18 – O Faiaoga Pepelo

Ua sili le atamai o le gata i manu uma o le vao na faia e Ieova le Atua. Ua fai mai o ia i le fafine, E moni ea, na fetalai mai le Atua, lua te le aai i laau uma o le faatoaga? Ona tali atu ai lea o le fafine i le gata, O fua o laau o le faatoaga ma te aai ai lava; a o le fua o le laau o i totonu o le faatoaga na fetalai mai ai le Atua, Aua ma te aai ai, aua foi ma te papai atu i ai, ne‘i ma oti. Ona fai mai lea o le gata i le fafine, Lua te le oti lava; auā ua silafia e le Atua, o le aso lua te aai ai, e pupula ai o oulua mata; ona avea ai lea o oulua e pei ni atua o loo iloa le lelei ma le leaga.

Ona fetalai atu lea o Ieova le Atua i le fafine, Se a lena mea ua e faia? Ona tali mai lea o le fafine, Na faasese mai le gata ia te au, ona ou ‘ai ai lea. Ona fetalai atu lea o Ieova le Atua i le gata, E sili lou malaia i manu vaefa fanua uma, ma manu vaefa uma lava o le vao, ina ua e faia lena mea; e te sosolo i lou manava, o le efuefu e te ‘ai ai i aso uma o lou ola; ou te faatupuina le feitagai ia te oulua ma le fafine, o lau fanau foi ma lana fanau; na te tu‘imomomoina lou ulu, a o oe e te tu‘imomomoina lona mulivae.

aua e te ifo i ai, aua foi e te auauna i ai; auā o a‘u o Ieova lou Atua, o le Atua fuā, o le taui atu i fanau o le amioletonu a o latou mātua, e oo i le tupulaga e tolu ma le fa o e ‘ino‘ino mai ia te au; a ou te alofa i afe o tupulaga o e alofa mai ia te au, ma tausi mai i a‘u poloaiga.

Aua e te sii le tala fatu fua; aua foi le ‘au faatasi ma le tagata amio leaga, ne‘i fai oe ma molimau faasaua. Aua e te mulimuli atu i le toatele e fai le amio leaga; aua foi e te tali atu i se finauga, e 'au ma le toatele e faapiopio ai le faamasinoga.

Aua tou te gaoi, aua foi tou te faa‘ole‘ole, aua foi tou te pelopelo le tasi i le tasi.

Aua e te fealuai i lou nuu ma ē feaveaveai; aua foi e te molimau pepelo i lē lua te tuaoi e oti ai o ia; o a‘u o Ieova. Aua e te ‘ino‘ino i lou uso i lou loto; ia e aoai lava i lē lua te tuaoi, aua foi ne‘i tuu ai pe a le agasala ia te ia.

E le se tagata le Atua e talapepelo ai o ia, po o se atalii o se tagata e salamo ai o ia; ua fetalai mai o ia, na te le faia ea? Ua fetalai mai foi o ia, na te le faataunuuina ea?

Ua outou iloa i o outou mata le mea na faia e Ieova ona o Paalapeoro, auā o tagata uma lava na mulimuli atu ia Paalapeoro ua faaumatia i latou nai ia te oe e Ieova lou Atua.

Lenei la, ia outou anaana ia faia, faapei ona poloai mai ai o Ieova lo outou Atua ia te outou, aua tou te afe i le itu taumatau, po o le itu tauagavale.

Ia e manatua le ala uma lava na ta‘ita‘iina mai ai oe e Ieova lou Atua i ia tausaga e fagafulu i le vao, ina ia na faatigaina oe, ma tofotofo ai ia te oe, e iloa ai mea o i lou loto, pe e te tausiusi i ana poloaiga pe leai. Na ia faatigaina foi oe, ma faalaina oe, ua na fafaga ia te oe i le manai, o le mea na e le iloa, na le iloa foi e ou tamā, ina ia na faailoa atu ia te oe e le na o mea e ‘ai e ola ai tagata, a o mea uma e tŭlei mai i le fofoga o Ieova e ola ai tagata.

E te iloa foi i lou loto e faapei o se tagata ona aoai i lona atalii, e faapea lava ona aoai o Ieova lou Atua ia te oe. O lenei, ia e tausiusi i poloaiga a Ieova lou Atua, ina ia e savali i ona ala, ma ia mata‘u ia te ia.

Ia outou, ne‘i pelogia o outou loto, tou te o ese ai ma auauna i atua ese, ma ifo i ai;

O mea uma lava ou te fai atu ai ia te outou, ia outou tausiusi i ai e fai; aua ne‘i e faaopoopo i ai se mea, aua foi ne‘i e ave ese ai se mea.

Afai e tu mai ia te oe se perofeta, po o se faimiti, na te tuu atu foi ia te oe se faailoga po o se vavega, a taunuu foi lea faailoga po o lea vavega, na ia fai atu ai ia te oe, o loo faapea, Ina tatou mulimuli atu ia i atua ese, o e na outou le iloa, ma ia tatou auauna i ai; aua ne‘i e faalogo i upu a lea perofeta, po o lena faimiti; auā e tofotofoina ai outou e Ieova lo outou Atua, ina ia silafia pe tou te alofa atu ia Ieova lo outou Atua ma o outou loto atoa ma o outou agaga atoa.

A o le perofeta e faamaualuga ma tautala i se upu i lo‘u igoa, ou te lei fai ane ia te ia e tautala atu ai, pe tautala ia i igoa o atua ese, e oti lea lava perofeta.

Afai foi e te faapea ifo i lou loto, Pe faapefea ona matou iloa o le upu e lei fetalaia e Ieova? A tautala se perofeta i le suafa o Ieova, afai e le oo le mea, e le taunuu foi, o le upu lea ua le fetalaia mai e Ieova; o le faamaualuga o lea perofeta ua tautala ai o ia; aua e te fefe ia te ia.

Auā o le fouvale, e tusa ia ma le agasala o le faataulāitu; o le finau vale, e tusa ia ma le leaga o le tapuai i tupua. Ua e lafoai le afioga a Ieova, o lea ua lafoai ai o ia ia te oe ia le fai ma tupu.

Ona alu ane lea o le tasi agaga, ma tu mai i luma o Ieova, ua fai mai, Ou te faaoleole ia te ia. Na fetalai atu foi Ieova ia te ia, I ni a ea? Ona fai mai lea o ia, Ou te alu, ma ou fai ma agaga pepelo i gutu o ana perofeta uma. Ona fetalai atu lea o Ieova, E te faaoleole ia te ia, e te malo foi; ina alu ia, ina e faia ia o lea. O lenei, faauta, na tuuina e Ieova le agaga pepelo i gutu o au perofeta nei uma; auā ua fetalai e Ieova ia oo le leaga ia te oe.

Ona alu ane ai lea o le tasi agaga, ma tu mai i luma o Ieova, ua fai mai, Ou te faaoleole ia te ia. Ua fetalai atu, Ieova ia te ia, I ni a ea? Ona fai mai lea o ia, Ou te alu atu, ma ou fai ma agaga pepelo i gutu o ana perofeta uma. Ona fetalai atu lea o Ieova, E te faaoleole ia te ia, e te malo ai foi; ina alu ia, ma e faapea ona fai. O lenei, faauta, ua tuuina e Ieova le agaga pepelo i gutu o au perofeta nei, ma ua fetalai mai e Ieova ia oo le leaga ia te oe.

Ua aauina mai ia te i latou e Ieova le Atua o lato tamā o e ave ana feau, ua ala aauina lava i latou; auā ua na alofa i lona nuu ma lona afioaga; a ua latou faatauemu i e na aauina mai e le Atua, ma ua ‘ino‘ino i ana afioga, ma ua ula i ana perofeta, ua oo ina tupu le toasa o Ieova i lona nuu, ua oo ina leai se fofo.

Auā ua outou fatu fua lava tala pepelo, o fomai le aoga lava outou uma.

Se a le mea ua faanunununu ai nuu ese, ma mafaufau ai nuu i le mea e le aoga? Ua tutū mai tupu o le lalolagi, ua pulega faatasi foi alii, e tetee atu ia Ieova ma le na ia faauuina, Se‘i tatou motusi ese o laua noataga, ma lafoaieseina a laua maea ia te i tatou. E soisoi le o afio i le lagi; e tauemu le Alii ia te i latou.

E fano ia te oe o e tala pepelo; e matuā inosia e Ieova le tagata ua totolima ma le tau‘ole‘ole.

Auā e leai se faamaoni i o latou gutu; o latou loto foi, ua matuā leaga; ua se tuugamau ua faamaga o latou faaī; ua faaoleole i latou i o latou laulaufaiva.

Ua fai ifo le tagata valea i lona loto, E leai se Atua. Ua leaga lava i latou; ua inosia a latou amioga; e leai se tasi ua amio lelei. O loo silasila mai Ieova mai le lagi i le fanau a tagata, ina ia silafia pe i ai se tasi ua poto, se ua saili i le Atua. Ua latou ‘alo‘alo ese uma lava, ua leaga faatasi i latou; e leai se tasi ua amio lelei, e leai lava se tasi.

Ia faalologo laugutu pepelo; o e tautala faasiasia, ma le faamaualuga, ma le ‘ino‘ino i le tagata amiotonu.

Aua ne‘i tautala lou laulaufaiva i upu leaga, ma ou laugutu ne‘i tautala faa‘ole‘ole.

A ua fetalai ane le Atua i le tagata amio leaga, Se a ea le mea ua e tautala ai i a‘u tulafono, ma e ta‘u la‘u feagaiga i lou gutu? O oe foi, ua e ‘ino‘ino i le aoaiga, ma ua e lafoaiina a‘u upu i ou tua.

Ua mafaufau lou laulaufaiva i mea leaga; e fai le pepelo e pei o se tafi maai. Ua sili lou manao i le leaga, a e itiiti i le lelei; ua sili lou manao i le tala pepelo, a e itiiti i le upu tonu. Selā. Le laulaufaiva faa‘ole‘ole e, ua e manao i upu uma e fano ai. O lea e faaumatia ai oe e faavavau e le Atua; na te aveeseina ma liaiina oe ai le fale ie; na te liaiina foi oe ai le nuu o e ola. Selā.

O lona gutu ua se suāsusu ua to‘a e molemole, a o i lona loto le taua; e sili le malulu o ana upu i le suāuu, a o pelu ua seia lava ia.

O le agasala a o latou gutu, o le upu lea ai o latou laugutu, ia maileia lava i latou i lo latou lava faamaualuga; ona o a latou fetuu foi ma a latou tala pepelo ua latou tautala ai.

E le nofo i lo‘u fale o se fai mea faa‘ole‘ole; o lē tala pepelo foi e le tumau ia i o‘u luma.

Ua e faaleaogaina i latou uma o e sese i au tulafono; auā o le pepelo lo latou faa‘ole‘ole.

Ou te ‘ino‘ino i le tala pepelo, ou te matuā ‘ino‘ino i ai; a ou te naunau i lau tulafono.

O le mata‘u ia Ieova, o le amataga lea o le poto; a e ‘ino‘ino tagata valelea i le poto ma le a‘oa‘oina.

o outou e faigofie, tou te loto i le amio faigofie seia afea? ma e tauemu, latou te fiafia i le tauemuga seia afea? ma e valelea, latou te ‘ino‘ino i le poto seia afea? Liliu mai ia i la‘u aoaiga; faauta, ou te liligi atu lo‘u Agaga ia te outou; ou te faailoa atu a‘u upu ia te outou.

Ia e faatuatua ia Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala. Aua e te faafiapoto; ia e mata‘u ia Ieova, ia ‘alo ese i le leaga;

Tuu ese ia te oe le gutu faapiopio; ma laugutu faatu‘iese, ia mamao ia ia te oe.

Ia vaai sa‘o ou mata i ou luma; ma ou laumata, ia faasagatonu ia i ou luma. Ia mafaufau i le ala o ou vae; ona faatumauina ai lea o ou ala uma. Aua ne‘i afe i le itu taumatau po o le itu tauagavale; ia ‘alo ese ou vae i le leaga.

O mea nei e ono ua inosia e Ieova; o lona fitu foi ua matuā inosia lava e ia; o mata faasiasia, o le laulaufaiva pepelo, ma lima e sasaa le toto o le ua le sala, o le loto e manatunatu i togafiti leaga, o vae e tele vavave ona taufetuli i le leaga, o le molimau pepelo, na te tautala i mea pepelo; ma le na te faatupu maseiga i uso.

O le na te aoai atu i lē tauemu e maua e ia le faamāina; ma le la te finau ma le tagata amio leaga e maua a ia le ila. Aua ne‘i aoai atu i lē tauemu, ne‘i inosia oe e ia; aoai atu i le ua poto, ona alofa mai lea o ia ia te oe. A‘oa‘o atu i le ua poto e atili poto ai o ia; a‘oa‘o atu i le ua amiotonu e tupu ai pea lona poto.

O le mata‘u ia Ieova, o le amataga o le poto lea; ia iloa foi lē Paia, o le atamai lava lea.

O laugutu faamaoni, e faatumauina ia e faavavau; a o le laulaufaiva pepelo, ua se emo o le mata lea.

E inosia e Ieova o laugutu pepelo; a o e fai mea faamaoni, e fiafia i ai o ia.

O le molimau faamaoni, e le pepelo ia; a o le molimau pepelo, o le tala pepelo ia. E saili le poto e le tagata tauemu, a e le maua; a e faigofie le poto i le ua lagona. Alu ia ai luma o le tagata valea, pe a ē le iloa ia te ia laugutu o le poto.

E laveaiina tagata e le molimau faamaoni; a o le molimau pepelo, e tautala o ia i mea pepelo.

E lē alofa le tauemu i lē aoai atu ia te ia; na te le alu atu i e popoto.

O lē fai mea leaga, ua uai atu ona taliga i laugutu leaga; o le tala pepelo e faalogo o ia i le laulaufaiva upu paaa.

E le faasaoina le molimau pepelo; ma le ua tala pepelo, e le sao lava ia.

E le faasaoina le molimau pepelo; ma le ua tala pepelo, e fano lava o ia.

Tuli ia le faatauemu, ona mavae atu ai lea o le finauga; e tuua foi le misa ma le faamāina.

Aua ne‘i fai fua oe ma molimau i lē lua te tuaoi; e te pepelo ea i ou laugutu?

E sili ona lelei o le aoaiga ua aliali mai, i le alofa ua lilo. E faamaoni manua mai le ua; a e tele le feasogi o le ua ‘ino‘ino.

O le faipule e uai atu ona taliga i upu pepelo, e amio leaga ana auauna uma lava.

O afioga uma a le Atua, ua se ario ua te‘a ma le otaota ia; o le talita lava o ia i e faatuatua ia te ia. Aua e te faaopoopo se upu i ana afioga; ne‘i aoai atu o ia ia te oe, ona ta‘upepeloina ai lea o oe.

E sili ona lelei o le ta‘uleleia i le suāuu lelei; ma le aso e oti ai e sili i le aso e fanau mai ai.

Le lagi e, faalogo mai ia; le lalolagi e, uai mai ia ou taliga; auā ua fetalai mai Ieova, Ua ou tausia ma a‘oa‘oina le fanau, a ua latou foua a‘u. Ua iloa e le povi le na te tausia o ia, ua iloa foi e le asini le mea e fagaina ai o ia e le na te tausia o ia; a o Isaraelu, ua le iloa e i latou, ua le mafaufau lava lo‘u nuu. Oi talofa i le nuu agasala, o le nuu e agasala tele lava, o le tupulaga amio leaga, o le fanau e leaga lava i latou; ua latou lafoaiina Ieova; ua latou ‘ino‘ino i le Paia o Isaraelu, ua tuumuli lava i latou. Se a le mea e toe sasaina ai outou? Tou te o ese pea ea? O loo ma‘i le ulu uma, o loo vaivai le loto uma.

