12 – Obugwenyufu Mu By'okwegatta

Noolwekyo omusajja kyʼanaavanga aleka kitaawe ne nnyina ne yeegatta ne mukazi we, ne bafuuka omubiri gumu.

Awo Mukama nʼagamba nti, “Olwʼokunkaabirira okusukkiridde olwʼebibi bya Sodomu ne Ggomola ebingi ennyo, nzija kukka ndabe obanga ddala bakozi ba bibi ngʼokunkaabirira olwʼebibi byabwe okutuuse gye ndi bwe kuli, era obanga si bwe kiri nnaamanya.” Awo abasajja ne bakyuka okuva awo, ne batambula okwolekera Sodomu; naye Ibulayimu nʼasigala ngʼakyayimiridde mu maaso ga Mukama. Awo Ibulayimu nʼamusemberera nʼagamba nti, “Ddala olizikiriza abatuukirivu awamu nʼababi? Singa mu kibuga mulimu abatuukirivu amakumi ataano onookizikiriza nʼotokisonyiwa olwʼabatuukirivu amakumi ataano abakirimu? Kireme okuba gyʼoli okukola ekintu bwe kityo, okutta abatuukirivu awamu nʼababi, abatuukirivu ne benkana nʼababi! Kireme kuba bwe kityo! Omulamuzi owʼensi yonna teyandisaanye akole kituufu?” Mukama nʼagamba nti, “Bwe nnaasanga mu Sodomu abatuukirivu amakumi ataano mu kibuga omwo nzija kusonyiwa ekibuga kyonna ku lwabwe.” Ibulayimu nʼaddamu nti, “Laba nnyinziza okwogera ne Mukama, nze ani, nze enfuufu nʼevvu! Singa abatuukirivu babulako bataano okuwera amakumi ataano, onoozikiriza ekibuga kubanga kubulako bataano?” Nʼamuddamu nti, “Sijja kukizikiriza, bwe nnaasangamu abatuukirivu amakumi ana mu abataano abampulira.” Ate Ibulayimu nʼamugamba nti, “Singa musangibwamu amakumi ana.” Mukama nʼamuddamu nti, “Ku lwʼamakumi ana sijja kukizikiriza.” Ate nʼagamba nti, “Kale nno Mukama aleme okunsunguwalira, nange nnaayogera. Singa musangibwamu amakumi asatu.” Nʼaddamu nti, “Sijja kukizikiriza singa musangibwamu amakumi asatu.” Nʼagamba nti, “Laba ŋŋumye ne njogera ne Mukama. Singa musangibwamu amakumi abiri.” Nʼagamba nti, “Ku lwʼamakumi abiri sijja kukizikiriza.” Ate nʼagamba nti, “Kale Mukama aleme okukwatibwa obusungu, nnaayongera okwogera, naye luno lwokka. Singa kkumi lye linaasangibwamu.” Nʼaddamu nti, “Ku lwʼabo ekkumi sijja kukizikiriza.”

Bamalayika ababiri ne batuuka mu Sodomu akawungeezi; Lutti yali atudde mu mulyango gwa Sodomu. Lutti bwe yabalaba nʼagolokoka okubasisinkana, nʼavuunama, nʼagamba nti, “Bakama bange mukyame mu nnyumba yʼomuddu wammwe munaabe ku bigere, mbegayiridde nʼokusula musule. Munaazuukuka mangu ku makya ne mukwata ekkubo lyammwe.” Ne bagamba nti, “Nedda tunaasula mu luguudo.” Naye nʼabawaliriza nnyo; awo ne bakyama ne bajja gyʼali ne bayingira mu nnyumba ye, nʼabategekera ekijjulo nʼemigaati egitali mizimbulukuse ne balya. Naye nga tebannaba kugenda kwebaka, abasajja abʼomu kibuga, abasajja ba Sodomu, abakulu nʼabato, abantu bonna ne beetooloola ennyumba; ne bayita Lutti nga bagamba nti, “Abasajja abazze gyʼoli ekiro kino bali ludda wa? Batufulumize twebake nabo.” Lutti nʼafuluma gye bali, nʼaggalawo oluggi, nʼabagamba nti, “Baganda bange mbasaba temukola kibi kifaanana bwe kityo. Laba, nnina bawala bange embeerera babiri, ka mbabafulumize, mu bakole kye mwagala; naye temubaako kye mukola basajja bano, bagenyi bange era nze mbalabirira.” Naye ne bamugamba nti, “Tuviire! Omusajja omugwira ono, ate kati yʼatulagira ekyʼokukola! Nedda, tujja kukukolako nʼokusinga abagenyi bo.” Awo ne banyigiriza nnyo Lutti, era kaabula kata bamenye nʼoluggi. Naye abasajja ababiri abaali mu nnyumba ne bagolola emikono gyabwe ne bakwata Lutti ne bamuyingiza mu nnyumba ne baggalawo oluggi. Ne baziba amaaso gʼabasajja abaali ebweru ku luggi lwʼennyumba, abato nʼabakulu, ne bakoowa nga bawammanta oluggi.

Awo abasajja bali ababiri ne babuuza Lutti nti, “Olina abantu bo abalala wano, batabani bo, oba bakoddomi bo, oba bawala bo, oba omuntu omulala yenna mu kibuga? Bafulumye mu kifo kino; kubanga tuli kumpi okukizikiriza. Kubanga okukaaba olwʼabantu baamu eri Mukama kuyitiridde, era Mukama atutumye okukizikiriza.” Awo Lutti nʼafuluma nʼategeeza bakoddomi be abaali abʼokuwasa bawala be ngʼagamba nti, “Musituke, muve mu kifo kino, kubanga Mukama ali kumpi kukizikiriza.” Naye yafaanana ngʼabalaata eri bakoddomi be. Lutti nʼabʼennyumba ye ne badduka. Naye obudde bwe bwali bunaatera okukya, bamalayika ne balagira Lutti nga bagamba nti, “Golokoka, otwale mukazi wo ne bawala bo ababiri abali wano muleme okuzikirira ngʼekibuga kibonerezebwa.” Naye bwe yali akyekunya, abasajja ne bamukwata omukono, nʼemikono gya mukazi we, nʼemikono gyʼabawala be bombi, Katonda ngʼabakwatirwa ekisa, ne babafulumya ne babateeka ebweru wʼekibuga. Bwe baabafulumya ne babagamba nti, “Mudduke muwonye obulamu bwammwe, temutunula mabega wadde okuyimirira mu kiwonvu; muddukire ku nsozi, muleme okuzikirizibwa.”

Awo Mukama nʼatonnyesa ku Sodomu ne Ggomola omuliro nʼobuganga okuva mu ggulu;

Naye mukazi wa Lutti bwe yatunula emabega, nʼafuuka empagi eyʼomunnyo.

Naye Katonda nʼajja eri Abimereki mu kirooto ekiro nʼamugamba nti, “Laba oli mufu, olwʼomukazi gwʼotutte kubanga muka musajja.”

Sekemu mutabani wa Kamoli Omukiiti omufuzi wʼensi eyo nʼamulaba nʼamukwata nʼamusobyako.

Batabani ba Yakobo ne bakomawo eka nga bamaze okukitegeera. Ne banakuwala era ne basunguwalira nnyo Sekemu olwʼokukola ekyʼekivve era ekitasaana mu Isirayiri.

Battiramu Kamoli ne mutabani we Sekemu ne baggya Dina mu nnyumba ya Sekemu ne beetambulira. Awo batabani ba Yakobo ne bagwa ku munyago ne banyaga ekibuga olwa mwannyinaabwe.

Bo ne bamuddamu nti, “Lwaki yayisa mwannyina ffe ngʼomwenzi?”

Yuda bwe yamulaba, nʼamulowooza okuba omu ku bamalaaya, kubanga yali abisse amaaso ge. Nʼagenda gyʼali ku mabbali gʼekkubo, nʼamugamba nti, “Jjangu, neetabe naawe,” kubanga teyamanya nti Ye yali muka mutabani we. Tamali kwe kumubuuza nti, “Onompa ki bwe neetaba naawe?” Yuda nʼamuddamu nti, “Nnaakuweereza embuzi ento.” Nʼamubuuza nti, “Onompa omusingo nga tonnagimpeereza?” Yuda nʼamuddamu nti, “Nkuwe musingo ki?” Nʼamugamba nti, “Akabonero ko, akajegere ko awamu nʼomuggo gwo oguli mu mukono gwo.” Awo nʼabimuwa, ne yeetaba naye, nʼamufunyisa olubuto. Tamali nʼagolokoka nʼagenda, nʼaggyako ekiremba nʼayambala ebyambalo byʼobwannamwandu bwe. Yuda bwe yatuma mukwano gwe Omudulamu, okutwala omwana gwʼembuzi, addizibwe omusingo teyalaba ku mukazi. Bwe yabuuliriza abʼomu kifo omwo, omukazi malaaya eyali Enayimu ku mabbali gʼekkubo, ne bamuddamu nti, “Wano tewabeeranga mukazi malaaya.” Nʼalyoka addayo eri Yuda nʼamugamba nti takubikako kimunye; era nʼabantu abʼekitundu ekyo bamutegeezeza nti, “Awo tewabangawo mukazi malaaya.” Yuda kwe kumugamba nti, “Omukazi oli, ebintu kʼabisigaze tuleme okusekererwa, naweereza embuzi eno, naye nʼatalabikako.” Emyezi ngʼesatu bwe gyayitawo ne bagamba Yuda nti, “Muka mwana wo Tamali yafuuka mwenzi. Ate ebyo nga biri awo obwenzi obwo yabufunamu nʼolubuto.” Yuda kwe kwejuumuula nga bwʼagamba nti, “Mumuleete ayokebwe.” Tamali bwe yali atwalibwa nʼatumira sezaala we Yuda nʼamugamba nti, “Omusajja nannyini bintu bino ye kazaalabulwa. Nkusaba weetegereze ebintu bino: akabonero, akajegere nʼomuggo, byʼani?” Awo Yuda nʼabitegeera nʼagamba nti, “Omuwala mutuukirivu okunsinga, kubanga saamuwa mutabani wange Seera.” Yuda nʼatamuddira.

Awo olwatuuka oluvannyuma lwʼebbanga eriwerako, mukyala wa mukama we namutunuulira nʼokwegomba era nʼamugamba nti, “Weebake nange.” Naye Yusufu nʼagaana, nʼagamba mukazi wa mukama we nti, “Laba, mukama wange yankwasa byonna ebiri mu nnyumba, nʼabiteeka byonna mu mikono gyange, era tewali nʼomu ansinga mu nnyumba ye, tewali na kimu kyʼatankwasa okuggyako ggwe, kubanga ggwe oli mukazi we. Kale nnyinza ntya okuyingira mu kwonoona okwenkanidde awo nʼokusobya eri Katonda?” Newaakubadde muka mukama we yamutayirira, Yusufu ye teyamuwulira na mulundi na gumu. Naye lwali lumu Yusufu bwe yayingira mu nju okukola emirimu gye nga tewali nʼomu mu nnyumba, muka mukama we nʼakwata ekyambalo kya Yusufu nga bwʼagamba nti, “Weegatte nange.” Yusufu nʼamwesimatulako, ekyambalo kye ne kisigala mu ngalo zʼomukazi wa mukama we. Ye nʼadduka nʼava mu nnyumba.

