01 – O Le Tusi Paia

Ua silasila atu le Atua i le malamalama, ua lelei; ona tuu eseese ai lea e le Atua o le malamalama ma le pouliuli.

Ua sili le atamai o le gata i manu uma o le vao na faia e Ieova le Atua. Ua fai mai o ia i le fafine, E moni ea, na fetalai mai le Atua, lua te le aai i laau uma o le faatoaga?

Ua silafia e Ieova ua leaga tele lava tagata i le lalolagi, o manatu uma ua mafaufau ifo ai i o latou loto ua na ona leaga ia i aso uma lava.

O Ieova, o le toa lava ia, o Ieova o lona suafa lea.

Ona alu lea o Mose ma na faailo atu i le nuu o afioga uma lava a Ieova ma faamasinoga uma. Ona tali mai lea o le nuu uma ma le leo gatasi ua faapea mai, O mea uma lava ua fetalai mai ai Ieova, matou te faia lava. Ona tusi lea e Mose o afioga uma lava a Ieova; ona tulai lea o ia i le taeao lava, ma na faia le fata faitaulaga i lalo o le mauga, atoa ma faailoga maa e sefulu ma le lua mo itu aiga o Isaraelu e sefulu ma le lua.

E le se tagata le Atua e talapepelo ai o ia, po o se atalii o se tagata e salamo ai o ia; ua fetalai mai o ia, na te le faia ea? Ua fetalai mai foi o ia, na te le faataunuuina ea?

Aua tou te faaopoopo se upu i upu ou te fai atu ai ia te outou, aua foi tou te aveeseina ai se upu; ina ia outou tausiusi i poloaiga a Ieova lo outou Atua ou te fai atu ai ia te outou.

Faauta, na ou a‘oa‘o atu ia te outou i tulafono ma faamasinoga e pei ona poloai mai ai ia te au e Ieova lo‘u Atua, ina ia outou faia faapea i le nuu tou te o atu ai e fai mo outou. O lenei, ia outou tausiusi i ai, ma ia outou faia, auā o le mea lea tou te popoto ai, ma atamamai ai i luma o nuu e faalogologo i nei tulafono uma; ona faapea ane lea, E moni lava o le nuu popoto ma le atamamai lenei nuu mamalu.

faailoa atu le aso na e tu ai i luma o Ieova lou Atua i Horepa, ina o fetalai mai Ieova ia te au, Ina faapotopoto mai ia ia te au le nuu, ia latou faalogologo mai i a‘u upu, ina ia a‘oa‘oina ai i latou, ina ia matatau mai ia te au i aso uma lava latou te ola ai i le fogāeleele, ma ia latou a‘oa‘o ai i a latou fanau.

Auā o Ieova lou Atua o le afi maamaai ia, o le Atua fuā ia.

Lenei la, ia outou anaana ia faia, faapei ona poloai mai ai o Ieova lo outou Atua ia te outou, aua tou te afe i le itu taumatau, po o le itu tauagavale.

Ia e alofa atu ia Ieova lou Atua ma lou loto atoa, ma lou agaga atoa, ma lou malosi atoa. Ia i ai foi i lou loto o upu nei ou te fai atu ai ia te oe i le aso nei. Ia e matuā a‘oa‘o soo ai i lau fanau, ma ia e tautalatala a‘i, pe a ē nofo i lou fale, pe a ē savali foi i le ala, pe a ē taoto, pe a ē tulai foi. Ia e fusi ai e fai ma faailoga i lou lima, e avea foi ma pale i le va o ou mata. Ia e tusi ai foi i pou o lou fale, atoa ma ou puipui.

Na ia faatigaina foi oe, ma faalaina oe, ua na fafaga ia te oe i le manai, o le mea na e le iloa, na le iloa foi e ou tamā, ina ia na faailoa atu ia te oe e le na o mea e ‘ai e ola ai tagata, a o mea uma e tŭlei mai i le fofoga o Ieova e ola ai tagata.

O lenei, ia e tausiusi i poloaiga a Ieova lou Atua, ina ia e savali i ona ala, ma ia mata‘u ia te ia.

Ua fetalai mai foi Ieova ia te au, ua faapea mai, Ua ou iloa lenei nuu, faauta foi, o le nuu e maaa ua.

O lenei, Isaraelu e, se a se mea e finagalo i ai Ieova lou Atua ia te oe, na ona ia e mata‘u ia Ieova lou Atua, ina ia e savali i ona ala uma lava, ma ia e alofa atu ia te ia, ma ia e auauna ia Ieova lou Atua ma lou loto atoa ma lou agaga atoa, ina ia e tausiusi i poloaiga a Ieova ma ana tulafono ou te fai atu ai ia te oe i le aso nei, ina ia manuia ai oe?

O lenei ia e alofa atu ia Ieova lou Atua ma ia e tausiusi i ana sauniga ma ana tulafono ma ana faamasinoga ma ana poloaiga i aso uma lava.

O lenei ia outou tuu nei upu i o outou loto ma o outou manatu, ia fusi foi e fai ma faailoga i o outou lima, e avea foi ma pale i le va o outou mata. Ia outou a‘oa‘o atu ai i a outou fanau, ma tautalatala a‘i pe a e nofo i lou fale, pe a e savali foi i le ala, pe a e taoto, pe a e tulai foi. Ia e tusi ai foi i pou o lou fale atoa ma puipui;

Faauta mai, ou te tuuina atu i o outou luma i le aso nei le manuia ma le malaia; o le manuia pe afai tou te faalogo i poloaiga a Ieova lo outou Atua, ou te fai atu ai ia te outou i le aso nei; a o le malaia pe afai tou te le faalogo i poloaiga a Ieova lo outou Atua, a e o ese i le ala ou te fai atu ai ia te outou i le aso nei, tou te mulimuli ai i atua ese ua outou le iloa.

O mea uma lava ou te fai atu ai ia te outou, ia outou tausiusi i ai e fai; aua ne‘i e faaopoopo i ai se mea, aua foi ne‘i e ave ese ai se mea.

Afai e tu mai ia te oe se perofeta, po o se faimiti, na te tuu atu foi ia te oe se faailoga po o se vavega, a taunuu foi lea faailoga po o lea vavega, na ia fai atu ai ia te oe, o loo faapea, Ina tatou mulimuli atu ia i atua ese, o e na outou le iloa, ma ia tatou auauna i ai; aua ne‘i e faalogo i upu a lea perofeta, po o lena faimiti; auā e tofotofoina ai outou e Ieova lo outou Atua, ina ia silafia pe tou te alofa atu ia Ieova lo outou Atua ma o outou loto atoa ma o outou agaga atoa. Tou te mulimuli atu ia Ieova lo outou Atua, ma outou matatau ia te ia, ma tausiusi i ana poloaiga, tou te faalogo foi i lona siufofoga, ma outou auauna ia te ia, ma pipii atu ia te ia.

ia i ai foi lea ia te ia, na te faitau ai foi i aso uma lava o lona olaga; ina ia a‘oa‘oina ai o ia ia mata‘u ia Ieova lona Atua, ma ia tausi i upu uma lava a lenei tulafono ma nei sauniga, na te faia;

O le aso nei ua poloai mai ai Ieova lou Atua ia te oe ia e faia nei tulafono ma faamasinoga; ia e tausi foi i ai, ma e faia ma lou loto atoa ma lou agaga atoa

Ia malaia le na te le faamauina upu o lenei tulafono e faia. Ona tali mai ai lea o le nuu uma, Amene.

Afai foi e te matuā faalogo i le siufofoga o Ieova lou Atua, e anaana e fai ana poloaiga uma lava ou te fai atu ai ia te oe i le aso nei, ona faasilisiliina lea o oe e Ieova lou Atua, i nuu uma lava o le lalolagi;

A e afai e te le faalogo i le siufofoga o Ieova lou Atua, e anaana e foi ana poloaiga uma ma ana tulafono ou te fai atu ai ia te oe i le aso nei; ona maua mai ai lea o oe i nei malaia uma, e oo lava ia ia te oe.

O ia Ieova lo tatou Atua mea lilo; a o mea ua faailoa mai o ia te i tatou ia ma a tatou fanau e faavavau, ina ia faia e i tatou o upu uma o lenei tulafono.

pe afai e te faalogo i le siufofoga o Ieova lou Atua, e tausi i ana poloaiga ma ana sauniga ua tusia i le tusi o lenei tulafono; pe afai foi e te foi mai ia Ieova lou Atua ma lou loto atoa, ma lou agaga atoa.

Ou te valaau i le lagi ma le lalolagi i le aso nei e fai ma molimau ia te outou, ua ou tuuina atu i ou luma o le ola ma le oti, o le manuia ma le malaia; o lenei, ia e filifili i le ola, ina ia ola ai oe atoa ma lau fanau;

Ia e faapotopotoina le nuu, o tane, ma fafine, ma tama iti, atoa ma le tagata ese e ia te oe i au aai, ina ia latou faalogologo ai, ma ia a‘oa‘oina i latou, ma ia latou matatau ia Ieova lo outou Atua, ma latou anaana e fai o upu uma lava o lenei tulafono.

Ia outou ave le tusi o lenei tulafono, ma tuu ai i le itu o le atolaau o le feagaiga a Ieova lo outou Atua, ina ia i ai e fai ma molimau ia te oe. Auā ua ou iloa lou fouvale, ma lou ua maaa; faauta, o loo fouvale outou ia Ieova, o loo o tatou ola faatasi i le aso nei; e le atili ai ea pe a ou oti?

E le te‘a i lou gutu le tusi o lenei tulafono, a ia mafaufau i ai i le ao atoa ma le po, ina ia e anaana e fai e tusa ma mea uma ua tusia i ai; ona manuia ai lea ia te oe o lou ala, ona e manuia ai lea.

Tau lava ina matatau outou ia Ieova, ma auauna ia te ia ma le faamaoni ma o outou loto atoa; auā ia outou manatunatu i mea tetele ua na faia mo outou.

Ua fai atu Samuelu, E tusa ea ona fiafia o Ieova i taulaga mu ma taulaga, i lona fiafia i le faalogo i le siufofoga o Ieova? Faauta, o le faalogo e sili lea i le taulaga, ma le usiusitai e sili lea i le ga‘o o mamoe poa. Auā o le fouvale, e tusa ia ma le agasala o le faataulāitu; o le finau vale, e tusa ia ma le leaga o le tapuai i tupua. Ua e lafoai le afioga a Ieova, o lea ua lafoai ai o ia ia te oe ia le fai ma tupu. Ona fai mai lea o Saulo ia Samuelu, Ua ou agasala, auā ua ou tuumavaega i le afioga a Ieova atoa ma lau upu; auā sa a‘u fefe i le nuu, ma ou faalogo i a latou upu.

Auā ua ou tausia ala o Ieova; ma ou le lafoai faalemata‘u i lo‘u Atua. Aua na ou lumanai pea ana faamasinoga uma; na ou le tuueseina foi ana tulafono ia te au.

A ua latou le faalogo lava, a e peitai ua latou faamaaa i o latou ua, faapei o ua o latou tamā, o e na le talitonu ia Ieova lo latou Atua.

Ina o ia, ina fesili ia Ieova mo a‘u, ma e o totoe i Isaraelu, ma Iuta i upu o le tusi ua maua; auā ua tele le toasa o Ieova ua liligi ifo ia te i tatou, ina ua le anaana o tatou tamā i le afioga a Ieova, e fai mea uma ua tusi i lenei tusi.

a ua latou faatauemu i e na aauina mai e le Atua, ma ua ‘ino‘ino i ana afioga, ma ua ula i ana perofeta, ua oo ina tupu le toasa o Ieova i lona nuu, ua oo ina leai se fofo.

Auā na saunia e Esera lona loto e saili i le tulafono a Ieova ma fai ai, ma a‘oa‘o atu i Isaraelu i le tulafono, ma faamasinoga.

Ona potopoto mai ai lea ia te au o i latou uma na matatau i afioga a le Atua o Isaraelu, ona o le agasala a le tafeaga; ua ou nofo foi ua segia lo‘u mauli, ua oo i le taulaga o le afiafi.

Ua latou fai atu foi i le Atua, Ina alu ese ia oe ia te i matou, auā matou te le fia iloa ou ala.

Ua ou le alu ese foi i le poloaiga a ona laufofoga; ua sili lo‘u tausi i afioga a lona fofoga i a‘u sauniga.

