24 – Aiga

Ona faia lea e le Atua o le tagata i lona faatusa, o le faatusa o le Atua na ia faia ai o ia; na faia e ia o i laua o le tane ma le fafine. Ua faamanuia foi e le Atua ia te i laua, ma ua fetalai atu le Atua ia te i laua, Ia fanafanau ia, ma ia uluola, ma ia tumu ai le lalolagi, ia faatoilalo i ai, ma ia pule i i‘a i le sami, ma manu felelei, atoa ma mea ola uma e fetolofi i le eleele.

Ua fetalai mai foi Ieova le Atua, E le lelei ina toatasi o le tagata; ou te faia sona fesoasoani e tatau ma ia. Na faia e Ieova le Atua i le eleele o manu vaefa uma lava, ma manu felelei uma lava; na ia aumaia ia Atamu ia iloa pe ni a ni igoa na te faaigoa ai; o le igoa ua faaigoaina ai e Atamu i meaola uma o lona igoa lea. Ona faaigoaina atu lea e Atamu o igoa i manu vaefa fanua uma, ma manu felelei, atoa ma manu vaefa uma o le vao; a o Atamu, e lei maua se fesoasoani e tatau ma ia.

Ua faamoegaseina o Atamu e Ieova le Atua, i le ua moe lava; ona toina lea e ia le tasi ona ivi asoaso, ma na faasoo ane le aano e sui a‘i. O le ivi asoaso foi na toina e Ieova le Atua ia Atamu ua na fai a‘i le fafine, ona ia aumaia lea o ia ia Atamu. Ona faapea ai lea o Atamu, O le ivi lava lenei o o‘u ivi, ma le aano o o‘u aano; e ta‘ua o ia o le fafine, auā na toina atu o ia ai le tane.

O le mea lea e tuua ai e le tane lona tamā ma lona tinā, a e faatasi ma lana avā; ona avea ai lea o i laua ma tino e tasi. Sa le lavalavā i laua o Atamu ma lana avā, a ua le mamā lava.

Ona faapea mai lea o Atamu, O le fafine na e aumai ia te au, ua na aumai ia te au le fua o le laau, ona ou ‘ai ai lea. Ona fetalai atu lea o Ieova le Atua i le fafine, Se a lena mea ua e faia? Ona tali mai lea o le fafine, Na faasese mai le gata ia te au, ona ou ‘ai ai lea. Ona fetalai atu lea o Ieova le Atua i le gata,

ou te faatupuina le feitagai ia te oulua ma le fafine, o lau fanau foi ma lana fanau; na te tu‘imomomoina lou ulu, a o oe e te tu‘imomomoina lona mulivae. Ua fetalai atu o ia i le fafine, Ou te matuā faateleina le tiga o lou ma‘i to; e te fanau mai tama ma le tiga; e uai atu lou manao i lau tane, e pule foi o ia ia te oe. Ua ia fetalai atu foi ia Atamu, Ua e usiusitai i le upu a lau avā, ma ua e ‘ai i le laau na ou fai atu ai ia te oe, na faapea atu, e aua e te ‘ai ai; o le mea lea ua malaia ai le laueleele ona o oe; e te ‘ai ai ma le tiga i aso uma o lou ola;

Ua faaigoaina e Atamu le igoa o lana avā o Eva; auā o le tinā o ia o tagata ola uma.

Ua iloa e Atamu lana avā o Eva; ona to ai lea o ia, ona fanau mai lea e ia o Kaino, ua ia faapea ane foi, Ua ou maua le tagata mai ia Ieova. Ua toe fanau mai foi e ia o lona uso o Apelu. O Apelu foi, o le leoleo mamoe o ia; a o Kaino, o le galue fanua ia. Ua oo ina atoa o aso, ona avatu ai lea e Kaino o le fua o le fanua o le taulaga ia Ieova. A o Apelu, ua ia avatu foi ‘uluai tama a lona lafu, o e pepeti ai lava. Ua silasila mai Ieova ia Apelu, atoa ma lana taulaga; a e peitai o Kaino ma lana taulaga, ua ia le silasila i ai. Ona ita tele ai lea o Kaino, ua faaūū lava ona mata. Ona fetalai atu lea o Ieova ia Kaino, Se a le mea ua e ita ai? Se a foi ua faaūū ai ou mata? Pe afai e te amio lelei e te le maua ea le fiafia? A e afai e te le amio lelei o loo taoto i le faitotoa le agasala. E uai atu lona manao ia te oe, e te pule foi oe ia te ia. Ua fai mai foi Kaino ia Apelu lona uso, ua iai foi i laua i le fanua, ona tulai atu lea o Kaino ia Apelu lona uso, ma fasioti ia te ia. Ua fetalai atu Ieova ia Kaino, O fea o iai Apelu lou uso? Ona tali mai lea o ia, Ou te lei iloa; o a‘u ea le leoleo o lo‘u uso? Ua fetalai atu o ia, Se a le mea ua e faia? O loo alaga mai ia te au mai le eleele le leo o le toto o lou uso. O lenei, ua malaia oe mai le eleele, ua faamaga mai lona gutu e tali a‘i le toto o lou uso mai lou lima.

O le tusi lenei i le gafa o Atamu. O le aso na faia ai e le Atua le tagata na ia faia o ia ua faatusa i le Atua. Na ia faia i laua, o le tane ma le fafine, na ia faamanuia foi ia te i laua, ma na faaigoaina ai o la igoa o Atamu, i le aso na faia ai i laua.

Na ola Atamu i tausaga e tasi le selau ma le tolugafulu, ona fanaua lea e ia o lona atalii e foliga ia te ia ma faatusa i ai; ma ua faaigoaina e ia lona igoa o Setu. O aso lava o Atamu talu ina fanauina e ia o Setu e valu selau o ona tausaga, ma ua fanaua ai e ia o atalii ma afafine. O aso uma foi na ola ai Atamu, e iva selau ma le tolu gafulu, o ona tausaga ia; ona oti ai lea.

Ua oo ina amata ona faatoateleina o tagata i le fogāeleele, ma ua fanauina e i latou o afafine,

Ua fetalai atu Ieova ia Noa. Ina ulu atu ia o oe atoa ma lou aiga uma i le vaa; auā ua ou iloa oe o le amiotonu i o‘u luma i lenei tupulaga.

Ua faamanuia atu e le Atua ia Noa ma ona atalii, ma ua faapea atu ia te i latou, Ia outou fanafanau, ma ia uluola, ma ia tumu le lalolagi ia te outou.

Ua fetalai mai Ieova ia Aperamo, Ia tuua e oe o lou nuu, ma tagata o lou nuu, ma le aiga o lou tamā, a e alu atu i se nuu ou te faasino atu ai ia te oe. Ou te faia oe ma nuu tele, cu te faamanuia foi ia te oe, ou te matuā faamamaluina lou igoa; e manuia foi oe. Ou te faamanuia atu ia te i latou o e faamanuia ia te oe, ou te faamalaia atu foi ia te i latou o e fetuu ia te oe; e manuia foi ia te oe o aiga uma o le lalolagi.

O a‘u nei, ou te fai atu, faauta, o ia te i taua le feagaiga, e fai foi oe ma tupuga o nuu e tele. E le toe valaauina lou igoa o Aperamo, a o le a igoa oe o Aperaamo, auā ua ou faia oe ma tupuga o nuu e tele. Ou te matuā faauluolaina oe, ou te faia oe ma tupuga o nuu; e tupuga mai foi ia te oe o tupu. Ou te faatumauina foi o la ta feagaiga ma oe, ma lau fanau, i a latou tupulaga, pe a mavae atu oe, e fai ma feagaiga e faavavau; ia fai a‘u ma Atua ia te oe ma au fanau pe a mavae atu oe.

Ua faapea mai foi le Atua ia Aperaamo, O Sarai lau avā, aua e te toe valaauia lona igoa o Sarai, a o Sara o lona igoa lea. Ou te faamanuia foi ia te ia, ma ou foaiina atu foi se atalii mo oe mai ia te ia; ou te faamanuia lava ia te ia, e fai foi o ia ma tupuga o nuu; e tupuga mai foi ia te ia o tupu o nuu. Ona faapaū fao lea o Aperaamo, ua ‘ata‘ata, ma faapea ifo i lona loto, E fanau mai ea se atalii i le tagata ua selau ona tausaga? O Sara foi e fanau ea ia ua iva sefulu ona tausaga?

Auā ua ou iloa o ia na te poloai atu i ana fanau ma lona aiga pe a mavae atu o ia; latou te tausia le ala o Ieova, i lo latou fai amiotonu ma faamasinoga, ina ia faataunuuina e Ieova ia Aperaamo le mea na ia fetalai atu ai ia te ia.

Ua asiasi Ieova ia Sara e pei ona ia fetalaia mai, ua faia foi e Ieova ia Sara e pei ona ia fetalai mai. Ua to foi Sara, ua fanau e ia se atalii mo Aperaamo, ina o toeaina o ia, i ona lava po sa fetalai mai ai le Atua ia te ia. Ua faaigoa foi e Aperaamo lona atalii na fanau mai ia te ia, o le na fanau mai e Sara ia te ia, o Isaako.

Ona ta‘ita‘i atu lea e Isaako ia te ia i le fale ie o lona tinā o Sara, ua ave e ia o Repeka, ua fai foi o ia ma ana avā; ua fiafia foi o ia ia te ia; ona faatoa faamafanafanaina ai lea o Isaako talu ona oti o lona tinā.

e avea foi au fanau pei o le efuefu o le eleele, e faasalalauina solo foi oe i sisifo, ma sasae, ma le itu i matu, atoa ma le itu i toga, o oe foi ma au fanau e manuia ai aiga uma o le lalolagi.

Ua manao Iakopo ia Rasela, ua fai atu ia, Ou te auauna ia te oe i tausaga e fitu ona o Rasela lou afafine aupito itiiti. Ona fai mai ai lea o Lapana, E lelei ona ou avatu ai o ia ia te oe, a e leaga ona ou avatu i se tasi tagata; ina ta nonofo ia ma a‘u. Ona auauna ai lea o Iakopo i tausaga e fitu ona o Rasela, ua peiseai o nai aso itiiti ia i lona manatu, auā o lona manao tele ia te ia.

Ua iloa e Rasela e lei fanau ia ia Iakopo, ona mataua lea o Rasela i lona uso, ua fai mai ai ia Iakopo, Au mai ia ni tama ia te au, a leai ona ou oti ai lea. Ona ita tele ai lea o Iakopo ia Rasela, ua na fai atu ai, O a‘u ea le sui o le Atua, o le ua le avatu ia te oe ni fanau?

Ua fetalai mai foi Ieova ia Iakopo, Ina toe foi atu ia i le nuu o ou tamā, ma lou aiga, ou te i ai foi ia te oe.

Ona fai ane lea o Iakopo i lona aiga ma i latou uma sa ia te ia, Tuu ese ia o atua ese o loo i ai ia te outou, ma ia outou faamamā ia te outou, ma fesui i o outou ofu;

Ona le mafai ai lea e Iosefa ona oono i luma o latou uma na tutū mai i ona luma, ona alaga ai lea o ia, Ia o ese tagata uma ia te au. E lei tu mai foi se tasi ia Iosefa ina ua faaali o ia i ona uso. Ua na tagi foi ma le leo tele; ona lagona ai lea e tagata Aikupito, ua lagona foi e le aiga o Farao. Ua fai atu Iosefa i ona uso, O a‘u o Iosefa; o ola mai pea ea lo‘u tamā? Ona le mafai ai lea e ona uso ona tali mai ia te ia; auā ua matuā atuatuvale i ona luma.

Ona sauni lea e Iosefa o lona nofoa faataavalevale, ua alu ae foi i Kosena la te fetaiai ai ma lona tamā o Isaraelu; ua na iloa atu ia te ia, ona fusi ai lea ia te ia, ma tagi pea lava i lona ua.

Ona tuu atu lea e Iosefa le nuu e mau ai lona tamā ma ona uso, ma na avatu ai e fai mo latou i le nuu o Aikupito i le fanua ua sili ona lelei, o le nuu o Ramese; faapei ona poloai i ai o Farao. Ua fagaina foi e Iosefa lona tamā, ma ona uso, ma le aiga atoa uma o lona tamā i le mea e ‘ai ua oo lava i o latou tama iti.

aua e te ifo i ai, aua foi e te auauna i ai; auā o a‘u o Ieova lou Atua, o le Atua fuā, o le taui atu i fanau o le amioletonu a o latou mātua, e oo i le tupulaga e tolu ma le fa o e ‘ino‘ino mai ia te au;

Ia e ava i lou tamā ma lou tinā, ina ia faalevaleva ai ou aso i le nuu o le a foaiina mai e Ieova lou Atua ia te oe.

O se fasi i lona tamā, po o lona tinā, ia fasiotia lava o ia.

Aua le agaleaga i se fafine ua oti lana tane, po o se mātuaoti.

o lō tausi le alofa e oo atu i afe o tupulaga; o lē faamagalo foi i le amioletonu ma le solitulafono ma le agasala, a e le faasaoina lava e ia o e agasala; a e taui atu e ia le agasala a mātua i a latou fanau ma le fanau a latou fanau, e oo i le tolu ma le fa o tupulaga.

Ne‘i e au mai foi o latou afafine ma avā a ou atalii, e mulilulua foi o latou afafine i o latou atua, e mulilulua ai foi ou atalii i o latou atua.

Ia taitoatasi outou ma ava i lona tinā ma lona tamā, ma ia outou tausiusi i o‘u sapati; o a‘u o Ieova lo outou Atua.

Aua e te ‘ino‘ino i lou uso i lou loto; ia e aoai lava i lē lua te tuaoi, aua foi ne‘i tuu ai pe a le agasala ia te ia.

Ai se tasi na te fetuu i lona tamā po o lona tinā e fasiotia lava o ia; ua ia fetuu i lona tamā po o lona tinā; e ia te ia lava lona toto.

Aua ne‘i fai avā so latou i se fafine talitane, po o se fafine faitaaga; aua foi ne‘i fai avā o ia i se fafine ua aleia e lana tane; auā ua paia o ia mo lona Atua.

O se taupou lava e fai avā ai o ia. O se fafine ua oti lana tane, po o se fafine ua aleia, po o se fafine faitaaga, po o se fafine talitane, o fafine ia aua le fai avā ai o ia; a o le taupou o lona lava nuu e fai avā ai o ia.

O le tulafono lea i le fuā, pe a alu ese le fafine i le tasi e le o lana tane, ma ua leaga ai o ia; i le ma lea foi pe a oo le loto fuā i le tane, ma ua fuā o ia i lana avā, ma tuuina atu e ia le fafine i luma o Ieova, ona faia lea e le ositaulaga ia te ia lenei tulafono uma. Ona sao lea o le tane a le agasala, a e nofo sala le fafine.

E tonu le upu a afafine o Selofeata; e te avatu lava ia te i latou so latou lava tofi faatasi ma le au uso o lo latou tamā; e te tuuina atu ia te i latou le tofi o lo latou tamā. Ia e fai atu foi i le fanauga a Isaraelu, ia faapea atu, Afai e oti se tagata, a e leai sona atalii, ona outou tuuina atu ai lea o lona tofi i lona afafine. Afai foi e leai sona afafine, ona outou tuuina atu ai lea o lona tofi i ona uso. Afai foi e leai ni ona uso, ona outou tuuina atu ai lea o lona tofi i uso o lona tamā. Afai foi e leai ni uso o lona tamā, ona outou tuuina atu ai lea o lona tofi i se tasi o lona aiga o le ua aupito mai ia te ia i lona aiga, e fai foi mona. E fai foi lena mea ma tulafono e faatonu a‘i i le fanauga a Isaraelu, e pei ona poloai mai ai o Ieova ia Mose.

