30 – O Le Rapture

ou te faatupuina le feitagai ia te oulua ma le fafine, o lau fanau foi ma lana fanau; na te tu‘imomomoina lou ulu, a o oe e te tu‘imomomoina lona mulivae.

Auā ua ou iloa, o loo soifua le na te togiolaina a‘u; o aso amuli foi e tulai mai ai o ia i luga o le eleele. E ui lava foi ina faaumatia lenei tino pe a mavae atu lo‘u pa‘u, a e ou te iloa atu le Atua i lo‘u tino; ou te iloa atu ia te ia mo a‘u lava, e vaai atu foi o‘u mata ia te ia, a e le o se tasi; pe a le toe ai o‘u manao i totonu ia te au.

O aso e gata ai, e oo ina faatumauina ai o le mauga o i ai le fale o Ieova i tumutumu o atu mauga, e faamaualugaina foi e sili i mauga, ona gasolo ane ai lea o nuu uma i ai. E o mai lava nuu e tele, ma latou faapea ane, O mai ia, tatou o ae ia i le mauga o Ieova, o le fale o le Atua o Iakopo; e a‘oa‘o mai foi o ia ia te i tatou ona ala, ona tatou savavali ai lea i ona ala; auā e alu atu le tulafono ai Siona, o le afioga foi a Ieova ai Ierusalema. E faamasino foi o ia i nuu ese, ma aoai atu i nuu e tele; ona latou tu‘i ai lea i a latou pelu e fai ma uamea o suotosina, o latou tao foi e fai ma polo e teu a‘i vine; e le sii atu le pelu e le tasi nuu i le tasi nuu, latou te le toe a‘oa‘o foi i taua.

Alu ia i totonu o le papa, ina lafi ia i le eleele, ona o le matautia o Ieova, ma lona mamalu silisili. E faamaulaloina mata faasiasia o tagata nuu; e faamaulaloina foi le faamaualuga o alii; na o Ieova lava e viia i lea aso. Auā o le aso o Ieova o ‘au, e oo atu lea i e faasiasia ma e faamaualuga uma lava, atoa foi ma e o faafefeteina uma; ona faamaulaloina ai lea. E oo i arasi uma ua uumi ma le maualuluga o Lepanona; e oo foi i aluna uma o Vasana; e oo i atu mauga maualuluga uma; e oo foi i mauga tetele uma; e oo i ‘olo maualuluga uma; e oo foi i pa uma e le aea; e oo i vaa uma o Tasesa; e oo foi i mea matagofie uma. E faamaulaloina lava le faasiasia o tagata nuu; e faamaulaloina foi le faamaualuga o alii; na o Ieova lava i viia i lea aso. E matuā mavae lava tupua. Latou te ulu atu foi i ana o papa, ma lua o le eleele, ona o le matautia o Ieova ma lona mamalu silisili, pe a tulai o ia e luluina le laueleele. O lea aso e lafoai atu ai e tagata a latou tupua ario ma a latou tupua auro, na latou faia mo i latou e ifo i ai, e lafoaiina lava i afora ma pe‘a. Ina ia latou o atu i mavaevae o papa, atoa ma va i papa, ona o le matautia o Ieova ma lona mamalu silisili, pe a tulai o ia e luluina le laueleele.

pe a uma ona fufulu ese e le Alii le otaota o tama fafine a Siona, a uma foi ona mulumuluina o le toto o Ierusalema ai totonu ia te ia, i le agaga o le faamasinoga, ma le agaga o le faamuina; ona faia lea e Ieova i luga o mea uma i le mauga o Siona, o i luga foi o le mea e potopoto ai, o le ao ma le asu i le ao, ma le pupula mai o le afi mumū i le po; auā e i ai le mamalu i luga o le matagofie uma.

Auā ua fanau mai mo i tatou le tama, ua foaiina mai mo i tatou le atalii, e i lona ua le malo, e igoa foi o ia, o le Silisili ese, o le Faipule, o le Atua malosi, o le Tamā o le faavavau, o le Alii o le filemu. E leai se mea e gata mai ai ona tele o lona malo ma le filemu o lona malo i le nofoālii o Tavita ma lona malo, e faatumauina, ma faamausali i le faamasinoga ma le amiotonu, e afua mai i ia ona po e oo i le faavavau; e faia lea mea i le maelega o Ieova o ‘au.

Ina uio ia, auā ua latalata le aso o Ieova, e oo mai pei o se malaia mai Le e ona le malosi uma lava. O le mea lea e vaivai ai lima uma, e faavaivai ai foi loto o tagata uma; ona latou atuatuvale ai lea; e maua i latou i le puapuaga ma le faatiga; latou te oono faapei o le fafine a fanau; latou te fevāaiai le tasi i le tasi ma le fememeai; o latou mata o mata afi mumū ia. Faauta, o loo sau le aso o Ieova, e ogogo i le toatamai ma le toasa tele; e fai ai le nuu ma faatafunaga; na te faaumatia foi tagata agasala o i ai. Auā o fetu o le lagi ma ona faaputuputugāfetu, e le fepulafi mai i latou; e faapouliuligia le la i lona alu ae, o le masina foi e le susulu mai lona malamalama. Ou te faasalaina le lalolagi ona o a latou amio leaga, o tagata ulavavale foi ona o a latou agasala; ou te faaumatia foi le faasausili o e faamaualuluga, ou te lafotuina i lalo le faasiasia o e faasaua. Ou te faatoaitiitia tagata e sili i le auro lelei, o tagata lava e sili ona toaitiiti i le auro o Ofeira. O le mea lea ou te faagateteina ai le lagi, e lulueseina foi le lalolagi i le mea o i ai, i le toatamai o Ieova o ‘au, ma le aso o lona toasa tele.

E faaumatia e ia le oti e faavavau; e soloiesea foi e le Alii o Ieova o loimata i mata uma lava; e faateaeseina foi e ia le gao o lona nuu i le lalolagi uma lava; auā ua fetalai mai ai Ieova.

Auā o loo i nuu ese uma le toatamai o Ieova, o lona toasa foi o loo i a latou ‘au uma lava; ua ia faafanoina i latou, ua ia tuuina atu lava i latou ia fasiotia. E lafoaiina lo latou fasi, e alu ae foi le elo i o latou tino oti, e tafeesea mauga i o latou toto. E mavae foi ‘au uma lava a le lagi, e taataaia le lagi e pei o se tusi; e pauu a latou ‘au uma lava, e pei ona paau o lau o le vine, e pei ona paau o lau o le mati. Auā e onā la‘u pelu i le lagi; faauta, e alu ifo ia i luga o Etoma, i luga lava o le nuu ua ou faafanoina, ina ia faasalaina. Ua maona le pelu a Ieova i le toto; ua mălie i le ga‘o; o le toto o tamai mamoe ma ‘oti, o le ga‘o o i ai fatuga‘o o mamoe poa; auā e ia Ieova le taulaga i Posara, ma le fasi tele i le laueleele o Etoma. E pauu foi rema faatasi ma i latou, ma povi taanoa faatasi ma povi poa; e onā o latou laueleele i le toto, e mălie foi lo latou efuefu i le ga‘o. Auā e ia Ieova le aso e taui ai ma sui; o le tausaga e taui atu ai i e o finau ma Siona. E liu pulu safeta ona vaitafe, e liu teio foi ona efuefu, e avea foi lona laueleele ma pulu safeta o mu. E le tineia lava ia i le po, po o le ao; e pusa ae pea lava lona asu; e tuufua ia i lea tupulaga ma lea tupulaga, e le uia e faavavau faavavau lava.

Liliu mai ia ia te au, tou te ola ai, o outou tuluiga uma o le lalolagi; auā o a‘u o le Atua, a e leai lava se tasi. Ua ou tauto ia te au lava, ua mavae atu le upu i lo‘u gutu e faamaoni, e le toe foi mai lava, E tootuli mai ia te au o tulivae uma lava, e tauto mai laulaufaiva uma lava;

o loo faaali talu mai le amataga o mea e mulimuli; mai anamua foi o mea ua le faia; o loo fai ane, E tu la‘u pule, ou te faia foi mea uma ou te loto i ai.

O le leo o ou tagata vaai, ua latou leo tetele, ua latou alalaga faatasi; auā latou te iloa e faafesagai lava, pe a faafoisia Siona e Ieova.

Auā faauta mai, ou te faia le lagi fou ma le lalolagi fou; e le toe manatua mea na muamua, e le alu ae foi i le loto.

Auā e pei ona tumau i o‘u luma o le lagi fou ma le lalolagi fou ou te faia, ua fetalai mai ai Ieova, e faapea ona tumau o a outou fanau ma lo outou igoa.

Aue! auā o le aso tele lea, e leai sona tusa; o ona po lava ia o le puapuaga o Iakopo; a e faaolaina ai o ia.

Auā ua faapea ona fetalai mai o le Alii o Ieova, Faauta, o a‘u, o a‘u lava, ou te sueina la‘u lafu, ou te matuā suesue lava i ai. E pei o le leoleo mamoe ona sueina o lana lafu i le aso o i ai o ia i lana lafu ua taapeape; e faapea ona ou sueina la‘u lafu, ma ou laveaiina i latou ai mea uma ua salalau ai i latou i le aso faamalumalu ma le pogisa. Ou te aumaia foi i latou nai nuu, ma ou faapotopotoina i latou mai nuu eseese; ou te aumaia i latou i lo latou lava laueleele, ma fagaina i latou i mauga o Isaraelu, i tafatafa o vaitafe, ma mea uma e āina o le nuu.

O le mea lea ia e vavalo atu ai, ia faapea atu ia te i latou, Ua faapea ona fetalai mai o le Alii o Ieova, Faauta, lo‘u nuu e, ou te lagaina o outou tuugamau, ou te avae outou ai o outou tuugamau, ma aumaia outou i le laueleele o Isaraelu. Lo‘u nuu e, tou te iloa o a‘u lava o Ieova, pe a ou lagaina o outou tuugamau, ma avae outou ai o outou tuugamau.

A o i ai le Atua i le lagi, o le na te faaalia mea ua lilo, ma faailoa mai ia Nepukanesa le tupu o mea e oo mai i aso amuli. Sa faapea lau faalepo ma le mea na e silafia i lou tofaga.

O oe, le tupu e, na e silafia, faauta foi o le tasi tupua tele; o lenei tupua tele sa maeu lona matagofie, na tu i ou luma, sa matautia foi lona tino mai. O le ulu o lenei tupua, o le auro lelei lea; o lona fatafata ma ona lima, o le ario ia; o lona manava ma ona ogavae o le ‘apa memea ia. O ona vae, e uamea ia, o ona tapuvae o uamea isi mea, a o omea isi mea. Na e silasila ua tofia le maa a e lei tofia i lima, na lavea ai le tupua i ona tapuvae na fai i uamea ma omea, ua nutililii ai ia mea. Ona nutililii faatasiina ai lea o le uamea, o le omea, o le ‘apa memea, o le ario, atoa ma le auro, ua pei o le aputi i le mea e soli ai saito, ua lelea i le matagi, ua le maua lava se mea latou te i ai; a o le maa na lavea ai le tupua ua avea lea ma mauga tele, ua tumu ai le lalolagi uma.

O le faalepo lena, o le a matou ta‘uina atu foi i le tupu lona uiga. Le tupu e, o oe o le tupu o tupu; auā ua foaiina mai ia te oe e le Atua o le lagi le malo, ma le malosi, ma le mamalu, ma le viiga; ua na avatu foi ia te oe mea uma e mau ai tagata, ma manu o le vao, ma manu felelei, ua tuuina atu ia mea uma i lau pule; o le ulu auro o oe lava lea. A mavae atu oe, ona tu lea o le tasi malo, e le tusa ma oe; ma le tasi o lona tolu foi o malo, o le ‘apa memea lea, e pule foi lea i le lalolagi uma.

O lona fa foi o malo e malosi ia pei o le uamea; auā e nutililii ma tu‘imomomo mea uma i le uamea, e pei o le uamea ona tu‘imomomo o ia mea uma e faapea lea malo ona nutililii ma tu‘imomomo. E vaevaeina foi le malo, auā na e silafia tapuvae ma tamatamai vae o uamea isi mea, a o isi mea o omea a le fai ipu omea; a e peitai e i ai lava ia te ia le malosi o le uamea, auā na e silafia le uamea ua filogia ma le omea a le fai ipu. O tamatamai vae foi o uamea isi mea a o omea isi mea, e faapea lava le malo, e malosi nisi mea a e vaivai nisi mea. Na e silafia le uamea ua fefiloi ma le omea a le fai ipu, e faapea foi ona filogia o i latou ma le fanau a tagata; a e latou te le pipii le tasi i le tasi, e pei ona le filogia o le uamea ma le omea.

O ona po o ia tupu e faatuina ai e le Atua o le lagi o le malo e le faaumatia e faavavau; o lea malo foi, e le tuuina atu ia i se tasi nuu, na te tu‘imomomoina ma faaumatia ia malo uma lava, a o ia e tumau lava e faavavau; e pei ona e silafia na tofia le maa i le mauga, a e lei tofia i lima, ma na tu‘imomomoina le uamea, le ‘apa memea, le omea, le ario, atoa ma le auro. O mea ia ua faailoa mai ai e le Atua silisili i le tupu o mea e oo mai amuli; e moni lava le li‘a, e faamaoni foi lona uiga.

Ua fai atu Tanielu, ua faapea atu, Na a‘u iloa i mea na faaali mai i le po, faauta foi, o matagi e fa o le lagi ua pesi tetele atu i le sami tele. Ona o ao ai lea mai le sami o manu feai tetele e fa, ua eseese le tasi i le tasi. O le muamua, ua pei se leona ia, ua fai foi apaau o le aeto; na a‘u vaavaai ina seia fufutiesea ona apaau, sa siitia foi ai le fogāeleele, sa faatuina lava i ona vae, pei se tagata, ma ua foaiina atu i ai le loto o le tagata. Faauta foi, o le tasi manu feai, o lona lua lea, ua pei o le urosa, ua tulai atu i le tasi itu; ua i lona gutu o ivi asoaso e tolu, ua u ai i ona nifo, ua latou fai atu i ai, ua faapea atu, Tulai ia, ina e ‘ai tino e tele. Mulimuli ane i lea mea na ou vaai atu, faauta foi, o le tasi pei o le nameri, ua i lona tua foi o apaau e fa o le manu lele; ua i ai foi i le manu feai o ulu e fa; sa tuuina atu foi i ai le pule. Mulimuli ane i lea mea na ou iloa i faaaliga i le po, faauta mai, o lona fa o manu feai, ua matautia ma ua maaa, ua matuā malosi lava; ua i ai foi nifo uamea tetele, ua ia ‘aina ma lamupalaina, a o mea ua totoe, ua na soli i ona vae. E ese lava ia i manu feai uma na muamua ia te ia, sa i ai foi nifo e sefulu i lona ulu. Na a‘u manatunatu i nifo, faauta foi, o le tasi nifo itiiti ua tupu ae i le va o ia nifo, ona fa‘iesea lea i ona luma o nifo e tolu sa luai tutū; faauta foi, ua i lenei nifo o mata e pei o mata o le tagata, atoa ma le gutu ua tautalatala i upu faasausili.

Na ou vaavaai ina seia tuu mai o nofoālii, ua tietie mai foi Lē ua mai anamuā ona aso, ua sinasina lona ofu e pei o le kiona, ma ona lauao e pei o le fulufulu mamoe e lelei; o lona nofoālii o le afi mumū ia, ua se afi ua mu ana mea e taavalevale a‘i. Ua tafe mai le afi ua alu atu nai ona luma, ua afe ni afe o e auauna ia te ia, e mano ni mano o e laulaututū i ona luma; ua nofoia le faamasinoga, ma ua fofola tusi.

Ona ou vaavaai atu ai lea ona o upu faasausili na tautala mai e le nifo ua ou vaai atu ina seia fasimatea le manu feai, ua faaumatia foi lona tino, ma ua lafoina le afi mumū. A o isi manu feai ua totoe, ua aveeseina la latou pule; a ua faafualoaina lo latou ola, ua oo i le tausaga ma le tau.

Na ou iloa i faaaliga i le po, faauta foi, ua afio mai i ao o le lagi Lē e pei o le Atalii o le tagata, ua oo foi ia i Lē ua mai anamua ona aso, ua latou momoli ia te ia i ona luma. Ua foaiina atu ia te ia le pule, ma le viiga, ma le malo, ina ia auauna ia te ia o nuu uma, ma atu nuu, ma gagana eseese; o lana pule o le pule e faavavau lea, e le mavae atu ia, o lona malo foi e le faaumatia.

O ia manu tetele e fa i latou o tupu ia e toafa o le a tutū mai i le lalolagi. A e maua le malo e le au paia a lē Silisili ese, e fai foi mo i latou le malo e faavavau, e faavavau lava.

Ona a‘u fia iloa lea o le uiga o lona fa o manu, o le ua uiga ese lava i nisi manu uma, ua matautia tele lava, o ona nifo o uamea ia, o ona atigivae o ‘apa memea ia; ua ‘ai, ua lamupala, ua soli foi i ona vae mea na totoe. Na a‘u fia iloa foi le uiga o nifo e sefulu ua i lona ulu, atoa ma le tasi ua tupu ae, ua pauu ai nifo e tolu i ona luma; o le nifo foi lea sa i ai mata, ma le gutu o loo tautala a‘i upu faasausili, o lona tino mai foi ua sili ona tele i nisi uma. Na ou iloa atu ua fai taua foi lena nifo i le au paia, ma ua manumalo ia te i latou; ina seia afio mai Lē ua mai anamuā ona aso, ma ua tuuina atu le faamasinoga i le au paia a lē Silisili ese; ua oo mai foi ona po ua maua mai ai le malo e le au paia.

Ua fai mai o ia ua faapea mai, O lona fa o manu, o lona fa lea o malo i le lalolagi, e ese lea i malo uma, na te ‘aina foi le lalolagi uma, ma soli i ai, ma olopalaina. O ona nifo foi e sefulu o lenei malo, o tupu e sefulu ia, o le a tutū mai; e mulimuli ane foi ia te i latou ona tu mai o le tasi, e ese ia i e na muamua, e faatoilaloina e ia o tupu e toatolu. Na te faia upu i lē Silisili ese, ma faaumatia le au paia a lē Silisili ese, e manatu o ia e faaliliu i tausaga ma tulafono; e tuuina atu foi i latou i lana pule seia mavae le tausaga, ma tausaga, ma le vaeluagalemu o le tausaga. A e nofoia le faamasinoga, ona aveeseina ai lea e i latou o lana pule, ia faaiuina ma faaumatia ia oo i le iuga. O le malo, ma le pule, atoa ma le mamalu o le malo i lalo ifo o le lagi uma, e tuuina atu ia i le nuu o le au paia a lē Silisili ese, o lona malo, o le malo e faavavau lea, e auauna ma usiusitai ia te ia o pule uma lava.

Ua tupu ae foi ai totonu o le tasi o i latou o le tasi nifo itiiti, ua tupu tele lava ia i le itu i toga, ma sasae, atoa ma le nuu matagofie. Ua tupu tele foi o ia, ua oo i ‘au e le lagi, ma ua na lafotu ifo i le eleele nisi ‘au atoa ma nisi fetu, ma na soli i ai. Ua faasilisili o ia ua oo lava i le ave ‘au, na ia aveesea le taulaga e fai i aso fai soo, ua ia lafotuina foi lona malumalu paia. Ona tuuina atu lea o ‘au, atoa ma le taulaga e fai i aso fai soo mo agasala, ua ia lafotuina le upu moni i le eleele, ua ia fai foi lona loto, ma ua manuia. Ona ou faalogo lea, ua tautala le tasi o le au paia, ua fai ane foi se tasi o le au paia ia te ia lava na tautala, Seia afea ea le faaaliga i la le taulaga e fai aso fai soo, ma le agasala e faatafuna ai, ona tuuina atu lea o le malumalu atoa ma ‘au ia solia lava? Ona faapea mai lea o ia ia te au, Seia atoa afiafi ma taeao e lua afe ma le tolu o selau, ona faapaiaina ai lea o le malumalu.

