12 – Feusuaiga le Mama

O le mea lea e tuua ai e le tane lona tamā ma lona tinā, a e faatasi ma lana avā; ona avea ai lea o i laua ma tino e tasi.

Ona faapea lea a Ieova, O le alaga mai Sotoma ma Komoro ua tele, ma ua matuā tele lava a latou agasala; o le mea lea ou te alu ifo ai, ia iloa po ua faia lava e i latou e poi o le alaga ua oo mai ai ia te au; afai foi ua leai, ou te iloa lava. Ona tuua lea o lea mea e nei tagata, ua o atu i Sotoma; a o Aperaamo ua tu pea o ia i luma o Ieova. Ona faalatalata atu lea o Aperaamo, ua faapea atu, E te faaumatia ea e ua amiotonu faatasi ma e amio leaga? Pe afai o i le aai tagata e toalimagafulu o e amiotouu, e te faaumatia ea a e le faasaoina le nuu ona o le toalimagafulu o e amiotonu o i ai? Ia mamao lava ia te oe ona e faia faapea e fasioti i e amiotonu faatasi ma e amio leaga; ma ona faagatusa e amiotonu ma e amio leaga, ia mamao lava lea ia te oe. O le na te faamasinoina le lalolagi uma, e le faia ea e ia le faamasinoga tonu? Ona faapea mai lea o Ieova, Afai ou te maua i Sotoma tagata amiotonu e toalimagafulu i le aai, ona ou faasao ai lea o le nuu uma ona o i latou. Ona tali atu lea o Aperaamo, ua faapea atu, Faauta mai, o a‘u nei o le efuefu ma le lefulefu, ua ou faamalosi e tautala atu i le Alii; afai ua toe toalima e faaatoa ai le toalimagafulu o tagata amiotonu, e te faaumatia ea le aai uma ona o le toalima? Ona tali mai lea a ia, Afai ou te maua ai se toafagafulu ma le toalima ou te le faaumatia lava. Ona toe fai atu lea o ia ia te ia, ua faapea atu, Pe afai ua maua ai le toafagafulu e a ea? Ona fetalai mai lea o ia, Afai ou te maua ai le toafagafulu ou te le faia lava ona o i latou. Ona fai atu lea a ia, Aua ne‘i toasa mai le Alii, a se‘i ou toe fai atu, Afai ua maua ai se toatolugafulu e a ea? Ona fetalai mai lea o ia, Afai ou te maua ai se toatolugafulu ou te le faia lava. Ona fai atu lea o ia, Faauta mai, ua ou faamalosi e tautala atu i le Alii, Afai e maua ai se toaluafulu e a ea? Ona fetalai mai lea o ia, Pe a o i ai le toaluafulu ou te le faaumatia lava ona o i latou. Ona fai atu lea o ia Aua ne‘i toasa mai le Alii, a se‘i ou fai atu le toe upu lea, Afai e maua ai se toasefulu e a ea? Ona tali mai lea a ia, Pe a o i ai le toasefulu ou te le faaumatia lava ona o i latou.

Ua oo atu agelu e toalua i Sotoma i le afiafi, a o nofo Lota i le faitotoa o Sotoma; ua ilo atu e Lota, ona tulai lea e faafetaiai ia te i laua; ona ifo toele lea o ia; ua fai atu foi o ia, Alii e, faauta mai, se‘i oulua afe mai i le fale o la oulua auauna, ma tofa ai, se‘i mulumulu foi o oulua vae; i le ala usu ai la oulua malaga. Ona tali mai lea o i laua, Soia, auā ma te momoe pea i fafo. Ona pulunaunau atu lava lea o ia ia te i laua; ona la o ane lea ma ia, ma ulufale atu i lona fale; ona saunia lea e ia o le mea e ‘ai ma i laua, ma ua tunu areto e le faafefetoina, ona la aai ai lea. A o lei taooto i laua ua siomia le fale e tagata o lea aai, o tagata lava o Sotoma, o taulelea atoa ma toeaina, o le nuu uma lava mai itu uma; ua latou valaau ia Lota, ua faapea atu, O ifea ea tagata na o mai ia te oe i le po nei? Tuu mai ia i laua ia te i matou nei, ina ia matou iloa i laua. Ona ulufafo lea o Lota i le faitotoa ia te i latou, ua pupuni le faitotoa i ona tua, ua faapea atu, O‘u uso e, aua lava tou te agaleaga. Faauta mai, o ia te au o‘u afafine e toalua, e lei iloa tane e i laua; se‘i ou tuuina mai i laua ia te outou, e faitalia lava outou ia te i laua; a o na tagata, aua tou te faia se mea ia te i laua, auā o le mea lava lea na o mai ai lalo ifo o lo‘u fale. Ona faapea mai lea o i latou, Alu ese ia; ua faapea ane foi i latou, Ua sau lena tagata e taase, a o le a fai o ia ma faamasino; o lenei, o le a sili le leaga matou te faia ia te oe a e itiiti ia te i laua. Ua latou matuā fetuleni mai lava ia Lota, ma ua faalatalata mai e sofai i le faitotoa. A ua fetagofi atu ia tagata ia Lota, ua au mai i le fale o i ai i laua, ona la pupuni lea o le faitotoa. A o tagata sa i le faitotoa o le fale, ua la faatauaso ia te i latou o tama atoa ma e matutua; ona lailoa ai lea o i latou i saili le faitotoa.

Ona fai atu lea o ia tagata ia Lota, O ai ea nisi o lou aiga o iinei? O se tane a sou afafine, po o sou atalii, po o sou afafine, atoa ma i latou uma e ua ia te oe o i le aai, ina ave ese ia i le mea nei; auā o le a ma faaumatia lenei mea, auā ua tele lo latou alaga i luma o Ieova; ua aauina mai foi i maua e Ieova e faaumatia ai. Ona alu atu lea o Lota, ma tautala atu i tane a ona afafine, o e ua fai avā i ona afafine, ua faapea atu, Ina tutū ia, ina outou o ese i lenei mea, auā o le a faaumatia e Ieova lenei aai. A o ia ua pei se tagata faianaga i le manatu o tane a ona afafine. Ua malama e le taeao ona nanati lea o agelu ia Lota, o loo faapea atu, Ina tulai ia, ave lau avā ma ou afafine e toalua, o loo iinei, ina ne‘i malaia oe i le sala a le aai. Ua faatuatuai o ia, ona fetagofi lea o ia tagata i lona lima, ma le lima o lana avā, ma lima o ona afafine e toalua, ina ua alofaina o ia e Ieova; ua la ta‘ita‘i atu foi ia te ia, ma tuu atu ia te ia i tua o le aai. Ua ta‘ita‘iina i latou e i laua i tua, ona faapea atu lea o ia, Ina sola ia e te ola ai, aua e te tepa i tua, aua foi e te tu i se mea o le fanua laugatasi; a ia sola lava i le mauga ina ne‘i malaia oe.

Ona faatotō faaua ifo lea e Ieova i Sotoma ma Komoro o le teio ma le afi mai ia Ieova mai le lagi;

Ua tepa i tua lana avā sa mulimuli atu ia te ia, ona liua lea o ia ma tupua masima.

A ua afio mai le Atua ia Apimeleko i le miti i le po, ua faapea mai ia te ia, Faauta, o le a e oti ona o le fafine ua e au mai, auā o le nofo tane lava ia.

Ua iloa foi o ia e Sekema le atalii o Hamoro, o lo sa Hivī, o le tamaalii o le nuu, ua ia ta‘ita‘i foi ia te ia, ua la momoe, ua ia faaleaga ia te ia.

Ua o mai foi atalii o Iakopo mai le vao ina ua latou faalogo i ai; ua tiga foi i latou, ua matuā ita lava, ina ua faia e ia le mea leaga ia Isaraelu, ina ua la momoe ma le afafine o Iakopo; auā o le mea lea e le tatau lava ona fai.

Ua la fafasi foi ia Hamoro ma lona atalii o Sekema i le pelu, ua ave foi ia Tina ai le fale o Sekema, ma latou o. Ua o atu foi atalii o Iakopo i e na fasia, ma latou vete le aai, auā na latou faaleagaina lo latou tuafafine.

Ona faapea lea o i laua, E faapea ea ona fai o ia i lo matou tuafafine e peiseai o se fafine talitane?

Ua iloa o ia e Iuta, fa te ia o ia le fafine talitane, auā sa na ufiufi ona mata. Ua afe ane ia ia te ia i le auala, ua fai atu ai, Ou te alu atu ea ia te oe? Auā na te lei iloa o le avā ia a lona atalii. Ua fai mai o ia, Se a se mea e te aumaia ia te au ina ia e sau ia te au? Ua fai atu, Ou te avatu ia te oe se tamai ‘oti ai le lafu. Ua fai mai o ia, E te aumaia ea se mea e fai ma faamaoni seia au mai ai le mea? Ua fai atu o ia, Se a se mea ou te avatu ui ia te oe e fai ma faamaoni? Ua fai mai o ia, O lou faamaufaailoga, ma lou asoa, ma lou tootoo o loo i lou lima. Ua avatu ai ia te ia, ona alu ane ai lea o ia ia te ia; ua to foi o ia ia te ia. Ua tulai le fafine, ua alu, ua tuu ese le ie sa ufiufi ai ona mata, ua ofu i ofu o lona nofo fua. Ua avatu e Iuta le tamai ‘oti i le lima o lana uo le Atulama e au mai ai mea na fai ma faamaoni i le lima o le fafine, a ua le iloa ia. Ua fesili o ia i tagata o le nuu, o loo faapea, O fea o i ai le fafine talitane sa i Ainaima i le au ala? Ua fai mai i latou, E leai se fafine talitane i le mea nei. Ua foi mai o ia ia Iuta, ua fai mai ai, Ua ou le iloa ia, mona ua fai mai tagata o le nuu, e leai se fafine talitane i lea mea. Ua fai ane Iuta, Ave pea ia mana, ne‘i inosia i taua; faauta, na ou avatua lenei tamai ‘oti, a ua e le iloa ia. Po ua atoa ea ni masina se tolu, ona ta‘uina atu ai lea ia Iuta, ua faapea, Ua faitaaga Tamara le avā a lou atalii, faauta foi, o loo ua to ia i ana faitaaga. Ona fai atu lea o Iuta, Au mai ia o ia, ina susunu. O loo ta‘ita‘iina atu o ia, na ia auina atu i le tamā o lana tane, o loo faapea atu, O le tagata e ana nei mea ua ou to ai; ua faapea foi o ia, Se‘i e iloilo po o ai e ana nei mea, o le faamaufaailoga, ma le asoa, ma le tootoo. Ua iloa lava e Iuta, ona fai ane lea, Ua sili ona tonu lana amio i la‘u, ona ua le avatua o ia ia Sila lo‘u atalii; ua la le toe feiloa‘i.

