31 – Evagelia

O aso uma o le lalolagi e le toe utuva ai o tausaga e lulu ai, ma tausaga e selesele ai, o le maalili foi ma le vevela, o le vaitoelau ma le vaipalolo, o le ao foi ma le po.

Ona tali atu lea o Mose, ua faapea atu, Faauta, latou te le talia mai a‘u, latou te le faalogo mai foi i la‘u upu, auā o le a fai mai i latou,

Ona fai atu lea o Mose ia Ieova, A ē alofa, le Alii e, o a‘u o le tagata e le iloa fai lauga, talu anamua, ma ona po nei ua e fetalai mai ai i lau auauna; ua le matala lo‘u gutu, ua le matala foi lo‘u laulaufaiva. Ona fetalai mai lea o Ieova ia te ia, O ai ea na na faia le gutu o le tagata, po o ai na te faia le gūgū, po o le tutuli, po o le vaai. Po o le tauaso? E le o a‘u ea o Ieova? O lenei, alu ia oe; o a‘u foi ou te faatasi ma lou gutu, ou te a‘oa‘o atu foi ia te oe i upu e te tautala atu ai.

A ua fai atu o ia, A ē alofa, le Alii e, ia e auina atu se tasi e tatau ona e auina atu ai. Ona tele lea o le toasa o Ieova ia Mose, ua fetalai mai, E le o lou uso ea o Arona o le sa Levī? Ua ou iloa e fai lauga lelei lava ia; faauta foi, o loo sau o ia e faafetaiai ia te oe; a iloa mai foi oe, ona fiafia ai lea o lona loto. E te tautala atu lava ia te ia, ma tuu atu ai ia upu i lona gutu; ou te faatasi foi ma lou gutu atoa ma lona gutu, ou te a‘oa‘o foi ia te oulua i mea lua te faia. E tautala atu ia mo oe i le nuu, e fai foi o ia ma gutu mo oe, e fai foi oe ma Atua mo ia.

O mea uma lava e solia e o outou alofivae, ou te foaiina atu ai ia te outou, e pei ona ou fai atu ai ia Mose.

Ia outou pepese atu ia Ieova le lalolagi uma; ia outou tala‘i atu lana faaolataga i lea aso ma lea aso. Ia outou ta‘uta‘u atu lona mamalu i nuu ese, ma ona vavega i nuu uma lava.

Ua ou tala‘i le amiotonu i le faapotopotoga tele; faauta, ou te lei taofia lava o‘u laugutu, Ieova e, ua e silafia lava. Ou te lei natia lava i lo‘u loto lau amiotonu; ua ou ta‘uina atu lou faamaoni ma lau faaolataga; ou te lei faalilolilo lou alofa ma le mea moni mai ia te oe i le faapotopotoga tele.

E ta‘uta‘u atu i lo‘u gutu le amiotonu mai ia te oe, e ta‘uta‘u foi le olataga mai ia te oe i aso uma lava; auā ua le masino ia te au lona faitau aofai. Ou te alu atu i le malosi o le Alii o Ieova; ou te ta‘uta‘u i lau amiotonu, na o lau lava. Le Atua e, na e a‘oa‘o mai ia te au talu ina ou tama itiiti; ua oo mai foi i nei ona po ua ou faaali atu ou vavega. Le Atua e, aua e te tuulafoai mai ia te au e oo ina toeaina ma ulusinā; seia ou faaali atu lou aao i leneiit tupulaga, ma lou malosi i e amuli uma lava.

Ia outou pepese atu ia Ieova, ia outou faafetaia lona suafa; ia outou tala‘i atu lana faaolataga i lea aso ma lea aso. Ia outou ta‘uta‘u atu lona mamalu i nuu ese, ma ona vavega i nuu uma lava.

Ou te tautala foi i au tulafono i luma o tupu; ou te le mā ai lava.

O e lulu saito ma loimata, latou te seleseleina ma le alaga fiafia. O le ua alu atu ma tagi fano, o loo ave le saito e lulu, e foi mai lava ia ma le alaga fiafia, o loo au mai ana fusi saito.

Ieova e, ia e tuuina se leoleo i lo‘u nei gutu, ia e leoleo i le faitotoa o o‘u laugutu.

E vivii atu le tasi tupulaga ma le tasi tupulaga i au galuega; latou te faailoa atu au mea mamana.

O lē amio leaga ua fai e ia le galuega pepelo; a o lē totō le amiotonu e ia te ia le taui faamaoni.

O le fua o le amiotonu, o le laau o le ola lea; ma le na te maua agaga, e poto ia.

O le malamalama o mata e fiafia ai le loto; o le tala lelei e lololo ai ivi. O le taliga ua faalogo i le aoaiga e ola ai, e mau lea faatasi ma e popoto. O le na te teena mea e a‘oa‘oina, e faaleaogaina e ia lona lava ola; a o lē faalogo i le aoaiga, e maua e ia le poto. O le mata‘u ia Ieova, o le a‘oa‘oina lea e poto ai; e muamua foi le faamaulalo i le viia.

O upu matagofie, o le meli ua sisina ifo ia; e suamalie i le loto, ma le mea e malolo ai ivi.

O le ua i ai le poto, e taofia e ia ana upu; o le ua agamalu foi, o le tagata faautauta lea. O le vale lava, a faalologo o ia, fa tagata, o ia ua poto; o le ua pupuni ona laugutu, fa tagata, o le tagata mafaufau ia.

E le manao le vale i le faautauta; ua na ona ia faaali o lona loto.

E o atu laugutu o le vale i le misa; ua valaau foi lona gutu i ta. O le gutu o le vale e fano ai o ia; o ona laugutu foi, o le mailei lea o lona ola.

O le na te tali atu i le upu, a o lei faalogo i ai, e fai lea mona valea, ma mea e faamāina ai o ia.

O le oti ma le ola, o loo i le pule a le laulaufaiva ia; o e mananao i ai latou te aai i lona fua.

O le vai mālūlū i le tagata ua lailoa i le fia inu, o le tala lelei lea mai le nuu mamao.

o ona po e saei ai, ma ona po e su‘i ai; o ona po e faalologo ai, ma ona po e tautala ai;

O le na te manatunatu i le matagi e le lulu saito e ia; o le na te vaavaai foi i ao e le selesele lava o ia.

O le taeao ia e lulu ai au saito, aua foi le mapu lou lima i le afiafi; auā e te le iloa po o le fea e manuia, o lenei, po o lena, pe gatusa ona lelei o ia mea e lua.

Na sili le poto o le Failauga, o le mea lea na sili ai lona a‘oa‘o atu i tagata ia popoto; na ia mafaufau foi, ma suesue, ma saunia faataoto e tele. Na sailia e le Failauga ia maua upu e faafiafia a‘i; o mea ua tusia foi e tonu ia, o upu moni lava.

Ona ou faalogo atu ai lea i le siufofoga o le Alii, ua faapea mai, O ai ea ou te auina atu? o ai foi e alu atu mo i matou? Ona ou faapea atu ai lea, O a‘u lenei, ina auina atu a‘u.

Ona faapea mai ai lea o ia, Ina alu ia, ma ia e faapea atu i lena nuu, Ia outou matuā faalogo lava, a e tou te le lagona; ia outou matuā vaai foi, a e tou te le iloa. Ia faamafiafiaina loto o lena nuu, ia faatutuli o latou taliga, ma ia faatauaso o latou mata; ina ne‘i vaai o latou mata, ma faalogo o latou taliga, ma lagona o latou loto, ma latou liliu mai, ma faamaloloina i latou. Ona ou faapea atu ai lea, Le Alii e, seia afea ea? Ona faapea mai ai lea o ia, Seia faagaogaoina aai ia leai se nofo ai, seia leai foi se tagata i fale, e matuā faatafunaina foi le laueleele,

Ina saili ia i le tulafono ma le mau; afai latou te le tautala e tusa ma ia upu, ua leai lava se malamalama ia te i latou.

Latou te le faia se mea leaga, latou te le faaumatia foi se mea i lo‘u mauga paia uma; auā e tumu le lalolagi i le malamalama o Ieova, e pei ona ufitia o le iliti tai i le suāsami.

Alu ae i le mauga maualuga, o oe lē au mai le tala lelei ia Siona; ia matuā leo tele, o oe lē au mai le tala lelei ia Ierusalema; ia leo tele, aua le fefe; fai atu i aai o Iuta, Faauta i lo outou Atua.

E matuā matagofie i luga o mauga o vae o le ua fai mai le tala lelei, o lē logologo mai le manuia, ua tala mai le tala lelei; ua faailoa mai le olataga; ua fai mai ia Siona, O loo pule lou Atua.

Ua i o‘u luga le Agaga o le Alii o Ieova; auā ua faauuina a‘u e Ieova e tala‘i le tala lelei i e ua tigaina, ua ia auina mai a‘u e fufusi i e loto momomo, e tala‘i le saolotoga i le tafeaga, ma le matuā tatalaina o e ua fusifusia. E tala‘i le tausaga e talileleia mai ai e Ieova, ma le aso e taui ai ma sui e lo tatou Atua; e faamatalaloto i e faanoanoa uma lava; e avatu le fiafia i e faanoanoa i Siona, e foaiina atu ia i latou le matagofie e sui a‘i le lefulefu, o le uu o le olioli e sui a‘i le faanoanoa, o le ofu e fai a‘i viiga e sui a‘i le loto faavaivai; e igoa i latou, O laau o le amiotonu, o le faatoaga a Ieova, e fai mona viiga.

Ona a‘u fai atu ai lea, Aue, le Alii e Ieova, faauta, ou te le iloa ona tautala, auā o a‘u o le tama itiiti. Ona fetalai mai ai lea o Ieova ia te au, Aua e te faapea, O a‘u o le tama itiiti; auā o i latou uma ou te auina atu i ai oe, e te alu lava i ai, o mea uma foi ou te fai atu ai ia te oe, e te fai atu ai lava. Aua e te fefe ia te i latou; auā ou te ia te oe e laveai ia te oe, ua fetalai mai ai Ieova. Ona faaloaloa ai lea e Ieova o lona aao, ua pai mai i lo‘u gutu; ua fetalai mai foi Ieova ia te au, Faauta, ua ou tuuina atu a‘u upu i lou gutu.

Faauta, ou te aauina atu tagata fai faiva e toatele, o loo fetalai mai ai Ieova, latou te fai faiva ia te i latou; e mulimuli ane ou te aauina atu tagata tuli manu e toatele, latou te tutuli ia te i latou mai atu mauga uma, ma mauga uma, ma mavaevae o papa.

Ua fetalai mai o ia ia te au, Le atalii e o le tagata, ina ‘ai ia le mea e te maua; ‘ai ia lena tusi taai, i le e alu, ma fai atu i le aiga o Isaraelu. Ona ou faamaga lea o lo‘u gutu, ona ia fafaga lea ia te au i lena tusi taai. Ua ia fetalai mai foi ia te au, Le atalii e o le tagata, ina tali ia o lou manava, ia ma‘ona ai lou alo i lena tusi taai ua ou avatua ia te oe; ona ou ‘ai ai lea, ua suamalie i lo‘u gutu e pei o le meli. Ua fetalai mai foi o ia ia te au. Le atalii e o le tagata alu ia oe, ina alu i le aiga o Isaraelu, ma e tautala atu i a‘u upu ia te i latou.

O e popoto foi, e fepulafi i latou faapei o le pupula o le lagi; o i latou foi ua faaliliu ai tagata e toatele ia amiotonu, e pei o fetu i latou e faavavau faavavau lava.

Ona oo mai lea o le afioga a Ieova ia Iona, o le foi faalua mai lea, ua faapea mai, Ina tulai ia, ina alu i Nineva le aai tele, ma tala‘i atu i ai le tala‘iga ou te fai atu ai ia te oe.

Ua amata ona ulu atu o Iona i le aai, o le savaliga o le aso e tasi, na alaga foi o ia, ua faapea atu, E toe fagafulu po ona faaumatia lea o Nineva. Ona talitonu ai lea o tagata o Nineva i le Atua, ua tala‘i atu foi e i latou la latou anapogi, ua latou oofu foi i le ie talatala, o alii atoa ma tagatānuu. Auā ua oo le tala i le tupu o Nineva, ona tulai ai lea o ia i lona nofoālii, ma tuu ese ia te ia lona ofu tele, ona ufutia lea o ia e ia i le ie talatala, ma nofo i le lefulefu. Ua ia tala‘i atu, ma faailo atu i Nineva i le pule a le tupu ma alii sa ia te ia, ua faapea atu, Aua ne‘i ‘ai sina mea e tagata, po o manu, po o lafu povi, po o lafu mamoe; aua lava ne‘i latou aai, aua foi latou te inu vai; a ia ufitia lava tagata ma manu i ie talatala, ma ia latou matuā alalaga atu i le Atua; ia latou taitasi foi ma liliu mai i lana amioga leaga, ma le faasaua ua i o latou lima. O ai se na te iloa, atonu e liliu mai le Atua, ma salamo, ma liliu ese i lona toasa mamafa, ina ia le fano ai i tatou. Ua silafia e le Atua a latou galuega, ina ua liliu ese i latou i lo latou ala leaga; ona salamo ai lea o le Atua i le malaia na ia fetalaia mai na te faia ia te i latou; e lei faia.

Faauta ea, o i luga o mauga o vae o lē fai mai le tala lelei, o lē logologo mai i le manuia; Iuta e, ia e fai au tausamiga, ia e avatu mea na e tauto ai; auā e le toe ui atu lava ia te oe le tagata amio leaga; ua matuā fano o ia.

O ona po ia na sau ai Ioane le papatiso, ua tala‘i atu i le vao o Iutaia, ua faapea atu, Ina salamo ia outou; auā ua latalata mai le malo o le lagi.

Ua na iloa atu le au faresaio ma le au satukaio e toatele ua o mai i lana papatisoga, ona ia faapea atu ai lea ia te i latou, Fanau a gata feai e, o ai ea ua na faaali atu ia te outou ia sosola ese i le toasa atali? Ia outou fua mai ni fua e tatau ma le salamo;

Ona tali atu ai lea o ia, ua faapea atu, Ua tusia, E le na o mea e ‘ai e ola ai le tagata, a o afioga uma e tūlei mai i le fofoga o le Atua.

Talu mai ai na afua ona tala‘i atu e Iesu, ua faapea atu, Ina salamo ia outou; auā ua latalata mai le malo o le lagi.

Ona fetalai atu lea o ia ia te i laua, Ina mulimuli mai ia ia te au, ou te faia oulua ma fai faiva i tagata. Ona la tuua loa lea o laua upega, a e mulimuli atu ia te ia. Ua tuanai foi e ia lea mea, ona silafia lea e ia o le isi uso e toalua, o Iakopo le atalii o Sepetaio, ma Ioane lona uso, ua i le vaa ma lo la tamā o Sepetaio, ua latou fai masae o latou upega; ua ia valaauina atu foi ia te i laua. Ona la tuua loa lea o le vaa ma lo la tamā, a e mulimuli atu ia te ia.