Ona tali mai ai lea o Ieova ia Iopu mai le afā, ua faapea mai, O ai ea lenei ua na faapouliuligia la‘u pule i upu e le o i ai le poto? Ina fusi ia lou sulugatiti e pei o le tagata malosi; ou te fesili atu foi ia te oe, ina e faailoa mai ia ia te au. O ifea sa e i ai ina o ou faavaeina le lalolagi? Ina faaali mai ia pe afai ua e iloa mafaufau.

a e naunau o ia i le tulafono a Ieova; e mafaufau foi o ia i lana tulafono i le ao atoa ma le po.

O afioga a Ieova o afioga mamā ia; ua se ario ua faate‘a ese ai le eleele i le umu, e faafitu ona faamamāina. Ieova e, o oe lava e te tausi ia te i latou; e te leoleo ia te ia mai lenei lava tupulaga e oo i le faavavau.

Auā ua ou tausia ala o Ieova, ma a‘u le lafoai faalematau i lo‘u Atua.

O le Atua, e sao lava lona ala; ua se ario ua te‘a ma le otaota afioga a Ieova; o ia lava o le talta o i latou uma o e faatuatua ia te ia.

E sao le tulafono a Ieova, e faafoisia mai ai le agaga; e faamaoni poloaiga a Ieova, e faapotoina ai le ua faigofie. E tonu feau a Ieova, e faafiafia ai le loto; e mamā poloaiga a Ieova, e malamalama ai mata. E mamā le mata‘u ia Ieova, e tumau e faavavau; o faamasinoga foi a Ieova e moni ia ma tonu uma lava. E silisili ona lelei i le auro, o le auro e sili ona lelei e tele; e sili foi ona suamalie i lo le meli, o le meli ua sisina ifo. Ua apoapoaiina mai ai foi lau auauna; e tele foi le taui pe a tausi i ai.

Auā o loo i o‘u luma lou alofa; ua ou savali foi i le mea moni mai ia te oe.

E malosi le siufofoga o Ieova; e mamalu le siufofoga o Ieova.

Ou te tuuina atu lo‘u agaga i lou aao; Ieova e, le Atua faamaoni, ua e togiolaina a‘u.

Ou te a‘oa‘o ia te oe, ma faasino ia te oe i lea lava ala e te savali ai; ou te faatonu ia te oe, ma ou vaai ia te oe. Aua e te faapei o le solofanua, po o le falata, e le o i ai se mafaufau, o latou teuga o le faagutu ma le taofi e taofi ai, auā ua latou le faalatalata mai ia te oe.

Ia matatau ia Ieova atoa uma le lalolagi; ia fefefe lava ia te ia o outou uma o e nonofo i le atu laulau.

E tu le pule a Ieova e oo i le faavavau; o mafaufauga a lona finagalo e a le tu a le tu lava.

Le fanau e, ina o mai ia, ina faalogologo mai ia ia te au; ou te a‘oa‘o atu ia te outou ia matatau ia Ieova.

Ona ou fai ane ai lea, Faauta, ou te alu atu; ua tusia a‘u i le tusi taai, Lo‘u Atua e, ou te fiafia e fai lou finagalo; o loo i totonu lava ia te au lau tulafono. Ua ou tala‘i le amiotonu i le faapotopotoga tele; faauta, ou te lei taofia lava o‘u laugutu, Ieova e, ua e silafia lava. Ou te lei natia lava i lo‘u loto lau amiotonu; ua ou ta‘uina atu lou faamaoni ma lau faaolataga; ou te lei faalilolilo lou alofa ma le mea moni mai ia te oe i le faapotopotoga tele.

A ua fetalai ane le Atua i le tagata amio leaga, Se a ea le mea ua e tautala ai i a‘u tulafono, ma e ta‘u la‘u feagaiga i lou gutu? O oe foi, ua e ‘ino‘ino i le aoaiga, ma ua e lafoaiina a‘u upu i ou tua.

Le Atua e, ia e faia se loto mamā mo a‘u; ma ia e faafouina se loto mau i totonu ia te au.

Na tŭlei mai le afioga a le Alii; e tele ‘au o e na tala‘iina.

Na latou le tausia le feagaiga a le Atua, na le mafafai foi ona latou savavali i lana tulafono;

A e lei faalogo mai lo‘u nuu i lo‘u leo; o Isaraelu foi e lei loto mai ia te au. Ona ou tuuina atu ai lea o i latou i o latou loto finau vale; na latou savavali i mea na latou filifili i ai. E! A na faalogo mai lo‘u nuu ia te au, ana savavali Isaraelu i o‘u ala; po ua ou vave faatoilaloina e ua ita ia te i latou, ma a‘u faaoo atu lo‘u lima i e ua fai i latou mo latou fili. Po ua faatagā vivii ia te i latou e ua ‘ino‘ino ia Ieova; a e faavavau o latou aso.

Ieova e, ia e faasino mai ia te au lou ala, ou te savali i le mea moni mai ia te oe; ia e faia ina ia tasi lo‘u loto e mata‘u i lou suafa.

O le Atua e tatau ona matautia tele i le faapotopotoga o le au paia; e tatau foi ona matautia o ia e i latou uma o e vagavagai ia te ia.

Ua na auina atu le pouliuli, i le ua faapouliuligia ai, e lei foua foi lana afioga.

auā na latou fouvale i afioga a le Atua, ma latou ‘ino‘ino i le pule a lē Silisili ese; o le mea lea na ia faamaulaloina ai o latou loto i le galuega mamafa; na pauu i latou, a e leai se fesoasoani.

Ua ia auina atu lana afioga, ma faamalolo ia i latou, ma laveaiina ai nai lo latou malaia.

O galuega a ona aao e moni ia ma le tonu; e faamaoni ana feau uma lava. E faatumauina ia mea e faavavau faavavau lava; ua faia i le faamaoni ma le tonu.

O le mata‘u ia Ieova, o le amataga lea o le poto; ua i ai le mafaufau lelei ia te i latou uma o e fai ia mea; e tumau lona viiga e faavavau lava.

Ia outou vivii atu ia Ioa. Amuia le tagata o lē mata‘u ia Ieova, o loo o fiafia tele i ana poloaiga.

O le faatuatua ia Ieova, e sili lea i le faalagolago i tagata. O le faatuatua ia Ieova, e sili lea i le faalagolago i alii.

Amuia e ua sao l o latou ala, o e savavali i le tulafono a Ieova.

Ona ou le mā lava lea, pe a a‘u manatu i au poloaiga uma.

E faapefea ea ona faamamāina e le taulealea o lona ala? Ona ua tausi i ai e tusa ma lau afioga.

Ua ou saili ia te oe ma lo‘u loto atoa; aua ne‘i ou sese i au poloaiga.

Ua ou teu i lo‘u loto lau afioga, ina ne‘i ou agasala ia te oe.

Ua ou ta‘u atu i o‘u laugutu o faamasinoga uma o lou fofoga.

Ia e faapupula mai o‘u mata, ia ou vaai lava i mea e ofo ai i lau tulafono.

Ua nutimomoia lo‘u loto i le manao tele i au faamasinoga i aso uma.

Ua e aoai atu i e faamaualuga, o e ua faafanoina, o e sese i au poloaiga.

Ia e faatea ese ia te au le ala o le pepelo; ma ia e foai mai lau tulafono ia te au i le alofa.

Ua ou filifili i le ala o le faamaoni; ua ou tuuina au faamasinoga i o‘u luma.

Ia e a‘oa‘o mai ia te au, ona ou anaana lea i lau tulafono, ma ou tausia ma lo‘u loto atoa.

Ona ou tausi lea e le aunoa lau tulafono e faavavau faavavau lava.

Ou te fiafia lava a‘u i au poloaiga, ua ou naunau i ai.

Ua maua a‘u e le tiga tele ona o e amio leaga, e ua lafoaiina lau tulafono.

Ua ou faatelevave, ou te lei faatelegese ona tausi i au poloaiga.

O le mea e lelei ai a‘u ina ua puapuagatia a‘u, ina ia a‘oa‘oina ai a‘u i au tulafono.

E sili ona lelei ia te au o le tulafono a lou fofoga i afe o auro ma ario.

Ieova e, ua mausali lau afioga i le lagi e faavavau lava.

Ua tele lava lo‘u naunau i lau tulafono; ou te mafaufau i ai i le aso atoa.

Ua matuā suamalie au afioga i lo‘u gutu; ua sili i lo le meli i lo‘u gutu.

O au feau ou te maua ai le lotomatala; o le mea lea ou te ‘ino‘ino ai i ala pepelo uma lava.

O lau afioga o le sulu lea i o‘u vae, ma le malamalama i lo‘u ala.

Ua uai atu lo‘u loto e fai au tulafono e faavavau faavavau lava.

O ese ia ia te au, outou o e amio leaga; auā ou te anaana lava i poloaiga a lo‘u Atua.

Ua e faaleaogaina i latou uma o e sese i au tulafono; auā o le pepelo lo latou faa‘ole‘ole.

Ua oo mai ona po e galue ai Ieova; ua solia e i latou lau tulafono.

O loo tafe ifo o vaitafe i o‘u mata, auā e le tausi e i latou lau tulafono.

Ua faaumatia a‘u i lo‘u maelega, ina ua galo i e saua mai ia te au au afioga.

E faatauvaa lava a‘u, ma inosia; a e le galo ia te au au feau.

O lau amiotonu o le amiotonu e faavavau lea; o le mea moni foi lau tulafono.

Ua muamua ona pupula o‘u mata i leoleoga i itupo, ina ia ou mafaufau i lau afioga.

E moni lava lau afioga talu le amataga; e faavavau foi au faamasinoga tonu uma lava.

Ua saua fua mai alii ia te au; a ua fefe lo‘u loto i au afioga.

Ou te fiafia a‘u i lau afioga, faapei o le ua maua le vete tele.

Ieova e, ou te naunau i lau faaolataga; o lau tulafono foi, o lo‘u lea fiafia.

Ou te ifo i lou malumalu paia, ou te vivii atu foi i lou suafa ona o lou alofa ma lou faamaoni; auā ua e faasilisili lau afioga i lou suafa uma.

O le mata‘u ia Ieova, o le amataga lea o le poto; a e ‘ino‘ino tagata valelea i le poto ma le a‘oa‘oina.

o outou e faigofie, tou te loto i le amio faigofie seia afea? ma e tauemu, latou te fiafia i le tauemuga seia afea? ma e valelea, latou te ‘ino‘ino i le poto seia afea?

Na latou ‘ino‘ino i le poto; ua latou le manao foi i le mata‘u ia Ieova; na latou le mafafai i la‘u pule; ua latou ‘ino‘ino i la‘u aoaiga uma lava; o le mea lava lea latou te aai ai i le fua o a latou amio; e maoona foi i latou i a latou togafiti.

e uai atu ai ou taliga i le poto, e faasaga atu ai lou loto i le faautauta; afai lava e te valaau atu i le atamai, ma e leo tele atu i le faautauta; afai e te sailiili ia te ia, e pei ona sailiili i le ario; afai e te suesue i ai, pei ona suesue i le oloa lilo; ona e lagona ai lea o le mata‘u ia Ieova, ma e maua ai le poto i le Atua.

Aua ne‘i te‘a ma oe le alofa ma le faamaoni, ia asoa ai i lou ua; ia e tusi ai i le papa o lou loto;

Ia e faatuatua ia Ieova ma lou loto atoa; a e aua le faalagolago i lou lava atamai.

Ia maua le poto, ia maua le atamai; aua ne‘i galo ia te oe nei mea; aua foi ne‘i e liliu ese i upu a lo‘u gutu. Aua e te lafoai ia te ia, ona tausia lea o oe e ia; ia e alofa ia te ia, ona leoleoina lea o oe e ia.

Lo‘u atalii e, ia e faalogo mai i a‘u upu; ia uai mai ou taliga i mea ou te fai atu ai; aua ne‘i te‘a ese ia mea i ou mata; ia e tausi i ai i totonu o lou loto;

Ia vaai sa‘o ou mata i ou luma; ma ou laumata, ia faasagatonu ia i ou luma. Ia mafaufau i le ala o ou vae; ona faatumauina ai lea o ou ala uma. Aua ne‘i afe i le itu taumatau po o le itu tauagavale; ia ‘alo ese ou vae i le leaga.

Auā o le poloaiga o le sulu lea; ma le upu e a‘oa‘o atu, o le malamalama lea; o aoaiga foi a‘oa‘oina ai, o le ala o le ola lea,

O le mata‘u ia Ieova, o le ‘ino‘ino lea i le leaga; o le faamaualuga, ma le loto fefete, ma le amio leaga, ma le gutu faapiopio, ou te ‘ino‘ino i ai.

