23 – Alofa

O le mea lea e tuua ai e le tane lona tamā ma lona tinā, a e faatasi ma lana avā; ona avea ai lea o i laua ma tino e tasi.

Ona auauna ai lea o Iakopo i tausaga e fitu ona o Rasela, ua peiseai o nai aso itiiti ia i lona manatu, auā o lona manao tele ia te ia.

Ia e ava i lou tamā ma lou tinā, ina ia faalevaleva ai ou aso i le nuu o le a foaiina mai e Ieova lou Atua ia te oe.

Aua e te manao i le fale o lē lua te tuaoi, aua e te manao i le avā a lē lua te tuaoi, po o lana auauna tane, po o lana auauna fafine, po o lana povi, po o lana asini, po o se tasi mea a lē lua te tuaoi.

Pe afai lua te fetaiai ma le povi a lē lua te masesei, po o lana asini ua sē, ia e toe faafoi mai ai lava ia te ia. Pe afai e te iloa le asini a le ua ita mai ia te oe, o loo taoto i lalo o lana avega; ia oe ne‘i e tuua lava o ia, a ia oulua tatalaina lava faatasi ma ia.

Ua afio ane foi Ieova i ona luma, ma na‘ta‘u mai, O Ieova, o Ieova, o le Atua alofa mutimutivale ma le alofa fua, e telegese lona toasa, a e tele le alofa ma le faamaoni;

Aua e te ‘ino‘ino i lou uso i lou loto; ia e aoai lava i lē lua te tuaoi, aua foi ne‘i tuu ai pe a le agasala ia te ia. Aua e te taui ma sui, aua foi le faamoemoe lou ita i tagata o lou nuu, a e te alofa atu i lē lua te tuaoi ia pei o oe lava ia te oe; o a‘u o Ieova.

O le tagata ese o loo āumau ia te outou, ia tusa lava ia ia te outou ma le tama a le eleele, e te alofa atu ia te ia e pei o oe lava ia te oe; auā sa āumau outou i le nuu o Aikupito; o a‘u o Ieova lo outou Atua.

Afai foi ua oo ina mativa lou uso, ua na le toe lavā se mea; ona e fesoasoani ai lea ia te ia; e ui lava o ia le tagata ese ma le āumau; ina ia nofo lava o ia faatasi ma oe. Aua e te talia mai ia te ia se totogi, po o se mea e faasili; a ia e mata‘u i lou Atua; ina ia nofo lava lou uso faatasi ma oe. Aua e te avatu ia te ia au tupe e maua ai ni ona tupu; aua foi e te avatu ia te ia au mea e ‘ai ina ia toe maua mai se mea e faasili.

(Na matuā agamalu lava le tagata nei o Mose, e sili lava i tagata uma o i le lalolagi.)

Ia e alofa atu ia Ieova lou Atua ma lou loto atoa, ma lou agaga atoa, ma lou malosi atoa.

Ia e iloa foi o Ieova lou Atua o le Atua lava ia, o le Atua faamaoni, o le na te tausi i le feagaiga atoa ma le alofa i e alolofa atu ia te ia ma tausiusi i ana poloaiga, e oo lava i le afe o tupulaga; a e tauia e ia o e ‘ino‘ino ia te ia i o latou lava luma, ia faaumatia i latou; e le faatuai o ia i lē ‘ino‘ino ia te ia, a e taui atu ia te ia i ona lava luma.

e le talia foi e ia se taui; o le na te faamasinoina mo le ua mātuaoti ma le fafine ua oti lana tane; o le alofa atu i le tagata ese, ua avatu ai ia te ia le mea e ‘ai atoa ma ofu. O lenei foi, ia outou alolofa atu i le tagata ese; auā foi sa tagata ese outou i le nuu o Aikupito.

O lenei ia e alofa atu ia Ieova lou Atua ma ia e tausiusi i ana sauniga ma ana tulafono ma ana faamasinoga ma ana poloaiga i aso uma lava.

Afai foi tou te matuā faalogo i a‘u poloaiga ou te fai atu ai ia te outou i le aso nei, ia outou alofa atu ia Ieova lo outou Atua, ma auauna ia te ia ma o outou loto atoa ma o outou agaga atoa,

aua ne‘i e faalogo i upu a lea perofeta, po o lena faimiti; auā e tofotofoina ai outou e Ieova lo outou Atua, ina ia silafia pe tou te alofa atu ia Ieova lo outou Atua ma o outou loto atoa ma o outou agaga atoa.

E te matuā avatu lava ia te ia, aua foi le avatu ia te ia ma le tiga o lou loto; auā ona o lenei mea o faamanuia ai oe e Ieova lou Atua i au galuega uma, ma mea uma lava e tago i ai ou lima. Auā o le aunoa ona i ai i le nuu o le tagata mativa; o le mea lea ou te fai atu ai ia te oe, o loo faapea atu, Ia e matuā faamafola atu lou lima i lou uso, i le ua tigaina, ma le ua mativa e ia te oe i lou nuu.

E taitasi le tagata e tusa ma mea ua ia te ia, e tusa ma le manuia ua foaiina mai e Ieova lou Atua ia te oe.

E faaperitomeina foi e Ieova lou Atua o lou loto, ma loto o lau fanau, ina ia e alofa atu ia Ieova lou Atua ma lou loto atoa, ma lou agaga atoa, ina ia e ola ai.

ina ia e alofa atu ia Ieova lou Atua, ma e faalogo i lona siufofoga, ma ia e pipii atu ia te ia; auā o lou ola ia, ma le na te faafualoaina ou aso; ina ia e mau i le laueleele sa tauto ai Ieova i ou tamā, o Aperaamo, ma Isaako, ma Iakopo, e foaiina atu ia te i latou.

A ia outou matuā anaana e fai le poloaiga ma le tulafono, na fai atu ai Mose le auauna a Ieova ia te outou; tou te alofa atu ia Ieova lo outou Atua, ma savavali i ona ala uma, ma anaana i ana poloaiga, ma pipii lava ia te ia, ma auauna ia te ia ma o outou loto atoa ma o outou agaga atoa.

Soia tou te faatele a outou upu faamaualuga naua, e alu ae ai le faaonoono i o outou gutu; auā o Ieova, o le Atua sisila mai o ia, o ia foi le na te fuatia amio.

Ua uma atu ana upu ia Saulo, ona pii mau lea o le loto o Ionatana i le loto o Tavita, ua alofa Ionatana ia te ia, pei ona alofa o ia ia te ia lava. Ua ave e Saulo ia te ia i lea aso, ua ia le mafai lava ina ia toe foi i le aiga o lona tamā. Ua osi e Ionatana le feagaiga ma Tavita, auā ua alofa ia te ia, pei ona alofa o ia ia te ia lava. Ua to ese foi e Ionatana lona ofu talaloa nai ia te ia, ua foai atu ai ia Tavita, ma lona ofu tino, atoa ma lana pelu, ma lana aufana, atoa ma lona fusi.

Ua alu le tama, ona tulai lea o Tavita nai le itu i toga, ua faapaū faō i le eleele, ua ifo faatolu, ua feasogi foi i laua, ma fetagisi i laua, ua oo ina faasili lo Tavita, Ona fai mai lea o Ionatana ia Tavita, Alu ia ma le manuia, auā ua tauto i taua ma a‘u i le suafa o Ieova, ua faapea, Ia i ai Ieova i le va o a‘u ma oe, i le va foi o la‘u fanau ma lau fanau e faavavau. Ona tulai lea o ia, ma alu ese, a e alu Ionatana i le aai.

O le ua tigaina e tatau ona alofagia o ia e lana uo; a ua tuua e ia le mata‘u i Le e ona le malosi uma lava.

Ieova e, ia e manatua lou alofa mutimuti vale ma lou agalelei; auā talu mai le vavau lava ia. Aua e te manatua a‘u agasala ina o ou taulealea, ma o‘u solitulafono; a e tusa ma lou alofa ia e manatua mai a‘u, Ieova e, ona o lou agalelei.

E ta‘ita‘iina e ia o e agamalu i le faamasinoga; na te a‘oa‘o mai foi i e agamalu i lona ala.

O ala uma lava o Ieova, o le alofa ia ma le faamaoni i e ua tausi i lana feagaiga ma ana tulafono.

O outou na uma lava o ona tagata amio Atua, ia outou alolofa atu ia Ieova; e leoleoina e Ieova o e faamaoni, a e matuā tauia e ia o e amio faamaualuga.

Ieova e, o i le lagi lou alofa; ua oo lava i ao lou faamaoni. E pei o le atu mauga o le Atua lau amiotonu; o le moana sausau au faamasino; Ieova e, ua ola ia te oe tagata atoa ma manu. Le Atua e, e maeu lava lou alofa, o le mea lea ua faatuatua ai tagata i le paolo o ou apaau.

Ieova e, aua e te taofi e oe lou alofa mutimuti vale ia te au; ia leoleoina pea lava a‘u e lou alofa ma lou faamaoni.

Amuia le tagata ua manatua le ua mativa; e faasaoina o ia e Ieova i le aso vale. E tausia o ia e Ieova ma faaolaina; e manuia foi o ia i le nuu; e te le tuua foi o ia i le manao o e ita ia te ia. E lagolago ane Ieova ia te ia i le taotoga o lona ma‘i; e te liua lona moega uma lava i lona ma‘i.

Le Atua e, ia e alofa mai ia te au, e tusa ma lou lava alofa; e tusa ma le tele o lou alofa mutimutivale, ia e sōloiesea o‘u solitulafono.

Ieova e, ia e tali mai ia te au, auā e lelei lou alofa mai; ia e liuliu alo mai ia te au, e pei ona tele o lou alofa mutimuti vale.

Auā le Alii e, o oe e lelei, ma ua e faamagalo sala; e tele foi lou alofa ia te i latou uma o e valaau atu ia te oe.

A o oe le Alii e, o le Atua oe lē alofa mutimuti vale ma lē alofa fua, o lē telegese lona toasa, a e tele le alofa ma le faamaoni.

O lē tuaupua i le la te tuaoi, e fano lea ia te au; o le ua mata faamaualuga ma le loto fefete, ou te le mafaia lava lea.

E alofa mutimuti vale ma alofa fua mai Ieova; e tele gese lona toasa, a e tele lona alofa. E le aoai mai pea lava ia; e le faamoemoe foi lona toasa e faavavau. E lei faia e ia ia i tatou e tusa ma a tatou agasala; e lei taui mai foi o ia ia i tatou e tusa ma a tatou amio leaga. Auā e pei ona maualuga o le lagi i le lalolagi, e faapea ona tele o lona alofa i e matatau ia te ia. E pei ona vava mamao o sasae ma sisifo, e faapea lava ona faamamao e ia ia i tatou o a tatou solitulafono.

A o le alofa o Ieova, mai le vavau lava lea, e oo i le faavavau i e matatau ia te ia; o lana amiotonu foi e oo i le fanau a latou fanau,

Vivii atu ia outou ia Ieova, auā e lelei lava o ia, auā e faavavau lava lona alofa.

Ia vivii atu i latou ia Ieova ona o lona alofa, ma ona vavega na fai i le fanau a tagata. Auā ua na faamălie i le tagata fia inu, o le tagata matelaina foi ua ma‘ona mai ia te ia i le mea lelei.

Auā ua tele lava lona alofa mai ia te i tatou; o le faamaoni foi o Ieova e faavavau lava lea. Ia outou vivii atu ia Ioa.

Faauta, o le mea e matuā lelei ma le matagofie lava, pe a nonofo faatasi lava o uso.

Ina vivii atu ia outou i le Atua o le lagi; auā e faavavau lava lona alofa.

E alofa fua mai ma alofa mutimuti vale mai Ieova; e telegese lona toasa, e tele foi lona alofa. O loo agalelei mai Ieova i mea uma, o lona alofa mutimuti vale foi ua i ana mea uma na fai.

E lagolago Ieova i e ua puapuagatia; a e lafotuina e ia e ua amio leaga ia toele.

Aua ne‘i te‘a ma oe le alofa ma le faamaoni, ia asoa ai i lou ua; ia e tusi ai i le papa o lou loto;

Ia e inu vai ai lou lava vailepa, ma vai e tafe mai ai lou lava vaieli. Ia faasalalau solo ou vaipuna, ma ou vaitafe i malae; ia fai mo oe ia vai, na o oe lava; a e aua le faatasi ma oe tagata ese. Ia manuia lou vaipuna, ma ia e fiafia i lau avā na fai a o ē taulealea. Ia pei o le aila pele o ia ma le ‘oti o le vao e matagofie; ia mălie oe i ona susu i aso uma; aua le aunoa ona e matuā fiafia i lou alofa ia te ia. Lo‘u atalii e, pe se a foi le mea e te fiafia ai i le fafine ese; ma e fusi le fatafata o le fafine ese?

O mea nei e ono ua inosia e Ieova; o lona fitu foi ua matuā inosia lava e ia; o mata faasiasia, o le laulaufaiva pepelo, ma lima e sasaa le toto o le ua le sala, o le loto e manatunatu i togafiti leaga, o vae e tele vavave ona taufetuli i le leaga, o le molimau pepelo, na te tautala i mea pepelo; ma le na te faatupu maseiga i uso.

O le mata‘u ia Ieova, o le ‘ino‘ino lea i le leaga; o le faamaualuga, ma le loto fefete, ma le amio leaga, ma le gutu faapiopio, ou te ‘ino‘ino i ai.

Ou te alofa atu ia i latou o e alofa mai ia te au; o e sailiili mai foi ia te au, latou te maua a‘u.

O le ‘ino‘ino e faatupu ai misa; a o le alofa e ufiufi ai solitulafono uma lava.

A sau le faamaualuga, ona sau ai lea o le mā; a o i ai le poto i e faamaulalo.

O le tagata alofa ua agalelei o ia ia te ia lava; a o le ua saua, na te faatigaina lona lava tino.

O i ai le na te faasalalauina ana mea, a e atili ai ona mau mea; o i ai foi le ua taofi ana mea, e sili i le mea ua tatau ai, a e mativa ai o ia. E faatamaoaigaina le tagata matamau; o ia foi lē faasūsū i nisi, e faasūsūina lava o ia.

O le ua tuuna lana sasa, ua ‘ino‘ino o ia i lona atalii; a o le ua alofa ia te ia, ua saili le aoaiga mo ia.

O lē ‘ino‘ino i lē la te tuaoi, ua agasala o ia; a o lē alofa i e ua tigaina, amuia lava o ia.

O le ua faasaua i le tagata mativa, e faalumaina e ia Le na faia o ia; a o le ua ava ia te ia, ua alofa o ia i le tagata mativa.

O le tali filemu e liliueseina ai le ita; a o le upu faatiga e tupu ai le ita.

E liaiina e Ieova le fale o e faamaualuga; a e faatumauina e ia le tuaoi o le fafine ua oti lana tane.

E inosia e Ieova atoa uma e ua loto faamaualuga; e tago lea lima i lea lima, a e le faasaoina i latou. Ua togiolaina le amioletonu i le alofa ma le faamaoni; o le mata‘u foi ia Ieova, ua ‘alo ese ai tagata i le leaga.

E muamua le faamaualuga i le malaia; e muamua foi le loto faasiasia i le paū. E lelei ona maulalo o le loto faatasi ma e ua agamalu; a e leaga ona tufa le vete faatasi ma ē faamaualuga.