Na a‘u iloa le faaaliga, o a‘u lava o Tanielu, ona a‘u suesue ai lea o le uiga, faauta foi, ua tu mai i o‘u luma se tasi ua tino mai pei se tagata. Ona a‘u lagona lea o le leo o le tagata i le va o auvai o Ulai, ua valaau, ua faapea ane, Kaperielu e, ia e faamatalaina le faaaliga i lenei tagata. Ua ia sau e lata ane i le mea na a‘u tu ai; ua sau lava ia, ona a‘u fefe ai lea, ua ou faapaū fao; ona faapea mai lea o ia ia te au, Ia e iloa, le atalii e o le tagata, auā o ona po o le iuga e taunuu ai le faaaliga. O loo o tautala mai o ia ia te au, ua ou moe gase faafaō lava i le eleele; a ua pai mai o ia ia te au, ma na faatuina a‘u i luga. Ua ia faapea mai foi, Faauta mai, ou te faailoa ia te oe mea e tutupu i ona po e taufaaiu ai le toasa; auā o ona po ua tuupoina e oo ai le iuga.

A oo i le gataaga o latou malo, pe a faaatoatoaina agasala a e agasala, ona tu mai ai lea o le tupu mata saua, na te iloa foi upu e faigata. E tele lona malosi, a e le o lona lava malosi; e faasilisili lava ia ona faaumatia, e manuia ia, e fai foi lona loto, na te faaumatia i e malolosi, atoa ma le nuu paia. O lona faautauta foi na te faamanuia ai ana sauniga pepelo; e faasilisili o ia i lona loto, na te faaumatia foi tagata o toatele, a o maninoa; e tulai atu foi o ia i le Alii o alii; e olopalaina, a e le se lima e olopalaina ai. O le faaaliga o le afiafi ma le taeao sa ta‘ua, ua faamaoni lea; ia e pupuni foi le faaaliga, auā e tele ona aso.

Ua atofaina vaiasosa e fitugafulu i lou nuu ma lau aai paia, e faauma ai le solitulafono, ma faaiu ai agasala; e fai ai foi le togiola mo agasala, ma faaooina mai ai le amiotonu e faavavau, e faamaufaailogaina foi le faaaliga ma le valoaga, e faauuina ai foi le mea e silisili ona paia. Ia e iloa foi ma manatunatu, e afua mai i le oo atu o le poloaiga ia toe faia ma ia atiina ae Ierusalema, e oo atu i le Mesia le Alii, e fitu vaiasosa ma vaiasosa e onogafulu ma le lua, e toe faia le ala tele ma le pa i ona po lava o le puapuaga. A mavae vaiasosa e onogafulu ma le lua, ona fasiotia ai lea o le Mesia, a e leai se mea ia te ia; o le nuu o le alii o le a maliu mai, latou te faaumatia le aai ma le malumalu, o lona iuga foi ua se tafega lea; ua tuu le pule ia faatafunaina e oo i le iuga o le taua. Na te faatumauina foi le feagaiga i tagata e toatele i le vaiasosa e tasi; o le vaeluagalemu foi o le vaiasosa na te faagata ai le taulaga, atoa ma le mea foaifuaina, e i ai foi i le itu o le malumalu mea e inosia e faatafunaina a‘i, seia oo i le iuga o le mea ua tuu pule i ai, ma ua faaoo i le na te faatafunaina.

O lenei, ua a‘u sau e faailoa atu ia te oe mea e tutupu i lou nuu i ona po amuli; auā e tuai ona po o le faaaliga.

E finagalo ia tupu e lua e fai mea leaga, la te tala pepelo i le laoai e tasi; a e le manuia ai, auā e oo lava le iuga i ona po ua atofaina ai. Ona toe foi ai lea o ia i lona nuu ma le oloa tele; e ita foi o ia i le feagaiga paia; na te faia foi lona loto, ona toe foi lea o ia i lona nuu.

O ona po ua tuupoina e toe foi mai ai o ia, ma alu atu i le itu i toga; a e le iu faapei o le na muamua, po o lē mulimuli. Auā e alu atu le fua Kitimo e tetee atu ia te ia; e tigaina ai lona loto, ona toe foi mai ai lea, o ita atu foi o ia i le feagaiga paia; na te faapea lava ona fai, na te toe foi mai ma faasaga lona manatu i e ua lafoai le feagaiga paia. O ‘au foi latou te ‘au ma ia, latou te faaleagaina le malumalu e malu ai, latou te aveeseina foi le taulaga fai soo, ma tuuina ai le mea inosia e faatafunaina ai. O e agasala i le feagaiga e leaga i latou ia te ia i faaoleolega; a o le nuu o e ua iloa lo latou Atua latou te faamalolosi ma fai mea tetele. O e ua popoto i le nuu latou te a‘oa‘oina atu i tagata e toatele; a o aso e tele e pauu ai i latou i le pelu ma le afi, ma le tafeaga, ma le veteina. A pauu foi i latou, latou te maua se fesoasoani, o se fesoasoani itiiti; a e toetele e pipii atu ia te i latou ma faaoleolega.

E pauu foi nisi o e popoto, e tofotofoina ai i latou, ma faamamāina ai, ma faasinasinaina ai, seia oo i ona po o le iuga; auā e lei oo i ona po ua tuupoina.

O le tupu foi na te faia e tusa ma lona loto, ma faamaualuga o ia e ia, ma faasili ia te ia i atua uma; na te faia upu faasausili i le Atua o atua, e manuia foi o ia seia atoatoa le toasa; auā e faia lava le mea ua tuu i ai le pule. Na te le manatu i le Atua o ona tamā, na te le manatu i le manao i fafine, na te le manatu foi i se tasi atua; auā e faasilisili o ia e ia i mea uma. E ava o ia i le atua o ‘olo i le mea e nofo ai o ia; o le atua foi sa le iloa e ona tamā na te ava i ai, ma avatu i ai auro, ma ario, ma maa tāua, atoa ma mea matagofie. E faia lava lea e ia i ‘olo e sili ona malolosi, i le atua ese, o le e manatua e ia ma faasilisili ona ava i ai; na te tuuina atu foi ia te i latou le pule i tagata e toatele, na te vaevaeina foi le laueleele e maua ai le taui.

A oo i ona po o le iuga, ona sii atu lea ia te ia o le taua e le tupu o le itu i toga; e pei se afā ona oso atu ia te ia o le tupu o le itu i matu ma kariota, ma e o tietie i solofanua, atoa ma vaa e tele; na te oo atu foi i nuu, ma lolofi i ai, ma ui ane ai. E oo atu foi o ia i le nuu matagofie, e faaumatia foi nuu e tele; a e sao nai lona lima o nuu ia, o Etoma, ma Moapi, atoa ma e ua sili i le fanauga a Amoni. Na te faaoo atu lona lima i nuu, e le sao foi le nuu o Aikupito. A e pule o ia oloa, o auro, ma ario atoa ma mea matagofie uma o Aikupito; e mulimuli atu foi ia te ia o Lipua ma Aitiope. A o tala mai sasae, ma le itu i matu e atuatuvale ai o ia; ona alu atu ai lea o ia ma le ita tele ia faaumatia ma fasiotia tagata e toatele. Na te faatuina fale ie o lona maota i le va o sami, i le mauga matagofie ma le paia; a e oo atu i lona iuga, e leai foi se tasi e fesoasoani ia te ia.

O ona po foi ia e tulai ai Mekaeli, o le alii sili, o le na te tulai ona o tagata o lou nuu; e oo mai foi aso vale, e leai sona tusa talu ona faatoa tupu o nuu, ua oo i ia lava aso; o ona po foi ia e laveaiina ai ou tagata, o i latou uma o e ua tusia i le tusi. E toatele foi o e momoe i le efuefu o le eleele latou te ala mai, o isi i le ola e faavavau, a o isi i le faalumaina ma le inosia e faavavau. O e popoto foi, e fepulafi i latou faapei o le pupula o le lagi; o i latou foi ua faaliliu ai tagata e toatele ia amiotonu, e pei o fetu i latou e faavavau faavavau lava. A o oe Tanielu e, ia e pupuni o ia upu, ma faamaufaailogaina le tusi, seia oo i ona po o le iuga; e fetaufetuliai tagata e toatele, e tupu tele foi le malamalama.

O a‘u Tanielu, na a‘u vaai atu, faauta foi, o isi e toalua ua tutū mai, o le tasi i le auvai i le itu vai mai o le vaitafe, a o le tasi i le auvai i lela itu o le vaitafe. Ona faapea atu lea o le tasi i le tagata ua ofu i le ie lino, ua i luga o le vai o le vaitafe, Pe oo mai afea le iuga o ia mea e ofo ai? Ona a‘u faalogo lea i le tagata ua ofu i le ie lino, ua i luga o le vai o le vaitafe, ua sii i luga i le lagi lona lima taumatau ma lona lima tauagavale, ua tauto foi o ia i le soifua e faavavau, e oo ia mea i le tausaga, ma tausaga, ma le vaeluagalemu o le tausaga; a uma foi ona faataapeapeina le malosi o le nuu paia, ona taunuu foi lea o na mea uma.

Na a‘u faalogo foi, a ua ou le lagona; ona ou faapea atu lea, Le alii e, pe se a le iuga o ia mea? Ona faapea mai lea o ia, Tanielu e, ina alu ia; auā ua punitia ma faamaufaailogaina o upu seia oo i ona po o le iuga. E toatele e faamamāina, ma faasinasinaina, ma tofotofoina; a e agasala o e agasala, e le lagona foi so latou toatasi o e agasala; a o e popoto e lagona lava i latou.

E afua i ona po e aveeseina ai le taulaga e fai i aso fai soo, e oo foi i le tuuina atu o le mea inosia e faatafunaina ai, e atoa aso e tasi le afe, ma le lua o selau ma le ivagafulu. Amuia o lē faatalitali atu ma aulia atu ona aso e afe ma le tolu o selau, ma le tolugafulu ma le lima. A o oe ia e alu atu seia oo i le iuga; auā e te malolo, e te tu mai foi i lou tofi pe a oo i le iuga o aso.

O loo faapea mai Ieova, O le aso lava lea e oo ai ona e faaaigoa ia te au, O Ise; e te le toe faaigoa ia te au, O Paale.

Ia outou ilia le pu i Siona, ia taalili i lo‘u mauga paia, ia tetemu i latou uma o e nonofo i le nuu; auā o le a oo mai le aso o Ieova, auā ua latalata mai. O le aso pouliuli ma le pogisa, o le aso malumalu ma le pogisa lava, e pei o le malamalama o le taeao ona sosolo i mauga; o le nuu tele ma le malolosi, e leai sona tusa mai le vavau; a mavae ia e le toe faapea lava i lea tupulaga ma lea tupulaga. O loo i o latou luma le afi e fano ai, o loo i o latou tua foi le afi mumū; o le fanua i o latou luma e pei o le faatoaga i Etena ia, a o latou tua, ua faalalaoina ia; e leai lava se mea e sao ia te i latou. E tino mai i latou e faapei ona tino mai o solofanua; pei o e tietie i solofanua, e faapea lava ona latou taufetuli. Latou te taufaioso, e pei o le taalili o kariota i tumutumu mauga, e pei o le taalili o le mu o le afi e susunuina ai tagutugutu o saito, e pei o le nuu malosi ua pae tau. E gatete tagata i luma ia te i latou, e sesega mata o tagata uma. Latou te taufetuli e pei o tagata totoa; latou te tausili i le aupa e pei o tagata tau; latou te savavali taitasi i lona ala, latou te le ‘alo foi ai le mea e ui ai i latou. E le tulei le tasi i le tasi; latou te savavali taitasi i lona ala; a latou pauu foi i tao e le manunua ai. Latou te femoei i le aai; latou te taufetuli foi i le aupa; latou te feaei i fale; latou te ulufale atu i faamalama e pei o se gaoi. E tetemu le lalolagi i o latou luma; e luluina le lagi; e pouliuli le la ma le masina, o fetu foi e le toe fepulafi mai. O Ieova foi na te tŭlei mai lona siufofoga i ana ‘au; auā e matuā tele lava lana itu taua; auā e malosi o ia le na te faataunuuina lana afioga; auā e mamafa le aso o Ieova, e matuā matautia, po o ai se na te mafaia ona talia?

Mulimuli ane, e iu ina ou liligi ifo ai lo‘u Agaga i luga i tagata uma; ona perofeta ai lea o outou atalii ma o outou afafine, e fai miti o outou toeaina, e iloa faaaliga e o outou taulelea. Ou te liligi ifo foi lo‘u Agaga i auauna ma auauna fafine, i ia ona aso.

Ou te tuuina atu foi vavega i le lagi ma le lalolagi, o le toto, ma le afi, ma le asu faaniutu. E muamua ona liua le la i le pouliuli, ma le masina i le toto, i le oo ai i le aso tele ma le silisili o Ieova. E iu foi ina faaolaina o i latou uma lava o e valaau atu i le suafa o Ieova; auā e i ai le faaolataga i le mauga o Siona ma Ierusalema, faapei ona fetalai mai ai o Ieova, e i ai foi i e ua totoe o i latou ia e valaauina e Ieova.

Ia outou tuu atu le selesaito, auā ua afu saito; o mai ia, ina outou o ifo; auā ua tumu le mea e soli ai vine, ua taumasuasua o latou tuugāuaina; auā ua tele lo latou leaga. E toatele lava tagata i le vanu e faasalaina ai, auā ua latalata mai le aso o Ieova i le vanu e faasalaina ai. E faapouliuligia le la ma le masina, o fetu foi e le toe fepulafi mai. E faataio foi Ieova mai Siona, e tŭlei ifo lona siufofoga ai Ierusalema; e luluina le lagi ma le lalolagi, a o Ieova, o le malu o ia o lona nuu, ma le ‘olo o le fanauga a Isaraelu.

Tou te iloa foi o a‘u o Ieova lo outou Atua, o lē nofo i Siona lo‘u mauga paia; ona paia lea o Ierusalema, o tagata ese foi latou te le toe ui atu ai lava. A oo foi i lea aso, ona tautulu mai lea o suāvine i mauga, e tafe foi le suāsusu i mauga iti, o alia uma foi o Iuta e tafe mai ai suāvai; e tafe mai se punāvai ai le fale o Ieova, e faasūsū ai le vanu o Setima. E faatafunaina Aikupito, e avea Etoma ma laueleele gaogao, ona o le faasaua i le fanauga a Iuta, auā ua latou faamaligiina i lo latou nuu le toto o e le sala. A e tumau Iuta e faavavau, o Ierusalema foi i lea tupulaga ma lea tupulaga. Ou te faamamā lo latou toto sa le faamamāina e a‘u; o a‘u lava o Ieova o lē nofo i Siona.

A o aso e gata ai e oo ina faatumauina ai le mauga o i ai le fale o Ieova i tumutumu o mauga, e faamaualugaina foi ia sili i mauga iti, ona gasolo ane lea o nuu i ai. E o mai lava nuu ese e tele, ma latou faapea ane, O mai ia, tatou o ae ia i le mauga o Ieova, o le fale foi o le Atua o Iakopo; e a‘oa‘o mai ai o ia ia te i tatou i ona ala, ona tatou savavali ai lea i ona ala; auā e alu atu le tulafono mai Siona, o le afioga foi a Ieova mai Ierusalema. E faamasino foi o ia i nuu e tele, e aoai atu foi i nuu malolosi e mamao; ona latou tu‘i ai lea i a latou pelu e fai ma uamea o suotosina, o latou tao foi e fai ma polo teu vine; e le sii atu foi le pelu e le tasi nuu, latou te le toe a‘oa‘o foi i taua. A e taitasi ma nofo i lalo o lona vine, ma lalo o lona mati; e leai foi se na te faamatau mai; auā ua faapea ona tŭlei mai ai le siufofoga o Ieova o ‘au.

O loo latalata mai le aso tele o Ieova, e lata mai lava, o loo matuā televave mai lava, o le taalili o le aso o Ieova; e matuā tagiaue ai le toa. E fai lea aso ma aso o le toasa, o le aso o le puapuaga ma le tiga, o le aso o le faatafunaina ma le faagaogaoina, o le aso o le pouliuli ma le pogisa, o le aso o ao ma le faamalumalu, o le aso o le pu ma le pāpā o alaga i le taua, e sii i aai nofo ‘olo atoa ma ‘olo maualuluga. Ou te faatiga foi i tagata, latou te savavali ai pei o tagata tauaso, auā ua latou agasala atu ia Ieova; e faamaligiina o latou toto pei o le efuefu, e fai o latou tino foi pei o otaota. E le mafai lava i o latou ario ma o latou auro ona laveai ia te i latou i le aso o le toasa o Ieova; a e faaumatia le nuu uma i le afi o lona fuā; auā e matuā faafuasei ona faaumatia e ia o i latou uma o e nonofo i le nuu.

O lenei, ia outou faatalitali ia te au, o loo fetalai mai ai Ieova, ia oo i le aso ou te tulai atu ai i le vete; auā ua tonu ia te au e faapotopotoina nuu ese, e aofia lava malo; ina ia sasaa atu i luga ia i latou lo‘u ita, o lo‘u ita tele uma lava; auā e faaumatia le lalolagi uma i le afi o lo‘u fuā.

Auā o ona po ia ou te liliu atu ai i nuu o le gagana lelei, ina ia latou valaau uma lava i le suafa o Ieova, ma auauna ia te ia ma le loto gatasi.

Auā o loo faapea ona fetalai mai o Ieova o ‘au, E toe tasi, e toe itiiti lava, ona ou luluina ai lea o le lagi, ma le lalolagi, ma le sami, atoa ma le eleele matutu. Ou te luluina foi nuu uma; ona oo mai ai lea o mea ua manaomia e nuu uma; ou te faatumuina foi lenei fale i le pupula, ua fetalai mai ai Ieova o ‘au. O loo ia te au le ario, o loo ia te au foi le auro, ua fetalai mai ai Ieova o ‘au. E sili le mamalu o lenei fale ua mulimuli i le na muamua, ua fetalai mai ai Ieova o ‘au; ou te avatu foi le manuia i le mea nei, ua fetalai mai ai Ieova o ‘au.

Faauta, o le a oo mai le aso o Ieova, e tufaina ai i totonu ia te oe o lou oa o le a vetea. Auā ou te faapotopotoina nuu uma e tau ma Ierusalema; e aea le aai, e vetea foi fale, ma fetosoina fafine, e ta‘ita‘i faatagataotauaina le tasi vaega o le aai; a o e totoe o le nuu, e le faate‘aeseina i latou i le aai. Ona afio atu lea o Ieova e tau ma ia nuu, pei o le aso na tau ai o ia i le aso o le taua.