A e oo faatasi le malaia o e solitulafono atoa ma e agasala; o e lafoai foi Ieova e faaumatia lava i latou.

Oi talofa ia te i latou o e fai mai, ua lelei le mea leaga, a e leaga le mea lelei; o e fai ma malamalama le pouliuli, a e fai foi ma pouliuli le malamalama; o e fai ma mea suamalie le mea oona, a e fai ma mea oona le mea suamalie. Oi talofa i e ua popoto i o latou lava manatu, ma e ua fai ma tagata mafaufau i o latou lava taofi.

A o Ieova o ‘au, ia paia o ia ia te outou, o ia lava tou te fefefe ai, o ia foi tou te matatau ai. E fai foi o ia ma malumalu; a e fai ma maa e tausuai ai, ma papa e tautevateva ai i aiga uma e lua o Isaraelu; e fai ma mailei ma matasele i e o nonofo i Ierusalema.

Ina saili ia i le tulafono ma le mau; afai latou te le tautala e tusa ma ia upu, ua leai lava se malamalama ia te i latou.

Oi! ua faapea ona paū mai le lagi o oe le ua pupula, le atalii o le taeao; ua taia oe i lalo i le eleele, o oe sa faatoilaloina nuu ese. O oe foi sa e faapea ifo i lou loto, Ou te alu ae i le lagi, ou te siitia i luga lo‘u nofoālii ia sili i fetu a le Atua, ou te nofo foi i le mauga o le faapotopotoga i le itu i matu; ou te alu ae i luga o mea maualuluga i luga ae o ao; ma te tutusa ma lē Silisili ese. A ua aveina ifo oe i seoli i itu o le lua. O i latou o e vāai ia te oe latou te pulatoa ia te oe, latou te mafaufau ia te oe, ma faapea ane, O le tagata ea lenei sa faagateteina le lalolagi, sa na luluina malo?

E mavae atu foi le atamai o Aikupito nai totonu ia te i latou, ou te faaumatia foi lana pule; ona latou saili ai lea i tupua, ma e ua leo oolo, ma aitu vavalo, ma e ua memu.

A e peitai o i latou, ua sese i latou i le uaina; ua feseseai i le ‘ava; ua sese le faitaulaga ma le perofeta i le ‘ava; ua faiaina i latou i le uaina, ua feseseai i latou i le ‘ava; ua sese lo latou vaai, ua latou tautevateva i le faamasinoga.

O le mea lea ua fetalai mai ai le Alii, Ua faalatalata mai lenei nuu ia te au i o latou gutu, ma latou vivii mai ia te au i o latou laugutu, a ua mamao lava o latou loto ia te au, o lo latou mata‘u foi ia te au ua a‘oa‘oina lea i upu a tagata;

E! lo outou faatuiese e. Pe faatusaina ea le omea i le tufuga? pe fai atu ea le mea na faia i le na na faia, E lei faia lava a‘u e ia? pe fai atu ea le mea na gaosia i le na na gaosia o ia, E leai sona mafaufau?

O e na sese i o latou loto, latou te iloa mafaufau; o e na muimui foi latou te a‘oa‘o ia popoto.

auā o le nuu fouvale lenei, o le fanau pepelo, o le fanau e le mafafai ona faalogo i le tulafono a Ieova;

o e fai atu i tagata vaai, Aua tou te vaai; latou te fai atu foi i perofeta, Aua tou te faaali mai ia te i matou mea tonu; ina fai mai ia ia te i matou upu malie, ina faaali mai ia mea pepelo; ‘alo ese ia outou i le ala; ina o ese ia i le ala; ina faateaeseina ia le Paia o Isaraelu i o matou luma. O le mea lea ua faapea ona fetalai mai ai o le Paia o Isaraelu, Ua outou teena lenei upu, ma ua outou faatuatua i le faasaua, ma le faapiopio, ma ua faalagolago i ai. O le mea lea e avea ai lenei amio leaga ia te outou e pei o se mea ua sofaia o le a paū, ua oso mai i le pa maualuga, o lona solo e faafuasei mai, ua se emo lava.

o le na te faaleaogaina faailoga o e pepelo; na te faavaleleaina o e faataulāitu; o loo faaliliuina i tua o e popoto, na te faaleaogaina o latou poto;

O ona tagata vaai, ua tauaso i latou; o i latou uma latou te le iloa se mea; o ulī gūgū i latou uma, latou te le lavā ou, o e fai miti, o e taooto, o fia momoe i latou. O ulī ‘ai tetele i latou, latou te le iloa se ma‘ona; o i latou foi o leoleo mamoe, latou te le iloa faautauta, ua faasaga i latou uma i o latou lava ala, ua taitasi ma faasaga i lana lava oloa, e le faapito lava.

Tou te faatauemu ea ia te ai? E faamaga o outou gutu ia te ai? tou te faaeto mai o outou laulaufaiva ia te ai? E le o le fanau fouvale ea outou? o le fanau e pepelo?

Auā ua matuā amio faa‘ole‘ole mai ia te au le aiga o Isaraelu, ma le aiga o Iuta, o loo fetalai mai ai Ieova. Ua latou faafiti ia Ieova, ma latou fai atu, E leai o ia; e le oo mai foi ia te i matou se leaga, o le iloa foi e i matou le pelu, po o le oge; e fai foi perofeta ma matagi, e leai foi se upu ia te i latou; e faapea ona faia ia te i latou.

Ua faia i le nuu le mea e ofo ai ma le inosia; ua vavalo le au perofeta i mea pepelo, ua pule foi le au faitaulaga ma le usiusitai ia te i latou; ua loto foi lo‘u nuu ina ia faapea; ia, se a se mea tou te faia i ona iuga?

Auā o latou tagatānuu atoa ma o latou alii ua matapeapea i oloa i latou uma; o perofeta foi atoa ma ositaulaga ua amio pepelo i latou uma. Ua latou fofo faatauvaa le manua o le tama fafine a lo‘u nuu, ua faapea ane, E manuia, e manuia; a e leai se manuia.

E taitoatasi i latou ma pepelo i lana uo, e le tautala foi i latou ma le faamaoni; ua latou faamasani o latou laulaufaiva i tautala pepelo, ua tautiga i latou i fai mea faapiopio. O le mea e te nofo ai o loo i totonu o le nuu faa‘ole‘ole lea; o le faa‘ole‘ole latou te le mafafai ai ona iloa o a‘u, ua fetalai mai ai Ieova.

O latou laulaufaiva o u fanafana ia e oti ai; e tautalatala faa‘ole‘ole; e taitasi ma tautala ma le filemu i lana uo i lona gutu, a o lona loto ua lamalama ia te ia.

Ona fetalai mai lea o Ieova ia te au, O loo vavalo mai perofeta i mea pepelo i lo‘u igoa; ua ou le aauina atu i latou, ma ou le poloai atu ia te i latou, ma a‘u le tautala atu ia te i latou; ua latou vavalo ia te outou le faaaliga pepelo, ma le faataulāitu, ma le mea faatauvaa, ma le pepelo o latou loto. O le mea lea o loo faapea ona fetalai mai ai o Ieova i perofeta ua vavalo i lo‘u igoa, a o a‘u ua ou le aauina atu i latou; a ua latou fai ane, E le oo mai le pelu ma le oge i lenei nuu; o le pelu ma le oge e faaumatia ai ia lava perofeta.

O loo faapea ona fetalai mai o Ieova, Ia malaia le tagata e faatuatua i tagata, ma ua fai tagata mona lima a ua liliu ese lona loto ia Ieova.

E sili le faa‘ole‘ole o le loto i mea uma, ma ua matuā leaga lava; po o ai na te mafaia ona iloa? O a‘u o Ieova o lē suesue i le loto, o lē tofotofo i manatu, ina ia tuuina atu i tagata taitasi e tusa ma ona ala, e tusa foi ma le fua o ana amioga.

Ua momomo lo‘u loto i totonu ia te au ona o perofeta; ua gatete o‘u ivi uma; ua avea a‘u e pei o le tagata onā, e pei o le tagata ua faiaina i le uaina, ona o Ieova ma ana afioga paia.

Auā o perofeta atoa ma faitaulaga ua faalematau i latou; ua iloa e a‘u la latou amio leaga i lo‘u lava fale, o loo fetalai mai ai Ieova. O le mea lea e avea ai lo latou ala ia te i latou e pei o mea maseesee i le pouliuli; e tulia i latou, ma latou pauu i ai; auā ou te faaooina le malaia i luga ia te i latou, o le tausaga lea e asiasia mai ai i latou, o loo fetalai mai ai Ieova.

Ua ou iloa foi le mea e inosia i perofeta o Ierusalema; ua latou mulilulua, ma savavali ma le pepelo; ua faamalolosia foi e i latou lima o e amio leaga, ina ia le toe foi mai se tasi ai lana amio leaga; ua avea i latou uma ia te au e pei o Sotoma, ma e o nonofo ai e pei o Komoro. O le mea lea ua faapea ona fetalai mai ai o Ieova o ‘au i perofeta, Faauta, ou te fafaga ia te i latou i le laena, ma faainu ia te i latou i vai oona; auā o perofeta o Ierusalema ua oo atu ai le amio faalematau i le nuu uma.

O loo faapea ona fetalai mai o Ieova o ‘au, Aua tou te faalogologo i upu a perofeta o e vavalo ia te outou; ua latou faasese ia te outou e fai mea faatauvaa; ua latou tautala atu i le faaaliga mai o latou lava loto, a e le mai le fofoga o Ieova. O loo tautala atu pea i latou i e ‘ino‘ino mai ia te au, O loo fetalai mai Ieova, E manuia outou; ma ua latou faapea atu ia te i latou uma o e savavali e tusa ma le finau vale o latou loto, E le oo ia te outou se malaia.

E le toe liliu le toasa o Ieova, seia faia e ia, seia faataunuuina foi e ia manatu o lona finagalo; tou te matuā mafaufau i ai i aso amuli. Ua ou le aauina atu o ia perofeta, a ua latou taufetuli; ua ou le tautala atu ia te i latou, a ua latou vavalo.

Ua ou faalogo i mea ua fai atu ai perofeta, o e ua vavalo ma le pepelo i lo‘u igoa, ua faapea atu, Ua fai la‘u miti, ua fai la‘u miti. E i ai lenei mea seia afea i loto o perofeta, o e vavalo mai ma le pepelo, o perofeta lava i latou o le pepelo ua i o latou loto? o loo manatu i latou ia faagaloina e lo‘u nuu o lo‘u igoa i a latou miti ua latou talatala atu ai o le tasi i le tasi, e pei ona faagalogalo e o latou tamā o lo‘u igoa ona o Paala. O le perofeta ua na fai le miti, ia talatala atu lana miti; ma le ua ia te ia la‘u upu, ia talatala atu e ia la‘u upu ma le faamaoni. E tusa ea le ‘au o saito i le fua o le saito? o loo fetalai mai ai Ieova. E le pei o le afi ea la‘u upu? o loo fetalai mai ai Ieova; e le pei o le samala foi e tu‘imomoia ai le papa?

O loo fetalai mai Ieova, Faauta, e fai mo‘u fili o perofeta, o e tautala i o latou laulaufaiva, ua faapea atu, Ua fetalai mai o ia. Faauta, e fai mo‘u fili i latou o e vavalo i miti pepelo, o loo fetalai mai ai Ieova, ma latou talatala atu ai, ma faaseseina ai lo‘u nuu i a latou upu pepelo, ma lo latou mitamita vale; a o a‘u na ou le aauina atu i latou, ma a‘u lei fai atu ia te i latou; o le mea lea e le aoga ai lava i latou i lenei nuu, o loo fetalai mai ai Ieova.

A o le perofeta, po o le faitaulaga, po o le nuu, e fai mai, O le avega mai ia Ieova; ou te taui atu lava i lena tagata atoa ma lona aiga. Ia faapea ona outou tautala atu, o le tagata i lē la te tuaoi, ma le tagata i lona uso, Se a le tali mai ia Ieova? se a foi le afioga mai ia Ieova? Tou te le toe ta‘uta‘ua foi le avega mai ia Ieova; auā e taitasi le tagata ma fai lana lava upu ma avega ia te ia; auā ua faauigaeseina e outou afioga a le Atua soifua, o Ieova o ‘au, lo tatou Atua.

A e afai tou te fai ane, O le avega mai ia Ieova; o le mea lea ua faapea ona fetalai mai ai o Ieova, Auā ua outou fai ane lenei upu, O le avega mai ia Ieova, a ua ou avatu le feau ia te outou, ua faapea atu, Aua tou te fai ane, O le avega mai ia Ieova; o le mea lea faauta, ou te matuā faagaloina ai outou, ma ou lafoaiina ai outou ai o‘u luma, atoa ma le aai na ou foaiina atu ia te outou ma o outou tamā. Ou te faaeeina atu foi ia te outou le luma e faavavau, ma le masiasi e faavavau, e le galo lava.

O lenei, aua ne‘i outou faalogo i o outou perofeta, ma o outou taulāitu, ma o outou fai miti, ma o outou tagata e iite i ao o le lagi, ma e fai togafiti faataulāitu ia te outou, o i latou o e fai atu ia te outou, ua faapea atu, E le fai ma auauna outou i le tupu o Papelonia. Auā o mea pepelo ua latou vavalo ai ia te outou, ina ia avemamaoina outou i lo outou laueleele; ia ou tulia foi outou, ma ia faaumatia outou.

Aua tou te faafofoga i upu a perofeta, o e fai mai ia te outou, ua faapea mai, E le fai outou ma auauna i le tupu o Papelonia; auā o mea pepelo ua latou vavalo ai ia te outou. Auā o loo fetalai mai Ieova, ua ou le aauina atu i latou, a ua latou vavalo i le pepelo i lo‘u igoa; ina ia ou tulia outou, ma ia faaumatia outou, o outou, ma perofeta o e vavalo ia te outou. Na ou fai atu foi i faitaulaga ma lenei nuu uma, ua faapea atu, O loo faapea ona fetalai mai o Ieova, Aua tou te faalogo i upu a o outou perofeta, o e vavalo ia te outou, ua faapea mai, Faauta, e taalise ona toe aumaia mai Papelonia o ipu o le fale o Ieova; auā o mea pepelo ua latou vavalo ai ia te outou.

Auā o loo faapea ona fetalai mai o Ieova o ‘au, le Atua o Isaraelu, Aua ne‘i faaseseina outou e o outou perofeta ua ia te outou, ma o outou taulāitu; aua foi ne‘i faalogo i miti, ua faia talu outou; auā ua latou vavalo i le pepelo ia te outou i lo‘u igoa; ou te lei aauina atu i latou, o loo fetalai mai ai Ieova.

O lo‘u nuu ua se lafu mamoe ua sē i latou; ua faaseseina i latou e o latou leoleo, ma latou faaliliuina i latou i le atu mauga; ua latou feoai i lea mauga ma lea mauga, ua galo ia i latou le mea sa latou taooto ai.

A ou fai atu i le ua amio leaga, E oti lava oe; a ē le apoapoai atu ia te ia, ma ē le fai atu i ai e apoapoai atu i le ua amio leaga ia liliu ese i lona ala leaga, ina ia ola ai o ia; e oti lena tagata amio leaga i lana amioletonu, a o lona toto ou te taui atu lea ia te oe. A e afai e te apoapoai atu i le ua amio leaga, a e le liliu ese o ia i lana amio leaga ma lona ala leaga, e oti o ia i lana amioletonu; a o oe, ua laveaiina oe ia te oe. A liliu ese foi le ua amiotonu i lana amiotonu, a e fai le amioletonu, ona ou tuuina lea i ona luma se mea e tausuai ai, e oti o ia; e oti o ia i lana agasala ona ua ē le apoapoai atu ia te ia, e le manatua ana amiotonu sa na faia; a o lona toto ou te taui atu lea ia te oe. A o oe, afai e te apoapoai atu i le ua amiotonu ina ia le agasala le ua amiotonu, e le agasala foi o ia, e ola lava o ia, ina ua apoapoaiina o ia; o oe foi, ua laveai oe ia te oe.