Ua faataamilo Iesu i Kalilaia uma, ua ia a‘oa‘o i o latou sunako, ua ia tala‘i atu foi le tala lelei o le malo, ma faamalolo e ia o ma‘i uma ma ma‘i tiga uma o le nuu.

Amuia outou pe a latou upu leaga, ma faasaua ia te outou, ma latou tuuaiina pepelo outou i mea leaga uma ona o a‘u. Ia outou olioli ma fiafia lava; auā o i le lagi lo outou taui e tele; auā na faapea ona latou faasaua i perofeta e na muamua ia te outou. O outou, o le masima o le lalolagi outou; a e afai e magalo le masima, pe se a se mea e faamāi a‘i? E leai se mea e toe aoga ai, na ona lafoaiina i fafo, ma solia e tagata.

O outou, o le malamalama o le lalolagi outou. E le mafai ona lilo le aai ua tu i luga o le mauga. Latou te le tŭtŭina foi le lamepa i le tuu ai i lalo o le mea e fua a‘i saito, a e tuu i luga lava o le tuugālamepa ia pupula atu ai i e o i le fale uma. Ia faapea ona pupula atu lo outou malamalama i luma o tagata, ina ia latou iloa la outou amio lelei, latou te vivii atu ai i lo outou Tamā o i le lagi.

Aua tou te tolo‘a‘i oa mo outou i le lalolagi, o i ai le mogamoga ma le ele e faaumatia ai; o i ai foi tagata gaoi e eli atu, ma gaoi ai. A ia outou tolo‘a‘i oa mo outou i le lagi, e le o i ai se mogamoga, po o se ele e faaumatia ai; e le o i ai foi tagata gaoi e eli atu, ma gaoi ai. Auā o le mea ua i ai lo outou oa, e i ai atoa foi ma o outou loto.

Ua fai mai foi ia te ia o le tasi o ona soo, Le Alii e, tuu mai ia ia te au, so‘u muai alu e tanu i lo‘u tamā. A ua fetalai atu Iesu ia te ia, Mulimuli mai ia ia te au, a e tuu pea ia i e ua oti e tanu i o latou tagata oti.

Ua maliu ese Iesu i lea mea, ona silafia ai lea e ia o le tagata ua nofo i le fale e tali ai taulaga, o Mataio lona igoa; ua faapea atu ia te ia, Ina mulimuli mai ia ia te au. Ona tulai ai lea o ia, ua mulimuli atu ia te ia.

Ua faataamilo Iesu i aai uma ma faoa aai, ua a‘oa‘o i o latou sunako, ma tala‘i i le tala lelei o le malo, ua ia faamalolo foi i ma‘i uma, ma ma‘i tiga uma o le nuu.

Ona fetalai atu ai lea o ia i ona soo, E tele le saito e seleseleina, a o le au fai galuega e toaitiiti ia; o lea ia outou aioi atu ai i le Alii e ana le saito e seleseleina, ina ia aauina mai e ia ni e galulue i lana saito e seleseleina.

A outou o, ia outou tala‘i atu, ia faapea atu, Ua latalata mai le malo o le lagi. Ia outou faamalolo i e mamai, faamamā lepela, faatutū i e ua oti, tutuli i temoni. Ua maua fua e outou, ia outou foaifuaina atu.

Aua ne‘i teu ma outou o auro, po o ario, po o ‘apa memea i o outou fusi. Aua foi le ave se taga i le malaga, aua foi le tailua o ofu tino, po o see vae, po o se tootoo; auā e tatau ona avatu le mea e ‘ai i le fai galuega. O se aai po o se faoa aai tou te oo atu i ai, ia fesili po o ai se i ai ua tatau; ia outou nonofo ai i le tou o ai. A outou ulufale atu i se aiga, ia outou ofo alofa atu i ai. Pe afai foi ua tatau lea aiga, ia oo atu i ai la outou faamanuia; a e afai ua le tatau, ia toe foi mai ai ia te outou la outou faamanuia.

Ai se le talia outou, pe le faalogo i a outou upu, a outou o atu nai lea fale po o lea aai, ia outou tūtū atu le eleele nai o outou vae. E moni, ou te fai atu ia te outou, O le aso faamasino e feoloolo ai Sotoma ma Komoro i lea lava aai.

Faauta, ou te aau atu ia te outou e pei o mamoe i le va o luko; o lenei, ia outou atamamai pei o gata, a ia fifilemu e pei o lupe. Ia outou ma tagata; auā latou te tuuina atu outou i fono, ma latou sasa ia te outou i o latou sunako. E ta‘ita‘iina atu foi outou i luma o alii ma tupu ona o a‘u, e fai ma molimau ia te i latou atoa ma nuu ese.

Pe a latou tuuina atu outou, aua tou te popole pe faapefea, pe se a foi tou te fai atu ai; auā e foaiina mai ia te outou i lea lava itu aso se upu tou te fai atu ai. Auā e le o outou e tautala atu ai, a o le Agaga o lo outou Tamā e tautala mai ai i totonu ia te outou.

E tuuina atu le uso e le uso ia oti, e tuuina atu foi le fanau e le tamā; e tutū atu foi le fanau i o latou matua ina ia fasiotia i latou. E inosia foi outou e tagata uma ona o lo‘u igoa; a o lē tumau seia oo atu i le gataaga, e faaolaina o ia. Pe a latou faasaua ia te outou i le tasi aai, ia outou sosola i se tasi; auā e moni, ou te fai atu ia te outou, e le soo aai o Isaraelu ia te outou seia sau le Atalii o le tagata.

O lenei, ai se na te ta‘uta‘u a‘u i luma o tagata, o a‘u foi ou te ta‘uta‘uina o ia i luma o lo‘u Tamā o i le lagi. Ai se faafiti foi ia te au i luma o tagata, ou te faafitia foi o ia i luma o lo‘u Tamā o i le lagi.

Aua tou te manatunatu ua ou sau e avatu le filemu i le lalolagi; ou te lei sau e avatu le filemu, a o le pelu. Auā ua ou sau e faamasesei le tagata ma lona tamā, o le tama teine foi e faamasesei ma lona tinā, o le avā foi e faamasesei ma le tinā o lana tane. E fai foi le tagata ma fili o lona aiga. O le ua tele lona alofa i lona tamā po o lona tinā, a e itiiti ia te au, e le aoga lea ia te au; o le ua tele foi lona alofa i lona atalii po o lona afafine, a e itiiti ia te au, e le aoga foi lea ia te au. O se le ave lona satauro, ma le lē mulimuli mai ia te au, e le aoga foi lea ia te au. O lē maua lona ola, e māumau ai ia te ia; a o le faamāumau i lona ola ona o a‘u, e maua e ia. O lē talia outou, ua talia e ia o a‘u; o lē talia foi a‘u, ua talia e ia o le na auina mai a‘u.

Ua uma ona poloai e Iesu i ona soo e toasefulu ma le toalua, ona maliu ese ai lea o ia i lea mea, e a‘oa‘o atu ma tala‘i atu i o latou aai.

ua pupula tauaso ma ua savavali pipili, ua faamamāina lepela ma ua logo tutuli, ua faatutūina o e na oti ma ua folafolaina foi le tala lelei i e matitiva. E manuia foi se le tausuai ia te a‘u.

Na afua mai i ona po o Ioane le papatiso, ua oo i nei ona po, ua taufaoa ai le malo o le lagi, o loo ua avea faamalosi foi e i latou o taufao.

E tutū mai tagata o Nineva i le faamasinoga faatasi ma le tupulaga nei, e faasala i ai; auā na latou salamo i le tala‘iga a Iona; faauta foi, o iinei lē sili ia Iona.

Ona fetalai atu lea o ia ia te i latou i mea e tele i faataoto, ua faapea atu, Faauta, ua alu atu le tagata lulu saito e lulu ai saito. Ua ia lulu saito, ua pa‘u ai isi i le auala; ona o ane lea o manu felelei, ma aai ai. Ua paū foi isi i le mea papa, e itiiti le eleele sa i ai; ona vave tupu ai lea, ona o le eleele ina itiiti; ua alu ae le la, ua velasia; ona magumagu ai lea, ona ua leai ni aa. Ua paū foi isi i le vao tuitui, ua tutupu ae foi le vao tuitui, ona fetinaiina ai lea. A ua paū isi i le eleele lelei, ona fua mai ai lea e taiselau i nisi ma taionogafulu i nisi ma taitolugafulu i nisi.

O lenei, ina faalogologo mai ia outou i le faataoto i le tagata lulu saito. A faalogo se tasi i le upu o le malo, a e le lagona, ona alu ane ai lea o le ua leaga, ua fao le mea sa luluina i lona loto; o le mea lea sa luluina i le auala. A o le mea sa luluina i le mea papa, o le tagata lea ua faalogo i le upu, ona talia loa lea ma le fiafia; a ua leai ni aa ia te ia, ua faaletumau ia; auā pe a tupu le puapuaga, po o le sauaga ona o le upu, ona tausuai loa lea o ia. O le mea sa luluina i le vao tuitui, o ia lea ua faalogo i le upu, a o le loto popole i mea a lenei lalolagi, ma le pepelo o le oa ua fetinaiina ai le upu, ona le fua mai lava lea. A o le mea sa luluina i le eleele lelei, o ia lea ua faalogo i le upu, ma lagona ai; ua fua mai lava ia, e taiselau i nisi, e taiono gafulu i nisi, e taitolugafulu foi i nisi.

Ua sauni atu e ia le tasi faataoto ia te i latou, ua faapea atu, E tusa le malo o le lagi ma le fua o le sinapi, na ave e le tasi tagata, ma totō i lona fanua; e itiiti lava ia i fua o laau uma; pe a uma ona tupu, e sili ia i laau afu, e iu ina fai ma laau tele, e o mai ai manu felelei, ma latou momoe i ona la.

A ua tali atu ia, ua faapea atu, O laau uma e lei totōina e lo‘u Tamā o i le lagi, e liaiina ia.

Ona fetalai atu ai lea o Iesu i ona soo, Ai se tasi e fia mulimuli mai ia te au, aua ne‘i usiusitai o ia ia te ia, a ia ave e ia lona satauro, i le mulimuli mai ai ia te au. Auā ai se fia faasaogalemuina lona ola, e māumau ai ia te ia; a o le faamāumau lona ola ona o a‘u, e maua ai e ia. Auā se a le aoga i le tagata pe afai na te maua le lalolagi uma, a e māumau lona ola? se a foi se mea e avatu e le tagata e togiola a‘i lona ola? Auā e sau le Atalii o le tagata faatasi ma ana agelu i le mamalu o lona Tamā; ona tauia lea e ia e taitasi e tusa ma lana galuega.

Ai se tasi ua ia tuua o fale, po o uso, po o tuafāfine, po o le tamā, po o le tinā, po o le avā, po o le fanau, p o fanua ona o lo‘u igoa, e maua e ia e taisautuaselau, e fai foi mona tofi le ola faavavau.

Auā e tusa le malo o le lagi ma le tasi matai na alausu atu e tautala ma nisi e faigaluega i lona tovine a e taui atu. Ua tautala o ia ma ē faigaluega, o le aso ma le tenari; ona aauina atu ai lea e ia o i latou i lana tovine. O le itu aso foi e tolu ua alu atu ai o ia, ona iloa atu ai lea e ia o isi ua tutū i le malae e leai se galuega; ona fai atu ai lea o ia ia te i latou, Ina o atu ia outou foi i le tovine, a e ou te avatu ia te outou se mea e tusa. Ona latou o atu ai lea. Ua toe alu atu ia i le itu aso e ono, ma le iva, ua faapea foi ona fai. O le itu aso foi e sefulu ma le tasi ua alu atu ai o ia, ona iloa atu ai lea e ia nisi ua tutū e leai se galuega, ua na fai atu foi ia te i latou, Se a le mea tou te tutu mai ai iinei i le aso uma e leai se galuega? Ua latou fai mai ia te ia, E leai se na fai mai ia te i matou. Ua fai atu ia ia te i latou, Ina o atu ia o outou foi i le tovine, a e maua e outou se mea e tusa. Ua oo i le afiafi, ona fai atu ai lea o le alii e ana le tovine i lana auauna e pule, Valaau ia i e faigaluega, ma avatu le taui ia te i latou, ia afua i e na mulimuli, ia oo i e na muamua. Ua o mai foi o e na o ane i le itu aso e sefulu ma le tasi, ua taitasi ma latou maua le tenari. Ona o mai ai lea o e na muamua, fa te i latou e sili sa latou mea e maua; a ua taitasi foi o i latou ma maua le tenari. Ua maua ai e i latou, ona latou muimui ai lea i le matai, ua faapea mai, E tasi lava le itu aso na galulue ai i latou nei na mulimuli, a ua e faatusaina i latou ma i matou o e na tigaina i le galuega ma le vevela o le aso. Ona tali atu ai lea o ia i le tasi o i latou, ua faapea atu, Sole, e leai sa‘u agaleaga ia te oe; ta te lei tautala ea i le tenari e tasi? Ina tago ia i lau mea, ma alu; o la‘u pule lea e avatu lava i lenei na mulimuli e pei o a oe lava. E le faitalia ea a‘u ona pule i a‘u lava mea? e te faaūū mai ea ina ua ou agalelei?

E tusa le malo o le lagi ma le tasi tupu ua na faia le tausamaaga o lona atalii; ua aauina atu e ia ana auauna e fai atu i e na tala‘iina ia o mai i le tausamaaga; a ua latou le mafafai ina o mai. Ua toe aauina atu e ia nisi auauna, ua faapea atu, Ia outou fai atu i e na tala‘iina, Faauta, ua ou saunia mea e taumafa, ua fafasi a‘u povi ma a‘u mea pepeti, ua saunia foi mea uma; ina o mai ia i le tausamaaga. A ua latou faatāla ese mai, ua taitasi ma alu, o le tasi i lona fanua, ma le tasi i lana faatau. A o isi, ua latou pupue i ana auauna, ua faaleaga ma fasiotia. Ua faalogo ai le tupu, ona matuā ita ai lea o ia; ua aauina atu e ia ana ‘au, ua faaumatia na tagata fasi tagata, ma susunu la latou aai.

Ona fai atu ai lea o ia i ana auauna, Ua saunia lava le tausamaaga, a ua le aoga e na tala‘iina. O lenei, ia outou o atu i ala tele, o i latou uma tou te iloa ai, tou te tala‘i i ai le tausamaaga. Ona o atu ai lea o ia auauna i ala, ua latou faapotopoto uma e na latou iloa, o e leaga atoa ma e lelei; ona tumu ai lea o le mea na fai ai le tausamaaga i e na taooto e aai ai.

Ona latou tuuina atu ai lea o outou i le puapuaga, ma latou fasiotia outou, e inosia foi outou e nuu uma ona o lo‘u igoa. O ona po ia e tausuai ai tagata e toatele, e faalata le tasi i le tasi, ma feitagai i latou. E tutū mai foi perofeta pepelo e toatele, latou te faasese foi i tagata e toatele.

E tala‘iina atu foi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.

