32 – Maliu faamaturo

Ua oo ina atoa o aso, ona avatu ai lea e Kaino o le fua o le fanua o le taulaga ia Ieova. A o Apelu, ua ia avatu foi ‘uluai tama a lona lafu, o e pepeti ai lava. Ua silasila mai Ieova ia Apelu, atoa ma lana taulaga; a e peitai o Kaino ma lana taulaga, ua ia le silasila i ai. Ona ita tele ai lea o Kaino, ua faaūū lava ona mata. Ona fetalai atu lea o Ieova ia Kaino, Se a le mea ua e ita ai? Se a foi ua faaūū ai ou mata? Pe afai e te amio lelei e te le maua ea le fiafia? A e afai e te le amio lelei o loo taoto i le faitotoa le agasala. E uai atu lona manao ia te oe, e te pule foi oe ia te ia. Ua fai mai foi Kaino ia Apelu lona uso, ua iai foi i laua i le fanua, ona tulai atu lea o Kaino ia Apelu lona uso, ma fasioti ia te ia. Ua fetalai atu Ieova ia Kaino, O fea o iai Apelu lou uso? Ona tali mai lea o ia, Ou te lei iloa; o a‘u ea le leoleo o lo‘u uso? Ua fetalai atu o ia, Se a le mea ua e faia? O loo alaga mai ia te au mai le eleele le leo o le toto o lou uso.

Ua mavae ia mea, ona tofotofo lea o le Atua ia Aperaamo, ua faapea mai ia te ia, Aperaamo e; ona tali atu lea o ia, O a‘u lenei. Ona fetalai mai lea o ia, Ia e ave lou atalii, o lou atalii e toatasi, o le ua pele ia te oe, o Isaako lava, ma e alu i le nuu o Moria; ma avatu ia te ia e fai ma taulaga mu i lea mea i le tasi mauga ou te ta‘uina atu ai ia te oe. Ona ala tulai lea o Aperaamo i le taeao, ma faanofoa lana asini, ua ave foi e ia ni ona taulelea e toalua, ma Isaako lona atalii; ma ua taisi fafie e fai a‘i le taulaga mu, ona tulai lea o ia ma alu i le mea na ta‘uina mai ai e le Atua ia te ia. Ua oo i le aso tolu ona tepa ae lea o Aperaamo, ma ua iloa lea mea a e mamao. Ua fai atu foi Aperaamo i ona taulelea, Tali atu ia iinei ma le asini, a o a‘u ma le tama ma te o i o e tapuai ai, i lo ma toe foi mai ia te oulua. Ua ave foi e Aperaamo le fafie e fai a‘i le taulaga mu, ma faaee ai ia Isaako lona atalii, ua ave foi e ia i ona lima le afi ma le polo; ona o ai lea o i laua. Ona fai atu lea o Isaako i lona tamā o Aperaamo, ua faapea atu, Lo‘u tamā e; ona tali mai lea o ia, Lo‘u atalii e, o a‘u lenei. Ona fai atu lea o ia, Faauta, o le afi ma le fafie; a o ifea se tamai mamoe e fai a‘i le taulaga mu? Ona tali mai lea o Aperaamo, Lo‘u atalii e, e au mai e le Atua se tamai mamoe māna e fai a‘i le taulaga mu; ona o faatasi ai lea o i laua. Ua oo atu i laua i le mea na ta‘uina mai ai e le Atua ia te ia; ona faia lea e Aperaamo o le fata faitaulaga i lea mea, ma faaafu le fafie; ua na fusifusi foi lona atalii o Isaako, ma faaee ia te ia i le fata i luga o le fafie. Ona aapa atu lea o Aperaamo lona lima i le polo, o le a fasioti lona atalii. Ona valaau ifo lea o le agelu a Ieova ia te ia mai le lagi, ua faapea mai, Aperaamo, Aperaamo e; i le ua tali atu o ia, O a‘u lenei. Ona fetalai mai lea o ia, Soia le oo lou lima i le tama, aua foi e te fai se mea e tasi ia te ia; auā ua ou iloa nei ua e mata‘u i le Atua, ina ua e le taofia lou atalii, o lou atalii e toatasi, a ua e tuu mai ia te au. Ona tepa ae lea o Aperaamo, ua iloa atu, faauta, o le mamoe poa i ona tua ua lavelavea ona nifo i le laau filifili; ona alu lea o Aperaamo, ma au mai le mamoe poa, ua osi ai le taulaga mu e sui a‘i lona atalii.

Ia sao ona lelei la outou tamai mamoe, o le poa, e tasi lona tausaga, tou te au mai ai i le lafu mamoe, po o le lafu ‘oti.

Aua e te fasioti tagata.

Ou te lei fai atu ea ia te oe? Ia e faamalosi, ma loto tele; aua e te fefe, aua e te mata‘u; auā o Ieova lou Atua o loo ia te oe i mea uma e te alu i ai.

Ona fai mai lea o le tupu i le ‘au e faafeao na tutū i ona luma, Ina liliu atu ia, ma fasioti i faitaulaga a Ieova, auā ua ‘au i latou ma Tavita; auā foi na latou iloa ua sola o ia, a e lei ta‘u mai ia te au. A ua le mafafai auauna a le tupu ona faaoo o latou lima e fasi ai i faitaulaga a Ieova. Ona fai mai lea o le tupu ia Toeka, Ina liliu atu ia oe, ma e fasi i faitaulaga. Ona liliu atu ai lea o Toeka le sa Etomā, ma na fasi i faitaulaga; na ia fasioti ai i lea aso o tagata e toavalugafulu ma le toalima o e na oofu i efota o ie lino. O Nove foi le aai o faitaulaga na ia fasi ai i le pelu; o tane atoa ma fafine, o tama iti atoa ma tama meamea, o povi, ma asini, atoa ma mamoe ua ia fasi i le pelu.

auā na fasiotia e Iesepela o perofeta a Ieova, ona ave lea e Opetaia o perofeta e toaselau, ma nanā ia te i latou e taitoalimagafulu i ana, na ia fafaga foi ia te i latou i areto ma vai.)

Ona fai atu lea o ia, Ua ou matua maelega a‘u ona o Ieova le Atua o ‘au, auā ua tuua e le fanauga a Isaraelu lau feagaiga, ua latou sŏloia i lalo ou fata faitaulaga, ua fasiotia foi e i latou au perofeta i le pelu, ua toe na o a‘u lava; ua latou fia fasioti foi ia te au.

Saili ia outou ia Ieova ma lona malosi; sa iliili ia te ia, aua le aunoa.

Ona oo mai lea o le Agaga o le Atua ia Sakaria le atalii o Ieoiata le faitaulaga, ua tu foi o ia i luga o le nuu, ma fai atu ia te i latou. O loo faapea ona fetalai mai o le Atua, Se a le mea tou te soli ai poloaiga a Ieova, e le manuia ai outou? Ua tuua e outou o Ieova, o le mea lea ua tuua ai outou e ia. Ona foua lea o ia e i latou, ma latou fetogi ia te ia i maa i le lotoā o le fale o Ieova, ina ua fai atu ai le tupu.

A ua latou vaogatata, ma latou fouvale ia te oe, ua latou lafoaiina foi au tulafono i o latou tua, ua latou fasioti foi au perofeta o e na aoai ia te i latou ia latou foi mai ia te oe, ua faia lava e i latou mea faaonoono e tele.

Ona tulai ai lea o Iopu, ma saei lona ofu, ma tafi lona ulu, ua faapaū foi o ia i le eleele ma ifo. Ua fai atu foi o ia, Na ou sau lē lavalavā mai le manava o lo‘u tinā, o le a ou foi atu i ai ua le lavalavā; na foaiina mai e Ieova, ua aveeseina foi e Ieova; ia faamanuina le suafa o Ieova.

E ui lava ina fasioti o ia ia te au, ou te faamoemoe pea ia te ia; a e peitai ou te faatonu atu o‘u ala i ona luma.

Auā ua ou iloa, o loo soifua le na te togiolaina a‘u; o aso amuli foi e tulai mai ai o ia i luga o le eleele. E ui lava foi ina faaumatia lenei tino pe a mavae atu lo‘u pa‘u, a e ou te iloa atu le Atua i lo‘u tino; ou te iloa atu ia te ia mo a‘u lava, e vaai atu foi o‘u mata ia te ia, a e le o se tasi; pe a le toe ai o‘u manao i totonu ia te au.

A e peitai ua silafia e ia lo‘u lava ala; a tofotofoina a‘u, ou te sao atu ai e pei o le auro. Ua tumau o‘u vae i ona tulagaaao; ua ou tausisi i lona ala, ua ou le liliu ese ai lava.

Se a le mea ua faanunununu ai nuu ese, ma mafaufau ai nuu i le mea e le aoga? Ua tutū mai tupu o le lalolagi, ua pulega faatasi foi alii, e tetee atu ia Ieova ma le na ia faauuina, Se‘i tatou motusi ese o laua noataga, ma lafoaieseina a laua maea ia te i tatou. E soisoi le o afio i le lagi; e tauemu le Alii ia te i latou.

A ia fiafia i latou uma o e faatuatua ia te oe; ia latou alalaga fiafia e faavavau, auā e te faamamaluina i latou; ia olioli foi ia te oe o e alolofa i lou suafa.

Ou te tuu Ieova i o‘u luma e le aunoa; auā o i lo‘u itu taumatau o ia, e le faagaeetia ai lava a‘u. O le mea lea e fiafia ai lo‘u loto, ma olioli ai lo‘u mamalu; e malolo foi lo‘u tino ma le saogalemu. Auā e te le tuua a‘u i le tuugamau; e te le tuu atu lou tagata paia ia oo i ai le pala. E te faailoa mai ia te au le ala o le ola; o i ou luma le fiafia e mālie ai; o i lou itu taumatau le olioli e faavavau.

A o a‘u, ou te vaavaai i ou fofoga i le amiotonu; ou te mălie pe a a‘u ala ua foliga ia te oe.

Na te faafoisia mai lo‘u agaga; na te ta‘ita‘i ia te au i ala o le amiotonu ona o lona suafa. E ui lava ina ou savali i le vanu o le ata o le oti, ou te le fefe lava i se mea leaga; auā o oe ta te faatasi ma a‘u; o lau laau ma lou tootoo e faamafanafanaina ai a‘u.

O Ieova, o lo‘u malamalama ia, ma lo‘u olataga: o ai ea se ou te fefe ai? O Ieova, o le malosi ia o lo‘u ola; ou te mata‘u ea ia te ai? Na sii taua mai ia te au tagata amio leaga, ina ia ‘ai lo‘u tino o e saua mai ma e ita mai ia te au; ona tausuai lea o i latou, ma latou pauu. E ui lava ina to lauapi se itu taua e tau ma a‘u, e le fefe ai lo‘u loto; e ui ina siitia se taua ia te au, ou te loto tele lava i lea mea. E tasi le mea ua ou ole atu ai ia Ieova, o le mea lava lea ou te saili atu ai; ia ou nofo i le fale o Ieova i aso uma o lo‘u ola, ina ia ou iloa atu ai le matagofie o Ieova, ma ou saili i lona malumalu. Auā na te faalilo ia te au i lona fale apitaga i le aso vale; na te natia a‘u i le mea lilo i lona fale fetafai; na te faaeetia a‘u i le papa.

Ina fiafia ia ia Ieova, ma olioli o outou o e amiotonu; ina alalaga ia ma le fiafia o outou uma o e ua faamaoni o outou loto.

Ua manatunatu le tagata amio leaga i se mea e leaga ai le tagata amiotonu; ua lilivau foi ona nifo ia te ia. E soisoi le Alii ia te ia; auā ua na silafia o le a sau lona aso. Ua fese‘i ae e tagata amio leaga a latou pelu, ua lolou a latou aufana, ia oti ai e ua puapuagaina ma e matitiva, ina ia fasioti i e ua sa‘o a latou amio. E oo a latou pelu i o latou lava fatu, e gauia foi a latou aufana.

Ona o oe lava ua fasiotia i matou i aso uma; ua faatatauina i matou e pei o mamoe a fāsia.

O le Atua, o lo tatou malu ia ma lo tatou malosi; e fai o ia ma fesoasoani silisili i puapuaga. O le mea lea tatou te le fefefe ai, pe a faaliliuina le lalolagi, ma luluina mauga i totonu o le sami;

Auā o lenei Atua, o lo tatou Atua lava ia e faavavau faavavau lava; o ia lava na te ta‘ita‘iina i tatou e oo lava i le oti.

Ia e tuuina atu ia Ieova o mea e te popole vale ai; o ia lava na te tausia oe; na te le tuuna e faavavau le amiotonu ia faagaeetia.

A o oe, Ieova e, e te soisoi ia te i latou; e te tauemu i nuu ese uma lava. Ou te naunau atu lava ia te oe ona o lona malosi; auā o le Atua o lo‘u ‘olo maualuga ia. O loo ou lumanai lo‘u Atua alofa; e faaali mai ia te au e le Atua le taui o e ita mai ia te au.

A ou manatua oe i lo‘u moega, ou te mafaufau ia te oe i leoleoga i itu po. Auā na fai oe ma fesoasoani ia te au; ou te olioli foi i le paolo o ou apaau. Ua pipii atu lava lo‘u loto ia te oe; o lou aao taumatau ua taofiina ai a‘u. A o i latou o e saili e fasioti ia te au ia ou fano, latou te oo i mea loloto i le eleele.

A ia fiafia o e amiotonu; ia latou olioli lava i luma o le Atua; ia matuā fiafia lava i latou. Ia outou pepese atu i le Atua, ia fai pesega i lona suafa; ia outou faalaulelei le ala mo lē tietie ma afio atu i le vao; o Ioa o lona suafa lea, ma ia outou olioli i ona luma.

A o a‘u, e le aunoa ona ta faatasi ma oe; na e taofiina lo‘u lima taumatau. E te ta‘ita‘i ia te au i lau pule, a e mulimuli ane e te talia mai a‘u i le manuia. O ai ea se ua ia te au i le lagi? E leai foi se tasi i le lalolagi ou te fiafia i ai, na o oe. E vaivai lo‘u tino ma lo‘u loto, a o le Atua, o le papa ia o lo‘u loto ma lo‘u tofi e faavavau.

Amuia le nuu ua latou lagona le leo fiafia; Ieova e, latou te savavali i le malamalama o ou fofoga. Latou te fiafia lava i lou suafa i aso uma lava; o lau amiotonu foi e maualuluga ai i latou.

O le nofo i le mea lilo o i ai lē Silisili ese, e mau o ia i le paolo o Le e ona le malosi uma lava.

Le Atua e, ia faasilisiliina oe i le lagi, ia i ai i le lalolagi uma lou mamalu.

E tausi e Ieova i e faigofie; sa vaivai a‘u, ona faaola mai lea o ia ia te au. Lo‘u agaga e, ia e foi atu i lou mapusaga; auā ua agalelei mai Ieova ia te oe. Auā ua e laveai mai ia te au nai le oti, o o‘u mata ne‘i tagi, ma o‘u vae ne‘i paū. Ou te savali i luma o Ieova i nuu o tagata ola.

E silisili i le manatu o Ieova le oti o ona tagata amio Atua.

Ia olioli i le mamalu e ua amio Atua; ia latou alalaga fiafia i o latou moega;

Ia e faatuatua ia Ieova ma lou loto atoa; a e aua le faalagolago i lou lava atamai.

E sili ona lelei o le ta‘uleleia i le suāuu lelei; ma le aso e oti ai e sili i le aso e fanau mai ai.

E faaumatia e ia le oti e faavavau; e soloiesea foi e le Alii o Ieova o loimata i mata uma lava; e faateaeseina foi e ia le gao o lona nuu i le lalolagi uma lava; auā ua fetalai mai ai Ieova.

E toe ola mai ou tagata oti, o latou tino oti e toe tutū mai. Ina ala mai ia, ma alalaga fiafia outou e o nonofo i le efuefu; auā o lou sau e pei o le sau o le vao iti ia; e lafo atu foi e le eleele e ua oti.

E foi mai e ua togiolaina e Ieova, latou te o mai foi i Siona ma le alaga ma le olioli e faavavau i luga i o latou ulu; latou te maua le olioli ma le fiafia, a e sosola ese le faanoanoa ma le mapuitiga.

Ia alaga oe le lagi e, ia olioli oe le lalolagi e, ia leo tetele outou mauga, ma ia alalaga fiafia; auā ua faamafanafanaina e Ieova lona nuu, ua ia alofa foi i ona tagata ua tigaina.

Na a‘u tuuina atu lo‘u tua i e sasa mai, ma o‘u alafau i e futi le ‘ava; ou te lei ufiufi foi o‘u mata i le mā ma le feanu. A o le Alii o Ieova e fesoasoani mai o ia ia te au; o le mea lea ou te le mā ai; o le mea lea ua ou faia o‘u mata ia pei o le papa alā; ua ou iloa foi e le faamaina a‘u.