O le mea lenei ua poloai mai ai Ieova i afafine o Selofeata, o loo faapea mai, Ia nofo tane i latou i e latou te loto i ai, a e tau lava o le aiga o le itu aiga o lo latou tamā latou te nofo tane ai. Ona le feaveaiina ai lea o tofi o le fanauga a Isaraelu i lea itu aiga ma lea itu aiga; auā o le fanauga a Isaraelu latou te taitasi ma nofo mau i le tofi o le itu aiga o lona tamā. Ai se fafine foi ua i ai se tofi i itu aiga o le fanauga a Isaraelu, e nofo tane o ia i se tasi o se aiga o le itu aiga o lona tamā, ina ia taitasi le fanauga a Isaraelu ma fai mona le tofi o lona tamā. E le feaveaiina foi le tofi i lea itu aiga ma lea itu aiga; a e taitasi le tagata o itu aiga o le fanauga a Isaraelu ma nofo mau i lona lava tofi.

Tau ina faaeteete oe ia te oe, ma ia e matuā faaeteete lava ia te oe, ne‘i galo ia te oe nei mea na iloa ai e ou mata, ne‘i te‘a ese ai lou loto i aso uma o lou olaga, a ia e faailoa atu i lau fanau, ma le fanau a lau fanau; faailoa atu le aso na e tu ai i luma o Ieova lou Atua i Horepa, ina o fetalai mai Ieova ia te au, Ina faapotopoto mai ia ia te au le nuu, ia latou faalogologo mai i a‘u upu, ina ia a‘oa‘oina ai i latou, ina ia matatau mai ia te au i aso uma lava latou te ola ai i le fogāeleele, ma ia latou a‘oa‘o ai i a latou fanau.

Ia e ava i lou tamā ma lou tinā, pei ona poloai mai ai o Ieova lou Atua ia te oe, ina ia faalevaleva ai ou aso, ina ia manuia ai foi oe i le nuu o le a faoiina mai e Ieova lou Atua ia te oe.

Ia i ai foi i lou loto o upu nei ou te fai atu ai ia te oe i le aso nei. Ia e matuā a‘oa‘o soo ai i lau fanau, ma ia e tautalatala a‘i, pe a ē nofo i lou fale, pe a ē savali foi i le ala, pe a ē taoto, pe a ē tulai foi.

Aua le fetaiai gafa ma i latou, aua le avatu lou afafine mā lona atalii, aua foi ne‘i e au mai lona afafine mā lou atalii; auā e faaliliueseina e ia lou atalii, ia le mulimuli mai ia te au, a e auauna i atua ese; ona tupu ai lea o le toasa o Ieova ia te outou, ma vave faaumatia ai oe.

e le talia foi e ia se taui; o le na te faamasinoina mo le ua mātuaoti ma le fafine ua oti lana tane; o le alofa atu i le tagata ese, ua avatu ai ia te ia le mea e ‘ai atoa ma ofu.

Ia outou a‘oa‘o atu ai i a outou fanau, ma tautalatala a‘i pe a e nofo i lou fale, pe a e savali foi i le ala, pe a e taoto, pe a e tulai foi.

Ia e anaana mai, ma e faalogo mai i nei upu uma ou te fai atu ai ia te oe, ina ia manuia ai oe ma au fanau pe a mavae atu oe, e oo i le faavavau, pe a e faia le mea lelei ma le tonu i luma o Ieova lou Atua.

e te olioli foi i lau tausamiga, o oe, ma lou atalii, ma lou afafine, ma lau auauna tane, ma lau auauna fafine, ma le sa Levī, ma le tagata ese, ma le ua āumatuā, ma le fafine na oti lana tane o i lau aai.

Aua foi ne‘i faatoateleina e ia o avā māna, ne‘i liliueseina ai lona loto; aua foi ne‘i faateleina naua e ia o ario ma auro mo ia.

O ai foi se tagata ua la fai le feagaiga ma se fafine e fai mana avā, a e lei faatasia? Ina alu ia, ina foi atu i lona fale, ne‘i oti o ia i le taua, ona fai ai lea o ia ma avā a se tasi tagata.

Afai e toalua avā a se tasi tagata, ua fiafia ia i le tasi, a e ‘ino‘ino i le tasi, ma ua la fananau ia te ia o a la tama tane, o le ua ia fiafia i ai ma le ua inosia; afai foi e luai fanau mai le tama a le ua inosia; a oo i le aso na te tofia ai ana mea i ona atalii, e le mafai ona avea ma ulumatua le tama a le ua ia fiafia i ai, a e tuua le tama a le ua inosia, auā o le ulumatua ia; a ia faailogaina lava e ia o le ulumatua o le tama lea a le ua inosia, i lona avatu ia te ia o vaega e lua i mea uma lava ua ia te ia; auā o ia le amataga o lona malosi; e ona le tofi o le ulumatua.

Afai e vaogata ma le finauvale le atalii o se tasi tagata, e le faalogo i le upu a lona tamā, po o le upu a lona tinā, pe a uma ona la aoai atu i ai, a e le faalogo lava o ia ia te i laua; ona tago ai lea o lona tamā ma lona tinā ia te ia, ma avatu ia te ia i toeaina o lana aai, i le faitotoa o lana aai; ona fai atu lea o i laua i toeaina o lana aai, O la ma tama nei ua vaogata ma le finauvale ia, e lei faalogo lava i a ma upu; o le ‘ai tele foi ia, ma le inu ia onā. Ona fetogi ai lea o tagata uma o lana aai ia te ia i maa, ia oti o ia; ona e tuueseina ai lea o le leaga ia te oe; e faalogo ai foi Isaraelu uma lava, ma latou matatau ai.

Afai e fai avā se tagata, ma alu i ai, a e ‘ino‘ino ia te ia, ma fai mea e upuia ai o ia, ma ta‘uleagaina ai o ia, ua faapea ane foi o ia, Na ou fai avā i lenei fafine, na ou alu i ai, ona ou iloa ai lea e le se taupou o ia; ona ave ai lea e le tamā ma le tinā o le teine o failoga o le taupou o le teine, ma avatu ai i toeaina o le aai, i le faitotoa; ona fai atu lea o le tamā o le teine i toeaina, Na ou avatu lo‘u afafine i lenei tagata e fai mana avā, a ua ‘ino‘ino o ia ia te ia; faauta foi, ua upuia le teine talu o ia, ua faapea ana, Ua ou iloa o lou afafine e le se taupou ia; a o faailoga nei o le taupou o lo‘u afafine. Ona fola atu lea e i laua o le ie i luma o toeaina o le aai. Ona ave lea e toeaina o lea aai lena tagata, ma latou sasa ia te ia; latou te faasalaina atu foi o ia i tupe e selau, ma avatua i le tamā o le teine, auā o ia ua ta‘uleagaina ai se taupou Isaraelu. E fai pea foi o ia māna avā; na te le toe mafai ona alei ia te ia i ona aso uma lava. A e peitai afai ua moni lena upu, ua le maua faailoga o le taupou o le teine; ona latou avatu lea o le teine i le faitotoa o le fale o lona tamā, ona fetogi lea e tagata o lana aai ia te ia i maa, ia oti; auā ua faia e ia le mea leaga i Isaraelu, ina ua faitaaga i le aiga o lona tamā; ona outou tuueseina ai lea o le leaga ia te outou. A iloa se tane ua la momoe ma se fafine nofo tane, ia oti i laua, o le tane na la momoe ma le fafine, atoa ma le fafine; ona e tuueseina ai lea o le leaga ia Isaraelu.

Aua ne‘i alu se tama toifale i le faapotopotoga a Ieova; aua lava ne‘i alu o ia i le faapotopotoga a Ieova e oo lava i le sefulu o augātupulaga.

Afai e fai avā se tasi i se fafine, ua la nonofo, a oo foi ina le toe fiafia o ia i ai, auā ua na iloa ia te ia se mea leaga; ona tusi ai lea e ia se tusi alei ma ia, ma avatu ai ia te ia, ma auina atu o ia ai lona fale. Pe a alu ese foi o ia i lona fale, ona alu ai lea o ia ma nofo i se tasi tane; afai foi e ‘ino‘ino ia te ia lana tane mulimuli, ma tusi se tusi alei ma ia, ma avatu ai ia te ia, ma auina atu o ia ai lona fale; pe afai foi ua oti le tane mulimuli, na fai avā ia te ia; e le mafai i lana muai tane, sa na auina o ia, ona toe fai o ia mana avā, ina ua uma ona faaleagaina o ia; auā o le mea inosia lea i luma o Ieova; aua foi ne‘i e faatupuina le agasala i le nuu ua foaiina mai e Ieova lou Atua ia te oe e fai mou tofi.

Afai foi e faatoa fai avā se tasi, aua ne‘i alu o ia i le taua, aua foi ne‘i togia o ia i se feau a le nuu; ia saoloto o ia i lona aiga i le tausaga e tasi, ma faafiafia atu ai i lana avā ua fai.

Ia malaia le na te faaleaogaina lona tamā po o lona tinā. Ona tali mai ai lea o le nuu uma lava, Amene.

Ia malaia le na te faapiopioina le faamasinoga i le tagata ese, ma le ua āumatuā, ma le fafine ua oti lana tane. Ona tali mai ai lea o le nuu uma, Amene.

O ia Ieova lo tatou Atua mea lilo; a o mea ua faailoa mai o ia te i tatou ia ma a tatou fanau e faavavau, ina ia faia e i tatou o upu uma o lenei tulafono.

Ia e faapotopotoina le nuu, o tane, ma fafine, ma tama iti, atoa ma le tagata ese e ia te oe i au aai, ina ia latou faalogologo ai, ma ia a‘oa‘oina i latou, ma ia latou matatau ia Ieova lo outou Atua, ma latou anaana e fai o upu uma lava o lenei tulafono. O a latou fanau foi, e na le iloa, ia latou faalogologo, ma ia a‘oa‘oina i latou ia matatau ia Ieova lo outou Atua, i aso uma lava tou te ola ai i le laueleele tou te sopoia atu ai Ioritana e fai mo outou.

O lenei, se‘i oulua tauto mai ia te au ia Ieova, auā ua ou agalelei atu ia te oulua, ia oulua agalelei mai foi i le aiga o lo‘u tamā, ma ia oulua tuu mai ia te au se faailoga faamaoni; ma ia outou faaolaina lo‘u tamā, ma lo‘u tinā, ma o‘u tuagane, ma o‘u uso, ma i latou uma ua ia te i latou, ma ia laveaiina i matou ia le oti.

E faalatalataina mai foi outou a itu aiga a taeao; o le itu aiga e maua e Ieova, ia sau a aiga; o le aiga foi e maua e Ieova, ia faalatalata mai a puiaiga; o le puiaiga e maua e Ieova ia faalatalataina mai ai ona tagata taitasi.

Auā afai tou te toe foi i tua, ma outou pipii atu i e o totoe o ia nuu, o i latou o e totoe ia te outou, ma feavagai ma i latou, ma outou o atu ia te i latou, ma latou o mai ia te outou; ia outou matuā iloa e le toe tulia e Ieova lo outou Atua se isi o ia nuu i o outou luma; a e fai i latou ma mailei, ma matasele ia te outou, ma sasa i o outou itu, ma mea matuitui i o outou mata, seia faaumatia outou ai lenei nuu lelei ua foaiina atu e Ieova lo outou Atua ia te outou.

Pe afai foi e leaga ia te outou ona auauna ia Ieova, ina filifili ia o outou i le aso nei, po o ai tou te auauna i ai; po o atua na auauna i ai o outou tamā, o e sa i le la itu o le vaitafe, po o atua o sa Amorī, e o latou le nuu ua outou nonofo ai; a o a‘u nei ma lo‘u aiga, matou te auauna ia Ieova.

Ona o ai lea i ia ona aso o le fanauga a Isaraelu ai lea mea, e taitasi i lona itu aiga ma lona aiga; ua latou o ese i lea mea e taitasi i lona tofi.

A ua fai atu Ruta, Aua e te finau ia te au ina ia ou tuulafoai ia te oe, ia le mulimuli atu ia te oe; auā o le mea e te alu i ai, ou te alu ai foi; o le mea e te nofo ai, ou te nofo ai, e fai lou nuu mo‘u nuu; e fai lou Atua mo‘u Atua;

o Ruta foi le fafine Moapi, le avā a Maalona, ua ou faatau ia te ia e fai ma‘u avā, e faatumau ai le igoa o le ua oti i lona tofi, ia le galo le igoa o le ua oti ai lona au uso, ma le faitotoa o lona aai; o molimau i ai outou i lenei aso.

Ona fai atu lea o Elekana lana tane ia te ia, Hana e, se a le mea e te tagi ai? Se a foi le mea e te le ‘ai ai? Se a foi le mea e tiga ai lou loto? E le ua sili ea ona lelei o a‘u ia te oe i tama tane e toatinoagafulu?

Ua ia tauto foi, ua faapea atu, Ieova o ‘au e, afai e te silasila mai i le puapuaga o lau auauna fafine, ma e manatu mai ia te au, a e le faagalogalo mai i lau auauna fafine, ma e foai mai i lau auauna fafine se tama tane, ona ou foai atu lea o ia ia Ieova i aso uma o lona ola; e le oo foi se tafi i lona ulu.

o le tama nei na ou tatalo atu ai; ua foai mai e Ieova ia te au le mea na ou faatoga atu ai ia te ia. O a‘u foi ua ou tuuina atu o ia ia Ieova; ua tuuina atu o ia ia Ieova i aso uma e ola ai o ia; ona ifo ai lea o ia ia Ieova i lea mea.

A o atalii o Eli, o tagata ulavavale i laua, ua la le iloa Ieova.

A o Samuelu, na auauna o ia i luma o Ieova; ua ofu le tama i le efota ie lino.

Ua tupu pea lava le tama o Samuelu, ma ua faapelepeleina e Ieova atoa foi ma tagata.

E fai a‘u mona tamā, e fai foi o ia mo‘u atalii; a agasala o ia ou te aoai atu ia te ia ma le sasa a tagata, ma ta a tagata;

A ua manao le tupu o Solomona i fafine ese e toatele, e faaopoopo i le afafine o Farao, o fafine o sa Moapī, ma sa Amonī, ma sa Etomā, ma sa Saitonū, ma sa Hetī; o nuu na fetalai mai ai Ieova i le fanauga a Isaraelu, Aua tou te o atu ia te i latou, aua foi ne‘i latou o mai ia te outou; auā e moni, latou te faaliliuina o outou loto e mulimuli i o latou atua. Ua matuā manao Solomona ia te i latou. Sa ia te ia ana avā o alo o alii e toafitu galau, ma ana palake e tolu galau; na faaliliueseina lava lona loto e ana avā. Auā ua toeaina Solomona ona faaliliueseina lea o lona loto e ana avā e mulimuli i atua ese; na le sao lona loto ia Ieova lona Atua, e faapei o le loto o lona tamā o Tavita.

O lenei, aua tou te avatua o outou afafine i o latou atalii, aua foi tou te aumaia o latou afafine ma o outou atalii, aua foi tou te sailia e faavavau se mea e filemu ai i latou pe manuia ai i latou; ina ia malolosi ai outou, ma ia outou aai ai i mea lelei o i le laueleele, ma fai ai mo outou atalii e faavavau.

Ona tulai lea o Esera le faitaulaga, ua faapea atu ia te i latou, O outou na ua agasala outou, ina ua outou fai avā i fafine ese e faaopoopo ai i le agasala a Isaraelu. O lenei, ia outou ta‘uta‘u atu a outou agasala ia Ieova le Atua o outou tama, ma ia outou faia lona finagalo, ma ia outou vavae ese i tagata o le nuu, ma fafine ese. Ona tali mai lea o le faapotopotoga uma, ua latou faapea mai ma le leo tele, E pei ona e fetalai mai ia te i matou, e faapea ona matou faia.