Auā e le toe ai lava se faaaliga faatauvaa, ma se togafiti faataulāitu faa‘ole‘ole i le aiga o Isaraelu.

Ua oo mai le afioga a Ieova ia te au, ua faapea mai, Le atalii e o le tagata, ia e vavalo i perofeta o Isaraelu o e vavalo, ma ia e fai atu ia te i latou o vavalo mai o latou lava loto, Faalogologo mai ia outou i le afioga a Ieova; o loo faapea ona fetalai mai o le Alii o Ieova, Oi talofa i perofeta valelea o e usiusitai i o latou lava loto, a e lei vaaia e i latou se mea.

Isaraelu e, ua faapei o alope i le vao ou perofeta. Ua outou le o ae i mea ua lepetia, ua outou le ati ae foi le pa mo le aiga o Isaraelu, ina ia tutū ai i le taua i le aso o Ieova. Ua latou vaaia le mea faatauvaa ma ua fai togafiti faataulāitu pepelo, ua faapea, O loo fetalai mai Ieova; a e lei aauina i latou e Ieova; ua latou faatupuina foi le faamoemoe e faataunuuina le upu. E lei vaaia ea e outou le faaaliga faatauvaa, ma outou faia le togafiti faataulāitu ina ua outou fai atu, O loo fetalai mai Ieova; a e ou te lei fai atu lava?

O le mea lea ua faapea ona fetalai mai ai o le Alii o Ieova, Ona ua outou fai atu le mea faatauvaa, ma ua vaaia mea pepelo; o le mea lea, faauta, ou te fai ai outou mo‘u fili, o loo fetalai mai ai le Alii o Ieova.

E oo foi lo‘u lima i perofeta o e vaaia le mea faatauvaa, ma fai togafiti faataulāitu pepelo; e le i ai latou i le saofaiga a lo‘u nuu, e le tusia foi i latou i le tusi o le aiga o Isaraelu, latou te le oo foi i le laueleele o Isaraelu; e iloa ai foi e outou o a‘u lava o le Alii o Ieova. Ua latou faaseseina lo‘u nuu, o loo faapea atu, E manuia; a e leai se manuia; ua ati ae e le tasi le pa, faauta foi, ua vali e nisi i le panisina; o le mea lea, o le mea lava lea, ia e fai atu ai ia te i latou o e vali i le panisina, e sŏloia; e to timuga tetele; o oe foi le uato‘a tetele, e to ifo oe; e lepetia foi le pa i le afā. Faauta foi, a solo le pa, e le fai atu ea ia te outou, O ifea ea le panisina na outou vali a‘i? O le mea lea ua faapea ona fetalai mai ai o le Alii o Ieova, Ou te lepetia lava i le afā i lo‘u ita tele, e to timuga tetele i lo‘u ita, ma uato‘a tetele i lo‘u ita tele, e faaumatia ai. Ou te lepetia ai lava le pa na outou valia i le panisina, ou te faagatasia lava ma le eleele, e aliali ai ona faavae; e solo lava ia, e faaumatia ai foi outou i totonu; e iloa ai e outou o a‘u lava o Ieova. Ou te faauma atu ai lo‘u ita tele i le pa, atoa ma i latou o e na latou valia i le panisina ou te fai atu foi ia te outou, Ua leai se pa, ua leai foi e na valia; o perofeta ia o Isaraelu o e vavalo ia Ierusalema, ma ē iloa faaaliga o le manuia mo ia, a e leai se manuia, ua fetalai mai ai le Alii o Ieova.

O oe foi le atalii o le tagata, ia e faasaga atu i fafine o lou nuu, o e vavalo mai o latou lava loto; ma ia e vavalo atu ia te i latou,

Ua outou faatigaina loto o e amiotonu i upu pepelo, o e ua le faatigaina e a‘u; ma ua outou faamalosi i lē amio leaga, ia le liliu ai o ia ai lana amio leaga ina ia faaolaina o ia. O le mea lea tou te le toe vaaia le mea faatauvaa, pe fai togafiti faataulāitu, auā ou te laveaiina lo‘u nuu ai o outou lima; tou te iloa ai o a‘u lava o Ieova.

Ua vali foi ana perofeta ia te i latou i le panisina, ua vaaia mea faatauvaa, ma vavalo i mea pepelo ia te i latou, ua faapea atu, O loo faapea ona fetalai mai o le Alii o Ieova, a e lei fetalai mai lava Ieova.

O le mea lea o loo faapea ona fetalai mai ai o le Alii o Ieova, Ua e faatusa lou loto i le finagalo o le Atua; faauta, o le mea lea ou te au mai ai tagata ese ia te oe, o e ua matautia i nuu; latou te to ae foi a latou pelu ia leaga ai le matagofie o lou poto, latou te faaleagaina lou matagofie.

a iloa atu e ia le pelu o loo sau i le nuu, afai na te ilia le pu, ma faailoa atu i le nuu; o se na te lagona le leo o le pu, a e le anaana i ai; a oo ane le pelu, ma oti ai o ia, e i luga o lona lava ulu lona toto. Na ia lagona le leo o le pu, a ua le anaana i ai; e ia te ia lava lona toto; a o Ie na te anaana e faasaoina e ia lona ola. A e afai e iloa e le tagata vaai le pelu o loo sau, a e le ilia e ia le pu, ma ua le faailoa atu i le nuu; a oo mai le pelu, ma oti ai se tasi o i latou, ua oti o ia i lana amio leaga; a o lona toto ou te tauiatua lea i le tagata vaai.

O oe foi le atalii o le tagata, ua ou tofia oe e fai ma tagata vaai i le aiga o Isaraelu; o le mea lea ia e faalogo mai ai i le upu a lo‘u gutu, ma e apoapoai atu ia te i latou i upu atu ia te au. A ou fai atu i le ua amio leaga, Le tagata amio leaga e, e te oti lava oe; afai e te le tautala atu e apoapoai atu ai i le ua amio leaga, ia liliu ese i lona ala; e oti lena tagata amio leaga i lana amio leaga; a o lona toto ou te tauiatua lea ia te oe. A o oe, afai e te apoapoai atu i le ua amio leaga, ia liliu ese o ia i lona ala; afai na te le liliu ese i lona ala, e oti o ia i lana amio leaga; a ua faasaoina e oe lou lava agaga.

A ou fai atu foi i le ua amio leaga, E oti lava oe; afai e liliu ese ia i lana agasala, ma ua fai e ia le amio tatau ma le amiotonu; afai e faafoi le ua amio leaga le mea e tuu faafaatau, ma toe avane le mea na ia fao, ma ia savali i sauniga e ola ai, ma ua le fai le amio leaga; e ola lava ia, e le oti.

A ua fai mai tagata o lou nuu, E le tusa le ala o le Alii; a o i latou, e le tusa lo latou ala. A liliu ese le ua amiotonu i lana amiotonu, ma ua faia e ia le amio leaga, ona oti ai lava lea o ia. A e afai e liliu ese le ua amio leaga ai lana amio leaga, ma ua faia e ia le amio tatau ma le amiotonu, ona ola ai lava lea o ia. A ua outou fai mai, E le tusa le ala o le Alii. Le aiga o Isaraelu e, ou te faamasinoina outou taitoatasi e tusa ma ona ala.

Le atalii e o le tagata, ia e vavalo atu i leoleo mamoe o Isaraelu, ina vavalo atu ia, ma e fai atu ia te i latou, o leoleo mamoe lava, Ua faapea ona fetalai mai o le Alii o Ieova, Oi talofa i leoleo mamoe o Isaraelu o e fafaga ia te i latou lava! E le tatau ea i leoleo mamoe ona fagaina o le lafu? Ua outou aai le ga‘o, ma oofu i le fulufulu, ua outou fasia e ua pepeti, a ua outou le fafaga i le lafu. Ua outou le faamalosia e ua vaivai; ua outou le faamalolo i le ua ma‘i; ua outou le fusia foi le ua gau; o le ua tulia ua outou le toe aumaia, o le ua sē ua outou le sailia; a ua outou pule faamalosi ma faasaua ia te i latou. Na faataapeapeina foi i latou ina ua leai se leoleo mamoe; na fai foi i latou ma mea e ‘ai ma manu feai uma o le vao, ina ua faataapeapeina i latou. Na sē la‘u lafu i mauga uma, ma mea maualuluga uma; na faataapeapeina foi la‘u lafu i le fogāeleele uma, a e leai se na suesue i ai, e leai foi se na sailia.

ua fetalai mai le Alii o Ieova, Ou te ola a‘u, na avea lava la‘u lafu ma mea e saeia, na avea foi la‘u lafu ma mea e ‘ai a manu feai uma o le vao, ina ua leai se leoleo mamoe, ua le sueina foi e a‘u leoleo mamoe la‘u lafu, a o leoleo mamoe ua fafaga i latou ia te i latou lava, a e lei fagaina e i latou la‘u lafu; o le mea lea, leoleo mamoe e, ia outou faalogo mai ai i le afioga a Ieova; ua faapea ona fetalai mai o le Alii o Ieova, Faauta, ou te faia ia leoleo mamoe mo‘u fili; ou te sueina atu foi la‘u lafu ia te i latou, ou te faate‘aina i latou ia le toe fafaga le lafu; o leoleo mamoe foi latou te le toe fafaga lava ia te i latou; auā ou te laveaiina la‘u lafu i o latou gutu, ina ia le fai i latou ma mea e ‘ai mā latou.

Ua faapea ona fetalai mai o le Alii o Ieova, O outou o la‘u lafu e, faauta, ou te faamasino i manu ma manu, o mamoe poa ma ‘oti poa.

O le mea lea ua faapea ona fetalai mai ai o le Alii o Ieova ia te i latou, Faauta, o a‘u, o a‘u lava, ou te faamasino i manu pepeti ma manu paeee. Ua outou tūlei i o outou itu, ma outou alagalima, ma ua outou suatia e ua vaivai uma i o outou nifo, ua oo ina outou faataapeapeina i latou i tuāpa. O le mea lea ou te faaolaina ai la‘u lafu, e le toe fai lava i latou ma mea e saeia; ou te faamasino foi i lea manu ma lea manu.

Ua outou tautala faasausili ia te au, ua faateleina foi a outou upu ia te au; ua ou faalogo ai lava.

Ua faaumatia lo‘u nuu ina ua leai se poto; o oe foi na e tetee atu i le poto, o le mea lea ou te tetee atu ai ia te oe, e le fai oe ma ositaulaga ia te au; ua e faagalogalo le tulafono a lou Atua, o a‘u foi, ou te faagalogalo i lau fanau.

O lo‘u nuu ua latou fesili i lo latou laau; ua faasino mai ai lo latou tootoo ia te i latou; auā o le fia faitaaga ua faaseseina ai i latou, ma ua latou o ese nai lo latou Atua e faitaaga ai.

O loo faapea mai Ieova i perofeta o e faasese i lo‘u nuu, o e fēu i o latou nifo, ma latou alalaga atu, O le manuia; a o le ua le avane mea i o latou gutu, latou te sauni lava le taua ia te ia. O le mea lea e pogia ai outou ma le leai o se mea e vaaia, e oo foi le pouliuli ia te outou ma le leai o se iite; e goto foi le la i ia perofeta, e pogisa foi le ao ia te i latou. Ona masiasi ai lea o tagata vaai, e fememeai ai foi o e iite; latou te ufiufi foi i a latou ‘ava, o i latou uma lava, auā e leai se tali mai le Atua.

O ona matai ua latou faamasino i le fia fai taui, o ana ositaulaga foi ua latou a‘oa‘o i le fia fai taui, ma ana perofeta ua latou iite i le fia fai tupe; a ua latou faalagolago ia Ieova, ma faapea ane, E le o ia te i tatou ea Ieova? e le oo mai se mea leaga ia te i tatou.

O mea nei tou te faia, Ia outou tautala i upu moni o le tasi i le tasi, ma ia faamasino i le faamaoni ma le faamasinoga e lelei ai i o outou faitotoa. Aua le manatunatu i o outou loto i se mea leaga e fai e le tasi i le tasi; aua foi le fiafia i le tauto pepelo; auā o mea uma ia ou te ‘ino‘ino i ai, ua fetalai mai ai Ieova.

Auā ua tautala tupua i mea le aoga, ma e fai togafiti faataulāitu ua latou vaaia le pepelo, ma latou tala mai miti pepelo, ma latou faamafanafana fua; o le mea lea ua o ese ai i latou pei o mamoe sa tigaina ina ua leai se leoleo.

Oi talofa i le leoleo mamoe le aoga, na te tuua le lafu mamoe! e i ai le pelu i lona lima atoa ma lona mata taumatau; e matuā gase lava lona lima, ma lona mata taumatau e matuā puaoa lava lea.

Ua fetalai mai Ieova o ‘au, O lea aso ou te tineia ai igoa o tupua i le lalolagi, e le toe manatua i latou; atoa foi ma perofeta ma le agaga leaga, ou te faate‘aeseina ia i le lalolagi. Afai foi e toe vavalo se tasi, ona fai atu ai lea ia te ia o lona tamā ma lona tinā na fanaua mai ai o ia, E te le ola; auā ua e tala pepelo i le suafa o Ieova; ona tutu‘i ai lea ia te ia e lona tamā ma lona tinā na fanaua mai ai o ia, pe a vavalo mai ai o ia. O lea aso foi e taitasi le perofeta ma mā ai o ia i lana mea na vaaia, pe a faia lana valoaga; latou te le oofu foi i se ofu taufulufulu e pepelo ai. E fai mai foi o ia, Ou te le se perofeta a‘u; o a‘u le tagata e galue i fanua; auā na faapologaina a‘u, talu ina ou taulealea.

Auā o laugutu o le faitaulaga e tausia ai le poto, latou te sailia foi le tulafono ai lona gutu; auā o le sāvali o ia a Ieova o ‘au. A o outou, ua outou o ese i le ala, ma outou faatausuai i e toatele i le tulafono; ua leaga ia te outou le feagaiga a Levi, na fetalai mai ai Ieova o ‘au. O a‘u foi, ua ou tuuina atu outou ia inosia ma ta‘ufaatauvaaina outou e le nuu uma, e pei ona outou le tausi i o‘u ala, ma outou faailogaina tagata i le tulafono.

Amuia ē sauaina ona o le amiotonu; auā e o latou le malo o le lagi. Amuia outou pe a latou upu leaga, ma faasaua ia te outou, ma latou tuuaiina pepelo outou i mea leaga uma ona o a‘u. Ia outou olioli ma fiafia lava; auā o i le lagi lo outou taui e tele; auā na faapea ona latou faasaua i perofeta e na muamua ia te outou.

Aua ne‘i outou manatu ua ou sau e tatalaina le tulafono po o le au perofeta; ou te lei sau e tatalaina, a ia faataunuuina. Auā e moni, ou te fai atu ia te outou, e mavae atu le lagi ma le lalolagi, a e le mavae atu lava se iota po o sina fāsi mataitusi o le tulafono, seia taunuu mea uma. O lenei, o se na te tatalaina se poloaiga e tasi e aupito itiiti o nei poloaiga, ma faapea ona a‘oa‘o i tagata, e ta‘ua ia e aupito itiiti i le malo o le lagi; a o se anaana ma a‘oa‘o ai, e ta‘ua ia e sili i le malo o le lagi.