O upu matagofie, o le meli ua sisina ifo ia; e suamalie i le loto, ma le mea e malolo ai ivi.

O le ua ufiufi le soliga o le tulafono, na te sailia le alofa; a o le ua toe ta‘u le mea, na te faateaeseina uo.

E alofa le uo i aso uma lava; a e fanau le uso mo le aso vale.

O le oti ma le ola, o loo i le pule a le laulaufaiva ia; o e mananao i ai latou te aai i lona fua.

O le tagata ua fai ana uo, e iu ina tigaina ai o ia; a o i ai le tagata alofa e sili ona pipii mai i lo le uso.

O le ua alofa i le tagata mativa, na te avatua ana mea ia Ieova; e tauia mai foi e ia ana mea na avatu ia te ia.

O le mea e manaomia i le tagata, o lona alofa lea; e sili ona lelei o le tagata mativa i le tagata pepelo.

Ia faia le amiotonu ma le faamasinoga; e sili ona lelei o lea ia Ieova i le taulaga. O mata faasiasia, ma le loto fefete, o le lamepa foi a e amio leaga, o le agasala lea.

O le na te punitia ona taliga i le valaau a le tagata mativa, e valaau lava o ia, a e le talia.

O le ua tausisi i le amiotonu ma le alofa, e maua e ia le ola, ma le amiotonu, ma le viiga.

O le ua leoleo i lona gutu ma lona laulaufaiva, e tausi o ia ia te ia ai puapuaga. O le faatauemu faamaualuga ma le faafefeteina, o le igoa lea o le ua fai lona ita ma le faamaualuga.

O le ua mataalofa e faamanuiaina o ia; auā e foai atu e ia ana mea e ‘ai i le ua mativa.

Tuli ia le faatauemu, ona mavae atu ai lea o le finauga; e tuua foi le misa ma le faamāina. O le ua manao i le loto mamā, e matagofie ona laugutu; e fai o ia ma uo a le tupu.

Afai e fia ‘ai le ua ita ia te oe, ia e fafaga ia te ia; afai e fia inu o ia, ia e faainu ia te ia i le vai; auā e te avae ai malala ola i luga o lona ulu; e tauia foi oe e Ieova.

O le ua foai atu i le tagata mativa, e le mativa o ia; a o lē ‘alo ai ona fofoga e lāufetuuina o ia.

O le tagata itagofie na te faatupuina le misa; ma le tagata lotoa na te faateleina soliga o le tulafono.

O le faamaualuga o le tagata e faamaulaloina ai o ia; a o le faamaulalo o le loto e maua ai le viiga.

E tolu mea ua faigata ia te au; o mea lava e fa ou te le iloa; o le ala o le aeto i le lagi; o le ala o le gata i luga o le papa; o le ala o le vaa i totonu o le sami; ma le ala o le tane i le taupou;

Ia e tautala mo e gūgū, o le finauga lava o i latou uma ua aumatuā; ia e tautala ia faamasino ma le tonu, ma ia finau mo e ua puapuagatia, ma e ua mativa.

Aua le faataalise ona ita o lou loto; auā e tumau le ita i loto o e valelea.

O le pese silisili a Solomona. Ia sogi mai o ia ia te au i sogi o lona fofoga; auā e sili ona lelei o lou faapelepele mai i le uaina. O le nanamu o ou uu lelei ua avea ai lou suafa e pei o le uu ua liligiina; o le mea lea ua mananao ai taupou ia te oe. Ia e tosina atu o a‘u, matou te taufetuli ma mulimuli atu ia te oe. Ua ta‘ita‘iina o a‘u e le tupu i ona potu; matou te fiafia ma olioli ia te oe, e tele lo matou manatunatu i lou faapelepele mai a e itiiti i le uaina; ua mananao tagata amiotonu ia te oe.

La‘u uo e, ua faatusaina oe i solofanua i kariota o Farao. Ua matagofie ou alafau i sei; o lou ua foi i asoa. Matou te faia mo oe ni pale auro e ema i ario. Ua puaiina le manogi o lo‘u nato ina o afio le tupu i lana tautega. O le ofuofu pulu muro lo‘u manamea ia te au; e asoa ia i lo‘u ua i le po atoa. O le fuifui kofero lo‘u manamea ia te au i tovine o Enokati. Faauta, la‘u uo e, ua e lalelei; faauta, ua lalelei oe, ua ni mata o se lupe ou mata. Faauta, lo‘u manamea e, e lalelei oe, e matagofie lava; ua uluuluola lo ta moega.

O a‘u o le fuga o le laau i Sarona; o le susana i vanu. E pei o le susana i totonu o laau talatala, o loo faapea la‘u uo i teine. E pei o le moli i totonu o laau o le vao, o loo faapea lo‘u manamea i taulelea. Na ou fiafia i lona paolo, ma ou nofo ai; na suamalie foi ona fua i lo‘u gutu. Na ia aumaia a‘u i le fale uaina; o lana fu‘a i o‘u luga, o le alofa lea. Ia outou faamalosia a‘u i potoi vine; ina fofola mai ia o moli; auā o a‘u ua ou vaivai i lo‘u alofa atu. Ua i lalo o lo‘u ulu lona lima tauagavale, ua fusi mai foi ia te au lona lima taumatau. Tama fafine o Ierusalema e, ou te fai atu ia te outou, ia tauto mai i sevi ma aila o le vao, tou te le tatatuli pe fafagu i la‘u pele, seia faitalia o ia. O le leo o lo‘u manamea! faauta, o loo sau o ia, o loo osooso i luga o mauga, o loo matuā osooso foi i mea maupuepue. E pei o se sevi, po o se tamai aila lo‘u manamea. Faauta, o loo tu mai o ia i tuāpa o lo tatou fale; o loo silasila mai i faamalama, o loo pupula mai lona tino i le mea faamataupega.

Na tautala mai lo‘u manamea, ua faapea mai ia te au, Si a‘u uo e, si o‘u lalelei e, ina tulai mai ia oe, ina sau ia; auā, faauta mai ia, ua mavae le tausaga maalili, ua mavae le timuga, ua te‘a ia. Ua iloa atu fuga i le fanua; ua oo mai le tau e teuteu ai vine; ua lagona foi le leo o le manutagi i lo tatou nuu; ua matua fua le mati sa moto; ua puaiina foi le nanamu o vine ua fuga. Si a‘u uo e, si o‘u lalelei e, ina tulai ia oe, ina sau ia. La‘u lupe e, ua i ana o papa ma lafitaga o i mato, ina faaali mai ia ou mata ia te au; so‘u faalogo i lou leo; auā o le leo mălie lou leo, e lalelei ou mata. Ina outou pupue ia mā tatou o alope, o alope iti, o e faamāumau i vine; auā ua fua o tatou vine. O lo‘u manamea, o lo‘u lava ia, e fai foi a‘u mona; ua ia fafaga i lona lafu i totonu o susana. Lo‘u manamea e, ina foi mai ia seia gafoa le ata, ma mavae le ufiata, ia avea oe e faapei o se sevi po o se tamai aila i mauga o Petere.

Tama fafine a Ierusalema e, ou te fai atu ia te outou, ia tauto mai i sevi ma aila o le vao, tou te le tatatuli pe fafagu i la‘u pele, seia faitalia o ia. O ai ea lena o loo alu ae nai le vao e faapei o le asu faaniutu, o loo nanamu i le pulu muro, ma le pulu lipano, ma mea manogi uma ua nutililiia a le tagata faatauoa?

La‘u pele e, faauta, ua e lalelei; faauta, ua lalelei oe; ua ni mata o se lupe ou mata ai totonu o lou ie ufimata. O lou lauulu ua pei o fulufulu o le lafu ‘oti ua taooto mai i le mauga o Kiliata. O ou nifo ua pei o le lafu mamoe ua seleina fulufulu ua o ae nai le fulufuluga; e taitasi o i latou uma ma taiuilua, e leai foi se tasi o i latou e pa. O ou laugutu ua pei o le manoa mūmū, ua matagofie lou gutu; ua pei o se fasi rimoni ou alafau i totonu o lou ie ufimata. O lou ua ua pei o le ‘olo o Tavita na faia e tuu ai le auupega; ua faatautauina ai o talita e afe, o talita uma o toa. O ou susu e lua ua pei o tamai sevi e lua, o le ui lua a le sevi, o loo tataa i totonu o susana. Ou te alu atu i le mauga o i ai le muro, ma le mea maupuepue o i ai le lipano; seia gafoa le ata, ma mavae le ufiata. La‘u uo e, ua sao lou lalelei, e leai lava se pona ia te oe.

Ua avea lo‘u loto ia te oe, lo‘u tuafafine e, la‘u avā e; ua avea lo‘u loto i le tasi o ou mata, ma le tasi asoa o i lou ua. Lo‘u tuafafine e, la‘u avā e, ua silisili ese lou alofa mai; e sili ona lelei o lou alofa mai i le uaina; o le nanamu foi o ou suāuu e sili i mea manogi uma. La‘u avā e, ua sisina ifo meli i ou laugutu; o i lalo o lou laulaufaiva le meli ma le suāsusu; o le nanamu foi o ou ofu ua pei o le nanamu o Lepanona. O lo‘u tuafafine, o la‘u avā, o le faatoaga ua puipuia o ia; o le vaipuna ua puipui; o le punāvai ua faamaufaailogaina. O au laau muli o le torimoni ia, ma ona fua e sili ona lelei; o le kofera atoa ma le nato, o le nato ma le keroko; o le kani ma le kinamomi, atoa ma laau uma o le lipano; o le muro ma le aloe, atoa ma mea uma e sili ona manogi; o le punāvai i faatoaga; o le punāvai ola; o vaitafe foi mai Lepanona. Le matu e, ina ala mai ia; le toga e, ina sau ia; agi mai i la‘u faatoaga, ina ia puaiina lona manogi. Ia maliu mai lo‘u manamea i lana faatoaga, ma taumafa i ona fua e sili ona lelei.

Lo‘u tuafafine e, la‘u avā e, ua ou sau i la‘u faatoaga; ua ou tau lo‘u muro atoa ma la‘u mea manogi; ua ou ‘aina la‘u meli ua sisina ifo ma la‘u meli; ua ou inu la‘u uaina ma la‘u suāsusu. A‘u uo e, ina taumamafa ia; a‘u uo pele e, ina feinu ia outou, feinu ia, ia malilie. Ua ou moe a‘u, a e ala lo‘u loto. O le leo o lo‘u manamea! O loo tu‘itu‘i mai o ia, ua faapea mai, Lo‘u tuafafine e, la‘u uo e, la‘u lupe e, le ua sao ona lelei, tatala mai ia le puipui ia te au, auā ua sūsū lo‘u ulu i le sau, o‘u lauulu foi i le ma‘ulu o le sau i le po. Ua ou to ese lo‘u ofu, pe faapefea ona ou toe ofu ai? Ua ou mulumulu i o‘u vae, pe faapefea ona ou toe faaeleelea ai? Na tuuina mai e lo‘u manamea lona lima i le pu o le puipui, ona mutimuti vale lea o lo‘u loto ia te ia.

Tama fafine a Ierusalema e, ou te fai atu ia te outou ia tauto mai, afai tou te iloa lo‘u manamea tou te ta‘u atu ia te ia, ua ou vaivai au i lo‘u alofa atu. O oe na, lē sili ona lalelei i fafine, se a se mea e sili ai lou manamea i se isi manamea? se a se mea e sili ai lou manamea i se isi manamea, ina ua e fai mai matou te tauto?

O lo‘u manamea, e sinasina ma le mūmū, e silisili ese i le mano. O lona ulu ua pei o le auro ua faamamāina; o ona lauulu ua faapuloulou, ua uliuli e pei o se oreva. O ona mata e pei ni mata o se lupe e latalata ane i vaitafe, o loo taeele i le suāsusu ma nonofo i le mau. O ona alafau ua pei o se topasama, ma mea maupuepue o i ai laau manogi; o ona laugutu o susana ia, ua sisina ifo ai le muro sisina. O ona lima ua pei o mama auro ua tuuina i ai tasesa; o lona manava ua pei o nifo o elefane ua faapupulaina, ma ua ufitia i safaira. O ona vae o pou sesa ia, ua faatuina i luga o lago auro lelei; ua foliga o ia i Lepanona, ua sili ona lelei e pei o arasi. O lona fofoga ua matuā leo malie. Ua atoatoa ona lelei o ia. Tama fafine a Ierusalema e, o lo‘u manamea lava lea, o la‘u uo foi lea.

O lo‘u manamea ua fai a‘u mona, o ia foi ua fai mo‘u; o loo taumafa o ia i totonu o susana.

Ina liliu ese ia ou fofoga ia te au, auā ua ou fefe ai; o lou lauulu ua pei o fulufulu o le lafu ‘oti ua taooto mai i Kiliata.

Le tausala e, e matagofie naua ou vae i see; o le fa‘iga o ou suilapalapa ua pei o se asoa ua faia e lima o le tufuga. O lou pute ua pei o se ipu lapotopoto ua i ai le uaina ua suia; o lou manava ua pei o le faaputugāsaito ua afei i susana. O ou susu e lua ua pei o tamai sevi e lua, o le ui lua a le sevi. O lou ua ua pei o se ‘olo o nifo o elefane; o ou mata ua pei o vailepa i Hesepona e latalata ane i le faitotoa o Peterepima; o lou isu ua pei o le ‘olo o Lepanona e feagai ma Tamaseko. O lou ulu i ou luga ua pei o Karamelu, ma lou lauulu ua pei o ie pauli; ua taofia le tupu i ou lauulu. Le pele e, ua matuā lalelei oe, ua matuā matagofie oe, e faafiafia ai. Ua faapea lou maualuga, ua tusa ma le pama; o ou susu foi e pei o fuifui vine. Na ou faapea ifo, Ou te alu ae i le pama, ou te tago atu i ona lau; ona avea lea o ou susu e pei o fuifui vine, ma le nanamu o lou isu e pei o moli. O lou fofoga foi e pei e le uaina lelei mā lo‘u manamea, ua tafe malie e faagaganaina ai laugutu o e momoe.

Ua fai a‘u mo lo‘u manamea, ua uai mai foi lona manao ia te au. Lo‘u manamea e, ina sau ia, ina ta o atu ia i le vao; ma momoe i faoa aai. Ia ta ala usu atu i tovine, ma ta matamata ai po ua fuga vine, po ua mātala ona fuga, po ua tupu olaola rimoni; ou te alofa atu ia te oe i lea mea. Ua puaiina mai le nanamu o tutaima; e latalata ane foi i o tatou faitotoa o fua uma e sili ona lelei; o fua ua faatoa tau atoa ma fua ua loa, ua ou faaputuina mā oe, lo‘u manamea e.

Ua i lalo o lo‘u ulu lona lima tauagavale, ua fusi mai foi ia te au lona lima taumatau.

Tama fafine a Ierusalema e, ou te fai atu ia te outou, ia tauto mai, tou te le tatatuli pe fafagu i la‘u pele, seia faitalia lava o ia. O ai ea lena, o loo alu ae mai le vao, o loo faalagolago i lona manamea? Na ou fafagu ia te oe i lalo o le moli; na oono ai lou tinā ia te oe i lea mea; na ia oono ai ma fanau mai ai e ia o oe i lea mea.