E tu ona aao i lea aso i luga o le mauga o Olive, o loo feagai ma Ierusalema i gagae; e vaeluaina foi le mauga o Olive i totonu i sasae ma sisifo, o le vanu tele lava; e te‘a atu le tasi itu o le mauga i le itu i matu, ma le tasi ona itu i le itu i toga. Ona outou sosola lea i le vanu o i o‘u mauga; auā e pāia Asela i le vanu o mauga; tou te sosola foi, pei ona outou sosola i le mafuie i ona po o Usia le tupu o Iuta; e afio mai lava Ieova lo‘u Atua ma le au paia uma faatasi ma oe. E oo lava i lea aso, e le i ai le malamalama o mea aoga, a o le pouliuli lava; a e oo mai le aso, e tasi lava ia, (ua silafia lava e Ieova,) e le o le ao, e le o le po; a e a oo i le itu aso afiafi e malamalama ai. O lea aso foi e alu atu ai le vai ola nai Ierusalema o le tasi ona vaega e tafe atu i le sami i sasae, a o le isi ona vaega e tafe atu i le sami i sisifo; o le tausaga vevela ma le tausaga maalili e fai ai ia mea.

E fai foi Ieova ma Tupu i le lalolagi uma lava; o lea aso ua na o Ieova ai lava, ma lona suafa e āu tasi lea.

E liua le nuu uma pei o le fanua laugatasi, e pau mai i Kepa e oo i Rimoni i le itu i toga o Ierusalema; e faaeaina foi o ia, ma nofo i lona lava nuu, e pau mai i le faitotoa o Peniamina e oo i le mea sa i ai le faitotoa anamua, e oo i le faitotoa o tulimanu; e pau mai foi i le ‘olo o Hananiali, e oo i le tuugāuaina a le tupu. Latou te nonofo ai, e le toe ai se faafanoga; e nofo lava Ierusalema ma le filemu. O lenei le mala e taia a‘i e Ieova o nuu uma e tau ma Ierusalema; e lāuvale lava o latou tino, a o tutū i o latou vae; e totō o latou mata i mea e tutū ai, ma o latou laulaufaiva e faaumatia ia i o latou gutu. O lea aso foi e i ai ia te i latou le atuatuvale tele mai ia Ieova; ona taitasi ai lea ma tago o le tasi i le lima o le tasi; e taitasi foi ma sii i luga o latou lima o le tasi i le tasi. O Iuta foi e ‘au i laua ma Ierusalema; e faaputuina oloa o nuu uma e ua vagavagai, o auro, ma ario, ma ofu e tele lava. E faapea foi ona i ai le mala i le solofanua, ma le falata, ma le kamela, ma le asini, atoa ma manu uma e i ai i ia toagālauapi, e tusa ma lenei mala.

O e totoe uma lava i nuu uma o e o mai e tau ma Ierusalema, latou te o ae lava i lea tausaga ma lea tausaga e ifo i le Tupu, o Ieova o ‘au; e fai ai foi le tausamiga o fale apitaga. A o le le alu ae ai itu aiga o le lalolagi i Ierusalema e ifo i le Tupu, o Ieova o ‘au, ona leai lea o se uaga ia te i latou. A e afai e le alu ae le itu aiga o Aikupito, ma latou le o mai, e leai foi se uaga ia te i latou; ona i ai lea o le mala e taia a‘i e Ieova o nuu o e le o ae e fai le tausamiga o fale apitaga. O le sala lena a Aikupito, ma le sala a nuu uma, o e le o ae e fai le tausamiga o fale apitaga.

O lea aso e i ai i tagitagi uamea o solofanua, E PAIA IA IEOVA; o ulo foi i le fale o Ieova, e tutusa ia ma ipu i luma o le fata faitaulaga. O ulo uma foi i Ierusalema ma Iuta, e paia lava ia ia Ieova o ‘au; o i latou uma o e fasi manu, latou te o mai ma ave nisi ulo, ma tunu ai; e le toe i ai lava se sa Kananā i le fale o Ieova o ‘au i lea aso.

A o ai se na te lavā tali le aso o lona afio mai? o ai foi se na te tulai pe a faaalia mai o ia? auā o ia e tusa ma le afi a lē tunu auro; e tusa foi ma le moli a lē tāofu; e nofo o ia, o lē tunu ma faamamā i le ario; na te faamamāina le fanauga a Levi, na te faate‘a ese foi le eleele ia te i latou e pei o le auro ma le ario; latou te avatu ai ia Ieova le taulaga e fai i le amiotonu.

a o le fanua, o le lalolagi lea; o le saito lelei, o tagata ia o le malo; o le titania, o le fanau ia a le ua leaga; o le ua ita mai na na luluina ia mea, o le tiapolo lea; o le seleselega, o le gataaga lea o le lalolagi; o e selesele, o agelu ia. O lea e pei ona faaputuina ai o le titania, ma susunuina i le afi, e faapea foi ona faia i le gataaga o lenei lalolagi. E aauina atu e le Atalii o le tagata ana agelu, latou te faapotopotoina nai lona malo mea uma e tausuai ai ma ē amio leaga. E lafoina i latou i totonu o le ogāumu aasa; e i ai le tagiaue ma le lilivau o nifo. Ona pupula ai lea o e amiotonu e pei o le la i le malo o lo latou Tamā. O le ua i ai taliga e faalogo ai, ina faalogo mai ia o ia.

E tusa foi le malo o le lagi ma le upega ua lafo i le vai, ua maua ai i‘a eseese uma. Ua tumu, ona latou toso ae ai lea i le matafaga, ua nonofo ma fafao i‘a lelei i ola, a o i‘a leaga ua lafoai. E faapea foi i le gataaga o le lalolagi; e o atu le au agelu e vavae ese i e amio leaga ma e amiotonu, ona latou lafoina lea ia te i latou i le ogāumu aasa; e i ai le tagiaue ma le lilivau o nifo.

A ua tali atu o ia, ua faapea atu ia te i latou, A oo i le afiafi ua outou fai ane, E laofie; auā ua mūmū mai le lagi. O le taeao foi ua outou fai ane, E uaga le asō; auā ua mūmū mai, ma faamalumalu ifo le lagi. O outou tagata pepelo, ua outou iloa ona mātauina amio a le lagi, a o faailoga o tausaga tou te le mafaia ea?

Auā e sau le Atalii o le tagata faatasi ma ana agelu i le mamalu o lona Tamā; ona tauia lea e ia e taitasi e tusa ma lana galuega. E moni, ou te fai atu ia te outou, O loo tutū mai iinei nisi e le oo ia te i latou le oti, seia latou vaaia le Atalii o le tagata ua sau i lona malo.

Ona fetalai atu ai lea o Iesu ia te i latou, E moni, ou te fai atu ia te outou, o outou ua mulimuli mai ia te au, pe a tietie le Atalii o le tagata i lona nofoālii mamalu i le toefuataiga, tou te tietie ai foi i nofoālii e sefulu ma le lua, e faamasino ai i itu aiga o Isaraelu e sefulu ma le lua.

Ua nofo o ia i le mauga o Olive, ona o mai ai lea o le au soo ia te ia ua na o i latou, ua faapea mai, Ia e fetalai mai ia te i matou pe oo afea ia mea? pe se a foi le faailoga o lou maliu mai, ma le gataaga o le lalolagi? Ona tali atu ai lea o Iesu, ua faapea atu ia te i latou, Ia outou, ne‘i faaseseina outou e se tasi. Auā e toatele e o mai i lo‘u igoa, ua faapea ane, O a‘u nei o le Keriso; latou te faaseseina foi tagata e toatele. E faalogo outou i taua ma tala o taua; ia outou, ne‘i tou atuatuvale; auā e ao ona taunuu o nei mea uma, a e lei oo i le gataaga. Auā e sii le taua e le tasi nuu i le tasi nuu, ma le tasi malo i le tasi malo; ona oo mai ai lea o oge, ma faamai, ma mafuie i lea mea ma lea mea. O na mea uma o le amataga ia o puapuaga.

Ona latou tuuina atu ai lea o outou i le puapuaga, ma latou fasiotia outou, e inosia foi outou e nuu uma ona o lo‘u igoa. O ona po ia e tausuai ai tagata e toatele, e faalata le tasi i le tasi, ma feitagai i latou. E tutū mai foi perofeta pepelo e toatele, latou te faasese foi i tagata e toatele. E maalili foi loto o tagata e toatele, ona ua tupu tele o le amio leaga. A o lē tumau seia oo i le gataaga, e faaolaina lea. E tala‘iina atu foi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.

Pe a iloa foi e outou le mea e inosia e faatafunaina a‘i, na fai mai ai e le perofeta o Tanielu, ua tu i le mea paia, (ina mafaufau ia o lē faitau;) o e o i Iutaia i ia ona po, ia latou sosola i mauga; o le ua i luga o le fale, aua ne‘i alu ifo ia e ave se mea ai lona fale; o le ua i le vao foi, aua ne‘i foi atu e ave ona ofu. Oi talofa foi i fafine totō, ma ē failele i ia ona po. A ia outou tatalo ina ne‘i outou sosola i le tausaga maalili, po o le sapati. Auā o ia ona po e oo ai le puapuaga tele, e leai sona tusa talu le amataga o le lalolagi, ua oo lava i ona po nei; e le toe faapea foi amuli. A le faapuupuuina foi ia aso, e le faaolaina se tasi; a e faapuupuuina ia aso ona o e ua filifilia.

Afai e fai ane se tasi ia te outou i ia ona po, Faauta, o iinei le Keriso, po o iila; aua tou te faalogo i ai. Auā e tutū mai Keriso pepelo, ma perofeta pepelo, latou te faia foi faailoga tetele ma vavega, ina ia faasese ai i e ua filifilia lava, pe afai e mafai ai. Faauta, ua ou muai ta‘uina atu ai ia te outou. O lea, afai latou te fai mai ai ia te outou, Faauta, o i le vao ia; aua tou te o atu i ai; faauta, o i se afeafe ia; aua tou te faalogo i ai. Auā e pei ona emo mai o le uila i sasae, ma malamalama atu i sisifo; e faapea foi ona sau o le Atalii o le tagata. Auā o le mea ua i ai le tagata oti, e aofaga i ai aeto.

A mavae atu le puapuaga o ia ona aso, ona faapogisaina loa lea o le la, e le susulu mai foi le masina, e pauu foi fetu mai le lagi, e luluina foi ‘au a le lagi. Ona iloa ai lea i le lagi o le faailoga o le Atalii o le tagata; ona taufaitagitu‘i ai lea o itu aiga uma o le lalolagi; latou te iloa atu foi le Atalii o le tagata ua sau i ao o le lagi ma le mana ma le mamalu tele. E aauina atu foi e ia o ana agelu ma le leo tele o le pu, latou te faapotopoto foi i e ua filifilia e ia mai matāmatagi e fa, e amata i le tasi tulu‘iga o le lagi, e oo i le tasi tulu‘iga.

Ia outou mataulia le faataoto i le mati; pe a faatoa tutupu ona tatupu, ma matala mai ona lau, tou te iloa ai ua latalata le tausaga vevela. E faapea foi outou, pe a outou iloa ia mea uma, tou te iloa ai, ua latalata ia, ua i faitotoa lava. E moni, ou te fai atu ia te outou, E le mavae atu lava lenei tupulaga, seia oo mai nei mea uma. E mavae atu le lagi ma le lalolagi, a o a‘u upu e le mavae atu lava ia. A o lea aso ma lea itu aso e le iloa e se tasi, e le iloa lava e agelu i le lagi, ua na o lo‘u Tamā lava. A e pei o ona po o Noa, e faapea foi pe a sau le Atalii o le tagata. Auā e pei ona faia i ona po a o lei oo le lolo, ua latou aai ma inu, ua latou fai avā foi ma faaavaga, ua oo lava i le aso na ulu atu ai Noa i le vaa, na le iloa foi e i latou ina seia oo le lolo, ma aveesea i latou uma; e faapea foi pe a sau le Atalii o le tagata.

O ia ona po e i ai i le vao o tagata e toalua, e avea le tasi, a e tuua le tasi. E olo faatasi fafine e toalua i le mea e olo a‘i saito, e avea le tasi, a e tuua le tasi. O lea, ia outou mataala ai; auā tou te le iloa po o le fea itu aso e sau ai lo outou Alii. Ia outou iloa lenei mea, ana iloa e le matai o le aiga po o le fea itu po e sau ai le gaoi, po ua na leoleoina, a e le tuua e ia lona fale ia elia. O le mea lea ia outou nofo sauni ai; auā o le itu aso tou te le manatunatu ai e sau ai le Atalii o le tagata.

O ai foi le auauna faamaoni ma le mafaufau, ua tofia e lona alii e pule i ana auauna, ia avatu a latou mea e ‘ai i ona itu aso? Amuia lea auauna, pe a sau lona alii e maua o ia o loo faapea ona fai. E moni, ou te fai atu ia te outou, e tofia o ia e pule i ana mea uma. A e afai e fai ifo lea auauna leaga i lona loto, E faatuai mai lo‘u alii; ona fasi ai lea o ia i ona uso a auauna, ua aai foi ma inu faatasi ma e inu ia onā; e sau lava le alii o lea auauna i le aso e le faatalitali atu ai o ia, o le itu aso foi e le iloa ai e ia, ona matuā faasala lea ia te ia, ma avatu ia te ia lona tofi faatasi ma tagata pepelo; e i ai le taufaitagiaue ma le lilivau o nifo.

O ia ona po e tusa ai le malo o le lagi ma taupou e toasefulu, o e na ave a latou lamepa, ma latou o atu e faafetaiai i le faatoafaiavā. Ua popoto le toalima o i latou, a e vālea le toalima. O e vālea ua ave a latou lamepa, a e lei avea ma ni suāuu. A o e popoto ua ave ni suāuu i a latou fagu faatasi ma a latou lamepa. Ua tuai mai le faatoafaiavā, ona taufaitulemomoe ai lea o i latou uma, ua momoe lava. A ua oo i le tulua o po, ona sau ai lea o lē alaga, Faauta, ua sau le faatoafaiavā; ina o ia outou e faafetaiai ia te ia. Ona tutū ai lea o ia taupou uma lava, ma teuteu a latou lamepa. Ona fai atu ai lea o e vālea i e popoto, Au mai ni a outou suāuu mā matou; auā o le a mamate a matou lamepa. A ua tali mai o e popoto, ua faapea mai, Ne‘i le lava ia i matou ma outou; a e lelei ona outou o i e faatau ma faatau mai ai ni a outou. Ua latou o e faatau, ona sau ai lea o le faatoafaiavā; o e ua saunia foi ua latou ulufale atu faatasi ma ia i le tausamaaga, ona pupuni ai lea o le faitotoa. E mulimuli ane, ona o mai ai lea o isi taupou, ua faapea mai, Le Alii e, le alii e, ia e tatala atu le puipui mo i matou. A ua tali atu o ia, ua faapea atu, E moni, ou te fai atu ia te outou, ou te le iloa outou. O lea, ia outou mataala ai, auā tou te le iloa le aso po o le itu aso e sau ai le Atalii o le tagata.

Pe a sau le Atalii o le tagata i lona mamalu, ma le au agelu paia uma faatasi ma ia, ona tietie ai lea o ia i lona nofoālii mamalu; e faapotopotoina foi i ona luma o nuu uma lava; ona tuueseeseina lea o i latou e ia, e pei o le leoleo mamoe ona tuueseeseina o mamoe ma ‘oti; ona tuu ai lea e ia o mamoe i lona itu taumatau, a o ‘oti i lona itu tauagavale.

Ona fai atu ai lea o le Tupu i e o i lona itu taumatau, O mai ia, o outou ua faamanuiaina e lo‘u Tamā, ia fai mo outou tofi le malo ua saunia mo outou a o lei faavaeina le lalolagi; auā na ou fia ‘ai, ona outou avane ai lea ni mea ou te ‘ai ai; na ou fia inu, ona outou avane ai lea ni vai ou te inu ai; sa fai a‘u ma tagata ese, ona outou talia lea o a‘u; na ou le lavalavā, ona outou faaofuina lea o a‘u; na ou ma‘i, ona outou asiasia mai lea o a‘u; na ou i le fale puipui, ona outou o ane ai lea ia te au. Ona tali mai ai lea ia te ia o e amiotonu, e faapea mai, Le Alii e, o anafea na matou iloa ai oe ua fia ‘ai, ma matou fagaina oe? po o fia inu, ma matou avane e te inu ai? O anafea foi na matou iloa ai oe o le tagata ese, ma matou talia oe? po o le le lavalavā, ma matou faaofuina oe? O anafea foi na matou iloa ai oe ua ma‘i, po o i le fale puipui, ma matou o atu ai ia te oe? Ona tali atu ai lea o le Tupu, e faapea atu ia te i latou, E moni, ou te fai atu ia te outou, auā na faia e outou i le tasi o e aupito itiiti o o‘u uso nei, o a‘u lea na outou faia i ai.

Ona fai atu foi lea o ia i e o i lona itu tauagavale, O outou ua faafanoina, o ese atu ia ia te au i le afi e faavavau, ua saunia mo le tiapolo ma ana agelu. Auā na ou fia ‘ai, a e tou te lei avane ni mea ou te ‘ai ai; na ou fia inu, a e tou te lei avane ni vai ou te inu ai; sa fai a‘u ma tagata ese, a e lei talia a‘u e outou; na ou le lavalavā, a e tou te lei faaofuina a‘u; na ou ma‘i, na a‘u i le fale puipui foi, a e tou te lei asiasia a‘u. Ona tali mai ai lea o i latou foi ia te ia, e faapea mai, Le Alii e, o anafea na matou iloa ai oe ua fia ‘ai, pe fia inu, po o se tagata ese, pe le lavalavā, po o ma‘i, po o i le fale puipui, ma matou lei auauna atu ia te oe? Ona tali atu ai lea o ia ia te i latou, e faapea atu, E moni, ou te fai atu ia te outou, auā na outou le faia i le tasi o e aupito itiiti o i latou nei, o a‘u lea ua outou le faia i ai. Ona o atu ai lea o i latou nā i le sala e faavavau; a o e amiotonu e o atu i le ola e faavavau.

Ona fetalai atu ai lea o Iesu ia te ia, O lea lava; ou te fai atu foi ia te outou, E mulimuli ane tou te iloa ai le Atalii o le tagata e nofo i le itu taumatau o le e ona le mana, e sau foi o ia i ao o le lagi.

Auā ai sē mā ia te au, ma a‘u upu i lenei tupulaga mulilulua ma le agasala, e mā foi le Atalii o le tagata ia te ia, pe a sau o ia faatasi ma ana agelu paia i le mamalu o lona Tamā.

Ua fetalai ane foi o ia ia te i latou, E moni, ou te fai atu ia te outou, o loo tutū mai nisi iinei, e le oo ia te i latou le oti, seia latou vaaia le malo o le Atua ona oo mai ma le mana.

Se‘i e ta‘u mai ia te i matou, pe fai afea ia mea? pe se a foi le faailoga pe a lata ona taunuu o ia mea uma? Ona tali atu lea o Iesu ia te i latou, ua faapea atu, Ia outou, ne‘i faaseseina outou e se tasi; auā e toatele e o mai i lo‘u nei igoa, ma faapea ane, O a‘u o ia, latou te faaseseina foi tagata e toatele. Pe a tou faalogo i taua ma tala o taua, aua tou te atuatuvale; auā e tupu lava ia mea; a e lei oo i le gataaga. Auā e sii le taua e le tasi nuu i le tasi nuu, o le tasi malo foi i le tasi malo; e i ai foi mafuie i lea mea ma lea mea, e i ai foi oge ma fouvale; o amataga ia o puapuaga.

