27 – Mafatiaga

A o le laau e iloa ai le lelei ma le leaga, aua e te ‘ai ai; auā o le aso e te ‘ai ai e te oti ai lava.

Ua fetalai atu o ia i le fafine, Ou te matuā faateleina le tiga o lou ma‘i to; e te fanau mai tama ma le tiga; e uai atu lou manao i lau tane, e pule foi o ia ia te oe. Ua ia fetalai atu foi ia Atamu, Ua e usiusitai i le upu a lau avā, ma ua e ‘ai i le laau na ou fai atu ai ia te oe, na faapea atu, e aua e te ‘ai ai; o le mea lea ua malaia ai le laueleele ona o oe; e te ‘ai ai ma le tiga i aso uma o lou ola; e tutupu mai ai o laau tuitui ma laau talatala ia te oe; e te ‘ai foi laau afu o le fanua; e te ‘ai foi au mea e ‘ai ma le afu o ou mata, seia e toe foi atu i le eleele; auā na faiina a‘i lava oe; auā o le efuefu oe, e te toe foi atu lava i le efuefu.

Ona fetalai mai lea o Ieova, Ua ou matuā vaai atu i le puapuaga o o‘u nuu o loo i Aikupito, ua ou faalogo foi i lo latou alaga ona o e pule faasaua ia i latou, ua ou iloa foi lo latou tiga. O lenei, ua ou alu ifo, ou te laveai mai ia te i latou ai lima o Aikupito, ma ou aveina ae i latou ai lea nuu i le nuu lelei ma le lautele, o le nuu o tafe ai le suāsusu ma le meli, o le mea e i ai sa Kananā, ma sa Hetī, ma sa Amorī, ma sa Perisē, ma sa Hivī, atoa ma sa Iepusē. O lenei, faauta, ua oo mai ia te au le alaga o le fanauga a Isaraelu, ua ou vaai atu lava i le sauaga o loo faasaua ai Aikupito ia te i latou.

O le a tau Ieova mo outou, a e faalologo outou.

Ua ia fetalai mai foi, Afai e te matuā faalogo i le leo o Ieova lou Atua, ma e fai le amio tonu i ona luma, ma e uai mai ou taliga i ana poloaiga, ma e tausi i ana sauniga uma lava, ou te le tuuina atu ia te oe se tasi o ia ma‘i na ou tuuina atu ia Aikupito; auā o a‘u o Ieova, o le na te faamaloloina oe.

Afai e te agaleaga lava i ai, ona alaga mai lea o ia ia te au, ou te faalogo lava i lona alaga mai.

A ia outou auauna ia Ieova lo outou Atua, ona faamanuia lea e ia lau mea e ‘ai atoa ma lou vai; ou te faatea ese foi ma‘i ia te oe.

Afai foi ua oo ina mativa lou uso, ua na le toe lavā se mea; ona e fesoasoani ai lea ia te ia; e ui lava o ia le tagata ese ma le āumau; ina ia nofo lava o ia faatasi ma oe.

Ou te avatu le filemu i le nuu, tou te taooto foi, e leai se tasi e faamatau ia te outou; ou te faaumatia foi manu feai ai le nuu, e le oo foi le pelu i lo outou nuu.

afai foi tou te lafoai i a‘u tulafono, ma outou ‘ino‘ino i a‘u faamasinoga, a outou le faia foi a‘u poloaiga uma, a e tuumavaega outou i la‘u feagaiga; ona ou faia lea e a‘u o nei mea ia te outou; ou te tuuina atu ia te outou le fefe, o le ma‘i faaiiva, ma le ma‘i vevela e fole ai mata, ma faavaivai ai loto; tou te lulufuaina a outou saito, auā e ‘aina e i latou o e fai outou mo latou fili. Ou te faia outou mo‘u fili, e fasia foi outou i luma o e ita ia te outou; e pule foi ia te outou e o ‘ino‘ino ia te outou; e sosola foi outou a o le tuliloaina e se tasi.

A oo ia te oe le puapuaga, a maua foi oe e ia mea uma lava i aso amuli, afai e te toe foi atu ia Ieova lou Atua, ma e faalogo i lona siufofoga, (auā o Ieova lou Atua, o le Atua alofa ia,) na te le tuuna oe, na te le faaumatia oe, e le galo foi ia te ia le feagaiga ma ou tamā, na ia tauto ai ia te i latou.

E ave ese e Ieova o ma‘i uma lava ia te oe, na te le tuuina mai ia te oe se tasi ma‘i o ma‘i leaga o Aikupito na e iloa, a e tuuina atu ia te i latou uma o e ‘ino‘ino ia te oe.

Na le pala ou ofu na e ofu ai, o ou vae foi na le fulafula i ia tausaga e fagafulu. E te iloa foi i lou loto e faapei o se tagata ona aoai i lona atalii, e faapea lava ona aoai o Ieova lou Atua ia te oe. O lenei, ia e tausiusi i poloaiga a Ieova lou Atua, ina ia e savali i ona ala, ma ia mata‘u ia te ia.

e le talia foi e ia se taui; o le na te faamasinoina mo le ua mātuaoti ma le fafine ua oti lana tane; o le alofa atu i le tagata ese, ua avatu ai ia te ia le mea e ‘ai atoa ma ofu.

Faauta mai, ou te tuuina atu i o outou luma i le aso nei le manuia ma le malaia; o le manuia pe afai tou te faalogo i poloaiga a Ieova lo outou Atua, ou te fai atu ai ia te outou i le aso nei; a o le malaia pe afai tou te le faalogo i poloaiga a Ieova lo outou Atua, a e o ese i le ala ou te fai atu ai ia te outou i le aso nei, tou te mulimuli ai i atua ese ua outou le iloa.

A ē alu atu e tau ai se taua ma lou fili; a ē ilo atu solofanua, ma kariota, ma le nuu e sili ona toatele ia te oe, aua ne‘i e fefe ia te i latou; auā o ia te oe Ieova lou Atua, o le na aveina ae oe ai le nuu o Aikupito.

Afai foi e te matuā faalogo i le siufofoga o Ieova lou Atua, e anaana e fai ana poloaiga uma lava ou te fai atu ai ia te oe i le aso nei, ona faasilisiliina lea o oe e Ieova lou Atua, i nuu uma lava o le lalolagi;

Ou te valaau i le lagi ma le lalolagi i le aso nei e fai ma molimau ia te outou, ua ou tuuina atu i ou luma o le ola ma le oti, o le manuia ma le malaia; o lenei, ia e filifili i le ola, ina ia ola ai oe atoa ma lau fanau; ina ia e alofa atu ia Ieova lou Atua, ma e faalogo i lona siufofoga, ma ia e pipii atu ia te ia; auā o lou ola ia, ma le na te faafualoaina ou aso; ina ia e mau i le laueleele sa tauto ai Ieova i ou tamā, o Aperaamo, ma Isaako, ma Iakopo, e foaiina atu ia te i latou.

Ia outou faamalolosi, ma outou loto tetele; aua tou te fefefe, aua foi ne‘i matatau i o latou luma; auā o Ieova lou Atua, lua te o faatasi ma ia; na te le tuuna oe, na te le lafoai ia te oe.

O Ieova foi, o ia na te savali i ou luma; lua te faatasi ma ia, na te le tuuna oe, na te le lafoai ia te oe; aua e te fefe, aua foi e te mata‘u.

O lenei, ia outou iloa o a‘u, o a‘u lava o ia, e leai foi se atua e toalua ma a‘u; ou te fasiotia, ma ou faaolaina; ou te taia, ma ou faamaloloina; e leai foi se na te laveai mai ai lo‘u lima.

Ou te lei fai atu ea ia te oe? Ia e faamalosi, ma loto tele; aua e te fefe, aua e te mata‘u; auā o Ieova lou Atua o loo ia te oe i mea uma e te alu i ai.

Ua fai atu foi Iosua ia te i latou, Aua tou te fefefe, aua foi tou te matatau, ia outou malolosi, ma ia loto tetele; auā e faapea lava ona faia e Ieova i e ita mai uma lava ia te outou, tou te tau ma i latou.

O Ieova na te fasioti, ma faaola; na te faaoo ifo i le tuugamau, ma faafoi ae. O Ieova na te faamativaina, ma faatamaoaigaina; o ia na te faamaulaloina, ma faamaualugaina; na te faatulaiina le tagatālautele nai le eleele, na te faaeaina foi le tagata mativa nai le faatăfuna, ia nofo faatasi ma alii, ia fai foi mo latou tofi le nofoālii mamalu; auā o loo ia Ieova faavae o le lalolagi, ua na faaee ai le atu laulau.

Ona faia lea e Tavita i lea mea o le fata faitaulaga ia Ieova; ua fai ai taulaga mu ma taulaga faafetai. Ona faafofoga lea o Ieova i le tatalo mo le nuu, ma na taofia le faamai ia Isaraelu.

O ona po ia na ma‘i ai Esekia, ua tāli oti. Ona sau ai lea ia te ia o le perofeta o Isaia le atalii o Amota, ua fai mai ia te ia, O loo faapea ona fetalai mai o Ieova, Sauni ia sau mavaega i lou aiga, auā o le a e maliu, e te le soifua. Ona liliu atu ai lea ona fofoga i le pa o le fale, ua tatalo atu ia Ieova, ua faapea atu, Ieova e, ou te aioi atu, ia e manatu mai i lo‘u savali i ou luma ma le faamaoni, ma le loto atoa, ua ou faia foi mea ua e finagalo i ai. Ona tagi lotulotu lea o Esekia. Ona oo mai ai lea o le afioga a Ieova ia Isaia, a o lei oo ia i le lotoā tuloto, ua faapea mai, Foi atu ia, ma ia e fai atu ia Esekia le ta‘ita‘i o lo‘u nuu, O loo faapea ona fai mai o Ieova le Atua o Tavita lou tamā, Ua ou faalogo i lau tatalo, ua ou iloa ou loimata; faauta foi, ou te faamalolo ia te oe, e te alu ae i e luā i le fale o Ieova. Ou te faaopoopo i aso o lou ola o tausaga e sefulu ma le lima; ou te laveai foi ia te oe atoa ma le aai nei i le lima o le tupu o Asuria; ou te faamamaluina foi le aai nei ona o a‘u lava, ona o Tavita foi la‘u auauna.

Ia outou mitamita i lona suafa paia; ia olioli loto o e sailiili ia Ieova. Saili ia outou ia Ieova ma lona malosi; sa iliili ia te ia, aua le aunoa. Faamanatu ia outou i ana mea mamana na ia faia, o ona vavega, atoa ma faamasinoga o lona fofoga;

afai e faamaulalo lo‘u nuu ē ua ta‘ua i lo‘u igoa, ma latou tatalo, ma sailiili ia te au, ma liliu ese i o latou ala leaga, ona ou faalogo ai lea mai le lagi, ma faamagalo i a latou agasala, ma faaolaina lo latou nuu. O lenei, e vaavaai o‘u mata, ma liliu o‘u taliga i le tatalo e faia i lenei mea.

O ia te ia le lima o le tagata, a o ia te i tatou Ieova lo tatou Atua e fesoasoani mai ia te i tatou, ma tau ai o tatou taua. Ua faalagolago foi le nuu i upu a Esekia le tupu o Iuta.

ona sau lea o le tasi auauna ia Iopu, ua faapea mai, Sa suatia le fanua e povi, sa aai foi asini fafine i o latou tafatafa; Ona feosofi mai lea o tagata o Seepa, ma latou faoa; ua latou fafasi foi i auauna i le pelu; ua ou sao mai, na o a‘u lava e toatasi, e ta‘u mai ai ia te oe. O loo tautala mai lena, a e sau foi le tasi, Ua faapea mai, Ua paū ifo le afi ai le Atua mai le lagi, ua susunu ai mamoe ma auauna, ua faaumatia ai i latou; ua ou sao mai, na o a‘u lava e toatasi, e ta‘u mai ai ia te oe. O loo tautala mai lena, a e sau foi le tasi, ua faapea mai, Na tofia ‘au e tolu e Kaletaia, ona feosofi mai lea o i latou i kamela, ma latou faoa, ua latou fafasi foi i auauna i le pelu; ua ou sao mai, na o a‘u lava e toatasi, e ta‘u mai ai ia te oe. O loo tautala mai lena, a e sau le tasi, ua faapea mai, Sa aai ma feinu uaina ou atalii ma ou afafine i le fale o lo latou uso ulumatua; faauta mai foi, sa agi mai le matagi tetele mai le vao, na pesi mai i tulimanu e fa o le fale, ona paū ai lea i luga o taulelea, ua oti ai i latou; ua ou sao mai, na o a‘u lava e toatasi, e ta‘u mai ai ia te oe. Ona tulai ai lea o Iopu, ma saei lona ofu, ma tafi lona ulu, ua faapaū foi o ia i le eleele ma ifo.

Ua fai atu foi o ia, Na ou sau lē lavalavā mai le manava o lo‘u tinā, o le a ou foi atu i ai ua le lavalavā; na foaiina mai e Ieova, ua aveeseina foi e Ieova; ia faamanuina le suafa o Ieova.

Ona tali mai ai lea o Satani ia Ieova, ua faapea mai, O le pa‘u e sui a‘i le pa‘u; o mea uma foi ua i ai i le tagata, e avatua e ia e sui a‘i lona ola. A e peitai ia e aapa atu lou aao, ma e tago atu i ona ivi ma ona aano, pe na te le faifai ai ea ia te oe i ou lava luma? Ona fetalai atu lea o Ieova ia Satani, Faauta, o ia o i lou lima, tau o lona ola e te faasaoina. Ona alu ese ai lea o Satani i luma o Ieova, ma na faaoo ia Iopu le ma‘i papala leaga, e gata ae i ona alofivae, e gata ifo i lona tumuai. Ona tago ai lea o Iopu i le ta‘egaipu omea, e valu a‘i ia te ia; ia nofo foi o ia i lalo i le lefulefu.

Ona fai mai ai lea o lana avā ia te ia, Ua e taofi mau pea ea i lau amiotonu? Ina faifai ia e oe o le Atua, ma e oti ai. Ona fai atu ai lea o ia ia te ia, Ua e tautala mai, e pei ona tautala mai o se tasi o le vao fafine vālea; ua tatou talia mea lelei mai le Atua, a e tatou te le talia ea ma mea leaga? Ua le agasala Iopu i nei mea uma i ona laugutu.

Ua faalogo uo e toatolu a Iopu i nei mea leaga uma ua oo atu ia te ia, ona latou o mai ai lea e taitoatasi mai lona nuu, o Elifasa le Timanu, o Pilitati le Sua, ma Sofara le Naama; ua latou filifili ua loto gatasi e o mai e faamafanafana ia te ia, ma faamatalaloto atu ia te ia. Na latou vaai mamao atu, ua latou le iloa o ia; ona latou fetagisi ai lea ua leo tetele; ua latou taitoatasi ma saei lona ofu, ma asu ae i luga le efuefu i o latou ulu. Ona nonofo ai lea o i latou ma ia i le eleele i ao e fitu ma po e fitu, a e lei tautala atu o i latou sina upu ia te ia; auā ua latou iloa, ua matuā tele lava lona tiga.

Faauta mai, amuia le tagata ua aoaiina e le Atua; o le mea lea aua e te ta‘ufaatauvaaina ai aoaiga a Le e ona le malosi uma lava. Auā o ia na te faatigaina, o ia foi na te fusia; o ia e manua ai, o ona aao foi e fofō ai.

Ona i ai pea lea sina o‘u faamatalaloto; ou te olioli foi i le tiga; aua na te faasaoina; auā sa ou le natia afioga a le Paia. Po o le a ea lo‘u malosi, ou te faamoemoe ai i se mea? Po o le a foi lo‘u iuga, ou te faatoatoa ai pea?

O le ua tigaina e tatau ona alofagia o ia e lana uo; a ua tuua e ia le mata‘u i Le e ona le malosi uma lava.

Ua liloia lo‘u tino i tuga, ua to‘ato‘a ai le eleele; ua iliganoa lo‘u pa‘u, ma ua toe sua.

Seia faatumuina e ia lou fofoga i le ‘ata‘ata, ma ou laufofoga i le alaga fiafia.

Ua musu lo‘u loto i lo‘u ola; ou te tuuina atu a‘u ia tagi pea; ou te tautala i le tiga o lo‘u loto.

Auā e galo ia te oe le puapuaga, e te manatua foi e pei o le vai ua tafe atu. E oo mai foi ou aso e sili ona malamalama i le aoauli; ua e i ai nei i le pouliuli, a e avea oe e pei o lea taeao. E fai sou faatuatua, auā o loo i ai le faamoemoe; o loo e mā nei oe, a e te toato ma le filemu. E te taoto foi, a e leai se na te faamatau mai; e toatele foi e ole atu ia te oe.

Auā ua outou fatu fua lava tala pepelo, o fomai le aoga lava outou uma.

E ui lava ina fasioti o ia ia te au, ou te faamoemoe pea ia te ia; a e peitai ou te faatonu atu o‘u ala i ona luma.

E palagia lava o ia e pei o le mea ua pala, e pei o se ofu ua atia e le mogamoga.

A e tigaina lona lava tino, ma faanoanoa lona lava loto.

Ua pipii o‘u ivi i lo‘u pa‘u ma lo‘u aano, ua ou sao ma le pa‘u o o‘u nifo.

Auā ua ou iloa, o loo soifua le na te togiolaina a‘u; o aso amuli foi e tulai mai ai o ia i luga o le eleele. E ui lava foi ina faaumatia lenei tino pe a mavae atu lo‘u pa‘u, a e ou te iloa atu le Atua i lo‘u tino;

O lenei, ua faavaivaia lo‘u loto i totonu ia te au; ua maua a‘u i aso o le puapuaga. Ua tiga tele lava o‘u ivi i le po, e le mapu i le gāoi o lo‘u tino.

Ua sapotuvale lo‘u manava, ma ua le to‘a filemu; ua oo mai ia te au aso o le puapuaga. Ua ou fealuai ua uliuli a e le o le la; ua ou tulai i le faapotopotoga, ma ou alaga. Ua avea a‘u ma uso o tanimo, ma uo o iaena. Ua uliuli lo‘u lava pa‘u, ua mu foi o‘u ivi i le vevela.

Ua aoaiina o ia i luga o lona moega i le tiga, ma le tiga tele o ona ivi e le aunoa. Ua ‘ino‘ino foi o ia i mea e ‘ai, ua le manao foi i mea suamalie. Ua faaumatia lona aano, ua le iloa; ua aliali mai ona ivi sa le iloa. Ua faalatalata foi o ia i le tuugamau, ma lona ola i e fasioti.

E tatau lava ina fai atu i le Atua, Ua aoaiina a‘u, ou te le toe agaleaga. O se mea ua ou le iloa ia e a‘oa‘o mai ai e oe ia te au; afai ua ou faia se amio leaga, ou te le toe faia.

Ua uma ona tatalo Iopu mo ana uo, ona faaae ai lea e Ieova o lana tafeaga. Ua toe au mai foi e Ieova o mea ia Iopu ua faateleina, ua lua mea i mea uma na muai ia te ia. Ona o mai lea ia te ia ona uso uma, ma ona tuafafine uma, ma i latou uma sa muai masani ma ia; ua latou aai foi faatasi ma ia o mea e ai i lona fale; ua latou faamafanafana foi ia te ia, ma faamatalaloto ia te ia ona o mala uma na faaoo mai e Ieova ia te ia. Ua foai mai foi ia te ia e i latou taitoatasi le tupe e tasi, taitoatasi foi ma le mama auro e tasi.

Ua tutū mai tupu o le lalolagi, ua pulega faatasi foi alii, e tetee atu ia Ieova ma le na ia faauuina, Se‘i tatou motusi ese o laua noataga, ma lafoaieseina a laua maea ia te i tatou. E soisoi le o afio i le lagi; e tauemu le Alii ia te i latou.

A o oe, Ieova e, ua fai oe mo‘u talita; o lo‘u mamalu foi, ma lē faaeaina lo‘u ulu. Na ou valaau ia Ieova i lo‘u leo; ua faafofoga mai foi o ia ia te au mai lona mauga paia. Selā. Na ou taoto lava a‘u, ma ou moe; na ou ala, auā ua lagolagoina mai Ieova ia te au. Ou te le fefe i manomano o tagata, o e siosio mai ia te au.

Ou te taoto, ma ou moe filemu; auā o oe Ieova e, na o oe lava, ua ou nofo ai ma le filemu.

Ieova e, ia e alofa mai ia te au, auā ua vaivai lava a‘u; Ieova e, ia e faamalolo mai ia te au, auā ua tetemu lava o‘u ivi. Ua matuā polepole vale foi lo‘u loto; a o oe Ieova e, seia afea? Ieova e, ia e toe foi mai, ia e laveai i lo‘u agaga; ia e faaola mai ia te au ona o lou alofa.

O Ieova e fai ma ‘olo maualuga mo le ua faasauaina, o le ‘olo maualuga i ona po e i ai le puapuaga. E faatuatua ia te oe o e ua iloa lou suafa; auā, Ieova e, e te le tuuna i latou o e saili ia te oe.

Ieova e, ia e alofa mai ia te au, ia e silasila mai i lo‘u puapuaga na tupu mai i e ua ‘ino‘ino mai ia te au, o oe na o le ua aveina ae a‘u ai faitotoa o le oti;

Ua e silafia lava, auā o oe lava, e te silasila i le tiga ma le ita, ina ia tuu atu ai i lou aao; o le ua tigaina e tuuina o ia e ia ia te oe; o oe lava o le fesoasoani o le ua mātuaoti.

Ou te filifili a‘u ma le faanoanoa i lo‘u loto i aso uma seia afea? E faamaualugaina e sili ia te au le ua ita mai ia te au seia afea? Ieova e lo‘u Atua, ia e silasila mai ma tali mai ia te au; ia e faamalamalamaina o‘u mata, ne‘i ou moe i le oti;

Ou te tuu Ieova i o‘u luma e le aunoa; auā o i lo‘u itu taumatau o ia, e le faagaeetia ai lava a‘u. O le mea lea e fiafia ai lo‘u loto, ma olioli ai lo‘u mamalu; e malolo foi lo‘u tino ma le saogalemu. Auā e te le tuua a‘u i le tuugamau; e te le tuu atu lou tagata paia ia oo i ai le pala. E te faailoa mai ia te au le ala o le ola; o i ou luma le fiafia e mālie ai; o i lou itu taumatau le olioli e faavavau.

Ia e leoleo mai ia te au e pei o le tamatamai mata; ia e natia a‘u i le paolo o ou apaau, i luma o e amio leaga, o e faasaua mai ia te au, o e ita mai ia te au, o e siosio ia te au ia a‘u oti.

Ieova e, lo‘u malosi, ou te alofa lava ia te oe. O Ieova o lo‘u papa ia, ma lo‘u ‘olo, ma lo‘u faaola; o lo‘u Atua, o lo‘u papa, ou te faatuatua ia te ia; o lo‘u talita, ma le nifo o lo‘u olataga, o lo‘u ‘olo maualuga. Ou te valaau ia Ieova, e tatau ona viia o ia; o lea e faaolaina ai a‘u i e ua ita mai ia te au. Na siosiomia a‘u i mailei e oti ai, na faamatautia foi a‘u i tafega a e ulavavale. Na siomia a‘u i mailei a seoli; na ou lumanai o matāsele a le oti. Ona ou valaau atu ai lea ia Ieova i lo‘u puapuaga, ma ou alaga atu i lo‘u Atua; na faafofoga mai o ia i lona malumalu i lo‘u leo, na oo atu ia te ia la‘u alaga i ona lava fofoga.

Auā e le ta‘ufaatauvaa o ia, e le ‘ino‘ino foi o ia i le puapuaga o le ua puapuagaina; e le liliu ese foi e ia ona fofoga ia te ia; na tagi atu o ia ia te ia, ona faafofoga mai ai lea o ia.

O Ieova, o lo‘u leoleo mamoe o ia; e leai se mea ou te mativa ai. Na te ave a‘u i le mea e i ai le vao mu‘a ou te taoto ai; na te ta‘ita‘i ia te au i tafatafa o vai e tafe lemu. Na te faafoisia mai lo‘u agaga; na te ta‘ita‘i ia te au i ala o le amiotonu ona o lona suafa. E ui lava ina ou savali i le vanu o le ata o le oti, ou te le fefe lava i se mea leaga; auā o oe ta te faatasi ma a‘u; o lau laau ma lou tootoo e faamafanafanaina ai a‘u. E te laulau mai mea i le laoai ma a‘u i luma o e ita mai ia te au; ua e faauuina lo‘u ulu i le suāuu; ua taumasuasua la‘u ipu. E moni e mulimuli mai ia te au le agalelei ma le alofa i aso uma o lo‘u ola; ou te nofo foi i le fale o Ieova i aso e tele lava.

Ia e liuliu alo mai ia te au, ma alofa mai ia te au; auā o a‘u ou te toatasi ma puapuagaina. Ua faateleina puapuaga o lo‘u loto; ia e aveeseina a‘u i mea ou te tiga ai. Ia e silasila mai i lo‘u puapuaga ma lo‘u tiga; ma ia e faamagaloina a‘u agasala uma lava.

O Ieova, o lo‘u malamalama ia, ma lo‘u olataga: o ai ea se ou te fefe ai? O Ieova, o le malosi ia o lo‘u ola; ou te mata‘u ea ia te ai? Na sii taua mai ia te au tagata amio leaga, ina ia ‘ai lo‘u tino o e saua mai ma e ita mai ia te au; ona tausuai lea o i latou, ma latou pauu. E ui lava ina to lauapi se itu taua e tau ma a‘u, e le fefe ai lo‘u loto; e ui ina siitia se taua ia te au, ou te loto tele lava i lea mea. E tasi le mea ua ou ole atu ai ia Ieova, o le mea lava lea ou te saili atu ai; ia ou nofo i le fale o Ieova i aso uma o lo‘u ola, ina ia ou iloa atu ai le matagofie o Ieova, ma ou saili i lona malumalu. Auā na te faalilo ia te au i lona fale apitaga i le aso vale; na te natia a‘u i le mea lilo i lona fale fetafai; na te faaeetia a‘u i le papa.

E ui lava ina tuua a‘u e lo‘u tamā ma lo‘u tinā, a e talia a‘u e Ieova.

O Ieova, o lo‘u malosi ma lo‘u talita o ia; na faatuatua lo‘u loto ia te ia, ona ou maua ai lea o le fesoasoani; o lea e fiafia ai lo‘u loto, ma ou vivii atu ia te ia i la‘u pese.

Ieova e lo‘u Atua, na ou alaga atu ia te oe, ona e faamaloloina ai lea o a‘u. Ieova e, ua e avae ia te au ai le tuugamau; ua e faaolaina a‘u, ne‘i ou alu ifo i le lua. O outou na o ona tagata amio Atua, ia outou pepese atu ia Ieova, ma ia outou vivii pe a manatua lona paia. Auā o lona toasa ua se emo o le mata lea, a o lona alofa tunoa o le ola lava lea; e afe ane le tagi i le afiafi, a o le alaga fiafia i le taeao.

Se a le aoga o lo‘u toto i lo‘u alu ifo i le tuugamau? E vivii ea le eleele ia te oe? Pe na te faaali atu ea lou faamaoni? Ieova e, ia e faafofoga mai, ma alofa mai ia te au. Ieova e, ia fai oe mo‘u fesoasoani. Ua e liua lo‘u tagitu‘i i le siva; ua e talaeseina lo‘u ie talatala, a e fusia a‘u i le fiafia; ina ia pese atu ia te oe lo‘u mamalu, ma le le mapu; Ieova e lo‘u Atua, ou te vivii atu ia te oe e faavavau lava.

Ia e liliu mai ou fofoga ia te au; ia e vave laveai ia te au; ia fai oe mo‘u papa malosi, o le ‘olo mauga ou te ola ai. Auā o oe lava lo‘u papa, ma lo‘u ‘olo; ia e ta‘ita‘i mai ma tausi ia te au ona o lou suafa.

Ieova e, ia e alofa mai ia te au, auā ua ou puapuaga; ua fole o‘u mata, atoa ma lo‘u agaga, ma lo‘u manava, i le tiga. Auā ua faauma lo‘u ola i le faanoanoa, ma ou tausaga i le mapuitiga; ua faavaivaiina lo‘u malosi i a‘u agasala, ua gagase foi o‘u ivi. Ua faalumaina a‘u e i latou uma o e ita mai ia te au, a e sili lava i latou matou te tuaoi; ua avea a‘u ma faamatau i e sa matou masani; ua sosola ese ia te au o e iloa mai a‘u i fafo. Ua faagalogaloina a‘u e pei o le ua oti, ua le manatua lava; peiseai a‘u se ipu ua nutililii.

O loo i ou aao o‘u aso; ia e laveai mai ia te au ai lima o e ita mai, ma e ua tuliloa mai ia te au.

Na ou faalologo, ona palagia ai lea o o‘u ivi i lo‘u faataio i le aso atoa; auā sa mamafa lou aao i luga ia te au i le ao atoa foi ma le po; ua liua lava lo‘u malosi i le vevela o le tausaga vevela. Selā.

Faauta, o loo silasila Ieova i e matatau ia te ia, o e faamoemoe i lona alofa; ina ia laveai ia te i latou ai le oti, ina ia ola foi i latou i le oge.