E mulimuli ane i nei mea, ua tepa ane le faletua o lona alii ia Iosefa, ua fai mai, Ta te momoe. A e le mafai o ia, ma ua fai atu i le faletua o lona alii, Faauta, e le iloa e lo‘u alii se mea ua ia te au i le fale, o ana mea uma foi ua ia tuu mai i lo‘u lima. E leai se sili ia te au i le fale nei, ua na le taofi sina mea ia te au, ua na o oe, auā o oe lona faletua; pe faapefea ona ou faia lenei mea leaga tele ma ou agasala ai i le Atua? Ua tautala o ia ia Iosefa i lea aso ma lea aso, a e le faalogo o ia ia te ia ina ia la momoe faatasi ma ia, pe nofo faatasi ma ia. Ua oo i le tasi aso, ua alu atu ai o ia i le fale e fai ai lana galuega, e leai se tasi tagata o le aiga sa i le fale. Ona tago atu lea o ia i lona ofu, o loo faapea, Ta te momoe; ona tuu lea e ia o lona ofu i lona lima ua sola, ua alu i fafo.

Ua iloa e ia ua tuu lona ofu i lona lima, ma ua sola i fafo, ona valaau atu lea o ia i tagata o lona aiga, ua fai atu ia te i latou, ua faapea, Faauta, ua ia au mai ia te i tatou le tagata Eperu e ula ia i tatou; na sau ia ia te au ma te momoe ma ia, ona ou alaga lea ma le leo tele; ona faalogo lea o ia ua ou leo tele ma alaga, ona tuua lea e ia lona ofu ia te au, ua sola, ua alu i fafo. Ua teu lona ofu e ia seia sau lona alii i lona fale. Ona tautala atu lea o ia ia te ia i nei upu, o loo faapea, Na sau ia te au le auauna Eperu na e au mai ia te i matou, e ula mai ia te au. Ona ou leo tele ai lea ma ou alaga, ona tuu lea e ia o lona ofu ia te au, a e sola ia i fafo. Ua faalogo lona alii i upu a lana avā sa tautala ai ia te ia, o loo faapea, Ua faia nei mea ia te au e lau auauna; ona ita tele ai lea o ia. Ua tago atu lona alii ia Iosefa, ua tuu ia te ia i le fale puipui, o le mea ua fusifusia ai e ua fusifusia e le tupu; sa i ai o ia i le fale puipui.

Aua e te mulilua.

Aua e te manao i le fale o lē lua te tuaoi, aua e te manao i le avā a lē lua te tuaoi, po o lana auauna tane, po o lana auauna fafine, po o lana povi, po o lana asini, po o se tasi mea a lē lua te tuaoi.

Ai se tasi la te momoe ma se manu, ia fasiotia lava ia.

Aua ne‘i faalatalata atu so outou i se tasi o lona lava aiga, e faatelenoa i lona tino; o a‘u o Ieova. Aua e te faatelenoa i lou tamā po o lou tinā, o lou tinā lava ia, aua e te faatelenoa ia te ia. Aua e te faatelenoa i le avā a lou tamā, o le telenoa lea o lou tamā. O lou tuafafine, o le afafine o lou tamā, po o le tama a lou tinā, sa fanau mai i le aiga, pe fanau mai i se tasi aiga, aua e te faatelenoa ia te ia. O le afafine o lou atalii, po o le tama a lou afafine, aua e te faatelenoa ia te i laua; auā o lo la telenoa, o lou lava lea. O le tama teine a le avā a lou tamā, o lou tamā na fanau ai, o lou tuafafine lea, aua e te faatelenoa ia te ia. Aua e te faatelenoa i le tuafafine o lou tamā; o le aiga lava ia o lou tamā. Aua e te faatelenoa i le uso o lou tinā; o le aiga lava ia o lou tinā. Aua e te faatelenoa i le uso o lou tamā, aua e te faalatalata atu i lana avā; o le avā ia a le uso o lou tamā. Aua e te faatelenoa i le avā a lou atalii; o le avā ia a lou atalii, aua e te faatelenoa ia te ia. Aua e te faatelenoa i le avā a lou uso; o le telenoa lea o lou uso. Aua e te faatelenoa i se fafine atoa ma lana tama teine; aua e te tago foi i le afafine o lana tama tane, po o le tama teine a lana tama teine e faatelenoa ia te ia; auā o fafine o lona lava aiga i latou; o le mea leaga lava lea, Aua foi e te fai avā i le uso o lau avā e faatiga ia te ia, e faatelenoa ia te ia atoa ma le tasi a o ola mai o ia.

Aua foi e te faalatalata atu i se fafine e faatelenoa ia te ia, ina o nofo ese o ia ona o lona leaga. Aua foi ne‘i momoe oulua ma le avā a le tasi, e leaga ai oe ia te ia. Aua foi e te tuuina atu o so lau fanau e ui ane i le afi ia Moloka. Aua foi e te faaleagaina le igoa o lou Atua; o a‘u o Ieova. Aua lua te momoe ma se tane, e pei ona momoe ma se fafine; o le mea e inosia lava lea. Aua foi lua te momoe ma se manu, e leaga ai oe ia te ia; aua ne‘i tu atu foi se fafine i luma o se manu la te momoe ma ia; o le mea matuā leaga lava lea.

Aua e te faaleaga i lou afafine e fai ma fafine talitane; ina ne‘i masani le nuu ma le faitaaga, ona tumu ai lea o le nuu i le amio leaga.

O le tagata foi ua la mulilua ma le avā a le tasi tagata, o le ua mulilua ma le avā a lē la te tuaoi, o le tane mulilua ma le fafine mulilua, e fasiotia lava i laua. O le tagata foi la te momoe ma le avā a lona tamā, ua faatelenoa e ia i lona tamā; e fasiotia lava i laua; e ia te i laua o la toto. Afai foi e momoe se tagata ma le avā a lona atalii, e fasiotia lava i laua; ua la faia le mea matuā leaga lava; e ia te i laua o la toto. Afai foi e momoe se tane ma le tasi tane, e pei ona momoe o le tane ma le fafine, ua la faia le mea leaga lava; e fasiotia lava i laua; e ia te i laua o la toto. Afai foi e fai avā se tagata i le fafine atoa ma le tinā o le fafine, o le mea leaga lava lea; e susunuina i latou i le afi, o ia atoa ma i laua; ina ne‘i i ai le amio leaga ia te outou. Afai foi e momoe se tane ma se manu, e fasiotia lava o ia; tou te fasimate foi i le manu. Afai foi e faalatalata atu se fafine i se manu la te momoe, e te fasioti i le fafine atoa ma le manu; e fasiotia lava i laua; e ia te i laua o la toto.

Afai foi e tago e le tagata lona tuafafine, o le afafine o lona tamā, po o le tama a lona tinā, ma iloa lona telenoa, ua iloa foi e le fafine lona telenoa; o le mea leaga lava lea; ia vavaeeseina i laua i luma o tagata o lo la nuu; ua ia faatelenoa i lona tuafafine; e nofo sala lava o ia. Ai se tane ua la momoe ma le fafine o loo na o faia le ma‘i, ua ia faatelenoa foi ia te ia; ua na su‘ena lona puna, o le fafine foi ua faaaliali e ia le puna o lona toto; e vavaeeseina lava i laua i lo la nuu. Aua foi e te faatelenoa i le uso o lou tinā, po o le tuafafine o lou tamā; auā o le faatelenoa lea e le tagata i lona lava aiga; e nofo sala lava i laua. Ai se tagata la te momoe ma le avā a le uso o lona tamā, ua faatelenoa e ia i le uso o lona tamā; e nofo sala i laua; e leai ni a la fanau, e oo lava i le oti. Afai foi e fai avā se tagata i le avā a lona uso, o le mea leaga lea; ua faatelenoa e ia i lona uso; e leai ni a la fanau.

Aua ne‘i fai avā so latou i se fafine talitane, po o se fafine faitaaga; aua foi ne‘i fai avā o ia i se fafine ua aleia e lana tane; auā ua paia o ia mo lona Atua. E te faapaiaina foi o ia, auā o ia na te avatu le areto a lou Atua; e paia lava o ia ia te oe; auā o a‘u o Ieova, o le faapaiaina outou, e paia lava a‘u. O le afafine foi o se faitaulaga, afai na te faaleaga o ia ia te ia i lona talitane, ua faaleaga o ia i lona tamā; e susunuina lava o ia i le afi.

O se fafine ua oti lana tane, po o se fafine ua aleia, po o se fafine faitaaga, po o se fafine talitane, o fafine ia aua le fai avā ai o ia; a o le taupou o lona lava nuu e fai avā ai o ia.

Ia e fai atu i le fanauga a Isaraelu, ia faapea atu ia te i latou, Ai se tane ua alu lana avā, ma agaleaga ia te ia, ua la momoe ma e tasi tane, a e lei iloa e lana tane, ua lilo lava, ua leaga ai o ia, a e leai se na te molimau ia te ia, e lei maua foi o ia;

O le tulafono lea i le fuā, pe a alu ese le fafine i le tasi e le o lana tane, ma ua leaga ai o ia;

Faauta foi, o le tasi tagata mai le fanauga a Isaraelu ua sau, ua ia au mai i ona uso o le fafine Mitiana, i luma o Mose, ma luma o le faapotopotoga uma o le fanauga a Isaraelu, a o fetagisi i latou i le faitotoa o le fale fetafai o le faapotopotoga.

Aua foi e te mulilua.

Aua foi e te manao i le avā a le lua te tuaoi, aua foi e te manao i le fale o le lua te tuaoi, o lona fanua, po o lana auauna tane, po o lana auauna fafine, o lana povi, po o lana asini, po o se tasi mea a le lua te tuaoi.

Aua ne‘i ofu le fafine i le ofu o le tane; aua foi le ofu le tane i le ofu o le fafine; auā e inosia e Ieova lou Atua i latou uma lava o e faia na mea.

A e peitai afai ua moni lena upu, ua le maua faailoga o le taupou o le teine; ona latou avatu lea o le teine i le faitotoa o le fale o lona tamā, ona fetogi lea e tagata o lana aai ia te ia i maa, ia oti; auā ua faia e ia le mea leaga i Isaraelu, ina ua faitaaga i le aiga o lona tamā; ona outou tuueseina ai lea o le leaga ia te outou.