Ona fai mai ai lea o lana avā ia te ia, Ua e taofi mau pea ea i lau amiotonu? Ina faifai ia e oe o le Atua, ma e oti ai. Ona fai atu ai lea o ia ia te ia, Ua e tautala mai, e pei ona tautala mai o se tasi o le vao fafine vālea; ua tatou talia mea lelei mai le Atua, a e tatou te le talia ea ma mea leaga? Ua le agasala Iopu i nei mea uma i ona laugutu.

Ua e faatumauina le viiga i gutu o tama meamea ma tama fesusui, ona o e faasaua ia te oe, ina ia faanofosaoina le ua ita ma le ua taui ma sui.

ina ia faamasino i le ua mātuaoti ma le ua faasauaina; ina ia le toe faamatau mai le tagata ua tupu mai le eleele.

A o oe, na e aumaia a‘u mai le manava; o oe na saogalemu ai a‘u ina ou susu i lo‘u tinā. Na tuuina atu a‘u ia te oe talu lo‘u fanau mai; o oe lava lo‘u Atua talu ina ou i le manava o lo‘u tinā.

E ui lava ina tuua a‘u e lo‘u tamā ma lo‘u tinā, a e talia a‘u e Ieova.

Ua ou toeaina a‘u nei, sa a‘u taulealea; a ou te lei iloa se tagata amiotonu na lafoaiina, po o ana fanau ua ‘aiisi i latou. Ua amio alofa ia i aso uma lava; ua avatu e ia ana mea i e nono mai; ua manuia foi ana fanau.

Faauta, na fanaua a‘u ma le amio leaga; na ou i ai foi i le manava o lo‘u tinā ma le agasala. Faauta, ua e finagalo i le faamaoni o le loto; ma e faailoa mai ia te au le poto i le mea lilo.

O le Tamā ia o e ua mātuaoti, le na te faamasinoina mo fafine ua oti a latou tane, o le Atua lea o loo i lona afioaga paia. O le Atua na te faatagatāina e ua ausage; na te aumaia e ua noanoatia i le mea e manuia ai; a o e fouvale, latou te nonofo i le nuu naumati.

Ou te tautala atu lava i le faataoto; ou te ta‘u atu mea lilo talu anamuā, o mea na tatou faalogologo i ai, ma tatou iloa; na talaina mai foi ia te i tatou e o tatou tamā. Tatou te le natia ia mea i a latou fanau, a e ta‘uta‘u atu i tupulaga amuli o viiga o Ieova, ma lona malosi, ma ona vavega na na faia. Ua ia faatuina le tulafono ia Iakopo, ua ia tuuina foi le poloaiga ia Isaraelu, o mea na ia poloai atu ai i o tatou tamā, ina ia latou faailoa ai i a latou fanau; ina ia iloa ai e le tupulaga amuli, o fanau lava e fanau mai; e tutupu mai i latou, ma ta‘u atu ai i a latou fanau; ina ia fai le Atua mo latou faatuatuaga; ma ia le galo galuega a le Atua; a ia latou tausi i ana poloaiga; ina ia le pei o latou tamā i latou, o le tupulaga vaogata ma le fouvale; o le tupulaga na le sauni o latou loto; e lei faamaoni foi o latou loto i le Atua.

Ia outou faamasinoina e ua vaivai ma ē mātuaoti; ia outou ta‘uamiotonuina e ua puapuaga ma ē matitiva.

E faapei ona alofa mutumuti vale o le tamā i lana fanau, e faapea lava ona alofa mutimuti vale o Ieova i e matatau ia te ia.

A o le alofa o Ieova, mai le vavau lava lea, e oo i le faavavau i e matatau ia te ia; o lana amiotonu foi e oo i le fanau a latou fanau,

o outou le fanauga a lana auauna o Aperaamo, o atalii o Iakopo na ia filifilia. O ia lava o Ieova lo tatou Atua; o i le lalolagi uma lava ana faamasinoga. E manatua e ia e faavavau o lana feagaiga, o le upu na ia poloai mai i tupulaga e afe.

o ia e avea ai le fafine pa ia nofo o ia ma le olioli, o le tinā o tama. Ia outou vivii atu ia Ioa.

E faaopoopoina ia te outou e Ieova, o outou atoa ma la outou fanau.

Faauta, o le fanau, o le tofi lea mai ia Ieova; o e ua fanau mai, o le taui lea mai ia te ia. E pei o u fanafana i le lima o le toa, e faapea lava atalii o taulelea. Amuia le tagata ua tumu ai lana utu; e le mamā i latou pe a latou tautala i le faitotoa ma e ita mai.

E avea lau avā pei o le vine fua tele mai i totonu o lou fale; o lau fanau e pei o tamai olive e vagavagai lau laoai.

E te iloa atu foi le fanau a lau fanau; e ia Isaraelu le manuia.

Faauta, o le mea e matuā lelei ma le matagofie lava, pe a nonofo faatasi lava o uso.

Auā sa ia te oe o‘u manatunatu; na e ufiufi ia te au i le manava o lo‘u tinā. Ou te vivii atu ia te oe, auā na faia a‘u e ala ai ona matautia ma ofo tele ai; o mea na e faia, o mea mamana ia; ua ou matuā iloa e a‘u nei mea. E lei lilo lo‘u tino ia te oe, ina ua faia a‘u i le mea lilo, ina ua saunia a‘u i mea loloto i le lalolagi. Na silasila mai ou fofoga i o‘u tino uma ina o afuafua; ua tusia foi uma lava i lau tusi, o ona aso foi na faia ai, a o leai ni o‘u tino.

O taulelea atoa ma teine, o toeaina atoa ma tama; ia latou vivii atu i le suafa o Ieova; auā ua na o lona suafa e mamalu; o lona viiga ua sili lea i le lalolagi atoa ma le lagi.

Lo‘u atalii e, faalogo mai ia i le a‘oa‘o atu a lou tamā; aua foi e te tuulafoaiina le upu a lou tinā;

Lo‘u atalii e, aua le faatauvaa ia te oe le aoaiga a Ieova; aua foi e te ‘ino‘ino pe a aoaiina oe e ia. Auā o le ua alofagia e Ieova, e aoaiina o ia e ia; e pei o le tamā ona aoaiina o lona atalii ua ia fiafia i ai.

Faalogo mai ia, outou le fanau e, i le a‘oa‘o atu e le tamā, ma uai mai o outou taliga ina ia faaatamamaiina outou. Auā ou te avatu ia te outou le poto e lelei; aua ne‘i tou tuulafoai i la‘u upu e a‘oa‘o atu. Auā o a‘u nei, o le atalii o lo‘u tamā, o le pele toatasi a lo‘u tinā. Na ia a‘oa‘o mai ia te au, ma na fai mai ia te au, Ia taofi a‘u upu i lou loto, ia tausiusi i a‘u poloaiga e te ola ai.

Faalogo mai, lo‘u atalii e, ma e talia a‘u upu, ona faateleina ai lea o tausaga o lou olaga. Ou te faasino ia te oe le ala o le poto; ou te ta‘ita‘iina oe i ala sa‘o.

Lo‘u atalii e, ia e faalogo mai i a‘u upu; ia uai mai ou taliga i mea ou te fai atu ai; aua ne‘i te‘a ese ia mea i ou mata; ia e tausi i ai i totonu o lou loto; auā o ia mea o le ola lea i e ua maua; ma le mea e malolo ai o latou tino uma. Ia sili ona leoleoina o lou loto i le leoleoina o mea uma; auā e tupu mai ai le amio.

Ia manuia lou vaipuna, ma ia e fiafia i lau avā na fai a o ē taulealea. Ia pei o le aila pele o ia ma le ‘oti o le vao e matagofie; ia mălie oe i ona susu i aso uma; aua le aunoa ona e matuā fiafia i lou alofa ia te ia.

Lo‘u atalii e, ia e tausi i poloaiga a lou tamā; aua foi e te tuulafoaiina le upu e a‘oa‘o atu a lou tinā;

(There is no heading for this chapter) O faataoto a Solomona. O le atalii poto na te faafiafia lona tamā; a o le tama valea e faanoanoa ai lona tinā.

O le na te faatigaina lona aiga, e fai mona tofi le matagi; e auauna foi le vale i le ua poto lona loto.

O le avā amio lelei, o le pale lea i lana tane; a o lē faamā, e tusa o ia ma le mea e pala ai ona ivi.

E faalogo le atalii poto i le a‘oa‘o atu a lona tamā; a o lē faatauemu, e le faalogo ia i le aoaiga.

O le tagata lelei na te tofia ana mea i le fanau a lana fanau; a o le oloa o le tagata agasala, e teua lea mo lē amiotonu.

O le ua tuuna lana sasa, ua ‘ino‘ino o ia i lona atalii; a o le ua alofa ia te ia, ua saili le aoaiga mo ia.

E taitasi uma fafine popoto ma atiina ae lona fale; a o le fafine valea na te lepetia ai i ona lima.

E tetee atu e le vale le a‘oa‘o atu a lona tamā; a o lē usiusitai i le aoaiga, e faautauta lava ia.

O le atalii poto e faafiafia e ia le tamā; a o le tagata valea, e faaleaogaina e ia lona tinā.

E pule le auauna poto i le atalii na te faatupu le mā; e fai lona veaga o le tofi faatasi ma le au uso.

O le pale o toeaina, o fanau a latou fanau ia; o le faamatagofie o le fanau, o latou tamā ia.

E alofa le uo i aso uma lava; a e fanau le uso mo le aso vale.

O le atalii valea o le faatiga loto lea i lona tamā; o le faaonoono foi i le na fanau mai o ia.

O le ua maua le avā, ua maua e ia le mea lelei; ua maua foi e ia le alofa mai ia Ieova.

O le atalii valea, o le malaia lea o lona tamā; o faamisa foi o le avā, o le tutulu soo lea. O le fale ma oloa, o le tofiga lea a mātua; a o le avā mafaufau, mai ia Ieova lava ia.

Aoai atu i lou atalii, manū o fai sou faamoemoe; a e aua le naunau lou loto ia oti ai o ia.

O le ua faamāumau mea a lona tamā, ma tuli ese i lona tinā, o le atalii lea e tupu ai le mā ma le masiasi.

E savali ma le tonu le ua amiotonu; e manuia lana fanau pe a mavae atu o ia.

E mafai ona iloa o le tama i lana amio; pe sao ona lelei ma le tonu o lana mea e fai.

O le ua fetuu i lona tamā ma lona tinā, e tineia lona lamepa i le pouliuli lava.

O le oloa ua maua faataalise i le amataga, e le manuia lea i le gataaga.

E lelei ona nofo i le tumutumu i luga o le fale; a e leaga ona nofo ma le fafine faamisa i le fale tele.

E lelei na nofo i le vao, a e leaga ona nofo ma le fafine faamisa ma le faaitaitagofie.

A‘oa‘o ia i le tama e tusa ma lona ala; a oo ina toeaina lava o ia, e le te‘a ese ai.

Ua fusifusia le valea i le loto o le tama; a e faateaeseina ai ia te ia i le sasa e aoai a‘i.

Aua ne‘i taofia le aoaiga i le tama; auā afai e te sasa ia te ia i se laau, e le oti o ia; e te sasa ia te ia i se laau, ona e laveaiina lea o lona agaga ai seoli. Lo‘u atalii e, afai e poto lou loto, ona fiafia ai lea o lo‘u nei lava loto; e olioli foi lo‘u manatu, pe a tautala ou laugutu i mea ua tonu.

Ia e faalogo i lou tamā, o le na fanaua oe; aua foi e te ‘ino‘ino i lou tinā pe a loomatua o ia. Ia e faatau mai le mea moni, aua lava le faatau atu; atoa foi ma le poto, ma le a‘oa‘oina, ma le atamai. E matua olioli lava le tamā o le ua amiotonu; o le na fanaua le atalii poto e fiafia o ia ia te ia; e fiafia lou tamā ma lou tinā; e olioli lava le na fanau mai oe. Lo‘u atalii e, au mai ia lou loto ia te au; ma ia fiafia ou mata i o‘u ala.

E lelei ona nofo i le tumutumu i luga o le fale; a e leaga ona nofo ma le fafine faamisa i le fale tele.

O le tutulu soo i le aso ua, ma le fafine faamisa, e tutusa ia;

O le ua anaana i le tulafono, o le atalii mafaufau o ia; a o le ua aumea ma e ‘ai tetele, e mā ai lona tamā ona o ia.

O le na te faoa mea a lona tamā ma lona tinā, a e fai ane o ia, E le se solitulafono lea; e faatasia o ia ma le tagata na te faataumaoi mea.

O le sasa ma le aoaiga e tupu ai le poto; a o le tama ua tuulafoaiina, e tupu ai le mā o lona tinā.

Ia e aoai i lou atalii, ona e maua ai lea se filemu; e tupu ai le fiafia i lou loto.

O i ai le tupulaga e fetuu i lo latou tamā, ma latou le faamanuia i lo latou tinā. O i ai le tupulaga, fa te i latou ua latou mamā; a e lei fufuluesea o latou eleele. O i ai le tupulaga e faasiasia naua o latou mata, ma faamaualugaina o latou laumata.

O mata ua tauemu i le tamā, ma ‘ino‘ino ona usiusitai i le tinā, e salia ia e oreva o le vanu, e ‘aina e tamai aeto.

E tolu mea ua faigata ia te au; o mea lava e fa ou te le iloa; o le ala o le aeto i le lagi; o le ala o le gata i luga o le papa; o le ala o le vaa i totonu o le sami; ma le ala o le tane i le taupou;

Se a ea sa‘u upu ia te oe la‘u tama e? se a lava sa‘u upu ia te oe na fanau i lo‘u manava? se a lava sa‘u upu ia te oe le tama na ou tauto ai? Aua ne‘i e avatu lou malosi i fafine, ma ou ala i le mea e fano ai tupu.

O le avā amio lelei, o ai ea se ua maua? e silisili lona tau i penina. Ua faatuatua ia te ia le loto o lana tane; e le mativa o ia i oloa. E agalelei o ia ia te ia, a e le agaleaga i aso uma o lona olaga. Na te sailia fulufulu mamoe ma lino; ua galue ai ona lima ma le fiafia. E tusa o ia ma vaa o le faatauoa; e mamao le mea e au mai ai ana mea e ‘ai. E tulai foi o ia, a o po lava, ma avatu mea e ‘ai i lona aiga, ma le galuega ua tofia i ana auauna teine. Ua manatunatu o ia i se fanua, ona maua ai lea e ia; o le fua o ona lava lima ua ia fai ai le tovine. Na te fusia lona sulugatiti i le malosi; na te faamalosia ona lava lima. Ua iloa e ia ua lelei lana tau; e le mate lana lamepa i le po. Ua tuu atu e ia ona lima i le kisuro, ma ua tago atu ona lima i le peleke. Ua faamafola lona lima i le ua tigaina; ua tuu atu foi ona lima i le ua mativa. E le fefe o ia ona o lona aiga i le kiona; auā ua oofu lona aiga uma i ofu mūmū. Ua fai ie afu mona; o le ie vavae ma le ie pāuli; o ona ofu ia. Ua iloga lana tane i faitotoa, pe a saofai o ia faatasi ma toeaina o le nuu. Ua fai e ia le ofu lino, ma faatau ai; ua avatu foi fusi i le faatauoa. O le malosi ma le mamalu e fai mona ofu ia; ua ‘ata‘ata foi o ia i aso o lumanai. Ua tautala o ia ma le poto; ua i lona laulaufaiva le tulafono o le alofa. Ua vaavaai o ia i amioga a lona aiga; e le ‘ai foi o ia mea e ‘ai a le paie. E tulai mai lana fanau, ma faafetai ia te ia; o lana tane foi ua vivii ia te ia. E toatele fafine e amio lelei i latou; a o oe; ua faasilisili oe ia i latou uma. O le matagofie e pepelo lea, o le mea faatauvaa le lalelei; a o le fafine ua mata‘u ia Ieova, e viia lava o ia. Avatu ia te ia le fua o ona lima; o ana galuega foi e viia ai o ia i faitotoa.