E to lauapi le agelu a Ieova e siosiomia ai e o matatau ia te ia, e laveai foi o ia ia te i latou.

O fofoga o Ieova o loo faasaga i e amiotonu, e liliu mai foi ona taliga i a latou alaga. A o fofoga o Ieova, o loo faasaga i e fai amio leaga, ina ia tineia le faamanatuina o i latou ai le lalolagi. Ua alalaga e ua amiotonu, ona faafofoga mai ai lea o Ieova; ua ia laveai mai foi ia te i latou ai o latou puapuaga uma. Ua latalata mai Ieova i e ua loto momomo; ua ia faaola foi i e ua loto nutimomoia. E tele lava mea leaga e oo i le ua amiotonu; a e laveaiina o ia e Ieova ai ia mea uma. E leoleoina e ia o ona ivi uma; e le gau lava se tasi.

A e peitai o a‘u nei, na ou ofu i ie talatala ina o latou mama‘i; na ou faatigaina a‘u e a‘u i le anapogi; ma ua foi mai la‘u tatalo i lo‘u fatafata. Na ou fealuai e peiseai o la‘u uo o ia po o lo‘u uso; na ou punou eleelea, e pei o le ua faanoanoa i lona tinā.

Le Atua e, e maeu lava lou alofa, o le mea lea ua faatuatua ai tagata i le paolo o ou apaau. E malilie i latou i mea lololo ua i lou fale; e te faainumia foi i latou i le vaitafe o au mea faafiafia. Auā o loo ia te oe le puna o le ola; o lou malamalama matou te iloa ai le malamalama.

E soisoi le Alii ia te ia; auā ua na silafia o le a sau lona aso. Ua fese‘i ae e tagata amio leaga a latou pelu, ua lolou a latou aufana, ia oti ai e ua puapuagaina ma e matitiva, ina ia fasioti i e ua sa‘o a latou amio. E oo a latou pelu i o latou lava fatu, e gauia foi a latou aufana.

Ina mafaufau ia i le ua sao lana amio, ma vaavaai i le ua amiotonu; auā o le iuga o lea tagata o le manuia lava lea.

E leai se itu o lo‘u tino ua sao ona o lo‘u toatamai; e leai se filemu i o‘u ivi ona o a‘u agasala. Auā ua oo lava a‘u agasala i luga o lo‘u ulu; e pei o se avega mamafa, ua mafatia ai lava a‘u. Ua elosia o‘u manua; ua alu ae le alou ona o lo‘u valea. Ua faano‘uno‘uina a‘u; ua ou matuā punou lava i lalo; ou te fealuai ma le eleelea i le aso atoa. Auā ua tigaina lo‘u manava i le ma‘i vevela; e leai se itu o lo‘u tino ua sao. Ua ou matuā vaivai, ua ou momomo lava; ou te faataio ona o le oi o lo‘u loto. Le Alii e, o loo i ou luma lo‘u manao uma; e le lilo foi ia te oe lo‘u mapuitiga. Ua sapotuvale lo‘u fatu manava, ua te‘a lo‘u malosi; o le malamalama foi sa i o‘u mata, ua le ia te au lea.

Ia e taofia lau ta ia te au; ua faaumatia a‘u nei i le sasa mai o lou aao. A e sasa i le tagata i aoaiga ona o le agasala, ona e faaumatia ai lea o lona lelei, e pei o le mogamoga ona atia o le ofu; e moni, o tagata uma e faatauvaa lava i latou. Selā. Ieova e, ia e faafofoga mai i la‘u tatalo, ma liliu mai ou fofoga i la‘u alaga; aua ne‘i e le tali mai i la‘u tagi; auā ou te se tagata ese a‘u i ou luma ma le āumau, e pei o o‘u tamā uma lava.

Na ia aveina ae a‘u ai le lua e malaia ai, ma le mea matuā palapalā; na faatuina foi o‘u vae i luga o le papa, ua faamautuina ai o‘u savali. Ua tuuina mai e ia le pese fou i lo‘u gutu, o le viiga i lo tatou Atua; e iloa ai e le toatele, e matatau foi i latou, ma latou faatuatua ia Ieova.

Ieova e, aua e te taofi e oe lou alofa mutimuti vale ia te au; ia leoleoina pea lava a‘u e lou alofa ma lou faamaoni.

E lagolago ane Ieova ia te ia i le taotoga o lona ma‘i; e te liua lona moega uma lava i lona ma‘i. Na ou fai atu, Ieova e, ia e alofa mai ia te au; ia e faamalolo i lo‘u agaga; auā ua ou agasala atu ia te oe.

Lo‘u agaga e, se a ea le mea ua e faanoanoa ai, ma ē atuatuvale ai i totonu ia te au? Ia e faamoemoe i le Atua, auā ou te toe vivii ia te ia ona o le faaolataga mai ona luma. Lo‘u Atua e, ua faanoanoa lo‘u agaga i totonu ia te au; o le mea lea ou te manatunatu ai ia te oe i le nuu o Ioritana, ma le atu Heremoni, ma le mauga itiiti.

Ona ou alu atu ai lea i le fata faitaulaga o le Atua, o le Atua ou te matuā fiafia i ai; le Atua e, lo‘u Atua ou te vivii atu ia te oe i le kitara. Lo‘u agaga e, se a ea le mea ua e faanoanoa ai? Ua atuatuvale foi oe i totonu ia te au i se a? Ia e faamoemoe i le Atua, auā ou te toe vivii ia te ia, o lo‘u faaolataga ia ma lo‘u Atua.

O le Atua, o lo tatou malu ia ma lo tatou malosi; e fai o ia ma fesoasoani silisili i puapuaga. O le mea lea tatou te le fefefe ai, pe a faaliliuina le lalolagi, ma luluina mauga i totonu o le sami;

Ina soia, ma ia outou iloa o a‘u lava o le Atua; e viia a‘u i nuu ese, e viia a‘u i le lalolagi. Ua ia te i tatou Ieova o ‘au, o le Atua o Iakopo, o lo tatou ‘olo maualuga ia. Selā.

Auā o lenei Atua, o lo tatou Atua lava ia e faavavau faavavau lava; o ia lava na te ta‘ita‘iina i tatou e oo lava i le oti.

Ia e valaau foi ia te au i le aso e i ai le puapuaga; ou te laveaiina ai oe, ona e vivii mai ai lea ia te au.

Ia ou faalogo mai ia te oe i le olioli ma le fiafia; ina ia fiafia ivi ua e faamomomoina.

O taulaga i le Atua, o le loto momomo lea; le Atua e, e te le inosia le loto momomo ma le nutimomoia.

E iloa atu ai foi e ua amiotonu, ma latou matatau ai, latou te featani ai ia te ia; e faapea atu, Faauta, o le tagata lea na na le faia le Atua mona malosi, a ua faatuatua ia i le tele o lona oloa; na ia faamalosi i lona leaga.

Na ia laveai mai ia te au, ia ou filemu ai i le taua sa ia te au; auā e toatele i latou sa ia te au.

Ia e tuuina atu ia Ieova o mea e te popole vale ai; o ia lava na te tausia oe; na te le tuuna e faavavau le amiotonu ia faagaeetia.

O le aso ou te mata‘u ai, ou te faatuatua ai ia te oe. Ou te mitamita i le Atua ona o lana afioga; ou te faatuatua i le Atua; ou te le fefe i se mea e faia e tagata ia te au. Ua latou faauigaese i a‘u upu i aso uma lava; ua faasaga mai ia te au o latou mafaufau uma lava ia a‘u leaga ai. Ua latou faapotopoto, ua latou lalafi, ua latou vaavaai i o‘u tulagāvae; auā ua latou lamalama ia ou oti.

Ua e faitauina lava lo‘u fesolasolatai; ia e utu o‘u loimata i lau fagu; e le o i ai ea i lau tusi?

Ua ou faatuatua i le Atua; ou te le fefe i se mea e faia e tagata ia te au. Le Atua e, o ia te au mea na ou tauto e avatu ai ia te oe; ou te avatu taulaga faafetai ia te oe. Auā ua e laveaiina a‘u nai le oti; e te le faamalosia ea o‘u vae ne‘i tuleia, ina ia ou savali i luma o le Atua i le malamalama o e ola.

Le Atua e, ia e alofa mai ia te au, ia e alofa mai ia te au; auā ua ou faatuatua lava ia te oe; ou te faatuatua foi i le paolo o ou apaau, seia mavae atu nei mea leaga.

A o oe, Ieova e, e te soisoi ia te i latou; e te tauemu i nuu ese uma lava. Ou te naunau atu lava ia te oe ona o lona malosi; auā o le Atua o lo‘u ‘olo maualuga ia.

A o a‘u ou te pese atu i lou malosi; ou te alaga fiafia i le taeao i lou alofa mai; auā na fai oe mo‘u ‘olo maualuga, ma o‘u malu i le aso na puapuagaina ai a‘u. Lo‘u malosi e, ou te fai pesega lava ia te oe; auā o le Atua o lo‘u ‘olo maualuga lea, o le Atua ua alofa mai ia te au.

Le Atua e, ia e faafofoga mai i la‘u alaga; ia e liliu mai i la‘u tatalo. Ou te valaau atu ia te oe ai le gataaga o le nuu, pe a faavaivai lo‘u loto; ia e ta‘ita‘iina a‘u i le papa e sili ona maualuga ia te au. Auā ua fai oe mo‘u malu, o le ‘olo malosi ai le ua ita mai. Ou te nofo e faavavau lava i lou fale fetafai; ou te faatuatua i le paolo o ou apaau. Selā.

E moni lava, e faalologo lo‘u agaga i luma o le Atua; mai ia te ia lo‘u faaolataga. E moni lava, o ia lo‘u papa, ma lo‘u faaolataga, o lo‘u ‘olo maualuga; e le faagaeeteleina a‘u.

E moni lo‘u agaga e, e te faalologo lava i luma o le Atua; auā mai ia te ia lava lo‘u faamoemoe. E moni lava, o ia lo‘u papa, ma lo‘u faaolataga, o lo‘u ‘olo maualuga; e le faagaeeina a‘u. O loo i le Atua lo‘u olataga ma lo‘u mamalu; o lo‘u papa malosi ma lo‘u malu o loo i le Atua ia. Le nuu e, ia outou faatuatua ia te ia i aso uma; ia outou momoli atu o outou loto i ona luma; o lo tatou malu o le Atua lea. Selā.

Le Atua e, o lo‘u Atua lava oe; ou te ala saili ia te oe; ua fia inu lo‘u agaga ia te oe, ua ou matuā naunau atu ia te oe i le nuu naumati, e lailoa ai, e leai ni vai; ia ou iloa lou malosi ma lou mamalu, e pei ona ou iloa oe i le malumalu. Auā o lou alofa e sili ona lelei lea i le ola; ou te vivii atu lava ia te oe i o‘u laugutu. O lea ou te faamanū atu ai ia te oe a o ou ola; ou te sii o‘u lima i lou suafa. E peiseai o le ga‘o ma le mea lololo, ou te ma‘ona ai lava a‘u; e vivii atu foi ia te oe o lo‘u gutu ma o‘u laugutu e alaga fiafia. A ou manatua oe i lo‘u moega, ou te mafaufau ia te oe i leoleoga i itu po. Auā na fai oe ma fesoasoani ia te au; ou te olioli foi i le paolo o ou apaau. Ua pipii atu lava lo‘u loto ia te oe; o lou aao taumatau ua taofiina ai a‘u.

O le Tamā ia o e ua mātuaoti, le na te faamasinoina mo fafine ua oti a latou tane, o le Atua lea o loo i lona afioaga paia. O le Atua na te faatagatāina e ua ausage; na te aumaia e ua noanoatia i le mea e manuia ai; a o e fouvale, latou te nonofo i le nuu naumati.

Le Atua e, aua e te tuulafoai mai ia te au e oo ina toeaina ma ulusinā; seia ou faaali atu lou aao i leneiit tupulaga, ma lou malosi i e amuli uma lava. Le Atua e, e silisili lava lau amiotonu, o mea ua e faia o mea mamana ia; le Atua e, o ai ea se tusa ma oe? O le ua faailoa mai ia te au o puapuaga e tele ma le leaga, e te toe faaola mai ia te au, e te toe avae ia te au nai le mea loloto i le eleele. E te faateleina lo‘u mamalu; e te liliu mai ma faamafanafana mai ia te au. O a‘u foi, ou te vivii atu ia te oe i le napeli, o lou faamaoni lava, lo‘u Atua e; ou te fai pesega ia te oe i le kitara, o oe le Paia o Isaraelu. E alaga fiafia o‘u laugutu pe a a‘u fai pesega ia te oe, atoa foi ma lo‘u agaga ua e faaolaina.

A o a‘u, e le aunoa ona ta faatasi ma oe; na e taofiina lo‘u lima taumatau. E te ta‘ita‘i ia te au i lau pule, a e mulimuli ane e te talia mai a‘u i le manuia. O ai ea se ua ia te au i le lagi? E leai foi se tasi i le lalolagi ou te fiafia i ai, na o oe. E vaivai lo‘u tino ma lo‘u loto, a o le Atua, o le papa ia o lo‘u loto ma lo‘u tofi e faavavau.

Ia outou faamasinoina e ua vaivai ma ē mātuaoti; ia outou ta‘uamiotonuina e ua puapuaga ma ē matitiva.

O loo naunau lo‘u agaga, ma ua lailoa i le fia alu atu i lotoā o Ieova; o loo alaga fiafia lo‘u loto ma lo‘u tino i le Atua soifua. E moni, o le manulele ua maua se fale, o le pe‘ape‘a foi ua maua sona ofaga e tuu ai lana toloai, o au lava fata faitaulaga, Ieova o ‘au e, o lo‘u Tupu ma lo‘u Atua. Amuia i latou ua nonofo i lou fale; latou te vivii pea ia te oe. Selā.

O le aso e puapuagaina ai a‘u, ou te valaau atu ai ia te oe; auā e te tali mai ia te au.

Auā e tele lava lou alofa ia te au; na e laveai mai lo‘u agaga ai seoli e maulalo lava.

Ia e manatua le puupuu o lo‘u olaga; se a le mea ua e faia ai fua le fanau uma a tagata. O ai se tagata ola na te le iloa le oti? Na te laveaiina ea lona agaga ai le pule a le tuugamau? Selā.

Le Alii e, ua fai oe ma mea matou te nonofo ai i lea tupulaga ma lea tupulaga.

O le nofo i le mea lilo o i ai lē Silisili ese, e mau o ia i le paolo o Le e ona le malosi uma lava. Ou te faapea atu ia Ieova, O lo‘u malu o ia ma lo‘u ‘olo; o lo‘u Atua ou te faatuatua ia te ia. Auā o ia na te laveaiina oe i le mailei a lē fai manu, ma le faamai e oti ai. E ufiufi ifo o ia ia te oe i ona apaau, e te sulufai foi i lalo o ona apaau; e faia lona faamaoni māu talipupuni ma mea e puipuiina ai oe. E te le mata‘u i le mea matautia i le po, ma le u fanafana e lele i le ao, o le faamai e fealuai i le pogisa, ma le mala e fano ai i le aoatea. E pauu se toaafe i ou tafatafa, ma le mano i lou itu taumatau; a e le tāitāi ane ia te oe.

Auā o oe, Ieova e, o lo‘u malu oe, na e faia lē Silisili ese ma mea e te nofo ai; e le oo ia te oe se mea leaga, e le tāitāi ane foi se mala i lou fale ie. Auā e poloai atu ia i ana agelu ia te oe, e tausi ia te oe i ou ala uma. Latou te ave ia te oe i o latou lima, ne‘i tū‘ia lou vae i se maa. E te solia le leona ma le asipi; e te solia lava le leona taanoa ma le tanimo. Ona ua naunau mai o ia ia te au, o le mea lea ou te faaolaina ai o ia; ou te faamamalu ia te ia ona ua iloa e ia lo‘u igoa. E valaau mai o ia ia te au, ona ou tali atu ai lea ia te ia; o a‘u, ou te ia te ia i le puapuaga; ou te laveaiina o ia, ma ou faatupuina lona mamalu. O le olaga faafualoa e mălie ai o ia ia te au; ou te faaali atu foi ia te ia la‘u faaolataga.

O le tele o manatunatu i lo‘u loto ua fiafia ai lo‘u agaga ona o faamafanafanaga mai ia te oe.

A e faia Ieova mo‘u ‘olo maualuga; o lo‘u Atua foi o le papa lea ou te malu ai.

Ia alalaga ia Ieova le lalolagi uma. Ia outou auauna atu ia Ieova ma le fiafia; o mai ia outou i ona luma ma le alaga fiafia. Ia outou iloa o Ieova o ia lava le Atua; o ia na faia i tatou, ua fai i tatou mona; o lona nuu i tatou, o le lafu mamoe ua ia fagaina. Ia outou ulu atu i ona faitotoa ma le viiga, ma ona lotoā ma le pese; ia outou vivii atu ia te ia, ia outou faamanu atu i lona suafa. Auā e lelei Ieova; e faavavau lava lona alofa; e oo atu lava lona faamaoni i lea tupulaga ma lea tupulaga.

Ieova e, faafofoga mai ia i la‘u tatalo, ma ia oo atu la‘u alaga ia te oe. Aua le ‘alo ou fofoga ia te au i le aso e puapuagatia ai a‘u; ia liliu mai ou fofoga ia te au; ia taalise ona e tali mai ia te au i le aso ou te valaau atu ai ia te oe. Auā ua mavae o‘u aso faapei o le asu, o o‘u ivi foi ua mu e pei o le motumotu. Ua sasaina ma ua magumagu lo‘u loto pei o le vao iti; o lea ua galo ai ia te au ona ‘ai i la‘u mea e ‘ai. O le leo o lo‘u mapuitiga ua pipii ai o‘u ivi i lo‘u aano.

O o‘u aso ua pei o le ata ua lafoia; o a‘u nei foi ua pei o le vao iti ona magumagu. A o oe, Ieova e, e afio oe e faavavau lava, ma le faamanatuga ia te oe, e āu tupulaga lava lea.

Lo‘u agaga e, ia e faamanū atu ia Ieova, o mea uma foi o i totonu ia te au ia faamanū i lona suafa paia. Lo‘u agaga e, ia e faamanū atu ia Ieova, aua foi ne‘i galo se mea e tasi o ana meaalofa; o lē faamagaloina au amio leaga uma lava; o lē faamaloloina ou ma‘i atoa uma; o lē faaolaina mai lou ola ai le tuugamau; o lē faapaleina oe i le alofa ma le alofa mutimuti vale;

Auā ua silafia lava e ia le mea na fai a‘i i tatou; ua manatu ia o le efuefu lava i tatou. O le tagata, e pei o le mutia ona aso; e pei o le fuga o le vao, e faapea ona fuga mai o ia; auā a agi mai i ai le matagi, ona leai lea o ia; ua le toe iloa foi o ia i le mea sa i ai. A o le alofa o Ieova, mai le vavau lava lea, e oo i le faavavau i e matatau ia te ia; o lana amiotonu foi e oo i le fanau a latou fanau,

Ua atu lasi ona laveai o ia ia te i latou, a o i latou ua latou faaonoono ia te ia i a latou pulega; na solia foi i latou ona o a latou amio leaga. A ua silasila mai o ia i lo latou puapuaga, ina ua faafofoga i lo latou alalaga. Ona ia manatua lea mo i latou o lana feagaiga, ma ua salamo e tusa ma lona alofa tele. Ua ia avatu foi ia i latou ia alofagia e i latou uma e na faatagataotauaina i latou.

Sa matelaina i latou, ma fia inu, na lailoa o latou loto i totonu ia i latou. Ona alalaga lea o i latou ia Ieova i lo latou puapuaga; na ia laveai ia te i latou nai o latou tiga.

Auā ua na faamălie i le tagata fia inu, o le tagata matelaina foi ua ma‘ona mai ia te ia i le mea lelei. O e nonofo i le pouliuli ma le ata o le oti, e ua noanoatia i le tiga ma le uamea; auā na latou fouvale i afioga a le Atua, ma latou ‘ino‘ino i le pule a lē Silisili ese; o le mea lea na ia faamaulaloina ai o latou loto i le galuega mamafa; na pauu i latou, a e leai se fesoasoani. Ona latou alalaga atu lea ia Ieova i lo latou puapuaga; na ia faaolaina i latou nai o latou tiga. Na ia aumaia i latou nai le pouliuli ma le ata o le oti, ua na motusia foi o latou noanoaga.

O tagata vālea ona o lo latou solitulafono, ma la latou amio leaga, ua faatigaina ai i latou; ua ‘ino‘ino i latou i mea e ‘ai uma lava, ua faalatalata foi i latou i faitotoa o le oti. Ona alalaga lea o i latou ia Ieova i lo latou puapuaga; na ia faaolaina i latou nai o latou tiga. Ua ia auina atu lana afioga, ma faamalolo ia i latou, ma laveaiina ai nai lo latou malaia.

Lo‘u agaga e, ia e foi atu i lou mapusaga; auā ua agalelei mai Ieova ia te oe. Auā ua e laveai mai ia te au nai le oti, o o‘u mata ne‘i tagi, ma o‘u vae ne‘i paū. Ou te savali i luma o Ieova i nuu o tagata ola.

E silisili i le manatu o Ieova le oti o ona tagata amio Atua.

Na ou valaau atu ia Ioa i lo‘u puapuaga; na tali mai Ioa ia te au, ma na aumaia a‘u i le mea lautele. O loo ia te au Ieova; ou te le fefe; se a se mea e faia e tagata ia te au?

O le faatuatua ia Ieova, e sili lea i le faalagolago i tagata. O le faatuatua ia Ieova, e sili lea i le faalagolago i alii.

Ou te le oti, ou te ola lava, ma ou ta‘uta‘u atu mea na faia e Ioa.

Na matuā aoai mai Ioa ia te au; a ua na le tuuina a‘u i le oti.

Ua pipii atu lo‘u ola i le efuefu; ia e faaolaola mai ia te au e tusa ma lau afioga.

Ua sisina ifo o‘u loimata ona o le faanoanoa; ia e faamalosia a‘u e tusa ma lau afioga.

O le faamatalaloto lea ia te au i lo‘u puapuaga; auā o lau afioga ua faaolaolaina ai a‘u.

A o lei puapuagatia a‘u na ou sese; a o lenei, ua ou tausi i lau afioga.

O le mea e lelei ai a‘u ina ua puapuagatia a‘u, ina ia a‘oa‘oina ai a‘u i au tulafono.

Ieova e, ua ou iloa e tonu lava au faamasinoga, na e faapuapuagatia foi a‘u i le faamaoni. Ia fai lou alofa ma faamatalaloto ia te au, e tusa ma lau afioga i lau auauna. Ia oo mai ia te au ou alofa mutimuti vale, ia ou ola ai; auā o lau tulafono, o lo‘u fiafia lea.

Ana le avea lau tulafono mo‘u fiafia, po ua ou fano i lo‘u puapuaga. E le galo ia te au au feau e faavavau; auā o mea ia na e faaolaola mai ai ia te au.

Ua matuā puapuagaina a‘u; Ieova e, ia e faaolaola mai ia te au e tusa ma lau afioga.

Ua maua a‘u e le puapuaga ma le tiga; o au poloaiga ou te fiafia i ai.

O lo‘u fesoasoani mai ia Ieova lea, o le na faia le lagi atoa ma le lalolagi.

E leoleo e Ieova ia te oe i mea leaga uma lava; e leoleo mai o ia i lou agaga. E leoleo Ieova i lou ulufafo ma lou ulufale, e amata mai nei lava, a e oo i le faavavau.

O e lulu saito ma loimata, latou te seleseleina ma le alaga fiafia. O le ua alu atu ma tagi fano, o loo ave le saito e lulu, e foi mai lava ia ma le alaga fiafia, o loo au mai ana fusi saito.

Ou te faatali atu ia Ieova, o loo faatali atu lava lo‘u agaga; ou te faamoemoe foi i lana afioga. O loo faatalitali atu lo‘u agaga i le Alii e sili i e o leoleo ona faatalitali i le taeao; e sili lava i e o leoleo ona faatalitali i le taeao.

Ieova e, ia e laveai mai ia te au ai le tagata amio leaga; leoleo mai ia ia te au ai le tagata faasaua; o e mafaufau i mea leaga i o latou loto, ma faatutupu taua i aso uma lava. Latou te faamaai i o latou laulaufaiva, e pei o le gata; o i lalo foi o latou laugutu le mea oona a le asipi. Selā.

Ua ou iloa e faia e Ieova le finauga mo e ua puapuagatia, o le faamasinoga o e ua matitiva.

Na ou alaga ia Ieova i lo‘u leo; na ou aioi atu ia Ieova i lo‘u leo. Na ou faapaūina atu la‘u tagi i ona luma; na ou faaali atu lo‘u puapuaga i ona luma; na lailoa lo‘u loto i totonu ia te au, ona e silafia lea e oe o lo‘u ala; na tuu e i latou le matāsele mo a‘u i lea lava ala na ou savali ai. Na ou tepa i le itu taumatau, ma ou vaavaai, a ua leai se tasi na fia iloa a‘u; ua leai lava se ‘alofaga ia te au; ua leai se tasi na te sailia a‘u ia ou ola. Ieova e, na ou alaga atu ia te oe; na a‘u faapea atu, O oe lava lo‘u malu, o lo‘u tofi i le nuu o tagata ola. Ia e faafofoga mai i lo‘u alaga atu, auā ua vaivai lava a‘u; ia e laveaiina mai a‘u i e tuliloa mai ia te au; auā ua sili lo latou malosi i lo‘u. Ia e avatua lava a‘u ai le fale puipui, ina ia ou vivii atu i lou suafa; e vagavagai mai ia te au o e amiotonu, pe a e agalelei mai ai te au.

Ou te faaloaloa o‘u lima ia te oe, ou te manao lava ia te oe, faapei o se nuu naumati. Selā. Ieova e, ia e vave tali mai ia te au, o le a faauma lo‘u nei ola; aua le ‘alo ou fofoga ia te au, ne‘i tusa a‘u ma tagata e o ifo i le lua.

E latalata mai Ieova ia i latou uma o e valaau ia te ia, o i latou uma o e valaau ia te ia ma le faamaoni. E faia e ia le mea e manao i ai o e matatau ia te ia; e faafofoga foi o ia i la latou alaga atu, ma faaolaina i latou. E tausi Ieova i e alolofa atu ia te ia uma lava; a e fano ia te ia o e amio leaga atoa uma. O vii o Ieova e ta‘u atu e lo‘u gutu; e faafetaia e tagata uma o lona suafa paia, e faavavau faavavau lava.

O le na te faia le faamasinoga mo e o sauaina; na te avatua le mea e ‘ai i e o fia aai; e tatala e Ieova i e ua noanoatia. E faafepulafia e Ieova e ua tauaso; e faatutusa‘oina e Ieova e ua faano‘uno‘u; e alofa Ieova i e amiotonu. O Ieova na te tausia tagata ese; e fai ma lagolago mo le ua aumatuā ma le fafine ua oti lana tane; a o le ala o e ua amio leaga e faapiopioina e ia.

E faamaloloina e ia e ua loto momomo; e fufusi e ia o latou manua.

Ia e faatuatua ia Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala. Aua e te faafiapoto; ia e mata‘u ia Ieova, ia ‘alo ese i le leaga; e fai lea ma mea e malosi ai lou pute, ma mea e su ai ou ivi.

O le atuatuvale i le loto o le tagata ua faavaivai ai o ia; a o le upu lelei e faaolioliina ai.

O le loto fiafia e tupu ai mata fiafia; a o le loto faanoanoa e momomo ai le agaga.

O le loto fiafia, e fai ma vailaau aoga lea; a o le loto faanoanoa e mamago ai ivi.

O le suafa o Ieova, o le ‘olo malosi lea; e sola atu i ai lē amiotonu, ona sao ai lea o ia.

O le loto o le tagata, na te faatoatoa ai lona ma‘i; a o le loto faanoanoa, o ai se na te lavā onosai?

O le oti ma le ola, o loo i le pule a le laulaufaiva ia; o e mananao i ai latou te aai i lona fua.

Afai e te faavaivai i le aso vale, ua itiiti lava lou malosi. Ia e laveai i e ua puea ia oti, ma ē a oo ina fasia.

Avatu le ‘ava i lē a mole; ma le uaina i le ua tiga le loto; ia inu ai o ia, ma faagalogalo i lona mativa; ma ia le toe manatu i lona puapuaga. Ia e tautala mo e gūgū, o le finauga lava o i latou uma ua aumatuā;

O le mea ma lona tausaga i mea uma, ma ona lava po i mea uma lava i lalo o le lagi; o ona po e fanau mai ai, ma ona po e oti ai; o ona po e totō ai, ma ona po e liai ai le mea ua totōina; o ona po e fasioti ai, ma ona po e fofō ai; o ona po e lepeti ai, ma ona po e ati ae ai; o ona po e tagi ai, ma ona po e ‘ata‘ata ai; o ona po e taufaitagitu‘i ai, ma ona po e sasaa ai;

E sili ona lelei o le ta‘uleleia i le suāuu lelei; ma le aso e oti ai e sili i le aso e fanau mai ai. E sili ona lelei o le alu i le fale o i ai le faanoanoa, i le alu i le fale ua fai ai le tausamiga; auā o le iuga lea o tagata uma; e manatua foi e le tagata ola i lona loto. E sili ona lelei o le tiga, i le ‘ata‘ata; auā o le faanoanoa o mata e lelei ai le loto. O le loto o le tagata poto ua i le fale o i ai le faanoanoa; a o le loto o e valelea, ua i ai lea i le fale o i ai le olioli.