Naye omukazi bwe yalaba ngʼasigazza ekyambalo kya Yusufu, nʼayita abasajja abʼomu nnyumba ye nʼabagamba nti, “Mulabe, yatuleetera Omwebbulaniya okutuduulira, yazze gye ndi okwebaka nange, bwʼawulidde nga ndeekaana nʼadduka nʼava mu nnyumba.” Awo kwe kutereka ekyambalo okutuusa mukama wa Yusufu lwe yadda eka. Omukyala nʼabuulira bba byonna ngʼagamba nti, “Omuddu Omwebbulaniya gwe watuleetera, yayingidde gye ndi okunjooga. Naye nabadde nakaleekaana, nʼaleka ekyambalo kye gye ndi, nʼadduka nʼava mu nnyumba.” Awo mukama wa Yusufu bwe yawulira ebigambo omukazi bye yamutegeeza ngʼagamba nti, “Bwʼati ne bwʼati omuddu wo bwe yampisizza,” obusungu bwa bba ne bubuubuuka. Mukama wa Yusufu nʼakwata Yusufu nʼamuteeka mu kkomera omwasibirwanga abazzizza emisango eri kabaka.

“Toyendanga.”

“Teweegombanga nnyumba ya muliraanwa wo. Teweegombanga mukazi wa muliraanwa wo, newaakubadde omuweereza we omulenzi, newaakubadde omuweereza we omuwala, wadde ente ye oba endogoyi ye, oba ekintu kyonna ekya muntu munno.”

“Omuntu akola ebyʼensonyi nʼensolo ateekwanga kuttibwa.

“ ‘Tewabanga omuntu yenna mu mmwe ajja eri munne gwʼalinako oluganda ne yeebaka naye. Nze Mukama. “ ‘Toleeteranga kitaawo buswavu ngʼokola ebyensonyi ne nnyoko. Oyo ye maama wo eyakuzaala, teweebakanga naye ne mukola ebyensonyi, nʼomuleetako obuswavu. “ ‘Teweebakanga na muka kitaawo ne mukola ebyensonyi, ekyo kireetera kitaawo obuswavu ne kimumalamu ekitiibwa. “ ‘Teweebakanga na mwannyoko, azaalibwa kitaawo, oba azaalibwa nnyoko, ne bwe muba nga mwakulira mu maka gamu oba nga temwakulira wamu, tomukolangako bya nsonyi okumuleetera obuswavu. “ ‘Teweebakanga na muwala azaalibwa mutabani wo, oba muwala wʼomwana wo omuwala, nʼokola naye ebyensonyi; ekyo ne kikuleetako obuswavu. “ ‘Teweebakanga na mwana wa muka kitaawo owʼobuwala eyazaalibwa kitaawo nʼomukolako ebyensonyi; oyo mwannyoko. Tomuleeteranga bya buswavu. “ ‘Teweebakanga na mwannyina wa kitaawo nʼokola naye ebyensonyi; oyo ne kitaawo ba musaayi gwe gumu. “ ‘Teweebakanga na muwala bwe bazaalibwa ne nnyoko nʼokola naye ebyensonyi; kubanga oyo ne nnyoko ba musaayi gwe gumu. “ ‘Toweebuulanga muganda wa kitaawo, ngʼolaga eri mukazi we weebake naye mukole ebyensonyi; oyo maama wo omuto. “ ‘Teweebakanga na muka mutabani wo ne mukola ebyensonyi; kubanga oyo ye mukyala wa mutabani wo; tomuleeteranga bya buswavu. “ ‘Teweebakanga na muka muganda wo ne mukola ebyensonyi, kubanga ekyo kinaaleeteranga muganda wo obuswavu. “ ‘Teweebakanga na mukazi ate ne muwala we nʼokola nabo ebyensonyi. Era teweebakanga na mwana muwala owa mutabani wa mukazi oyo oba na mwana muwala owa muwala we; kubanga abo ba musaayi gwe gumu nʼogwʼomukazi oyo. Ekyo kibi kinene. “ ‘Toleetanga mukazi nga muganda wa mukyala wo ne badda mu kuvuganya, era ne weebaka naye ne mukola ebyensonyi nga mukyala wo akyali mulamu.

“ ‘Tosembereranga mukazi ngʼoyagala weebake naye omukoleko ebyensonyi ngʼali mu kiseera kye ekya buli mwezi ekyʼokuvaamu omusaayi mwʼabeerera atali mulongoofu. “ ‘Teweebakanga na mukyala wa munnansi yammwe okumukolako ebyensonyi, nʼakuleetera obutali bulongoofu. “ ‘Mu baana bo towangayo nʼomu ngʼekiweebwayo ekyokeddwa mu muliro eri Moleki, kubanga erinnya lya Katonda wo tosaanira kuliweebuulanga. Nze Mukama. “ ‘Teweebakanga na musajja nga bwe wandyebase nʼomukazi, ekyo kibi ekikyayibwa ennyo. “ ‘Tokolanga byansonyi ku nsolo kubanga ekyo kinaakufuulanga atali mulongoofu. Omukazi teyeewangayo eri ensolo emukoleko ebyensonyi, okwo kwe kuwabira ddala.

“Tofuulanga mwana wo omuwala ekivume ngʼomufudde omwenzi, kubanga kirireetera abantu mu nsi yo okufuuka abenzi, nʼensi nʼejjula okwonoona.

“ ‘Omusajja bwanaayendanga ku muka omusajja, bombi, omusajja ayenze nʼomukazi gwʼayenzeeko banattibwanga. “ ‘Omusajja bwʼaneebakanga ne muka kitaawe, anaabanga aweebudde kitaawe. Bombi omusajja nʼomukazi banattibwanga; omusaayi gwabwe gunaabanga ku mitwe gyabwe. “ ‘Omusajja bwʼaneebakanga ne muka mutabani we, bombi banattibwanga. Kubanga bombi banaabanga bakoze ebyambyone; omusaayi gwabwe gunaabanga ku mitwe gyabwe. “ ‘Omusajja bwʼaneebakanga ne musajja munne nga bwe yandyebase nʼomukazi, bombi banaabanga bakoze ekyʼekivve; era banattibwanga, nʼomusaayi gwabwe gunaabanga ku mitwe gyabwe. “ ‘Omusajja bwʼanaawasanga omukazi ate nʼatwalirako ne nnyina, ekyo kya kivve. Ye nʼabakazi bombi banaayokebwanga mu muliro, bwe mutyo ekyonoono ekyo ne mukyegobako. “ ‘Omusajja bwʼanaakolanga ebyʼensonyi ku nsolo, anattibwanga, era nʼensolo munaagittanga. “ ‘Omukazi bwʼanaasembereranga ensolo alyoke akole nayo ebyʼensonyi, mumuttanga nʼensolo ne mugitta. Omukazi anattibwanga nʼensolo nettibwa; omusaayi gwʼomukazi gunaabanga ku mutwe gwe, nʼogwʼensolo gunaabanga ku mutwe gwayo.

“ ‘Omusajja bwʼanaawasanga mwannyina, oba nga mwanamuwala wa kitaawe, oba nga mwanamuwala wa nnyina, ne beebaka bombi, kinaabanga kya buwemu. Bombi banaagobwanga mu bannaabwe ne babagaana okukolagananga nabo. Kubanga omusajja oyo anaabanga aweebudde mwannyina, era yʼaneetikkanga obuvunaanyizibwa bwonna olwʼekibi ekyo. “ ‘Omusajja bwʼaneebakanga nʼomukazi mu biseera byʼomukazi, ebya buli mwezi ngʼempisa yʼabakazi bwʼeba, anaabanga abikudde ensulo yʼomusaayi gwʼomukazi oyo, era nʼomukazi anaabanga yeebikudde. Bombi banaagobwanga mu bannaabwe ne babagaana okukolagananga nabo. “ ‘Teweebakanga na mukazi muganda wa nnyoko oba ne mwannyina wa kitaawo nʼokola naye ebyʼensonyi, kubanga ekyo kiweebuula owooluganda owʼokumpi. Mwembi munaavunaanyizibwanga olwʼekyonoono kyammwe ekyo. “ ‘Omusajja bwʼaneebakanga ne muka kitaawe omuto oba ne muka kojjaawe, anaabanga aweebudde bakadde be abo. Omusajja oyo nʼomukazi oyo be baneetikkanga obuvunaanyizibwa obwʼekibi ekyo, era balifa nga tebalina baana. “ ‘Omusajja bwʼanaawasanga muka muganda we, kinaabanga ekikolwa ekitali kirongoofu, kubanga aweebudde muganda we. Tebalizaala baana.

Tebawasanga mukazi malaaya oba atali mulongoofu, oba oyo agobeddwa ewa bba; kubanga bakabona batukuvu eri Katonda waabwe. Mubayisenga ngʼabatukuvu, kubanga be bawaayo emmere eya Katonda wammwe. Mubayisenga ngʼabatukuvu; kubanga Nze Mukama atukuza mmwe, ndi mutukuvu. Era omwana omuwala owa kabona bwʼanaakubanga obwamalaaya, bwʼatyo ne yeereetako obutali bulongoofu, anaabeeranga aleetedde kitaawe obutali bulongoofu; anaayokebwanga mu muliro.

Tawasanga nnamwandu, oba omukazi bba gwe yagoba, oba omukazi eyeereeseeko obutali bulongoofu olwʼokukuba obwamalaaya; naye anaawasanga omukazi embeerera ngʼamuggya mu bantu be;

“Tegeeza abaana ba Isirayiri nti, Muka omusajja yenna bwʼanaakyamanga nʼakola ebitali bya bwesigwa eri bba ne yeebaka nʼomusajja omulala nga bba tategedde, omusajja oyo nʼamusobyako, ekikolwa ekyo ne kitamanyibwa, kubanga tewali mujulizi akirabye era nga tebabakutte nga bakikola;

“ ‘Eryo lye tteeka eryʼobuggya, omukazi bwʼanaakyamanga ne yeeyonoona songa mufumbo aliko bba,

Kale, laba, omusajja omu ku baana ba Isirayiri nʼaleeta mu maka ge omukazi Omumidiyaani awo mu maaso ga Musa, nga nʼekibiina kyonna ekya Isirayiri bali awo bakaabira mu mulyango gwa Weema ya Mukama eyʼOkukuŋŋaanirangamu.

“Toyendanga.”

“Teweegombanga mukyala wa muntu munno. So teweegombanga nnyumba ya muntu munno, newaakubadde ennimiro ye, newaakubadde omuweereza we omusajja, newaakubadde omuweereza we omukazi, wadde ente ye, oba endogoyi ye, oba ekintu kyonna ekya muntu munno.”

Omukazi taayambalenga ngoye za kisajja, so nʼomusajja taayambalenga ngoye za kikazi; kubanga abakola ebyo Mukama Katonda wammwe abakyayira ddala.