Se a le mea e te vaai atu ai i se fāsi laau i le mata o lou uso a e te le iloa e oe le utupoto i lou lava mata? Pe faapefea foi ona e fai atu i lou uso, Tuu mai ia, so‘u eu ese le fāsi laau i lou mata; faauta foi, o i lou lava mata le utupoto? O oe na le pepelo, ia e muai tiai le utupoto i lou lava mata, ona e iloa lelei ai lea e eueseina atu le fāsi laau i le mata o lou uso. Aua tou te avatu le mea paia i ulī; aua foi tou te lafo a outou penina i luma o puaa, ne‘i latou soli ai i o latou vae, ma liliu mai, i le saeia ai outou.

Ia outou ulu atu i le faitotoa va apiapi; auā e va tele le faitotoa, e lautele foi le ala e tau atu i le malaia, e toatele foi i latou o e ui atu ai. Auā e va apiapi le faitotoa, e lauitiiti foi le ala e tau atu i le ola, e toaitiiti foi i latou o e maua.

Ia outou ma perofeta pepelo, o e o mai ia te outou i ofu faamamoe, a o totonu o luko feai lava i latou.

O laau uma e le fua mai i fua lelei, e taia ia ma lafoina i le afi. O lea foi tou te iloa ai i latou i o latou fua.

E le sao atu i le malo o le lagi i latou uma o e fai mai ia te au, Le Alii e, le Alii e; na o le na te faia le finagalo o lo‘u Tamā o i le lagi. E toatele latou te fai mai ia te au i lea aso, Le Alii e, le Alii e, matou te lei perofeta ane ea i lou igoa, o lou igoa foi na matou tulia ai temoni, o lou igoa foi na matou fai ai vavega e tele? Ona ou ta‘utino atu ai lea ia te i latou, Ou te lei iloa lava outou; ina o ese ia outou ia te au, o outou o e fai amio leaga.

Ai sē fai upu i le Atalii o le tagata, e faamagaloina lea; a o lē fai upu i le Agaga Paia, e le faamagaloina lea i le olaga nei po o lē atali.

O le mea lea ou te tautala atu ai ia te i latou i faataoto, auā o lo latou vaai latou te le vaai ai, o lo latou faalogo foi, latou te le faalogo ai, pe lagona. Ua taunuu ai ia te i latou le valoaga a Isaia, ua faapea mai, E faalogo lava outou, a e tou te le lagona; e matuā vaavaai foi outou, a e tou te le iloa.

O lenei, ina faalogologo mai ia outou i le faataoto i le tagata lulu saito. A faalogo se tasi i le upu o le malo, a e le lagona, ona alu ane ai lea o le ua leaga, ua fao le mea sa luluina i lona loto; o le mea lea sa luluina i le auala. A o le mea sa luluina i le mea papa, o le tagata lea ua faalogo i le upu, ona talia loa lea ma le fiafia; a ua leai ni aa ia te ia, ua faaletumau ia; auā pe a tupu le puapuaga, po o le sauaga ona o le upu, ona tausuai loa lea o ia. O le mea sa luluina i le vao tuitui, o ia lea ua faalogo i le upu, a o le loto popole i mea a lenei lalolagi, ma le pepelo o le oa ua fetinaiina ai le upu, ona le fua mai lava lea. A o le mea sa luluina i le eleele lelei, o ia lea ua faalogo i le upu, ma lagona ai; ua fua mai lava ia, e taiselau i nisi, e taiono gafulu i nisi, e taitolugafulu foi i nisi.

A ua tali atu ia, ua faapea atu ia te i latou, Se a le mea ua soli ai e outou foi le poloaiga a le Atua i a outou uputuu?

Ua faalatalata mai ia te au lenei nuu i o latou gutu, ma vivii mai ia te au i oo latou laugutu, a o latou loto ua taumamao ia te au. E tapuai fua mai i latou ia te au i lo latou fai ma mataupu o poloaiga a tagata.

A ua tali atu ia, ua faapea atu, O laau uma e lei totōina e lo‘u Tamā o i le lagi, e liaiina ia. Tuu pea ia i latou, o tauaso i latou e ta‘ita‘i i e ua tauaso; afai foi e ta‘ita‘iina le tauaso e le tauaso, ona la pauu uma ai lea i le lua.

E le lagona faapefea outou, e le o le areto na ou fai atu ai ia te outou, ia matuā ‘alo ese i le mea faafefete a le au faresaio ma le au satukaio? Onā latou lagona ai lea, e le o le mea faafefete o le areto na fetalai atu ai o ia ia matuā alo ese ai, a o le mataupu a le au faresaio ma le au satukaio.

Ona fāliu atu ai lea o ia, ua faapea atu ia Peteru, Satani e, ina alu ia oe i o‘u tua, ua fai oe ma mea ou te tausuai ai; auā e le o mea a le Atua ua e loto i ai, a o mea a tagata.

Afai e agaleaga mai lou uso ia te oe, ia e alu, ma aoai ia te ia tau lava o oulua ma ia. Afai e faalogo mai o ia ia te oe, ua e maua lou uso. A e afai e le faalogo mai o ia, lua te o ma se tasi, po o se toalua, ina ia faamaoni ai upu uma i le mau a le toalua, po o le toatolu. A le faalogo lava o ia ia te i laua, ia e ta‘u atu i le ekalesia; pe afai e le faalogo lava o ia i le ekalesia, ia avea o ia ia te oe, ia pei o le faapaupau, po o le telona.

A ua silafia e Iesu o latou loto leaga, ua faapea atu, O outou tagata pepelo, se a le mea ua outou tofotofo mai ai ia te au?

Ona fetalai atu ai lea o Iesu i le motu o tagata ma ona soo, ua faapea atu, Ua tietie le au tusiupu ma le au faresaio i le nofoa o Mose; o lea ia outou anaana ai ma ia outou faia mea uma latou te fai atu ai ia te outou e anaana i ai; a e aua tou te faaa‘oa‘o i a latou amio; auā ua latou fai atu, a e latou te le faia. Auā ua latou saisai avega mamafa ma le avegata, ma latou faaee i ua o tagata; a e latou te le mafafai ina faagaoioi ai i so latou tamatamai lima. Ua latou fai a latou galuega uma, ina ia iloa ai e tagata; ua latou faalautele i a latou filateri, ma faatele i tuupao o latou ofu.

Ua latou fiafia foi i le mea sili e taoto ai i faigaai, ma nofoa sili i sunako, ma ia alofaina i latou i malae, ia ta‘ua foi i latou e tagata, Rapi e, rapi e. A o outou, aua ne‘i ta‘ua outou o rapi; auā e toatasi la outou a‘oa‘o, o le Keriso lea; a o outou uma o le au uso outou. Aua foi ne‘i tou ta‘ua se tasi i le lalolagi o lo outou tamā; auā e toatasi lo outou Tamā, o i le lagi ia. Aua foi ne‘i ta‘ua outou o a‘oa‘o; auā e toatasi la outou a‘oa‘o, o le Keriso lea. A o lē sili ia te outou e fai lea ma a outou auauna. O sē faamaualuga o ia ia te ia, e faamaulaloina lea; a o sē faamaulalo o ia ia te ia, e faamaualugaina lea.

Oi talofa ia te outou tusiupu ma faresaio, tagata pepelo! auā ua outou pupuni le malo o le lagi i tagata; auā tou te le ulu atu i ai outou, ua outou vavao foi i e a ulu atu i ai. Oi talofa ia te outou tusiupu ma faresaio, tagata pepelo! auā ua outou faauma fale o fafine ua oti a latou tane, ua faaleleva foi a outou tatalo e fai ma ufiufi; o le mea lea e atili ai lava ona faasalaina outou. Oi talofa ia te outou tusiupu ma faresaio, tagata pepelo! auā ua soo le sami ma le laueleele ia te outou ina ia lotu mai o se tasi; pe a maua foi o ia, ona outou faia lea o ia ma tagata o Kēna ua sili ona leaga ia te outou.

Oi talofa ia te outou tusiupu ma faresaio, tagata pepelo! ua outou avatu mea e sefulu a‘i o le mili, ma le aneto, ma le kumina, a ua tuu e outou o mea silisili o i le tulafono, o le amiotonu, ma le alofa, ma le faamaoni; e tatau pe ana faia nei mea, a e aua foi le tuu na mea. O outou ta‘ita‘i tauaso, ua outou faapilia le namu, a ua outou folo atoa le kamela. Oi talofa ia te outou tusiupu ma faresaio, tagata pepelo! ua outou faamamā i le tua o le ipu ma le tanoa, a o totonu ua tutumu i mea ua faoa ma le amio leaga. O oe na le faresaio tauaso, ia e muai faamamā i totonu o le ipu ma le tanoa, ina ia mamā atoa ma le tua. Oi talofa ia te outou tusiupu ma faresaio, tagata pepelo! auā e tutusa outou ma tuugamau ua faasinasinaina, o loo matagofie i fafo, a o totonu ua tutumu i ivi o tagata oti, ma mea leaga uma. E faapea foi outou, o fafo ua mataamiotonu i luma o tagata, a o totonu, ua tutumu outou i le pepelo ma le amioletonu.

Oi talofa ia te outou tusiupu ma faresaio, tagata pepelo! auā ua outou ati ae tuugamau o perofeta, ua outou teuteu foi loa o tagata amiotonu, ma outou faapea ane, Ana matou i ai i ia ona po o matou tamā, po ua matou le ‘au faatasi ma i latou i le fāsiga o perofeta O lea, ua molia ai outou e outou, o fanau outou a e na fasiotia perofeta. O outou foi, ia outou faatumuina le fua a o outou tamā. O outou gata, o fanau a gata feai, pe faapefea ona outou sosola i le faasala i Kēna? Faauta mai, o le mea lea ou te aauina atu ai ia te outou o perofeta, ma tagata popoto, ma tusiupu; o isi o i latou tou te fāsiotia ma faasatauroina; a o isi, tou te sasaina i o outou sunako, ma tulituliloa ia te i latou i lea aai ma lea aai; ina ia oo ia te outou le toto uma o e amiotonu ua faamaligiina i le lalolagi, e afua i le toto o Apelu le tagata amiotonu, e oo i le toto o Sakaria le atalii o Parakaio, na outou fasiotia i le va o le malumalu ma le fata faitaulaga.

Ona tali atu ai lea o Iesu, ua faapea atu ia te i latou, Ia outou, ne‘i faaseseina outou e se tasi. Auā e toatele e o mai i lo‘u igoa, ua faapea ane, O a‘u nei o le Keriso; latou te faaseseina foi tagata e toatele.

O ona po ia e tausuai ai tagata e toatele, e faalata le tasi i le tasi, ma feitagai i latou. E tutū mai foi perofeta pepelo e toatele, latou te faasese foi i tagata e toatele. E maalili foi loto o tagata e toatele, ona ua tupu tele o le amio leaga.

Auā e tutū mai Keriso pepelo, ma perofeta pepelo, latou te faia foi faailoga tetele ma vavega, ina ia faasese ai i e ua filifilia lava, pe afai e mafai ai. Faauta, ua ou muai ta‘uina atu ai ia te outou.

E mavae atu le lagi ma le lalolagi, a o a‘u upu e le mavae atu lava ia.

Ona maliu ane ai lea o Iesu, ua fetalai atu ia te i latou, ua faapea atu, Ua tuuina mai ia te au le pule uma lava i le lagi ma le lalolagi. O lenei, ia outou o atu e fai nuu uma lava ma soo, ma papatiso atu ia te i latou i le suafa o le Tamā, ma le Atalii, ma le Agaga Paia; ia outou a‘oa‘o atu ia te i latou ia tausi i mea uma ua ou fai atu ai ia te outou; faauta foi, ou te ia te outou i aso uma lava, e oo lava i le gataaga o le lalolagi. Amene.

O lē lulu saito, e lulu ia i le upu. O i latou ia i le auala e luluina ai le upu; a latou faalogo ai, ona alu ane loa lea o Satani, ma aveeseina le upu na luluina i o latou loto. E faapea foi i latou na luluina i le mea papa, o i latou ia ua faalogo i le upu, ona talia loa lea ma le fiafia. A e peitai ua leai ni o latou aa, ua faaletumau i latou; pe a tupu le puapuaga, po o le saua ona o le upu, ona latou tausuai loa lea. O i latou foi sa luluina i le vao tuitui, o i latou ia e na faalogo i le upu, a o le loto popole i mea a lenei lalolagi, ma le pepelo o le oa, ma le tu‘inanau i nisi mea, ua oo atu i totonu o le loto, ua fetinaiina ai le upu, ona le fua mai lava lea. A o i latou na luluina i le eleele lelei, o i latou ia e ua faalogo i le upu, ma latou talia, ma fua mai e taitolugafulu i nisi, e taiono sefulu i nisi, e taiselau foi i nisi.

Ona tali atu lea o ia ia te i latou, ua faapea atu, Ua tatau lelei le valoaga a Isaia ia te outou tagata pepelo, e pei ona tusia, Ua vivii mai lenei nuu ia te au i o latou laugutu, a o latou loto ua taumamao ia te au. E tapuai fua mai i latou ia te au i lo latou fai ma mataupu o poloaiga a tagata.

Auā ua outou tuua le poloaiga a le Atua, a e taofi i uputuu a tagata, o le fufuluina o ipu ma ipu e inu ai, atoa foi ma nisi mea faapena e tele ua outou faia. Ua fetalai atu foi o ia ia te i latou, Ua lelei lo outou faaleaogaina le poloaiga a le Atua, ina ia outou taofi a outou uputuu.

Auā e tutū mai Keriso pepelo, ma perofeta pepelo, ma latou faia faailoga ma vavega, ina ia faasese a‘i e ua filifilia lava, pe afai e mafai ai. Ia outou; faauta, ua ou muai ta‘uina atu ia te outou ia mea uma.

E mavae atu le lagi ma le lalolagi; a e peitai a‘u upu, e le mavae lava ia.

Ona tali atu lea o Iesu ia te ia, ua faapea atu, Ua tusia, E le na o mea e ‘ai e ola ai le tagata, a o afioga uma a le Atua.

Oi talofa ia te outou pe a tautala lelei tagata uma ia te outou! auā sa faapea lava ona fai e o latou tamā i perofeta pepelo.

Ua fetalai atu ia le faataoto ia te i latou, E mafai ea le tauaso ona ta‘ita‘i i le tauaso? la te le pauu uma lava ea i le utu? E le sili le soo i lona a‘oa‘o, a ua taitasi ma faapei o lona a‘oa‘o o e ua atoatoa ona lelei.

O le faataoto lenei, O le saito, o le afioga lea a le Atua. O e i le auala, o e faalogo ia; ona alu ane ai lea o le tiapolo, ma aveeseina le upu nai o latou loto, ne‘i faatuatua ma faaolaina i latou. O e i le mea papa, o i latou ia, pe a faalogo i le upu, ua talia ma le fiafia; a e leai ni o latou aa, ua faaletumau lo latou faatuatua, ua oo atu i aso e faaosoosoina ai, ona o ese ai lea. O le mea na paū i le vao tuitui, o i latou ia e ua faalogo, ua o atu ai, ona fetinaiina ai lea i mea e popole ai, ma oloa, ma mea faafiafia o le olaga nei, ona le oo lea ina matua o latou fua. Peitai o le mea na i le eleele lelei, o i latou ia e ua faalogo i le upu, ma tausi i ai i le loto ua faamaoni ma le lelei, ona fua mai ai lea ma le onosai.

Auā e leai se mea lilo e le faaalia; e leai foi se mea natia e le faailoa, a e iu ina faaalia. O lenei, ia outou, pe faapefea lo outou faalogo; auā o se ua i ai mea, e foaiina mai ia te ia; a o se ua le i ai mea, e aveeseina ia te ia o mea ua peiseai ua ia te ia.

E mavaegofie atu le lagi ma le lalolagi, a e le iuvale sina fāsi mataitusi e tasi o le tulafono.

Ua fetalai atu ia, Ia outou, ne‘i faaseseina outou; auā e toatele e o mai i lo‘u igoa, e taitasi ma faapea ane, O a‘u o ia; ua latalata foi ona po; aua foi tou te mulimuli atu ia te i latou.