Ina fiafia ia i le aso e manuia ai, ia mafaufau foi i le aso e malaia ai; ua tuu feagai e le Atua le tasi i le tasi, ina ia le iloa e le tagata se mea e tupu pe a mavae atu o ia.

Se a le mea e toe sasaina ai outou? Tou te o ese pea ea? O loo ma‘i le ulu uma, o loo vaivai le loto uma. E afua i le alofivae e oo lava i le ulu, e leai se mea ua sao; a o manua, ma faalavalava, atoa ma le papala ua aati, e lei faasooina, e lei fusia, e lei faamāluina foi i le suāuu.

Ua mapu le lalolagi uma, ua filemu lava; ua latou alalaga ma le fiafia.

E taia foi Aikupito e Ieova, na te taia, ma toe fofoina; ona latou liliu ai lea ia Ieova, ona faafofoga lea o ia ia te i latou, ma fofo ia te i latou.

O le mea lea ua matuā tiga ai lo‘u tua, ua maua a‘u i le tiga e pei o le faatiga o le fafine a fanau; ua tigaina a‘u, e le mafai ona faalogo atu; ua ou soona atuatuvale, e le mafai ona vaai.

Ua faanoanoa le lalolagi, ua mamae; ua faavaivai le atu laulau, ua mamae; ua faavaivai alii sili o le nuu. Ua leaga le nuu i e o nonofo ai; auā ua latou solia tulafono; ua latou liliu ese le sauniga; ua latou solia le feagaiga e faavavau. O le mea lea e faaumatia ai le nuu i le faafano, ua faasalaina foi e o nonofo ai; o le mea lea ua susunuina ai e o nonofo i le nuu; e toaitiiti foi tagata ua totoe.

auā o oe e malosi ai le ua vaivai, e malosi ai le ua mativa i lona puapuaga, o le malu i le afā, o le paolo i le vevela, pe a oo mai le ita o e o matautia e pei o se afā i le pa.

E faaumatia e ia le oti e faavavau; e soloiesea foi e le Alii o Ieova o loimata i mata uma lava; e faateaeseina foi e ia le gao o lona nuu i le lalolagi uma lava; auā ua fetalai mai ai Ieova.

E te leoleoina ia fifilemu lava le ua mausali lona loto; auā ua ia faatuatua ia te oe. Ina faatuatua ia outou ia Ieova e faavavau lava; auā o Ioa Ieova, o le papa e faavavau ia.

Ieova e, e te tuuina mai le manuia ia te i matou; auā foi ua e faia mo i matou a matou galuega uma.

A e ui lava i lea e faatalitali Ieova ina ia alofa fua mai ia te outou; o le mea lea e tulai ai o ia e alofa ia te outou; auā o Ieova, o le Atua e faamasino tonu ia; amuia i latou uma o e faatalitali ia te ia. Auā e nonofo le nuu i Siona i Ierusalema; e te le toe tagi lava; e matuā alofa o ia ia te oe pe a e alaga atu; a faafofoga o ia, ona tali atu ai lea o ia ia te oe. E avatu e le Alii ia te outou le mea e ‘ai o le maosiosi, ma le vai e maua ma le tiga; e le toe lalafi o outou a‘oa‘o, a e vaai atu o outou mata i o outou a‘oa‘o. E faalogo foi o outou taliga i le upu i o outou tua, pe a outou afe ane i le itu taumatau pe afe ane i le itu tauagavale, e faapea mai, O le ala lava lenei, ia outou savavali ai.

Ia outou faamalosi i lima ua gagase, ia outou faamalosi foi i tulivae ua vaivai. Fai atu ia i e ua loto vaivai, Ia outou faamalolosi, aua tou te fefefe; faauta, o lo outou Atua; o le a oo mai le taui ma sui, o le taui lava mai le Atua; e afio mai lava o ia ma faaola ia te outou. Ona faapupulaina ai lea mata o e tauaso, e faalogoa foi taliga o e tutuli; ona osooso ai lea o le pipili e pei o le aila, e pese foi le laulaufaiva o le gūgū; auā e oso mai le vai i le vao lafulafua, ma vaitafe i le toafa;

E i ai foi le ala tanu, ma le ala, e ta‘ua foi o le ala sa; e le ui atu ai se ua leaga, a e faia mo i latou lava; e ui ina valea se malaga e le sese ai lava. E le i ai se leona, e le alu ae ai foi se manu feai; e le i ai lava, a e savavali ai e ua togiolaina. E foi mai e ua togiolaina e Ieova, latou te o mai foi i Siona ma le alaga ma le olioli e faavavau i luga i o latou ulu; latou te maua le olioli ma le fiafia, a e sosola ese le faanoanoa ma le mapuitiga.

Ia outou faamafanafana, ina faamafanafana atu ia outou i lo‘u nuu, ua fetalai mai ai lo outou Atua. Ia outou faamatalaloto ia Ierusalema, ma outou alalaga ia te ia, ua iu ona po o lona tiga, ua tauia lana amioletonu; auā ua na maua faalua mai le lima o Ieova le taui ona o ana agasala uma.

Na te leoleoina lona lafu e pei o le leoleo mamoe; na te sapaia tamai mamoe i ona lima, ma tauave i latou i lona fatafata; na te ta‘ita‘i filemu i mamoe ua fananau.

E te le iloa ea? E te lei faalogo ai ea? O le Atua o le vavau, o Ieova o le na faia tuluiga o le lalolagi, e le vaivai o ia, e le tigaina foi, e le masuesueina lona mafaufau. Na te avatua le malosi i e ua vaivai; a o e ua leai se malosi, na te faatuputele i ai le malosi. E vaivai ma tigaina tama matutua; o taulelea foi, e pauu lava i latou; a o e faatalitali ia Ieova, e toe faafouina lo latou malosi; latou te sii ae apaau e pei o aeto; latou te femoei, a e le vaivai; latou te savavali, a e le tigaina.

Aua e te fefe, auā ou te ia te oe; aua le fetepatepai, auā o a‘u o lou Atua; ou te faamalosia oe; e moni, ou te fesoasoani ia te oe; e moni, ou te taofia oe i lo‘u lima taumatau e i ai le amiotonu.

O e ua tigaina ma ē matitiva o loo latou saili i se vai, a ua leai; ua matutu o latou laulaufaiva i le fia inu; o a‘u o Ieova, ou te tali atu ia te i latou, o a‘u o le Atua o Isaraelu, ou te le tuulafoaiina i latou.

A o lenei, o loo faapea ona fetalai mai o Ieova, o le na faia oe, Iakopo e, ma na faia oe, Isaraelu e; aua le fefe, auā ua ou faatauina oe, ua ou valaauina oe i lou lava igoa; e faia oe mo‘u. A ē sopoia atu le vai, ou te ia te oe; a ē sopoia atu vaitafe, e le lofia ai oe; a ē savali i totonu o le afi, e le mu ai oe; e le susunuina foi oe i le mumū o le afi.

o a‘u lē faia le malamalama, ma faatupuina le pouliuli; o lē faia le manuia, ma faatupuina le mala; o a‘u o Ieova, o lē faia ia mea uma.

E oo ina e toeaina, o a‘u lava o ia, e oo foi ina ulusina, o a‘u lava ou te tauave ia te oe; o a‘u na ou faia, ou te siitia foi, ou te tauave, ma ou laveaiina oe.

Faauta, ua ou faate‘a le otaota ia te oe, a e le pei o le ario; ua ou filifilia oe i le ogaumu o i ai le puapuaga.

Latou te le fia aai, latou te le fia inu foi; e le ogotia i latou i le vevela po o le la; auā o le ua alofa ia i latou, na te ave ia te i latou, na te ta‘ita‘iina foi i latou i vaipuna.

Ia alaga oe le lagi e, ia olioli oe le lalolagi e, ia leo tetele outou mauga, ma ia alalaga fiafia; auā ua faamafanafanaina e Ieova lona nuu, ua ia alofa foi i ona tagata ua tigaina.

Faauta, ua ou taia lou faatusa i o‘u alofilima; e tumau ou pa i o‘u luma.

Auā e faamafanafanaina Siona e Ieova, e faamafanafanaina ana mea faatafunaina uma lava; na te faia lona fanua lafulafua e pei o Etena, ma lona toafa e pei o le faatoaga a Ieova; e maua ai le fiafia ma le olioli, o le faafetai ma le leo o le pese.

E foi mai e ua togiolaina e Ieova, latou te o mai foi i Siona ma le alaga ma le olioli e faavavau i luga i o latou ulu; latou te maua le olioli ma le fiafia; a e sosola ese le faanoanoa ma le mapuitiga. O a‘u, o a‘u lava lē faamafanafana ia te outou; o ai ea oe e te fefe i le tagata e oti, ma le atalii o le tagata e avea o ia e pei o le mutia.

O ai ea ua talitonu i la matou upu e taulogologo atu; ua faaalia ia te ai le aao o Ieova? Na tupu ae o ia e pei o se tātupu i ona luma, e pei o le pogai i le nuu naumati; e le aulelei pe lalelei o ia; a tatou vaavaai ia te ia e leai sona matagofie, ina ia tatou mananao ai ia te ia. Ua inosia ma tuulafoaiina o ia e tagata; o le tagata faanoanoa, ua masani foi ma le tiga; e peiseai ua ‘alo ese mata ia te ia; ua inosia o ia, ma ua tatou le manatua lava o ia. E moni, ua na tauave o tatou tiga, ma na tauave o tatou faanoanoa; a ua tatou manatu o ia ua taia, ua fasia e le Atua, ma ua faatigaina. A ua manua o ia ona o a tatou solitulafono, ua momomo o ia ona o a tatou amio leaga; o le aoaiga e filemu ai tatou sa i ona luga lea, o ona faalavalava foi ua malolo ai tatou. O i tatou uma ua sē i tatou e pei o mamoe, ua taitasi ma faasaga i lona lava ala; a ua faaoo ia te ia e Ieova le amio leaga o i tatou uma. Na faasauaina o ia, sa tigaina foi o ia, a e le tautala mai o ia; e pei o le tamai mamoe ua ta‘ita‘iina ia fasia, e pei o le mamoe foi i luma o e sele lona fulufulu, ua faalologo ia, o ia foi ua le tautala mai. O le faasaua ma le faamasinoga na aveeseina ai o ia; o ai foi na te talatalaina lana tupulaga? auā ua vavaeeseina o ia i le nuu o tagata ola; na taia o ia ona o le solitulafono a lo‘u nuu. Na tofia o ia ia fai lona tuugamau faatasi ma ē pagotata, a e peitai sa i le mauoa ina ua maliu; auā na le faia e ia se faasauaga, ua leai foi se pepelo i lona fofoga. A ua finagalo Ieova e tu‘imomomo ia te ia, ua ia faatigaina o ia; pe afai na te faia se taulaga mo agasala, ona iloa lea e ia o lana fanau, e faalevalevaina ona aso, o le finagalo foi o Ieova e manuia lea ia te ia. Ona o le tiga o lona agaga na te iloa ai lana fanau, e malie ai o ia; o le malamalama mai ia te ia e ta‘uamiotonuina ai tagata e toatele e la‘u auauna ua amiotonu; auā e tauave e ia a latou amio leaga. O le mea lea ou te vaevaea ai se vaega mo ia faatasi ma e ua sili, e vaea foi le vete faatasi ma e fitafita, ona ua ia sasaa atu o lona ola ia oti; na faitauina foi o ia faatasi ma e pagotata; na ia aveina foi le agasala a tagata e toatele, ua fautua foi o ia mo e solitulafono.

Aua e te fefe, auā e te le mā; aua foi e te masiasi, auā e le faamaina oe; auā e galo ia te oe lou mā ina o ē teine muli; e te le toe manatua foi lou luma ina o ē nofo fua.

E faatumauina oe i le amiotonu; e mamao ma oe le sauaga, auā e te le fefe; e mamao foi ma le mata‘u, auā e le faalatalata mai lea ia te oe.

O auupega uma e faia e tau ma oe e le manuia ia; o laulaufaiva uma e finau atu ia te oe i le faamasinoga e te faasalaina ia; o le tofi lena o auauna a Ieova, o a latou amiotonu foi mai ia te au lea, ua fetalai mai ai Ieova.

Auā tou te o atu ma le fiafia, e ta‘ita‘iina foi outou ma le manuia; o atu mauga ma mauga e leo tetele ma le alaga fiafia i o outou luma, e pāti lima foi laau uma o le vao.

E ulu atu o ia i le manuia, latou te malolo i o latou moega, o i latou ia o e savavali ma le tonu.

Auā o loo faapea ona fetalai mai o le ua Maualuga ma ua Silisili, o lē afio e faavavau, e paia lona suafa, Ou te nofo i le mea maualuga ma le paia, ma te nonofo foi ma le ua momomo ma ua maulalo lona loto, e faamafanafana i e ua loto maulalo, ma faamafanafanaina loto o e ua loto momomo.

Ua ou iloa ona ala, ou te faamalolo foi ia te ia; ou te ta‘ita‘iina o ia, ou te toe avatu foi faamafanafanaga ia te ia, ma e ua faanoanoa faatasi ma ia. O loo ou te faia le fua o laugutu, O le filemu, o le filemu i le ua mamao, atoa ma le ua lata mai, ua fetalai mai ai Ieova; ou te faamaloloina foi o ia.

E faapena ea le anapogi ou te loto i ai; o le aso e faatiga ai le tagata ia te ia lava? e punou ai ea lona ulu e pei o le fiso? e fola lona moega i le ie talatala ma le lefulefu? E te faaigoa ea lena mea o le anapogi ma le aso e fiafia i ai Ieova? E le o lenei ea le anapogi ou te loto i ai? ma ia tatalaina fusi na faia i le amio leaga, e tatala fusi o le amo, e tuuina atu ia sa‘oloto e ua faasauaina, ma ia outou gausia amo uma lava. E le o lenei ea? ona ia tofitofi au mea e ‘ai i le ua fia ‘ai, ia au mai i lou fale e ua matitiva ma faasauaina; a ē iloa le ua le lavalavā e te faaofuina o ia, aua foi e te lafi ia i latou o lou lava aiga.

Ona gafoa mai ai lea o lou malamalama e pei o le tafa o ata, e taalise ona tupu mai foi o lou malolo; e alu atu foi lau amiotonu i ou luma, e muli‘au mai le pupula o Ieova ia te oe. Ona e valaau lea, a e tali mai ai Ieova; e te alaga atu, a e fetalai mai o ia, O a‘u lenei; pe afai e te faate‘aeseina le amo ia te outou, o le tusi o le lima, ma le upu vale. Afai foi e te alofa atu i le ua fia‘ai, ma e fafaga ia ma‘ona o le ua tiga; ona alu ae lea o lou malamalama i le pouliuli, ma lou pogisa e pei o le aoauli ia. E ta‘ita‘iina foi oe e le aunoa e Ieova; e faamălie foi o ia ia te oe pe a oge vai, ma faamalosia ou ivi; e avea foi oe e pei se fanua ua faasūsūina, e pei o le punavai foi e le mate ona suāvai.

Ua i o‘u luga le Agaga o le Alii o Ieova; auā ua faauuina a‘u e Ieova e tala‘i le tala lelei i e ua tigaina, ua ia auina mai a‘u e fufusi i e loto momomo, e tala‘i le saolotoga i le tafeaga, ma le matuā tatalaina o e ua fusifusia. E tala‘i le tausaga e talileleia mai ai e Ieova, ma le aso e taui ai ma sui e lo tatou Atua; e faamatalaloto i e faanoanoa uma lava; e avatu le fiafia i e faanoanoa i Siona, e foaiina atu ia i latou le matagofie e sui a‘i le lefulefu, o le uu o le olioli e sui a‘i le faanoanoa, o le ofu e fai a‘i viiga e sui a‘i le loto faavaivai; e igoa i latou, O laau o le amiotonu, o le faatoaga a Ieova, e fai mona viiga.

O latou puapuaga uma na le fai ai o ia mo latou fili; na faaolaina i latou e le agelu mai ona luma; na ia faatauina i latou i lona alofa ma lona agalelei; na ia siitia i latou ma ave ia i latou i aso uma anamua.

Auā faauta mai, ou te faia le lagi fou ma le lalolagi fou; e le toe manatua mea na muamua, e le alu ae foi i le loto. A e peitai ia outou olioli ma fiafia e faavavau i le mea ou te faia; auā faauta, ou te faia Ierusalema ma faafiafia, ou te faia foi lona nuu ma faaolioli. Ou te fiafia foi i Ierusalema, ma a‘u olioli i lo‘u nuu; e le toe lagona ai le leo o sē tagi, ma le leo o sē alaga.

E pei o le tagata ua faamaiseina e lona tinā, e faapea ona ou faamaise ia te outou; e faamaiseina lava outou i Ierusalema.

Amuia le tagata o lē faatuatua ia Ieova, o le ua fai Ieova mona faatuatuaga. Auā o ia e faapei o le laau ua totō i tafatafa ane o le vai, ua sosolo atu ona aa i tafatafa ane o le vaitafe, na te le iloa foi pe a oo mai le vevela, a e lauolaola ona lau; e le atuatuvale i le tausaga o le la mala, e fua mai pea lava ona fua.

Ieova e, ia e faamalolo mai ia te au, ona malolo ai lea o a‘u; ia e faaola mai ia te au, ona faaolaina ai lea o a‘u; auā o oe ou te vivii i ai.

Auā o a‘u nei, ua ou iloa manatu ua ou manatu ai ia te outou, o manatu i le manuia, a e le o le malaia, o loo fetalai mai ai Ieova, e foaiina atu ia te outou le iuga e i ai le faamoemoe. Ona outou valaau ai lea ia te au, e ō foi outou ma tatalo ia te au, ou te faalogo foi ia te outou. E saili mai outou ia te au, tou te maua foi, pe a outou saili mai ia te au ma outou loto atoa.

Auā ou te faamaloloina oe, ou te fofōina ou manua, o loo fetalai mai ai Ieova; auā ua latou ta‘ua oe, O le ua tulia; O Siona lena, e leai se tasi ua saili atu i ai.

Auā ua ou faamălie i le tagata ua lailoa, ua ou faamalilieina loto vaivai uma. Ona ou ala ai lea, ma ou vaai, ua mălie lava a‘u i a‘u moe.

Faauta, ou te faia se fusi o lona ma‘i, ma se togafiti e malolo a‘i; ou te faamalolo lava ia te i latou, ma ou faaali atu ia te i latou le silisili o le manuia ma le faamaoni.

Ia e manatu i lo‘u puapuaga ma lo‘u agaleagaina, o le laena ma le rosa. Ia e manatua lava, ua faano‘uno‘u lo‘u loto i totonu ia te au.

O le alofa o Ieova ua le faaumatia ai i tatou, ona ua le mavae o lona alofa mutimutivale; e fou mai ia i taeao uma; e tele lou faamaoni. Ua faapea ifo lo‘u loto, O lo‘u tofi o Ieova lea; o le mea lea ou te faamoemoe ai ia te ia. O loo agalelei Ieova i e faatalitali ia te ia, o le tagata e saili ia te ia. E lelei ona faamoemoe ma le faalologo i le olataga mai ia Ieova.

auā e ui lava ina faatiga mai o ia, e toe alofa mutimuti vale mai o ia e tusa ma le tele o lona alofa. Auā e le fiafia o ia ona faapuapuagaina pe faatigaina tagata.

Na e faalatalata mai ia te au i le aso na ou valaau atu ai ia te oe; na e fetalai mai, Aua le fefe. Le Alii e, ua e faia la‘u finauga; ua e togiolaina a‘u.

Ua mu o matou pa‘u e peiseai se ogaumu, ona ua velavela o le oge.

Ou te fafaga ia te i latou i le taaga lelei, e i ai o latou lotoā i mauga maualuluga o Isaraelu; latou te taooto ai i le lotoā lelei, o le taaga lelei foi e aai ai i latou i mauga o Isaraelu. Ou te fagaina la‘u lafu, o a‘u foi e taooto ai i latou, o loo fetalai mai ai le Alii o Ieova. Ou te sailia foi le ua sē, ou te aumaia le ua tulia, ou te fusia le ua gau, ou te faamalosia le ua vaivai; a o le ua peti ma le ua malosi ou te faaumatia ia, ou te fagaina i latou i le faamasinoga.

Ua fai atu Nepukanesa, ua faapea atu, Ia faafetaia le Atua o Sataraka, Mesako, ma Apeteniko, o le na auina mai lana agelu, ua laveaiina ai ana auauna e na faatuatua ia te ia, ua liliuina foi le upu a le tupu, ma ua latou tuuina atu o latou tino ina ne‘i latou auauna ma ifo i se tasi atua, tau lava o lo latou lava Atua.

ua auina mai e lo‘u Atua o lana agelu, ua punitia ai gutu o leona, ua le afaina ai a‘u; auā ua silafia e ia ua leai sa‘u amio i ona luma; e leai foi se mea leaga ua a‘u faia i ou luma, le tupu. Ona fiafia tele lea o le tupu ona o ia, ua ia fetalai atu ia aveina ae Tanielu ai le lua; ona aveina ae ai lea o Tanielu ai le lua, ua le afaina lava o ia, auā na ia faatuatua i lona Atua.

E ana e faaola ma laveai, ua faia foi e ia faailoga ma vavega i le lagi ma le lalolagi, o le na laveai ia Tanielu ai lima o leona.

O mai ia, ina tatou toe foi atu ia Ieova; auā o ia ua na saeia, na te faamaloloina foi i tatou; ua ia fasia, na te fofoina foi i tatou. Na te faaolaina mai i tatou pe a mavae aso e lua; a oo i lona tolu o aso na te faatutūina i tatou, tatou te ola mai ai i ona luma.

Ou te laveai ia te i latou ai le malosi o le tuugamau; ou te faaola ia te i latou ai le oti. Le oti e, o fea o i ai le malaia mai ia te oe? Le tuugamau e, o fea o i ai se mea e fano ai mai ia te oe? e lilo ia te au le salamo.

Ou te taui atu ia te outou o tausaga na ‘aina e le sē akerise, ma le sē aleka, ma le sē kasili, ma le sē kasama, o la‘u itu taua tele na ou auina atu ia te outou. Tou te aai lava, ma maoona ai, tou te vivii atu foi i le suafa o Ieova lo outou Atua, o le ua faia vavega ia te outou; e le mā foi lo‘u nuu e faavavau.

ua faapea atu, Na a‘u valaau atu ia Ieova ona o lo‘u puapuaga, ua na faafofoga mai foi ia te au; na ou alaga atu nai le mea maulalo i tuugamau, ua e faafofoga i lo‘u leo.

O Ieova lou Atua i totonu ia te oe o l? malosi ia; na te faaolaina; e olioli o ia ia te oe ma le fiafia; o lona alofa e le fetalai ai o ia; e olioli lava o ia ia te oe ma le ofo fiafia.

A o outou o e matatau i lo‘u igoa, e alu ae ia te outou le La o le amiotonu; e i ai foi le mea e malolo ai i ona apaau; e o atu foi outou ma osooso, pei o tamai povi mai le fale povi.

Ua iloa e Herota ua olegia o ia e makoi, ona tele ai lea o lona ita, ua aauina atu e ia nisi e fasioti i tama tane uma i Peteleema e oo i ona tuaoi uma, e afua i e ua lua o latou tausaga atoa ma e ua pito ane i ai, e faatatau i ona po na na matuā sueina atu ai i makoi. Ona taunuu lea o le upu a le perofeta o Ieremia, ua faapea mai, Ua lagona le leo i Rama, o le auega, o le fetagisi, ma le tagitu‘i tele; ua tagiaue Rasela i lana fanau, e le mafai foi ona faanaina o ia, ona o i latou ua leai.

Ua faataamilo Iesu i Kalilaia uma, ua ia a‘oa‘o i o latou sunako, ua ia tala‘i atu foi le tala lelei o le malo, ma faamalolo e ia o ma‘i uma ma ma‘i tiga uma o le nuu. Ua oo atu ai lona logo i Suria uma, ona latou au mai ai lea ia te ia o e ua mamai atoa uma, o e ua i ai ma‘i eseese, ma e ua puapuagatia, ma e ua uluitinoina e temoni, ma e ua ma‘i māliu, atoa ma e ua mamai i le supa; ona faamaloloina lea o i latou e ia.

Amuia ē loto maulalo; auā e o latou le malo o le lagi. Amuia ē faanoanoa; auā e faamafanafanaina i latou.

Amuia ē sauaina ona o le amiotonu; auā e o latou le malo o le lagi. Amuia outou pe a latou upu leaga, ma faasaua ia te outou, ma latou tuuaiina pepelo outou i mea leaga uma ona o a‘u. Ia outou olioli ma fiafia lava; auā o i le lagi lo outou taui e tele; auā na faapea ona latou faasaua i perofeta e na muamua ia te outou.

A ou te fai atu a‘u ia te outou, ia outou alolofa atu i e ua ita mai ia te outou, ia outou faamanuia atu i e ua fetuu mai ia te outou, ia outou agalelei atu i e ua ‘ino‘ino mai ia te outou, ia outou tatalo foi mo e ua tuua‘i fua mai ma faasaua mai ia te outou;

O le mea lea ou te fai atu ai ia te outou, aua ne‘i outou popole i o outou ola, i mea tou te aai ai, ma mea tou te inu ai, po o outou tino, i mea tou te oofu ai. E le sili ea le ola i le mea e ‘ai, ma le tino i le ofu? Ia outou vaavaai i manu felelei; latou te le lulu saito, pe selesele, pe faaputu i fale saito, a e fagaina i latou e lo outou Tamā o i le lagi. E le sili ea o outou lelei i lo latou? O ai ea so outou na te mafaia i lona popole ona faateleina le umi o lona olaga i le kupita e tasi? Se a foi le mea tou te popole ai i ofu? Ia outou mafaufau i lautalotalo o le vao, pe faapefea ona tupu; latou te le galulue, latou te le milo foi; a ou te fai atu ia te outou, o Solomona ma lona matagofie tele na le ofu o ia pei o le tasi o na mea. Afai e faapea ona faaofuina e le Atua le vao o le fanua, o ola mai i le asō, a e lafoina a taeao i le ogaumu; e le sili ea ona faaofuina o outou e faatuatua itiiti? O lenei, aua ne‘i outou popole, ma faapea ane. Ni a mea tatou te aai ai, ni a foi mea tatou te inu ai, ni a foi mea tatou te oofu ai? auā o mea uma ia ua sailia e nuu ese. Auā ua silafia e lo outou Tamā o i le lagi e aoga ia mea uma ia te outou. A ia outou muai saili le malo o le Atua ma lana amiotonu; ona faaopoopoina atu lea o ia mea uma ia te outou. O lenei, aua tou te popole i le aso a taeao; auā e popole le aso a taeao i ana lava mea. E tatau i le aso lona lava leaga.

Ia outou ole atu, ona foaiina mai ai lea ia te outou; ia outou saili, ona outou maua ai lea; ia outou tu‘itu‘i atu, ona toina ai lea ia te outou. Auā ai se ole atu, e maua e ia; o lē saili foi, e iloa e ia; e toina foi i lē tu‘itu‘i atu.

Faauta foi, ua sau le lepela, ua ifo mai ia te ia, ua faapea mai, Le Alii e, a ē finagalo i ai e te mafaia lava ona faamamā mai ia te au. Ona aapa atu lea e Iesu o lona aao, ua pa‘i atu ia te ia, ua faapea atu, Ou te loto i ai; ina mamā ia oe. Ona mamā loa lea o lona lepela.

Ua oo atu Iesu i Kapanaumi, ona sau ai lea ia te ia o le ta‘ita‘i o le toaselau, ua aioi mai ia te ia, ua faapea mai, Le Alii e, ua taoto la‘u auauna i le fale e ma‘i i le supa, ua matua tiga lava. Ona fetalai atu lea o Iesu ia te ia, O le a a‘u alu atu e faamalolo ia te ia. Ua tali mai le ta‘ita‘i o le toaselau, ua faapea mai Le Alii e, e le aoga a‘u ona e ulufale atu i lalo ifo o lo‘u fale; tau lava ina oo mai sau fetalaiga, e malolo ai la‘u auauna. Auā o a‘u foi o le tagata ua pule i ai le tasi, ua ou pule foi i le ‘au tau; a a‘u fai atu i le tasi, Ina alu ia, ona alu ai lea; ma le tasi, Ina sau ia, ona sau ai lea; ma la‘u auauna, Ina faia lenei mea, ona fai ai lea. Ua faafofoga i ai Iesu, ona ofo ai lea, ua faapea atu foi i e ua mulimuli mai, E moni, ou te fai atu ia te outou, ou te lei iloa ia Isaraelu lava se faatuatua e faapena ona tele. Ou te fai atu foi ia te outou, e toatele e o mai mai sasae ma sisifo, e taooto e aai faatasi ma Aperaamo, ma Isaako, ma Iakopo, i le malo o le lagi; a o tagata o le malo, e tulia i latou i le pouliuli i fafo, e i ai le taufaitagiaue ma le lilivau o nifo. Ona fetalai atu ai lea o Iesu i le ta‘ita‘i o le toaselau, Ina alu ia, e pei ona e faatuatua, ia faapea lava ona faia mo oe. Ona malolo ai lea o lana auauna i lea lava itu aso.