E sili ona lelei o le toalua i le toatasi; auā ua ia te i laua le taui lelei i la la galuega. Auā afai e paū le tasi e faatuina o ia i luga e lē la te toalua; oi talofa foi i le ua toatasi pe a paū, auā e leai sē la te toalua e faatu ia te ia i luga. Afai foi e taooto faatasi le toalua, e mafanafana ai i laua; a e faapefea ona mafanafana o le ua toatasi? Afai foi e faamanumalo mai se tasi i so laua, e teteeina atu o ia e le toalua; o le maea foi e sāutuatolu e le vave motusia.

Ia e fiafia i lou ola faatasi ma le avā ua e alofa i ai, i aso uma o lou ola faatauvaa, ua foaiina e le Atua ia te oe i lalo o le la, o ou aso faatauvaa uma; auā o lou tofi lea i lenei olaga ma lau galuega ua e galue ai i lalo o le la.

E pei ona le iloa e oe le ala o le matagi, ma ona tutupu o ivi i le manava o le ua to, e faapea foi ona le iloa e oe le galuega a le Atua, o le na te faia mea uma lava.

O lenei, ia e manatua le na faia oe i ona po o lou taulealea, a o lei oo mai aso leaga, a o lei oo mai foi tausaga e te faapea ai, E leai so‘u fiafia i ai;

Tama fafine a Siona e, o atu ia, ina matamata i le tupu o Solomona ma le pale na faapaleina ai o ia e lona tina i le aso na fai avā ai o ia, le aso foi na fiafia ai lona finagalo.

O le mea lea e tuuina mai ai e le Alii lava le faailoga ia te outou; faauta, e to le taupou, ma fanau mai se tama tane; na te faaigoa foi ia te ia o Emanuelu.

Auā ua fanau mai mo i tatou le tama, ua foaiina mai mo i tatou le atalii, e i lona ua le malo, e igoa foi o ia, o le Silisili ese, o le Faipule, o le Atua malosi, o le Tamā o le faavavau, o le Alii o le filemu.

E pei o le fafine to ua latalata ona fanau, ua tiga ia ma uio i lona faatiga; Ieova e, sa faapea lava i matou i ou luma. Sa totō i matou, sa faatiga, e peiseai na matou fanau ma le savili; e lei faia e i matou se faaolataga i le lalolagi, e lei pauu foi e o nonofo i le atu laulau.

O le ua ola, o le ua ola, o ia lava e vivii atu ia te oe, e pei o a‘u lava i le aso nei; e faailoa lou faamaoni e le tamā i lana fanau.

Faalogo mai ia ia te au, outou nuu tu matafaga e; uai mai ia o outou taliga outou nuu mamao e; ua valaauina a‘u e Ieova talu mai le manava; ua na ta‘ua lo‘u igoa talu mai le manava o lo‘u tinā.

E galo ea i le fafine lana tama ua susu, na te le alofa i le tama a lona lava manava? ai lava e galo ia te i latou, a e le galo lava oe ia te au.

Auā o le na faia oe o lau tane lea, o Ieova o ‘au o lona igoa lea; o le na faatauina oe, o le Paia o Isaraelu lea; e ta‘ua o ia, O le Atua o le lalolagi uma. Auā ua valaau Ieova ia te oe, e pei o le avā ua lafoaiina, ma ua faanoanoa lona loto, o le avā foi sa nofo a o teine muli ina ua lafoaiina oe, ua fetalai mai ai lou Atua.

E a‘oa‘oina lau fanau uma lava e Ieova; e tele foi le manuia o lau fanau.

Ou te matuā fiafia ia Ieova, e olioli lo‘u loto i lo‘u Atua; auā ua na faaofuina a‘u i ofu o le olataga, ua na faapulupuluina a‘u i le ofu o le amiotonu; e pei o le faatoafaiavā ua pulou o ia pei se faitaulaga; e pei o le faatoanofotane foi ua teuteu o ia i ana teuga.

Auā e pei o le taulealea ua fai avā i le taupou, e faapea au tama tane ona fai avā ia te oe; e pei ona fiafia foi o le faatoafaiavā i lana avā, e faapea ona fiafia o lou Atua ia te oe.

E pei o le tagata ua faamaiseina e lona tinā, e faapea ona ou faamaise ia te outou; e faamaiseina lava outou i Ierusalema.

Na a‘u iloa oe a o lei faia oe e a‘u i le manava; na a‘u faapaiaina oe a o lei fanau mai oe, na a‘u tofia oe e fai ma perofeta i nuu.

Fai mai, Afai e molia e se tagata lana avā, ma ua alu ese o ia ia te ia, a e fai ma avā a se tasi, e toe alu atu ea o ia ia te ia? E le matuā leaga ai ea lena nuu? A o oe, ua e talitane i tane e toatele, a ia e toe foi mai ia te au, ua fetalai mai ai Ieova.

Ona ou iloa lea, e ui lava i na mea uma na mulilua ai Isaraelu le ua liliu ese, na ou aleia ai o ia, ma ou avatu ia te ia le tusi alei, a ua le fefe lava lona uso faa‘ole‘ole o Iuta, a ua alu ia ua mulilua foi o ia.

Le fanau liliu ese e, ina foi mai ia, o loo fetalai mai ai Ieova; auā e ui lava ina ou ‘ino‘ino ia te outou, a ou te avea outou, e taitasi i aai ma le taitoalua i aiga, ma a‘u aumaia outou i Siona.

afai foi tou te le faasaua atu i le tagata ese, ma le ua aumatuā, ma le fafine ua oti lana tane, ma outou le faamaligi le toto o e ua le sala i lenei mea, ma outou le mulimuli atu i atua ese e i ai le malaia; ona ou faatumauina ai lea o outou i lenei mea, o le nuu na ou foaiina atu i o outou tamā e faavavau faavavau lava.

ina fai avā ia outou, ma ia fananau ai atalii ma afafine ia te outou; ia outou aumaia foi avā mā o outou atalii, ma fai ni tane mā o outou afafine, ina ia latou fananau mai tama ma teine; ia faatoateleina outou i lea mea, a e aua le faatoaitiitia.

Ua e le manatua aso ina o e teine itiiti, a ua e faaonoono mai ia te au i ia mea uma; faauta, o le mea lea ou te taui atu ai lau amio i luga o lou ulu o loo fetalai mai ai le Alii o Ieova, e le toe fai lea mea leaga e faaopoopo i au mea uma e inosia. Faauta, o i latou uma o e fai upu faatusa latou te fai le faatusa ia te oe, e faapea ane, E pei o le tinā lana tama.

O le tagata e agasala e oti lava ia; e le tauia le agasala a le tamā i le atalii, e le tauia foi le agasala a le atalii i le tamā; o le amiotonu a le ua amiotonu e i ona luga lava lea, o le amio leaga foi a le ua amio leaga e i ona luga lava lea.

Na ou fai atu foi i a latou fanau i le vao, Aua tou te savavali i tu a o outou tamā, aua foi le usiusitai i a latou masani, aua ne‘i faaleagaina outou i a latou tupua.

Ua ia te oe i latou o e faaletaualoa i le tamā ma le tinā; ua ia te oe i latou o e faasaua i le tagata ese; ua ia te oe i latou o e faasaunoa i le ua aumatuā ma le fafine ua oti lana tane.

Latou te le fai avā foi i se fafine ua oti lana tane, po o se fafine ua aleia; a e latou te fai avā i taupou o le fanau a le aiga o Isaraelu, po o se fafine ua oti lana tane sa nofo i se ositaulaga.

Ta te osi sa ta feagaiga ma a‘u e faavavau; ta te osi sa ta feagaiga ma a‘u i le amiotonu, ma le faamasinoga, ma le agalelei, ma le alofa. Ta te osi sa ta feagaiga ma a‘u ma le faamaoni; e te iloa foi Ieova.

Ia outou talatala atu ai i la outou fanau; ia talatala foi la outou fanau i la latou fanau, ma la latou fanau i se tasi tupulaga.

Ia e tagiaue, e pei o se taupou ua fusia i le ie talatala ona o lana tane sa fai a o teine muli o ia.

Mulimuli ane, e iu ina ou liligi ifo ai lo‘u Agaga i luga i tagata uma; ona perofeta ai lea o outou atalii ma o outou afafine, e fai miti o outou toeaina, e iloa faaaliga e o outou taulelea.

E feoai faatasi ea se toalua, pe a le loto gatasi i laua?

Auā o loo ‘ino‘ino le atalii i le tamā, o le tama teine ua tu o ia e tetee i lona tinā, o le avā a le tama tane e tetee atu o ia i le tinā o lana tane; o e ua ita i le tagata, o tagata ia o lona lava aiga.

Ua faapea ona fetalai mai o Ieova o ‘au, o loo faapea mai, Ia faamasino i le faamasinoga tonu, ma ia agalelei ma alofa o le tasi i le tasi; aua le faasaua i fafine ua oti a latou tane ma e ua mātua-oti, o le tagata ese ma le ua mativa; aua foi le manatunatu i o outou loto i se mea leaga e fai e le tasi i le tasi.

A ua outou fai mai, Aisea foi? Auā o Ieova, o ia ua fai ma molimau ia te oe ma lau avā sa e fai a o ē taulealea, o le ua e faa‘ole‘ole i ai; a o ia sa lua mafuta, o le avā foi o ia o lau feagaiga. Na ia le faia ea le toatasi? A ua ia te ia foi ona toe o le agaga. Se a foi ua toatasi ai? Ina ia saili le fanau amio Atua; o lenei, ia faaeteete outou i o outou loto, ina ne‘i faa‘ole‘ole se tasi i lana avā na fai a o taulealea. Auā ou te ‘ino‘ino i le alei, ua fetalai mai ai Ieova le Atua o Isaraelu; auā ua ufiufi e ia lona ofu i le faasaua, ua fetalai mai ai Ieova o ‘au; o le mea lea ia outou faaeteete ai i o outou loto, a e aua tou te faa‘ole‘ole.

Na te faaliliuina loto o mātua i fanau, ma loto o fanau i o latou mātua; ne‘i ou alu atu, ma ou taia le nuu i le faafanoga.

O le tusi i le gafa o Iesu Keriso, o le atalii o Tavita, o le atalii ia o Aperaamo. Na fanaua e Aperaamo o Isaako; na fanaua foi e Isaako o Iakopo; na fanaua e Iakopo o Iuta ma ona uso; na fanaua e Iuta o Faresa ma Sera mai ia Tamara; na fanaua e Faresa o Esaroma; na fanaua e Esaroma o Arama; na fanaua e Arama o Aminatapu; na fanaua e Aminatapu o Naasona; na fanaua e Naasona o Salemona; na fanaua e Salemona o Poasa mai ia Raava; na fanaua e Poasa o Opeta mai ia Ruta; na fanaua e Opeta o Iese; na fanaua e Iese o le tupu o Tavita; na fanaua e le tupu o Tavita o Solomona mai le avā a Uria; na fanaua e Solomona o Reopoamo; na fanaua e Reopoamo o Avia; na fanaua e Avia o Asa; na fanaua e Asa o Iosefatu; na fanaua e Iosefatu o Iorama; na fanaua e Iorama o Usia; na fanaua e Usia o Iotama; na fanaua e Iotama o Aasa; na fanaua e Aasa o Esekia; na fanaua e Esekia o Manase; na fanaua e Manase o Amone; na fanaua e Amone o Iosia; na fanaua e iosia o Iekonia ma ona uso, ina a tāfea i Papelonia. Ua oo le tafeaga i Papelonia, ona fanaua ai lea e Iekonia o Salatielu; na fanaua e Salatielu o Serupapelu; na fanaua e Serupapelu o Apiuta; na fanaua e Apiuta o Eliakimo; na fanaua e Eliakimo o Asora; na fanaua e Asora o Satoka; na fanaua e Satoka o Akeimo; na fanaua e Akeimo o Eliuta; na fanaua e Eliuta o Eleasaro; na fanaua e Eleasaro o Matano; na fanaua e Matano o Iakopo; na fanaua e Iakopo o Iosefa le tane a Maria, na fanaua ai IESU, o le ua igoa ia Keriso.

O lenei, o tupulaga uma e afua mai ia Aperaamo e oo ia Tavita, e sefulu ma le fa ia tupulaga; e afua foi ia Tavita e oo i le tafeaga i Papelonia, e sefulu ma le fa ia tupulaga; e afua foi i le tafeaga i Papelonia e oo i le Keriso, e sefulu ma le fa ia tupulaga.

Sa faapea ona fanau mai o Iesu Keriso. Sa fāufautane lona tinā o Maria ia Iosefa, ua iloa ua to o ia i le Agaga Paia, a o lei faatasi i laua. O Iosefa foi lana tane o le tagata amiotonu ia, e lei loto foi o ia ina faamasiasi ia te ia i luma o tagata, ua ia manatu e faatea lemu ia te ia. A o manatunatu o ia i na mea, faauta, ua faaali mai ia te ia le agelu a le Alii i le miti, ua faapea mai, Iosefa e, le atalii o Tavita, aua e te fefe ina au mai ia te oe o Maria lau avā; auā o lana to mai le Agaga Paia lea. E fanau mai e ia le tama tane, e te faaigoa foi ia te ia o Iesu; auā e faaola e ia lona nuu ai a latou agasala. Ua oo nei mea uma ina ia taunuu ai le afioga a le Alii i le perofeta, ua faapea mai, Faauta, e to le taupou, ma fanau mai le tama tane, latou te faaigoa foi ia te ia o Emanuelu; o lona uiga pe a faamatalaina, Ua ia te i tatou le Atua. Ua ala Iosefa, sa moe, ona faia lea e ia e pei ona fai mai ai ia te ia o le agelu a le Alii; ua na au mai lana avā. A e la te lei feiloai ua oo ina fanau mai e ia o lana tama tane ulumatua; ua ia faaigoa foi ia te ia o IESU.

Ua latou ulufale atu i le fale, ua latou iloa ai le tama itiiti ma Maria lona tinā, ona latou faapauu ai lea, ma ifo atu ia te ia; ua talai foi o latou oloa, ona latou avatu ai lea ia te ia o mea alofa, o le auro, ma le pulu lipano, ma le pulu muro.

A o a‘u, ou te fai atu ia te outou, ai se ita fua i lona uso, e nofo sala o ia i le faamasinoga; ai se fai atu foi i lona uso, Raka, e nofo sala o ia i le fono; ai se fai atu foi, Le vale e, e nofo sala o ia i le afi o Kēna. Pe afai foi e te avatu lau taulaga i le fata faitaulaga, ona e manatua ai lea ua i lou uso se mea e tiga ai o ia ia te oe, ina tuu ia i lea mea o lau taulaga i luma o le fata faitaulaga, a e alu oe ia muai faalelei i lou uso, i le e sau ai, ma avatu lau taulaga.

Sa fai mai foi, Ai se faatea i lana avā, ia avatu ia te ia le tusi alei. A ou te fai atu a‘u ia te outou, ai se faatea lana avā, a e lei mulilua ia, ua ia faamulilua ia te ia; ai se fai mana avā le ua faateaina, ua mulilua foi o ia.