A iloa se tane ua la momoe ma se fafine nofo tane, ia oti i laua, o le tane na la momoe ma le fafine, atoa ma le fafine; ona e tuueseina ai lea o le leaga ia Isaraelu.

Afai o se teine taupou ua fafautane, ua maua o ia e se tane i le aai, ma la momoe ma ia; ona outou ta‘ita‘iina atu lea o i laua i le faitotoa o lena aai, ma outou fetogi ia te i laua i mea, ia oti; o le teine, ina ua le alaga o ia i le aai; o le tane foi, ina ua faaleagaina e ia le avā a lē la te tuaoi; ona e tuueseina ai lea o le leaga ia te oe.

A e afai maua i le vao e se tane se teine ua faufautane, a toso faamalosi foi le tane ia te ia, ma la momoe ma ia; ia oti lava tau o le tane na momoe ma ia; a o le teine, aua tou te faia se mea ia te ia; auā e le o i le teine se agasala ia oti ai o ai; auā ua tusa le mea nei ma le tulai atu o le tgama fasioti i lē la te tuaoi; auā ua na maua o ia i le vao, na alaga foi le teine ua faufautane, a ua leai se tasi e laveai ia te ia.

A e afai foi e maua e se tane se teine taupou ua le faufautane, ma tago atu ia te ia, ma la momoe ma ia, ua maua foi i laua; ia avatu e le tane na la momoe ma ia i le tamā o le teine o tupe e lima sefulu, ona fai ai lea o ia mana avā; auā ua na na faaleaga ia te ia, na te le mafai ona alei ia te ia i ona aso uma lava.

Aua ne‘i fai avā se tasi i le avā a lona tamā; aua foi te susue le ie o lona tamā.

Aua ne‘i alu se tama toifale i le faapotopotoga a Ieova; aua lava ne‘i alu o ia i le faapotopotoga a Ieova e oo lava i le sefulu o augātupulaga.

Aua ne‘i ai se fafine talitane o afafine o Isaraelu; aua foi ne‘i ai se tane faasotoma o atalii o Isaraelu, Aua ne‘i e avatu i le fale o Ieova lou Atua le totogi o le fafine talitane, po o le tau o se ulī, e fai ma mea na tauto ai; auā e inosia nei mea e lua e Ieova lou Atua.

Ia malaia le la te momoe ma le avā a lona tamā; auā e susue e ia le ie o lona tamā. Ona tali mai ai lea o le nuu uma, Amene.

Ia malaia lē la te momoe ma se manu. Ona tali mai ai lea o le nuu uma lava, Amene.

Ia malaia lē la te momoe ma lona tuafafine, o le afafine o lona tamā, po o le tama teine a lona tinā. Ona tali mai ai lea o le nuu umā lava, Amene.

Ia malaia lē la te momoe ma le tinā o lana avā. Ona tali mai ai lea o le nuu uma, Amene.

Ua alu atu Samasoni i Kasa, ona iloa ai lea e ia o le fafine talitane; ua ia alu ane ia te ia.

O ia ona aso sa leai se tupu ia Isaraelu, ua āumau le tagata sa Levī i le itu o le mauga o Efaraima; sa fai avā o ia, o le palake foi, mai Peteleema o Iuta. Ua mulilua lana palake, ua alu ese ia te ia i le aiga o lona tamā i Peteleema o Iuta, sa i ai i masina e fa.

Sa faafiafia e i latou o latou loto, faauta o tagata o le nuu, o tagata ulavavale, ua latou siomia le fale o loo patu‘i i le puipui; ua latou fai mai i le tagata e ona le fale, o le toeaina lea, o loo faapea mai, Tuu mai ia le tagata na alu atu i lou fale, ina ia matou iloa o ia. Ona alu atu lea ia te i latou o le tagata e ona le fale, ua fai atu ia te i latou, Aua, o‘u uso e, aua lava ne‘i outou agaleaga, ina ua ulu mai lenei tagata i lo‘u fale, aua tou te faia lenei mea leaga; faauta, o lo‘u afafine o le taupou, atoa ma lana palake, se‘i ou aumaia i laua, tou te faaleaga ia i laua, ma ia faia e outou mea tou te loto i ai ia i laua; a o lenei tagata, aua tou te faia lena mea leaga ia te ia. A e le mafafai tagata ona faalogo ia te ia, ona pue atu lea e le tagata i lana palake, ua na tuu atu ai o ia ia te i latou i fafo; ua latou iloa o ia, ma latou faaleaga ia te ia ua atoa lava le po; ua oo i le taeao, ona latou tuu atu lea ia te ia e alu ina a malama ae le taeao. Onā sau ai lea o le fafine i le vave ao, ua paū i le faitotoa o le fale o le tagata sa i ai lona alii, ua oo i le malama aee ae o le taeao. Ua tulai lona alii i le taeao, ma tatala puipui o le fale, ua ulufafo atu o le a alu lana malaga; faauta i le fafine, o lana palake, ua paū i le faitotoa o le fale, ma ona lima ua i le faitotoa. Ona fai mai lea o ia ia te ia, Tulai ia, ina tatou o; a e leai se tali; ona tago ai lea o ia ia te ia, ma faaee i le asini, ua tulai le tagata, ua alu i lona nuu. Ona oo lea o ia i lona fale, ua tago i le polo, ona ‘u‘u atu lea i lana palake, ua pena ia te ia atoa ma ona ivi i tufaaga e sefulu ma le lua, ona avatu ai lea i itu uma o Isaraelu. O i latou uma e na vaai i ai ua faapea ane i latou, E lei faia, e lei iloa foi se mea faapena talu le aso na o mai ai le fanauga a Isaraelu mai le nuu o Aikupito e oo i lenei aso; ia outou manatunatu i lenei mea, ia outou filifili, ma fai mai so outou loto.

tatou te fa‘ifa‘i tagata e toasefulu ai le toaselau i itu aiga uma o Isaraelu, ma le toaselau i le afe, ma le afe ai le sefulu o afe, e fai mea e ‘ai mā le nuu; ina ia faia pe a oo i latou i Kipea o Peniamina e tusa ma le faivale uma ua latou faia i Isaraelu. Sa faapotopoto tagata uma o Isaraelu e tau ma le aai; o loo loto gatasi i latou pei se tagata e toatasi.

Sa matuā toeaina Eli, ua faalogo foi o ia i mea uma na faia e ona atalii ia Isaraelu uma, ma latou momoe ma fafine e na faapotopoto atu i le faitotoa o le fale fetafai o le faapotopotoga.

Ua oo i le tasi afiafi na tulai Tavita ai lona moega, ua fealuai i luga o le fale o le tupu; ona ia iloa atu ai lea ai luga o le fale o le fafine o loo taele, o le fafine ua matuā lalelei lava. Ona au atu lea e Tavita se tasi e fesili po o ai le fafine. Ua fai ane le tasi, E le o Patesepa ea lenei, le afafine o Eliamo, le avā a Uria le sa Hetī? Ua aauina atu e Tavita o auauna, ua aami ia te ia; ona sau ai lea o ia ia te ia; ona la momoe lea ma ia; a o le fafine, na faamamā o ia ia te ia ai lona leaga, ona foi ai lea o ia i lona fale. Sa to ai le fafine, ona auina atu lea e ia se tasi e ta‘u atu ai ia Tavita, na faapea atu, O a‘u nei ua to.

se a le mea ua e ‘ino‘ino ai i le afioga a Ieova, ua e fai ai le mea leaga i ona luma? Ua e fasioti ia Uria le sa Hetī i le pelu, ua e aumai foi lana avā e fai mau avā, a o ia ua e fasia i le pelu o le fanauga a Amoni. O lenei, e le mavae le pelu ai lou aiga e faavavau, auā ua e faalemigao ia te au, ma ua e aumaia le avā a Uria le sa Hetī e fai mau ava. O loo faapea ona fetalai mai o Ieova, Faauta, o le a a‘u faatupu le leaga ia te oe ai lou lava aiga; ou te ave au avā i ou luma, ma ou avatu ai i le tasi tagata, e moe o ia ma au avā i le mumū o lena la; auā o oe na e fai faalilolilo; a o a‘u, ou te faia lenei mea i luma o Isaraelu uma i le mumū o le la.

Ua ia avatu ai ia te ia ina ia ‘ai ai o ia; ona tago atu lea o ia ia te ia, ma na fai atu i ai, Lo‘u tuafafine e, sau ia, ta te momoe ma a‘u. Ua tali mai o ia ia te ia, Aua, lo‘u tuagane e, aua le toso ia te au, auā e le faia faapea i Isaraelu; aua le faia lena mea leaga. O a‘u foi, e faapefea ona ou faate‘aina o lo‘u luma; a o oe, e tusa ma se ulavale o Isaraelu; o lenei, se‘i lua tautala ma le tupu, auā na te le taofia a‘u mai ia te oe. A e le mafai o ia ona faalogo i lana upu, na ia faamalosi ia te ia, ma na toso ia te ia, ua momoe foi ma ia.

A ua manao le tupu o Solomona i fafine ese e toatele, e faaopoopo i le afafine o Farao, o fafine o sa Moapī, ma sa Amonī, ma sa Etomā, ma sa Saitonū, ma sa Hetī; o nuu na fetalai mai ai Ieova i le fanauga a Isaraelu, Aua tou te o atu ia te i latou, aua foi ne‘i latou o mai ia te outou; auā e moni, latou te faaliliuina o outou loto e mulimuli i o latou atua. Ua matuā manao Solomona ia te i latou. Sa ia te ia ana avā o alo o alii e toafitu galau, ma ana palake e tolu galau; na faaliliueseina lava lona loto e ana avā. Auā ua toeaina Solomona ona faaliliueseina lea o lona loto e ana avā e mulimuli i atua ese; na le sao lona loto ia Ieova lona Atua, e faapei o le loto o lona tamā o Tavita. Auā na mulimuli atu Solomona ia Asaira le atua fafine o sa Saitonū, ua mulimuli foi ia Melekoma le mea leaga a sa Amoni. Ua amio leaga Solomona i luma o Ieova, ua le matuā mulimuli atu o ia ia Ieova, e pei o lona tamā o Tavita.

Sa i ai foi i le nuu o tagata faasotoma; ua latou faia e tusa ma mea e inosia uma a nuu ese na tulia e Ieova i luma o le fanauga a Isaraelu.

Ua ave ese e ia tagata faasotoma i le nuu, ma na aveesea tupua uma na faia e ona tamā.

O tagata faasotoma na totoe, o e na totoe i ona po o Asa lona tamā, na aveesea e ia ai le nuu.