Ua ulufale atu Iesu i le fale o Peteru, ona silafia ai lea e ia le tinā o lana avā ua taoto i le ma‘i vevela. Ua pa‘i atu o ia i le lima o le fafine, ona te‘a lava lea o le ma‘i vevela ia te ia; ona tulai lea o ia, ua auauna ia te i latou.

Ua oo i le afiafi, ona latou au mai ai lea ia te ia o tagata e toatele ua uluitinoina e temoni; ona ia tulia ai lea o agaga i le upu lava, ua faamaloloina foi e ia o i latou uma na mamai. Ona taunuu ai lea o le upu a le perofeta o Isaia, ua faapea mai, O ia lava na na aveina o tatou vaivai, ma na tauave o tatou ma‘i.

Faauta foi, ua to mai le afā tele i le vai, ona osofia mai ai lea o le vaa e peau; a ua tofa o ia. Ona o mai ai lea o ona soo, ua fafagu ia te ia, ua faapea mai, Le Alii e, ia e faaola mai ia te i matou, o le a maotu fano. Ona fetalai atu ai lea o ia ia te i latou, Se a le mea ua outou matatau ai, outou e faatuatua itiiti? Ona tulai ai lea o ia, ua vavao i le matagi ma le vai, ona tele ai lea o le malū.

Ua oo atu ia i le tasi itu i le nuu o Kerekese, ona fetaiai ai lea ma ia o tagata e toalua ua uluitinoina e temoni, ua o mai mai tuugamau, ua matuā faavalemalosi i laua, e le mafai ai se tasi ona ui ane i lea ala. Faauta foi, ua alalaga i laua, ua faapea mai, Se a lau na ia te i matou nei, Iesu e, le Alo o le Atua? Ua e maliu mai ea iinei, e te faatiga ia te i matou a o lei oo i ona po? Ua mamao ane foi ma i latou le lafu puaa e tele o tataa. Ua aioi mai temoni ia te ia, ua faapea mai, Afai a ē tulia i matou i fafo, tuu mai ia ia te i matou e o atu i le lafu puaa. Ona fetalai atu ai lea o ia ia te i latou, Ina o ia. Ona latou o i fafo ai lea, ua o atu i le lafu puaa; faauta foi, ua feosofi ifo le lafu puaa uma i le tofē i le vai, ua mamate ai i le vai.

Faauta foi, ua latou au mai ia te ia le tagata supa, ua taoto i le moega; ua silafia foi e Iesu lo latou faatuatua, ona fetalai atu ai lea o ia i le supa, Lo‘u atalii e, ina faalototele ia oe, ua faamagaloina au agasala. Faauta foi, ua faapea ifo nisi o le au tusiupu i o latou loto, Ua upu leaga lenei tagata i le Atua. Ua silafia e Iesu o latou manatunatu, ona faapea atu lea o ia, Se a le mea ua manatunatu leaga ai o outou loto? auā po o le fea le faigofie? po o le fai atu, Ua faamagaloina au agasala; po o le faiatu, Tulai ia, ina savali? A e peitai ina ia iloa e outou o i ai i le Atalii o le tagata i le lalolagi le pule e faamagalo ai agasala, (ona fetalai atu ai lea o ia i le supa,) Ina tulai ia, ina ave lou moega, ma alu i lou fale. Ona tulai ai lea o ia, ua alu i lona fale.

A ua lagona e Iesu, ona fetalai atu ai lea o ia ia te i latou, E le aoga le fomai i e malolo, na o e mamai.

Faauta foi, o le fafine na i ai le puna toto i tausaga e sefulu ma le lua, ua alu ane ia i ona tua, ua ia pa‘i ane i le tuupao o lona ofu; auā ua fai ifo ia i lona loto, Afai ou te pa‘i atu tau o lona ofu, ou te ola ai. A ua fāliu Iesu, ua silafia o ia, ona faapea atu ai lea o ia, Lo‘u afafine e, ina faalototele ia oe, ua e ola i lou faatuatua. Ona ola ai lea o le fafine talu lea lava itu aso.

Ua ulufale atu Iesu i le fale o le alii, ona silafia ai lea e ia o e ili fagufagu ma le motu o tagata ua pa le lauaitu, ua faapea atu o ia ia te i latou, Ina o ese ia; auā e lei oti le teine, ua na ona moe. Ona latou tapisa mai ai lea ia te ia. Ua tulia le motu o tagata, ona ulu atu ai lea o ia, ua tago i lona lima, ona tulai ae lea o le teine.

Ua maliu ese Iesu i lea mea, ona mulimuli mai ai lea ia te ia o tauaso e toalua, ua alalaga, ua faapea mai, Le alo e o Tavita, ia e alofa mai ia te i maua. Ua ulufale ia i le fale, ua o mai ai ia te ia o ia tauaso; ona fetalai atu ai lea o Iesu ia te i laua, Ua oulua faatuatua mai ea ia te au ou te mafaia lenei mea? Ona la fai mai ai lea ia te ia, Ioe, le Alii e. Ona pa‘i atu ai lea o ia i o la mata, ua faapea atu, E pei ona oulua faatuatua, ia faapea lava ona faia ia te oulua. Ona pupula ai lea o laua mata. Ona matuā fetalai atu lea o Iesu ia te i laua, ua faapea atu, Ia oulua, ne‘i faailoa atu i se tasi.

Ua la o, faauta, ua latou au mai ia te ia le tagata gūgū, ua uluitinoina e le temoni. Ua tulia le temoni, ona tautala mai ai lea o le gūgū. Ona taufaiofo ai lea o le motu o tagata, ua faapea ane, E lei iloa mai anamua se mea faapena i Isaraelu.

Ua faataamilo Iesu i aai uma ma faoa aai, ua a‘oa‘o i o latou sunako, ma tala‘i i le tala lelei o le malo, ua ia faamalolo foi i ma‘i uma, ma ma‘i tiga uma o le nuu.

Ua valaau atu e ia ona soo e toasefulu ma le toalua, ona tuu atu lea e ia ia te i latou le pule i agaga leaga, ina ia tutuli ia te i latou, ma faamalolo i ma‘i uma ma ma‘i tiga uma.

Ia outou faamalolo i e mamai, faamamā lepela, faatutū i e ua oti, tutuli i temoni. Ua maua fua e outou, ia outou foaifuaina atu.

Aua foi tou te matatau i e fasioti le tino, a e latou te le mafaia ona fasioti le agaga; a e lelei ona outou matatau i le ua mafai ona fano ia te ia le agaga atoa ma le tino i Kēna. E le faataulia ea ni manu iti se lua i le asari? e leai foi so laua e paū i le eleele e aunoa ma lo outou Tamā. A o outou lauulu lava ua faitaulia uma ia. O lea aua tou te matatau ai; e sili outou i manu iti e tele.

O lē maua lona ola, e māumau ai ia te ia; a o le faamāumau i lona ola ona o a‘u, e maua e ia.

ua pupula tauaso ma ua savavali pipili, ua faamamāina lepela ma ua logo tutuli, ua faatutūina o e na oti ma ua folafolaina foi le tala lelei i e matitiva.

Ia outou o mai ia te au, o outou uma o e tigaina ma mafatia i avega, o a‘u foi e malolo ai outou. Ia outou amoina la‘u amo, ma ia outou faaa‘oa‘o ia te au, auā o a‘u lē agamalu ma le loto maulalo; ona maua lea e outou o le malologa mo outou agaga. Auā e avegofie la‘u amo, o la‘u avega foi e māmā ia.

Faauta foi, sa i ai le tagata ua gase lona lima; ona latou fesili mai ai lea ia te ia, ua faapea mai. E tatau ea ona faamalolo i le sapati? ina ia latou momoli ia te ia. Ona fetalai atu ai lea o ia ia te i latou, O ai ea so outou e ana le mamoe e tasi, afai foi e paū o ia i le lua i le sapati, e le tago ea i ai, ma avae i luga? e le sili lava ea le tagata i le mamoe? o lea e tatau ai ona agalelei i le sapati. Ona fetalai atu ai lea o ia i le tagata, Ina faaloaloa ia o lou lima. Ona faaloaloa ai lea e ia, ona toe lelei ai lea, ua pei o le tasi.

A ua silafia e Iesu, ona maliu ese ai lea o ia i lea mea; ua mulimuli mai foi ia te ia le motu o tagata e toatele; ona faamaloloina ai lea e ia o i latou uma;

Ona aumaia lea ia te ia o le tagata ua uluitinoina e le temoni, o le tauaso foi o ia ma gūgū; ona faamaloloina ai lea e ia o ia, ona tautala ai lea ma vaai lē sa tauaso ma gūgū.

A o le mea sa luluina i le mea papa, o le tagata lea ua faalogo i le upu, ona talia loa lea ma le fiafia; a ua leai ni aa ia te ia, ua faaletumau ia; auā pe a tupu le puapuaga, po o le sauaga ona o le upu, ona tausuai loa lea o ia.

Ua maliu atu Iesu, ua na silafia le motu o tagata e toatele, ona mutimuti vale ai lea o lona alofa ia te i latou, ua faamalolo foi e ia o latou ma‘i.

Ua iloa mai o ia e tagata o lea nuu, ona latou feau atu ai lea i lea itu uma lava, ua latou au mai ai ia te ia o e mamai uma lava; ma ua latou aioi mai ia te ia, tau lava ina latou papai i le tuupao o lona ofu; ua faamaloloina foi o i latou uma e na papai mai i ai.

Faauta foi, o le fafine o Kanana ua sau mai lea lava itu, ua alaga mai ia te ia, ua faapea mai, Le Alii e, le alo o Tavita, ia e alofa mai ia te au; ua leaga lava la‘u tama teine i le temoni ua i ai. A ua leai se upu na ia tali atu ai ia te ia. Ona o mai ai lea o ona soo, ua aioi mai ia te ia, ua faapea mai, Ia e tuuina atu ia te ia e alu, auā ua mulimuli mai o ia, ma alaga mai ia te i tatou. A ua tali atu ia, ua faapea atu, E lei auina mai a‘u i nisi, a e tau lava o mamoe o le aiga o Isaraelu ua le iloa. Ona sau ai lea o ia, ua ifo ia te ia, ua faapea mai, Le Alii e, ia e fesoasoani mai ia te au. Ona tali atu ai lea o ia, ua faapea atu, E le tatau ona ave le mea e ‘ai a le fanau, ma lafo i ulī. Ona fai mai ai lea o ia, Le Alii e, e moni a oe; auā foi ua aai e ulī o momoi mea ua pauu i laulau a o latou tāula. Ona tali atu ai lea o Iesu, ua faapea atu ia te ia, Funa e, ua tele lou faatuatua; e pei o lou manao, ia faapea lava ona faia ia te oe. Ona malolo ai lea o lana tama teine i lea lava itu aso.

Ona o mai ai lea ia te ia o le motu o tagata e toatele, ua ia te i latou o e pipili, o e tauaso, o e gūgū, o e mumutu, atoa ma nisi e toatele, ua latou tuu atu ia i latou i vae o Iesu; ona faamalolo ai lea e ia o i latou. Ona taufaiofo ai lea o le motu o tagata ina ua latou iloa atu o e sa gūgū ua tautala, o e sa mumutu ua atoatoa, o e sa pipili ua savavali, o e sa tauaso foi ua vaai; ona latou vivii atu ai lea i le Atua o Isaraelu.

Ua latou oo atu i le motu o tagata, ona sau ai lea ia te ia o le tasi tagata, ua tootuli ia te ia, ua faapea mai, Le Alii e, ia e alofa mai i lo‘u atalii, ua ma‘i māliu, ua tiga lava; auā ua paū soo ia i le afi, ua faapea soo foi i le vai. Na ou au mai ia te ia i ou soo, a ua latou le mafaia ona faamalolo ia te ia. Ona tali atu ai lea o Iesu, ua faapea atu, Le tupulaga le faatuatua ma le faapiopio, ou te i ai ia te outou seia afea? ou te faapalepale ia te outou seia afea? au mai ia o ia iinei ia te au. Ua vavao atu Iesu ia te ia, ona alu ai lea i fafo o le temoni sa ia te ia; ona malolo ai lea o le tama talu i lea lava itu aso.

Ona fetalai atu ai lea o Iesu ia te i latou, Ona o lo outou le faatuatua; auā e moni, ou te fai atu ia te outou, afai e tusa lo outou faatuatua ma le fua o le sinapi, e fai atu outou i lenei mauga, Alu atu ia oe i lela mea; ona alu atu ai lea; e leai foi se mea tou te le mafaia.

Afai foi e te tausuai i lou lima po o lou vae, ina tutū ese ia, ma e lafoai; e lelei ona e sao i le ola a ua lima mutu, pe pipili, a e leaga pe a lafoina oe i le afi e faavavau ma ou lima e lua ma ou vae e lua. Afai foi e te tausuai i lou mata, ina sali ese ia, ma e lafoai; e lelei ona e sao i le ola ma le mata e tasi, a e leaga pe a lafoina oe ma ou mata e lua i le afi o Kēna.

E faapea lo outou Tamā o i le lagi, e le finagalo ia ina ia fano se tasi o i latou nei e faatauvaa.

Faauta foi, ua nonofo i le au ala tagata tauaso e toalua, ua la faalogo ua maliu ane Iesu, ona la alalaga mai ai lea, ua faapea mai, Le Alii e, le alo o Tavita, ia e alofa mai ia te i maua. Ona vavao ai lea e le motu o tagata ia te i laua, ia la faalologo; a ua atili ai ona alalaga o i laua, ua faapea mai, Le Alii e, le alo o Tavita, ia e alofa mai ia te i maua. Ona tu ai lea o Iesu, ua valaau atu ia te i laua, ona faapea atu lea o ia, Se a se mea lua te mananao i ai ou te faia mo oulua? Ona la fai mai ai lea ia te ia, Le Alii e, ia pupula o maua mata. Ona mutimuti vale ai lea o le alofa o Iesu, ua pa‘i atu i o la mata; ona vaai loa ai lea o la mata, ona la mulimuli mai ai lea ia te ia.

Ona o mai ai lea ia te ia i le malumalu o e tauaso ma e pipili, ua na faamalolo ia te i latou.

A ua tali atu Iesu, ua faapea atu ia te i latou, E moni, ou te fai atu ia te outou, Afai ua ia te outou le faatuatua, ma outou le masalosalo, ona faia lea e outou e le na o le mea ua faia i le mati, a e afai tou te fai atu i lenei mauga, Ia siitia oe, ma lafoina i le sami, ona faia lava lea. O mea uma foi tou te ole mai ai i le tatalo ua i ai le faatuatua, e maua lava e outou.

Ona latou tuuina atu ai lea o outou i le puapuaga, ma latou fasiotia outou, e inosia foi outou e nuu uma ona o lo‘u igoa. O ona po ia e tausuai ai tagata e toatele, e faalata le tasi i le tasi, ma feitagai i latou. E tutū mai foi perofeta pepelo e toatele, latou te faasese foi i tagata e toatele. E maalili foi loto o tagata e toatele, ona ua tupu tele o le amio leaga. A o lē tumau seia oo i le gataaga, e faaolaina lea.

Auā o ia ona po e oo ai le puapuaga tele, e leai sona tusa talu le amataga o le lalolagi, ua oo lava i ona po nei; e le toe faapea foi amuli. A le faapuupuuina foi ia aso, e le faaolaina se tasi; a e faapuupuuina ia aso ona o e ua filifilia.

na ou le lavalavā, ona outou faaofuina lea o a‘u; na ou ma‘i, ona outou asiasia mai lea o a‘u; na ou i le fale puipui, ona outou o ane ai lea ia te au.

Ona fai mai ai lea o Peteru ia te ia, E ui ina tā oti lava faatasi ma oe, ou te le faafiti lava ia te oe. Ua faapea foi ona fai mai o le au soo uma lava.

Ua o ane o ia ma Peteru ma atalii o Sepetaio e toalua, ona tiga lea o ia ma atuatuvale. Ona fetalai atu ai lea o ia ia te i latou, Ua matuā tiga lo‘u loto e oo i le oti; ia outou nonofo pea iinei, ma ia tatou mataala faatasi ma a‘u. Ua maliu faaitiiti atu i luma, ona faapaū fao ai lea o ia ma tatalo, ua faapea atu, Lo‘u Tamā e, afai e mafai, ia ave ese lenei ipu ia te au; a e aua le faia lo‘u loto, a o lou finagalo.

Ona tatalaina atu ai lea e ia o Parapa ia te i latou, a ua sasaina e ia o Iesu, ma tuuina atu o ia ia faasatauroina.

Ua latou faasatauro ia te ia, ona tufatufa ai lea e i latou o ona ofu, ua latou fai ai le vili; ina ia taunuu ai le upu a le perofeta, Ua latou tufatufaina o‘u ofu mo i latou, ua latou faia foi le vili i lo‘u ofu tino.

Ua lata i le itu aso e iva, ona alaga ai lea o Iesu ma le leo tele, ua faapea atu, Eli, Eli, lama sapatani? o lona uiga lenei, Lo‘u Atua e, lo‘u Atua e, se a le mea ua e tuulafoai mai ai a‘u?

Sa i ai foi i lo latou sunako le tagata ua i ai le agaga leaga; ua alaga foi o ia, ua faapea mai, Aue, Iesu e le Nasareta! se a lau na ia i te i matou? ua e maliu mai ea ia fanoia i matou? ua ou iloa oe, o le Paia oe o le Atua. Ona vavao atu lea o Iesu ia te ia, ua faapea atu, Ina faalologo ia, ma e alu i fafo nai ia te ia. Ona faataafiti lea o le agaga leaga ia te ia, ua alaga foi ma le leo tele, ona alu lea o ia i fafo nai ia te ia.

Sa taoto ai foi le tinā o le avā a Simona i le ma‘i vevela; ona latou ta‘uina atu loa lea o ia ia te ia. Ona sōsō atu lea o ia ia te ia, ua tago ifo i lona lima, ua faatu ia te ia i luga; ona mavae loa lea o lona ma‘i vevela, ona auauna lea o ia ia te i latou.

Ua oo i le afiafi i le goto o le la, ona latou au mai lea ia te ia o e mamai uma, atoa ma e ua uluitinoina e temoni. Ua potopoto uma ane foi le aai i le faitotoa. Ona ia faamaloloina lea o tagata e toatele na mamai i ma‘i eseese, ua ia tulia foi temoni e toatele, ua ia le tuu atu foi i temoni e tautala, auā ua latou iloa o ia.

Ua ia tala‘i foi i o latou sunako i Kalilaia uma, ma tutuli temoni. Ua sau le lepela ia te ia, ua aioi ia te ia, ma tootuli ia te ia, ma ua faapea mai, Afai ua e finagalo i ai, e te mafaia ona faamamā ia te au. Ona mutimuti vale lea o le alofa o Iesu ia te ia, ua aapa atu lona aao, ua pa‘i atu ia te ia, ma fetalai atu ia te ia, Ou te loto i ai, ina mamā ia oe. Ua fetalai atu o ia, ona te‘a loa lea o le ma‘i lepela ia te ia, ona mamā ai lea o ia.

A ua o mai nisi ia te ia, ua au mai le tagata supa, o loo fataina mai e le toafā. Ua le mafai foi i latou ona faalatalata atu ia te ia, auā le motu o tagata, ona latou tatala lea o le ufi o le fale sa i ai o ia, ua faasosofa i ai, ona latou tuutuu ifo ai lea o le moega o taoto ai le supa. Ua silafia e Iesu lo latou faatuatua, ona fetalai atu lea o ia i le supa, Lo‘u atalii e, ua faamagaloina au agasala. Sa nonofo mai ai nisi o le au tusiupu, sa manatunatu ifo i o latou loto, Se a le mea ua upu leaga ai faapea lenei tagata i le Atua? E mafaia ea ia te ai ona faamagaloina o agasala, ua na o le toatasi o le Atua lea? Ua silafia loa e Iesu i lona finagalo ua faapea ona latou manatunatu i o latou loto, ona fetalai atu ai lea o ia ia te i latou, Se a le mea ua outou manatunatu ai ia mea i o outou loto? Po o le fea e faigofie? po o le fai atu i le supa, Ua faamagaloina au agasala; po o le fai atu, Ina tulai ia, ma ave lou moega, ma savali? A e peitai ina ia outou iloa o i ai i le Atalii o le tagata i le lalolagi le pule e faamagalo ai agasala, (ua fetalai ane ia i le supa,) Ou te fai atu ia te oe, Ina tulai ia, ina ave lou moega, ma alu atu i lou fale. Ona tulai loa lea o ia, ua ave foi lona moega, ma savali ane i luma o i latou uma. Ona ofo tele ai lea o i latou uma, ma vivii atu i le Atua, ua faapea, Ua tatou le iloa mai anamua se mea faapena.

Ua lagona e Iesu, ona fetalai atu lea o ia ia te i latou, E le aoga le fomai i e malolo, na o e mamai; ua ou le sau e valaau i e amiotonu, a o e agasala ina ia salamo.

Ua toe ulu atu ia i le sunako, sa i ai foi le tagata ua gase lona lima. Ona latou lamalama lea ia te ia, pe na te faamaloloina o ia i le sapati, ina ia latou molia o ia. Ua fetalai atu ia i le tagata ua gase lona lima, Ina tulai mai ia i totonu. Ona fetalai atu lea o ia ia te i latou, Pe sa ea le agalelei i le sapati, po o le agaleaga; o le faaola, po o le fasioti? A ua latou faalologo. Ua ia silasila solo ia te i latou ma le toasa, ina ua tiga o lona finagalo, auā o latou loto ua maaa, ona fetalai atu lea o ia i le tagata, Ina faaloaloa ia lou lima. Ona faaloaloa ai lea e ia, ona toe lelei ai lea o lona lima, ua pei o le tasi.

Auā e toatele na ia faamaloloina, o lea ua fetaomi mai ai ia te ia e na maua e ma‘i tiga, ina ia latou papai mai ia te ia. O agaga leaga foi, ua latou iloa mai o ia, ona faapauu lea o latou i ona luma, ma latou alalaga, ua faapea mai, O oe lava o le Alo o le Atua.

Ona tofia lea e ia le toatinoagafulu ma le toalua, ina ia latou faatasi ma ia, ia na aauina atu foi i latou e tala‘i i le tala lelei; ina ia tuuina atu foi le pule ia te i latou, latou te faamalolo ai ma‘i, ma tutuli ai temoni.

E faapea foi i latou na luluina i le mea papa, o i latou ia ua faalogo i le upu, ona talia loa lea ma le fiafia. A e peitai ua leai ni o latou aa, ua faaletumau i latou; pe a tupu le puapuaga, po o le saua ona o le upu, ona latou tausuai loa lea.

Ona to mai lea o le afā, o le matagi tele lava; ona fati mai ai lea o peau i totonu o le vaa, ua tumu ai. A o ia sa i le taumuli, ua tofa i le aluga; ona latou fafagu lea ia te ia, ma fai mai ia te ia, Le a‘oa‘o e, e te le manatu mai ea ia te i matou a fano? Ona tulai lea o ia, ma na vavao atu i le matagi, ua fetalai atu foi i le vai, Faalologo ia, ina malū ia. Ona mate lea o le matagi, i le ua matuā malū. Ona fetalai atu lea o ia ia te i latou, Se a le mea tou te fefefe ai faapea? se a le mea tou te le faatuatua mai ai?

Ua maliu atu ia nai le vaa, ona fetaiai loa lea ma ia o le tagata mai tuugamau, ua ia te ia le agaga leaga, sa mau o ia i tuugamau; e le mafai foi se tasi ona noanoatia o ia i maea uamea lava. Auā ua atu lasi ona noanoatia o ia i mea e faamau a‘i vae, atoa ma maeā uamea; a ua motumotusia e ia o maea uamea, ua tu‘ipalaina foi mea e faamaū a‘i vae; e leai foi se na ia mafaia ona faalata ia te ia. Sa i ai pea lava o ia i tuugamau ma mauga i le po ma le ao; sa alaga, ma selei o ia ia te ia i maa. Ua iloa mamao mai e ia o Iesu, ona momo‘e mai lea, ma ifo ia te ia, ua alaga mai foi o ia ma le leo tele, ua faapea mai, Se a lau na ia te au nei, Iesu e, le Alo o le Atua silisili ese? ou te fai atu ia te oe ia e tauto mai i le suafa o le Atua, e te le faatiga mai ia te au. Auā ua fetalai atu o ia ia te ia, Alu ia i fafo i le tagata, o oe na le agaga leaga. Ua fesili atu foi o ia ia te ia, Po o ai lou igoa? Ona tali mai lea o ia, ua faapea mai, O Lekeono lo‘u igoa; auā e totele i matou. Ua matuā aioi mai foi o ia ia te ia ina ia na le aueseina i latou i lea nuu. Sa i ai foi le lafu puaa e tele, ua tataa e lata ane i mauga. Ua aioi mai foi temoni uma ia te ia, ua faapea mai, Ia e aauina i matou i puaa, matou te uluitino ai. Ona tuu atu loa lea e Iesu ia te i latou. Ua o i fafo agaga leaga, ona latou uluitino lea i puaa; ona feosofi ifo ai lea o le lafu i le tofē i le vai, pe atoa le lua o afe i latou; ona malelemo ai lea i le vai.

O le tasi fafine, ua ia te ia le puna toto i tausaga e sefulu ma le lua, e tele foi mea na ia tiga ai i fomai e toatele, ua uma atu ai foi ana oloa, a e lei aoga lava ia te ia, a e peitai ua atili ai lona ma‘i, ua faalogo o ia ia Iesu, ona alu ane lea i ona tua, i totonu lava o le motu o tagata, ua pa‘i ane i lona ofu; auā ua faapea o ia, Afai ou te pa‘i atu tau lava o ona ofu, ona ou malolo ai lea. Ona utu loa lea o lona puna toto; ona iloa lea e ia lona tino ua faamaloloina i lona ma‘i tiga.

Ua o mai nisi mai le fale o le ua pule i le sunako, a o fetalai mai o ia, ua faapea mai i latou, Ua oti lou afafine; se a le mea e te faalavelave ai pea i le a‘oa‘o? A o Iesu ua faafofoga i le tala ua ta‘uina mai ai, ona fetalai atu loa lea o ia i le ua pule i le sunako, Aua e te mata‘u; tau lava ina e faatuatua. Ua le mafai o ia ona ia mulimuli atu se tasi ia te ia na o Peteru, ma Iakopo, ma Ioane le uso o Iakopo. Ua oo i le fale o lē pule i le sunako, ona silafia lea e ia o le lauaitu, ma e o taufaitagi, ma e o taufaiaue tele. Ua ulufale atu ia, ona faapea atu lea ia te i latou, Se a le mea ua outou pisaō ai, ma outou fetagisi ai? e le oti le teine, ua na ona moe. Ona latou tapisa ai lea ia te ia. A ua ia tulia i latou uma i fafo, ona ave lea e ia le tamā o le teine, atoa ma lona tinā, ma e na o mai ma ia ua ulu atu foi i le mea ua taoto ai le teine. Ona tago ifo lea o ia i le lima o le teine, ma fetalai atu ia te ia, Talita kumi; (o lona faamatalaga lenei, Funa e, ou te fai atu ia te oe, ia e tulai). Ona tulai loa lea o le teine ua savali, auā ua sefulu ma le lua ona tausaga; ona segia lea o latou mauli.

Ona le mafaia lea e ia ona fai o se vavega i lea mea, na o nai tagata mamai e toaitiiti ua ia faaee ai ona lima, ma faamaloloina.

E toatele foi temoni ua latou tulia, e toatele foi o e na mamai ua latou faauuina i le suāuu, ma faamaloloina.

ona taufetuli mai ai lea o i latou i lena itu uma, o mea uma na faalogo i ai latou o i ai o ia, ua au mai ai i luga o moega e ua mamai. O mea uma foi ua ia maliu atu i ai, po o faoa aai, po o aai tetele, po o aai, ua latou tuu ai e mamai i malae, ma aioi mai ia te ia, ina ia latou papai atu tau lava o le tuupao o lona ofu, o e na papai ia te ia, na malolo ai i latou uma.

auā o le fafine ua i lana tama teine le agaga leaga, ua na faalogo i le tala ia te ia, ona sau ai lea o ia ia te ia, ua faapaū mai i ona vae; (o le fafine Eleni ia, na fanau i Suria Foinie,) ua ia faatoga ia te ia, ina ia tulia i fafo le temoni i lana tama. A ua fetalai atu Iesu ia te ia, Seia lua‘i maoona le fanau auā e le tatau ina ave mea e ‘ai a le fanau, ma lafo i ulī. Ona tali mai lea o ia ia te ia, ua faapea mai, Le Alii e, moni a oe; a o ulī i lalo o le laoai e aai i latou i momoi mea a tama. Ona fetalai atu ai lea o ia ia te ia, Ina alu ia ona o lau upu lena; ua te‘a le temoni sa i totonu i lau tama teine. Ona alu atu lea o ia i lona fale, ua maua ai lana tama teine o taoto i luga o le moega, a ua te‘a le temoni.