E foi mai e ua togiolaina e Ieova, latou te o mai foi i Siona ma le alaga ma le olioli e faavavau i luga i o latou ulu; latou te maua le olioli ma le fiafia; a e sosola ese le faanoanoa ma le mapuitiga.

Ua inosia ma tuulafoaiina o ia e tagata; o le tagata faanoanoa, ua masani foi ma le tiga; e peiseai ua ‘alo ese mata ia te ia; ua inosia o ia, ma ua tatou le manatua lava o ia. E moni, ua na tauave o tatou tiga, ma na tauave o tatou faanoanoa; a ua tatou manatu o ia ua taia, ua fasia e le Atua, ma ua faatigaina. A ua manua o ia ona o a tatou solitulafono, ua momomo o ia ona o a tatou amio leaga; o le aoaiga e filemu ai tatou sa i ona luga lea, o ona faalavalava foi ua malolo ai tatou. O i tatou uma ua sē i tatou e pei o mamoe, ua taitasi ma faasaga i lona lava ala; a ua faaoo ia te ia e Ieova le amio leaga o i tatou uma. Na faasauaina o ia, sa tigaina foi o ia, a e le tautala mai o ia; e pei o le tamai mamoe ua ta‘ita‘iina ia fasia, e pei o le mamoe foi i luma o e sele lona fulufulu, ua faalologo ia, o ia foi ua le tautala mai. O le faasaua ma le faamasinoga na aveeseina ai o ia; o ai foi na te talatalaina lana tupulaga? auā ua vavaeeseina o ia i le nuu o tagata ola; na taia o ia ona o le solitulafono a lo‘u nuu. Na tofia o ia ia fai lona tuugamau faatasi ma ē pagotata, a e peitai sa i le mauoa ina ua maliu; auā na le faia e ia se faasauaga, ua leai foi se pepelo i lona fofoga. A ua finagalo Ieova e tu‘imomomo ia te ia, ua ia faatigaina o ia; pe afai na te faia se taulaga mo agasala, ona iloa lea e ia o lana fanau, e faalevalevaina ona aso, o le finagalo foi o Ieova e manuia lea ia te ia. Ona o le tiga o lona agaga na te iloa ai lana fanau, e malie ai o ia; o le malamalama mai ia te ia e ta‘uamiotonuina ai tagata e toatele e la‘u auauna ua amiotonu; auā e tauave e ia a latou amio leaga. O le mea lea ou te vaevaea ai se vaega mo ia faatasi ma e ua sili, e vaea foi le vete faatasi ma e fitafita, ona ua ia sasaa atu o lona ola ia oti; na faitauina foi o ia faatasi ma e pagotata; na ia aveina foi le agasala a tagata e toatele, ua fautua foi o ia mo e solitulafono.

Auā tou te o atu ma le fiafia, e ta‘ita‘iina foi outou ma le manuia; o atu mauga ma mauga e leo tetele ma le alaga fiafia i o outou luma, e pāti lima foi laau uma o le vao.

Ua fano le ua amiotonu, a e leai sē mafafau i ai; ua aveeseina foi tagata alolofa, a ua leai sē manatunatu ua aveeseina le ua amiotonu ai le leaga. E ulu atu o ia i le manuia, latou te malolo i o latou moega, o i latou ia o e savavali ma le tonu.

e avatu le fiafia i e faanoanoa i Siona, e foaiina atu ia i latou le matagofie e sui a‘i le lefulefu, o le uu o le olioli e sui a‘i le faanoanoa, o le ofu e fai a‘i viiga e sui a‘i le loto faavaivai; e igoa i latou, O laau o le amiotonu, o le faatoaga a Ieova, e fai mona viiga.

Ou te matuā fiafia ia Ieova, e olioli lo‘u loto i lo‘u Atua; auā ua na faaofuina a‘u i ofu o le olataga, ua na faapulupuluina a‘u i le ofu o le amiotonu; e pei o le faatoafaiavā ua pulou o ia pei se faitaulaga; e pei o le faatoanofotane foi ua teuteu o ia i ana teuga.

O latou puapuaga uma na le fai ai o ia mo latou fili; na faaolaina i latou e le agelu mai ona luma; na ia faatauina i latou i lona alofa ma lona agalelei; na ia siitia i latou ma ave ia i latou i aso uma anamua.

O i ai tagata o sa Iutā, o e na tofia e oe e pule i sauniga o le itu malo o Papelonia, o Sataraka, o Mesako, ma Apeteniko; le tupu e, ua le ava ia tagata ia te oe, latou te le auauna i ou atua, ua le ifo foi i latou i le tupua auro ua e faatuina. Ona fai atu ai lea o Nepukanesa ma le lilivau ma le ita tele ia ta‘ita‘iina mai Sataraka, ma Mesako, ma Apeteniko. Ona latou ta‘ita‘iina ai lea o ia tagata i luma o le tupu. Ua fai atu Nepukanesa, ua faapea atu ia te i latou, Sataraka e, Mesako e, ma Apeteniko, pe se matuā manatu ea tou te le auauna i o‘u atua, ma outou le ifo i le tupua auro na a‘u faatuina? O lenei, afai ua saunia outou pe a outou lagona le leo o le pu, le faaili, le kitara, le sapeka, le saniteri, le sumefono, atoa ma laaupese uiga eseese uma, tou te faapauu ma ifo i le tupua ua a‘u faia, e lelei; a e afai tou te le ifo, e lafoina outou i lena lava itu aso i totonu o le ogaumu e mu ai le afi; o ai foi se Atua na te laveaiina outou ai la‘u pule?

Ua tali mai Sataraka, Mesako, ma Apeteniko, ua faapea mai i le tupu, Nepukanesa e, e le aoga ona matou tali atu ia te oe i lenei mea; afai o lea, ua mafai lo matou Atua, matou te auauna i ai, ona laveai mai ia te i matou ai le ogaumu e mu ai le afi, na te laveaiina mai lava i matou ai lau pule le tupu. A e peitai, a le o lea, ia e silafia e oe le tupu e, matou te le auauna i ou atua; o le tupua auro foi ua e faatuina, matou te le ifo i ai.

Ona tumu ai lea o Nepukanesa i le ita tele, ua ese le tu o ona fofoga ia Sataraka, ma Mesako, ma Apeteniko; ua tautala atu ia, ua faapea atu, ia faaaasa le ogaumu, ia faafitu ona sili i le ua masani ai ona tafuina. Ona fai atu ai lea o ia i tagata e sili ona totoa i ana ‘au latou te fusifusi ia Sataraka, ma Mesako, ma Apeteniko, ia lafoina i le ogaumu e mu ai le afi. Ona fusifusia ai lea o ia tagata, atoa ma o latou ofuvae, ma o latou ofu tino, ma o latou ofu talaloa, atoa ma o latou ofu, ma ua lafoina i totonu i le ogaumu e mu ai le afi. Ua tauanau le poloaiga a le tupu, ma le ogaumu ua aasa tele lava, o le mea lea na fano ai i le mumū o le afi o ia tagata e na avae ia Sataraka, ma Mesako, ma Apeteniko. A o ia tagata e toatolu, o Sataraka, o Mesako, ma Apeteniko, ua pauu i latou o fusifusia i totonu o le ogaumu e mu ai le afi.

Ona matuā ofo ai lea o Nepukanesa le tupu, ua vave ona tulai, ua fai atu, ua faapea atu i ana tulafane, Pe na tatou le lafoina ea tagata e toatolu o fusifusia i totonu o le afi? Ua tali mai i latou, ua faapea mai i le tupu, Le tupu e, sa faapea lava. Ua tali atu o ia, ua faapea atu, Faauta, ua ou iloa tagata e toafa, ua tatalaina, ua feoai i totonu o le afi, ua le afaina lava i latou; ua tino mai lona toafa ua pei o se alo o le Atua. Ona faalatalata atu lea o Nepukanesa i le gutu o le ogaumu e mu ai le afi, ua fai atu ia, ua faapea atu, Sataraka e, Mesako, ma Apeteniko, o auauna a le Atua silisili, o mai ia, ina o mai. Ona o mai ai lea o Sataraka, Mesako, ma Apeteniko mai totonu o le afi. Ona faapotopotoina ai lea o alii sili, o faipule, o e pule i nuu, atoa ma tulafale a le tupu, ua latou matamata i ia tagata ua le mafaia i le afi ona muina o latou tino, e leai foi so latou lauulu ua mu, e lei liua foi o latou ofuvae, ua le namu afi lava i latou. Ua fai atu Nepukanesa, ua faapea atu, Ia faafetaia le Atua o Sataraka, Mesako, ma Apeteniko, o le na auina mai lana agelu, ua laveaiina ai ana auauna e na faatuatua ia te ia, ua liliuina foi le upu a le tupu, ma ua latou tuuina atu o latou tino ina ne‘i latou auauna ma ifo i se tasi atua, tau lava o lo latou lava Atua.

Ua iloa e Tanielu ua tusia le tusi, ona alu atu ai lea o ia i lona fale, ua avanoa faamalama o lona potu e faasaga i Ierusalema, ua ta‘i foi faatolu i aso ona tootuli o ia i ona tulivae, ma tatalo, ma faafetai i luma o lona Atua, faapei ona masani ai o ia. Ona lolofi ane ai lea o ia tagata, ua maua Tanielu o loo o tatalo ma faatoga atu i luma o lona Atua. Ona latou o atu ai lea, ua faapea atu i le tupu i a le vavao a le tupu, E lei tusia ea o oe le vavao, ai se tasi tagata e faatoga atu i se tasi atua, po o se tasi tagata, a e tau lava o oe e faatoga i ai, le tupu e, i po e tolugafulu, e lafoina o ia i le lua o leona? Ua tali mai le tupu, ua faapea mai, E moni lava lea mea, faapei o tulafono a Metai ma Peresia e le tālaina. Ona latou tali atu lea, ua faapea atu i le tupu, O lena Tanielu, o le tagata o le tafeaga o Iuta, e le ava o ia ia te oe, le tupu e, ma le vavao na e tusia, a ua tatalo o ia ta‘i foi faatolu i aso. Ua faalogo le tupu i na upu, ona tiga tele ai lea o ia ia te ia lava, ua naunau o ia ia laveaiina o Tanielu; ua oo ina goto le la o taumafai pea lava ia ina ia laveai ia te ia. Ona lolofi ane ai lea o ia tagata i le tupu, ua faapea atu i le tupu, Le tupu e, ia e silafia le tulafono a Metai ma Peresia, e le tālaina lava se vavao, po o se tulafono ua faamauina e le tupu.

Ua fai atu le tupu, ona latou ta‘ita‘iina ane ai lea o Tanielu, ua lafo ia te ia i le lua o leona. Ua fai atu le tupu, ua faapea atu ia Tanielu, O lou Atua, o le ua e auauna i ai e le aunoa, o ia na te laveaiina oe. Ua au mai foi le maa, ua tuu ai i le gutu o le lua, ona faamaufaailogaina lea e le tupu i lana mama, atoa ma le mama a alii sa ia te ia, ina ne‘i liua le pule ia Tanielu. Ona alu atu lea o le tupu i lona maota ua le taumafa ia i lea po; e leai foi ni lauupese na avane i ona luma, ma ua te‘a ia te ia le moe. Ua tulai le tupu i le vave ao, ua faataalise atu i le lua o leona. Ua oo ia i le lua, ona alaga atu lea o ia ma le leo faamamai ia Tanielu; ua fai atu le tupu, ua faapea atu ia Tanielu, Tanielu e, le auauna a le Atua soifua, ua mafai ea e lou Atua, o le ua e auauna i ai e le aunoa, ona laveai ia te oe ai leona? Ona tali mai lea o Tanielu i le tupu, Le tupu e, ia soifua oe e faavavau, ua auina mai e lo‘u Atua o lana agelu, ua punitia ai gutu o leona, ua le afaina ai a‘u; auā ua silafia e ia ua leai sa‘u amio i ona luma; e leai foi se mea leaga ua a‘u faia i ou luma, le tupu. Ona fiafia tele lea o le tupu ona o ia, ua ia fetalai atu ia aveina ae Tanielu ai le lua; ona aveina ae ai lea o Tanielu ai le lua, ua le afaina lava o ia, auā na ia faatuatua i lona Atua.

Na te faia upu i lē Silisili ese, ma faaumatia le au paia a lē Silisili ese, e manatu o ia e faaliliu i tausaga ma tulafono; e tuuina atu foi i latou i lana pule seia mavae le tausaga, ma tausaga, ma le vaeluagalemu o le tausaga.

O ona po foi ia e tulai ai Mekaeli, o le alii sili, o le na te tulai ona o tagata o lou nuu; e oo mai foi aso vale, e leai sona tusa talu ona faatoa tupu o nuu, ua oo i ia lava aso; o ona po foi ia e laveaiina ai ou tagata, o i latou uma o e ua tusia i le tusi. E toatele foi o e momoe i le efuefu o le eleele latou te ala mai, o isi i le ola e faavavau, a o isi i le faalumaina ma le inosia e faavavau. O e popoto foi, e fepulafi i latou faapei o le pupula o le lagi; o i latou foi ua faaliliu ai tagata e toatele ia amiotonu, e pei o fetu i latou e faavavau faavavau lava.

O loo agalelei Ieova, o le ‘olo ia i le aso o le puapuaga; o loo silafia e ia e o faatuatua ia te ia.

a e peitai a‘u, ou te olioli lava ia Ieova, ou te fiafia lava i le Atua o lo‘u faaolataga.

Amuia ē sauaina ona o le amiotonu; auā e o latou le malo o le lagi. Amuia outou pe a latou upu leaga, ma faasaua ia te outou, ma latou tuuaiina pepelo outou i mea leaga uma ona o a‘u. Ia outou olioli ma fiafia lava; auā o i le lagi lo outou taui e tele; auā na faapea ona latou faasaua i perofeta e na muamua ia te outou.

A ou te fai atu a‘u ia te outou, ia outou alolofa atu i e ua ita mai ia te outou, ia outou faamanuia atu i e ua fetuu mai ia te outou, ia outou agalelei atu i e ua ‘ino‘ino mai ia te outou, ia outou tatalo foi mo e ua tuua‘i fua mai ma faasaua mai ia te outou;

Aua tou te tolo‘a‘i oa mo outou i le lalolagi, o i ai le mogamoga ma le ele e faaumatia ai; o i ai foi tagata gaoi e eli atu, ma gaoi ai. A ia outou tolo‘a‘i oa mo outou i le lagi, e le o i ai se mogamoga, po o se ele e faaumatia ai; e le o i ai foi tagata gaoi e eli atu, ma gaoi ai.

Ia outou ma tagata; auā latou te tuuina atu outou i fono, ma latou sasa ia te outou i o latou sunako. E ta‘ita‘iina atu foi outou i luma o alii ma tupu ona o a‘u, e fai ma molimau ia te i latou atoa ma nuu ese. Pe a latou tuuina atu outou, aua tou te popole pe faapefea, pe se a foi tou te fai atu ai; auā e foaiina mai ia te outou i lea lava itu aso se upu tou te fai atu ai. Auā e le o outou e tautala atu ai, a o le Agaga o lo outou Tamā e tautala mai ai i totonu ia te outou.

E tuuina atu le uso e le uso ia oti, e tuuina atu foi le fanau e le tamā; e tutū atu foi le fanau i o latou matua ina ia fasiotia i latou. E inosia foi outou e tagata uma ona o lo‘u igoa; a o lē tumau seia oo atu i le gataaga, e faaolaina o ia. Pe a latou faasaua ia te outou i le tasi aai, ia outou sosola i se tasi; auā e moni, ou te fai atu ia te outou, e le soo aai o Isaraelu ia te outou seia sau le Atalii o le tagata.

Aua foi tou te matatau i e fasioti le tino, a e latou te le mafaia ona fasioti le agaga; a e lelei ona outou matatau i le ua mafai ona fano ia te ia le agaga atoa ma le tino i Kēna.

O se le ave lona satauro, ma le lē mulimuli mai ia te au, e le aoga foi lea ia te au. O lē maua lona ola, e māumau ai ia te ia; a o le faamāumau i lona ola ona o a‘u, e maua e ia.

Ia outou o mai ia te au, o outou uma o e tigaina ma mafatia i avega, o a‘u foi e malolo ai outou. Ia outou amoina la‘u amo, ma ia outou faaa‘oa‘o ia te au, auā o a‘u lē agamalu ma le loto maulalo; ona maua lea e outou o le malologa mo outou agaga. Auā e avegofie la‘u amo, o la‘u avega foi e māmā ia.

A ua o i fafo le au faresaio, ona latou taupulepule ai lea ia te ia, ina ia latou fasioti ia te ia.

A o le mea sa luluina i le mea papa, o le tagata lea ua faalogo i le upu, ona talia loa lea ma le fiafia; a ua leai ni aa ia te ia, ua faaletumau ia; auā pe a tupu le puapuaga, po o le sauaga ona o le upu, ona tausuai loa lea o ia.

