22 – Vavega

Na faia e le Atua le lagi ma le lalolagi i le amataga. Sa soona nunumi le lalolagi ma ua gaogao, sa ufitia foi le moana i le pouliuli; na fegaoioiai foi le Agaga o le Atua i le fogātai. Ua fetalai mai le Atua, Ia malamalama; ona malamalama ai lea.

Ona faia lea e Ieova le Atua o le tagata i le efuefu o le eleele, ma ua mānava i ona pogaiisu o le mānava ola, ona avea ai lea o le tagata ma tagata ola.

Ona fai mai ai lea o Farao ia Iosefa, Ua fai la‘u miti, a e leai se na te faamatalaina mai ia te au; ua ou faalogo foi i le tala ia te oe, pe a e faalogo i se miti e te iloa ona faamatalaina. Ona tali atu ai lea o Iosefa ia Farao, ua faapea atu. E le o a‘u, a o le Atua na te avatu se tali lelei ia Farao.

Ua faaali mai ai ia te ia le agelu a Ieova i le afi mumū i totonu o le laau talatala; ona vaai atu lea o ia, faauta, o loo mu lava le laau talatala i le afi, a e lei faaumatia le laau talatala. Ona faapea lea o Mose, Ou te afe atu, ma a‘u maimoa i lenei mea ou te vaai ua ese lava, pe faapefea ona le susunuina o le laau talatala. Ua silafa e Ieova ua afe ane ia e maimoa, ona valaau mai lea o le Atua ia te ia nai totonu o le laau talatala, ua fetalai mai, Mose, Mose e! Ona fai atu lea o ia, O a‘u lenei. Ona fetalai mai lea, Aua e te faalatalata mai iinei; ina to ese ia ou seevae i ou vae, auā ua sa lava le eleele o loo e tu ai nei.

E lei faaali mai Ieova ia te oe. Ona fetalai mai lea o Ieova ia te ia, Pe se a lena mea i lou lima? Ua fai atu ia, O le tootoo. Ua ia fetalai mai, Ina lafo ia i le eleele; ona lafo lea e ia i le eleele, ua liu gata; ona sola ese ai lea o Mose. Ona fetalai mai lea o Ieova ia Mose, Ina aapa atu ia o lou lima, ma tago i lona iu. Ona aapa atu ai lea o lona lima, ua pue atu ai, ona liu tootoo lea i lona lima; ina ia latou talia mai ai, na faaali ia te oe o Ieova le Atua o latou tamā, o le Atua o Aperaamo, o le Atua o Isaako, o le Atua foi o Iakopo.

Ua toe fetalai mai Ieova ia te ia, Ia e tuu lou lima i lou fatafata; ona tuu ai lea o lona lima i lona fatafata; ona to mai ai lea, faauta, o lona lima ua lepela e pei o le kiona. Ua fetalai mai o ia, a toe tuu ia lou lima i lou fatafata; ua toe tuu lona lima i lona fatafata, ona toe to mai lea nai lona fatafata, faauta foi, ua toe liliu, ua tusa ma lona lava tino. Afai foi latou te le talia mai oe, ma lē faalogo i le leo o le uluai faailoga, latou te talia lava le leo o le faailoga mulimuli. Pe afai foi latou te le talia o nei faailoga e lua, e le faalogo mai foi i lau upu, ona e asu ai lea sina vai nai le vaitafe, ma sasaa i le eleele matutu, ona liu toto ai lea i le eleele matutu, o le vai e te asuina mai le vaitafe.

Ona talatala atu lea o Arona i upu uma lava na fetalai mai ai Ieova ia Mose, ua ia faia foi faailoga i luma o le nuu. Ona talia lea e le nuu, ina ua latou faalogologo ua asiasi mai Ieova i le fanauga a Isaraelu, ua na silasila mai foi i lo latou puapuaga; ona latou punonou lea ma ifo.

O a‘u foi ou te faamaaa i le loto o Farao, ou te faatele foi o‘u faailoga ma o‘u vavega i le nuu o Aikupito;

A fai mai Farao ia te oulua, ua faapea mai, Ina faia se vavega e oulua; ona e fai atu lea ia Arona, Tago ia i lou tootoo, ma lafo i luma o Farao, ona liu gata ai lea. Ona o atu lea o Mose ma Arona ia Farao, ua la faia faapei ona fetalai mai ai o Ieova; ua lafo e Arona lona tootoo i luma o Farao ma ana auauna, ona liu gata ai lea. Ona valaau atu lea e Farao i le au popoto ma taulāitu; ua faapea foi ona fai e taulāitu a Aikupito i a latou togafiti faataulāitu. Auā ua latou taitasi ma lafo lona tootoo, ona liu gata ai lea; a ua folo o latou tootoo e le tootoo o Arona.

Ua faapea ona fai e Mose ma Arona, pei ona fetalai mai o Ieova; ua ia sii i luga foi le tootoo, ma ta le vai o le vaitafe i luma o Farao ma ana auauna; ona liu toto ai lea o le vai uma lava o le vaitafe. Ona mamate ai lea o i‘a sa i le vaitafe, ua elo foi le vaitafe, e le mafai e Aikupito ona inu i le vai o le vaitafe, sa i ai le toto i le nuu uma lava o Aikupito. Ona faapea lea ona fai e taulāitu o Aikupito i a latou togafiti faataulāitu; ona faamaaaina ai lea o le loto o Farao, ua le faalogo foi ia te i laua, faapei ona fetalai mai ai o Ieova. Ona liliu ai lea o Farao, ua alu i lona fale, e lei mafaufau foi o ia i lenei mea.

Ua fetalai mai Ieova ia Mose, Ina alu ia ia Farao, ma fai atu ia te ia, O loo faapea ona fetalai mai o Ieova; ia e tuu mai lo‘u nuu e o, ina ia latou auauna mai ia te au. Afai foi e te le mafai ona tuu mai o i latou e o, faauta, ou te taia lou nuu uma lava i rane. E tutupu tele mai o rane i le vaitafe; e ae mai, ma ulufane i lou fale, i lou afeafe moe, ma lou moega, ma le mea e te taoto ai, o fale foi o au auauna, atoa ma lou nuu, o au ogaumu foi, ma au mea e palu ai falaoa; e o ae rane i luga ia te oe, ma luga o lou nuu, ma luga o au auauna uma lava. Ua fetalai mai foi Ieova ia Mose, E te fai atu ia Arona; ina faaloaloa ia lou lima e i ai lou tootoo i luga o vaitafe, ma vaita‘i, ma vailepa, ma ia faaae mai rane i le nuu o Aikupito. Ona faaloaloa lea e Arona o lona lima i vai o Aikupito, ona ae mai ai lea o rane, ua lilo ai lava le nuu o Aikupito. Ua faapea ona fai foi e taulāitu i a latou togafiti faataulāitu; ua faaae foi e i latou o rane i le nuu o Aikupito.

Ona fetalai mai lea o Ieova ia Mose, Ia e fai atu ia Arona, faaloaloa ia lou tootoo, ma ta a‘i le efuefu o le fanua, ina ia liu ‘utu i le nuu uma lava o Aikupito. Na la faia foi faapea, na faaloaloa e Arona lona lima sa i ai lona tootoo, na ia ta i le efuefu o le fanua, i le, ua fai ma ‘utu i tagata atoa ma manu; ua liu ‘utu o le efuefu uma lava i le fanua i le nuu uma lava o Aikupito. Ua faapea ona fai foi e taulāitu i a latou togafiti faataulāitu, ina ia tutupu ae o ‘utu, a e le mafaia; sa i ai foi o ‘utu i tagata atoa ma manu. Ona fai atu lea o taulāitu ia Farao, O le aao lenei o le Atua; a ua maaa pea le loto o Farao, e lei faalogo o ia ia te i laua, faapei ona fetalai mai ai o Ieova.

Ua fetalai mai foi Ieova ia Mose, Ia e ala usu atu i le taeao, ma ia e tu i luma o Farao; faauta, o le a alu ane o ia i le vai, ma ia e fai atu ia te ia. O loo faapea ona fetalai mai o Ieova, tuu mai ia lo‘u nuu e o, ina ia latou auauna mai ia te au; auā a ē le mafai ona tuu mai lo‘u nuu e o, ona ou auina atu lea ia te oe, ma au auauna, ma lou nuu, ma ou fale, o le vao garova; e tutumu foi fale o Aikupito atoa ma le laueleele o i ai latou i garova. Ou te vavae ese foi i lea lava aso o le laueleele o Kosena e i ai lo‘u nuu, ina ia le oo i ai ni garova, ina ia e iloa ai o a‘u lava o Ieova le pule i le lalolagi. Ou te tuu ai foi se tuaoi i le va o lo‘u nuu ma lou nuu; e fai lava lenei faailoga a taeao. Ona faapea lava lea ona fai e Ieova, ua oo mai ai garova e tele lava i le fale o Farao, ma fale o ana auauna, ma le nuu atoa uma o Aikupito; ua leaga le nuu ona o le vao garova.

Ua fetalai mai Ieova ia Mose, Ina ulufale atu ia oe ia Farao, ma fai atu ia te ia, O loo faapea ona fetalai mai o Ieova le Atua o sa Eperū, Ia e tuu mai lo‘u nuu e o, latou te auauna mai ia te au. Auā afai e te le mafai ona tuu mai i latou e o, a e taofi pea i latou, faauta, o le aao o Ieova e oo i au manu i le fanua, o solofanua, ma asini, ma kamela, ma povi, ma mamoe, o le faamai matuā mamafa lava. A e vavaeeseina e Ieova o manu a Isaraelu ma manu a Aikupito; e le mate lava se mea e tasi i mea uma a le fanauga a Isaraelu. Ona tuupo ai lea e Ieova, ua fetalai mai, A taeao e faia e Ieova lana i mea i le nuu. Ona faia lea e Ieova o lea mea i le aso taeao, ua mamate ai o manu uma lava a Aikupito, a e lei mate lava se manu e tasi a le fanauga a Isaraelu. Ona auina atu lea e Farao, faauta, e lei mate se manu a Isaraelu, ua leai lava se tasi; a ua maaa pea lava le loto o Farao, e lei tuuina mai e ia o le nuu e o.

Ona fetalai mai lea o Ieova ia Mose ma Arona, Ia faatutumu oulua lima uma i lefulefu mai le umu, ma ia saaluu solo ai i luga e Mose i luma o Farao. Ona liu efuefu ninii ai lea i le nuu uma lava o Aikupito, e avea foi i luga o tagata atoa ma manu ma ma‘i fulafula e tupu ai le manunu i le nuu uma lava o Aikupito. Ona la ave lea o lefulefu nai le umu, ua la tutū atu i luma o Farao, ona saaluu solo ai lea i luga e Mose, ona avea lea ma ma‘i fulafula e tupu ai le manunu i tagata atoa ma manu. Ua le lavā taulāitu ona tutū i luma o Mose, ona o le ma‘i fulafula; auā sa i ai le ma‘i fulafula i taulāitu atoa ma Aikupito uma lava. A ua faamaaa e Ieova le loto o Farao, e lei faalogo foi o ia ia te i laua, e pei o le afioga a Ieova ia Mose.

Ona fetalai mai lea o Ieova ia Mose, Ina faaloaloa ia o lou lima i luga, ona to ifo ai lea o le uato‘a i le nuu uma lava o Aikupito, i luga o tagata, ma manu, ma laau afu uma lava o le fanua i le nuu o Aikupito. Ona faaloaloa ae lea e Mose lona tootoo i luga, ona tuuina mai lea e Ieova o faititili ma le uato‘a, ua sosolo foi le afi i le eleele, ua faatotō ifo foi e Ieova le uato‘a i le nuu o Aikupito. Sa i ai le uato‘a ma le afi e fefiloi ma le uato‘a, ua mamafa tele lava, e leai lava sona tusa i le nuu uma lava o Aikupito talu ina āina. Ua toia le laueleele uma lava o Aikupito i le uato‘a, o mea uma lava sa i le vao, o tagata atoa ma manu, ma laau afu uma lava o le fanua ua uma ona toia i le uato‘a; ua gāugau ai foi o laau uma lava o le vao. Na o le nuu o Kosena sa i ai le fanauga a Isaraelu, ua le i ai lava se uato‘a. Ona feauina lea e Farao ua aami ia Mose ma Arona, ua fai mai ia te i laua, Ua ou agasala i lenei mea; o loo amiotonu Ieova, a e peitai a‘u nei ma lo‘u nuu, ua amio leaga i matou;

Ona fetalai mai lea o Ieova ia Mose, Faaloaloa ia lou lima i luga o le laueleele o Aikupito i le sē akerise, ia o ae i luga o le laueleele o Aikupito; e ‘aina ai foi o laau afu uma o le fanua, o mea uma lava ua totoe i le uato‘a. Ona faaloaloa lea e Mose o lona tootoo i luga o le laueleele o Aikupito, ona faaagi mai lea e Ieova o le matagi mai sasae i le laueleele i lea lava ao uma ma lea lava po uma; ua oo i le taeao, ona au mai ai lea o sē akerise e le matagi mai sasae; ua o ae foi o sē akerise i luga o le laueleele uma lava o Aikupito, ua nonofo foi i nuu uma lava o Aikupito, ua tele lava; sa leai lava anamua ni sē akerise e tusa ma ia sē akerise, e le toe faapea lava. Ua ufitia ai le fogāeleele uma lava, ua faapouliuligia ai foi le nuu; ua ‘aina ai foi o laau afu uma o le nuu, atoa ma fua uma lava o laau na totoe i le uato‘a, e lei toe lava sina lau i se laau po o se laau afu i le fanau i le nuu atoa uma o Aikupito. Ona faataalise lea o Farao ona aami ia Mose ma Arona; na ia fai mai foi i ai, Ua ou agasala ia Ieova lo outou Atua, atoa foi ma oulua;

Ona fetalai mai lea o Ieova ia Mose, Ina faaloaloa ia lou lima i le lagi, ina ia pouliuli le nuu o Aikupito, o le pouliuli e mafai ona tagofia. Ona faaloaloa lea e Mose o lona lima i le lagi, ona pouliuli tele lava lea o le nuu atoa uma o Aikupito, e tolu aso. Ua le feiloai i latou, e lei tulai se tagata i le mea sa nofo ai, e tolu aso; a o le fanauga uma lava a Isaraelu, ua malamalama mea uma sa latou nonofo ai.

Ua oo i le tulua o po ma ao, ona fasi ai lea e Ieova o ulumatua uma lava i le nuu o Aikupito, o le ulumatua Farao, o le na tietie i le nofoālii, atoa ma le ulumatua a le ua faatagataotauaina i le fale puipui, atoa uma ma ulumatua a manu. Ona tulai lea o Farao i le po, o ia ma ana auauna uma lava, atoa ma Aikupito uma, sa tele foi le tagiaue i Aikupito; auā sa leai lava se fale e aunoa ma le oti. Ona ia aami atu lea ia Mose ma Arona i le po, ua ia fai atu i ai, Ina tutū ia, o ese atu ia i lo‘u nuu, oulua atoa ma le fanauga a Isaraelu, o atu ia outou, ma auauna ia Ieova, faapei ona oulua fai mai na. Ia ave foi o outou lafu mamoe ma o outou lafu povi, pei ona oulua fai mai na, ma ia outou o; ia oulua faamanuia mai foi ia te au lava. Ua nanati foi Aikupito i le nuu ina ia vave ona tuuina atu i latou e o ese i le nuu; auā ua latou faapea ane, O le a uma lava i tatou i le oti.

Ona alu ane lea o le agelu a le Atua, o le na muamua atu i ‘au a Isaraelu, ua alu ane, ua mulimuli atu ia te i latou; o le ao faaniutu foi ua alu ane nai o latou luma, ua tu i o latou tua. Ua ia ui ane foi i le va o ‘au a Aikupito ma ‘au a Isaraelu, ua fai ma ao ma le pouliuli i tua, a o le malamalama i le po i luma; o le mea lea na le faalatalata ai le tasi i le tasi i lea po atoa. Ona faaloaloa lea e Mose o lona lima i luga o le sami, ona faatafeeseina lea e Ieova o le sami i le matagi tele mai sasae i lea po atoa; ua ia faia foi le sami ma eleele matutu, ua vaeluaina lava le sami. Ona ui atu lea o le fanauga a Isaraelu i totonu o le sami i le iliti tai matutu; ua fai foi le sami ma aupa ia te i latou i lo latou itu taumatau, ma lo latou itu tauagavale. Ona tuliloa mai lea o Aikupito, ua mulimuli mai ia te i latou i totonu o le sami o solofanua uma lava a Farao, ma ona kariota, ma ana ‘au e tietie i solofanua. Ona oo lea i le leoleoga o le taeao, ua silasila ifo Ieova i ‘au a Aikupito nai le afi ma le ao faaniutu, ua ia faaatuatuvaleina ‘au a Aikupito. Ua ia tuu ese foi o mea e taavalevale a‘i o latou kariota, ona toso gata ai lea; ona fai ane lea o Aikupito, Ina tatou sosola ese ia ia Isaraelu; auā o Ieova o loo tau ma Aikupito mo i latou. Ona fetalai mai lea o Ieova ia Mose, Ina faaloaloa ia lou lima i luga o le sami, e foi atu ai lona suāsami i luga o Aikupito, i luga o ona kariota, ma ana ‘au e tietie i solofanua. Ona faaloaloa lea e Mose o lona lima i luga o le sami, ona foi atu lea o le sami i le vave ao i lona tūga tuai; ua sola ese ai Aikupito i lona fetaiaiga; a ua lafoina e Ieova o Aikupito i totonu o le sami. Ua foi le suāsami, ua ufitia ai kariota, ma ‘au na tietie i solofanua, o le itu taua atoa uma a Farao, e na mulimuli atu ia te i latou i le sami; e leai se tasi na toe o i latou. A o le fanauga a Isaraelu, na latou savavali i le iliti tai matutu i totonu o le sami; ua fai foi le suāsami ma aupa ia te i latou i lo latou itu taumatau ma lo latou itu tauagavale.

Ua ia fetalai mai foi, Afai e te matuā faalogo i le leo o Ieova lou Atua, ma e fai le amio tonu i ona luma, ma e uai mai ou taliga i ana poloaiga, ma e tausi i ana sauniga uma lava, ou te le tuuina atu ia te oe se tasi o ia ma‘i na ou tuuina atu ia Aikupito; auā o a‘u o Ieova, o le na te faamaloloina oe.

Ona fetalai mai ai lea o ia, Ina faalogologo mai ia i a‘u upu, Afai e i ai se perofeta a Ieova o ia te outou, ou te faailoa a‘u e a‘u ia te ia i le faaaliga, ou te tautala atu ia te ia i le miti.

auā o na tagata uma o e na iloa lo‘u mamalu ma o‘u faailoga na ou faia i Aikupito ma le vao, ma ua tofotofo faasefulu lava ia te au, ma latou le faalogo i lo‘u leo;

Ona outou faalatalata atu lea ma tutū i lalo o le mauga, na mu foi le mauga i le afi, ua oo lava i le lagi; sa i ai foi le pouliuli, ma ao, ma le pogasi. Ona fetalai mai lea o Ieova ia te outou mai totonu o le afi, ua outou faalogologo i le siufofoga, a ua outou le iloa atu se mea e tino a‘i mai, na o le siufofoga lava. Ua na faaalia foi ia te outou lana feagaiga na ia poloai mai ai ia te outou tou te faia, o upu ia e sefulu; na ia tusi ai foi i luga o papamaa e lua.

Pe na faalogologo se nuu i le siufofoga o le Atua ua tŭlei mai i totonu o le afi, faapei ona e faalogologo i ai, a e ola mai pea? Pe na sauni ea e le Atua ona afio atu, ma ave mona le tasi nuu ai totonu o le tasi nuu, i tofotofoga, ma faailoga, ma vavega, ma le taua, ma le aao malosi, ma le aao faaloaloa, atoa ma mea matautia tele lava, faapei o mea uma na faia e Ieova lo outou Atua ia te outou i o outou luma i Aikupito?

na tuuina atu foi e Ieova o faailoga ma vavega tetele na leaga ai Aikupito, ma Farao, atoa ma lona aiga uma, i o matou luma;

E ave ese e Ieova o ma‘i uma lava ia te oe, na te le tuuina mai ia te oe se tasi ma‘i o ma‘i leaga o Aikupito na e iloa, a e tuuina atu ia te i latou uma o e ‘ino‘ino ia te oe.

o tofotofoga tetele sa vaai atu i ai ou mata, ma faailoga, ma vavega, ma le aao malosi, ma le aao faaloaloaina, na au mai ai oe e Ieova lou Atua; e faapea lava ona faia e Ieova lou Atua i nuu uma lava e te mata‘u ai.

Na ia faatigaina foi oe, ma faalaina oe, ua na fafaga ia te oe i le manai, o le mea na e le iloa, na le iloa foi e ou tamā, ina ia na faailoa atu ia te oe e le na o mea e ‘ai e ola ai tagata, a o mea uma e tŭlei mai i le fofoga o Ieova e ola ai tagata. Na le pala ou ofu na e ofu ai, o ou vae foi na le fulafula i ia tausaga e fagafulu.

Ua le toe tu mai se perofeta ia Isaraelu e pei o Mose, sa la fesagai ma Ieova; e pei o ia i faailoga uma ma vavega, sa auina atu ai o ia e Ieova e fai i le nuu o Aikupito ia Farao, ma ana auauna uma, atoa ma lona nuu uma lava, ma le aao malosi uma, atoa ma mea matuā matautia uma na faia e Mose i luma o Isaraelu uma lava.

Ona o atu lea o le nuu ai o latou fale ie ia sopoia atu Ioritana; ua ave foi e faitaulaga le atolaau o le feagaiga i luma o le nuu; ua oo atu i Ioritana o e na ave le atolaau, ma ua fufui i le auvai o vae o faitaulaga e na ave le atolaau; (auā e lofia auvai uma o Ioritana i aso uma o le seleselegāsaito;) ona tu ai lea o le vai e tafe ifo mai luga, ua tupu ae e pei se mea maupuepue, e matuā mamao lava e oo i le aai o Atama, e latalata ane i Saretana; o le vai na tafe ifo i le sami i le eleele laugatasi, o le sami Oona lea, na mate, ma ua vavaeina; ona sopoia atu ai lea o le nuu i le mea e feagai ma Ieriko. O faitaulaga o e na ave le atolaau o le feagaiga a Ieova na tutumau i latou i le iliti vai matutu i totonu o Ioritana; na ui atu ai o Isaraelu uma i le iliti vai matutu, seia uma ona sopoia atu o Ioritana e le nuu uma.