Ia outou ia te outou; auā e tuuina atu outou e i latou i fono, ma sasaina outou i sunako; e tutū foi outou i luma o alii ma tupu ona o a‘u, e fai ma molimau ia te i latou. Ia muai tala‘iina foi le tala lelei i nuu uma lava e ao ai. Pe a latou ta‘ita‘iina ma tuuina atu outou, aua ne‘i muai manatu i sa outou e fai atu ai, aua foi le lua‘i fatufatua‘i; a o se mea e foaiina ia te outou i lena itu aso, o lea tou te fai atu ai; auā e le o outou e fai atu ai, a o le Agaga Paia. E tuuina atu foi le uso e le uso ia oti, e tuuina atu foi e le tamā lona atalii, e tutū atu foi le fanau i o latou mātua, ina ia fasiotia i latou. E inosia foi outou e tagata uma ona o lo‘u igoa; a o lē tumau seia oo i le iuga, e faaolaina lea.

Pe a outou iloa le mea e inosia e faatafunaina a‘i, ua fai mai ai e Tanielu le perofeta, ua tu i le mea e le tatau ai, (o lē faitau ia mafaufau ia;) o e o i Iutaia i ia ona po, ia latou sosola i mauga; o le ua i luga o le fale, aua ne‘i alu ifo ia i le fale, aua foi ne‘i ulu ai e ave se mea ai lona fale; o le ua le vao foi, aua ne‘i toe foi o ia e ave lona ofu. Oi talofa foi i fafine totō, ma ē failele i na ona aso! A ia outou tatalo ina ne‘i sosola outou i le tausaga maalili; auā o ia ona aso e i ai le puapuaga, e leai sona tusa talu lava le amataga o mea na faia e le Atua, ua oo mai i ona po nei, e le toe faapea foi amuli. Afai foi e le faapuupuuina ia aso e le Alii, e leai se tagata e faaolaina; a e peitai ona o le au filifilia ua filifilia e ia ua ia faapuupuuina ai ia aso.

Afai foi e foi ane se tasi ia te outou i ia ona po, Faauta, o iinei le Keriso; pe faapea, Faauta, o iilā; aua ne‘i faalogo i ai. Auā e tutū mai Keriso pepelo, ma perofeta pepelo, ma latou faia faailoga ma vavega, ina ia faasese a‘i e ua filifilia lava, pe afai e mafai ai. Ia outou; faauta, ua ou muai ta‘uina atu ia te outou ia mea uma.

O aso foi ia pe a mavae atu lena puapuaga, e faapogisaina ai le la, e le susulu mai foi le masina, e pauu mai fetu o le lagi, e luluina foi ‘au a le lagi. Ona iloa atu lea e i latou o le Atalii o le tagata ua sau i ao ma le mana tele ma le mamalu. Ona aauina mai lea e ia o ana agelu, latou te faapotopotoina e ua filifilia e ia mai matāmatagi e fa; e amata i le tulu‘iga o le lalolagi e oo atu i le tulu‘iga o le lagi.

Ia outou mātau i le faataoto i le mati; pe a faatoa tutupu ona tatupu, ma matala mai ona lau, ona outou iloa ai lea ua latalata mai le tausaga vevela. E faapea foi outou, pe a iloa ia mea ua tutupu mai, ia outou iloa ua latalata mai ia, ua i faitotoa lava. E moni, ou te fai atu ia te outou, E le mavae lenei tupulaga, seia taunuu ia mea uma. E mavae atu le lagi ma le lalolagi; a e peitai a‘u upu, e le mavae lava ia. A o lea aso ma lea itu aso e le iloa e se tasi, e le iloa lava e agelu i le lagi, po o le Atalii; ua na o le Tamā lava. Ia outou, ina mataala ia ma tatalo, auā tou te le iloa pe oo mai afea ia aso. Faapei o se tagata na alu malaga, na ia tuua lona fale ma avane le pule i ana auauna, ua taitoatasi foi ma lana lava galuega, ma ua fai atu i le leoleo faitotoa ina ia mataala o ia. O lea, ia mataala ai outou; auā tou te le iloa po o afea e sau ai le Alii o le aiga, po o le afiafi, po o le tautuluaga o le po, po o le vivini o moa, po o le taeao; ne‘i faafuasei ona sau, e maua mai outou o momoe. O le mea ou te fai atu ia te outou, ou te fai atu ai i tagata uma, Ina mataala ia.

Ona fetalai atu lea o Iesu, O a‘u lava lea; tou te iloa foi le Atalii o le tagata e nofo i le itu taumatau o Le e ona le mana, e sau foi o ia i ao o le lagi.

Auā ai se mā ia te au ma a‘u upu, e mā foi ia te ia le Atalii o le tagata, pe a sau o ia i lona mamalu, ma lo le tamā, ma le au agelu paia. E moni, ou te fai atu ia te outou, o loo tutū mai nisi iinei, e le oo ia te i latou le oti, seia latou vaaia le malo o le Atua.

Ia fusia o outou sulugātiti, ma ia mumū a outou lamepa; o outou foi, ia outou faapei o tagata e faatali atu i lo latou alii, seia foi mai o ia mai le tausamaaga; ia latou to loa mai le puipui ia te ia pe a sau, ma tu‘itu‘i mai. Amuia ia auauna e maua i latou e lo latou alii, o mataala pe a sau. E moni, ou te fai atu ia te outou, e fusi e ia ona ofu, ma fai atu ia te i latou ia taooto e aai, ma alu ane lava, ma auauna ia te i latou. Pe afai e sau ia i le leoleoga e lua o le po, pe sau i le leoleoga e tolu, a maua o i latou o faapea, amuia ia auauna. A ia outou iloa lenei mea, ana iloa e le matai o le aiga le itu po e sau ai le gaoi, po ua na leoleoina, a e le tuua e ia lona fale ia elia. O lenei, ia outou nofo sauni; auā o le itu aso tou te le manatunatu ai, e sau ai le Atalii o le tagata.

Amuia lea auauna, pe a sau lona alii e maua ia o loo faapea ona fai. E moni, ou te fai atu ia te outou, na te tofia o ia e pule i ana mea uma. A e afai e fai ifo lea auauna i lona loto. E faatuai mai lo‘u alii; ona fasi ai lea o ia i auauna tane ma auauna fafine, e ‘ai foi, ma inu, ma onā. E sau lava le alii o lea auauna i le aso e le faatalitali atu ai o ia, o le itu aso foi e le iloa ai e ia; ona matuā faasala lea ia te ia, ma avatu lona tofi faatasi ma e le faalogo. O lea auauna foi ua na iloa le finagalo o lona alii, a e lei sauni lava ia, e lei faia foi mea e tatau ma lona finagalo, e tele ona sasaina.

Ua fetalai atu foi o ia i le motu o tagata, Pe a outou iloa le ao o loo alu ae i sisifo, ona outou fai ane loa lea, Anei e ua; ona taunuu foi lea. A agi mai foi le toga, ua outou fai ane. Anei e la; ona taunuu foi lea. O outou tagata pepelo, ua outou iloa ona mātauina le amio a le lagi ma le lalolagi; se a foi le mea tou te le mātauina ai le uiga o lenei tausaga?

Ua fetalai atu ia i le au soo, E oo mai lava ona po tou te mananao tele ai ia iloa se aso e tasi o le Atalii o le tagata, a e le iloa. A fai mai tagata ia te outou, Faauta o iinei; pe faapea, Faauta o iila; aua tou te o i ai, pe mulimuli atu i ai. Auā e pei ona emo mai o le uila mai le tasi itu lagi, e malamalama atu i le tasi ita lagi; e faapea foi le Atalii o le tagata i lona aso.

A e tatau ona muai tiga o ia i mea e tele, ma lafoaiina e lenei tupulaga. Pei ona faia foi i ona aso o Noa, e faapea lava ona fai i ona aso o le Atalii o le tagata. Na aai i latou ma inu, na latou fai avā foi ma latou faaavaga, ua oo lava i le aso na ulu ai Noa i le vaa, ona oo mai ai lea o le lolo, ua fano ai i latou uma. E pei ona faia foi i ona aso o Lota; ua latou aai, ua inu, ua faatau, ua avane e faatau, ua totō mea, ma fai fale; a o lea lava aso na alu ese ai Lota i Sotoma, ua to faaua mai le afi ma le teio mai le lagi, ua fano ai i latou uma. E faapea lava i le aso e faaalia mai ai le Atalii o le tagata.

O le ua i luga o le fale i lea aso, ma ana mea ua i le fale, aua le alu ifo ia e ave; e faapea foi le ua i le vao, aua le toe foi mai o ia. Ia outou manatua le avā a Lota. O sē saili ia saogalemu lona ola, e māumau ai ia te ia; a o sē faamāumau ai, e faasaoina e ia.

Ou te fai atu ia te outou, O lea lava po, e i le moega e tasi tagata e toalua; e avea le tasi, a e tuua le tasi. E olo faatasi fafine e toalua; e avea le tasi, a e tuua le ta i. E i le vao tagata e toalua; e avea le tasi, a e tuua le tasi. Ua latou fai mai ia te ia, ua faapea mai. Le Alii e, po o fea e fai ai? Ua fetalai atu ia ia te i latou, O le mea o i ai le tino, e aofaga i ai aeto.

E ui lava ina tuai mai le Atua i e na ia filifilia, o loo alalaga i latou ia te ia i le ao ma le po, pe le faamasino ea o ia i a latou mea? Ou te fai atu ia te outou, e vave ona faamasino e ia o a latou mea. Peitai a sau le Atalii o le tagata, e iloga ea e maua e ia le faatuatua i le lalolagi.

Ona fetalai atu lea o ia ia te i latou, E sii le taua e le tasi nuu i le tasi nuu ma le tasi malo i le tasi malo. E i ai mafuie tetele i lea mea ma lea mea, o oge foi, ma faamai; ma faaiteite ma faailoga tetele mai le lagi.

A o lei oo nei mea, latou te pupue ma faasaua ia te outou, e tuuina atu ia te outou i sunako ma fale puipui, latou te ta‘ita‘iina atu outou i tupu ma alii ona o lo‘u igoa. E oo ia mea ia te outou e fai ma molimau. O lenei, ia tuu i o outou loto, tou te le muai mafaufau i se upu tou te tali atu ai. Auā ou te avatu mo outou le upu ma le poto, e leai so latou o e finau mai ia te outou na te mafaia ona tali mai, pe tetee mai ia te outou. E tuuina atu foi outou e mātua, ma uso, ma aiga, ma uo; o isi foi o outou e fasiotia e i latou. E inosia foi outou e tagata uma ona o lo‘u igoa. A e leai lava so outou lauulu e tasi e paū. O lo outou onosai ia maua ai lo outou ola.

A iloa e outou ua siosiomia Ierusalema i ‘au o le taua, ia outou iloa i lea aso ua latalata ona faatafunaina. O lea aso, o e ua i Iutaia ia latou sosola i mauga; o e ua i totonu o lea aai, ia latou o ese; o e ua i le vao foi, aua ne‘i latou o atu i totonu o le aai. Auā o ona aso ia e faasalaina ai, ina ia taunuu mai o mea uma ua tusia. Oi talofa i fafine ua totō, atoa foi ma ē failele i ia lava aso; auā e oo le puapuaga tele i le nuu, ma le toasa i le nuu nei. E oti i latou i le mata o le pelu; e tāfea foi i nuu uma; e solia foi Ierusalema e nuu ese, seia faaiuina tausaga o nuu ese.

E i ai foi faailoga i le la, ma le masina, ma fetu; o i le lalolagi foi le atuatuvale o nuu i le fememeai; e ū foi le sami ma le sousou; e oti foi tagata i le matatau ma le faatalitali i mea e oo mai i le lalolagi; auā e luluina ‘au a le lagi. Ona iloa atu ai lea e i latou o le Atalii o le tagata e sau i le ao, ma le mana ma le mamalu tele. A afua ona faia o ia mea, ia tepa ae outou, ma ia ea i luga o outou ulu; auā e latalata ina faaolaina outou.

Ua fetalai atu ia ia te i latou i le faataoto; Ina vaai ia i le mati atoa ma laau uma; pe a faatoa matala mai lau, ua outou vaai, ona outou iloa ai lea ua latalata le tausaga vevela. Ia faapea foi outou, pe a iloa e outou ia mea ua faia, ia outou iloa ua latalata le malo o le Atua. E moni, ou te fai atu ia te outou, E le mavae atu lenei tupulaga, seia taunuu mea uma. E mavae atu lava le lagi atoa ma le lalolagi; peitai o a‘u upu, e le mavae atu lava ia. Ia outou, ne‘i faamamafaina o outou loto, ma le faaniniva, ma le onā, ma le popole i mea a le olaga nei, ne‘i faafuasei mai lea aso ia te outou. Auā e pei o se mailei ona oo mai ai i e nonofo uma lava i le fogāeleele uma. O lea ia outou mataala ai ma tatalo e le aunoa, ina ia ta‘uaogaina outou e sao mai ia mea uma ua tāli oo mai, ma ia tutū i luma o le Atalii o le tagata.

E moni, e moni, ou te fai atu ia te outou, e oo i le aso, ua oo nei foi i ai, e faalogo mai ai e ua oti i le leo o le Atalii o le Atua; o e faalogo ai foi, e ola ai i latou. Aua faapei o le Tamā e i totonu ia te ia lava le ola: e faapea foi ona foai mai e ia i le Atalii, ia i totonu ia te ia lava le ola. Ua foai mai foi ia te ia le pule, ina ia fai e ia le faamasinoga, auā o ia o le Atalii o le tagata. Aua tou te ofo i lenei mea, auā e oo mai le aso e faalogo ai i lona leo o i latou uma ua i tuugamau, ma latou o mai ai; o e na amio lelei, e toe tutū i le ola; a o e na amio leaga, e toe tutū i le faasala.

E tele mea e nonofo ai i le maota o lo‘u Tamā; ana leai, po ua ou fai atu ia te outou; ou te alu e sauni se mea e nonofo ai outou. Afai foi ou te alu ma sauni se mea e nonofo ai outou, ou te toe sau, ou te talia foi outou ia faatasi ma a‘u; ina ia i ai outou i le mea ou te i ai a‘u.

Ua fetalai atu ia i ia mea, ona siitia lea o ia, o latou o vaavaai atu; ua avea foi o ia i le ao nai o latou luma. Ua latou tulimatai ae i le lagi, a o afio ae o ia, faauta foi, o tagata e toalua ua tutū mai ia te i latou ma ofu sisina. Ua la fai mai, O outou tagata Kalilaia e, se a le mea tou te tutū ai, ma vaavaai i le lagi? O Iesu lena, ua aveina ae nai ia te outou i le lagi, e faapea ona toe afio mai o ia, pei o lona afio atu i le lagi na outou vaavaai i ai.

Auā o lo‘u manatu e le tatau ona faatusaina le tiga i nei ona po ma le manuia atali e faaalia mai ia te i tatou. Auā o loo faatalitali mea uma na faia ma le naunau i le faaalia mai o atalii o le Atua.

Auā ua tusia, Ua fetalai mai le Alii, Ou te ola a‘u, e tootuli mai ia te au o tulivae uma lava, e ta‘uta‘u mai foi o laulaufaiva uma lava i le Atua.

E le pine foi ona solia o Satani i lalo o outou vae e le Atua e ona le manuia. Ia ia te outou le alofa tunoa o lo tatou Alii o Iesu Keriso. Amene.

A e afai e ati ae e se tasi i lenei faavae o auro, o ario, o maa tāua; o laau, o vaofalī, po o tagutugutu o saito; e faaalia galuega a tagata taitoatasi; e faailoa foi e le aso, auā e faaalia i le afi; e tofotofoina foi galuega a tagata taitoatasi i le afi po ua faapefea. Afai e tumau le galuega a se tasi na ia ati ae, e maua e ia le taui. Afai e faamuina le galuega a se tasi, e māumau ana mea; peitai ane e sao o ia, a e pei o se na ui mai i le afi.

O lenei, aua tou te faamasino i se tasi mea a o le oo mai ona po, seia afio mai le Alii, o le na te faamalamalamaina mea lilo io i le pouliuli, ma faaalia filifiliga o loto; e i ai ona taitasi ma ta‘uleleia e le Atua.

tou te tuuina atu ai le ua faapea ia Satani, e fano ai le tino, ina ia sao le agaga i le aso o le Alii o Iesu. E le tusa lo outou mitamita. Tou te le iloa ea o se mea faafefete itiiti, e faafefeteina ai le palugāfalaoa uma lava?

Le au uso e, o la‘u upu lenei, e le mafaia ona avea o le malo o le Atua ma tofi o i latou ua i ai tino aano ma toto; e le fai foi le ola pea ma tofi o le iu vale. Faauta mai, ou te ta‘u atu ia te outou le mea lilo; e le momoe i tatou uma, a e liua i tatou uma, e faafuasei lava, o le emo o le mata, pe a ilia le pu faauma; auā e ilia lava, e toe tutū mai ai e ua oti ma le ola pea, e liua foi i tatou.

ina ia tootuli o tulivae uma lava i le suafa o Iesu, o e o i le lagi, ma e o i le lalolagi, ma e o i lalo o le lalolagi; ma ia ta‘uta‘u atu e laulaufaiva uma lava o Iesu Keriso o le Alii lava ia, ia iu ina viia ai le Atua le Tamā.

Pe a faaali mai Keriso lo tatou ola, ona iloa ai lea o outou faatasi ma ia i le manuia.

ma ia faatali atu i lona Alo mai le lagi, o le na toe faatuina mai e ia nai e ua oti, o Iesu lea, o lē laveai mai ia i tatou ai le toasa atali.

Ou te loto ina ia outou iloa, le au uso e, i le mataupu i e o momoe, ina ne‘i outou faanoanoa, pei o isi e leai so latou faamoemoe. Auā afai tatou te talitonu, ua maliu Iesu ma toe tu mai, e faapea foi ona aumaia e le Atua faatasi ma ia e o momoe ona o Iesu. Matou te fai atu foi lenei mea ia te outou i le afioga a le Alii, o i tatou o e ola ma totoe pe a afio mai le Alii, tatou te le muamua i e o momoe.

Auā e afio ifo mai le lagi le Alii lava, ma le alaga, ma le leo o le agelu sili, ma le pu a le Atua; e muamua foi ona toe tutū mai o e ua oti o ia Keriso; ona faafuasei lea ona aveina ae o i tatou o e ola ma totoe, faatasi ma i latou i ao, ina ia fetaiai ma le Alii i le va nimonimo; ona tatou faatasi pea lava lea ma le Alii.

A o aso ma tausaga, e le aoga ia te outou, le au uso e, ona ou tusi atu ai ia te outou. Auā ua outou iloa lelei lava, o le aso o le Alii e pei o le gaoi i le po, e faapea ona oo mai ai; auā pe a latou fai ane. O loo filemu, ua le afaina, ona oo lea ia te i latou o le fano faafuasei, faapei o le faatiga o le fafine to a fanau mai, latou te le sosola ai lava. A o outou, le au uso e, tou te le o i le pouliuli, ia maua mai ai outou e lena aso, pei o se gaoi.

Auā e lei tofia i tatou e le Atua i le toasa, a ia maua le ola ona o lo tatou Alii o Iesu Keriso, o le na maliu e sui a‘i tatou, ina ia tatou ola faatasi ma ia, pe tatou te mataala, pe tatou te momoe.

O lea matou te mitamita ai ia te outou o i matou nei lava, i ekalesia a le Atua, ona o lo outou onosai ma lo outou faatuatua, i ona po o sauaga uma ma puapuaga ua outou faatoatoa ai; o le faailoga lea o le faamasinoga tonu a le Atua, ina ia ta‘uaogaina outou i le malo o le Atua, o le mea lea e tigaina ai outou. Auā ua tonu i le Atua e taui atu le puapuaga i e ua faapuapuagaina ai outou; e ia te outou foi o e puapuagaina, o le mapusaga faatasi ma i matou, pe a faaalia le Alii o Iesu mai le lagi, faatasi ma agelu o lona malosi, i le afi mumū, na te taui ma sui i e ua le iloa le Atua, ma ua le anaana i le tala lelei a lo tatou Alii o Iesu Keriso; e faasalaina i latou lava i le fanoga e faavavau lava, ia te‘a ma le Alii ma le mamalu o lona malosi; pe a afio mai o ia ina ia viia i ona lava tagata paia, ma ia ofo ia te ia i lena aso ia te i latou uma o e faatuatua, auā na outou talitonu mai lava i la matou mau.