E tusa foi le malo o le lagi i le oa ua natia i le fanua; ua iloa e le tasi, ona nanā ai lea e ia; ua alu foi ma le fiafia, ma faatau atu ana mea uma, i le faatau a‘i mai lea fanua. E tusa foi le malo o le lagi ma le tagata faatauoa, ua sailiili penina lelei; ua iloa e ia le tasi penina tau tele, ona alu ai lea o ia, ua faatau atu ana mea uma, i le faatau a‘i mai.

ona fai atu lea o ia i ana auauna, O Ioane le papatiso lena; ua tu mai o ia i e ua oti; o le mea foi lea ua fai ai vavega e ia. Auā na pue e Herota ia Ioane, ua fusifusi foi ia te ia, ma tuuina atu o ia i le fale puipui, ona o Herotia le avā a Filipo lona uso. Auā na fai atu Ioane ia te ia. E sa ona fai o ia mau avā. Ua ia fia fasioti ia te ia, a ua mata‘u i le motu o tagata, auā o la latou taofi o le perofeta ia. Ua oo ina fai le faamanatuga o le aso na fanau mai ai Herota, na saasaa i o latou luma le tama teine a Herotia, na ia faafiafia foi ia Herota. O le mea lea na ia matuā fai atu ai ia te ia ma le augani na te avatu ia te ia se mea na te ole mai ai. A o ia, ua faaosoina e lona tinā, ua fai atu, Ia e au mai iinei ia te au le ulu o Ioane le papatiso i se tanoa. Ona tiga ai lea o le tupu; a ona o le augani, ma e ua taooto e aai faatasi ma ia, ua ia poloai atu e avatua. Ona auina atu ai lea e ia se tasi, ua vavae mai le ulu o Ioane i le fale puipui. Ona au mai ai lea o lona ulu i le tanoa, ua avane i le teine, ua na aveina atu foi i lona tinā. Ona o ane ai lea o ona soo, ua ave le tino, na tanu ai; ua latou o mai foi, ma ta‘u mai ia Iesu.

O ona po ia na amata ai e Iesu ona faailoa atu i ona soo, e tatau ona alu o ia i Ierusalema, e faatigaina foi i mea e tele e toeaina ma le au faitaulaga sili, ma le au tusiupu, e fasiotia foi o ia, e faatuina foi o ia i le aso tolu.

Ona fetalai atu ai lea o Iesu i ona soo, Ai se tasi e fia mulimuli mai ia te au, aua ne‘i usiusitai o ia ia te ia, a ia ave e ia lona satauro, i le mulimuli mai ai ia te au. Auā ai se fia faasaogalemuina lona ola, e māumau ai ia te ia; a o le faamāumau lona ola ona o a‘u, e maua ai e ia.

Ona tali mai ai lea o Peteru, ua faapea mai ia te ia, Faauta, ua matou tuua mea uma, a e matou mulimuli atu ia te oe; se a foi se mea matou te maua?

Faauta, o le a tatou o ae i Ierusalema, e tuuina atu ai le Atalii o le tagata i le au faitaulaga sili, ma le au tusiupu, latou te faasala ia te ia ia oti; latou te tuuina atu foi ia te ia i nuu ese, ina ia latou faatauemu, ma sasa, ma faasatauro ia te ia; a e toe faatuina o ia i le aso tolu.

Ia outou faalogo mai i le tasi faataoto. O le tasi matai na fai le tovine, ua ia lotoāina i le āi, ua eli ai le soligāvine, ua faia foi le ‘olo, ua tuuina atu e ia i e galulue i vine, ona alu malaga ai lea o ia i le nuu ese. Ua latalata ona po e matua ai le fuata, ona aauina atu ai lea e ia o ana auauna i e galulue i vine, ia maua ona fua. Ona pupue ai lea o e galulue i vine i ana auauna, ua latou sasa i le tasi, ma fasioti le isi, ma fetogi le tasi i maa. Ona toe aauina atu ai lea e ia o isi auauna e sili ona toatele i e na muamua; a ua faapea lava a latou amio ia te i latou. A e mulimuli ane ua auina atu ai e ia o lona atalii ia te i latou, ua faapea ane, Latou te ava mai i lo‘u atalii. A o ia tagata galulue i vine, ua iloa atu lona atalii, ona latou fetautalatalai ai lea, O le suli lenei; o mai ia, tatou te fasiotia o ia, a e fai mo i tatou lona fanua. Ona latou pue ai lea ia te ia, ua lafo ia te ia i tua o le tovine, ona latou fasiotia ai lea.

Faauta mai, o le mea lea ou te aauina atu ai ia te outou o perofeta, ma tagata popoto, ma tusiupu; o isi o i latou tou te fāsiotia ma faasatauroina; a o isi, tou te sasaina i o outou sunako, ma tulituliloa ia te i latou i lea aai ma lea aai; ina ia oo ia te outou le toto uma o e amiotonu ua faamaligiina i le lalolagi, e afua i le toto o Apelu le tagata amiotonu, e oo i le toto o Sakaria le atalii o Parakaio, na outou fasiotia i le va o le malumalu ma le fata faitaulaga.

Ona latou tuuina atu ai lea o outou i le puapuaga, ma latou fasiotia outou, e inosia foi outou e nuu uma ona o lo‘u igoa. O ona po ia e tausuai ai tagata e toatele, e faalata le tasi i le tasi, ma feitagai i latou.

A o lē tumau seia oo i le gataaga, e faaolaina lea.

Auā o ia ona po e oo ai le puapuaga tele, e leai sona tusa talu le amataga o le lalolagi, ua oo lava i ona po nei; e le toe faapea foi amuli. A le faapuupuuina foi ia aso, e le faaolaina se tasi; a e faapuupuuina ia aso ona o e ua filifilia.

ua latou taupulepule i se mailei e mafai ai ona pue, ma fasioti ia Iesu.

Ona fai mai ai lea o Peteru ia te ia, E ui ina tā oti lava faatasi ma oe, ou te le faafiti lava ia te oe. Ua faapea foi ona fai mai o le au soo uma lava.

A o le au faitaulaga sili, ma toeaina, ma le taupulega uma, ua latou saili ni e molimau pepelo ia Iesu, ina ia latou fasioti ia te ia;

Ona latou taufaifeanu ai lea i ona fofoga, ua taufaitu‘i foi ia te ia; ua taufaipo atu foi isi,

Ua ao, ona taupulepule ai lea o le au faitaulaga sili uma ma toeaina o le nuu ia Iesu ina ia fasioti ia te ia; ua latou noanoa ia te ia, ona latou ta‘ita‘i ai lea ia te ia, ma tuu atu ai ia Ponotio Pilato le alii.

Ona tatalaina atu ai lea e ia o Parapa ia te i latou, a ua sasaina e ia o Iesu, ma tuuina atu o ia ia faasatauroina.

Ua feanu i latou ia te ia, ona latou tago ai lea i le u, ma ta i lona ao. Ua uma ona latou faatauemu mai ia te ia, ona latou tatala ese lea o le ofu, ma faaofu ia te ia i ona lava ofu; ona latou ta‘ita‘i atu ai lea ia te ia ia faasatauroina.

Ua latou faasatauro ia te ia, ona tufatufa ai lea e i latou o ona ofu, ua latou fai ai le vili; ina ia taunuu ai le upu a le perofeta, Ua latou tufatufaina o‘u ofu mo i latou, ua latou faia foi le vili i lo‘u ofu tino.

E faapea foi i latou na luluina i le mea papa, o i latou ia ua faalogo i le upu, ona talia loa lea ma le fiafia. A e peitai ua leai ni o latou aa, ua faaletumau i latou; pe a tupu le puapuaga, po o le saua ona o le upu, ona latou tausuai loa lea.

Ua faalogo ai le tupu o Herota, (auā ua ta‘ua lona suafa,) ona fai ane lea o ia, Ua tulai Ioane le papatiso nai e ua oti, o le mea lea ua fai ai e ia o vavega. Ua fai ane isi, O Elia lena; a o isi, ua faapea ane, O le perofeta ia, pe faapei o se tasi o le au perofeta. A ua faalogo ai Herota, ona fai ane lea, O Ioane lena sa ou vavaeeseina lona nuu; ua toe tulai ia nai e ua oti. Auā sa aauina nisi e Herota e pue ia Ioane, ma noanoa ia te ia i le fale puipui, ona o Herotia le avā a Filipo lona uso, ina ua fai o ia māna avā. Auā sa fai atu Ioane ia Herota, E sa ona e fai avā i le avā a lou uso. O lea na ita ai Herotia ia te ia, na ia fia fasioti foi ia te ia, a ua le mafai; auā sa mata‘u Herota ia Ioane, ina ua iloa o le tagata amiotonu o ia, ma le paia; sa leoleo foi o ia ia te ia, na faalogo foi ia te ia, ma na faia mea e tele, ma faalogo ia te ia ma le fiafia. Ua oo i le aso e paganoa, o le aso lea e fai ai le faamanatuga o le fanau mai o Herota, na fai ai e ia le talisuaga tele i alii sili, ma alii o ‘au e taitoaafe, ma matai sili o Kalilaia. Ua ulufale foi le tama teine a Herotia ua saa, ua faafiafia ai ia Herota, atoa ma i latou sa taooto e aai faatasi ma ia; ona fai atu ai lea o le tupu i le teine, Ia e fai mai ia te au se mea e te manao i ai, ou te avatu lava ia te oe; ua ia augani foi ia te ia, So se mea e te fai mai ai, ou te avatua lava ia te oe, e oo lava i le vaeluagalemu o lo‘u malo. Ona ulufafo lea o ia, ma fai atu i lona tinā, Se a se mea ou te fai atu i ai? Ua fai mai e ia, O le ulu o Ioane le papatiso. Ona ulufale loa lea o ia i le tupu, ua tele lise, ua fai atu ia te ia, ua faapea atu, Ou te manao ina ia e au mai nei lava le ulu o Ioane le papatiso i se tanoa. Ona tiga tele ai lea o le tupu; a ona o lana augani, ma e ua taooto e aai faatasi ma ia, ua ia le mafai ona faafiti atu ia te ia. A ua auina loa e le tupu le tasi o le ‘au e faafeao, ua fai atu ia aumaia lona ulu. Ona alu ai lea o ia, ma vavaeeseina lona ulu i le fale puipui. Ua ia au mai foi lona ulu i le tanoa, ua avane i le teine; ua avatu foi e le teine i lona tinā. Ua faalogo ai ona soo, ona o ane lea o i latou, ma ave lona tino, ma tuu ai i le tuugamau.

Ona amata ai lea e ia ona a‘oa‘o atu ia te i latou, e tatau ona tiga le Atalii o le tagata i mea e tele; e lafoaiina foi o ia e toeaina, ma le au faitaulaga sili, ma le au tusiupu, e fasiotia foi o ia; a mavae aso e tolu, i le toe tu mai.

Ona valaau atu lea o ia i le motu o tagata, atoa ma ona soo, ua fetalai atu ia te i latou, Ai se fia mulimuli mai ia te au, aua ne‘i usiusitai o ia ia te ia, a ia ave e ia lona satauro, i le mulimuli mai ai ia te au. Auā ai se fia faasaogalemuina lona ola, e māumau ai ia te ia; a o lē faamāumau lona ola ona o a‘u ma le tala lelei, e faasaoina e ia.

Auā ua ia a‘oa‘o atu i ona soo, ma fetalai atu ia te i latou, Ua tuuina atu le Atalii o le tagata i lima o tagata, latou te fasioti foi ia te ia; a uma foi ona fasia o ia, e toe tu mai o ia i le aso tolu.

ua faapea atu, Faauta, a tatou o ae nei i Ierusalema, e tuuina ai le Atalii o le tagata i le au faitaulaga sili, ma le au tusiupu; latou te faasala ia te ia, ia oti, latou te tuuina atu foi o ia i nuu ese, e faatauemu i latou ia te ia, e sasa foi ia te ia, e feanu foi ia te ia, ma fasioti ia te ia; a e toe tu mai o ia i le aso tolu.

Ona fetalai atu lea o ia ia te i latou i faataoto, Na totō e le tasi tagata le tovine, ua ia lotoāina i le āi, ua eli foi le mea e tali ai le suāvine, ua fai foi le ‘olo, ua tuuina atu i e galulue i vine, ona alu malaga lea o ia i le nuu ese. Ua fai le fuata, ona auina atu lea e ia le auauna i e galulue i vine, ina ia maua ni fua o le tovine i e galulue i vine. A ua latou pue ia te ia, ma sasa, ma aufuaina mai o ia. Ona toe auina atu lea e ia o le tasi auauna ia te i latou; ona latou fetogi lea ia te ia i maa, ua foa lona ulu, ma auina mai o ia ua agaleagaina. Ua toe auina atu foi e ia le tasi; ua latou fasiotia lava o ia; o isi foi e toatele, ua latou sasaina nisi, a ua fasioti nisi. Ona toe lea ia te ia na o lona atalii e toatasi, ua faapelepeleina e ia, ua muliai auina atu o ia ia te i latou, ua faapea ana, Latou te ava mai i lo‘u atalii. A o ia tagata galulue i vine, ua latou fetautalatala‘i, O le suli lenei; ina o mai ia, tatou fasioti ia te ia, ona fai ai lea o le fanua mo i tatou. Ona latou pue lea ia te ia, ma fasioti, ma lafo i tua o le tovine.

Ia outou ia te outou; auā e tuuina atu outou e i latou i fono, ma sasaina outou i sunako; e tutū foi outou i luma o alii ma tupu ona o a‘u, e fai ma molimau ia te i latou. Ia muai tala‘iina foi le tala lelei i nuu uma lava e ao ai. Pe a latou ta‘ita‘iina ma tuuina atu outou, aua ne‘i muai manatu i sa outou e fai atu ai, aua foi le lua‘i fatufatua‘i; a o se mea e foaiina ia te outou i lena itu aso, o lea tou te fai atu ai; auā e le o outou e fai atu ai, a o le Agaga Paia. E tuuina atu foi le uso e le uso ia oti, e tuuina atu foi e le tamā lona atalii, e tutū atu foi le fanau i o latou mātua, ina ia fasiotia i latou. E inosia foi outou e tagata uma ona o lo‘u igoa; a o lē tumau seia oo i le iuga, e faaolaina lea.

Ua mavae po e lua ona oo lea i le paseka, ma areto e le faafefeteina; ona saili lea e le au faitaulaga sili ma le au tusiupu, pe faapefea sa latou mailei e pue ai ia te ia, ma fasiotia.

Ona atili ai lea ona fai mai o ia, E ui lava ina ta oti faatasi ma oe, ou te le faafiti lava ia te oe. Ua faapea foi ona fai mai o i latou uma.

A o le au ositaulaga sili, ma le taupulega uma, ua latou saili i mau ia Iesu, ina ia fasioti ia te ia; a e lei maua lava.

Ua outou faalogo i le upu leaga i le Atua. Pe ni a fa outou? Ona fai mai lea o i latou uma, E tatau ona oti o ia. Ona feanu ai lea o isi ia te ia, ma ufiufi i ona fofoga, ma tu‘i ia te ia, ua faapea mai foi ia te ia, Ina iite mai ia; o le au auauna foi, ua latou taufaipo mai ia te ia.

Ona latou toe alalaga ai lea, Ina faasatauro ia ia te ia. Ona fai atu lea o Pilato ia te i latou, Se a foi se mea leaga ua na faia? A ua atili ai ona latou alalaga, Ina faasatauro ia ia te ia. Ua loto Pilato e faalotomălie i le motu o tagata, ua ia tatalaina atu ai Parapa ia te i latou; ua uma ona sasaina o Iesu e ia, ona ia tuuina atu lea o ia ia faasatauroina.

Ua uma ona latou faatauemu ia te ia, ona latou toeseina lea o le ofu pāuli ia te ia, ma faaofu ia te ia i ona lava ofu; ona latou ta‘ita‘i atu lea ia te ia ia faasatauroina o ia.

Ua uma ona latou faasatauroina o ia, ona latou tufatufa lea i ona ofu, ma fai ai le vili, e iloa ai le mea a le tagata. O le itu aso e tolu na latou faasatauro ai ia te ia.

Ua alaga Iesu ua leo tele, ona to ai lea o lana mānava.

Ua fiafia lava lo‘u loto i le Atua lo‘u Faaola;

Amuia outou pe a itagia outou e tagata, pe a faateaeseina foi outou, ma faaleagaina e i latou, ma lafoaiina lo outou igoa, pei o se mea leaga, ona o le Atalii o le tagata. Ia outou olioli i lea aso, ma ia outou osooso ma le fiafia; auā faauta, o i le lagi lo outou taui ua tele; auā sa faapea ona fai e o latou tamā i perofeta.

A ou te fai atu ia te outou o e faalogo mai. Ia alofa atu i e o fai outou mo latou fili: ia agalelei atu i e ita mai ia te outou, ia outou faamanuia atu i e fetuu mai ia te outou, ia outou tatalo foi mo e tuua‘i fua mai ia te outou;

Peitai outou, ia outou alolofa atu i e o fai outou mo latou fili, ma ia agalelei atu, ma ia avatu tupe e nonoina, aua le faamoemoe i se mea e tasi e au mai; e tele ai so outou totogi, e avea foi outou ma fanau a le Silisili ese; auā o ia le agamalu i e agavale, atoa ma e amio leaga.