Naye singa omusajja nga byʼanaabanga ayogedde bya mazima, nga nʼobujulizi obukakasa ngʼomuwala yali mbeerera bunaabanga bubuze, kale nno omuwala oyo anaaleetebwanga ku muzigo gwʼennyumba ya kitaawe, era abasajja abʼomu kibuga kyʼomuwala oyo banaamukubiranga awo amayinja nʼafa. Kubanga anaabanga akoze ekikolwa kya bugwenyufu nnyo ekyʼokumanya abasajja ngʼakyali mu luggya lwa kitaawe. Ekibi musaananga mukimalemu mu Isirayiri.

Omusajja bwʼanaakwatibwanga nga yeebase nʼomukyala wʼomusajja omulala, kale, omusajja akwatiddwa nʼomukyala gwʼanaabanga yeebase naye, bombi baakuttibwanga. Ekibi musaana mukimalengamu mu Isirayiri.

Bwe wanaabangawo omuwala embeerera ayogerezebwa afumbirwe, omusajja nʼamusanga mu kibuga ne yeebaka naye, munaabaleetanga bombi ku wankaaki wʼekibuga ekyo ne mubakuba amayinja ne bafa; omuwala, bwe kibanga nga yali munda mu kibuga naye nʼatakuba nduulu kufuna buyambi; omusajja, kubanga yayonoona omuwala ajja okufumbirwa omusajja we. Bwe mutyo bwe munaamalangamu ekibi mu mmwe.

Naye omusajja bwʼanaasanganga omuwala ayogerezebwa ku ttale nʼamukwata ne yeebaka naye olwʼempaka, kale nno omusajja anaabanga yeebase nʼomuwala oyo yʼanattibwanga. Omuwala oyo temumukolangako kintu kyonna, kubanga anaabanga talina kibi kyonna kyʼakoze ekinaamusaanyizanga okufa. Ensonga ezo zifaanana ngʼezʼomuntu anaabanga alumbaganye muliraanwa we nʼamutemula. Olwokubanga omuwala ono anaabanga ayogerezebwa okufumbirwa yasangibwa omusajja ku ttale etali bantu, anaayinzanga okuba nga yeekubira enduulu naye ne watabaawo amudduukirira okumuyamba.

Omusajja bwʼanasisinkananga omuwala embeerera naye nga taliiko amwogereza, nʼamukwata ne yeebaka naye, ne bakwatibwa nga bali mu kikolwa ekyo, omusajja anaabanga yeebase nʼomuwala oyo anaasasulanga kitaawe wʼomuwala sekeri eza ffeeza amakumi ataano. Omusajja anaawasanga omuwala oyo okuba mukazi we, kubanga anaabanga amaze okumusobyako. Era taamugobenga okumala ebbanga lyonna omusajja oyo nga mulamu.

Omusajja taawasenga mukyala wa kitaawe aleme kuweebuulanga kitiibwa kya buliri bwa kitaawe.

“Abantu bonna abanaazaalibwanga mu bufumbo obutaabenga butukuvu tebaayingirenga mu kuŋŋaaniro lya Mukama Katonda. Bazzukulu baabwe okutuusa ku mulembe ogwʼekkumi, nabo tebayingiranga mu kuŋŋaaniro lya Mukama Katonda.

“Mu bawala ba Isirayiri temukkirizibwenga kubeerangamu bamalaaya abʼomu masabo, nʼabasajja abalya ebisiyaga nabo tebakkirizibwenga mu Isirayiri. Toleetanga nsimbi, bamalaaya ze banaabanga bafunye mu bwamalaaya, mu nnyumba ya Mukama Katonda wo okusasulira obweyamo, wadde ensimbi zʼabasajja abalya ebisiyaga; kubanga Mukama Katonda wo akyayira ddala ebikolwa ebyo byombi.

“Akolimirwe omuntu yenna eyeebaka ne muka kitaawe, kubanga ekitanda kya kitaawe akimalamu ekitiibwa.” Abantu bonna ne baddamu nti “Amiina.”

“Akolimirwe omuntu yenna akola ebyobukaba nʼensolo.” Abantu bonna ne baddamu nti, “Amiina.”

“Akolimirwe omuntu yenna eyeebaka ne mwannyina omuwala wa kitaawe, oba muwala wa nnyina.” Abantu bonna ne baddamu nti, “Amiina.”

“Akolimirwe omuntu yenna eyeebaka ne nnyina wa mukazi we.” Abantu bonna ne baddamu nti, “Amiina.”

Samusooni nʼalaga e Gaza nʼalabayo omukazi malaaya, nʼayingira gyʼali.

Awo mu biro ebyo tewaali kabaka mu Isirayiri. Ne wabaawo Omuleevi eyabeeranga mu kyalo mu nsi eyʼensozi eya Efulayimu eyawasa omukazi mu Besirekemu mu Yuda. Naye mukazi we oyo nʼataba mwesigwa nʼanoba ku bba, nʼaddayo mu nnyumba ya kitaawe e Besirekemu mu Yuda nʼamalayo emyezi ena.

Awo bwe baali nga beesanyusaamu, laba, abasajja abʼomu kibuga ekyo, abaana abʼobutali butuukirivu ne bazingiza ennyumba nga bwe bakoona oluggi. Ne bagamba nannyini nnyumba, omusajja omukadde nga bwe bawowoggana nti, “Fulumya omusajja oyo ayingidde mu nnyumba yo, tumusiyage.” Nannyini nnyumba nʼafuluma, nʼabagamba nti, “Nedda mikwano gyange, temubeera bagwenyufu. Olwʼokuba ngʼomusajja ono azze mu nnyumba yange, temukola kintu kya buswavu bwe kityo. Mulaba muwala wange wuuno, mbeerera, ate nʼomukazi wʼomusajja naye nzija kubamuwa. Baabo mubakole kye mwagala. Naye omusajja ono temumukola kintu kya buswavu bwe kityo.” Naye abasajja ne bagaana okumuwuliriza. Omusajja kyeyava addira mukazi we, nʼamufulumya, ne bamukwata ne bamusobyako ekiro kyonna, ne bamuta agende ngʼemmambya esala. Omukazi nʼaddayo nʼatuuka obudde nga bukya, nʼagwa ku luggi lwʼennyumba, mukama we gye yali asuze, nʼabeera awo okutuusa obudde bwe bwakya. Mukama we bwe yagolokoka mu makya, nʼaggulawo enzigi zʼennyumba ye nʼafuluma agende ku lugendo lwe, laba, mukazi we ngʼagudde mu maaso gʼennyumba, ngʼemikono gye gikunukkiriza omulyango. Nʼagamba mukazi we nti, “Golokoka tugende.” Kyokka ne wataba kanyego. Omusajja nʼamuteeka ku ndogoyi, nʼagenda ewuwe. Bwe yatuuka ewuwe, nʼaddira akambe, nʼakwata mukazi we, nʼamusalaasalamu ebifi kkumi na bibiri, nʼabiweereza mu buli kitundu ekya Isirayiri. Awo buli muntu eyabirabangako nʼagamba nti, “Ekikolwa ekiri nga kino tekikolebwanga so tekirabibwanga okuva ku lunaku abaana ba Isirayiri lwe baayambukirako okuva mu nsi yʼe Misiri nʼokutuusa leero. Mukirowoozeeko, mukifumiitirizeeko era tulabe ekyʼokukola.”

Abantu kkumi ku bantu kikumi okuva mu bika byonna ebya Isirayiri, nʼabalala kikumi ku bantu olukumi, nʼabalala lukumi ku bantu omutwalo ogumu bagende bafunire eggye ebyetaago. Eggye bwe lirituuka e Gibea ekyʼe Benyamini balyoke bababonereze ngʼekikolwa kyabwe ebyʼobugwenyufu bwe kiri, kye baakola mu Isirayiri.” Awo abantu bonna aba Isirayiri ne bakuŋŋaana ne baba omuntu omu, ne balumba ekibuga.

Awo Eri eyali akaddiye ennyo, nʼawulira ebyo byonna batabani be bye baakolanga Abayisirayiri bonna, ne bwe beetabanga nʼabakyala abaweerezanga ku mulyango gwʼEweema eyʼOkukuŋŋaanirangamu.

Olunaku olumu, mu ssaawa ezʼolweggulo, Dawudi nʼagolokoka, nʼatambulatambula ku kasolya akʼolubiri lwe. Nʼasinziira waggulu eyo nʼalengera omukazi ngʼanaaba, era omukyala yali mulungi omubalagavu. Dawudi nʼatuma omuntu okugenda okumunoonyerezaako. Ne bakomawo ne bamutegeeza nti, “Oyo ye Basuseba muwala wa Eriyaamu mukyala wa Uliya Omukiiti.” Awo Dawudi nʼamutumya, nʼajja gyʼali, ne yeebaka naye. Yali mu kiseera ekyʼokwelongoosa obutali bulongoofu bwe. Oluvannyuma nʼaddayo ewuwe. Omukyala nʼaba olubuto, nʼatumira Dawudi nti, “Ndi lubuto.”

Kiki ekikunyoomezza ekigambo kya Mukama, nʼokukola nʼokola ekibi bwe kityo mu maaso ge? Watta Uliya Omukiiti nʼekitala, nʼotwala mukyala we nʼomufuula owuwo.’ Wamutta nʼekitala ekyʼAbaana ba Amoni. Noolwekyo ekitala tekiriva mu nnyumba yo, kubanga onnyoomye nʼotwala mukyala wa Uliya Omukiiti nʼomufuula owuwo. “Bwʼati bwʼayogera Mukama nti, ‘Laba, ndireeta ekikolimo mu nnyumba yo, ne nzirira bakyala bo ngʼolaba ne mbawa muliraanwa wo, ne yeebaka nabo emisana. Wakikola mu kyama, naye nze ndikikola mu maaso ga Isirayiri yenna, emisana.’ ”

Naye bwe yagimusembereza okulya nʼamukwata, nʼamugamba nti, “Jjangu weebake nange, mwannyinaze.” Nʼamuddamu nti, “Nedda, mwannyinaze, tonkwata nʼamaanyi. Ekyo tekikolwa mu Isirayiri. Tokola kya kivve bwe kityo. Nsaasira, nnadda wa obuswavu? Ate ggwe, onoobeera ngʼomu ku basajja abasirusiru mu Isirayiri. Nkwegayiridde yogera ne kabaka, tajja kukuziyiza nkufumbirwe.” Naye nʼagaana okumuwuliriza, nʼamukwata olwʼempaka, kubanga yali amusinza amaanyi, ne yeebaka naye.

Kabaka Sulemaani yayagala abakazi bannaggwanga bangi: Abamowaabu, nʼAbamoni, nʼAbayedomu, nʼAbasidoni, nʼAbakiiti, ngʼokwo kwʼogasse muwala wa Falaawo, nga bava mu mawanga Mukama ge yayogerako ngʼalabula Abayisirayiri nti, “Temufumbiriganwanga nabo kubanga tebalirema kukyusa mitima gyammwe okugoberera bakatonda baabwe.” Naye omutima gwa Sulemaani ne guwugulwa, era naabagala. Sulemaani yalina abakyala lusanvu abambejja, nʼabakazi abalala ebikumi bisatu, era abo bonna ne bamuwabya. Mu bisera bya Sulemaani ebyʼobukadde, bakyala be ne basendasenda omutima gwe okugoberera bakatonda abalala. Nʼatanula okusinza Asutoleesi katonda omukazi owʼAbasidoni, ne Mirukomu katonda owʼomuzizo owʼAbamoni. Sulemaani nʼakola ebitaali bya butuukirivu mu maaso ga Mukama nʼatagobererera ddala Mukama, nʼatakola nga Dawudi kitaawe bwe yakola.