O lenei, matou te aioi atu ia te outou, le au uso e, i le mataupu i le afio mai o lo tatou Alii o Iesu Keriso, ma lo tatou faapotopotoina ia te ia; ina ne‘i vave luluina o outou loto, pe faaatuatuvaleina i se agaga, po o se upu, po o se tusi, peiseai nai ia i matou, peiseai ua oo mai le aso o Keriso. Aua ne‘i faasese se tasi ia te outou i se togafiti e tasi; auā e le oo mai lena aso, seia muai ona taunuu o le tete‘a ese, ma ia faaalia mai o le tagata o le agasala, o le tagata lea o le malaia, o lē tetee atu, ma faamaualugaina e ia ia te ia e sili i mea uma lava ua ta‘uatuaina, ma mea uma ua ifo i ai tagata, o lea ua tietie ai o ia i le malumalu o le Atua, peiseai o le Atua o ia, o loo faaali mai o ia, o le Atua lava o ia.

Tou te le manatu ea, na ou fai atu ia mea ia te outou, a o tatou i ai ma outou? O lenei foi, ua outou iloa le mea o loo faalavelave, ina ia faaalia mai o ia i ona lava aso. Auā o loo galue nei lava le mea lilo a le amio leaga, na ona seia aveeseina le o faalavelave. Ona faaalia mai ai lea o le ua amio leaga, e fano o ia i le Alii, i le mānava mai o lona fofoga, ma faaumatia i le faaali mai o lana afio; o lona sau foi e pei o le galuega a Satani, i le mana uma, ma faailoga, ma vavega pepelo, ma mea faasese uma o le amio leaga i e a fano; auā ua latou le talia le upu moni ma le fiafia i ai, ina ia faaolaina ai i latou. O le mea foi lea e auina atu ai e le Atua ia te i latou le galuega e faasese ai, ina ia latou talia le mea pepelo; ina ia faasalaina o i latou uma lava o e le talia le upu moni, a e fiafia i le amioleaga.

ia e taofi lenei poloaiga ma le le ponā, ma ia le mata‘uleagaina, seia oo atu i le faaali mai o lo tatou Alii o Iesu Keriso. E faailoa mai lea mea e ia i ona lava aso, o ia o le Alii e manuia mona ua toatasi, o le Tupu o tupu, ma le Alii o alii; o loo na o ia o lē soifua pea lava, o lē afio i le malamalama e le masao i ai se tasi; e lei vaaia o ia e se tasi tagata, e le mafai foi ona vaai i ai; ia ia te ia le viiga ma le malosi e faavavau. Amene.

A e ia e iloa e oe lenei mea, o ona aso e gata ai e oo mai ai aso faigata; auā e avea tagata ma e alolofa i latou ia i latou, o e mananao i tupe, o e loto vii, o e faamaualuga, o e upu leaga, o e le faalogo i mātua, o e le faafetai, o e amio leaga, o e le lotoaiga, o e tuumavaega, o e faatuaupua, o e le taofi manao o le tino, o e faasaua, o e le alolofa i tagata amio lelei, o e faalata, o e soona fai, o e ua faafefeteina, o e ua tele le manao i mea faafiafia a e leai se manao i le Atua; o e ua peiseai ua amio Atua, a o le mana ua i lea mea ua latou teena; ia e ‘alo ese lava i tagata faapena.

O lenei ou te matuā fai atu ia te oe i luma o le Atua ma le Alii o Iesu Keriso, o le na te faamasinoina o e ola atoa ma e ua oti, pe a oo i lona faaali mai ma lona malo; ia e tala‘i atu le upu, ia e faamalosi i ona aso e taugalemu ai, ma ona aso e le taugalemu ai, ia e faatonu atu, ia e aoai atu, ia e apoapoai atu ma le onosai uma atoa ma le a‘oa‘o atu. Auā e oo i ona po latou te le mafafai ai ona talia o le mataupu e ola ai, a e tusa ma o latou lava tu‘inanau, latou te faapotopoto ai a‘oa‘o mo i latou, ina ua feū o latou taliga; latou te liliu ese foi o latou taliga i le upu moni, a e liliu atu i tala o le vavau. A o oe, ia e faautauta i mea uma lava, ia e onosai i mea e tiga ai, ia e fai le galuega a lē folafola le tala lelei, ia e matuā faaiuina lau faiva.

O lenei, ua teuina mo a‘u le pale o le amiotonu, e foaiina mai ia te au i lea lava aso o le Alii le faamasino amiotonu; e le gata foi ia te au, a o i latou uma lava o e fiafia i lona faaali mai.

o faatalitali atu i le faatuatuaga e manuia ai, o le faaalia lea o le pupula o le Atua silisili, o lo tatou Faaola o Iesu Keriso lea;

I le ma lea, Le Alii e, na e faavaeina le lalolagi i le amataga, o lagi foi o galuega ia a ou aao; e faaumatia ia mea, a o oe e te tumau pea; e pala ia mea uma lava pei o se ofu, pei o se ie pulupulu e te taataaia, e liua foi ia; a o oe, e te le liliu lava, e leai foi se iuga i ou tausaga.

O le mea lea sa tatau ai ona famamāina o faatusa o mea o i le lagi i ia mea; a o mea faalelagi lava e faamamāina i taulaga e sili ona lelei i ia mea. Auā ua le ulu atu Keriso i le mea paia ua faia e lima, o le faatusa lea o le mea moni, a o le lagi lava, ina ia iloa ai nei o ia i luma o le Atua mo i tatou; a e le ina ia avatu soo o ia e ia ma taulaga, pei o le faitaulaga sili ona ulu atu i le mea paia i lea tausaga ma lea tausaga ma le toto ese; auā ana faapea po ua tatau ona tigaina faalasi o ia talu ona faavaeina o le lalolagi; a o lenei, ua tasi lava le faaalia mai o ia i le faaatoaga o tausaga, ina ia aveeseina le agasala, ina ua faia o ia e ia ma taulaga. Pei ona tofia foi mo tagata ia tasi lo latou oti, a e mulimuli ane o le faamasinoga; na faapea foi Keriso, ua tasi lava ona avatua o ia ma taulaga, ina ia aveina ai agasala a le toatele, e faaali foi o ia ia te i latou o e faatalitali atu ia te ia i lona foi faalua mai, e le ina ia aveina agasala, a ia latou ola ai.

aua le lafoaiina le faapotopotoina o i tatou, pei o le masani o isi, a ia fefaamafanafanai; ia atili ai foi ona faapea ina ua outou iloa o le aso o loo tāulata mai.

na maua mai e fafine o latou tagata oti ina ua toe tu mai; na faataugaina nisi, ua le talia e i latou le olataga, ina ia maua e i latou le toe tu mai e sili ona lelei;

Faauta mia ia; outou e tamaoaiga, ia outou fetagisi ma uio ona o puapuaga o le a oo mai ia te outou. Ua pala la outou oloa, ua atiatia o outou ofu i mogamoga; ua elea o outou auro ma ario; e fai foi ma molimau ia te outou o latou ele, e ‘aina ai o outou tino pei o se afi; ua outou faaputu mea i ona aso e gata ai.

O lenei, le au uso e, onosai ia seia oo i le afio mai o le Alii. Faauta, e faatali lē galue fanua i le fua aoga o le eleele, e faatalitali i ai, seia maua le uaga muamua ma lē mulimuli; ia onosai foi outou, ia faatumauina o outou loto, auā ua latalata le afio mai o le Alii.

ua muamua, ona iloa o lenei mea, e o mai i ona aso e gata ai o e tauemu, latou te savavali e tusa ma o latou lava tu‘inanau; e faapea mai foi i latou, O ifea o i ai le upu na folafolaina ai lona afio mai? auā talu ona momoe o le augātamā, ua tutumau pea o mea uma talu ona faatoa faia. Auā latou te mananao ia lilo lenei mea ia te i latou, sa i ai le lagi talu anamua, o le lalolagi foi na i le moana lea, ua faatumauina foi i le moana, ona o le afioga a le Atua, o lea mea foi sa faaumatia ai le lalolagi tuai ina ua lofia i le vai; a o le lagi nei ma le lalolagi ua tuu ona o lea lava afioga, ia taofia mo le afi i le aso e faamasino ai ma fano ai tagata faalematau.

A e aua ne‘i lilo ia te outou, le au pele, lenei mea e tasi, e tusa i luma o le Alii le aso e tasi ma tausaga e afe, o le afe foi o tausaga e tusa ma le aso e ta si. E le faatuai mai le Alii i le mea na folafolaina mai, faapei o le manatu a isi tagata i le faatuai; a e peitai ua onosai mai lava o ia ia i tatou, ona ua le finagalo ia fano se tasi, a ia oo uma lava i le salamo.

A e sau le aso o le Alii pei o se gaoi i le po, e mavaeeseina ai le lagi ma le gogolo tele, e te‘a eseese ai foi o mea na fai a‘i ina ua mu; o le lalolagi foi ma galuega o i ai e susunuina lava. O lenei, o le a te‘a eseese nei mea uma, pe faapefea la outou amio e tatau ai i le amio lelei ma le amio Atua; o loo faatalitali ma naunau atu ia aulia mai le aso o le Atua, e te‘a eseese ai le lagi ina ua mu, e liu suāvai foi o mea na fai a‘i ina ua mu? A e faatalitali i tatou i le lagi fou ma le lalolagi fou, pei o lana na folafola mai, e mau ai le amiotonu.

O le a mavae atu foi le lalolagi, atoa ma lona tu‘inanau, a o lē fai le finagalo o le Atua, e tumau lea e faavavau. Tama iti e, o ona aso nei e gata ai, faapei ona outou faalogo ai foi o loo sau le anetikeriso, o loo i ai nei foi anetikeriso e toatele; o le mea lea ua tatou iloa ai o ona aso nei e gata ai. Na latou o ese ia i tatou, a e lei ni o tatou i latou; auā pe afai ni o tatou i latou, po ua latou tumau ma i tatou; a ua o ese i latou ina ia faaalia ai e le ni o tatou i latou uma.

Leau pele e, aua tou te faalogo i agaga uma lava, a ia outou tofotofo i agaga pe mai le Atua i latou; auā e toatele perofeta pepelo ua o atu i le lalolagi. O le mea lenei tou te iloa ai le Agaga o le Atua, O agaga uma o e ta‘utino, ua maliu mai Iesu Keriso i le tino, mai le Atua lava i latou. A o agaga uma o e le ta‘utino, ua maliu mai Iesu Keriso i le tino, e le mai le Atua i latou; o lo le anetikeriso lava lenei ua outou faalogo ai o le a sau, o loo i ai nei i le lalolagi. O outou, le fanau e, mai le Atua lava outou, ua outou manumalo foi ia te i latou, auā e sili o ia ua ia te outou, i le ua i le lalolagi. O i latou, e o le lalolagi lava i latou, o le mea lea o loo tautalatala ai i latou i la le lalolagi; e faalogo atu foi le lalolagi ia te i latou. O i matou, mai le Atua lava i matou, o le ua iloa le Atua e faalogo mai o ia ia te i matou; o le le mai le Atua e le faalogo mai o ia ia te i matou; o le mea lea ua tatou iloa ai le agaga moni ma le agaga sese.

Auā e toatele o e faasese ua o atu i le lalolagi, o e le ta‘u tino ua maliu mai Iesu Keriso i le tino; o le faasese lava lea ma le anetikeriso. Ia outou ia te outou, ne‘i maumau a matou galuega na matou faia, a ia maua le taui atoa. O i latou uma lava o e tuumavaega, a e le tumau i le mataupu ia Keriso, e le o ia te i latou le Atua; o lē tumau i le mataupu ia Keriso, e ia te ia lava le Tamā atoa ma le Alo. Pe a alu atu ia te outou se tasi a e le molia lenei lava mataupu, aua tou te talia o ia i o outou fale, aua foi tou te ofo alofa ia te ia; auā o sē ofo alofa atu ia te ia, e faatasi ai o ia ma ana galuega leaga.

Na valoia foi i latou e Enoka, o le toafitu lea talu mai ia Atamu, ua faapea ane, Faauta, e afio mai le Alii ma ona au paia e manomano, e faamasino ai i tagata uma, ma faasalaina ai e ua amio faalematau uma lava o ia i latou, ona o a latou galuega faalematau uma ua latou faia ma le faalematau, ona o a latou upu faatautala foi na fai ia te ia e tagata agasala ua faalematau.

O le faaaliga a Iesu Keriso, na tuuina atu e le Atua ia te ia ina ia faaali mai i ana auauna o mea e tusa ona vave oo mai, ua auina mai foi e ia lana agelu e faailoa mai ai i lana auauna o Ioane,

Faauta, o loo afio mai o ia ma ao, e iloa atu foi o ia e mata o tagata uma, atoa ma e na tu‘ia o ia; e taufaitagitu‘i foi itu aiga uma o le lalolagi ona o ia. E moni, Amene.

Ua e tausia le upu o lo‘u onosai, o lea foi ou te tausi ai ia te oe i le itu aso e tofotofoina ai, a oo mai i le lalolagi uma, e tofotofo ai i e o nonofo i le lalolagi. Faauta, ou te vave alu atu; ia e taofi mau i le mea ua ia te oe, ne‘i avea e se tasi lou pale. O lē manumalo, ou te faia lea ma pou tu i le malumalu o lo‘u Atua, e le toe ulufafo lava ia, ou te tusi foi i ai le suafa o lo‘u Atua, ma le igoa o le aai a lo‘u Atua, o Ierusalema fou lea e alu ifo nai le lagi mai lo‘u Atua, atoa foi ma lo‘u igoa fou.

Ua ou iloa au galuega, e te le maalili, e te le vevela foi; ou te loto ina ia e maalili, pe vevela; o lenei, ua e faaleogalua, e te le maalili, e te le vevela foi, o le mea lea ou te luai atu ai ia te oe i lo‘u gutu Auā ua e fai mai, Ou te se mauoa, ua faatamaoaigaina a‘u, ou te le mativa foi i se mea e tasi; a ua e le iloa o oe o le malaia, ma le pagatia, ma le mativa, ma le tauaso, ma le le lavalava; ou te fai atu ai ia te oe, ia e faatau atu ia te au le auro ua faamamāina i le afi, ina ia e tamaoaiga ai; ma ofu sisina ina ia e ofu ai, ina ne‘i iloa le mā o lou le lavalavā; ma le vaimata e nini a‘i ou mata, ina ia e pupula ai. Ou te aoai ma sasa ia i latou uma ou te alofa i ai; o lenei, ia e vilivilitai, ma ia e salamo.

Ua mavae atu ia mea, ona ou iloa atu lea, faauta, o le faitotoa ua avanoa i le lagi, o le uluai leo foi na ou faalogo ai e pei o le pu ona tautala mai ia te au, ua faapea mai, Ina sau ia i luga nei, ou te faaali atu ai ia te oe mea e tusa ona tutupu amuli.

Na ou iloa foi i le aao taumatau o lē tietie i le nofoālii, o le tusi ua tusia i totonu ma le tua, ua faamauina i faamaufaailoga e fitu. Na ou iloa foi le agelu malosi na tala‘i atu ma le leo tele, O ai ea e tatau ona fofola e ia o le tusi, ma tatala ona faamaufaailoga? A e leai se tasi i le lagi, po o le lalolagi, po o lalo o le lalolagi, na te mafaia ona fofolaina le tusi, pe vaai i ai. Ona ou tagi tele ai lea, ina ua le maua se tasi e tatau ai ona fofolaina e ia ma faitau le tusi, pe vaai i ai. Ona fai mai ai lea ia te au o le tasi o le au toeaina, Aua e te tagi; faauta, ua manumalo le Leona o le itu aiga o Iuta, o le Aa o Tavita, e fofola i le tusi, ma tatala i ona faamaufaailoga e fitu. Na a‘u iloa foi, faauta, ua tu mai i le va o le nofoālii ma mea ola e fa, e i ona tua foi le au toeaina, o le Tamai mamoe e peiseai na fasia, e fitu ona nifo ma ona mata e fitu, o Agaga ia e toafitu o le Atua ua aauina atu i le lalolagi uma. Ua alu atu ia, ma to mai le tusi mai le aao taumatau o lē tietie i le nofoālii. Ua to mai e ia le tusi, ona faapaū ai lea o mea ola e fa ma toeaina e toaluafulu ma le toafa i luma o le Tamai mamoe, ua tofu i latou ma le kitara, ma le ipu auro ua tumu i mea manogi e mu, o talosaga ia a le au paia; ua latou pepese foi i le pese fou, ua faapea atu, Ua tatau lava oe ina ia e tago i le tusi, ma tatala i ona faamaufaailoga; auā na fasia oe, ua e faatauina foi i matou i lou lava toto mo le Atua, mai itu aiga uma, ma gagana eseese, ma nuu, atoa ma atu nuu; ua faia foi e oe i matou ma tupu ma faitaulaga i lo matou Atua; e fai foi i matou ma tupu i le lalolagi.

Na a‘u iloa atu foi, ma ou faalogo i le leo o agelu e toatele, o e ua faataaliolio i le nofoālii, ma le leo o mea ola e fa atoa ma le au toeaina; o lo latou faitau aofai ua mano ni mano, ma afe ni afe, o loo faapea atu ma le leo tele, Ua tatau lava le Tamai mamoe na fasia ina ia tuuina atu ia te ia le mana, ma le oa, ma le poto, ma le malosi, ma le faaneeneega, ma le viiga, ma le faamanū. Na ou faalogo foi i mea uma na faia o i le lagi, ma le lalolagi, ma lalo ifo o le lalolagi, ma mea foi o i le sami, atoa ma mea uma o i ai i ia mea, o loo faapea atu, Ia ia te ia o lē tietie i le nofoālii atoa ma le Tamai mamoe le faamanū, ma le faaneeneega, ma le viiga, ma le malosi e faavavau faavavau lava. Ona fai atu lea o mea ola e fa, Amene; ona faapaū lea o toeaina e toaluafulu ma le toafa ma ifo atu i lē soifua e faavavau e faavavau lava.

Na a‘u iloa atu foi ua tatalaina e le Tamai mamoe le tasi o faamaufaailoga, ona ou faalogo ai lea i le tasi o mea ola e fa, ua leo i le faititili, ua faapea mai, Sau ia ina vaai. Ona ou vaai ai lea, faauta foi, o le solofanua sinasina, ua i ai le aufana i loo tietie ai; ua avatu foi ia te ia le palealii; ona alu atu lea o ia, o loo manumalo, o le a manumalo pea ia.

Ua tatalaina foi e ia o lona lua o faamaufaailoga, ona ou faalogo ai lea i lona lua o mea ola, o loo faapea mai, Sau ia ina vaai. Ona alu atu lea o le isi solofanua mūmū; ua avatu foi le pule i loo tietie ai na te aveeseina le filemu i le lalolagi, a e latou te fefasiai ai; ua avatu foi ia te ia le pelu tele.