Ona latou au mai lea ia te ia le tagata tutuli, ua leo oolo; ua latou aioi foi ia te ia ina ia faaee e ia lona aao i luga ia te ia. Ona taita‘i ese lea o ia ia te ia i le motu o tagata, ua tuu ona tamatamai lima i totonu o ona taliga, ua feanu foi, ma pa‘i ane i lona laulaufaiva. Ua silasila ae ia i le lagi, ua oi, ona ia fetalai atu lea ia te ia, Efata, o lona uiga, ia avanoa. Ona pūpū loa lea o ona taliga, ua matala foi le noanoaga o lona laulaufaiva, ona tautala lelei mai ai lea. Ona ia vavao atu lea foi ia te i latou, aua latou te ta‘u atu i se tasi; a e ui lava ina vavao e ia ia te i latou, ua atili ai ona latou tala‘i atu ai lava; ua faapea atu ma le ofo ua matuā tele, Ua mālie lava ana mea uma ua fai; ua ia faalogoa e sa tutuli, atoa ma e sa gūgū ua ia faagaganaina.

Ua oo ia i Petesaita, ona latou au mai lea o le tauaso ia te ia, ma latou aioi ia te ia ina ia pa‘i ane ia te ia. Ona tago atu lea o ia i le lima o le tausao, ua ta‘ita‘i ane ia te ia i tua o le aai. Ua feanu foi ia i ona mata, ona faaee lea e ia o ona aao i luga ia te ia, ua fesili atu i ai, po ua na iloa se mea. Ua tepa ae o ia, ona fai mai lea o ia, Ua ou iloa atu tagata ua faapei o laau, o loo savavali. Ona toe faaee atu lea e ia o ona aao i ona mata, ua fetalai atu ia te ia, ia tepa ae; ona toe lelei lea o ia, ua na iloa lelei foi o tagata uma.

Ona tali mai lea o le tasi o le motu o tagata, ua faapea mai, Le a‘oa‘o e, ua ou au mai ia te oe lo‘u atalii ua i ai le agaga gūgū; so se mea e pue ai ia te ia, ona lafotu ai lea ia te ia, ua fāuā le gutu, ua lilivau ona nifo, ua tino vale ai foi o ia; ua uma foi ona ou fai atu i ou soo ina ia latou tulia o ia, a ua le mafaia e i latou. Ona tali atu lea o ia ia te ia, ua faapea atu, Le tupulaga le faatuatua e, tatou te i ai ma outou seia afea? ou te faapalepale ia te outou seia afea? ina au mai ia o ia ia te au. Ona latou aumaia lea o ia ia te ia; ua na iloa o ia, ona faataafiti loa lea ia te ia e le agaga, i le ua paū ia i le eleele, ona taafilifili ai lea o ia, ma fāuā lona gutu. Ona fesili atu lea o ia i lona tamā, Talu mai anafea ona oo o lena mea ia te ia? Ua fai mai o ia, Talu ina o tama itiiti. Ua lafo soo foi o ia ia te ia i le afi, atoa ma le vai, ina ia fano ai o ia; a e peitai ai se mea e te mafaia, ia e alofa mai ia te i matou, ma ia e fesoasoani mai ia te i matou. Ona fetalai atu lea o Iesu ia te ia, Afai ua e mafaia ona faatuatua, e mafaia mea uma lava i lē faatuatua. Ona alaga loa lea o le tamā o le tama, ua fai mai ma le tagi, Le Alii e, ua ou faatuatua; ia e fesoasoani i lo‘u le faatuatua. Ua silafia e Iesu ua taufetuli mai le motu o tagata, ona vavao atu lea o ia i le agaga leaga, ua faapea atu ia te ia. O oe na, le agaga gūgū ma le tutuli, ou te fai atu lava ia te oe, ina e alu i fafo ia te ia, aua foi e te toe alu i totonu ia te ia. Ona alaga lea o le agaga, ma faataafiti tele ia te ia, ona alu lea i fafo; ona liua lea o ia peiseai ua oti; ona fai mai ai lea tagata e toatele, Ua oti lava ia. A o Iesu ua tago ifo ia i lona lima, ma faatu ia te ia, ona tulai lea o ia.

A faatausuaiina foi oe e lou lima, ina tutū ese ia; e lelei ona e sao i le ola a ua e lima mutu, a e leaga ona lima lua, a e alu i Kēna, i le afi e le mafai ona tineia; o i ai e le mamate o latou ilo, e le tineia foi le afi. A faatausuaiina foi oe e lau vae, ina tutū ese ia; e lelei ina e sao i le ola ua pipili, a e leaga ona lua ni vae, a e lafoina oe i Kēna, i le afi e le mafai ona tineia; o i ai e le mamate o latou ilo, e le tineia foi le afi. A faatausuaiina foi oe e lou mata, ina sali ese ia; e lelei ina e sao i le malo o le Atua ma le mata e tasi, a e leaga ona lafoina oe ma ou mata e lua i le afi o Kēna; o i ai e le mamate o latou ilo, e le tineia foi le afi.

Ua oo i latou i Ieriko, o le a tuanai atu foi Ieriko e ia, atoa ma ona soo, ma le motu o tagata e toatele, a ua nofo mai i le auala o Patimaio le tauaso, le atalii o Timaio, o faatoga i mea māna; ua faalogo o ia o i ai Iesu le Nasareta, ona alaga mai ai lea, ua faapea mai, Iesu e, le alo o Tavita, ia e alofa mai ia te au. Ona matuā vavao atu lea o tagata e toatele ia te ia, ina ia faalologo ia; a o ia ua atili ai ona alaga, Le alo o Tavita e, ia e alofa mai ia te au. Ua tu Iesu, ma fetalai atu ia valaauia o ia; ona latou valaau atu lea i le tauaso, ua faapea atu ia te ia, Ia e loto tele, ina tu ia, o loo valaau o ia ia te oe. Ona tiai lea e ai lona ofu, ua tu i luga, ua sau ia Iesu. Ona fetalai atu lea o Iesu, ua faapea atu ia te ia, Se a se mea e te manao i ai ou te faia ia te oe? Ona fai mai lea o le tauaso ia te ia, Raponi e, ia vaai o‘u nei mata. Ona fetalai atu lea o Iesu ia te ia, Ina alu ia; ua e ola oe i lou faatuatua. Ona vaai loa lea o ona mata; ona mulimuli atu ai lea o ia ia Iesu i le ala.

Ona tali atu lea o Iesu ia te i latou, ua faapea atu, Ia outou faatuatua i le Atua; auā e moni, ou te fai atu ia te outou, ai sē fai atu i lenei mauga, Ia siitia oe, ma ia lafoina i le sami, ma le le masalosalo lona loto, a e peitai e faatuatua ia e taunuu lava mea na ia fai atu ai, ona faia lea mo ia o le mea na te fai atu ai. O le mea lea ou te fai atu ai ia te outou, o mea uma lava tou te ole mai ai i a outou tatalo, ina faatuatua ia o le a maua e outou, ona faia lava lea mo outou.

Ia outou ia te outou; auā e tuuina atu outou e i latou i fono, ma sasaina outou i sunako; e tutū foi outou i luma o alii ma tupu ona o a‘u, e fai ma molimau ia te i latou. Ia muai tala‘iina foi le tala lelei i nuu uma lava e ao ai. Pe a latou ta‘ita‘iina ma tuuina atu outou, aua ne‘i muai manatu i sa outou e fai atu ai, aua foi le lua‘i fatufatua‘i; a o se mea e foaiina ia te outou i lena itu aso, o lea tou te fai atu ai; auā e le o outou e fai atu ai, a o le Agaga Paia. E tuuina atu foi le uso e le uso ia oti, e tuuina atu foi e le tamā lona atalii, e tutū atu foi le fanau i o latou mātua, ina ia fasiotia i latou. E inosia foi outou e tagata uma ona o lo‘u igoa; a o lē tumau seia oo i le iuga, e faaolaina lea.

Ona atili ai lea ona fai mai o ia, E ui lava ina ta oti faatasi ma oe, ou te le faafiti lava ia te oe. Ua faapea foi ona fai mai o i latou uma.

Ua ō ane foi o ia ma Peteru, ma Iakopo, ma Ioane, ona matautuia lea o ia, ma atuatuvale. Ona fetalai atu lea o ia ia te i latou, O loo matuā tiga lava lo‘u loto e oo i le oti; ina nonofo ia outou iinei, ma mataala. Ua faaitiiti atu ia i luma, ona faapaū lea o ia i le eleele, ma tatalo ina ia mavae atu lea itu aso ia te ia, pe afai e mafaia. Ua faapea atu, Ava, lo‘u Tamā e, e te mafaia e oe mea uma lava; ia e aveeseina lenei ipu ia te au; a e aua le faia lo‘u loto, a o lou finagalo.

Ua loto Pilato e faalotomălie i le motu o tagata, ua ia tatalaina atu ai Parapa ia te i latou; ua uma ona sasaina o Iesu e ia, ona ia tuuina atu lea o ia ia faasatauroina.

Ua uma ona latou faasatauroina o ia, ona latou tufatufa lea i ona ofu, ma fai ai le vili, e iloa ai le mea a le tagata. O le itu aso e tolu na latou faasatauro ai ia te ia.

O le itu aso e iva foi ua alaga ai Iesu, ua leo tele, ua faapea atu, Eloi, Eloi, lama sapatani? o lona uiga pe a faamatalaina, Lo‘u Atua e, lo‘u Atua e, se a le mea ua e tuulafoai mai ai a‘u?

E mulimuli atu foi nei faailoga i e faatuatua; e tutuli e i latou temoni i lo‘u igoa; e tautalatala i latou i gagana fou; e fetagofi i latou i gata; afai foi latou te inu i se mea e oti ai, latou te le afaina ai lava; e faaee atu foi o latou lima i luga o e mamai, ma faamaloloina i latou.

Ua i o‘u luga le Agaga o le Alii, auā ua na faauu mai ia te au e folafola le tala lelei i e matitiva; ua auina mai a‘u e ia e faamalolo i e loto momomo, e tala‘i le saolotoga i le tafeaga, ma ia pupula mata o e tauaso, e tuu saoloto i e ua faasauaina,

Sa i le sunako o le tagata ua i ai le agaga o le temoni leaga; ua alaga mai foi o ia, ua leo tele, ua faapea mai, Aue! Iesu e, le Nasareta, se a ea lau na ia te i matou? Ua e maliu mai ea ia fanoia i matou? Ua ou iloa oe, o le Paia oe o le Atua. Ona vavao lea o Iesu ia te ia, ua faapea atu, Ina faalologo ia, ma ē alu i fafo nai ia te ia. Ona lafo i lalo lea o le temoni ia te ia i o latou uma; ona alu lea i fafo ia te ia, ua le afaina lava ia. Ona ofo lea o i latou uma, ua fetautalatala‘i foi, ua faapea ane, O le a lenei mataupu? auā o le pule ma le mana ua fetalai atu ai o ia i agaga leaga, ona latou o ese lea i fafo.

Ua tuua e ia le sunako, a e ulu atu i le fale o Simona. Ua maua le tinā o le avā a Simona e le ma‘i vevela, ua tele; ua latou faatoga atu ia te ia mo ia. Ona tu lea o ia i ona tafatafa, ua vavao le ma‘i vevela, ona mavae ai lea; ona tulai loa lea o ia, ua auauna ia te i latou.

O i latou uma sa i ai tagata e mamai i ma‘i eseese, ua latou aumaia i latou ia te ia i le goto o le la; ua pa‘ipa‘i tasi atu ona aao ia te i latou, ma faamalolo ia te i latou.

Sa i le tasi aai o ia, faauta o le tagata ua liloia i le lepela; ua iloa atu e ia o Iesu, ona faapaū fao ai lea o ia, ma aioi mai ia te ia, ua faapea mai, Le Alii e, a e finagalo i ai, e mafai lava ia te oe ona faamamā ia te au. Ona aapa atu lea e ia lona aao, ua pa‘i atu ia te ia, ua faapea atu, Ou te loto i ai; ia mamā oe. Ona te‘a ese loa lava lea o le ma‘i lepela ia te ia.

A ua atili ai ona logo atu le tala ia te ia. Ona faapotopoto mai lea o le motu o tagata e toatele e faalogologo ia te ia, ma ia faamaloloina e ia o latou ma‘i.

Sa a‘oa‘o atu ia i le tasi aso, ua nonofo mai ai faresaio ma a‘oa‘o o le tulafono, e na o mai mai faoa aai uma o Kalilaia, ma Iutaia, ma Ierusalema; ua i ai foi le mana o le Alii e faamalolo ia te i latou. Faauta foi, o tagata o loo fata mai i le moega le tagata ua ma‘i i le supa; ua latou mananao ina ia au mai ia te ia, ma tuu ifo i ona luma. A e lei iloa e i latou se mea e au mai ai ia te ia, ona o le motu o tagata, ona o ae lea o i latou i luga o le fale, ua tuutuu ifo ia te ia ma lona moega i maa omea o le fale i totonu i luma o Iesu. Ua silafia e ia lo latou faatuatua, ona fetalai atu lea o ia ia te ia, Sole, ua faamagaloina au agasala. Ona manatunatu lea o le au tusiupu ma le au faresaio, ua faapea ane, O ai ea lenei ua na upu leaga i le Atua? O ai na te mafaia ona faamagaloina agasala, ua na o le Atua lava? Ua silafia e Iesu o latou manatunatu, ona tali atu ai lea o ia, ua faapea atu ia te i latou, Se a le mea tou te manatunatu ai i o outou loto? Po o le fea le faigofie? po o le fai atu. Ua faamagaloina au agasala; po o le fai atu, Tulai ia, ina savali? A e peitai ina ia iloa ai e outou o i le Atalii o le tagata le pule i le lalolagi e faamagalo ai agasala, (ua fetalai atu ia i le supa,) Ou te fai atu ia te oe, Tulai ia, ina ave lou moega, ma e alu i lou fale. Ona tulai loa lea o ia i o latou luma, ua ave le mea na taoto ai o ia, ona alu ai lea i lona fale, ua vivii atu i le Atua.

Ua tali atu Iesu, ua faapea atu ia te i latou, O e malolo e le aoga i ai le fomai, na o e mamai. Ou te lei sau e valaau i e ua amiotonu, a o e ua agasala, ina ia latou salamo.

O le tasi sapati foi ua ulu ai o ia i le sunako, ma a‘oa‘o atu; sa i ai le tagata ua gase lona lima taumatau. Ua lamalama ia te ia le au tusiupu ma le au faresaio, pe faamalolo e ia i le sapati, ina ia latou maua se mea e momoli ai o ia. A ua silafia e ia lo latou manatunatu, ona fetalai atu lea i le tagata ua gase lona lima, Ina tulai ia, ma tu mai i totonu. Ona tulai loa o ia, ua tu mai. Ona fetalai atu lea o Iesu ia te i latou, Ou te fesili atu ia te outou i le mea e tasi, Pe tatau ea i le sapati ona agalelei, pe agaleaga? po o le faaola, po o le fasioti? Ua silasila solo o ia ia te i latou uma, ona fetalai atu lea i le tagata, Ina faaloaloa ia lou lima; ona faapea ai lea o ia; ona toe lelei ai lea o lona lima, e pei o le tasi.

Ua maliu ifo o ia faatasi ma i latou, ona tu lea o ia i le mea laugatasai, ma ona soo e toatele, ma le motu o tagata e toatele, mai Iutaia uma, ma Ierusalema, ma le itu i tai o Turo ma Saitonu, ua latou o mai e faalogologo ia te ia, ma ia faamaloloina o latou ma‘i; o e na tigaina foi i agaga leaga, ua faamaloloina foi i latou. Ua tausisi le motu o tagata uma e pa‘i atu ia te ia; auā ua alu ane le mana nai ia te ia, ua faamaloloina ai i latou uma.

Amuia outou e fia aai nei; auā e maoona outou. Amuia outou e tagi nei; aua e featani outou. Amuia outou pe a itagia outou e tagata, pe a faateaeseina foi outou, ma faaleagaina e i latou, ma lafoaiina lo outou igoa, pei o se mea leaga, ona o le Atalii o le tagata. Ia outou olioli i lea aso, ma ia outou osooso ma le fiafia; auā faauta, o i le lagi lo outou taui ua tele; auā sa faapea ona fai e o latou tamā i perofeta.

Ua ma‘i le auauna a le tasi ta‘ita‘i o le toaselau, sa faapelepeleina e ia, ua tāli oti. Ua faalogo o ia ia Iesu, ona auina mai lea e ia o toeaina o Iutaia e aioi mai ia te ia ina ia maliu atu ma faaola lana auauna. Ua latou o mai ia Iesu, ona latou matuā faatoga mai lea ia te ia, ua faapea mai, Ua aoga o ia e te fai ai le mea nei; auā ua alofa mai o ia i lo tatou nuu, ua na faia foi le sunako mo i matou. Ona maliu atu ai lea o Iesu ma i latou; ua latalata ia i le fale, ona auina mai lea e le ta‘ita‘i o le toaselau o ana uo ia te ia, ua faapea mai ia te ia, Le Alii e, aua ne‘i faalavelaveina oe; auā ou te le aoga ina ia ulu mai oe i lo‘u fale. O lea foi na ou manatu ai ou te le aoga ona ou alu atu ia te oe; a ia oo mai sau fetalaiga, e faamaloloina ai la‘u auauna. Auā o a‘u foi le tagata ua pule i ai le tasi, ua ou pule foi i le ‘au tau; a a‘u fai atu i se tasi, Ina alu ia, ona alu ai lea; ma le tasi, Ina sau ia, ona sau ai lea; ma la‘u auauna, Ina faia lenei mea, ona fai ai lea. Ua faafofoga Iesu i nei mea, ona ofo ai lea ia te ia; ua fāliu o ia, ma fetalai atu i le motu o tagata e ua mulimuli mai ia te ia, Ou te fai atu ia te outou, ou te lei iloa ia Isaraelu lava se faatuatua e faapena ona tele. O e na auina mai ua foi atu i le fale, ona iloa lea e i latou o le auauna sa ma‘i, ua malolo.

Ua latalata ia i le faitotoa o le aai, faauta foi, ua fata mai le tagata oti, o le tama e toatasi o ia a lona tinā, o ia foi le fafine ua oti lana tane; ua ia te ia foi tagata o le aai e toatele. Ua silasila atu le Alii ia te ia, ona mutimuti alofa lea o ia ia te ia, ua fetalai atu ia te ia, Aua e te tagi. Ua maliu ane ia, ua pa‘i atu i le fata; ona tutū mai ai lea o le au fata, ona fetalai atu lea o ia, Le tauleale e, ou te fai atu ia te oe, Ina tulai ia. Ona nofo ai lea i luga o le na oti, ua tautala; ona ia tuuina atu lea o ia i lona tinā.

O lea lava itu aso ua faamalolo ai e ia tagata e toatele sa i ai ma‘i, ma ma‘i tiga, ma agaga leaga; ua foai atu foi ina ia vaai o e tauaso e toatele. Ona tali atu lea o Iesu ia te i laua, ua faapea atu, Ina o atu ia oulua, ma faailoa atu ia Ioane o mea ua oulua vaai i ai, ma faalogo i ai; ua pupula tauaso, ua savavali pipili, ua faamamāina lepela, ua logo tutuli, ua faatutūina e na oti, ua folafolaina le tala lelei i e matitiva.

atoa ma nisi fafine sa i ai agaga leaga ma ma‘i, a ua faamaloloina; o Maria ua ta‘ua o le Makatala, na ō i fafo ia te ia temoni e toafitu,

Ua alu lo latou vaa, a e tofa o ia, ona to ifo lea o le afā i le vai, ua osofia lo latou vaa, ua tāli goto. Ona latou o ane lea ua fafagu ia te ia, ua faapea mai, Le Alii e, le Alii e, o le a matou fano. Ona tu lea o ia, ua vavao i le matagi ma peau o le vai; ona mavae ai lea, ua malū. Ua fetalai atu ia ia te i latou, O ifea ea lo outou faatuatua? Ua matatau lava i latou ma ofo; ua fetautalatala‘i i latou, O ai ea lenei? auā ua fetalai o ia i le matagi ma le vai, ona usiusitai ai lea ia te ia.

Ua latou oo atu i le laueleele o Katara, o le itu vai lea ua feagai ma Kalilaia. Ua maliu ae ia i uta, ona fetaiai lea ma ia o le tasi tagata mai le aai ua leva ona ia te ia o temoni, ua le ofu o ia, ua le nofo foi i se fale, a o tuugamau. Ua iloa mai e ia o Iesu, ona alaga mai lea o ia, ma faapaū mai i ona luma, ua fai mai ia te ia ma le leo tele, Se a lau na ia te au nei, Iesu e, o oe na le Alo o le Atua silisili ese? ou te aioi atu ia te oe, aua e te faatiga mai ia te au. Auā na fetalai o ia i le agaga leaga e alu i fafo i le tagata. Auā na atu lasi ona pue ia te ia; ua fusifusia o ia i maea uamea, ma mea e faamau a‘i vae ua leoleoina ai o ia, a ua motumotusia maea ia te ia, ona avea ai lea o ia e le temoni i le vao.) Ua fesili atu Iesu ia te ia, ua faapea atu, O ai ea lou igoa? Ua fai mai o ia, O Lekeono; auā ua uluitino ia te ia temoni e toatele. Ua latou aioi mai ia te ia, aua le fetalai o ia ia te i latou e o i le fafā. Sa i ai le lafu puaa e tele, sa tataa i le mauga; ua latou faanoi mai ia te ia ia tuu atu latou te uluitino i ai. Ona tuu atu ai lea ia te i latou. Ona o lea o temoni i fafo nai le tagata, a ua uluitino i puaa; ona feosofi ifo lea o le lafu i le tofē i le vai, ua malelemo ai.

O le fafine sa ia te ia le puna toto i tausaga e sefulu ma le lua, ua uma atu ana mea i fomai, a ua le mafai ona malolo i se tasi, ua alu ane ia i ona tua, ma pa‘i ane i le tuupao o lona ofu; ona utu loa lea o lona puna toto.

Ua sau le tasi mai le fale o le pule i le sunako a o fetalai o ia, ua fai mai ia te ia. Ua oti lou afafine; soia e te faalavelaveina le a‘oa‘o. Ua faafofoga i ai Iesu, ona tali atu lea o ia ia te ia, ua faapea atu, Aua e te fefe; tau ina e faatuatua, e ola ai o ia. Ua ulu atu ia i le fale, e le mafai ia te ia ona ulu atu se tasi, tau o Peteru, ma Iakopo, ma Ioane, o le tamā foi ma le tinā o le teine. Ua fetagisi i latou uma, ma tagitu‘i ona o ia; a ua fetalai atu ia, Soia le fetagisi; e lei oti o ia, a ua moe. Ua latou tapisa ia te ia, auā ua latou iloa ua oti o ia. A o ia, ua na tulia i latou uma i fafo, ona tago atu lea o ia i lona lima, ua valaau, ua faapea atu, Funa e, ina tulai ia. Ua toe foi mai lona agaga, ona tulai loa lea o ia; ua fetalai atu foi o ia, ia avatu ni ana mea e ‘ai.

Ua faapotopotoina e ia ona soo e toasefulu ma le toalua, ua tuu atu ia te i latou le mana ma le pule i temoni uma, ma ia faamalolo i ma‘i. Ua aauina atu i latou e ia e tala‘i i le malo o le Atua, e faamalolo foi i e mamai.

Ua latou o atu, ona faataamilo ai lea i lea aai ma lea aai e folafola le tala lelei, ma faamalolo i ma‘i i mea uma.

Ua iloa e le motu o tagata, ona latou mulimuli atu lea ia te ia; ona talia lea o i latou e ia, ua fetalai foi ia te i latou i le malo o le Atua, ma faamalolo i e na fia faamaloloina.

Faauta foi, ua alaga mai le tasi mai le motu o tagata, ua faapea mai, Le a‘oa‘o e, ou te aioi atu ia te oe, e te silasila mai i lo‘u atalii; auā o ia lo‘u atalii toatasi. Faauta foi, ua pue ia te ia e le agaga, ona alaga loa lea, ma faataafiti ia te ia, ma ua fāuā lona gutu, ua tu‘i fulifuli ia te ia, toe ina le alu ese ia te ia. Na ou aioi atu foi i ou soo ia latou tuli ia te ia i fafo; a ua le mafai lava ia te i latou. Ua tali atu Iesu, ua faapea atu, Le tupulaga lē faatuatua ma le faapiopio, ou te i ai ia te outou, ma onosai ia te outou seia afea? Ina au mai ia lou atalii iinei. O loo sau ia, a e lafotu ma faataafiti ia te ia e le temoni. Ona vavao lea e Iesu i le agaga leaga, ma ua faamalolo i le tama, ma toe tuu atu ia te ia i lona tamā.

ia outou faamalolo foi i e mamai o i ai, ma ia fai atu ia te i latou, Ua latalata ia te outou le malo o le Atua.

Faauta, ou te foai ia te outou le pule e soli ai gata ma akarava ma le malosi uma o le fili; e leai lava se mea e leaga ai outou.

Ua tali atu Iesu, ua faapea atu, O le tasi tagata na alu ifo mai Ierusalema i Ieriko, ua maua o ia e tagata fao mea; ua latou toeseina ona ofu, ma fasi ia te ia, ua latou o, ua tuua ia, ua tāli oti. Ua soona alu ifo le tasi faitaulaga i lea ala; ua iloa atu ia te ia, ona ui ane lea o ia i le tasi itu ala. Ua faapea a foi le sa Levī, ua oo i lea mea, ua alu ane, ma matamata ai; ona ui ane foi lea o ia i le tasi itu ala. A o le tasi Samaria ua alu lana malaga, ua oo atu i le mea o i ai o ia, ua iloa o ia, ona mutimuti vale lea o lona alofa; ua alu atu, ma nonoa i ona manua, ua liligi foi i ai le suāuu ma le uaina; ua faatietie ia te ia i lana lava manu, ma ta‘ita‘i ia te ia i le fale e tali ai malo, ma tausi ia te ia.

Sa tuli e ia le temoni, ua gūgū foi o ia; ua alu i fafo le temoni, ona gagana ai lea o le gūgū, ua ofo ai lava le motu o tagata.

E le faataulia ea manu iti e lima gafua i asari e lua? e leai foi so latou e tasi ua galo i luma o le Atua. A o outou lauulu lava ua faitaulia uma ia. O lena, aua tou te matatau ai; ua sili outou i manu iti e tele.

Ona fetalai atu lea o ia i ona soo, O lea ou te fai atu ai ia te outou, aua tou te popole i lo outou ola, i mea tou te aai ai, po o le tino, i mea tou te oofu ai. Ua sili le ola i le mea e ‘ai, ua sili foi le tino i le ofu. Ia outou mafaufau i oreva; latou te le lulu saito, latou te le selesele foi; e leai lava so latou afeafe, po o se fale saito, a e fagaina i latou e le Atua; e le sili ea lo outou lelei, i manu? O ai ea so outou ua mafai ia te ia i lona popole ona faateleina le umi o lona olaga i le kupita e tasi? Afai foi tou te le mafai i se mea itiiti lava, se a le mea tou te popole ai i nisi mea? Ia outou mafaufau i lautalotalo pe faapefea ona tupu; latou te le galue, e le milo foi; a ou te fai atu ia te outou, e lei ofu lava Solomona ma lona matagofie tele pei o le tasi o na mea. Afai e faapea ona faaofuina e le Atua le vao o i le fanua, o ola mai i le asō, a e lafoina a taeao i le ogāumu; e le sili ea ona faaofuina outou e ia o outou e faatuatua itiiti? O outou foi, aua tou te saili pe ni a tou te aai ai, ni a foi tou te inu ai; aua foi le feaveaiina o outou loto. Auā o mea uma ia ua sailia e nuu o le lalolagi; ua silafia foi e lo outou Tamā o ia mea e aoga ia te outou. A ia outou saili le malo o le Atua; ona faaopoopoina ai lea o ia mea uma ia te outou. Aua e te fefe oe le lafu mamoe itiiti e; auā ua finagalo lo outou Tamā e foai mai le malo ia te outou.

Ia outou faatau atu i a outou mea, tou te avatu ai e fai ma mea alofa; ia fai outou ni a outou taga e anagata, o le oa i le lagi e le uma lava, e le tāitāi ane i ai se gaoi, e le atia foi e se mogamoga. Auā o le mea o i ai lo outou oa, e i ai atoa foi ma o outou loto.

Faauta foi, sa i ai le fafine ua ia te ia le agaga e vaivai ai i ona tausaga ua sefulu ma le valu, ua faano‘uno‘u lava ia, e le mafai lava ona tu sa‘o i luga. Ua silafia o ia e Iesu, ona valaau atu lea o ia ia te ia, ua faapea atu, Funa e, ua tatalaina lou vaivai. Ua faaee atu e ia ona aao ia te ia; ona faasa‘oloaina lea o ia, ua vivii atu foi o ia i le Atua.

A o le fafine nei, o le afafine o Aperaamo, ua noanoatia e Satani, faauta ona tausaga ia ua sefulu ma le valu, e le tatau ea ona tatalaina o lenei noanoaga ia te ia i le aso sapati?

