04 – Ukudalwa

Ekuqaleni uNkulunkulu wadala amazulu lomhlaba. Umhlaba wawungelasimo njalo ungelalutho, ubumnyama babengame phezulu kolwandle njalo uMoya kaNkulunkulu wawuzulazula ngaphezulu kwamanzi. Yikho uNkulunkulu wasesithi, “Akubekhona ukukhanya,” lakanye kwabakhona ukukhanya. UNkulunkulu wabona ukuthi ukukhanya kwakukuhle, wasekwehlukanisa ukukhanya lobumnyama. UNkulunkulu wabiza ukukhanya ngokuthi “lusuku,” lobumnyama wabubiza ngokuthi “yibusuku.” Yikho kwabakhona ukuhlwa lokusa  —  usuku lokuqala.

Njalo uNkulunkulu wathi, “Kakubekhona umkhandlu phakathi kwamanzi ukwehlukanisa amanzi kwamanye amanzi.” Ngakho uNkulunkulu wehlukanisa amanzi angaphansi komkhandlu kulawo amanzi angaphezulu kwawo. Kwaba njalo. UNkulunkulu wabiza umkhandlu ngokuthi “ngumkhathi.” Njalo kwabakhona ukuhlwa, kwabakhona njalo ukusa  —  usuku lwesibili.

Njalo uNkulunkulu wathi, “Kakuthi amanzi angaphansi komkhathi aqoqane ndawonye endaweni eyodwa, njalo kakuvele umhlabathi owomileyo.” Ngakho kwaba njalo. UNkulunkulu wabiza umhlaba owomileyo ngokuthi “ngumhlabathi,” lamanzi aqoqeneyo wathi “yizilwandle.” Njalo uNkulunkulu wabona ukuthi kwakukuhle. Yikho uNkulunkulu wasesithi, “Umhlabathi kawuthele izimila: izihlahla ezizala intanga lezihlahla emhlabathini ezithela izithelo ezilentanga phakathi, kusiya ngemihlobo yazo eyahlukeneyo.” Kwaba njalo. Umhlaba wathela izimila: izihlahla ezilentanga kusiya ngemihlobo yazo, lezihlahla ezizala izithelo ezilentanga phakathi kwazo kusiya ngemihlobo yazo. Njalo uNkulunkulu wabona ukuthi kwakulungile. Kwabakhona njalo ukuhlwa, njalo kwabakhona ukusa  —  usuku lwesithathu.

Njalo uNkulunkulu wathi, “Akube lezibane emkhandlwini womkhathi ukwehlukanisa imini lobusuku, njalo zibe luphawu lokubonisa izibanga zomnyaka, lezinsuku leminyaka, njalo mazibe yizibane emkhandlwini womkhathi ukuletha ukukhanya emhlabeni.” Kwaba njalo. UNkulunkulu wenza izibane ezimbili ezinkulu  —  isibane esikhulu ukubusa emini lesibane esincinyane ukubusa ebusuku. Wenza futhi lezinkanyezi. UNkulunkulu wazibeka emkhandlwini womkhathi ukuletha ukukhanya emhlabeni, ukubusa imini lobusuku, kanye lokwahlukanisa ukukhanya lobumnyama. Njalo uNkulunkulu wabona ukuthi kwakukuhle. Njalo kwabakhona ukuhlwa, kwabakhona njalo lokusa  —  usuku lwesine.

Njalo uNkulunkulu wathi, “Akuthi amanzi anyakazele ngezidalwa eziphilayo, njalo akuthi izinyoni ziphaphe ngaphezulu komhlaba zidabule emkhandlwini womkhathi.” Yikho uNkulunkulu wadala izidalwa ezinkulu zolwandle layo yonke into ephilayo lehambayo enyakazelayo emanzini, kusiya ngemihlobo yazo, lezinyoni zonke ezilamaphiko, ngemihlobo yazo. Njalo uNkulunkulu wabona ukuthi kwakukuhle. UNkulunkulu wazibusisa wathi, “Zalani lande ngobunengi ligcwalise amanzi ezilwandle, njalo akuthi lezinyoni lazo zande emhlabeni.” Njalo kwabakhona ukuhlwa, kwabakhona njalo lokusa  —  usuku lwesihlanu.