Ia tuuina a‘u i lou loto e faapei o se faamaufaailoga, e faapei o se faamaufaailoga i lou lima; auā ua malosi le alofa e pei o le oti; ua faauluulumamau le tuinanau e faapei o le tuugamau; o lona mumū, o le mumū lea o le afi mu saesae. E le mafaia i vai e tele ona tineia le alofa, e le mafai ona lofia i vaitafe. A avatu e se tagata le oloa uma o i lona fale ia alofaina o ia e ta‘ufaatauvaaina lava.

E faamaulaloina mata faasiasia o tagata nuu; e faamaulaloina foi le faamaualuga o alii; na o Ieova lava e viia i lea aso. Auā o le aso o Ieova o ‘au, e oo atu lea i e faasiasia ma e faamaualuga uma lava, atoa foi ma e o faafefeteina uma; ona faamaulaloina ai lea.

A o le ua matamau ua sauni e ia mea e matamau ai; o le matamau foi e faatumauina ai o ia.

Na a‘u tuuina atu lo‘u tua i e sasa mai, ma o‘u alafau i e futi le ‘ava; ou te lei ufiufi foi o‘u mata i le mā ma le feanu.

Ua inosia ma tuulafoaiina o ia e tagata; o le tagata faanoanoa, ua masani foi ma le tiga; e peiseai ua ‘alo ese mata ia te ia; ua inosia o ia, ma ua tatou le manatua lava o ia. E moni, ua na tauave o tatou tiga, ma na tauave o tatou faanoanoa; a ua tatou manatu o ia ua taia, ua fasia e le Atua, ma ua faatigaina. A ua manua o ia ona o a tatou solitulafono, ua momomo o ia ona o a tatou amio leaga; o le aoaiga e filemu ai tatou sa i ona luga lea, o ona faalavalava foi ua malolo ai tatou. O i tatou uma ua sē i tatou e pei o mamoe, ua taitasi ma faasaga i lona lava ala; a ua faaoo ia te ia e Ieova le amio leaga o i tatou uma. Na faasauaina o ia, sa tigaina foi o ia, a e le tautala mai o ia; e pei o le tamai mamoe ua ta‘ita‘iina ia fasia, e pei o le mamoe foi i luma o e sele lona fulufulu, ua faalologo ia, o ia foi ua le tautala mai.

E le o lenei ea? ona ia tofitofi au mea e ‘ai i le ua fia ‘ai, ia au mai i lou fale e ua matitiva ma faasauaina; a ē iloa le ua le lavalavā e te faaofuina o ia, aua foi e te lafi ia i latou o lou lava aiga.

Afai foi e te alofa atu i le ua fia‘ai, ma e fafaga ia ma‘ona o le ua tiga; ona alu ae lea o lou malamalama i le pouliuli, ma lou pogisa e pei o le aoauli ia.

Ou te vivii i le alofa o Ieova, o viiga o Ieova, e tusa ma mea uma ua foai mai e Ieova ia te i tatou, ma lona agalelei tele lava i le aiga o Isaraelu, ua na foai mai ia te i latou e tusa ma lona alofa mutimutivale, e tusa foi ma le tele o lona alofa.

Na faaali mai Ieova ia te au anamua, ua faapea mai, O le alofa e faavavau, ua ou alofa atu ai ia te oe; o le mea lea ua ou faafualoaina ai lo‘u alofa ia te oe.

O le alofa o Ieova ua le faaumatia ai i tatou, ona ua le mavae o lona alofa mutimutivale; e fou mai ia i taeao uma; e tele lou faamaoni.

Na a‘u tatalo ia Ieova lo‘u Atua, ma ou faaali atu, ua ou faapea atu, Le Alii e, o le Atua e sili ma le matautia, o lē tausi i le feagaiga, ma le alofa i e alofa atu ia te ia, atoa ma e o tausiusi i ana poloaiga.

Ta te osi sa ta feagaiga ma a‘u e faavavau; ta te osi sa ta feagaiga ma a‘u i le amiotonu, ma le faamasinoga, ma le agalelei, ma le alofa. Ta te osi sa ta feagaiga ma a‘u ma le faamaoni; e te iloa foi Ieova.

Sole, ua faaali atu e ia ia te oe le mea lelei; se a foi se mea e finagalo ai Ieova ia te oe, pe a le o ia mea, ia fai le amiotonu, ia naunau i le alofa, ma ia feooai ma lou Atua ma le loto faamaulalo?

Ia outou saili ia Ieova, outou uma ua agamalu i le nuu, o e ua faia lana faamasinoga; ia outou saili le amiotonu, ia outou saili le agamalu, atonu e lilo ai outou i le aso o le toasa o Ieova.

O Ieova lou Atua i totonu ia te oe o l? malosi ia; na te faaolaina; e olioli o ia ia te oe ma le fiafia; o lona alofa e le fetalai ai o ia; e olioli lava o ia ia te oe ma le ofo fiafia.

Ua faapea ona fetalai mai o Ieova o ‘au, o loo faapea mai, Ia faamasino i le faamasinoga tonu, ma ia agalelei ma alofa o le tasi i le tasi; aua le faasaua i fafine ua oti a latou tane ma e ua mātua-oti, o le tagata ese ma le ua mativa; aua foi le manatunatu i o outou loto i se mea leaga e fai e le tasi i le tasi.

Amuia ē loto maulalo; auā e o latou le malo o le lagi. Amuia ē faanoanoa; auā e faamafanafanaina i latou. Amuia ē agamalu; auā e fai mo latou tofi le nuu. Amuia ē fia aai ma fia inu i le amiotonu; auā e maoona i latou. Amuia ē alolofa atu; auā e alofaina mai i latou. Amuia ē loto mamā; auā latou te iloa atu le Atua. Amuia ē faatupuina le filemu; auā e ta‘ua i latou o atalii o le Atua. Amuia ē sauaina ona o le amiotonu; auā e o latou le malo o le lagi. Amuia outou pe a latou upu leaga, ma faasaua ia te outou, ma latou tuuaiina pepelo outou i mea leaga uma ona o a‘u. Ia outou olioli ma fiafia lava; auā o i le lagi lo outou taui e tele; auā na faapea ona latou faasaua i perofeta e na muamua ia te outou.

A o a‘u, ou te fai atu ia te outou, ai se ita fua i lona uso, e nofo sala o ia i le faamasinoga; ai se fai atu foi i lona uso, Raka, e nofo sala o ia i le fono; ai se fai atu foi, Le vale e, e nofo sala o ia i le afi o Kēna. Pe afai foi e te avatu lau taulaga i le fata faitaulaga, ona e manatua ai lea ua i lou uso se mea e tiga ai o ia ia te oe, ina tuu ia i lea mea o lau taulaga i luma o le fata faitaulaga, a e alu oe ia muai faalelei i lou uso, i le e sau ai, ma avatu lau taulaga.

Ua outou faalogo, na fai mai, E suia le mata i le mata, e suia foi le nifo i le nifo. A ou te fai atu a‘u ia te outou, aua ne‘i outou tetee atu i le leaga; ai se na te po mai i lou alafau taumatau, ia e liliu atu ia te ia le isi. O lē fia fai se faamasinoga ma oe e ave lou ofu tino, ia e tuu atu foi i ai ma lou ofu tele. Ai se na te tauanau mai lua te o ma ia i le maila e tasi, ina o ia oulua ma ia i maila e lua. Ia e avatu i le ua ole mai ia te oe; aua foi e te liliu ese i le ua fia nonō tupe ia te oe.

Ua outou faalogo, na fai mai, Ia e alofa atu i lē lua te tuaoi, a ia ‘ino‘ino i le ua ita mai ia te oe. A ou te fai atu a‘u ia te outou, ia outou alolofa atu i e ua ita mai ia te outou, ia outou faamanuia atu i e ua fetuu mai ia te outou, ia outou agalelei atu i e ua ‘ino‘ino mai ia te outou, ia outou tatalo foi mo e ua tuua‘i fua mai ma faasaua mai ia te outou; ina ia faia outou ma atalii o lo outou Tamā o i le lagi, o le na te faaoso i lona la i e ua amio leaga atoa ma e ua amio lelei; ua ia faatotō ifo foi le ua i e ua amiotonu, atoa ma e ua amioletonu. Auā afai tou te alolofa atu i e ua alolofa mai ia te outou, se a ea se taui tou te maua ai? e le faia ea e le au telona o lea lava mea? Pe afai tou te faapito lo outou fealofani i o outou uso, se a se mea sili ua outou faia? e le faapea ea ona faia e le au telona? O lenei, ia atoatoa ona lelei o la outou amio, e pei o lo outou Tamā o i le lagi e atoatoa ona lelei o ia.

Ia outou, ne‘i avatu ni a outou mea alofa i luma o tagata, ina ia iloa ai e i latou; a faapea, ona leai ai lea o so outou taui mai lo outou Tamā o i le lagi. O lea a e avatu ai ni mea alofa, aua ne‘i e ilia le pu i ou luma, pei ona faia e tagata pepelo i sunako ma ala, ina ia viia o i latou e tagata. E moni, ou te fai atu ia te outou, ua maua e i latou lo latou taui. A ē avatu ni mea alofa, aua ne‘i iloa e lou lima tauagavale le mea ua faia e lou lima taumatau; ina ia lilo au mea alofa; o lou Tamā foi, o lē silafia i le mea lilo, o ia lava na te avatu faaaliali se taui ia te oe.

Auā afai tou te faamagaloina atu tagata i a latou agasala, e faamagaloina foi outou e lo outou Tamā o i le lagi. A e afai tou te le faamagaloina atu tagata i a latou agasala, e le faamagaloina foi e lo outou Tamā a outou agasala.

E leai se na te mafaia ona auauna i alii e toalua; auā e ‘ino‘ino o ia i le tasi, a e alofa atu i le tasi; a le o lea, e faapipii atu ia i le tasi, a e faaleaoga i le tasi. Tou te le mafaia ona auauna i le Atua atoa ma mamone.

Aua tou te faamasino atu, ina ne‘i faamasinoina outou. Auā o le faamasinoga tou te faamasinoina atu ai, e faamasinoina ai outou; o le fua foi tou te fuaina atu ai, e toe fuaina mai ai ia te outou. Se a le mea e te vaai atu ai i se fāsi laau i le mata o lou uso a e te le iloa e oe le utupoto i lou lava mata? Pe faapefea foi ona e fai atu i lou uso, Tuu mai ia, so‘u eu ese le fāsi laau i lou mata; faauta foi, o i lou lava mata le utupoto? O oe na le pepelo, ia e muai tiai le utupoto i lou lava mata, ona e iloa lelei ai lea e eueseina atu le fāsi laau i le mata o lou uso.

O mea uma foi tou te loto i ai ia faia e tagata ia te outou, ia faapea lava ona outou faia ia te i latou; auā o le tulafono lea ma le au perofeta.

Ia outou o mai ia te au, o outou uma o e tigaina ma mafatia i avega, o a‘u foi e malolo ai outou. Ia outou amoina la‘u amo, ma ia outou faaa‘oa‘o ia te au, auā o a‘u lē agamalu ma le loto maulalo; ona maua lea e outou o le malologa mo outou agaga. Auā e avegofie la‘u amo, o la‘u avega foi e māmā ia.

ua faapea atu, E moni, ou te fai atu ia te outou, a le liua outou, ma avea ia pei o tama iti, tou te le sao lava i le malo o le lagi. O lenei o sē faamaulalo o ia ia te ia e pei o le tama itiiti nei, e sili lea i le malo o le lagi.

Pe ni a fa outou? ai se tagata o i ai mamoe e selau, afai e sē le tasi, na te le tuua ea le ivagafulu ma le iva i mauga, a e alu o ia e saili i le na sē? Afai foi na te maua, e moni, ou te fai atu ia te outou, e tele lona olioli i lea, a e itiiti i le ivagafulu ma le iva e lei sē. E faapea lo outou Tamā o i le lagi, e le finagalo ia ina ia fano se tasi o i latou nei e faatauvaa.

Afai e agaleaga mai lou uso ia te oe, ia e alu, ma aoai ia te ia tau lava o oulua ma ia. Afai e faalogo mai o ia ia te oe, ua e maua lou uso.

Ona alu ane ai lea o Peteru ia te ia, ua faapea ane, Le Alii e, e agaleaga mai faafia ea lo‘u uso ia te au, ma ou faamagalo ia te ia? seia atu fitu ea? Ua fetalai atu Iesu ia te ia, Ou te le fai atu ia te oe, seia atu fitu, a ia fitugafulu ni fitu.

ia e ava i lou tamā ma lou tinā; ma ia e alofa atu i lē lua te tuaoi, ia pei o oe lava ia te oe.

Ua tali atu Iesu ia te ia, Afai e te manao ina ia atoatoa ona lelei o lau amio ia e alu ma e faatau atu au mea, i le e avatu ai i e matitiva; ona ia te oe lea o le faulaigāoloa i le lagi, i le e sau ma mulimuli mai ia te au.

E faapea ona muamua o e na mulimuli, e mulimuli foi e na muamua; auā e toatele e ua tala‘iina, a e toaitiiti e ua filifilia.

a e le faapea outou; a o sē fia sili ia te outou, ia fai o ia ma a outou auauna; o sē fia muamua foi ia te outou, ia fai o ia ma a outou tautua. E pei o le Atalii o le tagata e lei sau ia ina ia auauna mai tagata ia te ia, a ia auauna atu ia, ma foaiina atu lona ola e fai ma togiola e sui a‘i tagata e toatele.

Ona fetalai atu ai lea o Iesu ia te ia, E te alofa atu i le Alii lou Atua ma lou loto atoa, ma lou agaga atoa, ma lou manatu atoa. O le poloaiga muamua lena ma le sili. E faapena foi lona lua, E te alofa atu i lē lua te tuaoi, ia pei o oe lava ia te oe.

A o lē sili ia te outou e fai lea ma a outou auauna. O sē faamaualuga o ia ia te ia, e faamaulaloina lea; a o sē faamaulalo o ia ia te ia, e faamaualugaina lea.

Ona fai atu ai lea o le Tupu i e o i lona itu taumatau, O mai ia, o outou ua faamanuiaina e lo‘u Tamā, ia fai mo outou tofi le malo ua saunia mo outou a o lei faavaeina le lalolagi; auā na ou fia ‘ai, ona outou avane ai lea ni mea ou te ‘ai ai; na ou fia inu, ona outou avane ai lea ni vai ou te inu ai; sa fai a‘u ma tagata ese, ona outou talia lea o a‘u; na ou le lavalavā, ona outou faaofuina lea o a‘u; na ou ma‘i, ona outou asiasia mai lea o a‘u; na ou i le fale puipui, ona outou o ane ai lea ia te au. Ona tali mai ai lea ia te ia o e amiotonu, e faapea mai, Le Alii e, o anafea na matou iloa ai oe ua fia ‘ai, ma matou fagaina oe? po o fia inu, ma matou avane e te inu ai? O anafea foi na matou iloa ai oe o le tagata ese, ma matou talia oe? po o le le lavalavā, ma matou faaofuina oe? O anafea foi na matou iloa ai oe ua ma‘i, po o i le fale puipui, ma matou o atu ai ia te oe? Ona tali atu ai lea o le Tupu, e faapea atu ia te i latou, E moni, ou te fai atu ia te outou, auā na faia e outou i le tasi o e aupito itiiti o o‘u uso nei, o a‘u lea na outou faia i ai.