Ona maliu ane ai lea o Iesu, ua fetalai atu ia te i latou, ua faapea atu, Ua tuuina mai ia te au le pule uma lava i le lagi ma le lalolagi. O lenei, ia outou o atu e fai nuu uma lava ma soo, ma papatiso atu ia te i latou i le suafa o le Tamā, ma le Atalii, ma le Agaga Paia; ia outou a‘oa‘o atu ia te i latou ia tausi i mea uma ua ou fai atu ai ia te outou; faauta foi, ou te ia te outou i aso uma lava, e oo lava i le gataaga o le lalolagi. Amene.

Sa faia e Ioane lana papatisoga i le vao, ma tala‘i atu ai le papatisoga o le salamo ina ia faamagaloina agasala.

Ua tuuina atu Ioane i le fale puipui, ona maliu atu lea o Iesu i Kalilaia, ua tala‘i atu ai le tala lelei i le malo o le Atua, ua faapea atu, Ua oo mai ona po, ua latalata mai le malo o le Atua; ina salamo ia, ma talitonu i le tala lelei.

Ua savali ane ia e latalata ane i le vai o Kalilaia, ona silafia lea e ia o Simona ma Aneterea lona uso, ua la lafo le upega i le vai; auā o tagata fai faiva i laua. Ona fetalai atu lea o Iesu ia te i laua, Ina mulimuli mai ia ia te au, ou te faia oulua ma fai faiva i tagata. Ona la tuua loa lea o la upega, a e mulimuli atu ia te ia.

Ona fetalai atu lea o ia ia te i latou, Ina tatou o atu ia i aai e latalata mai, ia ou tala‘i atu i ai le tala lelei, auā o le mea lea na ou sau ai.

Ua maliu ane o ia, ona silafia lea e ia o Levi o le atalii o Alefaio, ua nofo i le fale e tali ai taulaga, ona fetalai atu lea o ia, Mulimuli mai ia ia te au. Ona tulai lea o ia, ua mulimuli atu ia te ia.

Ona tofia lea e ia le toatinoagafulu ma le toalua, ina ia latou faatasi ma ia, ia na aauina atu foi i latou e tala‘i i le tala lelei; ina ia tuuina atu foi le pule ia te i latou, latou te faamalolo ai ma‘i, ma tutuli ai temoni.

Ina faalogologo mai ia outou; faauta, o le tagata lulu saito, ua alu atu ia e lulu ai saito. Ua ia lulu saito, ona paū lea isi i le auala, ona o ane lea o manu felelei, ua aai ai. Ua paū foi isi i le mea papa, e itiiti lava le eleele sa i ai; ona tupu lise lea ia, auā o le eleele ina itiiti. Ua alu ae le la, ua velasia ai, ona magumagu ai lea, ona ua leai ni aa. Ua paū foi isi i le vao tuitui, ua tutupu ae le vao tuitui, ona fetinaiina ai lea, e lei fua mai lava. A ua paū isi i le eleele lelei, ua tutupu ae, ma tupu tele, ua fua mai, e taitolu sefulu i nisi, e taiono sefulu i nisi, a e taiselau i nisi. Ua ia fetalai atu foi ia te i latou, O le ua i ai taliga e faalogo ai, ina faalogo mai ia o ia. Ua toatasi ia, ona fesili ane lea ia te ia o e ua faatasi ma ia, atoa ma le toatinoagafulu ma le toalua i le faataoto. Ona fetalai atu lea o ia ia te i latou, Ua foaiina atu ia te outou ina ia outou iloa mea lilo a le malo o le Atua; a o i latou o i tua, ua fai atu mea uma ia te i latou i faataoto; ina ia latou le iloa i lo latou matuā vaai; ina ia latou le lagona foi i lo latou matuā faalogologo; ina ne‘i liliuina i latou, ma faamagaloina a latou agasala.

Ua ia fetalai atu foi ia te i latou, Tou te le iloa ea lenei faataoto? Pe faapefea foi ona outou iloa o faataoto uma? O lē lulu saito, e lulu ia i le upu. O i latou ia i le auala e luluina ai le upu; a latou faalogo ai, ona alu ane loa lea o Satani, ma aveeseina le upu na luluina i o latou loto. E faapea foi i latou na luluina i le mea papa, o i latou ia ua faalogo i le upu, ona talia loa lea ma le fiafia. A e peitai ua leai ni o latou aa, ua faaletumau i latou; pe a tupu le puapuaga, po o le saua ona o le upu, ona latou tausuai loa lea. O i latou foi sa luluina i le vao tuitui, o i latou ia e na faalogo i le upu, a o le loto popole i mea a lenei lalolagi, ma le pepelo o le oa, ma le tu‘inanau i nisi mea, ua oo atu i totonu o le loto, ua fetinaiina ai le upu, ona le fua mai lava lea. A o i latou na luluina i le eleele lelei, o i latou ia e ua faalogo i le upu, ma latou talia, ma fua mai e taitolugafulu i nisi, e taiono sefulu i nisi, e taiselau foi i nisi.

Ua ia fetalai atu foi, O le malo o le Atua ua faapei o le tagata ua na luluina saito i le eleele. Ua moe foi o ia i le po, ma ala i le ao; a ua totogo ae le saito, ma tutupu, ua na le iloa pe na faapefea ia; auā ua tupu fua ia i le eleele; e muamua ōna lau, ona oo lea i lona fuga mai, mulimuli ane foi ua i ai saito matua. A afu le saito, ona selesele loa lea, auā ua oo i ona po e selesele ai.

Ua fetalai atu foi o ia, Se a se mea tatou te faatusa i ai le malo o le Atua? se a foi se faataoto tatou te faatusaina ai? E tusa ia ma le fua o le sinapi; a totōina i le eleele, e sili ona laitiiti i fua uma e tutupu i le eleele. Pe a totōina foi, ona tupu ae lea, ua avea foi ma laau tele, ua sili i laau uma e afu, ua fai foi ōna a tetele, e mafai ai manu felelei ona momoe i lalo o lona paolo.

A o Iesu ua le mafai, a ua fetalai atu ia te ia, Alu atu ia oe i lou fale, i lou aiga, ma ia e ta‘u atu ia te i latou mea tetele ua faia e le Alii ia te oe, ma lona alofa ia te oe. Ua alu foi o ia, ma na tala‘i i Tekapoli o mea tetele ua faia e Iesu ia te ia; ona ofo ai lea o tagata uma.

Ua valaau atu ia i le toatinoagafulu ma le toalua, ona aau atu lea ia te i latou e taitoalua, ua ia tuu atu foi ia te i latou le pule i agaga leaga; ma na fetalai atu ia te i latou, aua latou te ave se mea i a latou malaga, tau lava o le tootoo e tasi; aua se taga, aua ni mea e ‘ai, ia leai foi ni tupe i o latou fusi, a ia faaseevaeina o latou vae; aua foi le tailua o ofu e ofu ai. Ua fetalai atu foi o ia ia te i latou, O se mea tou te ulu atu ai i se fale, ia outou nonofo ai i le tou o ai.

Ai se le talia outou, pe le faalogo ia te outou, a outou o ese i lea mea, i le tou tūtū atu ai le eleele nai o outou vae, e fai ma molimau ia te i latou; e moni, ou te fai atu ia te outou, e feoloolo Sotoma ma Komoro i le aso faamasino, i lea lava aai. Ona latou o atu ai lea ma tala‘i atu ina ia latou salamo.

Ua fetalai atu foi o ia ia te i latou, Ua lelei lo outou faaleaogaina le poloaiga a le Atua, ina ia outou taofi a outou uputuu.

Ua ia te i latou foi nai i‘a lauiti, ua ia faafetai foi, ona fetalai atu lea ia laulauina atu foi ia mea. Ona latou aai lea, ua maoona; ona latou fu‘e lea o toe ‘aiga ua fitu ete. O i latou foi na aai pe fa afe; ona ia tuuina atu lea ia te i latou e ō.

Ona valaau atu lea o ia i le motu o tagata, atoa ma ona soo, ua fetalai atu ia te i latou, Ai se fia mulimuli mai ia te au, aua ne‘i usiusitai o ia ia te ia, a ia ave e ia lona satauro, i le mulimuli mai ai ia te au. Auā ai se fia faasaogalemuina lona ola, e māumau ai ia te ia; a o lē faamāumau lona ola ona o a‘u ma le tala lelei, e faasaoina e ia. Auā se a le aoga i le tagata, pe afai na te maua le lalolagi uma, a e māumau lona ola? se a foi se mea e avatu e le tagata e togiola a‘i lona ola?

Auā ai sē mā ia te au, ma a‘u upu i lenei tupulaga mulilulua ma le agasala, e mā foi le Atalii o le tagata ia te ia, pe a sau o ia faatasi ma ana agelu paia i le mamalu o lona Tamā.

Ona tali atu lea o Iesu, ua faapea atu, E moni, ou te fai atu ia te outou, ai se tasi ua ia tuua le fale, po o uso, po o tuafāfine, po o le tamā, po o le tinā, po o le avā, po o le fanau, po o fanua, ona o a‘u ma le tala lelei, e maua lava e ia taisautuaselau i lenei olaga, o fale, ma uso, ma tuafāfine, ma tinā, ma fanau, ma fanua, atoa foi ma sauaga, a o le ola atali e maua ai le ola e faavavau.

Ia outou ia te outou; auā e tuuina atu outou e i latou i fono, ma sasaina outou i sunako; e tutū foi outou i luma o alii ma tupu ona o a‘u, e fai ma molimau ia te i latou. Ia muai tala‘iina foi le tala lelei i nuu uma lava e ao ai.

Pe a latou ta‘ita‘iina ma tuuina atu outou, aua ne‘i muai manatu i sa outou e fai atu ai, aua foi le lua‘i fatufatua‘i; a o se mea e foaiina ia te outou i lena itu aso, o lea tou te fai atu ai; auā e le o outou e fai atu ai, a o le Agaga Paia.

E tuuina atu foi le uso e le uso ia oti, e tuuina atu foi e le tamā lona atalii, e tutū atu foi le fanau i o latou mātua, ina ia fasiotia i latou. E inosia foi outou e tagata uma ona o lo‘u igoa; a o lē tumau seia oo i le iuga, e faaolaina lea.

Ua fetalai atu foi o ia ia te i latou, O atu ia outou i le lalolagi uma, ina tala‘i atu ai le tala lenei i tagata uma lava. O lē faatuatua ma papatisoina, e faaolaina ia; a o le lē faatuatua, e faasalaina ia.

Ona latou o atu lea, ma tala‘i atu i mea uma; ua galue faatasi le Alii ma i latou, ma ua faamaonia le upu i faailoga ua mulimuli ane ai. Amene.

e faapei ona tuuina mai ia te i tatou e i latou na matamata ai, ma auauna ai i le upu talu le amataga;

e faailoa atu le olataga i lona nuu i le faamagaloina o a latou agasala,

Ona fai mai lea o le agelu ia te i latou, Aua tou te matatau; auā faauta, ou te au mai ia te outou le tala e olioli tele i le nuu uma;

Ona alu atu ai lea o ia i le itu uma o Ioritana, ua tala‘i atu le papatisoga o le salamo ina ia faamagaloina agasala. Pei ona tusia i le tusi o upu a Isaia le perofeta, ua faapea mai, O le leo o le ua alaga i le vao, Ina teuteu ia outou le ala o le Alii, ia faalaulelei ona ala. E faatumuina o vanu uma, e faamaulaloina foi mauga ma mea maupuepue uma; e faasa‘oina foi o mea piopio, ma mea gaoa e fai ma ala laulelei ia. E vaaia foi e tagata uma le faaolataga mai le Atua.

O isi foi upu faamafanafana e tele ua ia folafola ai le tala lelei i le nuu.

Ua i o‘u luga le Agaga o le Alii, auā ua na faauu mai ia te au e folafola le tala lelei i e matitiva; ua auina mai a‘u e ia e faamalolo i e loto momomo, e tala‘i le saolotoga i le tafeaga, ma ia pupula mata o e tauaso, e tuu saoloto i e ua faasauaina,

A ua fetalai atu ia ia te i latou, E tatau ona ou folafola le tala lelei o le malo o le Atua i nisi aai foi; auā o le mea lea na auina mai ai a‘u.

Ua uma lana lauga, ona fetalai atu lea o ia ia Simona, Ina tuutuu atu ia i le loloto, ma tuu ifo ai o outou upega e maua ai ni i‘a. Ua tali mai Simona, ua faapea mai ia te ia, Le Alii e, ua atoa le po ua tigaina ai i matou, e leai ni mea ua maua; a ona o lau fetalaiga ou te tuu ifo ai le upega. Ua uma ona latou faia o lea mea, ona latou siomia lea o le au i‘a tele lava, ua masae ai lo latou upega. Ua latou genogeno atu i o latou o i le tasi vaa, e o mai e fesoasoani ia te i latou; ona latou o mai lea, ua faatumu e i latou vaa uma e lua, ua tāli gogoto ai. Ua iloa e Simona Peteru, ona faapaū lea o ia i tulivae o Iesu, ua faapea mai, Le Alii e, ina maliu ese atu ia oe ia te au, auā o a‘u le tagata agasala. Auā ua ofo o ia atoa ma i latou uma sa ia te ia, auā o le au i‘a ua latou maua; ua faapea foi Iakopo ma Ioane, o atalii o Sepetaio, o i latou ua fai faiva faatasi ma Simona. Ona fetalai atu lea o Iesu ia Simona, Aua e te fefe, e amata i nei ona po ona e maua tagata. Ua tūta o latou vaa, ona latou tuu ai lea o mea uma, a e mulimuli atu ia te ia.

Ua mavae ia mea, ona ulufafo ai lea o ia, ua silafia e ia le telona e igoa ia Levi, ua nofo i le fale e tali ai taulaga; ona faapea atu lea ia te ia, Ina mulimuli mai ia ia te au. Ona tuua lea e ia o mea uma, ua tulai ma mulimuli ia te ia.

Ia outou olioli i lea aso, ma ia outou osooso ma le fiafia; auā faauta, o i le lagi lo outou taui ua tele; auā sa faapea ona fai e o latou tamā i perofeta.

Ona tali atu lea o Iesu ia te i laua, ua faapea atu, Ina o atu ia oulua, ma faailoa atu ia Ioane o mea ua oulua vaai i ai, ma faalogo i ai; ua pupula tauaso, ua savavali pipili, ua faamamāina lepela, ua logo tutuli, ua faatutūina e na oti, ua folafolaina le tala lelei i e matitiva. E manuia foi se le tausuai ia te a‘u.

Mulimuli ane ua faataamilo o ia i aai ma faoa aai, ua tala‘i ma folafola le tala lelei o le malo o le Atua; ua faatasi foi ma ia le toasefulu ma le toalua,

Ua alu atu le tagata lulu saito e lulu ai ana saito; ua ia lulu saito, ua paū ai isi i le auala; ona solia lea, ua ‘aina foi e manu felelei. Ua paū isi i le mea papa; ua tupu, ona magumagu ai lea, auā e le su. A ua paū isi i le vao tuitui; ua tutupu faatasi ia ma le vao tuitui, ona fetinaiina ai lea. Ua paū foi isi i le eleele lelei; ua tupu, ua fua mai taiselau i fua. Ua fetalai atu ia i nei mea, ona alaga atu lea, O le ua i ai taliga e faalogo ai, ina faalogo mai ia o ia. A ua fesili mai ona soo ia te ia, ua faapea mai, Se a ea le faataoto nei? Ona fetalai atu lea o ia, Ua foaiina atu ia te outou ina ia outou iloa mea lilo a le malo o le Atua; a ua fai atu i nisi i faataoto; ina ia latou le vaai i lo latou vaai, ina ia le lagona foi i lo latou faalogo.