Aua ne‘i aoai atu i lē tauemu, ne‘i inosia oe e ia; aoai atu i le ua poto, ona alofa mai lea o ia ia te oe.

O le mata‘u ia Ieova, o le amataga o le poto lea; ia iloa foi lē Paia, o le atamai lava lea.

O le mata‘u ia Ieova, o le puna o le ola lea, e ‘alo ese ai i mailei e oti ai.

Ia maua le poto, e sili ona lelei lea i le auro; ia maua foi le atamai, ia sili ona manaomia lea i le ario.

Aua e te tautala atu i taliga o le vale; auā e ‘ino‘ino o ia i le poto o au upu.

O le ua liliu ese ona taliga a e le faalogologo i le tulafono, e inosia lana lava tatalo.

O afioga uma a le Atua, ua se ario ua te‘a ma le otaota ia; o le talita lava o ia i e faatuatua ia te ia. Aua e te faaopoopo se upu i ana afioga; ne‘i aoai atu o ia ia te oe, ona ta‘upepeloina ai lea o oe.

Se‘i tatou faalogo ia i le iuga o ia mea uma, Ia e mata‘u i le Atua, ma e anaana i ana poloaiga; auā o mea ia e tatau i tagata uma.

O lenei, faapei ona ‘aina o tagutugutu saito i le mumū o le afi, e pei ona pauu foi le mutia magumagu ua mu, e faapea foi ona pala o latou aa, e pusa ae foi lo latou fuga e pei o le efuefu; auā ua latou lafoai le tulafono a Ieova o ‘au, ua latou ‘ino‘ino foi i le afioga a le Paia o Isaraelu.

Ona faapea mai ai lea o ia, Ina alu ia, ma ia e faapea atu i lena nuu, Ia outou matuā faalogo lava, a e tou te le lagona; ia outou matuā vaai foi, a e tou te le iloa.

Ina saili ia i le tulafono ma le mau; afai latou te le tautala e tusa ma ia upu, ua leai lava se malamalama ia te i latou.

O lenei, alu ia ma tusi lenei mea i se papa i o latou luma, ia tusi ai foi i se tusi, ina ia tumau i aso amuli e faavavau faavavau lava; auā o le nuu fouvale lenei, o le fanau pepelo, o le fanau e le mafafai ona faalogo i le tulafono a Ieova; o e fai atu i tagata vaai, Aua tou te vaai; latou te fai atu foi i perofeta, Aua tou te faaali mai ia te i matou mea tonu; ina fai mai ia ia te i matou upu malie, ina faaali mai ia mea pepelo; ‘alo ese ia outou i le ala; ina o ese ia i le ala; ina faateaeseina ia le Paia o Isaraelu i o matou luma. O le mea lea ua faapea ona fetalai mai ai o le Paia o Isaraelu, Ua outou teena lenei upu, ma ua outou faatuatua i le faasaua, ma le faapiopio, ma ua faalagolago i ai. O le mea lea e avea ai lenei amio leaga ia te outou e pei o se mea ua sofaia o le a paū, ua oso mai i le pa maualuga, o lona solo e faafuasei mai, ua se emo lava.

E magumagu le mutia, e toulu le fuga; a o le afioga a lo tatou Atua, e tumau lea e faavavau.

O ai ea ua talitonu i la matou upu e taulogologo atu; ua faaalia ia te ai le aao o Ieova?

Auā o o‘u manatu e le o outou manatu, o o‘u ala e le o outou ala, ua fetalai mai ai Ieova. Auā e pei ona sili ona maualuga o le lagi i le lalolagi, ua faapea ona sili ona maualuga o o‘u ala i o outou ala, ma o‘u manatu e sili i o outou manatu.

e faapea foi la‘u upu e alu atu ai lo‘u gutu, e le foi mai fua ia te au; a e peitai e faia le mea ou te loto i ai, e manuia foi i le mea ou te auina atu ai.

A ē alaga, ia laveai āu aofaga ia te oe; e siitia i latou uma e le matagi, e avea i le mānava; a o le ua faatuatua ia te au e maua e ia le nuu e fai mona tofi lo‘u mauga paia.

A o a‘u, o la‘u feagaiga lenei e faia ma i latou, ua fetalai mai ai Ieova, O lo‘u Agaga o loo i luga ia te oe, ma a‘u upu ua ou tuuina atu ai i lou gutu, e le te‘a ese ia i lou gutu ma gutu o lau fanau, ma gutu o le fanau a lau fanau, e afua mai i na ona aso, a e oo i le faavavau, ua fetalai mai ai Ieova.

Na faia ia mea uma e o‘u lima; sa i ai lava ia mea uma, ua fetalai mai ai Ieova; a o lenei le tagata ou te vaai i ai, o e ua faamaulalo ma le loto tiga, o le ua gatete foi i la‘u upu.

O a‘u foi, ou te filifili i mea latou te tiga ai, ou te faaoo foi ia te i latou o mea latou te fefefe ai; auā na ou valaau, a ua leai se na tali mai; na ou fai atu, a ua latou le faalogo mai; ua latou faia le mea leaga i o‘u luma, ua latou filifilia foi le mea ou te le fiafia i ai. Faalogo mai ia i le upu a Ieova, outou o e gatete i lana upu, O outou uso, o e ‘ino‘ino ia te outou, ma tutuli ia te outou ona o lo‘u igoa, ua latou fai ane, Ia viia Ieova; matou te vaaia foi lo outou olioli, a e mamā lava i latou.

Ieova e, e le silasila ea ou fofoga i le ua faamaoni? Ua e sasaina i latou, a ua le tiga i latou; ua e faaumatia i latou, a ua latou le mafafai ona talia o le aoaiga; ua latou faamaaa o latou mata e sili i le papa, ua latou le mafafai ona toe foi mai. Ona ou fai ane ai lea, Ai lava o tagata lautele i latou, e valelea i latou; auā latou te le iloa le ala o Ieova, ma le faamasinoga a lo latou Atua.

Le lalolagi e, ina faalogologo mai ia, faauta, o a‘u nei ou te faaooina atu le malaia i lenei nuu, o le fua o latou lava mafaufauga, auā ua latou le faalogo i a‘u upu; o la‘u tulafono foi ua latou lafoaiina lea.

A o le mea lava lenei na ou poloai atu ai ia te i latou, ua faapea atu, Ia outou faalogo mai i lo‘u leo, ona fai ai lea o a‘u mo outou Atua, e fai foi outou mo‘u nuu; ma ia outou savavali i le ala uma na ou poloai atu ai ia te outou, ina ia manuia ai outou. A ua latou le faalogo mai, ma ua le uai mai o latou taliga, a ua latou savavali i mafaufauga ma le finau vale o latou loto leaga, ua latou tuumuli i tua, a ua le savavali i luma.

Ua faamāina ē popoto, ua matatau i latou, ma ua maua; faauta, ua latou lafoai le afioga a Ieova; se a foi se poto ua ia te i latou?

A e afai tou te le faalogo mai, ona tagi ai lea o lo‘u loto i mea lilo ona o lo outou faamaualuga, ma ou matuā tagi lava, e tafe ifo liomata i o‘u mata, auā ua tāfea le lafu mamoe a Ieova.

Na maua au afioga, ona ou ‘ai ai lea; sa ia te au lau afioga e fai ma mea e olioli ai ma fiafia ai lo‘u loto; auā ua ta‘ua a‘u i lou suafa, Ieova e, le Atua o ‘au.

O loo faapea ona fetalai mai o Ieova, Ia malaia le tagata e faatuatua i tagata, ma ua fai tagata mona lima a ua liliu ese lona loto ia Ieova.

A ua latou le faalogo mai, ma ua le uai mai o latou taliga, a ua latou faamaaa o latou ua, ina ia latou le faalogo mai, ma ia le talia mai le aoaiga.

Ua faapea ona fetalai mai o Ieova o ‘au, le Atua o Isaraelu, Faauta, ou te faaoo mai i lenei aai, ma ona faoa aai uma le malaia uma na ou fai atu ai; auā ua latou faamaaa o latou ua, ina ia latou le faalogologo ai i a‘u upu.

O loo faapea ona fetalai mai o Ieova o ‘au, Aua tou te faalogologo i upu a perofeta o e vavalo ia te outou; ua latou faasese ia te outou e fai mea faatauvaa; ua latou tautala atu i le faaaliga mai o latou lava loto, a e le mai le fofoga o Ieova.

E le pei o le afi ea la‘u upu? o loo fetalai mai ai Ieova; e le pei o le samala foi e tu‘imomoia ai le papa?

Ua aauina atu ia te outou e Ieova o ana auauna uma, o perofeta, ua ala aauina atu lava i latou;; a ua outou le faalogo mai, ma ua le uai mai o outou taliga e faalogologo mai ai.

E te fai atu foi ia te i latou, O loo faapea ona fetalai mai o Ieova, Afai tou te le faalogo mai ia te au, ma le savavali e tusa ma la‘u tulafono ua ou tuuina i o outou luma, e le faalogo i upu a a‘u auauna le au perofeta, na aauina e a‘u ia te outou; na ou ala aauina i latou, a ua outou le faalogo mai; ona ou faia lea o lenei fale ia pei o Sailo, ou te faia foi lenei aai ma faafanoga i atu nuu uma o le lalolagi.

O lenei, ia outou sauni lelei o outou ala ma a outou amioga, ma ia outou faalogo i le suifofoga o Ieova lo outou Atua; ona salamo ai lea o Ieova i le malaia na ia fetalaia mai e oo ia te outou.

Auā o loo faapea ona fetalai mai o Ieova o ‘au, le Atua o Isaraelu, Aua ne‘i faaseseina outou e o outou perofeta ua ia te outou, ma o outou taulāitu; aua foi ne‘i faalogo i miti, ua faia talu outou; auā ua latou vavalo i le pepelo ia te outou i lo‘u igoa; ou te lei aauina atu i latou, o loo fetalai mai ai Ieova.

O loo fetalai mai Ieova, Faauta, e oo i ona aso ou te osia ai le feagaiga fou ma le aiga o Isaraelu, ma le aiga o Iuta. E le pei o le feagaiga na ou osia ma o latou tamā i le aso na ou tago ai i o latou lima e aumaia ai i latou mai le nuu o Aikupito; o la‘u feagaiga lea na latou solia, o a‘u foi na ou ‘ino‘ino ai ia te i latou, ua fetalai mai ai Ieova; a o lenei le feagaiga ou te osia ma le aiga o Isaraelu, pe a mavae ia aso, o loo fetalai mai ai Ieova, ou te tuuina la‘u tulafono i totonu ia te i latou, ma ou tusi ai i o latou loto; e fai foi a‘u mo latou Atua, o i latou foi e fai mo‘u nuu. E le toe a‘oa‘o atu foi le tagata i lē la te tuaoi, ma le tagata i lona uso, e faapea atu, Ia outou iloa Ieova; auā e iloa a‘u e i latou uma lava, o tagata nuu atoa ma alii, o loo fetalai mai ai Ieova; auā ou te faamagalo i a latou amio leaga, ma ou le toe manatua a latou agasala.

A ua outou fai mai, E le tusa le ala o le Alii. Ina faalogologo mai ia, le aiga o Isaraelu e, E le tusa ea lo‘u ala? E le ua le tutusa ea o outou ala?

Latou te a‘oa‘o foi i lo‘u nuu ia masino mea paia ma mea e le paia, ina ia latou iloa le mea e le mamā ma le mea e mamā.

Ua faaumatia lo‘u nuu ina ua leai se poto; o oe foi na e tetee atu i le poto, o le mea lea ou te tetee atu ai ia te oe, e le fai oe ma ositaulaga ia te au; ua e faagalogalo le tulafono a lou Atua, o a‘u foi, ou te faagalogalo i lau fanau.

O i talofa ia te i latou! auā ua sosola ese i latou ia te au; ia malaia i latou! auā ua latou fouvale ia te au; na ou togiola foi ia te i latou, a ua latou tala pepelo ia leaga ai a‘u.

O loo faapea mai le Alii o Ieova, Faauta, e oo mai aso ou te tuuina atu ai le oge i le nuu; e le se oge i mea e ‘ai, po o se gālala i le fia inu vai, a o le oge i le faalogologo i afioga a Ieova.