A o le aso fitu ua latou tulai ai i le malama ae o le taeao, ma latou faataamilo faapena i le aai e atu fitu; na o le aso lea ua latou faataamilo faafitu ai le aai. Ua oo i le atu fitu, ua ili pu e faitaulaga; ona fai atu ai lea o Iosua i le nuu, Ina alalaga ia, auā ua foaiina mai e Ieova le aai ia te outou. E faatoina le aai, o le aai lava, ma mea uma ua i ai mo Ieova; na o Raava le fafine talitane e ola ia; o ia, ma i latou uma o i le fale ma ia; auā sa natia e ia e na aauina na tatou aauina atu. A o outou, ia outou ma le mea ua faatoina; ne‘i faatoina outou pe a outou ave se mea ua faatoina; ona outou faia lea o le toagālauapi o Isaraelu ma mea ua faatoina; ma outou faatigaina ai. A o le ario uma, ma le auro, ma ipu ‘apa memea, ma uamea, e faasaina lava mo Ieova, e avatua i le mea e teu ai oa a Ieova. Ua ili pu e faitaulaga, ona alalaga ai lea o le nuu; ua faalogo le nuu i le leo o le pu, ona alalaga lea o le nuu i le leo tele, ona solo ai lea i lalo o le pa, ona o ae ai lea o le nuu i le aai taitasi i o latou luma, ua latou aea foi le aai.

Ona fai atu ai lea o Iosua ia Ieova i le aso na tuuina mai ai e Ieova o sa Amorī i luma o le fanauga a Isaraelu, ua faapea atu i luma o Isaraelu, Le la e, ia tumau oe i luga o Kipeona; ma oe le masina i luga o le vanu o Ailona. Ona tumau ai lea o le la, sa tu foi le masina, ina seia tauia e le nuu o e ita ia i latou. E le ua tusia ea lenei tala i le tusi a Iasera? Ua tumau le la i totonu o le lagi, ua le vave ona alu ifo, ua tumau pei o se aso atoa.

Ona o ifo lea o Samasoni, ma lona tamā, ma lona tinā i Timenata; ua oo atu i tovine o Timenata, faauta, ua tu mai ia te ia le leona taanoa o tagi mai. Ona osofia lea o ia e le Agaga o Ieova, ua na saeia le leona, e pei ona saeia se tamai ‘oti, a e leai lava se mea i lona lima; ua ia le ta‘u atu i lona tamā ma lona tinā le mea ua na faia.

Ona lolo‘u ai lea e Samasoni i pou e lua i totonu na mau ai le fale, ma lagolago ai, o le tasi i lona lima taumatau ma le tasi i lona lima taugavale. Ua fai atu Samasoni, Ia ou oti faatasi ma Filisitia. Ona punou faamalosi lea, ua paū le fale i luga o alii, ma luga o le nuu uma sa i ai; sa toatele e na fasiotia e ia i lona oti i e na fasiotia a o ola ia.

Ua fetagofi Filisitia i le atolaau a le Atua, ma avatu ai i le fale o Takono, ua tuu i tafatafa o Takono. Ua alu usu atu i le taeao tagata o Asetota, faauta ia Takono, ua paū fao i le eleele i luma o le atolaau a Ieova; ona latou fetagofi ai lea ia Takono, ma faatu ia te ia i le mea e tu ai. Ua latou ala usu atu foi i le tasi taeao, faauta foi ia Takono, ua paū fao ia i le eleele i luma o le atolaau a Ieova; ua motu ese foi le ulu o Takono ma ona tapulima e lua i le faitotoa, ua na o le ogātino o Takono ua toe ia te ia;

Sa mamafa le aao o Ieova i tagata o Asetota, ua ia faatafunaina i latou, ma fasi ia te i latou i silailalo, o Asetota ma ona itu. Ua iloa e tagata o Asetota, ua faapea ona fai, ona latou fai ane ai lea, E le tuupeaina le atolaau a le Atua o Isaraelu ia te i tatou; auā ua mamafa lona aao ia te i tatou atoa ma Takono lo tatou atua. Ona latou tūu sāvali lea, ma faapotopotoina alii uma o Filisitia ia te i latou, ua latou fai atu ai, Se a se mea e faia i le atolaau a le Atua o Isaraelu? Ona fai ane ai lea o i latou, Ina faataamilo atu ia le atolaau a le Atua o Isaraelu i Kata. Oma faataamilo atu ai lea o le atolaau a le Atua o Isaraelu. Mulimuli ane ina ua uma ona faataamilo ai, ona oo lea o le aao o Ieova i le aai; ua matua tele lava le atuatuvale, ua ia fasia tagata o le nuu, o tama iti atoa ma e matutua, ua faatigaina i latou i le silailalo. Ona latou avatu lea o le atolaau a le Atua i Ekerona; ua oo le atolaau a le Atua i Ekerona, ona uio ai lea o tagata o Ekerona, o loo faapea, Ua latou faataamilo mai le atolaau a le Atua o Isaraelu ia te i tatou e fasioti ia te i tatou atoa ma lo tatou nuu. Ona latou tūu sāvali lea, ma faapotopotoina alii uma o Filisitia, ua latou fai atu ai, Ina avatu ia le atolaau a le Atua o Isaraelu ia foi atu i lona lava nuu, ina ne‘i oti ai i matou atoa ma lo matou nuu; auā sa i ai le atuatuvale i le oti i le aai uma, sa matuā mamafa i ai le aao o le Atua. O tagata na le oti, ua taia i latou i le silailalo; ua alu ae i le lagi le uio o le nuu.

Ua ia fasia tagata o Petesemesa, auā na latou maimoa i totonu o le atolaau a Ieova; na ia fasia i lea nuu o le toafitugafulu o tagata, o tagata o limagafulu o afe. Ua faanoanoa le nuu ona ua fāsia le nuu e Ieova i le fasi tele. Ua fai ane tagata o Petesemesa, O ai se na te mafaia ona tu i luma o lenei Atua paia, o Ieova? E avae ea ia te ai le atolaau ai ia te i tatou?

Ona tali atu lea o Tavita ia Saulo, Sa leoleo lau auauna i mamoe a lona tamā; ona alu atu lea o le leona ma le urosa, ua ave le tama‘i mamoe nai le lafu; Ona ou tuliloa lea ia te ia, ma ou fasi ia te ia, ma segi mai le mea nai lona gutu; na tu mai o ia ia te au, ona ou tago ai lea i lana ‘ava, ma fasi ia te ia, ua mate ai. Na fasia e lau auauna le leona atoa ma le urosa; e faapea foi lena Filisitia lē peritomeina, e pei o so laua, ina ua ia faifai i le itu taua a le Atua soifua. Ua fai atu foi Tavita, O Ieova na ia laveai ia te au nai le lima o le leona ma le lima o le urosa, o ia lava na te laveai ia te au ai le lima o lena Filisitia. Ona fai mai lea o Saulo ia Tavita, Alu ia oe, ia ia te oe foi Ieova.

Ona tali atu lea o Tavita i le Filisitia, Ua e sau ia te au ma le pelu, ma le tao, ma le tao leoleo; a o a u, ou te alu atu ia te oe i le suafa o Ieova o ‘au, o le Atua o le itu taua a Isaraelu ua e faifai i ai. O le aso nei e tuuina mai ai oe e Ieova i lo‘u lima, ou te fasi ia te oe, ma ave ese lou ulu; ou te foai atu foi tino oti o ‘au a Filisitia i lenei aso i manu felelei ma manu feai e tataa; e iloa ai le lalolagi uma, o i ai le Atua ia Isaraelu. E iloa ai foi e lenei faapotopotoga uma, e le faaolaina tagata e Ieova i se pelu ma se tao; auā o loo ia Ieova le taua, na te tuuina mai outou i o matou lima. Ua tulai le Filisitia, ua alu ane, ma faalatalata e faafetaiai ia Tavita; ona faataalise lea o Tavita, ua momo‘e atu i le itu tauā e faafetaiai i le Filisitia. Ona tago ifo lea o Tavita i le ‘ato, ua avea ai se maa, na sasau e ia le maatā, ua lavea le Filisitia i lona muaulu, ua goto le maa i lona muaulu, ona paū faō ai lea o ia i le eleele. Ua malo Tavita i le Filisitia i le maatā ma le maa; ua na fasi le Filisitia, ua oti ai, a e leai se pelu i le lima o Tavita; ona momo‘e atu ai lea Tavita, ua tu i luga o le Filisitia, ua tago i lana pelu, ua to ae nai lona faamoega, ua na faaoti ai ia te ia, ma vavae ai lona ulu. Ua vaai Filisitia ua oti lo latou toa, ona sosola ai lea o i latou.

Ua oo i latou i le mea e sasa ai saito a Nakano, ona tago atu lea o Usa i le atoloau a le Atua, ma na taofia ai, auā ua taupaū povi. Ona tupu ai lea o le toasa o Ieova ia Usa, ona fasia lea o ia e le Atua i lea lava mea ona o lona sese, i le, ua oti ai o ia i lea mea i tafatafa o le atolaau a le Atua.

Ua fai atu Elia le Tisepi, o so le nuu e nonofo i Kiliata, ia Aapo, O loo soifua Ieova le Atua o Isaraelu, o ia ou te tu ai i ona luma, e leai se sau po o se timu i nisi tausaga se‘i iloga ou fai atu.

Ona tali mai lea o ia, O loo soifua Ieova lou Atua, e leai se potoi areto ia te au; ua na o le luutaga o falaoa i le kate, ma sina suāuu itiiti i le fagu; faauta, ua ou fai nei ni fafie se lua, ina ia ou alu, ma ou tunu ai mā maua ma si a‘u tama tane, ma te aai ai, ona ma oti lea. Ona fai atu lea o Elia ia te ia, Aua e te fefe; alu ia, ina e faia le mea na e fai mai ai; a e muamua ona e fai se potoi areto itiiti ma‘u, ma au mai ai ia te au; e mulimuli ane ona e faia lea mā oulua ma lau tama tane. Auā ua faapea ona fetalai mai o Ieova le Atua o Isaraelu, E le uma le kate falaoa, e le faaitiitia le suāuu i le fagu, seia oo i le aso e foaiina mai ai e Ieova le ua i le laueleele. Ona alu lea o ia, ua ia faia e tusa ma le upu a Elia; ua latou aai ai, o ia, ma Elia, ma lona aiga, ua tele aso. Sa le uma le falaoa i le kate, sa le faaitiitia foi le suāuu i le fagu, e tusa ma le afioga a Ieova na fai atu ai Elia.

Ua mavae ia mea, ona ma‘i ai lea o le tama tane a le fafine, o le matai o le aiga; sa tele lava lona ma‘i, ua iu ai ina le toe se mānava ia te ia. Ona fai atu lea o ia ia Elia, Le tagata o le Atua e, se a ea lau na ia te au? Ua e maliu mai ea e faamanatu mai i a‘u agasala, ma faaoo le oti i la‘u tama? Ona fai atu lea o ia ia te ia, Ina aumaia lau tama ia te au; ona au mai lea o ia ia te ia mai lona fatafata, ua ia avae ia te ia i le afeafe sa nofo ai o ia, na ia faataoto foi ia te ia i lona moega. Ona alaga lea o ia ia Ieova, ua faapea atu, Ieova e, lo‘u Atua, ua e faaoo ea le leaga i le fafine ua oti lana tane, o lē ou te aumau ai, ina ua faaoo le oti i lana tama? Ona faō faatolu lea o ia i luga o le tama, ma alaga atu ia Ieova, ua faapea atu, Ieova e, lo‘u Atua, ia e faafoisia mai le agaga o lenei tama i totonu ia te ia. Ona faafofoga mai lea o Ieova i le leo o Elia; ua toe foi mai ai le agaga o le tama i totonu ia te ia, ona ola ai lea o ia. Ona sii lea e Elia o le tama, ma ave ifo ia te ia i le fale ai le afeafe, ma tuu atu ia te ia i lona tinā; ua fai atu foi Elia ia te ia, Faauta mai, ua ola lau tama. Ona fai mai lea o le fafine ia Elia, O lenei, ua ou iloa i lenei mea o le tagata o le Atua oe; o le afioga foi a Ieova ua oo mai i lou fofoga e moni lea.

Ona faia lea e ia i ia maa o le fata faitaulaga i le suafa o Ieova; ua faia foi e ia le utu ua soo ai le fata faitaulaga; o lona tele ua tusa ma sea e lua o fua. Ona faaafu lea e ia o fafie, ma pena le povi, ma faaee ai i luga o fafie; ona fai atu lea o ia, Ina faatumu mai ia o kate e fa i le vai, ma sasaa ai i luga o le taulaga mu, ma luga o fafie. Ua ia fai atu foi, Ina foi faalua mai ia. Ona latou foi faalua mai ai lea. Ua ia fai atu foi, Ina foi faatolu mai ia. Ona latou foi faatolu mai ai lea. Ua tafe le vai ua soo ai le fata faitaulaga; ua tumu foi le utu i le vai. Ua oo i le itu la e fai ai le taulaga afiafi, ona faalatalata atu ai lea o Elia le perofeta, ua faapea atu, Ieova e, le Atua o Aperaamo, ma Isaako, ma Isaraelu, ia faailoa i lenei aso, o oe o le Atua i Isaraelu, o a‘u foi o lau auauna, ma ua ou faia o nei mea uma e tusa ma lau afioga. Ia e faafofoga mai ia te au, Ieova e, ia e faafofoga mai ia te au, ina ia iloa e le nuu nei o oe o Ieova o le Atua, ma ua e faaliliuina mai o latou loto. Ona paū ifo lea o le afi a Ieova, ma faaumatia ai le taulaga mu, ma fafie, ma maa, ma le eleele ua mitiia ai foi le vai sa i le utu. Ua iloa e le nuu uma, ona faapauufao ai lea o i latou, ua faapea, O Ieova, o le Atua ia; o Ieova o le Atua ia!

Ua tago Elia i lona ofu tele, ua taataai, ua taia a‘i le vai, ona vaeluaina ai lea i le tasi itu ma le tasi itu. Ona la savavali atu ai lea i le iliti vai matutu.

Ua savavali atu pea i laua, o tautalatala fano; faauta foi, o le nofoa afi faataavalevale ma solofanua afi, ua te‘a eseese ai i laua, ona alu ae ai lea o Elia i le asiosio i le lagi. Ua iloa foi e Elisaia, ona alaga lea o ia, Lo‘u tamā e lo‘u tamā e, le kariota o Isaraelu ma ana ‘au e tietie i solofanua. Ua na le toe iloa atu o ia; ona tago lea o ia i lona lava ofu, ua saei lua. Ua ia avae foi le ofu tele o Elia na paū ifo ia te ia, ona foi atu ai lea, ua tu i le auvai o Ioritana. Ona tago lea o ia i le ofu tele o Elia na pa‘u ifo ia te ia, ua na taia a‘i le vai, ma fai ane, O ifea ea Ieova le Atua o Elia? Ona taia foi lea e ia le vai, ona vaeluaina ai lea i le tasi itu ma le tasi itu; ona sopoia atu ai lea e Elisaia.

Ua alu ae ia nai lea mea i Peteli; o loo alu ae ia i le ala, ona o mai lea o tama iti mai le aai, ua latou tauemu ia te ia, ua fai mai ia te ia. Le ulu tula e, alu ae ia. Le ulu tula e, alu ae ia. Ona fāliu lea o ia i tua, ua vaai atu ia te i latou, ua fetuu atu foi ia te i latou i le suafa o Ieova. Ona o mai ai lea o urosa fafine e lua mai le vao, ua saei i tama e toafagafulu ma le toalua o i latou.

Ona fai atu lea o Elisaia ia te ia, Se a ea se mea ou te faia ia te oe? Ina ta‘u mai ia ia te au, pe se a se mea o ia te oe i le fale? Ona tali mai ai lea o ia, E leai se mea a lau auauna fafine o i lo‘u fale, ua na o le fagu suāuu lava. Ona fai atu ai lea o ia, Ina alu ia, ia e no ipu i tuā i tagata uma ua lata mai ia te oe, o ipu le susua, aua le itiiti. A ē ulufale ane, ia e pupuni le faitotoa i ou tua ma tua o au tama, i le e liligi atu i na ipu uma, ma tuu ese le ua tumu. Ona alu ane ai lea o ia, ua tapuni le faitotoa i ona tua ma tua o ana tama; ona la au mai ai lea o ipu ia te ia, ona liligi atu ai lea e ia. Ua tutumu ipu, ona fai atu lea o ia i lana tama, Ia toe au mai se isi ipu ia te a‘u; ona fai mai ai lea o ia ia te ia, E leai se toe ipu. Ona utu ai lea o le suāuu. Ona alu ai lea o ia, ua ta‘u atu i le tagata o le Atua. Ona fai mai ai lea o ia ia te ia, Alu ia, ina faatau atu le suāuu, i le e taui atu i le tagata ua outou aitalafu ai; a o mea ua totoe ia ola ai oe ma au tama.

Ua ulufale atu Elisaia i le fale, faauta foi, o le tama ua oti, ua faataoto i luga o lona moega. Ua ulu atu o ia, ua pupuni foi le faitotoa, ua i totonu i laua, ona tatalo atu ai lea o ia ia Ieova. Ona alu ae lea o ia, ua faō luga o le tama; ua faatatau lona gutu i lona gutu, ma ona mata i ona mata, ma ona lima i ona lima; ua taoto o ia i ona luga; ona mafanafana lea o le tino o le tama. Ona foi atu lea o ia, ua taifoifaatasi ona savali i le loto fale; ona alu ae ai lea, ua taoto o ia i ona luga; ona mafatua faafitu ai lea o le tama, ua pupula ae foi mata o le tama.

Ona latou liligi atu ai lea e aai ai tagata. O aai i latou i le mea na tunu, ona latou alalaga lea, ua faapea mai, Le tagata o le Atua e, ua i le pani le oti. Ua le mafai ona latou aai ai. A ua fai atu o ia, Ina aumaia se falaoa. Ona lafo lea e ia i le pani, ona fai atu ai lea, Liligi atu ia mā le nuu, latou te aai ai. Ua le toe i ai se mea leaga i le pani. Ua sau le tasi tagata mai Paalasalisa, ua au mai i le tagata o le Atua o le mea e ‘ai o uluai fua, o areto karite e fua lua, atoa ma fua saito mata i lana taga. Ona fai atu lea o ia, Avatu ia ma le nuu, latou te aai ai. Ona fai mai ai lea o lana auauna, Pe a ou laulauina atu ea mea nei i luma o tagata e toaselau? Ona toe fai atu lea o ia, Ina laulau atu ia mā le nuu, ina ia latou aai ai; aua o loo faapea ona fetalai mai o Ieova, Latou te aai ai, a e totoe lava. Ona laulau atu ai lea e ia i o latou luma, ua latou aai ai ma ua totoe lava, pei ona fetalai mai ai o Ieova.

Ona auina atu lea e Elisaia o le auauna ia te ia, ua faapea atu, Ina alu ia, ina taele faafitu i Ioritana, ona toe foi mai ai lea o lou tino tuai ia te oe, ona e mamā ai lea. Ona ita lava lea o Naamanu, ma alu ese, ua faapea ane, Faauta, na ou faapea, e sau lava ia i fafo, ma tu mai, ma valaau i le suafa o Ieova lona Atua, ma tālo lona lima i le mea ua i ai le ma‘i e faatea ai i le lepela. E le sili ea ona lelei o Apana ma Farapa, o vaitafe ia o Tamaseko, i vai uma o Isaraelu? Ou te le taele ai ea, ma ou mamā ai? Ona liliu ai lea o ia, ua alu ma le ita tele? A ua faalatalata ane ana auauna, ua fai ane ia te ia, ua faapea ane, Sena e, ana fai atu e le perofeta se mea tele ia te oe, e te le faia ea? A o lenei, e te le faia ea ina ua ia fai atu ia te oe, E te taele, e te mamā ai? Ona alu ifo ai lea o ia, ua fufui faafitu i Ioritana, e tusa ma le upu a le tagata o le Atua, ona foi mai ai lea o lona tino tuai pei o le tino o le tama itiiti, ua mamā foi ia.

Ua ta e le tasi le laau, ona paū ese lea o le matau i le vai; ona alaga lea o ia, ua faapea mai, Aue! Le alii e; auā o le mea nonō. Ona fai atu ai lea o le tagata o le Atua, Pe na paū ifea? Ona faasino mai ai lea e ia o le mea. Ona vavae mai ai lea e ia o se laau, ua lafo atu i ai; ona opeopea ai lea o le uamea. Ona fai atu ai lea o ia, Ina avae ia. Ona aapa atu ai lea o ia lona lima, ua tago i ai.

Ua sii mai e le tupu o Suria le taua ia Isaraelu, ua latou filifili, o ia ma ana auauna, ua faapea, O lea mea ma lea mea e fai ai le toagālauapi. Ona avatu lea o le feau a le tagata o le Atua i le tupu o Isaraelu, ua faapea atu, Ia oe, ne‘i e ui ane i lea mea, auā ua o ifo i ai Suria. Ona aauina lea nisi e le tupu o Isaraelu i le mea na fai atu ai le tagata o le Atua, ma faasino atu ia te ia; ua faaola ai o ia e ia i lea mea, e le na o le atu tasi pe atu lua. O le mea lea ua atuatuvale tele ai le loto o le tupu o Suria; ona valaau ai lea o ia i ana auauna, ua faapea atu ia te i latou, Tou te le faaali mai ea ia te au po o ai so tatou e ‘au ma le tupu o Isaraelu. Ona fai mai ai lea o le tasi ana auauna, Le alii e, le tupu, e leai lava; a o Elisaia le perofeta o i Isaraelu, o ia na te faaalia i le tupu o Isaraelu mea e te fetalaia i lou tofaga.

Ua tulai le auauna a le tagata o le Atua i le taeao lava, ua alu i fafo, faauta, o ‘au ua si‘o le aai ma a latou solofanua ma kariota. Ona fai mai ai lea o lana auauna ia te ia, Aue! Le alii e, pe faapefea se mea tatou te fai a‘i? Ona tali atu ai lea o ia, Aua e te fefe, auā e toatele ua ia te i tatou i e ua ia te i latou. Ona tatalo ai lea o Elisaia, ua faapea atu, Ieova e, ia e faapupula i ona mata ina ia na iloa. Ona faapupulaina lea e Ieova o mata o le taulealea, ona iloa ai lea e ia, faauta foi, ua tumu le mauga i solofanua ma kariota afi, ua latou vagavagai ia Elisaia. Ua o ifo ‘au ia te ia, ona tatalo atu ai lea o Elisaia ia Ieova, ua faapea atu, Ia e faatauasoina nei tagata. Ona faatauasoina lea e ia o i latou, e tusa ma le upu a Elisaia. Ona fai atu lea o Elisaia ia te i latou, E le o le ala lenei, e le o le aai foi lenei; mulimuli mai ia ia te au, ou te ta‘ita‘i ia te outou i le tagata tou te sailia na. A ua na ta‘ita‘i ia te i latou i Samaria. Ua oo atu i latou i Samaria, ona faapea atu ai lea o Elisaia, Ieova e, ia e faapupulaina mata o nei tagata ina ia latou iloa. Ona faapupulaina ai lea e Ieova o latou mata, ona latou iloa ai lea, faauta foi, ua latou i totonu o Samaria.