Ua faalogo le tupu o Herota i mea uma ua faia e ia, ona fememeai lea o ia, ina ua fai mai nisi, Ua tu mai Ioane i e ua oti; a o isi, Ua faaali mai Elia; a o isi. Ua toe tu mai le tasi o le au perofeta anamua. A ua fai ane Herota, Na ou vavaeeseina le ulu o Ioane; a o ai lenei ua ou faalogo ai i mea faapena? Ua manao o ia i le fia vaai ia te ia.

E tatau ona tiga le Atalii o le tagata i mea e tele, ma ia lafoaiina e toeaina, ma faitaulaga sili, ma le au tusiupu, ia fasiotia foi; e faatuina foi o ia i le aso tolu.

Ua fetalai atu ia i tagata uma, A fia mulimuli mai se tasi ia te au, aua le usiusitai o ia ia te ia, a ia ave e ia lona satauro i aso fai soo, i le mulimuli mai ai ia te au. Auā ai sē fia faasaogalemuina lona ola, e māumau ai ia te ia; a o lē faamāumau i lona ola ona o a‘u, e faasaoina e ia.

Oi talofa ia te outou! auā ua outou ati ae tuugamau o perofeta; o outou tamā foi, na latou fasioti ia te i latou. Ua molimau lava outou i le amio a o outou tamā, ma fiafia i ai; auā na latou fasioti ia te i latou, a e tou te ati ae o latou tuugamau. O lea foi ua fetalai mai ai le poto o le Atua, Ou te aauina atu ia te i latou perofeta ma aposetolo; e fasioti foi e i latou, ma faasaua i nisi: ina ia suea i le tupulaga nei le toto o perofeta uma ua faamaligiina talu ona faavaeina o le lalolagi; e afua mai i le toto o Apelu, e oo atu i le toto o Sakaria, na fasiotia i le va o le fata faitaulaga ma le malumalu; e moni, ou te fai atu ia te outou, e suea lava ia i lenei tupulaga.

A ou te fai atu ia te outou na a‘u uo, aua tou te matatau ia te i latou o e fasioti le tino; a mavae lea, ua leai se toe mea latou te mafaia. A e ou te faasino atu ia te outou i lē tou te matatau i ai; ia outou matatau ia te ia, a mavae ona fasioti e ia, e ana le pule e lafo atu i Kēna; e moni, ou te fai atu ia te outou, ia outou matatau ia te ia.

Aua e te fefe oe le lafu mamoe itiiti e; auā ua finagalo lo outou Tamā e foai mai le malo ia te outou. Ia outou faatau atu i a outou mea, tou te avatu ai e fai ma mea alofa; ia fai outou ni a outou taga e anagata, o le oa i le lagi e le uma lava, e le tāitāi ane i ai se gaoi, e le atia foi e se mogamoga.

Afai e sau se tasi ia te au, a e le ‘ino‘ino i lona tamā, ma le tinā, ma le avā, ma le fanau, ma uso, ma tuafāfine e oo lava i lona ola, e le mafai ona fai o ia mo‘u soo. O se le ave lona satauro, ma ua le mulimuli mai ia te au, e le mafai ona fai o ia mo‘u soo.

E faapea foi so outou e le lafoai ana mea uma, e le mafai ona fai o ia mo‘u soo.

O sē saili ia saogalemu lona ola, e māumau ai ia te ia; a o sē faamāumau ai, e faasaoina e ia.

Auā e tuuina atu ia i nuu ese, e faatauemuina, e faaleagaina, e feanu foi i latou ia te ia, latou te sasa foi ma fasioti ia te ia; a o le aso tolu e toe tu mai ai o ia.

Ona fetalai atu lea o ia i lenei faataoto i le nuu, Na fai e le tasi tagata le tovine, ua tuu atu ai i e galulue i vine, ona alu malaga lea o ia i le nuu ese ua fāi po. Ua fai le fuata, ona auina atu lea e ia o le auauna i e galulue i vine, ia latou au mai ia te ia ni fua o le tovine; a o e galulue i vine ua latou sasaina o ia, ma aufuaina mai o ia. Ua toe auina atu e ia le tasi auauna; ua latou sasa ma agaleaga ia te ia, ona latou aufuaina mai lea o ia. Ua toe auina atu e ia lona toatolu, ua latou fasia o ia ua manua, ma latou tuliesea. Ona fai ane ai lea o le alii e ona le tovine, Se a se mea ou te faia? Ou te auina atu lo‘u atalii pele; atonu latou te ava mai ia te ia, pe a iloa mai o ia. A ua iloa atu o ia e tagata galulue i vine, ona latou fetautalatala‘i ai lea, ua faapea ane, O le suli lena; o mai ia, ina tatou fasioti ia te ia, e maua ai le fanua mo i tatou. Ua latou tuli ia te ia i tua o le tovine, ma latou fasiotia. Se a foi le mea e faia ia te i latou e le alii e ona le tovine?

a o e ta‘uaogaina ia maua e i latou lea olaga, ma le toe tu mai o e ua oti, latou te le fai avā, pe nofo tane; e le mafai foi ona toe oti o i latou; auā ua latou tutusa ma agelu; o fanau foi i latou a le Atua, o tagata o le toe tu.

A o lei oo nei mea, latou te pupue ma faasaua ia te outou, e tuuina atu ia te outou i sunako ma fale puipui, latou te ta‘ita‘iina atu outou i tupu ma alii ona o lo‘u igoa. E oo ia mea ia te outou e fai ma molimau. O lenei, ia tuu i o outou loto, tou te le muai mafaufau i se upu tou te tali atu ai. Auā ou te avatu mo outou le upu ma le poto, e leai so latou o e finau mai ia te outou na te mafaia ona tali mai, pe tetee mai ia te outou. E tuuina atu foi outou e mātua, ma uso, ma aiga, ma uo; o isi foi o outou e fasiotia e i latou. E inosia foi outou e tagata uma ona o lo‘u igoa.

O lo outou onosai ia maua ai lo outou ola.

Ona saili lea e le au faitaulaga sili ma le au tusiupu pe faapefea ona latou fasioti ia te ia; auā ua latou matatau i le nuu.

O outou foi, ua outou tumau ia te au i o‘u tofotofoga.

Ua fai mai o ia ia te ia, Le Alii e, ua ou sauni ta te o faatasi ma oe i le fale puipui atoa ma le oti.

O tagata ua taofi ia Iesu, ua latou tauemu ma sasa ia te ia. Ua latou ufiufi ona fofoga, ona po mai ai lea i ona fofoga, ua fesili mai foi ia te ia, ua faapea mai, E te iite mai, po o ai na na po atu ia te oe?

A ua latou leo tetele mai, ua faapea mai, Ina faasatauro ia, ina faasatauro ia ia te ia. Ua fai atu faatolu foi o ia ia te i latou, Se a foi lona leaga ua na faia? Ou te lei iloa se mea e faasalaina ai o ia ia oti; o lea foi ou te aoai atu ai ia te ia, i le ou tatalaina atu ai. A ua latou faatauanau mai ma leo tetele, o fai mai ia faasatauroina ia; ua malo o latou leo ma leo o le au faitaulaga sili.

Ua latou oo atu i le mea e ta‘ua o le mea o i ai le ulupoo, ua latou faasatauro ia te ia i lea mea, ma e pagotata, o le tasi i le itu taumatau, ma le tasi i le itu tauagavale. Ona fetalai atu lea o Iesu, Lo‘u Tamā e, ia e faamagaloina atu ia te i latou; auā ua latou le iloa le mea ua latou faia. Ua tufatufa e i latou ona ofu, ona fai ai lea o le vili.

Ona fetalai atu ai lea o Iesu ia te ia, E moni, ou te fai atu ia te oe, o le asō ta te faatasi ai ma oe i parataiso.

Ona valaau ai lea o Iesu, ua leo tele, ua faapea atu, Lo‘u Tamā e, ou te tuuina atu lo‘u nei agaga i ou aao; ua na fetalai ia upu, ona to ai lea o lana mānava.

na tuuina atu foi o ia e le au faitaulaga sili ma o tatou faipule, ia faasalaina o ia ia oti, ma ua latou faasatauroina o ia.

E moni, e moni, ou te fai atu ia te outou, o lē faalogo mai i la‘u upu, ma talitonu ia te ia na na auina mai a‘u, ua ia te ia le ola e faavavau: e le oo foi ina faasalaina o ia, a ua oo atu ia i le ola, sa i le oti, E moni, e moni, ou te fai atu ia te outou, e oo i le aso, ua oo nei foi i ai, e faalogo mai ai e ua oti i le leo o le Atalii o le Atua; o e faalogo ai foi, e ola ai i latou.

Aua tou te ofo i lenei mea, auā e oo mai le aso e faalogo ai i lona leo o i latou uma ua i tuugamau, ma latou o mai ai; o e na amio lelei, e toe tutū i le ola; a o e na amio leaga, e toe tutū i le faasala.

O lenei le areto ua alu ifo mai le lagi; ai se ‘ai ai ona le oti lea o ia. O a‘u le areto ola na alu ifo mai le lagi; pe a ‘ai se tasi i lenei areto ona ola ai lea o ia e faavavau. O le areto foi ou te avatua, o lo‘u tino lea, ou te avatua ma ola o le lalolagi.

E lei tuuina atu ea e Mose le tulafono ia te outou, a e leai se tasi o outou e anaana i le tulafono; pe se a le mea tou te fia fasioti ai ia te au?

E moni, e moni, ou te fai atu ia te outou; ai se tausi i la‘u upu, e le iloa e ia le oti, e oo i le faavavau.

O a‘u le leoleo mamoe lelei; e tuu atu e le leoleo mamoe lelei o lona ola e sui a‘i mamoe.

pei ona silafia a‘u e le Tamā ma ou iloa le Tamā. Ou te tuuina atu foi lo‘u ola e sui a‘i mamoe. Ua ia te au foi isi mamoe e le o i lenei lotoā; e tatau ona ou ta‘ita‘iina mai o i latou foi, e faalogo foi i latou i lo‘u leo; ona tasi ai lea o le lafu mamoe, ma le leoleo mamoe e toatasi. O le mea lea e alofa mai ai le Tamā ia te au, auā ou te tuuina atu lo‘u ola, ina ia ou toe au mai ai. E leai se tasi na te aveeseina ia te au, a e peitai a‘u, ou te tuuina atu e a‘u lava. O ia te au le pule e tuuina atu, o ia te au foi le pule e toe au mai ai; ua ou maua lena poloaiga mai lo‘u Tamā.

Ua fetalai atu Iesu ia te ia, O a‘u nei o le toe tu ma le ola; o lē faatuatua mai ia te au, e ui lava ina oti, a e ola lava ia. O tagata ola uma o e faatuatua mai ia te au, e le oti lava e oo i le faavavau; po ua e talitonu mai ea i lena mea?

Talu foi i lea aso ua latou taupulepule ai e fasioti ia te ia.

A ua taupulepule le au ositaulaga sili, e fasioti foi ia Lasalo.

E moni, e moni, ou te fai atu ia te outou, Afai a e le paū le fua o le saito i le eleele ma pala ai, e tumau pea o le mea e tasi; a e afai e pala, ona fua mai ai lea o fua e tele. O lē faapelepele i lona ola, e faamāumau e ia i ai; a o lē ‘ino‘ino i lona ola i lenei lalolagi, e leoleo ai e ia e oo i le ola faavavau. A fia auauna mai se tasi ia te au, ia mulimuli mai o ia ia te au; o le mea ou te i ai a‘u, e i ai foi la‘u auauna; pe a auauna mai foi se tasi ia te au, ona viia lea o ia e le Tamā.

Ua fai mai Peteru ia te ia. Le Alii e, pe se a le mea ou te le mafai ai ona mulimuli atu nei ia te oe? ou te tuuina atu lo‘u ola ona o oe.

E le sili lava le alofa o se tasi i lenei alofa, ia tuuina atu e se tasi lona ola e sui a‘i ana uo.

Afai e ‘ino‘ino mai le lalolagi ia te outou, ua outou iloa ua muamua ona ‘ino‘ino mai ia te au, i lona ‘ino‘ino ia te outou. Afai a ni tagata o le lalolagi outou, po ua alofa mai le lalolagi i ona tagata; a e le ni o le lalolagi outou, a ua ou filifilia outou nai le lalolagi, o le mea lea e ‘ino‘ino ai le lalolagi ia te outou. Ia outou manatua le upu na ou fai atu ai ia te outou. E le sili le auauna i lona alii. Afai ua latou faasaua mai ia te au, e faasaua foi ia te outou; afai ua latou tausia la‘u upu, latou te tausia foi la outou. A e faia e i latou ia mea uma ia te outou ona o lo‘u igoa, auā e lei iloa e i latou o ia ua auina ma a‘u.

E tulia outou i sunako e i latou; a e oo lava i le aso e manatu ai se na te fasioti ia te outou, ua na faia le taulaga i le Atua. E faia foi e i latou ia mea ia te outou, auā latou te lei iloa le Tamā atoa ma a‘u. A ua ou fai atu ia te outou nei mea, ina ia outou manatua pe a oo i le aso, na a‘u fai atu ai ia te outou. Ou te lei fai atu nei mea ia te outou i le amataga, auā na ou i ai ia te outou.

O lenei foi, ua maua nei outou e le tiga; a e tatou te toe feiloai ma a‘u, ona olioli ai lea o outou loto, e le aveeseina foi e se tasi lo outou olioli.

Ua ou fai atu nei mea ia te outou, ina ia outou maua le manuia ia te au; e maua foi outou e le puapuaga i le lalolagi, a ia outou loto tetele, ua ou manumalo i le lalolagi.

Ua ou tuu atu lau afioga ia te i latou; ua ‘ino‘ino foi le lalolagi ia te i latou, auā e le ni o le lalolagi i latou, faapei o a‘u, ou te le so le lalolagi a‘u.

Ona ave lea e Pilato ia Iesu, ua sasa foi ia te ia. Ua taataai foi e le ‘au o laau tuitui, ua fai a‘i le pale, ua faaee i lona ao, ua faaofu foi ia te ia i le ofu pāuli. Ona latou fai atu lea, Talofa! le tupu o tagata Iutaia. Ua latou po atu foi ia te ia.

Ua vaai atu ia te ia le au ositaulaga sili ma auauna, ona alalaga lea o i latou, ua faapea, Ina faasatauro ia, faasatauro ia. Ua fai atu Pilato ia te i latou, Ina ave ia e outou ia te ia, ma ia outou faasatauroina; auā ou te lei iloa se mea e sala ai o ia.

Ua tali atu Iesu, E leai sau pule ia te au, ana le tuuina mai ia te oe mai lugā; o le mea lea e tele ai lona leaga na ia tuuina mai a‘u ia te oe.

A ua alalaga i latou, Ave ese ia, ave ese ia; ina faasatauro ia te ia. Ua faapea mai Pilato ia te i latou. Ou te faasatauro ea i lo outou tupu? Ua tali atu lea au ositaulaga ia te ia. E leai so matou tupu, na o Kaisara. Ona ia tuuina atu lea o ia ia te i latou, ina ia faasatauroina. Ona ave lea o iesu e i latou, ua ta‘ita‘iina atu; ua ave e ia lona satauro, ua maliu atu foi i le mea e ta‘ua. O le mea o i ai le ulupoo, ua igoa i le upu Eperu, o Kolokota. Ua latou faasatauro ia te ia i le a mea, atoa ma isi tagata e toalua faatasi ma ia, o le tasi i le tasi itu, ma le isi i le isi itu, a o i totonu Iesu.

Ua talia le vineta e Iesu, ona fetalai ane lea o ia. Ua taunuu; ua faagaugau lona ao, ona tuuina atu lea o lona agaga.

E moni, e moni, ou te fai atu ia te oe, ua e fusi oe ina o e taulealea, ma e fealuai i mea na e loto i ai; a e pe a e toeaina, e te faaloaloa ou lima, e fusifusi foi ia te oe e se tasi, e ave foi oe i le mea e te le loto i ai. Ua ia fetalai atu lea upu e faailoa atu ai le uiga o lona oti e vivii atu ai o ia i le Atua. Ua fetalai atu lea mea, ona faapea atu lea o ia ia te ia, Ia e mulimuli mai ia te au.

Ua fetalai atu Iesu ia te ia, Afai ou te loto ina ia tumau pea o ia seia ou sau, pe se a lea mea ia te oe? Ia e mulimuli mai oe ia te au. Ona salalau ai lea o lenei tala i le au uso, E le oti lava lea soo; a e lei faapea atu Iesu ia te ia, E le oti ia; a e faapea, Afai ou te loto ina ia tumau pea o ia seia ou sau, pe se a lea mea ia te oe?

o ia ua tuuina mai e le pule tonu ma le silafaga a le Atua anamua, na maua o ia e outou, ma outou faamau i le laau ma fasioti i lima o tagata faaletaupulea; o ia ua faatuina mai e le Atua, ua na tatala i puapuaga o le oti, auā na le mafai ona taofiina ai o ia.

ua latou pupue atu foi i le au aposetolo, ma tuu atu ia te i latou i le fale puipui o le nuu.