A ua latou le mafafai ona uai mai o latou taliga, ma ua liu tua mai i latou ma le finau vale; ma o latou taliga ua faatulituli ia ina ia latou le faalogo. Ua latou faia foi o latou loto ma samira, ina ia le faalogo i latou i le tulafono ma afioga na auina mai ai e Ieova o ‘au e lona Agaga i perofeta anamua; o lea na tele ai le toasa mai ia Ieova o ‘au. O lenei, e pei ona valaau o ia, a e lei faalogologo mai i latou; e faapea foi ona valaau o i latou, a e ou te lei faalogo i ai, ua fetalai mai ai Ieova o ‘au.

Ona tali atu ai lea o ia, ua faapea atu, Ua tusia, E le na o mea e ‘ai e ola ai le tagata, a o afioga uma e tūlei mai i le fofoga o le Atua.

Aua ne‘i outou manatu ua ou sau e tatalaina le tulafono po o le au perofeta; ou te lei sau e tatalaina, a ia faataunuuina. Auā e moni, ou te fai atu ia te outou, e mavae atu le lagi ma le lalolagi, a e le mavae atu lava se iota po o sina fāsi mataitusi o le tulafono, seia taunuu mea uma. O lenei, o se na te tatalaina se poloaiga e tasi e aupito itiiti o nei poloaiga, ma faapea ona a‘oa‘o i tagata, e ta‘ua ia e aupito itiiti i le malo o le lagi; a o se anaana ma a‘oa‘o ai, e ta‘ua ia e sili i le malo o le lagi.

E leai se na te mafaia ona auauna i alii e toalua; auā e ‘ino‘ino o ia i le tasi, a e alofa atu i le tasi; a le o lea, e faapipii atu ia i le tasi, a e faaleaoga i le tasi. Tou te le mafaia ona auauna i le Atua atoa ma mamone.

Ia outou ulu atu i le faitotoa va apiapi; auā e va tele le faitotoa, e lautele foi le ala e tau atu i le malaia, e toatele foi i latou o e ui atu ai. Auā e va apiapi le faitotoa, e lauitiiti foi le ala e tau atu i le ola, e toaitiiti foi i latou o e maua.

E le sao atu i le malo o le lagi i latou uma o e fai mai ia te au, Le Alii e, le Alii e; na o le na te faia le finagalo o lo‘u Tamā o i le lagi. E toatele latou te fai mai ia te au i lea aso, Le Alii e, le Alii e, matou te lei perofeta ane ea i lou igoa, o lou igoa foi na matou tulia ai temoni, o lou igoa foi na matou fai ai vavega e tele? Ona ou ta‘utino atu ai lea ia te i latou, Ou te lei iloa lava outou; ina o ese ia outou ia te au, o outou o e fai amio leaga.

O lenei, ai se faalogo i a‘u upu nei, ma faia e ia, ou te faatusaina o ia i le tagata poto, ua na faia lona fale i luga o le papa; ona to mai lea o uaga, ua oo mai foi tafega, ua agi mai foi o matagi, ua pesi mai i lea fale, a e lei paū lava ia; auā ua faavaeina i luga o le papa. Ai se faalogo foi i a‘u upu nei, a e le faia, e faatusaina o ia i le tagata valea, na na faia lona fale i luga o le oneone; ona to mai lea o uaga, ua oo mai foi tafega, ua agi mai foi o matagi, ua pesi mai i lea fale, ona paū ai lea, ua nutipalaina lava.

Ai se le talia outou, pe le faalogo i a outou upu, a outou o atu nai lea fale po o lea aai, ia outou tūtū atu le eleele nai o outou vae. E moni, ou te fai atu ia te outou, O le aso faamasino e feoloolo ai Sotoma ma Komoro i lea lava aai.

O lenei, ai se na te ta‘uta‘u a‘u i luma o tagata, o a‘u foi ou te ta‘uta‘uina o ia i luma o lo‘u Tamā o i le lagi. Ai se faafiti foi ia te au i luma o tagata, ou te faafitia foi o ia i luma o lo‘u Tamā o i le lagi.

O le ua tele lona alofa i lona tamā po o lona tinā, a e itiiti ia te au, e le aoga lea ia te au; o le ua tele foi lona alofa i lona atalii po o lona afafine, a e itiiti ia te au, e le aoga foi lea ia te au. O se le ave lona satauro, ma le lē mulimuli mai ia te au, e le aoga foi lea ia te au. O lē maua lona ola, e māumau ai ia te ia; a o le faamāumau i lona ola ona o a‘u, e maua e ia. O lē talia outou, ua talia e ia o a‘u; o lē talia foi a‘u, ua talia e ia o le na auina mai a‘u.

Ona tali atu ai lea o ia, ua faapea atu ia te i latou, Ua foaiina atu ia te outou ia outou iloa mea lilo a le malo o le lagi, a ua le foaiina atu ia te i latou.

O le mea lea ou te tautala atu ai ia te i latou i faataoto, auā o lo latou vaai latou te le vaai ai, o lo latou faalogo foi, latou te le faalogo ai, pe lagona. Ua taunuu ai ia te i latou le valoaga a Isaia, ua faapea mai, E faalogo lava outou, a e tou te le lagona; e matuā vaavaai foi outou, a e tou te le iloa. Auā ua mafiafia loto o lenei nuu, ma ua faalogo gata o latou taliga i faalogo, ua moeiini foi o latou mata; ne‘i vaai o latou mata, ma faalogo o latou taliga, ma lagona o latou loto ma liliuina i latou, ma ou faamaloloina i latou. Amuia o outou mata, auā ua vaavaai; ma o outou taliga, auā ua faalogo; auā e moni, ou te fai atu ia te outou, E toatele perofeta ma tagata amiotonu sa naunau i le fia iloa o mea ua outou vaai i ai, a e lei iloa; na latou fia faalogo foi i mea ua outou faalogo i ai, a e lei faalogo ai lava. O lenei, ina faalogologo mai ia outou i le faataoto i le tagata lulu saito. A faalogo se tasi i le upu o le malo, a e le lagona, ona alu ane ai lea o le ua leaga, ua fao le mea sa luluina i lona loto; o le mea lea sa luluina i le auala. A o le mea sa luluina i le mea papa, o le tagata lea ua faalogo i le upu, ona talia loa lea ma le fiafia; a ua leai ni aa ia te ia, ua faaletumau ia; auā pe a tupu le puapuaga, po o le sauaga ona o le upu, ona tausuai loa lea o ia. O le mea sa luluina i le vao tuitui, o ia lea ua faalogo i le upu, a o le loto popole i mea a lenei lalolagi, ma le pepelo o le oa ua fetinaiina ai le upu, ona le fua mai lava lea. A o le mea sa luluina i le eleele lelei, o ia lea ua faalogo i le upu, ma lagona ai; ua fua mai lava ia, e taiselau i nisi, e taiono gafulu i nisi, e taitolugafulu foi i nisi.

A ua tali atu ia, ua faapea atu, O laau uma e lei totōina e lo‘u Tamā o i le lagi, e liaiina ia.

Ona tali atu ai lea o Iesu, ua faapea atu ia te i latou, Ua outou sese lava, ina ua outou le iloa upu o Tusi, ma le mana o le Atua.

Ona fetalai atu ai lea o Iesu ia te ia, E te alofa atu i le Alii lou Atua ma lou loto atoa, ma lou agaga atoa, ma lou manatu atoa. O le poloaiga muamua lena ma le sili. E faapena foi lona lua, E te alofa atu i lē lua te tuaoi, ia pei o oe lava ia te oe. O nā poloaiga e lua ua autu ai le tulafono uma ma le au perofeta.

E tala‘iina atu foi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.

E mavae atu le lagi ma le lalolagi, a o a‘u upu e le mavae atu lava ia.

Ona maliu ane ai lea o Iesu, ua fetalai atu ia te i latou, ua faapea atu, Ua tuuina mai ia te au le pule uma lava i le lagi ma le lalolagi.

Ua tuuina atu Ioane i le fale puipui, ona maliu atu lea o Iesu i Kalilaia, ua tala‘i atu ai le tala lelei i le malo o le Atua, ua faapea atu, Ua oo mai ona po, ua latalata mai le malo o le Atua; ina salamo ia, ma talitonu i le tala lelei.

Ona fetalai atu lea o ia ia te i latou, Ua foaiina atu ia te outou ina ia outou iloa mea lilo a le malo o le Atua; a o i latou o i tua, ua fai atu mea uma ia te i latou i faataoto; ina ia latou le iloa i lo latou matuā vaai; ina ia latou le lagona foi i lo latou matuā faalogologo; ina ne‘i liliuina i latou, ma faamagaloina a latou agasala. Ua ia fetalai atu foi ia te i latou, Tou te le iloa ea lenei faataoto? Pe faapefea foi ona outou iloa o faataoto uma? O lē lulu saito, e lulu ia i le upu. O i latou ia i le auala e luluina ai le upu; a latou faalogo ai, ona alu ane loa lea o Satani, ma aveeseina le upu na luluina i o latou loto. E faapea foi i latou na luluina i le mea papa, o i latou ia ua faalogo i le upu, ona talia loa lea ma le fiafia. A e peitai ua leai ni o latou aa, ua faaletumau i latou; pe a tupu le puapuaga, po o le saua ona o le upu, ona latou tausuai loa lea. O i latou foi sa luluina i le vao tuitui, o i latou ia e na faalogo i le upu, a o le loto popole i mea a lenei lalolagi, ma le pepelo o le oa, ma le tu‘inanau i nisi mea, ua oo atu i totonu o le loto, ua fetinaiina ai le upu, ona le fua mai lava lea. A o i latou na luluina i le eleele lelei, o i latou ia e ua faalogo i le upu, ma latou talia, ma fua mai e taitolugafulu i nisi, e taiono sefulu i nisi, e taiselau foi i nisi.

A o Iesu ua faafofoga i le tala ua ta‘uina mai ai, ona fetalai atu loa lea o ia i le ua pule i le sunako, Aua e te mata‘u; tau lava ina e faatuatua.

ua outou faaleaogaina ai le afioga a le Atua i a outou uputuu, ua outou tuuina mai. O isi foi mea faapena e tele ua outou faia.

Ona valaau atu lea o ia i le motu o tagata, atoa ma ona soo, ua fetalai atu ia te i latou, Ai se fia mulimuli mai ia te au, aua ne‘i usiusitai o ia ia te ia, a ia ave e ia lona satauro, i le mulimuli mai ai ia te au. Auā ai se fia faasaogalemuina lona ola, e māumau ai ia te ia; a o lē faamāumau lona ola ona o a‘u ma le tala lelei, e faasaoina e ia. Auā se a le aoga i le tagata, pe afai na te maua le lalolagi uma, a e māumau lona ola? se a foi se mea e avatu e le tagata e togiola a‘i lona ola? Auā ai sē mā ia te au, ma a‘u upu i lenei tupulaga mulilulua ma le agasala, e mā foi le Atalii o le tagata ia te ia, pe a sau o ia faatasi ma ana agelu paia i le mamalu o lona Tamā.

Ona tali atu lea o Iesu ia te i latou, ua faapea atu, E le o lenei ea ua outou sese ai, ina ua outou le iloa upu o Tusi, ma le mana o le Atua?

Ia muai tala‘iina foi le tala lelei i nuu uma lava e ao ai.

E mavae atu le lagi ma le lalolagi; a e peitai a‘u upu, e le mavae lava ia.

Ua fetalai atu foi o ia ia te i latou, O atu ia outou i le lalolagi uma, ina tala‘i atu ai le tala lenei i tagata uma lava. O lē faatuatua ma papatisoina, e faaolaina ia; a o le lē faatuatua, e faasalaina ia.

Ona latou o atu lea, ma tala‘i atu i mea uma; ua galue faatasi le Alii ma i latou, ma ua faamaonia le upu i faailoga ua mulimuli ane ai. Amene.

(e tū‘ia foi lou lava loto ia ati i le pelu), ina ia faaalia mai ai manatu o loto i tagata e toatele.

Ona tali atu lea o Iesu ia te ia, ua faapea atu, Ua tusia, E le na o mea e ‘ai e ola ai le tagata, a o afioga uma a le Atua.

Ua matuā ofo i latou i lana mataupu; auā o lana fetalaiga ua i ai le pule.

Se a ea le mea e ta‘ua ai a‘u e outou, Le Alii e, le Alii e, a e tou te le faia mea ou te fai atu ai? O sē sau ia te au ma faalogo i a‘u upu, ma faia e ia, ou te faailoa atu ia te outou le ua tusa i ai o ia. E tusa ia ma le tagata ua fai lona fale, ua ia eli maulalo, ua tuu le faavae i luga o le papa; ona sau ai lea o le tafe, ua fafati mai le vaitafe i lea fale, ua le magaoioi ai lava; auā ua faavaeina i luga o le papa. A o lē faalogo, a e le faia, e tusa ia ma le tagata ua fai lona fale i luga o le eleele, e leai sona faavae; ua fafati mai i ai le vaitafe, ona paū loa lea, ona matuā nutipalaina lea o lea fale.