Era waaliwo nʼabaalyanga ebisiyaga mu nsi, ne bakolanga ebyʼemizizo byonna abamawanga Katonda be yagoba mu maaso gʼAbayisirayiri bye baakolanga.

Nʼagoba mu nsi abaalyanga ebisiyaga, era nʼaggyawo nʼebifaananyi ebyakolebwa nʼemikono byonna bajjajjaabe bye baakola.

Nʼaggyirawo ddala abaalyanga ebisiyaga abaali basigaddewo mu nsi, oluvannyuma lwʼomulembe gwa kitaawe Asa.

Ate era yamenyaamenya nʼennyumba ezʼabaalyanga ebisiyaga ezaali mu yeekaalu ya Mukama, era eyo abakazi gye baalukiriranga Asera ebitimbibwa.

Nakola endagaano nʼamaaso gange; obutatunuulira muwala nʼamaaso agʼobukaba.

Amagezi Mukama gʼawa ge gokka agajja okukuwonya ekkubo lyʼomukazi omwenzi, nʼokukuwonya ebigambo bye ebisendasenda, eyaleka bba owʼomu buvubuka bwe era eyeerabira endagaano gye yakola mu maaso ga Katonda we.

Kubanga emimwa gyʼomukazi omwenzi gitonnya omubisi gwʼenjuki, nʼebigambo bye biweweevu okusinga omuzigo; naye enkomerero ya byonna, akaawa ngʼomususa era asala ngʼekitala ekyʼobwogi obubiri.

Lwaki mwana wange osendebwasendebwa omukazi omwenzi, nʼogwa mu kifuba kyʼomukazi wʼomusajja omulala?

okukuwonya omukazi owʼebibi, okukuggya mu kunyumiikiriza kwʼomukazi omwenzi. Teweegombanga bulungi bwe mu mutima gwo, wadde okumukkiriza okukuwamba nʼamaaso ge, kubanga malaaya akussa ku muwendo ogugula omugaati, era omukazi omwenzi anoonya kuzikiririza ddala bulamu bwo. Omuntu ayinza okuwambaatira omuliro mu kifuba kye, ebyambalo bye ne bitaggya? Oba omuntu ayinza okutambulira ku manda agookya, ebigere bye ne bitasiriira? Bwe kityo bwe kiri eri omusajja agenda ne muka muliraanwa we, buli akwata ku mukazi ngʼoyo talirema kubonerezebwa olwʼekibi kye.

Naye buli ayenda ku mukazi talina magezi; kubanga azikiririza ddala emmeeme ye ye.

Binaakuwonyanga omukazi omwenzi, omukazi omutambuze awaanawaana nʼebigambo ebisendasenda. Lumu nnali nnyimiridde ku ddirisa lyʼennyumba yange, Ne ndaba mu bavubuka abatoototo, omulenzi atalina magezi, ngʼayita mu luguudo okumpi nʼakafo kʼomukazi omwenzi, nʼakwata ekkubo eridda ku nnyumba yʼomukazi oyo, olwʼeggulo ngʼobudde buzibye, ekizikiza nga kikutte. Awo omukazi nʼajja okumusisinkana ngʼayambadde nga malaaya, ngʼajjudde ebirowoozo ebyʼobukaba mu mutima gwe.

Yamusendasenda nʼebigambo ebisikiriza; nʼamuwabya nʼebigambo ebiwoomerera. Amangwago omuvubuka nʼamugoberera ngʼente etwalibwa okuttibwa obanga empeewo egwa mu mutego, okutuusa akasaale lwe kafumita ekibumba kyayo, ngʼakanyonyi bwe kanguwa okugwa mu mutego, so tamanyi ngʼalifiirwa obulamu bwe. Kaakano nno batabani bange mumpulirize, era musseeyo nnyo omwoyo eri ebigambo byange. Temukkiriza mitima gyammwe kugoberera bigambo bye; temukkiriza bigere byammwe kukyamira mu makubo ge. Kubanga bangi bazikiridde, ddala abʼamaanyi bangi bagudde. Ennyumba ye, lye kkubo eridda emagombe, nga likka mu bisenge ebyʼokufa.

Obutuukirivu bwʼabagolokofu bubawonya, naye abatali beesigwa bagwa mu mutego olwʼokwegomba ebibi.

Malaaya mutego gwa kabi, akolimiddwa Mukama mwʼafiira.

kubanga omukazi omwenzi lukonko luwanvu, nʼomukazi omubambaavu luzzi lufunda. Ateega ngʼomutemu, nʼayongera ku muwendo gwʼabasajja abatali beesigwa eri bakazi baabwe.

Ayagala amagezi asanyusa kitaawe, naye munne wʼabamalaaya ayiwaayiwa obugagga bwe.

Bwʼati bwe yeeyisa omukazi omwenzi: alya nʼasiimuula emimwa gye nʼagamba nti, “Sirina kibi kye nkoze.”

Ekintu kye nalaba ekyʼobulabe ekisinga okufa, ye mukazi alina omutima ogusendasenda, era ogusikiriza, era emikono gye gisiba ngʼenjegere. Oyo ayagala Katonda, yʼawona omukazi oyo, kyokka ye omwonoonyi talema kugwa mu mutego gwe.

Laba ekibuga ekyesigwa bwe kifuuse ngʼomwenzi! Oyo eyasalanga emisango mu bwenkanya! Obutuukirivu bwatuulanga mu ye, naye kaakano batemu bennyini nnyini!

“Naye mmwe mujje musembere wano batabani bʼomukazi omufumu ezzadde lyʼomwenzi omukazi eyeetunda.

“Omusajja bwʼagoba mukazi we, omukazi oyo nʼagenda nʼafuuka owʼomusajja omulala, omusajja we alimukomyawo nate? Ensi eba teyonoonekedde ddala nnyo? Naye obadde nga malaaya, ngʼolina abasajja bangi; naye kaakano oyagala okukomawo gye ndi?” bwʼayogera Mukama. Yimusa amaaso go olabe ku ntikko yʼobusozi. Waliwo ekifo we bateebakira naawe? Ku mabbali gʼekkubo we watulanga nʼolinda abasajja ngʼoli nga Omuwalabu mu ddungu; nʼolyoka oyonoona ensi nʼobwenzi bwo nʼekibi kyo. Noolwekyo enkuba kyevudde eziyizibwa, nʼenkuba eya ttoggo nʼetetonnya. Naye era otemya nga malaaya tokwatibwa nsonyi.

Mu nnaku zʼobufuzi bwa kabaka Yosiya Mukama yayogera nange nʼaŋŋamba nti, “Olabye Isirayiri etali neesigwa kyʼekoze? Agenze ku buli kasozi na buli wansi wʼomuti oguyimiridde ne yeeyisa ngʼomukazi omwenzi. Nalowooza nti, Bwʼalimala okukola bino byonna agenda kudda gye ndi naye teyadda, era muganda we atali mwesigwa Yuda nʼakiraba. Yalaba nti bwe namala okugoba Isirayiri eyanvaako, ne muwa nʼebbaluwa eyʼokumugoba olwʼobwenzi bwe. Naye ate nʼendaba muganda we atali mwesigwa Yuda nga taliimu kutya, naye nʼagenda nʼakola obwenzi.

Naye ngʼomukazi atali mwesigwa eri bba bwʼabeera, bwe mutyo bwe mutabadde beesigwa gye ndi, mmwe ennyumba ya Isirayiri,” bwʼayogera Mukama.

“Mbasonyiwe ntya? Abaana bammwe banvuddeko, ne balayiririra bakatonda abatali bakatonda. Bwe nabaliisa ne bakkuta, badda mu kwenda, ne beekuŋŋaanya ku nnyumba zʼabenzi. Baali ngʼembalaasi ennume ezikkuse ezitaamye, buli muntu ngʼakaayanira muka munne.

“Munabba ne mutta, ne mukola obwenzi ne mulayira ebyʼobulimba, ne mwoteza obubaane eri Baali, ne mutambula okugoberera bakatonda abalala be mutamanyanga;

Ndabye obwenzi bwammwe nʼobwamalaaya bwe mukoze. Ndabye ebikolwa byo ebyʼekivve ku busozi era ne mu nnimiro. Zikusanze ggwe, ayi Yerusaalemi! Olituusa ddi obutaba mulongoofu?

Era ne mu bannabbi ba Yerusaalemi ndabye ekintu ekibi ennyo. Bakola ebyʼobwenzi ne batambulira mu bulimba. Bagumya abo abakozi bʼebibi ne wataba nʼomu ava mu kwonoona kwe. Bonna bali nga Sodomu gye ndi; abantu ba Yerusaalemi bali nga Ggomola.”

Kubanga bakoze ebyʼekivve mu Isirayiri; bakoze obwenzi ne baka baliraanwa baabwe era ne boogera ebyʼobulimba mu linnya lyange, bye sibagambanga kwogera. Nkimanyi era ndi mujulirwa ku ekyo,” bwʼayogera Mukama.

Abakyala ba Sayuuni, nʼabawala embeerera abʼomu bibuga bya Yuda bakwatiddwa olwʼamaanyi.

“Naye weesiga obulungi bwo, nʼokozesa ettutumu lyo okukola obwenzi, nʼofuka obukaba bwo ku buli eyayitangawo obulungi bwo ne bufuuka bubwe. Waddira ebimu ku byambalo byo ne weekolera ebifo ebigulumivu nga byamabala mangi, gye wakoleranga obwenzi bwo. Ebintu bwe bityo tebikolebwa, era tebikolebwanga. Ate era waddira emikuufu emirungi gye nnali nkuwadde, egyakolebwa mu zaabu nʼeffeeza bye nakuwa, ne weekolera bakatonda abalala abali mu bifaananyi ebyʼekisajja, bwʼotyo nʼokola ebyʼobwenzi nabyo,

“Waddira batabani bo ne bawala bo be wanzaalira, nʼobawaayo ngʼebiweebwayo ebyʼemmere eri bakatonda abalala. Obwenzi bwe wakola bwali tebumala? Watta abaana bange nʼobawaayo ngʼebiweebwayo eri bakatonda abalala. Mu bikolwa byo byonna ebyʼekivve nʼobwenzi bwo, tewajjukira biseera ebyʼobuvubuka bwo, bwe wali obwereere nga toliiko bwʼoli, era ngʼosambagala mu musaayi gwo.”

Buli luguudo we lusibuka, wazimbawo essabo lyo, nʼokolerawo obwenzi, ngʼowaayo omubiri gwo mu bukaba obungi eri buli eyayitangawo. Weetaba mu bwenzi ne baliraanwa bo abakaba Abamisiri, nʼoyongera ku bukaba bwo nʼonsunguwaza. Kyenava nkugololerako omukono gwange ne nkendeeza ku nsalo yo, ne nkuwaayo eri omululu gwʼabalabe bo abawala bʼAbafirisuuti, abeekanga olwʼobukaba bwo. Weetaba mu bikolwa ebyʼobwenzi nʼAbasuuli, kubanga tewamalibwa, ate nʼoluvannyuma lwʼekyo nʼotamatira. Nʼoluvannyuma nʼoyongerayo ebikolwa byo ebyʼobukaba mu Bakaludaaya, ensi eyʼebyamaguzi, naye era nʼotamalibwa.”