Sa latou tanu le tagata, faauta foi, ua latou iloa le ‘au; ona latou lafo ai lea o le tagata i le tuugamau o Elisaia; ua oo ifo le tagata, ua papai i ivi o Elisaia, ona toe ola ai lea o ia, ua tu i luga ona vae.

Ona tali mai ai lea o Isaia, O le faailoga lenei ia te oe mai ia Ieova, e te iloa ai e faia e Ieova le mea ua na fetalaia mai, pe alu i luma ea le ata o le la i vaega e sefulu, pe foi atu i vaega e sefulu? Ona fai atu ai lea o Esekia, O le mea itiiti ona alu ifo o le ata o le la i vaega e sefulu; aua ne‘i faapea, a ia foi atu i tua le ata i vaega e sefulu. Ona valaau atu ai lea o Isaia le perofeta ia Ieova, ona faafoi atu ai lea e ia o le ata i vaega e sefulu na uma ona alu ifo ai i le mea a Aasa o vaevae ai itu la.

Na ma‘i foi Asa i ona vae i le tolugafulu ma le iva o tausaga o lana nofoaiga, ua oo ina tele o lona ma‘i; a ua le saili o ia ia Ieova i lona ma‘i, a ua saili i foma‘i.

Ua malosi o ia, ona faamaualugaina lea o lona loto, e iu ai i lona malaia; auā ua ia agasala atu ia Ieova, lona Atua, ua alu atu i le malumalu o Ieova e faamu ai mea manogi i luga o le fata e faamu ai mea manogi. Ona mulimuli atu lea ia te ia o Asaraia le faitaulaga, atoa ma faitaulaga a Ieova e toavalugafulu faatasi ma ia, o tagata loto tetele; Ona latou tetee lea ia Usia le tupu, ua latou faapea atu ai, Usia e, e te le aia ona faamu o mea manogi ia Ieova, a o le au faitaulaga o le fanauga a Arona, ua faapaiaina i latou e faamu ai mea manogi; maliu ese ia oe i le malumalu; auā ua e agasala lava; e le oo ai ia te oe se mamalu mai ia Ieova le Atua. Ona ita ai lea o Usia, sa i lona lima le ipu e mu ai mea manogi; o loo ita o ia i le au faitaulaga, ona tupu loa lea o le lepela i lona muaulu i luma o le au faitaulaga i le fale o Ieova, i tafatafa o le fata e mu ai mea manogi. Ua vaavaai atu ia te ia o Asaraia le faitaulaga sili, ma le au faitaulaga uma, faauta foi, ua i ai ia te ia le lepela i lona muaulu, ona latou tuli atu ai lea ia te ia ai lea mea; o ia foi ua faataalise ona alu i fafo, auā ua taia o ia e Ieova.

na e faia foi faailoga ma vavega ia Farao, ma ana auauna uma, ma tagata uma o lona nuu; auā na e silafia ua latou faamaualuga ia te i latou. Sa faapea ona e maua le viiga e pei ona fai i le aso nei.

Ae peitai a‘u, ou te saili atu i le Atua, ou te tuuina atu la‘u mea i le Atua; o le ua faia mea tetele e le masuesueina, o vavega e le mafaitaulia.

Auā ua outou fatu fua lava tala pepelo, o fomai le aoga lava outou uma.

Ieova e lo‘u Atua, na ou alaga atu ia te oe, ona e faamaloloina ai lea o a‘u.

E lagolago ane Ieova ia te ia i le taotoga o lona ma‘i; e te liua lona moega uma lava i lona ma‘i. Na ou fai atu, Ieova e, ia e alofa mai ia te au; ia e faamalolo i lo‘u agaga; auā ua ou agasala atu ia te oe.

O oe lava le Atua o lē fai vavega; ua faailoa lou malosi i nuu.

o lē faamagaloina au amio leaga uma lava; o lē faamaloloina ou ma‘i atoa uma; o lē faaolaina mai lou ola ai le tuugamau; o lē faapaleina oe i le alofa ma le alofa mutimuti vale; o lē e mălie ai lou manao i mea lelei; o le faafouina lou taulealea faapei o le aeto.

E faamaloloina e ia e ua loto momomo; e fufusi e ia o latou manua.

O le mea lea e tuuina mai ai e le Alii lava le faailoga ia te outou; faauta, e to le taupou, ma fanau mai se tama tane; na te faaigoa foi ia te ia o Emanuelu.

A ua manua o ia ona o a tatou solitulafono, ua momomo o ia ona o a tatou amio leaga; o le aoaiga e filemu ai tatou sa i ona luga lea, o ona faalavalava foi ua malolo ai tatou.

Auā ou te faamaloloina oe, ou te fofōina ou manua, o loo fetalai mai ai Ieova; auā ua latou ta‘ua oe, O le ua tulia; O Siona lena, e leai se tasi ua saili atu i ai.

o le na faatuina foi o faailoga ma vavega i le nuu o Aikupito, ua oo i le aso nei, ma le nuu o Isaraelu, atoa ma nuu o tagata ese; ua e faia foi mo oe le suafa, e pei ona faia i le aso nei. Na e aumaia foi lou nuu o Isaraelu mai le nuu o Aikupito, ma faailoga, ma vavega, ma le aao malosi, ma le aao faaloaloa, ma mea matua matautia.

Na i luga ia te au le aao o Ieova; na ia aveina atu a‘u i le Agaga o Ieova, ma na tuuina a‘u i le fanua laugatasi, ua tumu i ivi. Ua ia ta‘ita‘iina ane ai a‘u ia faataamilomilo ai lava; faauta foi, ua matuā tele lava i le fogāeleele; faauta foi, ua matuā mamago lava. Ona fai mai lea o ia ia te au, Le atalii e o le tagata, e mafai ea ona toe ola o ia ivi? Ona ou tali atu ai lea, Le Alii e Ieova e, ua e silafia lava oe. Ona fetalai mai ai lea o ia ia te au, Ia e vavalo atu i na ivi, ma fai atu i ai, Ivi mamago e, faalogologo mai ia i le afioga a Ieova. Ua faapea ona fetalai mai o le Alii o Ieova i na ivi; Faauta, ou te faaulu ane le mānava i totonu ia te outou, ona outou ola ai lea; ou te avane foi ua ia te outou, ma ou faatupuina ae aano ia te outou, ma ufiufi ia te outou i pa‘u, ou te tuuina atu foi le mānava i totonu ia te outou, e ola foi outou; ona outou iloa ai lea o a‘u lava o Ieova. Ona ou vavalo atu ai lea e pei ona poloaiina o a‘u; ua ou vavalo atu, a e gāsēsē; faauta foi, o le gaoioi, ona fesootai lea o ivi, o le ivi i lona ivi. Ua ou vaai atu, faauta, ua tupu ae ua ma aano ia te i latou, ua ufitia foi i latou i pa‘u; a ua leai se mānava i totonu ia te i latou. Ona fetalai mai lea o ia ia te au, Vavalo atu ia i le mānava le atalii e o le tagata, ina vavalo atu ia, ma ē faapea atu i le mānava, O loo faapea ona fetalai mai o le Alii o Ieova, Mānava e, ina sau ia mai matāmatagi e fa, ma ia mānava atu i ia tagata fāsia, ia latou ola ai. Ona ou vavalo atu lea e pei ona poloaiina o a‘u, ona ulu ane lea o le mānava i totonu ia te i latou, ona latou ola ai lea, ma tutū i luga i o latou vae, o le itu taua e matuā tele lava.

Ona fai mai lea o le tupu, ua faapea mai ia Tanielu o le ua igoa ia Peletisara, Ua e mafaia ea ona faailoa mai ia te au le miti na a‘u iloa, atoa ma lona uiga? Ua tali atu Tanielu i luma o le tupu, ua faapea atu, E le mafai i e popoto, ma vaafaatau, ma taulāitu, ma e o popoto i fetu, ona faaali atu i le tupu o le mea a le tupu ua lilo na ia fetalai atu ai. A o i ai le Atua i le lagi, o le na te faaalia mea ua lilo, ma faailoa mai ia Nepukanesa le tupu o mea e oo mai i aso amuli. Sa faapea lau faalepo ma le mea na e silafia i lou tofaga. O oe, le tupu e, sa tutupu ou manatu i luga o lou tofaga i mea e oo mai i aso amuli. O le na te faaali mai mea ua lilo ua ia faailoa mai ia te oe o mea o le a oo mai. O a‘u foi, e lei faaalia mai ia te au lenei mea sa lilo ona o se poto ua ia te au e sili i tagata ola uma, na o lenei, ona ia faailoa i le tupu le uiga, ma ia e silafia manatunatu o lou finagalo.

Ona tumu ai lea o Nepukanesa i le ita tele, ua ese le tu o ona fofoga ia Sataraka, ma Mesako, ma Apeteniko; ua tautala atu ia, ua faapea atu, ia faaaasa le ogaumu, ia faafitu ona sili i le ua masani ai ona tafuina. Ona fai atu ai lea o ia i tagata e sili ona totoa i ana ‘au latou te fusifusi ia Sataraka, ma Mesako, ma Apeteniko, ia lafoina i le ogaumu e mu ai le afi. Ona fusifusia ai lea o ia tagata, atoa ma o latou ofuvae, ma o latou ofu tino, ma o latou ofu talaloa, atoa ma o latou ofu, ma ua lafoina i totonu i le ogaumu e mu ai le afi. Ua tauanau le poloaiga a le tupu, ma le ogaumu ua aasa tele lava, o le mea lea na fano ai i le mumū o le afi o ia tagata e na avae ia Sataraka, ma Mesako, ma Apeteniko. A o ia tagata e toatolu, o Sataraka, o Mesako, ma Apeteniko, ua pauu i latou o fusifusia i totonu o le ogaumu e mu ai le afi. Ona matuā ofo ai lea o Nepukanesa le tupu, ua vave ona tulai, ua fai atu, ua faapea atu i ana tulafane, Pe na tatou le lafoina ea tagata e toatolu o fusifusia i totonu o le afi? Ua tali mai i latou, ua faapea mai i le tupu, Le tupu e, sa faapea lava. Ua tali atu o ia, ua faapea atu, Faauta, ua ou iloa tagata e toafa, ua tatalaina, ua feoai i totonu o le afi, ua le afaina lava i latou; ua tino mai lona toafa ua pei o se alo o le Atua. Ona faalatalata atu lea o Nepukanesa i le gutu o le ogaumu e mu ai le afi, ua fai atu ia, ua faapea atu, Sataraka e, Mesako, ma Apeteniko, o auauna a le Atua silisili, o mai ia, ina o mai. Ona o mai ai lea o Sataraka, Mesako, ma Apeteniko mai totonu o le afi. Ona faapotopotoina ai lea o alii sili, o faipule, o e pule i nuu, atoa ma tulafale a le tupu, ua latou matamata i ia tagata ua le mafaia i le afi ona muina o latou tino, e leai foi so latou lauulu ua mu, e lei liua foi o latou ofuvae, ua le namu afi lava i latou. Ua fai atu Nepukanesa, ua faapea atu, Ia faafetaia le Atua o Sataraka, Mesako, ma Apeteniko, o le na auina mai lana agelu, ua laveaiina ai ana auauna e na faatuatua ia te ia, ua liliuina foi le upu a le tupu, ma ua latou tuuina atu o latou tino ina ne‘i latou auauna ma ifo i se tasi atua, tau lava o lo latou lava Atua. O le mea lea ou te pule ai, Ai se nuu, po o se atu nuu, po o se gagana ese, na te faia se upu vale i le Atua o Sataraka, Mesako, ma Apeteniko, e vaevaeniniiina i latou, e fai foi o latou fale ma faatăfuna; auā e leai se isi atua na te mafaia ona laveaiina faapena. Ona tomai lea o Sataraka, Mesako, ma Apeteniko i le itu malo o Papelonia, i le pule a le tupu.

O a‘u o Nepukanesa le tupu, o la‘u upu lenei i nuu uma, ma atu nuu, ma gagana eseese o e nonofo i le lalolagi uma, ia tupu tele so outou manuia. Sa a‘u manatu e tatau ona a‘u faailoa atu faailoga ma vavega na faia ia te au e le Atua silisili ese. O ona faailoga ua matuā tetele, o ona vavega ua mamana lava ia; o lona malo o le malo e faavavau lea, o lana pule e āu tupulaga lea.

O lea lava itu po na oo mai ai tamatamai lima o le tagata, ma ua tusi i le panisina o le pa puipui ua feagai ma le tuugalamepa i le maota o le tupu; ua iloa foi e le tupu o le lima ua tusi. Ona liua lea o fofoga o le tupu, ua atuatuvale o ia i lona manatunatu, ua tatalaina sootaga o lona papatua, o ona tulivae foi ua faafetoai le tasi i le tasi.

Ua fai atu le tupu, ona latou ta‘ita‘iina ane ai lea o Tanielu, ua lafo ia te ia i le lua o leona. Ua fai atu le tupu, ua faapea atu ia Tanielu, O lou Atua, o le ua e auauna i ai e le aunoa, o ia na te laveaiina oe. Ua au mai foi le maa, ua tuu ai i le gutu o le lua, ona faamaufaailogaina lea e le tupu i lana mama, atoa ma le mama a alii sa ia te ia, ina ne‘i liua le pule ia Tanielu. Ona alu atu lea o le tupu i lona maota ua le taumafa ia i lea po; e leai foi ni lauupese na avane i ona luma, ma ua te‘a ia te ia le moe. Ua tulai le tupu i le vave ao, ua faataalise atu i le lua o leona. Ua oo ia i le lua, ona alaga atu lea o ia ma le leo faamamai ia Tanielu; ua fai atu le tupu, ua faapea atu ia Tanielu, Tanielu e, le auauna a le Atua soifua, ua mafai ea e lou Atua, o le ua e auauna i ai e le aunoa, ona laveai ia te oe ai leona? Ona tali mai lea o Tanielu i le tupu, Le tupu e, ia soifua oe e faavavau, ua auina mai e lo‘u Atua o lana agelu, ua punitia ai gutu o leona, ua le afaina ai a‘u; auā ua silafia e ia ua leai sa‘u amio i ona luma; e leai foi se mea leaga ua a‘u faia i ou luma, le tupu. Ona fiafia tele lea o le tupu ona o ia, ua ia fetalai atu ia aveina ae Tanielu ai le lua; ona aveina ae ai lea o Tanielu ai le lua, ua le afaina lava o ia, auā na ia faatuatua i lona Atua. Ua fai atu le tupu, ona ta‘ita‘iina mai ai lea o ia tagata e na molia Tanielu, ma ua lafo ia te i latou, atoa ma a latou fanau, ma a latou avā i le lua o leona; ua manumalo leona ia te i latou, ua lamupala o latou ivi uma, a o lei oo ifo i latou i le taele o le lua.

Ona tusi atu lea o le tupu o Tariu i nuu uma, ma atu nuu, ma gagana eseese o e nonofo i le lalolagi uma, ua faapea atu, Ia tupu tele so outou manuia. Ou te pule ina ia gatete ma matatau i luma o le Atua o Tanielu o tagata i itu malo uma i lo‘u malo; auā o ia o le Atua e soifua, e tumau o ia e faavavau, e le faaumatia lona malo ma lana pule e oo i le gataaga. E ana e faaola ma laveai, ua faia foi e ia faailoga ma vavega i le lagi ma le lalolagi, o le na laveai ia Tanielu ai lima o leona.

Mulimuli ane, e iu ina ou liligi ifo ai lo‘u Agaga i luga i tagata uma; ona perofeta ai lea o outou atalii ma o outou afafine, e fai miti o outou toeaina, e iloa faaaliga e o outou taulelea. Ou te liligi ifo foi lo‘u Agaga i auauna ma auauna fafine, i ia ona aso. Ou te tuuina atu foi vavega i le lagi ma le lalolagi, o le toto, ma le afi, ma le asu faaniutu. E muamua ona liua le la i le pouliuli, ma le masina i le toto, i le oo ai i le aso tele ma le silisili o Ieova.

Ua faataamilo Iesu i Kalilaia uma, ua ia a‘oa‘o i o latou sunako, ua ia tala‘i atu foi le tala lelei o le malo, ma faamalolo e ia o ma‘i uma ma ma‘i tiga uma o le nuu. Ua oo atu ai lona logo i Suria uma, ona latou au mai ai lea ia te ia o e ua mamai atoa uma, o e ua i ai ma‘i eseese, ma e ua puapuagatia, ma e ua uluitinoina e temoni, ma e ua ma‘i māliu, atoa ma e ua mamai i le supa; ona faamaloloina lea o i latou e ia.

Faauta foi, ua sau le lepela, ua ifo mai ia te ia, ua faapea mai, Le Alii e, a ē finagalo i ai e te mafaia lava ona faamamā mai ia te au. Ona aapa atu lea e Iesu o lona aao, ua pa‘i atu ia te ia, ua faapea atu, Ou te loto i ai; ina mamā ia oe. Ona mamā loa lea o lona lepela.

Ua ulufale atu Iesu i le fale o Peteru, ona silafia ai lea e ia le tinā o lana avā ua taoto i le ma‘i vevela. Ua pa‘i atu o ia i le lima o le fafine, ona te‘a lava lea o le ma‘i vevela ia te ia; ona tulai lea o ia, ua auauna ia te i latou.

Ua oo i le afiafi, ona latou au mai ai lea ia te ia o tagata e toatele ua uluitinoina e temoni; ona ia tulia ai lea o agaga i le upu lava, ua faamaloloina foi e ia o i latou uma na mamai. Ona taunuu ai lea o le upu a le perofeta o Isaia, ua faapea mai, O ia lava na na aveina o tatou vaivai, ma na tauave o tatou ma‘i.

Faauta foi, ua to mai le afā tele i le vai, ona osofia mai ai lea o le vaa e peau; a ua tofa o ia. Ona o mai ai lea o ona soo, ua fafagu ia te ia, ua faapea mai, Le Alii e, ia e faaola mai ia te i matou, o le a maotu fano. Ona fetalai atu ai lea o ia ia te i latou, Se a le mea ua outou matatau ai, outou e faatuatua itiiti? Ona tulai ai lea o ia, ua vavao i le matagi ma le vai, ona tele ai lea o le malū. Ona taufaiofo ai lea o tagata, ua faapea ane, Ua silisili lava lenei Alii! auā ua usiusitai ia te ia le matagi ma le vai.

Ua oo atu ia i le tasi itu i le nuu o Kerekese, ona fetaiai ai lea ma ia o tagata e toalua ua uluitinoina e temoni, ua o mai mai tuugamau, ua matuā faavalemalosi i laua, e le mafai ai se tasi ona ui ane i lea ala. Faauta foi, ua alalaga i laua, ua faapea mai, Se a lau na ia te i matou nei, Iesu e, le Alo o le Atua? Ua e maliu mai ea iinei, e te faatiga ia te i matou a o lei oo i ona po? Ua mamao ane foi ma i latou le lafu puaa e tele o tataa. Ua aioi mai temoni ia te ia, ua faapea mai, Afai a ē tulia i matou i fafo, tuu mai ia ia te i matou e o atu i le lafu puaa. Ona fetalai atu ai lea o ia ia te i latou, Ina o ia. Ona latou o i fafo ai lea, ua o atu i le lafu puaa; faauta foi, ua feosofi ifo le lafu puaa uma i le tofē i le vai, ua mamate ai i le vai. Ona sosola ai lea o e sa fagaina, ua oo i le aai, ma tala atu ai mea uma, atoa ma mea ua oo i e sa i ai temoni. Faauta foi, ua o uma mai le aai e faafetaiai ia Iesu; ua latou iloa o ia, ona latou aioi mai ai lea ia alu ese o ia i lo latou nuu.

Faauta foi, ua latou au mai ia te ia le tagata supa, ua taoto i le moega; ua silafia foi e Iesu lo latou faatuatua, ona fetalai atu ai lea o ia i le supa, Lo‘u atalii e, ina faalototele ia oe, ua faamagaloina au agasala. Faauta foi, ua faapea ifo nisi o le au tusiupu i o latou loto, Ua upu leaga lenei tagata i le Atua. Ua silafia e Iesu o latou manatunatu, ona faapea atu lea o ia, Se a le mea ua manatunatu leaga ai o outou loto? auā po o le fea le faigofie? po o le fai atu, Ua faamagaloina au agasala; po o le faiatu, Tulai ia, ina savali? A e peitai ina ia iloa e outou o i ai i le Atalii o le tagata i le lalolagi le pule e faamagalo ai agasala, (ona fetalai atu ai lea o ia i le supa,) Ina tulai ia, ina ave lou moega, ma alu i lou fale. Ona tulai ai lea o ia, ua alu i lona fale. Ua iloa e le motu o tagata, ona taufaiofo ai lea; ua latou vivii atu i le Atua le ua foaiina mai le pule faapena i tagata.

Faauta foi, o le fafine na i ai le puna toto i tausaga e sefulu ma le lua, ua alu ane ia i ona tua, ua ia pa‘i ane i le tuupao o lona ofu; auā ua fai ifo ia i lona loto, Afai ou te pa‘i atu tau o lona ofu, ou te ola ai. A ua fāliu Iesu, ua silafia o ia, ona faapea atu ai lea o ia, Lo‘u afafine e, ina faalototele ia oe, ua e ola i lou faatuatua. Ona ola ai lea o le fafine talu lea lava itu aso.

Ua ulufale atu Iesu i le fale o le alii, ona silafia ai lea e ia o e ili fagufagu ma le motu o tagata ua pa le lauaitu, ua faapea atu o ia ia te i latou, Ina o ese ia; auā e lei oti le teine, ua na ona moe. Ona latou tapisa mai ai lea ia te ia. Ua tulia le motu o tagata, ona ulu atu ai lea o ia, ua tago i lona lima, ona tulai ae lea o le teine. Ona logo atu lea o lenei mea i lea nuu uma.