Njalo uNkulunkulu wathi, “Akuthi umhlaba uveze izidalwa eziphilayo kusiya ngemihlobo yazo: izinanakazana ezihuquzela emhlabathini, kanye lezinyamazana zeganga, yilezo kusiya ngemihlobo yazo.” Lakanye kwaba njalo. UNkulunkulu wenza izinyamazana zeganga kusiya ngemihlobo yazo, izifuyo kusiya ngemihlobo yazo, njalo zonke izinanakazana ezihuquzela emhlabathini kusiya ngemihlobo yazo. Njalo uNkulunkulu wabona ukuthi kwakukuhle.

UNkulunkulu wasesithi, “Asenze umuntu ngesimo sethu, ngomfuziselo wethu, njalo kabuse phezu kwezinhlanzi zolwandle lezinyoni zemoyeni, phezu kwezifuyo, phezu kwawo wonke umhlaba laphezu kwazo zonke izinanakazana ezihuquzela emhlabathini.” Ngakho uNkulunkulu wamdala umuntu ngesimo sakhe, wamdala ngesimo sikaNkulunkulu; wadala owesilisa lowesifazana. UNkulunkulu wababusisa wathi kubo, “Zalani lande ngobunengi; wugcwaliseni umhlaba, liwubuse. Busani phezu kwezinhlanzi zolwandle lezinyoni zemoyeni laphezu kwezidalwa zonke ezihambayo emhlabathini.” UNkulunkulu wasesithi, “Ngilinika zonke izihlahla ezizala intanga eziphezu kwawo wonke umhlaba lazo zonke izihlahla ezilezithelo ezilentanga phakathi. Zingezenu ukuthi lizidle. Njalo nginika zonke izihlahla eziluhlaza kuzo zonke izinyamazana zomhlaba lakuzo zonke izinyoni zemoyeni lakuzo zonke izidalwa ezihambayo emhlabathini  —  yonke into ephefumula impilo phakathi kwayo  —  ukuba zibe yikudla kwazo.” Kwaba njalo. UNkulunkulu wakubona konke lokho ayesekwenzile, njalo kwakukuhle kakhulu. Njalo kwabakhona ukuhlwa, kwabakhona njalo lokusa  —  usuku lwesithupha.

Kanjalo amazulu lomhlaba kwapheleliswa ngakho konke ukuhlotshiswa okukhulu. Ngosuku lwesikhombisa uNkulunkulu wayesewuqedile umsebenzi ayewenza; yikho ngosuku lwesikhombisa waphumula kuwo wonke umsebenzi wakhe. Njalo uNkulunkulu walubusisa usuku lwesikhombisa walwenza lwaba ngcwele, ngokuba mhla walo waphumula kuwo wonke umsebenzi wokudala lokho ayesekwenzile.

Lo ngumlando wamazulu lomhlaba ekudalweni kwakho. Kwathi uJehova uNkulunkulu esenze umhlaba lamazulu  — kungakaveli sihlahlana seganga emhlabathini njalo kungakamili lasihlahla bani seganga, ngoba uJehova uNkulunkulu wayengakanisi izulu emhlabeni, njalo kwakungelamuntu wokusebenza umhlabathi, kodwa izintombo zantuntuza emhlabathini zathelela lonke iphansi  — uJehova uNkulunkulu wambumba umuntu ngothuli lomhlabathi waphefumulela emakhaleni akhe umphefumulo wokuphila, yikho umuntu wasesiba yinto ephilayo. Kunjalo uJehova uNkulunkulu wayelungise isivande empumalanga, e-Edeni; wambeka khona umuntu ayembumbile.

Lo ngumlando olotshiweyo ngosendo luka-Adamu. Kwathi uNkulunkulu edala umuntu wamenza ngomfuziselo kaNkulunkulu. Wabadala baba ngowesilisa lowesifazana wababusisa. Kwathi sebedaliwe wababiza ngokuthi “abantu.” Kwathi u-Adamu esephile iminyaka elikhulu lamatshumi amathathu wathola indodana eyafana laye xathu; wayibiza ngokuthi nguSethi.

Ngoba ngezizinsuku eziyisikhombisa uJehova wenza amazulu lomhlaba lakho konke okukukho, kodwa ngosuku lwesikhombisa waphumula. Ngakhoke walubusisa usuku lweSabatha walwenza lwaba ngcwele.

Lizakuba yisibonakaliso phakathi kwami labako-Israyeli nini lanini. Ngoba ngezinsuku eziyisithupha uJehova wenza izulu lomhlaba, kwathi ngosuku lwesikhombisa wazila umsebenzi waphumula.’ ”

Impela njengoba ngiphila, lanjengoba inkazimulo kaJehova igcwalise umhlaba wonke,

Buzani khathesi ngezinsuku ezedlulayo, kudala lingakabi khona, kusukela ngosuku uJehova adala ngalo umuntu emhlabeni; buzani kusukela ngapha kwamazulu kusiya ngale kwamazulu. Kambe kukhona yini okukhulu kangaka okwedlula lokhu osekuke kwenzakala loba kwezwakala na?