“Omutima gwo nga munafu, nʼokwewaayo ne weewaayo okukola ebintu ebyo byonna, ne weeyisa ngʼomwenzi owʼamawaggali ateefiirayo. Bwe wazimba ebifo byo ebigulumivu buli luguudo we lusibuka, nʼoteeka amasabo go mu buli kibangirizi ekigazi, tewafaanana ngʼomwenzi kubanga wanyoomanga empeera.” “Ggwe omukazi omwenzi eyeegomba abatambuze okusinga balo! Buli mwenzi afuna empeera, naye ggwe owa baganzi bo bonna ebirabo, ngʼobagulirira okujja gyʼoli okuva buli wamu olwʼobwenzi bwo. Era mu bikolwa byo ebyʼobwenzi tofaanana ngʼabalala; tewali akusindika kukola bwenzi. Oli wanjawulo okuva ku balala kubanga osasula empeera, naye ate nga tewali akusasula.”

“Kale nno, wulira ekigambo kya Mukama ggwe omwenzi. Bwʼati bwʼayogera Mukama Katonda nti, Olwʼobugagga bwo bwe walaga, nʼoyanika obwereere bwo wakati mu baganzi bo ngʼokola ebikolwa ebyʼobwenzi, nʼolwa bakatonda bo abalala abʼekivve, nʼokuwaayo omusaayi gwʼabaana bo, kyendiva nkuŋŋaanya baganzi bo bonna, be wasinza, bonna be wayagala ne be wakyawa, gyʼoli ne bakwetooloola, ne nkufungulirira mu maaso gaabwe, balabe obwereere bwo. Ndikusalira omusango ne nkuwa ekibonerezo ngʼekyʼabakazi abenzi nʼabo abayiwa omusaayi, ne nkuleetako omusaayi ogwʼekiruyi nʼobuggya.

Balyokya amayumba go ne bakubonereza mu maaso gʼabakyala abangi, era ndikulesaayo ebikolwa byo ebyʼobwenzi so tolisasula baganzi bo mpeera. Nʼoluvannyuma obusungu bwange bulikendeera, nʼobuggya bwange bulikuvaako, era ndiba mukkakkamu, nga sirina busungu.” “Kubanga tojjukira biseera ebyʼobuvubuka bwo, nʼonnyiiza nʼebintu ebyo byonna; kyendiva nkuleetako omusango olwʼebikolwa byo, bwʼayogera Mukama Katonda. Ku bukaba obwo bwonna si kwe wayongera ebikolwa ebyo byonna ebyʼekivve?”

Mu mmwe mulimu abantu abawaayiriza abaamalirira okuyiwa omusaayi, era mulimu nʼabo abaliira ku nsozi, ne bakola ebyʼobugwagwa. Era mu mmwe mulimu abajerega obwereere bwa bakitaabwe, era mulimu nʼabo abeebaka nʼabakazi abali mu nsonga zaabwe ezʼabakazi nga si balongoofu. Mu mmwe mulimu omusajja akola ebibi ebyʼobwenzi ne muka muliraanwa we, omulala nʼayonoonyesa mukamwana mu buswavu, ate omulala nʼakwata mwannyina muwala wa kitaawe.

Ekigambo kya Mukama Katonda ne kinzijira nʼaŋŋamba nti, “Omwana wʼomuntu waaliwo abakazi babiri, nnyabwe omu, abeewaayo mu Misiri, ne bakola obwamalaaya okuviira ddala mu buto bwabwe, era eyo gye baakwatirakwatira ku mabeere ne batandika nʼokumanya abasajja. Erinnya lyʼomukulu nga ye Okola, ne muto we nga ye Okoliba. Baali bange, era banzalira abaana aboobulenzi nʼaboobuwala. Okola ye yali ayitibwa Samaliya, Okoliba nga ye Yerusaalemi.” “Okola nʼakola obwamalaaya ngʼakyali wange, nʼakabawala ku baganzi be Abasuuli, abaserikale abaayambalanga kaniki, nʼabaamasaza, nʼabaduumizi bʼeggye, bonna nga basajja balabika bulungi era nga beebagala embalaasi. Yeewaayo okubeera malaaya eri abakulembeze abʼe Bwasuli, ne yeeyonoonyesa ne bakatonda abalala bonna aba buli muntu gwe yakabawalanga naye. Teyalekayo bwamalaaya bwe yatandikira mu Misiri.” “Kyenava muwaayo eri baganzi be Abasuuli, be yakabawalanga nabo. Baamwambula, ne batwala batabani be ne bawala be, ye ne bamutta nʼekitala. Yafuuka ekivume mu bakazi ne bamuwa nʼekibonerezo.” “Newaakubadde nga muganda we Okoliba, yabiraba ebyo, yeeyongera mu bukaba bwe ne mu bwamalaaya bwe nʼokusinga muganda we. Yakabawala nʼAbasuuli, nʼabaamasaza nʼabaduumizi bʼeggye nʼabaserikale abaali bambadde obulungi engoye ennungi nʼabeebagalanga embalaasi nʼabaalabikanga obulungi abeegombebwanga. Ne ndaba nga naye yeeyonoonye, era bombi nga bakutte ekkubo lye limu.” “Naye wakati mu ebyo byonna, ne yeeyongeranga mu bwamalaaya bwe; nʼalaba ebifaananyi ebyʼabasajja ebyasiigibwa ku bisenge, nʼebifaananyi ebyʼAbakaludaaya ebyatonebwa mu langi emyufu, nga beesibye enkoba mu biwato, nga beesibye nʼebiremba ku mitwe, bonna nga bafaanana ngʼabakungu ba Babulooni abavuga amagaali abʼomu nsi eyʼAbakaludaaya. Awo olwatuuka, nʼabeegomba, nʼabatumira ababaka mu Bukaludaaya. Era Abababulooni ne bajja gyʼali, ne beebaka naye, era mu kwegomba kwe ne bamwonoona. Bwe baamusobyako nʼabaviira, nga yeetamiddwa. Bwe yagenda mu maaso nʼobwamalaaya bwe mu lwatu, nʼayolesa obwereere bwe, ne mmuviira nga nennyamidde, nga bwe nnava ku muganda we. Newaakubadde nga namukola ebyo byonna, yeeyongeranga bweyongezi mu maaso, nga bwe yejjukanya ennaku ezʼomu buvubuka bwe, bwe yakola obwamalaaya mu Misiri, gye yakabawalira ku baganzi be, abaalina entula ezʼekisajja nga zifaanana ezʼendogoyi, nʼamaanyi agabavaamu ngʼagʼembalaasi. Bwʼotyo nʼoyaayaanira okwegomba okwʼomu buvubuka bwo, bwe wali mu Misiri ne bakukwatirira mu ngeri eyʼobukaba, ne bakwatirira nʼamabeere go amato.”

Era ndikomya obukaba nʼobwamalaaya bwe waleeta okuva mu Misiri, so tolibuyaayaanira nate newaakubadde okujjukira Misiri.” “Bwʼati bwʼayogera Mukama Katonda nti, Nnaatera okukuwaayo eri abo abakukyawa nʼeri abo be weetamwa. Balikukwata nʼobukyayi obuyitiridde, ne batwala ebintu byonna bye wakolerera, ne bakuleka bwereere nga tolina kantu, nʼensonyi zʼobwamalaaya zirabibwe buli muntu. Obukaba bwo nʼobugwagwa bwo bwe bukuleetedde ebyo, kubanga weegomba amawanga ne weeyonoona ne bakatonda baabwe.

“Mukama Katonda kyava ayogera nti, Kubanga mwanneerabira ne munkuba amabega, kyemuliva mubonaabona olwʼokwegomba kwammwe.” Mukama nʼaŋŋamba nti, “Omwana wʼomuntu olisalira Okola ne Okoliba omusango? Kale nno baŋŋange olwʼebikolwa byabwe ebyʼekivve, kubanga bakoze ebyʼobwenzi, nʼengalo zaabwe zijjudde omusaayi. Benze ne bakatonda baabwe, ne basaddaaka nʼabaana baabwe ngʼemmere yʼabakatonda baabwe, abaana be banzalira. Ne kino bakinkoze. Mu kiseera kyekimu boonoonye ekifo kyange ekitukuvu, era boonoonye ne Ssabbiiti zange. Ku lunaku kwe baassaddaakira abaana baabwe eri bakatonda baabwe, baayingira mu watukuvu ne bayonoonawo. Ebyo bye baakola mu nnyumba yange.”

“Baatuma ababaka okuleeta abasajja okuva ewala ennyo, era bwe baatuuka, ne munaaba ku lwabwe ne mweyonja mu maaso, ne mwambala nʼamayinja agʼomuwendo omungi. Watuula ku kitanda ekinene ekyʼekitiibwa, nʼoyalirira nʼemmeeza mu maaso go ngʼetegekeddwako obubaane bwange nʼamafuta gange.” “Oluyoogaano olwʼekibinja kyʼabantu abatalina nnyo kye bakola ne Abaseba ne lumwetooloola; Abaseba ne baleetebwa okuva mu ddungu wamu nʼabasajja abaalyanga mu kasasiro, ne bambaza ebintu ebyʼebikomo ku mikono gyʼomukazi ne muganda we, ne babatikkira nʼengule ennungi ku mitwe gyabwe. Awo ne njogera ku oyo eyali akaddiye olwʼobwenzi nti, ‘Bamukozeseze ddala nga malaaya kubanga ekyo kyali.’ Ne beebaka naye. Ngʼabasajja bwe beebaka ne malaaya, bwe batyo beebaka nʼabakazi abo abagwenyufu, Okola ne Okoliba. Naye abatuukirivu balisalira omusango abakazi abenzi era abassi kubanga benzi era nʼengalo zaabwe zijjudde omusaayi.”

Bwe ntyo bwe ndikomya obukaba mu nsi, abakazi bonna bakitwale ngʼekyokulabula, baleme okukola ebyo bye mwakola. Mulisasulibwa olwʼobukaba bwammwe, era mulibonerezebwa olwʼebibi byammwe ebyʼokusinza bakatonda abalala, mulyoke mumanye nga nze Mukama Katonda.

Awo Mukama bwe yasooka okwogera eri Koseya, yamulagira nti, “Ggenda owase omukazi malaaya, omuzaalemu abaana, era banaayitibwanga abaana aboobwamalaaya, kubanga ensi eyitirizza okukola ekibi ekyʼobwenzi, nʼeva ku Mukama.”