O le faataoto lenei, O le saito, o le afioga lea a le Atua. O e i le auala, o e faalogo ia; ona alu ane ai lea o le tiapolo, ma aveeseina le upu nai o latou loto, ne‘i faatuatua ma faaolaina i latou. O e i le mea papa, o i latou ia, pe a faalogo i le upu, ua talia ma le fiafia; a e leai ni o latou aa, ua faaletumau lo latou faatuatua, ua oo atu i aso e faaosoosoina ai, ona o ese ai lea. O le mea na paū i le vao tuitui, o i latou ia e ua faalogo, ua o atu ai, ona fetinaiina ai lea i mea e popole ai, ma oloa, ma mea faafiafia o le olaga nei, ona le oo lea ina matua o latou fua. Peitai o le mea na i le eleele lelei, o i latou ia e ua faalogo i le upu, ma tausi i ai i le loto ua faamaoni ma le lelei, ona fua mai ai lea ma le onosai.

Ina foi atu ia oe i lou aiga, ma ia faamatala atu i mea tetele ua faia e le Atua ia te oe. Ona alu ai lea o ia, ua tala‘i i le aai uma i mea tetele na faia e Iesu ia te ia.

Ua faapotopotoina e ia ona soo e toasefulu ma le toalua, ua tuu atu ia te i latou le mana ma le pule i temoni uma, ma ia faamalolo i ma‘i. Ua aauina atu i latou e ia e tala‘i i le malo o le Atua, e faamalolo foi i e mamai. Ua fetalai atu foi o ia ia te i latou, Aua tou te ave se mea i le malaga, po o tootoo, po o se taga, po o mea e ‘ai, po o se tupe, aua foi ne‘i tailua ofu tino. O se fale foi tou te ulu atu i ai, ia nonofo ai i le tou o ai lava.

Ai se lē talia outou, a outou o ese i lea aai, ia tūtū atu le eleele i o outou vae, e fai ma molimau ia te i latou. Ua latou o atu, ona faataamilo ai lea i lea aai ma lea aai e folafola le tala lelei, ma faamalolo i ma‘i i mea uma.

Ua fetalai atu ia i tagata uma, A fia mulimuli mai se tasi ia te au, aua le usiusitai o ia ia te ia, a ia ave e ia lona satauro i aso fai soo, i le mulimuli mai ai ia te au. Auā ai sē fia faasaogalemuina lona ola, e māumau ai ia te ia; a o lē faamāumau i lona ola ona o a‘u, e faasaoina e ia. Auā se a le aoga i le tagata pe afai na te maua le lalolagi uma, a e faamāumau e ia ia ia, pe lafoaiina?

Auā ai se mā ia te au ma a‘u upu, e mā foi ia te ia le Atalii o le tagata, pe a sau o ia i lona mamalu, ma lo le tamā, ma le au agelu paia.

Ua fetalai atu ia i le tasi, Ina mulimuli mai ia ia te au. A ua fai mai o ia, Le Alii e, tuu mai ia ia te au, se‘i ou alu e muai tanu i lo‘u tamā. A ua fetalai atu Iesu ia te ia, Ina tuu pea ia i e ua oti e tanu i o latou tagata oti; a o oe, e te alu ma tala‘i atu le malo o le Atua.

Ua fai mai foi le tasi, Le Alii e, ou te mulimuli atu ia te oe; a ia tuu mai ia te au, se‘i ou muai faamavae i lo‘u aiga. Ua fetalai atu Iesu ia te ia, O lē tago lona lima i le suotosina, ma tepa i tua, e le tatau ia i le malo o le Atua.

Mulimuli ane ua tofia e le Alii nisi e toafitugafulu, ua aauina atu o i latou e taitoalua ua muamua atu ia te ia, i aai uma ma mea uma o le a maliu atu i ai o ia.

Ua fetalai atu foi o ia ia te i latou, E tele le saito e seleseleina, a o le au faigaluega e toaitiiti ia; o lea ia outou aioi ai i le Alii e ana le saito e seleseleina, ina ia aauina mai e ia ni e galulue i lana saito e seleseleina.

Ina o atu ia, faauta, ou te aauina atu outou pei o tamai mamoe i le va o luko. Aua tou te ave se ete tupe, po o se taga, po o seevae; aua foi tou te ofo alofa atu i se tasi i le ala.

A o le aai tou te oo atu i ai, ua latou le talia foi outou, tou te o ai i o latou malae, ma faapea atu, O le eleele lava mai la outou aai, ua pipii mai ia te i matou, matou te sōloi atu ia te outou; a e peitai ia outou iloa lenei mea, ua latalata ia te outou le malo o le Atua. Ou te fai atu ia te outou, O lea aso e feoloolo ai Sotoma i lea lava aai.

O lē faalogo ia te outou, ua faalogo o ia ia te au; o lē faaleaoga ia te outou, ua ia faaleaoga ia te au; o lē faaleaoga foi ia te au, ua ia faaleaoga i le na auina mai a‘u.

E tutū tagata o Nineva i le faamasinoga faatasi ma le tupulaga nei, e faasala i ai; auā na latou salamo i le tala‘iga a Iona; faauta foi, o iinei lava lē sili ia Iona.

Ou te fai atu foi ia te outou, O sē ta‘ua a‘u i luma o tagata, e ta‘ua foi o ia e le Atalii o le tagata i luma o agelu a le Atua. A o lē faafiti mai ia te au i luma o tagata, e faafitia o ia i luma o agelu a le Atua.

Pe a ta‘ita‘iina outou i sunako, ma alii, ma faipule, aua tou te popole i sa outou e tali atu, pe faapefea, pe se a foi tou te fai atu ai; auā e a‘oa‘o le Agaga Paia ia te outou i lea lava itu aso i upu e tatau ona fai atu ai.

Ia outou faatau atu i a outou mea, tou te avatu ai e fai ma mea alofa; ia fai outou ni a outou taga e anagata, o le oa i le lagi e le uma lava, e le tāitāi ane i ai se gaoi, e le atia foi e se mogamoga. Auā o le mea o i ai lo outou oa, e i ai atoa foi ma o outou loto.

Fa te outou ea ua ou sau e avatu le filemu i le lalolagi? Ou te fai atu ia te outou, e leai; a o le fevaevaeai. Auā e amata i nei ona po e i ai i le fale e tasi tagata e toalima e favaevaeai i latou, o le toatolu e faamasesei ma le toalua, o le toalua foi e faamasesei ma le toatolu. E fevaevaeai le tamā ma le atalii, o le atalii foi ma le tamā; o le tinā ma le tama teine, o le tama teine foi ma le tinā; o le tinā o le tane ma le avā a lana tama, o le avā foi ma le tinā o lana tane.

Ou te fai atu ia te outou, e leai; a e afai tou te le salamo, e faapena lava ona fano outou uma.

A ua fetalai atu o ia ia te ia, Na saunia e le tasi tagata le talisuaga tele, na tala‘i atu foi e ia i tagata e toatele; ua oo foi i le itu aso e fai ai le talisuaga, ona auina atu lea e ia o lana auauna e fai atu i e na tala‘iina, Ia outou o mai, auā ua uma ona saunia o mea uma. Ona latou fealoalofa‘i ai lea, ua tasi le loto. Ua fai mai le tasi ia te ia, Ua ou faatau le fanua, e tatau ona ou alu atu e matamata ai; se‘i e faapea, ia tuu mai ia te au. Ua fai mai foi le tasi, Ua ou faatau povi e lima ni tailua, ou te alu e faataitai i ai; se‘i e faapea, ia tuu mai ia te au. Ua fai mai foi le tasi, Ua ou fai avā; o le mea lea ou te le mafai ai ona alu. Ua alu atu lea auauna ua faamatala atu ia mea i lona alii. Ona ita ai lea o le matai o le aiga, ua fai atu ia i lana auauna, Ina alu ia ia vave i ala ma alātua o le aai, ma ia au mai iinei i e matitiva, ma e mumutu, ma e pipili, atoa ma e tauaso. Ona fai mai lea o le auauna, Le alii e, ua uma ona faia o le mea na e poloai mai ai, a e lei nofoia le fale. Ua fai atu le alii i le auauna, Ina alu atu ia i ala tele ma magāala, ma ia pulunaunau atu latou te o mai, ina ia tumu lo‘u nei fale. Auā ou te fai atu ia te outou, E leai lava se tasi o ia tagata e na tala‘iina, e ‘ai i la‘u talisuaga nei.

Afai e sau se tasi ia te au, a e le ‘ino‘ino i lona tamā, ma le tinā, ma le avā, ma le fanau, ma uso, ma tuafāfine e oo lava i lona ola, e le mafai ona fai o ia mo‘u soo. O se le ave lona satauro, ma ua le mulimuli mai ia te au, e le mafai ona fai o ia mo‘u soo.

E faapea foi so outou e le lafoai ana mea uma, e le mafai ona fai o ia mo‘u soo. O le mea lelei le masima; a e afai e magalo le masina, pe se a se mea e faamāi a‘i?

Ou te fai atu ia te outou, e faapea foi ona tele o le olioli i le lagi i le tagata agasala e toatasi e salamo, a e itiiti i e amiotonu e toaivagafulu ma le toaiva e le tusa i ai le salamo.

Ou te fai atu ia te outou, ua faapea le olioli i luma o agelu a le Atua, ona o le tagata agasala e toatasi ua salamo.

Auā ua sau le Atalii o le tagata e saili ma faaola i le na le iloa.

O le tasi o ia aso, a o a‘oa‘o ia i le nuu i le malumalu, ma folafola i le tala lelei, ua tutū mai ai ia te ia faitaulaga sili, ma tusiupu, ma toeaina.

A o lei oo nei mea, latou te pupue ma faasaua ia te outou, e tuuina atu ia te outou i sunako ma fale puipui, latou te ta‘ita‘iina atu outou i tupu ma alii ona o lo‘u igoa. E oo ia mea ia te outou e fai ma molimau.

O lenei, ia tuu i o outou loto, tou te le muai mafaufau i se upu tou te tali atu ai. Auā ou te avatu mo outou le upu ma le poto, e leai so latou o e finau mai ia te outou na te mafaia ona tali mai, pe tetee mai ia te outou.

E tuuina atu foi outou e mātua, ma uso, ma aiga, ma uo; o isi foi o outou e fasiotia e i latou. E inosia foi outou e tagata uma ona o lo‘u igoa.

Ua fetalai atu ia ia te i latou, Na ou aauina atu ia te outou e leai sa outou ete tupe, po o se ‘ato, po o seevae, pe na outou matitiva ea i se mea e tasi? Ua fai mai i latou, E leai lava. Ona fetalai atu ai lea o ia ia te i latou, A o lenei, ai se tagata e ana se ete tupe, ina tago ia i ai, e faapea foi sana ‘ato; o le tagata foi e leai sana pelu, ia avatu lona ofu e faatau a‘i mai.

ina ia tala‘iina foi le salamo ma le faamagaloina o agasala i nuu uma i lona igoa, e amata mai i Ierusalema. O molimau foi outou i nei mea.

A o i latou uma e na talia o ia, ma faatuatua i lona suafa, na ia avatu i ai o lea manuia, ia avea i latou ma fanau a le Atua. O i latou, e le o le toto na fanau ai, e le o le manao foi o le tino e le o le loto foi o le tagata, a o le Atua lava.

O le taeao ua finagalo ai Iesu e maliu atu i Kalilaia ua na silafia Filipo, ona fetalai atu lea o ia ia te ia, Mulimuli mai ia ia te au.

Ua tali atu Iesu, ua faapea atu ia te ia, E moni, e moni, ou te fai atu ia te oe, a le toe fanau le tagata, e le mafai ona iloa e ia o le malo o le Atua. Ua fai mai Nikotemo ia te ia, E mafai ea faapefea ona fanau o le tagata ua toeaina? E mafai ea ona toe ofi i le manava o lona tinā, e fanau mai ai? Ua tali atu Iesu, E moni, e moni, ou te fai atu ia te oe, afai e le fanau se tasi i le vai ma le Agaga, e le mafai ona sao o ia i le malo o le Atua. O le ua fanau mai i la le tino, o le tino lea; o le ua fanau mai foi i la le Agaga, o le agaga lea. Aua e te ofo auā na ou fai atu ia te oe, E ao ina toe fanau mai outou. E agi le matagi i le mea e loto i ai o ia, e te faalogo foi i lona agi, a e te le iloa le mea na sau ai, ma le mea e alu atu i ai; e faapea i latou uma o e ua fanau mai e le Agaga.

E moni, e moni, ou te fai atu ia te oe, matou te tautala i mea ua matou iloa, matou te molimau foi i mea ua matou vaavaai i ai; a e le talia mai e outou la matou mau. Afai ua ou fai atu ia te outou i mea o i le lalolagi, a e le talitonu mai outou, pe faapefea ona outou talitonu pe a a‘u fai atu ia te outou i mea o i le lagi?

Auā ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau. Auā e lei auina mai e le Atua lona Atalii i le lalolagi ina ia faasala i le lalolagi, a ia faaolaina le lalolagi ia te ia. O lē faatuatua ia te ia, e le faasalalaina o ia; a o le lē faatuatua, ua nofosala nei lava o ia, auā e lei faatuatua lava ia i le igoa o le Atalii e toatasi o le Atua. O le faasala foi lenei, ina ua oo mai le malamalama i le lalolagi, a o tagata, e sili lo latou manao i le pouliuli i lo latou manao i le malamalama; auā e leaga a latou amio. Auā o i latou uma o e fai mea leaga e ‘ino‘ino i latou i le malamalama, e le o mai foi i le malamalama, ne‘i faailoa a latou amio. A o lē ua faamaoni ana mea e fai, e sau lava o ia i le malamalama, ia faaalia ana amio ina ua tatau i le Atua.

O lē faatuatua i le Alo, ua ia te ia le ola e faavavau; a o le le faatuatua i le Alo e le iloa e ia le ola, a o le toasa o le Atua o loo tumau lava i ona luga.

Tou te le fai ane ea, E toe fa masina, i le oo ai i le seleselegāsaito; faauta, ou te fai atu ia te outou, ina tepa ae ia o outou mata, ma vaavaai i le fanua ua sinasina mai nei i le seleselegāsaito. O lē selesele foi, e maua lana totogi, ma faaputu le fua e oo i le ola faavavau; ina ia faatau olioli o lē lulu saito ma lē selesele. O lenei mea foi ua faamaoni ai le upu, Ese lē lulu saito ese lē selesele. Ua ou auina atu outou e selesele i le mea sa outou le galulue ai; na galulue isi tagata, a ua oo atu outou i la latou galuega.