Izulu ngelikaJehova wenu, izulu elingaphezu kwamazulu, umhlaba kanye lakho konke okukiwo.

Uvusa abayanga ethulini aphakamise abaswelayo esilotheni; abahlalise lamakhosana. Enze bathole isihlalo sodumo sibe yilifa labo. “Ngokuba izisekelo zomhlaba ngezikaJehova; umise umhlaba phezu kwazo.

Izigodi zolwandle zambulwa lezisekelo zomhlaba zavezwa obala ekukhuzeni kukaJehova, ekufutheni komoya wamakhala akhe.

UHezekhiya wakhuleka kuJehova wathi: “O Jehova ka-Israyeli, ohlezi ngaphezu kwamaKherubhi, wena wedwa unguNkulunkulu phezu kwemibuso yonke yomhlaba. Wenzile izulu lomhlaba.

Bungobakho, O Jehova, ubukhulu lamandla lodumo lobukhosi; ngoba konke okusezulwini lokusemhlabeni kungokwakho. Bungobakho, O Jehova, ubukhosi; uphakeme wena phezu konke.

Wena wedwa unguJehova. Wenza amazulu, kanye lamazulu aphezukonke, lazo zonke izinkanyezi zawo, umhlaba lakho konke okukuwo, izilwandle lakho konke okukuzo. Uyapha ukuphila kukho konke, lamabandla wonke asezulwini ayakukhonza.

Uyawunyikinya umhlaba endaweni yawo, axukuxe izinsika zawo. Uyalitshela ilanga ukuba lingakhanyi; asibekele ukukhanya kwezinkanyezi. Nguye kuphela owelula amazulu, ohamba phezu kwamagagasi olwandle. UnguMenzi wezinkanyezi iNgulube leZinja, iSilimela loMthala waseningizimu. Wenza imimangaliso engafinyelelekiyo, izimanga ezingelakubalwa.

“Kodwa ake ubuze izinyamazana, zizakufundisa, kumbe izinyoni zemoyeni, zizakutshela; kumbe khuluma lomhlaba, uzakufundisa, loba wothi izinhlanzi zolwandle zikutshele. Yikuphi kwalezizinto okungaziyo na ukuthi yisandla sikaJehova esikwenzileyo lokhu? Esandleni sakhe kulempilo yazo zonke izidalwa lokuphefumula kwabantu bonke.

Uyawendlala umkhathi wenyakatho endaweni engelalutho; aphanyeke umhlaba phezu kweze. Ugoqele amanzi emayezini akhe, kodwa amayezi kawapatshaki yikusindwa ngamanzi. Uyayigubuzela inyanga egcweleyo, endlale amayezi phezu kwayo. Umisa umkhawulo wokwengama komkhathi emanzini kube ngumngcele phakathi kokukhanya lobumnyama. Izinsika zamazulu ziyazamazama, zisethuswa yikukhuza kwakhe.

UMoya kaNkulunkulu wangenza; umphefumulo kaSomandla ungipha impilo.

Kwathi uJehova wasemphendula uJobe ephakathi kwesiphepho. Wathi: “Ngubani na lowo odunga ukwaluleka kwami ngamazwi okungazi? Ziqinise njengendoda; ngizakubuza, lawe uzangiphendula. “Wawungaphi lapho ngangibeka izisekelo zomhlaba na? Ngitshela uma uzwisisa. Ngubani owamisa izilinganiso zawo na? Phela angithi uyazi! Ngubani owayidonsayo intambo yokulinganisa kuwo na? Izinsika zawo zamiswa phezu kwani na, loba ngubani owamisa ilitshe lawo legumbi na  — lapho izinkanyezi zokusa zazihlabelela kanyekanye lezingilosi zonke zamemeza ngentokozo? “Ngubani owavalela ulwandle ngemuva kwezivalo lapho lwaselufohla esiswini na, lapho ngenza amayezi aba yisambatho salo na ngalugoqela ngomnyama omkhulu, lapho ngalubekela imikhawulo ngamisa iminyango yalo lemigoqo endaweni yayo, lapho engathi, ‘Ungeza uze ufike lapha kodwa ungedluli; kulapha amagagasi akho azigqajayo aphelela khona?’