Munenye nnyammwe, mumunenye, kubanga si mukazi wange, so nange siri bba. Aggyewo obukaba obuli mu maaso ge, nʼobwenzi obuva wakati wʼamabeere ge; nneme okumwambulira ddala ne mmulekeraawo nga bwe yali ku lunaku kwe yazaalibwa; ne mmufuula ngʼeddungu, ne mmulekawo ngʼensi enkalu eteriiko kyʼegasa, ne mmussa ennyonta. Sirilaga kwagala kwange eri abaana be, kubanga baana ba bwenzi. Nnyabwe yakola obwenzi, nʼabazaalira mu buwemu. Yayogera nti, “Ndigenda eri baganzi bange abampa emmere nʼamazzi, nʼebimbugumya nʼebyokwambala, nʼamafuta nʼekyokunywa.”

Waliwo okukolima, nʼokulimba, nʼokutta, nʼokubba, nʼokukola ebyʼobwenzi; bawaguza, era bayiwa omusaayi obutakoma.

Abantu bange beebuuza ku kikonge kyʼomuti, ne baddibwamu omuti. Omwoyo ogwʼobwenzi gubasendasenda ne gubaleetera obutaba beesigwa eri Katonda waabwe. Baweerayo ssaddaaka ku ntikko zʼensozi, ne baweerayo ebiweebwayo ebyokebwa ku busozi, wansi wʼemyalooni, nʼemiribine nʼemyera awali ekisiikirize ekirungi. Bawala bammwe kyebava baba bamalaaya, ne baka baana bammwe ne bakola obwenzi.” “Siribonereza bawala bammwe olwʼokubeera bamalaaya, newaakubadde baka baana bammwe okukola ebyʼobwenzi, kubanga abasajja bennyini bassa bumu ne bamalaaya, ne baweerayo ssaddaaka ne bamalaaya abʼomu masabo; abantu abatategeera balizikirira.”

Mmanyi byonna ebikwata ku Efulayimu, so ne Isirayiri tankisibwa. Efulayimu weewaddeyo okukuba obwamalaaya, ne Isirayiri yeeyonoonye. Ebikolwa byabwe tebibaganya kudda eri Katonda waabwe, kubanga omwoyo ogwʼobwamalaaya guli mu mitima gyabwe, so tebamanyi Mukama.

Tosanyuka ggwe Isirayiri; tojaguza ngʼamawanga amalala, kubanga tobadde mwesigwa eri Katonda wo, weegomba empeera eya malaaya ku buli gguuliro.

Baagabana abantu bange nga babakubirako obululu; ne batunda abalenzi olwʼabakazi bamalaaya, nʼabawala ne babatundamu omwenge ne beenywera.

Bino byonna biri bityo kubanga Nineeve yeeweerayo ddala okwetunda eri abalabe ba Katonda obutasalako, nga malaaya omukulu, kye kibuga ekikyaamu ekitali kyesigwa ekyawubisa ebirala, omukulu wʼobufumu, ekyafuula amawanga abaddu baakyo olwʼobwamalaaya bwakyo, nʼolwʼobulogo bwakyo.

Kale mubuuza nti, “Lwaki tabifaako?” Kubanga Mukama yali mujulirwa wakati wo ne mukazi wo owʼomu buvubuka bwo, naye ggwe tewali mwesigwa, ngʼolimbalimba newaakubadde nga yali munno era mukazi wo gwe walagaana naye endagaano. Mukama Katonda teyabafuula omu mu mwoyo? Era lwaki yabafuula omu? Kubanga yali anoonya ezzadde eriritya Katonda. Kale mwekuume nnyo waleme kubaawo agoba mukazi we, era alimbalimba mukazi we owʼomu buvubuka bwe. “Kubanga nkyawa abafumbo okwawukana,” bwʼayogera Mukama Katonda wa Isirayiri, “nʼomusajja ajooga mukazi we,” bwʼayogera Mukama owʼEggye. Kale mwekuumenga mu mwoyo gwammwe mubeerenga beesigwa.

“Era mu kiseera ekyo awatali kulonzalonza ndibasemberera nsale omusango. Ndiyanguwa okuwa obujulizi ku baloga ne ku benzi ne ku abo abalayira ebyʼobulimba, ne ku abo abalyazaamaanya omupakasi empeera ye; abanyigiriza nnamwandu ne mulekwa, era abajoogereza munnaggwanga, abatatya Mukama,” bwʼayogera Mukama owʼEggye.

“Mwawulira bwe kyagambibwa nti, ‘Toyendanga!’ Naye mbagamba nti Buli muntu atunuulira omukazi nʼamwegomba aba amaze okumwendako mu mutima gwe.

Naye mbagamba nti Buli anaagobanga mukazi we wabula olwʼobwenzi anaabanga amwenzesezza, nʼoyo anaawasanga omukazi gwe bagobye anaabanga ayenze.”

Kubanga mu mutima mwe muva ebirowoozo ebibi, obussi, nʼobwenzi, nʼobukaba, nʼobubbi, nʼokuwaayiriza, nʼokuvvoola.

Era mbagamba nti Omuntu yenna anaagobanga mukazi we okuggyako olwʼobwenzi, nʼamala awasa omulala, anaabanga ayenze, nʼoyo anaawasanga oyo agobeddwa anaabanga ayenze.”

Mutunule nga bwe musaba. Omwoyo gwo gwagala, naye omubiri gwe munafu!”

Kubanga mu mutima gwʼomuntu mwe muva ebirowoozo ebibi ebyʼobukaba, nʼobubbi, nʼobutemu, nʼobwenzi, nʼokwegomba, nʼomutima omubi, nʼobukuusa, nʼobumenyi bwʼamateeka, nʼobuggya, nʼokusekeeterera, nʼobusirusiru. Ebibi bino byonna biva munda mu muntu ne bimwonoona.”

Yesu nʼabagamba nti, “Omusajja bwʼagobanga mukazi we nʼawasa omukazi omulala, aba ayenze. Nʼomukazi bwʼayawukananga ne bba nʼafumbirwa omusajja omulala naye aba ayenze.”

Amateeka gano ogamanyi. ‘Tottanga, toyendanga, tobbanga, towaayirizanga, kitaawo ne nnyoko obassangamu ekitiibwa.’ ”

“Omusajja yenna agoba mukazi we nʼawasa omulala aba ayenze; nʼoyo awasa omukazi agobeddwa, naye aba ayenze.”

Amateeka ogamanyi nti, ‘Toyendanga, tottanga, tobbanga, tolimbanga, kitaawo ne nnyoko obassangamu ekitiibwa.’ ”

Awo abannyonnyozi bʼamateeka nʼAbafalisaayo ne baleeta omukazi gwe baakwata ngʼayenda, ne bamuteeka wakati mu maaso gʼekibiina. Ne bagamba Yesu nti, “Omuyigiriza, omukazi ono akwatibbwa ngʼayenda. Amateeka Musa ge yatulagira gagamba kubakuba mayinja abali ngʼono. Noolwekyo ggwe ogamba otya ku nsonga eyo?” Ekyo baakyogera nga bamugezesa, bafune kye banaasinziirako okumuwawaabira. Naye Yesu nʼakutama nʼawandiika ku ttaka nʼolunwe. Bwe beeyongera okumubuuza, nʼakutaamulukuka, nʼagamba nti, “Mu mmwe atayonoonangako yʼaba asooka okumukuba ejjinja.” Nʼaddamu okukutama, era nʼawandiika ku ttaka nʼolunwe. Bwe baawulira ebyo, ne baseebulukuka kinnoomu, abasinga obukulu nga be basoose, okutuusa Yesu nʼomukazi bwe baasigalawo bokka mu maaso gʼekibiina. Awo Yesu nʼakutaamulukuka ate, nʼabuuza omukazi nti, “Abakuwawaabira baluwa?” Omukazi nʼamuddamu nti, “Mukama wange, tewali nʼomu.” Yesu nʼamugamba nti, “Nange sikusalira musango kukusinga. Genda, naye toddangayo okwonoona.”

Wabula tubawandiikire tubategeeze beewale okulya ennyama eya ssaddaaka eweebwayo eri bakatonda abalala, beewale obwenzi nʼokulya ennyama eyʼebisolo ebitugiddwa, era beewale okulya nʼomusaayi.

Mwewalenga ennyama ettiddwa olwʼokuweebwayo eri bakatonda abalala, mwewalenga nʼokulya omusaayi, era nʼennyama eyʼebisolo ebitugiddwa, era mwewalenga obwenzi. Bwe muneegendereza ne mwewala ebintu ebyo, munaaba mukoze bulungi. Mweraba.”

Ku nsonga zʼAbamawanga abakkiriza, twabawandikira nga tubagamba baleme kugoberera bulombolombo bwa Kiyudaaya nʼakatono wabula ebyo bye twassa mu bbaluwa yaffe era bye bino; obutalya nnyama ya bisolo ebiweereddwayo eri bakatonda abalala, nʼobutalya ebitugiddwa oba okulya omusaayi, era nʼokwewala obwenzi.”

Katonda kyeyava abaleka, emitima gyabwe ne girulunkanira ebyʼobugwagwa ne bawemula emibiri gyabwe bokka na bokka. Ne bafuula amazima ga Katonda okuba obulimba ne basinza era ne baweereza ebitonde, mu kifo kyʼokusinza eyabitonda, eyeebazibwa emirembe nʼemirembe. Amiina. Katonda kyeyava abaleka ne beeyongera mu kwegomba kwabwe okwʼobuwemu. Abakazi baabwe baawanyisa enkolagana yaabwe eyʼobuzaaliranwa nʼabasajja, ne bakola ebitali bya buzaaliranwa. Abasajja nabo baalekayo okwegatta ne bakazi baabwe mu ngeri eyʼobuzaaliranwa, ne bajjuzibwa obukaba ne beegatta ne basajja bannaabwe. Nʼekyava mu bikolwa ebyo ebyʼobugwagwa, kwe kusasulibwa empeera esaanira okwonoona kwabwe.

Bwe baagaana okumanya Katonda, Katonda kyeyava abaleka ne babeera nʼomutima omwonoonefu ne bakola ebitasaana. Bajjuzibbwa obutali butuukirivu bwonna, nʼebibi, nʼomululu, nʼobukyayi, nʼobuggya, nʼobussi, nʼentalo, nʼobulimba, nʼenkwe, nʼokwogera ebitasaana, nga basala ku bannaabwe ebigambo,

Newaakubadde nga bamanyi nga Katonda yagamba nti Abantu abakola ebintu ngʼebyo balizikirizibwa, tebakoma ku kubikola kyokka, naye basiima nʼabo ababikola.

Noolwekyo ekibi kiremenga okufuga omubiri gwammwe ogufa, nga mugondera okwegomba kwagwo. Temuwangayo bitundu byammwe ebyʼomubiri okukozesebwa ebitali bya butuukirivu eri ekibi, naye mweweereyo ddala eri Katonda, ngʼabantu abalamu abaava mu bafu. Ebitundu byammwe ebyʼomubiri gwammwe bikozesebwe ebyʼobutuukirivu eri Katonda.

Njogera nga nkozesa olulimi olwa bulijjo kubanga mukyali banafu. Nga bwe mwawangayo ebitundu byammwe ebyʼomubiri okuba abaddu bʼebirowoozo ebyʼobugwagwa, ne mweyongeranga okukola ebitali bya butuukirivu, bwe mutyo muweeyo ebitundu byammwe ebyʼomubiri okuba abaddu bʼobutuukirivu, nga mweweerayo ddala eri Katonda, mube batukuvu.