Ona fetalai atu lea o ia ia te i latou, Ina o ia, fai atu i lea alope, Faauta, ou te tuli i fafo temoni, ou te faamalolo foi i e mamai i le asō ma taeao, a oo i e luā ou te faaiuina ai.

Faauta foi, sa i ona luma le tasi tagata ua ma‘i i le fula. Ua fetalai atu Iesu i le au a‘oa‘o tulafono ma le au faresaio, ua faapea atu, Pe sa ea ona faamalolo i ma‘i i le sapati? Ua latou faalologo lava. Ona tago atu lea o ia ia te ia, ua faamalolo ia te ia, ma tuu atu e alu.

Peitai o oe, pe a e sauni le faigaai, ina tala‘i ia i e matitiva, i e mumutu, i e pipili, ma e tauaso;

O le tasi tagata mauoa, ua ofu i le ofu pāuli, ma le ie vavae, ua taileleiia lava ia i aso uma. O le tasi tagata mativa foi e igoa ia Lasalo, ua taatia i lona faitotoa, ua lilo i le papala, ua manao tele ia e ‘ai momoi mea na pauu ifo i le laoai a le mauoa; a ua o mai ulī ua etoeto ona papala. Ua oo foi ina oti o le tagata mativa, ona avea lea o ia e agelu i le fatafata o Aperaamo. Ua oti foi le mauoa, ma ua tanu; ua i seoli na faataugaina, ona tepa ae ai lea o ia, ua na iloa mamao atu ia Aperaamo ma Lasalo i lona fatafata; ua alaga atu foi o ia, ua fai atu, Lo‘u tamā e, Aperaamo, ia e alofa mai ia te au, ma ia e auina mai Lasalo, na te fufui i le tumutumu o lona tamatamailima i se vai, e faamālulu a‘i lo‘u nei laulaufaiva; auā ua ou puapuaga i le mumū o le afi nei. Ona fai ane lea o Aperaamo, Lo‘u atalii e, ia e manatu, na e maua au mea lelei i lou olaga, na maua foi e Lasalo o mea leaga; a o lenei, ua faaolioliina ia; a ua puapuagaina oe. E le gata i nei mea uma, a ua tumau le vanu tele i lo tatou va; o le mea lea e le masao ai o e ua iinei ua fia o atu ia te outou; e le masao mai foi o e ua iina ia te i matou nei. Ona fai atu lea o ia, Lo‘u tamā e, ou te faatoga atu ia te oe, ina ia e auina atu o ia i le aiga o lo‘u tamā; auā e toalima o‘u uso; ina ia molitino atu ia ia te i latou, ne‘i latou o mai foi i lenei mea puapuaga. Ua fai ane Aperaamo ia te ia, O ia te i latou Mose ma le au perofeta, ia latou faalogo i ai. A ua faapea atu ia, Lo‘u tamā e, Aperaamo, aua; a e afai e alu atu se tasi ia te i latou nai e ua oti, e salamo ai i latou. Ua fai ane o ia ia te ia, Pe afai latou te le faalogo ia Mose ma le au perofeta, e ui lava ina tu mai se tasi nai e ua oti, latou te le mafafai lava.

Ua oo atu ia i le tasi aai, ona fetaiai lea ma ia o tagata lepela e toatinoagafulu, ua tutū mamao mai i latou. Ua latou alalaga mai, ua faapea mai, Le Alii e, Iesu, ia e alofa mai ia te i matou. Ua silafia e ia, ona fetalai atu lea o ia ia te i latou, Ina o ia, ia faaali atu outou i faitaulaga. Ua latou o, ona faamamāina lea o i latou. O le tasi o i latou, ua na iloa ua faamaloloina ia, ona toe foi mai lea o ia, ua vivii atu i le Atua ma le leo tele;

O sē saili ia saogalemu lona ola, e māumau ai ia te ia; a o sē faamāumau ai, e faasaoina e ia.

Ua latalata ia i Ieriko, a ua nofo i le auala le tasi tauaso o faatoga i mea: ua faalogo o ia i le motu o tagata ua savavali ane, ona fesili lea a ia, pe se a lea. Ua latou fai atu ia te ia, o Iesu le Nasareta ua maliu ane. Ona alaga mai ai lea o ia, ua faapea mai, Iesu e, le alo o Tavita, ia e alofa mai ia te au. Ua vavao ia te ia e na muamua, ina ia faalologo o ia; peitai o ia ua atili ai ona alaga, Le alo o Tavita e, ia e alofa mai ia te au. Ua tu Iesu, ma fetalai atu ia ta‘ita‘iina mai o ia ia te ia. Ua latalata mai o ia, ona fesili atu lea o ia ia te ia, ua faapea atu, Se a le mea e te manao i ai ou te faia mo oe? Ua fai mai o ia, Le Alii e, ia vaai o‘u nei mata. Ona fetalai atu lea o Iesu ia te ia. Ina vaai ia ou mata; o lou faatuatua ua e ola ai. Ona vaai loa lea o ona mata, ua mulimuli atu ia te ia, ua vivii atu i le Atua; ua iloa atu ai e le nuu uma, ona latou vivii atu lea i le Atua.

Auā ua sau le Atalii o le tagata e saili ma faaola i le na le iloa.

e le mafai foi ona toe oti o i latou; auā ua latou tutusa ma agelu; o fanau foi i latou a le Atua, o tagata o le toe tu.

A o lei oo nei mea, latou te pupue ma faasaua ia te outou, e tuuina atu ia te outou i sunako ma fale puipui, latou te ta‘ita‘iina atu outou i tupu ma alii ona o lo‘u igoa. E oo ia mea ia te outou e fai ma molimau. O lenei, ia tuu i o outou loto, tou te le muai mafaufau i se upu tou te tali atu ai. Auā ou te avatu mo outou le upu ma le poto, e leai so latou o e finau mai ia te outou na te mafaia ona tali mai, pe tetee mai ia te outou. E tuuina atu foi outou e mātua, ma uso, ma aiga, ma uo; o isi foi o outou e fasiotia e i latou. E inosia foi outou e tagata uma ona o lo‘u igoa. A e leai lava so outou lauulu e tasi e paū.

O outou foi, ua outou tumau ia te au i o‘u tofotofoga.

Ua fetalai atu le Alii, Simona e, Simona e, faauta, ua manao tele Satani ia te outou, ia lulu ia te outou pei o le saito; a ua ou faatoga mo oe, ina ne‘i mavae lou faatuatua; a o oe foi, pe a liua mai oe, ona e faamalosi ai lea i ou uso. Ua fai mai o ia ia te ia, Le Alii e, ua ou sauni ta te o faatasi ma oe i le fale puipui atoa ma le oti.

Ua puapuaga o ia, ua atili ai lana tatalo; o lona afu foi ua pei o ‘alu‘alu toto ua paū ifo i le eleele.

Ua latou oo atu i le mea e ta‘ua o le mea o i ai le ulupoo, ua latou faasatauro ia te ia i lea mea, ma e pagotata, o le tasi i le itu taumatau, ma le tasi i le itu tauagavale. Ona fetalai atu lea o Iesu, Lo‘u Tamā e, ia e faamagaloina atu ia te i latou; auā ua latou le iloa le mea ua latou faia. Ua tufatufa e i latou ona ofu, ona fai ai lea o le vili.

Ona fetalai atu ai lea o Iesu ia te ia, E moni, ou te fai atu ia te oe, o le asō ta te faatasi ai ma oe i parataiso.

Ona valaau ai lea o Iesu, ua leo tele, ua faapea atu, Lo‘u Tamā e, ou te tuuina atu lo‘u nei agaga i ou aao; ua na fetalai ia upu, ona to ai lea o lana mānava.

Auā ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau.

Ona toe malia atu ai lea o Iesu i Kana i Kalilaia, na ia lina ai le suāvai ma uaina. O le tasi alii foi ua ma‘i lona atalii i Kapanaumi; ua faalogo o ia ua maliu mai Iesu mai Iutaia i Kalilaia, ona sau ai lea o ia ia e ia, ma faatoga mai ia te ia, ia maliu ifo e faamalolo i lona atalii, auā ua tāli oti. Ona fetalai atu lea o Iesu ia te ia, Afai tou te le vaavaai i faailoga ma vavega, tou te le talitonu lava. Ua fai mai le alii ia te ia, Le Alii e, se‘i e maliu ifo, manū o lei oti si ou atalii. Ona fetalai atu lea o Iesu ia te ia, Alu ia oe, ua ola lou atalii. Ua talitonu le tagata i le upu na fetalai atu ai Iesu ia te ia, ona alu ai lea o ia. O alu ifo o ia ua fetaiai ma ana auauna, ona latou ta‘u atu lea ia te ia, ua faapea atu, Ua ola lou atalii. Ona fesili atu lea o ia ia te i latou, po o le fea itu aso na afua ai ona faafeoloolo. Ua fai mai i latou ia te ia, Na mavae lava ananafi lona ma‘i vevela i le itu aso e fitu. Ona iloa lea e le tamā, o le itu aso lava lea na fetalai atu ai Iesu ia te ia, Ua ola lou atalii. Ona talitonu lea o ia, atoa ma lona aiga uma.

Sa taooto ai tagata e toatele o e mamai, o e tauaso, o e pipili, ma e ma‘i tino vale; o faatalitali ai le gaepu o le vai; auā a oo i ona aso, ua alu ifo ai le agelu i le taelega, ma faagaepu le vai; i le o le ua muamua ifo, ina o gaepu o le vai, ua malolo ai o ia i le ma‘i na ma‘i ai o ia. Sa i ai foi le tasi tagata na ma‘i i tausaga e tolugafulu ma le valu. Ua silasila atu Iesu ia te ia o taoto; ua silafia foi ua loa ona ia te ia o le ma‘i, ua fetalai atu ia te ia, E te fia malolo ea? Ua tali mai ia te ia le na ma‘i, Le Alii e, e leai lava se tagata na te tuuina ifo a‘u i le taelega, pe a gaepu le vai; a alu ifo a‘u e muamua ifo le tasi ia te au. Ua fetalai atu Iesu ia te ia, Ina tu ia i luga, ave ia lou moega, ma ia e savali. Ona malolo loa lea o le tagata; ua ave lona moega, ma ua savali. O le sapati foi lea aso.

Ua mavae ia mea, ua silafia o ia e Iesu i le malumalu, ona fetalai atu lea o ia ia te ia. Faauta, ua e malolo oe; aua e te toe agasala, ne‘i oo atu ia te oe se leaga e sili i lena.

Ona mulimuli atu lea ia te ia le motu o tagata e toatele, auā na latou matamata i ona faailoga sa faia i e na mamai.

Ua fetalai atu Iesu ia te i latou, O a‘u nei le areto o le ola; o lē sau ia te au, e le laina lava ia; o lē faatuatua foi ia te au, e le toe fia inu lava ia. A ua ou fai atu ia te outou, ua outou vaavaai mai ia te au, a e tou te lei faatuatua mai lava. O i latou uma ua foaiina mai ia te au e le Tamā, e o mai i latou ia te au; o ia foi e sau ia te au, ou te le tulia lava i fafo.

Ona toe fetalai atu lea o Iesu ia te i latou, ua faapea atu, O a‘u nei o le malamalama o le lalolagi; o lē mulimuli mai ia te au, e le savali o ia i le pouliuli, a e ia te ia le malamalama o le ola.

Ua maliu aue o ia, ua silafia le tagata ua tauaso talu ina fanau mai. Ona fesili mai lea o ona soo ia te ia, ua faapea mai, Rapi e, po o ai ea na agasala, po o ia nei, po o ona mātua, ina ua fanau mai o ia o tauaso? Ua tali atu Iesu, E lei agasala lenei tagata, po o ona mātua; a e peitai ina ia faaalia ai o galuega a le Atua ia te ia. E tatau ona ou faia galuega a le ua auina mai a‘u, manū o ao; e oo i le po, e le mafaia e se tasi ona galue ai. Manū ou i ai i le lalolagi, o a‘u o le malamalama o le lalolagi. Ua fetalai atu nei upu, ona feanu ifo lea o ia i le eleele; ona faia lea o le palapala i le feanuga, ua nini mata o le tauaso i le palapala; ona faapea atu lea o ia ia te ia, Alu ia, ina mulumulu i le taelega i Seloa, (o lona uiga pe a faamatalaina, O le auina.) Ona alu lea o ia, ua mulumulu, ua toe foi mai, ua vaai.

E lei faalogo lava talu mai le vavau, ona faapupulaina e se tasi o mata o le na fanau mai o tauaso.

O le gaoi, e leai se tasi mea e sau ai na ona ai gaoi, ma fasi, ma faaumatia: ua ou sau ina ia latou maua le ola, ia maua atili ai lava. O a‘u le leoleo mamoe lelei; e tuu atu e le leoleo mamoe lelei o lona ola e sui a‘i mamoe.

ou te avatu foi le ola e faavavau ia te i latou; latou te le fano lava e oo i le faavavau, e le mafai lava e se tasi ona fao ia te i latou ai lo‘u lima. O lo‘u Tamā o le na foaiina mai i latou ia te au, e sili o ia i nisi uma lava; e le mafai e se tasi ona faoa i latou i le lima o lo‘u Tamā.

Ua fetalai atu Iesu ia te ia, O a‘u nei o le toe tu ma le ola; o lē faatuatua mai ia te au, e ui lava ina oti, a e ola lava ia. O tagata ola uma o e faatuatua mai ia te au, e le oti lava e oo i le faavavau; po ua e talitonu mai ea i lena mea?

Ua oo foi Maria i le mea sa i ai Iesu; ua vaai mai ia te ia, ona faapaū mai lea o ia i ona vae, ua faapea mai ia te ia, Le Alii e, ana e iinei, po ua le oti lo‘u tuagane. Ua silafia e Iesu o ia ua tagi, ma Iutaia ua o mai ma ia ua fetagisi, ona tiga tele lea o lona finagalo, ma ua ātu lava o ia; ona faapea atu lea, O fea na outou tuuina ai o ia? Ua faapea mai i latou ia te ia, Le Alii e, maliu mai ia, e te silasila i ai. Ua tagi Iesu. Ona faapea ane ai lea o Iutaia, Faauta i le tele o lona alofa ia te ia!

Ua fetalai atu Iesu, Ave ese ia le maa. Ona fai mai lea ia te ia o Mareta le tuafafine o le ua oti, Le Alii e, ua oo ina manogi, auā o lona po fa lenei. Ua fetalai atu Iesu ia te ia, Pe na ou le fai atu ea ia te oe, Afai e te talitonu, ona e iloa lea o le mamalu o le Atua? Ona latou ave ese lea o le maa i le mea na tuu ai le ua oti. Ona tepa ae lea o fofoga o Iesu, ua faapea atu, Lo‘u Tamā e, ou te faafetai atu ia te oe, auā ua e faafofoga mai ia te au. Ua ou iloa foi, e te faafofoga mai ia te au e le aunoa; a e peitai ua ou fai atu ai, ona o le motu o tagata o loo vagavagai, ina ia talitonu i latou ua e auina mai a‘u. Ua ia fetalai atu ia upu, ona alaga lea o ia ua leo tele, Lasalo e, ina sau ia i fafo. Ona alu ai lea i fafo o le na oti, ua fusifusia ona vae ma ona lima i ie na tanuma‘i, ua fusi foi ona mata i le solosolo. Ona fetalai atu lea o Iesu ia te i latou, Tatala ia ia te ia, ina tuu atu ia e alu.

Aua le atuatuvale o outou loto; ia outou faatuatua i le Atua, ia faatuatua mai foi ia te au. E tele mea e nonofo ai i le maota o lo‘u Tamā; ana leai, po ua ou fai atu ia te outou; ou te alu e sauni se mea e nonofo ai outou.

O mea uma foi tou te ole atu ai i lo‘u igoa, ou te faia lava; ina ia viia le Tamā ona o le Atalii. Afai tou te ole atu i se mea i lo‘u igoa, ou te faia lava.

Ou te tuuina atu ia te outou le manuia; o lo‘u manuia ou te avatu ai ia te outou; ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau.

Afai tou te tumau ia te au, a tumau foi a‘u upu ia te outou, o mea uma lava tou mananao i ai, tou te ole atu ai, ona faia lea mo outou. E viia lo‘u Tamā i lenei mea, pe a outou fua tele mai; ona fai ai lea outou mo‘u soo.

Ua ou fai atu nei mea ia te outou, ina ia tumau ai lo‘u olioli ia te outou, ia atoatoa foi lo outou olioli.

O lenei foi, ua maua nei outou e le tiga; a e tatou te toe feiloai ma a‘u, ona olioli ai lea o outou loto, e le aveeseina foi e se tasi lo outou olioli. O lea aso tou te le toe fesili mai ai ia te au i se mea e tasi. E moni, e moni, ou te fai atu ia te outou, o mea uma tou te ole atu ai i le Tamā i lo‘u igoa, e foai mai e ia ia te outou. Ua oo mai nei lava tou te lei ole atu i se mea i lo‘u igoa; ina ole atu ia, ona outou maua ai lea, ina ia atoatoa ai lo outou olioli.

Ua ou fai atu nei mea ia te outou, ina ia outou maua le manuia ia te au; e maua foi outou e le puapuaga i le lalolagi, a ia outou loto tetele, ua ou manumalo i le lalolagi.

Ona ave lea e Pilato ia Iesu, ua sasa foi ia te ia.

Ona ia tuuina atu lea o ia ia te i latou, ina ia faasatauroina. Ona ave lea o iesu e i latou, ua ta‘ita‘iina atu; ua ave e ia lona satauro, ua maliu atu foi i le mea e ta‘ua. O le mea o i ai le ulupoo, ua igoa i le upu Eperu, o Kolokota. Ua latou faasatauro ia te ia i le a mea, atoa ma isi tagata e toalua faatasi ma ia, o le tasi i le tasi itu, ma le isi i le isi itu, a o i totonu Iesu.

Ua talia le vineta e Iesu, ona fetalai ane lea o ia. Ua taunuu; ua faagaugau lona ao, ona tuuina atu lea o lona agaga.

Ua toe faapea foi le tasi Tusi, E vaai atu i latou ia te ia na latou tu‘ia.

E iu foi ina faaolaina o i latou uma lava o e valaau atu i le suafa o le Alii.

O le mea lea ua fiafia ai lo‘u loto, ma olioli ai lo‘u laulaufaiva; e malolo ai foi lo‘u tino ma le faatalitali; auā e te le tuua a‘u i le tuugamau; e te le tuu atu foi lou Tagata Paia ia oo i ai le pala. Ua e faailoa mai ia te au ala o le ola; e te faatumu mai ia te au i le fiafia i ou luma.

Ona fai atu lea o Peteru, E leai sa‘u ario po o sa‘u auro; a o le mea ua ia te au, ou te avatu lea ia te oe, O le suafa o Iesu Keriso o le Nasareta, ina tu ai ia i luga, ina savali. Ua tago atu foi o ia i lona lima taumatau, ua faatu ia te ia i luga; ona faamalosia loa lea o ona vae ma ponaponāvae. Ua oso ia i luga ma tu, ua savali foi, na ulu faatasi foi ma i laua i le malumalu, o loo savali ia, ma oso, ma vivii atu i le Atua. Ua iloa mai foi e le nuu uma o ia o loo savali ma vivii atu i le Atua.

ua oo ina au mai e i latou i e mamai i malae, ma faataooto ai i moega ma fata, tau lava ina ia faapaoloina ai nisi o i latou i le ata o Peteru pe a ui ane. Ua o mai foi le motu o tagata mai aai ua vagavagai Ierusalema, ua au mai e i latou e ua mamai ma e ua tigaina i agaga leaga; ua faamaloloina i latou uma lava.

Ona tutū lea i luga o le faitaulaga sili, ma i latou uma ua ia te ia, o le itu aiga lea a le au satukaio, ua matuā matataua lava i latou; ua latou pupue atu foi i le au aposetolo, ma tuu atu ia te i latou i le fale puipui o le nuu. A ua to mai puipui o le fale e le agelu a le Alii i le po, ua na ta‘ita‘i ia te i latou i fafo, ma faapea atu, Ina o ia outou, ina tutū i le malumalu ma tautala atu i le nuu i upu uma lava o lenei olataga.

Ona ō lea o i latou nai luma o le fono, ua olioli ina ua ta‘uaogaina i latou ia faaleagaina ona o lona suafa.

A ua soona saua Saulo i le ekalesia, ua ulufale ia i lea fale ma lea fale, ma fetoso mai i tane ma fafine, ma tuuina atu i le fale puipui. Ua o solo foi e na faasalalauina, ma latou folafola atu le tala lelei o le upu.

Ua naunau le motu o tagata ma le loto gatasi i upu na fai atu e Filipo, ua latou faalogologo ma vaavaai i faailoga ua faia e ia. Auā ua ō i fafo agaga leaga i tagata e toatele sa i ai, ua alalaga ma le leo tele; ua faamaloloina foi e sa mamai i le supa ma pipili e toatele. Ua tele lava le olioli i lea aai.

o Iesu o le Nasareta, o le na faauuina e le Atua i le Agaga Paia ma le mana, o ia sa femaliuai ma agalelei ma faamalolo atu i e na faatoilaloina uma lava e le tiapolo; auā sa ia te ia le Atua.

Ua pue ia te ia, ona tuu ai lea i le fale puipui, ma tuuina atu i tagata tau e taitoafā i vasega e fa e leoleo ia te ia; ua manatu ia e ta‘ita‘i ane ia te ia i le nuu pe a mavae le paseka. O lenei, ua leoleoina Peteru i le fale puipui; a ua faia le tatalo faatauanau i le Atua e le ekalesia mo ia. Ua oo ina a ta‘ita‘i e Herota ia te ia i fafo, o lea lava po na moe ai Peteru i le va o tagata tau e toalua, ua noanoatia o ia i maea uamea e lua; o leoleo foi i luma o le faitotoa, ua leoleo i latou i le fale puipui. Faauta foi, o le agelu a le Alii ua tu mai, ua pupula mai foi le malamalama i le fale; ua na ta ia Peteru i lona itu, ma fafagu ia te ia, ua faapea atu, Ina tu ai i luga, ia vave. Ona pauu ifo lea o maoa uamea nai ona lima. Ua fai atu le agelu ia te ia, Fusi ia ou ofu, ma faamau ifo ou seevae. Ua faapea foi ona faia e ia. Ua na fai atu foi ia te ia, Ina pulupulu ia lou ofu, ma mulimuli mai ia te au. Ona alu lea o ia i fafo, ua mulimuli atu ia te ia; ua le iloa e ia ua moni le mea ua faia e le agelu; fa te ia ua vaaia le faaaliga. Ua mavae i tua ia te i laua le muai leoleoga ma lona lua, ona oo lea o i laua i le puipui uamea e o atu ai i le aai; ua matala fua lea ia te i laua; ona la o atu lea i fafo, ma savali atu i le ala e tasi; ona tuua loa lea o ia e le agelu.

ua faamalosi i loto o le au soo, ma apoapoai atu ia tumau i le faatuatua; ua faapea atu foi, O puapuaga e tele e tatau ona tatou sao atu ai i le malo o le Atua.

Ua feosofi mai le motu o tagata ia te i laua, ua saei ese atu e faamasino o laua ofu, ua fai atu foi ia sasa ia te i laua i laau. Ua latou sasa ia te i laua, e tele o la ta, ona tuu atu lea i le fale puipui, ua fai atu i le leoleo o le fale ia leoleo lelei ia te i laua;

ua oo lea poloaiga, ona tuu atu lea o ia ia te i laua i le potu tuloto, ma faamau i o la vae i laau. O le tulua o po ma ao ua tatalo ai ma pepese o Paulo ma Sila i le Atua; ua faalogo foi ia te i laua e ua noanoatia. Ona faafuasei mai lea o le mafuie tele, ua luluina ai faavae e le fale puipui; ua toloaina mai ai o puipui uma, ua maunuunu ai foi o latou noanoaga uma lava. Ua ala le leoleo o le fale puipui na moe, ua na iloa faitotoa o le fale ua avanoa, ona se‘i lea e ia o le pelu, a fasi o ia e ia, fa te ia ua sosola e na noanoatia, A ua alaga Paulo ma le leo tele, ua faapea atu, Aua ne‘i faia e oe se mea e leaga ai oe; auā o iinei i matou uma lava. Ona fai atu lea o ia e au mai ni afi, ona oso mai lea o ia, ma faapaū i luma o Paulo ma Sila ma le gatete. Ua na aumaia foi i laua i fafo, ua faapea mai, Alii e, se a le mea e tatau ona ou faia ou te ola ai?

Ua faia foi e le Atua vavega sili i lima o Paulo; o lea ua avea ai solosolo ma ie tali otaota nai lona tino i e mamai, ona mavae ai lea o latou ma‘i, ua ō i fafo foi ia te i latou agaga leaga.

na ou auauna i le Alii ma le loto maulalo lava, ma le maligi tele o loimata, ma faaosoosoga na oo ia te au ona o le taupulepulega a Iutaia;

Faauta foi, ou te alu nei, ua tinoū le loto, i Ierusalema, ou te le iloa se mea e oo mai ia te au i lea mea; na o lenei, o loo molitino mai e le Agaga Paia i lea aai ma lea aai, o loo faapea mai, ua faatali mai noanoaga ma puapuaga ia te au. A e ou te le manatua se tasi mea, o lo‘u lava ola foi ou te le naunau i ai, se‘i ou faauma lo‘u momo‘e ma le olioli, atoa ma le faiva ua ou maua mai le Alii o Iesu, ou te molitino atu le tala lelei o le alofa tunoa o le Atua.

Ua ou faaali atu ia te outou mea uma lava, ia faapea ona outou galulue ia fesoasoani i e ua vaivai e tatau ai, ma ia outou manatu i le afioga a le Alii o Iesu, na fetalai mai e ia, E sili le manuia o le na te foai atu, i le manuia o le na te talia mai.

A ua tali mai Paulo, Tou te fetagisi ma faatiga tele mai lo‘u loto i se a? auā ua ou sauni lava a‘u e le gata ina fusifusia, a ia ou oti lava i Ierusalema, ona o le suafa o le Alii o Iesu. Ua le mafaia o ia, ona faalologo lea o i matou, ua faapea ane, Ina faia ia le finagalo o le Alii.

Ua taoto foi le tamā o Popilio i le ma‘i vevela ma le sana toto; ua alu atu Paulo ia te ia, ma ua tatalo, ona faaee lea e ia o ona lima i luga ia te ia, ua faamalolo ai ia te ia. Ua faia foi lenei mea, ona o mai ai lea o e na mama‘i uma lava i le motu, ma ua faamaloloina.

E le gata foi i lea, a ua tatou mitamita foi i puapuaga, ina ua tatou iloa o le puapuaga e tupu ai le onosai, o le onosai e tupu ai le mautinoa, o le mautinoa e tupu ai le faamoemoe; o le faamoemoe foi e le mā ai, auā ua faamaligi mai le alofa o le Atua i o tatou loto e le Agaga Paia ua foaiina mai ia te i tatou.

a ua faaalitinoina mai e le Atua lona lava alofa ia te i tatou, ina ua maliu Keriso ma sui o i tatou, a o tatou agasala pea. O lenei, ua ta‘uamiotonuina nei i tatou i lona toto, e le faaolaina ea i tatou e ia ai le toasa i se a? Auā afai ua lelei i tatou ma le Atua i le maliu o lona Alo, ina o fai i tatou mona fili, e matuā faaolaina lava i tatou i lona soifua, o i tatou ua lelei ma ia. A e le gata i lea, a ua tatou mitamita foi i le Atua, ona o lo tatou Alii o Iesu Keriso, o ia ua tatou maua mai ai nei le leleiga.

O lenei faapei ona oo mai o le agasala i le lalolagi i le tagata e toatasi, o le oti foi ona o le agasala, ona oo mai ai lea o le oti i tagata uma lava, auā ua agasala uma lava;

Tou te lei iloa ea, o i tatou nei uma na papatisoina ia Keriso Iesu, na papatisoina i tatou i lona maliu? O lenei, ua tatanu faatasi i tatou ma ia i le papatisoga i lona maliu; ina ia tatou savavali i le ola toefuataiina, pei ona toe faatuina mai o Keriso nai e ua oti, i le mana o le Tamā. Auā afai ua faatasia i tatou i le faatusa i lona maliu, e faapea foi i tatou i lona toe tu mai. Ua tatou iloa lenei mea, na faasatauroina faatasi ma ia lo tatou tagata tuai, ina ia faaumatia ai le tino o le agasala, ina ia le toe faapologaina i tatou i le agasala. Auā o le ua oti ua tuusaunoa ia nai le agasala.

Afai foi ua oti faatasi i tatou ma Keriso, ua tatou taofi, tatou te ola foi faatasi ma ia. Ua tatou iloa ua toe tu mai Keriso nai e ua oti, e le toe maliu lava o ia, e le toe pule le oti ia te ia. Auā o lona maliu, ua tasi lona maliu i la le agasala; a o lona soifua, e soifua lava ia i la le Atua. Ia faapea foi la outou taofi, ua outou oti i la le agasala, a ua outou ola lava i la le Atua i lo tatou Alii o Keriso Iesu. O lenei, aua ne‘i malo le agasala i o outou tino auga vale, i lo outou gauai i ai i ona tu‘inanau; aua foi ne‘i tuuina atu o outou tino i le agasala e fai ma auupega a le amio leaga; a ia outou tuuina atu outou i le Atua, e pei o e ua ola nai e ua oti, ma ia tuuina atu outou tino i le Atua e fai ma auupega a le amiotonu.