Ua tatalaina foi e ia o lona tolu o faamaufaailoga, ona ou faalogo ai lea i lona tolu o mea ola, o loo faapea mai, Sau ia ina vaai. Ona ou vaai lea, faauta foi, o le solofanua uliuli; ua i le lima o loo tietie ai le fua faatautau. Na ou faalogo foi i le leo mai le va o mea ola e fa, ua faapea mai, O le tau o le koini o le saito o le tenari lea, o le tau o koini e tolu o le karite o le tenari foi lea; a e aua e te faaleaga i le suāuu ma le uaina.

Ua tatalaina foi e ia o lona fa o faamaufaailoga, ona ou faalogo ai lea i le leo o lona fa o mea ola, ua faapea mai, Sau ia ina vaai. Ona ou vaai lea, faauta, o le solofanua samasama, ma lē tietie ai, o lona igoa o le Oti, ua mulimuli atu foi Seoli ia te ia; ua avatu foi ia te i laua le pule e fasioti i lona fa o vaega o le lalolagi i le pelu, ma le oge, ma le oti, atoa ma manu feai o le vao.

Ua tatalaina foi e ia o lona lima o faamaufaailoga, ona ou iloa lea o i lalo ifo o le fata faitaulaga o agaga o e na fasiotia ona o le afioga a le Atua, ma le mau na latou taofi mau ai; ua latou alalaga foi ma le leo tele, ua faapea atu, Le Alii e, le paia ma le faamaoni e te le faamasino ea ma taui i lo matou toto i e nonofo i le lalolagi seia afea? Ua foaiina atu ia te i latou taitoatasi ofu sisina; ua fai atu foi ia te i latou ia latou faatalitali lemu seia toe itiiti, seia atoatoa mai ai o latou uso a auauna atoa ma o latou uso, o le a fasiotia pei o i latou lava.

Na a‘u iloa atu foi ua tatalaina e ia o lona ono o faamaufaailoga, faauta foi, o le mafuie tele, o le la foi ua liua ua uliuli e pei o le ie fulufulu talatala, o le masina foi ua liua e pei o le toto, o fetu foi o le lagi ua pauu i le lalolagi, e pei o le mati ona toulu o ona fua moto pe a luluina e le matagi tetele; ua mavae atu foi le lagi pei o se tusi ua taaia, o mauga ma motu uma foi ua aveeseina i mea sa i ai; o tupu foi o le lalolagi, ma alii sili, ma e ua tamaoaiga, ma ta‘ita‘i o ‘au e taitoaafe, ma e ua malolosi, ma pologa uma, atoa ma tama a le eleele uma ua latou lalafi i ana ma papa o mauga; ua latou fai atu foi i mauga ma papa, Mafuli mai ia ia te i matou, ma tanumai i matou ai le silafaga a lē tietie i le nofoālii, ma le toasa o le Tamai mamoe; auā ua oo mai le aso tele o lona toasa, o ai foi se na te mafaia ona tu atu?

Ua mavae atu ia mea, ona a‘u iloa ai lea o agelu e toafa o tutū mai i itu e fa o le lalolagi, o taofi i matagi e fa o le lalolagi, ina ia le agi atu le matagi i le fanua, po o le sami, po o se laau e tasi. Ua a‘u iloa foi le tasi agelu ua ui ae i le mea e alu ae ai le la, ua ia te ia le faamaufaailoga a le Atua soifua; ua alaga ia ma le leo tele i agelu e toafa na tuuina atu ia i latou ia faaleaga i le fanua ma le sami, ua faapea atu, Aua tou te faaleaga i le fanua, po o le sami, po o laau, seia matou faamaufaailogaina auauna a lo tatou Atua i o latou muaulu.

Na ou faalogo foi i le faitau aofai o e na faamaufaailogaina; e selau afe ma afe e fagafulu ma afe e fa o e ua faamaufaailogaina i itu aiga uma o le fanauga a Isaraelu; e sefulu afe ma afe e lua o e ua faamaufaailogaina i le itu aiga o Iuta; e sefulu afe ma afe e lua o e ua faamaufaailogaina i le itu aiga o Reupena; e sefulu afe ma afe e lua o e ua faamaufaailogaina i le itu aiga o Kato; e sefulu afe ma afe e lua o e ua faamaufaailogaina i le itu aiga o Asera; e sefulu afe ma afe e lua o e ua faamaufaailogaina i le itu aiga o Nafatali; e sefulu afe ma afe e lua o e ua faamaufaailogaina i le itu aiga o Manase; e sefulu afe ma afe e lua o e ua faamaufaailogaina i le itu aiga o Simeona; e sefulu afe ma afe e lua o e ua faamaufaailogaina i le itu aiga o Levi; e sefulu afe ma afe e lua o e ua faamaufaailogaina i le itu aiga o Isakara; e sefulu afe ma afe e lua o e ua faamaufaailogaina i le itu aiga o Sepulona; e sefulu afe ma afe e lua o e ua faamaufaailogaina i le itu aiga i Iosefa; e sefulu afe ma afe e lua o e ua faamaufaailogaina i le itu aiga o Peniamina.

Ua mavae atu ia mea, ona ou iloa lea, faauta foi i le motu o tagata e toatele mai atu nuu uma, ma aiga, ma nuu, ma gagana eseese, e le ma faitaulia e se tasi, o loo tutū i latou i luma o le nofoālii ma luma o le Tamai mamoe, ua oofu i latou i ofu sisina, ua i ai foi lau pama i o latou lima; ua latou alalaga foi ma leo tetele, ua faapea atu, O i ai le faaolataga i lo tatou Atua o lē tietie i le nofoālii, atoa ma le Tamai mamoe. Ua tutū faataaliolio agelu uma i le nofoālii ma le au toeaina ma mea ola e fa, ua latou faapaū fao i luma o le nofoālii, ma ifo atu i le Atua, ua faapea atu, Amene; Ia i lo tatou Atua le faamanū, ma le viiga, ma le poto, ma le faafetai, ma le mamalu, ma le mana, ma le malosi e faavavau faavavau lava. Amene. Ona fai mai ai lea o le tasi o le au toeaina, ua faapea mai ia te au, O i latou ia e ua oofu i ofu sisina, o ai ea i latou, po o fea foi na latou o mai ai? Ona ou faapea atu ai lea ia te ia, Le Alii e, ua e silafia. Ona faapea mai ai lea o ia ia te au, O i latou ia o e o mai nai le puapuaga tele, ua ta foi o latou ofu, ma ua faasinasinaina o latou ofu i le toto o le Tamai mamoe. O le mea lea ua latou i luma ai o le nofoālii o le Atua, ua latou auauna foi ia te ia i lona malumalu i le ao ma le po; o lē tietie foi i le nofoālii e mau ma i latou. Latou te le toe fia aai, e le toe fia inu foi e le ogotia i latou i le la, po o se tasi vevela; auā o le Tamai mamoe o loo i luma o le nofoālii na te fafaga ia i latou, ma ta‘ita‘i ia te i latou i puna o vai ola; e sōloieseina foi e le Atua o loimata uma nai o latou mata.

Ua tatalaina foi e ia o lona fitu o faamaufaailoga, ona lologo ai lea o e i le lagi pe atoa le vaeluagalemu o le itu aso e tasi. Na a‘u iloa foi agelu e toafitu o e tutū i luma o le Atua, ua avatu foi ia te i latou pu e fitu. Ua sau foi le tasi agelu, ma tu mai i le fata faitaulaga, ua ia te ia le ipu auro e faamu ai mea manogi; ua avatu ia te ia mea manogi e tele, ina ia avatu ai atoa ma talosaga a le au paia uma i luga o le fata auro ua i luma o le nofoālii. O le asu foi o le mea manogi ua i le lima o le agelu ua alu ae, atoa ma talosaga a le au paia, i luma o le Atua. Ua tago foi le agelu i le ipu e faamu ai mea manogi, ua ia faatumuina ai i le afi ai le fata faitaulaga, ua lafo ifo ai i le lalolagi; ona i ai lea o leo, ma faititili, ma uila, ma le mafuie. O agelu e toafitu ua i ai pu e fitu, ua latou sauniuni e ili.

Ua ili foi e le agelu muamua le pu, ona i ai lea o le uato‘a ma le afi ua fefiloi ma le toto, ua lafo ifo i le lalolagi; ona susunuina ai lea o lona tolu o vaega o laau, ma ua susunuina vao iti lauolaola uma lava.

Ua ili foi e lona toalua o agelu le pu, ona i ai lea peiseai se mauga tele ua mu i le afi, ua lafo ifo i le sami; ona liu toto lea o lona tolu o vaega o le sami. Ona mamate ai lea o lona tolu o vaega o mea ola o i le sami, atoa ma lona tolu o vaega o vaa ua faaumatia.

Ua ili foi e lona toatolu o agelu le pu, ona paū ai lea nai le lagi o le fetu tele, ua mu e pei o se lamepa, ma ua paū ifo i lona tolu o vaega o vaitafe, atoa ma puna o vai. Ua igoa le fetu o le Oona; ona faaoonaina ai lea o lona tolu o vaega o vai, ua oti foi tagata e toatele i le vai, ina ua faaoonaina.

Ua ili foi e lona toafa o agelu le pu, ona taia ai lea o lona tolu o vaega o le la, ma lona tolu o vaega o le masina, atoa ma lona tolu o vaega o fetu, ina ia faapouliuligia o lona taitolu o latou vaega, e lei malamalama foi o lona tolu o vaega o le ao, ua faapea foi ma le po. Na ou iloa, ma ou faalogo i le tasi agelu ua lele i le taulotoaiga o le lagi, ua faapea mai ma le leo tele, Aue, aue, aue i e o nonofo i le lalolagi, ona o isi iligāpu a agelu e toatolu o le a ilia mai.

Ua ili foi e lona toalima o agelu le pu, ona ou iloa ai lea o le fetu ua paū nai le lagi i le lalolagi; ua tuuina atu foi ia te ia le ki o le to e le gata. Ua tatala foi e ia le to e le gata; ona alu ae ai lea o le asu ai le to e pei o le asu o se umu tele, ua faapouliuligia ai le la ma le lagi ona o le asu o le to. Ua o atu foi sē akerisi nai le asu i luga o le laueleele; ua tuuina atu ia te i latou le malosi e pei o le malosi o akarava o le vao; ua fai atu foi ia te i latou aua ne‘i latou faaleaga i vao iti o le fanua, po o se mea lauolaola e tasi, po o se laau e tasi; tau lava o tagata ua le i ai i o latou muaulu le faamaufaailoga a le Atua. Ua tuuina atu ia te i latou aua ne‘i fasiotia i latou, tau lava ina faatigaina i masina e lima; o latou tiga foi e pei o le tiga o le tagata pe a tuia e le akarava. O ona po ia e saili ai e tagata le oti, a e latou te le maua; e naunau foi i latou ina ia oti, a e sola ese le oti ia te i latou. O sē akerisi foi ua tino mai e pei o solofanua ua saunia i le taua; o latou ulu foi ua peiseai ua i ai palealii e pei o auro, ma o latou mata e pei o mata o tagata; ua ia te i latou foi lauulu e pei o lauulu o fafine, ma o latou nifo e pei o nifo o leona; ua ia te i latou foi ufifatafata e pei o ufifatafata uamea; ua palalu foi o latou apaau e pei o le taalili o kariota ma solofanua e tele pe a taufetuli e tau. Ua ia te i latou o iu e pei o iu o akarava, ua i ai foi tui i o latou iu; ma ua ia te i latou le malosi e faaleaga ai tagata i masina e lima. Ua ia te i latou foi le tupu, o le agelu lea o le to e le gata; o lona igoa i le upu Eperu o Avatonu, a o lona igoa i le upu Eleni o Apoluonu. Ua mavae atu le aue e tasi; faauta, ua totoe aue e lua e mulimuli ane i le oo mai.

Ua ili foi e lona toaono o agelu le pu, ona ou faalogo ai lea i le leo mai nifo e fa o le fata auro o i luma o le Atua, ua faapea atu i lona toaono o agelu ua i ai le pu. Tatala ia agelu e toafa o e ua fusifusia i le vaitafe tele o Eufirate. Ona talatalaina ai lea o ia agelu e toafa o e ua saunia i le itu aso, ma le aso, ma le masina, ma le tausaga, ina ia latou fasiotia lona tolu o vaega o tagata. O le faitau aofai o le ‘au tau o e ua tietie i solofanua e lua mano o mano; ua ou faalogo foi i le faitau aofai o i latou. E faapea foi ona a‘u iloa o solofanua i le mea na vaaia, ma e ua tietie ai, ua i ai ufifatafata afi, ma le uakini, ma le teio; o ulu foi o solofanua e pei o ulu o leona, ua alu atu nai o latou gutu le afi, ma le asu, ma le teio. O mea ia e tolu na fasiotia ai lona tolu o vaega o tagata, o le afi, ma le asu, ma le teio na alu atu nai o latou gutu. Auā ua i o latou gutu ma o latou iu lo latou malosi; auā o latou iu e pei o gata ia, ua i ai ulu, o mea foi ia latou te faaleaga ai tagata. O tagata foi na totoe o e lei fasiotia i nei mala, latou te lei salamo i galuega a o latou lima, o lo latou ifo i temoni, ma tupua auro, ma ario, ma ‘apa memea, ma maa, ma laau, o mea ia e le mafaia ona vaai, pe faalogo, pe savavali; latou te lei salamo foi i o latou fasioti tagata, ma a latou togafiti faataulāitu, ma la latou faitaaga, ma o latou gaoi.

Na a‘u iloa atu foi le tasi agelu malosi ua alu ifo mai le lagi, ua ofu i le ao, ua i lona ulu le nuanua, o ona fofoga foi e pei o le la, o ona vae foi e pei o pou tu afi; ua i lona lima foi le tusi itiiti ua fofola; ua tu lona vae taumatau i le sami, ma lona vae tauagavale i le fanua, ua alaga foi ia ma le leo tele, e pei o le leona pe a tagi; ua alaga ia, ona feganavai mai ai lea o faititili e fitu i o latou lava leo; ua feganavai mai faititili e fitu i o latou lava leo, na fai a a‘u tusia; ona ou faalogo ai lea i le leo mai le lagi, ua faapea mai ia te au, Ina faamaufaailogaina ia o na mea na feganavai mai ai o faititili e fitu, aua ne‘i e tusia na mea. O le agelu foi na iloa e a‘u ua tu i le sami ma le fanua, ua sii ae e ia lona lima i le lagi, ma ua tauto i le o soifua e faavavau faavavau lava, o le na faia le lagi ma mea o i ai, ma le fanua ma mea o i ai, ma le sami ma mea o i ai, e le toe ai ni aso; a e peitai a oo i ia ona po o le leo o lona toafitu o agelu, pe a ilia e ia le pu, ona taunuu ai lea o le mea lilo a le Atua, e pei ona folafolaina mai e ia i ana auauna le au perofeta.

O le leo foi na ou faalogo ai mai le lagi, ua toe tautala mai ia te au, ua faapea mai, Alu ia, ina tago i le tusi itiiti ua fofola, o i le lima o le agelu o loo tu i le sami ma le fanua. Ona ou alu atu ai lea i le agelu, ma ou fai atu ia te ia, Au mai ia te au le tusi itiiti. Ona faapea mai ai lea o ia ia te au, Ina tago ia i ai, ma e ‘aina; e oona i lou manava, a e suamalie i lou gutu e pei o le meli. Ona ou tago ai lea i le tusi itiiti nai le lima o le agelu, ma a‘u ‘aina; ona suamalie ai lea i lo‘u gutu e pei o le meli; ua uma ona ou ‘ai ai, ona oona lea i lo‘u manava. Ona faapea mai ai lea o ia ia te au, E ao ina e toe vavalo i nuu, ma atu nuu, ma gagana eseese, ma tupu e toatele.

Ona tuuina mai lea ia te au le u e pei o se tootoo; ua tu mai foi le agelu, ua faapea mai, Tulai ia, ina fuatia ia le malumalu o le Atua, ma le fata faitaulaga, ma e o tapuai i ai; a o le lotoā o le malumalu e aupito i tua, lafoai lea, aua foi e te fuaina, auā ua tuuina atu i nuu ese; latou te solia foi le aai paia i masina e fagafulu ma le lua. Ou te tuuina atu foi i a‘u molimau e toalua, la te vavalo ai i aso e tasi le afe e lua selau ma le onogafulu, o oofu i laua i ie talatala. O laau olive ia e lua, ma tuugālamepa e lua ua tutū i luma o Atua o le lalolagi. Afai foi e fia faaleaga se tasi ia te i laua, ona alu atu ai lea o le afi ai o la gutu, e faaumatia ai e ua fai i laua mo latou fili; afai foi e fia faaleaga se tasi ia te i laua, e tusa ona faapea ona fasiotia o ia. Ua ia te i laua le pule e pupuni le lagi, ina ia le to ifo se ua i aso o la la valoaga; ua ia i laua foi le pule i vai e liu ai ma toto, e taia foi le lalolagi i mala uma, o lo la faitalia pe atu fia.

Pe a uma ona la faaiuina la la mau, ona sii mai lea o le taua ia te i laua e le manu feai le ua alu ae nai le to e le gata, e manumalo foi o ia ia te i laua, ma fasioti ia te i laua. O la tino foi e i ai ia i le ala o le aai tele, o lona igoa faaleagaga, o Sotoma ma Aikupito, o le mea foi na faasatauroina ai lo tatou Alii. E tolu aso ma le vaeluagalemu o le aso e vaavaai ai i o la tino e nisi mai nuu, ma itu aiga, ma gagana eseese, ma atu nuu, a e latou te le mafafai ona ia tuuina atu o la tino i tuugamau. E fiafia foi e ua nonofo i le nuu ona o i laua, ma latou olioli, ma feaveai mea alofa; auā na faatigaina e ua nonofo i le nuu e ia perofeta e toalua.

A ua mavae aso e tolu ma le vaeluagalemu o le aso, ona uluitinoina ai lea o i laua e le Agaga ola mai le Atua, ona la tutū ai lea i luga i o la vae, ona oo ai lea o le mata‘u tele i e na matamata ia te i laua. Ona la faalogo lea i le leo tele mai le lagi, ua faapea atu ia te i laua, Ina o mai ia i luga nei. Ona la o ae ai lea i le lagi i le ao, ua matamata foi ia te i laua o e na fai i laua mo latou fili. O le itu aso lava lea na to ai le mafuie tele, ua paū ai foi lona sefulu o vaega o le aai, ua oti foi i le mafuie tagata e toafitugaafe; ua matatau foi e na totoe, ona latou vivii atu lea i le Atua o le lagi. Ua mavae atu lona lua o aue; faauta, o lona tolu o aue e vave ona oo mai.

Ua ili foi e lona toafitu o agelu le pu, ona i ai lea i le lagi o leo tetele, ua faapea mai, O malo o le lalolagi ua avea mo lo tatou Alii ma lona Keriso, e fai foi o ia ma tupu e faavavau faavavau lava. O toeaina foi e toaluafulu ma le toafa, o e nonofo i o latou nofoālii i luma o le Atua, ua latou faapaū fao, ma ifo i le Atua, ua faapea atu, Le Alii e, le Atua e ou le malosi uma lava, ua matou faafetai atu ia te oe, o lē soifua, o le na soifua, o le a afio mai, ina ua e tago i lou mana tele ma ua fai oe ma tupu. Ua ita foi nuu, ona oo mai lea o lou toasa, ma ona po e faamasinoina ai e ua oti, ma taui ai i au auauna le au perofeta, ma le au paia, ma e ua matatau i lou suafa, o tagatānuu atoa ma alii, e fano ai foi i latou o e na fano ai le lalolagi. Ua faaavanoaina foi le malumalu o le Atua i le lagi, ona iloa atu ai lea o le atolaau o lana feagaiga i lona malumalu; ona tutupu lea o uila, ma leo, ma faititili, ma le mafuie, ma le uato‘a tetele.