Ua ia lepeti foi i fale o e faasotoma sa i tafatafa o le fale o Ieova, na lalaga ai e fafine o fale mo Asaira i lea mea.

Ua ou osia le feagaiga ma o‘u mata, se a foi le mea ou te manatu ai i se taupou?

e laveai ia te oe ai le fafine ese, o le fafine ese na te faaoleole i ana upu;; o le na te tuua le na tausi ia te ia a o teine muli; ua galo foi ia te ia le feagaiga a lona Atua.

Auā e faasisina ifo meli ai laugutu o le fafine ese; o lona gutu foi e sili ona molemole i le suāuu; a e mulimuli ane ua oona ia, e pei o le laena; e maamaai o ia, e pei o le pelu ua faatau maai ona itu.

Lo‘u atalii e, pe se a foi le mea e te fiafia ai i le fafine ese; ma e fusi le fatafata o le fafine ese?

ina ia leoleo ia te oe ai le fafine amio leaga, ai le laulaufaiva molemole o le fafine ese. Aua ne‘i naunau lou loto i lona lalelei; aua ne‘i maua oe i ona laumata. Auā e iu ina toe na o si fāsi areto ona o le fafine talitane; o le avā foi a le tasi tagata na te taumailei le ola aoga. E ave ea e se tasi le afi i lona fatafata, a e le mu ai ona ofu? Afai e savali se tagata i luga o malala ola, e le mu ai ea ona vae? E faapea foi le ua alu atu i le avā a le la te tuaoi; ai se tago ia te ia, e le faasaoina o ia.

O lē mulilua i le fafine ua leai sona mafaufau; o le na te faia lea mea, na te faaumatia e ia lona lava ola;

Ina ia leoleo ia te oe ai le fafine ese, o le fafine ese na te faaoleole i ana upu. Auā o le faamalama o lo‘u fale na ou vaavaai atu ai i le mea faamataupega; ona ou vaai atu ai lea i e faigofie; na ou iloa ua i taulelea le tasi tama, ua leai sona mafaufau; na ui ane o ia i le ala e lata ane i le fetaulaigāala e nofo ai le fafine; na ia alu ane i le ala i lona fale, i le segisegi, i le afiafi, i le tulua o po, i le pouliuli; faauta foi, na fetaiai ma ia le fafine ua ofu i le ofu o le fafine talitane, ua ia te ia foi le loto pepelo;

Na ia faasese ia te ia i le tele o ana togafiti; na ia tosina o ia i ona laugutu faaoleole. Ua mulimuli loa o ia ia te ia, e pei o le povi ua alu a fasia; e pei o le vale ua alu i le aoaiga o noanoaga; seia ati le u i lona ate; e pei ona faavave atu le manu i le mailei; na te le iloa ua saunia lea e mate ai o ia. O lenei, la fanua e, ia outou faalogo mai ia te au; ia uai mai o outou taliga i upu a lo‘u gutu; aua ne‘i afe lou loto i ona ala; aua ne‘i e sese atu i ona magāala. Auā e toatele ua lafotuina e ia ua manunua; o e malolosi lava o i latou uma e ua fasiotia e ia. O lona fale, o le ala i seoli lea, e alu ifo ai i ana o le oti.

O le amiotonu a e amio sa‘o e laveaiina ai i latou; a o e faapiopio, e maua i latou i a latou amio paaa.

O le gutu o le fafine ese, o le lua maulalo lea; o le ua matuā itagia e Ieova e paū o ia i ai.

Auā o le fafine talitane, o le lua maulalo lea; o le fafine ese, o le vaieli pu itiiti lea; o ia foi nate saunia mailei, e tusa ma le ua fao mea, na te faatoateleina foi tagata amioletonu.

O le tagata ua manao i le poto, na te faatupuina le fiafia o lona tamā; a o lē aumea ma fafine talitane, na te faaumatia oloa.

o loo faapea lava le ala o le fafine mulilua; ua ‘ai o ia, ma sōloi i lona gutu, ona faapea ane ai lea o ia, Ua ou le faia se mea leaga.

ua ou iloa foi e itiiti lava le tiga o le oti, a e tele lava ona o le fafine ua fai lona loto ma mailei ma upega, ma ona lima ma noanoaga; o le ua lelei i luma o le Atua, e sao o ia ia te ia; a o le ua agasala e maua o ia e ia.

Aue! ua avea ma talitane le aai sa faamaoni; sa tumu i le faamasinoga, sa nofo ai le amiotonu; a o ona po nei, o loo o nonofo ai o e fasioti tagata.

A o outou, ina faalatalata mai ia iinei, o outou tama a le fafine iite i ao, o le fanau a le mulilua ma le fafine talitane.

Fai mai, Afai e molia e se tagata lana avā, ma ua alu ese o ia ia te ia, a e fai ma avā a se tasi, e toe alu atu ea o ia ia te ia? E le matuā leaga ai ea lena nuu? A o oe, ua e talitane i tane e toatele, a ia e toe foi mai ia te au, ua fetalai mai ai Ieova. Ina faasaga ae ia ou mata i mauga tula, ma vaavaai, po o ifea ea se mea ua e le mulilua ai? ua e lamalama i ala mo i latou, e pei o se tagata Arapi i le vao; ua leaga ia te oe le nuu i lou talitane ma lau amio leaga. O le mea lea ua taofia ai le timu, ua leai foi ni timuga mulimuli; a ua ia te oe le muaulu o le fafine talitane, e le mafaia ona faamaina o oe.

Na fetalai mai Ieova ia te au i ona po o Iosia le tupu, Po ua e iloa ea le mea ua faia e Isaraelu, le ua liliu ese? Ua alu ia i luga o mauga maualuluga uma, ma lalo ifo o laau lauolaola uma, ma ua mulilua ai. Na ou fai atu foi ina ua uma ona ia faia o ia mea uma, Ina e toe foi mai ia ia te au; a e lei toe foi mai lava ia, o lona uso faa‘ole‘ole foi o Iuta na ia iloa atu i ai. Ona ou iloa lea, e ui lava i na mea uma na mulilua ai Isaraelu le ua liliu ese, na ou aleia ai o ia, ma ou avatu ia te ia le tusi alei, a ua le fefe lava lona uso faa‘ole‘ole o Iuta, a ua alu ia ua mulilua foi o ia.

E moni, e pei o le fafine ona amio faa‘ole‘ole i lana tane, ua faapea ona amio faa‘ole‘ole ia te au o outou, le aiga o Isaraelu e, o loo fetalai mai ai Ieova.

E faapefea ona ou faamagalo ia te oe i lenei mea? Ua tuua a‘u e lau fanau, a ua latou tauto i mea e le ni atua; na ou fafaga ia te i latou ua maoona, a ua latou mulilulua ma latou faapotopoto atu i le fale o le fafine talitane. Ua ni solofanua poa e pepeti i latou i le taeao, ua latou taitasi ma tagi i le avā a lē la te tuaoi.

Tou te gaoi ea, ma fasioti tagata, ma mulilua, ma tauto pepelo, ma faamu mea manogi ia Paala, ma mulimuli atu i atua ese ua outou le iloa;

Ua ou iloa au muliluaga, ma au tagi faasolofanua, ma le leaga o lou talitane, ma au mea faasoesa i luga o mauga i le vao. Ierusalema e, talofa ia te oe; e le faamamāina ea oe seia afea?

Ua ou iloa foi le mea e inosia i perofeta o Ierusalema; ua latou mulilulua, ma savavali ma le pepelo; ua faamalolosia foi e i latou lima o e amio leaga, ina ia le toe foi mai se tasi ai lana amio leaga; ua avea i latou uma ia te au e pei o Sotoma, ma e o nonofo ai e pei o Komoro.

auā na la fai le mea leaga i Isaraelu, ma la mulilulua ma avā a ē sa latou tuaoi, ma la fai upu i lo‘u igoa i le pepelo, na ou le poloai atu ai ia te i laua; ua ou iloa ma molimau ai, o loo fetalai mai ai Ieova.

Ua latou fetoso fafine i Siona, o taupou foi i aai o Iuta.

A e peitai na e faatuatua i lou lalelei, ma e mulilua ona o lou logo, ma sasaa atu au muliluaga ia te i latou uma na ui ane; na fai ia mo i latou. Na e avea foi ni ou ofu ma teteuina ai au mea maualuluga lanu eseese, ma e talitane ai; e lei oo mea faapea, i le e le faia lava. Ua e avea foi au mea matagofie na fai i a‘u auro, ma a‘u ario na ou avatu ia te oe, ma ua e faia faatusa o tane ma oe, ma talitane ia i latou.

Ua e avea foi au tama tane, ma au tama teine na e fanau mai ia te au, ma ua e fai i latou ma taulaga ia te i latou ina ia faaumatia ai. O le mea māmā ea lea i lou talitane, ina ua e fasioti i la‘u fanau; ma ua e tuuina atu i latou ia faaui ane i latou i le afi mo i latou? O au mea e inosia uma ma lou talitane uma, na e le manatua ona aso a o te teine itiiti, ina ua le ufitia ai oe, ma ua le lavalavā, ma ua taatia i lou toto.

Ua e fai au mea maualuluga i tuluiga o ala uma, ua e faainosia lou lalelei, ua talia foi i latou uma na ui ane ai, ma ua e faateleina lava lou talitane. Ua e mulilua i tagata Aikupito ua outou tuaoi, o e tino latetele, ma ua faateleina lou talitane e faaonoono mai ai ia te au. Faauta foi, ua ou faaloaloa atu lo‘u lima i luga ia te oe, ma ua ou faaitiitia au mea e ‘ai e tatau mā oe, ua ou tuuina atu foi oe i le pule a e ua ‘ino‘ino ia te oe, o afafine ia o Filisitia o e ua mamā i au amio ulavale. Ua e talitane foi i tagata Asuria ina ua e le mălie lava, ua e talitane lava ia te i latou, a e te le āu mălie lava. Ua e faateleina foi lou talitane i le nuu o Kanana ua oo i Kaletaia, a ua e le mălie ai lava.

Ua faapea ona vaivai o lou loto! o loo fetalai mai ai le Alii o Ieova, ina ua e faia o ia mea uma, o mea lava ua fai e le fafine talitane ma le faamatāitu; ina ua e fai lou fale taā i tuluiga o ala uma, ma ua e fai au mea maualuluga i malae uma, mona ua e le faapei o se talitane le ua tetee i le totogi; a e pei o le avā ua mulilua, o lē talia tane ese a e tuu lana lava tane. E avatua totogi i fafine talitane uma, a o oe ua e foai atu au totogi ia te i latou uma o e mananao ia te oe, ma ua e taui ia te i latou ia latou o ane ia te oe mai itu uma ona o au muliluaga. Ua ese lava oe i nisi fafine i lou talitane, ina ua leai se mulimuli atu ia te oe e faitaaga ai; ma ua e avatu se totogi, a e leai se totogi e avane ia te oe; o le mea lea ua ese ai oe.