O ai foi se tagata o outou pe a ole mai lona atalii se areto, na te avane ea ia te ia se maa? a ole mai foi se i‘a, na te avane ea ia te ia se gata? O lenei, o outou e leaga, afai ua iloa e outou ona avatu o mea lelei mā a outou fanau, e le sili ea ona foaiina mai e lo outou Tamā o i le lagi o mea lelei i e ole atu ai ia te ia?

Aua tou te manatunatu ua ou sau e avatu le filemu i le lalolagi; ou te lei sau e avatu le filemu, a o le pelu. Auā ua ou sau e faamasesei le tagata ma lona tamā, o le tama teine foi e faamasesei ma lona tinā, o le avā foi e faamasesei ma le tinā o lana tane. E fai foi le tagata ma fili o lona aiga. O le ua tele lona alofa i lona tamā po o lona tinā, a e itiiti ia te au, e le aoga lea ia te au; o le ua tele foi lona alofa i lona atalii po o lona afafine, a e itiiti ia te au, e le aoga foi lea ia te au.

A ua silafia e Iesu o latou manatunatu, ona fetalai atu ai lea o ia ia te i latou, O malo uma ua fevaevaeai e faaumatia ia; o aai uma foi po o aiga e fevaevaeai e lē tumau ia.

Ua tautala ia i le motu o tagata, faauta, ua tutū mai i fafo o lona tinā ma ona uso, ua fia tautala ma ia. Ona fai mai ai lea o le tasi ia te ia, Faauta, ua tutū mai i fafo lou tinā ma ou uso, ua fia tautala ma oe. Ona tali atu ai lea o ia, ua faapea atu i le na ta‘u mai ia te ia, O ai ea lo‘u tinā? o ai foi o‘u uso? Ona faaloaloa ai lea e ia o lona aao i ona soo, ua faapea atu, Faauta, o lo‘u tinā ma o‘u uso, Auā o lē faia le finagalo o lo‘u Tamā o i le lagi, o lo‘u uso lea, ma lo‘u tuafafine, ma lo‘u tinā.

E le o le atalii ea lenei o le tufuga? e le o Maria ea le igoa o lona tinā, o ona uso foi o Iakopo, ma Iose, ma Simona, ma Iuta? E le o ia te i tatou ea ona tuafāfine uma? po o fea foi na maua ai e lenei tagata nei mea uma? Ona latou tausuai ai lea ia te ia. A ua fetalai atu Iesu ia te i latou, E leai se perofeta e le mamalu, ua na o lona lava nuu ma lona aiga e le mamalu ai.

Auā ua poloai mai le Atua, ua faapea mai, Ia e ava i lou tamā ma lou tinā; i le ma lea, O lē upu leaga i le tamā po o le tinā, ia fasiotia lava ia. A ua outou fai mai, Ai se fai ane i le tamā po o le tinā, ai se mea ua ia te au e aoga ia te oe, o le taulaga lea; ona le toe ava lea o ia i lona tamā po o lona tinā. Ua faapea ona outou faaleaogaina le poloaiga a le Atua i a outou uputuu.

Ona valaau atu ai lea o Iesu i le tama itiiti, ua faatu ia te ia i o latou luma, ua faapea atu, E moni, ou te fai atu ia te outou, a le liua outou, ma avea ia pei o tama iti, tou te le sao lava i le malo o le lagi. O lenei o sē faamaulalo o ia ia te ia e pei o le tama itiiti nei, e sili lea i le malo o le lagi. Ai se talia se tama itiiti faapenei ona o lo‘u igoa, ua ia talia a‘u; ai se na te faatausuai se tasi o i latou nei e faatauvaa o e faatuatua ia te au, e lelei i lea tagata pe ana nonoa se maaolo tele i lona ua, ma faagotoina o ia i le moana loloto.

Ia outou, ne‘i tou faaleaogaina se tasi o i latou nei e faatauvaa; auā ou te fai atu ia te outou, o a latou agelu i le lagi e le aunoa ona latou vaavaai i fofoga o lo‘u Tamā o i le lagi.

Afai e agaleaga mai lou uso ia te oe, ia e alu, ma aoai ia te ia tau lava o oulua ma ia. Afai e faalogo mai o ia ia te oe, ua e maua lou uso.

Ona alu ane ai lea o Peteru ia te ia, ua faapea ane, Le Alii e, e agaleaga mai faafia ea lo‘u uso ia te au, ma ou faamagalo ia te ia? seia atu fitu ea? Ua fetalai atu Iesu ia te ia, Ou te le fai atu ia te oe, seia atu fitu, a ia fitugafulu ni fitu.

Ona o mai ai lea ia te ia o faresaio, ua faaosooso mai ia te ia, ua faapea mai ia te ia, Pe sa ea i se tasi ona faatea o lana avā ona o mea uma? Ona tali atu ai lea o ia, ua faapea atu ia te i latou, Tou te lei faitaulia ea, o le na faia tagata i le amataga, na ia faia i laua o le tane ma le fafine, na ia fetalai ane foi, O le mea lea e tuua ai e le tane o lona tamā ma lona tinā, a e faatasi ma lana avā; ona avea lea o i laua o le tino e tasi? O lea e le toe toalua ai, a o le tino e tasi i laua; o lenei, o e ua faatasia e le Atua, aua ne‘i faateaeseina e se tagata. Ona latou fai mai ai lea ia te ia, Se a foi le mea na poloai mai ai Mose e avatu le tusi alei e faatea ai ia te ia? Ona fetalai atu ai lea o ia ia te i latou, Ona o outou loto ina maaa na tuu mai ai e Mose ia te outou e faatea i a outou avā; a e lei faapea talu mai i le amataga. Ou te fai atu foi ia te outou, Ai se faatea i lana avā, a o lei mulilua ia, ma fai avā i se tasi, ua mulilua ia; o se fai avā i le na faate‘aina, ua mulilua foi lea. Ona fai mai ai lea ona soo ia te ia, Afai e faapea le tu a le tane ma le fafine, e ao ina le fai avā.

Ona au mai ai lea ia te ia o tama iti, ina ia faaee ona aao ia te i latou, ma tatalo; ona vavao atu ai lea o ona soo ia te i latou. A ua fetalai atu Iesu, Ina tuu mai ia o tama iti e o mai ia te au, aua le vaoia i latou; auā e faapei o i latou nei o e o i le malo o le lagi.

Ai se tasi ua ia tuua o fale, po o uso, po o tuafāfine, po o le tamā, po o le tinā, po o le avā, po o le fanau, p o fanua ona o lo‘u igoa, e maua e ia e taisautuaselau, e fai foi mona tofi le ola faavavau.

ona faapea mai ai lea o i latou ia te ia, Ua e lagona ea a latou upu? Ona fetalai atu ai lea o Iesu ia te i latou, Ioe; tou te lei faitaulia lava ea, Ua e saunia le viiga mai gutu o tama meamea ma tama fesusui?

E tusa le malo o le lagi ma le tasi tupu ua na faia le tausamaaga o lona atalii; ua aauina atu e ia ana auauna e fai atu i e na tala‘iina ia o mai i le tausamaaga; a ua latou le mafafai ina o mai. Ua toe aauina atu e ia nisi auauna, ua faapea atu, Ia outou fai atu i e na tala‘iina, Faauta, ua ou saunia mea e taumafa, ua fafasi a‘u povi ma a‘u mea pepeti, ua saunia foi mea uma; ina o mai ia i le tausamaaga.

O lenei, ia outou o atu i ala tele, o i latou uma tou te iloa ai, tou te tala‘i i ai le tausamaaga. Ona o atu ai lea o ia auauna i ala, ua latou faapotopoto uma e na latou iloa, o e leaga atoa ma e lelei; ona tumu ai lea o le mea na fai ai le tausamaaga i e na taooto e aai ai. Ona ulufale atu ai lea o le tupu e vaavaai atu i e na taooto e aai ua iloa atu ai e ia o le tasi tagata ua le ofu i le ofu o le tausamaaga. Ona fai atu ai lea o ia ia te ia, Sole, pe faapefea ona e ulufale mai iinei ua le ia te oe le ofu o le tausamaaga? Ona le gagana ai lea o ia.

O lea aso ua o mai ai ia te ia satukaio, o e taofi, e leai se toe tu; ua latou fesili mai ia te ia, ua faapea mai, Le a‘oa‘o e, ua fai mai Mose, Afai e oti se tasi e leai sana fanau, ia fai lana avā ma avā a lona uso, ia tupu ai se gafa mo lona uso. Sa ia te i matou le au uso e toafitu; na fai avā le ulumatua, ua oti foi o ia; e leai foi sana fanau, o lea ua tuuina atu ai lana avā mā lona uso. Na faapea foi o lona lua, ma lona toatolu, ua oo lava i le toafitu. A e muliai oti foi le fafine. O lenei, a oo i le toe tu, o ai so latou o le toafitu e fai māna le avā? auā na fai avā uma ai. Ona tali atu ai lea o Iesu, ua faapea atu ia te i latou, Ua outou sese lava, ina ua outou le iloa upu o Tusi, ma le mana o le Atua. Auā a oo i le toe tu latou te le fai avā, pe nofo tane, a e latou te pei o agelu a le Atua o i le lagi. A o le toe tutū mai o e ua oti, tou te lei faitau ai ea le afioga a le Atua ia te outou, ua faapea mai, O a‘u nei o le Atua o Aperaamo, o le Atua foi o Isaako, o le Atua foi o Iakopo? o le Atua e le se Atua ia o e ua oti, a o e ola.

Aua foi ne‘i tou ta‘ua se tasi i le lalolagi o lo outou tamā; auā e toatasi lo outou Tamā, o i le lagi ia.

Auā e pei ona faia i ona po a o lei oo le lolo, ua latou aai ma inu, ua latou fai avā foi ma faaavaga, ua oo lava i le aso na ulu atu ai Noa i le vaa,

O ia ona po e tusa ai le malo o le lagi ma taupou e toasefulu, o e na ave a latou lamepa, ma latou o atu e faafetaiai i le faatoafaiavā.

ma Iakopo le atalii o Sepetaio, ma Ioane le uso o Iakopo; ua ia faaigoa foi ia te i laua o Poaneki, o lona uiga, O tagata faititili;

Afai foi e fevaevaeai se aiga, e le mafai ona tumau o lena aiga.

Ona o mai ai lea o ona uso ma lona tinā, ua tutū i fafo, ma feau atu ia te ia, ma valaau atu ia te ia. Ua nonofo vagavagai ia te ia le motu o tagata, ua latou fai ane foi ia te ia, Faauta, o lou tinā ma ou uso o i fafō, o saili ia te oe. Ona tali atu lea o ia te i latou, ua faapea atu, O ai ea lo‘u tinā? O ai foi o‘u uso? Ona silasila solo ai lea o ia i e nonofo vagavagai ia te ia, ua faapea atu, Faauta i lo‘u tinā ma o‘u uso. Auā o lē faia le finagalo o le Atua o lo‘u uso lea, ma lo‘u tuafafine, ma lo‘u tinā.

E le o le tufuga ea lenei, le tama a Maria, o lona uso foi o Iakopo, ma Iose, ma Iuta, ma Simona? e le o iinei foi ea ia te i tatou ona tuafāfine? Ona latou tausuai ai lea ia te ia. A ua fetalai atu Iesu ia te i latou, E leai se perofeta e le mamalu, ua na o lona lava nuu, ma lona aiga, ma lona fale e le mamalu ai.

Auā ua fai mai Mose, Ia e ava i lou tamā ma lou tinā; i le ma lea, O lē fai upu leaga i le tamā po o le tinā, ia fasiotia lava ia. A ua outou fai mai, Afai e fai ane se tagata i le tamā po o lē tinā, Ai se mea ua ia te au e aoga ia te oe ua kopano lea, (o lona uiga, o le taulaga;) ona outou le toe tuuina atu lea ia te ia, ina ia faia se mea mā lona tamā po o lona tinā; ua outou faaleaogaina ai le afioga a le Atua i a outou uputuu, ua outou tuuina mai. O isi foi mea faapena e tele ua outou faia.

Ona tago lea o ia i le tama itiiti, ua faatu ia te ia i o latou luma; ua na siitia o ia i ona lima, ona fetalai atu lea ia te i latou, Ai sē talia se tama itiiti faapenei i lo‘u nei igoa, ua talia e ia o a‘u; ai se talia a‘u, e le o a‘u ua ia talia, a o ia na auina mai a‘u.

Ai se na te faatausuaiina se tasi o i latou nei i faatauvaa o e faatuatua mai ia te au, e lelei ia te ia pe ana noatia se maaolo i lona ua, ma lafoina o ia i le moana.

Ua o mai faresaio, ua fesili ia te ia, o tofotofo ia te ia, E tatau ea ina faatea e le tane lava avā? Ona tali atu ai lea o ia ia te i latou, ua faapea atu, Se a le mea ua poloai ai Mose ia te outou? Ona fai mai ai lea o i latou, Na tuu mai e Mose ia te i matou, ia matou tusia se tusi alei, ma faatea ia te ia. Ona tali atu lea o Iesu, ua faapea atu ia te i latou, Ona o le maaa o outou loto, na ia tusi atu ai lena poloaiga ia te outou; a e peitai talu le amataga o mea na faia, na faia i laua e le Atua o le tane ma le fafine. O le mea lea e tuua ai e le tane lona tamā ma lona tinā, a e faatasi ma lana avā, ona avea lea o i laua ma tino e tasi; o lea e le toe toalua ai i laua, a e peitai ua tino e tasi; o lenei, o e ua faatasia e le Atua, aua le faate‘aeseeseina e se tagata. Ua toe fesili ane ona soo ia te ia i lena mea i le fale. Ona fetalai atu ai lea o ia ia te i latou, Ai sē faatea i lana avā, a e fai avā i le tasi, ua mulilua o ia e agaleaga atu ai ia te ia. Afai foi e faatea e le fafine lana tane, a e fai ma avā a se tasi, ua mulilua o ia.

Ona latou au mai lea o tama iti ia te ia, ina ia pa‘i ane o ia ia te i latou; a ua vavao atu le au soo i e na aumaia. A ua silafia e Iesu, ona tiga ai lea o lona finagalo, ua na fetalai atu foi ia te i latou, Ina tuu mai ia o tama iti o e mai ia te au; aua le vavao ia te i latou; auā e faapei o i latou nei o e o i le malo o le Atua. E moni, ou te fai atu ia te outou, Ai se le talia le malo o le Atua faapei o se tama itiiti, e le sao lava ia i ai. Ona siitia lea e ia o i latou i ona lima, ua faaee foi ona aao i luga ia te i latou, ma faamanuia ia te i latou.

Ua e iloa tulafono, Aua e te mulilua; aua e te fasioti tagata; aua e te gaoi; aua e te molimau pepelo; aua e te agaleaga; ia e ava i lou tamā ma lou tinā.

Ona tali atu lea o Iesu, ua faapea atu, E moni, ou te fai atu ia te outou, ai se tasi ua ia tuua le fale, po o uso, po o tuafāfine, po o le tamā, po o le tinā, po o le avā, po o le fanau, po o fanua, ona o a‘u ma le tala lelei, e maua lava e ia taisautuaselau i lenei olaga, o fale, ma uso, ma tuafāfine, ma tinā, ma fanau, ma fanua, atoa foi ma sauaga, a o le ola atali e maua ai le ola e faavavau.