Ua faalogo i latou, ona matuā lotoa ai lea, ua latou taupulepule; ule e fasioti ia te i latou.

Ua usiusitai i latou ia te ia; ua aami foi le au aposetolo, ua sasa ia te i latou, ma fai atu, ia soia le tautala i le igoa o Iesu; ona tuuina atu lea ia te i latou e ō. Ona ō lea o i latou nai luma o le fono, ua olioli ina ua ta‘uaogaina i latou ia faaleagaina ona o lona suafa.

O outou, e ua maaa ua, ma ua le peritomeina o loto ma taliga, ua outou tetee atu pea lava i le Agaga Paia; pei o outou tamā ua faapea foi outou. O ai so le au perofeta e lei saua i ai o outou tamā? ua fasiotia foi e i latou e na muai tala‘i i le afio mai o lē Amiotonu; o ia ua outou faalataina ma fasiotia nei; o outou, e ua maua le tulafono i sauniga a agelu, a ua le taofia. Ua faalogo i latou i ia upu, ona matuā lotoa lea o i latou; ua lilivau foi o latou nifo ia te ia. A ua tumu o ia i le Agaga Paia, ua pulatoa i le lagi, ua iloa atu le pupula o le Atua, ma Iesu o loo tu i le itu taumatau o le Atua, ona fai atu lea, Faauta, ua ou iloa le lagi ua avanoa, ma le Atalii o le tagata o loo tu i le itu taumatau o le Atua.

Ona alalaga lea o i latou ma le leo tele, ua pupuni o latou taliga, ma feosofi mai ia te ia ma le loto gatasi, ua tulei atu foi ia te ia i tua o le aai, ona latou fetogi lea ia te ia i maa; ua tuu atu foi e molimau o latou ofu i le taulealea, o Saulo le igoa, e leoleo ai. Ua fetogi foi i latou ia Setefano, o valaau o ia, ua faapea atu, Le Alii e Iesu, ia e talia mai lo‘u nei agaga. Ua tootuli foi o ia, ma alaga atu ma le leo tele, Le Alii e, aua e te tuuina atu lenei agasala ia te i latou. Ua uma atu lea upu, ona moe ai lea o ia.

Sa loto gatasi foi Saulo ma i latou i lona fasiga. O lea lava aso ua tupu ai le saua tele i le ekalesia i Ierusalema; na faasalalauina foi i latou uma i nuu o Iutaia ma Samaria, ua toe na o le au aposetolo. Ua ave foi Setefano e tanu e tagata ua matatau i le Atua, ua matuā taufaitagitu‘i i latou ia te ia. A ua soona saua Saulo i le ekalesia, ua ulufale ia i lea fale ma lea fale, ma fetoso mai i tane ma fafine, ma tuuina atu i le fale puipui.

O le fuaiupu foi o le tusi ua na faitau ai, o lenei, Pei o le mamoe ua ta‘ita‘iina ia fasia; pei o le tamai mamoe foi i luma o lē sele fulufulu e le tagi, e faapea foi o ia ua le tautala mai. O ona po o lona faamaulaloina na aveesea ai lona faamasinoga; o ai foi se na te talaina lana tupulaga? auā ua aveesea lona ola i le lalolagi.

A ua mapugatamai pea o Saulo i le faamatau ma le fasioti i le au soo o le Alii, ua alu atu ia i le faitaulaga sili, ua faatoga atu ia te ia i tusi e ave i sunako i Tamaseko, pe afai na te maua ai nisi o lena lotu, o tane atoa ma fafine, ia fusifusi ma ta‘ita‘i mai i latou e ia i Ierusalema. Ua alu atu o ia ua latalata i Tamaseko, ona faafuasei mai ai lea ona pupula faataaliolio mai ia te ia o le malamalama mai le lagi; ona paū lea o ia i lalo i le eleele, ua faalogo atu i le siufofoga, o loo faapea mai ia te ia, Saulo, Saulo e, se a le mea ua e saua mai ai ia te au? Ona fai atu lea o ia, Le Alii e, o ai ea oe? Ona fetalai mai lea o le Alii, O a‘u o Iesu ua e saua mei i ai; o le mea faigata ia te oe ona aa i tui.

Ua fāi po, ona taupulepule lea o Iutaia e fasioti ia te ia; ua iloa e Saulo la latou taupulepulega. A ua lamalama i latou i faitotoa o le aai i le ao ma le po, ina ia fasioti ia te ia.

ma tautala faamalosi i le suafa o le Alii o Iesu; ua tautala foi o ia, ma fefinauai ma le au Elenisi; a ua latou taumafaia e fasioti ia te ia.

O ona po ia na pupue ai e le tupu o Herota nisi o le ekalesia ina ia faasaua i ai. Ua na fasioti foi ia Iakopo le uso o Ioane i le pelu. Ua iloa foi e ia ua fiafia ai Iutaia, ona faasosolo ai lea ona pue ia Peteru lava. (O ona aso ia o areto e le faafefeteina) Ua pue ia te ia, ona tuu ai lea i le fale puipui, ma tuuina atu i tagata tau e taitoafā i vasega e fa e leoleo ia te ia; ua manatu ia e ta‘ita‘i ane ia te ia i le nuu pe a mavae le paseka.

Ua taupulepule foi tagata o nuu ese, atoa ma Iutaia ma o latou alii, e faasaua ma fetogi ia te i laua i maa; ona iloa ai lea o i laua, ona la sosola ai lea i Lusa ma Teipe, o aai ia o Lukaonia, ma nuu e vagavagai;

ua faamalosi i loto o le au soo, ma apoapoai atu ia tumau i le faatuatua; ua faapea atu foi, O puapuaga e tele e tatau ona tatou sao atu ai i le malo o le Atua.

o tagata ia ua tuulafoaiina o laua ola ona o le suafa o lo tatou Alii o Iesu Keriso.

Ua feosofi mai le motu o tagata ia te i laua, ua saei ese atu e faamasino o laua ofu, ua fai atu foi ia sasa ia te i laua i laau. Ua latou sasa ia te i laua, e tele o la ta, ona tuu atu lea i le fale puipui, ua fai atu i le leoleo o le fale ia leoleo lelei ia te i laua; ua oo lea poloaiga, ona tuu atu lea o ia ia te i laua i le potu tuloto, ma faamau i o la vae i laau.

ua faia foi e ia nuu uma o tagata i le toto e tasi, ia nonofo i le fogaeleele uma lava, ua na tuu foi tausaga na tofia anamua, ma tuaoi o mea latou te nonofo ai; ina ia latou saili i le Alii, pe mafai ona latou tautāgotago ma latou iloa o ia; a e peitai e le mamao o ia ma i tatou taitoatasi. Auā o ia o loo ola ai i tatou, ma gaoioi ai, o loo i ai foi i tatou talu o ia; pei ona fai mai foi e isi o outou fatu pese, Auā o lana fanau i tatou.

Faauta foi, ou te alu nei, ua tinoū le loto, i Ierusalema, ou te le iloa se mea e oo mai ia te au i lea mea; na o lenei, o loo molitino mai e le Agaga Paia i lea aai ma lea aai, o loo faapea mai, ua faatali mai noanoaga ma puapuaga ia te au. A e ou te le manatua se tasi mea, o lo‘u lava ola foi ou te le naunau i ai, se‘i ou faauma lo‘u momo‘e ma le olioli, atoa ma le faiva ua ou maua mai le Alii o Iesu, ou te molitino atu le tala lelei o le alofa tunoa o le Atua.

A ua tali mai Paulo, Tou te fetagisi ma faatiga tele mai lo‘u loto i se a? auā ua ou sauni lava a‘u e le gata ina fusifusia, a ia ou oti lava i Ierusalema, ona o le suafa o le Alii o Iesu. Ua le mafaia o ia, ona faalologo lea o i matou, ua faapea ane, Ina faia ia le finagalo o le Alii.

O loo naunau i latou e fasioti ia te ia, a ua logo ae i le alii e pule i ‘au, ua matuā lolofi mai Ierusalema uma lava.

Na ou saua atu i lenei lotu ina ia oti i latou, sa ou fusifusia ma tuuina atu i fale puipui o tane atoa ma fafine; pei ona molimau mai foi ia te au nei e le faitaulaga sili, atoa ma toeaina uma; sa ou maua mai ai foi tusi i le au uso, ma ou alu atu i Tamaseko e fusifusi i e o i ai, ma ta‘ita‘i mai ia te i latou i Ierusalema ina ia faasalaina i latou.

Ona ou fai atu lea, Le Alii e, ua iloa lava e i latou sa ou masani ina tuu i fale puipui ma sasa i lea sunako ma lea sunako i e faatuatua ia te oe; sa maligi foi le toto o lau molimau o Setefano, sa tu ai foi a‘u, ma loto gatasi i lona fasiga, sa ou leoleo foi i ofu o e na fasioti ia te ia.

Ua ou, ona ‘au faatasi lea o isi Iutaia ua tuufeaugani i latou, ua faapea, latou te le aai pe feinu seia latou fasioti ia Paulo. Ua toafagafulu ma ona tupu o i latou na ‘au faatasi i lenei augani. Ua o atu i latou i faitaulaga sili ma toeaina, ua fai atu, Ua tuufeaugani i matou i le anatema, matou te le aai lava i sina mea seia matou fasioti ia Paulo. O lenei, ia faailoa atu e outou atoa ma le fono i le alii e pule i ‘au, ina ia ta‘ita‘i ifo o ia ia te ia taeao ia te outou, peiseai a outou matuā suesue i mea ia te ia; a o i matou, ua sauniuni i matou e fasioti ia te ia, a o lei latalata o ia.

O au nei foi, na ou manatu ifo e tusa ona ou faatu‘ieseina o mea e tele i le suafa o Iesu le Nasareta. Sa ou fai ai foi i Ierusalema; na ou maua foi le pule mai le au faitaulaga sili, ona ou puipuia lea o le au paia e toatele i fale puipui; na fasiotia foi i latou, ua ou faaopoopo i ai. Na ou taui soo atu foi ia te i latou i sunako uma lava, ma ou tauanau atu ai ia latou upu leaga ia Iesu; na ou faavalemalosi atu foi ia te i latou, ua ou saua atu ua oo lava i aai ese.

Ona o nei mea ua pue mai ai Iutaia ia te au i le malumalu, ma latou taumafai ona fasioti ia te au.

E tuuina atu foi le ola e faavavau i e tumau pea i galuega lelei, ua latou saili ai le viiga, ma le mamalu, ma le le iu vale;

E le gata foi i lea, a ua tatou mitamita foi i puapuaga, ina ua tatou iloa o le puapuaga e tupu ai le onosai,

Auā na maliu Keriso i ona po e tatau ai, ina o vaivai pea i tatou, o le sui o ia o e faalematau. Auā e toe ina le mafai ona oti o se tasi e sui a‘i le ua amiotonu; a o le ua agalelei, atonu pe faamalosi se tasi ona oti e sui a‘i o ia; a ua faaalitinoina mai e le Atua lona lava alofa ia te i tatou, ina ua maliu Keriso ma sui o i tatou, a o tatou agasala pea. O lenei, ua ta‘uamiotonuina nei i tatou i lona toto, e le faaolaina ea i tatou e ia ai le toasa i se a? Auā afai ua lelei i tatou ma le Atua i le maliu o lona Alo, ina o fai i tatou mona fili, e matuā faaolaina lava i tatou i lona soifua, o i tatou ua lelei ma ia.

Tou te lei iloa ea, o i tatou nei uma na papatisoina ia Keriso Iesu, na papatisoina i tatou i lona maliu? O lenei, ua tatanu faatasi i tatou ma ia i le papatisoga i lona maliu; ina ia tatou savavali i le ola toefuataiina, pei ona toe faatuina mai o Keriso nai e ua oti, i le mana o le Tamā. Auā afai ua faatasia i tatou i le faatusa i lona maliu, e faapea foi i tatou i lona toe tu mai. Ua tatou iloa lenei mea, na faasatauroina faatasi ma ia lo tatou tagata tuai, ina ia faaumatia ai le tino o le agasala, ina ia le toe faapologaina i tatou i le agasala. Auā o le ua oti ua tuusaunoa ia nai le agasala.

Afai foi ua oti faatasi i tatou ma Keriso, ua tatou taofi, tatou te ola foi faatasi ma ia. Ua tatou iloa ua toe tu mai Keriso nai e ua oti, e le toe maliu lava o ia, e le toe pule le oti ia te ia. Auā o lona maliu, ua tasi lona maliu i la le agasala; a o lona soifua, e soifua lava ia i la le Atua. Ia faapea foi la outou taofi, ua outou oti i la le agasala, a ua outou ola lava i la le Atua i lo tatou Alii o Keriso Iesu.

auā afai tou te amio i la le tino, e oti ai outou; a e afai e fasiotia e outou amioga a le tino e le Agaga, tou te ola ai. Auā o i latou uma ua ta‘ita‘iina e le Agaga o le Atua, o atalii i latou o le Atua.

Afai foi o fanau i tatou, o suli foi, o suli lava o le Atua, o suli faatasi ma Keriso; pe afai tatou te tiga faatasi ma ia, ina ia faamanuiaina foi i tatou faatasi ma ia. Auā o lo‘u manatu e le tatau ona faatusaina le tiga i nei ona po ma le manuia atali e faaalia mai ia te i tatou.

Auā ua tatou iloa, ua oi faatasi, ma oono faatasi mea uma lava na faia, ua oo mai lava i ona po nei. E le gata foi i lea, a o i tatou lava ua i ai mea faapolopolo a le Agaga, tatou te feoi, o i tatou lava i totonu ia te i tatou, o loo faatalitali atu ia avea ma tamafai, o le faaolaina lea o tatou tino.

Ua tatou iloa foi e galulue faatasi mea uma e lelei ai i latou e ua alofa atu i le Atua, o e ua valaauina i lona finagalo. Auā o e na silafia e ia anamua, na ia tofia anamua foi, ia foliga i latou i lona Alo, ia foliga ia te ia, ina ia avea o ia ma ulumatua o le au uso e toatele; o e na tofia anamua e ia, ua valaauina foi i latou e ia; o e ua valaauina e ia, ua ta‘uamiotonuina foi i latou e ia; o e ua ta‘uamiotonuina e ia, ua faamanuiaina foi i latou e ia.

O lenei, se a sa tatou upu i nei mea? Afai ua ‘au ma i tatou le Atua, o ai sē faasaga tau mai ia i tatou? O ia lava sa na le faasaoina lona lava Alo, a ua tuuina mai o ia e sui a‘i i tatou uma lava, e le foai fua mai ea e ia ia te i tatou mea uma lava faatasi ma ia i se a?

O ai se na te faateaeseina mai i tatou i le alofa o Keriso? o le puapuaga ea, po o le atuatuvale, po o le saua, po o le oge, po o le lavalavā, po o le pagatia, po o le pelu? Faapei ona tusia, Ona o oe ua fasiotia ai i matou i aso uma, ua faatatauina i matou e pei o mamoe ā fasia. A ua tatou manumalo aiai i nei mea uma lava, ona o ia ua alofa mai ia te i tatou. Auā ua ou mautinoa, e le mafaia e le oti, po o le ola, po o agelu, po o alii, po o e malolosi, po o mea i nei ona po, po o mea atali, po o le maualuga, po o le loloto, po o se tasi mea na faia, e le mafaia e ia mea ona faateaeseina mai i tatou i le alofa o le Atua, o loo ia Keriso Iesu lo tatou Alii.

Le Alii e, ua fasiotia e i latou au perofeta, ma ua sŏloia ou fata faitaulaga; na o a‘u lava ua toe, ua latou saili foi e fasioti ia te au. A ua faapefea ea le tali mai a le Atua ia te ia? Ua ou faatoe mo‘u e toafitugaafe o tagata, o e ua le tootuli lava ia Paala. O lenei, e faapea foi i nei ona po, ua i ai e ua totoe e tusa ma le filifiliga o le alofa tunoa.

O lenei, le au uso e, ou te aioi atu ia te outou, ona o le alofa mutimuti vale o le Atua, ia outou tuuina atu o outou tino i le Atua, o le taulaga ola, ma le paia, ma le mālie, o le mea lea e tatau ai ona outou faia. Aua foi tou te amio faatasi ma lenei lalolagi, a e peitai ia liliuina i le toe fuataiina o outou loto, ina ia outou suesue pe se a le finagalo o le Atua, o mea ua lelei, ma le mālie, ma le atoatoa.

Ia olioli i le faamoemoe, ia onosai i le puapuaga, ia finafinau i le tatalo. Ia tufatufa atu ni a outou mea i le mativa o le au paia, ia tausisi i le alofa i tagata ese. Ia faamanuia atu i e faasaua mai ia te outou, ia faamanuia lava, a e aua le fetuu.