“Khangela imvubu, engayenzayo kanye lawe njalo edla utshani njengenkomo. Ilamandla amangalisayo okhalweni lwayo, amandla angaka emisipheni yesisu sayo! Umsila wayo uyazunguza njengomsidari; imisipha yemilenze yayo yalukene.

Nxa nginakana ngamazulu akho, umsebenzi weminwe yakho, inyanga lezinkanyezi ozibeke endaweni yazo,

Izigodi zolwandle zavela egcekeni, lezisekelo zomhlaba zachayeka lapho usukhwaza, wena Jehova ngomfutho wokuphefumula kwamakhala akho.

Kumqondisi wokuhlabela. Ihubo likaDavida. Amazulu afakaza inkazimulo kaNkulunkulu; lomkhathi utshumayela umsebenzi wezandla zakhe.

Ilizwi lazo lizwakala emhlabeni wonke, amazwi azo afika emikhawulweni yomhlaba. Ilanga uselakhele ithente emazulwini,

Ihubo likaDavida Umhlaba ungokaJehova, lakho konke okukuwo, ilizwe labo bonke abahlala kulo; ngokuba wenza isisekelo sawo phezu kwezilwandle wawumisa phezu kwamanzi.

Ngelizwi likaJehova amazulu enziwa, unkanyankanya lwezinkanyezi ngomoya womlomo wakhe.

Ngawakho amazulu, ngowakho njalo lomhlaba; wawudala umhlaba lakho konke okukuwo. Wayidala inyakatho kanye leningizimu; iThabhori leHemoni zihlabelela ibizo lakho ngentokozo.

Izintaba zingakabikhona lalapho ungakawuvezi umhlaba kanye lelizwe, kusukela phakade kuze kube phakade unguNkulunkulu.

Ngolwakhe ulwandle ngokuba walwenza, lezandla zakhe zawenza umhlaba owomileyo. Wozani, kasikhothame simkhonze, kasiguqe phambi kukaJehova uMenzi wethu;

Ekuqaleni wabeka izisekelo zomhlaba, lamazulu angumsebenzi wezandla zakho. Konke kuzabhubha, kodwa wena uzasala; konke kuzaguga njengesigqoko. Njengesivunulo uzakuguqula kucine sekulahlwa.

Dumisa uJehova, O mphefumulo wami. O Jehova Nkulunkulu wami, umkhulu kakhulu; ugqoke inkazimulo lobukhosi. Uyazigoqela ngokukhanya kungathi kungesivunulo; amazulu uyawelula njengethente anqumise izintungo zezindlu zangaphezulu zilale phezu kwamanzi. Wenza amayezi inqola yakhe yamabhiza, undiza ngezimpiko zomoya. Wenza izikhatha zomoya zibe yizigijimi zakhe, amalangabi omlilo izinceku zakhe. Wawugxilisa umhlaba ezisekelweni zawo; ungeke wagudlulwa.

Minengi kanganani imisebenzi yakho, O Jehova! Zonke wazenza ngenhlakanipho; umhlaba ugcwele izidalwa zakho. Nantuyana ulwandle, uthwaca olungakaya, olunyakazela ngezidalwa ezingelakubalwa  —  izinto eziphilayo ezinkulu lezincinyane.

Mikhulu imisebenzi kaJehova; isemicabangweni yabo bonke abathokoza ngaye.

Sengathi lingabusiswa nguJehova, uMenzi wezulu lomhlaba. NgakaJehova amazulu angaphezu kwakho konke, kodwa umhlaba wawunika umuntu.

Leli lilanga alenzileyo uJehova; kasithokoze sijabule ngalo.

Usizo lwami luvela kuJehova, uMenzi wezulu lomhlaba.

Usizo lwethu lusegameni likaJehova uMenzi wezulu lomhlaba.

UJehova wenza loba yini ayifunayo, emazulwini lasemhlabeni, ezilwandle lasezinzikini zazo.

owathi ngokuzwisisa kwakhe wenza amazulu, Uthando lwakhe lumi laphakade. owendlala umhlaba phezu kwamanzi, Uthando lwakhe lumi laphakade. owenza izibane ezinkulu  —  Uthando lwakhe lumi laphakade ilanga ukubusa emini, Uthando lwakhe lumi laphakade. inyanga lezinkanyezi ukubusa ebusuku; Uthando lwakhe lumi laphakade.

Ngokuba wadala ingaphakathi yobuyimi; wangiphetha kuhle ndawonye esiswini sikamama. Ngiyakudumisa ngokuthi ngabunjwa ngesimanga esesabekayo; iyamangalisa imisebenzi yakho, lokho ngikwazi kamhlophe.

uMenzi wezulu lomhlaba, ulwandle lakho konke okulapho  —  uJehova owala elokhu ethembekile laphakade.