Ni a foi ni fua na ia te outou anamua i na mea ua outou mamā ai i nei ona po? Auā o le iuga o ia mea o le oti lea. A o lenei, ua tuusaunoa outou nai le agasala, ma ua fai ma auauna a le Atua, ua ia te outou ni a outou fua e oo ai i le faapaiaina o lona uiga foi o le ola e faavavau.

Auā o le oti, o le totogi lea o le agasala; a o le ola e faavavau, o le mea foaifuaina mai lea e le Atua, i lo tatou Alii o Keriso Iesu.

Aue o a‘u le tagata malaia! o ai sē laveai ia te au ai le tino o lenei oti?

O lenei, ua leai se faasala i e o ia Keriso Iesu, o e le savavali i la le tino, a e i la le Agaga; auā o le tulafono a le Agaga o le ola ua ia Keriso Iesu ua tuusaunoa mai lea ia te au nai le tulafono a le agasala ma le oti. Auā o le mea na le mafaia i le tulafono, ina ua vaivai ia ona o le tino, ua faia lea e le Atua i lona auina mai o lona lava Alo, ua tino tagata agasala, o le taulaga foi mo agasala, na ia faasalaina ai le agasala i le tino; ina ia atoatoa ai le amiotonu i la le tulafono ia i tatou, o e le savavali i la le tino, a e i la le Agaga. Auā o e i la le tino e loto atu i latou i mea a le tino; a o e i la le Agaga e loto atu i mea a le Agaga. Auā o le loto i la le tino o le oti lea; a o le loto i la le Agaga o le ola lea ma le manuia; auā o le loto i la le tino o le ita lea i le Atua; auā e le usiusi tai i le tulafono a le Atua, e le mafai foi i ai. O i latou foi o i la le tino, e le mafai ona fiafia i ai le Atua.

A o outou, tou te le i la le tino, a e i la le Agaga, pe afai e nofo le Agaga o le Atua i totonu ia te outou. Ai se tasi ua le ia te ia le Agaga o Keriso, e le fai lea mona. A e afai ua i totonu ia te outou Keriso, ua oti ai le tino ona o le agasala, a ua ola le agaga ona o le amiotonu. A e afai e nofo i totonu ia te outou le Agaga o le na toe faatu mai ia Iesu nai e ua oti, e faaola mai foi o outou tino auga vale e le na toe faatu mai ia Keriso nai e ua oti, e lona Agaga o loo nofo i totonu ia te outou.

O lenei, le au uso e, ua ia te i tatou e taui atu, a e le o le tino, tatou te amio ai i la le tino; auā afai tou te amio i la le tino, e oti ai outou; a e afai e fasiotia e outou amioga a le tino e le Agaga, tou te ola ai. Auā o i latou uma ua ta‘ita‘iina e le Agaga o le Atua, o atalii i latou o le Atua. Auā ua outou le maua le agaga o le pologa, e toe fefefe ai; a ua outou maua le Agaga o tamafai, tou te valaau atu ai, Ava, le Tamā e. O loo molimau mai lea lava Agaga i o tatou agaga, o fanau i tatou a le Atua. Afai foi o fanau i tatou, o suli foi, o suli lava o le Atua, o suli faatasi ma Keriso; pe afai tatou te tiga faatasi ma ia, ina ia faamanuiaina foi i tatou faatasi ma ia.

Auā o lo‘u manatu e le tatau ona faatusaina le tiga i nei ona po ma le manuia atali e faaalia mai ia te i tatou. Auā o loo faatalitali mea uma na faia ma le naunau i le faaalia mai o atalii o le Atua. Auā ua faatoilaloina mea uma na faia i le iu vale, (e le o lona loto lea, a e peitai ona o ia na na faatoilaloina ai,) ma le faamoemoe ia tuusaunoa ia lava mea na faia ia le faapologaina e le iu vale, a e oo i le saolotoga o le fanau a le Atua e manuia ai. Auā ua tatou iloa, ua oi faatasi, ma oono faatasi mea uma lava na faia, ua oo mai lava i ona po nei. E le gata foi i lea, a o i tatou lava ua i ai mea faapolopolo a le Agaga, tatou te feoi, o i tatou lava i totonu ia te i tatou, o loo faatalitali atu ia avea ma tamafai, o le faaolaina lea o tatou tino. Auā e faaolaina i tatou i le faamoemoe; a o le faamoemoe ua vaaia, e le o le faamoemoe lea; auā pe faapefea ona toe faamoemoe se tasi i le mea ua vaaia? A e peitai a tatou faamoemoe i le mea ua le vaaia, tatou te faatalitali atu i ai ma le onosai.

E faapea foi le Agaga ona fesoasoani mai i lo tatou vaivai; auā tatou te le iloa mea tatou te ole atu ai ma le tusa, a e peitai o le Agaga, e fautua o ia mo i tatou i le oi e le mafai ona talatalaina. A o lē suesue i loto, ua silafia e ia le finagalo o le Agaga; auā o loo fautua o ia mo le au paia e tusa ma le finagalo o le Atua.

Ua tatou iloa foi e galulue faatasi mea uma e lelei ai i latou e ua alofa atu i le Atua, o e ua valaauina i lona finagalo. Auā o e na silafia e ia anamua, na ia tofia anamua foi, ia foliga i latou i lona Alo, ia foliga ia te ia, ina ia avea o ia ma ulumatua o le au uso e toatele; o e na tofia anamua e ia, ua valaauina foi i latou e ia; o e ua valaauina e ia, ua ta‘uamiotonuina foi i latou e ia; o e ua ta‘uamiotonuina e ia, ua faamanuiaina foi i latou e ia.

O lenei, se a sa tatou upu i nei mea? Afai ua ‘au ma i tatou le Atua, o ai sē faasaga tau mai ia i tatou? O ia lava sa na le faasaoina lona lava Alo, a ua tuuina mai o ia e sui a‘i i tatou uma lava, e le foai fua mai ea e ia ia te i tatou mea uma lava faatasi ma ia i se a? O ai se na te molia le au filifilia a le Atua? O le Atua o lē ta‘uamiotonuina mai, o ai se na te faasalaina mai? O Keriso o ia na maliu, a ua toe tu mai lava o ia; o loo i le itu taumatau foi o le Atua, o loo fautua foi o ia mo i tatou.

O ai se na te faateaeseina mai i tatou i le alofa o Keriso? o le puapuaga ea, po o le atuatuvale, po o le saua, po o le oge, po o le lavalavā, po o le pagatia, po o le pelu? Faapei ona tusia, Ona o oe ua fasiotia ai i matou i aso uma, ua faatatauina i matou e pei o mamoe ā fasia.

A ua tatou manumalo aiai i nei mea uma lava, ona o ia ua alofa mai ia te i tatou. Auā ua ou mautinoa, e le mafaia e le oti, po o le ola, po o agelu, po o alii, po o e malolosi, po o mea i nei ona po, po o mea atali, po o le maualuga, po o le loloto, po o se tasi mea na faia, e le mafaia e ia mea ona faateaeseina mai i tatou i le alofa o le Atua, o loo ia Keriso Iesu lo tatou Alii.

O le upu moni ou te fai atu ai i luma o Keriso, ou te le pepelo, ua molimau mai ia te a‘u lo‘u loto fuatia ifo i le Agaga Paia, e tele lo‘u faanoanoa, e le aunoa foi le puapuaga o lo‘u loto; auā ou te mafaia ona fia anatema o a‘u ia te‘a ma Keriso e sui a‘i o‘u uso, o lo‘u aiga i la le tino;

Pei ona tusia, Faauta, ou te tuu i Siona le maa e tausuai ai, ma le papa e tautevateva ai, e le mā foi se tasi e faatuatua ia te ia.

Auā ua faapea mai le Tusi, E le mā se tasi e faatuatua ia te ia. Auā e le eseese le Iutaia ma le Eleni; auā o le Alii e toatasi o tagata uma e faulai lona alofa ia te i latou uma lava o e valaau atu ia te ia; auā e faaolaina i latou uma o e valaau i le suafa o le Alii.

O lenei, le au uso e, ou te aioi atu ia te outou, ona o le alofa mutimuti vale o le Atua, ia outou tuuina atu o outou tino i le Atua, o le taulaga ola, ma le paia, ma le mālie, o le mea lea e tatau ai ona outou faia.

Ia olioli i le faamoemoe, ia onosai i le puapuaga, ia finafinau i le tatalo. Ia tufatufa atu ni a outou mea i le mativa o le au paia, ia tausisi i le alofa i tagata ese. Ia faamanuia atu i e faasaua mai ia te outou, ia faamanuia lava, a e aua le fetuu. Ia outou olioli faatasi ma e ua olioli, ia outou tagi foi faatasi ma e ua fetagisi.

auā afai tatou te ola, tatou te ola mo le Alii, pe afai e oti, e oti mo le Alii; o lenei, pe ola pe oti i tatou, o tagata lava o le Alii i tatou. Auā o le mea lava lea na maliu ai Keriso, ma ua toe tu mai ai, ma ua soifua ai, ina ia faia o ia ma Alii i e ua oti atoa ma e o ola.

O le Atua foi e tupu mai ai le faamoemoe, ia faatutumuina outou e ia i le olioli uma atoa ma le filemu, ina ua faatuatua; ina ia tele lava lo outou faamoemoe ona o le mana o le Agaga Paia.

Ua ou faapei o sē vaivai i e ua vaivai, ina ia ou maua e ua vaivai; ua avea a‘u ma mea uma mo tagata uma, ina ia iu lava ina ola nisi ia te au.

A ua aoaiina i tatou e le Alii ina ua faasalaina, ina ne‘i matuā faasalaina i tatou faatasi ma le lalolagi.

ina ne‘i i ai i le tino se maseiga, a ia fetausiai faatasi uma itu tino. Pe afai e tiga le tasi itu tino, ia tiga faatasi ai itu tino uma lava; pe viia le tasi itu tino, ia olioli faatasi ai itu tino uma lava.

Auā o le Atua, e le o le Atua ia o le faasoesa, a o le filemu; faapei o i ekalesia uma o le au paia.

Auā faapei ona oti uma ia Atamu, e faapea foi ona faaolaina uma ia Keriso.

O le toe fili e faaumatia, o le oti lea;

Auā e tatau ona ofu o lenei tino iu vale i le tino ola pea, ia ofu foi lenei tino oti i le tino le oti lava. Pe a ofu foi lenei tino iu vale i le tino ola pea, a ofu foi lenei tino oti i le tino le oti lava, ona taunuu ai lea o le upu ua tusia. Ua faaumatia le oti i le manumalo. Le oti e, o fea o i ai lou tui? Le tuugamau e, o fea o i ai lou mauumalo?

Ia faamanuina le Atua, o le Tamā o lo tatou Alii o Iesu Keriso, o le Tamā e ona le alofa mutimuti vale, o le Atua foi e ana le faamafanafanaga uma; o le na te faamafanafanaina mai ia te i matou i lo matou puapuaga uma lava, ina ia matou mafaia ona faamafanafana atu ia te i latou ua maua i se tasi lava puapuaga, i le faamafanafanaga ua faamafanafanaina ai i matou e le Atua. Auā pei ona tele ia i matou o tiga ona o Keriso, ua faapea foi ona tele o le faamafanafanaina o i matou e Keriso. Pe afai ua puapuagatia i matou, ua faapeaina ona o le faamafanafanaina ma faaolaina o outou, o loo matuā galue ma le onosai i ia lava tiga ua matou tiga ai; pe afai foi ua faamafanafanaina i matou, ua faapeaina ona o le faamafanafanaina ma faaolaina o outou. Ua tumau foi lo matou faatuatua ia te outou; o loo matou iloa, faapei ona faatasia outou i tiga, e faapea foi i le faamafanafanaina.

Auā, le au uso e, matou te loto ina ia outou iloa lo matou puapuaga na oo mai ia te i matou i Asia, sa silisili ona mafatia tele ai o i matou, e lei au i ai lo matou malosi, na oo lava ina matou masalo ai a matou oti. A o i matou, sa i o matou loto le manatu o le a oti, ina ne‘i matou faatuatua ia te i matou, a ia faatuatua i le Atua na te toe faatuina e ua oti; o le na laveai mai ia i matou ai le oti e matuā leaga, o loo laveai mai nei foi, ua matou faamoemoe foi ia te ia, na te laveai mai pea ia te i matou.

A ua ia te i matou lenei oa i ipu omea, ina ia i le Atua le matuā tele o le mana, a e le mai ia te i matou. Ua puapuagatia i matou i mea uma, a e le faaatuatuvaleina; ua fememeai, a e le matuā fememeai; ua sauaina, a e le tuulafoaiina; ua lafotuina i lalo, a e le fano; o loo tauave i le tino e le aunoa le fasiotia o le Alii o Iesu, ina ia faaalia foi le soifua o Iesu i o matou tino. Auā o i matou nei o loo ola ua tuuina atu pea lava i le oti ona o Iesu, ina ia faaalia foi le soifua o Iesu i o matou tino augavale. O lenei, ua galue le oti i totonu ia te i matou, a o le ola i totonu ia te outou.

O le mea lea matou te le faavaivai ai; auā e ui lava ina tauāu ina uma lo matou tagata i fafo, ua faafouina lē i totonu i lea aso ma lea aso. Auā o lo matou puapuaga mamasagia ma le vave mavae, e tupu mai ai mo i matou le manuia mamafa e matuā silisili ese lava ma le faavavau; o loo matou le manatunatu i mea ua vaaia, a o mea e le vaaia; auā o mea ua vaaia e gata mai ia, a o mea e le vaaia e faavavau ia.

Auā ua matou iloa afai e lepetia lo matou fale apitaga faalelalolagi, ua ia te i matou le fale mai le Atua, o le fale e lei faia e lima, e faavavau i le lagi. Auā foi ua matou feoi i lenei fale, o loo naunau tele i le fia faaofuina i lo matou fale mai le lagi;

O lenei, ua matou loto tetele e le aunoa, ona ua iloa, a o matou o nonofo i le tino, ua nofo eseese i matou ma le Alii; (auā o le faatuatua ua matou savavali ai, a e le o le tino mai o mea;) ua matou loto tetele ma ua sili lo matou manao ia o ese i matou i le tino, a ia nonofo i matou ma le Alii.

Auā ua pulunaunauina i matou i le alofa o Keriso; o loo manatu faapea i matou, afai na maliu le toatasi o le sui o tagata uma, ua oti lava tagata uma; na maliu foi o ia ona o tagata uma, ina ia le usiusitai pea o e ola ia te i latou, a o ia o le na maliu ma toe tu mai o le sui o i latou. O lenei, e amata i nei ona po ona matou le toe iloa se tasi i la le tino; e ui lava ina iloa e i matou o Keriso i la le tino, a o lenei, matou te le toe iloa.

O lenei, afai o ia Keriso se tasi, o le tagata fou ia; ua mavae mea tuai, faauta, ua faafouina mea uma.

a o mea uma lava ua faailoa ai i matou o auauna a le Atua i matou, i le onosai tele, i puapuaga, i malaia, i atuatuvale i sasaina, i tuuina i fale puipui, i faaletaupulea, i galuega, i mataala, i anapopogi, i le amio mamā, i le poto, i le faapalepale, i le agamalu, i le Agaga Paia, i le alofa moni,

peiseai ua le iloa, a ua lāu iloa; peiseai a oti, faauta foi, o loo ola i matou; peiseai ua aoaiina, a e le fasiotia; peiseai o faanoanoa, a o loo olioli pea; peiseai o matitiva, a ua matou faatamaoaigaina nisi e le toatele; peiseai e leai sina mea o ia te i matou, a o loo ia te i matou mea uma.

Ou te le faapea atu e aoai ia te outou; auā ua uma ona ou muai fai atu, o loo i o matou loto outou, tatou te oti faatasi ma ola faatasi. E tele lo‘u faamalosi atu ia te outou, ua tele lo‘u mitamita ona o outou; ua faatumuina a‘u i le mafanafana, ou te matuā olioli tele lava i lo matou puapuaga uma.

Auā na matou o mai i Maketonia sa leai se mapu i o matou tino, a e peitai sa puapuagatia i matou i mea uma, o taua i fafo, o i totonu o mata‘u. A o le Atua o le na te faamafanafanaina e ua faamaulaloina, na ia faamafanafana mai ia te i matou i le oo mai o Tito;

Auā o le tiga e tusa i le Atua e tupu ai le salamo e oo i le ola e le toe salamo ai; a o le tiga faalelalolagi e tupu ai le oti. Faauta foi i lenei lava mea, na tiga outou e tusa i le Atua, ua tele lava le filigā na tupu ai ia te outou, i le ma le faatonu, i le ma le loto tiga, i le ma le mata‘u, i le ma le naunau tele mai, i le ma le maelega, i le ma le taui atu. Ua uma ona faailoa outou e outou ua outou mamā i lena mea.

auā na tofotofoteleina i latou i puapuaga ua atili ai lo latou olioli, atoa ma lo latou mativa matuā tele, ua sili ai le faulai o lo latou matamau.

E mafai foi e le Atua ona faafaulai ia te outou o mea alofa uma; o loo faalavaina i aso uma o mea uma ia te outou i mea uma lava, ina ia faulai ia te outou o galuega lelei uma. Pei ona tusia. Ua ia faasalalauina ana mea; ua ia avatu i e matitiva, e tumau lana amiotonu e faavavau. O lenei, o le ua foai tele mai saito i le ua lulu ai, ma le mea e ‘ai e ‘ai ai, ia foai mai e ia, ma ia faateleina la outou fua, ma faatupu e ia le fua o la outou amiotonu; o loo faatamaoaigaina outou i mea uma lava, e iu ai i le matamau uma, e tupu ai le feafetai i le Atua ona o i matou.

O auauna ea i latou a Keriso? (ou te tauta‘a pei se vale, ua sili a‘u; ua sili i galuega, ua matuā tele i sasaina, ua tele ona tuuina i fale puipui, ua atu lasi i oti, ua atu lima ona sasaina o a‘u e Iutaia, e taifagafulu i le iva o‘u ta, ua atu tolu ona sasaina o a‘u i laau, ua tasi le fetogia o a‘u i maa, ua atu tolu ona malaia o folauga sa ou i ai, ua atoa le po ma le ao sa ou i le vasa; ua atu lasi a‘u malaga se manū a‘u leaga i vaitafe, se manū a‘u leaga i e fao mea, se manū a‘u leaga i tagata o lo‘u lava nuu, se manū a‘u leaga i tagata o nuu ese, se manū a‘u leaga i le aai, se manū a‘u leaga i le vao, se manū a‘u leaga i le vasa, se manū a‘u leaga i uso pepelo; na ou i le galuega mamafa ma le tiga, o le mataala soo, o le fia ‘ai ma le fia inu; o le anapogi soo, o le maalili ma le le lavalavā. Tuu ia o isi mea, a o le mea e mafatia ai a‘u i aso fai soo, o le popole lea ona o ekalesia uma. Po o ai le ua vaivai, ou te le vaivai ai? Po o ai le ua tausuai, ou te le tiga ai? Afai e tatau ina ia ou mitamita, ou te mitamita i mea ou te vaivai ai.

O lena tagata ou te mitamita ai, a ou te le mitamita ia te au, tau lava o mea ua ou vaivai ai.

Ina ne‘i faamaualuga a‘u i le silisili ese o mea na faaalia mai, sa tuuina mai ia te au le mea matuitui i le tino, ole agelu a Satani, e tu‘i mai ia te au, ina ne‘i ou faamaualuga. Na ou aioi faatolu atu i le Alii ona o lea mea, ina ia alu ese ia te au. Ona faapea mai ai lea o ia ia te au. O lo‘u nei alofa tunoa e lava lea e fesoasoani ia te oe; auā o le vaivai e faaatoaina ai lo‘u mana. O lea ua tele ai lava lo‘u fiafia i le mitamita i mea ua ou vaivai ai, ina ia tumau i o‘u luga le mana o Keriso. O lea ou te fiafia ai i mea e vaivai ai, o le faaleaga mai, o malaia, o le agatele mai, o le atuatuvale ona o Keriso; auā pe a ou vaivai, ona ou malosi ai lea.

e le o i ai se Iutaia po o se Eleni, e le o i ai se pologa po o se sa‘oloto, e le o i ai se tane po o se fafine; auā ua tasi lava outou uma ia Keriso Iesu. Afai foi e o Keriso outou, e moni, o le fanau outou a Aperaamo, o suli foi e tusa ma le mea na folafolaina.

A o le fua o le Agaga o le alofa, o le olioli, o le filemu, o le onosai, o le mataalofa, o le agalelei, o le faamaoni,

Ia outou fesui i a outou avega e ave, ma ia faapea ona outou faia le tulafono a Keriso.

ua na toe faatutū faatasi mai foi, ma faanonofo faatasi i tatou ma Keriso Iesu i mea o i le lagi;

Ona o lea mea, o a‘u o Paulo o le ua noanoatia ona o Keriso Iesu, ona o outou o nuu ese;

O lenei, o a‘u o le ua noanoatia ona o le Alii, ou te aioi atu ia te outou ia outou savavali ia tusa ma le valaau ua valaauina ai outou, ma le loto maulalo lava ma le agamalu, ma le onosai, ia outou faapalepale le tasi i le tasi ma le alofa,

Auā tatou te le tau ma tagata, a o alii sili, ma faipule, ma alii o le pouliuli o lenei lalolagi, atoa ma agaga leaga i mea o i le lagi. O le mea lea ia outou tago ai i ofutau atoatoa mai le Atua, ina ia outou mafaia ona tetee atu pe a oo i le aso vale, pe a uma ona outou faia o mea uma, tou te tutumau ai lava.

Ia outou tatalo i le Agaga i aso uma lava i talotaloga ma faatoga uma; ia outou mataala pea i lenei lava mea, ma matuā tausisi i le faatoga mo tagata paia uma lava; mo a‘u foi, ina ia tuuina mai le upu ia te au, ina ia ou faamalosi ona tautala atu ma faailoa atu le upu o le tala lelei sa lilo, o le upu lava lea ua noanoatia ai a‘u le sāvali, ina ia ou faamalosi ai ona tautala, pei ona tatau ona ou tautala atu ai.

Auā o lo‘u ola ua ia Keriso lea; a o lo‘u oti, o lo‘u manuia lea. Afai ou te ola i le tino, o le fua lea o la‘u galuega; a ou te le iloa po o le fea mea ou te filifilia. Auā ua ou faaletonu i manatu e lua; o loo ia te au le naunau ia ou alu, ia faatasia a‘u ma Keriso; o le mea lea e sili ona lelei.

Auā ua foaifuaina ia te outou ona o Keriso, e le na ona ia faatuatua ia te ia, a ia faatigaina foi outou ona o ia;

Auā foi sa ma‘i lava o ia, na fai a oti; a ua alofa le Atua ia te ia, a e le gata ia te ia, a o a‘u foi, ina ne‘i faaopoopoina mai ia te au o lea faanoanoa ma lea faanoanoa.

auā o le au peritomeina i tatou, o e auauna i le Atua ma le loto, ma mitamita ia Keriso Iesu, a e le faatuatua i la le tino.

ina ia ou iloa o ia, ma le mana o lona toe tu mai, ma ia faatasi a‘u i ona tiga, ona ua faatusaina a‘u ia te au i lona maliu,

Aua o lo tatou nuu moni ua i le lagi lea, o loo faatalitali mai ai i tatou i le Faaola, o le Alii o Iesu Keriso; na te liua o tatou nei tino ua leaga, ina ia faia ia faatatau i lona tino matagofie, e tusa ma le mana na te mafaia ai ona faatoilaloina o mea uma ia te ia lava.

Ia outou olioli i le Alii aua le aunoa; ou te toe fai atu, ia outou olioli. Ia iloa lo outou agamalu e tagata uma lava; ua lata mai le Alii. Aua ne‘i popole outou i se mea e tasi, a ia faailoa atu o outou manao i mea uma lava i le Atua, i le tatalo, ma le faatoga, atoa ma le faafetai. O le manuia foi mai le Atua, o loo silisili lava i mea uma e manatu i ai, e leoleoina ai o outou loto atoa ma o outou mafaufau ia Keriso Iesu.

Ua ou iloa le mativa, ua ou iloa foi le mauoa, o i mea uma lava ou te i ai, ma mea uma e oo ia te au ua a‘oa‘oina ai a‘u ia ou ma‘ona, ma ou fia ‘ai, ia faulai mai mea, ma ia oge mea. Ou te mafaia mea uma lava i le faamalosi mai o Keriso ia te au. A e ui lava i lea na outou agalelei, ina ua outou alolofa mai i lo‘u puapuaga.

A o lo‘u Atua e faaatoa e ia ia te outou mea uma e matitiva ai outou, e tusa ma le faulai o lona viiga, ia Keriso Iesu.

ia faamalosia outou i le malosi uma lava, e tusa ma lona malosi ua silisili, e iu i le onosai uma lava ma le faatoatoa atoa ma le fiafia; o loo faafetai atu i le Tamā ua na saunia i tatou ia tatau ona tofusia i tatou i le tofi o le au paia o i le malamalama; o ia ua na laveai mai ia te i tatou nai le pule a le pouliuli, a ua na aumaia i latou i le malo o lona lava Alo pele;

Ou te olioli nei i mea ou te tiga ai ona o outou, ou te faaatoa foi i lo‘u tino o mea ua totoe i puapuaga o Keriso ona o lona tino, o le ekalesia lea;

O lenei, afai ua toe faatuina outou faatasi ma Keriso, ia outou saili i mea o i lugā, o i ai Keriso, o loo tietie i le itu taumatau o le Atua. Ia outou loto lava i mea i lugā, a e le o mea i le lalolagi; auā ua oti outou, ua lilo foi lo outou ola faatasi ma Keriso i le Atua. Pe a faaali mai Keriso lo tatou ola, ona iloa ai lea o outou faatasi ma ia i le manuia.

Ia pule foi le filemu mai le Atua i o outou loto, o le mea lea ua valaauina ai outou e fai ma tino e tasi; ma ia outou saga faafetai.

a e ui lava ina muamua ona tigaina o i matou, ma faaleagaina i Filipi, pei ona outou iloa ua matou faamalosi ona o lo tatou Atua e tautala atu ia te outou i le tala lelei a le Atua ma le finafinau tele lava.

ina ne‘i faagaeetia se tasi i nei puapuaga; auā ua outou iloa ua tofia lenei lava mea. Auā foi o ona po sa i ai i matou ia te outou, na matou muai fai atu ai ia te outou, o le a oo mai le puapuaga, ua faapea ona taunuu lava, ua outou iloa foi. O le mea lea na ou le toe mafai ai ona onosai, ona auina atu lea e a‘u, ina ia ou iloa lo outou faatuatua, ne‘i faaosoosoina outou e lē faaosooso, ona faaleaogaina ai lea o la matou galuega.

Ou te loto ina ia outou iloa, le au uso e, i le mataupu i e o momoe, ina ne‘i outou faanoanoa, pei o isi e leai so latou faamoemoe. Auā afai tatou te talitonu, ua maliu Iesu ma toe tu mai, e faapea foi ona aumaia e le Atua faatasi ma ia e o momoe ona o Iesu. Matou te fai atu foi lenei mea ia te outou i le afioga a le Alii, o i tatou o e ola ma totoe pe a afio mai le Alii, tatou te le muamua i e o momoe.

Ia outou saga olioli pea lava. Ia tatalo e le aunoa. Ia outou faafetai i mea uma lava, auā o le finagalo lea o le Atua ia te outou, ia Keriso Iesu.

Ia atoatoa ona faapaiaina o outou e le Atua lava e ona le manuia; ia tausia lava lo outou agaga atoa uma, i le ma le loto, atoa ma le tino, ia le mata‘uleagaina, i le afio mai o lo tatou Alii o Iesu Keriso. E faamaoni lava o le ua valaauina outou, o le na te faia lava.

O lea matou te mitamita ai ia te outou o i matou nei lava, i ekalesia a le Atua, ona o lo outou onosai ma lo outou faatuatua, i ona po o sauaga uma ma puapuaga ua outou faatoatoa ai; o le faailoga lea o le faamasinoga tonu a le Atua, ina ia ta‘uaogaina outou i le malo o le Atua, o le mea lea e tigaina ai outou. Auā ua tonu i le Atua e taui atu le puapuaga i e ua faapuapuagaina ai outou; e ia te outou foi o e puapuagaina, o le mapusaga faatasi ma i matou, pe a faaalia le Alii o Iesu mai le lagi, faatasi ma agelu o lona malosi, i le afi mumū,

O lo tatou Alii lava o Iesu Keriso, atoa ma le Atua lo tatou Tamā, o le ua alofa mai ia te i tatou, ma na foai mai le faamatala loto e faavavau, ma le faamoemoe lelei i le alofa tunoa, ia faamafanafana atu e ia i o outou loto, ma ia faatumauina outou i upu lelei uma ma galuega lelei uma.

O lenei, o le Alii lava e ona le manuia, ia foaiina atu e ia le manuia ia te outou e le aunoa i mea uma lava. Ia ia te outou uma lava le Alii.

Aua e te toe inu le vai auli, a ia e inu sina uaina itiiti, ona o lou manava ma lou ma‘i e tupu soo.