Ona fai atu foi lea o ia i e o i lona itu tauagavale, O outou ua faafanoina, o ese atu ia ia te au i le afi e faavavau, ua saunia mo le tiapolo ma ana agelu. Auā na ou fia ‘ai, a e tou te lei avane ni mea ou te ‘ai ai; na ou fia inu, a e tou te lei avane ni vai ou te inu ai; sa fai a‘u ma tagata ese, a e lei talia a‘u e outou; na ou le lavalavā, a e tou te lei faaofuina a‘u; na ou ma‘i, na a‘u i le fale puipui foi, a e tou te lei asiasia a‘u. Ona tali mai ai lea o i latou foi ia te ia, e faapea mai, Le Alii e, o anafea na matou iloa ai oe ua fia ‘ai, pe fia inu, po o se tagata ese, pe le lavalavā, po o ma‘i, po o i le fale puipui, ma matou lei auauna atu ia te oe? Ona tali atu ai lea o ia ia te i latou, e faapea atu, E moni, ou te fai atu ia te outou, auā na outou le faia i le tasi o e aupito itiiti o i latou nei, o a‘u lea ua outou le faia i ai.

ona sau ai lea ia te ia o le fafine ma le fagu alapasa ua i ai le suāuu manogi tau tele, ona liligi ai lea e ia i lona ao a o taoto ia e taumafa.

Ua maliu faaitiiti atu i luma, ona faapaū fao ai lea o ia ma tatalo, ua faapea atu, Lo‘u Tamā e, afai e mafai, ia ave ese lenei ipu ia te au; a e aua le faia lo‘u loto, a o lou finagalo.

Ua nofo ia i lalo, ona valaau atu lea i le toatinoagafulu ma le toalua, ua fetalai atu ia te i latou, Afai e fia muamua se tasi, e avea o ia ma mulimuli i tagata uma, ma auauna a tagata uma.

a o se fia sili ia te outou, ia fai o ia ma a outou auauna; o sē fia muamua foi ia te outou, ia fai o ia ma tautua a outou uma. Auā foi o le Atalii o le tagata na le sau o ia ina ia auauna tagata ia te ia, a e peitai ia auauna o ia, ma foaiina atu lona ola o le togiola e sui a‘i tagata e toatele.

A outou tutū ma tatalo, ai se mea tou te tiga ai i se tasi, ia outou faamagaloina; ina ia faamagaloina foi e lo outou Tamā o i le lagi a outou agasala. Afai foi tou te le faamagaloina, e le faamagaloina e lo outou Tamā o i le lagi a outou agasala.

Ia e alofa foi i le Alii lou Atua ma lou loto atoa, ma lou agaga atoa, ma lou manatu atoa, ma lou malosi atoa. O le poloaiga sili lea. E faapena foi lona lua, o lenei, Ia e alofa atu i lē lua te tuaoi, ia pei o oe lava ia te oe. E leai lava se tasi poloaiga e sili i na poloaiga. Ona fai mai lea o le tusiupu ia te ia, Mālie a oe le a‘oa‘o e, o le tonu lea ua e fatalai mai na; auā e toatasi lava le Atua; e leai lava se tasi ua na o ia. Ia alofa foi ia te ia ma le loto atoa, ma le manatu atoa, ma le agaga atoa ma le malosi atoa; ma ia alofa i lē la te tuaoi e pei o ia lava ia te ia, e sili lea i taulaga mu atoa, ma taulaga uma.

Sa i Petania o ia i le fale o Simona le lepela, o taoto i le taumafataga, ona sau lea o le fafine ma le fagu alapasa, ua i ai le uu nato tau tele; ua tatae le fagu, ma liligi ai i luga o lona ao.

Ua tali atu ia, ua faapea atu ia te i latou, O le tagata e lua ona ofu tino, ia avane ia te ia e leai sona ofu; o le ua ia te ia mea e ‘ai, ia faapea foi ona fai.

A ou te fai atu ia te outou o e faalogo mai. Ia alofa atu i e o fai outou mo latou fili: ia agalelei atu i e ita mai ia te outou, ia outou faamanuia atu i e fetuu mai ia te outou, ia outou tatalo foi mo e tuua‘i fua mai ia te outou; o lē po ia te oe i le tasi alafau, ina liliu atu i ai le tasi; o lē ave ese lou ofu tele, aua e te vaoia atu foi lou ofu tino. Ina avatu ia i tagata uma o e ole mai ia te oe; o lē fao i au mea, aua e te toe aamiina atu. Pei ona outou loto i tagata ona ia latou faia ia te outou, ia faapea lava ona outou faia ia te i latou.

Pe afai tou te alofa atu i e alolofa mai ia te outou, pe se a ea se faafetai ia te outou i lea mea? auā ua alolofa atu ē agasala i e alolofa mai ia te i latou. Pe afai foi tou te agalelei atu i e agalelei mai ia te outou, se a ea se faafetai ia te outou i lea mea? auā ua faia lea lava mea e ua agasala. Pe afai tou te avatu tupe i e nono mai, ma outou faamoemoe i ai e toe maua mai ai, se a ea se faafetai ia te outou i lea mea? auā e avatu e tagata agasala tupe e nonoina e tagata agasala ina ia latou maua mai sona faatusa.

Peitai outou, ia outou alolofa atu i e o fai outou mo latou fili, ma ia agalelei atu, ma ia avatu tupe e nonoina, aua le faamoemoe i se mea e tasi e au mai; e tele ai so outou totogi, e avea foi outou ma fanau a le Silisili ese; auā o ia le agamalu i e agavale, atoa ma e amio leaga. O lenei, ia mutimuti vale lo outou alofa, pei ona alofa mutimuti vale o lo outou Tamā. Aua tou te faamasino atu, ona le faamasinoina mai ai lea o outou; aua tou te faasala, ona le faasalaina mai ai lea o outou; ia outou faamagaloina atu, e faamagaloina mai ai outou. Ia outou foai atu, e foaiina mai ai ia te outou; e foai mai e i latou i lo outou lava ie pulupulu le fua lelei, e lolomi ma luluina, e tumu ma solo i tua. Auā o le fua tou te fuaina atu ai, e fuaina mai ai ia te outou.

Faauta foi, o le fafine o le aai, o ia o le fafine agasala, ua iloa e ia ua taoto o ia e taumafa i le fale o le faresaio, ona au mai lea e ia o le fagu alapasa ua tumu i le suāuu manogi; ua tu foi o ia i tua i ona vae, ua tagi, ua faasisina ifo e ia loimata i ona vae, ua sōloi ai i lona lava lauulu, ua sogi foi i ona vae, ma faauuina i le suāuu manogi.

O tagata e toalua sa la nonō mai tupe i le tagata e toatasi; sa nonō mai le tasi i tenari e lima selau, e a le tasi e limagafulu. Ua leai ni a la tupe e toe avatu, ona faamagalo fua lea o ia ia te i laua uma. Ina fai mai ia, po o ai so laua e tele lona alofa ia te ia? Ua tali mai Simona, ua faapea mai, Ai lava o lea na faamagaloina atu ana mea e tele. Ua fetalai atu ia ia te ia, Ua tonu lau taofi. Ona fāliu atu lea o ia i le fafine, ua fetalai atu ia Simona, Ua e iloa ea le fafine nei? na ou ulu mai i lou fale, e te lei au mai ni vai mo o‘u vae; peitai o ia, ua faasisina ifo e ia o loimata i o‘u vae, ma sōloi ai i lona lava lauulu. E te lei feasogi mai ia te au; peitai o ia, ua le aunoa ona sogi i o‘u vae talu lava ona ulufale mai o ia. E te lei faauu mai i lo‘u ulu i le suāuu fua; peitai o ia, ua faauu e ia i o‘u vae i le suāuu manogi. O lea foi ou te fai atu ai ia te oe, Ua faamagaloina ana agasala e tele, auā ua alofa tele mai o ia; a o le ua faamagaloina i ai se mea itiiti, ua itiiti foi lona alofa.

Ua tali mai o ia, ua faapea mai, E te alofa atu i le Alii lou Atua ma lou loto atoa, ma lou agaga atoa, ma lou malosi atoa, ma lou manatu atoa; e te alofa atu foi i lē lua te tuaoi, ia pei o oe lava ia te oe.

Ua tali atu Iesu, ua faapea atu, O le tasi tagata na alu ifo mai Ierusalema i Ieriko, ua maua o ia e tagata fao mea; ua latou toeseina ona ofu, ma fasi ia te ia, ua latou o, ua tuua ia, ua tāli oti. Ua soona alu ifo le tasi faitaulaga i lea ala; ua iloa atu ia te ia, ona ui ane lea o ia i le tasi itu ala. Ua faapea a foi le sa Levī, ua oo i lea mea, ua alu ane, ma matamata ai; ona ui ane foi lea o ia i le tasi itu ala. A o le tasi Samaria ua alu lana malaga, ua oo atu i le mea o i ai o ia, ua iloa o ia, ona mutimuti vale lea o lona alofa; ua alu atu, ma nonoa i ona manua, ua liligi foi i ai le suāuu ma le uaina; ua faatietie ia te ia i lana lava manu, ma ta‘ita‘i ia te ia i le fale e tali ai malo, ma tausi ia te ia. O le taeao o le a alu ia, ona to ae lea o tenari e lua, ma avatu i le matai e ona le fale, ua fai atu ia te ia. Ina e tausi ia te ia; ai se mea e te toe faatau ai, ou te taui atu ia te oe pe a ou toe sau. Pe ni a fa te oe, o ai so latou nei o le toatolu ua fai ma tagata la te tuaoi ma le na maua e tagata fao mea? Ua fai mai ia, O le na alofa atu ia te ia. Ona faapea atu ai lea o Iesu ia te ia. Ina alu ia, ma ia e faapea ona fai.

Pe a fai atu se tasi ia te oe e alu i le faigaai, aua e te taoto i le mea sili, ne‘i i ai foi se tasi ua tala‘iina e ia ua sili ia te oe; ona alu atu lea o le na tala‘i ia te oulua ma ia, ma fai atu ia te oe, Ina sōsō atu ia ma le alii nei; ona e alu ai lea ma le mā i le mea e aupito faatauvaa. Peitai o oe, pe a tala‘iina oe, e te alu e taoto i le mea e aupito faatauvaa; ina ia fai atu le na tala‘i ia te oe, pe a sau o ia, Sole, ina alu ae ia oe i le mea e sili; ona mamalu ai lea oe i luma o e taooto e aai faatasi ma oe. Auā so se faamaualuga e ia ia te ia, e faamaulaloina lea; a o lē faamaulalo e ia ia te ia, e faamaualugaina lea.

Ua fetalai atu foi o ia i le na tala‘i mai ia te ia, Pe a e sauni se faigaai, po o se talisuaga, aua e te tala‘i i au uo, po o ou uso, po o tagata o lou aiga, po o tagata mauoa tou te tuaoi, ne‘i latou toe tala‘i mai foi ia te oe, ona tauia mai lea o oe. Peitai o oe, pe a e sauni le faigaai, ina tala‘i ia i e matitiva, i e mumutu, i e pipili, ma e tauaso; e manuia ai oe; auā latou te le mafaia ona taui mai ia te oe; a e tauia oe i le toe tutū mai o e amiotonu.

Ona tulai lea o ia, ua alu i lona tamā. Ua iloa mamao atu foi o ia e lona tamā, ona mutimuti vale lea o lona alofa, ua momo‘e atu ia, ua fusi ia te ia, ma sogi atu ia te ia. A ua fai mai le atalii ia te ia, Lo‘u tamā e, ua ou agasala i Lē o i le lagi, atoa ma ou luma, ua ou le toe aoga ona ta‘ua o lou atalii. A ua fai atu le tamā i ana auauna, Au mai ia le ofu tatapuvae e aupito lelei, ma faaofu ia te ia; ma ia tuu se mama i lona lima, ma faasee i ona vae; au mai ia foi le tamai povi peti, ma fasi; tatou te aai ma olioli; auā o lo‘u atalii lenei, na oti, ua toe ola mai; na le iloa foi o ia, a ua maua. Ona latou olioli ai lea.

E le mafai se auauna ona auauna i alii e toalua; auā e ‘ino‘ino o ia i le tasi, a e alofa atu i le tasi; a le o lea, e faapipii atu ia i le tasi, a e faaleaoga i le tasi. Tou te le mafaia ona auauna i le Atua atoa ma mamone.

Pe afai e foi faafitu i le aso ona agaleaga mai o ia ia te oe, ma foi faafitu i le aso ona liliu mai ia te oe, ua faapea mai, Ua ou salamo; ia e faamagalo atu ia te ia.

Ou te fai atu ia te outou, na alu ifo lena tagata i lona fale ua ta‘uamiotonuina, a e le faapea le isi; auā o sē faamaualuga ia te ia, e faamaulaloina lea; a o lē faamaulalo ia te ia, e faamaualugaina lea.

A ua tu mai Sakaio, ua faapea mai i le Alii, Faauta, le Alii e, o le a ou vaeluaina atu a‘u mea i e matitiva; afai foi ua tiga se tasi i lo‘u tuua‘i ane, ou te taui atu ai e taifā.

Ona fetalai atu lea o ia, E moni, ou te fai atu ia te outou, o mea a lenei fafine mativa ua oti lana tane ua lafo i ai, ua sili lea i a latou uma. Auā o i latou uma, ua latou lafo atu i taulaga a le Atua nisi mea mai a latou mea ua tele; a o ia ua mativa, ua lafo e ia ana mea uma e ola ai sa ia te ia.

A e le faapea outou; peitai o lē sili ia te outou, ia avea o ia ia pei o le aupito itiiti; o lē pule foi, ia pei o le auauna ia. Auā po o ai lē sili; o lē taoto ea e ‘ai, po o lē auauna mai? E le o lē taoto e ‘ai ea? A o a‘u nei, o loo ia te outou pei o le auauna lava.

Ua fai mai o ia ia te ia, Le Alii e, ua ou sauni ta te o faatasi ma oe i le fale puipui atoa ma le oti.

Ona fetalai atu lea o Iesu, Lo‘u Tamā e, ia e faamagaloina atu ia te i latou; auā ua latou le iloa le mea ua latou faia. Ua tufatufa e i latou ona ofu, ona fai ai lea o le vili.

Auā ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau. Auā e lei auina mai e le Atua lona Atalii i le lalolagi ina ia faasala i le lalolagi, a ia faaolaina le lalolagi ia te ia.

E ao ina tupu pea o ia: peitai a‘u nei, e tauāu ina itiiti o a‘u.

O le mea lea e alofa mai ai le Tamā ia te au, auā ou te tuuina atu lo‘u ola, ina ia ou toe au mai ai.

Ua tagi Iesu. Ona faapea ane ai lea o Iutaia, Faauta i le tele o lona alofa ia te ia!

Ona tago ai lea o Maria i le litara o le uu nato tau tele; ua ia uu ai vae o Iesu, ma sōloi ona vae i lona lauulu; ua tumu foi le fale i le manogi o le uu.

A o lei oo i le tausamiga o le paseka, ua silafia e Iesu ua oo mai ona po e tuua ai e ia lenei lalolagi, a e maliu atu i le Tamā; ua na alofa i ona tagata o i le lalolagi, ua ia alofa ia i latou ua oo i le gataaga.