Le a‘oa‘o e, ua tusi mai Mose ia te i matou, Pe a oti le uso o le tasi tagata, ma tuu ai lana avā a e leai se fanau, ona fai lea o lana avā ma avā a lona uso, e faatupuina ai se gafa mo lona uso. Ia, sa i ai le au uso e toafitu; na fai avā le ulumatua, ua oti foi, ua leai se fanau. Ona fai avā lea ia te ia o lē aupito ane i ai, ua oti foi ia, ua leai foi sana fanau; ua faapea foi lona toatolu. Atoa uma le toafitu ua fai avā ia te ia, a ua leai lava se fanau. A e muliai oti le fafine. O lenei, a oo i le toe tu, pe a toe tu mai i latou, o ai so latou e ana le avā; auā sa fai avā le toafitu ia te ia? Ona tali atu lea o Iesu ia te i latou, ua faapea atu, E le o lenei ea ua outou sese ai, ina ua outou le iloa upu o Tusi, ma le mana o le Atua? auā pe a latou toe tutū mai i e ua oti, latou te le fai avā pe nofo tane; a e peitai latou te faapei o agelu o i le lagi. A o e ua oti, ma lo latou toe tu, ua outou le faitau ai ea i le tusi a Mose, i le laau talatala, na fetalai mai le Atua ia te ia, ua faapea, O a‘u o le Atua o Aperaamo, o le Atua foi o Isaako, o le Atua foi o Iakopo?

E tuuina atu foi le uso e le uso ia oti, e tuuina atu foi e le tamā lona atalii, e tutū atu foi le fanau i o latou mātua, ina ia fasiotia i latou.

Ua faapea mai le agelu ia te ia, Sakaria e, aua e te mata‘u; auā ua faafofogaina lau tatalo; e fanau lau avā o Elisapeta sou atalii, e te faaigoa ia te ia o Ioane. E ia te oe le fiafia ma le olioli; e toatele foi e fiafia i lona fanau mai. Auā e sili o ia i luma o le Alii; e le inu o ia i le uaina po o le ‘ava; e faatumuina foi o ia i le Agaga Paia e afua ina fanau mai o ia. E faaliliu e ia le fanauga a Isaraelu e toatele i le Alii lo latou Atua. E muamua atu o ia i ona luma ma le loto o Elia ma lona faamalosi, e faaliliu e ia loto o mātua i le fanau, e faaliliu foi e ua faalogogata i le poto o e amiotonu; e sauni le nuu e faatatauina mo le Alii.

O le ono o masina ua auina mai ai e le Atua o le agelu o Kaperielu i le aai o Kalilaia, o Nasareta le igoa, i le taupou o le aiga o Tavita, ua faufautane i le tagata e igoa ia Iosefa; o Maria foi le igoa o le taupou. Ua ulufale mai le agelu ia te ia ona faapea mai lea o ia, Si o‘u alofa ia te oe le ua alofaina, ua ia te oe le Alii; amuia oe i fafine. Ua vaai atu foi o ia, ona atuatuvale lea o ia i lana upu, ua taumanatunatu foi o ia, pe se a le uiga o lenei alofa. Ua fai mai foi le agelu ia te ia, Maria e, aua e te fefe; auā ua alofaina mai oe e le Atua. Faauta foi, o le a to oe, ma e fanauina se tama tane, e te faaigoa ia te ia o Iesu. E sili o ia, e ta‘ua foi o le Alo o le Silisili ese; e foai atu e le Alii o le Atua ia te ia le nofoaiga a Tavita lona tamā; e fai o ia ma tupu i le aiga o Iakopo e faavavau; o lona malo foi e leai sona gataaga. Ona fai atu lea o Maria i le agelu, A faapefea le mea nei; auā ou te lei iloa se tane? Ua tali mai le agelu, ua faapea mai ia te ia, E afio ifo le Agaga Paia i luga ia te oe, e faamalumalu ifo foi ia te oe le mana o le Silisili ese; o le mea lea e ta‘ua ai le tama paia, o le Alo o le Atua.

Ua faalogo mai Elisapeta i le alofa o Maria, ona osooso ai lea o le tama i lona manava; ua faatumuina foi Elisapeta i le Agaga Paia; ua alaga ia, ua leo tele, ua faapea mai, Amuia oe i fafine, amuia foi lē a fanau mai ia te oe. Pe faapefea foi lenei mea, ina ua sau le tinā o lo‘u Alii ia te au nei? Faauta foi, ua oo mai le leo o lou alofa i o‘u taliga, ona osooso ai lea o le tama i lo‘u manava ma le olioli.

Ua alu ae foi Iosefa mai Kalilaia, mai le aai o Nasareta, i Iutaia i le aai a Tavita, ua igoa ia Peteleema, auā o le aiga ia ma le gafa o Tavita, ia tusia faatasi ma Maria lana avā sa fāufautane ia te ia, ua to o ia. Sa i ai i laua, ona oo lea i ona po e fanau ai o ia. Ua fanau e ia lana tama ulumatua, ua ia aui ia te ia i le ie, ma faataoto ia te ia i le fale povi, auā latou te le ofi i le fale e tali ai malo.

Ua oo i le aso valu e peritome ai le tama, ona faaigoaina ai lea o ia o Iesu, na faaigoa ai e le agelu a o lei i le manava o lona tinā. Ua atoa ona aso o le faamamāina o ia, e tusa ma le tulafono a Mose, ona la au mai lea ia te ia i Ierusalema, e tuu atu ai i luma o le Alii; (pei ona tusia i le tulafono a le Alii, O tama tane ulumatua uma e taua i latou e paia mo le Alii;)

Ua la ofo ina ua iloa atu o ia e i laua; ona fai ane lea o lona tinā ia te ia, La‘u tama e se a le mea ua e faapea mai ai ia te i maua? Faauta, o i maua ma lou tamā sa ma saili lava ia te oe ma le tiga. Ona fai atu lea o ia ia te i laua, Se a ea le mea na oulua saili mai ai ia te au? lua te le iloa ea e tatau ona ou i le fale o lo‘u Tamā? A ua le lagona e i laua le upu ua fai mai ai o ia ia te i laua. Ua latou o ifo ma i laua, ua oo i Nasareta, ua anaana o ia ia te i laua; a o lona tinā ua taofi ia mea uma i lona loto.

O Iesu foi, ua faatoa oo i le tolugafulu o ona tausaga, ua manatu foi tagata, o ia le atalii o Iosefa, o le atalii ia o Heli, o le atalii ia o Matata, o le atalii ia o Levi, o le atalii ia o Meleki, o le atalii ia o Iana, o le atalii ia o Iosefa, o le atalii ia o Matatia, o le atalii ia o Amosa, o le atalii ia o Nauma, o le atalii ia o Eseli, o le atalii ia o Nagae, o le atalii ia o Maato, o le atalii ia o Matatia, o le atalii ia o Semei, o le atalii ia o Iosefa, o le atalii ia o Iuta, o le atalii ia o Ioana, o le atalii ia o Resa, o le atalii ia o Serupapelu, o le atalii ia o Salatielu, o le atalii ia o Neri, o le atalii ia o Meleki, o le atalii ia o Ati, o le atalii ia o Kosamo, o le atalii ia o Elemotamo, o le atalii ia o Eru, o le atalii ia o Iose, o le atalii ia Elisara, o le atalii ia o Iorimo, o le atalii ia o Matata, o le atalii ia o Levi, o le atalii ia o Simeona, o le atalii ia o Iuta, o le atalii ia o Iosefa, o le atalii ia o Ionano, o le atalii ia o Eliakimo, o le atalii ia o Melea, o le atalii ia o Mainano, o le atalii ia o Matata, o le atalii ia o Natano, o le atalii ia o Tavita, o le atalii ia o Iese, o le atalii ia o Opeta, o le atalii ia o Poasa, o le atalii ia o Salemona, o le atalii ia o Naasona, o le atalii ia o Aminatapu, o le atalii ia o Arama, o le atalii ia o Eseroma, o le atalii ia o Faresa, o le atalii ia o Iuta, o le atalii ia o Iakopo, o le atalii ia o Isaako, o le atalii ia o Aperaamo, o le atalii ia o Tara, o le atalii ia o Nakori, o le atalii ia o Seruka, o le atalii ia o Reu, o le atalii ia o Peleko, o le atalii ia o Eperu, o le atalii ia o Selaa, o le atalii ia o Kainano, o le atalii ia o Afasata, o le atalii ia o Semu, o le atalii ia o Noa, o le atalii ia o Lameko, o le atalii ia o Metusela, o le atalii ia o Enoka, o le atalii ia o Iareto, o le atalii ia o Maalaelu, o le atalii ia o Kainano, o le atalii ia o Enosa, o le atalii ia o Setu, o le atalii ia o Atamu, o le atalii ia o le Atua.

Ua o mai ia te ia lona tinā ma ona uso, a ua le masao mai ia te ia ona o le motu o tagata. Ua fai mai nisi ia te ia, ua faapea mai, Ua tutū lou tinā ma ou uso i fafo, ua fia feiloai ma oe. Ua tali atu ia, ua faapea atu ia te i latou, O e faalogo i le afioga a le Atua, ma latou faia, o lo‘u tinā ma o‘u uso lava ia.

O ai se tamā ia te outou e avatu ea e ia i lona atalii se maa, pe a ole mai se areto? pe a ole mai se i‘a, e avatu ea ia te ia se gata a e le o se i‘a? pe a ole mai se fuāmoa, e avatu ea ia te ia se akarava? O lenei, o outou e leaga, afai ua iloa e outou ona avatu o mea lelei mā a outou fanau; e le sili ea ona foaiina mai e lo outou Tamā o i le lagi le Agaga Paia i e ole atu ai ia te ia?

E fevaevaeai le tamā ma le atalii, o le atalii foi ma le tamā; o le tinā ma le tama teine, o le tama teine foi ma le tinā; o le tinā o le tane ma le avā a lana tama, o le avā foi ma le tinā o lana tane.

Afai e sau se tasi ia te au, a e le ‘ino‘ino i lona tamā, ma le tinā, ma le avā, ma le fanau, ma uso, ma tuafāfine e oo lava i lona ola, e le mafai ona fai o ia mo‘u soo. O se le ave lona satauro, ma ua le mulimuli mai ia te au, e le mafai ona fai o ia mo‘u soo.

Ua fetalai atu o ia, O le tasi tagata e toalua ona atalii. Ua fai atu le uii i lona tamā, Sena e, ia e au mai ia te au lo‘u tofi o le oa; ona vaelua lea e ia o ana mea ia te i laua. Ua mavae nai aso, ona faapotopoto ai lea e le uii mea uma, ua alu malaga i le nuu mamao, ua faataapeape ai ana mea i lea nuu, ua soona ulavale. Ua uma atu ana mea, ona oge tele ai lea o lea nuu; ona faatoa mativa ai lea o ia. Ua alu ia ua nofo i le tasi tagata o lea nuu, ua ia auina foi o ia i ona fanua e fafaga ai puaa. Ua tupu lona manao i atigi mea e ‘aina e puaa ia maona ai o ia; e leai lava se tasi ua avane sina mea ia te ia. Ona atamai ai lea o ia, ua faapea ane, E lē toatele ea o auauna a lo‘u tamā ua faulai a latou areto ua totoe; a o au, ou te matelaina. O le a a‘u tulai ma alu i lo‘u tamā, ou te fai atu ia te ia, Lo‘u tamā e, ua ou agasala i Lē o i le lagi, atoa ma ou luma; ua ou le toe aoga ona ta‘ua o lou atalii; ia e avea a‘u ia pei o se tasi o au auauna. Ona tulai lea o ia, ua alu i lona tamā. Ua iloa mamao atu foi o ia e lona tamā, ona mutimuti vale lea o lona alofa, ua momo‘e atu ia, ua fusi ia te ia, ma sogi atu ia te ia. A ua fai mai le atalii ia te ia, Lo‘u tamā e, ua ou agasala i Lē o i le lagi, atoa ma ou luma, ua ou le toe aoga ona ta‘ua o lou atalii. A ua fai atu le tamā i ana auauna, Au mai ia le ofu tatapuvae e aupito lelei, ma faaofu ia te ia; ma ia tuu se mama i lona lima, ma faasee i ona vae; au mai ia foi le tamai povi peti, ma fasi; tatou te aai ma olioli; auā o lo‘u atalii lenei, na oti, ua toe ola mai; na le iloa foi o ia, a ua maua. Ona latou olioli ai lea.

O sē faatea i lana avā, a e fai avā i se tasi, o le mulilua lea; o sē fai avā i le ua faateaina e lana tane, o le mulilua foi lea.

Ia outou ia te outou. Pe afai a e agaleaga mai lou uso ia te oe, ia e aoai atu ia te ia; pe afai e salamo ia, ia e faamagalo atu ia te ia. Pe afai e foi faafitu i le aso ona agaleaga mai o ia ia te oe, ma foi faafitu i le aso ona liliu mai ia te oe, ua faapea mai, Ua ou salamo; ia e faamagalo atu ia te ia.

Ua latou au mai tama meamea ia te ia, ina ia pa‘i ane o ia ia te i latou; ua iloa e le au soo, ona latou vavao lea ia te i latou. A o Iesu, ua valaau atu o ia ia te i latou, ua faapea atu, Ina tuu mai ia o tama iti e o mai ia te au, a e aua tou te vavao ia te i latou; auā e faapei o i latou nei o e o i le malo o le Atua. E moni, ou te fai atu ia te outou, Ai se le tali i le malo o le Atua e pei o se tama itiiti, e le sao lava ia i ai.

Ona fetalai atu lea o ia ia te i latou, E moni, ou te fai atu ia te outou, Ai se tagata ua tuua e ia le fale, po o mātua, po o uso, po o le avā, po o le fanau, ona o le malo o le Atua, e maua e ia o mea sautualasi i nei ona po, o le ola foi e faavavau i le olaga atali.

Ua o mai ia te ia isi o le au satukaio o e taofi e leai se toe tu; ua latou fesili mai ia te ia, ua faapea mai, Le a‘oa‘o e, ua tusi mai Mose ia te i matou, pe afai e oti le uso o le tasi tagata ua fai lana avā, a ua oti ia e leai sana fanau, ia fai avā lona uso i le fafine, ina ia tupu ai se gafa o lona uso. Ia, e toafitu le au uso; na fai avā le ulumatua, ua oti e leai sana fanau. Ona fai avā lea i le fafine o le aupito ane i ai, ua oti foi o ia e leai sana fanau. Ua fai avā foi i ai lona toatolu, ua faapea foi ua oo i lona toafitu, ua latou oti ua leai ni a latou fanau. A e muliai oti foi le fafine. A oo foi i le toe tu, o ai so latou e ana le avā? auā na fai avā ai le toafitu. Ona tali atu lea o Iesu, ua faapea atu ia te i latou, O tagata o le olaga nei, ua fai avā ma nofo tane i latou; a o e ta‘uaogaina ia maua e i latou lea olaga, ma le toe tu mai o e ua oti, latou te le fai avā, pe nofo tane;

A o i latou uma e na talia o ia, ma faatuatua i lona suafa, na ia avatu i ai o lea manuia, ia avea i latou ma fanau a le Atua. O i latou, e le o le toto na fanau ai, e le o le manao foi o le tino e le o le loto foi o le tagata, a o le Atua lava.

Ua oo i le aso tolu, ona fai ai lea o le tausamaaga i Kana i Kalilaia; sa i ai foi le tinā o Iesu.

O le tagata e ana le faatoanofotane, o le faatoafaiavā lea; a o le uo a le faatoafaiavā, e tu mai ma faalogo ia te ia, e tele lona olioli i le leo o le faatoafaiavā; o lea foi ua atoatoa ai lo‘u nei olioli. E ao ina tupu pea o ia: peitai a‘u nei, e tauāu ina itiiti o a‘u.