Ona fetalai atu lea o ia, Ua foaiina atu ia te outou ina ia outou iloa mea lilo a le malo o le Atua; a ua fai atu i nisi i faataoto; ina ia latou le vaai i lo latou vaai, ina ia le lagona foi i lo latou faalogo. O le faataoto lenei, O le saito, o le afioga lea a le Atua. O e i le auala, o e faalogo ia; ona alu ane ai lea o le tiapolo, ma aveeseina le upu nai o latou loto, ne‘i faatuatua ma faaolaina i latou. O e i le mea papa, o i latou ia, pe a faalogo i le upu, ua talia ma le fiafia; a e leai ni o latou aa, ua faaletumau lo latou faatuatua, ua oo atu i aso e faaosoosoina ai, ona o ese ai lea. O le mea na paū i le vao tuitui, o i latou ia e ua faalogo, ua o atu ai, ona fetinaiina ai lea i mea e popole ai, ma oloa, ma mea faafiafia o le olaga nei, ona le oo lea ina matua o latou fua. Peitai o le mea na i le eleele lelei, o i latou ia e ua faalogo i le upu, ma tausi i ai i le loto ua faamaoni ma le lelei, ona fua mai ai lea ma le onosai.

Ua tali atu ia, ua faapea atu ia te i latou, O e faalogo i le afioga a le Atua, ma latou faia, o lo‘u tinā ma o‘u uso lava ia.

Ua fetalai atu ia i tagata uma, A fia mulimuli mai se tasi ia te au, aua le usiusitai o ia ia te ia, a ia ave e ia lona satauro i aso fai soo, i le mulimuli mai ai ia te au. Auā ai sē fia faasaogalemuina lona ola, e māumau ai ia te ia; a o lē faamāumau i lona ola ona o a‘u, e faasaoina e ia. Auā se a le aoga i le tagata pe afai na te maua le lalolagi uma, a e faamāumau e ia ia ia, pe lafoaiina? Auā ai se mā ia te au ma a‘u upu, e mā foi ia te ia le Atalii o le tagata, pe a sau o ia i lona mamalu, ma lo le tamā, ma le au agelu paia.

Ua fetalai atu ia i le tasi, Ina mulimuli mai ia ia te au. A ua fai mai o ia, Le Alii e, tuu mai ia ia te au, se‘i ou alu e muai tanu i lo‘u tamā. A ua fetalai atu Iesu ia te ia, Ina tuu pea ia i e ua oti e tanu i o latou tagata oti; a o oe, e te alu ma tala‘i atu le malo o le Atua. Ua fai mai foi le tasi, Le Alii e, ou te mulimuli atu ia te oe; a ia tuu mai ia te au, se‘i ou muai faamavae i lo‘u aiga. Ua fetalai atu Iesu ia te ia, O lē tago lona lima i le suotosina, ma tepa i tua, e le tatau ia i le malo o le Atua.

A ua fetalai atu ia, E moni, a e sili ona manuia o e faalogo i le afioga a le Atua, ma tausi i ai.

Ua fai mai le tasi ia te ia, Le Alii e, e toaitiiti ea e faaolaina? Ona fetalai atu lea o ia ia te i latou, Ia outou finafinau ina ia ulu atu i le faitotoa va apiapi; auā ou te fai atu ia te outou, e toatele latou te saili ina ia ulu atu, a e le mafai lava.

Afai e sau se tasi ia te au, a e le ‘ino‘ino i lona tamā, ma le tinā, ma le avā, ma le fanau, ma uso, ma tuafāfine e oo lava i lona ola, e le mafai ona fai o ia mo‘u soo. O se le ave lona satauro, ma ua le mulimuli mai ia te au, e le mafai ona fai o ia mo‘u soo.

O le tulafono ma le au perofeta na oo lava ia ia Ioane; talu ai ia ona po ua folafolaina le tala lelei o le malo o le Atua, ua taufaoa foi e tagata uma. E mavaegofie atu le lagi ma le lalolagi, a e le iuvale sina fāsi mataitusi e tasi o le tulafono.

Ua fai ane Aperaamo ia te ia, O ia te i latou Mose ma le au perofeta, ia latou faalogo i ai. A ua faapea atu ia, Lo‘u tamā e, Aperaamo, aua; a e afai e alu atu se tasi ia te i latou nai e ua oti, e salamo ai i latou. Ua fai ane o ia ia te ia, Pe afai latou te le faalogo ia Mose ma le au perofeta, e ui lava ina tu mai se tasi nai e ua oti, latou te le mafafai lava.

E mavae atu lava le lagi atoa ma le lalolagi; peitai o a‘u upu, e le mavae atu lava ia.

Ona fetalai atu lea o ia ia te i laua, O tagata valea, ma loto faigata ona talitonu i mea uma ua fai mai ai e le au perofeta.

Ona faamatala ai lea e ia ia te i laua o mea ua tusia ia te ia i Tusi uma, ua amata mai ia Mose atoa ma le au perofeta uma.

Ua fetalai atu ia ia te i latou, O upu ia na ou fai atu ai ia te outou, ina o ou ia te outou; e tatau ona taunuu o mea uma ua tusia ia te au i le tulafono a Mose, ma le au perofeta, ma salāmo. Ona tatalaina lea o ia o latou loto, ina ia latou lagona ai Tusi.

Sa i le amataga, le Lokou, sa i le Atua le Lokou, o le Atua foi le Lokou.

Auā na tuuina mai e Mose le tulafono, a o le alofa tunoa ma le mea moni, mai ia Iesu Keriso ia.

Na tu mai o ia nai e ua oti ona manatu ai lea o ona soo ua na fetalai mai lenei upu ia te i latou; ona latou talitonu lea i le Tusi, ma le fetalaiga a Iesu ua ia fetalai mai ai.

Afai ua ou fai atu ia te outou i mea o i le lalolagi, a e le talitonu mai outou, pe faapefea ona outou talitonu pe a a‘u fai atu ia te outou i mea o i le lagi?

Auā ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau. Auā e lei auina mai e le Atua lona Atalii i le lalolagi ina ia faasala i le lalolagi, a ia faaolaina le lalolagi ia te ia. O lē faatuatua ia te ia, e le faasalalaina o ia; a o le lē faatuatua, ua nofosala nei lava o ia, auā e lei faatuatua lava ia i le igoa o le Atalii e toatasi o le Atua.

Auā o le ua auina mai e le Atua, ua fetalai lava ia i le afioga a le Atua; auā e le foai faatatauina le Agaga e le Atua ia te ia.

O lē faatuatua i le Alo, ua ia te ia le ola e faavavau; a o le le faatuatua i le Alo e le iloa e ia le ola, a o le toasa o le Atua o loo tumau lava i ona luga.

O le Atua o le agaga lava ia; o e tapuai ia te ia, e tatau ona tapuai atu ai i le agaga ma le faamaoni.

E moni, e moni, ou te fai atu ia te outou, o lē faalogo mai i la‘u upu, ma talitonu ia te ia na na auina mai a‘u, ua ia te ia le ola e faavavau: e le oo foi ina faasalaina o ia, a ua oo atu ia i le ola, sa i le oti, E moni, e moni, ou te fai atu ia te outou, e oo i le aso, ua oo nei foi i ai, e faalogo mai ai e ua oti i le leo o le Atalii o le Atua; o e faalogo ai foi, e ola ai i latou.

E le tumau foi lana afioga i totonu ia te outou; auā o le ua ia auina mai, tou te le talitonu i ai. E suesue outou i Tusi, auā ua outou manatu tou te maua ai le ola e faavavau; o Tusi foi ia o loo molimau ia te au;

O le agaga lea e tupu ai le ola, e le aoga le tino i se mea; o upu ou te fai atu ia te outou, o le agaga ia, o le ola foi ia.

O lea ua ou fai atu ai ia te outou. E oti outou i a outou agasala; auā a outou le talitonu, o a‘u lenei o ia, ona oti lea o outou i a outou agasala.

Ona fetalai atu lea o Iesu ia Iutaia, e ua talitonu ia te ia. Afai tou te tumau pea i la‘u mataupu, o o‘u soo moni outou. E iloa foi e outou le mea moai, e tuu sa‘oloto foi outou e le upu moni.

Se a le mea e le lagona ai e outou la‘u nei upu? auā tou te le mafaia ona faalogo i la‘u mataupu. O outou nai lo outou tamā le tiapolo, tou te fia faia foi mea e tu‘inanau i ai lo outou tamā. O le fasioti tagata ia talu le amataga, e lei tumau lava ia i le upu moni, auā e le o i totonu lava ia te ia le upu moni; a tautala ia i le tala pepelo, o lana lava lea e tautala a‘i, auā o le pepelo ia, ma le tamā o le pepelo. A o a‘u nei, tou te le talitonu mai ia te au, auā ou te fai atu le upu moni. O ai ea so outou na te faailoa mai sa‘u agasala? Afai foi ou te tautala i le mea moni, pe se a le mea tou te le talitonu mai ai ia te au? O lē mai le Atua, e faalogo ia i afioga a le Atua; o le mea lea tou te le faalogo ai, auā e le mai le Atua outou.

E moni, e moni, ou te fai atu ia te outou; ai se tausi i la‘u upu, e le iloa e ia le oti, e oo i le faavavau.

A ua outou le talitonu mai lava outou; auā e le ni a‘u mamoe outou, pei ona a‘u fai atu ia te outou. O a‘u mamoe e faalogo mai i latou i lo‘u leo, ua ou iloa foi i latou, ua latou mulimuli mai foi ia te au;

Afai na ta‘ua e ia o atua i latou e ua i ai le afioga a le Atua, e le mafai foi ona faaleaogaina le Tusi;

O lē faapelepele i lona ola, e faamāumau e ia i ai; a o lē ‘ino‘ino i lona ola i lenei lalolagi, e leoleo ai e ia e oo i le ola faavavau. A fia auauna mai se tasi ia te au, ia mulimuli mai o ia ia te au; o le mea ou te i ai a‘u, e i ai foi la‘u auauna; pe a auauna mai foi se tasi ia te au, ona viia lea o ia e le Tamā.

Ua ia faia faailoga e tele lava i o latou luma, a e lei talitonu i latou ia te ia, ina ia taunuu ai le upu a Isaia le perofeta, ua ia faapea mai, Le Alii e, o ai ea ua talitonu i la matou upu e taulogologo atu? ua faaalia foi ia te ai le aao o le Alii? O lenei, e le mafai e i latou ona talitonu, auā ua toe faapea mai Isaia, Ua ia faatauasoina o latou mata, ma na faamaaaina o latou loto, ne‘i vaai o latou mata, ma lagona o latou loto, ne‘i liliuina foi i latou, ma a‘u faamaloloina i latou. Na fai mai ia upu e Isaia ina ua vaai atu o ia i lona mamalu, ma tautala mai ia te ia. A e peitai e toatele alii ua talitonu ia te ia; a e le‘i ta‘u atu ai, ona o le au faresaio, ne‘i tulia i latou i le sunako. Auā ua sili lo latou manao i le viiga mai tagata, i le viiga mai le Atua.

O lē faaleaoga ia te au, ma ua le talia a‘u upu, o ia te ia le tasi na te faasalaina ia; o le upu ua ou tautala atu ai, e faasala lea ia te ia i le aso gataaga.

Auā ou te le tautala fua na o a‘u; a o le Tamā ua auina mai a‘u, na ia tuu mai le poloaiga ia te au i mea ou te fai atu ai, ma mea ou te tautala atu ai. Ua ou iloa foi o lana poloaiga o le ola faavavau lea. O lenei, o mea ou te tautala atu ai, faapei ona fetalai mai ai le Tamā ia te au, e faapea ona ou tautala atu ai.

Ua fetalai atu Iesu ia te ia. O a‘u nei le ala, ma le upu moni, ma le ola; e le alu atu lava se tasi i le Tamā, pe a le ui mai ia te au.

Afai tou te alofa mai ia te au, ia outou tausi mai i a‘u poloaiga.

O le ua ia te ia a‘u poloaiga ma tausi i ai, o ia lea e alofa mai ia te au; o lē alofa mai foi ia te au, e alofaina o ia e lo‘u Tamā; ou te alofa foi ia te ia, ma ou faaali ia te ia.