Umisile ubunengi bezinkanyezi aziqambe leyo laleyo ngamabizo.

Ngokuhlakanipha uJehova wabeka izisekelo zomhlaba, ngokuqedisisa wamisa izulu endaweni yalo;

UJehova wangenza ngaba khona ngaqalela konke okukhona, kuqala kokwenza ezinye izinto; ngaba khona ekudabukeni kwezinto, kwasekuqaleni, umhlaba ungakabi khona. Kungakabi lezilwandle, ngasengizelwe, kungakabi khona izihotsha ezigcwele amanzi; izintaba zingakamiswa ezinsikeni zazo, engakabi khona amaqaqa, ngasengizelwe, uJehova engakawenzi umhlaba lamaganga, loba lonke uthuli lomhlaba. Ngangikhona uJehova ehlela kuhle izulu, ephawula kuhle imingcele yomkhathi lolwandle, esenza amayezi emkhathini wazizinzisa izinziki zolwandle, ebeka imingcele yolwandle ukuze amanzi angedluli izimiso zakhe, ngesikhathi lapho emisa izisekelo zomhlaba. Ngalesosikhathi ngangingumbumbi eceleni kwakhe. Ngangigcwele injabulo insuku ngensuku, ngithokoza ukuba laye kokuphela, ngithokoza ngomhlaba wakhe wonke ngijabuliswa yibukhona babantu.

Izindlebe ezizwayo lamehlo abonayo  —  kokubili kwenziwa nguJehova.

Elinye lamemezela kwelinye lisithi: “Ungcwele, ungcwele, ungcwele uJehova uSomandla, Umhlaba wonke ugcwele inkazimulo yakhe.”

Abayikulimaza loba badilize kuyo yonke intaba yami engcwele ngoba umhlaba uzakuba usugcwele ulwazi lukaJehova njengamanzi egcwele ulwandle.

Lina ligomonqisa izinto kube angathi kucatshangwa ukuthi umbumbi unjengebumba. Okubunjiweyo kungatsho yini kokubumbileyo kuthi, “Kangibumbanga”? Imbiza ingatsho na kumbumbi ithi, “Kazi lutho”?

“Awu, Jehova Somandla, Nkulunkulu ka-Israyeli osebukhosini phakathi kwamaKherubhi, wena kuphela nguwe onguNkulunkulu wemibuso yonke yasemhlabeni. Nguwe owenza izulu lomhlaba.

Ngubani olinganise amanzi entendeni yesandla sakhe, loba walinganisa amazulu ngobubanzi besandla sakhe na? Ngubani owaphatha uthuli lomhlabathi ngesitsha loba walinganisa izintaba ezilinganisweni lamaqaqa esikalini na?

Kalazi yini? Kalizwanga na? Kalikutshelwanga kwasekuqaleni na? Kalizwisisanga na selokhu umhlaba wadalwayo? UJehova uhlezi ebukhosini ngaphezu kwendingilizi yomhlaba, njalo abantu bakhe banjengezintethe. Welula amazulu njengekhetheni, awendlale njengethente lokuhlala kulo.

Phakamisani amehlo enu likhangele phezulu. Ngubani owadala konke lokhu na? Yena okhupha amaxuku ezinkanyezi ngalinye ngalinye, awabize ngalinye ngamabizo awo. Ngenxa yamandla akhe amakhulu lokuqina okulamandla akukho lalinye elingekho.

Kalazi yini? Kalizwanga na? UJehova unguNkulunkulu waphakade, UMdali wemikhawulo yomhlaba. Kayikudinwa kumbe akhathale, ukuqedisisa kwakhe kakho ongakulinganisa.

Lokhu yikho okutshiwo nguJehova yena owadala amazulu wawelula, yena owendlala umhlaba lakho konke okuphuma kuwo, yena onika abantu abakuwo ukuphefumula, kuthi abahamba kuwo abanike ukuphila:

wonke umuntu obizwa ngebizo lami, engamdalela udumo lwami, engambumbayo, ngamenza.”

“Nanku akutshoyo uJehova  —  uMhlengi wakho, owakubumbayo esiswini: Mina nginguJehova, owenza izinto zonke, owenza amazulu eyedwa, owendlala umhlaba eyedwa,

Nanku okutshiwo nguJehova  —  oNgcwele ka-Israyeli, loMdali wakhe uthi: Mayelana lezinto ezizayo, uyangibuza ngabatwabami na, loba uyangilawula emsebenzini engiwenzayo na? Yimi engadala umhlaba, ngenza labantu abahlala kuwo. Ezami izandla yizo ezananabula amazulu; ngahlela amaxuku ezinkanyezi zawo.