Ua maliu ese Iesu i lea mea, ona mulimuli mai ai lea ia te ia o tauaso e toalua, ua alalaga, ua faapea mai, Le alo e o Tavita, ia e alofa mai ia te i maua. Ua ulufale ia i le fale, ua o mai ai ia te ia o ia tauaso; ona fetalai atu ai lea o Iesu ia te i laua, Ua oulua faatuatua mai ea ia te au ou te mafaia lenei mea? Ona la fai mai ai lea ia te ia, Ioe, le Alii e. Ona pa‘i atu ai lea o ia i o la mata, ua faapea atu, E pei ona oulua faatuatua, ia faapea lava ona faia ia te oulua. Ona pupula ai lea o laua mata. Ona matuā fetalai atu lea o Iesu ia te i laua, ua faapea atu, Ia oulua, ne‘i faailoa atu i se tasi. A ua la o ma faalauaitele le tala ia te ia i lea nuu uma.

Ua la o, faauta, ua latou au mai ia te ia le tagata gūgū, ua uluitinoina e le temoni. Ua tulia le temoni, ona tautala mai ai lea o le gūgū. Ona taufaiofo ai lea o le motu o tagata, ua faapea ane, E lei iloa mai anamua se mea faapena i Isaraelu.

Ua faataamilo Iesu i aai uma ma faoa aai, ua a‘oa‘o i o latou sunako, ma tala‘i i le tala lelei o le malo, ua ia faamalolo foi i ma‘i uma, ma ma‘i tiga uma o le nuu.

Ua valaau atu e ia ona soo e toasefulu ma le toalua, ona tuu atu lea e ia ia te i latou le pule i agaga leaga, ina ia tutuli ia te i latou, ma faamalolo i ma‘i uma ma ma‘i tiga uma.

Ia outou faamalolo i e mamai, faamamā lepela, faatutū i e ua oti, tutuli i temoni. Ua maua fua e outou, ia outou foaifuaina atu.

ua pupula tauaso ma ua savavali pipili, ua faamamāina lepela ma ua logo tutuli, ua faatutūina o e na oti ma ua folafolaina foi le tala lelei i e matitiva.

Faauta foi, sa i ai le tagata ua gase lona lima; ona latou fesili mai ai lea ia te ia, ua faapea mai. E tatau ea ona faamalolo i le sapati? ina ia latou momoli ia te ia. Ona fetalai atu ai lea o ia ia te i latou, O ai ea so outou e ana le mamoe e tasi, afai foi e paū o ia i le lua i le sapati, e le tago ea i ai, ma avae i luga? e le sili lava ea le tagata i le mamoe? o lea e tatau ai ona agalelei i le sapati. Ona fetalai atu ai lea o ia i le tagata, Ina faaloaloa ia o lou lima. Ona faaloaloa ai lea e ia, ona toe lelei ai lea, ua pei o le tasi.

A ua silafia e Iesu, ona maliu ese ai lea o ia i lea mea; ua mulimuli mai foi ia te ia le motu o tagata e toatele; ona faamaloloina ai lea e ia o i latou uma;

Ona aumaia lea ia te ia o le tagata ua uluitinoina e le temoni, o le tauaso foi o ia ma gūgū; ona faamaloloina ai lea e ia o ia, ona tautala ai lea ma vaai lē sa tauaso ma gūgū. Ona taufaiofo ai lea o le motu o tagata uma, ua faapea ane, E le o le atalii ea lenei o Tavita?

A e afai o le Agaga o le Atua ou te tulia ai e a‘u o temoni, ua oo mai lava ia te outou le malo o le Atua.

Ua le tele foi ni vavega na na faia i lea mea, ona o lo latou le faatuatua.

Ua maliu atu Iesu, ua na silafia le motu o tagata e toatele, ona mutimuti vale ai lea o lona alofa ia te i latou, ua faamalolo foi e ia o latou ma‘i.

Ua oo i le afiafi, ona o mai ai lea o ona soo ia te ia, ua faapea mai, O le mea tuufua lenei, ua leva foi le aso; ia e tuuina atu le motu o tagata, ina ia latou o i aai e faatau ni mea e ‘ai mā latou. A ua fetalai atu Iesu ia te i latou, E le aoga ona latou o; ia outou avane ni mea latou te aai ai. Ona latou fai mai lea ia te ia, E leai ni a tatou mea iinei, ua na o areto e limagafua ma i‘a e lua lau. Ua fetalai atu o ia, Aumaia iinei ia te au. Ona fetalai atu ai lea o ia i le motu o tagata ia latou taooto i le mutia. Ona tago lea o ia i areto e limagafua ma i‘a e lua lau, ua tepa ae i le lagi, ua faafetai; ua ia tofitofi foi i areto, ma avatu i le au soo, ona avatu ai lea e le au soo i le motu o tagata. Ona aai ai lea o i latou uma lava, ua maoona; ua latou fu‘e foi toe ‘aiga, ua tutumu ai ato e sefulu ma le lua. O i latou foi na aai pe limagaafe o tane, a e lei faitaulia fafine ma tama iti.

Ua maliu atu Iesu ia te i latou i le leoleoga e fa o le po, ua savali i luga o le vai. Ua iloa mai e le au soo o ia ua savali i luga o le vai, ona latou atuatuvale ai lea, ua faapea ane, O le aitu; ona latou uio ai lea i le matatau. Ona fetalai atu loa lea o Iesu ia te i latou, ua faapea atu, Ia outou loto tetele; o a‘u lava, aua tou te matatau.

Ua tali mai Peteru ia te ia, ua faapea mai, Le Alii e, afai o oe, ia e fetalai mai ia te au, ou te alu atu ia te oe i luga o le vai. Ona fetalai atu ai lea o ia, Ina sau ia. Ona alu ifo ai lea o Peteru nai le vaa, ua savali i luga o le vai e alu ia Iesu. Ua vaai ia i le matagi ua tetele, ona fefe ai lea; ona afua ai lea ona goto, ua alaga, ua faapea mai, Le Alii e, ia e faaola mai ia te au. Ona aapa atu loa lea e Iesu o lona aao, ua tago ia te ia, ua faapea atu ia te ia, O oe na lē faatuatua itiiti, se a le mea ua e masalosalo vale ai? Ona la o ae lea i le vaa, ona malū ai lea o le matagi. Ona o mai ai lea o e na i le vaa, ua ifo mai ia te ia, ua faapea mai, E moni, o oe lava o le Alo o le Atua.

Ua iloa mai o ia e tagata o lea nuu, ona latou feau atu ai lea i lea itu uma lava, ua latou au mai ai ia te ia o e mamai uma lava; ma ua latou aioi mai ia te ia, tau lava ina latou papai i le tuupao o lona ofu; ua faamaloloina foi o i latou uma e na papai mai i ai.

Faauta foi, o le fafine o Kanana ua sau mai lea lava itu, ua alaga mai ia te ia, ua faapea mai, Le Alii e, le alo o Tavita, ia e alofa mai ia te au; ua leaga lava la‘u tama teine i le temoni ua i ai. A ua leai se upu na ia tali atu ai ia te ia. Ona o mai ai lea o ona soo, ua aioi mai ia te ia, ua faapea mai, Ia e tuuina atu ia te ia e alu, auā ua mulimuli mai o ia, ma alaga mai ia te i tatou. A ua tali atu ia, ua faapea atu, E lei auina mai a‘u i nisi, a e tau lava o mamoe o le aiga o Isaraelu ua le iloa. Ona sau ai lea o ia, ua ifo ia te ia, ua faapea mai, Le Alii e, ia e fesoasoani mai ia te au. Ona tali atu ai lea o ia, ua faapea atu, E le tatau ona ave le mea e ‘ai a le fanau, ma lafo i ulī. Ona fai mai ai lea o ia, Le Alii e, e moni a oe; auā foi ua aai e ulī o momoi mea ua pauu i laulau a o latou tāula. Ona tali atu ai lea o Iesu, ua faapea atu ia te ia, Funa e, ua tele lou faatuatua; e pei o lou manao, ia faapea lava ona faia ia te oe. Ona malolo ai lea o lana tama teine i lea lava itu aso.

Ona o mai ai lea ia te ia o le motu o tagata e toatele, ua ia te i latou o e pipili, o e tauaso, o e gūgū, o e mumutu, atoa ma nisi e toatele, ua latou tuu atu ia i latou i vae o Iesu; ona faamalolo ai lea e ia o i latou. Ona taufaiofo ai lea o le motu o tagata ina ua latou iloa atu o e sa gūgū ua tautala, o e sa mumutu ua atoatoa, o e sa pipili ua savavali, o e sa tauaso foi ua vaai; ona latou vivii atu ai lea i le Atua o Isaraelu.

Ona valaau atu ai lea o Iesu i ona soo, ua faapea atu, Ou te alofa atu i le motu o tagata, auā o le aso tolu lenei o tatou nonofo ma i latou, e leai foi ni a latou mea e ‘ai. Ou te le mafai ona tuuina atu ia te i latou e ō mātelaina, ne‘i latou lailoa i le ala. Ona fai mai ai lea o ona soo ia te ia, Tatou te maua ifea ea i le vao ni areto e tele, ina ia maoona ai le motu o tagata ua toatele naua? Ona fetalai atu ai lea o Iesu ia te i latou, E fia ea ni a outou areto? Ona latou fai mai ai lea, E fitu, ma nai i‘a lāuiti. Ona fetalai atu ai lea o ia i le motu o tagata ia latou taooto i lalo; ona tago ai lea o ia i areto e fitu ma i‘a, ua faafetai, ma tofitofi, ona avatu ai lea e ia i ona soo, ona avatu ai lea e le au soo i le motu o tagata. Ona aai ai lea o i latou uma lava, ua maoona; ua latou fu‘e foi i toe ‘aiga, ua tutumu ai ete e fitu. O i latou foi na aai e toafagaafe o tane, a e lei faitaulia fafine ma tama iti.

Ona liua ai lea o ia i o latou luma, ua pupula mai ona fofoga e pei o le la, ua sisina mai foi ona ofu e pei o le malamalama.

Ua latou oo atu i le motu o tagata, ona sau ai lea ia te ia o le tasi tagata, ua tootuli ia te ia, ua faapea mai, Le Alii e, ia e alofa mai i lo‘u atalii, ua ma‘i māliu, ua tiga lava; auā ua paū soo ia i le afi, ua faapea soo foi i le vai. Na ou au mai ia te ia i ou soo, a ua latou le mafaia ona faamalolo ia te ia. Ona tali atu ai lea o Iesu, ua faapea atu, Le tupulaga le faatuatua ma le faapiopio, ou te i ai ia te outou seia afea? ou te faapalepale ia te outou seia afea? au mai ia o ia iinei ia te au. Ua vavao atu Iesu ia te ia, ona alu ai lea i fafo o le temoni sa ia te ia; ona malolo ai lea o le tama talu i lea lava itu aso.

Ona o ane ai lea o le au soo ia Iesu ua na o i latou, ua faapea ane, Se a le mea na matou le mafai ai ona tulia o ia? Ona fetalai atu ai lea o Iesu ia te i latou, Ona o lo outou le faatuatua; auā e moni, ou te fai atu ia te outou, afai e tusa lo outou faatuatua ma le fua o le sinapi, e fai atu outou i lenei mauga, Alu atu ia oe i lela mea; ona alu atu ai lea; e leai foi se mea tou te le mafaia.

A o lenei, ne‘i latou tausuai ia i tatou, ina alu ia oe i le vai, ma lafo ai se mātau, o le uluai i‘a e te maua, ia e tago i ai, ma fafasi lona gutu, ona e maua ai lea o le setatara; ia e ave lea, ma avatu ia te i latou mā oe ma a‘u.

E moni, ou te fai atu ia te outou, O mea uma tou te fusifusia i le lalolagi, e fusifusia ia i le lagi; o mea uma foi tou te tālā i le lalolagi, e tatalaina ia i le lagi. Ou te fai atu foi ia te outou, Afai e loto gatasi se toalua o outou o i le lalolagi i se mea la te ole atu ai, e faia lea mo i laua e lo‘u Tamā o i le lagi. Auā o le mea ua faapotopoto ai se toalua, po o se toatolu i lo‘u igoa, ou te i ai faatasi ma i latou.

Ona silasila atu ai lea o Iesu, ua faapea atu ia te i latou, E le mafaia e tagata lenei mea, a e mafaia mea uma e le Atua.

Faauta foi, ua nonofo i le au ala tagata tauaso e toalua, ua la faalogo ua maliu ane Iesu, ona la alalaga mai ai lea, ua faapea mai, Le Alii e, le alo o Tavita, ia e alofa mai ia te i maua. Ona vavao ai lea e le motu o tagata ia te i laua, ia la faalologo; a ua atili ai ona alalaga o i laua, ua faapea mai, Le Alii e, le alo o Tavita, ia e alofa mai ia te i maua. Ona tu ai lea o Iesu, ua valaau atu ia te i laua, ona faapea atu lea o ia, Se a se mea lua te mananao i ai ou te faia mo oulua? Ona la fai mai ai lea ia te ia, Le Alii e, ia pupula o maua mata. Ona mutimuti vale ai lea o le alofa o Iesu, ua pa‘i atu i o la mata; ona vaai loa ai lea o la mata, ona la mulimuli mai ai lea ia te ia.

Ona o mai ai lea ia te ia i le malumalu o e tauaso ma e pipili, ua na faamalolo ia te i latou.

Ua silafia e ia le mati e tasi i le auala, ua oo atu i ai, a e leai se mea na maua ai, ua na o lau; ona faapea atu ai lea o ia i ai, Aua ne‘i toe tutupu ni ou fua e oo i le faavavau. Ona mago loa lea o le mati. Ua iloa atu e le au soo, ona latou taufaiofo ai lea, ua faapea ane, Ua faapea ona vave mago o le mati nei! A ua tali atu Iesu, ua faapea atu ia te i latou, E moni, ou te fai atu ia te outou, Afai ua ia te outou le faatuatua, ma outou le masalosalo, ona faia lea e outou e le na o le mea ua faia i le mati, a e afai tou te fai atu i lenei mauga, Ia siitia oe, ma lafoina i le sami, ona faia lava lea. O mea uma foi tou te ole mai ai i le tatalo ua i ai le faatuatua, e maua lava e outou.

Faauta foi, ua to le mafuie tele; auā na alu ifo le agelu a le Alii mai le lagi, ua alu atu, ma fuli ese le maa i le gutu o le tuugamau, ma tietie i ona luga.

E le o iinei o ia; auā ua toe tu mai o ia, pei ona fetalai atu ai o ia. O mai, ina matamata i le mea na tuu ai le Alii. Ina o atu ia ia vave, lua te ta‘u atu i ona soo, ua toe tu mai o ia nai e ua oti; faauta foi, e muamua atu ia ia te outou i Kalilaia; tou te iloa ai o ia i lea mea; faauta, ua ou fai atu ia te oulua.

Ona maliu ane ai lea o Iesu, ua fetalai atu ia te i latou, ua faapea atu, Ua tuuina mai ia te au le pule uma lava i le lagi ma le lalolagi.

Sa i ai foi i lo latou sunako le tagata ua i ai le agaga leaga; ua alaga foi o ia, ua faapea mai, Aue, Iesu e le Nasareta! se a lau na ia i te i matou? ua e maliu mai ea ia fanoia i matou? ua ou iloa oe, o le Paia oe o le Atua. Ona vavao atu lea o Iesu ia te ia, ua faapea atu, Ina faalologo ia, ma e alu i fafo nai ia te ia. Ona faataafiti lea o le agaga leaga ia te ia, ua alaga foi ma le leo tele, ona alu lea o ia i fafo nai ia te ia. Ona taufaiofo ai lea o i latou uma, ua latou fesili ai le tasi i le tasi, ua faapea, Pe se a lenei? se a foi lenei mataupu fou? auā ua pule ia i agaga leaga, ma fetalai atu i ai, ona latou faalogo lava lea ia te ia. Ona logo atu loa lea o le tala ia te ia i le nuu uma o Kalilaia.

Ua latou ulufafo i le sunako, ona o atu loa lea i le fale o Simona ma Aneterea, ua o faatasi ma Iakopo ma Ioane. Sa taoto ai foi le tinā o le avā a Simona i le ma‘i vevela; ona latou ta‘uina atu loa lea o ia ia te ia. Ona sōsō atu lea o ia ia te ia, ua tago ifo i lona lima, ua faatu ia te ia i luga; ona mavae loa lea o lona ma‘i vevela, ona auauna lea o ia ia te i latou.

Ua oo i le afiafi i le goto o le la, ona latou au mai lea ia te ia o e mamai uma, atoa ma e ua uluitinoina e temoni. Ua potopoto uma ane foi le aai i le faitotoa. Ona ia faamaloloina lea o tagata e toatele na mamai i ma‘i eseese, ua ia tulia foi temoni e toatele, ua ia le tuu atu foi i temoni e tautala, auā ua latou iloa o ia.

Ua ia tala‘i foi i o latou sunako i Kalilaia uma, ma tutuli temoni.

Ua sau le lepela ia te ia, ua aioi ia te ia, ma tootuli ia te ia, ma ua faapea mai, Afai ua e finagalo i ai, e te mafaia ona faamamā ia te au. Ona mutimuti vale lea o le alofa o Iesu ia te ia, ua aapa atu lona aao, ua pa‘i atu ia te ia, ma fetalai atu ia te ia, Ou te loto i ai, ina mamā ia oe. Ua fetalai atu o ia, ona te‘a loa lea o le ma‘i lepela ia te ia, ona mamā ai lea o ia. Ona matuā vavao atu lea o ia ia te ia, ma tuuina atu loa ia te ia e alu. Ua faapea atu foi ia te ia, Ia oe, ne‘i e ta‘u atu sina tala i se tasi; a ia e alu, ina faaali oe i le ositaulaga; ma avane o mea na poloai ai Mose mo lou faamamāina, e fai ma faailoga ia te i latou. A ua alu atu ia, ona matuā tala‘i atu lea ma faasalalau le tala, o lea e lei toe mafai ai o ia ona maliu faaali i le aai; a ua nofonofo i mea tuufua, ua latou o ane foi ia te ia mai itu uma.

A ua o mai nisi ia te ia, ua au mai le tagata supa, o loo fataina mai e le toafā. Ua le mafai foi i latou ona faalatalata atu ia te ia, auā le motu o tagata, ona latou tatala lea o le ufi o le fale sa i ai o ia, ua faasosofa i ai, ona latou tuutuu ifo ai lea o le moega o taoto ai le supa. Ua silafia e Iesu lo latou faatuatua, ona fetalai atu lea o ia i le supa, Lo‘u atalii e, ua faamagaloina au agasala. Sa nonofo mai ai nisi o le au tusiupu, sa manatunatu ifo i o latou loto, Se a le mea ua upu leaga ai faapea lenei tagata i le Atua? E mafaia ea ia te ai ona faamagaloina o agasala, ua na o le toatasi o le Atua lea? Ua silafia loa e Iesu i lona finagalo ua faapea ona latou manatunatu i o latou loto, ona fetalai atu ai lea o ia ia te i latou, Se a le mea ua outou manatunatu ai ia mea i o outou loto? Po o le fea e faigofie? po o le fai atu i le supa, Ua faamagaloina au agasala; po o le fai atu, Ina tulai ia, ma ave lou moega, ma savali? A e peitai ina ia outou iloa o i ai i le Atalii o le tagata i le lalolagi le pule e faamagalo ai agasala, (ua fetalai ane ia i le supa,) Ou te fai atu ia te oe, Ina tulai ia, ina ave lou moega, ma alu atu i lou fale. Ona tulai loa lea o ia, ua ave foi lona moega, ma savali ane i luma o i latou uma. Ona ofo tele ai lea o i latou uma, ma vivii atu i le Atua, ua faapea, Ua tatou le iloa mai anamua se mea faapena.

Ua toe ulu atu ia i le sunako, sa i ai foi le tagata ua gase lona lima. Ona latou lamalama lea ia te ia, pe na te faamaloloina o ia i le sapati, ina ia latou molia o ia. Ua fetalai atu ia i le tagata ua gase lona lima, Ina tulai mai ia i totonu. Ona fetalai atu lea o ia ia te i latou, Pe sa ea le agalelei i le sapati, po o le agaleaga; o le faaola, po o le fasioti? A ua latou faalologo. Ua ia silasila solo ia te i latou ma le toasa, ina ua tiga o lona finagalo, auā o latou loto ua maaa, ona fetalai atu lea o ia i le tagata, Ina faaloaloa ia lou lima. Ona faaloaloa ai lea e ia, ona toe lelei ai lea o lona lima, ua pei o le tasi.

Auā e toatele na ia faamaloloina, o lea ua fetaomi mai ai ia te ia e na maua e ma‘i tiga, ina ia latou papai mai ia te ia. O agaga leaga foi, ua latou iloa mai o ia, ona faapauu lea o latou i ona luma, ma latou alalaga, ua faapea mai, O oe lava o le Alo o le Atua. A ua matuā vavao atu o ia ia te i latou, aua ne‘i latou faaalia o ia.

Ona tofia lea e ia le toatinoagafulu ma le toalua, ina ia latou faatasi ma ia, ia na aauina atu foi i latou e tala‘i i le tala lelei; ina ia tuuina atu foi le pule ia te i latou, latou te faamalolo ai ma‘i, ma tutuli ai temoni.

Ona to mai lea o le afā, o le matagi tele lava; ona fati mai ai lea o peau i totonu o le vaa, ua tumu ai. A o ia sa i le taumuli, ua tofa i le aluga; ona latou fafagu lea ia te ia, ma fai mai ia te ia, Le a‘oa‘o e, e te le manatu mai ea ia te i matou a fano? Ona tulai lea o ia, ma na vavao atu i le matagi, ua fetalai atu foi i le vai, Faalologo ia, ina malū ia. Ona mate lea o le matagi, i le ua matuā malū. Ona fetalai atu lea o ia ia te i latou, Se a le mea tou te fefefe ai faapea? se a le mea tou te le faatuatua mai ai? Ona matuā matatau lava lea o i latou, ma fetautalatalai i latou, Po o ai lava lenei, ina ua faalogo lava le matagi ma le vai ia te ia?