Ua fetalai atu Iesu ia te ia, Alu ia oe, valaau i lau tane, i le toe sau iinei. Ua tali mai le fafine, ua faapea mai, E leai sa‘u tane. Ona fetalai atu lea o Iesu ia te ia, Ua tonu lau upu, E leai sau tane; auā sa ia te oe tane e toalima; o ia foi ua ia te oe i ona po nei, e le sau tane lea; o le mea moni lava ua e fai mai na.

Ona iloa lea e le tamā, o le itu aso lava lea na fetalai atu ai Iesu ia te ia, Ua ola lou atalii. Ona talitonu lea o ia, atoa ma lona aiga uma.

ua faapea ane foi i latou, E le o Iesu ea lenei le atalii o Iosefa, ua tatou iloa lona tamā ma lona tinā? o lenei foi, pe faapefea ona fai mai o ia, ua ou alu ifo mai le lagi?

Ua maliu aue o ia, ua silafia le tagata ua tauaso talu ina fanau mai. Ona fesili mai lea o ona soo ia te ia, ua faapea mai, Rapi e, po o ai ea na agasala, po o ia nei, po o ona mātua, ina ua fanau mai o ia o tauaso? Ua tali atu Iesu, E lei agasala lenei tagata, po o ona mātua; a e peitai ina ia faaalia ai o galuega a le Atua ia te ia.

Ou te le tuua outou o mātuaoti, ou te sau ia te outou.

A fanau se fafine ua tiga ai o ia, auā ua oo i lona aso; a uma ona fanau mai o lana tama, ua le toe manatu e ia lona tiga, ona o le olioli, ina ua fanau mai le tagata i le lalolagi.

Sa tutū latalata ane i le satauro o Iesu lona tinā, ma le uso o lona tinā, o Maria le avā a Kalopa, ma Maria le Makatala. Ua silasila atu Iesu i lona tinā, ma le soo ua alofaina e ia, ua tutū mai, ona fetalai atu lea o ia i lona tinā, Sena e, faauta, o lau tama. Ua faapea atu foi i lea soo, Faauta, o lou tinā. Talu foi lea itu aso ua ave o ia e lea soo i lona aiga.

Ua finafinau pea i latou nei uma lava ma le loto gatasi i le tatalo ma le aioi, atoa ma fafine, ma Maria le tinā o Iesu, atoa foi ma ona uso.

O ona aso e gata ai, o loo faapea mai le Atua, e iu ina ou liligi ifo ai lo‘u Agaga i luga o tagata uma lava; ona perofeta mai lea o outou atalii ma o outou afafine, e iloa faaaliga e o outou taulelea, e fai miti foi o outou toeaina.

Auā o ia te outou ma a outou fanau le mea ua folafolaina mai, atoa ma e o mamao uma lava, o i latou uma e valaauina e le Alii lo tatou Atua.

o le tagata amio Atua, ma le mata‘u i le Atua, atoa ma lona aiga uma, o lē avatu mea alofa e tele i le nuu, ma ua tatalo i le Atua e le aunoa.

na te fai mai upu ia te oe, e faaolaina ai oe atoa ma lou aiga uma lava.

Ua papatisoina o ia atoa ma lona aiga, ona aioi mai lea o ia, ua faapea mai, Afai ua outou manatu o a‘u o lē faatuatua i le Alii, o mai ia i lo‘u fale, ma nonofo ai. Ua pulutia foi i matou e ia.

Ua fai atu i laua, Ina faatuatua ia i le Alii o Iesu Keriso, e ola ai oe atoa ma lou aiga. Ona la tautala atu loa i le afioga a le Alii ia te ia, ma i latou uma ua i lona fale. Ua na au mai foi ia te i laua i lea lava itu po, ma mulumulu atu o la ta; ona papatisoina loa lea o ia ma lona aiga uma. Ua na aveina ae foi ia te i laua i lona fale, ma laulau atu mea e ‘ai, ua olioli o ia ma lona aiga uma, ua faatuatua i le Atua.

Auā o le fafine nofo tane, ua noanoa ia e le tulafono i lana tane a o ola o ia; a e afai ua oti le tane, ona talaina lea o ia ai le tulafono i le tane. O lenei foi, afai e nofo tane o ia i se tasi, a o ola lana tane, e ta‘ua ia o le mulilua; peitai ane, afai ua oti lana tane, ona tuusaunoa lea o ia i le tulafono; i le, a nofo o ia i se tasi tane e le mulilua ai o ia.

Auā o i latou uma ua ta‘ita‘iina e le Agaga o le Atua, o atalii i latou o le Atua. Auā ua outou le maua le agaga o le pologa, e toe fefefe ai; a ua outou maua le Agaga o tamafai, tou te valaau atu ai, Ava, le Tamā e. O loo molimau mai lea lava Agaga i o tatou agaga, o fanau i tatou a le Atua. Afai foi o fanau i tatou, o suli foi, o suli lava o le Atua, o suli faatasi ma Keriso; pe afai tatou te tiga faatasi ma ia, ina ia faamanuiaina foi i tatou faatasi ma ia.

Auā o loo faatalitali mea uma na faia ma le naunau i le faaalia mai o atalii o le Atua. Auā ua faatoilaloina mea uma na faia i le iu vale, (e le o lona loto lea, a e peitai ona o ia na na faatoilaloina ai,) ma le faamoemoe ia tuusaunoa ia lava mea na faia ia le faapologaina e le iu vale, a e oo i le saolotoga o le fanau a le Atua e manuia ai. Auā ua tatou iloa, ua oi faatasi, ma oono faatasi mea uma lava na faia, ua oo mai lava i ona po nei.

Auā faapei o itu tino e tele i le tino e tasi, a e le tasi se faiva i itu tino uma; e faapea i tatou nei le toatele, ua tino e tasi ia Keriso, ma ua fefaafeagaiai itu tino.

A o mea na outou tusi mai ai, e lelei ona le tago se tagata i se fafine; a ona o le faitaaga, ia taitasi le tane ma lana lava avā, ia taitasi foi le fafine ma lana lava tane. Ia avatu le tane i le avā le agalelei e tatau ai, ia faapea foi le avā i le tane. E le pule le avā i lona lava tino, na o le tane; e faapea foi le tane, e le pule ia i lona lava tino, na o le avā. Aua ne‘i faafiti le tasi i le tasi, seia iloga lava lua te loto gatasi ai i nai aso, ina ia oulua faasaga i le anapogi ma le tatalo; ma ia toe faatasi ane i le mea e tasi, ina ne‘i faaosooso mai Satani ia te oulua, ona o lo oulua le lava onosai. O le mea tuufaitalia ou te fai atu ai, e le se poloaiga. A o lo‘u loto ia faapei o a‘u nei tagata uma; a e peita e taitoatasi ma lana lava mea alofa e maua mai le Atua, e taitasi ma lona uiga, o lea ma lea.

O la‘u lenei upu i tagata taataanoa ma fafine ua oti a latou tane, e lelei ona latou nonofo pea pei o a‘u nei. Peitai afai latou te le lavā oono, ia fai avā nofotane i latou, auā e lelei ona fai avā, a e leaga ona mu. Ou te fai atu foi i ie ua fai avā ma nofotane, e le o a‘u, a o le Alii, Aua le te‘a ese le avā i lana tane, afai foi e te‘a, ia nofo fua pea ia, pe toe lelei ma lana tane; aua foi le molia e le tane lana avā.

A o isi, o la‘u lenei upu ia te i latou, e le a le Alii; ai se tasi o le au uso ua i ai le avā le talitonu, ua loto ina la nonofo ma ia, aua le molia o ia; o se fafine foi o i ai le tane le talitonu, ua loto ina la nonofo ma ia, aua le faatea ia te ia. Auā e faapaiaina le tane le talitonu i le avā; e faapaiaina foi le avā le talitonu i le tane; ana le o lea po ua leaga a outou fanau; a o lenei, e paia i latou. Peitai afai e te‘a ese le le talitonu, ia te‘a ese pea ia. E le faapologaina se uso, po o se tuafafine, pe a faapeaina; a ua valaauina i tatou e le Atua i le filemu. Ua e iloa faapefea o oe le avā, pe ola lau tane ia te oe? ma oe le tane, ua e iloa faapefea, pe ola lau avā ia te oe?

A o taupou, ua ou le maua se poloaiga a le Alii ia te i latou; a ou te ta‘u atu lo‘u taofi, o a‘u foi ua alofagia e le Alii, ou te faamaoni ai. O la‘u taofi foi, e lelei lena mea ona o le faigata i ona po nei, e lelei foi i le tagata pe a faapea. Ua noatia ea oe i le avā? aua e te saili ina ia tatalaina; ua tatalaina ea oe i le avā? aua e te saili i se avā. A e ui lava ina e fai avā e te le agasala ai; afai foi e nofotane le taupou e le agasala ai o ia; a e oo i e ua faapea le puapuaga i le tino. A e ou te le faamamafa atu ia te outou. A o la‘u lenei e fai atu ai, le au uso e, ua itiiti ona aso ua totoe; o lenei, o e ua fai avā, ia peiseai ua le fai avā;

Ou te loto lava ina ne‘i popole outou. Ua popole le taataanoa i mea a le Alii i se mea e fiafia mai i ai le Alii; a o le ua fai avā, e popole ia i mea a le lalolagi i se mea e faafiafia ai le avā. E ese lē nofotane, a e ese le taupou; ua popole lē nofo fua i mea a le Alii, ina ia paia o ia, o le tino atoa ma le agaga; a o lē nofotane, e popole ia i mea a le lalolagi i se mea e faafiafia ai le tane. O la‘u lenei upu e fai atu ia te outou e aoga ai ia te outou; e le ina ia ou lafo se matāsele ia te outou, a e peitai ina ia matagofie ai; ina ia auauna lelei foi i le Alii ma le loto le fetosoaiina.

Afai foi e manatu se tasi ua faaleono lana amio i lona afafine taupou, afai ua matua lava ia, ma ona ua tatau ona ia faapea, ina fai ia e ia le mea e loto i ai, e le agasala ia; ia nofo o ia i lana tane. A o le ua mau lona loto, e leai se mea e faigata i ai, ua ia te ia foi le pule i lona lava loto, ma ua tonu lona loto i lenei mea ona ia taofi i lona afafine taupou, ua lelei lana mea e fai. O lenei, o lē faaavaga i lona afafine ua lelei lana mea e fai, a o le le faaavaga ia te ia ua sili ona lelei lana mea e fai. Ua noatia le fafine i le tulafono i aso uma e ola ai lana tane; a e afai ua oti lana tane, ua sa‘oloto o ia e nofotane i le ua loto i ai, tau lava i le ua i le Alii. A e afai e nofo fua pea ia, e sili lona manuia, o la‘u taofi lea; o lo‘u manatu foi ua ia te au le Agaga o le Atua.

A ou te loto ina ia outou iloa, o le ulu o tane taitoatasi o Keriso lea, o le ulu o le avā o le tane lea, a o le ulu o Keriso o le Atua lea. Ai se tane e tatalo pe perofeta ma lona ulu ua ufiufitia, ua faalemigao ia i lona ulu. Ai se fafine foi e tatalo pe perofeta ma lona ulu e le ufiufitia, ua faalemigao ia i lona lava ulu; auā o le mea e tasi lava lea ma le tafi o lona lauulu. Auā a le ufiufitia le fafine ia sele mamā lona lauulu; a e afai o le mea e masiasi ai ona sele mamā pe tafi, ia ufiufitia lava ia. Auā e le tatau i le tane ona ufiufitia e ia lona ulu, auā ua foliga o ia i le Atua, ma lē e viia ai o ia; a o le fafine o ia lē e viia ai le tane. Auā e le mai le fafine le tane, a o le fafine, mai le tane ia. Auā foi na le faia le tane ona o le fafine, a o le fafine ona o le tane. O le mea lea e tatau ai i le fafine ina ia i ai le ufiufi i lona ulu, ona o agelu. A e ui lava ina faapea, e leai se tane pe a le o i ai le fafine, e leai foi es fafine pe a le o i ai le tane, i le Alii; auā pei ona tupu mai o le fafine mai le tane, e faapea foi le tane i le fafine; a o mea uma lava mai le Atua ia. Ina manatunatu ifo ia outou, pe tatau ona tatalo o le fafine i le Atua ma le le ufiufitia. E le a‘oa‘o mai ea le mafaufau ia te outou, a uumi le lauulu o le tane, o le mea lava lea e mā ai o ia? A e afai e uumi le lauulu o le fafine, o le mea lea e viia ai o ia; auā ua foai mai lona lauulu e fai ma ufiufi ia te ia. A e afai e fia finau se tasi, e leai se tu faapea ia i matou, e leai foi i ekalesia a le Atua.

E onosai le alofa, e agamalu, e le losilosi le alofa, e le mitamita vale le alofa, e le faafefeteina, e le amio matagā, e le sailia e ia ana lava mea, e le faaitaitagofie, e le tuuina atu i nisi le leaga, e le fiafia i le amio leaga, a e fiafia i le faamaoni, e ufiufi i mea uma, e talitonu i mea uma, e faamoemoe i mea uma, e onosai i mea uma.

Ona po na ou itiiti ai, na ou tautala ai faatamaitiiti, na ou manatunatu faatamaitiiti, na ou filifili faatamaitiiti; a ua oo ina ou tagata matua, ona ou tiai lea o mea a tamaiti.

Aua le tautala o outou fafine i ekalesia; auā e le tuuina ia te i latou e tautala; a ia latou usiusitai, pei ona fai mai ai foi o le tulafono. Afai foi ua latou fia iloa se tasi mea, ia latou fesili atu ai i a latou lava tane i o latou fale; auā o le mea matagā ona tautala o le fafine i le ekalesia. Na alu atu ea le upu a le Atua nai ia te outou? po ua na o outou ea na oo atu i ai? Ai se tasi ua ta‘ua o le perofeta, po o le ua i ai le Agaga, ia iloa lelei e ia, o mea ou te tusi atu nei ia te outou, o poloaiga ia a le Alii. A e afai e le iloa e se tasi, ia le iloa pea e ia.

Aua tou te amo faalegatasi ma e le talitonu; auā pe faapefea ona faatasi o le amiotonu ma le amio leaga? Pe faapefea foi ona mafuta o le malamalama ma le pouliuli? Pe faapefea foi ona loto gatasi o Keriso ma Pelialo? Pe faapefea foi ona tofusia faatasi o lē talitonu ma le ua le talitonu? Pe faapefea foi ona loto faatasi o le malumalu o le Atua ma tupua? auā o outou le malumalu o le Atua soifua, pei ona fetalai mai o le Atua, Ou te nofo i totonu ia te i latou, ou te savali foi i totonu ia te i latou; e fai a‘u mo latou Atua, e fai foi i latou mo‘u tagata. O lea i o mai ai outou nai totonu ia te i latou, ma ia outou vavae mai, ua fetalai mai ai le Alii, aua foi tou te papai atu i se mea leaga; ona ou talia ai lea o outou, e fai foi a‘u mo outou Tamā, e fai foi outou mo‘u atalii ma o‘u afafine, ua fetalai mai ai le Alii e ona le malosi uma lava.

Auā ua ou maelega alofa ia te outou i le maelega e tatau i le Atua; aua ua uma ona ou fāufautane ia te outou i le tane e toatasi, ina ia ou momoli ia te outou o le taupou faamaoni ia Keriso.

Ou te fai atu foi, o aso uma o itiiti ai le suli, e ui lava o ia e ana mea uma, e leai se mea e ese ai o ia ma le pologa; a e pule ia te ia faatamā ma auauna e pule, seia oo atu i ona po na tuupoina e le tamā.