Ngoba nanku okutshiwo nguJehova yena owadala amazulu, unguNkulunkulu, yena owabumba umhlaba wawenza, wawusekela; kawudalanga ukuba ungabi lalutho, kodwa wawenza ukuba kuhlalwe kuwo, uthi: “Mina nginguJehova, kakho omunye.

“Ngilalela wena Jakhobe, Israyeli, engikubizileyo: Mina nginguye; Ngingowokuqala njalo ngingowokucina. Isandla sami sabeka izisekelo zomhlaba, isandla sami sokudla sendlala amazulu; lapho ngikubiza, kuyasukuma konke kanyekanye.

uze ukhohlwe uJehova, uMenzi wakho, owendlala amazulu wabeka lezisekelo zomhlaba, ukuthi uhlale ngokwesaba okungapheliyo nsuku zonke ngenxa yolaka lomcindezeli, ohlose ukuchitha na? Ngoba lungaphi na ulaka lomcindezeli?

Ikanti, O Jehova, wena unguBaba wethu. Thina silibumba, wena ungumbumbi; Sonke singumsebenzi wezandla zakho.

Nanku okutshiwo nguJehova: “Izulu liyisihlalo sami sobukhosi, lomhlaba uyisenabelo sezinyawo zami. Ingaphi indlu elizangakhela yona na? Indawo yami yokuphumula izakuba ngaphi na? Isandla sami kasizenzanga lezizinto ukuze zibe khona na?” kutsho uJehova. “Engimbukayo ngulo: lowo othobekileyo ozisolayo emoyeni, olesabayo ilizwi lami.

Kodwa uJehova unguNkulunkulu oqotho; unguNkulunkulu ophilayo, iNkosi yanininini. Lapho ethukuthele, umhlaba uyagedezela; izizwe azingeke zimelane lolaka lwakhe. “Batshele lokhu uthi: Onkulunkulu laba, abangawenzanga amazulu lomhlaba, bazabhubha emhlabeni langaphansi kwamazulu.’ ” Kodwa uNkulunkulu wenza umhlaba ngamandla akhe; wawumisa umhlaba ngokuhlakanipha kwakhe njalo wanweba amazulu ngokuqedisisa kwakhe.

Ngamandla ami amakhulu langengalo yami eyeluliweyo ngenza umhlaba labantu bawo kanye lezinyamazana ezikuwo, njalo ngiwunika loba ngubani ngokuthanda kwami.

“Jehova Wobukhosi, wadala amazulu lomhlaba ngamandla akho amakhulu langengalo yakho eyeluliweyo. Akukho lutho olunzima kuwe.

“Wenza umhlaba ngamandla akhe; wamisa umhlaba ngokuhlakanipha kwakhe njalo wendlala lamazulu ngokuqedisisa kwakhe.

(yena owenza iSilimela loMthala, oguqula umnyama ube yikusa enze imini ibe yibusuku obumnyama, yena obiza amanzi olwandle, awathele phezu kobuso belizwe  —  uJehova yilo ibizo lakhe  —

yena owakha indlu yakhe yobukhosi ephakemeyo emazulwini njalo ubeka isisekelo sakhe phezu komhlaba, ebiza amanzi olwandle awathele phezu kobuso bomhlaba  —  uJehova yilo ibizo lakhe.

Waphendula wathi, “NgingumHebheru, ngikhonza uJehova, uNkulunkulu wasezulwini, owenza ulwandle kanye lomhlabathi.”

Ngoba umhlaba uzagcwala ngokwazi udumo lukaJehova, njengamanzi agcwalise ulwandle.

Nanti ilizwi likaJehova mayelana lo-Israyeli. UJehova owachayayo amazulu, obeka isisekelo somhlaba, njalo owenza umphefumulo womuntu phakathi kwakhe, uthi:

Kodwa ekuqaleni kwendalo uNkulunkulu ‘wabenza indoda lomfazi.’

indodana ka-Enoshi, indodana kaSethi, indodana ka-Adamu, indodana kaNkulunkulu.

Ekuqaleni wayekhona uLizwi, uLizwi waye loNkulunkulu, njalo uLizwi wayenguNkulunkulu. Waye loNkulunkulu kwasekuqaleni. Izinto zonke zenziwa ngaye; ngaphandle kwakhe kakulalutho olukhona olwenziwayo.