Ona liligi lea e ia o le vai i le ipu e mulumulu ai, ua mulumulu i vae o ona soo, ma sōloi ai i le ie sōloi ua ia fusia ai.

O lenei, afai o a‘u le Alii, ma le a‘oa‘o, ua oa mulumuluina o outou vae, e tatau ona outou femulumuluai o outou vae. Auā ua ou avatu le faaa‘oa‘o ia te outou, e pei ona ou faia ia te outou, ia faapea lava e outou ona fai. E moni, e moni, ou te fai atu ia te outou, e le sili le auauna i lona alii; e le sili foi le ua auina i le e ana le feau. Afai ua outou iloa ia mea, amuia outou pe a outou faia.

Ua taoto ane foi i le fatafata o Iesu le tasi o ona soo, o le ua alofaina e Iesu.

O le poloaiga fou ou te tuu atu ai ia te outou, ia outou fealofani; faapei ona ou alofa atu ia te outou, ia fealofani foi outou. O le mea lea e iloa ai e tagata uma lava o o‘u soo outou, pe afai ua outou fealofani.

Afai tou te alofa mai ia te au, ia outou tausi mai i a‘u poloaiga.

O le ua ia te ia a‘u poloaiga ma tausi i ai, o ia lea e alofa mai ia te au; o lē alofa mai foi ia te au, e alofaina o ia e lo‘u Tamā; ou te alofa foi ia te ia, ma ou faaali ia te ia.

Ona tali atu lea o Iesu, ua faapea atu ia te ia, Afai e alofa mai se tasi ia te au, e tausia e ia la‘u upu; e alofa foi lo‘u Tamā ia te ia; e o mai foi i maua ia te ia, matou te nonofo ma ia. O le le alofa ia te au, e le tausia e ia a‘u upu; o le upu foi tou te faalogologo i ai, e le sa‘u lea, a o le upu a le Tamā ua auina mai a‘u.

Faapei ona alofa mai o le Tamā ia te au, e faapea lava ona ou alofa atu ia te outou; ia tumau pea outou i lo‘u alofa. Afai tou te tausia a‘u poloaiga, ona tumau lea o outou i lo‘u alofa; pei ona ou tausia poloaiga a lo‘u Tamā, ma ou tumau i lona alofa. Ua ou fai atu nei mea ia te outou, ina ia tumau ai lo‘u olioli ia te outou, ia atoatoa foi lo outou olioli. O la‘u poloaiga lenei, ia outou fealofani, pei ona ou alofa atu ia te outou. E le sili lava le alofa o se tasi i lenei alofa, ia tuuina atu e se tasi lona ola e sui a‘i ana uo. O a‘u uo outou, pe afai tou te faia mea uma lava ou te fai atu ai ia te outou. Ou te le toe ta‘ua outou o auauna, auā e le iloa e le auauna mea e faia e lona alii; a ua ou ta‘ua outou o uo, auā ua ou faailoa atu ia te outou mea uma na ou faalogo ai i lo‘u Tamā.

Ou te fai atu ia te outou ia mea, ina ia outou fealofani.

auā e alofa mai lava le Tamā ia te outou, ina ua outou alofa mai ia te au, ma ua outou talitonu o a‘u nei ua ou sau mai le Atua.

o a‘u o i totonu ia te i latou, o oe foi o i totonu ia te au, ina ia faaatoatoaina i latou ia tasi; ina ia iloa ai foi e le lalolagi, na e auina mai a‘u, ma e alofa mai ia te i latou, faapei ona e alofa mai ia te au.

Ua ou faailoa atu foi lou suafa ia te i latou, ou te faailoa atu ai foi; ina ia i totonu ia te i latou le alofa ua e alofa mai ai ia te au, o a‘u foi i totonu ia te i latou.

Ua uma ona latou aai, ona fetalai atu lea o Iesu ia Simona Peteru, Simona e, le atalii o Iona, pe sili mai lon alofa ia te au, i o latou nei? Ua fai mai o ia ia te ia, Ioe, le Alii e, ua e silafia, ou te alofa ia te oe. Ona fetalai atu lea o ia ia te ia. Ia e faafaga i a‘u tamai mamoe. Ua toe fetalai atu faalua o ia ia te ia, Simona e, le atalii o Iona, pe e te aloa mai ia te au? Ua fai mai o ia ia te ia, Ioe, le Alii e, ua e silafia, ou te alofa ia te oe. Ona fetalai atu lea o ia ia te ia, Ia e leoleo i a‘u mamoe. Ua fetalai faatolu atu o ia ia te ia, Simona e, le atalii o Iona, pe e te alofa mai ia te au? Ua tiga Peteru, auā ua ia fetalai faatolu ia te ia, Pe e te alofa mai ia te au? Ua fai mai ia te ia, Le Alii e, ua e silafia mea uma lava, ua e silafia, ua ou alofa lava ia te oe. Ona fetalai atu lea o Iesu ia te ia, Ia e fafaga i a‘u mamoe.

Ua faatasia foi e ua faatuatua uma lava, ua tuu tele a latou mea uma lava; ua faatau atu foi o latou fanua ma oloa, ma ua tufatufa le tau o ia mea i tagata uma, ua faatatau i le mativa o le tagata. Ua latou nonofo pea ma le loto gatasi i le malumalu i lea aso ma lea aso, ua tofitofi foi le areto i lea fale ma lea fale, ua latou aai a latou mea e ‘ai ma le fiafia ma le loto faamaoni,

Ua leai foi so latou e mativa; auā o i latou ua i ai fanua po o fale, ua latou faatauina, ua au mai foi le tau o mea na faatauina, ma tuu mai i le au aposetolo e pule; ua tufatufa ia te i latou taitoatasi e faatatau i le mativa o le tagata.

Ua fetogi foi i latou ia Setefano, o valaau o ia, ua faapea atu, Le Alii e Iesu, ia e talia mai lo‘u nei agaga. Ua tootuli foi o ia, ma alaga atu ma le leo tele, Le Alii e, aua e te tuuina atu lenei agasala ia te i latou. Ua uma atu lea upu, ona moe ai lea o ia.

O le fuaiupu foi o le tusi ua na faitau ai, o lenei, Pei o le mamoe ua ta‘ita‘iina ia fasia; pei o le tamai mamoe foi i luma o lē sele fulufulu e le tagi, e faapea foi o ia ua le tautala mai. O ona po o lona faamaulaloina na aveesea ai lona faamasinoga; o ai foi se na te talaina lana tupulaga? auā ua aveesea lona ola i le lalolagi.

Ua ou faaali atu ia te outou mea uma lava, ia faapea ona outou galulue ia fesoasoani i e ua vaivai e tatau ai, ma ia outou manatu i le afioga a le Alii o Iesu, na fetalai mai e ia, E sili le manuia o le na te foai atu, i le manuia o le na te talia mai.

o le faamoemoe foi e le mā ai, auā ua faamaligi mai le alofa o le Atua i o tatou loto e le Agaga Paia ua foaiina mai ia te i tatou. Auā na maliu Keriso i ona po e tatau ai, ina o vaivai pea i tatou, o le sui o ia o e faalematau. Auā e toe ina le mafai ona oti o se tasi e sui a‘i le ua amiotonu; a o le ua agalelei, atonu pe faamalosi se tasi ona oti e sui a‘i o ia; a ua faaalitinoina mai e le Atua lona lava alofa ia te i tatou, ina ua maliu Keriso ma sui o i tatou, a o tatou agasala pea. O lenei, ua ta‘uamiotonuina nei i tatou i lona toto, e le faaolaina ea i tatou e ia ai le toasa i se a? Auā afai ua lelei i tatou ma le Atua i le maliu o lona Alo, ina o fai i tatou mona fili, e matuā faaolaina lava i tatou i lona soifua, o i tatou ua lelei ma ia.

O ai se na te faateaeseina mai i tatou i le alofa o Keriso? o le puapuaga ea, po o le atuatuvale, po o le saua, po o le oge, po o le lavalavā, po o le pagatia, po o le pelu? Faapei ona tusia, Ona o oe ua fasiotia ai i matou i aso uma, ua faatatauina i matou e pei o mamoe ā fasia. A ua tatou manumalo aiai i nei mea uma lava, ona o ia ua alofa mai ia te i tatou.

Auā ua ou mautinoa, e le mafaia e le oti, po o le ola, po o agelu, po o alii, po o e malolosi, po o mea i nei ona po, po o mea atali, po o le maualuga, po o le loloto, po o se tasi mea na faia, e le mafaia e ia mea ona faateaeseina mai i tatou i le alofa o le Atua, o loo ia Keriso Iesu lo tatou Alii.

Auā o le alofa tunoa ua tuuina mai ai ia te au, ou te fai atu ai ia te outou uma, aua le faasili le manatu o se tasi i le mea ua tatou ona manatu ai, a ia māmā le manatu, ia tusa ma le tofiga o le faatuatua ua taitasi ma tofu ai mai le Atua.

Aua ne‘i faatagā alofa; ia ‘ino‘ino i le leaga, ia pipii i le lelei. Ia fefaapelepeleai i le fealofani o uso; ia tausolomua ona ava o le tasi i le tasi. Aua le faavaivai i le filigā, ia malosi le loto, ia auauna i le Alii. Ia olioli i le faamoemoe, ia onosai i le puapuaga, ia finafinau i le tatalo. Ia tufatufa atu ni a outou mea i le mativa o le au paia, ia tausisi i le alofa i tagata ese.

Ia faamanuia atu i e faasaua mai ia te outou, ia faamanuia lava, a e aua le fetuu. Ia outou olioli faatasi ma e ua olioli, ia outou tagi foi faatasi ma e ua fetagisi. Ia gatasitasi o outou manatu; aua le manatu i mea silisili, a ia feoai ma e ua faamaulalo; aua le faafiapopoto. Aua le taui atu le leaga i le leaga i se tasi; ia sauniuni mea e tusa i luma o tagata uma lava. Afai e mafaia ia te outou, ia outou nofo lelei ma tagata uma lava.

Le au pele e, aua le taui atu ma sui, a ia outou tuu atu i le toasa; auā ua tusia, Ua faapea mai le Alii, O ia te au le taui ma sui, ou te taui atu. O lenei, a matelaina le ua ita mai ia te oe, fafaga ia te ia; a fia inu ia avatu ia te ia e inu ai; auā o le amio faapea e faafaupue ai malala ola i luga i lona ulu. Aua le faatoilaloina oe i le leaga a ia e faatoilaloina le leaga i le lelei.

Aua ne‘i ia te outou se mea e tasi a se tasi tagata; a e tau lava o le fealofani; auā ai sē alofa atu i se tasi tagata, ua atoatoa ona faia e ia o le tulafono. Auā o upu ia, Aua le mulilua, Aua le fasioti tagata, Aua le gaoi, aua le molimau pepelo, Aua le tu‘inanau; afai foi ua toe se isi poloaiga, o loo ua aofia lava i lenei upu, Ia e alofa atu i lē lua te tuaoi, ia pei o oe lava ia te oe. E le agaleaga atu le alofa i lē la te tuaoi; o lenei, o le alofa o le atoatoa lea o le tulafono.

Ia outou talia le ua vaivai i le faatuatua, a e le ina ia faamasinoina o masalosaloga.

O oe na, se a le mea e te faasala ai i lou uso? o oe na foi, pe se a le mea e te ta‘ufaatauvaaina ai lou uso? auā tatou te laulaututū uma lava i luma o le nofoa faamasino o Keriso. Auā ua tusia, Ua fetalai mai le Alii, Ou te ola a‘u, e tootuli mai ia te au o tulivae uma lava, e ta‘uta‘u mai foi o laulaufaiva uma lava i le Atua. O lenei, e taitasi i tatou ma tala i lana amio i le Atua.

O lenei, aua ne‘i tatou toe fefaasalai; a e lelei ina ia manatu i lenei lava mea, aua ne‘i tuu ane e se tasi se mea e tausuai ai, po o se mea e tautevateva ai lona uso. Ua ou iloa ma ou mautinoa i le Alii o Iesu, e leai se mea e leaga fua; peitai o se ua manatu ua leaga le mea, ona leaga ai lea ia te ia. A e afai e faatigaina lou uso i au mea e ‘ai, ua e le toe amio alofa; aua le fano i au mea e ‘ai o ia na maliu ai Keriso.

O lenei, ia tatou tausisi i mea e tupu ai le filemu, ma mea e fefaamafanafanai.

O i tatou o e malolosi ia tatou fesoasoani i le vaivai o e ua le lavā e tatau ai; a e aua ne‘i faafiafia i o tatou lava loto. Auā ia taitasi o i tatou ma faafiafia i lē la te tuaoi ina ia lelei ai o ia, e faamafanafanaina ai. Auā o Keriso lava e lei faafiafia o ia i lona lava finagalo; a e pei ona tusia, Ua oo mai ia te au upu faifai a latou e na faifai atu ia te oe. O mea uma foi na tusia anamua, na tusia ia e a‘oa‘o mai ai ia te i tatou; ina ia tatou maua le faamoemoe e tupu mai i le onosai, ma le faamafanafana mai o Tusi. Ia foai atu foi ia te outou e le Atua o ia e tupu mai ai le onosai ma le faamafanafana, ina ia gatasitasi o outou loto e tusa ma le finagalo o Keriso Iesu; ina ia vivii outou i le Atua, le Tamā o lo tatou Alii o Iesu Keriso, ma le loto e tasi, ma le upu e tasi. O lea ia outou talia ai le tasi e le tasi, faapei o Keriso foi ona talia o i tatou, e oo ai le viiga i le Atua.

Ia outou fealofani i le feasogi paia. O loo alolofa atu ia te outou ekalesia a Keriso.

Ou te aioi atu foi ia te outou, le au uso e, ia outou vaavaai i e faatupu fevaevaeaiga, ma mea e tausuai ai; o mea ia e le tusa ma le mataupu ua a‘oa‘oina ai outou; ia outou liliu ese foi ia te i latou. Auā o e faapea, e le auauna i latou i lo tatou Alii o Iesu Keriso, a o latou lava manava; ma latou faasese i loto o tagata ua le manatu leaga, i lo latou faaneenee ma alofa faavivii.

A e pei ona tusia, O mea e lei vaaia e mata, e lei lagona foi e taliga, e lei oo foi i le loto o se tagata, o mea ia ua saunia e le Atua mo i latou o e alofa ia te ia.

O lenei, ua outou matuā sese lava, ina ua ia te outou finauga o le tasi i le tasi. Tou te le onosai ea i le agaleaga i se a? Tou te le onosai i se a pe a gaoia a outou mea?

A o mea na outou tusi mai ai, e lelei ona le tago se tagata i se fafine; a ona o le faitaaga, ia taitasi le tane ma lana lava avā, ia taitasi foi le fafine ma lana lava tane. Ia avatu le tane i le avā le agalelei e tatau ai, ia faapea foi le avā i le tane. E le pule le avā i lona lava tino, na o le tane; e faapea foi le tane, e le pule ia i lona lava tino, na o le avā. Aua ne‘i faafiti le tasi i le tasi, seia iloga lava lua te loto gatasi ai i nai aso, ina ia oulua faasaga i le anapogi ma le tatalo; ma ia toe faatasi ane i le mea e tasi, ina ne‘i faaosooso mai Satani ia te oulua, ona o lo oulua le lava onosai.