Ua maliu atu ia nai le vaa, ona fetaiai loa lea ma ia o le tagata mai tuugamau, ua ia te ia le agaga leaga, sa mau o ia i tuugamau; e le mafai foi se tasi ona noanoatia o ia i maea uamea lava. Auā ua atu lasi ona noanoatia o ia i mea e faamau a‘i vae, atoa ma maeā uamea; a ua motumotusia e ia o maea uamea, ua tu‘ipalaina foi mea e faamaū a‘i vae; e leai foi se na ia mafaia ona faalata ia te ia. Sa i ai pea lava o ia i tuugamau ma mauga i le po ma le ao; sa alaga, ma selei o ia ia te ia i maa. Ua iloa mamao mai e ia o Iesu, ona momo‘e mai lea, ma ifo ia te ia, ua alaga mai foi o ia ma le leo tele, ua faapea mai, Se a lau na ia te au nei, Iesu e, le Alo o le Atua silisili ese? ou te fai atu ia te oe ia e tauto mai i le suafa o le Atua, e te le faatiga mai ia te au. Auā ua fetalai atu o ia ia te ia, Alu ia i fafo i le tagata, o oe na le agaga leaga. Ua fesili atu foi o ia ia te ia, Po o ai lou igoa? Ona tali mai lea o ia, ua faapea mai, O Lekeono lo‘u igoa; auā e totele i matou. Ua matuā aioi mai foi o ia ia te ia ina ia na le aueseina i latou i lea nuu. Sa i ai foi le lafu puaa e tele, ua tataa e lata ane i mauga. Ua aioi mai foi temoni uma ia te ia, ua faapea mai, Ia e aauina i matou i puaa, matou te uluitino ai. Ona tuu atu loa lea e Iesu ia te i latou. Ua o i fafo agaga leaga, ona latou uluitino lea i puaa; ona feosofi ifo ai lea o le lafu i le tofē i le vai, pe atoa le lua o afe i latou; ona malelemo ai lea i le vai. Ona sosola lea o e sa fagaina puaa, ma tala atu ai i le aai ma ona faoa aai; ona latou o mai lea e matamata i le mea ua faia. Ua latou o mai foi ia Iesu, ma ua iloa o ia sa uluitinoina e temoni, sa i ai le lekeono, ua nofo i lalo o ia, ua ofu foi, ma ua atamai; ona latou matatau ai lea. O e na iloa, ua latou faamatala atu ia te i latou i le uiga o le mea na faia i le na uluitinoina, atoa ma puaa. Ona latou aioi atu lea ia te ia ina ia maliu ese atu ia i lo latou nuu.

O le tasi fafine, ua ia te ia le puna toto i tausaga e sefulu ma le lua, e tele foi mea na ia tiga ai i fomai e toatele, ua uma atu ai foi ana oloa, a e lei aoga lava ia te ia, a e peitai ua atili ai lona ma‘i, ua faalogo o ia ia Iesu, ona alu ane lea i ona tua, i totonu lava o le motu o tagata, ua pa‘i ane i lona ofu; auā ua faapea o ia, Afai ou te pa‘i atu tau lava o ona ofu, ona ou malolo ai lea. Ona utu loa lea o lona puna toto; ona iloa lea e ia lona tino ua faamaloloina i lona ma‘i tiga. Ua silafia loa e Iesu i lona lava finagalo, ua alu atu le mana nai ia te ia, ona fāliu lea o ia i le motu o tagata, ua faapea atu, Po o ai ea na pa‘i mai i o‘u ofu? Ona fai mai lea o ona soo ia te ia, Ua e silafia le motu o tagata, o loo fetaomi mai i latou ia te oe, a e te fetalai mai ea, Po o ai na pa‘i mai ia te au? Ua silasila solo foi o ia ina ia silafia le na faia lea mea. A o le fafine, ua mata‘u ma gatete, ua na iloa le mea ua faia ia te ia, ua sau ma faapaū o ia i ona luma, ma ta‘utino atu le tonu ia te ia. A ua fetalai atu ia ia te ia, Lo‘u afafine e, ua e ola i lou faatuatua; ina alu ia oe ma le manuia, ma ia e malolo i lou ma‘i tiga.

Ua o mai nisi mai le fale o le ua pule i le sunako, a o fetalai mai o ia, ua faapea mai i latou, Ua oti lou afafine; se a le mea e te faalavelave ai pea i le a‘oa‘o? A o Iesu ua faafofoga i le tala ua ta‘uina mai ai, ona fetalai atu loa lea o ia i le ua pule i le sunako, Aua e te mata‘u; tau lava ina e faatuatua. Ua le mafai o ia ona ia mulimuli atu se tasi ia te ia na o Peteru, ma Iakopo, ma Ioane le uso o Iakopo. Ua oo i le fale o lē pule i le sunako, ona silafia lea e ia o le lauaitu, ma e o taufaitagi, ma e o taufaiaue tele. Ua ulufale atu ia, ona faapea atu lea ia te i latou, Se a le mea ua outou pisaō ai, ma outou fetagisi ai? e le oti le teine, ua na ona moe. Ona latou tapisa ai lea ia te ia. A ua ia tulia i latou uma i fafo, ona ave lea e ia le tamā o le teine, atoa ma lona tinā, ma e na o mai ma ia ua ulu atu foi i le mea ua taoto ai le teine. Ona tago ifo lea o ia i le lima o le teine, ma fetalai atu ia te ia, Talita kumi; (o lona faamatalaga lenei, Funa e, ou te fai atu ia te oe, ia e tulai). Ona tulai loa lea o le teine ua savali, auā ua sefulu ma le lua ona tausaga; ona segia lea o latou mauli.

Ua oo i le sapati, ona a‘oa‘o atu lea e ia i le sunako, e toatele o e na faalogo ai, ua ofo i latou, ua faapea atu, Maifea na maua ai e lenei tagata ia mea? se a foi lenei poto ua tuuina atu ia te ia, ina ua faia e ona lima vavega e faapena ona tele?

Ona le mafaia lea e ia ona fai o se vavega i lea mea, na o nai tagata mamai e toaitiiti ua ia faaee ai ona lima, ma faamaloloina.

Ua valaau atu ia i le toatinoagafulu ma le toalua, ona aau atu lea ia te i latou e taitoalua, ua ia tuu atu foi ia te i latou le pule i agaga leaga;

E toatele foi temoni ua latou tulia, e toatele foi o e na mamai ua latou faauuina i le suāuu, ma faamaloloina.

Ua levaleva le aso, ona o mai ai lea o ona soo ia te ia, ua faapea mai, O le mea tuufua lenei, ua levaleva foi le aso; ina e tuuina atu i latou ina ia latou o atu i faoa aai ma aai ua latalata mai, ma faatau ai ni a latou mea e ‘ai; auā ua leai sa latou mea e aai ai. A ua tali atu ia ia te i latou, ua faapea atu, Ina avatu ia e outou ni mea e ‘ai mā latou. Ona latou fai mai lea ia te ia, A matou o ea e faatau ni mea e ‘ai e tusa ma tenari e lua selau, ma avatua ai ia te i latou e aai ai? Ona fetalai atu ai lea o ia ia te i latou, Pe fia a outou areto? ina o ia se‘i iloilo. Ua latou iloa, ona fai mai ai lea, E lima, ma i‘a e lua lau. Ona fetalai atu lea o ia ia te i latou, ia latou fai atu i tagata uma, ia taooto i latou i vasega i le mutia. Ona taooto ai lea o i latou i vasega, e taitoaselau, ma taitoalimagafulu. Ua tago o ia i areto e lima ma i‘a e lua lau, ona tepa ae lea i le lagi, ua faafetai; ona tofitofi lea i areto, ma avatu i ona soo, latou te laulau atu ai ia te i latou; ma i‘a foi e lua lau ua na tufatufa atu ai ia te i latou uma. Ona aai uma lea o i latou, ua maoona. Ua latou fu‘e foi i ato e sefulu ma le lua, ua tutumu i toe mea, atoa ma fāsi i‘a. O i latou na aai i areto, pe limagaafe o tane.

Ua silafia e ia i latou ua tigaina i taualo, auā ua agi mai i luma le matagi; ona maliu atu lea o ia ia te i latou i le leoleoga e fa o le po, ua savali i luga o le vai, o le a maliu loa. A o i latou ua iloa o ia ua savali i luga o le vai, fa i latou se aitu; ona latou uio ai lea. Auā ua iloa o ia e i latou uma, ua atuatuvale ai; ona fetalai atu loa lea o ia ia te i latou, ua faapea atu ia te i latou, Ia outou loto tetele; o a‘u lenei, aua tou te matatau. Ona maliu ae lea o ia i luga o le vaa ia te i latou, ona malū ai lea o le matagi; ona matuā segia ai lea o latou mauli, ua latou ofo ai.

Ua latou o atu nai le vaa, ona latou iloa loa lea o ia; ona taufetuli mai ai lea o i latou i lena itu uma, o mea uma na faalogo i ai latou o i ai o ia, ua au mai ai i luga o moega e ua mamai. O mea uma foi ua ia maliu atu i ai, po o faoa aai, po o aai tetele, po o aai, ua latou tuu ai e mamai i malae, ma aioi mai ia te ia, ina ia latou papai atu tau lava o le tuupao o lona ofu, o e na papai ia te ia, na malolo ai i latou uma.

Ua tulai o ia nai lea mea, ona maliu ane lea i le laueleele o Turo ma Saitonu; ua ulu atu ia i le fale, ua finagalo foi ina ia le iloa o ia e se isi; a e le mafai ona faaliloina o ia; auā o le fafine ua i lana tama teine le agaga leaga, ua na faalogo i le tala ia te ia, ona sau ai lea o ia ia te ia, ua faapaū mai i ona vae; (o le fafine Eleni ia, na fanau i Suria Foinie,) ua ia faatoga ia te ia, ina ia tulia i fafo le temoni i lana tama. A ua fetalai atu Iesu ia te ia, Seia lua‘i maoona le fanau auā e le tatau ina ave mea e ‘ai a le fanau, ma lafo i ulī. Ona tali mai lea o ia ia te ia, ua faapea mai, Le Alii e, moni a oe; a o ulī i lalo o le laoai e aai i latou i momoi mea a tama. Ona fetalai atu ai lea o ia ia te ia, Ina alu ia ona o lau upu lena; ua te‘a le temoni sa i totonu i lau tama teine. Ona alu atu lea o ia i lona fale, ua maua ai lana tama teine o taoto i luga o le moega, a ua te‘a le temoni.

Ona latou au mai lea ia te ia le tagata tutuli, ua leo oolo; ua latou aioi foi ia te ia ina ia faaee e ia lona aao i luga ia te ia. Ona taita‘i ese lea o ia ia te ia i le motu o tagata, ua tuu ona tamatamai lima i totonu o ona taliga, ua feanu foi, ma pa‘i ane i lona laulaufaiva. Ua silasila ae ia i le lagi, ua oi, ona ia fetalai atu lea ia te ia, Efata, o lona uiga, ia avanoa. Ona pūpū loa lea o ona taliga, ua matala foi le noanoaga o lona laulaufaiva, ona tautala lelei mai ai lea. Ona ia vavao atu lea foi ia te i latou, aua latou te ta‘u atu i se tasi; a e ui lava ina vavao e ia ia te i latou, ua atili ai ona latou tala‘i atu ai lava; ua faapea atu ma le ofo ua matuā tele, Ua mālie lava ana mea uma ua fai; ua ia faalogoa e sa tutuli, atoa ma e sa gūgū ua ia faagaganaina.

O ia ona aso ua matua toatele ai le motu o tagata, ua leai foi ni a latou mea e ‘ai, ona valaau atu ai lea o Iesu i ona soo, ua fetalai atu ia te i latou, Ou te alofa atu i le motu o tagata, auā o le aso tolu lenei o matou o nonofo ma a‘u, e leai foi ni a latou mea e ‘ai; afai foi ou te tuuina atu ia te i latou e ō i o latou aiga, o matelaina, e lailoa i latou i le ala; auā e mamao mea na o mai ai nisi o i latou. Ona tali mai lea o ona soo ia te ia, Maifea e mafai ai se tasi ona fafaga ia te i latou i areto i lenei vao? Ona fesili atu lea o ia ia te i latou, Pe fia ea ni a outou areto? Ona latou fai mai lea, E fitu. Ona fetalai atu lea o ia i le motu o tagata ia latou taooto i lalo; ona tago lea o ia i areto e fitu, ua faafetai, ua tofitofi ma avane i ona soo, latou te laulauina atu; ona latou laulauina atu ai lea i le motu o tagata. Ua ia te i latou foi nai i‘a lauiti, ua ia faafetai foi, ona fetalai atu lea ia laulauina atu foi ia mea. Ona latou aai lea, ua maoona; ona latou fu‘e lea o toe ‘aiga ua fitu ete. O i latou foi na aai pe fa afe; ona ia tuuina atu lea ia te i latou e ō.

Ua oo ia i Petesaita, ona latou au mai lea o le tauaso ia te ia, ma latou aioi ia te ia ina ia pa‘i ane ia te ia. Ona tago atu lea o ia i le lima o le tausao, ua ta‘ita‘i ane ia te ia i tua o le aai. Ua feanu foi ia i ona mata, ona faaee lea e ia o ona aao i luga ia te ia, ua fesili atu i ai, po ua na iloa se mea. Ua tepa ae o ia, ona fai mai lea o ia, Ua ou iloa atu tagata ua faapei o laau, o loo savavali. Ona toe faaee atu lea e ia o ona aao i ona mata, ua fetalai atu ia te ia, ia tepa ae; ona toe lelei lea o ia, ua na iloa lelei foi o tagata uma.

Ua mavae aso e ono, ona o ai lea o Iesu ma Peteru, ma Iakopo, ma Ioane; ua ia avae ia te i latou i le mauga maualuga, ua na o i latou lava; ona liua lea o ia i o latou luma. Ua pupula ona ofu, ua matuā pe‘epa‘e lava pei o le kiona; e leai foi se tagata taofu i le lalolagi na te mafaia ona faasinasina faapena.

Ona tali mai lea o le tasi o le motu o tagata, ua faapea mai, Le a‘oa‘o e, ua ou au mai ia te oe lo‘u atalii ua i ai le agaga gūgū; so se mea e pue ai ia te ia, ona lafotu ai lea ia te ia, ua fāuā le gutu, ua lilivau ona nifo, ua tino vale ai foi o ia; ua uma foi ona ou fai atu i ou soo ina ia latou tulia o ia, a ua le mafaia e i latou. Ona tali atu lea o ia ia te ia, ua faapea atu, Le tupulaga le faatuatua e, tatou te i ai ma outou seia afea? ou te faapalepale ia te outou seia afea? ina au mai ia o ia ia te au. Ona latou aumaia lea o ia ia te ia; ua na iloa o ia, ona faataafiti loa lea ia te ia e le agaga, i le ua paū ia i le eleele, ona taafilifili ai lea o ia, ma fāuā lona gutu. Ona fesili atu lea o ia i lona tamā, Talu mai anafea ona oo o lena mea ia te ia? Ua fai mai o ia, Talu ina o tama itiiti. Ua lafo soo foi o ia ia te ia i le afi, atoa ma le vai, ina ia fano ai o ia; a e peitai ai se mea e te mafaia, ia e alofa mai ia te i matou, ma ia e fesoasoani mai ia te i matou. Ona fetalai atu lea o Iesu ia te ia, Afai ua e mafaia ona faatuatua, e mafaia mea uma lava i lē faatuatua. Ona alaga loa lea o le tamā o le tama, ua fai mai ma le tagi, Le Alii e, ua ou faatuatua; ia e fesoasoani i lo‘u le faatuatua. Ua silafia e Iesu ua taufetuli mai le motu o tagata, ona vavao atu lea o ia i le agaga leaga, ua faapea atu ia te ia. O oe na, le agaga gūgū ma le tutuli, ou te fai atu lava ia te oe, ina e alu i fafo ia te ia, aua foi e te toe alu i totonu ia te ia. Ona alaga lea o le agaga, ma faataafiti tele ia te ia, ona alu lea i fafo; ona liua lea o ia peiseai ua oti; ona fai mai ai lea tagata e toatele, Ua oti lava ia. A o Iesu ua tago ifo ia i lona lima, ma faatu ia te ia, ona tulai lea o ia.

A ua silasila atu Iesu ia te i latou, ua faapea atu, E le mafaia e tagata, na o le Atua; auā e mafaia mea uma e le Atua.

Ua oo i latou i Ieriko, o le a tuanai atu foi Ieriko e ia, atoa ma ona soo, ma le motu o tagata e toatele, a ua nofo mai i le auala o Patimaio le tauaso, le atalii o Timaio, o faatoga i mea māna; ua faalogo o ia o i ai Iesu le Nasareta, ona alaga mai ai lea, ua faapea mai, Iesu e, le alo o Tavita, ia e alofa mai ia te au. Ona matuā vavao atu lea o tagata e toatele ia te ia, ina ia faalologo ia; a o ia ua atili ai ona alaga, Le alo o Tavita e, ia e alofa mai ia te au. Ua tu Iesu, ma fetalai atu ia valaauia o ia; ona latou valaau atu lea i le tauaso, ua faapea atu ia te ia, Ia e loto tele, ina tu ia, o loo valaau o ia ia te oe. Ona tiai lea e ai lona ofu, ua tu i luga, ua sau ia Iesu. Ona fetalai atu lea o Iesu, ua faapea atu ia te ia, Se a se mea e te manao i ai ou te faia ia te oe? Ona fai mai lea o le tauaso ia te ia, Raponi e, ia vaai o‘u nei mata. Ona fetalai atu lea o Iesu ia te ia, Ina alu ia; ua e ola oe i lou faatuatua. Ona vaai loa lea o ona mata; ona mulimuli atu ai lea o ia ia Iesu i le ala.

Ona tali atu lea o Iesu ia te i latou, ua faapea atu, Ia outou faatuatua i le Atua; auā e moni, ou te fai atu ia te outou, ai sē fai atu i lenei mauga, Ia siitia oe, ma ia lafoina i le sami, ma le le masalosalo lona loto, a e peitai e faatuatua ia e taunuu lava mea na ia fai atu ai, ona faia lea mo ia o le mea na te fai atu ai. O le mea lea ou te fai atu ai ia te outou, o mea uma lava tou te ole mai ai i a outou tatalo, ina faatuatua ia o le a maua e outou, ona faia lava lea mo outou.

A ua fai atu ia ia te i latou, Aua tou te matatau; o loo outou saili ia Iesu le Nasareta o le na faasatauroina; ua tu o ia; e le o iinei; ina matamata ia i le mea na latou tuuina ai o ia.

E mulimuli atu foi nei faailoga i e faatuatua; e tutuli e i latou temoni i lo‘u igoa; e tautalatala i latou i gagana fou; e fetagofi i latou i gata; afai foi latou te inu i se mea e oti ai, latou te le afaina ai lava; e faaee atu foi o latou lima i luga o e mamai, ma faamaloloina i latou.

Ua mavae foi ona fetalai atu o le Alii ia te i latou, ona aveina ae lea o ia i le lagi, ona nofo ai lea o ia i le itu taumatau o le Atua.

Ona latou o atu lea, ma tala‘i atu i mea uma; ua galue faatasi le Alii ma i latou, ma ua faamaonia le upu i faailoga ua mulimuli ane ai. Amene.

auā e leai lava se mea e tasi e le mafaia e le Atua.

Sa i le sunako o le tagata ua i ai le agaga o le temoni leaga; ua alaga mai foi o ia, ua leo tele, ua faapea mai, Aue! Iesu e, le Nasareta, se a ea lau na ia te i matou? Ua e maliu mai ea ia fanoia i matou? Ua ou iloa oe, o le Paia oe o le Atua. Ona vavao lea o Iesu ia te ia, ua faapea atu, Ina faalologo ia, ma ē alu i fafo nai ia te ia. Ona lafo i lalo lea o le temoni ia te ia i o latou uma; ona alu lea i fafo ia te ia, ua le afaina lava ia. Ona ofo lea o i latou uma, ua fetautalatala‘i foi, ua faapea ane, O le a lenei mataupu? auā o le pule ma le mana ua fetalai atu ai o ia i agaga leaga, ona latou o ese lea i fafo. Ona logo atu lava lea o le tala ia te ia i mea uma o lea itu.

Ua tuua e ia le sunako, a e ulu atu i le fale o Simona. Ua maua le tinā o le avā a Simona e le ma‘i vevela, ua tele; ua latou faatoga atu ia te ia mo ia. Ona tu lea o ia i ona tafatafa, ua vavao le ma‘i vevela, ona mavae ai lea; ona tulai loa lea o ia, ua auauna ia te i latou.

O i latou uma sa i ai tagata e mamai i ma‘i eseese, ua latou aumaia i latou ia te ia i le goto o le la; ua pa‘ipa‘i tasi atu ona aao ia te i latou, ma faamalolo ia te i latou. Ua o atu foi temoni i fafo i e toatele, o alalaga, ua faapea mai, O oe lava le Keriso, le Alo o le Atua. Ona vavao lea o ia ia te i latou, ua ia le mafai ona latou tautala; auā ua latou iloa o ia o le Keriso.

Ua uma lana lauga, ona fetalai atu lea o ia ia Simona, Ina tuutuu atu ia i le loloto, ma tuu ifo ai o outou upega e maua ai ni i‘a. Ua tali mai Simona, ua faapea mai ia te ia, Le Alii e, ua atoa le po ua tigaina ai i matou, e leai ni mea ua maua; a ona o lau fetalaiga ou te tuu ifo ai le upega. Ua uma ona latou faia o lea mea, ona latou siomia lea o le au i‘a tele lava, ua masae ai lo latou upega. Ua latou genogeno atu i o latou o i le tasi vaa, e o mai e fesoasoani ia te i latou; ona latou o mai lea, ua faatumu e i latou vaa uma e lua, ua tāli gogoto ai. Ua iloa e Simona Peteru, ona faapaū lea o ia i tulivae o Iesu, ua faapea mai, Le Alii e, ina maliu ese atu ia oe ia te au, auā o a‘u le tagata agasala. Auā ua ofo o ia atoa ma i latou uma sa ia te ia, auā o le au i‘a ua latou maua;

Sa i le tasi aai o ia, faauta o le tagata ua liloia i le lepela; ua iloa atu e ia o Iesu, ona faapaū fao ai lea o ia, ma aioi mai ia te ia, ua faapea mai, Le Alii e, a e finagalo i ai, e mafai lava ia te oe ona faamamā ia te au. Ona aapa atu lea e ia lona aao, ua pa‘i atu ia te ia, ua faapea atu, Ou te loto i ai; ia mamā oe. Ona te‘a ese loa lava lea o le ma‘i lepela ia te ia. Ona fetalai atu lea o ia ia te ia, Aua le ta‘u atu i se tasi; a ia e alu, ma faaali oe i le faitaulaga, ma avatu mo lou faamamāina e tusa ma le poloaiga a Mose, e fai ma faailoga ia te i latou. A ua atili ai ona logo atu le tala ia te ia. Ona faapotopoto mai lea o le motu o tagata e toatele e faalogologo ia te ia, ma ia faamaloloina e ia o latou ma‘i.