E mavae atu lava le lagi atoa ma le lalolagi; peitai o a‘u upu, e le mavae atu lava ia.

A o Iesu, e lei faalagolago o ia ia te i latou, auā ua na silafia tagata uma lava. E le aoga foi ia te ia ina ia molimau o se tasi ia te ia i amio a tagata; auā foi ua na silafia mea o i loto o tagata.

O lē faatuatua ia te ia, e le faasalalaina o ia; a o le lē faatuatua, ua nofosala nei lava o ia, auā e lei faatuatua lava ia i le igoa o le Atalii e toatasi o le Atua. O le faasala foi lenei, ina ua oo mai le malamalama i le lalolagi, a o tagata, e sili lo latou manao i le pouliuli i lo latou manao i le malamalama; auā e leaga a latou amio. Auā o i latou uma o e fai mea leaga e ‘ino‘ino i latou i le malamalama, e le o mai foi i le malamalama, ne‘i faailoa a latou amio.

A e oo mai ona aso, ua oo nei foi i ai, o e tapuai faamaoni latou te tapuai i le Tamā i le agaga ma le faamaoni; auā o loo saili le Tamā e tapuai faapena ia te ia. O le Atua o le agaga lava ia; o e tapuai ia te ia, e tatau ona tapuai atu ai i le agaga ma le faamaoni.

Ua fetalai atu Iesu ia te i latou, ua faapea atu, O la‘u mataupu, e le o sa‘u lava, a o lana na auina mai a‘u. Ai se tasi e fia fai lona finagalo, e iloa ai e ia le mataupu, pe mai le Atua, pe ou te tautala fua lava a‘u.

E lei tuuina atu ea e Mose le tulafono ia te outou, a e leai se tasi o outou e anaana i le tulafono; pe se a le mea tou te fia fasioti ai ia te au? Ona tali mai lea o le motu o tagata, ua faapea mai, O ia te oe le temoni; o ai ea e fia fasioti ia te oe?

Aua le soona faamasino, a ia faamasino i le faamasinoga tonu.

Ona toe fetalai atu lea o Iesu ia te i latou, ua faapea atu, O a‘u nei o le malamalama o le lalolagi; o lē mulimuli mai ia te au, e le savali o ia i le pouliuli, a e ia te ia le malamalama o le ola.

Ona fetalai atu lea o Iesu ia Iutaia, e ua talitonu ia te ia. Afai tou te tumau pea i la‘u mataupu, o o‘u soo moni outou. E iloa foi e outou le mea moai, e tuu sa‘oloto foi outou e le upu moni.

Se a le mea e le lagona ai e outou la‘u nei upu? auā tou te le mafaia ona faalogo i la‘u mataupu. O outou nai lo outou tamā le tiapolo, tou te fia faia foi mea e tu‘inanau i ai lo outou tamā. O le fasioti tagata ia talu le amataga, e lei tumau lava ia i le upu moni, auā e le o i totonu lava ia te ia le upu moni; a tautala ia i le tala pepelo, o lana lava lea e tautala a‘i, auā o le pepelo ia, ma le tamā o le pepelo.

O lē mai le Atua, e faalogo ia i afioga a le Atua; o le mea lea tou te le faalogo ai, auā e le mai le Atua outou.

Ona faapea ane ai lea o Iesu. O le faamasinoga, o le mea lea ua ou sau ai i le lalolagi nei: ina ia latou vaai o e le vaavaai, ia faatauasoina foi i latou o e vaai. Ua faalogo mai i ia mea nisi o le au faresaio sa latou i ai ma ia, ona faapea mai lea o i latou ia te ia. O i matou foi, ua matou tauaso ea? Ua faapea atu Iesu ia te i latou, Afai ana outou tauaso, po na leai sa outou agasala; lenei, o loo faapea outou. Matou te vaai; o lea o tumau ai pea la outou agasala.

E moni, e moni, ou te fai atu ia te outou, o le le ui atu i le faitotoa i totonu o le lotoā mamoe, a e alu ae i ai i se tasi mea, o le gaoi lea ma le fao mea. A o lē ui atu i le faitotoa, o le leoleo mamoe lava lea. E to mai ia te ia le puipui e le leoleo faitotoa: e faalogo foi mamoe i lona leo: e valaau e ia i ana lava mamoe i o latou igoa; na te ta‘ita‘i atu foi ia te i latou. Pe a tuuina atu e ia ana lava mamoe, e muamua atu ia i ai; ona mulimuli atu ai lea o mamoe ia te ia, anā ua latou iloa lona leo. A e le mulimuli atu i latou i se tagata ese, a e sosola ese ia te ia; auā latou te le iloa leo o tagata ese.

A o le auauna, e le o le leoleo foi o ia, e le ana le lafu mamoe; ua vaai atu ia i le luko ua sau, ona lafoai lea e ia o mamoe, a e sola; ona puea lea o mamoe e le luko, ma faasalalauina. E sola le auauna, auā o le auauna lava ia, e le manatu foi o ia i mamoe.

Ua ia faia faailoga e tele lava i o latou luma, a e lei talitonu i latou ia te ia, ina ia taunuu ai le upu a Isaia le perofeta, ua ia faapea mai, Le Alii e, o ai ea ua talitonu i la matou upu e taulogologo atu? ua faaalia foi ia te ai le aao o le Alii? O lenei, e le mafai e i latou ona talitonu, auā ua toe faapea mai Isaia, Ua ia faatauasoina o latou mata, ma na faamaaaina o latou loto, ne‘i vaai o latou mata, ma lagona o latou loto, ne‘i liliuina foi i latou, ma a‘u faamaloloina i latou.

O lē faaleaoga ia te au, ma ua le talia a‘u upu, o ia te ia le tasi na te faasalaina ia; o le upu ua ou tautala atu ai, e faasala lea ia te ia i le aso gataaga.

Ua fetalai atu Iesu ia te ia. O a‘u nei le ala, ma le upu moni, ma le ola; e le alu atu lava se tasi i le Tamā, pe a le ui mai ia te au.

Afai tou te alofa mai ia te au, ia outou tausi mai i a‘u poloaiga.

o le Agaga lea e tupu mai ai le upu moni, e le mafai e le lalolagi ona talia o ia, auā, ua le vaaia o ia, ua le iloa foi o ia; a o outou, ua outou iloa o ia, auā e tumau pea ia ia te outou, e i ai foi o ia i totonu ia te outou.

A o le Fesoasoani, o le Agaga Paia lea, e auina mai e le Tamā i lo‘u igoa, o ia lava na te a‘oa‘o ia te outou i mea uma lava; e faamanatu mai foi o ia ia te outou i mea uma ua ou fai atu ai ia te outou.

A maliu mai le Fesoasoani, o le ou te auina mai ia te outou mai le Tamā, o le Agaga lea e tupu mai ai le upu moni, o lē maliu mai mai le Tamā, o ia lava e molimau ia te au.

A e a maliu mai o ia, o le Agaga lea e tupu mai ai le upu moni, e ta‘ita‘i e ia ia te outou i upu moni uma; auā e le tautala fua ia na o ia, a o mea uma e faalogo i ai o ia, e tautala a‘i lava, ma faailoa mai ia te outou mea e oo mai.

Ia e faapaiaina i latou i lau upu moni; o lau afioga o le upu moni lea.

A ua fai atu Peteru, Anania e, se a le mea ua faatumu ai e Satani lou loto e te pepelo ai i le Agaga Paia, ma e tuu ai ma oe nisi mea o le tau o le fanua? A o tumau e lei faatauina, e le o lou lava ea? ua uma foi ona faatauina, e lei i lau pule ea? Se a le mea ua tuu ai lenei mea i lou loto? ua e le pepelo i tagata, a o le Atua.

O outou, e ua maaa ua, ma ua le peritomeina o loto ma taliga, ua outou tetee atu pea lava i le Agaga Paia; pei o outou tamā ua faapea foi outou.

O lenei, ina tausi ia outou ia te outou, atoa ma le lafu mamoe uma lava ua tofia ai outou e le Agaga Paia e fai ma leoleo, ia leoleo atu i le ekalesia a le Atua, ua faatauina e ia mona i lona lava toto.

Auā o a‘u nei, ua ou iloa lenei mea, pe a mavae ona ou alu, e oo mai ia te outou luko saua o e le faasaoina le lafu mamoe. E tupu mai foi ia te outou lava tagata e tautala mai i mea faapiopio, e fetoso ese ai le au soo ia mulimuli ia i latou. O le mea lea ia outou mataala ai, ma ia manatu e tolu tausaga ou te lei mapu ai i le po ma le ao i lo‘u apoapoai atu ma loimata i tagata taitoatasi.

e faapupula i o latou mata, ia liliu mai mai le pouliuli i le malamalama, mai le pule foi a Satani ia liliu i le Atua; latou te maua ai le faamagaloina o agasala, ma le tofi faatasi ma i latou ua faapaiaina i le faatuatua ia te au.

Ua faaalia mai foi le toasa o le Atua mai le lagi i le amio faalematau ma le amio leaga uma lava a tagata, o e taofi i le upu moni ma le amioletonu.

auā o ana mea e le vaaia talu ona faia o le lalolagi, e vaaia lava ia i le mafaufau i mea na faia, o lona mana lava lea e faavavau ma lona Atua; o lea foi ua le mautali ai i latou. Auā foi na iloa e i latou le Atua a ua le vivii ma faafetai atu ia te ia, ia tusa i le Atua; a e peitai ua faavaleleaina i latou i lo latou taumasalosaloga, ua faapouliuligia foi o latou loto vālea;

ua vālea i latou, a o faafiapopoto i latou,

o i latou ia o e ua fesuiai le upu moni i le Atua ma le upu pepelo; ua latou matatau foi ma auauna i mea na faia, a ua tuua o ia na na faia, o ia o lē viia e faavavau.

(auā e le ta‘uamiotonuina i luma o le Atua e ua faalogologo atu i le tulafono, a e peitai o e anaana i le tulafono, e ta‘uamiotonuina i latou.

Aua ne‘i faapea; ia tuu le faamaoni i le Atua, a o le pepelo i tagata uma lava; pei ona tusia, Ina ia ta‘uamiotonuina oe i au afioga, ma ia e malo pe a faamasinoina oe.

e leai sē saili i le Atua. Ua latou o ese uma lava, ua leaga faatasi i latou, e leai se ua amio lelei, ua leai lava se tasi. Ua se tuugamau ua faamaga o latou faaī, ua ‘ole‘ole o latou laulaufaiva, o i o latou laugutu le mea oona o le asipi.

O lenei foi, e paia lava le tulafono, ma le poloaiga e paia, e tonu, ma ua lelei.

O le upu moni ou te fai atu ai i luma o Keriso, ou te le pepelo, ua molimau mai ia te a‘u lo‘u loto fuatia ifo i le Agaga Paia,

Auā ou te molimau ia te i latou, ua latou maelega i la le Atua, a e le tusa ma le poto. Auā ua le iloa e i latou le amiotonu mai le Atua, ma ua saili e faatu la latou lava amiotonu, ua latou le usiusitai ai i le amiotonu ma le Atua. Auā o le iuga o le tulafono o Keriso lea, e oo mai ai le amiotonu i e faatuatua uma lava.

O lenei, e tupu le faatuatua i le taulogologo atu, o le taulogologo atu foi o i le afioga a le Atua lea.

Pei ona tusia, Ua tuu atu e le Atua ia te i latou le loto moe gase, o mata latou te le vaai ai, ma taliga latou te le faalogo ai, ua oo i ona po nei.

Ia outou talia le ua vaivai i le faatuatua, a e le ina ia faamasinoina o masalosaloga.

Ou te aioi atu foi ia te outou, le au uso e, ia outou vaavaai i e faatupu fevaevaeaiga, ma mea e tausuai ai; o mea ia e le tusa ma le mataupu ua a‘oa‘oina ai outou; ia outou liliu ese foi ia te i latou. Auā o e faapea, e le auauna i latou i lo tatou Alii o Iesu Keriso, a o latou lava manava; ma latou faasese i loto o tagata ua le manatu leaga, i lo latou faaneenee ma alofa faavivii.

Auā o le poto o le Atua, ina ua le iloa le Atua e le lalolagi i lo latou poto, ua finagalo ai le Atua ia faaolaina i le valea o le tala‘iga e ua faatuatua. Auā o loo fai mai Iutaia i se faailoga, ma Eleni o loo saili i latou i le poto; a o i matou, ua matou tala‘i atu ia Keriso na faasatauroina, o le mea e tausuai ai Iutaia, ma le valea ia Eleni; a e peitai o e ua valaauina, o Iutaia atoa ma Eleni, ua fai Keriso ma mana o le Atua, ma poto o le Atua ia te i latou. Auā o le valea o le Atua e sili lona poto i tagata; o le vaivai foi o le Atua e sili lona malosi i tagata.

O a‘u nei foi, le au uso e, ou te lei alu atu ma le sili o le upu ma le poto, ina ua ou alu atu ia te outou i lo‘u tala‘i atu ia te outou le mau a le Atua. Auā na tonu lo‘u manatu, ou te le iloa se tasi mea ia te outou tau lava o Iesu Keriso, o ia lava na faasatauroina. Na ou i ai foi ia te outou ma le vaivai, ma le mata‘u, ma le gatete tele; e lei sauni atu foi la‘u upu, ma la‘u tala‘iga i upu mālie o le poto o tagata, a e peitai o le faasino mai e le Agaga ma le mana; ina ia le i ai lo outou faatuatua i le poto o tagata, a o le mana o le Atua.

A e matou te tautala atu i le poto i e ua uma ona a‘oa‘oina; a e le o le poto o lenei lalolagi po o le poto o alii o lenei lalolagi ua faaleaogaina; a e peitai matou te tautala atu i le poto o le Atua i le upu lilo sa natia, na tofia e le Atua anamuā anamuā lava, ina ia tatou manuia ai; o le mea na le iloa e se alii e tasi o lenei lalolagi; auā ana latou iloa, po ua latou le faasatauroina le Alii e ona le manuia.

Po o ai foi se tagata ua iloa mea a le tagata, ua na o le agaga o le tagata o loo i totonu ia te ia? E faapea foi ona le iloa e se tasi mea a le Atua, ua na o le Agaga o le Atua. A ua maua e i matou e le o le agaga o lenei lalolagi, a o le agaga mai le Atua, ina ia matou iloa mea ua foaifuaina mai e le Atua ia te i matou. O ia mea foi matou te tautala atu ai i upu e a‘oa‘oina mai e le Agaga Paia, a e le o upu e a‘oa‘oina ai i le poto o tagata, o loo faamatalaina mea faaleagaga i upu faaleagaga.

A e le talia e le tagata faaletino o mea a le Agaga o le Atua; auā o mea valea ia ia te ia, na te le mafai foi ona iloa, auā e faamasinoina faaleagaga. A o le tagata faaleagaga e faamasino e ia i mea uma, a e le faamasinoina o ia e se tasi. Auā po o ai ua na iloa le finagalo o le Alii na te a‘oa‘oina atu o ia? A ua tatou maua le finagalo o Keriso.

Auā e le mafaia e se tasi ona tuu se isi faavae i le ua uma ona tuuina, o Iesu le Keriso lea.

Aua ne‘i ai se tasi e faaseseina o ia e ia. Afai ua ia te outou se tasi o manatu e poto ia i lenei lalolagi, ia avea ia ma vale, ina ia poto ai o ia. Auā o le poto o lenei lalolagi o le valea lea i luma o le Atua; auā ua tusia, E maua e ia o e popoto i a latou lava togafitiga; i le ma lea, Ua silafia e le Alii manatunatu o e popoto, ua faatauvaa ia.