O le mea lea, le fafine talitane e, ia e faalogo mai ai i le afioga a Ieova. O loo faapea ona fetalai mai o le Alii o Ieova; ua e sasaa atu au tupe, ma ua faaalia lou tino i lou talitane ua fai ma ē ua e manao i ai, atoa ma au tupua uma e inosia, ma le toto o au fanau, na e avatu ia te i latou; faauta, o le mea lea ou te faapotopotoina ai i latou uma ua e manao i ai, o i latou ua e fiafia i ai, ma i latou uma ua e naunau i ai, atoa ma i latou uma ua e ‘ino‘ino i ai; ou te faapotopotoina lava i latou ia te oe mai itu uma ia leaga ai oe, ma ou faaalia ia te i latou lou tino, ina ia latou iloa lou tino uma. Ou te faasala foi ia te oe, e pei ona faasalaina o fafine mulilulua, ma e ua faamaligi toto, ma ou avatu ia te oe le toto i le ita tele ma le fuā.

Latou te susunu foi ou fale i le afi, latou te faasalaina foi oe i luma o fafine e toatele; ou te faagataina lou talitane, e te le toe avatu lava se totogi. Ou te faaiuina ai lo‘u ita tele ia te oe, ona mavae ai lea o lo‘u fuā ia te oe; ona ou filemu ai lea, ma ou le toe ita lava. Ua e le manatua aso ina o e teine itiiti, a ua e faaonoono mai ia te au i ia mea uma; faauta, o le mea lea ou te taui atu ai lau amio i luga o lou ulu o loo fetalai mai ai le Alii o Ieova, e le toe fai lea mea leaga e faaopoopo i au mea uma e inosia.

O ia te oe tagata e feaveaveai ia faamaligi ai le toto; o ia te oe foi o e aai i luga o mauga; o ia te oe o e fai mea leaga lava. O ia te oe foi ē faatelenoa i o latou tamā; o ia te oe ē faaleaga le fafine o faanofoeseina ona o lona leaga. Ua fai foi e le tasi mea e inosia i le avā a le tasi tagata; ma ua faaleaga e le tasi i le ulavale le avā a lona lava atalii; ua ia te oe foi le ua ia faaleagaina iona lava tuafafine, o le afafine o lona tamā.

Ua oo mai foi le afioga a Ieova ia te au, ua faapea mai, Le atalii e o le tagata, o fafine e toalua, o tama a le fafine e toatasi, na la talitane i Aikupito; na la talitane a o teine muli i laua; na omia ai o laua susu; na tatao ai susu o laua o taupou. O la igoa foi, o Aola le matua, ma Aolipa lona uso; na fai foi i laua ma‘u, na la fananau foi tama tane ma tama teine. A o laua igoa, o Aola o Samaria lea, o Aolipa o Ierusalema lea. Na mulilua Aola ina o fai ma‘u; na ia tu‘inanau atu foi i e na mananao ia te ia, o Asuria o e vāvā lalata ma ia. Ua oofu i latou i ofu uli, o ta‘ita‘i, ma faipule, o taulelea aulelei i latou uma, o ‘au o tietie i solofanua. Na ia talitane ia i latou, o i latou uma o aupito sili i tagata o Asuria, ma i latou uma na ia tu‘inanau i ai; na faaleagaina o ia e ia i a latou tupua uma. Na ia le tuua lona talitane mai Aikupito; auā na latou momoe ma ia ina o teine muli, na latou tatao foi ona susu o taupou o ia, ma sasaa a latou faitaaga i luga ia te ia. O le mea lea na ou tuuina atu ai o ia i lima o e na mananao ia te ia, o lima lava o tagata o Asuria, na ia tu‘inanau i ai. O i latou ua latou faatelenoa ia te ia; na latou ave foi ana tama tane ma ana tama teine; na latou fasioti foi ia te ia i le pelu, ona logologoa lea o ia i fafine ina ua latou faasalaina o ia. Ua iloa e lona uso o Aolipa, ona faasili lea e ia o lona tu‘inanau i le tu‘inanau o lona uso, ma lona talitane na sili i le talitane o lona uso. Na ia tu‘inanau i tagata o Asuria, o e vava lalata ma ia, o ta‘ita‘i ma faipule o loo oofu faamatagofie lava, o ‘au o tietie i solofanua, o taulelea ‘aulelei i latou uma. Ona ou iloa lea ua leaga o ia, ua tasi lava lo laua ala. Ua faateleina e ia lona talitane; auā na ia iloa tane na tusia i le pa, o faatagata foi o Kaletaia, ua tusia i le vali mūmū, ua fusia o latou sulugatiti i fusi, ua i o latou ulu o pulou lanu eseese, e tino mai i alii ta‘ita‘i ‘au i latou uma, e pei o tagata Papelonia o Kaletaia ia, o le nuu na fanau ai i latou. Ua ia vaai atu i ai, ona ia tu‘inanau atu ai lea ia te i latou; na ia aauina atu foi auauna ia te i latou i Kaletaia. Ona o mai ai lea o tagata o Papelonia ia te ia i le moega e faatasi ai, ona latou faaleaga lea ia te ia i a latou faitaaga, ona leaga ai lea o ia ia te i latou, ona liliu ese ai lea o lona loto ia te i latou. Na ia faaalia lona talitane, na ia faaalia foi lona le lavalavā; ona liliu ese ai lea o lo‘u loto ia te ia, e pei ona liliu ese o lo‘u loto i lona uso. A ua ia faateleina lona talitane i lona manatu i ona po ina o teine muli o ia, na ia talitane ai i le nuu o Aikupito. Auā na ia tu‘inanau atu ia latou momoe ma ia, o latou tino e pei o le tino o le asini, ma le sua o latou tino e pei o le sua o le tino o le solofanua. Ua e toe manatua mea leaga na e faia ina o e teine muli, ina ua omia ou susu e tagata o Aikupito ona o ou susu ina o e teine muli.

Ou te faaiuina lou leaga ma lou talitane mai le nuu o Aikupito; ona e le toe faasaga ae lea o ou mata ia te i latou, ma ē le toe manatua lava Aikupito. Auā o loo faapea ona fetalai mai o le Alii o Ieova, Faauta, ou te tuuina atu oe i lima o e ua e ‘ino‘ino i ai, o lima o e ua liliu ese ai lou loto. Latou te ‘ino‘ino lava ia te oe, latou te ave foi au mea uma sa e tautiga ai, latou te tuua oe e le ufiufitia ma le le lavalavā; e faaalia foi le leaga o lou talitane, o lou ulavale atoa ma au faitaaga. Ou te faia ia mea ia te oe, auā ua e mulimuli atu i nuu ese e faitaaga ai, o i latou ia ua leaga ai oe i a latou tupua.

O le mea lea o loo faapea ona fetalai mai ai o le Alii o Ieova, Ua e faagalogalo mai ia te au, ma ua e lafoaiina a‘u i ou tua, o le mea lea ia taui ai ia te oe o lou ulavale, ma au faitaaga. Ua fetalai mai foi Ieova ia te au, Le atalii e o le tagata, e te le faamasino ea ia Aola ma Aolipa, ma e faaali ia te i laua mea e inosia? Auā ua la mulilulua, ua i ai foi le toto i o laua lima; ua la mulilulua i a la tupua; o a laua fanau foi na la fanau mai ai ia te au, ua la faaui ane i le afi, ia faaumatia ai mo i latou. Ua la faia foi lenei mea ia te au; ua la faaleagaina lo‘u malumalu i lea lava aso, ma o‘u sapati ua la solia; ua la fasia a laua fanau mo tupua, ona o mai ai lea o i laua i lo‘u malumalu i lea lava aso e soli ai; faauta foi, na faapea ona la faia i totonu o lo‘u fale.

I le ma lea foi, ua oulua feauina tane ia o mai i le mea mamao, na auina atu ia te i latou le auauna, faauta foi, na latou o mai; na e taele ona o i latou, ma e valia ou mata, ma e teuteu i mea e faamatagofie a‘i. Na e nofo foi i luga o le moega lalelei, ua saunia le laulau i ona luma, na e faaeeina i ona luga a‘u mea manogi, ma a‘u suāuu. Na ia te ia foi le leo o le vao tagata ua nonofo faatalanoa; na aumaia foi ia te ia e faatasi ma tagata lautele, o tagata Sepea mai le vao, sa i ai taulima i o latou lima, ma pale matagofie i o latou ulu. Ona ou fai atu ai lea ia te ia le ua loa ona fai pea o muliluaga, Latou te faitaaga lava ea ma ia, o ia foi ma i latou? A ua latou o ane lava ia te ia, e pei ona latou o ane i le fafine talitane, na faapea ona latou o ane ia Aola ma Aolipa, o fafine ulavavale. O tagata amiotonu latou te faamasino ia te i laua, e pei ona faamasino o fafine mulilulua, e pei ona faamasino foi o fafine e faamaligi toto; auā o fafine mulilulua i laua, ua i ai foi le toto i o laua lima.

Ona ou faagataina lea o le ulavale i le nuu, ina ia a‘oa‘o ai fafine uma ia le toe fai e pei o lo oulua ulavale. Latou te taui atu lava lo oulua ulavale ia te oulua, e taui foi ia te oulua le agasala i a oulua tupua; ona oulua iloa ai lea o a‘u lava o le Alii o Ieova.

O le amataga o le afioga a Ieova ia Hosea. Ua fetalai mai Ieova ia Hosea, Alu ia oe, ia e fai avā i le fafine talitane, ma ia fai māu le fanau a le faitaaga, auā ua matuā faitaaga lava le nuu, ua o ese ia Ieova.

ne‘i ou talaeseina ona ofu, ma tuu atu ia te ia pei ona i ai i le aso na fanau mai ai o ia, e avea foi o ia pei o se vao, ma avea foi pei o se nuu naumati, ma ou faaumatia o ia i le fia inu. Ou te le alofa atu i lana fanau, auā o le fanau a le faitaaga i latou. Auā ua faitaaga lo latou tinā, ua agavale lava le na fanaua i latou; auā na ia faapea mai, Ou te mulimuli atu i e o mananao ia te au, o e o au mai a‘u mea e a‘i, ma o‘u vai, ma a‘u fulufulu mamoe, ma a‘u lino, ma a‘u suāuu, ma a‘u mea e inu.