Afai e mafaia ia te outou, ia outou nofo lelei ma tagata uma lava. Le au pele e, aua le taui atu ma sui, a ia outou tuu atu i le toasa; auā ua tusia, Ua faapea mai le Alii, O ia te au le taui ma sui, ou te taui atu. O lenei, a matelaina le ua ita mai ia te oe, fafaga ia te ia; a fia inu ia avatu ia te ia e inu ai; auā o le amio faapea e faafaupue ai malala ola i luga i lona ulu.

Ia usiusitai tagata uma i faipule silisili; auā e leai se pule pe a le mai le Atua; o pule uma lava o loo fai nei, ua faatuina e le Atua. O lenei, o le na te tetee i le pule, ua tetee e ia i le sauniga a le Atua; o e tetee foi e sala lava i latou. Auā o alii, e le se faamatau i latou i e amio lelei, na o e amio leaga. O lou manao ea, ia e le fefe i le pule? ia e amio lelei, ona ta‘uleleia mai lea o oe e ia. Auā o le auauna ia a le Atua ia te oe, ia lelei ai; a e afai e te amio leaga, ia e fefe ai, auā e le fai fua e ia lana pelu; auā o le auauna o ia a le Atua, o le na te taui atu le toasa i lē amio leaga.

auā afai tatou te ola, tatou te ola mo le Alii, pe afai e oti, e oti mo le Alii; o lenei, pe ola pe oti i tatou, o tagata lava o le Alii i tatou. Auā o le mea lava lea na maliu ai Keriso, ma ua toe tu mai ai, ma ua soifua ai, ina ia faia o ia ma Alii i e ua oti atoa ma e o ola.

a e peitai matou te tautala atu i le poto o le Atua i le upu lilo sa natia, na tofia e le Atua anamuā anamuā lava, ina ia tatou manuia ai; o le mea na le iloa e se alii e tasi o lenei lalolagi; auā ana latou iloa, po ua latou le faasatauroina le Alii e ona le manuia. A e pei ona tusia, O mea e lei vaaia e mata, e lei lagona foi e taliga, e lei oo foi i le loto o se tagata, o mea ia ua saunia e le Atua mo i latou o e alofa ia te ia.

Tou te le o iloa ea o le malumalu outou o le Atua, o loo nofo foi le Agaga o le Atua i totonu ia te outou?

Auā o lo‘u manatu ua tuuina atu i matou le au aposetolo e le Atua ia mulimuli, pei o e ua tofia ia oti; auā ua avea i matou ma mataaga i le lalolagi, o agelu atoa ma tagata.

Ua oo mai i lenei lava itu aso, ua matou fia aai, ma fia inu, ma ua le lavalavā, ma taufaitu‘iina, ma maumau solo; o loo tautiga i matou o galulue i o matou lava lima; o loo agateleina i matou, matou te upu lelei atu; o loo sauaina i matou, matou te onosai; o loo faifaia i matou, matou te aioi atu; ua matou pei o otaota o le lalolagi, o le punefu foi o mea uma, ua oo mai lava i ona po nei.

Tou te le iloa ea, o lo outou tino o le malumalu lea o le Agaga Paia ua i totonu ia te outou, o loo ua ia te outou mai le Atua, e le aiā foi outou ia te outou? Auā ua faatauina outou i le tau; o lenei, ia outou vivii atu i le Atua i o outou tino ma ou outou agaga, o mea a le Atua ia.

Auā o aso uma tou te aai ai i lenei areto, ma feinu i lenei ipu, tou te faailoa atu ai le maliu o le Alii seia afio mai o ia.

Afai foi ou te tufatufaina a‘u mea uma e fagaina a‘i e matitiva; afai foi ou te tuuina atu lo‘u tino ina ia susunuina, a e leai so‘u alofa, e leai lava sona aoga ia te au. E onosai le alofa, e agamalu, e le losilosi le alofa, e le mitamita vale le alofa, e le faafefeteina, e le amio matagā, e le sailia e ia ana lava mea, e le faaitaitagofie, e le tuuina atu i nisi le leaga, e le fiafia i le amio leaga, a e fiafia i le faamaoni, e ufiufi i mea uma, e talitonu i mea uma, e faamoemoe i mea uma, e onosai i mea uma.

A o lenei, ua toe faatuina mai Keriso i e ua oti, ua avea ma faapolopolo o e ua momoe.

O le toe fili e faaumatia, o le oti lea;

Ou te augani i le mitamita ua ia te au ona o outou ia Keriso Iesu lo tatou Alii, ou te oti i aso fai soo.

O oe na le valea; o le mea e luluina e oe e le ola lea pe afai e le pala.

E faapea foi le toe tutū mai o e ua oti; eluluina ma le pala, e toe faatuina mai ma le le pala; e luluina ma le matagā, e toe faatuina mai ma le matagofie; e luluina ma le vaivai, e toe faatuina mai ma le malosi; e luluina le tino faaletino, e toe faatuina mai o le tino faaleagaga; e i ai le tino faaletino, e i ai foi le tino faaleagaga.

Auā e tatau ona ofu o lenei tino iu vale i le tino ola pea, ia ofu foi lenei tino oti i le tino le oti lava. Pe a ofu foi lenei tino iu vale i le tino ola pea, a ofu foi lenei tino oti i le tino le oti lava, ona taunuu ai lea o le upu ua tusia. Ua faaumatia le oti i le manumalo. Le oti e, o fea o i ai lou tui? Le tuugamau e, o fea o i ai lou mauumalo?

Ia faamanuina le Atua, o le Tamā o lo tatou Alii o Iesu Keriso, o le Tamā e ona le alofa mutimuti vale, o le Atua foi e ana le faamafanafanaga uma; o le na te faamafanafanaina mai ia te i matou i lo matou puapuaga uma lava, ina ia matou mafaia ona faamafanafana atu ia te i latou ua maua i se tasi lava puapuaga, i le faamafanafanaga ua faamafanafanaina ai i matou e le Atua. Auā pei ona tele ia i matou o tiga ona o Keriso, ua faapea foi ona tele o le faamafanafanaina o i matou e Keriso. Pe afai ua puapuagatia i matou, ua faapeaina ona o le faamafanafanaina ma faaolaina o outou, o loo matuā galue ma le onosai i ia lava tiga ua matou tiga ai; pe afai foi ua faamafanafanaina i matou, ua faapeaina ona o le faamafanafanaina ma faaolaina o outou. Ua tumau foi lo matou faatuatua ia te outou; o loo matou iloa, faapei ona faatasia outou i tiga, e faapea foi i le faamafanafanaina.

Auā, le au uso e, matou te loto ina ia outou iloa lo matou puapuaga na oo mai ia te i matou i Asia, sa silisili ona mafatia tele ai o i matou, e lei au i ai lo matou malosi, na oo lava ina matou masalo ai a matou oti. A o i matou, sa i o matou loto le manatu o le a oti, ina ne‘i matou faatuatua ia te i matou, a ia faatuatua i le Atua na te toe faatuina e ua oti; o le na laveai mai ia i matou ai le oti e matuā leaga, o loo laveai mai nei foi, ua matou faamoemoe foi ia te ia, na te laveai mai pea ia te i matou.

A ua ia te i matou lenei oa i ipu omea, ina ia i le Atua le matuā tele o le mana, a e le mai ia te i matou. Ua puapuagatia i matou i mea uma, a e le faaatuatuvaleina; ua fememeai, a e le matuā fememeai; ua sauaina, a e le tuulafoaiina; ua lafotuina i lalo, a e le fano; o loo tauave i le tino e le aunoa le fasiotia o le Alii o Iesu, ina ia faaalia foi le soifua o Iesu i o matou tino. Auā o i matou nei o loo ola ua tuuina atu pea lava i le oti ona o Iesu, ina ia faaalia foi le soifua o Iesu i o matou tino augavale. O lenei, ua galue le oti i totonu ia te i matou, a o le ola i totonu ia te outou.

O le mea lea matou te le faavaivai ai; auā e ui lava ina tauāu ina uma lo matou tagata i fafo, ua faafouina lē i totonu i lea aso ma lea aso. Auā o lo matou puapuaga mamasagia ma le vave mavae, e tupu mai ai mo i matou le manuia mamafa e matuā silisili ese lava ma le faavavau; o loo matou le manatunatu i mea ua vaaia, a o mea e le vaaia; auā o mea ua vaaia e gata mai ia, a o mea e le vaaia e faavavau ia.

Auā ua matou iloa afai e lepetia lo matou fale apitaga faalelalolagi, ua ia te i matou le fale mai le Atua, o le fale e lei faia e lima, e faavavau i le lagi. Auā foi ua matou feoi i lenei fale, o loo naunau tele i le fia faaofuina i lo matou fale mai le lagi; afai foi o faaofuina i matou, e le maua i matou e le lavalavā. Auā o i matou o i lenei fale apitaga, ua feoi i matou o loo mafatia; e le ona ua matou loto ina ia toeseina ofu, a ia faaofunina, ina ia tofatumoanaina le iu vale i le ola. O ia foi ua saunia i matou mo lenei lava mea, o le Atua ia, o ia foi ua foai mai le faamaoni o le Agaga ia te i matou.

O lenei, ua matou loto tetele e le aunoa, ona ua iloa, a o matou o nonofo i le tino, ua nofo eseese i matou ma le Alii; (auā o le faatuatua ua matou savavali ai, a e le o le tino mai o mea;) ua matou loto tetele ma ua sili lo matou manao ia o ese i matou i le tino, a ia nonofo i matou ma le Alii. O lenei, pe matou te nonofo ai, pe matou te le nonofo ai, ua matou loto malosi ina ia fiafia mai o ia ia te i matou.

Auā ua pulunaunauina i matou i le alofa o Keriso; o loo manatu faapea i matou, afai na maliu le toatasi o le sui o tagata uma, ua oti lava tagata uma; na maliu foi o ia ona o tagata uma, ina ia le usiusitai pea o e ola ia te i latou, a o ia o le na maliu ma toe tu mai o le sui o i latou.

O lenei, e amata i nei ona po ona matou le toe iloa se tasi i la le tino; e ui lava ina iloa e i matou o Keriso i la le tino, a o lenei, matou te le toe iloa. O lenei, afai o ia Keriso se tasi, o le tagata fou ia; ua mavae mea tuai, faauta, ua faafouina mea uma.

Ua matou le tuuina atu se mea e tasi e tausuai ai, ina ne‘i ta‘uleagaina le galuega; a o mea uma lava ua faailoa ai i matou o auauna a le Atua i matou, i le onosai tele, i puapuaga, i malaia, i atuatuvale i sasaina, i tuuina i fale puipui, i faaletaupulea, i galuega, i mataala, i anapopogi, i le amio mamā, i le poto, i le faapalepale, i le agamalu, i le Agaga Paia, i le alofa moni, i le upu moni, i le mana o le Atua, e le auupega o le amiotonu i le itu taumatau atoa ma le itu tauagavale, i le viia ma le faaleagaina, i le ta‘uleleia ma le ta‘uleagaina; peiseai o e faasese, a e faamaoni lava; peiseai ua le iloa, a ua lāu iloa; peiseai a oti, faauta foi, o loo ola i matou; peiseai ua aoaiina, a e le fasiotia; peiseai o faanoanoa, a o loo olioli pea; peiseai o matitiva, a ua matou faatamaoaigaina nisi e le toatele; peiseai e leai sina mea o ia te i matou, a o loo ia te i matou mea uma.

Ou te le faapea atu e aoai ia te outou; auā ua uma ona ou muai fai atu, o loo i o matou loto outou, tatou te oti faatasi ma ola faatasi. E tele lo‘u faamalosi atu ia te outou, ua tele lo‘u mitamita ona o outou; ua faatumuina a‘u i le mafanafana, ou te matuā olioli tele lava i lo matou puapuaga uma.

auā na tofotofoteleina i latou i puapuaga ua atili ai lo latou olioli, atoa ma lo latou mativa matuā tele, ua sili ai le faulai o lo latou matamau.

O auauna ea i latou a Keriso? (ou te tauta‘a pei se vale, ua sili a‘u; ua sili i galuega, ua matuā tele i sasaina, ua tele ona tuuina i fale puipui, ua atu lasi i oti, ua atu lima ona sasaina o a‘u e Iutaia, e taifagafulu i le iva o‘u ta, ua atu tolu ona sasaina o a‘u i laau, ua tasi le fetogia o a‘u i maa, ua atu tolu ona malaia o folauga sa ou i ai, ua atoa le po ma le ao sa ou i le vasa; ua atu lasi a‘u malaga se manū a‘u leaga i vaitafe, se manū a‘u leaga i e fao mea, se manū a‘u leaga i tagata o lo‘u lava nuu, se manū a‘u leaga i tagata o nuu ese, se manū a‘u leaga i le aai, se manū a‘u leaga i le vao, se manū a‘u leaga i le vasa, se manū a‘u leaga i uso pepelo; na ou i le galuega mamafa ma le tiga, o le mataala soo, o le fia ‘ai ma le fia inu; o le anapogi soo, o le maalili ma le le lavalavā. Tuu ia o isi mea, a o le mea e mafatia ai a‘u i aso fai soo, o le popole lea ona o ekalesia uma.

Ina ne‘i faamaualuga a‘u i le silisili ese o mea na faaalia mai, sa tuuina mai ia te au le mea matuitui i le tino, ole agelu a Satani, e tu‘i mai ia te au, ina ne‘i ou faamaualuga. Na ou aioi faatolu atu i le Alii ona o lea mea, ina ia alu ese ia te au. Ona faapea mai ai lea o ia ia te au. O lo‘u nei alofa tunoa e lava lea e fesoasoani ia te oe; auā o le vaivai e faaatoaina ai lo‘u mana. O lea ua tele ai lava lo‘u fiafia i le mitamita i mea ua ou vaivai ai, ina ia tumau i o‘u luga le mana o Keriso. O lea ou te fiafia ai i mea e vaivai ai, o le faaleaga mai, o malaia, o le agatele mai, o le atuatuvale ona o Keriso; auā pe a ou vaivai, ona ou malosi ai lea.

Auā ua outou faalogo i la‘u amioga anamua ina ou i le lotu a Iutaia, sa ou matuā saua lava i le ekalesia a le Atua, ma faatauga i ai.

Ua faasatauroina faatasi i maua ma Keriso; a e ou te le toe ola a‘u, a o Keriso o loo ola i totonu ia te au; o le ola foi ou te ola ai nei i le tino, ou te ola ai lava i le faatuatua i le Alo o le Atua, o le na alofa mai ia te au, ma foaiina mai o ia e ia e fai mo‘u sui.

a e faapei ona saua o le na fanau i la le tino i le na fanau i la le Agaga i ia ona po, e faapea foi i ona po nei.

A o e o ia Keriso, ua faasatauroina e i latou le tino, ma ona manao, ma ona tu‘inanau.

o sē lulu i la lona tino, e selesele mai ai e ia i la le tino le mea e pala; a o sē lulu i la le Agaga, e selesele mai ai e ia i la le Agaga le ola faavavau.

A o a‘u, aua ne‘i ou mitamita i se mea, tau lava o le satauro o lo tatou Alii o Iesu Keriso, o ia ua faasatauroina ai le lalolagi ia te au, o a‘u foi i le lalolagi.

Ona o lea mea, o a‘u o Paulo o le ua noanoatia ona o Keriso Iesu, ona o outou o nuu ese;

O lenei, ou te aioi atu, aua ne‘i faavaivai ina ua puapuagatia a‘u ona o outou, auā o le mea tou te mitamita ai lena. O le mea lea ou te tootuli ai i le Tamā o lo tatou Alii o Iesu Keriso,

O lenei, o a‘u o le ua noanoatia ona o le Alii, ou te aioi atu ia te outou ia outou savavali ia tusa ma le valaau ua valaauina ai outou, ma le loto maulalo lava ma le agamalu, ma le onosai, ia outou faapalepale le tasi i le tasi ma le alofa,

ma ia savavali i le alofa, faapei o Keriso foi na ia alofa mai ia i tatou, ua na foai mai foi e ia ia te ia e sui a‘i i tatou, o le taulaga ma le togiola i le Atua o le mea manogi lea;

Le au uso e, ou te manao ia iloa e outou, o mea na oo ia te au, ua iu ina tupu atili ai le tala lelei. O lea ua faaalia ai lo‘u noanoataga ona o Keriso, i le fale uma o le ‘au e leoleo atoa ma isi mea uma. O le toatele foi o le au uso o i le Alii o loo matuā faatuatua ona o lo‘u noanoataga; ua atili ai ona latou faamalosi e tautala i le upu ma le le mata‘u.

e tusa ma lo‘u faanaunau atu, ma lo‘u faamoemoe, ina ia ou le mā i se mea e tasi, a ia ou matuā faamalosi faapei ona ou faia e le aunoa, e faapea foi i nei ona po, ina ia viia ai Keriso i lo‘u tino, i le ola po o le oti.