O lenei, se a ea lo‘u taui? O lenei, pe a ou folafolaina atu le tala lelei, ia ou avatu le tala lelei a Keriso ma le le tauia mai; ina ia ou le faia la‘u pule i le tala lelei.

Aua foi tatou te faaonoono ia Keriso, pei ona faaonoono o isi o i latou, ma fano ai i gata.

A e afai e fia finau se tasi, e leai se tu faapea ia i matou, e leai foi i ekalesia a le Atua.

Auā e muamua lea, ua logo mai ia te au, pe a potopoto outou i le ekalesia, ua ia te outou maseiga; ua ou taofi foi e moni nisi mea; auā e ao ina tupu o fevaevaeaiga ia te outou, ina ia faaalia o e ua faamaoni o ia te outou.

O lenei, ai sē ‘ai i lenei areto, pe inu i le ipu a le Alii ma le faaletatau, e nofo sala o ia i le tino ma le toto o le Alii. A ia suesue ifo le tagata ia te ia, i le ‘ai ai o ia i lenei areto, ma inu i lenei ipu. Auā o lē ai ma inu faaletatau ua ‘ai o ia ma inu i lona lava faasala, ina ua le faautauta o ia i le tino o le Alii. O le mea lea ua mamai ai ma vaivai ai ni o outou e toatele, ma nisi e toatele ua latou momoe. Auā afai ana tatou faamasino ia te i tatou, po ua le faasalaina i tatou. A ua aoaiina i tatou e le Alii ina ua faasalaina, ina ne‘i matuā faasalaina i tatou faatasi ma le lalolagi.

a e peitai ou te loto ina ia ou tautala i le ekalesia i ni upu se lima ma lo‘u mafaufau, ina ia ou a‘oa‘o atu i nisi, a e ou tele loto i ni upu se mano i se gagana ese. Le au uso e, aua tou te faatamaiti i le mafaufau; peitai ane ia outou faatamameamea i le leaga, a ia outou tagata matutua i le mafaufau. Ua tusia i le tulafono, Ua fetalai mai le Alii, Ou te tautala atu i lenei nuu i gagana eseese ma laugutu ese; a e ui lava ina faapea, latou te le faalogo mai lava ia te au.

Auā o le Atua, e le o le Atua ia o le faasoesa, a o le filemu; faapei o i ekalesia uma o le au paia. Aua le tautala o outou fafine i ekalesia; auā e le tuuina ia te i latou e tautala; a ia latou usiusitai, pei ona fai mai ai foi o le tulafono. Afai foi ua latou fia iloa se tasi mea, ia latou fesili atu ai i a latou lava tane i o latou fale; auā o le mea matagā ona tautala o le fafine i le ekalesia. Na alu atu ea le upu a le Atua nai ia te outou? po ua na o outou ea na oo atu i ai? Ai se tasi ua ta‘ua o le perofeta, po o le ua i ai le Agaga, ia iloa lelei e ia, o mea ou te tusi atu nei ia te outou, o poloaiga ia a le Alii. A e afai e le iloa e se tasi, ia le iloa pea e ia.

Le au uso e, ou te faailoa atu ia te outou le tala lelei na ou folafolaina atu ia te outou, na outou talia foi, o loo tumau i ai foi outou, ua ola ai foi outou; pe afai tou te taofi mau i le mataupu na folafolaina e a‘u ia te outou; pe afai ua outou le talia fua.

Aua ne‘i faaseseina outou, O le feoai ma e amio leaga e leaga ai amio lelei. Ina ala mai ia i le amiotonu, a e aua ne‘i agasala; auā ua pouliuli nisi i la le Atua; ou te faapea atu ia te outou e faamā ia te outou.

ina ne‘i ‘ole‘olegia i tatou e Satani; auā tatou te le vālea i ana togafiti.

Ua faafetai i le Atua, o le ua matou manumalo ai pea lava ona o Keriso, o le ua matou faaali atu ai foi i nuu uma le manogi o le mataupu ia te ia. Auā o le nanamu i matou ia Keriso i le Atua i e o faaolaina, atoa ma e o malaia; o le manogi o le oti e oo i le oti i nisi; a o le manogi o le ola e oo i le ola i nisi. Po o ai foi sē tusa ma nei mea? Auā o i matou nei, e le pei o le toatele o e o faafilogia le afioga a le Atua; a ua matou tautalatala atu mai le loto lelei, mai le Atua foi, o i luma o le Atua, o i matou ua ia Keriso.

o ia foi na sauni i matou ia tatau ona fai ma auauna o le feagaiga fou, e le o le tusi, a o le Agaga; auā e a le tusi e fasioti, a e a le Agaga e faaola.

a e peitai sa faatauasoina o latou manatu; auā ua oo mai i nei ona po o tumau pea lea lava ufiufi pe a faitauina le feagaiga tuai, e lei faailoa ua faaumatia lea talu Keriso. A ua oo i nei ona po, o loo i ai lava le ufiufi i o latou loto pe a faitauina Mose. A e peitai pe a liliu i le Alii, ona aveeseina ai lea o le ufiufi.

a ua matou lafoai mea lilo e mamā ai, e le o savavali ma le amio pepelo, e le o faafilogia e i matou le afioga a le Atua; a ua faailoa matou e i matou i le loto fuatia ifo o tagata uma i luma o le Atua i lo matou faaali atu le upu moni. Afai foi ua ufitia la matou tala lelei, ua ufitia ia i e ua fano; ua faatauasoina manatu o i latou o e le talitonu e le atua o le lalolagi nei, ina ne‘i pupula atu ia te i latou le malamalama o le tala lelei i le mamalu o Keriso, ua tusa o ia ma le Atua.

auā o auupega a lo matou nei taua e le faaletino ia, a e faamalolosia el e Atua e lepetia ai ‘olo; o loo lepeti i lalo masalosaloga, ma mea maualuluga uma ua faasiasia i le mataupu a le Atua, o loo faatoilaloina manatu uma ia anaana ia Keriso; o loo nofo sauni foi i matou e taui atu i le le anaana uma, pe a faaatoatoaina lo outou anaana.

A e ou te fefe, ina ne‘i pei ona faaseseina o Eva e le gata i lana togafiti, e faapea ona faaleagaina o outou manatu ina ia le tonu ia Keriso. Aua afai e tala‘iina atu e sē alu atu, se Iesu e ese i le na matou tala‘iina atu, pe talia e outou se agaga e ese i le ua outou talia, po o se tala lelei e ese i le ua outou talia, po ua lelei ina ia onosai i ai.

Auā o i latou, o aposetolo pepelo i latou, o le au faigaluega ‘ole‘ole, ua lina i latou e i latou ma aposetolo a Keriso. E le se mea foi lea e ofo ai, auā o Satani lava, ua liua o ia e ia ma agelu o le malamalama. O lenei, e le se mea tele pe a liua ana auauna peiseai o auauna a le amiotonu i latou; o lo latou iuga e tusa ma a latou galuega.

Ina tofotofo ia outou ia te outou, po ua outou i le faatuatua; ina suesue ifo ia ia te outou; pe tou te le iloa ea o outou loto, ua i totonu ia te outou o Iesu Keriso, pe afai ua le pepelo outou?

Ua ou ofo ina ua faapea ona vave liliueseina o outou i le na valaauina outou i le alofa tunoa o Keriso a e faasaga i le tala lelei e ese; e le se tasi tala lelei foi lea, a o isi tagata ua faaatuatuvale ia te outou, ma fia faaliliueseina le tala lelei a Keriso.

A e peitai e ui lava ina tala‘iina e i matou, po o se agelu mai le lagi, ia te outou se tala lelei e ese i lea na tala‘iina atu ai e i matou ia te outou, ia anatema ia. Pei ona matou muai fai atu, ou te toe fai atu ai nei foi, Afai e tala‘iina atu e se isi ia te outou se tala lelei e ese i lea na outou talia, ia anatema ia.

Auā, ou te faaaviavi ea i ona po nei i tagata, po o le Atua; Ou te saili ea ina ia ou faafiafia i tagata? Auā afai ana ou faafiafia pea i tagata, po ua le fai a‘u ma auauna a Keriso. Le au uso e, ou te faailoa atu ia te outou, e le faatatauina i tagata le tala lelei sa tala‘iina atu e a‘u; auā e lei maua lea e a‘u mai se tagata, e lei a‘oa‘oina ai foi a‘u, ua na o le faaaliga a Iesu Keriso na ou maua ai.

Sa faapea foi ona o uso pepelo e na faaofia faaleiloga, o tagata ia na o ane faaleiloga e tilotilo i lo tatou sa‘olotoga ua ia te i tatou ia Keriso Iesu, ina ia latou faapologaina i tatou. A e matou te lei gauai ma ua le usiusitai ia te i latou i sina itu aso, ina ia tumau ia te outou le tonu o le tala lelei.

A ua alu atu Peteru i Anetioka, ona ou matuā finau atu lea ia te ia i ona lava luma, auā ua tatau ona aoaiina o ia. Auā a o lei o mai nisi mai Iakopo, ua aai faatasi o ia ma tagata ese; a ua latou oo mai, ona alo lea o ia, ma vavae ese o ia, ina ua fefe i ē ua peritomeina, ona pepelo lea faatasi ma ia o isi Iutaia uma, ua oo ina tosina o Panapa lava i lo latou pepelo. A ua ou iloa latou te lei savavali tonu e tusa ma le upu moni a le tala lelei, ona ou fai atu lea ia Peteru i luma o i latou uma, O oe le Iutaia, afai e te amio faanuuese, a e le faa-Iutaia, se a le mea ua e tauanau atu ai i nuu ese ia latou faa-Iutaia?

Kalatia valea e, o ai ea na ia pelogia outou, ina ia le anaana outou i le upu moni, ua tusia ia te outou i o outou lava luma o Iesu Keriso ua faasatauroina?

Le au uso e, afai e maua se tagata i se tasi agasala, o outou o i la le Agaga ia outou faafoi mai le ua faapeaina ma le loto o le agamalu, ma ia faaeteete oe ina ne‘i faaosoosoina foi oe. Ia outou fesui i a outou avega e ave, ma ia faapea ona outou faia le tulafono a Keriso. Auā pe a manatu se tasi o le tagata aoga ia, a e leai, ua pelogia o ia e ia i lona manatu.

A o le ua a‘oa‘oina i le upu, ia tufa atu e ia mea lelei uma lava i le ua a‘oa‘o mai. Aua ne‘i faaseseina outou, e le ulagia le Atua auā o le mea e luluina e le tagata, o le mea lava lea e seleseleina mai ai e ia; o sē lulu i la lona tino, e selesele mai ai e ia i la le tino le mea e pala; a o sē lulu i la le Agaga, e selesele mai ai e ia i la le Agaga le ola faavavau.

ina ia le toe tama ninii i tatou o loo felafoaiina e pei o peau, ma feaveaiina i matagi uma lava o matāupu, i le pepelo o tagata, i togafiti leaga ua saunia e faasese ai. A ia amio faamaoni i le alofa, ia tutupu i tatou ia te ia i mea uma, o le ulu lava ia, o ia foi o Keriso;

O lenei, ou te fai atu ia te outou, ma ta‘utino atu lenei mea i luma o le Alii, aua tou te toe savavali faapei o isi nuu faapaupau uma, o e savavali i le valea o latou loto, o loo faapouliuligia o latou mafaufau, o liliueseina i latou i le ola o i le Atua, ona o le valea ua ia i latou, ona o le maaa o latou loto;

O lenei, ia outou tuu ese le pepelo, ia tautalatala faamaoni taitasi ma lē la le tuaoi; auā o itu tino lava i tatou o le tasi i le tasi.

Aua ne‘i alu atu se upu leaga ai o outou gutu, na o le upu lelei e ati ae ai i mea e aoga, e tupu ai le lelei i e faalogologo i ai.

Aua ne‘i faaseseina outou e se tasi i upu faatauvaa; auā o mea ia e oo mai ai le toasa o le Atua i e faalogogata.

auā sa outou pouliuli anamua, a o lenei ua outou malamalama i le Alii; ina savavali ia pei o e ua malamalama; (auā o le fua o le Agaga, o le agalelei uma lava lea, ma le amiotonu, ma le faamaoni;) ia suesue outou pe se a se mea e fiafia i ai le Alii.

Aua foi tou te amio faatasi ma galuega le aoga a le pouliuli, a e lelei ona outou aoai atu.

Auā tatou te le tau ma tagata, a o alii sili, ma faipule, ma alii o le pouliuli o lenei lalolagi, atoa ma agaga leaga i mea o i le lagi.

O lenei, ina tutumau ia outou o fusia o outou sulugātiti i le faamaoni, ia oofu foi outou i le ufifatafata o le amiotonu; ma ia faaseevaeina o outou vae i le sauniga o le tala lelei o le filemu; ia faaopoopo i na mea uma ona tago atu i le talipupuni o le faatuatua, tou te mafai ai ona tinei o u fanafana mu uma lava a loo leaga; ma ia outou ave le puloutau o le olataga, ma le pelu a le Agaga, o le afioga lea a le Atua.

O la‘u tatalo foi lenei, ia faatuputeleina pea lava lo outou alofa, ma le iloa lelei, atoa ma le faautauta uma; ina ia masino ia te outou mea uiga eseese, ina ia avea outou ma ē faamaoni, ma le le ta‘uleagaina pe a oo i le aso o Keriso;

O le upu lea ou te fai atu na, ina ne‘i faaseseina outou e se tasi i upu faaoleole.

Ia outou, ne‘i faatagataotauaina outou e se tasi i le poto le aoga e faasese ai, e tusa ma le uputuu a tagata, e tusa ma mataupu muamua a le lalolagi, a e le tusa ma mataupu a Keriso;

Aua ne‘i faa‘ole‘ole se tasi ia te outou i le taui i lona fia faalalolalo, ma le ifo atu i agelu, o loo suesue i mea ua ia le vaaia, o loo faafefetefuaina lona lava mafaufau faaletino;

O lenei, afai ua outou oti faatasi ma Keriso i mataupu muamua a le lalolagi, se a le mea tou te usiusitai atu ai i tulafono, peiseai ua nonofo outou i le lalolagi? (Aua ne‘i pa‘i atu i ai, aua ne‘i tofo, aua ne‘i tago; o mea uma ia e uma ai pe a tagofia;) e tusa ma poloaiga ma mea e a‘oa‘o atu e tagata; o mea ia te ta‘ua ai le poto, ma le faafiaamioatua, ma le faamaulalo, ma le faasaunoa o le tino, a e le o le tausi i ai e ma‘ona ai le tino.

Aua le fetaupelopeloai, ina ua toeseina e outou le tagata tuai atoa ma ana amio, a ua outou oofu i le tagata fou, o le ua faafouina i le poto, e faatatau ia foliga i le na faia o ia.

Ia tofotofo i mea uma lava, ia taofi mau i le mea lelei.

Aua ne‘i faasese se tasi ia te outou i se togafiti e tasi; auā e le oo mai lena aso, seia muai ona taunuu o le tete‘a ese, ma ia faaalia mai o le tagata o le agasala, o le tagata lea o le malaia,

o lona sau foi e pei o le galuega a Satani, i le mana uma, ma faailoga, ma vavega pepelo, ma mea faasese uma o le amio leaga i e a fano; auā ua latou le talia le upu moni ma le fiafia i ai, ina ia faaolaina ai i latou. O le mea foi lea e auina atu ai e le Atua ia te i latou le galuega e faasese ai, ina ia latou talia le mea pepelo; ina ia faasalaina o i latou uma lava o e le talia le upu moni, a e fiafia i le amioleaga.

O le mea lea le au uso e, ia outou tumau ai, ma ia taofi mau i upu tuu na a‘oa‘oina ai outou i la matou upu ma la matou tusi.

Matou te fai atu ia te outou, le au uso e, i le suafa o lo tatou Alii o Iesu Keriso, tou te vavae ese i uso uma o e amio faapiopio, ma le le tusa ma le uputuu na latou maua ia te i matou.