O loo o tauto, ma tala pepelo, ma fasioti tagata, ma gaoi, ma mulilua, ua latou faasaua lava, ua fepaia‘i toto.

O lo‘u nuu ua latou fesili i lo latou laau; ua faasino mai ai lo latou tootoo ia te i latou; auā o le fia faitaaga ua faaseseina ai i latou, ma ua latou o ese nai lo latou Atua e faitaaga ai. Ua latou faitaulaga i tumutumu o mauga, ma faamu mea manogi i mea maupuepue, ma lalo ifo o aluna, ma lipeno, ma tapeneto, auā ua lelei lo latou paolo; o le mea lea e faitaaga ai o outou afafine, e mulilulua foi a outou avā. Ou te le faasalaina o outou afafine pe a latou faitaaga, ma a outou avā pe a latou mulilulua; auā o i latou lava ua latou o ese faatasi ma fafine faitaaga, ua latou faitaulaga faatasi ma fafine talitane; o le nuu foi ua le mafaufau e pauu i latou.

O a‘u ua ou iloa Efaraima, o Isaraelu foi ua le lilo lava ia ia te au; auā, Efaraima e, ua e faitaaga nei, ua leaga Isaraelu. Latou te le sauniuni a latou galuega ina ia latou liliu mai i lo latou Atua; auā o i totonu ia te i latou le fia faitaaga, latou te le iloa Ieova.

Isaraelu e, aua e te fiafia ma le olioli, faapei o isi nuu; auā ua e alu ese i lou Atua e faitaaga ai; ua e fia fai taui i mea uma e sasa ai saito.

Ua latou fai le vili e maua ai lo‘u nuu; ua latou tuuina atu se tama e fai ma tau o se fafine talitane, ua avatu foi se teine ma tau o uaina latou te feinu ai.

Ona o le tele o le talitane o le fafine talitane o le ua lalelei, o le tamaitai taulāitu, o le ua faatau atu nuu i lona talitane atoa ma aiga o ana togafiti faataulāitu.

A ua outou fai mai, Aisea foi? Auā o Ieova, o ia ua fai ma molimau ia te oe ma lau avā sa e fai a o ē taulealea, o le ua e faa‘ole‘ole i ai; a o ia sa lua mafuta, o le avā foi o ia o lau feagaiga. Na ia le faia ea le toatasi? A ua ia te ia foi ona toe o le agaga. Se a foi ua toatasi ai? Ina ia saili le fanau amio Atua; o lenei, ia faaeteete outou i o outou loto, ina ne‘i faa‘ole‘ole se tasi i lana avā na fai a o taulealea. Auā ou te ‘ino‘ino i le alei, ua fetalai mai ai Ieova le Atua o Isaraelu; auā ua ufiufi e ia lona ofu i le faasaua, ua fetalai mai ai Ieova o ‘au; o le mea lea ia outou faaeteete ai i o outou loto, a e aua tou te faa‘ole‘ole.

Ou te faalatalata foi ia te outou i le faamasinoga; e vave foi ona fai o a‘u ma molimau i e fai togafiti faataulāitu, ma ē mulilulua, ma ē tauto pepelo, ma ē faasaua i le taui o le auauna tauia, o le fafine ua oti lana tane, ma le ua mātuaoti, atoa ma ē faapioina le faamasinoga o le tagata ese; ua latou le matatau foi ia te au, ua fetalai mai ai Ieova o ‘au.

Ua outou faalogo, na fai mai i e anamua, Aua e te mulilua. A ou te fai atu a‘u ia te outou, ai se vaai atu i le fafine ina ia manao i ai, ua uma ona mulilua ma ia i lona loto.

A ou te fai atu a‘u ia te outou, ai se faatea lana avā, a e lei mulilua ia, ua ia faamulilua ia te ia; ai se fai mana avā le ua faateaina, ua mulilua foi o ia.

Auā e alu ae mai le loto o le manatu leaga, o le fasioti tagata, ole mulilua, o le faitaaga, o le gaoi, o le molimau pepelo, ma le upu leaga.

Ou te fai atu foi ia te outou, Ai se faatea i lana avā, a o lei mulilua ia, ma fai avā i se tasi, ua mulilua ia; o se fai avā i le na faate‘aina, ua mulilua foi lea.

Ia outou mataala ma tatalo, ina ne‘i oo mai le faaosoosoga ia te outou; ua manao i ai le loto, a o le tino ua vaivai.

Auā e alu ae mai le loto o le tagata o le manatu leaga, o le mulilua, o le faitaaga, o le fasioti tagata, o le gaoi, o le manumanu, o le amio leaga, o le pepelo, o le matāitu, o le mataua, o upu leaga, o le faamaualuga, o le le mafaufau. O ia mea leaga uma e sau mai totonu, ma leaga ai le tagata.

Ona fetalai atu ai lea o ia ia te i latou, Ai sē faatea i lana avā, a e fai avā i le tasi, ua mulilua o ia e agaleaga atu ai ia te ia. Afai foi e faatea e le fafine lana tane, a e fai ma avā a se tasi, ua mulilua o ia.

Ua e iloa tulafono, Aua e te mulilua; aua e te fasioti tagata; aua e te gaoi; aua e te molimau pepelo; aua e te agaleaga; ia e ava i lou tamā ma lou tinā.

O sē faatea i lana avā, a e fai avā i se tasi, o le mulilua lea; o sē fai avā i le ua faateaina e lana tane, o le mulilua foi lea.

Ua e iloa poloaiga, Aua e te mulilua; aua e te fasioti; aua e te gaoi; aua e te molimau pepelo; ia e ava i lou tamā ma lou tinā.

Ua ta‘ita‘iina mai e le au tusiupu ma le au faresaio le fafine na maua ina o mulilua; ua tuuina o ia e i latou i totonu; ua faapea mai i latou ia te ia, Le a‘oa‘o e, na maua lenei fafine ina o mulilua ua mautinoa lava. Ua poloai Mose ia te i tatou i le tulafono ia fetogi i maa o e faapea; a o oe, pe se a se mea e te fetalai mai i ai? Ua latou faapea mai e tofotofo ia te ia, ina ia maua e i latou se mea e molia ai o ia; a ua punou Iesu, ma tusi i lona tamatamai lima i le eleele. A ua latou fesili atu pea lava ia te ia; ona toe nofo lea o ia i luga, ma faapea atu ia te i latou, O so outou e leai sana agasala, ia lua‘i togi se maa ia te ia. Ona toe punou lea o ia, ma tusi i le eleele. Ua latou faalogo i ai, ua iloa a latou agasala i o latou loto fuatia ifo; ona taitoatasi lea o i latou ma alu i fafo, e afua mai i toeaina, ua oo atu i e aupito iti. Ua tuua na o Iesu lava, ma le fafine o loo tu i totonu. Ua toe nofo i luga Iesu, ua silafia ua leai se tagata, ua na o le fafine lava, ona fetalai atu lea o ia ia te ia, Funa e, o ifea ea i latou e na molia oe? ua le faasala mai ea se tasi ia te oe? Ua fai mai o ia, Le Alii e, e leai lava se tasi. Ona fetalai atu lea o Iesu ia te ia, Ou te le faasala foi ia te oe; alu ia oe, aua e te toe agasala.

a ia tusi atu ia te i latou, ia taumamao i latou i mea leaga e fasia mo tupua, ma le faitaaga, ma mea titina, ma le toto.

ia faamamao outou i mea e fasia mo tupua, ma le toto, ma mea titina, ma le faitaaga; afai tou te taumamao ma nei mea, e lelei ai outou. Ia outou manuia.

A e peitai o nuu ese e ua faatuatua, ua matou tusi i ai ua pule atu, aua le anaana i latou i se mea faapea, tau lava ona ia mamao i latou i taulaga i tupua, ma le toto, ma mea ua titina, ma le faitaaga.

O lea foi na tuuina atu ai i latou e le Atua i le amio leaga, i le tu‘inanau o latou loto, latou te fefaaleagaina ai o latou lava tino; o i latou ia o e ua fesuiai le upu moni i le Atua ma le upu pepelo; ua latou matatau foi ma auauna i mea na faia, a ua tuua o ia na na faia, o ia o lē viia e faavavau. Amene. O le mea lea na tuuina atu ai i latou e le Atua i manao e masiasi ai; auā o latou fafine foi, ua latou fesuiai le tu tatau ma le tu e le tatau; e faapea foi tane, ua tuua e i latou le tu e tatau i le fafine, ina ua mu i lo latou femanaoai; o tane ua fefaiai i latou i mea e masiasi ai; ua tauia foi i latou i o latou lava tino e tusa ma lo latou sese.

Ua latou le loto foi e taofi i le mataupu i le Atua, o lea ua tuuina atu ai i latou e le Atua i le loto leaga, latou te fai ai mea e le tusa; o loo tutumu i latou i amio leaga uma lava, o le faitaaga, o le amio ulavale, o le manumanu, o le loto leaga; o loo tumu saisai i le mataua, o le fasioti tagata, o le misa, o le ‘ole‘olega, ma le faatāutala;

o i latou ia ua iloa le tonu mai le Atua, e tatau ai ona oti o e fai mea faapena, e le gata ona latou faia o ia mea, a e fiafia lava i latou i e ua faia.

O lenei, aua ne‘i malo le agasala i o outou tino auga vale, i lo outou gauai i ai i ona tu‘inanau; aua foi ne‘i tuuina atu o outou tino i le agasala e fai ma auupega a le amio leaga; a ia outou tuuina atu outou i le Atua, e pei o e ua ola nai e ua oti, ma ia tuuina atu outou tino i le Atua e fai ma auupega a le amiotonu.

O upu a tagata ou te fai atu ai nei, ona o le vaivai o outou tino; auā faapei ona outou tuuina atu o outou tino e fai ma auauna a le amio leaga ma le ulavale, e ulavale ai; ia faapea foi ona tuuina atu nei o outou tino e fai ma auauna a le amiotonu, e iu i le faapaiaina.