Noolwekyo omukazi oyo bwe yeegatta nʼomusajja omulala, bba ngʼakyali mulamu, omukazi oyo anaayitibwanga mwenzi. Naye bba bwʼafanga, olwo omukazi omufumbo anaabanga asumuluddwa mu tteeka, era taabenga mwenzi bwʼanaafumbirwanga omusajja omulala. Nammwe baganda bange mwafa eri amateeka, muli ba mubiri gwa Kristo. Mwegatta ku Kristo eyazuukizibwa okuva mu bafu, tulyoke tubale ebibala ebisanyusa Katonda. Kubanga bwe twali tukyafugibwa omubiri, okwegomba kwʼebibi kwakoleranga mu bitundu byaffe ebyʼomubiri olwʼamateeka, era enkomerero kwali kufa.

Naye mu mubiri gwange gwonna, ndaba amateeka agʼenjawulo nga gawakana nʼetteeka lya Katonda amagezi gange ge limanyi. Ekyo kinfuula omusibe wʼamateeka agʼekibi, ekikolera mu mubiri gwange.

Noolwekyo abo abali mu Kristo Yesu, tebaliiko musango; abo abatagoberera kwegomba okwʼomubiri wabula ne bagoberera Omwoyo. Kubanga etteeka eryʼOmwoyo aleeta obulamu mu Kristo Yesu, lyannunula okuva mu tteeka lyʼekibi nʼokufa. Amateeka ga Musa kye gataayinza kukola, olwʼokunafuyizibwa omubiri, Katonda yakikola mu Mwana we yennyini bwe yamutuma mu kifaananyi kyʼomubiri ogwʼekibi, nʼasalira ekibi omusango mu mubiri. Ekyo kyabaawo, ebyʼobutuukirivu mu mateeka biryoke bituukirire mu ffe bwe tugondera Omwoyo, ffe abatatambulira mu mubiri naye abatambulira mu Mwoyo. Abo abalowooleza mu mubiri balowooza bintu bya mubiri, naye abalowooleza mu Mwoyo balowooza bya Mwoyo. Okulowooleza mu byʼomubiri kwe kufa, naye okufugibwa Omwoyo bwe bulamu nʼemirembe. Kubanga okulowooza ebyʼomubiri kya bulabe eri Katonda. Ebirowoozo ebyʼomubiri tebiyinza kuwulira mateeka ga Katonda. Nʼabo abafugibwa omubiri tebayinza kusanyusa Katonda.

Noolwekyo abooluganda tulina ebbanja, so si eri omubiri okugondera bye gutulagira. Kubanga bwe munaagobereranga omubiri, mugenda kufa. Naye bwe munnatta ebikolwa ebyʼomubiri, muliba balamu,

Noolwekyo abooluganda mbeegayirira olwʼokusaasira kwa Katonda, muwengayo emibiri gyammwe nga ssaddaaka ennamu entukuvu esanyusa Katonda, kwe kuweereza kwammwe okwʼomwoyo.

Kubanga amateeka gano nti, “Toyendanga, tottanga, tobbanga, teweegombanga,” nʼetteeka eddala, ligattiddwa mu kino nti “Yagalanga muliraanwa wo nga bwe weeyagala wekka.”

Tutambulenga ngʼabʼomu musana, so si mu binyumu ne mu kutamiira, ne mu bwenzi nʼobukaba, ne mu kuyombagana nʼobuggya, naye twambale Mukama waffe Yesu Kristo so tetuwanga mubiri bbanga kukola ngʼokwegomba kwagwo bwe kuli.

Twategeezebwa nga mu mmwe mulimu obwenzi, ate obwenzi obutali na mu baamawanga, kubanga omuntu atwala muka kitaawe nʼamufuula mukazi we.

Mbawandiikira nga mbalabula obutegattanga na benzi, so si okwewala abenzi abʼensi eno, oba aboomululu, oba abakumpanya, oba abasinza bakatonda abalala, kubanga kyandibagwanidde mmwe okuva mu nsi. Naye kaakano mbawandiikira nga mbategeeza nti Mwewale omuntu yenna ayitibwa owooluganda ngʼate mwenzi, owoomululu, asinza bakatonda abalala, oba omuvumi, oba omutamiivu oba omukumpanya. Abʼengeri eyo nʼokulya temulyanga nabo. Kale nze nfaayo ki okusalira abʼebweru omusango? Lwaki sisalira abo abali mu mmwe? Naye abʼebweru Katonda ye abasalira. Omubi oyo ali mu mmwe mumuggyeemu.

Oba temumanyi ngʼabatali batuukirivu tebaliyingira mu bwakabaka bwa Katonda? Temulimbibwanga. Abakaba, newaakubadde abasinza bakatonda abalala, newaakubadde abenzi, newaakubadde abasajja abeeyisa ngʼabakazi, newaakubadde abalya ebisiyaga, newaakubadde ababbi, newaakubadde aboomululu, newaakubadde abatamiivu, newaakubadde abajerega, newaakubadde abanyazi tebaliyingira mu bwakabaka bwa Katonda. Era abamu ku mmwe mwali nga bo, naye ebibi byammwe byanaazibwa era mwatukuzibwa era mwaweebwa obutuukirivu mu linnya lya Mukama waffe Yesu Kristo nʼOmwoyo wa Katonda waffe.

Ebyokulya bya lubuto, nʼolubuto lwa byakulya. Naye byombi Katonda alibizikiriza. Omubiri si gwa bwenzi, naye gwa Mukama.

Temumanyi ngʼemibiri gyammwe bitundu bya Kristo? Ate nzirire ebitundu bya Kristo mbifuule ebyʼomwenzi? Kikafuuwe. Oba temumanyi nti Omuntu yenna eyeegatta nʼomwenzi, emibiri gyammwe gifuuka gumu? Kubanga kigambibwa nti, “Bombi balifuuka omubiri gumu.” Naye eyeegatta ne Mukama waffe bafuuka omu mu mwoyo. Mudduke obwenzi. Buli kibi omuntu kyʼakola kiba ku mubiri, naye ayenda akola ekibi ku mubiri gwe ye yennyini.

Kaakano ku bintu bye mwampandiikira, kirungi omusajja obutakwatanga ku mukazi. Naye olwʼebikolwa ebyʼobwenzi, buli musajja abeerenga ne mukazi we; era na buli mukazi abeerenga ne bba. Omusajja ateekwa okutuukirizanga ebyʼobufumbo byonna eri mukazi we era nʼomukazi bwʼatyo. Kubanga omukazi bwʼafumbirwa aba takyafuga mubiri gwe ye wabula bba, era nʼomusajja bwʼatyo aba takyafuga mubiri gwe ye wabula mukazi we yʼaba agulinako obuyinza. Buli omu alemenga okumma munne wabula nga mulagaanye ekiseera mulyoke mufune ebbanga eryʼokusabiramu nʼoluvannyuma muddiŋŋanenga, Setaani aleme okubasuula olwʼobuteefuga bwammwe.

Naye bwe baba tebasobola kwefuga bafumbirwe, oba bawase, kubanga okufumbiriganwa kisinga okwakiriranga okwʼokwegomba.

Omusajja bwʼalowooza nti Aba teyeeyisizza bulungi eri omuwala oyo gwʼayogereza bwʼatamuwasa, bwe bafumbiriganwa, aba tayonoonye.

Tetusaana kubeera benzi ngʼabamu ku bo bwe baali, abantu emitwalo ebiri mu enkumi ssatu ku bo ne bafa mu lunaku lumu.

Kale alowooza ngʼayimiridde, yeekuumenga aleme okugwa. Tewali kukemebwa kubatuukako okutali kwa bantu; kyokka Katonda mwesigwa, kubanga taabalekenga kutuukibwako kukemebwa kwe mutayinza kugumira, naye anaabasobozesanga okubigumira, nʼabalaga nʼekkubo eryʼokubiwangula.

Kubanga ffe ffenna kitugwanira okulabika mu maaso gʼentebe ya Kristo eyʼokusalirako omusango, buli muntu asalirwe olwʼebyo bye yakola ngʼakyali mulamu, okusinziira ku ebyo bye yakola oba birungi oba bibi.

Abaagalwa, nga bwe tulina ebisuubizo ngʼebyo, twetukuze mu buli kintu ekyonoona omubiri nʼomwoyo, nga tutuukiriza obutukuvu mu kutya Katonda.

bwe ndijja nate, Katonda wange aleme kuntoowaza mu maaso gammwe, ne nkaabira abo bonna abaayonoona edda, ne bateenenya obutali bulongoofu, nʼobwenzi, nʼobugwagwa bye baakola.

Mbagamba nti, mutambulirenga mu Mwoyo, mu ngeri yonna, mulemenga kutuukiriza kwegomba kwa mubiri. Kubanga okwegomba kwʼomubiri kulwanagana nʼOmwoyo, nʼOmwoyo nʼalwanagana nʼomubiri; kubanga bino byombi bikontana, mulemenga okukola bye mwagala. Naye bwe muluŋŋamizibwa Omwoyo, olwo nga temukyafugibwa mateeka. Ebikolwa byʼomubiri bya lwatu, bye bino: obwenzi, obukaba, obugwenyufu, Okusinza bakatonda abalala, obufumu, obulabe, okuyomba, obuggya, obusungu, okwekuluntaza, okweyawula, okwesalamu, ettima, obutamiivu, ebinyumu, nʼebirala ebiri ngʼebyo. Ka mbategeeze nate nga bwe nasooka okubabuulira nti Buli akola ebyo talina mugabo mu bwakabaka bwa Katonda.

Nʼabo aba Kristo Yesu baakomerera omubiri nʼokwegomba kwagwo, nʼomululu gwagwo.

Temubuzibwabuzibwanga, Katonda tasekererwa, kubanga omuntu kyʼasiga era kyʼalikungula. Kubanga oyo asiga eri omubiri gwe, alikungula ebiggwaawo. Naye oyo asiga eri omwoyo, alikungula obulamu obutaggwaawo.

Edda naffe twatambuliranga mu kwegomba kwʼemibiri gyaffe, nga tukola ebyo ebyegombebwanga omubiri nʼebirowoozo. Era okufaanana ngʼabantu abalala bonna, naffe mu buzaaliranwa twali baakubonerezebwa ngʼabalala bonna.

Tebakyalina nsonyi, beemalidde mu bya buwemu, na mululu gwa kukola bya bugwenyufu ebya buli ngeri.

Nga bwe muli abantu ba Katonda abatukuvu, obwenzi, nʼobugwagwa bwonna, nʼomululu bireme okuwulirwa mu mmwe. Mwewale okwogera ebyʼensonyi, nʼebyʼobusirusiru, nʼokubalaata ebitasaana. Mwebazenga bwebaza Katonda. Mukimanye era mukitegeerere ddala nga buli mwenzi, oba omugwagwa, oba eyeegomba, aba asinza bakatonda abalala, talina mugabo mu bwakabaka bwa Kristo ne Katonda.

Noolwekyo temufugibwa bikolwa byammwe ebyʼomubiri, byonna mubitte. Gamba nga: obwenzi, nʼobutali bulongoofu, nʼobukaba, nʼokwegomba okwʼensonyi, nʼokuyaayaana; kye kimu nʼokusinza bakatonda abalala.