Ua iloa foi le faailoga tele i le lagi, o le fafine ua ofu i le la, o i lalo o ona vae le masina, o i lona ulu foi le palealii fetu e sefulu ma le lua; ua to foi o ia; ua faatiga ma alaga i le tiga a fanau. Ua iloa foi le tasi faailoga i le lagi, faauta foi, o le tarako tele e mūmū, e fitu ona ulu ma ona nifo e sefulu; ua i ona ulu o palealii e fitu. Ua toso e lona iu i lona tolu o vaega o fetu i le lagi, ma lafo ifo ia i latou i le lalolagi. Ua tu foi le tarako i luma o le fafine o le a fanau, ina ia ‘ai e ia o lana tama pe a fanau. Ua fanau foi e ia o le tama tane, o le na te pule i nuu uma i le tootoo uamea; ona segia ae lea o lana tama i le Atua i lona nofoālii. Ona sola lea o le fafine i le vao, o i ai le mea ua saunia e le Atua e nofo ai o ia, ina ia latou fafaga ai ia te ia i aso e tasi le afe ma le lua o selau ma le onogafulu.

Ua tau foi le taua i le lagi; o Mekaeli ma ana agelu ua latou tau ma le tarako, ua ‘au foi le tarako ma ana agelu e tau ai le taua, a ua latou le manumalo, e le toe maua foi i le lagi se mea latou te nonofo ai. Ua lafo foi le tarako tele, o le gata tuai lea, ua igoa i le tiapolo, i le ma Satani, o lē faasese i le lalolagi uma; ua lafo ifo i le lalolagi, ua lafo foi ana agelu faatasi ma ia. Na ou faalogo foi i le leo tele i le lagi, ua faapea, O ona po nei ua oo mai ai le olataga, ma le mana, ma le malo o lo tatou Atua ma le pule a lona Keriso; auā ua lafo i lalo le na molia o tatou uso, o le na molia i latou i luma o lo tatou Atua i le ao ma le po. A ua latou manumalo ia te ia ona o le toto o le Tamai mamoe, ma le upu a la latou mau, ua latou le faapelepeleina foi lo latou ola ua oo i le oti. O le mea lea ia outou olioli ai, le lagi e atoa ma e ua nonofo ai. O i talofa ia te outou o e nonofo i le fanua ma le sami, auā ua alu ifo ia te outou le tiapolo ua lotoa tele, auā ua na iloa ua saasaa ona po.

Ua iloa e le tarako ua lafo ifo o ia i le lalolagi, ona faasaua lea o ia i le fafine na na fanaua le tama tane. Ona foaiina atu lea i le fafine apaau e lua o le aeto tele, ina ia lele ai o ia ai luma o le gata i le vao i le mea e nofo ai o ia, e fagaina ai o ia i le tausaga, ma tausaga, ma lona vaeluagalemu o le tausaga. Ona luai atu lea e le gata le vai, e pei o se vaitafe nai lona gutu i tua o le fafine, ina ia tafea o ia i le vai. Ona fesoasoani ai lea o le fanua i le fafine, ua faamaga ae foi e le fanua lona gutu, ma ua inu i le vaitafe ua luai atu e le tarako nai lona gutu. Ua ita foi le tarako i le fafine, ona alu atu ai lea o ia e tau le taua ma i latou ua totoe o lana fanau, o e ua tausi i poloaiga a le Atua, ma ua taofi le mau ia Iesu Keriso.

Ua ou tu i le oneone i le matafaga; ona a‘u iloa ai lea o le manu feai ua alu ae nai le sami, e fitu ona ulu ma ona nifo e sefulu; ua i ona nifo foi o palealii e sefulu, ua i ona ulu foi o le igoa faifai. O le manu feai foi na ou iloa, e pei o le nameri, o ona vae foi e pei o vae o le urosa, ma lona gutu e pei o le gutu o le leona. Ua tuuina atu foi ia te ia e le tarako lona malosi, ma lona nofoālii, ma le pule tele. Na a‘u iloa foi le tasi o ona ulu e peiseai ua foa a mate; a o lona foa na fai a mate ai ua mafu, ona ofo ai lea o le lalolagi uma ma latou mulimuli atu i le manu feai. Ua latou ifo foi i le tarako o le na tuuina atu le pule i le manu feai, ua latou ifo foi i le manu feai, ua faapea atu. O ai sē tusa ma le manu feai? O ai se na te mafaia ona tau ma ia? Ua avatu foi ia te ia le gutu e tautala ai i upu tetele ma upu faifai; ua tuuina atu foi ia te ia le pule e tau ai le taua i masina e fagafulu ma le lua. Ona tautala lea o ia ua upu leaga i le Atua, ua ia upu leaga i lona suafa, ma lona fale fetafai, atoa ma e ua nonofo i le lagi.

Ua tuuina atu foi ia te ia ia tau le taua ma le au paia, ma ia manumalo ia te i latou; ua tuuina atu foi ia te ia e pule i itu aiga uma, ma gagana eseese, ma nuu. Ua ifo foi ia te ia o i latou uma o e nonofo i le lalolagi, ē ua le tusia o latou igoa i le tusi o le ola a le Tamai mamoe na fasia talu ona faavaeina o le lalolagi. Ai se tasi ua i ai taliga, ina faalogo mai ia o ia. Ai se na te ta‘ita‘iina nisi faatagataotaua, e alu lava ia faatagataotaua; ai se na te fasiotia i le pelu, e tusa ona fasiotia o ia i le pelu. O le mea lena ua i ai le onosai ma le faatuatua o le au paia.

Na a‘u iloa foi le tasi manu feai ua alu ae nai le fanua, ua i ai foi ona nifo e lua pei o nifo o se tamai mamoe, a ua tautala ia pei o se tarako. Ua fai foi e ia le pule uma a le uluai manu feai i ona luma; ma ua faia e ia ona ia ifo o le lalolagi ma e ua nonofo ai i le uluai manu feai, o le ua mafu lona foa na fai a mate ai; ua faia foi e ia faailoga tetele, o lea ua fai ai e ia ina ia alu ifo le afi mai le lagi i le lalolagi i luma o tagata. Ua ia faasese foi i e ua nonofo i le lalolagi ona o ia faailoga ua tuuina atu ia te ia na te faia i luma o le manu feai, o loo fai atu ia i e ua nonofo i le lalolagi latou te faia se faatagata o le manu feai e ona le manua i le pelu a ua ola. Ua tuuina atu foi ia te ia na te avatua le mānava i le faatagata o le manu feai, ina ia tautala le faatagata o le manu feai, ma ia faia ina ia fasiotia i latou uma o e le ifo atu i le faatagata o le manu feai.

Ua faia foi e ia ona ia faailogaina o tagata uma, o tagata nuu atoa ma alii, o e mauoa ma e matitiva, o e sa‘oloto ma e pologa, ia faailogaina i latou i o latou lima taumatau, po o latou muaulu; ina ia le mafaia ona faatau mai pe faatau atu e se tasi, tau lava o e ua i ai le faailoga, po o le igoa o le manu feai, po o le faitau aofai o lona igoa. O le mea lenei ua i ai le poto. O le ua i ai le mafaufau ina faitau ia o ia i le faitau aofai o le manu feai; auā o le faitau aofai lea o le tagata; o lona faitau aofai foi, E ono selau ma le onogafulu ma le ono.

Na a‘u iloa, faauta foi, ua tu mai le Tamai mamoe i le mauga o Siona, ua faatasi foi ma ia tagata e selau afe ma afe e fa sefulu ma le fa o afe, ua tusia le suafa o lona Tamā i o latou muaulu. Ua ou faalogo foi i le leo mai le lagi e pei o le taalili o vai e tele, e pei o le taalili foi o le faititili tetele; ua ou faalogo foi i le leo o e ta kitara o loo ta i a latou kitara. Ua latou pepese foi e peiseai o se pese fou i luma o le nofoālii, ma luma o mea ola e fa, ma le au toeaina; e le mafaia foi e se tasi ona a‘oa‘o i lea pese, na o le selau afe ma afe e fa sefulu ma le fa o afe o e ua faatauina nai le lalolagi. O tagata ia e lei leaga i fafine; auā o taupou i latou; o i latou ia o e ua mulimuli atu i le Tamai mamoe i mea uma e alu i ai o ia; o i latou ia o e ua faatauina nai tagata, o e ua faapolopoloina mo le Atua ma le Tamai mamoe; e le iloa foi se pepelo i o latou gutu; auā e le ponā i latou i luma o le nofoālii o le Atua.

Na a‘u iloa foi le tasi agelu ua lele i le taulotoaiga o le lagi, ua ia te ia le tala lelei e faavavau e folafola atu i e nonofo i le lalolagi i atu nuu uma, ma itu aiga, ma gagana eseese, ma nuu, ua faapea atu ma le leo tele, Ia outou matatau i le Atua, ma avatu ia te ia le viiga, auā ua oo mai le itu aso o lana faamasinoga; ma ia outou ifo i le na faia le lagi, ma le fanua, ma le sami, atoa ma puna o vai. Ona mulimuli atu ai lea o le tasi agelu, ua faapea atu, Ua paū, ua paū Papelonia o le aai tele, auā ua ia faainu i nuu uma i le uaina o le toasa i lana faitaaga.

Ona mulimuli atu ai lea ia te i laua o lona toatolu o agelu, ua faapea atu ma le leo tele, Ai se tasi e ifo i le manu feai ma lona faatagata, ma talia le faailoga i lona muaulu po o lona lima, e inu lava ia i le uaina o le toasa o le Atua, ua liligiina atu e le suia i le ipu o lona toasa, e puapuagatia foi ai i le afi ma le teio i luma o le au agelu paia ma luma o le Tamai mamoe; o le asu foi o lo latou puapuaga e alu ae e faavavau faavavau lava; latou te le maua foi se filemu i le ao ma le po o e ua ifo i le manu feai ma lona faatagata, ma se na te talia le faailoga o lona igoa. O le mea lenei ua i ai le onosai o le au paia; o le mea lenei ua i ai e ua tausi i poloaiga a le Atua ma le faatuatua ia Iesu.

Na ou faalogo foi i le leo mai le lagi, ua faapea mai ia te au, Ia e tusi, Amuia ē ua oti, o e ua oti o i le Alii e amata i nei ona po. O lea lava, ua fetalai mai ai le Agaga, ina ua latou malolo i a latou galuega tiga; o a latou galuega foi e mulimuli ia te i latou.

Na a‘u iloa faauta foi, o le ao sinasina, ua tietie foi i le ao le tasi ua pei o le Atalii o le tagata, ua i lona ao le palealii auro, ua i lona aao foi le selesaito maai. Ua alu atu foi le tasi agelu nai le malumalu, ua alaga ma le leo tele i le ua tietie i le ao, Ina faaoo atu ia lau selesaito, ina sele, auā ua oo i ona po e te selesele ai, auā ua afu le saito o le lalolagi. Ona faaoo mai lea e le ua tietie i le ao lana selesaito i le lalolagi, ua seleseleina ai le lalolagi.

Ua alu atu foi le tasi agelu nai le malumalu o i le lagi, ua ia te ia foi le selesaito maai. O le tasi agelu foi ua alu atu nai le fata faitaulaga, ua ia te ia le pule i le afi, ua alaga foi ia ma le leo tele i le ua i ai le selesaito maai, ua faapea atu, Ina faaoo atu ia lau selesaito maai, ina sala ia i fuifui vine o le vine o le lalolagi, auā ua otatā ona fuifui vine. Ona faaoo mai ai lea e le agelu o lana selesaito i le lalolagi, ua sala foi e ia le vine o le lalolagi, ua ia lafo atu foi i totonu o le soligāvine tele o le toasa o le Atua. Ua solia foi le soligāvine i tua o le aai, ua alu atu foi le toto nai le soligāvine e oo i faagutu o solofanua, e tasi le afe ma le ono o selau o setatio ua pau mai ai.

Na ou iloa foi i le lagi le tasi faailoga tele e ofo ai, o agelu e toafitu ua i ai mala e fitu e gata ai; auā e faaiuina ai le toasa o le Atua.

Na ou iloa atu foi ua peiseai o se sami tioata ua fefiloi ma le afi; o i latou foi na manumalo i le manu feai, ma lona faatagata, ma lona faailoga, ma le faitau aofai o lona igoa, ua tutū i latou i le sami tioata, ua ia te i latou kitara a le Atua. Ua latou pepese i le pese a Mose le auauna a le Atua, ma le pese a le Tamai mamoe, ua faapea atu, Le Alii e, le Atua e ou le malosi uma lava, ua tetele au galuega e ofo ai; e tonu ma faamaoni ou ala, le Tupu o le au paia e. Le Alii e, o ai se le mata‘u ia te oe, ma vivii atu i lou suafa? auā ua na o oe e lelei; auā e o mai nuu uma lava, ma latou ifo i ou luma; auā ua faaalia au faamasinoga tonu.

Ua mavae nei mea, ona ou vaai lea, faauta foi, ua faaavanoaina i le lagi le malumalu o i le fale fetafai o i ai le mau; ona o atu lea nai le malumalu o agelu e toafitu ua i ai mala e fitu, ua oofu i latou i ie lino e mamā ma le pupula, ua fusia foi o latou fatafata i fusi auro. O le tasi foi o mea ola e fa ua ia avatu i agelu e toafitu o ipu auro e fitu, ua tutumu i le toasa o le Atua o lē soifua e faavavau faavavau lava. Ua tumu foi le malumalu i le asu nai le pupula o le Atua atoa ma lona mana; e le mafaia foi e se tasi ona ulu atu i le malumalu, seia faaiuina mala e fitu a agelu e toafitu.

Na ou lagona foi le leo tele mai le malumalu, ua faapea atu i agelu e toafitu, O ia, ina liligi atu ipu o le toasa o le Atua i le lalolagi.

Ona alu atu ai lea o lē muamua, ua liligi ifo lana ipu i le fanua; ona oo lea o le papala leaga e tiga ai tagata ua i ai le faailoga o le manu feai, atoa ma ē ua ifo i lona faatagata.

Ua liligi foi e lona toalua o agelu lana ipu i le sami; ona liu toto ai lea e pei o le toto o le tagata oti; ona mamate ai lea o mea ola uma o i le sami.

Ua liligi foi e lona toatolu o agelu lana ipu i vaitafe ma puna o vai; ona liu toto ai lea. Na ou lagona foi le agelu e pule i vai ua faapea atu, Le Alii e, o lē amiotonu oe, o lē soifua, o le na soifua, ma loo lelei, auā ua faapea ona e faasalaina. Auā na latou faamaligiina le toto o tagata paia ma perofeta, i le ua e avatu ai ia te i latou le toto e inu ai; auā ua tatau lea mo i latou. Na ou lagona foi i le tasi mai le fata faitaulaga, ua faapea atu, E moni, le Alii e, le Atua e ou le malosi uma lava; e faamaoni ma le tonu au faamasinoga.

Ua liligi foi e lona toafa o agelu lana ipu i le la; ua tuuina atu i ai ia mu ai tagata i le afi; ua mu foi tagata i le mu tele, ona latou faifai lea i le suafa o le Atua e ana le pule i ia mala; a ua le salamo i latou e avatu ai le viiga ia te ia.

Ua liligi foi e lona toalima o agelu lana ipu i le nofoālii o le manu feai; ona faapouliuligia lea o lona malo; ona latou feati ai lea o latou laulaufaiva ona o le puapuaga; ua latou faifai foi i le Atua o le lagi ona o latou puapuaga atoa ma o latou papala, ua le salamo foi i latou i a latou amio.

Ua liligi foi e lona toaono o agelu lana ipu i le vaitafe tele o Eufirate; ona mate ai lea o lona vai, ina ia saunia le ala o tupu mai nuu e alu ae ai le la.

Ona ou iloa ai lea o agaga leaga e toatolu e pei o rane ua o mai mai le gutu o le tarako, ma le gutu o le manu feai, atoa ma le gutu o le perofeta pepelo; auā o agaga ia o temoni e fai faailoga, ua latou o atu i tupu o le lalolagi ma le atu laulau uma, e faapotopoto ia te i latou i le taua i le aso tele o le Atua e ona le malosi uma lava. (Faauta, ou te alu atu pei o se gaoi; amuia lē mataala, ma tausi i ona ofu, ina ne‘i savali o ia e lē lavalavā, ne‘i latou iloa atu foi lona mā.) Na ia faapotopoto foi ia te i latou i le mea ua igoa i le upu Eperu o Amaketo.

Ua liligi foi e lona toafitu o agelu lana ipu i le matagi; ona tŭlei mai ai lea o le siufofoga tele mai le malumalu o i le lagi mai le nofoālii, ua faapea mai, Ua uma ona fai. Ona tutupu ai lea o leo, ma faititili, ma uila, sa i ai foi le mafuie tele, e le faapea ona tele se mafuie ua tele naua talu ona i ai o tagata i le lalolagi. Ua vaetoluina foi le aai tele, ua pauu foi aai o nuu; ua manatua Papelonia le aai tele i luma o le Atua, ina ia tuuina atu ia te ia o le ipu o le uaina o lona toasa mamafa. Ua sosola foi motu uma, o mauga foi ua le iloa. Ua to mai foi ai le lagi i luga o tagata le uato‘a latetele, e pei o le taleni ona mamafa; ona faifai ai lea o tagata i le Atua ona o le mala o le uato‘a, auā ua matuā tele lea mala.

Ua sau foi le tasi o ia agelu e toafitu sa i ai ipu e fitu, ua tautala mai ia te au, ua faapea mai ia te au, Sau ia, ou te faailoa ia te oe le faasalaina o le fafine talitane e sili, o lē tietie i vai e tele; ua faitaaga ma ia o tupu o le lalolagi, ua onā foi e o nonofo i le lalolagi i le uaina o lana faitaaga. Ua ia avea foi a‘u i le vao i le Agaga; ona ou iloa lea o le fafine ua tietie i le manu feai mūmū, ua lilo i igoa faifai, e fitu ona ulu ma ona nifo e sefulu. Ua ofu le fafine i le ie pāuli ma le mūmū, ua teuteu foi i auro, ma maa tāua, ma penina, ua i lona lima le ipu auro, ua tumu i mea e inosia ma le leaga o lana faitaaga; ua tusia foi i lona muaulu le igoa, O LE MEA LILO, PAPELONIA LE AAI TELE, O LE TINA O FAFINE TALITANE MA MEA E INOSIA I LE LALOLAGI. Na ou iloa foi le fafine ua onā i le toto o le au paia ma le toto o e na molimau ia Iesu; ua ou iloa atu ia te ia, ona ou matuā ofo tele ai lea. Ona fai mai lea o le agelu ia te au, Se a le mea ua e ofo ai? Ou te ta‘u atu ia te oe le uiga lilo o le fafine, ma le manu feai ua ia tietie ai, e fitu ona ulu ma ona nifo e sefulu.

O le manu feai na e iloa, sa i ai, ua le i ai foi, o le a alu ae foi o ia ai le to e le gata, e alu atu foi o ia i le malaia; o e nonofo i le lalolagi, (e lei tusia o latou igoa i le tusi o le ola talu ona faavaeina o le lalolagi,) latou te taufaiofo, pe a iloa le manu feai sa i ai, ua le i ai foi, a e ui i lea o loo i ai lava. O le mea lenei ua i ai le atamai e ona le poto. O ulu e fitu o mauga ia e fitu, ua nofo ai le fafine; o tupu foi ia e toafitu; e toalima ua pauu, o loo i ai le tasi, e lei oo mai nei foi le tasi; pe a oo mai e tusa ona saasaa ona po e tumau ai. O le manu feai foi sa i ai, ua le i ai foi, o lona toavalu lea, nai le toafitu foi o ia, e alu atu foi o ia i le malaia. O nifo foi e sefulu na e iloa, o tupu ia e toasefulu, ua le oo ina maua o latou malo, a e maua e i latou le pule pei o tupu e tasi le itu aso faatasi ma le manu feai. Ua loto gatasi i latou nei, latou te avatu foi o latou malosi ma a latou pule i le manu feai.