O lenei foi, afai e nofo tane o ia i se tasi, a o ola lana tane, e ta‘ua ia o le mulilua; peitai ane, afai ua oti lana tane, ona tuusaunoa lea o ia i le tulafono; i le, a nofo o ia i se tasi tane e le mulilua ai o ia. E faapea foi outou o‘u uso e, ua oti outou i la le tulafono, i le tino o Keriso; ina ia outou nonofo i le tasi, o le na toe tu mai nai e ua oti, ina ia fua mai ai i tatou ni fua i le Atua. Auā ua galulue manao leaga talu le tulafono, i o tatou tino, ina o i la le tino i tatou, e fua mai ai ni fua e oti ai;

A ua ou iloa le tulafono ese i o‘u tino, o loo tau le taua i le tulafono a lo‘u mafaufau, ua fai foi a‘u ma tagata o taua i le tulafono a le agasala o loo i o‘u tino.

O lenei, ua leai se faasala i e o ia Keriso Iesu, o e le savavali i la le tino, a e i la le Agaga; auā o le tulafono a le Agaga o le ola ua ia Keriso Iesu ua tuusaunoa mai lea ia te au nai le tulafono a le agasala ma le oti. Auā o le mea na le mafaia i le tulafono, ina ua vaivai ia ona o le tino, ua faia lea e le Atua i lona auina mai o lona lava Alo, ua tino tagata agasala, o le taulaga foi mo agasala, na ia faasalaina ai le agasala i le tino; ina ia atoatoa ai le amiotonu i la le tulafono ia i tatou, o e le savavali i la le tino, a e i la le Agaga. Auā o e i la le tino e loto atu i latou i mea a le tino; a o e i la le Agaga e loto atu i mea a le Agaga. Auā o le loto i la le tino o le oti lea; a o le loto i la le Agaga o le ola lea ma le manuia; auā o le loto i la le tino o le ita lea i le Atua; auā e le usiusi tai i le tulafono a le Atua, e le mafai foi i ai. O i latou foi o i la le tino, e le mafai ona fiafia i ai le Atua.

O lenei, le au uso e, ua ia te i tatou e taui atu, a e le o le tino, tatou te amio ai i la le tino; auā afai tou te amio i la le tino, e oti ai outou; a e afai e fasiotia e outou amioga a le tino e le Agaga, tou te ola ai.

O lenei, le au uso e, ou te aioi atu ia te outou, ona o le alofa mutimuti vale o le Atua, ia outou tuuina atu o outou tino i le Atua, o le taulaga ola, ma le paia, ma le mālie, o le mea lea e tatau ai ona outou faia.

Auā o upu ia, Aua le mulilua, Aua le fasioti tagata, Aua le gaoi, aua le molimau pepelo, Aua le tu‘inanau; afai foi ua toe se isi poloaiga, o loo ua aofia lava i lenei upu, Ia e alofa atu i lē lua te tuaoi, ia pei o oe lava ia te oe.

Ia tatou savavali ma le matagofie e tusa i le ao; aua le poula ma le onā, aua le faitaaga ma le matāitu, aua le femisai ma le mataua. A ia outou oofu i le Alii o Iesu Keriso; aua foi le sauniuni mo le tino, e oo ai ona tu‘inanau.

Ua salalau le tala o ia te outou le faitaaga, o le faitaaga faapea foi e le o ta‘ua i nuu ese, ina ua fai avā le tasi i le avā a lona tamā.

Ua ou tusi atu ia te outou i la‘u tusi, aua tou te feoai ma e faitaaga. A e le matuā faapea foi i e faitaaga i lenei lalolagi, atoa ma e matapeapea, ma e fao mea, ma e ifo i tupua; ana faapea, e ao ina outou o ese atu i le lalolagi. A o lenei, ua ou tusi atu ia te outou, ai se tasi ua ta‘uusoina a e faitaaga, pe matapeapea, pe ifo i tupua, pe agatele, pe onā, pe fao mea; aua lava ne‘i tou feoai, aua foi tou te aai faatasi ma le o faapea. Auā o ia te au ea ona faamasino i e ua i tua? Tou te le faamasino ea i e ua i loto pa? A o e i tua, e faamasinoina i latou e le Atua. O lenei, ia faateaeseina e outou lena tagata amio leaga ia te outou.

Tou te le iloa ea, o e amio leaga e le fai mo latou tofi le malo o le Atua? Aua ne‘i faaseseina outou; o e faitaaga, ma e ifo i tupua, ma e mulilulua, ma e tauātane, ma e faasotoma, ma e gaoi, ma e matapeapea, ma e onā, ma e agatele, ma e fao mea, e le fai mo latou tofi le malo o le Atua. Sa faapea foi nisi o outou; a ua taeele outou, a ua faapaiaina outou, a ua ta‘uamiotonuina outou i le suafa o le Alii o Iesu, i le Agaga foi o lo tatou Atua.

E tatau mea e ‘ai i le manava, e tatau foi le manava i mea e ‘ai; a e faatau faaumatia e le Atua o lena atoa ma ia mea. A e le tatau le tino i le faitaaga, a e tatau i le Alii; e tatau foi le Alii i le tino.

Tou te le iloa ea, o outou tino o itu tino o Keriso ia? O lenei, ou te ave ea itu tino o Keriso a e faia ma itu tino o le fafine talitane? Aua ne‘i faapea. Tou te le iloa ea, ua tino e tasi le ua faatasia ma le fafine talitane? auā o loo faapea mai, E avea i laua m tino e tasi. A e peitai ua agaga e tasi le ua faatasia ma le Alii. Ina sosola ese ia outou i le faitaaga. Ua auliuligia le tino i agasala uma e faia e tagata; a o lē faitaaga, e agasala ia i lona lava tino.

A o mea na outou tusi mai ai, e lelei ona le tago se tagata i se fafine; a ona o le faitaaga, ia taitasi le tane ma lana lava avā, ia taitasi foi le fafine ma lana lava tane. Ia avatu le tane i le avā le agalelei e tatau ai, ia faapea foi le avā i le tane. E le pule le avā i lona lava tino, na o le tane; e faapea foi le tane, e le pule ia i lona lava tino, na o le avā. Aua ne‘i faafiti le tasi i le tasi, seia iloga lava lua te loto gatasi ai i nai aso, ina ia oulua faasaga i le anapogi ma le tatalo; ma ia toe faatasi ane i le mea e tasi, ina ne‘i faaosooso mai Satani ia te oulua, ona o lo oulua le lava onosai.

Peitai afai latou te le lavā oono, ia fai avā nofotane i latou, auā e lelei ona fai avā, a e leaga ona mu.

Afai foi e manatu se tasi ua faaleono lana amio i lona afafine taupou, afai ua matua lava ia, ma ona ua tatau ona ia faapea, ina fai ia e ia le mea e loto i ai, e le agasala ia; ia nofo o ia i lana tane.

Aua foi tatou te faitaaga, pei ona faitaaga o isi o i latou, ma fano ai i le aso e tasi e lua sefulu o afe ma afe e tolu.

O lenei, o lē manatu o loo o tu ia, ina faaeteete ia ne‘i paū. Ua le maua outou e se tofotofoga e ese i lo tagata; a ua faamaoni le Atua, o le na te le tuuina atu outou i le tofotofoga e sili i se mea ua outou lavatia, a e sauni foi faatasi ma le tofotofoga se mea e sao ai, ina ia outou lavā oono.

Auā tatou te tutū atu uma lava i luma o le nofoa faamasino o Keriso e tatau ai; ina ia taitasi ma talitali i mea na faia i le tino, e pei o mea na faia, pe lelei pe leaga.

O lenei, le au pele e, ona ua ia te i tatou o ia upu ua folafolaina mai, ia tatou faamamā ia te i tatou i mea uma e leaga ai le tino atoa ma le agaga, ia faaatoatoina lo outou faapaiaina i le mata‘u i le Atua.

ina ne‘i faamaualaloina a‘u e lo‘u Atua ona o outou, i lo‘u toe alu atu ia te outou; ona ou faanoanoa lea i nisi e toatele o e na agasala anamua, ma ua le salamo i le amio leaga, ma le faitaaga, ma le matāitu na latou faia.

Ou te fai atu, ia outou savavali i la le Agaga, ona le faia lea e outou o le tu‘inanau o le tino. Auā o le tino ua tu‘inanau lea e tetee atu i le Agaga, ua tu‘inanau foi le Agaga e tetee atu i le tino; ua feteenai foi ia mea, o le mea lea tou te le fai ai mea tou te loto i ai. A e afai e ta‘ita‘iina outou e le Agaga, ua le nonofo outou i le tulafono. Ua iloa tino foi galuega a le tino, o mea faapenei; o le mulilua, o le faitaaga, o le amio leaga, o le matāitu, o le ifo i tupua, o le fai togafiti faataulāitu, o le feitagai, o le femisai, o le losilosi vale, o le lotoa, o le finau vale, o le fevaevaeaiga, o maseiga, o le mataua, o le fasioti tagata, o le onaga, o le poula, ma mea faapena; ou te muai ta‘u atu nei ia te outou, pei ona ou fai atu anamua, o e faia mea faapena, e le fai le malo o le Atua mo latou tofi.

A o e o ia Keriso, ua faasatauroina e i latou le tino, ma ona manao, ma ona tu‘inanau.

Aua ne‘i faaseseina outou, e le ulagia le Atua auā o le mea e luluina e le tagata, o le mea lava lea e seleseleina mai ai e ia; o sē lulu i la lona tino, e selesele mai ai e ia i la le tino le mea e pala; a o sē lulu i la le Agaga, e selesele mai ai e ia i la le Agaga le ola faavavau.

o i tatou foi, na amio faatasi i tatou uma lava ma i latou anamua, ina ua tatou nonofo i tu‘inanau o tatou tino, na faia foi e i tatou o mea na loto i ai le tino atoa ma le mafaufau, na fanau mai foi i tatou o le fanauga a le toasa, faapei o isi atoa foi.

ua latou le lagona se mea, ua tuuina atu i latou ia i latou i le matāitu e fai mea leaga uma lava ma le tu‘inanau i ai.

a o le faitaaga, ma mea leaga uma, ma le manumanu, aua ne‘i ta‘ua lava ia te outou, e pei ona tatau i e ua paia. O le anovale foi, ma upu faatauvaa, ma le faaulaula, o mea ia e le tatau; a o le faafetai e lelei lava lea. Auā ua outou iloa lenei mea, ai sē faitaaga, po o sē fai mea leaga, po o sē manumanu, (o le ifo i tupua lava lea,) e le maua e i latou se tofi i le malo o Keriso, o le Atua lea.

O lenei, ia outou fasiotia o outou itu tino o i le lalolagi, o le faitaaga, o le amio leaga, o le faamatāitu, o le tu‘inanau leaga, ma le matapeapea, (o le ifo i tupua lava lea);

O le finagalo foi lenei o le Atua, ia faapaiaina outou, ina ia faamamao outou ma le faitaaga; ia taitasi outou ma iloa ona fai o lana lava ipu ma le faapaiaina ma le ta‘uleleia, aua ma le tu‘inanau o le manao, faapei o nuu ese ua le iloa le Atua.