Sa a‘oa‘o atu ia i le tasi aso, ua nonofo mai ai faresaio ma a‘oa‘o o le tulafono, e na o mai mai faoa aai uma o Kalilaia, ma Iutaia, ma Ierusalema; ua i ai foi le mana o le Alii e faamalolo ia te i latou. Faauta foi, o tagata o loo fata mai i le moega le tagata ua ma‘i i le supa; ua latou mananao ina ia au mai ia te ia, ma tuu ifo i ona luma. A e lei iloa e i latou se mea e au mai ai ia te ia, ona o le motu o tagata, ona o ae lea o i latou i luga o le fale, ua tuutuu ifo ia te ia ma lona moega i maa omea o le fale i totonu i luma o Iesu. Ua silafia e ia lo latou faatuatua, ona fetalai atu lea o ia ia te ia, Sole, ua faamagaloina au agasala. Ona manatunatu lea o le au tusiupu ma le au faresaio, ua faapea ane, O ai ea lenei ua na upu leaga i le Atua? O ai na te mafaia ona faamagaloina agasala, ua na o le Atua lava? Ua silafia e Iesu o latou manatunatu, ona tali atu ai lea o ia, ua faapea atu ia te i latou, Se a le mea tou te manatunatu ai i o outou loto? Po o le fea le faigofie? po o le fai atu. Ua faamagaloina au agasala; po o le fai atu, Tulai ia, ina savali? A e peitai ina ia iloa ai e outou o i le Atalii o le tagata le pule i le lalolagi e faamagalo ai agasala, (ua fetalai atu ia i le supa,) Ou te fai atu ia te oe, Tulai ia, ina ave lou moega, ma e alu i lou fale. Ona tulai loa lea o ia i o latou luma, ua ave le mea na taoto ai o ia, ona alu ai lea i lona fale, ua vivii atu i le Atua. Ua matuā ofo i latou uma, ma vivii atu i le Atua; ua latou matuā fefefe foi, ua faapea ane, Ua fāi ese na mea ua tatou iloa i le aso nei.

O le tasi sapati foi ua ulu ai o ia i le sunako, ma a‘oa‘o atu; sa i ai le tagata ua gase lona lima taumatau. Ua lamalama ia te ia le au tusiupu ma le au faresaio, pe faamalolo e ia i le sapati, ina ia latou maua se mea e momoli ai o ia. A ua silafia e ia lo latou manatunatu, ona fetalai atu lea i le tagata ua gase lona lima, Ina tulai ia, ma tu mai i totonu. Ona tulai loa o ia, ua tu mai. Ona fetalai atu lea o Iesu ia te i latou, Ou te fesili atu ia te outou i le mea e tasi, Pe tatau ea i le sapati ona agalelei, pe agaleaga? po o le faaola, po o le fasioti? Ua silasila solo o ia ia te i latou uma, ona fetalai atu lea i le tagata, Ina faaloaloa ia lou lima; ona faapea ai lea o ia; ona toe lelei ai lea o lona lima, e pei o le tasi.

Ua maliu ifo o ia faatasi ma i latou, ona tu lea o ia i le mea laugatasai, ma ona soo e toatele, ma le motu o tagata e toatele, mai Iutaia uma, ma Ierusalema, ma le itu i tai o Turo ma Saitonu, ua latou o mai e faalogologo ia te ia, ma ia faamaloloina o latou ma‘i; o e na tigaina foi i agaga leaga, ua faamaloloina foi i latou. Ua tausisi le motu o tagata uma e pa‘i atu ia te ia; auā ua alu ane le mana nai ia te ia, ua faamaloloina ai i latou uma.

Ua ma‘i le auauna a le tasi ta‘ita‘i o le toaselau, sa faapelepeleina e ia, ua tāli oti. Ua faalogo o ia ia Iesu, ona auina mai lea e ia o toeaina o Iutaia e aioi mai ia te ia ina ia maliu atu ma faaola lana auauna. Ua latou o mai ia Iesu, ona latou matuā faatoga mai lea ia te ia, ua faapea mai, Ua aoga o ia e te fai ai le mea nei; auā ua alofa mai o ia i lo tatou nuu, ua na faia foi le sunako mo i matou. Ona maliu atu ai lea o Iesu ma i latou; ua latalata ia i le fale, ona auina mai lea e le ta‘ita‘i o le toaselau o ana uo ia te ia, ua faapea mai ia te ia, Le Alii e, aua ne‘i faalavelaveina oe; auā ou te le aoga ina ia ulu mai oe i lo‘u fale. O lea foi na ou manatu ai ou te le aoga ona ou alu atu ia te oe; a ia oo mai sau fetalaiga, e faamaloloina ai la‘u auauna. Auā o a‘u foi le tagata ua pule i ai le tasi, ua ou pule foi i le ‘au tau; a a‘u fai atu i se tasi, Ina alu ia, ona alu ai lea; ma le tasi, Ina sau ia, ona sau ai lea; ma la‘u auauna, Ina faia lenei mea, ona fai ai lea. Ua faafofoga Iesu i nei mea, ona ofo ai lea ia te ia; ua fāliu o ia, ma fetalai atu i le motu o tagata e ua mulimuli mai ia te ia, Ou te fai atu ia te outou, ou te lei iloa ia Isaraelu lava se faatuatua e faapena ona tele. O e na auina mai ua foi atu i le fale, ona iloa lea e i latou o le auauna sa ma‘i, ua malolo.

Ua latalata ia i le faitotoa o le aai, faauta foi, ua fata mai le tagata oti, o le tama e toatasi o ia a lona tinā, o ia foi le fafine ua oti lana tane; ua ia te ia foi tagata o le aai e toatele. Ua silasila atu le Alii ia te ia, ona mutimuti alofa lea o ia ia te ia, ua fetalai atu ia te ia, Aua e te tagi. Ua maliu ane ia, ua pa‘i atu i le fata; ona tutū mai ai lea o le au fata, ona fetalai atu lea o ia, Le tauleale e, ou te fai atu ia te oe, Ina tulai ia. Ona nofo ai lea i luga o le na oti, ua tautala; ona ia tuuina atu lea o ia i lona tinā. Ua oo le mata‘u ia te i latou uma, ua latou vivii atu i le Atua, ua faapea ane, Ua tu mai ia te i tatou le perofeta sili; i le ma lea, Ua asiasi mai le Atua i lona nuu. Ua soo lava Iutaia uma ma le itu uma i lenei tala ia te ia.

O lea lava itu aso ua faamalolo ai e ia tagata e toatele sa i ai ma‘i, ma ma‘i tiga, ma agaga leaga; ua foai atu foi ina ia vaai o e tauaso e toatele. Ona tali atu lea o Iesu ia te i laua, ua faapea atu, Ina o atu ia oulua, ma faailoa atu ia Ioane o mea ua oulua vaai i ai, ma faalogo i ai; ua pupula tauaso, ua savavali pipili, ua faamamāina lepela, ua logo tutuli, ua faatutūina e na oti, ua folafolaina le tala lelei i e matitiva.

atoa ma nisi fafine sa i ai agaga leaga ma ma‘i, a ua faamaloloina; o Maria ua ta‘ua o le Makatala, na ō i fafo ia te ia temoni e toafitu,

Ua maliu ae ia ma ona soo i le tasi aso i le vaa; ua fetalai atu foi o ia ia te i latou, Tatou o ia i le tasi itu vai, ona latou tuuvaa atu lea. Ua alu lo latou vaa, a e tofa o ia, ona to ifo lea o le afā i le vai, ua osofia lo latou vaa, ua tāli goto. Ona latou o ane lea ua fafagu ia te ia, ua faapea mai, Le Alii e, le Alii e, o le a matou fano. Ona tu lea o ia, ua vavao i le matagi ma peau o le vai; ona mavae ai lea, ua malū. Ua fetalai atu ia ia te i latou, O ifea ea lo outou faatuatua? Ua matatau lava i latou ma ofo; ua fetautalatala‘i i latou, O ai ea lenei? auā ua fetalai o ia i le matagi ma le vai, ona usiusitai ai lea ia te ia.

Ua maliu ae ia i uta, ona fetaiai lea ma ia o le tasi tagata mai le aai ua leva ona ia te ia o temoni, ua le ofu o ia, ua le nofo foi i se fale, a o tuugamau. Ua iloa mai e ia o Iesu, ona alaga mai lea o ia, ma faapaū mai i ona luma, ua fai mai ia te ia ma le leo tele, Se a lau na ia te au nei, Iesu e, o oe na le Alo o le Atua silisili ese? ou te aioi atu ia te oe, aua e te faatiga mai ia te au. Auā na fetalai o ia i le agaga leaga e alu i fafo i le tagata. Auā na atu lasi ona pue ia te ia; ua fusifusia o ia i maea uamea, ma mea e faamau a‘i vae ua leoleoina ai o ia, a ua motumotusia maea ia te ia, ona avea ai lea o ia e le temoni i le vao.) Ua fesili atu Iesu ia te ia, ua faapea atu, O ai ea lou igoa? Ua fai mai o ia, O Lekeono; auā ua uluitino ia te ia temoni e toatele. Ua latou aioi mai ia te ia, aua le fetalai o ia ia te i latou e o i le fafā. Sa i ai le lafu puaa e tele, sa tataa i le mauga; ua latou faanoi mai ia te ia ia tuu atu latou te uluitino i ai. Ona tuu atu ai lea ia te i latou. Ona o lea o temoni i fafo nai le tagata, a ua uluitino i puaa; ona feosofi ifo lea o le lafu i le tofē i le vai, ua malelemo ai. Ua iloa ē sa faga puaa i le mea ua faia, ona sosola ai lea, ua o atu ua tala atu i le aai ma ona faoa aai. Ona latou o mai lea e matamata i le mea ua faia; ua o mai ia Iesu, ua latou iloa atu le tagata ua o i fafo ia te ia temoni, o loo nofo o ia i vae o Iesu; ua ofu ia, ma ua atamai; ona latou matatau ai lea. O e na iloa ua latou tala atu ia te i latou le mea na malolo ai le tagata sa uluitinoina. Ona aioi mai lea ia te ia o le nuu uma o Katara, ina ia maliu ese o ia ia te i latou; auā ua oo ia te i latou le mata‘u tele; ona maliu ae lea o ia i le vaa, ua toe foi atu.

O le fafine sa ia te ia le puna toto i tausaga e sefulu ma le lua, ua uma atu ana mea i fomai, a ua le mafai ona malolo i se tasi, ua alu ane ia i ona tua, ma pa‘i ane i le tuupao o lona ofu; ona utu loa lea o lona puna toto. Ona fetalai ane lea o Iesu, O ai ea na na pa‘i mai ia te au? Ua faafiti mai tagata uma, ona fai mai lea o Peteru ma i latou sa faatasi ma ia, Le Alii e, ua fetaomi ma fetuleni mai le motu o tagata ia te oe, e te fetalai mai ea, O ai na pa‘i mai ia te au? Ua fetalai atu Iesu, Na pa‘i mai lava se tasi ia te au; auā ua ou iloa ua alu atu le mana nai ia te au. Ua iloa e le fafine ua le lilo o ia, ona alu atu lea o ia ma le gatete, ua faapaū mai i ona luma, ma faamatala mai ia te ia i luma o le nuu uma le mea na pa‘i atu ai o ia ia te ia, ma le faamaloloina loa o ia. Ona fetalai atu lea o ia ia te ia, Lo‘u afafine e, ina faalototele ia oe; ua e ola i lou faatuatua; ina alu ia oe ma le manuia.

Ua sau le tasi mai le fale o le pule i le sunako a o fetalai o ia, ua fai mai ia te ia. Ua oti lou afafine; soia e te faalavelaveina le a‘oa‘o. Ua faafofoga i ai Iesu, ona tali atu lea o ia ia te ia, ua faapea atu, Aua e te fefe; tau ina e faatuatua, e ola ai o ia. Ua ulu atu ia i le fale, e le mafai ia te ia ona ulu atu se tasi, tau o Peteru, ma Iakopo, ma Ioane, o le tamā foi ma le tinā o le teine. Ua fetagisi i latou uma, ma tagitu‘i ona o ia; a ua fetalai atu ia, Soia le fetagisi; e lei oti o ia, a ua moe. Ua latou tapisa ia te ia, auā ua latou iloa ua oti o ia. A o ia, ua na tulia i latou uma i fafo, ona tago atu lea o ia i lona lima, ua valaau, ua faapea atu, Funa e, ina tulai ia. Ua toe foi mai lona agaga, ona tulai loa lea o ia; ua fetalai atu foi o ia, ia avatu ni ana mea e ‘ai. Ona matuā ofo ai lea o ona mātua; a ua vavao o ia ia te i laua, aua ne‘i tala atu i se tasi le mea ua faia.

Ua faapotopotoina e ia ona soo e toasefulu ma le toalua, ua tuu atu ia te i latou le mana ma le pule i temoni uma, ma ia faamalolo i ma‘i. Ua aauina atu i latou e ia e tala‘i i le malo o le Atua, e faamalolo foi i e mamai.

Ua latou o atu, ona faataamilo ai lea i lea aai ma lea aai e folafola le tala lelei, ma faamalolo i ma‘i i mea uma.

Ua iloa e le motu o tagata, ona latou mulimuli atu lea ia te ia; ona talia lea o i latou e ia, ua fetalai foi ia te i latou i le malo o le Atua, ma faamalolo i e na fia faamaloloina.

Ua taugagaifo le la, ona o mai lea ia te ia o le toasefulu ma le toalua, ua fai mai. Ia e tuuina atu le motu o tagata, ina ia latou o atu i aai ma faoa aai ua latalata mai, e api ai, ma maua ai mea e ‘ai; auā o le mea gaogao ua tatou i ai nei. A ua fetalai atu ia ia te i latou, Ia outou avane ni mea e ‘ai mā latou. Ona latou fai mai lea, E leai ni a tatou mea, na o areto e lima gafua, ma i‘a e lua lau; se‘i iloga matou te o e faatau ni mea e ‘ai mā lenei nuu uma. Auā o i latou pe toalima gaafe o tane. Ua fetalai atu ia i ona soo, Ia outou fai atu ia te i latou ia taooto i vasega, e taitoalimagafulu. Ua latou faapea lava ona fai, ma fai atu ia te i latou uma ia taooto i lalo. Ona tago ai lea o ia i areto e lima gafua, ma i‘a e lua lau, ua tepa ae i le lagi, ua faafetai, ma tofitofi, ua avatu i ona soo, latou te laulau atu ai i le motu o tagata. Ua latou aai, ua maoona uma lava; ona fu‘e lea o a latou toe ‘aiga, ua tumu ato e sefulu ma le lua i fāsi mea.

O loo tatalo ia, a ua liua ona fofoga, ua pa‘epa‘e ma pupula tele mai ona ofu.

Faauta foi, ua alaga mai le tasi mai le motu o tagata, ua faapea mai, Le a‘oa‘o e, ou te aioi atu ia te oe, e te silasila mai i lo‘u atalii; auā o ia lo‘u atalii toatasi. Faauta foi, ua pue ia te ia e le agaga, ona alaga loa lea, ma faataafiti ia te ia, ma ua fāuā lona gutu, ua tu‘i fulifuli ia te ia, toe ina le alu ese ia te ia. Na ou aioi atu foi i ou soo ia latou tuli ia te ia i fafo; a ua le mafai lava ia te i latou. Ua tali atu Iesu, ua faapea atu, Le tupulaga lē faatuatua ma le faapiopio, ou te i ai ia te outou, ma onosai ia te outou seia afea? Ina au mai ia lou atalii iinei. O loo sau ia, a e lafotu ma faataafiti ia te ia e le temoni. Ona vavao lea e Iesu i le agaga leaga, ma ua faamalolo i le tama, ma toe tuu atu ia te ia i lona tamā. Ua latou matuā ofo uma i le vavega o le Atua. O loo ofo i latou uma i mea uma na faia e Iesu, ona fetalai atu lea o ia i ona soo,

O le aai tou te oo atu i ai, ua latou talia foi outou, ia outou aai i mea e laulauina mai ia te outou; ia outou faamalolo foi i e mamai o i ai, ma ia fai atu ia te i latou, Ua latalata ia te outou le malo o le Atua.

Faauta, ou te foai ia te outou le pule e soli ai gata ma akarava ma le malosi uma o le fili; e leai lava se mea e leaga ai outou. A e peitai aua tou te olioli i lenei mea, ina ua usiusitai agaga ia te outou; na o lenei tou te olioli ai, ina ua tusia o outou igoa i le lagi.

Sa tuli e ia le temoni, ua gūgū foi o ia; ua alu i fafo le temoni, ona gagana ai lea o le gūgū, ua ofo ai lava le motu o tagata.

Sa a‘oa‘o ia i le tasi sunako i le sapati. Faauta foi, sa i ai le fafine ua ia te ia le agaga e vaivai ai i ona tausaga ua sefulu ma le valu, ua faano‘uno‘u lava ia, e le mafai lava ona tu sa‘o i luga. Ua silafia o ia e Iesu, ona valaau atu lea o ia ia te ia, ua faapea atu, Funa e, ua tatalaina lou vaivai. Ua faaee atu e ia ona aao ia te ia; ona faasa‘oloaina lea o ia, ua vivii atu foi o ia i le Atua. Ona tautala mai ai lea o lē pule i le sunako, ua ita ina ua faamalolo Iesu i le sapati, ua fai ane ia i le motu o tagata, E ono ia aso e tatau ona galulue ai; o aso ia tou te o mai ai ia faamaloloina, a e aua lava i le sapati. Ua tali atu le Alii ia te ia, ua faapea atu, O oe na le pepelo; e le ua taitasi ea o outou i le sapati ma tatala i lana povi, po o lana asini i le fale povi, ma ta‘ita‘i e faainu? A o le fafine nei, o le afafine o Aperaamo, ua noanoatia e Satani, faauta ona tausaga ia ua sefulu ma le valu, e le tatau ea ona tatalaina o lenei noanoaga ia te ia i le aso sapati? Ua fetalai ane ia na upu, ona mamā uma ai lea o e ita mai ia te ia; a ua olioli lava le motu o tagata uma ona o ia mea silisili uma na faia e ia.

Ona fetalai atu lea o ia ia te i latou, Ina o ia, fai atu i lea alope, Faauta, ou te tuli i fafo temoni, ou te faamalolo foi i e mamai i le asō ma taeao, a oo i e luā ou te faaiuina ai.

Faauta foi, sa i ona luma le tasi tagata ua ma‘i i le fula. Ua fetalai atu Iesu i le au a‘oa‘o tulafono ma le au faresaio, ua faapea atu, Pe sa ea ona faamalolo i ma‘i i le sapati? Ua latou faalologo lava. Ona tago atu lea o ia ia te ia, ua faamalolo ia te ia, ma tuu atu e alu.

Ona fai mai lea o le au aposetolo i le Alii, Ia e faatuputeleina lo matou faatuatua. Ua fetalai atu le Alii, Afai ua tusa lo outou faatuatua ma le fua o le sinapi, po ua outou fai atu i lenei sukamina, Ia liaiina oe, ma ia totōina i le sami; ona anaana mai lava lea ia te outou.

Ua oo atu ia i le tasi aai, ona fetaiai lea ma ia o tagata lepela e toatinoagafulu, ua tutū mamao mai i latou. Ua latou alalaga mai, ua faapea mai, Le Alii e, Iesu, ia e alofa mai ia te i matou. Ua silafia e ia, ona fetalai atu lea o ia ia te i latou, Ina o ia, ia faaali atu outou i faitaulaga. Ua latou o, ona faamamāina lea o i latou. O le tasi o i latou, ua na iloa ua faamaloloina ia, ona toe foi mai lea o ia, ua vivii atu i le Atua ma le leo tele; ua faapaū fao ia i ona vae, ua faafetai mai ia te ia; o le Samaria foi o ia. Ona fetalai atu lea o Iesu, ua faapea atu, E lei faamamāina ea le toatinoagafulu? a o ifea le toaiva? Ua le iloa ni e toe foi mai e vivii atu i le Atua, na o lenei tagata ese. Ua fetalai atu o ia ia te ia, Ina tulai ia, ina alu; ua e ola i lou faatuatua.

Ua fetalai atu ia, O mea e le mafaia e tagata, e mafaia e le Atua.

Ua latalata ia i Ieriko, a ua nofo i le auala le tasi tauaso o faatoga i mea: ua faalogo o ia i le motu o tagata ua savavali ane, ona fesili lea a ia, pe se a lea. Ua latou fai atu ia te ia, o Iesu le Nasareta ua maliu ane. Ona alaga mai ai lea o ia, ua faapea mai, Iesu e, le alo o Tavita, ia e alofa mai ia te au. Ua vavao ia te ia e na muamua, ina ia faalologo o ia; peitai o ia ua atili ai ona alaga, Le alo o Tavita e, ia e alofa mai ia te au. Ua tu Iesu, ma fetalai atu ia ta‘ita‘iina mai o ia ia te ia. Ua latalata mai o ia, ona fesili atu lea o ia ia te ia, ua faapea atu, Se a le mea e te manao i ai ou te faia mo oe? Ua fai mai o ia, Le Alii e, ia vaai o‘u nei mata. Ona fetalai atu lea o Iesu ia te ia. Ina vaai ia ou mata; o lou faatuatua ua e ola ai. Ona vaai loa lea o ona mata, ua mulimuli atu ia te ia, ua vivii atu i le Atua; ua iloa atu ai e le nuu uma, ona latou vivii atu lea i le Atua.

O le tasi tagata o i latou, ua ta e ia le auauna a le faitaulaga sili, ua tipiesea lona taliga taumatau. Ona fetalai atu lea o Iesu, ua faapea atu, Tuu mai ia, seia faia lenei mea. Ona tago ai lea o ia i lona taliga, ua faamalolo ia te ia.

E le o iinei o ia, a ua tu; ia outou manatu i lona fetalai atu ia te outou, ina o i Kalilaia o ia,

Ua uma foi le uaina, ona fai atu lea o le tinā o Iesu ia te ia, Ua leai sa latou uaina. Ua fetalai mai Iesu ia te ia, Funa e, se a ea lau na ia te au? e lei oo i lo‘u itu aso. Ua fai ane lona tinā i auauna, O se mea lava e fai mai ai o ia ia te outou, ia outou faia. Sa i ai vai maa tetele e ono, e tailua pe taitolu paita i vai, pei o le tu o le faamamāina o Iutaia. Ua fetalai atu Iesu ia te i latou, Ina faatutumu ia o vai i suāvai. Ona latou faatutumuina lea, ua oo lava i lau. Ua fetalai atu ia ia te i latou, Ina asu ane ia, ina ave i lē pule i le tausamaaga. Ona latou avatua lea. Ua tofo foi lē pule i le tausamaaga i le vai ua liu uaina, (a ua na le iloa le mea na maua ai, a o auauna na asu le vai ua latou iloa,) ona valaau atu lea o lē pule i le tausamaaga i le faatoafaiavā, ua fai atu ia te ia, E muamua ona au mai e tagata uma o le uaina lelei; pe a tele foi le inu i ai o tagata, ona au mai ai lea o le uaina leaga; a ua tuu e oe le uaina lelei, ua oo mai i lenei itu aso. Na faia e Iesu lenei uluai faailoga i Kana i Kalilaia, ma faaali mai ai lona mamalu; ona talitonu ai lea o ona soo ia te ia.