Ona tali atu lea o Iesu, ua faapea atu ia te ia, Afai e alofa mai se tasi ia te au, e tausia e ia la‘u upu; e alofa foi lo‘u Tamā ia te ia; e o mai foi i maua ia te ia, matou te nonofo ma ia. O le le alofa ia te au, e le tausia e ia a‘u upu; o le upu foi tou te faalogologo i ai, e le sa‘u lea, a o le upu a le Tamā ua auina mai a‘u.

Afai tou te tumau ia te au, a tumau foi a‘u upu ia te outou, o mea uma lava tou mananao i ai, tou te ole atu ai, ona faia lea mo outou.

A e a maliu mai o ia, o le Agaga lea e tupu mai ai le upu moni, e ta‘ita‘i e ia ia te outou i upu moni uma; auā e le tautala fua ia na o ia, a o mea uma e faalogo i ai o ia, e tautala a‘i lava, ma faailoa mai ia te outou mea e oo mai.

Ua ou tuu atu lau afioga ia te i latou; ua ‘ino‘ino foi le lalolagi ia te i latou, auā e le ni o le lalolagi i latou, faapei o a‘u, ou te le so le lalolagi a‘u.

Ia e faapaiaina i latou i lau upu moni; o lau afioga o le upu moni lea.

Ona fai mai lea o Pilato ia te ia, O lena foi, e te se tupu ea oe? Ua tali atu Iesu, O lea lava, o a‘u o le Tupu. O le mea lenei na fanau mai ai a‘u, o le mea foi lenei na ou sau ai i le lalolagi, ina ia ou molimau i le upu moni. O i latou uma lava o i le upu moni, e faalogo mai i latou i lo‘u leo.

Ona tali atu lea o Peteru ma le au aposetolo ua faapea atu, E tusa ona sili o lo matou anaana i le Atua i lo matou anaana i tagata.

Ona faamalosi atu lea o Paulo ma Panapa, ua faapea atu, Ua tatau lava ona ua muai folafolaina atu le afioga a le Atua ia te outou; a ua outou tetee mai ai, ma ua ta‘uleaogaina outou e outou i le ola e faavavau, faauta, o le mea lea ma te liliu atu ai i tagata o nuu ese.

Ua sili ona amio lelei o i latou nei i tagata Tesalonia; auā ua latou talia le upu ma le fiafia tele, ua saili i Tusi i lea aso ma lea aso, pe moni ia mea.

A ua loto fatu nisi, ma ua le talitonu, o upu leaga mai i lenei lotu i luma o le toatele; ona alu ese lea o ia ia te i latou, ma ua vavae ese le au soo, ua tautalatala o ia i lea aso ma lea aso i le fale a‘oga o le tasi tagata e igoa ia Turano.

Auā o a‘u nei, ua ou iloa lenei mea, pe a mavae ona ou alu, e oo mai ia te outou luko saua o e le faasaoina le lafu mamoe. E tupu mai foi ia te outou lava tagata e tautala mai i mea faapiopio, e fetoso ese ai le au soo ia mulimuli ia i latou. O le mea lea ia outou mataala ai, ma ia manatu e tolu tausaga ou te lei mapu ai i le po ma le ao i lo‘u apoapoai atu ma loimata i tagata taitoatasi.

Ina alu ia i lena nuu, ma fai atu, O lo outou faalogo e faalogo ai outou, a e le lagona; o lo outou vaai foi e vaai ai outou, a e le iloa. Auā ua mafiafia le loto o lena nuu, uma ua faalogo gata o latou taliga i faalogo, ua moeiini o latou mata; ne‘i vaai o latou mata, ma faalogo o latou taliga, ma lagona o latou loto, ma liliuina i latou, ma ou faamaloloina i latou.

O a‘u o Paulo, o le auauna a Iesu Keriso, na valaauina e fai ma aposetolo, ua tofia e tala‘i le tala lelei a le Atua, (na ia muai ta‘uina mai e ana perofeta i Tusi paia,)

Auā ou te le mā i le tala lelei ia Keriso; auā o le mana lava lea o le Atua e ola ai i latou uma o e faatuatua, e muamua le Iutaia, atoa ma le Eleni. Auā ua faaalia mai ai le amiotonu a le Atua i le faatuatua, ina ia faatuatua ai, pei ona tusia, E ola le tagata amiotonu i le faatuatua. Ua faaalia mai foi le toasa o le Atua mai le lagi i le amio faalematau ma le amio leaga uma lava a tagata, o e taofi i le upu moni ma le amioletonu. Auā o mea a le Atua e mafai ona iloa ua faaalia mai ia te i latou; auā ua faaalia mai e le Atua ia te i latou; auā o ana mea e le vaaia talu ona faia o le lalolagi, e vaaia lava ia i le mafaufau i mea na faia, o lona mana lava lea e faavavau ma lona Atua; o lea foi ua le mautali ai i latou. Auā foi na iloa e i latou le Atua a ua le vivii ma faafetai atu ia te ia, ia tusa i le Atua; a e peitai ua faavaleleaina i latou i lo latou taumasalosaloga, ua faapouliuligia foi o latou loto vālea; ua vālea i latou, a o faafiapopoto i latou,

O lenei, se a ea se mea e sili ai le Iutaia? pe aoga i ni a le peritome? E tele lava i mea uma; a e muamua lenei, ona ua tuuina atu ia te i latou o afioga a le Atua. A faapefea? Afai ua le faamaoni nisi, pe faaleaogaina ea le faamaoni o le Atua i lo latou le faamaoni? Aua ne‘i faapea; ia tuu le faamaoni i le Atua, a o le pepelo i tagata uma lava; pei ona tusia, Ina ia ta‘uamiotonuina oe i au afioga, ma ia e malo pe a faamasinoina oe.

faapei ona tusia, E leai sē amiotonu, e leai lava se tasi, e leai se na te lagona, e leai sē saili i le Atua.

O lenei, e faaleaoga ea e i tatou le tulafono i le faatuatua? Aua ne‘i faapea; a ua tatou faatumauina ai le tulafono.

a o lenei, tatalaina i tatou nai le tulafono sa taofia ai i tatou, ina ua tatou oti, o lea ua tatou auauna ai i la le agaga fou, a e le i la le tusi tuai.

O lenei foi, e paia lava le tulafono, ma le poloaiga e paia, e tonu, ma ua lelei.

Ou te faafetai lava i le Atua, auā o Iesu Keriso lo tatou Alii. O lenei foi, o a‘u nei lava ou te auauna i le tulafono a le Atua i lo‘u mafaufau, a o le tulafono a le agasala i lo‘u tino.

auā o le loto i la le tino o le ita lea i le Atua; auā e le usiusi tai i le tulafono a le Atua, e le mafai foi i ai.

pe faapefea foi ona latou tala‘i atu, pe afai ua le aauina atu i latou? Pei ona tusia, E matagofie naua o latou vae o e au mai le tala lelei i le manuia, o e au mai le tala i mea lelei. A e lei usiusitai i latou uma lava i le tala lelei; auā ua faapea mai Isaia, Le Alii e, o ai ea ua talitonu i la matou upu e taulogologo atu? O lenei, e tupu le faatuatua i le taulogologo atu, o le taulogologo atu foi o i le afioga a le Atua lea.

Pei ona tusia, Ua tuu atu e le Atua ia te i latou le loto moe gase, o mata latou te le vaai ai, ma taliga latou te le faalogo ai, ua oo i ona po nei.

O mea uma foi na tusia anamua, na tusia ia e a‘oa‘o mai ai ia te i tatou; ina ia tatou maua le faamoemoe e tupu mai i le onosai, ma le faamafanafana mai o Tusi.

Ou te aioi atu foi ia te outou, le au uso e, ia outou vaavaai i e faatupu fevaevaeaiga, ma mea e tausuai ai; o mea ia e le tusa ma le mataupu ua a‘oa‘oina ai outou; ia outou liliu ese foi ia te i latou. Auā o e faapea, e le auauna i latou i lo tatou Alii o Iesu Keriso, a o latou lava manava; ma latou faasese i loto o tagata ua le manatu leaga, i lo latou faaneenee ma alofa faavivii.

Auā o le mataupu i le satauro, o le valea lea i e o malaia; a o le mana o le Atua ia te i tatou ua faaolaina.

A e matou te tautala atu i le poto i e ua uma ona a‘oa‘oina; a e le o le poto o lenei lalolagi po o le poto o alii o lenei lalolagi ua faaleaogaina; a e peitai matou te tautala atu i le poto o le Atua i le upu lilo sa natia, na tofia e le Atua anamuā anamuā lava, ina ia tatou manuia ai;

O ia mea foi matou te tautala atu ai i upu e a‘oa‘oina mai e le Agaga Paia, a e le o upu e a‘oa‘oina ai i le poto o tagata, o loo faamatalaina mea faaleagaga i upu faaleagaga. A e le talia e le tagata faaletino o mea a le Agaga o le Atua; auā o mea valea ia ia te ia, na te le mafai foi ona iloa, auā e faamasinoina faaleagaga. A o le tagata faaleagaga e faamasino e ia i mea uma, a e le faamasinoina o ia e se tasi.

E le aoga lava le peritome, e le aoga foi le le peritome; ua na o le tausi i poloaiga a le Atua.

Le au uso e, ou te faailoa atu ia te outou le tala lelei na ou folafolaina atu ia te outou, na outou talia foi, o loo tumau i ai foi outou, ua ola ai foi outou; pe afai tou te taofi mau i le mataupu na folafolaina e a‘u ia te outou; pe afai ua outou le talia fua.

Ai se tagata e le alofa i le Alii o Iesu Keriso ia anatema maranata lava ia.

Auā o le nanamu i matou ia Keriso i le Atua i e o faaolaina, atoa ma e o malaia; o le manogi o le oti e oo i le oti i nisi; a o le manogi o le ola e oo i le ola i nisi. Po o ai foi sē tusa ma nei mea?

o ia foi na sauni i matou ia tatau ona fai ma auauna o le feagaiga fou, e le o le tusi, a o le Agaga; auā e a le tusi e fasioti, a e a le Agaga e faaola. A e afai sa faapea le mamalu o le sauniga na oo mai ai le oti, na togia ai i mataitusi i maa, ua le mafai ai le fanauga a Isaraelu ona pulatoa atu i fofoga o Mose ona o le pupula o ona fofoga, o le pupula lea faaumatia; e le matuā sili ea le mamalu o le sauniga ua oo mai ai le Agaga? Auā afai sa mamalu le sauniga na oo mai ai le faasala, e matuā sili lava ona mamalu o le sauniga ua oo mai ai le amiotonu.

a ua matou lafoai mea lilo e mamā ai, e le o savavali ma le amio pepelo, e le o faafilogia e i matou le afioga a le Atua; a ua faailoa matou e i matou i le loto fuatia ifo o tagata uma i luma o le Atua i lo matou faaali atu le upu moni. Afai foi ua ufitia la matou tala lelei, ua ufitia ia i e ua fano; ua faatauasoina manatu o i latou o e le talitonu e le atua o le lalolagi nei, ina ne‘i pupula atu ia te i latou le malamalama o le tala lelei i le mamalu o Keriso, ua tusa o ia ma le Atua.

A e ou te fefe, ina ne‘i pei ona faaseseina o Eva e le gata i lana togafiti, e faapea ona faaleagaina o outou manatu ina ia le tonu ia Keriso.

Auā o i latou, o aposetolo pepelo i latou, o le au faigaluega ‘ole‘ole, ua lina i latou e i latou ma aposetolo a Keriso. E le se mea foi lea e ofo ai, auā o Satani lava, ua liua o ia e ia ma agelu o le malamalama.

Auā matou te le mafaia se mea e le tatau ma le upu moni, a o mea e tatou ma le upu moni.

Ua ou ofo ina ua faapea ona vave liliueseina o outou i le na valaauina outou i le alofa tunoa o Keriso a e faasaga i le tala lelei e ese; e le se tasi tala lelei foi lea, a o isi tagata ua faaatuatuvale ia te outou, ma fia faaliliueseina le tala lelei a Keriso. A e peitai e ui lava ina tala‘iina e i matou, po o se agelu mai le lagi, ia te outou se tala lelei e ese i lea na tala‘iina atu ai e i matou ia te outou, ia anatema ia. Pei ona matou muai fai atu, ou te toe fai atu ai nei foi, Afai e tala‘iina atu e se isi ia te outou se tala lelei e ese i lea na outou talia, ia anatema ia.