E moni, e moni, ou te fai atu ia te outou, o lē faalogo mai i la‘u upu, ma talitonu ia te ia na na auina mai a‘u, ua ia te ia le ola e faavavau: e le oo foi ina faasalaina o ia, a ua oo atu ia i le ola, sa i le oti,

O lea ua ou fai atu ai ia te outou. E oti outou i a outou agasala; auā a outou le talitonu, o a‘u lenei o ia, ona oti lea o outou i a outou agasala.

Ona fetalai atu lea o Iesu ia Iutaia, e ua talitonu ia te ia. Afai tou te tumau pea i la‘u mataupu, o o‘u soo moni outou. E iloa foi e outou le mea moai, e tuu sa‘oloto foi outou e le upu moni.

E tatau ona ou faia galuega a le ua auina mai a‘u, manū o ao; e oo i le po, e le mafaia e se tasi ona galue ai.

E moni, e moni, ou te fai atu ia te outou, o le le ui atu i le faitotoa i totonu o le lotoā mamoe, a e alu ae i ai i se tasi mea, o le gaoi lea ma le fao mea.

O lē faaleaoga ia te au, ma ua le talia a‘u upu, o ia te ia le tasi na te faasalaina ia; o le upu ua ou tautala atu ai, e faasala lea ia te ia i le aso gataaga. Auā ou te le tautala fua na o a‘u; a o le Tamā ua auina mai a‘u, na ia tuu mai le poloaiga ia te au i mea ou te fai atu ai, ma mea ou te tautala atu ai.

Ua fetalai atu Iesu ia te ia. O a‘u nei le ala, ma le upu moni, ma le ola; e le alu atu lava se tasi i le Tamā, pe a le ui mai ia te au.

A ua tusia ia mea, ina ia talitonu ai outou, o Iesu o le Keriso lava ia, o le Alo o le Atua; ina ia maua ai foi le ola i lona suafa e outou o e talitonu.

Ua fetalai atu o ia ia te i latou. Ina lafo ia le upega i le itu i matau o le vaa, ona outou maua ai lea. Ona latou lafo lea; a ua le toe mafai e i latou ona toso ae, ona o taumafa o i‘a. Ona fai atu lea o lena soo ua alofaina e Iesu ia Peteru, O le Alii lea. Ua faalogo Simona Peteru, o le Alii ia, ona ofu lea o ia i lona ofu, auā na faasau o ia; i le ua oso i le vai. A ua o mai isi soo i le vaa itiiti; auā e le vava mamao ma uta, pe lua selau o kupita; ua toso mai le upega, ua i ai i‘a. Ua latou tūta, ona iloa lea o le afi malala, o le i‘a foi ua tunu ai, ma le areto. Ua fetalai atu Iesu ia te i latou, Au mai ia nisi i‘a ua outou maua nei. Ona alu ane lea o Simona Peteru, ma toso mai le upega i uta, ua tumu i i‘a tetele; e lau selau, ma le lau lima, ma le tolugalau; e ui lava ina tele o i‘a, a e lei masae lava le upega.

A e maua e outou le mana, pe a afio ifo le Agaga Paia i luga ia te outou; e fai foi outou ma molimau ia te au i Ierusalema ma Iutaia uma lava, ma Samaria, e oo lava i le tulu‘iga o le lalolagi.

E iu foi ina faaolaina o i latou uma lava o e valaau atu i le suafa o le Alii.

Ona fai atu lea o Peteru ia te i latou, Ina salamo ia, ma ia taitasi ma papatisoina outou uma i le suafa o Iesu Keriso, mo le faamagaloina o agasala; ona maua lea e outou o le mea foai fua mai, o le Agaga Paia lea. Auā o ia te outou ma a outou fanau le mea ua folafolaina mai, atoa ma e o mamao uma lava, o i latou uma e valaauina e le Alii lo tatou Atua. O isi upu foi e tele na ia molitino atu ma apoapoai atu ai, ua faapea atu, Ia faaolaina outou ai lenei tupulaga faapiopio.

Ona papatisoina lea o e na talia lana upu ma le fiafia; o lea aso foi ua faaopoopoina ai pe tolu afe o tagata.

ua latou vivii atu i le Atua, ma ua alofaina e le nuu uma lava. Ua faaopoopoina i le ekalesia e le Alii i aso fai soo o e ua faaolaina.

O lenei, ina salamo ia outou ma outou liliu, ina ia sōloiesea a outou agasala, ina ia oo mai ai o tausaga e filemu ai mai luma o le Alii; ina ia auina mai foi e ia le na muai tala‘iina ia te outou, o Iesu Keriso lea; e tatau ona nofo o ia i le lagi seia oo i tausaga e toe fuatai ai mea uma lava, ua fetalaia mai e le Atua i fofoga o ana perofeta paia uma lava talu mai anamuā.

E toatele o e na faalogologo i le upu ua talitonu i latou; o le tau aofai foi o tagata po ua lima gaafe.

E leai foi se tasi ua i ai le ola; e leai lava se isi igoa i lalo o le lagi ua foaiina mai i tagata e mafaia ona faaolaina ai o i tatou.

Ua vaai i latou i le faamalosi o Peteru ma Ioane, ma ua iloa o tagata e lei a‘oa‘oina i laua ma le valelea, ua latou ofo ai; ua latou iloa foi o i laua sa latou faatasi ma Iesu.

Ua aami atu ia te i laua, ona vavao lea ia te i laua, aua lava ne‘i tautala atu pe a‘oa‘o atu i le igoa o Iesu. A ua tali atu Peteru ma Ioane, ua faapea atu ia te i latou, Pe tonu i luma o le Atua, ona ma faalogo ia te outou, a e ma te le faalogo i le Atua, ina filifili ia outou. Auā ma te le mafaia ona le tautala i mea ua ma vaai i ai ma faalogo i ai.

O lenei, le Alii e, ia e silasila i lo latou faamatau mai; ma ia e foai mai i au auauna, ina ia latou matuā tautala i lau afioga ma le faamalosi, i le faaloaloa mai o lou aao e faamalolo ai, ina ia faia foi o faailoga ma vavega i le suafa o lau Auauna paia o Iesu. Ua mavae atu la latou tatalo, ona luluina lea o le mea ua faapotopoto ai i latou; ua tutumu foi i latou uma i le Agaga Paia, ma ua tautala atu i le afioga a le Atua ma le faamalosi.

Ua molitino atu e le au aposetolo ma le mana tele i le toe tu mai o le Alii o Iesu; ua alofateleina foi i latou uma.

Ua latou ta‘ita‘i mai ia te i latou, ona tuu atu ai lea i luma o le fono; ona fesili mai lea o le faitaulaga sili ia te i latou, ua faapea mai, Pe na matou le matuā fai atu ea ia te outou ia soia le toe a‘oa‘o i lena igoa? faauta foi, ua outou faatumu i Ierusalema i la outou mataupu, ma outou fia faaoo mai i luga ia i matou le toto o lena tagata. Ona tali atu lea o Peteru ma le au aposetolo ua faapea atu, E tusa ona sili o lo matou anaana i le Atua i lo matou anaana i tagata.

Ua usiusitai i latou ia te ia; ua aami foi le au aposetolo, ua sasa ia te i latou, ma fai atu, ia soia le tautala i le igoa o Iesu; ona tuuina atu lea ia te i latou e ō. Ona ō lea o i latou nai luma o le fono, ua olioli ina ua ta‘uaogaina i latou ia faaleagaina ona o lona suafa. Ua le mapu foi i latou i aso uma ona a‘oa‘o atu, ma tala‘i atu i le malumalu, ma lea fale ma lea fale le tala lelei ia Iesu Keriso.

Ua o solo foi e na faasalalauina, ma latou folafola atu le tala lelei o le upu. Ua alu ifo foi Filipo i le aai o Samaria, ua tala‘i atu Keriso ia te i latou.

Ua talitonu i latou ia Filipo o folafola le tala lelei i mea a le malo o le Atua, ma le suafa o Iesu Keriso, ona papatisoina lea o i latou, o tane atoa ma fafine.

Ua uma foi lo laua molitino ma tautala atu i le afioga a le Alii, ona la toe foi atu lea i Ierusalema, ua folafola le tala lelei i aai e tele o Samaria.

Ona tautala atu lea o Filipo, ua afua i lea lava Tusi ona folafola ia te ia o le tala lelei ia Iesu. Ua o ane foi i laua i le ala, ua oo i le tasi vai; ona fai mai lea o le eunuka, Faauta, o le vai; se a ea se mea e vaoia ai a‘u e aua le papatisoina o a‘u? Ua fai atu e Filipo, Afai ua e talitonu ma le loto atoa, e mafai ai lava. Ua tali mai o ia, ua faapea mai, Ou te talitonu o Iesu Keriso o le Alo o le Atua ia. Ona fai atu lea o ia ia faapau mai le nofoa faataavalevale; ona o ifo lea o i laua uma i le vai, o Filipo ma le eunuka; ua na papatiso foi ia te ia.

A ua iloa Filipo i Asota; ua alu foi o ia, ma folafola solo le tala lelei i aai uma lava, ua oo lava ia i Kaisareia.

A ua ave e Panapa ia te ia, ma ta‘ita‘iina atu i le au aposetolo, ua na tala atu foi ia te i latou i lona iloa o le Alii i le ala, ma lona fetalai mai ia te ia, ma lana tautala faamalosi i le suafa o Iesu i Tamaseko. Sa feoai foi o ia ma i latou i Ierusalema, ma tautala faamalosi i le suafa o le Alii o Iesu; ua tautala foi o ia, ma fefinauai ma le au Elenisi; a ua latou taumafaia e fasioti ia te ia.

Ua outou iloa le upu na molia e ia i le fanauga a Isaraelu, ua folafola ai le tala lelei o le manuia ia Iesu Keriso, o le Alii ia o tagata uma lava; o le upu lea sa i Iutaia uma, na afua i Kalilaia, ina ua mavae o le papatisoga sa tala‘iina e Ioane;

Ua na poloai mai foi ia te i matou e tala‘i atu i le nuu, ma molitino atu, o ia lava le ua tofia e le Atua e fai ma faamasino i e o ola ma e ua oti. Ua molitinoina mai o ia e le au perofeta uma, ona o lona suafa e maua ai le faamagalo o agasala a ē faatuatua ia te ia uma lava. Ua tautala atu Peteru i nei upu, a e afio ifo le Agaga Paia ia te i latou uma lava o e ua faalogo i le upu.

Ua faalogo e le au aposetolo ma le au uso o i Iutaia, ua talia e nuu ese le afioga a le Atua.

Ua na tala mai ia te i matou i lona iloa atu i le agelu na tu mai i lona fale, ma fai atu ia te ia, Ina aau atu ia ni tagata i Iopa, e aami ia Simona e igoa ia Peteru; na te fai mai upu ia te oe, e faaolaina ai oe atoa ma lou aiga uma lava.

Ua latou faalogo mai i ia upu, ona latou faalologo lea, ua vivii atu foi i le Atua, ua faapea ane, E moni, ua foai atu e le Atua i nuu ese le salamo e ola ai.

O tagata Kuperu ma Kurene foi nisi o i latou, ua oo foi i latou i Anetioka; ua tautala i tagata Elenisi, ma folafola atu le tala lelei i le Alii o Iesu. Sa ia te i latou le aao o le Alii; ua talitonu foi le vao tagata e toatele, ma liliu mai i le Alii.

ina ua muai tala‘i e Ioane, a o lei maliu mai o ia, i le papatisoga o le salamo i le nuu o Isaraelu uma lava.

Ua ma folafola atu foi le tala lelei ia te outou i le mea na folafolaina atu i o outou tamā;

Ua oo i le sapati ona tāli o uma mai lea o le nuu e faalogo i le afioga a le Atua.

Ona faamalosi atu lea o Paulo ma Panapa, ua faapea atu, Ua tatau lava ona ua muai folafolaina atu le afioga a le Atua ia te outou; a ua outou tetee mai ai, ma ua ta‘uleaogaina outou e outou i le ola e faavavau, faauta, o le mea lea ma te liliu atu ai i tagata o nuu ese. Auā ua faapea ona poloai mai o le Alii ia te i matou, Ua ou tofia oe e fai ma malamalama o nuu ese, ina ia avea oe ma faaolataga e oo i le tulu‘iga o le lalolagi.

Ua faalogo tagata o nuu ese, ona olioli ai lea, ma vivii atu i le afioga a le Alii; ua faatuatua foi i latou uma lava e ua saunia i le ola e faavavau. Ua logo atu foi le afioga a le Alii i lea nuu uma lava.

A ua faalalo ane e Iutaia i fafine e matatau i le Atua, ma sa‘o tamaitai, ma sa‘o alii o le aai, ma latou faatupu le sauaga ia Paulo ma Panapa, ma tutuli atu ia te i laua i lo latou tuaoi. A ua tūtū atu e i lana le eleele nai o laua vae ia te i latou, ona o atu ai lea o i laua i Ikonio.

Sa i Ikonio i laua, ua ulufale faatasi i le sunako o tagata Iutaia, o upu foi na la lauga a‘i, ua faatuatua ai Iutaia ma Eleni e toatele lava. A e peitai o Iutaia le faalogo, ua latou faaoso atu ma faaita atu i loto o tagata o nuu ese i le au uso.

O le mea lea ua nonofo loa ai i laua, ma tautala faamalosi atu i le afioga a le Alii, ua molimau mai o ia i le upu o lona alofa tunoa, ma ua foai ia faia faailoga ma vavega i o laua lima.

Alii e, se a le mea ua outou fai ai na mea? O tagata lava i maua nei e tutusa ma outou, ua ma folafola atu le tala lelei ia te outou, ia outou lafoai nei mea le aoga, ma liliu mai i le Atua soifua, o le na faia le lagi, ma le lalolagi, ma le sami, ma mea uma lava o i ai;

Ua uma foi ona la folafola le tala lelei i lea aai, e toatele ua fai ai ma soo, ona la toe foi lea i Lusa, ma Ikonio, ma Anetioka, ua faamalosi i loto o le au soo, ma apoapoai atu ia tumau i le faatuatua; ua faapea atu foi, O puapuaga e tele e tatau ona tatou sao atu ai i le malo o le Atua.

Ua tele le fefinauai, ona tu lea o Peteru i luga, ua faapea atu ia te i latou, Le au uso e, ua outou iloa ua leva ona filifili e le Atua so tatou, ia logona mai e tagata o nuu ese le upu o le tala lelei i lo‘u nei gutu, ma latou talitonu i ai.

Ua mavae ona latou ui ane i Ferukia ma le nuu o Kalatia, a ua vaoia e le Agaga Paia aua latou te tautala i le upu i Asia; ua oo foi i latou i Musia, ona taumafai ai lea e i latou ona o atu i Pitunia; a ua le mafai le Agaga ona latou o. Ona ui faatafatafa ane lea o i latou i Musia, ua oo ifo i Teroa. Ua iloa foi e Paulo le faaaliga i le po; o le tasi tagata Maketonia ua tu mai, ma aioi mai ia te ia, ua faapea mai, Sau ia i Maketonia, ma fesoasoani mai ia te i matou. Ua iloa e ia le faaaliga, ona sauni loa lea o i matou e o atu i Maketonia, ua manatu lava i matou, ua valaauina i matou e le Alii e folafola atu le tala lelei ia te i latou.