Sa i Ierusalema o ia i le paseka, i le tausamiga, ona toatele ai lea o e na talitonu i lona suafa, ina ua latou vaai atu i faailoga na ia faia.

ua alu ane o ia ia Iesu i le po, ua fai mai ia te ia, Rapi e, ua matou iloa o oe o le a‘oa‘o ua maliu mai mai le Atua; auā e le mafai e se tasi ona fai o ia faailoga e te faia, ana le ia te ia le Atua.

Ona toe malia atu ai lea o Iesu i Kana i Kalilaia, na ia lina ai le suāvai ma uaina. O le tasi alii foi ua ma‘i lona atalii i Kapanaumi; ua faalogo o ia ua maliu mai Iesu mai Iutaia i Kalilaia, ona sau ai lea o ia ia e ia, ma faatoga mai ia te ia, ia maliu ifo e faamalolo i lona atalii, auā ua tāli oti. Ona fetalai atu lea o Iesu ia te ia, Afai tou te le vaavaai i faailoga ma vavega, tou te le talitonu lava. Ua fai mai le alii ia te ia, Le Alii e, se‘i e maliu ifo, manū o lei oti si ou atalii. Ona fetalai atu lea o Iesu ia te ia, Alu ia oe, ua ola lou atalii. Ua talitonu le tagata i le upu na fetalai atu ai Iesu ia te ia, ona alu ai lea o ia. O alu ifo o ia ua fetaiai ma ana auauna, ona latou ta‘u atu lea ia te ia, ua faapea atu, Ua ola lou atalii. Ona fesili atu lea o ia ia te i latou, po o le fea itu aso na afua ai ona faafeoloolo. Ua fai mai i latou ia te ia, Na mavae lava ananafi lona ma‘i vevela i le itu aso e fitu. Ona iloa lea e le tamā, o le itu aso lava lea na fetalai atu ai Iesu ia te ia, Ua ola lou atalii. Ona talitonu lea o ia, atoa ma lona aiga uma.

O i Ierusalema le taelega, e latalata i le faitotoa mamoe, o Petesa lona igoa i le upu Eperu, e lima ona faapaologa. Sa taooto ai tagata e toatele o e mamai, o e tauaso, o e pipili, ma e ma‘i tino vale; o faatalitali ai le gaepu o le vai; auā a oo i ona aso, ua alu ifo ai le agelu i le taelega, ma faagaepu le vai; i le o le ua muamua ifo, ina o gaepu o le vai, ua malolo ai o ia i le ma‘i na ma‘i ai o ia. Sa i ai foi le tasi tagata na ma‘i i tausaga e tolugafulu ma le valu. Ua silasila atu Iesu ia te ia o taoto; ua silafia foi ua loa ona ia te ia o le ma‘i, ua fetalai atu ia te ia, E te fia malolo ea? Ua tali mai ia te ia le na ma‘i, Le Alii e, e leai lava se tagata na te tuuina ifo a‘u i le taelega, pe a gaepu le vai; a alu ifo a‘u e muamua ifo le tasi ia te au. Ua fetalai atu Iesu ia te ia, Ina tu ia i luga, ave ia lou moega, ma ia e savali. Ona malolo loa lea o le tagata; ua ave lona moega, ma ua savali. O le sapati foi lea aso.

Ona mulimuli atu lea ia te ia le motu o tagata e toatele, auā na latou matamata i ona faailoga sa faia i e na mamai.

Ona tepa ae ai lea o Iesu ona fofoga, ua silasila atu foi, ua o mai ia te ia le motu o tagata e toatele, ona fetalai atu lea o ia ia Filipo, O ifea tatou te faatauina mai ai ni areto, ina ia aai ai i latou nei? Ua faapea atu Iesu, o lana tofotofo ia te ia; auā ua silafia lava e ia le mea o le a na faia. Ua tali mai Filipo ia te ia, E le lava areto, pe a faatauina i tenari e lua selau, ina ia tofu i latou ma sina mea itiiti. Ona fai mai lea ia te ia o le tasi o ona soo, o Aneterea, o le uso o Simona Peteru, O loo iinei le tama o ia te ia areto karite e lima, ma nai i‘a iti e lua lau; a e aumā ea ia mea ia i latou e toatele? Ona faapea atu lea o Iesu, Ia outou fai ane ia taooto tagata. E tele foi le mutia i lea mea. Ona latou taooto ai lea, o le tau aofai o tane, pe lima o afe. Ona tago lea o Iesu i areto, ua faafetai, ona tufatufa lea i ona soo, a e tufatufa e ona soo i e taooto. Ua faapea foi ma i‘a, ua avatu faitalia i latou. Ua maoona lava i latou, ona fetalai ane lea o ia i ona soo, ia faapotopoto toe ‘aiga, ne‘i ai ni mea e māumau. Ona faapotopoto ai lea, ua tutumu ai ‘ato e sefulu ma le lua i toe ‘aiga o areto karite e lima, o mea ia na totoe i e na aai. Ua iloa ia tagata le faailoga na faia e Iesu, ona faapea lea o i latou, E moni, o lea lava perofeta lenei, o lē maliu mai i le lalolagi.

Ua taualo i latou, pe lua sefulu ma le lima, pe tolugafulu o setatio, ona iloa atu lea o i latou ia Iesu, o savali lava i luga o le vai, ua latalata atu foi o ia i le vaa; ua latou fefefe ai. A ua fetalai atu ia ia te i latou, O a‘u lava lenei; aua tou te fefefe. Ona talia lea o ia e i latou i le vaa ma le fiafia; ona oo atu loa lea o le vaa i le nuu ua latou o i ai.

Ona latou fetagofi lea i maa e fetogi ia te ia. Ona lafi lea o Iesu, ua ulufafo i le malumalu, ua ui ane i totonu ia te i latou, ma maliu ese ai.

Ua maliu aue o ia, ua silafia le tagata ua tauaso talu ina fanau mai. Ona fesili mai lea o ona soo ia te ia, ua faapea mai, Rapi e, po o ai ea na agasala, po o ia nei, po o ona mātua, ina ua fanau mai o ia o tauaso? Ua tali atu Iesu, E lei agasala lenei tagata, po o ona mātua; a e peitai ina ia faaalia ai o galuega a le Atua ia te ia. E tatau ona ou faia galuega a le ua auina mai a‘u, manū o ao; e oo i le po, e le mafaia e se tasi ona galue ai. Manū ou i ai i le lalolagi, o a‘u o le malamalama o le lalolagi. Ua fetalai atu nei upu, ona feanu ifo lea o ia i le eleele; ona faia lea o le palapala i le feanuga, ua nini mata o le tauaso i le palapala; ona faapea atu lea o ia ia te ia, Alu ia, ina mulumulu i le taelega i Seloa, (o lona uiga pe a faamatalaina, O le auina.) Ona alu lea o ia, ua mulumulu, ua toe foi mai, ua vaai. Ona fai ane lea o e na tuaoi ma ia, ma e na muai iloa o ia ina o tauaso, E le o ia ea lenei sa nofo ma ole atu i mea?

E lei faalogo lava talu mai le vavau, ona faapupulaina e se tasi o mata o le na fanau mai o tauaso. Ana le mai le Atua lena tagata, na te le mafaia se mea e tasi ona fai.

Ua fetalai atu Iesu, Ave ese ia le maa. Ona fai mai lea ia te ia o Mareta le tuafafine o le ua oti, Le Alii e, ua oo ina manogi, auā o lona po fa lenei. Ua fetalai atu Iesu ia te ia, Pe na ou le fai atu ea ia te oe, Afai e te talitonu, ona e iloa lea o le mamalu o le Atua? Ona latou ave ese lea o le maa i le mea na tuu ai le ua oti. Ona tepa ae lea o fofoga o Iesu, ua faapea atu, Lo‘u Tamā e, ou te faafetai atu ia te oe, auā ua e faafofoga mai ia te au. Ua ou iloa foi, e te faafofoga mai ia te au e le aunoa; a e peitai ua ou fai atu ai, ona o le motu o tagata o loo vagavagai, ina ia talitonu i latou ua e auina mai a‘u. Ua ia fetalai atu ia upu, ona alaga lea o ia ua leo tele, Lasalo e, ina sau ia i fafo. Ona alu ai lea i fafo o le na oti, ua fusifusia ona vae ma ona lima i ie na tanuma‘i, ua fusi foi ona mata i le solosolo. Ona fetalai atu lea o Iesu ia te i latou, Tatala ia ia te ia, ina tuu atu ia e alu.

Ona faapotopoto lea o le fono e le au ositaulaga sili ma le au faresaio, ua latou faapea ane, Se a sa tatou mea e fai? auā ua faia faailoga e tele e lea tagata.

Ua ia faia faailoga e tele lava i o latou luma, a e lei talitonu i latou ia te ia,

Ia outou talitonu mai ia te au, o a‘u o i totonu o le Tamā, o le Tamā foi o i totonu ia te au; a le o lea ia outou talitonu mai ia te au ona o ia galuega. E moni, e moni, ou te fai atu ia te outou, o lē talitonu mai ia te au, e faia lava e ia o galuega ou te faia; e fai foi e ia mea e sili i ia mea, auā ou te alu i lo‘u Tamā.

O mea uma foi tou te ole atu ai i lo‘u igoa, ou te faia lava; ina ia viia le Tamā ona o le Atalii. Afai tou te ole atu i se mea i lo‘u igoa, ou te faia lava.

Afai tou te tumau ia te au, a tumau foi a‘u upu ia te outou, o mea uma lava tou mananao i ai, tou te ole atu ai, ona faia lea mo outou.

Ua oo i le afiafi, o le uluai aso lea o le vaisapati, ua punitia faitotoa o le mea na potopoto ai le au soo, ona o le fefe ia Iutaia; ua maliu atu Iesu, ua tu i totonu; ona fetalai atu lea o ia ia te i latou, Ia outou manuia. Ua ia fetalai atu lea mea, ona faaali atu lea ia te i latou o ona lima ma lona itu. Ona olioli ai lea o le au soo ina ua latou vaai atu i le Alii.

Ona fai atu lea o le au soo uma ia te ia, Ua matou iloa atu le Alii. A ua fai mai o ia ia te i latou, Afai ou te le vaai atu i ona lima, i mea na tutu‘i ai fao, ma tuu lo‘u tamatamai lima i mea na tutu‘i ai fao, ma tuu lo‘u lima i lona itu, ou te le talia lava. Ua mavae aso e valu, ua toe faatasi ona soo i le fale, ua faatasi ai foi i latou ma Toma; ua maliu atu Iesu, a o pupuni faitotoa, ua tu foi o ia i totonu, ma fetalai atu, Ia outou manuia. Ona fetalai atu lea o ia ia Toma, Au mai ia lou tamatamai lima iinei, vaai mai foi i o‘u lima; au mai ia foi lou lima, ma tuu mai i lo‘u itu; aua foi e te masalo vale, a ia e talitonu. Ona tali mai lea o Toma, ua faapea mai ia te ia, Lo‘u Alii e, ma lo‘u Atua e.

O isi foi faailoga e tele na faia e Iesu i luma o ona soo, e lei tusia i lenei tusi.

Ua fai atu Simona Peteru ia te i latou, Ou te alu, ou te fagota. Ua fai mai i latou ia te ia, Tatou te o foi ma oe. Ua latou o atu, ona latou o ae loa lea i le vaa; a e lei maua se i‘a e tasi i lea po. Ua oo i le taeao, ua tu Iesu i le auvai, a e lei iloa e le au soo o Iesu lea. Ona fetalai atu lea o Iesu ia te i latou. Le fanau e, pe ai ea ni a outou mea e ‘ai? Ua latou tali mai ia te ia, E leai. Ua fetalai atu o ia ia te i latou. Ina lafo ia le upega i le itu i matau o le vaa, ona outou maua ai lea. Ona latou lafo lea; a ua le toe mafai e i latou ona toso ae, ona o taumafa o i‘a. Ona fai atu lea o lena soo ua alofaina e Iesu ia Peteru, O le Alii lea. Ua faalogo Simona Peteru, o le Alii ia, ona ofu lea o ia i lona ofu, auā na faasau o ia; i le ua oso i le vai. A ua o mai isi soo i le vaa itiiti; auā e le vava mamao ma uta, pe lua selau o kupita; ua toso mai le upega, ua i ai i‘a. Ua latou tūta, ona iloa lea o le afi malala, o le i‘a foi ua tunu ai, ma le areto. Ua fetalai atu Iesu ia te i latou, Au mai ia nisi i‘a ua outou maua nei. Ona alu ane lea o Simona Peteru, ma toso mai le upega i uta, ua tumu i i‘a tetele; e lau selau, ma le lau lima, ma le tolugalau; e ui lava ina tele o i‘a, a e lei masae lava le upega.

Ua fāliu Peteru, ona vaai atu lea o ia i le soo ua alofaina e Iesu, o loo mulimuli mai, o ia foi na faalagolago i le fatafata o Iesu ina o fai le talisuaga, na na fai atu foi, Le Alii e, o ai ea e faalataina oe? Ua iloa atu o ia e Peteru, ona fai mai lea o ia ia Iesu, Le Alii e pe faapefea o ia nei? Ua fetalai atu Iesu ia te ia, Afai ou te loto ina ia tumau pea o ia seia ou sau, pe se a lea mea ia te oe? Ia e mulimuli mai oe ia te au. Ona salalau ai lea o lenei tala i le au uso, E le oti lava lea soo; a e lei faapea atu Iesu ia te ia, E le oti ia; a e faapea, Afai ou te loto ina ia tumau pea o ia seia ou sau, pe se a lea mea ia te oe?

O isi mea foi e tele na faia e Iesu, afai e tusia uma lava, o la‘u taofi e le mafai ona ofi i le lalolagi ia tusi pe a tusia. Amene.

Na faailoa atu foi o ia e ia ia te i latou ua soifua ia, ina ua mavae o lona tiga, ua faamaonia i faailoga faamaoni e tele; e fagafulu po ua iloa ai o ia e i latou, ma na fetalai atu i mea a le malo o le Atua.

A e maua e outou le mana, pe a afio ifo le Agaga Paia i luga ia te outou; e fai foi outou ma molimau ia te au i Ierusalema ma Iutaia uma lava, ma Samaria, e oo lava i le tulu‘iga o le lalolagi. Ua fetalai atu ia i ia mea, ona siitia lea o ia, o latou o vaavaai atu; ua avea foi o ia i le ao nai o latou luma.

Ona faafuasei mai lea o le atalii mai le lagi, peiseai o le matagi ua agi tele mai, ua tumu uma ai le fale sa latou nonofo ai. Ua iloa foi e i latou o laulaufaiva peiseai o le afi ua vaevaeina, ua nofo i o latou luga taitoatasi. Ua faatutumuina foi i latou uma i le Agaga Paia, ua afua ai ona tautala i gagana eseese, pei ona foaiina mai e le Agaga o le gagana ia te i latou. Sa nonofo i Ierusalema tagata Iutaia e ua matatau i le Atua, mai nuu uma lava o le lalolagi. Ua lagona foi lenei taalili, ona faapotopoto mai ai lea o le motu o tagata, ua fememeai, ina ua taitasi ma faalogo atu ia te i latou ua tautala mai i lana lava gagana.

O ona aso e gata ai, o loo faapea mai le Atua, e iu ina ou liligi ifo ai lo‘u Agaga i luga o tagata uma lava; ona perofeta mai lea o outou atalii ma o outou afafine, e iloa faaaliga e o outou taulelea, e fai miti foi o outou toeaina. O ia aso foi ou te liligi ifo ai lo‘u Agaga i luga o a‘u auauna tane, ma a‘u auauna fafine, latou te perofeta mai ai. Ou te faia foi vavega i le lagi i lugā, ma faailoga i le lalolagi i lalo, o le toto, ma le afi, ma le asuasu e faaniutu. E muamua ona liua o le la i le pouliuli, ma le masina i le toto, i le oo ai i le aso tele ma le silisili o le Alii.

Sema e, o outou Isaraelu e, faalogo mai ia i nei upu; o Iesu o le Nasareta, o le tagata ua faasinoina e le Atua ia te outou i mea mamana, ma vavega, ma faailoga ua faia e le Atua i o outou luma e ia, pei ona outou iloa foi;

Ua oo foi le fefe i tagata uma; ua faia foi e le au aposetolo vavega ma faailoga e tele.

Ua ave foi le tasi tagata ua pipili talu ina fanau mai, ua tuuina ifo o ia e i latou i aso fai soo i le faitotoa o le malumalu ua igoa i le Matagofie, e faatoga atu i se mea alofa i e ulu atu i le malumalu; ua iloa mai e ia o Peteru ma Ioane a ulu atu i le malumalu, ona faatoga lea o ia i se mea alofa. Ona pulatoa lea o Peteru ma Ioane ia te ia, ua faapea atu, Vaai mai ia ia te i maua. Ona naunau mai lea o ia ia te i laua, fā‘i e maua se mea mai ia te i laua. Ona fai atu lea o Peteru, E leai sa‘u ario po o sa‘u auro; a o le mea ua ia te au, ou te avatu lea ia te oe, O le suafa o Iesu Keriso o le Nasareta, ina tu ai ia i luga, ina savali. Ua tago atu foi o ia i lona lima taumatau, ua faatu ia te ia i luga; ona faamalosia loa lea o ona vae ma ponaponāvae. Ua oso ia i luga ma tu, ua savali foi, na ulu faatasi foi ma i laua i le malumalu, o loo savali ia, ma oso, ma vivii atu i le Atua. Ua iloa mai foi e le nuu uma o ia o loo savali ma vivii atu i le Atua. Ua latou iloa o ia lava sa nofo i le faitotoa Matagofie o le malumalu, ma faatoga atu i mea alofa; ua matuā ofo i latou, ua segia o latou mauli i le mea ua oo ia te ia. Ua pipii atu ia Peteru ma Ioane le pipili ua faamaloloina, ua femoei mai le nuu uma lava ia te i latou i le faapaologa e igoa i le faapaologa o Solomona, ua ofo tele.

Ua iloa e Peteru, ona fai atu lea o lana lauga i le nuu, Sema e, o outou Isaraelu e, se a le mea tou te ofo ai i lenei mea? se a foi tou te pulatoa mai ai ia te i maua, peiseai o so maua mana, ma sa maua amio Atua ua savali ai o ia nei?

O lona suafa foi, ona o le faatuatua i lona suafa, ua faamalosia e ia lenei tagata ua outou vaavaai i ai, ma outou iloa; o le faatuatua mai ia te ia, ua foai atu ai ia te ia lenei faamalosi o lona tino i o outou luma uma lava.

Ua vaai i latou i le faamalosi o Peteru ma Ioane, ma ua iloa o tagata e lei a‘oa‘oina i laua ma le valelea, ua latou ofo ai; ua latou iloa foi o i laua sa latou faatasi ma Iesu. Ua iloa atu foi e i latou le tagata ua faamaloloina ua tutū faatasi ma i laua, ua le mautali i latou. Ua fai mai ia te i laua e o ese ia i le fono; ona fetautalatalai lea o i latou, ua faapea, Se a se mea tatou te faia i nei tagata? auā ua matuā iloa e o nonofo i Ierusalema uma lava ua faia lava e i laua le faailoga sili; e le mafai foi sa tatou upu e toe fai atu.

O lenei, le Alii e, ia e silasila i lo latou faamatau mai; ma ia e foai mai i au auauna, ina ia latou matuā tautala i lau afioga ma le faamalosi, i le faaloaloa mai o lou aao e faamalolo ai, ina ia faia foi o faailoga ma vavega i le suafa o lau Auauna paia o Iesu. Ua mavae atu la latou tatalo, ona luluina lea o le mea ua faapotopoto ai i latou; ua tutumu foi i latou uma i le Agaga Paia, ma ua tautala atu i le afioga a le Atua ma le faamalosi.

Ao le tasi tagata o Anania lona igoa, ma Safaira lana avā, na ia faatau atu le fanua. Ua tuu faanānā foi māna nisi mea o le tau, ua iloa foi e lana avā, ua aumaia foi nisi mea ma tuu mai i le au aposetolo e pule. A ua fai atu Peteru, Anania e, se a le mea ua faatumu ai e Satani lou loto e te pepelo ai i le Agaga Paia, ma e tuu ai ma oe nisi mea o le tau o le fanua? A o tumau e lei faatauina, e le o lou lava ea? ua uma foi ona faatauina, e lei i lau pule ea? Se a le mea ua tuu ai lenei mea i lou loto? ua e le pepelo i tagata, a o le Atua. Ua faalogo Anania i ia upu, ona paū lea o ia i lalo, ua to lana mānava; ona oo ai lea o le mata‘u tele ia te i latou uma o e na faalogo i nei mea. Ona tutū lea i luga o taulelea, ua teuteu ia te ia, ma ave i fafo ua tanu ai. Ua mavae atu ona itu aso pe tolu, i le ulufale mai ai lana avā, e lei iloa e ia le mea ua faia. Ua fai atu Peteru ia te ia, Fai mai ia te au, pe na oulua faatau atu ea le fanua i ia lava mea? Ua fai mai ia, Ioe, o lea lava. Ona fai atu lea o Peteru ia te ia, Se a le mea ua oulua loto gatasi ai e tofotofo i le Agaga o le Alii? faauta, o tutū mai i le faitotoa i latou e na tanu lau tane, latou te ave foi ia te oe i fafo. Ona paū loa lea o ia i ona vae, ua to lana mānava; ua ulufale mai taulelea, ma latou iloa o ia ua oti, ona latou ave lea ia te ia i fafo, ua tanu ai i tafatafa o lana tane. Ua oo foi le mata‘u tele i le ekalesia uma lava, ma i latou uma e na faalogo i nei mea.