O atalii outou, o le mea lea ua auina mai ai e le Atua le Agaga o lona Alo i o outou loto, o valaau, Ava, le Tamā e. O lea e te le se pologa ai i ona po nei, a o le atalii; a e afai o le atalii, o le suli foi o le Atua ia Keriso.

ina ia le toe tama ninii i tatou o loo felafoaiina e pei o peau, ma feaveaiina i matagi uma lava o matāupu, i le pepelo o tagata, i togafiti leaga ua saunia e faasese ai.

O outou fafine, ia outou usiusitai i a outou lava tane, faapei ona usiusitai i le Alii. Auā o le tane o le ulu ia o le avā, pei o Keriso foi o le ulu ia o le ekalesia, o ia foi o le faaola o le tino. O lenei, faapei ona usiusitai o le ekalesia ia Keriso, ia faapea foi fafine i a latou lava tane i mea uma lava. O outou tane, ia outou alolofa atu i a outou lava avā, faapei o Keriso foi ona alofa mai i le ekalesia, ma foaiina mai e ia ia te ia e fai mona sui; ina ia faapaiaina ai, ina ua faamamaina i le faataeleina i le vai atoa ma le upu; ina ia na tuuina atu o ia ia te ia, o le ekalesia matagofie lava, e leai sona ila, po o se maanuminumi po o se tasi mea faapena, a ia paia ma ia le ponā. O loo faapea ona tatau ona alolofa o tane i a latou lava avā, faapei o latou lava tino; o lē alofa i lana lava avā, o loo alofa o ia ia te ia lava; auā e leai lava se tasi e ita i lona lava tino; a e peitai na te fafaga ma tausi atu i ai, faapei o le Alii foi ona tausi i le ekalesia; auā o itu lava i tatou o lona tino, ma lona aano, ma ona ivi. O le mea lea e tuua ai e le tane o lona tamā ma lona tinā, a e faatasi ma lana avā, ona avea ai lea o i laua o le tino e tasi. O le mea matuā lilo lenei; a ou te talaina atu nei ia Keriso atoa ma le ekalesia. A o outou, ia taitasi outou ma alofa i lana lava avā faapei o ia lava ia te ia; o le fafine foi ia ava o ia i lana tane.

O outou le fanau, ia outou faalogo i o outou mātua i le Alii, auā o le mea tonu lava lea. Ia e ava i lou tamā ma lou tinā; o le uluai tulafono lea ua i ai le mea ua folafolaina; ina ia manuia ai oe, ma ia e nofo tulu‘i ai i luga o le laueleele. O outou tamā foi, aua ne‘i tou faaonoono atu i a outou fanau, a ia tausi atu i ai i aoaiga ma apoapoaiga a le Alii.

O outou fafine, ia outou usiusitai atu i a outou lava tane, pei ona tatau i le Alii. O outou tane, ia outou alolofa atu i a outou avā, aua foi ne‘i faaonoono ia te i latou. O outou le fanau, ia outou faalogo i o outou mātua i mea uma; auā o le mea mālie lea i le Alii. O outou tamā, aua ne‘i faaita i a outou fanau, ina ne‘i faapalapala i latou.

A ua matou agamalu ina ua matou i ai ia te outou na, faapei o se failele na te tausi lelei i ana lava tama;

Pei ona outou iloa, sa matou i ai ia te outou taitasi, pei o le tamā i lana lava fanau, na matou apoapoai atu ia te outou, o faamafanafana atu foi, ma ta‘utino atu,

Ia faapea foi fafine, ia latou teuteu ia i latou i ofu e onomea, ma ia le teuanoai, a ia faamatuāfafine; aua ne‘i teteu ma le lauulu fili, po o auro, po o penina, po o ofu tau tele; a o galuega lelei, (o le mea lea e tatau i fafine ua ta‘ua latou e i latou o e amio Atua.) Ia a‘oa‘oina le fafine, a ia le tautala o ia, ma ia usiusitai lava. Auā ou te le tuuina atu i se fafine ia a‘oa‘o atu, pe pule i le tane, a ia nofo faalologo lava. Auā ua muamua ona faia o Atamu, a e mulimuli Eva. E lei ‘olegia foi Atamu, a ua ‘olegia le fafine, ona solitulafono lea o ia; a e faaolaina ia i le fanauga o tama, pe afai e tutumau pea i latou i le faatuatua, ma le alofa, ma le amio lelei, atoa ma le faamatuāfafine.

O lenei, e tatau i le epikopo ia le mata‘uleagaina, o lē faiavā i le fafine e toatasi, o lē mataala, o lē faautauta, o lē amio lelei, o lē alofa i tagata ese, o le na te mafaia ona a‘oa‘o atu. E le se inu tele i uaina, e le se fasi tagata, e le manumanu i oloa; a e agamalu, e le se fai finauga, e le se matapeapea i tupe; o lē pule lelei i lona lava aiga, o loo ua usiusitai mai ia te ia o lana fanau ma le fifilemu lava. (Auā afai e le iloa e se tasi ona pule i lona lava aiga, pe faapefea ona tausia e ia le ekalesia a le Atua?)

O fafine foi, ia faapea lava ona faamatuāfafine i latou, e le ni faatuaupua, a ia mataala, ia faamaoni i mea uma lava. O tiakono, ia taitasi ma lana avā e toatasi, ia pule lelei i la latou fanau ma o latou lava aiga.

Aua e te aoai atu i se toeaina, a ia aioi atu i ai, peiseai se tamā; o taulelea foi, peiseai o uso; o loomatutua, peiseai o tinā; o fafine muli foi, peiseai o tuafafine ia, ma ia le gaoiā lava. Ia ava i fafine ua oti a latou tane, o e ua ausage lava. Afai foi o i ai i se fafine ua oti lana tane ni ana tama po o fanau a ana tama, ia a‘oa‘oina i latou ia muamua ona agalelei i lo latou lava aiga, ma taui atu i o latou mātua; anā o le mea lelei lea ma le mālie i luma o le Atua.

A e afai e le tausi e se tasi i lona aiga, afai foi e le sili ona tausi i e mau ma ia, ua faafitia e ia le faatuatua, e sili foi lona leaga i le ua le faalogo.

Aua ne‘i faitauina se fafine ua oti lana tane seia oo i ona tausaga e onogafulu, sa toatasi foi lana tane; o loo ta‘uleleia foi ona o ana galuega lelei, pe afai ua tausia e ia ni fanau, pe afai ua na alofa i tagata ese, pe afai ua na mulumulu i vae o tagata paia, pe afai ua na agalelei atu i e ua puapuagatia, pe afai ua na tausisi i galuega lelei uma lava. A o fafine muli ua oti a latou tane, aua le talia i latou, auā pe a fia sa‘oloto i latou nai ia Keriso, ona fia nofotane ai lea o i latou; o loo i ai le faasala, ina ua latou lafoai i lo latou uluai faamaoni. E le na o lea, a e masani foi i latou ma le paie, e feoai i lea fale ma lea fale; e le gata foi ina latou paie, a e seona tautala, ma matamata fua i galuega a nisi, ma tautalatala i mea le tatau. O lenei, ou te loto ia nofotane o fafine muli, ia fanau ai tama, ia matai i latou i o latou aiga, ina ne‘i tuuina atu i loo tetee mai se mea e tasi e ta‘uleagaina ai i latou. Auā ua uma le liliueseina o isi ua mulimuli ia Satani. Ai se tane faatuatua, po o se fafine faatuatua o i ai ni fafine ua oti a latou tane, ia latou tausia i latou aua ne‘i mafatia ai le ekalesia; ina ia latou tausia fafine ua ausage lava.

A o oe, ia e tumau i mea ua a‘oa‘oina ai oe, ma ua mautinoa ia te oe, ina ua e iloa o ia na a‘oa‘o atu ai ia te oe; talu foi ina o e tama itiiti ua e iloa Tusi Paia, e mafaia ona faapoto ai ia te oe e iu ai i le ola i le faatuatua ua ia Keriso Iesu.

ai se tasi e le mata‘uleagaina, o le tane a le fafine e toatasi, o i ai ana fanau e faatuatua, e lei ta‘ua i latou ua ulavavale pe soli i tulafono.

ina ia latou a‘oa‘o atu i fafine muli latou te alofa atu i a latou tane, ia alofa atu i a latou fanau, ia faautauta i latou, ia le gaoiā, ia tausi lelei i o latou aiga, ia agalelei, ia usiusitai atu i a latou lava tane, ina ne‘i upuleagaina le afioga a le Atua.

E ui lava o ia o le Alo, a o mea sa tiga ai o ia na a‘oa‘oina ai o ia ia usiusitai,

O le faatuatua na fausia ai e Noa le vaa ina ua mata‘u, e ola ai lona aiga, ina ua a‘oa‘oina e le Atua i mea e lei vaaia i ia ona po, na ia faasalaina ai le lalolagi, ua na maua ai foi le amiotonu, o le amiotonu lea e i le faatuatua.

ua galo foi ia te outou le apoapoaiga o loo fetalaia mai ia te outou pei ona tautala i fanau, Lo‘u atalii e, aua le faatauvaa i lou manatu le aoaiga a le Alii; aua foi le faavaivai pe a aoaiina oe e ia. Auā o le ua alofagia e le Alii, ua aoai atu o ia ia te ia; ua sasaina foi e ia atalii uma ua talia e ia. Afai e talia e outou le aoaiga, o loo tausi mai le Atua ia te outou pei ona tausi i atalii; auā o ai se atalii ua le aoaiina e lona tamā? A e afai e aunoa outou ma le aoaiga, ua tofusia ai le fanau uma lava, o tama to i fale outou, a e le ni atalii. Auā foi sa ia i tatou tamā o tatou tino e na aoai mai ia i tatou, sa tatou faalogo i ai; a e le sili ea i se a ona tatou usiusitai i le Tamā o tatou agaga tatou te ola ai?

Ia lelei le faiavā i tagata uma, o le moega foi ia leai sona leaga; e faasalaina e le Atua o e faitaaga ma e mulilulua.

O lenei lava le amio Atua e lelei ma le faamaoni i luma o le Atua o le Tamā lea, ina ia tauasiasi atu i e matuā oti ma fafine ua oti a latou tane i o latou tiga, ia leoleo foi o ia ia te ia, ina ne‘i pisai mai o ia i le lalolagi.

Afai ua le ofu se uso po o se tuafafine, ua leai foi sana mea e ‘ai i lea aso ma lea aso, a fai atu so outou ia te i latou, Ina o ia outou ma le manuia, ia mafanafana, ma ia maoona, a ua le foai atu ia te i latou ni mea e tatau i le tino, se a lona aoga? E faapea foi le faatuatua, pe afai e le i ai galuega, e mate lava ia ina ua na o ia.

Ia faapea outou fafine, ia usiusitai i a outou lava tane, afai foi e le faalogo nisi i le upu, ia maua i latou i le amio lelei a avā, a e leai se upu, pe a latou vaai ane i a outou amio le gaoiā ma le mata‘u. Aua ne‘i faia i le tino a latou teuga, o le fili lea o le lauulu, ma le teuteu i auro, ma le oofu i ofu; a o le tagata lilo o le loto, ia teua lea i le mea e le pala, o le loto agamalu ma le filemu, o le mea tau tele lava lea i luma o le Atua. Auā sa faapea foi fafine paia anamua ona teuteu ia i latou, o e na faamoemoe i le Atua, na usiusitai i latou i a latou lava tane. Sa faapea Sara ona faalogo ia Aperaamo, na ia ta‘ua o ia o le alii; ua fai foi outou ma ana tama, pe a agalelei ma le le mata‘u i se mea e tasi e mata‘u ai. Ia faapea outou tane, ia nonofo faatasi ma i latou ma le poto, ia ava i le avā, auā o le ipu ia ua sili ona vaivai ia te oe, mona ua tofia faatasi i le ola e foaifuaina mai, ne‘i faalavelaveina a outou tatalo. O le iuga lenei, ia loto gatasi outou uma, ia fealofani, ia alolofa i le au uso, ia mutimuti vale i le alofa, ia agalelei;

Ia faapea o outou taulelea, ia usiusitai i toeaina; ia usiusitai outou uma lava o le tasi i le tasi, ia oofu outou i le loto maulalo; auā, E tetee atu le Atua i e faamaualuga, a e foaiina mai le alofa tunoa i e faamaulalo.

O i tatou, ua tatou iloa ua oo i tatou i le ola sa i le oti, auā o loo alolofa i tatou i le au uso; o se le alofa i le uso, o loo tumau ia i le oti. O i latou uma o e ita i o latou uso, o fasioti tagata i latou; ua outou iloa foi e leai sē fasioti tagata e tumau ia te ia le ola e faavavau. O le mea lava lenei ua tatou iloa ai le alofa, ina ua tuuina atu e ia o lona lava soifua e sui a‘i i tatou; e tatau foi ona tatou tuuina atu lo tatou ola e sui a‘i le au uso. O sē ua i ai le oa a le lalolagi nei, pe a iloa atu e ia lona uso ua mativa, a e punitia lona loto alofa ia te ia, pe faapefea ona tumau o le alofa i le Atua i lea tagata?

E tele lava lo‘u fiafia ina ua ou iloa ni au fanau o e savavali i le upu moni, faapei o le poloaiga ua tatou maua mai le Tamā.

E leai so‘u fiafia e sili i lenei, pe a ou faalogo ua savavali la‘u fanau i le upu moni.

Ua iloa foi le faailoga tele i le lagi, o le fafine ua ofu i le la, o i lalo o ona vae le masina, o i lona ulu foi le palealii fetu e sefulu ma le lua; ua to foi o ia; ua faatiga ma alaga i le tiga a fanau. Ua iloa foi le tasi faailoga i le lagi, faauta foi, o le tarako tele e mūmū, e fitu ona ulu ma ona nifo e sefulu; ua i ona ulu o palealii e fitu. Ua toso e lona iu i lona tolu o vaega o fetu i le lagi, ma lafo ifo ia i latou i le lalolagi. Ua tu foi le tarako i luma o le fafine o le a fanau, ina ia ‘ai e ia o lana tama pe a fanau. Ua fanau foi e ia o le tama tane, o le na te pule i nuu uma i le tootoo uamea; ona segia ae lea o lana tama i le Atua i lona nofoālii. Ona sola lea o le fafine i le vao, o i ai le mea ua saunia e le Atua e nofo ai o ia, ina ia latou fafaga ai ia te ia i aso e tasi le afe ma le lua o selau ma le onogafulu.

Ia tatou fiafia ma olioli, ma tuu atu le viiga ia te ia; auā ua oo mai le tausamaaga o le Tamai mamoe, o lona felutua foi ua saunia o ia e ia. Ua tuuina atu foi ia te ia ina ia ofu o ia i le ie vavae e mamā ma le pupula; auā o le ie vavae o le amiotonu lea a le au paia. Ua fai mai foi o ia ia te au, Ia e tusi, Amuia e ua tala‘iina i le tausamaaga o le Tamai mamoe. Ua fai mai foi o ia ia te au, O afioga moni ia a le Atua.

O a‘u foi o Ioane na ou iloa le aai paia, o Ierusalema fou, ua alu ifo mai le Atua i le lagi, ua saunia pei o se faatoanofotane ua teuteuina mo lana tane.

Ua alu ane foi ia te au le tasi o ia agelu e toafitu o e sa i ai ipu e fitu na tutumu i mala e fitu e gata ai, ua tautala mai foi o ia ia te au, ua faapea mai, Sau ia, ou te faaali atu ia te oe le faatoanofotane, o le faletua lea o le Tamai mamoe.

Ua fetalai mai le Agaga ma le faatoanofotane, Ina sau ia; ina fai atu foi ia o lē faalogo, Ina sau ia; o lē fia inu, ina sau ia, atoa ma lē manao i ai, ina ave fua ia le vai o le ola.