Auā o lo‘u ola ua ia Keriso lea; a o lo‘u oti, o lo‘u manuia lea. Afai ou te ola i le tino, o le fua lea o la‘u galuega; a ou te le iloa po o le fea mea ou te filifilia. Auā ua ou faaletonu i manatu e lua; o loo ia te au le naunau ia ou alu, ia faatasia a‘u ma Keriso; o le mea lea e sili ona lelei.

o loo le faamatatauina outou i se mea e tasi e i latou o e tetee mai; auā o le faailoga lea ia te i latou o le malaia, a o le faailoga o le ola ia te outou, e mai le Atua foi lea. Auā ua foaifuaina ia te outou ona o Keriso, e le na ona ia faatuatua ia te ia, a ia faatigaina foi outou ona o ia;

na iloa foi o ia ua tino mai i le tagata, ua faamaulalo e ia ia te ia, ua na anaana ua oo ina maliu, o le maliu lea i le satauro.

Afai foi e faamaligiina lo‘u toto i luga o le taulaga ma le galuega i lo outou faatuatua, ou te olioli ai, tatou te olioli faatasi foi ma outou uma lava.

Auā na fai a oti o ia ona o le galuega a Keriso, e lei faapelepeleina foi e ia lona ola, a seia faaatoatoaina e ia mea sa totoe i lo outou auauna mai ia te au.

auā o le au peritomeina i tatou, o e auauna i le Atua ma le loto, ma mitamita ia Keriso Iesu, a e le faatuatua i la le tino.

A e peitai o mea uma sa aoga ia te au, ua ou manatu ua le aoga ia mea ona o Keriso. O lenei foi e moni lava, o lo‘u manatu ua le aoga mea uma lava ona o le silisili ese o le poto i la Keriso Iesu lo‘u Alii; ona o ia ua ou faaleaogaina mea uma, ma ou manatu o otaota lava ia mea, ina ia ou maua Keriso, ia maua foi a‘u ua ia te ia, e le ia te au sa‘u amiotonu nai le tulafono, a e peitai na o lea o loo i le faatuatua ia Keriso, o le amiotonu lea mai le Atua i le faatuatua; ina ia ou iloa o ia, ma le mana o lona toe tu mai, ma ia faatasi a‘u i ona tiga, ona ua faatusaina a‘u ia te au i lona maliu, pe mafai lava ia te au ona oo atu i le toe tu mai o e ua oti.

Aua o lo tatou nuu moni ua i le lagi lea, o loo faatalitali mai ai i tatou i le Faaola, o le Alii o Iesu Keriso; na te liua o tatou nei tino ua leaga, ina ia faia ia faatatau i lona tino matagofie, e tusa ma le mana na te mafaia ai ona faatoilaloina o mea uma ia te ia lava.

Ia outou olioli i le Alii aua le aunoa; ou te toe fai atu, ia outou olioli.

Aua ne‘i popole outou i se mea e tasi, a ia faailoa atu o outou manao i mea uma lava i le Atua, i le tatalo, ma le faatoga, atoa ma le faafetai. O le manuia foi mai le Atua, o loo silisili lava i mea uma e manatu i ai, e leoleoina ai o outou loto atoa ma o outou mafaufau ia Keriso Iesu.

Ou te olioli nei i mea ou te tiga ai ona o outou, ou te faaatoa foi i lo‘u tino o mea ua totoe i puapuaga o Keriso ona o lona tino, o le ekalesia lea;

O lenei, afai ua toe faatuina outou faatasi ma Keriso, ia outou saili i mea o i lugā, o i ai Keriso, o loo tietie i le itu taumatau o le Atua. Ia outou loto lava i mea i lugā, a e le o mea i le lalolagi; auā ua oti outou, ua lilo foi lo outou ola faatasi ma Keriso i le Atua. Pe a faaali mai Keriso lo tatou ola, ona iloa ai lea o outou faatasi ma ia i le manuia. O lenei, ia outou fasiotia o outou itu tino o i le lalolagi, o le faitaaga, o le amio leaga, o le faamatāitu, o le tu‘inanau leaga, ma le matapeapea, (o le ifo i tupua lava lea);

auā ua outou iloa, e maua e outou mai le Alii o le taui, o le tofi lea; auā ua auauna outou i le Alii o Keriso.

sa outou faaa‘oa‘o mai foi ia te i matou, atoa ma le Alii, ina ua outou talia le upu i le puapuaga tele, ma le olioli mai le Agaga Paia;

o e na fasioti i le Alii, o Iesu lava, atoa ma a latou lava perofeta, na faasaua mai foi i latou ia i matou; e le fiafia i ai le Atua, ua fai foi tagata uma lava mo latou fili;

ina ne‘i faagaeetia se tasi i nei puapuaga; auā ua outou iloa ua tofia lenei lava mea. Auā foi o ona po sa i ai i matou ia te outou, na matou muai fai atu ai ia te outou, o le a oo mai le puapuaga, ua faapea ona taunuu lava, ua outou iloa foi.

Ou te loto ina ia outou iloa, le au uso e, i le mataupu i e o momoe, ina ne‘i outou faanoanoa, pei o isi e leai so latou faamoemoe. Auā afai tatou te talitonu, ua maliu Iesu ma toe tu mai, e faapea foi ona aumaia e le Atua faatasi ma ia e o momoe ona o Iesu. Matou te fai atu foi lenei mea ia te outou i le afioga a le Alii, o i tatou o e ola ma totoe pe a afio mai le Alii, tatou te le muamua i e o momoe.

o le na maliu e sui a‘i tatou, ina ia tatou ola faatasi ma ia, pe tatou te mataala, pe tatou te momoe.

Ia outou saga olioli pea lava. Ia tatalo e le aunoa. Ia outou faafetai i mea uma lava, auā o le finagalo lea o le Atua ia te outou, ia Keriso Iesu.

O lea matou te mitamita ai ia te outou o i matou nei lava, i ekalesia a le Atua, ona o lo outou onosai ma lo outou faatuatua, i ona po o sauaga uma ma puapuaga ua outou faatoatoa ai; o le faailoga lea o le faamasinoga tonu a le Atua, ina ia ta‘uaogaina outou i le malo o le Atua, o le mea lea e tigaina ai outou. Auā ua tonu i le Atua e taui atu le puapuaga i e ua faapuapuagaina ai outou; e ia te outou foi o e puapuagaina, o le mapusaga faatasi ma i matou, pe a faaalia le Alii o Iesu mai le lagi, faatasi ma agelu o lona malosi, i le afi mumū, na te taui ma sui i e ua le iloa le Atua, ma ua le anaana i le tala lelei a lo tatou Alii o Iesu Keriso; e faasalaina i latou lava i le fanoga e faavavau lava, ia te‘a ma le Alii ma le mamalu o lona malosi; pe a afio mai o ia ina ia viia i ona lava tagata paia, ma ia ofo ia te ia i lena aso ia te i latou uma o e faatuatua, auā na outou talitonu mai lava i la matou mau.

ia latou teua oloa mo i latou lava, o le faavae lelei mo aso atali, ina ia latou fetagofi atu i le ola e faavavau.

Auā ua le foaiina mai e le Atua ia te i tatou le Agaga e mata‘u ai, a o le Agaga e faamalosi ai, ma alofa ai, ma mafaufau tonu ai. O lenei, aua e te mā i le molimau i lo tatou Alii, po o ona o a‘u o loo noanoatia ona o ia; a ia tiga faatasi i tatou ona o le tala lelei, e tusa ma le mana o le Atua, o le na faaola mai ia i tatou, ma valaau mai i le valaau paia, e le tusa ma a tatou galuega, a e tusa ma lona lava finagalo ma lona alofa tunoa na foaiina mai ia i tatou ia Keriso Iesu talu mai le vavau, a ua faailoa mai nei i le faaalia mai o lo tatou Faaola o Iesu Keriso, o le ua faaumatia lava le oti, a o le ola ma le le iu vale ua faamalamalamaina mai lea e ia i le tala lenei,

O le mea lea ua tigaina ai a‘u i ia mea; a ou te le mā lava, auā ua ou iloa o ia ua ou faatuatua i ai, ma a‘u mautinoa ua mafaia lava e ia ona leoleo i le mea na ou tuuina atu ai ia te ia e oo atu i lea lava aso.

O lenei, ia e onosai i mea e tiga ai, faapei o se tagata tau e lelei a Iesu Keriso. E leai sē tau i le taua na te faalavelavea e ia ia te ia i mea a lenei olaga, ina ia faafiafia o ia i lē na filifili ia te ia e fai ma tagata tau.

Ia e manatua Iesu Keriso o le fanau lava a Tavita, ua faatuina mai o ia nai e ua oti, e tusa ma la‘u tala lelei; ona o lea ua tigaina ai a‘u, ua oo ina noanoatia o a‘u, peiseai se pagota; a o le afioga a le Atua e le noatia lava lea. O le mea lea ou te onosai ai i mea uma ona o le au filifilia, ina ia maua e i latou lava le ola o loo ia Keriso Iesu ma le manuia e faavavau. O le upu moni lenei; auā pe afai tatou te oti faatasi ma ia, tatou te ola faatasi ai foi; pe afai tatou te onosai, e fai foi i tatou ma tupu faatasi ma ia; pe afai tatou te faafiti ia te ia, e faafiti foi o ia ia te i tatou;

A o oe, ua e iloa lelei o la‘u mataupu, o la‘u amio, o le loto mau, o le faamaoni, o le faapalepale; o le alofa, ma le onosai, o sauaga ma mea tiga, o mea ia na oo mai ia te au i Anetioka, ma Ikonio, ma Lusa; o sauaga faapena na tigaina ai a‘u; a o le Alii na ia laveai mai ia te au i na mea uma lava. O i latou uma foi o e loto ina nonofo ma le amio Atua ia Keriso Iesu, e sauaina i latou.

A o oe, ia e faautauta i mea uma lava, ia e onosai i mea e tiga ai, ia e fai le galuega a lē folafola le tala lelei, ia e matuā faaiuina lau faiva. Auā o a‘u ua faamaligiina nei lo‘u toto, ua lata ona po ou te alu ai. Ua ou tau le taua lelei, ua iu ia te au le tausinioga, ua ou taofi i le upu o le faatuatua. O lenei, ua teuina mo a‘u le pale o le amiotonu, e foaiina mai ia te au i lea lava aso o le Alii le faamasino amiotonu; e le gata foi ia te au, a o i latou uma lava o e fiafia i lona faaali mai.

O a‘u o Paulo, o le ua noanoatia ona o Keriso Iesu, o Timoteo foi lo tatou uso, o la ma tusi lenei ia Filemoni o le pele na tatou galulue faatasi;

a e ou te aioi atu ona o le alofa, o a‘u nei lava o Paulo le toeaina, o le ua noanoatia nei foi ona o Iesu Keriso.

A ua tatou iloa o ia o le na faamaulaloina teisi i agelu, o Iesu lea, ua faapaleina i le mamalu ma le viiga, ona o le tiga o le oti, ina ia oo ia te ia le oti ona o tagata uma i le alofa tunoa o le Atua. Auā o le na fai mea uma lava mona, sa na faia foi mea uma lava e ia, na tatau ia te ia i lona ta‘ita‘iina o atalii e toatele i le manuia, ona faaatoatoaina ai o le Alii o lo latou olataga ona o tiga.

O lenei, ina ua i ai i le fanau le tino tagata ola, na faapea foi ona ua i ai ia te ia, ina ia faaumatia e ia i lona maliu o le ua i ai le malo e oti ai, o le tiapolo lea, ma tuusaunoaina ai i latou uma o e na faapologaina i o latou olaga uma ona o le mata‘u i le oti.

O lenei, ua tuuina mai pea o le malologa faasapati mo tagata o le Atua. Auā o le ua sao atu i lona malologa, ua malolo foi o ia i ana lava galuega, faapei o le Atua i ana lava. O lenei, ina tatou finafinau ia ina ia sao atu i lena malologa, ne‘i ai se tasi e paū i lona faaa‘oa‘o i lo latou faalogogata.

O ia lenei sa tatalo atu i ona po na tino tagata mai ai, ma aioi atu ma le tagi tele ma loimata i le na mafaia ona faaola ia te ia nai le oti, na faafofogaina foi o ia i le mea na ia fefe ai. E ui lava o ia o le Alo, a o mea sa tiga ai o ia na a‘oa‘oina ai o ia ia usiusitai, ua faaatoatoaina foi o ia, ona avea ai lea o ia ma tupuga o le ola e faavavau ia i latou uma o e usiusitai ia te ia;

A ia outou manatu i aso anamua, ina o faamalamalamaina outou, na outou onosai ai i le taua tele o tiga; ina ua faia outou ma mataaga i upu faifai ma puapuaga, tasi lea mea; i le ma lenei, ina ua faatasia outou ma e na faapeaina; auā na outou alolofa mai i o‘u noanoataga, ma outou onosai i le vetega o a outou oloa ma le olioli, ua iloa e outou ua ia te outou le oloa i le lagi e sili ona lelei ma le tumau. O le mea lea aua le lafoai ai o outou faamalosi, ua i ai le taui e tele.

Na oti i latou nei uma lava o faatuatua, e lei maua mea na folafolaina, a ua iloa ai e i latou a e mamao, na mautinoa foi, ma latou talia ma le fiafia, ma latou ta‘utino mai o tagata ese i latou ma āumau i le lalolagi. Auā o i latou o e fai mai upu faapena, ua latou matuā faailoa mai o loo saili e i latou lo latou lava nuu. Auā foi ana manatua e i latou le nuu ua latou o mai ai, po ua mafaia e i latou ona toe foi atu i ai; a o lenei, ua latou naunau lava i le nuu e sili ona lelei, o le faalelagi lea; o le mea lea e le mā ai le Atua ia te i latou, ina ia ta‘ua o ia o lo latou Atuā auā ua saunia e ia o le aai mo i latou.

ua filifili e ia ia agaleagaina o ia faatasi ma tagata o le Atua e lelei ai, a e aua le ia te ia le fiafia i le agasala e vave mavae; ua manatu o ia i le upu faifai ona o Keriso o le oa lea e sili i faaputugāoa o Aikupito; auā sa faanaunau o ia i le taui. O le faatuatua na tuuina ai e ia o Aikupito, ua le fefe i le ita o le tupu; auā na faamalosi o ia pei o sē iloa atu i le le o vaaia.

Se a foi la‘u e toe fai atu? auā e saasaa le aso e tala atu ai ia Kitiona, ma Parako, ma Samasoni, ma Iefata, ma Tavita, ma Samuelu, ma le au perofeta; o e na faatoilaloina malo i le faatuatua, na fai ai amiotonu, na maua ai mea na folafolaina, na pupuni ai gutu o leona, na tinei ai le malosi o le afi, na sao ai i le mata o le pelu, na faamalosia ai i latou sa vaivai, na avea ai ma fitafita i taua, na tutuli ai ‘au a nuu ese; na maua mai e fafine o latou tagata oti ina ua toe tu mai; na faataugaina nisi, ua le talia e i latou le olataga, ina ia maua e i latou le toe tu mai e sili ona lelei; na tofotofoina isi i tauemuga, ma sasaina, atoa ma noanoataga, ma tuuina i fale puipui; na fetogia i latou i maa, na vaevaeesea i ‘ili, na tofotofoina, na oti i latou na fasia i le pelu; na feoai solo ma oofu i pa‘u mamoe ma pa‘u oti; o mativa i latou, ma puapuagatia, ma faasaunoaina; (e le aoga le lalolagi ona i ai o i latou;) na feoai solo i latou i vao, ma mauga, ma ana, ma lua i le eleele.

O lenei, o i tatou foi, o loo ua vagavagaia e le faapotopotoga o e matamata mai e faapea ona toatele, ina tatou tuu ese ia o mea mamafa uma, atoa ma le agasala e faalavelavegofie ai i tatou, ia tatou taufetuli ma le onosai i le ala tanu o i o tatou luma,

ma ia vaavaai atu ia Iesu o le na te ta‘ita‘iina ma le na te faaatoatoaina le faatuatua; o le na onosai i le satauro, na faatauvaa ia te ia le mā, ona o le olioli sa tuu i ona luma, ua nofo foi o ia i le itu taumatau o le nofoālii o le Atua. Auā, ia outou mafaufau i le na onosai i le faatu‘i ese faapena ia te ia o e agasala, ne‘i faavaivai o outou loto ma outou le lavatia. Ua oo i nei ona po ua outou le tetee atu e oo i le faasasaaina o outou toto i lo outou tetee atu i le agasala;

O lea na tiga ai Iesu i tua o le faitotoa o le aai, ina ia faapaiaina ai e ia o le nuu i lona lava toto. O le mea lea ina tatou o atu ai ia te ia i tua o le toagālauapi, ma ia tatou onosai i le upu faifai pei o lona faifaiga; auā ua leai so tatou aai tumau iinei, a ua tatou saili i lē atali.