Auā tatou te lei au mai lava se mea e tasi i le lalolagi, ua mautinoa foi tatou te le mafai ona ave ese ai o se mea. Afai ua maua e i tatou o mea e aai ai ma mea e oofu ai, ia gata ai o tatou manao.

Auā ua le foaiina mai e le Atua ia te i tatou le Agaga e mata‘u ai, a o le Agaga e faamalosi ai, ma alofa ai, ma mafaufau tonu ai.

O lenei, aua e te mā i le molimau i lo tatou Alii, po o ona o a‘u o loo noanoatia ona o ia; a ia tiga faatasi i tatou ona o le tala lelei, e tusa ma le mana o le Atua, o le na faaola mai ia i tatou, ma valaau mai i le valaau paia, e le tusa ma a tatou galuega, a e tusa ma lona lava finagalo ma lona alofa tunoa na foaiina mai ia i tatou ia Keriso Iesu talu mai le vavau, a ua faailoa mai nei i le faaalia mai o lo tatou Faaola o Iesu Keriso, o le ua faaumatia lava le oti, a o le ola ma le le iu vale ua faamalamalamaina mai lea e ia i le tala lenei, ua tofia ai a‘u o lē tala‘i, ma le aposetolo, ma le a‘oa‘o i nuu ese. O le mea lea ua tigaina ai a‘u i ia mea; a ou te le mā lava, auā ua ou iloa o ia ua ou faatuatua i ai, ma a‘u mautinoa ua mafaia lava e ia ona leoleo i le mea na ou tuuina atu ai ia te ia e oo atu i lea lava aso.

ona o lea ua tigaina ai a‘u, ua oo ina noanoatia o a‘u, peiseai se pagota; a o le afioga a le Atua e le noatia lava lea. O le mea lea ou te onosai ai i mea uma ona o le au filifilia, ina ia maua e i latou lava le ola o loo ia Keriso Iesu ma le manuia e faavavau. O le upu moni lenei; auā pe afai tatou te oti faatasi ma ia, tatou te ola faatasi ai foi; pe afai tatou te onosai, e fai foi i tatou ma tupu faatasi ma ia; pe afai tatou te faafiti ia te ia, e faafiti foi o ia ia te i tatou;

A o oe, ua e iloa lelei o la‘u mataupu, o la‘u amio, o le loto mau, o le faamaoni, o le faapalepale; o le alofa, ma le onosai, o sauaga ma mea tiga, o mea ia na oo mai ia te au i Anetioka, ma Ikonio, ma Lusa; o sauaga faapena na tigaina ai a‘u; a o le Alii na ia laveai mai ia te au i na mea uma lava. O i latou uma foi o e loto ina nonofo ma le amio Atua ia Keriso Iesu, e sauaina i latou.

A o oe, ia e faautauta i mea uma lava, ia e onosai i mea e tiga ai, ia e fai le galuega a lē folafola le tala lelei, ia e matuā faaiuina lau faiva.

Auā o a‘u ua faamaligiina nei lo‘u toto, ua lata ona po ou te alu ai. Ua ou tau le taua lelei, ua iu ia te au le tausinioga, ua ou taofi i le upu o le faatuatua. O lenei, ua teuina mo a‘u le pale o le amiotonu, e foaiina mai ia te au i lea lava aso o le Alii le faamasino amiotonu; e le gata foi ia te au, a o i latou uma lava o e fiafia i lona faaali mai.

O la‘u uluai faatonu atu e lei faatasi mai ai se tasi ia te au, a ua lafoai mai e tagata uma lava ia te au; aua ne‘i tauiina atu ia te i latou a e peita sa ia te au le Alii, ma na faamalosi mai ia te au; ina ia faaatoatoaina e a‘u le tala‘iga, ina ia faalogologo i ai o nuu uma lava; ua laveaiina foi a‘u ai le gutu o le leona. E laveai mai foi le Alii ia te au ai mea leaga uma, ma faaola mai ia te au ia oo i lona malo i le lagi; ia ia te ia le viiga e faavavau faavavau lava. Amene.

i le faamoemoe i le ola e faavavau, na folafolaina mai talu mai tausaga o le vavau e le Atua e le mafai ona tala pepelo;

O a‘u o Paulo, o le ua noanoatia ona o Keriso Iesu, o Timoteo foi lo tatou uso, o la ma tusi lenei ia Filemoni o le pele na tatou galulue faatasi;

a e ou te aioi atu ona o le alofa, o a‘u nei lava o Paulo le toeaina, o le ua noanoatia nei foi ona o Iesu Keriso.

O lenei, ina ua i ai i le fanau le tino tagata ola, na faapea foi ona ua i ai ia te ia, ina ia faaumatia e ia i lona maliu o le ua i ai le malo e oti ai, o le tiapolo lea, ma tuusaunoaina ai i latou uma o e na faapologaina i o latou olaga uma ona o le mata‘u i le oti.

Auā na tigaina o ia ina o tofotofoina, o le mea lea ua mafai ai e ia ona fesoasoani i e ua tofotofoina.

O lenei, ia tatou fefefe, ina ua tuuina mai pea o le upu ua folafola mai ia sao atu ai i lona malologa, ne‘i ai so outou e faaleoo atu i ai. Auā foi ua tala‘iina mai i tatou i le tala lelei e pei o i latou; a ua le aoga le upu na latou faalogologo i ai, ina ua le faatatauina ma le faatuatua i e na faalogologo i ai. Auā tatou te sao atu i le malologa, o i tatou o e ua faatuatua, pei ona fetalai mai o ia, Pei ona ou tauto i lo‘u ita, Latou te le sao atu lava i lo‘u malologa; o le malologa lava lea i le galuega na faia ina ua uma ona faavaeina o le lalolagi. Auā ua fai mai i le tasi upu i le aso fitu, ua faapea mai, Na malolo foi le Atua i le aso fitu i ana galuega uma. Ua toe faapea foi i lenei upu, Latou te le sao atu lava i lo‘u malologa. O lenei, ua tuuina mai pea ona ia sao atu i ai o isi, mona ua le sao atu i ai o e na muai tala‘iina i ai le tala lelei ona o le faalogogata, ona toe tuupo ai lea o ia i le tasi aso i lana na fetalaia mai e Tavita, O le aso nei, ina ua mavae o ia tausaga e tele, pei ona fetalaia mai, O le aso nei afai tou te faalogo ai i lona siufofoga, aua tou te faamaaa i o outou loto. Auā ana faaoo e Iosua ia i latou i le malologa, po ua le toe ta‘uina e le Atua o se tasi aso. O lenei, ua tuuina mai pea o le malologa faasapati mo tagata o le Atua.

Auā e le ia te i tatou se faitaulaga sili e le mafaia ona tiga alofa faatasi ma i tatou i o tatou vaivai, a ua faaosoosoina o ia i mea uma pei o i tatou, a ua leai se agasala ia te ia. O le mea lea ia tatou faalatalata atu ai ma le faamalosi i le nofoālii o le alofa tunoa, ina ia alofaina ai o i tatou, ia maua ai foi le alofa tunoa e fesoasoani mai i ona aso e tatau ai.

O ia lenei sa tatalo atu i ona po na tino tagata mai ai, ma aioi atu ma le tagi tele ma loimata i le na mafaia ona faaola ia te ia nai le oti, na faafofogaina foi o ia i le mea na ia fefe ai. E ui lava o ia o le Alo, a o mea sa tiga ai o ia na a‘oa‘oina ai o ia ia usiusitai,

A ia outou manatu i aso anamua, ina o faamalamalamaina outou, na outou onosai ai i le taua tele o tiga; ina ua faia outou ma mataaga i upu faifai ma puapuaga, tasi lea mea; i le ma lenei, ina ua faatasia outou ma e na faapeaina; auā na outou alolofa mai i o‘u noanoataga, ma outou onosai i le vetega o a outou oloa ma le olioli, ua iloa e outou ua ia te outou le oloa i le lagi e sili ona lelei ma le tumau. O le mea lea aua le lafoai ai o outou faamalosi, ua i ai le taui e tele. Auā ua aoga ia te outou le onosai, ina ia maua e outou le mea na folafolaina, pe a uma ona faia e outou le finagalo o le Atua. Auā e toe itiiti itiiti lava, ona oo mai ai lea o lē maliu mai, e le faatuai mai lava. A e ola lē amiotonu i le faatuatua; i le ma lea, A tuumuli, e le fiafia lava lo‘u loto ia te ia.

O le mea lea sa tutupu mai ai mai le toatasi, o ia foi na oti i na mea, o le toatele pei o fetu o le lagi, pei o le oneone foi i le matafaga e le mafaitaulia.

Na oti i latou nei uma lava o faatuatua, e lei maua mea na folafolaina, a ua iloa ai e i latou a e mamao, na mautinoa foi, ma latou talia ma le fiafia, ma latou ta‘utino mai o tagata ese i latou ma āumau i le lalolagi.

O le faatuatua na le mafai ai Mose, ina ua matua o ia, ona ia ta‘ua o ia o le tama a le afafine o Farao, ua filifili e ia ia agaleagaina o ia faatasi ma tagata o le Atua e lelei ai, a e aua le ia te ia le fiafia i le agasala e vave mavae; ua manatu o ia i le upu faifai ona o Keriso o le oa lea e sili i faaputugāoa o Aikupito; auā sa faanaunau o ia i le taui. O le faatuatua na tuuina ai e ia o Aikupito, ua le fefe i le ita o le tupu; auā na faamalosi o ia pei o sē iloa atu i le le o vaaia.

Se a foi la‘u e toe fai atu? auā e saasaa le aso e tala atu ai ia Kitiona, ma Parako, ma Samasoni, ma Iefata, ma Tavita, ma Samuelu, ma le au perofeta; o e na faatoilaloina malo i le faatuatua, na fai ai amiotonu, na maua ai mea na folafolaina, na pupuni ai gutu o leona, na tinei ai le malosi o le afi, na sao ai i le mata o le pelu, na faamalosia ai i latou sa vaivai, na avea ai ma fitafita i taua, na tutuli ai ‘au a nuu ese; na maua mai e fafine o latou tagata oti ina ua toe tu mai; na faataugaina nisi, ua le talia e i latou le olataga, ina ia maua e i latou le toe tu mai e sili ona lelei; na tofotofoina isi i tauemuga, ma sasaina, atoa ma noanoataga, ma tuuina i fale puipui; na fetogia i latou i maa, na vaevaeesea i ‘ili, na tofotofoina, na oti i latou na fasia i le pelu; na feoai solo ma oofu i pa‘u mamoe ma pa‘u oti; o mativa i latou, ma puapuagatia, ma faasaunoaina; (e le aoga le lalolagi ona i ai o i latou;) na feoai solo i latou i vao, ma mauga, ma ana, ma lua i le eleele. O i latou uma ia o e na ta‘uleleia ona o le faatuatua, na le maua e i latou le mea na folafolaina; ina ua saunia e le Atua se tasi mea e sili ona lelei mo i tatou, ina ia le faaatoatoaina i latou pe a le i ai i tatou.

O lenei, o i tatou foi, o loo ua vagavagaia e le faapotopotoga o e matamata mai e faapea ona toatele, ina tatou tuu ese ia o mea mamafa uma, atoa ma le agasala e faalavelavegofie ai i tatou, ia tatou taufetuli ma le onosai i le ala tanu o i o tatou luma, ma ia vaavaai atu ia Iesu o le na te ta‘ita‘iina ma le na te faaatoatoaina le faatuatua; o le na onosai i le satauro, na faatauvaa ia te ia le mā, ona o le olioli sa tuu i ona luma, ua nofo foi o ia i le itu taumatau o le nofoālii o le Atua. Auā, ia outou mafaufau i le na onosai i le faatu‘i ese faapena ia te ia o e agasala, ne‘i faavaivai o outou loto ma outou le lavatia.

Ua oo i nei ona po ua outou le tetee atu e oo i le faasasaaina o outou toto i lo outou tetee atu i le agasala; ua galo foi ia te outou le apoapoaiga o loo fetalaia mai ia te outou pei ona tautala i fanau, Lo‘u atalii e, aua le faatauvaa i lou manatu le aoaiga a le Alii; aua foi le faavaivai pe a aoaiina oe e ia. Auā o le ua alofagia e le Alii, ua aoai atu o ia ia te ia; ua sasaina foi e ia atalii uma ua talia e ia. Afai e talia e outou le aoaiga, o loo tausi mai le Atua ia te outou pei ona tausi i atalii; auā o ai se atalii ua le aoaiina e lona tamā? A e afai e aunoa outou ma le aoaiga, ua tofusia ai le fanau uma lava, o tama to i fale outou, a e le ni atalii. Auā foi sa ia i tatou tamā o tatou tino e na aoai mai ia i tatou, sa tatou faalogo i ai; a e le sili ea i se a ona tatou usiusitai i le Tamā o tatou agaga tatou te ola ai? Auā o i latou na latou aoai mai ia i tatou i nai aso itiiti i lo latou faitalia; peitai ane o ia, ua aoai mai o ia e aoga ia i tatou, ina ia tofusia i tatou i lana amio lelei. O aoaiga uma foi a o i ai, e le manatu i ai o se mea e olioli ai, a o le mea e faanoanoa ai; a e mulimuli ane e fua mai ai le fua o le amiotonu e manuia ai e ua a‘oa‘oina ai.

O le mea lea ina faamalosi ai ia i lima ua gagase ma tulivae ua vaivai; i le ma lea, Ina fai ia o ala laulelei mo o outou vae, ne‘i mapeva le vae ua pipili, a e lelei ina faamaloloina.

Ia manatua e ua noanoatia, peiseai ua noanoatia outou faatasi ma i latou; ia manatua foi e ua agaleagaina, auā o loo i le tino foi outou.

Ia aunoa a outou amio ma le matapeapea; ia gata ia o outou manao i mea ua ia te outou; auā ua fetalai mai o ia, Ou te le tuua lava oe, ou te le tuulafoai lava ia te oe. O le mea lea tatou te mafai ai ona fai atu ma le faamalosi, O le Alii o lo‘u fesoasoani ia, ou te le fefe lava i se mea e faia e tagata ia te au.

O lea na tiga ai Iesu i tua o le faitotoa o le aai, ina ia faapaiaina ai e ia o le nuu i lona lava toto. O le mea lea ina tatou o atu ai ia te ia i tua o le toagālauapi, ma ia tatou onosai i le upu faifai pei o lona faifaiga; auā ua leai so tatou aai tumau iinei, a ua tatou saili i lē atali.

O lenei, o ia tatou te avatu soo ai le taulaga o le viiga i le Atua, o le fua lea o tatou laugutu, o loo faafetai atu i lona suafa. Aua le galo ia te outou ona agalelei ma alolofa atu; auā o taulaga faapena e fiafia ai le Atua.

O‘u uso e, ia outou manatu, o le mea e fiafia tele ai pe a maua outou i tofotofoga eseese; ina ua outou iloa o le tofotofoina o lo outou faatuatua e tupu ai le onosai; a ia atoatoa le galuega a le onosai, ina ia atoatoa ai ma ia sao ona lelei ai outou, ia leai se mea e tasi e mativa ai.

Amuia le tagata o lē onosai i le faaosoosoga; auā a uma ona tofotofoina e maua e ia le pale o le ola, ua folafolaina mai e le Alii i e alolofa atu ia te ia.

O‘u uso e, ia outou faaa‘oa‘o i le faatoatoa i le leaga, atoa ma le onosai o le au perofeta, e na tautala mai i le suafa o le Alii. Faauta, ua tatou ta‘uamuia i e onosai; ua outou faalogologo i le onosai o Iopu, ua outou iloa foi le iuga i la le Alii, ina ua mutimuti vale tele le Alii ma le alofa naunau.

Ua tigaina ea so outou? ina tatalo ia. Ua fiafia ea se tasi? ina pese ia. Ua ma‘i ea so outou? ina aami atu ia i toeaina o le ekalesia, ia latou tatalo mo ia, pe a uma ona faauu ia te ia i le suāuu i le suafa o le Alii. O le tatalo foi e faia i le faatuatua e faaolaina ai le ma‘i, e faatuina foi o ia e le Alii; afai foi ua agasala, e faamagaloina ia. Ia fefaaaliai a outou agasala, ma tatalo le tasi mo le tasi, ina ia faamaloloina outou. Ua aoga tele le tatalo faatauanau a le tagata amiotonu.

O lea ua outou olioli ai, e ui lava ona faanoanoa o outou i nai aso nei, (pe afai e tatau ai,) i tofotofoga eseese. O le tofotofo foi o lo outou faatuatua, e silisili ona aoga i le auro e faaumatia, e ui lava ina tofotofoina i le afi, e avea ma mea e iu i le viiga, ma le mamalu, ma le manuia pe a faaalia mai Iesu Keriso;

Auā o le mea lenei e mālie, pe afai o le loto fuatia i la le Atua e onosai ai se tasi i le tiga, o loo faatigaina fua lava o ia. Auā pe se a se viiga e maua pe afai tou te onosai pe a tu‘ia outou ona o le agasala? a e afai tou te onosai pe a tigaina outou a o amio lelei, o le mea lava lea e mālie i le Atua. Auā na valaauina outou ona o lea lava mea; auā na tigaina Keriso lava o le sui o outou, ua tuuina mai ai e ia le faaa‘oa‘o mo outou, ina ia outou mulimuli atu i ona tulagāaao. O le na le agasala lava, na le iloa foi se pepelo i lona fofoga; o le sa agateleina, a e lei toe agatele atu, na faatigaina o ia, a e lei faamatau atu, a ua tuuina atu o ia e ia i le na te faamasino tonu. O le na aveina e ia lava a tatou agasala i lona lava tino i luga i le laau, ina ia tete‘a outou ma agasala, tatou te nofo ai i le amiotonu, O ona faalavalava ua malolo ai i tatou.

A e afai e tigaina outou ona o le amiotonu, amuia outou, Aua foi tou te fefefe i lo latou faamatau mai, aua foi le atuatuvale.

Auā afai e finagalo o le Atua ia tigaina outou ona o le amio lelei, e sili ona lelei o lea i le tigaina ona o le amio leaga. Auā o Keriso foi na tigaina o ia faatasi mo agasala, o le amiotonu o le sui o le amioletonu, ina ia ta‘ita‘iina e ia o i tatou i le Atua; na fasiotia o ia i le tino, a ua faaolaina mai i le Agaga;

O lenei, ua tigaina Keriso i le tino o le sui o i tatou, ia fai ai ma auupega ia te outou foi lea lava loto, auā o le ua tiga i le tino, ua tuu e ia le agasala;

Le au pele e, aua tou te ofo i le tofotofoga pei o le afi, ua oo ia te outou e fai ma tofotofoga ia te outou, peiseai o se mea fou ua oo ia te outou; a e faapei ona tofusia o outou faatasi i tiga o Keriso, ia outou olioli ai, ina ia fiafia outou ma le olioli tele pe a faaalia mai lona mamalu. Afai e upuleagaina outou ona o le suafa o Keriso, amuia outou; auā o loo tumau ia te outou le Agaga mamalu o le Atua; o loo faifaia o ia e i latou, a ua viia e outou. Aua foi ne‘i ala ona faatigaina so outou ina ua fasioti tagata, pe gaoi, pe amio leaga, po ina ua asiasi fua i mea a isi tagata; a e afai e faatigaina se tasi auā o ia o le Kerisiano, aua le masiasi ai o ia, a ia vivii atu i le Atua ona o lea lava mea.

O lenei, o i latou ua tigaina e tusa ma le finagalo o le Atua, ia latou tuuina atu ma le amio lelei o latou lava ola i le na faia mea uma, o ia e faamaoni.

Ou te aioi atu i toeaina o ia te outou, o a‘u foi o le toeaina, ma le molimau i tiga o Keriso, ma le ua tofusia faatasi i le manuia o le a faaalia mai;

O le mea lea ia faamaulalo ai outou i lalo o le aao malosi o le Atua, ina ia faamaualugaina outou e ia i ona po e tatau ai. Ia tuuina atu ia te ia mea uma tou te popole ai, auā o loo manatu mai o ia ia te outou. Ia outou faautauta, ia outou mataala, ona o le ua fai outou mona fili, o le tiapolo lea, o loo fealualuai o ia e pei o se leona tagi, ua saili se tasi e ‘aina e ia; ia outou tetee atu ia te ia, ma ia mausali outou i le faatuatua, ina ua outou iloa o loo taufaaatoaina ia lava mea tiga i lo outou au uso o i le lalolagi. A o le Atua e ona le alofa tunoa uma lava, o le na valaauina i tatou ia iu atu i lona manuia faavavau o ia Keriso Iesu, pe a tigaina outou i nai aso, ia faaatoatoaina outou e ia lava, ia faatumauina ia faamalosia, ma ia faavaeina outou;

Faapei ona foaiina mai ia te i tatou ai lona mana Atua o mea uma, e oo ai i le ola ma le amio Atua, i lo tatou iloa lelei o le na valaau mai ia i tatou i lona lelei e silisili lava.

ua silafia e le Alii se mea e laveai mai ai i e amio Atua ai le faaosoosoga, a e taofi i e amio leaga e oo i le aso faamasino ina ia faasalaina i latou;

A e aua ne‘i lilo ia te outou, le au pele, lenei mea e tasi, e tusa i luma o le Alii le aso e tasi ma tausaga e afe, o le afe foi o tausaga e tusa ma le aso e ta si. E le faatuai mai le Alii i le mea na folafolaina mai, faapei o le manatu a isi tagata i le faatuai; a e peitai ua onosai mai lava o ia ia i tatou, ona ua le finagalo ia fano se tasi, a ia oo uma lava i le salamo.

O outou, le fanau e, mai le Atua lava outou, ua outou manumalo foi ia te i latou, auā e sili o ia ua ia te outou, i le ua i le lalolagi.

O i tatou foi, ua tatou iloa ma ua faatuatua i le alofa ua i le Atua ia te i tatou. O le Atua, o le alofa lava ia; o lē tumau i le alofa, ua tumau ia i totonu o le Atua, o le Atua foi o i totonu ia te ia. O le mea lava lenei ua atoatoa ai le alofa ia te i tatou, ina ia tatou maua le faamalosi i le aso o le faamasinoga; auā e pei o ia, e faapea foi i tatou i lenei lalolagi. E leai se fefe i le alofa, a o le alofa atoatoa e faateaeseina ai le fefe; auā o le mea tiga le fefe; o le ua fefe, e le faaatoatoaina o ia i le alofa.

Auā o i latou uma o e fanau mai i le Atua, e manumalo i latou i le lalolagi; o lenei foi le manumalo e manumalo ai i le lalolagi, o lo tatou faatuatua lava. O ai se na te manumalo i le lalolagi, pe afai e le o lē talitonu, o Iesu o le Alo lava ia o le Atua?

O lenei foi le faamalosi ua tatou maua i ona luma, pe afai tatou te ole atu ai se mea e tusa ma lona finagalo, e faafofoga mai o ia ia te i tatou. Afai foi ua tatou iloa, e faafofoga mai o ia ia te i tatou e se mea tatou te faatoga atu ai, ua tatou iloa e maua e i tatou mea tatou te faatoga atu ai ia te ia.

Le pele e, ia e manuia i mea uma, ma ia e malolo, faapei ona manuia o lou agaga.

o lē ola nei lava, sa ou oti, faauta foi, ou te ola e faavavau faavavau lava; Amene, o ia te au foi ki o seoli ma le oti.

O le ua i ai taliga, ina faalogo mai ia o ia i le mea ua fetalai mai ai le Agaga i ekalesia, O lē manumalo, ou te avatua ia te ia e ‘ai i le laau o le ola o i totonu o le parataiso o le Atua.

Ia e tusi foi i le agelu a le ekalesia o i Semurana, O mea nei ua fai mai ai lē muamua ma lē mulimuli, o le na oti, a ua ola mai, Ua ou iloa au galuega, ma lou puapuaga, ma lou mativa, (a ua e tamaoaiga,) ma le upu faifai a ē ua fai mai o Iutaia i latou, a e leai lava, a o le sunako o Satani i latou. Aua lava e te fefe i mea o le a e tiga ai. Faauta, o le a tuuina atu ni o outou e le tiapolo i le fale puipui, ina ia tofotofoina ai outou; e po agafulu foi e puapuagatia ai outou. Ia e faamaoni seia oo i le oti, ona ou avatu ai lea ia te oe o le pale o le ola.

O le ua i ai taliga, ina faalogo mai ia o ia i le mea ua fetalai mai ai le Agaga i ekalesia, O lē manumalo, e le afaina lava o ia i le oti faalua.

O le ua i ai taliga, ina faalogo mai ia o ia i le mea ua fetalai mai ai le Agaga i ekalesia, O lē manumalo, ou te avatua ia te ia le manai lilo e ‘ai ai; ou te avatu foi ia te ia le maa sinasina, ua tusia foi i le maa le igoa fou, e le iloa e se tasi ua na o le ua maua.

O lē manumalo foi, ma tausi i a‘u galuega seia oo i le gataaga, ou te avatua ia te ia e pule i nuu ese; e pule foi o ia ia te i latou i le tootoo uamea; e nutipalaina i latou pei o ipu a lē fai ipu omea, e pei o a‘u foi ona ou maua mai i lo‘u Tamā; ou te avatua foi ia te ia le fetu ao. O le ua i ai taliga, ina faalogo mai ia o ia i le mea ua fetalai mai ai le Agaga i ekalesia.

O lē manumalo, e faaofuina o ia i ofu sisina; ou te le sōloiesea foi lona igoa i le tusi o le ola, a e ou te ta‘u atu lona igoa i luma o lo‘u Tamā, ma luma o ana agelu. O le ua i ai taliga, ina faalogo mai ia o ia i le mea ua fetalai mai ai le Agaga i ekalesia.

O lē manumalo, ou te faia lea ma pou tu i le malumalu o lo‘u Atua, e le toe ulufafo lava ia, ou te tusi foi i ai le suafa o lo‘u Atua, ma le igoa o le aai a lo‘u Atua, o Ierusalema fou lea e alu ifo nai le lagi mai lo‘u Atua, atoa foi ma lo‘u igoa fou. O le ua i ai taliga, ina faalogo mai ia o ia i le mea ua fetalai mai ai le Agaga i ekalesia.

O lē manumalo ou te avatua i te ia ma te nonofo faatasi ma a‘u i lo‘u nofoālii, e pei o a‘u foi ona ou manumalo, ua ma nonofo foi faatasi ma lo‘u Tamā i lona nofoālii. O le ua i ai taliga, ina faalogo mai ia o ia i le mea ua fetalai mai ai le Agaga i ekalesia.

Ona ou faapea atu ai lea ia te ia, Le Alii e, ua e silafia. Ona faapea mai ai lea o ia ia te au, O i latou ia o e o mai nai le puapuaga tele, ua ta foi o latou ofu, ma ua faasinasinaina o latou ofu i le toto o le Tamai mamoe. O le mea lea ua latou i luma ai o le nofoālii o le Atua, ua latou auauna foi ia te ia i lona malumalu i le ao ma le po; o lē tietie foi i le nofoālii e mau ma i latou. Latou te le toe fia aai, e le toe fia inu foi e le ogotia i latou i le la, po o se tasi vevela; auā o le Tamai mamoe o loo i luma o le nofoālii na te fafaga ia i latou, ma ta‘ita‘i ia te i latou i puna o vai ola; e sōloieseina foi e le Atua o loimata uma nai o latou mata.

A ua latou manumalo ia te ia ona o le toto o le Tamai mamoe, ma le upu a la latou mau, ua latou le faapelepeleina foi lo latou ola ua oo i le oti.

O le mea lenei ua i ai le onosai o le au paia; o le mea lenei ua i ai e ua tausi i poloaiga a le Atua ma le faatuatua ia Iesu. Na ou faalogo foi i le leo mai le lagi, ua faapea mai ia te au, Ia e tusi, Amuia ē ua oti, o e ua oti o i le Alii e amata i nei ona po. O lea lava, ua fetalai mai ai le Agaga, ina ua latou malolo i a latou galuega tiga; o a latou galuega foi e mulimuli ia te i latou.

Ua iloa foi ia te oe le toto o perofeta ma le au paia, ma i latou uma ua fasiotia i le lalolagi.

Na a‘u iloa foi nofoālii, ma ua latou tietie ai, ua tuuina atu foi le faamasinoga ia te i latou; na a‘u iloa foi agaga o e ua vavaeeseina o latou ulu ona o le mau ia Iesu ma le afioga a le Atua, o e na le ifo i le manu feai po o lona faatagata, na le talia foi le faailoga i o latou muaulu po o latou lima; ua latou ola foi, ma ua fai ma tupu faatasi ma Keriso i tausaga e afe;

E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua. Ua fetalai mai foi lē tietie i le nofoālii, Faauta, ou te faia ia fou mea uma lava. Ua fetalai mai foi o ia ia te au, Ia e tusi; auā o upu nei e moni ma le faamaoni ia. Ua fetalai mai foi o ia ia te au, Ua uma ona fai. O a‘u le Alefa ma le Omeka, o le amataga ma le gataaga. O le ua fia inu ou te foaifuaina atu ia te ia ai le puna o le vai ola. O lē manumalo e maua e ia mea uma, e fai foi a‘u mona Atua, e fai foi o ia mo‘u atalii.