Faapei ona ou aioi atu ia te oe, i lo‘u alu atu i Maketonia, e te nofo i Efeso, ia faapea ona e faia, ina ia e vavao atu i nisi, aua foi ne‘i latou a‘oa‘o i upu ese; aua ne‘i manatu i latou i tala o le vavau ma tala i gafa e leai ni ona gataaga, o mea ia e tupu ai finauga, a e le o le faamafanafanaga mai le Atua o loo i le faatuatua. A o le iuga o le poloaiga, o le alofa lea ai le loto mamā, ma le loto fuatia ifo ua lelei, ma le faatuatua faamaoni; ua sese ai nisi i ia mea, ua latou liliu ane i upu le aoga; ua mananao i latou e fai ma a‘oa‘o i le tulafono, a ua latou le iloa mea latou te tautalatala i ai, ma mea latou te finau faamalosi i ai.

o lē finagalo ina ia faaolaina o tagata uma lava, ma ia oo ina iloa lelei le upu moni. Auā e toatasi le Atua, e toatasi foi le puluvaga i le Atua ma tagata, o le tagata o Keriso Iesu lea; o le na foaifuaina e ia ia te ia e fai ma togiola mo tagata uma lava, e fai ma molimau i ona lava po e tatau ai; na tofia a‘u mo lenei mea, o lē tala‘i ma le aposetolo, (o le upu moni ou te fai atu ai ia Keriso, ou te le tala pepelo,) o le a‘oa‘o o nuu ese i le faatuatua ma le upu moni.

Ia a‘oa‘oina le fafine, a ia le tautala o ia, ma ia usiusitai lava. Auā ou te le tuuina atu i se fafine ia a‘oa‘o atu, pe pule i le tane, a ia nofo faalologo lava. Auā ua muamua ona faia o Atamu, a e mulimuli Eva. E lei ‘olegia foi Atamu, a ua ‘olegia le fafine, ona solitulafono lea o ia;

A o loo ta‘utino mai e le Agaga, e o ese nisi i le faatuatua i tausaga amuli, latou te faalogo i agaga e faasese ma mataupu a temoni; ona o le pepelo o tagata tala pepelo, o e ua faamuina o latou lava loto fuatia ifo i le uamea aasa;

Afai e te tuuina atu na mea i le au uso, e fai ai oe ma auauna lelei a Iesu Keriso, e tausia oe i upu o le faatuatua ma le mataupu lelei ua e taofi i ai. A o tala leaga o le vavau a fafine valevalematua, ia e ‘alo ese ai; a ia e faamasani i le amio Atua.

Ia e matuā fai atu na mea, ma e a‘oa‘o atu ai. Aua ne‘i ‘ino‘ino se tasi i lou taulealea, a ia fai oe ma faaa‘oa‘o i e ua faatuatua, i le upu, ma le amio, ma le alofa, ma le loto, ma le faatuatua, ma le le gaoiā. Ia e faasaga i le faitau, ma le apoapoai atu, ma le a‘oa‘o atu, seia ou alu atu. Aua ne‘i e faatalale i le mea alofa na tuuina atu ia te oe i le valoaga ma le faaee atu o lima o toeaina. Ia e mafaufau i ia mea, ia e faamasani ai; ina ia iloa ai e tagata uma o oe o le alualu. Ia oe lava ia te oe, atoa ma lau e a‘oa‘o atu, ia e tumau pea i ai; auā a ē fai lena mea, e faaolaina ai oe e oe atoa ma e ua faalogologo ia te oe.

O toeaina o e pule lelei, ia ta‘uaogaina i latou ona faateleina atu i ai o le mamalu, a e faasili i e galulue i le upu atoa ma le a‘oa‘o atu. Auā o loo fai mai le Tusi, Aua ne‘i e fusi le gutu o le povi a o solisolia e ia le saito; i le ma lea, E tatau ona avatu i le faigaluega o lona taui.

Aua ne‘i talia se mau i se toeaina, vagana o i ai se mau a le toalua po o le toatolu. Ia aoai atu i e agasala i luma o tagata uma, ina ia matatau ai nisi uma lava. Ou te matuā fai atu lava ia te oe i luma o le Atua, ma le Alii o Iesu Keriso, ma le au agelu na filifilia, ina ia e tausi i na mea ma ia le muai faasala, aua foi le faia se mea ma le faailogaina se tasi. Aua e te vave faaee atu lima i se tasi; aua foi le ‘au faatasi i agasala a isi tagata. Ia taofi oe ia te oe ina ia sao lau amio.

Afai e a‘oa‘o ese se tasi, ma le le gauai i upu e ola ai a lo tatou Alii o Iesu Keriso, ma le mataupu e tatau ma le amio Atua, ua faafefeteina o ia, ua le iloa se mea, a ua se ma‘i lona suesue ma lona finau i upu e tupu mai ai le mataua, ma le misa, ma faifaiga, ma masalosalo leaga, o finauvalega o tagata loto leaga, o e ua tetea ma le upu moni, o e ua manatu o le mea e maua ai le oloa o le amio Atua lea; ia e ‘alo ese i tagata faapea.

Timoteo e, ia e tausi i le mea na tuuina atu ia te oe, ma ‘alo‘alo ese i upu leaga ma le le aoga, ma finauga i mea ua igoa pepelo ai o le poto; o isi o e na taofi ai, ua sese ai i latou i le upu o le faatuatua. Ia ia te oe le alofa tunoa. Amene.

Ia e faamanatu ia te i latou i ia mea, ma ta‘utino i luma o le Alii, aua ne‘i latou fefinauai i upu e leai se aoga, a e faaseseina ai o e faalogologo i ai.

Ia e taumafai ina ia avea oe ma le ua fiafia mai i ai le Atua, o le faigaluega e leai se mea e mā ai, na te vavaetonuina le upu moni. A ia e taumamao ma upu leaga ma le le aoga; auā e tupu atili ai le amio faalematau,

o a latou upu foi e aati pei o se papala; e i ai Umenio ma Fileto; o i laua ia ua sese i le upu moni, o loo faapea ane, Ua mavae lava le toe tu; ua faaliliu ese ai nisi tagata i le faatuatua. A e ui lava i lea o le faavae mau o le Atua e tu lava lea, o loo i ai lenei faailoga, Ua silafia e le Alii ona lava tagata; atoa ma lea, Ia o ese i le amio leaga i latou uma o e ta‘uta‘u le suafa o Keriso.

A o sailiga valea ua le a‘oa‘oina mai, ia e ‘alo ese ai, auā ua iloa o mea ia e tupu ai le fefinauaiga. Auā e le tatau ona finau o le auauna a le Alii, a ia agamalu i tagata uma, ia mafaia ona a‘oa‘o atu, ma ia onosai, ia a‘oa‘o atu ma le agamalu i e o finau mai; pe mafai lava le Atua ona foai atu ia te i latou le salamo, ina ia latou iloa lelei le upu moni; ia latou ala mai foi na moe i le mailei a le tiapolo, o e ua maua e ia, ina ia faia lona lava finagalo.

auā e avea tagata ma e alolofa i latou ia i latou, o e mananao i tupe, o e loto vii, o e faamaualuga, o e upu leaga, o e le faalogo i mātua, o e le faafetai, o e amio leaga, o e le lotoaiga, o e tuumavaega, o e faatuaupua, o e le taofi manao o le tino, o e faasaua, o e le alolofa i tagata amio lelei, o e faalata, o e soona fai, o e ua faafefeteina, o e ua tele le manao i mea faafiafia a e leai se manao i le Atua; o e ua peiseai ua amio Atua, a o le mana ua i lea mea ua latou teena; ia e ‘alo ese lava i tagata faapena.

E i ai foi nisi o e ulu atu i fale, ma ave faatagataotaua fafine valelea, ua mafatia i agasala, o e ua ta‘ita‘ieseina e tu‘inanau eseese, ua a‘oa‘oina e le aunoa, a e le āu mafai ona oo ina iloa lelei o le upu moni.

Faapei o Iani ma Iameri e na tetee atu ia Mose, e faapea foi i latou ia ona tetee atu i le upu moni, o tagata ua loto leaga, o e ua le faamaoni i la le faatuatua. A e le alualu pea i latou, auā e iloa lelei lava lo latou valea e tagata uma, faapei o i laua.

O i latou uma foi o e loto ina nonofo ma le amio Atua ia Keriso Iesu, e sauaina i latou. A o tagata amio leaga ma e taupelopelo, e alualu pea lava lo latou leaga, o loo faasese atu, ua faaseseina foi i latou.

A o oe, ia e tumau i mea ua a‘oa‘oina ai oe, ma ua mautinoa ia te oe, ina ua e iloa o ia na a‘oa‘o atu ai ia te oe; talu foi ina o e tama itiiti ua e iloa Tusi Paia, e mafaia ona faapoto ai ia te oe e iu ai i le ola i le faatuatua ua ia Keriso Iesu. O Tusi Paia uma lava e mai le Agaga o le Atua ia, e aoga foi ia e a‘oa‘o ai, e aoai ai, e faatonu ai, e faapoto ai foi i le amiotonu, ina ia atoatoa ona lelei ai o le tagata o le Atua, ia saunia lava ia i galuega lelei uma lava.

ia e tala‘i atu le upu, ia e faamalosi i ona aso e taugalemu ai, ma ona aso e le taugalemu ai, ia e faatonu atu, ia e aoai atu, ia e apoapoai atu ma le onosai uma atoa ma le a‘oa‘o atu. Auā e oo i ona po latou te le mafafai ai ona talia o le mataupu e ola ai, a e tusa ma o latou lava tu‘inanau, latou te faapotopoto ai a‘oa‘o mo i latou, ina ua feū o latou taliga; latou te liliu ese foi o latou taliga i le upu moni, a e liliu atu i tala o le vavau.

o lē taofi mau i le upu moni, faapei ona a‘oa‘oina o ia, ina ia mafaia e ia ona apoapoai atu i le mataupu e ola ai, ma aoai atu i e finau mai. Auā e toatele o e solitulafono ua tautalatala i upu le aoga ma faasese atu, a e sili musa le au peritome; e tatau ina punitia o latou gutu; ua latou faaliliu ese i nisi aiga atoa, o loo a‘oa‘o i mea le tatau, ina ua matapeapea i le oloa. Sa faapea mai le tasi o i latou, o sa latou lava perofeta, O tagata Kereta, e sagasaga tala pepelo lava i latou, o manu feai leaga, o e usuusua‘i ina ‘ai. O le molimau moni lava lea. O le mea lea ia maamaai ona e aoai atu ai ia te i latou, ina ia latou faamaoni i le faatuatua; aua ne‘i taofi i tala o le vavau faa-Iutaia, ma poloaiga a tagata o e liliu ese i le upu moni. Ua mamā mea uma i e ua loto mamā, a o e loto eleelea ma le le faatuatua, e le mamā ia te i latou se mea e tasi, a ua eleelea o latou mafaufau atoa ma o latou loto fuatia ifo. Ua latou ta‘u ane ua latou iloa le Atua, a e faafiti ia te ia i a latou galuega, o inosia i latou ma faalogogata, latou te le faamaoni foi i se galuega lelei e tasi.

A o oe, ia e tautala atu i mea e tusa ma le mataupu e ola ai; fai atu i toeaina ia mataala i latou, ia faatoeaina, ia faautauta, ia faamaoni i le faatuatua, ma le alfoa, ma le onosai.

Ia faapena foi loomatutua, ia amio i latou i le amio Atua, aua ne‘i faatuaupua, aua ne‘i faapologaina i latou i le uaina, a ia fai ma a‘oa‘o i mea lelei, ina ia latou a‘oa‘o atu i fafine muli latou te alofa atu i a latou tane, ia alofa atu i a latou fanau, ia faautauta i latou, ia le gaoiā, ia tausi lelei i o latou aiga, ia agalelei, ia usiusitai atu i a latou lava tane, ina ne‘i upuleagaina le afioga a le Atua.

Ia faapea foi ona e apoapoai atu i taulelea, ia faautauta i latou. Ia avea oe a faaa‘oa‘o o galuega lelei i mea uma lava; ia e a‘oa‘o i le mataupu ma le faamaoni, ma le faatoeaina, ma le upu e ola ai, e le mata‘uleagaina, ina ia faamāina ai o lē tetee mai, ina ua le maua e ia se mea leaga e talatala ane ai ia te outou.

Apoapoai atu i pologa ia usiusitai i latou i o latou lava matai, ia latou taumafai ona faafiafia i ai i mea uma lava, aua ne‘i faatau upu i ai. Aua ne‘i latou gaoi, a ia faaalia e i latou ua latou faamaoni aiai, ina ia viia ai i mea uma lava talu o i latou le mataupu a le Atua lo tatou Faaola.

A ia taumamao ma sailiga valea ma tala tupuga, ma le femisaiga, ma le fefinauaiga i la le tulafono; auā o upu le aoga ia ma le faatauvaa. O le tagata na te faatupu le fevaevaeaiga ia e ‘alo ese ia te ia pe a uma atu ia te ia le aoaiga e atu tasi pe atu lua; auā ua iloa o le tagata faapena ua liliueseina lava o ia, ma ua agasala, ua faasalaina o ia e ia.

O le mea lea e tatau ona atili ai ona tatou naunau i mea ua tatou faalogologo i ai, ne‘i te‘a ia i tatou. Auā afai na faamauina le upu na molia mai e agelu, taitasi foi soli tulafono ma faalogogata ma oo i ai le taui e tusa ai, pe sao faapefea i tatou pe a faatamala i le olataga e matuā tele? sa muai fetalaia mai e le Alii, ona faamaonia mai lea ia i tatou e i latou sa faalogo ia te ia;

Le au uso e, ia outou, ne‘i ai i so outou le loto leaga ma le le talitonu, tou te o ese ai i le Atua soifua;

O ai foi i latou na ia tauto i ai, latou te le sao atu i lona malologa? e le o i latou ea e na faalogogata? O lenei, ua tatou iloa na le mafai ona sao atu i ai i latou ona o le le talitonu.

Auā o loo ola le afioga a le Atua, o loo matuā galue foi, o loo sili foi lona maai i pelu uma e faatau maai itu, o loo vaevae foi e oo lava i le vavaeeseina o le loto ma le agaga, o gaugātino foi ma aano o ivi, o loo faamasino foi i manatu ma filifiliga o le loto; e le lilo foi se tasi mea na faia i ona luma, a ua taatia fua ma ua aliali mai o mea uma lava i lana silafaga, tatou te ta‘u atu ia te ia a tatou amio.

Auā e le mafaia ia te i latou e na muai faamalamalamaina, na latou tofo foi i le mea foaifuaina mai i le lagi, ma ua faatofutofusia i le Agaga Paia, o e ua tofo foi i le upu lelei a le Atua ma le mana o le ola atali, ma ua pauu i latou, e le mafaia ona toe faafouina o i latou ina ia salamo, ina ua toe faasatauroina e i latou lava le Alo o le Atua, ma faainosia o ia i luma o tagata.

Auā afai tatou te agasala ma le loto i ai pe a uma ona talia o le malamalama o le upu moni, ua le toe lava se taulaga mo agasala, na o le faatali ma le mata‘u tele i le faasala, ma le toasa e mumū e susunu ai e o tetee atu. O le na faaleaogaina le tulafono a Mose na oti o ia i le mau a le toalua po o le toatolu, ua le alofagia; pe ni a fa outou i le sili o le mamafa o le taui e ta‘utatauina ai le ua soli le Alo o le Atua, ma ua ta‘ulepaiaina e ia le toto o le feagaiga na faapaiaina ai o ia, ma ua upu leaga i le Agaga o le alofa tunoa?