O‘u uso e, ia outou manatu, o le mea e fiafia tele ai pe a maua outou i tofotofoga eseese; ina ua outou iloa o le tofotofoina o lo outou faatuatua e tupu ai le onosai; a ia atoatoa le galuega a le onosai, ina ia atoatoa ai ma ia sao ona lelei ai outou, ia leai se mea e tasi e mativa ai.

Amuia le tagata o lē onosai i le faaosoosoga; auā a uma ona tofotofoina e maua e ia le pale o le ola, ua folafolaina mai e le Alii i e alolofa atu ia te ia.

O‘u uso e, ia outou faaa‘oa‘o i le faatoatoa i le leaga, atoa ma le onosai o le au perofeta, e na tautala mai i le suafa o le Alii. Faauta, ua tatou ta‘uamuia i e onosai; ua outou faalogologo i le onosai o Iopu, ua outou iloa foi le iuga i la le Alii, ina ua mutimuti vale tele le Alii ma le alofa naunau.

ia iu i le tofi e le pala, e leai se leaga o i ai, e le mamae lava, o loo teu i le lagi mo i tatou, o e o leoleoina e le mana o le Atua, i le faatuatua, ia iu i le ola ua saunia, e faaalia mai i ona po e gata ai.

Ua outou o mai ia te ia, o le maa ola o ia na lafoaiina e tagata, a ua filifilia e le Atua, ua tāua lava, o outou foi, ua atiina ae outou pei o maa ola, o le fale faaleagaga, o le au ositaulaga paia, e avatu taulaga faaleagaga e mālie i le Atua ona o Iesu Keriso.

Auā na valaauina outou ona o lea lava mea; auā na tigaina Keriso lava o le sui o outou, ua tuuina mai ai e ia le faaa‘oa‘o mo outou, ina ia outou mulimuli atu i ona tulagāaao. O le na le agasala lava, na le iloa foi se pepelo i lona fofoga; o le sa agateleina, a e lei toe agatele atu, na faatigaina o ia, a e lei faamatau atu, a ua tuuina atu o ia e ia i le na te faamasino tonu.

A e afai e tigaina outou ona o le amiotonu, amuia outou, Aua foi tou te fefefe i lo latou faamatau mai, aua foi le atuatuvale.

Auā o Keriso foi na tigaina o ia faatasi mo agasala, o le amiotonu o le sui o le amioletonu, ina ia ta‘ita‘iina e ia o i tatou i le Atua; na fasiotia o ia i le tino, a ua faaolaina mai i le Agaga;

Le au pele e, aua tou te ofo i le tofotofoga pei o le afi, ua oo ia te outou e fai ma tofotofoga ia te outou, peiseai o se mea fou ua oo ia te outou; a e faapei ona tofusia o outou faatasi i tiga o Keriso, ia outou olioli ai, ina ia fiafia outou ma le olioli tele pe a faaalia mai lona mamalu. Afai e upuleagaina outou ona o le suafa o Keriso, amuia outou; auā o loo tumau ia te outou le Agaga mamalu o le Atua; o loo faifaia o ia e i latou, a ua viia e outou.

a e afai e faatigaina se tasi auā o ia o le Kerisiano, aua le masiasi ai o ia, a ia vivii atu i le Atua ona o lea lava mea.

O lenei, o i latou ua tigaina e tusa ma le finagalo o le Atua, ia latou tuuina atu ma le amio lelei o latou lava ola i le na faia mea uma, o ia e faamaoni.

Pe a faaali mai foi le Leoleo mamoe silisili, e maua e outou le pale pupula e le mamae lava.

O le mea lea ia faamaulalo ai outou i lalo o le aao malosi o le Atua, ina ia faamaualugaina outou e ia i ona po e tatau ai. Ia tuuina atu ia te ia mea uma tou te popole ai, auā o loo manatu mai o ia ia te outou. Ia outou faautauta, ia outou mataala, ona o le ua fai outou mona fili, o le tiapolo lea, o loo fealualuai o ia e pei o se leona tagi, ua saili se tasi e ‘aina e ia; ia outou tetee atu ia te ia, ma ia mausali outou i le faatuatua, ina ua outou iloa o loo taufaaatoaina ia lava mea tiga i lo outou au uso o i le lalolagi. A o le Atua e ona le alofa tunoa uma lava, o le na valaauina i tatou ia iu atu i lona manuia faavavau o ia Keriso Iesu, pe a tigaina outou i nai aso, ia faaatoatoaina outou e ia lava, ia faatumauina ia faamalosia, ma ia faavaeina outou;

E le pei o Kaino na i loo leaga, na fasioti foi i lona lava uso; se a foi le mea na ia fasioti ai ia te ia? Ona o lana amio ina leaga, a o le amio a lona uso ua tonu.

O‘u uso e, aua tou te ofo pe a ita mai le lalolagi ia te outou. O i tatou, ua tatou iloa ua oo i tatou i le ola sa i le oti, auā o loo alolofa i tatou i le au uso; o se le alofa i le uso, o loo tumau ia i le oti. O i latou uma o e ita i o latou uso, o fasioti tagata i latou; ua outou iloa foi e leai sē fasioti tagata e tumau ia te ia le ola e faavavau. O le mea lava lenei ua tatou iloa ai le alofa, ina ua tuuina atu e ia o lona lava soifua e sui a‘i i tatou; e tatau foi ona tatou tuuina atu lo tatou ola e sui a‘i le au uso.

O outou, le fanau e, mai le Atua lava outou, ua outou manumalo foi ia te i latou, auā e sili o ia ua ia te outou, i le ua i le lalolagi.

Auā o i latou uma o e fanau mai i le Atua, e manumalo i latou i le lalolagi; o lenei foi le manumalo e manumalo ai i le lalolagi, o lo tatou faatuatua lava. O ai se na te manumalo i le lalolagi, pe afai e le o lē talitonu, o Iesu o le Alo lava ia o le Atua?

Faauta, o loo afio mai o ia ma ao, e iloa atu foi o ia e mata o tagata uma, atoa ma e na tu‘ia o ia; e taufaitagitu‘i foi itu aiga uma o le lalolagi ona o ia. E moni, Amene. O a‘u le Alefa ma le Omeka, o le amataga ma le gataaga, ua fetalai mai ai le Alii, o loo soifua, na soifua foi, o le a afio mai, e ona le malosi uma lava.

o lē ola nei lava, sa ou oti, faauta foi, ou te ola e faavavau faavavau lava; Amene, o ia te au foi ki o seoli ma le oti.

O le ua i ai taliga, ina faalogo mai ia o ia i le mea ua fetalai mai ai le Agaga i ekalesia, O lē manumalo, ou te avatua ia te ia e ‘ai i le laau o le ola o i totonu o le parataiso o le Atua.

Ia e tusi foi i le agelu a le ekalesia o i Semurana, O mea nei ua fai mai ai lē muamua ma lē mulimuli, o le na oti, a ua ola mai, Ua ou iloa au galuega, ma lou puapuaga, ma lou mativa, (a ua e tamaoaiga,) ma le upu faifai a ē ua fai mai o Iutaia i latou, a e leai lava, a o le sunako o Satani i latou. Aua lava e te fefe i mea o le a e tiga ai. Faauta, o le a tuuina atu ni o outou e le tiapolo i le fale puipui, ina ia tofotofoina ai outou; e po agafulu foi e puapuagatia ai outou. Ia e faamaoni seia oo i le oti, ona ou avatu ai lea ia te oe o le pale o le ola.

O le ua i ai taliga, ina faalogo mai ia o ia i le mea ua fetalai mai ai le Agaga i ekalesia, O lē manumalo, e le afaina lava o ia i le oti faalua.

Ua ou iloa au galuega, ma le mea ua e nofo ai, o i ai le nofoālii o Satani, ua e taofi mau foi i lo‘u igoa, ma ua e le faafitia le faatuatua ia te au i ia ona po lava na i ai Anetipa o la‘u molimau o le na faamaoni, sa fasiotia o ia na ia te outou i le mea o nofo ai Satani.

O le ua i ai taliga, ina faalogo mai ia o ia i le mea ua fetalai mai ai le Agaga i ekalesia, O lē manumalo, ou te avatua ia te ia le manai lilo e ‘ai ai; ou te avatu foi ia te ia le maa sinasina, ua tusia foi i le maa le igoa fou, e le iloa e se tasi ua na o le ua maua.

O lē manumalo foi, ma tausi i a‘u galuega seia oo i le gataaga, ou te avatua ia te ia e pule i nuu ese; e pule foi o ia ia te i latou i le tootoo uamea; e nutipalaina i latou pei o ipu a lē fai ipu omea, e pei o a‘u foi ona ou maua mai i lo‘u Tamā; ou te avatua foi ia te ia le fetu ao. O le ua i ai taliga, ina faalogo mai ia o ia i le mea ua fetalai mai ai le Agaga i ekalesia.

O lē manumalo, e faaofuina o ia i ofu sisina; ou te le sōloiesea foi lona igoa i le tusi o le ola, a e ou te ta‘u atu lona igoa i luma o lo‘u Tamā, ma luma o ana agelu. O le ua i ai taliga, ina faalogo mai ia o ia i le mea ua fetalai mai ai le Agaga i ekalesia.

O lē manumalo, ou te faia lea ma pou tu i le malumalu o lo‘u Atua, e le toe ulufafo lava ia, ou te tusi foi i ai le suafa o lo‘u Atua, ma le igoa o le aai a lo‘u Atua, o Ierusalema fou lea e alu ifo nai le lagi mai lo‘u Atua, atoa foi ma lo‘u igoa fou. O le ua i ai taliga, ina faalogo mai ia o ia i le mea ua fetalai mai ai le Agaga i ekalesia.

O lē manumalo ou te avatua i te ia ma te nonofo faatasi ma a‘u i lo‘u nofoālii, e pei o a‘u foi ona ou manumalo, ua ma nonofo foi faatasi ma lo‘u Tamā i lona nofoālii. O le ua i ai taliga, ina faalogo mai ia o ia i le mea ua fetalai mai ai le Agaga i ekalesia.

Ua tatalaina foi e ia o lona lima o faamaufaailoga, ona ou iloa lea o i lalo ifo o le fata faitaulaga o agaga o e na fasiotia ona o le afioga a le Atua, ma le mau na latou taofi mau ai; ua latou alalaga foi ma le leo tele, ua faapea atu, Le Alii e, le paia ma le faamaoni e te le faamasino ea ma taui i lo matou toto i e nonofo i le lalolagi seia afea? Ua foaiina atu ia te i latou taitoatasi ofu sisina; ua fai atu foi ia te i latou ia latou faatalitali lemu seia toe itiiti, seia atoatoa mai ai o latou uso a auauna atoa ma o latou uso, o le a fasiotia pei o i latou lava.

Ua mavae atu ia mea, ona ou iloa lea, faauta foi i le motu o tagata e toatele mai atu nuu uma, ma aiga, ma nuu, ma gagana eseese, e le ma faitaulia e se tasi, o loo tutū i latou i luma o le nofoālii ma luma o le Tamai mamoe, ua oofu i latou i ofu sisina, ua i ai foi lau pama i o latou lima;

Ona fai mai ai lea o le tasi o le au toeaina, ua faapea mai ia te au, O i latou ia e ua oofu i ofu sisina, o ai ea i latou, po o fea foi na latou o mai ai? Ona ou faapea atu ai lea ia te ia, Le Alii e, ua e silafia. Ona faapea mai ai lea o ia ia te au, O i latou ia o e o mai nai le puapuaga tele, ua ta foi o latou ofu, ma ua faasinasinaina o latou ofu i le toto o le Tamai mamoe. O le mea lea ua latou i luma ai o le nofoālii o le Atua, ua latou auauna foi ia te ia i lona malumalu i le ao ma le po; o lē tietie foi i le nofoālii e mau ma i latou. Latou te le toe fia aai, e le toe fia inu foi e le ogotia i latou i le la, po o se tasi vevela; auā o le Tamai mamoe o loo i luma o le nofoālii na te fafaga ia i latou, ma ta‘ita‘i ia te i latou i puna o vai ola; e sōloieseina foi e le Atua o loimata uma nai o latou mata.

Ua ita foi nuu, ona oo mai lea o lou toasa, ma ona po e faamasinoina ai e ua oti, ma taui ai i au auauna le au perofeta, ma le au paia, ma e ua matatau i lou suafa, o tagatānuu atoa ma alii, e fano ai foi i latou o e na fano ai le lalolagi.

A ua latou manumalo ia te ia ona o le toto o le Tamai mamoe, ma le upu a la latou mau, ua latou le faapelepeleina foi lo latou ola ua oo i le oti.

Ua ita foi le tarako i le fafine, ona alu atu ai lea o ia e tau le taua ma i latou ua totoe o lana fanau, o e ua tausi i poloaiga a le Atua, ma ua taofi le mau ia Iesu Keriso.

Ua tuuina atu foi ia te ia ia tau le taua ma le au paia, ma ia manumalo ia te i latou; ua tuuina atu foi ia te ia e pule i itu aiga uma, ma gagana eseese, ma nuu.

Ua tuuina atu foi ia te ia na te avatua le mānava i le faatagata o le manu feai, ina ia tautala le faatagata o le manu feai, ma ia faia ina ia fasiotia i latou uma o e le ifo atu i le faatagata o le manu feai. Ua faia foi e ia ona ia faailogaina o tagata uma, o tagata nuu atoa ma alii, o e mauoa ma e matitiva, o e sa‘oloto ma e pologa, ia faailogaina i latou i o latou lima taumatau, po o latou muaulu; ina ia le mafaia ona faatau mai pe faatau atu e se tasi, tau lava o e ua i ai le faailoga, po o le igoa o le manu feai, po o le faitau aofai o lona igoa. O le mea lenei ua i ai le poto. O le ua i ai le mafaufau ina faitau ia o ia i le faitau aofai o le manu feai; auā o le faitau aofai lea o le tagata; o lona faitau aofai foi, E ono selau ma le onogafulu ma le ono.

O le mea lenei ua i ai le onosai o le au paia; o le mea lenei ua i ai e ua tausi i poloaiga a le Atua ma le faatuatua ia Iesu. Na ou faalogo foi i le leo mai le lagi, ua faapea mai ia te au, Ia e tusi, Amuia ē ua oti, o e ua oti o i le Alii e amata i nei ona po. O lea lava, ua fetalai mai ai le Agaga, ina ua latou malolo i a latou galuega tiga; o a latou galuega foi e mulimuli ia te i latou.

Na ou iloa foi le fafine ua onā i le toto o le au paia ma le toto o e na molimau ia Iesu; ua ou iloa atu ia te ia, ona ou matuā ofo tele ai lea.

e le toe pupula mai foi ia te oe se malamalama o se lamepa, e le toe lagona foi ia te oe le leo o le faatoafaiavā ma le faatoanofo tane; auā o ou tagata faatauoa o tagata sili ia o i le lalolagi, auā ua faaseseina nuu uma i au togafiti faataulāitu. Ua iloa foi ia te oe le toto o perofeta ma le au paia, ma i latou uma ua fasiotia i le lalolagi.

ua ofu foi o ia i le ofu ua fufui i le toto; ua faasuafaina o ia, O le Lokou o le Atua. O ‘au foi o i le lagi ua mulimuli atu ia te ia i luga o solofanua sisina, ua oofu i latou i le ie vavae sinasina ma le mamā.

Na a‘u iloa foi nofoālii, ma ua latou tietie ai, ua tuuina atu foi le faamasinoga ia te i latou; na a‘u iloa foi agaga o e ua vavaeeseina o latou ulu ona o le mau ia Iesu ma le afioga a le Atua, o e na le ifo i le manu feai po o lona faatagata, na le talia foi le faailoga i o latou muaulu po o latou lima; ua latou ola foi, ma ua fai ma tupu faatasi ma Keriso i tausaga e afe; a o e totoe o e ua oti, e lei toe ola i latou seia atoa ia tausaga e afe. O le uluai toe tu lena. Amuia mona ua paia le ua i ai se tofi i le uluai toe tu; e le oo foi le pule a le oti faalua ia te i latou, a e avea i latou ma faitaulaga a le Atua ma Keriso, latou te fai ma tupu foi faatasi ma ia i tausaga e afe.

E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua. Ua fetalai mai foi lē tietie i le nofoālii, Faauta, ou te faia ia fou mea uma lava. Ua fetalai mai foi o ia ia te au, Ia e tusi; auā o upu nei e moni ma le faamaoni ia. Ua fetalai mai foi o ia ia te au, Ua uma ona fai. O a‘u le Alefa ma le Omeka, o le amataga ma le gataaga. O le ua fia inu ou te foaifuaina atu ia te ia ai le puna o le vai ola.

O lē manumalo e maua e ia mea uma, e fai foi a‘u mona Atua, e fai foi o ia mo‘u atalii.

Faauta foi, ou te vave alu atu; ua ia te au foi le taui ou te taui taitasi atu ia tusa ma lana ua fai. O a‘u le Alefa ma le Omeka, o le amataga ma le gataaga, o le muamua ma le mulimuli.