A e matou te lei gauai ma ua le usiusitai ia te i latou i sina itu aso, ina ia tumau ia te outou le tonu o le tala lelei.

Auā o i latou uma o e faalagolago i galuega o le tulafono, ua faafanoina i latou; auā ua tusia, Ia faafanoina i latou uma o e le tumau i mea uma lava ua tusia i le tusi o le tulafono ia faia.

Na faatauina mai i tatou e Keriso ai le faafanoga o le tulafono, ina ua faafanoina o ia mo i tatou; auā ua tusia, E faafanoina i latou uma o e ua faatautauina i le laau; ina ia oo ai i nuu ese le manuia o Aperaamo ia Keriso Iesu, ina ia tatou maua i le faatuatua le na folafolaina o le Agaga lea.

Na fetalaia mai folafolaga ia Aperaamo, ma so lana fanau; e lei faapea mai, O le fanau, peiseai e toatele, a e toatasi, O so lau fanau, o Keriso lava lea.

O lenei, ua fai mo tatou ta‘ita‘itama le tulafono, na te ta‘ita‘iina i tatou ia Keriso, ina ia ta‘uamiotonuina i tatou i le faatuatua.

Ia, ou te se ita atu ea ia te outou i lo‘u ta‘uina atu ia te outou le upu moni?

ina ia foai atu ia te outou e le Atua o lo tatou Alii o Iesu Keriso, o le Tamā e ona le mamalu, le Agaga e ona le poto ma le faaaliga, ina ia outou iloa lelei o ia; ia faapupulaina mata o outou loto, ina ia outou iloa le uiga o le faamoemoe ua i lona valaau mai, ma le uiga o le faulaigamea lelei o i lana tofiga ua silisili mo le au paia;

ina ia le toe tama ninii i tatou o loo felafoaiina e pei o peau, ma feaveaiina i matagi uma lava o matāupu, i le pepelo o tagata, i togafiti leaga ua saunia e faasese ai.

ina ia faapaiaina ai, ina ua faamamaina i le faataeleina i le vai atoa ma le upu;

ma ia outou ave le puloutau o le olataga, ma le pelu a le Agaga, o le afioga lea a le Atua.

O la‘u tatalo foi lenei, ia faatuputeleina pea lava lo outou alofa, ma le iloa lelei, atoa ma le faautauta uma; ina ia masino ia te outou mea uiga eseese, ina ia avea outou ma ē faamaoni, ma le le ta‘uleagaina pe a oo i le aso o Keriso;

o loo taofia e outou le upu o le ola, e fai ma mea ou te olioli ai i le aso o Keriso, ina ua ou le momo‘e faaleaoga, pe galue faaleaoga.

pe afai lava tou te tutumau i le faatuatua, o faavaeina, ma mausali, ma le le faateaeseina outou i le faamoemoe o i le tala lelei na outou faalogologo i ai, sa tala‘iina atu foi i tagata uma lava i le lalolagi; o a‘u o Paulo ua fai a‘u ma auauna i ai.

Ia outou, ne‘i faatagataotauaina outou e se tasi i le poto le aoga e faasese ai, e tusa ma le uputuu a tagata, e tusa ma mataupu muamua a le lalolagi, a e le tusa ma mataupu a Keriso;

Ina tatalo ia mo i matou foi, ina ia faaavanoa mai e le Atua se faitotoa o le upu mo i matou, e tautala atu ai i le upu ia Keriso sa lilo, ona o lea foi ua noanoatia ai a‘u,

sa outou faaa‘oa‘o mai foi ia te i matou, atoa ma le Alii, ina ua outou talia le upu i le puapuaga tele, ma le olioli mai le Agaga Paia;

a e ui lava ina muamua ona tigaina o i matou, ma faaleagaina i Filipi, pei ona outou iloa ua matou faamalosi ona o lo tatou Atua e tautala atu ia te outou i le tala lelei a le Atua ma le finafinau tele lava.

O le mea lea matou te faafetai ai i le Atua, o i matou lava e le aunoa, auā na talia e outou le afioga a le Atua na outou faalogo mai ai ia i matou, ua le talia e outou o le upu a tagata, a e peitai o le upu a le Atua, (e moni lava lea,) ua matuā galue foi lea i totonu ia te outou o e faatuatua.

e ia te outou foi o e puapuagaina, o le mapusaga faatasi ma i matou, pe a faaalia le Alii o Iesu mai le lagi, faatasi ma agelu o lona malosi, i le afi mumū, na te taui ma sui i e ua le iloa le Atua, ma ua le anaana i le tala lelei a lo tatou Alii o Iesu Keriso; e faasalaina i latou lava i le fanoga e faavavau lava, ia te‘a ma le Alii ma le mamalu o lona malosi;

Ona faaalia mai ai lea o le ua amio leaga, e fano o ia i le Alii, i le mānava mai o lona fofoga, ma faaumatia i le faaali mai o lana afio; o lona sau foi e pei o le galuega a Satani, i le mana uma, ma faailoga, ma vavega pepelo, ma mea faasese uma o le amio leaga i e a fano; auā ua latou le talia le upu moni ma le fiafia i ai, ina ia faaolaina ai i latou. O le mea foi lea e auina atu ai e le Atua ia te i latou le galuega e faasese ai, ina ia latou talia le mea pepelo; ina ia faasalaina o i latou uma lava o e le talia le upu moni, a e fiafia i le amioleaga.

Ua tatou iloa lava o le mea lelei le tulafono, pe afai e faia e se tasi o mea e tatau i ai; o loo iloa lenei mea, ua le faatuina mai le tulafono mo le ua amiotonu, a o e faaletaupulea ma e soli i tulafono, o e faalematau ma e agasala, o e amio leaga ma e ulavavale, o e fasi tamā ma e fasi tinā, o e fasioti tagata, o e faitaaga, o e faasotoma, o e gaoi tagata, o e tala pepelo, o e tauto pepelo; afai foi o i ai se toe mea e faatu‘iese ai i le mataupu e ola ai, e tusa ma le tala lelei silisili a le Atua manuia, ua tuuina mai ia te au.

auā o le mea lelei lea ma le mālie i luma o lo tatou Faaola le Atua, o lē finagalo ina ia faaolaina o tagata uma lava, ma ia oo ina iloa lelei le upu moni.

a e afai ou te tuai atu, ia e iloa ai lau amio e tatau i le fale o le Atua, o le ekalesia lea a le Atua soifua, o le pou tu foi lea ma le lagolago o le upu moni.

A o loo ta‘utino mai e le Agaga, e o ese nisi i le faatuatua i tausaga amuli, latou te faalogo i agaga e faasese ma mataupu a temoni;

Afai e te tuuina atu na mea i le au uso, e fai ai oe ma auauna lelei a Iesu Keriso, e tausia oe i upu o le faatuatua ma le mataupu lelei ua e taofi i ai.

Ia e faasaga i le faitau, ma le apoapoai atu, ma le a‘oa‘o atu, seia ou alu atu.

Ia oe lava ia te oe, atoa ma lau e a‘oa‘o atu, ia e tumau pea i ai; auā a ē fai lena mea, e faaolaina ai oe e oe atoa ma e ua faalogologo ia te oe.

O lenei, aua e te mā i le molimau i lo tatou Alii, po o ona o a‘u o loo noanoatia ona o ia; a ia tiga faatasi i tatou ona o le tala lelei, e tusa ma le mana o le Atua,

pe afai tatou te onosai, e fai foi i tatou ma tupu faatasi ma ia; pe afai tatou te faafiti ia te ia, e faafiti foi o ia ia te i tatou;

Ia e taumafai ina ia avea oe ma le ua fiafia mai i ai le Atua, o le faigaluega e leai se mea e mā ai, na te vavaetonuina le upu moni.

Auā e le tatau ona finau o le auauna a le Alii, a ia agamalu i tagata uma, ia mafaia ona a‘oa‘o atu, ma ia onosai, ia a‘oa‘o atu ma le agamalu i e o finau mai; pe mafai lava le Atua ona foai atu ia te i latou le salamo, ina ia latou iloa lelei le upu moni;

ua a‘oa‘oina e le aunoa, a e le āu mafai ona oo ina iloa lelei o le upu moni.

talu foi ina o e tama itiiti ua e iloa Tusi Paia, e mafaia ona faapoto ai ia te oe e iu ai i le ola i le faatuatua ua ia Keriso Iesu. O Tusi Paia uma lava e mai le Agaga o le Atua ia, e aoga foi ia e a‘oa‘o ai, e aoai ai, e faatonu ai, e faapoto ai foi i le amiotonu, ina ia atoatoa ona lelei ai o le tagata o le Atua, ia saunia lava ia i galuega lelei uma lava.

ia e tala‘i atu le upu, ia e faamalosi i ona aso e taugalemu ai, ma ona aso e le taugalemu ai, ia e faatonu atu, ia e aoai atu, ia e apoapoai atu ma le onosai uma atoa ma le a‘oa‘o atu. Auā e oo i ona po latou te le mafafai ai ona talia o le mataupu e ola ai, a e tusa ma o latou lava tu‘inanau, latou te faapotopoto ai a‘oa‘o mo i latou, ina ua feū o latou taliga; latou te liliu ese foi o latou taliga i le upu moni, a e liliu atu i tala o le vavau.

o lē taofi mau i le upu moni, faapei ona a‘oa‘oina o ia, ina ia mafaia e ia ona apoapoai atu i le mataupu e ola ai, ma aoai atu i e finau mai.

O le molimau moni lava lea. O le mea lea ia maamaai ona e aoai atu ai ia te i latou, ina ia latou faamaoni i le faatuatua;

A o oe, ia e tautala atu i mea e tusa ma le mataupu e ola ai;

O le mea lea e tatau ona atili ai ona tatou naunau i mea ua tatou faalogologo i ai, ne‘i te‘a ia i tatou. Auā afai na faamauina le upu na molia mai e agelu, taitasi foi soli tulafono ma faalogogata ma oo i ai le taui e tusa ai, pe sao faapefea i tatou pe a faatamala i le olataga e matuā tele? sa muai fetalaia mai e le Alii, ona faamaonia mai lea ia i tatou e i latou sa faalogo ia te ia;

O le mea lea, pei ona fetalai mai ai le Agaga Paia, O le aso nei afai tou te faalogo ai i lona siufofoga, aua tou te faamaaa i o outou loto, pei o le faaonoono i le aso na faaosooso ai i le vao; sa faaosooso mai ai o outou tamā ia te au, sa tofotofo mai ai ia te au, a ua latou iloa a‘u galuega i ona tausaga e fagafulu; o le mea lea na ou ‘ino‘ino ai i lena tupulaga, ma ou fai ane, Ua sese pea lava i o latou loto, ua le iloa e i latou o‘u ala; ona ou tauto ai lea i lo‘u ita, Latou te le sao atu lava i lo‘u malologa. Le au uso e, ia outou, ne‘i ai i so outou le loto leaga ma le le talitonu, tou te o ese ai i le Atua soifua;

Auā foi ua tala‘iina mai i tatou i le tala lelei e pei o i latou; a ua le aoga le upu na latou faalogologo i ai, ina ua le faatatauina ma le faatuatua i e na faalogologo i ai. Auā tatou te sao atu i le malologa, o i tatou o e ua faatuatua, pei ona fetalai mai o ia, Pei ona ou tauto i lo‘u ita, Latou te le sao atu lava i lo‘u malologa; o le malologa lava lea i le galuega na faia ina ua uma ona faavaeina o le lalolagi.

Auā o loo ola le afioga a le Atua, o loo matuā galue foi, o loo sili foi lona maai i pelu uma e faatau maai itu, o loo vaevae foi e oo lava i le vavaeeseina o le loto ma le agaga, o gaugātino foi ma aano o ivi, o loo faamasino foi i manatu ma filifiliga o le loto; e le lilo foi se tasi mea na faia i ona luma, a ua taatia fua ma ua aliali mai o mea uma lava i lana silafaga, tatou te ta‘u atu ia te ia a tatou amio.

Auā e le mafaia ia te i latou e na muai faamalamalamaina, na latou tofo foi i le mea foaifuaina mai i le lagi, ma ua faatofutofusia i le Agaga Paia, o e ua tofo foi i le upu lelei a le Atua ma le mana o le ola atali, ma ua pauu i latou, e le mafaia ona toe faafouina o i latou ina ia salamo, ina ua toe faasatauroina e i latou lava le Alo o le Atua, ma faainosia o ia i luma o tagata.

a o le feagaiga lenei ou te faia ma le aiga o Isaraelu pe a mavae atu ia aso, o loo fetalai mai ai le Alii, ou te tuuina atu a‘u tulafono i o latou mafaufau, ma ou tusia i o latou loto; e fai foi a‘u mo latou Atua, e fai foi i latou mo‘u nuu.