Ia outou faaeteete ia te outou, ne‘i ai se tasi e le maua atu le alofa tunoa o le Atua; ne‘i ai se aa oona e tupu ae e faasoesa ia te outou, ma leaga ai nisi e toatele; ne‘i ai se faitaaga, po o se faatalale i mea paia, pei o Esau, o le na avatu lona tofi o le ulumatua e faatau a‘i le ‘ai e tasi. Auā ua outou iloa e mulimuli ane, ina ua manao o ia ia maua le faamanuia, ua teena o ia; auā e ui lava ina ua matuā faatoga ma loimata, a ua le maua e ia se mea e liliu ai le loto o lona tamā.

Aua le feaveaiina outou i mataupu ese ma uiga eseese; auā e lelei ina faatumauina o le loto i le alofa tunoa, e le o mea e ‘ai, ua leai se aoga i e ua taofi i ai.

ina ua outou iloa o le tofotofoina o lo outou faatuatua e tupu ai le onosai; a ia atoatoa le galuega a le onosai, ina ia atoatoa ai ma ia sao ona lelei ai outou, ia leai se mea e tasi e mativa ai. A e afai ua leai se poto i so outou, ina ole atu ia i le Atua, o lē foai tele mai i tagata uma ma le le toe ta‘uta‘ua; ona foaiina mai ai lea ia te ia.

A ia fai outou ma e anaana i le upu, a e aua le na ona faalogologo i ai, o faaseseina ai outou e outou. Auā ai se tasi e faalogologo i le upu a e le anaana i ai, e tusa ia ma le tagata ua vaavaai i le faaata i ona lava mata. na fanau ma ia; auā ua vaavaai o ia ia te ia, ona alu ese lea, ua galo loa le uiga o ona mata;

O‘u uso e, aua le toatele outou e fai ma a‘oa‘o, ina ua tatou iloa e atili ai ona faasalaina o i tatou. Auā o mea e tele e sese ai i tatou uma; a le sese se tasi i le upu, o le tagata lea ua sao, na te mafaia foi ona taofi i le tino uma.

E faapea foi le laulaufaiva, o le mea itiiti lea, a ua lafo upu faasili. Faauta, o le afi itiiti e mu ai le vao laau e tele. O le laulaufaiva o le afi lea, o le faupuega o amio leaga; ua faapea ona tuuina le laulaufaiva i o tatou itu tino, o loo leaga ai le tino uma, ua faamuina ai le olaga nei uma lava; ua faamuina foi lena mai Kēna.

O lenei, ua ia te outou o e faatuatua o lenei mamalu; a o e faalogogata, O le maa na lafoaiina e tufuga fai fale, ua avea lava lea ma tulimanu aupitoaluga, ma maa e tausuai ai, ma papa e tautevateva ai; o e tausuai i latou ua faalogogata i le upu, na tofia foi i latou i lea lava mea.

Auā o lē fia manao i le ola, ma ia iloa aso lelei, soia le tautala lona laulaufaiva i upu leaga, ma ona laugutu aua le tautalatala faa‘ole‘ole.

A ia paia le Alii le Atua i o outou loto. Ia saunia pea lava outou e tali atu ma le agamalu ma le mata‘u ia i latou uma o e fesili mai ia te outou i le uiga o le faamoemoe o loo ia te outou. Ia ia te outou le loto fuatia ifo lelei, o le mea foi latou te faaleaga ai ia te outou, peiseai ua outou amio leaga, ia masiasi i latou o e tuua‘i fua la outou amio lelei o ia Keriso.

Ia outou faautauta, ia outou mataala, ona o le ua fai outou mona fili, o le tiapolo lea, o loo fealualuai o ia e pei o se leona tagi, ua saili se tasi e ‘aina e ia; ia outou tetee atu ia te ia, ma ia mausali outou i le faatuatua, ina ua outou iloa o loo taufaaatoaina ia lava mea tiga i lo outou au uso o i le lalolagi.

Ia muai iloa lenei mea, ua leai se valoaga o i le Tusi e faamatalafuaina. Auā e le o le loto o tagata na tuu mai ai le valoaga anamua, a o tagata paia o le Atua na talatalaina mai ina ua osofia mai e le Agaga Paia.

Sa i ai foi i le nuu o perofeta pepelo, e pei ona i ai ia te outou, o a‘oa‘o pepelo, latou te faatupuina faalilolilo o vaevaega e fano ai, ma latou faafiti i le Alii na ia faatau mai ia te i latou, o i latou lava e oo mai ai ia i latou le malaia e vave mai lava. E toatele foi latou te mulimuli atu i a latou mea e fano ai, talu o i latou e upuleagaina ai le ala o le upu moni. O le matapeapea foi e fai ai outou e i latou ma mea faatau i a latou upu pepelo; e le tuai mai ia te i latou le sala na fetalaia mai talu anamua, o lo latou malaia foi e le moe lea.

Auā afai na latou sosola ai mea leaga a le lalolagi ina ua iloa lelei o le Alii o le Faaola lea o Iesu Keriso, a e toe faalavelaveina, ma toilalo i latou i na mea, ona tele ai lea o le leaga o lo latou iuga i lo latou amataga. Auā e lelei pe a na latou le iloa le ala o le amiotonu, a e leaga ina ua latou iloa, ma toe liliu ese i le poloaiga paia sa tuuina mai ia te i latou.

faapei o ana tusi uma lava, o loo talatalaina ai nei mea; o i ai nisi upu faamatalagatā, ua faauigaeseina e tagata e lei a‘oa‘oina, ma ua le faatumauina, faapea o isi Tusi foi e oo ai lo latou lava malaia.

O lenei, le au pele e, ia outou faaeteete ia te outou, auā ua muai iloa e outou, ne‘i ta‘ita‘ieseina outou i le sese o e faaletaupulea, tou te pauu ai i le mea sa outou tumau ai. A ia tutupu outou i le alofa tunoa ma le poto i a lo tatou Alii o lo tatou Faaola lea o Iesu Keriso. Ia ia te ia le viiga i ona po nei, ma ia oo i le faavavau lava. Amene.

O lenei foi le feau na matou faalogologo ai mai ia te ia, ua matou faailoa atu ai foi ia te outou, o le malamalama lava le Atua, a e leai lava se pouliuli o ia te ia. Afa tatou te fai atu, ua tatou mafuta faatasi ma ia, a e savavali i tatou i le pouliuli, ua tatou pepelo ai, ua tatou le faia foi le upu moni.

O le mea foi lea tatou te iloa ai ua tatou iloa o ia, pe afai tatou te tausi i ana poloaiga. O sē faapea, Ua ou iloa o ia, a e le tausi e ia i ana poloaiga, o le pepelo lava lea, e le o i totonu ia te ia le upu moni. A o lē tausi i lana afioga, e moni, ua atoatoa le alofa i le Atua i totonu ia te ia. O le mea lea ua tatou iloa ai o i totonu ia te ia i tatou. O lē faapea o loo tumau ia i totonu ia te ia, e tatau ona savali o lena tagata faapei ona savali o ia.

Ua ou tusi atu ia mea ia te outou i e o faasese atu ia te outou. O le faauuina foi ua outou maua mai ia te ia, e tumau lea ia te outou, e le aoga foi ona a‘oa‘oina atu e se tasi ia te outou; a e faapei ona a‘oa‘o atu ia te outou e lea lava faauuina i mea uma lava, e moni foi lea, a e leai sona pepelo; faapei ona a‘oa‘o atu foi ia te outou, ia outou tumau lava ia te ia.

Leau pele e, aua tou te faalogo i agaga uma lava, a ia outou tofotofo i agaga pe mai le Atua i latou; auā e toatele perofeta pepelo ua o atu i le lalolagi. O le mea lenei tou te iloa ai le Agaga o le Atua, O agaga uma o e ta‘utino, ua maliu mai Iesu Keriso i le tino, mai le Atua lava i latou. A o agaga uma o e le ta‘utino, ua maliu mai Iesu Keriso i le tino, e le mai le Atua i latou; o lo le anetikeriso lava lenei ua outou faalogo ai o le a sau, o loo i ai nei i le lalolagi.

O i latou, e o le lalolagi lava i latou, o le mea lea o loo tautalatala ai i latou i la le lalolagi; e faalogo atu foi le lalolagi ia te i latou. O i matou, mai le Atua lava i matou, o le ua iloa le Atua e faalogo mai o ia ia te i matou; o le le mai le Atua e le faalogo mai o ia ia te i matou; o le mea lea ua tatou iloa ai le agaga moni ma le agaga sese.

O lenei lava le alofa, ia tatou savavali e tatau ma ana poloaiga; o lenei lava le poloaiga, faapei ona outou faalogo i ai talu le amataga, ina ia outou savavali ai.

Auā e toatele o e faasese ua o atu i le lalolagi, o e le ta‘u tino ua maliu mai Iesu Keriso i le tino; o le faasese lava lea ma le anetikeriso. Ia outou ia te outou, ne‘i maumau a matou galuega na matou faia, a ia maua le taui atoa.

O i latou uma lava o e tuumavaega, a e le tumau i le mataupu ia Keriso, e le o ia te i latou le Atua; o lē tumau i le mataupu ia Keriso, e ia te ia lava le Tamā atoa ma le Alo. Pe a alu atu ia te outou se tasi a e le molia lenei lava mataupu, aua tou te talia o ia i o outou fale, aua foi tou te ofo alofa ia te ia; auā o sē ofo alofa atu ia te ia, e faatasi ai o ia ma ana galuega leaga.

Na ou tusi atu i le ekalesia, a o Tioterifi, o lē fia sili ia te i latou, e le talia i matou e ia. O le mea lea, pe a a‘u alu atu, ou te faamanatu ai lana amio o loo faia e ia, o loo tuaupua mai ia i matou i upu leaga; e le gata foi i ia mea, a e le talia lava e ia le au uso, e vavao atu foi i e loto i ai, na te faateaina foi i latou i le ekalesia.

Le au pele e, o loo ou matua faamalosi e tusi atu ia te outou i le faaolataga ua tuu tele, e tatau ai lava ona ou tusi atu ia te outou ia apoapoai atu ia outou faamalolosi ona finau mo le faatuatua na tuuina mai faatasi i le au paia. Auā ua o ane faaleiloga o isi tagata, ua leva foi ona muai tusia o i latou ia oo i lenei lava faasala, e faalematau i latou, ua liua e i latou le alofa tunoa o lo tatou Atua i le faamatāitu, ma ua latou faafiti i le Alii e tasi, o le Atua, ma lo tatou Alii o Iesu Keriso.

Ua ou iloa i au galueaga, ma lou tiga, ma lou onosai, ina ua e le lavatia i e ua leaga; ua e tofotofo foi i e ua fai mai o aposetolo i latou, a e leai lava, ua e iloa foi o tagata pepelo i latou,

Ua ou iloa au galuega, ma lou puapuaga, ma lou mativa, (a ua e tamaoaiga,) ma le upu faifai a ē ua fai mai o Iutaia i latou, a e leai lava, a o le sunako o Satani i latou.

A ua ia te au ni nai mea ia te oe, ona ua ia te oe o e ua taofi i le mataupu a Palaamo, o le na a‘oa‘o ia Palako e tuu atu le mea e tausuai ai i luma o le fanauga a Isaraelu, ona ia aai i mea ua fāsia mo tupua ma ia latou faitaaga. E faapea foi ona ia te oe o e ua taofi i le mataupu a le au Nikalaitai; o le mea ou te ‘ino‘ino i ai. Ina e salamo ia; afai e leai, ona ou vave alu atu lea ia te oe, ou te tau foi ma i latou i le pelu ai lo‘u gutu.

A ua ia te au ni nai mea ia te oe, ona ua e tuu pea le fafine o Iesepela, ua ta‘ua o ia e ia o le perofeta fafine, e a‘oa‘o ma faasese i a‘u auauna, ina ia faitaaga, ma aai mea ua fāsia mo tupua.

Ua ou iloa au galuega, e te le maalili, e te le vevela foi; ou te loto ina ia e maalili, pe vevela; o lenei, ua e faaleogalua, e te le maalili, e te le vevela foi, o le mea lea ou te luai atu ai ia te oe i lo‘u gutu Auā ua e fai mai, Ou te se mauoa, ua faatamaoaigaina a‘u, ou te le mativa foi i se mea e tasi; a ua e le iloa o oe o le malaia, ma le pagatia, ma le mativa, ma le tauaso, ma le le lavalava;

Ou te aoai ma sasa ia i latou uma ou te alofa i ai; o lenei, ia e vilivilitai, ma ia e salamo.

Ua lafo foi le tarako tele, o le gata tuai lea, ua igoa i le tiapolo, i le ma Satani, o lē faasese i le lalolagi uma; ua lafo ifo i le lalolagi, ua lafo foi ana agelu faatasi ma ia. Na ou faalogo foi i le leo tele i le lagi, ua faapea, O ona po nei ua oo mai ai le olataga, ma le mana, ma le malo o lo tatou Atua ma le pule a lona Keriso; auā ua lafo i lalo le na molia o tatou uso, o le na molia i latou i luma o lo tatou Atua i le ao ma le po. A ua latou manumalo ia te ia ona o le toto o le Tamai mamoe, ma le upu a la latou mau, ua latou le faapelepeleina foi lo latou ola ua oo i le oti.

Ua ou faalogo foi i le tasi leo mai le lagi, ua faapea mai, Lo‘u nuu e, ia outou o ese ia te ia, ina ne‘i faatasia outou i ana agasala, ina ne‘i tofusia foi outou i ona mala;

e le toe pupula mai foi ia te oe se malamalama o se lamepa, e le toe lagona foi ia te oe le leo o le faatoafaiavā ma le faatoanofo tane; auā o ou tagata faatauoa o tagata sili ia o i le lalolagi, auā ua faaseseina nuu uma i au togafiti faataulāitu.

Ona puea lea o le manu feai atoa ma le perofeta pepelo o le na fai faailoga i ona luma, o mea ia na faaseseina ai e ia o e ua i ai le faailoga o le manu feai, ma e ua ifo i lona faatagata; ua lafoolaina i laua i le lepa afi ua mu i le teio.

Ua pue foi e ia le tareko, o le gata tuai, o le tiapolo lea ma Satani, ua ia fusifusi foi ia te ia i tausaga e afe. Ua ia lafo foi ia te ia i le to e le gata, ua pupuni foi ia te ia, ma tuuina atu le faamaufaailoga i ona luga, ina ia le toe faaseseina e ia o nuu, seia atoa ia tausaga e afe; a mavae foi ia, e tatau ona tatalaina o ia i nai aso.

o le tiapolo foi o le na faasese ia te i latou, ua lafoina o ia i le lepa afi ma le teio, o i ai le manu feai ma le perofeta pepelo; e puapuagaina ai i latou i le ao ma le po e faavavau faavavau lava.

A o e loto vaivai, ma e lē faalogo, ma e fai mea e inosia, ma e fasioti tagata, ma e faitaaga, ma e faataulāitu, ma e ifo i tupua, atoa ma e tala pepelo uma, e fai o latou tofi i le lepa e mu i le afi ma le teio, o le oti faalua lea.

E le sao atu lava i ai se mea leaga e tasi, po o se na te faia se mea inosia, po o se pepelo; na o i latou lava e ua tusia i le tusi o le ola a le Tamai mamoe.

A ua i tuapā o ulī, ma e faataulāitu, ma e faitaaga, ma e fasioti tagata, ma e ifo i tupua, atoa uma lava e ua loto i le tala pepelo ma latou faia.

Auā ou te ta‘utino atu ia i latou uma o e faalogo i upu o le valoaga o lenei tusi, Ai se tasi e faaopoopo mai se upu i nei upu, e faaopoopoina atu e le Atua ia te ia o mala ua tusia i lenei tusi. Ai se tasi foi e ave ese se upu i upu o le tusi o lenei valoaga, e aveeseina e le Atua lona tofi i le tusi o le ola, ma le aai paia, ma mea ua tusia i lenei tusi.