Wayesemhlabeni, kodwa lanxa umhlaba wenziwa ngaye, umhlaba kawumazanga.

umphathi wedili wahubula wawanambitha amanzi ayesephendulwe aba liwayini. Kakwazanga ukuthi lavela ngaphi, kodwa izince-ku ezaziwakhile amanzi zazisazi. Wasebizela umnyeni eceleni wathi, “Wonke umuntu uletha iwayini elimnandi kuqala, kuthi nxa izethekeli sezinathe kakhulu kube yikhona ekhupha elibi; kodwa wena ugodle elimnandi kuze kube khathesi.”

“ ‘Izulu liyisihlalo sami sobukhosi, umhlaba uyisenabelo sami. Lizangakhela ndlu bani? kutsho iNkosi. Kumbe izaba ngaphi indawo yami yokuphumula na?

“Madoda, likwenzelani lokhu? Lathi singabantu njengani. Sililethela izindaba ezinhle, silitshela ukuthi litshiye izinto lezi ezingasulutho liye kuNkulunkulu ophilayo owenza izulu, lomhlaba, lolwandle lakho konke okukulezo zindawo.

“UNkulunkulu owenza umhlaba lakho konke okukuwo uyiNkosi yezulu lomhlaba, njalo kahlali emathempelini akhiwe ngezandla. Njalo kancediswa yizandla zabantu, ingathi kukhona akuswelayo, ngokuba yena ngokwakhe upha bonke abantu impilo lomphefumulo lokunye konke. Ngomuntu oyedwa wenza zonke izizwe zabantu, ukuthi zakhe emhlabeni wonke; njalo wamisa izikhathi abazilungiselweyo lazo kanye izindawo abamele bahlale kuzo. UNkulunkulu wakwenza lokhu ukuze abantu bamdinge lokuthi mhlawumbe bamfinyelele bamfumane, loba nje uvele engakhatshana komunye lomunye wethu. ‘Ngokuba siphila kuye, sihambe silalame.’ Njengokutsho kwezinye izimbongi zakini ukuthi, ‘Singabantwabakhe.’

Ngoba kusukela ekudalweni komhlaba isimo sikaNkulunkulu esingabonakaliyo  —  amandla akhe angapheliyo kanye lobuNkulunkulu bakhe  —  sekubonakele ngokusobala, kuzwisiseka ngokwenziweyo, ukuze abantu bangabi lasizatho sokuzigeza.

Njengoba kulotshiwe ukuthi: “Sengikwenze waba nguyise wezizwe ezinengi.” Ungubaba emehlweni kaNkulunkulu, akholwa kuye  —  uNkulunkulu onika abafileyo ukuphila abize izinto ezingekho kungathi zikhona.

Ngakho-ke njengalokhu isono sangena emhlabeni ngomuntu oyedwa, lokufa ngesono, njalo ngale indlela ukufa kwafika ebantwini bonke, ngoba bonke benze isono  —

Indalo ilindile ngokuthakazelela okukhulu ukuba amadodana kaNkulunkulu abonakaliswe. Ngoba indalo ihlezi ihlukuluzekile njalo, kungasintando yayo, kodwa kungentando yalowo oyihlukuluzayo, ngethemba lokuthi indalo yona ngokwayo izakhululwa ebugqilini bokonakala ilethwe kunkululeko elenkazimulo yabantwana bakaNkulunkulu. Siyakwazi ukuthi indalo yonke ibubula njengaye osebuhlungwini bokuhelelwa kuze kube khathesi.

Ngoba izinto zonke zivela kuye langaye njalo futhi zikuye. Udumo kalube kuye nini lanini! Ameni.

kodwa kithi kuloNkulunkulu oyedwa kuphela, uYise, okwavela kuye izinto zonke njalo okunguye esimphilelayo; njalo kuleNkosi eyodwa kuphela, uJesu Khristu, ozinto zonke zeza ngaye njalo esiphila ngaye.

Kodwa uNkulunkulu uyinika umzimba njengokuthanda kwakhe, njalo uhlobo ngalunye lwenhlanyelo ulunika umzimba walo. Inyama yonke kayifanani: Abantu balohlobo lunye lwenyama, izinyamazana zilolunye, izinyoni olunye lezinhlanzi olunye.