Auā e ui ina ou sa‘oloto mai tagata uma, ua faapologaina a‘u e a‘u mo tagata uma, ina ia atili ai ona toatele ou te maua.

Aua le saili se tasi i lona lava lelei, a ia taitasi ma saili i le lelei o le isi.

Aua le avea outou ma mea e tautevateva ai Iutaia, po o Eleni, po o le ekalesia a le Atua; faapei o a‘u nei foi, ou te faafiafia atu i tagata uma i mea uma lava, o loo le sailia e a‘u so‘u lava lelei, a o lo le toatele, ina ia faaolaina ai i latou.

ina ne‘i i ai i le tino se maseiga, a ia fetausiai faatasi uma itu tino. Pe afai e tiga le tasi itu tino, ia tiga faatasi ai itu tino uma lava; pe viia le tasi itu tino, ia olioli faatasi ai itu tino uma lava.

Afai ou te tautala i gagana a tagata atoa ma agelu, a e leai so‘u alofa, ua avea a‘u ma ‘apa memea taalili, po o se sumapalo tagitagi. Afai foi o ia te au ona perofeta ane, ma le iloa o mea lilo uma, ma le poto uma lava; afai foi o ia te au le faatuatua uma e ave ese ai mauga, a e leai so‘u alofa, ou te le aoga lava. Afai foi ou te tufatufaina a‘u mea uma e fagaina a‘i e matitiva; afai foi ou te tuuina atu lo‘u tino ina ia susunuina, a e leai so‘u alofa, e leai lava sona aoga ia te au. E onosai le alofa, e agamalu, e le losilosi le alofa, e le mitamita vale le alofa, e le faafefeteina, e le amio matagā, e le sailia e ia ana lava mea, e le faaitaitagofie, e le tuuina atu i nisi le leaga, e le fiafia i le amio leaga, a e fiafia i le faamaoni, e ufiufi i mea uma, e talitonu i mea uma, e faamoemoe i mea uma, e onosai i mea uma. E le uma le alofa; a e pe ni perofetaga, e faaleaogaina ia; pe ni gagana, e mavae ia; po o le poto, e faaleaogaina lea.

A o lenei, o tumau le faatuatua, ma le faamoemoe, ma le alofa, o na mea e tolu; a o le sili o na mea o le alofa lea.

Ia outou tausisi i le alofa; ia naunau foi i mea faaleagaga, a e sili lea ina ia outou perofeta ane.

Ia faia uma a outou mea i le alofa.

Auā ua pulunaunauina i matou i le alofa o Keriso; o loo manatu faapea i matou, afai na maliu le toatasi o le sui o tagata uma, ua oti lava tagata uma; na maliu foi o ia ona o tagata uma, ina ia le usiusitai pea o e ola ia te i latou, a o ia o le na maliu ma toe tu mai o le sui o i latou.

a o mea uma lava ua faailoa ai i matou o auauna a le Atua i matou, i le onosai tele, i puapuaga, i malaia, i atuatuvale i sasaina, i tuuina i fale puipui, i faaletaupulea, i galuega, i mataala, i anapopogi, i le amio mamā, i le poto, i le faapalepale, i le agamalu, i le Agaga Paia, i le alofa moni, i le upu moni, i le mana o le Atua, e le auupega o le amiotonu i le itu taumatau atoa ma le itu tauagavale, i le viia ma le faaleagaina, i le ta‘uleleia ma le ta‘uleagaina; peiseai o e faasese, a e faamaoni lava; peiseai ua le iloa, a ua lāu iloa; peiseai a oti, faauta foi, o loo ola i matou; peiseai ua aoaiina, a e le fasiotia; peiseai o faanoanoa, a o loo olioli pea; peiseai o matitiva, a ua matou faatamaoaigaina nisi e le toatele; peiseai e leai sina mea o ia te i matou, a o loo ia te i matou mea uma.

auā na tofotofoteleina i latou i puapuaga ua atili ai lo latou olioli, atoa ma lo latou mativa matuā tele, ua sili ai le faulai o lo latou matamau. Auā ou te molimau, na latou loto fua i ai e tusa i a latou mea e sili foi i a latou mea. Ua matuā aioi mai ia te i matou ina ia talia e i matou le mea alofa, o le alofa fai tele lea e fesoasoani i le au paia. E le na o lea, pei ona matou faatuatua i ai, a ua muai tuuina atu i latou e i latou i le Alii, ma i matou foi i le finagalo o le Atua.

O lenei, e pei ona faulai o mea uma ia te outou, o le faatuatua, ma le upu, ma le poto, ma le filigā uma, atoa ma lo outou alofa mai ia te i matou, ia faapea foi ona faulai ia te outou o lenei mea alofa. E le sa‘u upu poloai lenei ou te fai atu ai, a ona o le filigā o isi, e tofotofo foi pe moni lo outou alofa. Auā ua outou iloa le alofa tunoa o lo tatou Alii o Iesu Keriso, sa tamaoaiga ia, a ua faamativaina ona o outou, ina ia faatamaoaigaina outou i lona mativa.

Auā afai ua i ai le loto fiafia, e talileleia lea, e tusa ma mea ua ia te ia, a e le tusa ma mea e le o ia te ia.

O lenei, ia outou faaali atu ia te i latou, i luma foi o ekalesia, se faailoga o lo outou alofa, ma lo matou mitamita ona o outou.

Ia taitoatasi ma foai e pei ona filifili i lona loto; aua ma le tiga, aua foi ma le faatauanauina; auā e alofa le Atua i le ua foai ma le loto mălie.

O a‘u lava o Paulo o lē faamaulalo pe a a‘u i ai ia te outou, a e faamalosi pe a ou le i ai ia te outou, ou te aioi atu ia te outou ona o le agamalu ma le alofa o Keriso;

O lea ou te fiafia ai i mea e vaivai ai, o le faaleaga mai, o malaia, o le agatele mai, o le atuatuvale ona o Keriso; auā pe a ou vaivai, ona ou malosi ai lea.

Le au uso e, o le toe upu lenei; ia outou manuia, ia faaatoatoaina outou, ia faamafanafanaina outou, ia loto gatasitasi outou, ia outou fifilemu; ona ia te outou lea o le Atua e ona le alofa ma le manuia. Ia outou fealofani i le feasogi paia.

Ia ia te outou uma lava le alofa tunoa o le Alii o Iesu Keriso, ma le alofa o le Atua, atoa ma le mafuta faatasi ma le Agaga Paia. Amene.

e le o i ai se Iutaia po o se Eleni, e le o i ai se pologa po o se sa‘oloto, e le o i ai se tane po o se fafine; auā ua tasi lava outou uma ia Keriso Iesu.

auā e leai se aoga o le peritome po o le le peritomeina i e o ia Keriso Iesu, tau lava o le faatuatua e matuā galue i le alofa.

Auā le au uso e, ua valaauina outou i le sa‘olotoga; tau lava ina ne‘i avea le sa‘olotoga ma togafiti a le tino; a ia outou auauna le tasi i le tasi i le alofa. Auā ua atoatoa le tulafono uma lava i le upu e tasi, o lenei, Ia e alofa atu i lē lua te tuaoi, ia pei o oe lava ia te oe. A e afai tou te feūtai ma fe‘ainai, ia outou ina ne‘i faaumatia outou ia te outou.

Ua iloa tino foi galuega a le tino, o mea faapenei; o le mulilua, o le faitaaga, o le amio leaga, o le matāitu, o le ifo i tupua, o le fai togafiti faataulāitu, o le feitagai, o le femisai, o le losilosi vale, o le lotoa, o le finau vale, o le fevaevaeaiga, o maseiga, o le mataua, o le fasioti tagata, o le onaga, o le poula, ma mea faapena; ou te muai ta‘u atu nei ia te outou, pei ona ou fai atu anamua, o e faia mea faapena, e le fai le malo o le Atua mo latou tofi.

A o le fua o le Agaga o le alofa, o le olioli, o le filemu, o le onosai, o le mataalofa, o le agalelei, o le faamaoni, o le agamalu, ma le le gaoiā; e le faatulafonoina mea faapena.

Le au uso e, afai e maua se tagata i se tasi agasala, o outou o i la le Agaga ia outou faafoi mai le ua faapeaina ma le loto o le agamalu, ma ia faaeteete oe ina ne‘i faaosoosoina foi oe. Ia outou fesui i a outou avega e ave, ma ia faapea ona outou faia le tulafono a Keriso.

Auā pe a manatu se tasi o le tagata aoga ia, a e leai, ua pelogia o ia e ia i lona manatu. A ia taitoatasi ma faamasino i lana lava galuega, ona ia te ia lea o se mea e mitamita ai ia te ia lava, a e le o se tasi.

Aua ne‘i tatou faapalapala i le amio lelei; auā o ona po e tatau ai tatou te selesele mai ai, pe afai tatou te le faavaivai. O lenei, ia tatou agalelei, ia faatatau i mea e tutupu i lea aso ma lea aso, i tagata uma lava, a e faasili i le aiga o le faatuatua.

faapei ona ia filifili mai ia i tatou ona o ia, a o lei faavaeina le lalolagi, ina ia paia i tatou ma ia le mata‘uleagaina i ona luma, i le alofa;

Ua ou faalogologo i lo outou faatuatua i le Alii o Iesu, ma lo outou alofa i le au paia uma lava, o le mea lea ou te le mapu ai i le faafetai ona o outou, o ta‘uta‘ua outou i a‘u tatalo;

A o le Atua, ua i ai le faulai o le alofa, ona o lona lava alofa tele na ia alofa mai ai ia i tatou, a o oti lava i tatou i amio leaga, ua na faaola mai ia i tatou faatasi ma Keriso; (o le alofa tunoa ua faaolaina ai outou;)

Auā o lana lava galuega i tatou, na faia i tatou ia Keriso Iesu, ina ia faia galuega lelei, na saunia anamua e le Atua, ina ia tatou savavali ai.

ia nofo mau Keriso i o outou loto i le faatuatua, ina ia mauaa outou, ma ia faavaeina i le alofa, tou te mafai ai ona iloa lelei e outou atoa ma le au paia uma, o le uiga o le lautele, ma le umi, ma le loloto, ma le maualuga, ia iloa foi le alofa o Keriso ua silisili ese e le mailea, ia faatutumuina outou i le tumu uma lava o le Atua.

O lenei, o a‘u o le ua noanoatia ona o le Alii, ou te aioi atu ia te outou ia outou savavali ia tusa ma le valaau ua valaauina ai outou, ma le loto maulalo lava ma le agamalu, ma le onosai, ia outou faapalepale le tasi i le tasi ma le alofa, ia taumafaia e outou ona taofi o le loto gatasi i la le Agaga i le noataga o le filemu.

O lē gaoi aua ne‘i toe gaoi, a e lelei ina faamalosi o ia i galuega a ona lima i mea aoga, ia maua e ia se mea e avatu i le ua mativa. Aua ne‘i alu atu se upu leaga ai o outou gutu, na o le upu lelei e ati ae ai i mea e aoga, e tupu ai le lelei i e faalogologo i ai. Aua foi tou te faatiga i le Agaga Paia o le Atua, ua faamaufaailogaina ai outou ia te ia seia oo i le aso e faaolaina ai. Ia te‘a ma outou upu faafiufiu uma lava, ma le lotoa, ma le ita, ma le leo tele, ma le upu leaga, atoa ma le loto leaga uma lava. A ia outou feagaleleiai, ia femutimutivaleai lo outou alofa, ia fefaamagaloai outou, faapei ona faamagaloina outou e le Atua ia Keriso.

O lenei, ia faaa‘oa‘o outou i le Atua, faapei o le fanau pele; ma ia savavali i le alofa, faapei o Keriso foi na ia alofa mai ia i tatou, ua na foai mai foi e ia ia te ia e sui a‘i i tatou, o le taulaga ma le togiola i le Atua o le mea manogi lea;

Ia usiusitai le tasi i le tasi ma le mata‘u i le Atua.

O outou tane, ia outou alolofa atu i a outou lava avā, faapei o Keriso foi ona alofa mai i le ekalesia, ma foaiina mai e ia ia te ia e fai mona sui;

O loo faapea ona tatau ona alolofa o tane i a latou lava avā, faapei o latou lava tino; o lē alofa i lana lava avā, o loo alofa o ia ia te ia lava; auā e leai lava se tasi e ita i lona lava tino; a e peitai na te fafaga ma tausi atu i ai, faapei o le Alii foi ona tausi i le ekalesia; auā o itu lava i tatou o lona tino, ma lona aano, ma ona ivi.

O le mea lea e tuua ai e le tane o lona tamā ma lona tinā, a e faatasi ma lana avā, ona avea ai lea o i laua o le tino e tasi. O le mea matuā lilo lenei; a ou te talaina atu nei ia Keriso atoa ma le ekalesia. A o outou, ia taitasi outou ma alofa i lana lava avā faapei o ia lava ia te ia; o le fafine foi ia ava o ia i lana tane.

O outou le fanau, ia outou faalogo i o outou mātua i le Alii, auā o le mea tonu lava lea. Ia e ava i lou tamā ma lou tinā; o le uluai tulafono lea ua i ai le mea ua folafolaina; ina ia manuia ai oe, ma ia e nofo tulu‘i ai i luga o le laueleele. O outou tamā foi, aua ne‘i tou faaonoono atu i a outou fanau, a ia tausi atu i ai i aoaiga ma apoapoaiga a le Alii. O outou pologa, ia outou faalogo i o outou alii i la le tino, ma le mata‘u ma le gatete, i le faamaoni o outou loto, e peiseai ua faalogo ia Keriso.

Ia i le au uso le manuia, ma le alofa, atoa ma le faatuatua mai le Atua le Tamā; ma le Alii o Iesu Keriso. Ia i ai le alofa tunoa ia i latou uma o e alolofa tumau i lo tatou Alii o Iesu Keriso. Amene.

Auā ua silafia mai e le Atua ia te au, ua tele lo‘u naunau ia te outou uma lava i le alofa mutimuti vale o Iesu Keriso. O la‘u tatalo foi lenei, ia faatuputeleina pea lava lo outou alofa, ma le iloa lelei, atoa ma le faautauta uma; ina ia masino ia te outou mea uiga eseese, ina ia avea outou ma ē faamaoni, ma le le ta‘uleagaina pe a oo i le aso o Keriso;

O lenei, afai a e ai se faamafanafana ia Keriso, afai a e ai se faamatalaloto i le alofa, afai a e ai se mafuta faatasi ma le Agaga, afai a e ai se alofa mutimuti vale ma se loto alofa, ina faaatoatoa mai ia e outou lo‘u olioli, ina ia gatasitasi o outou manatu, ia ia te outou le alofa faatasi, ma le loto gatasitasi, ma le manatunatu i le mea e tasi. Aua ne‘i faia se mea e tasi ma le finau vale, ma le mitamita fua; a ia taitasi outou ma manatu ma le loto maulalo, ua sili nisi uma ia te ia. Aua ne‘i taitasi ma vaavaai i ana lava mea, a ia taitasi ma vaavaai i mea a isi.

Ia ia te outou foi lea lava manatu sa ia Keriso Iesu, o ia sa uiga faatasi ma le Atua, e lei manatu ia o se mea faoa ina ia tusa lava o ia ma le Atua; a ua faamaulalo e ia ia te ia, ua uiga o ia faatasi ma le pologa, ina ua faia o ia faapei o se tagata; na iloa foi o ia ua tino mai i le tagata, ua faamaulalo e ia ia te ia, ua na anaana ua oo ina maliu, o le maliu lea i le satauro.