Ona fai atu lea o ia e au mai ni afi, ona oso mai lea o ia, ma faapaū i luma o Paulo ma Sila ma le gatete. Ua na aumaia foi i laua i fafo, ua faapea mai, Alii e, se a le mea e tatau ona ou faia ou te ola ai? Ua fai atu i laua, Ina faatuatua ia i le Alii o Iesu Keriso, e ola ai oe atoa ma lou aiga.

Ua ulufale foi Paulo ia te i latou, o lana lea masani, e tolu foi sapati ua lauga atu o ia ia te i latou i Tusi, ua faamatala ma faasino atu, na tatau ona tiga o le Keriso, ma toe tu mai i e ua oti; ma ua faapea atu, O Iesu lenei ou te folafola atu ai ia te outou, o le Keriso ia. Ua talitonu mai foi nisi o i latou, ma ua faaopoopoina i latou ia Paulo ma Sila; o Eleni foi o e matatau i le Atua e toatele lava, ma sa‘o tamaitai e toatele foi.

Ua sili ona amio lelei o i latou nei i tagata Tesalonia; auā ua latou talia le upu ma le fiafia tele, ua saili i Tusi i lea aso ma lea aso, pe moni ia mea.

Ona tu atu ai lea o Paulo i Areopako, ua faapea atu o ia, O outou Atenai e, ua ou iloa i mea uma lava ua sili la outou tapuai i atua. Auā na ou ui ane, ma ou matamata i a outou mea paia, ona ou iloa atu lea o le fata ua tusi i ai, MO LE ATUA E LE ILOA. O lenei, o ia ua outou tapuai i ai ma le le iloa, ou te faailoa atu ai ia te outou. O le Atua na faia le lalolagi ma mea uma lava o i ai, ona o le Alii o ia o le lagi ma le lalolagi, e le afio o ia i malumalu e faia e lima; e le o lima o tagata e auauna ai ia te ia, peiseai ua mativa o ia i se mea e tasi; o loo foai mai e ia le ola, ma le mānava, ma mea uma lava i le vao mea atoa; ua faia foi e ia nuu uma o tagata i le toto e tasi, ia nonofo i le fogaeleele uma lava, ua na tuu foi tausaga na tofia anamua, ma tuaoi o mea latou te nonofo ai; ina ia latou saili i le Alii, pe mafai ona latou tautāgotago ma latou iloa o ia; a e peitai e le mamao o ia ma i tatou taitoatasi. Auā o ia o loo ola ai i tatou, ma gaoioi ai, o loo i ai foi i tatou talu o ia; pei ona fai mai foi e isi o outou fatu pese, Auā o lana fanau i tatou. O lenei, ona o le fanau a le Atua i tatou, e le tatau ona tatou manatu ua tusa le Atua i se auro, po o se ario, po o se maa, ua talaiia i le faiva ma le fuafua o le tagata. Na faapalepale le Atua i ona po o le vālea; a o loo fetalai mai nei i tagata uma i nuu uma lava ia salamo; auā ua faatuina e ia le aso e faamasinoina ai le lalolagi ma le tonu, e le tagata ua tofia e ia; o loo faamaoni mai ai e ia i tagata uma lava i lona toe faatu mai ia te ia i e ua oti.

Ua sau foi i Efeso le tasi tagata Iutaia, o Apolo le igoa, o Alesania na fanau ai, o le tagata mau upu, ma le poto i Tusi. Ua a‘oa‘oina lenei tagata i le ala o le Ali; ua malosi foi lona loto, ua tautala atu o ia ma matuā a‘oa‘o atu i upu a le Alii, na o le papatisoga a Ioane ua iloa e ia. Ua afua foi ona tautala faamalosi o ia i le sunako; ua faalogo atu Akula ma Pisila ia te ia, ona la ave lea ia te ia, ma faamatala atu atili le ala o le Atua ia te ia.

Ua ulufale foi o ia i le sunako, ma lauga faamalosi atu, ma tautalatala, ma faaoleole ia i latou i mea a le malo o le Atua, i masina e tolu. A ua loto fatu nisi, ma ua le talitonu, o upu leaga mai i lenei lotu i luma o le toatele; ona alu ese lea o ia ia te i latou, ma ua vavae ese le au soo, ua tautalatala o ia i lea aso ma lea aso i le fale a‘oga o le tasi tagata e igoa ia Turano. E lua tausaga na faia lenei mea; o lea na faalogo ai i le afioga a le Alii o Iesu o i latou uma lava e ua nonofo i Asia, o Iutaia atoa ma Eleni.

ma lo‘u lei natia se mea aoga, ina ne‘i le faailoa atu ma a‘oa‘o atu ia te outou i luma o le nuu, atoa foi ma lea fale ma lea fale, ua ou molitino ia Iutaia atoa ma Eleni le salamo i le Atua, ma le faatuatua i lo tatou Alii o Iesu Keriso. Faauta foi, ou te alu nei, ua tinoū le loto, i Ierusalema, ou te le iloa se mea e oo mai ia te au i lea mea; na o lenei, o loo molitino mai e le Agaga Paia i lea aai ma lea aai, o loo faapea mai, ua faatali mai noanoaga ma puapuaga ia te au. A e ou te le manatua se tasi mea, o lo‘u lava ola foi ou te le naunau i ai, se‘i ou faauma lo‘u momo‘e ma le olioli, atoa ma le faiva ua ou maua mai le Alii o Iesu, ou te molitino atu le tala lelei o le alofa tunoa o le Atua.

Auā e fai oe māna molimau i tagata uma lava i ia mea na e vaaia ma e faalogo i ai.

Ua oo i le po, ona tu mai ai lea o le Alii ia te ia, ua faapea mai, Paulo e, ina faalototele ia oe; auā e pei ona e molitino i mea ia te au i Ierusalema, e tusa foi ona faapea ona e molimau i Roma.

A e tulai ia i luga o ou vae; auā o le mea lea ua faaali ai a‘u ia te oe, ia tofia oe e fai ma auauna ma molimau i mea ua e vaaia, atoa ma mea e toe faaali ai a‘u ia te oe;

e faapupula i o latou mata, ia liliu mai mai le pouliuli i le malamalama, mai le pule foi a Satani ia liliu i le Atua; latou te maua ai le faamagaloina o agasala, ma le tofi faatasi ma i latou ua faapaiaina i le faatuatua ia te au.

O lea foi na maua ai e a‘u le fesoasoani mai le Atua, ou te tumau ai ua oo i lenei aso, o loo molimau i tagatānuu ma alii, ou te le fai atu se tasi mea na o ia mea ua ta‘u mai e le au perofeta ma Mose o le a taunuu; e tiga le Keriso, e muai toe tu mai foi o ia i e ua oti, ma folafola e ia le malamalama i le nuu nei atoa ma nuu ese.

Ua nofo foi Paulo i tausaga atoa e lua i lona fale e totogi, ua na talia uma lava e na ulufale ia te ia, ua tala‘i le malo o le Atua, ma a‘oa‘o atu i mea a le Alii o Iesu Keriso ma le faamalosi lava, e lei vaoia.

E muamua ona ou faafetai atu i lo‘u Atua ia Iesu Keriso, ona o outou uma, ina ua ta‘ua lo outou faatuatua i le lalolagi uma lava.

Ua ia te au mea a Eleni atoa ma nuu ese, o e popoto atoa ma e valelea; o le mea lea ou te naunau ai, ia ou folafola le tala lelei ia te outou foi o i Roma. Auā ou te le mā i le tala lelei ia Keriso; auā o le mana lava lea o le Atua e ola ai i latou uma o e faatuatua, e muamua le Iutaia, atoa ma le Eleni.

a ua faaalitinoina mai e le Atua lona lava alofa ia te i tatou, ina ua maliu Keriso ma sui o i tatou, a o tatou agasala pea.

Auā o le oti, o le totogi lea o le agasala; a o le ola e faavavau, o le mea foaifuaina mai lea e le Atua, i lo tatou Alii o Keriso Iesu.

afai e te ta‘utino i lou gutu i le Alii o Iesu, ma talitonu i lou loto ua toe faatuina mai o ia e le Atua nai e ua oti, e faaolaina ai oe; auā o le loto e talitonu ai, e oo mai ai le amiotonu; a o le gutu e ta‘utino ai, e oo mai ai le ola. Auā ua faapea mai le Tusi, E le mā se tasi e faatuatua ia te ia. Auā e le eseese le Iutaia ma le Eleni; auā o le Alii e toatasi o tagata uma e faulai lona alofa ia te i latou uma lava o e valaau atu ia te ia; auā e faaolaina i latou uma o e valaau i le suafa o le Alii.

O lenei, pe faapefea ona latou valaau atu i le ua latou le faatuatua i ai? pe faapefea foi ona latou faatuatua i le ua latou le faalogo atu i ai? pe faapefea foi ona latou faalogo atu, pe a leai se tala‘i atu? pe faapefea foi ona latou tala‘i atu, pe afai ua le aauina atu i latou? Pei ona tusia, E matagofie naua o latou vae o e au mai le tala lelei i le manuia, o e au mai le tala i mea lelei.

A e lei usiusitai i latou uma lava i le tala lelei; auā ua faapea mai Isaia, Le Alii e, o ai ea ua talitonu i la matou upu e taulogologo atu?

O lenei, e tupu le faatuatua i le taulogologo atu, o le taulogologo atu foi o i le afioga a le Atua lea. A e ou te fai atu, Ua latou le faalogo mai ea? E moni, ua oo lo latou leo i le lalolagi uma lava, o a latou upu foi i tuluiga o le atu laulau.

i le mana o faailoga ma vavega, i le mana o le Agaga o le Atua; o lea e afua mai ai i Ierusalema, ma faataamilomilo e oo i Iluriko, ua ou matuā folafola le tala lelei a Keriso.

Ia viia le na te mafaia ona faatumau ia te outou, e tusa ma la‘u tala lelei, ma le tala‘iga o le tala ia Iesu Keriso, e tusa ma le faaaliga o le mea lilo sa natia i tausaga o le vavau; a ua faaali mai nei i tusi a perofeta, e tusa ma le poloaiga a le Atua e faavavau, o loo ua faailoa mai i nuu uma, ia iu ina usiusitai i le faatuatua;

Auā e lei auina mai a‘u e Keriso e papatiso, a ia folafola atu le tala lelei, e le o le poto i upu, ina ne‘i faaleaogaina le satauro o Keriso. Auā o le mataupu i le satauro, o le valea lea i e o malaia; a o le mana o le Atua ia te i tatou ua faaolaina. Auā ua tusia, Ou te faaumatia le poto o e popoto, ma ou faaleaogaina le atamai o e atamamai.

Auā o le poto o le Atua, ina ua le iloa le Atua e le lalolagi i lo latou poto, ua finagalo ai le Atua ia faaolaina i le valea o le tala‘iga e ua faatuatua. Auā o loo fai mai Iutaia i se faailoga, ma Eleni o loo saili i latou i le poto; a o i matou, ua matou tala‘i atu ia Keriso na faasatauroina, o le mea e tausuai ai Iutaia, ma le valea ia Eleni; a e peitai o e ua valaauina, o Iutaia atoa ma Eleni, ua fai Keriso ma mana o le Atua, ma poto o le Atua ia te i latou. Auā o le valea o le Atua e sili lona poto i tagata; o le vaivai foi o le Atua e sili lona malosi i tagata.

O a‘u nei foi, le au uso e, ou te lei alu atu ma le sili o le upu ma le poto, ina ua ou alu atu ia te outou i lo‘u tala‘i atu ia te outou le mau a le Atua. Auā na tonu lo‘u manatu, ou te le iloa se tasi mea ia te outou tau lava o Iesu Keriso, o ia lava na faasatauroina. Na ou i ai foi ia te outou ma le vaivai, ma le mata‘u, ma le gatete tele; e lei sauni atu foi la‘u upu, ma la‘u tala‘iga i upu mālie o le poto o tagata, a e peitai o le faasino mai e le Agaga ma le mana; ina ia le i ai lo outou faatuatua i le poto o tagata, a o le mana o le Atua.

A e matou te tautala atu i le poto i e ua uma ona a‘oa‘oina; a e le o le poto o lenei lalolagi po o le poto o alii o lenei lalolagi ua faaleaogaina; a e peitai matou te tautala atu i le poto o le Atua i le upu lilo sa natia, na tofia e le Atua anamuā anamuā lava, ina ia tatou manuia ai; o le mea na le iloa e se alii e tasi o lenei lalolagi; auā ana latou iloa, po ua latou le faasatauroina le Alii e ona le manuia. A e pei ona tusia, O mea e lei vaaia e mata, e lei lagona foi e taliga, e lei oo foi i le loto o se tagata, o mea ia ua saunia e le Atua mo i latou o e alofa ia te ia.

A ua faaalia mai ia mea e le Atua ia te i matou e lona Agaga; auā e suesue ifo le Agaga i mea uma, o mea loloto foi a le Atua. Po o ai foi se tagata ua iloa mea a le tagata, ua na o le agaga o le tagata o loo i totonu ia te ia? E faapea foi ona le iloa e se tasi mea a le Atua, ua na o le Agaga o le Atua. A ua maua e i matou e le o le agaga o lenei lalolagi, a o le agaga mai le Atua, ina ia matou iloa mea ua foaifuaina mai e le Atua ia te i matou. O ia mea foi matou te tautala atu ai i upu e a‘oa‘oina mai e le Agaga Paia, a e le o upu e a‘oa‘oina ai i le poto o tagata, o loo faamatalaina mea faaleagaga i upu faaleagaga.

A e le talia e le tagata faaletino o mea a le Agaga o le Atua; auā o mea valea ia ia te ia, na te le mafai foi ona iloa, auā e faamasinoina faaleagaga. A o le tagata faaleagaga e faamasino e ia i mea uma, a e le faamasinoina o ia e se tasi. Auā po o ai ua na iloa le finagalo o le Alii na te a‘oa‘oina atu o ia? A ua tatou maua le finagalo o Keriso.

O a‘u foi, le au uso e, na ou le mafaia ona tautala atu ia te outou faapei o e faaleagaga, a e peitai pei o e faaletino, pei o tama meamea ia Keriso. Na ou fafaga ia te outou i le suāsusu, a e le o mea aano; auā na outou le lavā i ona po ia, i le tou te le lavā foi ua oo mai i ona po nei; auā ua faaletino pea outou;

Na ou totōina, na faasūsūina e Apolo; a e peitai o le Atua ua faatupuina. O lenei, e le o lē totō, e le o lē faasūsū; a e peitai o le Atua o le na te faatupuina. A o lē totō foi ma lē faasūsū, e tasi lava i laua; a e taitasi ma lona lava taui e maua, e tusa ma lana lava galuega. Auā o le au faigaluega i matou faatasi ma le Atua; o outou o le faatoaga a le Atua o outou o le fale o fai o le Atua.