Latou te tau le taua ma le Tamai mamoe, a e manumalo le Tamai mamoe ia te i latou, auā o le Alii ia o alii ma le Tupu o tupu; o e ua ia te ia foi ua valaauina i latou, ma filifilia, ma faamaoni. Ona fai mai lea o ia ia te au, O vai na e iloa, o loo tietie ai le fafine talitane, o nuu ia, ma motu o tagata, ma atu nuu, ma gagana eseese. O nifo foi e sefulu na e iloa i le manu feai, latou te ‘ino‘ino i le fafine talitane, ma faasaunoa ia te ia, ma to ese ona ofu, latou te aai foi i lona tino, ma susunu ia te ia i le afi. Auā ua tuuina atu e le Atua i o latou loto ia faia lona finagalo, latou te loto gatasi foi e avatu lo latou malo mo le manu feai, seia taunuu afioga a le Atua. O le fafine foi na e iloa, o le aai tele lea, e i ai le pule i tupu o le lalolagi.

Ua mavae ia mea, ona ou iloa atu lea o le agelu o loo alu ifo i le lagi, ua ia te ia le pule sili; ua malamalama foi le lalolagi i lona pupula. Ua matuā alaga foi o ia ma le leo tele, ua faapea ane, Ua paū, ua paū Papelonia le aai tele, ua avea foi o ia ma mea e nofo ai temoni, ma mea e puipui ai agaga leaga uma, o le mea foi e puipui ai manu felelei uma e leaga ma le inosia; auā ua feinu nuu uma i le uaina o le toasa i lana faitaaga, ua faitaaga foi ma ia tupu o le lalolagi, o le faulaiga o ana mea faafiafia ua tamaoaiga ai e ua faatau oa o i le lalolagi.

Ua ou faalogo foi i le tasi leo mai le lagi, ua faapea mai, Lo‘u nuu e, ia outou o ese ia te ia, ina ne‘i faatasia outou i ana agasala, ina ne‘i tofusia foi outou i ona mala; auā ua pa‘i atu ana agasala i le lagi, ua manatua foi e le Atua ana amioleaga. Ia outou taui atu ia te ia ia pei ona taui mai e ia ia te outou, ia outou taui faalua ia te ia e tusa ma ana galuega; o le ipu foi na liligi mai ai e ia, ia outou liligi faaluaina atu ai ia te ia. E pei ona mitamita o ia ia te ia, mona ua faafiafia o ia ia te ia, ia faapea ona outou tuuina atu ia te ia o le puapuaga ma le faanoanoa. Auā ua faapea ifo ia i lona loto, Ou te nofo nei o le tupu fafine, ou te le se fafine ua oti lana tane, ou te le iloa lava se faanoanoa; o le mea lea e oo mai ai i le aso e tasi ona mala, o le oti, ma le faanoanoa, ma le oge; e susunuina foi o ia i le afi; auā e malosi lava le Alii le Atua o lē faasala ia te ia.

O tupu foi o le lalolagi e na faitaaga ma faafiafia i latou faatasi ma ia, latou te taufaitagi ia te ia ma taufaitagitu‘i ona o ia, pe a latou iloa atu le asu o lona susunuina; e tutū mamao i latou ona o le fefe i lona puapuaga, e faapea atu, Aue, aue Papelonia e, le aai tele ma le aai malosi! auā o le itu aso e tasi ua oo mai ai lau sala. O faatauoa foi i le lalolagi e taufaitagi i latou ma faanoanoa ona o ia; auā e le toe faatau e se tasi a latou oloa; o le oloa auro, ma ario, ma maa tāua, ma penina, ma ie vavae, ma ie pāuli, ma le silika, ma le ie mūmū, ma laau tuina uma, ma ipu nifo elefane uma, ma ipu laau matuā tāua uma, ma le ‘apa memea, ma le uamea, ma le maremaru, ma kinamomi, ma mea manogi, ma le suāuu manogi, ma le pulu lipano, ma le uaina, ma le uu olive, ma le falaoa lelei, ma le saito, ma manu, ma mamoe, ma solofanua, ma nofoa faataavalevale, o tino foi atoa ma agaga o tagata. Ua te‘a foi ma oe o fua na e tu‘inanau i ai, ua te‘a foi ma oe mea lalelei uma ma mea pupula, e te le toe maua lava ia mea. O e faatau ia mea, o e tamaoaiga ona o ia, latou te tutū mamao ma le fefe i lona puapuaga, o loo taufaitagi ma faanoanoa, o loo faapea atu, Aue, aue le aai tele, na ofu i le ie vavae ma le pāuli, ma le mūmū, na teteu foi i auro, ma maa tāua ma penina; auā o le itu aso e tasi ua faaumatia ai le oloa ua sili ona tele. O tautai uma, atoa ma tagata uma o i vaa, ma auvaa, atoa uma ma e feoai i le vasa, ua tutū mamao i latou, ma latou alalaga ina o iloa mai le asu o lona susunuina, ua faapea, O fea se aai e tusa ma lenei aai tele? Ua latou lafo ae foi le eleele i o latou ulu, ua alalaga, ma taufaitagi, ma faanoanoa, ua faapea atu, Aue, aue le aai tele, na tamaoaiga ai i latou uma o e o i ai vaa i le vasa, ona o ana mea tāua; auā o le itu aso e tasi ua faatafunaina ai o ia. Ia e olioli ona o ia, le lagi e, atoa ma outou aposetolo paia ma perofeta; auā ua faasalaina o ia e le Atua ona o le faasalaina o outou e ia. Ua siitia foi e le tasi agelu malosi o le maa e pei o se maaolo tele, ma lafo i le sami, ua faapea atu, E faapea ona lafotuina o Papelonia le aai tele, e le toe iloa lava. E le toe lagona foi ia te oe le leo o e ta kitara, ma ē lagi siva, ma ē ili fagufagu, atoa ma ē ili pu; e le toe iloa foi ia te oe se tufuga e toatasi o se faiva e tasi, e le toe lagona foi ia te oe le taalili o le maaolo,

e le toe pupula mai foi ia te oe se malamalama o se lamepa, e le toe lagona foi ia te oe le leo o le faatoafaiavā ma le faatoanofo tane; auā o ou tagata faatauoa o tagata sili ia o i le lalolagi, auā ua faaseseina nuu uma i au togafiti faataulāitu. Ua iloa foi ia te oe le toto o perofeta ma le au paia, ma i latou uma ua fasiotia i le lalolagi.

Ua mavae nei mea, ona ou faalogo lea e peiseai o le leo tele o le motu o tagata e toatele o i le lagi, ua faapea atu, Aleluia; ua i le Alii lo tatou Atua le olataga, ma le viiga, ma le faaneeneega, ma le mana; auā e faamaoni, e tonu foi ana faamasinoga; auā ua faasalaina e ia le fafine talitane e sili, o le na faaleagaina le lalolagi i lana faitaaga, ua ia taui atu ia te ia lava le toto o ana auauna. Ua latou toe fai atu, Aleluia; ona alu ae ai lea o lona asu e faavavau faavavau lava. Ua faapaū toeaina e toaluafulu ma le toafa, ma mea ola e fa, ma ua ifo i le Atua o lē tietie i le nofoālii, ua faapea atu, Amene; Aleluia. Ua oo mai foi le leo mai le nofoālii, ua faapea mai. Ia vivii atu i lo tatou Atua, o outou ana auauna uma, ma outou o e matatau ia te ia, o tagata nuu atoa ma alii. Ua ou faalogo foi e peiseai o le leo o le motu o tagata e toatele, e peiseai o le taalili o vai e tele, e peiseai o le taalili foi o faititili tetele, ua faapea atu, Aleluia; auā ua fai ma tupu le Alii le Atua e ona le malosi uma lava.

Ia tatou fiafia ma olioli, ma tuu atu le viiga ia te ia; auā ua oo mai le tausamaaga o le Tamai mamoe, o lona felutua foi ua saunia o ia e ia. Ua tuuina atu foi ia te ia ina ia ofu o ia i le ie vavae e mamā ma le pupula; auā o le ie vavae o le amiotonu lea a le au paia. Ua fai mai foi o ia ia te au, Ia e tusi, Amuia e ua tala‘iina i le tausamaaga o le Tamai mamoe. Ua fai mai foi o ia ia te au, O afioga moni ia a le Atua. Ona ou faapaū atu lea i luma o ona vae e ifo ia te ia; a ua fai mai o ia ia te au, Ia oe, aua lava; o a‘u o lou uso a auauna, o so lou au uso foi ua i ai le mau ia Iesu; ia e ifo i le Atua; auā o le agaga o le valoaga o le mau lea ia Iesu.

Na a‘u iloa atu le lagi ua avanoa, faauta foi, o le solofanua sinasina, o lē tietie ai foi ua igoa ia o le Faamaoni ma le Moni, o le amiotonu foi na te faamasino ai ma tau ai le taua; ua pei o le mumū o le afi ona fofoga, ua i lona ao foi palealii e tele; ua ia te ia le suafa ua tusia e le iloa e se tasi ua na o ia lava; ua ofu foi o ia i le ofu ua fufui i le toto; ua faasuafaina o ia, O le Lokou o le Atua. O ‘au foi o i le lagi ua mulimuli atu ia te ia i luga o solofanua sisina, ua oofu i latou i le ie vavae sinasina ma le mamā. Ua alu atu foi le pelu maai nai i lona fofoga, ina ia taia a‘i e ia o nuu; e pule foi o ia ia te i latou i le tootoo uamea; e soli foi e ia le soligāvine o le toasa mamafa o le Atua e ona le malosi uma lava. Ua ia te ia foi le suafa ua tusia i lona ofu ma lona vae. O LE TUPU O TUPU, MA LE ALII O ALII.

Na a‘u iloa foi le tasi agelu ua tu i le la; ua alaga foi o ia ma le leo tele, ua faapea atu i manu uma e felelei i le taulotoaiga o le lagi, O mai ia, ina outou faapotopoto ane i le faigaai a le Atua silisili, ina ia outou aai i tino o tupu, ma tino o ta‘ita‘i o ‘au taitoaafe, ma tino o tagata malolosi, ma tino o solofanua ma e ua tietie ai, ma tino o tagata uma, o e sa‘oloto atoa ma pologa, o tagatānuu atoa ma alii.

Ona ou iloa lea o le manu feai, ma tupu o le lalolagi, ma a latou ‘au, ua faapotopotoina e tau ai le taua ma le ua tietie i le solofanua ma lana itu taua. Ona puea lea o le manu feai atoa ma le perofeta pepelo o le na fai faailoga i ona luma, o mea ia na faaseseina ai e ia o e ua i ai le faailoga o le manu feai, ma e ua ifo i lona faatagata; ua lafoolaina i laua i le lepa afi ua mu i le teio. A o e na totoe, ua fasiotia i latou i le pelu ua alu atu nai le fofoga o le ua tietie i le solofanua; ona maoona ai lea o manu felelei uma i o latou tino.

Na a‘u iloa foi le agelu ua alu ifo i le lagi, ua ia te ia le ki o le to e le gata, ua i lona lima foi le maea uamea tele. Ua pue foi e ia le tareko, o le gata tuai, o le tiapolo lea ma Satani, ua ia fusifusi foi ia te ia i tausaga e afe. Ua ia lafo foi ia te ia i le to e le gata, ua pupuni foi ia te ia, ma tuuina atu le faamaufaailoga i ona luga, ina ia le toe faaseseina e ia o nuu, seia atoa ia tausaga e afe; a mavae foi ia, e tatau ona tatalaina o ia i nai aso.

Na a‘u iloa foi nofoālii, ma ua latou tietie ai, ua tuuina atu foi le faamasinoga ia te i latou; na a‘u iloa foi agaga o e ua vavaeeseina o latou ulu ona o le mau ia Iesu ma le afioga a le Atua, o e na le ifo i le manu feai po o lona faatagata, na le talia foi le faailoga i o latou muaulu po o latou lima; ua latou ola foi, ma ua fai ma tupu faatasi ma Keriso i tausaga e afe; a o e totoe o e ua oti, e lei toe ola i latou seia atoa ia tausaga e afe. O le uluai toe tu lena. Amuia mona ua paia le ua i ai se tofi i le uluai toe tu; e le oo foi le pule a le oti faalua ia te i latou, a e avea i latou ma faitaulaga a le Atua ma Keriso, latou te fai ma tupu foi faatasi ma ia i tausaga e afe.

Pe a atoa foi ia tausaga e afe, ona tatalaina lea o Satani ai le mea na puipuiina ai o ia. E alu atu foi o ia e faasese i nuu o i itu e fa o le lalolagi, o Koku ma Makoku, e faapotopoto ia te i latou i le taua, ua pei o le oneone o le sami i latou ona toatele. Ua o ae foi i latou i le mafolafola o le lalolagi, ua latou siomia foi le toagālauapi a le au paia ma le aai ua faapelepeleina; ona alu ifo lea o le afi mai le Atua i le lagi, ua susunu ai ia te i latou;

o le tiapolo foi o le na faasese ia te i latou, ua lafoina o ia i le lepa afi ma le teio, o i ai le manu feai ma le perofeta pepelo; e puapuagaina ai i latou i le ao ma le po e faavavau faavavau lava.

Na a‘u iloa foi le nofoālii tele e sinasina, ma le o tietie ai, ua sosola ese le lalolagi ma le lagi i ona luma, e le iloa foi se mea e tu ai i laua. Na a‘u iloa foi o e na oti, o tagatānuu atoa ma alii, o tutū i luma o le Atua, ona fofola lea o tusi; ua fofola foi ma le tasi tusi, o le tusi lea o le ola; ona faamasinoina ai lea o e na oti i mea ua tusia i tusi, e tusa ma a latou amio. Ua avae foi e le sami e na oti sa i ai, ua avae foi e le oti ma seoli e na oti sa i ai; e taitasi foi o i latou ma faamasinoina e tusa ma a latou amio. Ua lafoina foi le oti ma seoli i le lepa afi; o le oti faalua lea. Ai se tasi ua iloa ua le tusia i le tusi o le ola, ua lafoina lea i le lepa afi.

Ona a‘u iloa lea o le lagi fou ma le lalolagi fou; auā ua mavae atu le uluai lagi, ma le uluai lalolagi, ua leai foi se toe sami. O a‘u foi o Ioane na ou iloa le aai paia, o Ierusalema fou, ua alu ifo mai le Atua i le lagi, ua saunia pei o se faatoanofotane ua teuteuina mo lana tane.

Na ou faalogo foi i le leo tele mai le lagi, ua faapea mai, Faauta, ua faatasi ma tagata le fale fetafai o le Atua, e mau foi o ia ma i latou; e fai foi i latou mona nuu, e ia te i latou le Atua lava, o lo latou Atua ia. E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua. Ua fetalai mai foi lē tietie i le nofoālii, Faauta, ou te faia ia fou mea uma lava. Ua fetalai mai foi o ia ia te au, Ia e tusi; auā o upu nei e moni ma le faamaoni ia. Ua fetalai mai foi o ia ia te au, Ua uma ona fai. O a‘u le Alefa ma le Omeka, o le amataga ma le gataaga. O le ua fia inu ou te foaifuaina atu ia te ia ai le puna o le vai ola. O lē manumalo e maua e ia mea uma, e fai foi a‘u mona Atua, e fai foi o ia mo‘u atalii. A o e loto vaivai, ma e lē faalogo, ma e fai mea e inosia, ma e fasioti tagata, ma e faitaaga, ma e faataulāitu, ma e ifo i tupua, atoa ma e tala pepelo uma, e fai o latou tofi i le lepa e mu i le afi ma le teio, o le oti faalua lea. Ua alu ane foi ia te au le tasi o ia agelu e toafitu o e sa i ai ipu e fitu na tutumu i mala e fitu e gata ai, ua tautala mai foi o ia ia te au, ua faapea mai, Sau ia, ou te faaali atu ia te oe le faatoanofotane, o le faletua lea o le Tamai mamoe.

Ua ia avea foi a‘u i le Agaga i le mauga tele ma le maualuga, ua ia faaali foi ia te au Ierusalema, o le aai tele ma le paia, o loo alu ifo i le lagi mai le Atua, ua i ai le pupula o le Atua; o lona pupula foi e pei o se maa tāua lava, e pei o se maa iasepi i lona faatioata mai; ua i ai foi le pa tele ma le maualuga, ua i ai puipui e sefulu ma le lua, ua i puipui foi agelu e toasefulu ma le toalua, ua tusia ai foi igoa, o igoa ia o itu aiga e sefulu ma le lua o le fanauga a Isaraelu, ua i sasaē o puipui e tolu, ua i le itu i matu o puipui e tolu, ua i le itu i toga o puipui e tolu, ua i sisifo o puipui e tolu. Ua i le pa foi o le aai o faavae e sefulu ma le lua, ua i ai foi igoa o le au aposetolo a le Tamai mamoe e toasefulu ma le toalua. O le na tautala ma a‘u sa i ai le u auro e fua a‘i e ia le aai, ma ona puipui, atoa ma ona pa. Ua faatu faatāfafa foi le aai, o lona umi ua tusa ma lona lautele; ua fuatia foi e ia o le aai i le u, e sefulu afe ma afe e lua o setatio; o lona umi, ma le lautele, ma le maualuga, ua tutusa lava ia. Ua fuatia foi e ia lona pa, e tasi le selau ma le fagafulu ma le fa o kupita, o le fua a le tagata, o a le agelu lea. Ua ati foi lona pa i maa iasepi; o le aai o le auro lelei lea, ua pei o le tioata manino. Ua teteu foi noopa o le aai i maa tāua uma; o le noopa muamua o le iasepi lea, o lona lua o le safaira lea, o lona tolu o le kakito lea, o lona fa o le samaraki lea; o lona lima o le saritonu lea, o lona ono o le salikea lea, o lona fitu o le tasesa lea, o lona valu o le soama lea, o lona iva o le topasi lea, o lona sefulu o le kuasopera lea, o lona sefulu ma le tasi o le uakini lea, o lona sefulu ma le lua o le aselama lea. O puipui foi e sefulu ma le lua o penina ia e sefulu ma le lua; taitasi le puipui ma le penina e tasi na fai a‘i; o le ala tele foi o le aai o le auro lelei lea, e pei o le tioata manino.

Ou te lei iloa ai foi se malumalu; auā o lona malumalu o le Alii le Atua lea, e ona le malosi uma lava, atoa ma le Tamai mamoe. E le aoga foi i le aai ona pupula i ai o le la, po o le masina; auā o le pupula o le Atua ua faamalamalamaina ai ia, o le Tamai mamoe foi o lona lamepa lea. O nuu foi o e ua faaolaina latou te savavali i lona malamalama; o tupu foi o le lalolagi latou te au mai i ai o latou mamalu ma viiga. O ona puipui foi e le punitia lava i le ao; auā e leai se po i lea mea. Latou te au mai foi i ai le mamalu ma le viiga o nuu. E le sao atu lava i ai se mea leaga e tasi, po o se na te faia se mea inosia, po o se pepelo; na o i latou lava e ua tusia i le tusi o le ola a le Tamai mamoe.

Faauta foi, ou te vave alu atu; ua ia te au foi le taui ou te taui taitasi atu ia tusa ma lana ua fai.