O lenei, o‘u uso e, o e ou te alofa ma naunau i ai, o lo‘u fiafia ma lo‘u pale le au pele, ia faapea ona tumau o outou i le Alii.

Ma te faafetai atu i le Atua, o le Tamā o ia o lo tatou Alii o Iesu Keriso, o loo tatalo atu e le aunoa mo outou, talu ona ma faalogologo i lo outou faatuatua ia Keriso Iesu, ma lo outou alofa i le au paia uma lava;

Ou te olioli nei i mea ou te tiga ai ona o outou, ou te faaatoa foi i lo‘u tino o mea ua totoe i puapuaga o Keriso ona o lona tino, o le ekalesia lea;

ina ia faamafanafanaina o latou loto, o faasooina i le alofa, ina ia maua ai le oloa uma o le mautinoa i le loto matala, ina ia iloa lelei le upu a le Atua sa lilo, o le Tamā lea, atoa ma Keriso;

a o ona po nei ia tuu ese ai e outou lava o nei mea uma, o le ita, o le lotoa, o le loto leaga, o le upu leaga, ma le upu matagā ai o outou gutu. Aua le fetaupelopeloai, ina ua toeseina e outou le tagata tuai atoa ma ana amio, a ua outou oofu i le tagata fou, o le ua faafouina i le poto, e faatatau ia foliga i le na faia o ia. E le o i ai se Eleni po o se Iutaia, o sē peritomeina po o sē le peritomeina, o se tagata o nuu ese po o se Sekutia, o se ploga po o se sa‘oloto; a ua ia Keriso mea uma, o i ai foi o ia i mea uma lava.

O lenei, ia oofu outou i le alofa mutimuti vale, ma le agalelei, ma le loto maulalo, ma le agamalu, ma le onosai, faapei o e ua filifilia e le Atua, o e ua paia ma ua alofaina; ia fefaapalepaleai, ma ia fefaamagaloai outou, pe afai ua agaleagaina se tasi e se tasi; faapei ona faamagalo mai Keriso ia te outou, ia faapea foi outou. A o le alofa, e lautua lea i nei mea uma, o le fusi lea e atoatoa ona lelei ai. Ia pule foi le filemu mai le Atua i o outou loto, o le mea lea ua valaauina ai outou e fai ma tino e tasi; ma ia outou saga faafetai. Ia nofo le afioga a Keriso i totonu ia te outou ia tele lava, i le poto uma lava, ia outou a‘oa‘o ma apoapoai le tasi i le tasi i salāmo, ma pese, ma siva faaleagaga, o loo pepese atu ai ma le faafetai i le Alii i o outou loto. O mea uma foi tou te faia i le tautalatala, po o le amio, ia faia uma lava ia mea i le suafa o le Alii o Iesu, ma le faafetai i le Atua le Tamā ona o ia.

O outou fafine, ia outou usiusitai atu i a outou lava tane, pei ona tatau i le Alii. O outou tane, ia outou alolofa atu i a outou avā, aua foi ne‘i faaonoono ia te i latou. O outou le fanau, ia outou faalogo i o outou mātua i mea uma; auā o le mea mālie lea i le Alii. O outou tamā, aua ne‘i faaita i a outou fanau, ina ne‘i faapalapala i latou.

O outou pologa, ia outou faalogo i mea uma i o outou matai i la le tino, aua ne‘i faatagā auauna, faapei o e faafiafia i tagata, a ia faia ma le loto faamaoni, o loo matatau i le Atua. O mea uma lava tou te faia, ia faia ma le loto, peiseai ua faia i le Alii, a e le o tagata;

Ia savavali ma le poto i e o i tua, ma faaaogaina e outou aso o lenei olaga. Ia le aunoa a outou upu ma le alofa, ia faamāi i le masima, ia iloa e outou ona fai faatatau se tali i tagata e taitoatasi uma.

Ia faatele foi e le Alii, ma ia faasilisili ona tele o lo outou alofa, o le tasi i le tasi, atoa ma tagata uma, faapei o i matou nei lava ia te outou; ina ia faatumauina o outou loto e le mata‘uleagaina i le amio lelei i luma o le Atua lo latou Tamā, pe a afio mai lo tatou Alii o Iesu Keriso, faatasi ma ona au paia uma.

A e le aoga ona ou tusi atu ia te outou i le mataupu o le alofa i le au uso; auā ua a‘oa‘oina outou lava e le Atua ia fealofani. Auā foi ua faapea lava ona outou faia i le au uso uma lava o i Maketonia atoa uma. A e matou te apoapoai atu ia te outou le au uso e, ia faasilisili pea i ai;

O lea ia outou feapoapoai ai, ma ia fefaamafanafanai, faapei ona outou faia lava. Matou te aioi atu foi ia te outou, le au uso e, ia outou iloa e o galulue ia te outou, ma pule ia te outou i la le Alii, ma latou apoapoai atu ia te outou; ia matuā mānatua i latou ma le alofa, ona o la latou galuega. Ia outou nonofo fefilemuai. Matou te aioi atu foi ia te outou, le au uso e, ia outou apoapoai atu i e amio faapiopio, ia faamafanafana i e loto iti, ia fesoasoani i e o vaivai, ia outou onosai i tagata uma lava. Ia outou, ne‘i taui atu e se tasi le leaga i le leaga i se tasi tagata, a ia outou tausisi e le aunoa i le mea lelei, o le tasi i le tasi, atoa ma tagata uma lava.

E tatau ona matou faafetai e le aunoa i le Atua ona o outou, le au uso e, e faapei ona tusa, auā ua tupu tele lava lo outou faatuatua, ua faateleina foi lo outou fealofani o outou uma lava taitoatasi. O lea matou te mitamita ai ia te outou o i matou nei lava, i ekalesia a le Atua, ona o lo outou onosai ma lo outou faatuatua, i ona po o sauaga uma ma puapuaga ua outou faatoatoa ai; o le faailoga lea o le faamasinoga tonu a le Atua, ina ia ta‘uaogaina outou i le malo o le Atua, o le mea lea e tigaina ai outou.

ia ta‘ita‘i tonu foi e le Alii o outou loto i le alofa o le Atua ma le onosai o Keriso.

A o le iuga o le poloaiga, o le alofa lea ai le loto mamā, ma le loto fuatia ifo ua lelei, ma le faatuatua faamaoni;

Ua silisili foi ona tele o le alofa tunoa o lo tatou Alii, ua tupu mai ai lo‘u faatuatua atoa ma le alofa o loo ia Keriso Iesu.

Aua ne‘i ‘ino‘ino se tasi i lou taulealea, a ia fai oe ma faaa‘oa‘o i e ua faatuatua, i le upu, ma le amio, ma le alofa, ma le loto, ma le faatuatua, ma le le gaoiā.

A e afai e le tausi e se tasi i lona aiga, afai foi e le sili ona tausi i e mau ma ia, ua faafitia e ia le faatuatua, e sili foi lona leaga i le ua le faalogo.

A o oe, le tagata o le Atua e, ia e sola ese i ia mea; a ia e tausisi atu i le amiotonu, ma le amio Atua, ma le faatuatua, ma le alofa, ma le onosai, ma le agamalu.

Ou te faafetai atu i le Atua, o le ou te auauna i ai ma le loto fuatia ifo ua mamā pei ona maua mai o‘u tupuga, ina ua ou manatua oe e le aunoa i a‘u faatoga i le po ma le ao; o loo ou faanaunau e feiloai ma oe, auā ua ou manatu i ou loimata, ina ia tumu ai a‘u i le olioli;

Auā ua le foaiina mai e le Atua ia te i tatou le Agaga e mata‘u ai, a o le Agaga e faamalosi ai, ma alofa ai, ma mafaufau tonu ai. O lenei, aua e te mā i le molimau i lo tatou Alii, po o ona o a‘u o loo noanoatia ona o ia; a ia tiga faatasi i tatou ona o le tala lelei, e tusa ma le mana o le Atua,

Auā e le tatau ona finau o le auauna a le Alii, a ia agamalu i tagata uma, ia mafaia ona a‘oa‘o atu, ma ia onosai, ia a‘oa‘o atu ma le agamalu i e o finau mai; pe mafai lava le Atua ona foai atu ia te i latou le salamo, ina ia latou iloa lelei le upu moni;

auā e avea tagata ma e alolofa i latou ia i latou, o e mananao i tupe, o e loto vii, o e faamaualuga, o e upu leaga, o e le faalogo i mātua, o e le faafetai, o e amio leaga, o e le lotoaiga, o e tuumavaega, o e faatuaupua, o e le taofi manao o le tino, o e faasaua, o e le alolofa i tagata amio lelei, o e faalata, o e soona fai, o e ua faafefeteina, o e ua tele le manao i mea faafiafia a e leai se manao i le Atua; o e ua peiseai ua amio Atua, a o le mana ua i lea mea ua latou teena; ia e ‘alo ese lava i tagata faapena.

A o oe, ua e iloa lelei o la‘u mataupu, o la‘u amio, o le loto mau, o le faamaoni, o le faapalepale; o le alofa,

A o oe, ia e tautala atu i mea e tusa ma le mataupu e ola ai; fai atu i toeaina ia mataala i latou, ia faatoeaina, ia faautauta, ia faamaoni i le faatuatua, ma le alfoa, ma le onosai. Ia faapena foi loomatutua, ia amio i latou i le amio Atua, aua ne‘i faatuaupua, aua ne‘i faapologaina i latou i le uaina, a ia fai ma a‘oa‘o i mea lelei, ina ia latou a‘oa‘o atu i fafine muli latou te alofa atu i a latou tane, ia alofa atu i a latou fanau, ia faautauta i latou, ia le gaoiā, ia tausi lelei i o latou aiga, ia agalelei, ia usiusitai atu i a latou lava tane, ina ne‘i upuleagaina le afioga a le Atua. Ia faapea foi ona e apoapoai atu i taulelea, ia faautauta i latou. Ia avea oe a faaa‘oa‘o o galuega lelei i mea uma lava; ia e a‘oa‘o i le mataupu ma le faamaoni, ma le faatoeaina, ma le upu e ola ai, e le mata‘uleagaina, ina ia faamāina ai o lē tetee mai, ina ua le maua e ia se mea leaga e talatala ane ai ia te outou.

Ia e faamanatu atu ia i latou ia latou usiusitai i alii sili ma faipule, ia gauai i alii, ia nofo sauniuni foi i latou i galuega lelei uma lava, aua ne‘i upu leaga i se tasi, aua ne‘i faamisa, a ia faapalepale, ma ia faaali atu le agamalu uma i tagata uma lava. Auā o i tatou foi, sa vālea i tatou anamua, ma faalogogata, ma faaseseina, sa auauna i tu‘inanau ma mea eseese e fiafia ai, sa nonofo ma le loto leaga ma le mataua, sa inosia ma feitagai. A ua faaalia mai le agalelei ma le alofa i tagata o lo tatou Faaola le Atua, ona faaola mai ai lea o ia ia i tatou, e le ona o galuega o i le amiotonu sa tatou faia, a e tusa ma lona lava alofa i le faataeleina i le toefuataiina ma le faafouina e le Agaga Paia,

Ou te faafetai atu i lo‘u Atua, o loo ou ta‘uta‘ua oe e le aunoa i a‘u tatalo, ina ua ou faalogo i lou alofa ma le faatuatua o ia te oe i le Alii o Iesu, atoa ma le au paia uma;

Auā lo‘u uso e, ua tele lo matou fiafia ma le mafanafana ona o lou alofa, ina ua faamafanafanaina le au paia ona o oe. O lenei, e ui lava ina ua ia te au le pule lava mai ia Keriso e poloai atu ai ia te oe i mea e tatau, a e ou te aioi atu ona o le alofa, o a‘u nei lava o Paulo le toeaina, o le ua noanoatia nei foi ona o Iesu Keriso.

Auā e le amioletonu le Atua, na te le faagalogaloina la outou galuega ma le faamalosi i le alofa ua outou faaali mai ai i lona suafa, auā na outou auauna i le au paia, i le o loo outou auauna i ai.

auā ou te faamagalo i a latou amioleaga, ou te le toe manatua foi a latou agasala ma o latou solitulafono.

ia tatou manatunatu foi le tasi i le tasi, ina ia taufaatupu ai le alofa ma galuega lelei; aua le lafoaiina le faapotopotoina o i tatou, pei o le masani o isi, a ia fefaamafanafanai; ia atili ai foi ona faapea ina ua outou iloa o le aso o loo tāulata mai.

Auā o le ua alofagia e le Alii, ua aoai atu o ia ia te ia; ua sasaina foi e ia atalii uma ua talia e ia. Afai e talia e outou le aoaiga, o loo tausi mai le Atua ia te outou pei ona tausi i atalii; auā o ai se atalii ua le aoaiina e lona tamā? A e afai e aunoa outou ma le aoaiga, ua tofusia ai le fanau uma lava, o tama to i fale outou, a e le ni atalii. Auā foi sa ia i tatou tamā o tatou tino e na aoai mai ia i tatou, sa tatou faalogo i ai; a e le sili ea i se a ona tatou usiusitai i le Tamā o tatou agaga tatou te ola ai?

Ia tumau le fealofani o le au uso. Aua le galo le alofa i tagata ese; auā o lea ua talia ai e isi o agelu ma le le iloa. Ia manatua e ua noanoatia, peiseai ua noanoatia outou faatasi ma i latou; ia manatua foi e ua agaleagaina, auā o loo i le tino foi outou.

Aua le galo ia te outou ona agalelei ma alolofa atu; auā o taulaga faapena e fiafia ai le Atua.

Ia olioli le uso mativa ina ua faamaualugaina o ia;

O lenei, o‘u uso pele e, ia taitasi le tagata ma faataalise ona faalogologo, ia faagesegese ona tautala atu, ia faagesegese ona ita. Auā e le tupu le amiotonu mai le Atua i le ita o tagata; o lea foi ia lafoai ai mea eleelea uma ma le leaga e silisili, ia talia ma le faamaulalo le upu ua totōina, o lea e mafai ai ona faaolaina o outou agaga.

Ai se tasi o ia te outou e manatu ifo o ia o le tagata amio Atua a e le taofi i lana upu, a e faaseseina e ia lona lava loto, ua le aoga lana amio Atua.

Auā afai e ulu atu se tagata i la outou faapotopotoga ma ni mama auro i ona lima ma le ofu pupula, a e ulu atu ai foi se tagata mativa ma le ofu leaga, ona outou faaaloalo atu lea ia te ia ua ofu i le ofu pupula, ma faapea atu i ai, Ina alāla ia oe i lenei mea lelei; a e fai atu i le tagata mativa, Ina tu ia oe iina, pe nofo ia iinei i lalo o le mea e tu ai o‘u vae; e le ua filitaa ea outou ia te outou lava, ma outou fai ma faamasino e leaga o outou manatu? O‘u uso pele e, faalogologo mai ia; e le ua filifilia ea e le Atua o e matitiva i lenei lalolagi, o tamaoaiga i le faatuatua, ua tofia foi i latou i le malo ua ia folafolaina mai i e alolofa ia te ia? Peitai outou, ua outou faaletaualoa le tagata mativa, E le ua faasaua ea o e tamaoaiga ia te outou, ma latou fetoso ia te outou i le faamasinoga?

