu foi le malumalu i le asu nai le pupula o le Atua atoa ma lona mana; e le mafaia foi e se tasi ona ulu atu i le malumalu, seia faaiuina mala e fitu a agelu e toafitu.

Latou te tau le taua ma le Tamai mamoe, a e manumalo le Tamai mamoe ia te i latou, auā o le Alii ia o alii ma le Tupu o tupu; o e ua ia te ia foi ua valaauina i latou, ma filifilia, ma faamaoni.

Ua mavae nei mea, ona ou faalogo lea e peiseai o le leo tele o le motu o tagata e toatele o i le lagi, ua faapea atu, Aleluia; ua i le Alii lo tatou Atua le olataga, ma le viiga, ma le faaneeneega, ma le mana;

Ua faapaū toeaina e toaluafulu ma le toafa, ma mea ola e fa, ma ua ifo i le Atua o lē tietie i le nofoālii, ua faapea atu, Amene; Aleluia. Ua oo mai foi le leo mai le nofoālii, ua faapea mai. Ia vivii atu i lo tatou Atua, o outou ana auauna uma, ma outou o e matatau ia te ia, o tagata nuu atoa ma alii. Ua ou faalogo foi e peiseai o le leo o le motu o tagata e toatele, e peiseai o le taalili o vai e tele, e peiseai o le taalili foi o faititili tetele, ua faapea atu, Aleluia; auā ua fai ma tupu le Alii le Atua e ona le malosi uma lava. Ia tatou fiafia ma olioli, ma tuu atu le viiga ia te ia; auā ua oo mai le tausamaaga o le Tamai mamoe, o lona felutua foi ua saunia o ia e ia.

ua pei o le mumū o le afi ona fofoga, ua i lona ao foi palealii e tele; ua ia te ia le suafa ua tusia e le iloa e se tasi ua na o ia lava; ua ofu foi o ia i le ofu ua fufui i le toto; ua faasuafaina o ia, O le Lokou o le Atua. O ‘au foi o i le lagi ua mulimuli atu ia te ia i luga o solofanua sisina, ua oofu i latou i le ie vavae sinasina ma le mamā. Ua alu atu foi le pelu maai nai i lona fofoga, ina ia taia a‘i e ia o nuu; e pule foi o ia ia te i latou i le tootoo uamea; e soli foi e ia le soligāvine o le toasa mamafa o le Atua e ona le malosi uma lava.

Ua ia te ia foi le suafa ua tusia i lona ofu ma lona vae. O LE TUPU O TUPU, MA LE ALII O ALII.

Na a‘u iloa foi le nofoālii tele e sinasina, ma le o tietie ai, ua sosola ese le lalolagi ma le lagi i ona luma, e le iloa foi se mea e tu ai i laua. Na a‘u iloa foi o e na oti, o tagatānuu atoa ma alii, o tutū i luma o le Atua, ona fofola lea o tusi; ua fofola foi ma le tasi tusi, o le tusi lea o le ola; ona faamasinoina ai lea o e na oti i mea ua tusia i tusi, e tusa ma a latou amio.

Ona a‘u iloa lea o le lagi fou ma le lalolagi fou; auā ua mavae atu le uluai lagi, ma le uluai lalolagi, ua leai foi se toe sami. O a‘u foi o Ioane na ou iloa le aai paia, o Ierusalema fou, ua alu ifo mai le Atua i le lagi, ua saunia pei o se faatoanofotane ua teuteuina mo lana tane. Na ou faalogo foi i le leo tele mai le lagi, ua faapea mai, Faauta, ua faatasi ma tagata le fale fetafai o le Atua, e mau foi o ia ma i latou; e fai foi i latou mona nuu, e ia te i latou le Atua lava, o lo latou Atua ia.

Ou te lei iloa ai foi se malumalu; auā o lona malumalu o le Alii le Atua lea, e ona le malosi uma lava, atoa ma le Tamai mamoe. E le aoga foi i le aai ona pupula i ai o le la, po o le masina; auā o le pupula o le Atua ua faamalamalamaina ai ia, o le Tamai mamoe foi o lona lamepa lea.

Ona faaali mai lea e ia ia te au le vaitafe manino o le vai o le ola, e manino e pei o le maa tioata, ua tafe ifo mai le nofoālii o le Atua ma le Tamai mamoe. O i le moa o lona ala tele ma itu taitasi o le vaitafe le laau o le ola, o loo fua mai i fuata e sefulu ma le lua, e taitasi le masina ma fua mai ai lona fuata; o lau foi o le laau e faamalolo ai nuu. E leai foi se toe faafano e tasi; e i ai foi le nofoālii o le Atua ma le Tamai mamoe, o ana auauna foi latou te auauna ia te ia; latou te vaavaai atu foi i ona fofoga, e i ai foi i o latou muaulu lona suafa.

O a‘u le Alefa ma le Omeka, o le amataga ma le gataaga, o le muamua ma le mulimuli.