O le feagaiga lava lenei ou te faia ma i latou pe a mavae atu ia aso, o loo fetalai mai ai le Alii, ou te tuuina atu a‘u tulafono i o latou loto, ma ou tusi ai i o latou mafaufau;

Auā afai tatou te agasala ma le loto i ai pe a uma ona talia o le malamalama o le upu moni, ua le toe lava se taulaga mo agasala, na o le faatali ma le mata‘u tele i le faasala, ma le toasa e mumū e susunu ai e o tetee atu. O le na faaleaogaina le tulafono a Mose na oti o ia i le mau a le toalua po o le toatolu, ua le alofagia; pe ni a fa outou i le sili o le mamafa o le taui e ta‘utatauina ai le ua soli le Alo o le Atua, ma ua ta‘ulepaiaina e ia le toto o le feagaiga na faapaiaina ai o ia, ma ua upu leaga i le Agaga o le alofa tunoa?

A leai foi se faatuatua e le mafai ona fiafia mai o ia; auā e tatau i lē alu atu i le Atua ona talitonu o loo soifua o ia, o ia foi na te tauia mai o e matuā saili ia te ia.

ia outou, ne‘i liliu ese outou ia te ia o loo fetalai mai. Auā afai na le sao i latou e na liliu ese i le na fetalai i le lalolagi, e matuā le sao lava i tatou pe a liliu ese ia te ia o loo fetalai mai mai le lagi;

Auā foi o lo tatou Atua o le afi maamaai ia

A e afai ua leai se poto i so outou, ina ole atu ia i le Atua, o lē foai tele mai i tagata uma ma le le toe ta‘uta‘ua; ona foaiina mai ai lea ia te ia.

o lea foi ia lafoai ai mea eleelea uma ma le leaga e silisili, ia talia ma le faamaulalo le upu ua totōina, o lea e mafai ai ona faaolaina o outou agaga. A ia fai outou ma e anaana i le upu, a e aua le na ona faalogologo i ai, o faaseseina ai outou e outou. Auā ai se tasi e faalogologo i le upu a e le anaana i ai, e tusa ia ma le tagata ua vaavaai i le faaata i ona lava mata. na fanau ma ia; auā ua vaavaai o ia ia te ia, ona alu ese lea, ua galo loa le uiga o ona mata;

O outou tane mulilulua e, ma fafine mulilulua e, tou te le iloa ea o le fefaauoai ma le lalolagi o le ita lea i le Atua? O lenei, o sē fia uo ma le lalolagi, ua avea o ia ma ita i le Atua. Fa te outou ea ua fai mai fua le Tusi. O le loto o loo nofo i totonu ia te outou ua naunau ia i le mataua? A ua foai mai e ia le alofa tunoa e sili; o lea ua faapea mai ai, E tetee atu le Atua i e faamaualuga, a e foai mai le alofa tunoa i e faamaulalo. O le mea lea ia outou gauai ai i le Atua; ia outou tetee atu i le tiapolo, ona sola ese ai lea o ia ia te outou. Ia outou faalatalata atu i le Atua, ona faalatalata mai lea o ia ia te outou. Tagata agasala e, ina fafano ia o outou lima, o outou e faalotolotolua e, ina faamamā ia o outou loto; ia puapuagatia outou, ma ia faavauvau, ma fetagisi; ia liua o outou ‘ata‘ata ma faavauvau, ma lo outou fiafia i le faanoanoa; ina faamaulalo ia i luma o le Alii, ona faamaualugaina lea o outou e ia.

Ua outou faamamā i o outou loto i le gauai i le upu moni e le Agaga, ua iu i le alofa faamaoni i le au uso, o le mea lea ia matuā fealofani ai outou ai le loto naunau; ua fanaufouina outou e le o le fua e pala, a o le fua e le pala lava, o le afioga a le Atua lea ua oia ma ua tumau e oo i le faavavau. Auā o tagata uma lava e tusa ia ma le mutia, o le matagofie uma foi o tagata e pei o le fuga o le vao; e magumagu le mutia, e toulu foi ona fuga; a o le afioga a le Alii e tumau lea e faavavau lava. O le afioga foi lea ua folafolaina atu ia te outou na.

faapei o tama meamea faatoa fanau mai ia naunau outou i le suāsusu e le suia o le upu, ina ia outou tutupu ai,

O lenei, ua ia te outou o e faatuatua o lenei mamalu; a o e faalogogata, O le maa na lafoaiina e tufuga fai fale, ua avea lava lea ma tulimanu aupitoaluga, ma maa e tausuai ai, ma papa e tautevateva ai; o e tausuai i latou ua faalogogata i le upu, na tofia foi i latou i lea lava mea.

Auā o ona po nei e amata ai le faamasinoga i le aiga o le Atua; afai foi e muamua ia i tatou, pe se a le gataaga o e faalogogata i le tala lelei a le Atua?

O le siufofoga lava lea na matou faalogologo ai, na tŭlei mai mai le lagi, ina o matou i ai ma ia i le mauga paia. O loo ia te i tatou foi le upu o le valoaga e sili lona mausali, e lelei ona outou naunau i ai, e pei o se lamepa e mumū i le mea pogisa, seia tafa mai ata, seia alu ae foi le fetu ao i o outou loto. Ia muai iloa lenei mea, ua leai se valoaga o i le Tusi e faamatalafuaina. Auā e le o le loto o tagata na tuu mai ai le valoaga anamua, a o tagata paia o le Atua na talatalaina mai ina ua osofia mai e le Agaga Paia.

Sa i ai foi i le nuu o perofeta pepelo, e pei ona i ai ia te outou, o a‘oa‘o pepelo, latou te faatupuina faalilolilo o vaevaega e fano ai, ma latou faafiti i le Alii na ia faatau mai ia te i latou, o i latou lava e oo mai ai ia i latou le malaia e vave mai lava. E toatele foi latou te mulimuli atu i a latou mea e fano ai, talu o i latou e upuleagaina ai le ala o le upu moni. O le matapeapea foi e fai ai outou e i latou ma mea faatau i a latou upu pepelo; e le tuai mai ia te i latou le sala na fetalaia mai talu anamua, o lo latou malaia foi e le moe lea.

faapei o ana tusi uma lava, o loo talatalaina ai nei mea; o i ai nisi upu faamatalagatā, ua faauigaeseina e tagata e lei a‘oa‘oina, ma ua le faatumauina, faapea o isi Tusi foi e oo ai lo latou lava malaia. O lenei, le au pele e, ia outou faaeteete ia te outou, auā ua muai iloa e outou, ne‘i ta‘ita‘ieseina outou i le sese o e faaletaupulea, tou te pauu ai i le mea sa outou tumau ai.

O le mea foi lea tatou te iloa ai ua tatou iloa o ia, pe afai tatou te tausi i ana poloaiga. O sē faapea, Ua ou iloa o ia, a e le tausi e ia i ana poloaiga, o le pepelo lava lea, e le o i totonu ia te ia le upu moni. A o lē tausi i lana afioga, e moni, ua atoatoa le alofa i le Atua i totonu ia te ia. O le mea lea ua tatou iloa ai o i totonu ia te ia i tatou. O lē faapea o loo tumau ia i totonu ia te ia, e tatau ona savali o lena tagata faapei ona savali o ia.

Leau pele e, aua tou te faalogo i agaga uma lava, a ia outou tofotofo i agaga pe mai le Atua i latou; auā e toatele perofeta pepelo ua o atu i le lalolagi.

O i matou, mai le Atua lava i matou, o le ua iloa le Atua e faalogo mai o ia ia te i matou; o le le mai le Atua e le faalogo mai o ia ia te i matou; o le mea lea ua tatou iloa ai le agaga moni ma le agaga sese.

O le mea lava lenei ua tatou iloa ai e alolofa i tatou i le fanau a le Atua, pe a tatou alolofa i le Atua, ma tausi i ana poloaiga.

O lē faatuatua i le Alo o le Atua ua i totonu ia te ia le molimau; o le le talitonu i le Atua ua ia faia o ia ma pepelo; auā e lei talitonu ia i le mau na molimau mai ai e le Atua i lona lava Alo.

O lenei lava le alofa, ia tatou savavali e tatau ma ana poloaiga; o lenei lava le poloaiga, faapei ona outou faalogo i ai talu le amataga, ina ia outou savavali ai.

O i latou uma lava o e tuumavaega, a e le tumau i le mataupu ia Keriso, e le o ia te i latou le Atua; o lē tumau i le mataupu ia Keriso, e ia te ia lava le Tamā atoa ma le Alo. Pe a alu atu ia te outou se tasi a e le molia lenei lava mataupu, aua tou te talia o ia i o outou fale, aua foi tou te ofo alofa ia te ia; auā o sē ofo alofa atu ia te ia, e faatasi ai o ia ma ana galuega leaga.

Ou te fia faamanatu atu foi ia te outou i le mea na outou iloa anamua, na faaolaina e le Alii le nuu ai le nuu o Aikupito, a e mulimuli ane ua faaumatia e ia o e na le faatuatua.

ua i lona aao taumatau o fetu e fitu; ua alu atu foi ai lona fofoga o le pelu e faataumaai ona itu e maamaai lava; o ona fofoga foi e pei o le pupula o le la ina o mu toto‘a.

Ua ou iloa i au galueaga, ma lou tiga, ma lou onosai, ina ua e le lavatia i e ua leaga; ua e tofotofo foi i e ua fai mai o aposetolo i latou, a e leai lava, ua e iloa foi o tagata pepelo i latou,

Ina e salamo ia; afai e leai, ona ou vave alu atu lea ia te oe, ou te tau foi ma i latou i le pelu ai lo‘u gutu.

o lenei, ua e faaleogalua, e te le maalili, e te le vevela foi, o le mea lea ou te luai atu ai ia te oe i lo‘u gutu Auā ua e fai mai, Ou te se mauoa, ua faatamaoaigaina a‘u, ou te le mativa foi i se mea e tasi; a ua e le iloa o oe o le malaia, ma le pagatia, ma le mativa, ma le tauaso, ma le le lavalava;

Ua ita foi le tarako i le fafine, ona alu atu ai lea o ia e tau le taua ma i latou ua totoe o lana fanau, o e ua tausi i poloaiga a le Atua, ma ua taofi le mau ia Iesu Keriso.

Na a‘u iloa foi le tasi agelu ua lele i le taulotoaiga o le lagi, ua ia te ia le tala lelei e faavavau e folafola atu i e nonofo i le lalolagi i atu nuu uma, ma itu aiga, ma gagana eseese, ma nuu, ua faapea atu ma le leo tele, Ia outou matatau i le Atua, ma avatu ia te ia le viiga, auā ua oo mai le itu aso o lana faamasinoga; ma ia outou ifo i le na faia le lagi, ma le fanua, ma le sami, atoa ma puna o vai.

Le Alii e, o ai se le mata‘u ia te oe, ma vivii atu i lou suafa? auā ua na o oe e lelei; auā e o mai nuu uma lava, ma latou ifo i ou luma; auā ua faaalia au faamasinoga tonu.

ua pei o le mumū o le afi ona fofoga, ua i lona ao foi palealii e tele; ua ia te ia le suafa ua tusia e le iloa e se tasi ua na o ia lava; ua ofu foi o ia i le ofu ua fufui i le toto; ua faasuafaina o ia, O le Lokou o le Atua.

Ua alu atu foi le pelu maai nai i lona fofoga, ina ia taia a‘i e ia o nuu; e pule foi o ia ia te i latou i le tootoo uamea; e soli foi e ia le soligāvine o le toasa mamafa o le Atua e ona le malosi uma lava.

A o e na totoe, ua fasiotia i latou i le pelu ua alu atu nai le fofoga o le ua tietie i le solofanua; ona maoona ai lea o manu felelei uma i o latou tino.

Auā ou te ta‘utino atu ia i latou uma o e faalogo i upu o le valoaga o lenei tusi, Ai se tasi e faaopoopo mai se upu i nei upu, e faaopoopoina atu e le Atua ia te ia o mala ua tusia i lenei tusi. Ai se tasi foi e ave ese se upu i upu o le tusi o lenei valoaga, e aveeseina e le Atua lona tofi i le tusi o le ola, ma le aai paia, ma mea ua tusia i lenei tusi.