Auā e lei valaauina i tatou e le Atua ia amio leaga, a ia faapaiaina lava. O lenei, o lē faaleaoga mai, ua ia le faaleaoga i tagata, a o le Atua le ua foai mai lona Agaga Paia ia te i matou.

o loo iloa lenei mea, ua le faatuina mai le tulafono mo le ua amiotonu, a o e faaletaupulea ma e soli i tulafono, o e faalematau ma e agasala, o e amio leaga ma e ulavavale, o e fasi tamā ma e fasi tinā, o e fasioti tagata, o e faitaaga, o e faasotoma, o e gaoi tagata, o e tala pepelo, o e tauto pepelo; afai foi o i ai se toe mea e faatu‘iese ai i le mataupu e ola ai,

Ia e sola ese i tu‘inanau o taulelea, ia e tausisi i le amiotonu, ma le faatuatua, ma le alofa, atoa ma le filemu, faatasi ma i latou o e valaau i le Alii ai le loto mamā.

auā e avea tagata ma e alolofa i latou ia i latou, o e mananao i tupe, o e loto vii, o e faamaualuga, o e upu leaga, o e le faalogo i mātua, o e le faafetai, o e amio leaga, o e le lotoaiga, o e tuumavaega, o e faatuaupua, o e le taofi manao o le tino, o e faasaua, o e le alolofa i tagata amio lelei, o e faalata, o e soona fai, o e ua faafefeteina, o e ua tele le manao i mea faafiafia a e leai se manao i le Atua; o e ua peiseai ua amio Atua, a o le mana ua i lea mea ua latou teena; ia e ‘alo ese lava i tagata faapena. E i ai foi nisi o e ulu atu i fale, ma ave faatagataotaua fafine valelea, ua mafatia i agasala, o e ua ta‘ita‘ieseina e tu‘inanau eseese,

o loo a‘oa‘o mai ai ia te i tatou, ia tatou tete‘a ese ma le faalematau atoa ma tu‘inanau faalelalolagi, a ia tatou nonofo ma le faautauta ma le amiotonu atoa ma le amio Atua i lenei olaga;

ne‘i ai se faitaaga, po o se faatalale i mea paia, pei o Esau, o le na avatu lona tofi o le ulumatua e faatau a‘i le ‘ai e tasi.

Ia lelei le faiavā i tagata uma, o le moega foi ia leai sona leaga; e faasalaina e le Atua o e faitaaga ma e mulilulua.

Amuia le tagata o lē onosai i le faaosoosoga; auā a uma ona tofotofoina e maua e ia le pale o le ola, ua folafolaina mai e le Alii i e alolofa atu ia te ia. A faaosoosoina se tasi, aua le faapea, Ua faaosoosoina a‘u mai le Atua; auā e le mafai ona faaosoosoina o le Atua i mea leaga, e le faaosooso atu foi o ia i se tasi; a ua taitasi ma faaosoosoina, pe a tosina ma maileia i lona lava tu‘inanau; pe a to le tu‘inanau ona fanau mai ai lea o le agasala; a matua le agasala ona fanaua mai ai lea o le oti.

ua outou ole atu, a e lei maua, auā ua ole atu ma le faaletatau, ina ia faauma ai ia mea i o outou manao leaga. O outou tane mulilulua e, ma fafine mulilulua e, tou te le iloa ea o le fefaauoai ma le lalolagi o le ita lea i le Atua? O lenei, o sē fia uo ma le lalolagi, ua avea o ia ma ita i le Atua.

Ia pei o fanau gauai, aua ne‘i faatusaina outou e outou i o outou tu‘inanau tuai, a o vālea outou;

Le au pele e, ou te aioi atu ia te outou o tagata ese ma e āumau, ia mamao outou ma tu‘inanau o le tino, o mea ia e tau ma le agaga.

O lenei, ua tigaina Keriso i le tino o le sui o i tatou, ia fai ai ma auupega ia te outou foi lea lava loto, auā o le ua tiga i le tino, ua tuu e ia le agasala; ina ia le toe usiusitai o ia i tu‘inanau o tagata, i ona tausaga ua totoe i le tino, a ia usiusitai i le finagalo o le Atua. Auā ia gata ia i aso ua mavae o le olaga nei ona fai ai e i tatou o le manao o e faapaupau, sa savavali i le faamatāitu ma tu‘inanau, ma le inu tele i uaina, ma poula, ma inugāava, ma le ifo i tupua e soli ai tulafono.

Auā afai na le faasaoina e le Atua le au agelu o e na agasala, a ua na tuuina atu i latou i maea uamea o le pogisa i seoli, ina ia taofia i latou e oo i le faamasinoga; e lei faasaoina foi le lalolagi tuai, na o Noa lē tala‘i le amiotonu, o lona toavalu lea na faaolaina, ina ua au mai le lolo i le lalolagi faalematau; o aai foi o Sotoma ma Komoro ua na taui atu i ai i le olapalaina, ina ua lelefu, ua tuu ma faailoga i e faalematau i aso amuli; na ia laveai foi ia Lota o le amiotonu, sa tiga i le amio faamatāitu a e faaletaupulea; (auā o lea tagata amiotonu, sa tiga lona loto faamaoni a o nofo faatasi ma i latou, i lona vaai atu ma faalogo atu i lea aso ma lea aso, i a latou amio faaletaupulea;) ua silafia e le Alii se mea e laveai mai ai i e amio Atua ai le faaosoosoga, a e taofi i e amio leaga e oo i le aso faamasino ina ia faasalaina i latou; a e sili lava i latou o e mulimuli atu i la le tino i le tu‘inanau i le fia ulavale, ma latou ta‘ufaatauvaa i alii; ua faamalosi, ua finau vale, ma ua le fefe ona upu leaga i e ua mamalu.

ua tutumu o latou mata i le fafine mulilua, e le mafai foi ona mapu i le agasala, latou te maileia tagata ua le faatumauina, o ia te i latou le loto ua masani i le matapeapea, o tagata ua faafanoina;

Auā o loo tautala i latou i upu faasausili ma le le aoga, latou te maileia i tu‘inanau o le tino ma le faamatāitu o e na matuā sosola ese i e ua nonofo ma le sese.

ua muamua, ona iloa o lenei mea, e o mai i ona aso e gata ai o e tauemu, latou te savavali e tusa ma o latou lava tu‘inanau;

Auā o mea uma lava o i le lalolagi, o le tu‘inanau o le tino, ma le tu‘inanau o mata, ma le faalialia o lenei olaga, e le mai le Tamā ia, a e mai le lalolagi. O le a mavae atu foi le lalolagi, atoa ma lona tu‘inanau, a o lē fai le finagalo o le Atua, e tumau lea e faavavau.

Auā ua o ane faaleiloga o isi tagata, ua leva foi ona muai tusia o i latou ia oo i lenei lava faasala, e faalematau i latou, ua liua e i latou le alofa tunoa o lo tatou Atua i le faamatāitu, ma ua latou faafiti i le Alii e tasi, o le Atua, ma lo tatou Alii o Iesu Keriso.

O agelu foi o e na le taofi i lo latou mamalu, a ua tuua e i latou le mea sa latou nofo ai, ua taofia e ia i noanoataga e faavavau i lalo o le pogisa, seia oo i le faamasinoga o le aso tele. E pei o Sotoma ma Komoro, ma aai sa vagavagai ai, ua faitaaga pei o i latou, ma mulimuli atu i nisi tino, o lea ua tuu mai ai i latou e fai ma faailoga, ua faasalaina i latou i le afi e faavavau. E faapea foi lava o ia tagata moemiti, latou te faaleaga le tino, ma latou ta‘ufaatauvaa i alii, ma upu leaga i e ua mamalu.

A ua ia te au ni nai mea ia te oe, ona ua ia te oe o e ua taofi i le mataupu a Palaamo, o le na a‘oa‘o ia Palako e tuu atu le mea e tausuai ai i luma o le fanauga a Isaraelu, ona ia aai i mea ua fāsia mo tupua ma ia latou faitaaga.

A ua ia te au ni nai mea ia te oe, ona ua e tuu pea le fafine o Iesepela, ua ta‘ua o ia e ia o le perofeta fafine, e a‘oa‘o ma faasese i a‘u auauna, ina ia faitaaga, ma aai mea ua fāsia mo tupua. Ua ou tuu atu foi ni ona aso ia salamo ai i lana faitaaga, a ua le salamo lava o ia. Faauta, o a‘u ou te lafo ia te ia i le moega, atoa ma e ua mulilulua ma ia, ina ia puapuagateleina, pe afai latou te le salamo i a latou galuega;

latou te lei salamo foi i o latou fasioti tagata, ma a latou togafiti faataulāitu, ma la latou faitaaga, ma o latou gaoi.

Ona mulimuli atu ai lea o le tasi agelu, ua faapea atu, Ua paū, ua paū Papelonia o le aai tele, auā ua ia faainu i nuu uma i le uaina o le toasa i lana faitaaga.

Ua sau foi le tasi o ia agelu e toafitu sa i ai ipu e fitu, ua tautala mai ia te au, ua faapea mai ia te au, Sau ia, ou te faailoa ia te oe le faasalaina o le fafine talitane e sili, o lē tietie i vai e tele; ua faitaaga ma ia o tupu o le lalolagi, ua onā foi e o nonofo i le lalolagi i le uaina o lana faitaaga.

auā ua feinu nuu uma i le uaina o le toasa i lana faitaaga, ua faitaaga foi ma ia tupu o le lalolagi, o le faulaiga o ana mea faafiafia ua tamaoaiga ai e ua faatau oa o i le lalolagi.

O tupu foi o le lalolagi e na faitaaga ma faafiafia i latou faatasi ma ia, latou te taufaitagi ia te ia ma taufaitagitu‘i ona o ia, pe a latou iloa atu le asu o lona susunuina;

auā e faamaoni, e tonu foi ana faamasinoga; auā ua faasalaina e ia le fafine talitane e sili, o le na faaleagaina le lalolagi i lana faitaaga, ua ia taui atu ia te ia lava le toto o ana auauna.

A o e loto vaivai, ma e lē faalogo, ma e fai mea e inosia, ma e fasioti tagata, ma e faitaaga, ma e faataulāitu, ma e ifo i tupua, atoa ma e tala pepelo uma, e fai o latou tofi i le lepa e mu i le afi ma le teio, o le oti faalua lea.