E tusa ma le alofa o le Atua na foaiina mai ia te au, pei o se autu o tufuga e poto, na ou tuu le faavae, o le tasi foi o loo ati ae; a ia taitoatasi ma faaeteete pe faapefea ona ati ae. Auā e le mafaia e se tasi ona tuu se isi faavae i le ua uma ona tuuina, o Iesu le Keriso lea. A e afai e ati ae e se tasi i lenei faavae o auro, o ario, o maa tāua; o laau, o vaofalī, po o tagutugutu o saito; e faaalia galuega a tagata taitoatasi; e faailoa foi e le aso, auā e faaalia i le afi; e tofotofoina foi galuega a tagata taitoatasi i le afi po ua faapefea. Afai e tumau le galuega a se tasi na ia ati ae, e maua e ia le taui. Afai e faamuina le galuega a se tasi, e māumau ana mea; peitai ane e sao o ia, a e pei o se na ui mai i le afi.

Auā afai ou te folafola le tala lelei, e le se mea lea ou te mitamita ai, auā ua leai sa‘u faitalia i lea mea; oi talofa foi ia te au, pe a ou le folafolaina le tala lelei.

Aua afai ou te faia lenei mea ma le loto, ua ia te au le taui; peitai ane, a ou le faia ma le loto, ua tuuina mai ia te au e fai ma auauna tausi mea. O lenei, se a ea lo‘u taui? O lenei, pe a ou folafolaina atu le tala lelei, ia ou avatu le tala lelei a Keriso ma le le tauia mai; ina ia ou le faia la‘u pule i le tala lelei.

Auā e ui ina ou sa‘oloto mai tagata uma, ua faapologaina a‘u e a‘u mo tagata uma, ina ia atili ai ona toatele ou te maua. Sa ou faapei o se Iutaia ia Iutaia, ina ia ou maua ni Iutaia; ua ou faapei o sē nofo i le tulafono i e nonofo i le tulafono, ina ia ou maua ni e nonofo i le tulafono; ua ou faapei o sē le nofo i le tulafono i e ua le nofo i le tulafono, (e le ona ua ou le nofo i le tulafono i le Atua, a ua ou nofo i le tulafono ia Keriso,) ina ia ou maua ni e ua le nofo i le tulafono. Ua ou faapei o sē vaivai i e ua vaivai, ina ia ou maua e ua vaivai; ua avea a‘u ma mea uma mo tagata uma, ina ia iu lava ina ola nisi ia te au.

Afai foi o ia te au ona perofeta ane, ma le iloa o mea lilo uma, ma le poto uma lava; afai foi o ia te au le faatuatua uma e ave ese ai mauga, a e leai so‘u alofa, ou te le aoga lava. Afai foi ou te tufatufaina a‘u mea uma e fagaina a‘i e matitiva; afai foi ou te tuuina atu lo‘u tino ina ia susunuina, a e leai so‘u alofa, e leai lava sona aoga ia te au.

Le au uso e, ou te faailoa atu ia te outou le tala lelei na ou folafolaina atu ia te outou, na outou talia foi, o loo tumau i ai foi outou, ua ola ai foi outou; pe afai tou te taofi mau i le mataupu na folafolaina e a‘u ia te outou; pe afai ua outou le talia fua.

A o le alofa tunoa o le Atua ua ou faapenei ai a‘u; o lona alofa tunoa foi o ia te au, e le faaleaogaina lea, a ua sili la‘u galuega i a latou uma; a e peitai e le o a‘u, a o le alofa tunoa o le Atua ua ia te au. O lenei, po o a‘u, po o i latou, e faapea ona matou tala‘iina atu, sa faapea foi ona outou talitonu.

O oe na le valea; o le mea e luluina e oe e le ola lea pe afai e le pala. O le mea foi e te lulu, ua e le luluina le tino e tupu ai; a o le fua lava, atonu se saito, po o se tasi o ia mea.

Ua faafetai i le Atua, o le ua matou manumalo ai pea lava ona o Keriso, o le ua matou faaali atu ai foi i nuu uma le manogi o le mataupu ia te ia. Auā o le nanamu i matou ia Keriso i le Atua i e o faaolaina, atoa ma e o malaia; o le manogi o le oti e oo i le oti i nisi; a o le manogi o le ola e oo i le ola i nisi. Po o ai foi sē tusa ma nei mea?

Auā o i matou nei, e le pei o le toatele o e o faafilogia le afioga a le Atua; a ua matou tautalatala atu mai le loto lelei, mai le Atua foi, o i luma o le Atua, o i matou ua ia Keriso.

A e afai sa faapea le mamalu o le sauniga na oo mai ai le oti, na togia ai i mataitusi i maa, ua le mafai ai le fanauga a Isaraelu ona pulatoa atu i fofoga o Mose ona o le pupula o ona fofoga, o le pupula lea faaumatia; e le matuā sili ea le mamalu o le sauniga ua oo mai ai le Agaga? Auā afai sa mamalu le sauniga na oo mai ai le faasala, e matuā sili lava ona mamalu o le sauniga ua oo mai ai le amiotonu. Auā foi o le mea na mamalu e leai sona mamalu i lenei mea, ona o le mamalu e silisili ese. Afai foi sa mamalu le mea e faaumatia, e matuā sili le mamalu o le mea e tumau.

O lenei, ona ua ia te i matou o lenei faamoemoe, matou te matuā faaalitino;

O mea uma foi mai le Atua ia, ua uma ona faaleleia e ia o i tatou ia te ia talu Iesu Keriso, ua tuuina mai foi ia te i matou le galuega o le leleiga. O lenei, sa ia Keriso le Atua, ua faaleleia e ia le lalolagi ia te ia, ua le ta‘ua a latou agasala ia te i latou; ua ia tuuina mai foi ia te i matou le upu o le leleiga.

O lenei, o sāvali i matou a Keriso, peiseai ua aioi mai le Atua ia te outou e i matou; matou te ole atu, o sui i matou o Keriso, ia outou lelei ma le Atua.

(Auā ua faapea mai o ia, O le tausaga e talia ai na ou faalogo ai ia te oe, o le aso foi e faaolaina ai na ou fesoasoani ai ia te oe. Faauta, o lenei le tausaga e talileleia mai ai; faauta, o lenei le aso e faaolaina ai.)

Ua matou le tuuina atu se mea e tasi e tausuai ai, ina ne‘i ta‘uleagaina le galuega;

Auā o le tiga e tusa i le Atua e tupu ai le salamo e oo i le ola e le toe salamo ai; a o le tiga faalelalolagi e tupu ai le oti.

A o la‘u lenei e fai atu, o le ua itiiti ana saito e lulu, e itiiti foi ana e selesele mai; a o le ua tele ana e lulu, e tele foi ana e selesele mai.

O lenei, o le ua foai tele mai saito i le ua lulu ai, ma le mea e ‘ai e ‘ai ai, ia foai mai e ia, ma ia faateleina la outou fua, ma faatupu e ia le fua o la outou amiotonu;

matou te folafola atu ai le tala lelei i nuu i tala atu o outou, o loo le mitamita i le matāgaluega a le tasi tagata ua uma ona saunia.

Ua ou faia ea se agasala, ina ua faamaulaloina a‘i e a‘u, ina ia faamaualulugaina outou, auā na ou tala‘iina atu ia te outou le tala lelei a le Atua ma le le tauia mai?

A e peitai e ui lava ina tala‘iina e i matou, po o se agelu mai le lagi, ia te outou se tala lelei e ese i lea na tala‘iina atu ai e i matou ia te outou, ia anatema ia. Pei ona matou muai fai atu, ou te toe fai atu ai nei foi, Afai e tala‘iina atu e se isi ia te outou se tala lelei e ese i lea na outou talia, ia anatema ia.

Auā, ou te faaaviavi ea i ona po nei i tagata, po o le Atua; Ou te saili ea ina ia ou faafiafia i tagata? Auā afai ana ou faafiafia pea i tagata, po ua le fai a‘u ma auauna a Keriso. Le au uso e, ou te faailoa atu ia te outou, e le faatatauina i tagata le tala lelei sa tala‘iina atu e a‘u;

Ua faasatauroina faatasi i maua ma Keriso; a e ou te le toe ola a‘u, a o Keriso o loo ola i totonu ia te au; o le ola foi ou te ola ai nei i le tino, ou te ola ai lava i le faatuatua i le Alo o le Atua, o le na alofa mai ia te au, ma foaiina mai o ia e ia e fai mo‘u sui.

Aua ne‘i faaseseina outou, e le ulagia le Atua auā o le mea e luluina e le tagata, o le mea lava lea e seleseleina mai ai e ia; o sē lulu i la lona tino, e selesele mai ai e ia i la le tino le mea e pala; a o sē lulu i la le Agaga, e selesele mai ai e ia i la le Agaga le ola faavavau.

Na maliu mai foi o ia, e folafola mai le tala lelei o le leleiga ia te outou sa vava mamao, atoa ma e ua latalata.

Na ia tuuina mai foi nisi e fai ma aposetolo, o isi foi e fai ma perofeta, o isi foi e folafola le tala lelei, o isi foi e fai ma leoleo atoa ma a‘oa‘o; ina ia faaatoatoaina ai le au paia, latou te fai ai le galuega a auauna, ia atiina ae ai le tino o Keriso; seia tatou oo atu o i tatou uma lava ma le loto gatasi i le faatuatua ma le iloa lelei o le Alo o le Atua, ina ia fai ma tagata matua ia oo i le fua o le ua matua, e tatau ma le tumu o Keriso; ina ia le toe tama ninii i tatou o loo felafoaiina e pei o peau, ma feaveaiina i matagi uma lava o matāupu, i le pepelo o tagata, i togafiti leaga ua saunia e faasese ai.

ma ia savavali i le alofa, faapei o Keriso foi na ia alofa mai ia i tatou, ua na foai mai foi e ia ia te ia e sui a‘i i tatou, o le taulaga ma le togiola i le Atua o le mea manogi lea;

mo a‘u foi, ina ia tuuina mai le upu ia te au, ina ia ou faamalosi ona tautala atu ma faailoa atu le upu o le tala lelei sa lilo, o le upu lava lea ua noanoatia ai a‘u le sāvali, ina ia ou faamalosi ai ona tautala, pei ona tatau ona ou tautala atu ai.

O le toatele foi o le au uso o i le Alii o loo matuā faatuatua ona o lo‘u noanoataga; ua atili ai ona latou faamalosi e tautala i le upu ma le le mata‘u. O isi foi ua tala‘i ia Keriso ma le mataua lava, ma le finau vale, a o isi ua tala‘i i le loto lelei. O e tala‘i ia Keriso ma le finau vale, e le faia ma le faamaoni, o loo o manatunatu i latou e faaopoopo ai le puapuaga i lo‘u noanoataga; a o e tala‘i ma le alofa, ua iloa e i latou ua faatuina a‘u ina ia ou faatonu atu le tala lelei. O lenei, pe faapefea? e ui lava i togafiti uma, pe faatagā fai, pe fai ma le faamaoni, ua tala‘iina atu ai Keriso, o le mea lea ua ou olioli ai, e moni ou te olioli ai lava.

pe afai lava tou te tutumau i le faatuatua, o faavaeina, ma mausali, ma le le faateaeseina outou i le faamoemoe o i le tala lelei na outou faalogologo i ai, sa tala‘iina atu foi i tagata uma lava i le lalolagi; o a‘u o Paulo ua fai a‘u ma auauna i ai. Ou te olioli nei i mea ou te tiga ai ona o outou, ou te faaatoa foi i lo‘u tino o mea ua totoe i puapuaga o Keriso ona o lona tino, o le ekalesia lea; ua fai a‘u ma auauna i ai, e tusa ma le sauniga a le Atua, ua tuuina mai ai ia te au mo outou, ina ia matuā folafolaina le afioga a le Atua; o le upu lilo lea, sa natia talu mai i augātagata ma tupulaga ua mavae, a o ona po nei ua faaalia mai ai i ona tagata paia; na finagalo foi le Atua ona faailoa atu i ai le uiga o le silisili o le lelei o lenei upu lilo o i nuu ese, o Keriso lea o loo ia te outou o le faamoemoe i le manuia; o ia lava matou te tala‘iina atu, ma apoapoai atu i tagata uma, ma a‘oa‘o atu ai i tagata uma i le poto uma lava, ina ia tuuina atu e i matou o tagata uma ua atoatoa ona lelei ia Keriso Iesu;

auā ua outou iloa, e maua e outou mai le Alii o le taui, o le tofi lea; auā ua auauna outou i le Alii o Keriso.

Ina tatalo ia mo i matou foi, ina ia faaavanoa mai e le Atua se faitotoa o le upu mo i matou, e tautala atu ai i le upu ia Keriso sa lilo, ona o lea foi ua noanoatia ai a‘u, ina ia ou faailoa atu ai, faapei ona tatau ona ou tautala atu ai. Ia savavali ma le poto i e o i tua, ma faaaogaina e outou aso o lenei olaga. Ia le aunoa a outou upu ma le alofa, ia faamāi i le masima, ia iloa e outou ona fai faatatau se tali i tagata e taitoatasi uma.

Auā e lei oo atu la matou tala lelei ia te outou na o le upu, a o le mana, ma le Agaga Paia, atoa ma le mautinoa lava ina ua outou iloa la matou amio ona o outou, a o matou i ai ma outou; sa outou faaa‘oa‘o mai foi ia te i matou, atoa ma le Alii, ina ua outou talia le upu i le puapuaga tele, ma le olioli mai le Agaga Paia;

a e ui lava ina muamua ona tigaina o i matou, ma faaleagaina i Filipi, pei ona outou iloa ua matou faamalosi ona o lo tatou Atua e tautala atu ia te outou i le tala lelei a le Atua ma le finafinau tele lava. Auā o lo matou apoapoai atu ia te outou e lei faia lea ma le sese, po o le amio leaga, po o le faa‘ole‘ole. A e peitai, faapei ona tatau i le finagalo o le Atua na te tuuina mai ia te i matou le tala lelei, e faapea foi ona matou tautala atu ai; e le ina ia fiafia mai tagata, a o le Atua, o lē tofotofo mai i o matou loto. Auā matou te lei fai lava se upu e faaviivii atu ai, faapei ona outou iloa, pe faia se ufiufi o le manumanu; ua silafia e le Atua; e ui lava ina mafai ia te i matou ona ia mafatia ai outou, auā o aposetolo i matou a Keriso, a e matou te le saili le viiga mai tagata, po o outou po o isi tagata. A ua matou agamalu ina ua matou i ai ia te outou na, faapei o se failele na te tausi lelei i ana lava tama; sa faapea lava lo matou maelega i le alofa ia te outou, na matou manao i le fia avatu ia te outou e le na o le tala lelei i le Atua, a o matou lava ola foi, auā na alofaina outou e i matou. Auā le au uso e, ua outou mānatua la matou galuega mamafa ma le tiga; auā sa matou galulue ai i le po atoa ma le ao, ina ne‘i mafatia so outou, na matou tala‘i atu ai ia te outou le tala lelei a le Atua.

pe a afio mai o ia ina ia viia i ona lava tagata paia, ma ia ofo ia te ia i lena aso ia te i latou uma o e faatuatua, auā na outou talitonu mai lava i la matou mau.

ma le talitonu i le upu moni, na valaauina ai outou e ia i la matou tala lelei, ina ia maua le manuia o lo tatou Alii o Iesu Keriso. O le mea lea le au uso e, ia outou tumau ai, ma ia taofi mau i upu tuu na a‘oa‘oina ai outou i la matou upu ma la matou tusi.