Kubanga Katonda ayagala mutukuzibwe, era mwewalenga obwenzi, buli omu ku mmwe amanyenga okufuga omubiri gwe mu butukuvu nʼekitiibwa, so si mu kwegomba okwʼobukaba ngʼabamawanga abatamanyi Katonda bwe bakola.

Kubanga Katonda teyatuyitira bugwenyufu wabula yatuyitira kutukuzibwa. Noolwekyo anyooma bino aba tanyoomye muntu wabula Katonda, atuwa Omwoyo we Omutukuvu.

Tusaanye tutegeere nga Amateeka tegaateekerwawo batuukirivu, wabula gaateekerwawo bamenyi baago na bajeemu, aboonoonyi, nʼabatatya Katonda, nʼabatali batukuvu, nʼabagwenyufu, abatta bakitaabwe ne bannyaabwe, era nʼabatta abantu abalala, nʼabenzi, nʼabalya ebisiyaga, abagula nʼabatunda abaddu, abalimba nʼabalayirira obwereere, ne bonna abatakkiriziganya na njigiriza ntuufu,

Naye ddukanga okwegomba okubi okwʼekivubuka, ogobererenga obutuukirivu, nʼokukkiriza, nʼokwagalana era nʼemirembe awamu nʼabo abasaba Mukama nʼomutima omulongoofu.

Kubanga abantu baliba nga beefaako bokka, nga balulunkanira ensimbi, nga beepanka, nga beekuluntaza, nga boogera ebibi, era nga tebawulira bazadde baabwe, nga tebeebaza, nga tebatya Katonda, nga tebaagalana era nga tebatabagana, nga bawaayiriza, nga tebeegendereza, nga bakambwe, nga tebaagala birungi, nga ba nkwe, nga baagala ebyʼamasanyu okusinga bwe baagala Katonda; nga balina ekifaananyi ekyʼokutya Katonda so nga tebakkiriza maanyi gaakyo. Abantu abʼengeri eyo obeewalanga. Mu abo mulimu abasensera mu mayumba ne bawamba abakazi abanafu mu mwoyo abazitoowereddwa ebibi, era abawalulwa okwegomba okubi okwa buli ngeri,

era kituyigiriza tuleke obutatya Katonda, nʼokwegomba kwʼensi, tulyoke tube beegendereza, abatuukirivu abatya Katonda nga tuli mu mulembe gwa kaakano;

Era mwegendereze waleme okubaawo omwenzi mu mmwe wadde atatya Katonda nga Esawu eyatunda ebyobusika bwe olwʼolulya olumu.

Obufumbo mubussangamu ekitiibwa nʼebirayiro byabwo, kubanga abakaba nʼabenzi Katonda alibasalira omusango, ne gubasinga.

Alina omukisa omuntu agumira okukemebwa, kubanga bwʼalimala okusiimibwa aliweebwa engule eyʼobulamu Katonda gye yasuubiza abo abamwagala. Omuntu yenna bwʼakemebwanga, tagambanga nti, “Katonda ye yankemye,” kubanga Katonda takemebwa, era naye yennyini takema muntu nʼomu. Naye buli muntu akemebwa ngʼokwegomba kwe okubi, bwe kuli, nʼasendebwasendebwa. Okwegomba okwo bwe kumala okuba olubuto, ne kuzaala ekibi, nʼekibi bwe kikula ne kizaala okufa.

Era ne bwe mubisaba, temubifuna kubanga ekigendererwa kyammwe kikyamu; mugenderera kubikozesa ku masanyu gokka. Mmwe abenzi temumanyi ngʼokuba mikwano gyʼensi bulabe eri Katonda? Noolwekyo omuntu yenna bwʼalondawo okuba mukwano gwʼensi afuuka mulabe wa Katonda.

Mugonderenga Katonda, kubanga muli baana be, muleme kufugibwa okwegomba kwammwe okubi okwʼedda, kwe mwatambulirangamu mu butamanya.

Abaagalwa, mutegeerere ddala nti Ku nsi kuno muli bayise. Kyenva mbeegayirira mwewale okwegomba kwʼomubiri, kubanga kulwanagana nʼomwoyo.

Kale nga Kristo bwe yabonyaabonyezebwa mu mubiri, nammwe mumalirire okubonaabona nga ye. Kubanga abonaabona mu mubiri aba takyafugibwa kibi. Okuva kaakano nga muli mu nsi muno, mugoberere ebyo Katonda byʼayagala, so si kugoberera kwegomba kwammwe okwʼomubiri. Mu biseera ebyayita mwemaliranga mu kukola ebyo Abaamawanga bye beegombanga. Mwali mwemalidde mu bwenzi, mu kwegomba okubi, mu butamiivu, mu binyumu, mu bubaga obwʼomwenge, ne mu kusinza bakatonda abalala.

Katonda teyasaasira bamalayika abaayonoona, wabula yabasuula mu lukonko oluwanvu olujjudde ekizikiza, gye bali, nga basibiddwa mu njegere nga balindirira olunaku olwʼokusalirwako omusango. Nʼensi eyʼedda teyagisaasira, nʼaleeta amataba ku nsi okuzikiriza abo abataamutya, nʼalokolako Nuuwa eyabuulira obutuukirivu wamu nʼabalala musanvu. Era yasalira omusango abaali mu bibuga byʼe Sodomu nʼe Ggomola bwe yabazikiriza, ne bisirikka mu muliro, bwʼatyo nʼalaga ebyo ebigenda okutuuka ku buli atatya Katonda. Kyokka nʼawonya Lutti, omutuukirivu, eyalumwanga ennyo olwʼobulamu obwʼabantu abo abajeemu. Olwʼokubanga yababeerangamu, buli lunaku, yalabanga era nʼawuliranga ebikolwa ebyʼobujeemu bye baakolanga, ekyo ne kimuleetera okunyolwa mu mwoyo gwe omutuukirivu. Mukama amanyi okuwonya nʼokuggya mu kugezesebwa abamutya, nʼabonereza abatali bakkiriza okutuusa ku lunaku olwʼokusalirako omusango, nʼokusingira ddala abo abagoberera okwegomba kwabwe okwʼomubiri ne banyooma abakulembeze baabwe. Tebaliiko kye batya, beerowoozaako bokka, era tebakwatibwa na nsonyi kuvuma baakitiibwa.

Balina amaaso agajjude obukaba, tebalekaayo kukola kibi buli kiseera boonoona era basendasenda abatali banywevu, bajjudde omululu. Baana abaakolimirwa,

Boogera ebigambo ebyʼokwekuluntaza era ebitaliimu nsa. Mu kwegomba kwʼomubiri ne mu bukaba bwabwe basendasenda abo abali okumpi nʼokubadduka abakyatambulira mu kibi.

Ekisooka, mutegeerere ddala nga mu nnaku ezʼoluvannyuma abantu abagoberera okwegomba kwʼomubiri gwabwe balijja mu mmwe nga babasekerera,

Kubanga buli ekyʼensi: okwegomba kwʼomubiri, nʼokwegomba kwʼamaaso, nʼokwekuluntaza okwʼobulamu, si bya Kitaffe, naye bya nsi. Ensi nʼokwegomba kwayo byonna biggwaawo, naye buli akola Katonda byʼayagala abeerera emirembe gyonna.

Waliwo abantu abajja mu bubba, abaawandiikwako edda nga baasalirwa omusango, abatatya Katonda abajerega ekisa kya Katonda waffe, ne bakiyisaamu amaaso, ne beegaana Yesu Kristo Mukama waffe, omu yekka.

ne bamalayika abataakuuma kitiibwa kyabwe ne badda mu kukola bye baayagala ne balekulira nʼebifo byabwe, abo Katonda yabasiba mu njegere nʼabassa mu kkomera eryʼekizikiza ekikutte gye balindiririra okusalirwa omusango. Temusaanye kwerabira bibuga ebya Sodomu ne Ggomola nʼebibuga ebyali bibiriraanye. Byonna byali bijjudde kwegomba okubi nʼobwenzi, nga nʼabasajja bakolaganako ebyʼensonyi. Ebibuga ebyo byazikirizibwa nʼomuliro, era byabonerezebwa nʼomuliro ogutaggwaawo bibeere ekyokulabirako gye tuli. Mu ngeri yʼemu abo abaloota bagwagwawaza omubiri, ate oludda ne banyooma obuyinza, ne bavvoola ne bamalayika.

Naye nkulinako ensonga ntono: eyo olinayo abʼenjigiriza eya Balamu eyayigiriza Balaki okutega abaana ba Isirayiri omutego nʼabaliisa ennyama eyʼomuzizo eyassaddaakirwa eri bakatonda abalala, era nʼokwenda.

Kyokka nkulinako ensonga eno. Ogumiikiriza omukazi Yezeberi eyeeyita nnabbi omukazi akyamya abaweereza bange ngʼabayigiriza obwenzi nʼokulya emmere eweereddwayo eri bakatonda abalala. Namuwa ekiseera yeenenye, kyokka tayagala kwenenya bwenzi bwe. Laba, ndimulwaza obulwadde obulimusuula ku ndiri, era nʼabo baayenda nabo mbatuuse ku bulumi obwʼamaanyi, okuggyako nga beenenyezza ebikolwa byabwe.

Era tebeenenya butemu bwabwe, wadde obulogo, wadde obwenzi, wadde obubbi bye baakolanga.

Ate malayika omulala owookubiri nʼamugoberera ngʼagamba nti, “Babulooni kigudde! Kigudde, ekibuga ekikulu, kubanga kyasendasenda amawanga gonna okunywa ku mwenge gwʼobusungu obwʼobwenzi bwakyo.”

Awo omu ku bamalayika omusanvu abaalina ebibya omusanvu nʼajja nʼayogera nange, nʼaŋŋamba nti, “Jjangu nkulage ebigenda okutuuka ku mukazi malaaya omukulu atudde ku mazzi amangi. Bakabaka abʼoku nsi bayenda naye nʼabantu abʼoku nsi banywa omwenge ogwʼobwenzi bwe ne batamiira.”

Kubanga amawanga gonna gaanywa ku mwenge gwʼobwenzi bwe. Bakabaka abʼomu nsi bonna baayenda naye. Era abasuubuzi abʼomu nsi yonna bagaggawadde olwʼobulamu bwe obwʼokwejalabya.”

“Bakabaka abʼomu nsi abeegatta naye mu bwenzi bwe ne beejalabya naye, balimukaabira nga bakuba ebiwoobe bwe baliraba omukka oguva mu kifo mwʼalyokerwa.

Kubanga ensala ye eyʼemisango ya mazima era ya butuukirivu. Yabonereza malaaya omukulu eyayonoona ensi nʼobwenzi bwe. Era yawoolera eggwanga ku mwenzi oyo olwʼomusaayi gwʼabaweereza be.”

Naye abo ababi nʼabatakkiriza nʼabagwagwa, nʼabassi, nʼabenzi, nʼabalogo nʼabasinza ebifaananyi, nʼabalimba bonna, omugabo gwabwe kuliba kuzikirizibwa mu nnyanja eyʼomuliro ogwaka ne salufa. Okwo kwe kufa okwokubiri.”