Ua faia e lima o le au aposetolo faailoga ma vavega e tele i luma o le nuu. Sa i le faapaologa o Solomona foi i latou uma lava ma le loto gatasi. A o isi tagata, ua leai so latou ua faamalosi e faatasi ma i latou; a ua viia i latou e le nuu; ua atili ai ona faaopoopoina i le Alii e ua faatuatua, o taumafa, o tane atoa ma fafine; ua oo ina au mai e i latou i e mamai i malae, ma faataooto ai i moega ma fata, tau lava ina ia faapaoloina ai nisi o i latou i le ata o Peteru pe a ui ane. Ua o mai foi le motu o tagata mai aai ua vagavagai Ierusalema, ua au mai e i latou e ua mamai ma e ua tigaina i agaga leaga; ua faamaloloina i latou uma lava.

A ua to mai puipui o le fale e le agelu a le Alii i le po, ua na ta‘ita‘i ia te i latou i fafo, ma faapea atu, Ina o ia outou, ina tutū i le malumalu ma tautala atu i le nuu i upu uma lava o lenei olataga. Ua faalogo ai i latou, ona latou ulufale lea i le malumalu i le tafa o ata, ma a‘oa‘o ai. Ona sau lea o le faitaulaga sili ma i latou sa ia te ia, ua faapotopoto e i latou le fono, atoa ma le taupulega uma lava o le fanauga a Isaraelu, ona aau atu lea nisi i le fale puipui e ta‘ita‘i mai ia te i latou. Ua oo atu auauna, ua latou le maua ia te i latou i le fale puipui; ona toe foi mai lea, ma tala mai, ua faapea mai, Na matou iloa le fale ua puipui ma ua mausali lava, ma leoleo ua tutū i fafo i luma o faitotoa; ua matou to atu, a ua le maua e i matou se tasi i totonu. Ua faalogo i nei upu le faitaulaga, ma le ta‘ita‘i o le ‘au o le malumalu, atoa ma le au faitaulaga sili, ua latou masalosalo i nei mea, pe iu i ni a. Ona sau lea o le tasi, ma tala mai ia te i latou, ua faapea mai, Faauta, o tagata sa outou tuu i le fale puipui, o loo i le malumalu i latou, o tutū ma a‘oa‘o atu i le nuu.

A o Setefano, ua tumu o ia i le faatuatua ma le mana, ua na faia vavega ma faailoga tetele i luma o le nuu.

Ua pulatoa ia te ia o i latou uma ua nonofo i le fono, ua iloa e i latou ona mata, ua peiseai o fofoga o se agelu.

Ua mavae foi tausaga e fagafulu, ona faaali lea ia te ia o le agelu a le Alii i le afi mumū i le laau talatala i le vao o le mauga o Sinai.

O ia lava na ta‘ita‘iina atu ia te i latou, a ua uma ona fai vavega ma faailoga i le nuu o Aikupito, ma le sami Ulaula, atoa ma le vao i tausaga e fagafulu.

Ua naunau le motu o tagata ma le loto gatasi i upu na fai atu e Filipo, ua latou faalogologo ma vaavaai i faailoga ua faia e ia. Auā ua ō i fafo agaga leaga i tagata e toatele sa i ai, ua alalaga ma le leo tele; ua faamaloloina foi e sa mamai i le supa ma pipili e toatele. Ua tele lava le olioli i lea aai.

O Simona foi, ua talitonu ia; ua papatisoina foi o ia, ona faatasi atu lea o ia ia Filipo, ua matuā ofo, ina o matamata i faailoga ma vavega tele ua faia.

Ua o ae i laua nai le vai, ona segia lea o Filipo e le Agaga o le Alii; ua le toe iloa ia e le eunuka, ua alu foi ia i lana malaga ma le olioli. A ua iloa Filipo i Asota; ua alu foi o ia, ma folafola solo le tala lelei i aai uma lava, ua oo lava ia i Kaisareia.

Ua alu atu o ia ua latalata i Tamaseko, ona faafuasei mai ai lea ona pupula faataaliolio mai ia te ia o le malamalama mai le lagi; ona paū lea o ia i lalo i le eleele, ua faalogo atu i le siufofoga, o loo faapea mai ia te ia, Saulo, Saulo e, se a le mea ua e saua mai ai ia te au? Ona fai atu lea o ia, Le Alii e, o ai ea oe? Ona fetalai mai lea o le Alii, O a‘u o Iesu ua e saua mei i ai; o le mea faigata ia te oe ona aa i tui. Ua gatete ia, ma ua mata‘u, ua faapea atu, Le Alii e, se a le mea e te finagalo i ai ou te faia? Ona fetalai mai lea o le Alii ia te ia, Tu ia oe i luga, ina alu ia i le aai, ona ta‘uina atu lea ia te oe o le mea e tusa ona e faia. A ua tutū i luga tagata ua o malaga ma ia, ua le mafeganavai; ua lagona lava i latou i le siufofoga, a e le iloa atu se tasi. Ua tu i luga Saulo nai le eleele; ua pupula ona mata, a ua le iloa se tasi; ua fetagofi i latou i ona lima, ua ta‘ita‘i ia te ia i Tamaseko. Ua tolu foi aso e le o vaai ai o ia, ua le ‘ai, e lei inu.

Ona alu lea o Anania, ua ulu atu i le fale, ua na faaee atu foi ona lima i luga ia te ia, ua faapea atu, Lo‘u uso e Saulo, ua auina mai a‘u e le Alii o Iesu, sa faaali ia te oe i le ala na e sau ai, ina ia e toe vaai, ma ia faatumuina oe i le Agaga Paia. Ona pauu loa lea o mea nai ona mata peiseai ni una; ona toe vaai loa lea o ia, ua tu foi i luga, ma ua papatisoina.

Ua na iloa ai le tasi tagata o Ainea le igoa, e valu ona tausaga o taoto i lona moega, ua ma‘i o ia i le supa. Ua fai atu foi Peteru ia te ia, Ainea e, ua faamaloloina oe e Iesu le Keriso; ina tu ia i luga, ma teu lou moega. Ona tu loa lea o ia i luga. Ua iloa atu foi o ia e i latou uma e ua nonofo i Lita ma Sarona, ua liliu ai i latou i le Alii.

O ia ona po ua ma‘i o ia, ua oti ai; ua uma foi ona latou mulumulu ia te ia i le vai, ona tuu lea ia te ia i le afeafe aupitoaluga. Ua fetalai Lita ma Iopa, ua faalogo le au soo o i ai Peteru, ona latou aau atu ai lea o tagata e toalua ia te ia, ua ole atu aua le faatuai ona alu atu ia te i latou. Ona tu lea o Peteru i luga, ua o ma i laua. Ua oo atu o ia, ona aveina ae lea o i latou ia te ia i le afeafe aupitoaluga; ua tutū mai foi fafine uma lava ua oti a latou tane, o fetagisi mai, ma faaali mai ofu tino ma ofu tetele sa faia e Toreka, ina o ia te i latou o ia. A ua tuli atu Peteru ia te i latou uma lava i fafo, ona tootuli lea o ia, ma tatalo; ona faasaga atu lea o ia i le oti, ua faapea atu, Tapita e, ina tu ai i luga. Ua pupula o ia; ua na iloa Peteru, ona nofo lea i luga. Ona tago atu lea o Peteru i lona lima, ua na faatu ia te ia; ua valaau foi o ia i le au paia ma fafine ua oti a latou tane, ua tuu atu ia te ia ua ola. Ua iloa ai e Iopa uma lava; ua faatuatua foi tagata e toatele i le Alii.

o Iesu o le Nasareta, o le na faauuina e le Atua i le Agaga Paia ma le mana, o ia sa femaliuai ma agalelei ma faamalolo atu i e na faatoilaloina uma lava e le tiapolo; auā sa ia te ia le Atua.

Ua pue ia te ia, ona tuu ai lea i le fale puipui, ma tuuina atu i tagata tau e taitoafā i vasega e fa e leoleo ia te ia; ua manatu ia e ta‘ita‘i ane ia te ia i le nuu pe a mavae le paseka. O lenei, ua leoleoina Peteru i le fale puipui; a ua faia le tatalo faatauanau i le Atua e le ekalesia mo ia. Ua oo ina a ta‘ita‘i e Herota ia te ia i fafo, o lea lava po na moe ai Peteru i le va o tagata tau e toalua, ua noanoatia o ia i maea uamea e lua; o leoleo foi i luma o le faitotoa, ua leoleo i latou i le fale puipui. Faauta foi, o le agelu a le Alii ua tu mai, ua pupula mai foi le malamalama i le fale; ua na ta ia Peteru i lona itu, ma fafagu ia te ia, ua faapea atu, Ina tu ai i luga, ia vave. Ona pauu ifo lea o maoa uamea nai ona lima. Ua fai atu le agelu ia te ia, Fusi ia ou ofu, ma faamau ifo ou seevae. Ua faapea foi ona faia e ia. Ua na fai atu foi ia te ia, Ina pulupulu ia lou ofu, ma mulimuli mai ia te au. Ona alu lea o ia i fafo, ua mulimuli atu ia te ia; ua le iloa e ia ua moni le mea ua faia e le agelu; fa te ia ua vaaia le faaaliga. Ua mavae i tua ia te i laua le muai leoleoga ma lona lua, ona oo lea o i laua i le puipui uamea e o atu ai i le aai; ua matala fua lea ia te i laua; ona la o atu lea i fafo, ma savali atu i le ala e tasi; ona tuua loa lea o ia e le agelu. Ua faatoa mau manatu ai Peteru, ona faapea lea o ia, Ua ou iloa nei, e moni, ua auina mai e le Alii lana agelu, ma ua laveai mai o ia ia te au ai le lima o Herota, ma le faatuatuaga uma lava o le nuu o Iutaia.

A o Elima le makoi, (auā o le uiga lea o lona igoa,) ua tetee mai o ia ia te i laua, ua fia faaliliu ese atu e ia i le suikonesula i le faatuatua. A o Saulo, (o Paulo foi lea,) ua tumu ia i le Agaga Paia, ua pulatoa ia te ia, ona faapea atu lea o ia, O oe na ua tumu i le pepelo uma ma le ulavale uma, o le atalii o le tiapolo, o lē ‘ino‘ino i le amiotonu uma lava; e te le se‘i soia ea lou faapiopio i ala tonu o le Alii? Faauta nei, o le a oo ia te oe le aao o le Alii, e tauaso oe, e te le vaai i le la seia se aso. Ona paū loa lea ia te ia o le popogi ma le pouliuli; ona fealuai lea o ia, ma saili ni tagata e ta‘ita‘i ia te ia. Ua iloa foi e le suikonesula le mea ua faia, ona talitonu lea o ia, ua matuā ofo i le mataupu a le Alii.

O le mea lea ua nonofo loa ai i laua, ma tautala faamalosi atu i le afioga a le Alii, ua molimau mai o ia i le upu o lona alofa tunoa, ma ua foai ia faia faailoga ma vavega i o laua lima.

Sa nofo foi i Lusa le tasi tagata ua le lavā i ona vae, ua pipili talu lava ona fanau mai, e lei savali lava. Ua faalogo mai lenei tagata ia Paulo o loo tautala; ua pulatoa atu o ia ia te ia, ua iloa foi ua ia te ia le faatuatua e malolo ai, ua fai atu ma le leo tele, Ina tu sa‘o ia ou vae i luga. Ona oso lea o ia ma savali.

Ona faalologo lea o le toatele uma lava, ma faalogologo mai ia Panapa ma Paulo, o loo faamatalaina atu o faailoga ma vavega e tele ua faia e le Atua i nuu ese e i laua.

O le tulua o po ma ao ua tatalo ai ma pepese o Paulo ma Sila i le Atua; ua faalogo foi ia te i laua e ua noanoatia. Ona faafuasei mai lea o le mafuie tele, ua luluina ai faavae e le fale puipui; ua toloaina mai ai o puipui uma, ua maunuunu ai foi o latou noanoaga uma lava. Ua ala le leoleo o le fale puipui na moe, ua na iloa faitotoa o le fale ua avanoa, ona se‘i lea e ia o le pelu, a fasi o ia e ia, fa te ia ua sosola e na noanoatia,

Ua faia foi e le Atua vavega sili i lima o Paulo; o lea ua avea ai solosolo ma ie tali otaota nai lona tino i e mamai, ona mavae ai lea o latou ma‘i, ua ō i fafo foi ia te i latou agaga leaga.

Sa nofo foi le tasi taulealea, o Eutiko le igoa, i le faamalama, ua maua e le moe gase; ua loa foi le lauga a Paulo, ua oo lava ia te ia le moe, ona paū ifo lea o ia mai luga i le tolu o pae o le fale, ua sii ae foi o ia ua oti. Ona alu ifo lea o Paulo, ua faō i luga ia te ia, ua fusi foi ia te ia, ma fai atu, Soia le fetagisi, auā o loo ia te ia lona ola. Ua toe alu ae foi o ia i luga, ua tofitofi le areto, ma ua ‘ai, ma ua talatala leleva ua oo ina ao, ona alu lea o ia. Ua au mai foi e i latou le tama ua ola, ua matuā faaolioliteleina ai i latou.

Ua faaputu e Paulo le avegāfafie, ma faaee i le afi, ona sau ai lea o le gata uogo ona o le vevela, ma pipii i lona lima. Ua vaai mai le nuu ese i le mea feai o tautau ifo i lona lima, ona fetautalatalai lea o i latou, O le fasioti tagata lava lena, e ui lava ina ua sao o ia mai le sami, a e le mafai i le toasa ona ola o ia. A ua lulu atu e ia le mea feai i le afi, ua le lagona se leaga. Ua faatali i latou fa‘i e fulafula, pe paū i lalo ma lipiola; a ua leva ona latou faatali, ma ua iloa atu ua le oo se mea leaga ia te ia, ona liliu lea o latou manatu, ua faapea ane, o se atua lava ia.

Ua latalata i lenei mea fanua o le alii o le motu, o Popilio le igoa; ua na talia i matou, ua matou api i lona fale, ua agalelei mai o ia i aso e tolu. Ua taoto foi le tamā o Popilio i le ma‘i vevela ma le sana toto; ua alu atu Paulo ia te ia, ma ua tatalo, ona faaee lea e ia o ona lima i luga ia te ia, ua faamalolo ai ia te ia. Ua faia foi lenei mea, ona o mai ai lea o e na mama‘i uma lava i le motu, ma ua faamaloloina.

O lenei, e tupu le faatuatua i le taulogologo atu, o le taulogologo atu foi o i le afioga a le Atua lea.

i le mana o faailoga ma vavega, i le mana o le Agaga o le Atua; o lea e afua mai ai i Ierusalema, ma faataamilomilo e oo i Iluriko, ua ou matuā folafola le tala lelei a Keriso.

Auā o loo fai mai Iutaia i se faailoga, ma Eleni o loo saili i latou i le poto; a o i matou, ua matou tala‘i atu ia Keriso na faasatauroina, o le mea e tausuai ai Iutaia, ma le valea ia Eleni; a e peitai o e ua valaauina, o Iutaia atoa ma Eleni, ua fai Keriso ma mana o le Atua, ma poto o le Atua ia te i latou.

O a‘u nei foi, le au uso e, ou te lei alu atu ma le sili o le upu ma le poto, ina ua ou alu atu ia te outou i lo‘u tala‘i atu ia te outou le mau a le Atua. Auā na tonu lo‘u manatu, ou te le iloa se tasi mea ia te outou tau lava o Iesu Keriso, o ia lava na faasatauroina. Na ou i ai foi ia te outou ma le vaivai, ma le mata‘u, ma le gatete tele; e lei sauni atu foi la‘u upu, ma la‘u tala‘iga i upu mālie o le poto o tagata, a e peitai o le faasino mai e le Agaga ma le mana; ina ia le i ai lo outou faatuatua i le poto o tagata, a o le mana o le Atua.

Ua foaiina taitasi i tagata le faaaliga o le Agaga e aoga ai. Auā ua foaiina mai i le tasi le upu o le poto e le Agaga; e i le tasi le upu o le malamalama, e tusa ma le Agaga e tasi; e i le tasi le taofi tonu e le Agaga e tasi; e i le tasi o mea alofa e faamalolo a‘i ma‘i e le Agaga e tasi; e i le tasi na te faia vavega; e i le tasi o le perofeta; e i le tasi o suega o agaga; e i le tasi gagana eseese; e i le tasi o le faamatalaga o gagana. E matuā galue foi na mea uma e lea lava Agaga e tasi, o loo o tufatufa i tagata ia taitasi ma lana mea, pei ona finagalo i ai o ia.

Ua faatuina foi e le Atua i le ekalesia e muamua o aposetolo, o lona lua o perofeta, o lona tolu o a‘oa‘o, pito ane i ai o e fai vavega, i le ma mea alofa e faamalolo a‘i ma‘i, o e fesoasoani, o ta‘ita‘i, o gagana eseese. O aposetolo uma ea? o perofeta uma ea? o a‘oa‘o uma ea? o fai vavega uma ea? ua tofu uma ea ma mea alofa e faamalolo a‘i ma‘i? e tautala uma lava ea i gagana eseese? e faamatala uma ea? Ia outou naunau i mea alofa e sili; a e peitai ou te faasino atu ia te outou le ala e silisili lava.

Afai ou te tautala i gagana a tagata atoa ma agelu, a e leai so‘u alofa, ua avea a‘u ma ‘apa memea taalili, po o se sumapalo tagitagi. Afai foi o ia te au ona perofeta ane, ma le iloa o mea lilo uma, ma le poto uma lava; afai foi o ia te au le faatuatua uma e ave ese ai mauga, a e leai so‘u alofa, ou te le aoga lava.

Ia outou tausisi i le alofa; ia naunau foi i mea faaleagaga, a e sili lea ina ia outou perofeta ane. Auā o lē tautala i le gagana ese, e le tautala ia i tagata, a o le Atua; auā e leai se lagona, a e tautala ia i le Agaga i mea lilo; a o lē perofeta ane, e tautala ia i tagata, ina ia faamafanafana ai, ma apoapoai ai, ma fetomai ai. O lē tautala i le gagana ese e faamafanafana e ia ia te ia; a o lē perofeta ane, e faamafanafana ia i le ekalesia. Ou te loto ina ia outou tautala uma i gagana eseese, a e sili lo‘u loto ina ia outou perofeta ane; auā e sili lē perofeta ane i lē tautala i gagana eseese, pe a le faamatalaina e ia, ina ia faamafanafanaina le ekalesia. A o lenei, le au uso e, afai ou te alu atu ia te outou ma tautala i gagana eseese, se a ea so‘u aoga ia te outou, pe afai ou te le tautala atu ia te outou i le faaaliga, po o le poto, po o le perofeta ane, po o le a‘oa‘o atu?

O lenei, o gagana eseese, e le fai ma faailoga ia i e faatuatua, a o e le faatuatua; a o le perofeta ane, e le se faailoga lea mo e le faatuatua a o e faatuatua. Afai foi e faapotopoto le ekalesia uma i le mea e tasi, ma latou tautala uma i gagana eseese, a ulufale atu ni e valelea, po o e le faatuatua, e le ta‘uvaleleaina ea outou e i latou? A e afai e perofeta ane uma, a e ulufale atu se tasi, o se le faatuatua, po o se valea, ua aoaiina o ia e i latou uma, ua faamasinoina e i latou uma, ua aliali mai ai foi mea lilo o i lona loto, ona faapaū fao ai lea o ia, ma ifo atu i le Atua, ma talatala, e moni, o ia te outou le Atua.

O lenei, le au uso e, ia outou naunau ina ia perofeta; aua foi ne‘i vavao le tautala i gagana eseese.

Na faia lava faailoga o le aposetolo ia te outou i le onosai uma, i faailoga, ma vavega, ma mea mamana.

Ia ia te ia o le na te mafaia ona faia o mea uma e faasilisili lava i mea tatou te ole atu ai ma mafaufau i ai, e tusa ma le mana o loo matuā galue i totonu ia te i tatou,

ua molimau mai foi le Atua faatasi ma i latou i faailoga ma vavega, i mea mamana eseese foi, ma mea alofa mai le Agaga Paia, e tusa ma lona lava finagalo.

A o le faatuatua, o le faalagolago lea i mea ua faamoemoe i ai, o le mautinoa lea o mea e le o vaaia.

A leai foi se faatuatua e le mafai ona fiafia mai o ia; auā e tatau i lē alu atu i le Atua ona talitonu o loo soifua o ia, o ia foi na te tauia mai o e matuā saili ia te ia.

A ia ole atu ma le faatuatua, aua lava ne‘i masalosalo; auā e lē masalosalo e tusa ia ma le peau o le sami ua sousou i le matagi ma felafolafoaiina.

Ua ma‘i ea so outou? ina aami atu ia i toeaina o le ekalesia, ia latou tatalo mo ia, pe a uma ona faauu ia te ia i le suāuu i le suafa o le Alii. O le tatalo foi e faia i le faatuatua e faaolaina ai le ma‘i, e faatuina foi o ia e le Alii; afai foi ua agasala, e faamagaloina ia. Ia fefaaaliai a outou agasala, ma tatalo le tasi mo le tasi, ina ia faamaloloina outou. Ua aoga tele le tatalo faatauanau a le tagata amiotonu.

O Elia o le tagata ia e tusa ma i tatou, ua matuā tatalo o ia ina ia le ua; ona le uaina ai lea o le fanua i tausaga e tolu ma masina e ono. Ua toe tatalo foi, ona to ifo ai lea o le ua mai le lagi, ona fua mai ai lea o le eleele i ona lava fua.

Na ou fāliu atu e vaai i le leo na tautala mai ia te au; ua ou fāliu, ona ou iloa atu lea o tuugālamepa auro e fitu. Ua i totonu foi i tuugālamepa e fitu le tasi e pei o le Atalii o le tagata, ua ofu ia i le ofu tatapuvae, ua fusia foi lona fatafata i le fusi auro; ua sinasina foi lona ao ma ona lauao e pei o le fulufulu mamoe ona sinasina, e pei o le kiona lava; o ona fofoga foi e pei o le mumū o le afi; ma ona vae e pei o le ‘apa pupula, e peiseai ua mu i le ogāumu; o lona siufofoga foi e pei o le taalili o vai e tele; ua i lona aao taumatau o fetu e fitu; ua alu atu foi ai lona fofoga o le pelu e faataumaai ona itu e maamaai lava; o ona fofoga foi e pei o le pupula o le la ina o mu toto‘a.

Ona a‘u iloa lea o le lagi fou ma le lalolagi fou; auā ua mavae atu le uluai lagi, ma le uluai lalolagi, ua leai foi se toe sami. O a‘u foi o Ioane na ou iloa le aai paia, o Ierusalema fou, ua alu ifo mai le Atua i le lagi, ua saunia pei o se faatoanofotane ua teuteuina mo lana tane.