Ia e tau le taua lelei i la le faatuatua, tago atu ia i le ola faavavau, na valaauina ai foi oe, ma ua e ta‘utino atu i le ta‘utinoga lelei i luma o molimau e toatele.

O lenei, aua e te mā i le molimau i lo tatou Alii, po o ona o a‘u o loo noanoatia ona o ia; a ia tiga faatasi i tatou ona o le tala lelei, e tusa ma le mana o le Atua, o le na faaola mai ia i tatou, ma valaau mai i le valaau paia, e le tusa ma a tatou galuega, a e tusa ma lona lava finagalo ma lona alofa tunoa na foaiina mai ia i tatou ia Keriso Iesu talu mai le vavau, a ua faailoa mai nei i le faaalia mai o lo tatou Faaola o Iesu Keriso, o le ua faaumatia lava le oti, a o le ola ma le le iu vale ua faamalamalamaina mai lea e ia i le tala lenei, ua tofia ai a‘u o lē tala‘i, ma le aposetolo, ma le a‘oa‘o i nuu ese. O le mea lea ua tigaina ai a‘u i ia mea; a ou te le mā lava, auā ua ou iloa o ia ua ou faatuatua i ai, ma a‘u mautinoa ua mafaia lava e ia ona leoleo i le mea na ou tuuina atu ai ia te ia e oo atu i lea lava aso.

O mea foi na e faalogologo mai ai ia te au i molimau e toatele, ia e tuuina atu ai i tagata faamaoni, o e ua mafaia ona a‘oa‘oina atu i nisi.

O le mea lea ou te onosai ai i mea uma ona o le au filifilia, ina ia maua e i latou lava le ola o loo ia Keriso Iesu ma le manuia e faavavau. O le upu moni lenei; auā pe afai tatou te oti faatasi ma ia, tatou te ola faatasi ai foi; pe afai tatou te onosai, e fai foi i tatou ma tupu faatasi ma ia; pe afai tatou te faafiti ia te ia, e faafiti foi o ia ia te i tatou;

Ia e faamanatu ia te i latou i ia mea, ma ta‘utino i luma o le Alii, aua ne‘i latou fefinauai i upu e leai se aoga, a e faaseseina ai o e faalogologo i ai. Ia e taumafai ina ia avea oe ma le ua fiafia mai i ai le Atua, o le faigaluega e leai se mea e mā ai, na te vavaetonuina le upu moni. A ia e taumamao ma upu leaga ma le le aoga; auā e tupu atili ai le amio faalematau,

ia e tala‘i atu le upu, ia e faamalosi i ona aso e taugalemu ai, ma ona aso e le taugalemu ai, ia e faatonu atu, ia e aoai atu, ia e apoapoai atu ma le onosai uma atoa ma le a‘oa‘o atu. Auā e oo i ona po latou te le mafafai ai ona talia o le mataupu e ola ai, a e tusa ma o latou lava tu‘inanau, latou te faapotopoto ai a‘oa‘o mo i latou, ina ua feū o latou taliga; latou te liliu ese foi o latou taliga i le upu moni, a e liliu atu i tala o le vavau. A o oe, ia e faautauta i mea uma lava, ia e onosai i mea e tiga ai, ia e fai le galuega a lē folafola le tala lelei, ia e matuā faaiuina lau faiva.

a e peita sa ia te au le Alii, ma na faamalosi mai ia te au; ina ia faaatoatoaina e a‘u le tala‘iga, ina ia faalogologo i ai o nuu uma lava; ua laveaiina foi a‘u ai le gutu o le leona.

Auā o le alofa tunoa o le Atua ua au mai ai le olataga, ua faaalia mai lea i tagata uma lava,

ina ia galue lava lou mafuta faatasi i le faatuatua, ina ia matuā iloa mea lelei uma o ia te outou ia Keriso Iesu. Auā lo‘u uso e, ua tele lo matou fiafia ma le mafanafana ona o lou alofa, ina ua faamafanafanaina le au paia ona o oe. O lenei, e ui lava ina ua ia te au le pule lava mai ia Keriso e poloai atu ai ia te oe i mea e tatau,

O lenei, ia tatou fefefe, ina ua tuuina mai pea o le upu ua folafola mai ia sao atu ai i lona malologa, ne‘i ai so outou e faaleoo atu i ai. Auā foi ua tala‘iina mai i tatou i le tala lelei e pei o i latou; a ua le aoga le upu na latou faalogologo i ai, ina ua le faatatauina ma le faatuatua i e na faalogologo i ai. Auā tatou te sao atu i le malologa, o i tatou o e ua faatuatua, pei ona fetalai mai o ia, Pei ona ou tauto i lo‘u ita, Latou te le sao atu lava i lo‘u malologa; o le malologa lava lea i le galuega na faia ina ua uma ona faavaeina o le lalolagi.

Auā o loo ola le afioga a le Atua, o loo matuā galue foi, o loo sili foi lona maai i pelu uma e faatau maai itu, o loo vaevae foi e oo lava i le vavaeeseina o le loto ma le agaga, o gaugātino foi ma aano o ivi, o loo faamasino foi i manatu ma filifiliga o le loto; e le lilo foi se tasi mea na faia i ona luma, a ua taatia fua ma ua aliali mai o mea uma lava i lana silafaga, tatou te ta‘u atu ia te ia a tatou amio.

O le mea lea aua le lafoai ai o outou faamalosi, ua i ai le taui e tele.

A leai foi se faatuatua e le mafai ona fiafia mai o ia; auā e tatau i lē alu atu i le Atua ona talitonu o loo soifua o ia, o ia foi na te tauia mai o e matuā saili ia te ia.

A e afai ua leai se poto i so outou, ina ole atu ia i le Atua, o lē foai tele mai i tagata uma ma le le toe ta‘uta‘ua; ona foaiina mai ai lea ia te ia.

Ai se tasi o ia te outou e manatu ifo o ia o le tagata amio Atua a e le taofi i lana upu, a e faaseseina e ia lona lava loto, ua le aoga lana amio Atua.

Le au uso e, ai se tasi o ia te outou ua sese i le upu moni, a ua faafoi mai se tasi ia te ia, ia iloa e ia, o lē faafoi mai le tagata agasala nai lona ala sese, e faaolaina e ia le agaga nai le oti, e ufiufi foi e ia le vao agasala.

na faaalia mai ia te i latou e le ona o i latou, a o i tatou, na latou tuuina mai ai ia mea, o mea ia ua faamatalaina atu nei ia te outou e i latou o e folafola atu le tala lelei ia te outou, ma le Agaga Paia ua auina mai mai le lagi; o mea ia e naunau i ai le au agelu i le fia matamata i ai.

ua fanaufouina outou e le o le fua e pala, a o le fua e le pala lava, o le afioga a le Atua lea ua oia ma ua tumau e oo i le faavavau. Auā o tagata uma lava e tusa ia ma le mutia, o le matagofie uma foi o tagata e pei o le fuga o le vao; e magumagu le mutia, e toulu foi ona fuga; a o le afioga a le Alii e tumau lea e faavavau lava. O le afioga foi lea ua folafolaina atu ia te outou na.

faapei o tama meamea faatoa fanau mai ia naunau outou i le suāsusu e le suia o le upu, ina ia outou tutupu ai, pe afai ua outou iloa e agalelei lava le Alii.

O lenei, ua ia te outou o e faatuatua o lenei mamalu; a o e faalogogata, O le maa na lafoaiina e tufuga fai fale, ua avea lava lea ma tulimanu aupitoaluga, ma maa e tausuai ai, ma papa e tautevateva ai; o e tausuai i latou ua faalogogata i le upu, na tofia foi i latou i lea lava mea.

A o outou o le tupulaga ua filifilia outou, o tupu ma ositaulaga, o le nuu paia, ma le nuu na faatauina mai, ina ia outou ta‘uta‘u atu ona lelei na ia valaau ia te outou nai le pouliuli e oo i lona lava malamalama e matuā ofo ai;

A ia paia le Alii le Atua i o outou loto. Ia saunia pea lava outou e tali atu ma le agamalu ma le mata‘u ia i latou uma o e fesili mai ia te outou i le uiga o le faamoemoe o loo ia te outou. Ia ia te outou le loto fuatia ifo lelei, o le mea foi latou te faaleaga ai ia te outou, peiseai ua outou amio leaga, ia masiasi i latou o e tuua‘i fua la outou amio lelei o ia Keriso.

Auā e lei usiusitai i matou i tala o le vavau ua fatua ma le poto, ina ua matou faailoa atu ia te outou le mana ma le afio mai o lo tatou Alii o Iesu Keriso; peitai na matou vaavaai atu i lona lava mamalu.

E le faatuai mai le Alii i le mea na folafolaina mai, faapei o le manatu a isi tagata i le faatuai; a e peitai ua onosai mai lava o ia ia i tatou, ona ua le finagalo ia fano se tasi, a ia oo uma lava i le salamo.

a e afai tatou te faaali a tatou agasala, e faamaoni o ia, ma le amiotonu e faamagalo ai a tatou agasala, ma faamamā mai ia i tatou i amioletonu uma lava.

O i latou uma o e ua fanau mai i le Atua, latou te le faia le agasala; auā o loo tumau i totonu ia te i latou lana fua; e le mafai foi ona agasala, auā ua fanau mai i latou i le Atua. O le mea lea ua iloa ai le fanau a le Atua ma le fanau a le tiapolo. O i latou uma o e le fai le amiotonu, e le mai le Atua i latou, atoa ma ē le alolofa i o latou uso.

O i matou, mai le Atua lava i matou, o le ua iloa le Atua e faalogo mai o ia ia te i matou; o le le mai le Atua e le faalogo mai o ia ia te i matou; o le mea lea ua tatou iloa ai le agaga moni ma le agaga sese.

Afai e talia e i tatou le molimau a tagata, e sili le molimau a le Atua; auā o lenei lava le molimau a le Atua na ia molimau mai ai i lona lava Alo. O lē faatuatua i le Alo o le Atua ua i totonu ia te ia le molimau; o le le talitonu i le Atua ua ia faia o ia ma pepelo; auā e lei talitonu ia i le mau na molimau mai ai e le Atua i lona lava Alo. O lenei foi le mau, ua foaiina mai e le Atua ia te i tatou le ola e faavavau; o le ola lava lea ua i lona Alo.

o le na molimau i le afioga a le Atua, ma le mau ia Iesu Keriso, o mea uma foi na ia vaaia.

Faauta, ou te tu atu i le puipui ma tu‘itu‘i atu; ai se tasi e faalogo mai i lo‘u leo, ma tatala mai le puipui, ou te ulufale atu ia te ia, ma te tali sua foi ma ia, o ia foi ma a‘u.

ua latou alalaga foi ma leo tetele, ua faapea atu, O i ai le faaolataga i lo tatou Atua o lē tietie i le nofoālii, atoa ma le Tamai mamoe.

Ou te tuuina atu foi i a‘u molimau e toalua, la te vavalo ai i aso e tasi le afe e lua selau ma le onogafulu, o oofu i laua i ie talatala. O laau olive ia e lua, ma tuugālamepa e lua ua tutū i luma o Atua o le lalolagi. Afai foi e fia faaleaga se tasi ia te i laua, ona alu atu ai lea o le afi ai o la gutu, e faaumatia ai e ua fai i laua mo latou fili; afai foi e fia faaleaga se tasi ia te i laua, e tusa ona faapea ona fasiotia o ia. Ua ia te i laua le pule e pupuni le lagi, ina ia le to ifo se ua i aso o la la valoaga; ua ia i laua foi le pule i vai e liu ai ma toto, e taia foi le lalolagi i mala uma, o lo la faitalia pe atu fia.

Pe a uma ona la faaiuina la la mau, ona sii mai lea o le taua ia te i laua e le manu feai le ua alu ae nai le to e le gata, e manumalo foi o ia ia te i laua, ma fasioti ia te i laua. O la tino foi e i ai ia i le ala o le aai tele, o lona igoa faaleagaga, o Sotoma ma Aikupito, o le mea foi na faasatauroina ai lo tatou Alii. E tolu aso ma le vaeluagalemu o le aso e vaavaai ai i o la tino e nisi mai nuu, ma itu aiga, ma gagana eseese, ma atu nuu, a e latou te le mafafai ona ia tuuina atu o la tino i tuugamau. E fiafia foi e ua nonofo i le nuu ona o i laua, ma latou olioli, ma feaveai mea alofa; auā na faatigaina e ua nonofo i le nuu e ia perofeta e toalua. A ua mavae aso e tolu ma le vaeluagalemu o le aso, ona uluitinoina ai lea o i laua e le Agaga ola mai le Atua, ona la tutū ai lea i luga i o la vae, ona oo ai lea o le mata‘u tele i e na matamata ia te i laua.

A ua latou manumalo ia te ia ona o le toto o le Tamai mamoe, ma le upu a la latou mau, ua latou le faapelepeleina foi lo latou ola ua oo i le oti.

Ua ita foi le tarako i le fafine, ona alu atu ai lea o ia e tau le taua ma i latou ua totoe o lana fanau, o e ua tausi i poloaiga a le Atua, ma ua taofi le mau ia Iesu Keriso.

e le iloa foi se pepelo i o latou gutu; auā e le ponā i latou i luma o le nofoālii o le Atua.

Ua mavae nei mea, ona ou faalogo lea e peiseai o le leo tele o le motu o tagata e toatele o i le lagi, ua faapea atu, Aleluia; ua i le Alii lo tatou Atua le olataga, ma le viiga, ma le faaneeneega, ma le mana;

Ua fai mai foi o ia ia te au, Ia e tusi, Amuia e ua tala‘iina i le tausamaaga o le Tamai mamoe. Ua fai mai foi o ia ia te au, O afioga moni ia a le Atua. Ona ou faapaū atu lea i luma o ona vae e ifo ia te ia; a ua fai mai o ia ia te au, Ia oe, aua lava; o a‘u o lou uso a auauna, o so lou au uso foi ua i ai le mau ia Iesu; ia e ifo i le Atua; auā o le agaga o le valoaga o le mau lea ia Iesu.

Na a‘u iloa foi nofoālii, ma ua latou tietie ai, ua tuuina atu foi le faamasinoga ia te i latou; na a‘u iloa foi agaga o e ua vavaeeseina o latou ulu ona o le mau ia Iesu ma le afioga a le Atua, o e na le ifo i le manu feai po o lona faatagata, na le talia foi le faailoga i o latou muaulu po o latou lima; ua latou ola foi, ma ua fai ma tupu faatasi ma Keriso i tausaga e afe;

Faauta foi, ou te vave alu atu; ua ia te au foi le taui ou te taui taitasi atu ia tusa ma lana ua fai.