Ngakho kulotshiwe ukuthi: “Umuntu wakuqala u-Adamu waba yisidalwa esiphilayo;” kodwa u-Adamu wokucina waba ngumoya ophilisayo. Owomoya kafikanga kuqala, kodwa owemvelo, emva kwalokho kwafika owomoya. Umuntu wakuqala wayenziwe ngothuli lomhlabathi; umuntu wesibili wavela ezulwini. Njengoba wayenjalo umuntu wasemhlabeni, banjalo lalabo abangabomhlaba; njalo njengoba enjalo umuntu ovela ezulwini, banjalo labo abangabasezulwini.

Ngoba uNkulunkulu owathi, “Ukukhanya kakukhanye emnyameni,” wenza ukukhanya kwakhe kwakhanya ezinhliziyweni zethu ukuba asiphe ukukhanya kokwazi inkazimulo kaNkulunkulu ebusweni bukaKhristu.

njalo ngikubeke obala ukuphatha kwami imfihlakalo le eyayifihliwe okweminyaka eminengi eyedlulayo kuNkulunkulu, owadala izinto zonke.

Yona iyisifanekiso sikaNkulunkulu ongabonakaliyo, izibulo kukho konke okwadalwayo. Ngoba izinto zonke zadalwa ngayo: izinto ezisezulwini lezisemhlabeni, ezibonakalayo lezingabonakaliyo, loba kuyizihlalo zobukhosi kumbe amandla loba ababusi kumbe abaphathi; izinto zonke zadalwa ngayo zidalelwa yona. Yona iphambi kwezinto zonke, njalo kuyo izinto zonke zibambene.

kodwa ngalezizinsuku zokucina ukhulume kithi ngeNdodana yakhe, ayibeka ukuba yindlalifa yezinto zonke, yona adala ngayo izulu lomhlaba. INdodana iyikubenyezela kwenkazimulo kaNkulunkulu kanye lesifanekiso uqobo sokuba nguye kwakhe, iqinisa izinto zonke ngelizwi layo elilamandla. Emva kokuba isidlinzekele ukuhlanjululwa kwezono, yahlala phansi ngakwesokudla sobuKhosi ezulwini.

Njalo uthi, “Ekuqaleni, O Nkosi, wabeka isisekelo somhlaba, lamazulu angumsebenzi wezandla zakho.

Ngoba yileyo laleyo indlu yakhiwa ngumuntu othize, kodwa uNkulunkulu ungumakhi wezinto zonke.

Ngokukholwa siyezwisisa ukuthi izulu lomhlaba kwadalwa ngokulaya kukaNkulunkulu, ukuze kuthi okubonakalayo kakwenziwanga ngalokho okwakubonakala.

Kuqala, kumele liqedisise ukuthi ngezinsuku zokucina kuzafika abaklolodayo baklolode belandela izinkanuko zabo ezimbi. Bazakuthi, “Kungaphi ‘ukuza’ lokhu akuthembisayo? Selokhu obaba bafayo, konke kuqhubeka njengokwakuvele kusenzakala kusukela ekuqaleni kokudaliweyo.” Kodwa bakhohlwa ngabomu ukuthi endulo ngelizwi likaNkulunkulu amazulu aba khona lomhlaba wavela emanzini njalo ngamanzi. Ngamanzi futhi umhlaba wakulezozinsuku wakhukhulwa wachitheka. Ngalonalelolizwi amazulu akhathesi kanye lomhlaba kugcinelwe umlilo, kulindele usuku lokwahlulela lokubhujiswa kwabantu abangamesabiyo uNkulunkulu. Kodwa, bangane abathandekayo, lingakhohlwa into le eyodwa ukuthi: ENkosini usuku lunjengeminyaka eyinkulungwane, leminyaka eyinkulungwane injengosuku olulodwa.

“Ufanele, Nkosi yethu loNkulunkulu wethu, ukwamukela udumo lenhlonipho kanye lamandla, ngoba wena wadala izinto zonke, njalo zadalwa ngentando yakho njalo zilabo ubukhona bazo.”

Yafunga ngaye ophilayo kuze kube nini lanini, owadala amazulu lakho konke okukuwo, lomhlaba lakho konke okukuwo, lolwandle lakho konke okukulo, yathi, “Kakusayikuba khona ukuphuza futhi!

Ngabuya ngabona enye ingilosi indiza emoyeni, ilevangeli elingapheliyo ukuba ilitshumayele kulabo abahlezi emhlabeni  —  lasezizweni zonke, lasezizwaneni, lasezindimini kanye lasebantwini. Ngelizwi elikhulu yathi, “Mesabeni uNkulunkulu limdumise, ngoba isikhathi sokwahlulela kwakhe sesifikile. Mkhonzeni yena owadala amazulu, lomhlaba, lolwandle kanye lemithombo yamanzi.”