Afai foi ua atoatoa ona anaana o outou i le tulafono silisili, e tusa ma le Tusi, Ia e alofa atu i lē lua te tuaoi, ia pei o oe lava ia te oe, tou te amio lelei ai; a e afai tou te faailogaina tagata, ua outou agasala ai, ua faailoaina ai i le tulafono o solitulafono outou;

aua o le le alofa, e le alofagia o ia i le faamasinoga; a o lē alofa, e olioli ia pe a faamasinoina.

Afai ua le ofu se uso po o se tuafafine, ua leai foi sana mea e ‘ai i lea aso ma lea aso, a fai atu so outou ia te i latou, Ina o ia outou ma le manuia, ia mafanafana, ma ia maoona, a ua le foai atu ia te i latou ni mea e tatau i le tino, se a lona aoga? E faapea foi le faatuatua, pe afai e le i ai galuega, e mate lava ia ina ua na o ia.

E faapea foi le laulaufaiva, o le mea itiiti lea, a ua lafo upu faasili. Faauta, o le afi itiiti e mu ai le vao laau e tele. O le laulaufaiva o le afi lea, o le faupuega o amio leaga; ua faapea ona tuuina le laulaufaiva i o tatou itu tino, o loo leaga ai le tino uma, ua faamuina ai le olaga nei uma lava; ua faamuina foi lena mai Kēna.

O ai ea so outou ua poto ma ua malamalama? Ina faaali mai ia e ia ai le amio lelei o ana lava galuega i le agamalu o i ai le poto. A e afai o ia te outou le finau leaga ma le misa i o outou loto, soia le mitamita, aua foi le pepelo e faaleaga ai le upu moni.

Auā o le mea e i ai le mataua ma le misa, o i ai le feavauai ma mea leaga uma. A o le poto mai lugā e muamua ona mamā, i le ua filemu, e agamalu, e ganagofie, e tumu i le alofa ma fua lelei, e le alofa faapito, e le faatagā fai. Ua luluina foi le fua o le amiotonu ma le filemu e i latou o e faatupuina le filemu.

Maifea taua ma misa o ia te outou? E le o lenei ea, mai o outou manao leaga o loo tau i o outou tino uma? Ua outou tu‘inanau, a e lei maua; ua outou fasioti ma outou losilosi, a e tou te le mafai ona maua; ua outou femisai ma fai taua, a e lei maua, ina ua outou le ole atu; ua outou ole atu, a e lei maua, auā ua ole atu ma le faaletatau, ina ia faauma ai ia mea i o outou manao leaga.

A ua foai mai e ia le alofa tunoa e sili; o lea ua faapea mai ai, E tetee atu le Atua i e faamaualuga, a e foai mai le alofa tunoa i e faamaulalo. O le mea lea ia outou gauai ai i le Atua; ia outou tetee atu i le tiapolo, ona sola ese ai lea o ia ia te outou. Ia outou faalatalata atu i le Atua, ona faalatalata mai lea o ia ia te outou. Tagata agasala e, ina fafano ia o outou lima, o outou e faalotolotolua e, ina faamamā ia o outou loto; ia puapuagatia outou, ma ia faavauvau, ma fetagisi; ia liua o outou ‘ata‘ata ma faavauvau, ma lo outou fiafia i le faanoanoa; ina faamaulalo ia i luma o le Alii, ona faamaualugaina lea o outou e ia. Le au uso e, ana tou te fefaiupuai; o lē fai upu i lona uso, ma faamasino i lona uso, ua fai upu o ia i le tulafono, ma faamasino i le tulafono; afai foi ua e faamasino i le tulafono, e te le se anaana i le tulafono, a o le faamasino i ai.

O lenei, o le ua iloa e fai le mea lelei, a e le faia, o le agasala lea ia te ia.

ia onosai foi outou, ia faatumauina o outou loto, auā ua latalata le afio mai o le Alii. Le au uso e, aua tou te femuimuiai, ne‘i faasalaina outou; faauta, ua tu mai le faamasino i luma o le faitotoa. O‘u uso e, ia outou faaa‘oa‘o i le faatoatoa i le leaga, atoa ma le onosai o le au perofeta, e na tautala mai i le suafa o le Alii.

Ia fefaaaliai a outou agasala, ma tatalo le tasi mo le tasi, ina ia faamaloloina outou. Ua aoga tele le tatalo faatauanau a le tagata amiotonu.

Ua outou faamamā i o outou loto i le gauai i le upu moni e le Agaga, ua iu i le alofa faamaoni i le au uso, o le mea lea ia matuā fealofani ai outou ai le loto naunau;

O lenei, ia tuueseina e outou le loto leaga uma lava, ma le faa‘ole‘ole uma, ma le taupelopelo, ma le mataua, ma tautalatalaga leaga uma lava; faapei o tama meamea faatoa fanau mai ia naunau outou i le suāsusu e le suia o le upu, ina ia outou tutupu ai,

Ia outou ava i tagata uma; ia alolofa atu i le au uso; ia matatau i le Atua; ia ava i le tupu. O outou auauna, ia outou usiusitai ma le mata‘u uma i o outou matai, ana ne‘i gata ai i e agalelei ma e agamalu, a o e amio paaa foi.

Auā na valaauina outou ona o lea lava mea; auā na tigaina Keriso lava o le sui o outou, ua tuuina mai ai e ia le faaa‘oa‘o mo outou, ina ia outou mulimuli atu i ona tulagāaao. O le na le agasala lava, na le iloa foi se pepelo i lona fofoga; o le sa agateleina, a e lei toe agatele atu, na faatigaina o ia, a e lei faamatau atu, a ua tuuina atu o ia e ia i le na te faamasino tonu.

O le iuga lenei, ia loto gatasi outou uma, ia fealofani, ia alolofa i le au uso, ia mutimuti vale i le alofa, ia agalelei; aua le taui atu le leaga i le leaga, po o le agatele mai i le agatele atu; a ia outou faamanuia atu, ina ua iloa o le mea lenei na valaauina ai outou, ina ia maua e outou le manuia.

Ia muamua i mea uma ona maua e outou o le alofa naunau o le tasi i le tasi, auā o le alofa e ufiufi ai agasala e tele; ia outou talia malaga o outou ma le le muimui. Ia taitoatasi ma auauna o le tasi i le tasi i lea lava mea, e pei ona maua e ia o le mea alofa, e pei o auauna pule e lelei i le alofa tunoa uiga eseese o le Atua.

Ia faapea o outou taulelea, ia usiusitai i toeaina; ia usiusitai outou uma lava o le tasi i le tasi, ia oofu outou i le loto maulalo; auā, E tetee atu le Atua i e faamaualuga, a e foaiina mai le alofa tunoa i e faamaulalo. O le mea lea ia faamaulalo ai outou i lalo o le aao malosi o le Atua, ina ia faamaualugaina outou e ia i ona po e tatau ai. Ia tuuina atu ia te ia mea uma tou te popole ai, auā o loo manatu mai o ia ia te outou.

Ia fealofani outou i le feasogi. Ia manuia outou uma lava o e o ia Keriso Iesu. Amene.

O le mea lava lea ia outou matuā faamalosi ai lava, ina ia faaopoopoina le amio lelei i lo outou faatuatua, ia faaopoopo foi le poto i le amio lelei, ia faaopoopo foi le le gaoiā i le poto, ma ia faaopoopo le onosai i le le gaoiā, o le amio Atua foi i le onosai, ia faaopoopo foi le alofa i le au uso i le amio Atua, o le alofa foi i le alofa i le au uso.

A o lē tausi i lana afioga, e moni, ua atoatoa le alofa i le Atua i totonu ia te ia. O le mea lea ua tatou iloa ai o i totonu ia te ia i tatou.

O lē faapea, o i le malamalama o ia, a o loo ita i lona uso, o i le pouliuli lava ia ua oo mai i ona po nei. O sē alofa i lona uso, o loo tumau ia i le malamalama, e leai foi se mea ia te ia e tausuai ai. A o lē ita i lona uso, o i le pouliuli o ia, o loo savali foi i le pouliuli, e le iloa foi e ia le mea e alu i ai, auā ua faatauasoina ona mata e le pouliuli.

Aua tou te mananao i le lalolagi, po o mea o i ai i le lalolagi. Pe afai e manao se tasi i le lalolagi, e le o ia te ia le alofa i le Tamā.

Faauta i le silisili o le alofa ua foaiina ma e le Tamā ia te i tatou, ina ua ta‘ua i tatou o le fanau a le Atua; o le mea lea e le iloa ai i tatou e le lalolagi, auā na le iloa o ia.

Auā o le poloaiga lenei ua outou faalogologo i ai talu le amataga, ia tatou fealofani.

O i tatou, ua tatou iloa ua oo i tatou i le ola sa i le oti, auā o loo alolofa i tatou i le au uso; o se le alofa i le uso, o loo tumau ia i le oti. O i latou uma o e ita i o latou uso, o fasioti tagata i latou; ua outou iloa foi e leai sē fasioti tagata e tumau ia te ia le ola e faavavau. O le mea lava lenei ua tatou iloa ai le alofa, ina ua tuuina atu e ia o lona lava soifua e sui a‘i i tatou; e tatau foi ona tatou tuuina atu lo tatou ola e sui a‘i le au uso. O sē ua i ai le oa a le lalolagi nei, pe a iloa atu e ia lona uso ua mativa, a e punitia lona loto alofa ia te ia, pe faapefea ona tumau o le alofa i le Atua i lea tagata? La‘u fanau e, aua ne‘i tatou alolofa tau o le upu ma le gutu, a o le amio ma le faamaoni.

O lenei foi lana poloaiga, ia tatou faatuatua i le suafa o lona Alo o Iesu Keriso, ma ia tatou fealofani, faapei ona tuuina mai e ia o le poloaiga ia i tatou.

Le au pele e, ia tatou fealofani; auā mai le Atua le alofa; o i latou uma foi o e alolofa ua fanau mai i latou mai le Atua, ua iloa foi e i latou le Atua. O se le alofa ua le iloa e ia le Atua; auā o le Atua, o le alofa lava ia. O le mea lava lenei ua faaalia mai ai le alofa o le Atua ia te i tatou, ina ua auina mai e le Atua lona Alo e toatasi i le lalolagi, ina ia tatou ola ia te ia. O le alofa lava lenei, e le ona ua tatou alofa i le Atua, a ua alofa mai o ia ia te i tatou, ua na auina mai foi lona Alo o le togiola mo a tatou agasala. Le au pele e, afai ua faapea ona alofa mai o le Atua a te i tatou, e tatau ai ona tatou fealofani. E lei vaaia lava le Atua e se tasi; a tatou fealofani, ua tumau le Atua i totonu ia te i tatou, ua atoatoa foi le alofa ia te ia i totonu ia i tatou.

O i tatou foi, ua tatou iloa ma ua faatuatua i le alofa ua i le Atua ia te i tatou. O le Atua, o le alofa lava ia; o lē tumau i le alofa, ua tumau ia i totonu o le Atua, o le Atua foi o i totonu ia te ia. O le mea lava lenei ua atoatoa ai le alofa ia te i tatou, ina ia tatou maua le faamalosi i le aso o le faamasinoga; auā e pei o ia, e faapea foi i tatou i lenei lalolagi. E leai se fefe i le alofa, a o le alofa atoatoa e faateaeseina ai le fefe; auā o le mea tiga le fefe; o le ua fefe, e le faaatoatoaina o ia i le alofa. O i tatou, ua tatou alolofa ia te ia, auā na ia muai alofa mai ia te i tatou. Pe afai e faapea mai se tasi, Ou te alofa i le Atua, a e ita i lona uso, o le pepelo lava ia; auā o le le alofa i lona uso ua ia vaai atu i ai, pe mafai faapefea ona alofa o ia i le Atua ua ia le vaai atu i ai. O lenei foi le poloaiga ua tatou maua mai ia te ia, o lē alofa i le Atua ia alofa foi o ia i lona uso.

O i latou uma o e talitonu, o Iesu o le Keriso lava lea, ua fanau mai i latou mai le Atua; o i latou uma foi o e alolofa i lē ana le fanau, e alolofa foi i latou i lana fanau. O le mea lava lenei ua tatou iloa ai e alolofa i tatou i le fanau a le Atua, pe a tatou alolofa i le Atua, ma tausi i ana poloaiga. Auā o lenei lava le alofa i le Atua, ia tatou tausi i ana poloaiga; e le mamafa foi ana poloaiga.

Ia ia te outou le alofa tunoa, ma le alofa ma le manuia mai le Atua le Tamā, atoa ma le Alii o Iesu Keriso, o le Alo o le Tamā, i le faamaoni atoa ma le alofa.

O lenei, le tamaitai e, ou te aioi atu ia te oe, (ou te le tusi atu ia te oe e peiseai o se poloaiga fou, a o lea lava ua ia te i tatou talu le amataga.) ia tatou fealofani. O lenei lava le alofa, ia tatou savavali e tatau ma ana poloaiga; o lenei lava le poloaiga, faapei ona outou faalogo i ai talu le amataga, ina ia outou savavali ai.

ia outou faatumau ia te outou i le alofa o le Atua, ma faatalitali atu i le alofa o lo tatou Alii o Iesu Keriso, e oo atu i le ola e faavavau. Ia outou alofa atu i nisi ma ia faatatau; a o isi ia outou faaola ia i latou ma le mata‘u, ia se‘i ia te i latou mai le afi, ma ia outou ‘ino‘ino i le ofu ua pisia i le tino.

mai ia Iesu Keriso foi, o le molimau faamaoni, o le ulumatua o e ua oti, ma le pule i tupu o le lalolagi. O le na alofa mai ia te i tatou, na ia fufulu mai foi ia te i tatou i a tatou agasala i lona lava toto,

A ua ou iloa se mea ia te oe, ona ua e tuua o lou uluai alofa.

Ua ou iloa au galuega ma lou alofa, ma lou auauna mai, ma lou faatuatua, ma lou onosai, ma au galueaga, ua sili mea mulimuli i mea na muamua.

Ou te aoai ma sasa ia i latou uma ou te alofa i ai; o lenei, ia e vilivilitai, ma ia e salamo.

Latou te le toe fia aai, e le toe fia inu foi e le ogotia i latou i le la, po o se tasi vevela; auā o le Tamai mamoe o loo i luma o le nofoālii na te fafaga ia i latou, ma ta‘ita‘i ia te i latou i puna o vai ola; e sōloieseina foi e le Atua o loimata uma nai o latou mata.

O a‘u foi o Ioane na ou iloa le aai paia, o Ierusalema fou, ua alu ifo mai le Atua i le lagi, ua saunia pei o se faatoanofotane ua teuteuina mo lana tane.

E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua. Ua fetalai mai foi lē tietie i le nofoālii, Faauta, ou te faia ia fou mea uma lava. Ua fetalai mai foi o ia ia te au, Ia e tusi; auā o upu nei e moni ma le faamaoni ia. Ua fetalai mai foi o ia ia te au, Ua uma ona fai. O a‘u le Alefa ma le Omeka, o le amataga ma le gataaga. O le ua fia inu ou te foaifuaina atu ia te ia ai le puna o le vai ola. O lē manumalo e maua e ia mea uma, e fai foi a‘u mona Atua, e fai foi o ia mo‘u atalii.